ಜುದಾಸ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆಮಿ ಕಾಂಯ್ ಆಮ್ಚಿಂ ವಾಟ್ ಚುಕ್ಲ್ಯಾಂವ್? ಹ್ಯಾ ಮ್ಹಜ್ಯಾ ಸವಾಲಾಂತ್ ಅರ್ಥ್ ಯಾ ತೀರ್ಳ್ ನಾ? ಹೆಂ ಮಾತ್ರ್ ಸತ್ - ಜುದಾಸ್ ನಾತ್‌ಲ್ಲೊ ತರ್ ಜೆಜುಕ್ ಧರುಂಕ್ ಜಾತೆಂ? ಧರುಂಕ್ ನಾತ್‌ಲ್ಲೆಂ ತರ್, ಹಾಂವ್, ತೊ, ತೆಂ ಆನಿ ಆಮಿಂ ಸಾಲ್ವಾರ್ ಜಾತ್ಯಾಂವ್?

Placeholder: the original page gave this picture no description, and none has been written yet. It came from daaiz\daaiz\column\sv\sv13.asp.

ಸತಾಂತ್ಲಿಂ ವಿಚಿತ್ರಾಂ - 13. ಜುದಾಸ್

ಜೆಮ್ಮಾ ಪಡೀಲ್

ದೆವಾ ತುಂವೆಂ ಸಂಸಾರ್ ರಚ್ಲೊಯ್ ತರೀ ಕಸೊ? 6 ದೀಸ್ ಕಸ್ಟ್ ಕಾಡ್ನ್ ಸಾತ್ವ್ಯಾ ದಿಸಾ ಆರಾಮ್ ಕೆಲೊಯ್. ತುಂವೆಂ ಕಸ್ಟಾಂನಿ ಸಂಸಾರ್ ರಚ್ತಾನಾ ಸರ್ವ್ ದಿಲೆಂಯ್ - ಬರ್‍ಯಾಂಕ್ ಆನಿ ಪಾಡ್ ಮನ್ಶ್ಯಾಂಕ್. ಸಾಂತಾಂಕ್ ಆನಿ ಖುನಿಗಾರಾಂಕ್. ರಡ್ಕುರ್‍ಯಾಂಕ್ ತಸೆಂ ಹಾಸ್ಕುರ್‍ಯಾಂಕ್. ಕಾಸಪ್ಪ್ಯಾಂಕ್ ಆನಿ ಧರ್ಮಿಷ್ಟಾಂಕ್. ನಿತಳ್ ಕಾಳ್ಜಾಂಚ್ಯಾಂಕ್ ಆನಿ ದುಷ್ಟ್ಯಾಂಕ್. ಮೊಸ್ರ್ಯಾಂಕ್ ಆನಿ ಬರ್‍ಯಾ ಮನಾಚ್ಯಾಂಕ್. ಸರ್ವಾಂಕ್ ತುಂವೆಂ ರಚ್ಲೆಂಯ್.

ತೊ, ನಸ್ಟೊ ಯಾ ಪಾಡಾರಿ ಮ್ಹಣ್ ತಾಚ್ಯಾ ವಯ್ರ್ ಮೊಳಾಬ್ ಲಿಪಂವ್ಕ್‌ನಾಂಯ್. ಬರ್‍ಯಾ ಮನ್ಶ್ಯಾಕ್ ತಕ್ಲೆಕ್ ವೋತ್ ಲಾಗ್ತಾ ಮ್ಹಣ್ ತಾಚ್ಯಾ ತಕ್ಲೆ ವಯ್ಲ್ಯಾ ಸುರ್ಯಾಚಿ ಧಾವ್ ಲಾಗ್ತಾ ಮ್ಹಣ್ ತಾಚ್ಯಾ ತಕ್ಲೆ ವಯ್ಲ್ಯಾ ಸುರ್ಯಾಚಿ ಧಾವ್ ಲಾಗಾನಾತ್‌ಲ್ಲ್ಯಾಬರಿ ಕರುಂಕ್ ನಾಂಯ್. ತೊ ಬರೊ ಮನಿಸ್ ಮ್ಹಣ್ ತಾಂಣೆಂ ಆಪಡ್ಲೆಲೆಂ ಭಾಂಗಾರ್ ಯಾ ರುಪೆಂ ಜೀವನಾಂತ್ ಆನಂದ್, ವಾವ್ರಾಂತ್ ಧಾದೊಸ್ಕಾಯ್, ಕುಟ್ಮಾಂತ್ ಶಾಂತಿ ಆನಿ ರಗ್ಳೆವಿಣೆಂ: ಜೀವನ್ ತಸಲೆಂ ಕಾಂಯ್ ತುಂವೆಂ ಬರ್‍ಯಾ ಮನ್ಶ್ಯಾಕ್ ಕರುಂಕ್ ನಾಂಯ್ ತರ್ ಹೊ ತಫಾವತ್ ಕಿತ್ಯಾಕ್? ಸರ್ವಾಂಕ್ ತಾಕಾ ತಾಕಾ ಲಗ್ತಿಂ ಜಾಲ್ಲಿಂ ತಾಲೆಂತಾಂ, ದೆಣಿಂ ಯಾ ಚುಕಿಕ್ ದಿಲ್ಯಾಂಯ್ ಆಸ್ತಾಂ ಹಾಂವೆಂ ಯಾ ತಾಂಣಿಂ ಬರೆಂ ಯಾ ಪಾಡ್ ದಿಲ್ಲ್ಯಾ ತುಕಾ ಕಿತೆಂ ಮ್ಹಣ್ ಸಾಂಗೊಂ?

ಹಾಂವೆಂ ಬರೆಂ ಕೆಲ್ಲ್ಯಾಕ್ ತುಂವೆಂ ಹ್ಯಾ ಸಂಸಾರಾಂತ್ ಸಂತೊಸ್ ದೀಂವ್ಕ್ ನಾಂಯ್. ಎಕಾ ಲೆಕಾಕ್ ಪಳೆತಾನಾ ಹ್ಯಾ ತುಜ್ಯಾ ಸಂಸಾರಾಂತ್ ಪಾಡ್ ಕಾಮಾಂ ಕೆಲ್ಯಾರ್ "ಬರೆಂ" ಮ್ಹಣ್ ಭಗ್ತಾ. ಕಾಂಯ್ ಕಸ್ಟ್ ನಾಸ್ತಾಂ "ಸಂತೊಸಾನ್" ದೀಸ್ ಕಾಡ್ಯೆತ್. ಮೆಲ್ಲ್ಯಾ ಉಪ್ರಾಂತ್ ಉಪ್ರಾಂತ್ಲಿ ಗಜಾಲ್. ಸರ್ಗ್, ಯೆಮ್ಕೊಂಡ್ ಆನಿ ಲಿಂಬ್ ಇತ್ಯಾದಿ. ಹೆಂ ಕೊಣೆಂ ಪಳೆಲಾಂ? ಸಾಂಗ್ಲಲೆಂ ಪಾತ್ಯೆಂವ್ಚೆಂ ನ್ಹಂಯ್‌ವೆ? ಹೊ ಸಂಸಾರ್ ವೈಗ್ಯಾನಿಕ್ ಸಂಸಾರ್. ಹರ್ಯೆಕಾಕ್ ಏಕ್ ರೀತ್ ಆಸಾ; ಕಾರಾಣ್ ಆಸಾ. ಸಾಂಗ್ಲೆಲೆಂ ಪಾತ್ಯೆಂವ್ಚೆಂ ದೀಸ್ ಗೆಲೆ. ಹರ್ಯೆಕಾಕ್ ಸೂತ್ರಾಂ ಆಸಾತ್. ತುಂವೆಂ ರಚ್‌ಲ್ಲೊ ಹೊ ಸಂಸಾರ್ ಕಸೊ ಉಭೊ ಜಾಲ್ಲೊ ತೆಂ ವಿಗ್ಯಾನ್ ಸಾಂಗ್ತಾನಾ ಹಾಂವ್ ಕಿತೆಂ ಸಾಂಗೊಂ ಸೊಮಿಯಾಂ?. ವರ್ಸಾಕ್ ಏಕ್ ಪಾವ್ಟಿಂ ಪಾಸ್ಕ್. ಪಾಸ್ಕಾಂ ಪಯ್ಲೆಂ ಪಾಶಾಂವ್. ಹ್ಯಾ ಪಾಸ್ಕಾಂ ವೆಳಾರ್, ತುಂ ಕುಡಿ ಆತ್ಮ್ಯಾ ಸಮೇತ್ ಪುನರ್ ಜೀವಂತ್ ಜಾಲೊಯ್. ತಾಚ್ಯಾ ಪಯ್ಲೆಂ ಜುದಾಸಾನ್ ತುಕಾ ವಿಕ್ರಿತ್ ಕೆಲ್ಲ್ಯಾನ್ ತುಕಾ ಖುರ್ಸಾರ್ ಮೊರೊಂಕ್ ಕಾರಾಣ್ ಜಾಲೆಂ ತರ್, ಹೊ ಜುದಾಸ್ ’ಪಾಡ್’ ಕಸೊ ಸೊಮಿಯಾಂ?

ತುಂ ಹ್ಯಾ ಸಂಸಾರಾಂತ್ ಆಯಿಲ್ಲೊಯ್ ಆಮ್ಕಾಂ ಸಾಲ್ವಾರ್ ಕರುಂಕ್. ಸಾಲ್ವಾರ್ ಕರುಂಕ್ ತುಂವೆಂ ಖುರ್ಸಾರ್ ಮೊರಾಜಯ್ ತರ್, ತುಕಾ ಪರಾಧೀನ್ ಕೆಲ್ಲ್ಯಾ, 30 ನಾಣ್ಯಾಂ ಖಾತಿರ್ ವಿಕ್ರೀತ್ ಕೆಲ್ಲ್ಯಾ ಜುದಾಸಾಕ್ ಆಮಿಂ "ಹ್ಯಾ" ಥರಾನ್ ದುಷ್ಟೊ ಮ್ಹಣ್ ಲೆಕ್ಚೆಂ ಕಸಲ್ಯಾಕ್ ಸೊಮಿಯಾಂ? ಜಸೆಂ ತಾಂತಿಂ ಆನಿ ಕೊಂಬೊ ನಾಸ್ತಾಂ ಪೀಲ್ ನಾ ತಸೆಂ ಜುದಾಸ್ ನಾತ್‌ಲ್ಲೊ ತರ್ ಆಮ್ಚಿ ಸೊಡ್ವಣ್ ಜಾತಿ? ಹ್ಯಾ ಜುದಾಸಾಕ್ ಆಮಿಂ ’ಬರೊ’ ಲೆಕ್ಚ್ಯಾ ಬದ್ಲಾಕ್ ದರಾಬಸ್ತ್ ಖೆಬ್ಡಾಯೊ, ಪಾತ್ಕಿ, ನಶ್ಟೊ, ಘಾತ್ಕಿ ತಸಲ್ಯಾ ನಾಂವಾಂನಿ ಉಲಂವ್ಚೆಂ ತಾಚ್ಯಾ ವಿಷಯ್ ಪಾಡ್ ಸಾಂಗ್ಚೆಂ ಸಮಾ?

ತುಂವೆಂ ರಚ್‌ಲ್ಲೊ ಮನಿಸ್ ಹ್ಯಾ ಸಂಸಾರಾಂತ್ ತುಂವೆಂ ಯೋಜನ್ ಕೆಲ್ಲ್ಯಾ ಕಾಮಾಕ್ ಹ್ಯಾ ಸಂಸಾರಾಂತ್ ಲಿಪ್ತಾ. ಹಾಂವ್ ಹಿಟ್ಲರ್ ವಿಶ್ಯಾಂತ್ ಉಲಯ್ನಾಂ, ತಾಣೆಂ ಕರೆಡಾಂನಿ ಜುದೆವಾಂಕ್ ಲಗಾಡ್ ಕಾಡ್ಲಾಂ. ಹಾಂವ್ ಚೆಂಗೀಸ್ ಖಾನಾ ವಿಶ್ಯಾಂತ್ ಯಾ ದುಸ್ರ್ಯಾ ರಾಯಾಂ ವಿಶ್ಯಾಂತ್ ಉಲಯ್ನಾ - ತಾಣೆಂ ರಾಜ್ ಭಿತರ್ ಘಾಲ್ತಾನಾ, ಲೊಕಾಚೊ ಸಂಸಾರ್ ಕೆಲಾಂ. ತಾಂಕಾಂ ಗಂಗಾಗತಿಕ್ ಪಾಯ್ಲಾಂ. ತಾಂಕಾಂ ನಿರಾಶ್ರಿತ್ ಕೆಲಾಂ.

ಪುಣ್ ಜುದಾಸಾನ್ ಕೆಲ್ಲೆಂ ಕಾಮ್ ವಾಯ್ಟ್ ತರ್, ತಾಣೆಂ ’ಬರೆಂ’ ಕರುಂಕ್ ವಚೊನ್ ತುಕಾ ವಿಕ್ರಿತ್ ಕರುಂಕ್ ನಾತ್ಲಲೊ ತರ್ ಕಿತೆಂ ಜಾತೆಂ?

ಹ್ಯಾ ವಿಷಯಿಂ ತುಂ ಮ್ಹಾಕಾ ತಿಳ್ಸಿತಾಯ್‌ಗಿ?

ಆಮಿಂ ಸರ್ವ್ ಪಾತ್ಕಿ. ಆಮ್ಚೆ ಮಧೆಂ ಸರ್ವ್ ಥರಾಂಚೆ ಮನಿಸ್ ಆಸಾತ್, ತುಂವೆಂ ಆಮ್ಕಾಂ ದಿಲಾಂಯ್ ಹಾಂವೆಂ ಜರ್‌ತರ್ ವಾಯ್ಟ್ ಕರುನ್ ದುಸ್ರ್ಯಾಂಕ್ ’ಬರೊ’ ಕರುಂಕ್ ಜಾತಾ ತರ್, ಜುದಾಸ್ ಕಸೊ ಪಾಡ್ ಮನಿಸ್ ಮ್ಹಣ್ ಲೆಕ್ಚೆಂ. ತಾಣೆಂ ತುಕಾ ವಿಕ್ರಿತ್ ಕೆಲ್ಲ್ಯಾನ್ ತುಜೆಂ "ಮಿಸಾಂವ್" ಸಂಪ್ಲೆಂ. ನಾಂತರ್, ತುಂವೆಂ ಅನ್ಯೇಕ್ಲ್ಯಾಕ್ ತಯಾರ್ ಕರಿಜಾಯ್ ಆಸ್ತೆಂ.

ದೆವಾ.. ದೆವಾ.. ತಕ್ಲಿ ಘುಂವ್ತಾ. ಇತ್ಲ್ಯಾ ವರ್ಸಾಂನಿ ತ್ಯಾ ಪಾಪ್ ಜುದಾಸಾಕ್ ಆಮಿಂ "ಇತ್ಲ್ಯಾ" ವಾಯ್ಟ್ ಥರಾನ್ ದೆಖ್ಲೆಂ. ತಾಣೆಂ ಕೆಲ್ಲ್ಯಾ ಕೃತ್ಯಾಚಿ "ಅನ್ಯೇಕ್" ಕೂಸ್ ಆಮ್ಚ್ಯಾ ಮನ್ಶ್ಯಾಂನಿ. ಕಿತ್ಯಾಕ್ ಪಳೆಂವ್ಕ್ ನಾ?. ಆಮಿ ತುಕಾ ಮೊರ್ನಾಚೆಂ ಫರ್ಮಾಣ್ ದಿಲ್ಲ್ಯಾ, ತುಕಾ ಖುರಿಸ್ ವಾವಂವ್ಕ್ ಕಾರಣ್ ಕೆಲ್ಲ್ಯಾ ತ್ಯಾ ಸರ್ವ್ ಫುಡಾರ್‍ಯಾಂಕ್ ತುಂವೆಂ "ತಶೆಂ" ಕರುಂಕ್ ಸೊಡುಂಕ್ ನಾತ್‌ಲ್ಲೆಂಯ್ ತರ್ ಕಿತೆಂ ಜಾತೆಂ?

ತಾಂತಿಂ ಯಾ ಕೊಂಬೊ ನಾಸ್ತಾಂ ಪೀಲ್ ಕಶೆಂ ಯೆಂವ್ಚೆಂ ಸೊಮಿಯಾಂ?

ತುಂವೆಂ ಮ್ಹಾಕಾ ಕೂಡ್ ದಿಲಿಯ್. ತಕ್ಲೆ ಭಿತರ್ ಮೆಂದು ದೀವ್ನ್ ಥಂಯ್ ಗಿನ್ಯಾನ್ ದಿಲೆಂಯ್. ಹೆಂ ’ಗಿನ್ಯಾನ್’ ಮ್ಹಳ್ಳೊ ’ಕಿಡೊ’ ಭಾರೀ ಮಾರೆಕಾರ್ ಧನಿಯಾಂ. ಮತಿಂತ್ ಉದೆಲ್ಲ್ಯಾ ಸವಾಲಾಂಕ್ ಜವಾಬಿ ದೀಂವ್ಕ್ ಹಾಂಗಾ ಕೊಣ್ಣೀಂ ತಯಾರ್ ನಾಂತ್. ಆದಿಂ ಥಾವ್ನ್ ಪಾತ್ಯೆಲ್ಲೆ ಆಮಿ ಮುಖಾರೀ ಪಾತ್ಯೆಂವ್ಕ್ ಗೆಲ್ಯಾರ್, ಹೆಂ ತುಂವೆಂ ದಿಲ್ಲ್ಯಾ ಮೆಂದ್ವಾಂತ್ಲೊ ’ಗಿನ್ಯಾನ್’ ಕಿತ್ಯಾಕ್?

ಮ್ಹಾಕಾ ಸವಾಲ್ ತುಕಾ ಕರ್ಚೆಂ. ತುವೆಂ ಆಮ್ಕಾಂ ಸಾಲ್ವಾರ್ ಕೆಲ್ಲೊಯ್. ತುಂವೆಂ ಖುರಿಸ್ ವಾವಯ್ಲೊಯ್. ತುಂವೆಂ ರಗಾತ್ ಘಾಮೆಲ್ಲೊಯ್. ಹೆಂ ಪುರಾ ತಯಾರಿ ಯಾ ’Process’ ನಾತ್‌ಲ್ಲೆಂ ತರ್ ತುಕಾ ತುಜೆಂ "ಮಿಸಾಂವ್" ವರ್ತೆಂ ಜಾತೆಂ?

ವೇಳ್ ಬದಲ್ಲಾ. ಸಂಸಾರ್ ಬದಲ್ಲಾ. ಪುಣ್ ಥೊಡೆ ವಿಚಾರ್, ಮೂಳ್ ಸಂಗ್ತಿಂ ಬದ್ಲೊಂಕ್ ನಾಂತ್. ಹೆಂ ಕಿತ್ಯಾಕ್ ಸೊಮಿಯಾಂ?

ದಾಕ್ತೆರ್ ಮನ್ಶ್ಯಾಕ್ ತಪಾಸ್ಣಿಂ ಕರಿನಾಸ್ತಾಂ, ದುಸ್ರ್ಯಾಂಚೆರ್ ಪ್ರಯೋಗ್ ಕರಿನಾಸ್ತಾಂ ಯಶಸ್ವಿ ಜಾಯ್ನಾಂತ್. ಹೆಂ ಏಕ್ ಸತ್. ಹ್ಯಾ ಪ್ರಯೋಗಾಂತ್ ಮನಿಸ್ ಮೊರೊಂಕ್ ಪುರೊ. ತಸಲ್ಯಾ ದಾಕ್ತೆರಾಕ್ ಆಮಿಂ ಸಲಾಮ್ ಕರ್ತಾಂವ್. ಮೆಲ್ಲ್ಯಾ ಮನ್ಶ್ಯಾಂ ವಿಶ್ಯಾಂತ್ ಉಲಂವ್ಚೆಂ ಉಣೆಂ.

ಹಾಂವೆಂ ತುಕಾ ಕೆಲ್ಲೆಂ ಸವಾಲ್ ಬರಂವ್ಕ್ ಮ್ಹಾಕಾ ಬರೆಂ ಲಾಗಾನಾ. ಕಿತೆಂ ಕರುಂ? 2000 ವರ್ಸಾಚೆಂ ಸವಾಲಾಕ್ ಜವಾಬ್ ಮೆಳೊಂಕ್ ವರ್ಸಾಂ ಯೆತೆಲಿಂ ತೆಂ ಖಂಡಿತ್.

ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12

ದಾಯ್ಜ್ ಪಾನಾಕ್

[ಮಿಕ್‌ಮ್ಯಾಕ್ಸ್]

[8. ವಲ್ಲಿ]

[7. ಮಾನೆಸ್ತ್]