ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 57. ತುಂ ಮ್ಹಾಕಾ ವಿಸರ್
ಜಿಯೋ ಆಗ್ರಾರ್: ಕೊಂಕ್ಣೆಂತ್ ನಾಟಕಿಸ್ತ್, ಚಿಂತ್ಪಿ, ವಿಮರ್ಶಕ್ ಜಾವ್ನ್ ಕಾಣ್ಯೆಗಾರ್ ಜಾಲ್ಲೆ ಭೋವ್ ಥೊಡೆ, ತಾಂತ್ಲೊ ಎಕ್ಲೊ ಜಿಯೋ ಆಗ್ರಾರ್. ಸಾಮಾಜಿಕ್ ಹುಸ್ಕೊ, ಅಪ್ಲ್ಯಾ ಕಾಣ್ಯಾಂನಿ ಪಿಂತ್ರಾಂವ್ಚೊ ಹೊ ಏಕ್ ಪ್ರಭುದ್ದ್ ಚಿಂತ್ಪಿ. ಉಲವ್ಣ್ಯಾಂತ್ ಶೀದಾ-ಕಡಕ್ಕ್ ತಸೊ ಕಾಳ್ಜಾಂತ್ ತಿತ್ಲೊಚ್ ಪ್ರಾಮಾಣಿಕ್ ಆನಿ ಮೊವಾಳ್ ವೆಕ್ತಿತ್ವಾಚೊ ಕವಿ.
ಜಿಯೋ, ಆಗ್ರಾರ್
ತಿ ಖಂಚಿ ಘಡಿಗೀ ಕಸಲೊ ಸಂದರ್ಭ್ಗೀ.... ತರ್ನಾಟ್ಪನಾಚೆ ಉಮಾಳೆ ಭರ್ಲ್ಲೆ ಪಮ್ಮುಚೆ ದೊಳೆ ಆಚಾನಕ್ ಪ್ರವೀಣಾಚ್ಯಾ ದೊಳ್ಯಾಂಕ್ ಭೆಟ್ಲೆ. ಮೊಗಾ ಕಿಟಾಳಾಂ ಆಶಾರ್ ಪಾಶಾರ್ ಜಾಲಿಂ. ಬಸ್ಲ್ಲೆ ಬಸ್ಕೆ ಭಂವ್ತಿಂ ಭೃಹ್ಮಾಂಡಾಂತ್ಲೆಂ ಸುಖ್ ವೊಂದಾಲ್ಲೆಪರಿ ಭೊಗ್ಲೆಂ ತಾಕಾಂ.
ತಿಂ ಮೊಗಾರ್ ಪಡ್ತಾತ್..... ಪಡ್ಲಿಂಚ್........
ನಾ ಕೊಣಾಚಿಯ್ ಕಬ್ಲಾತ್, ಯಾ ಕೊಣಾಚಿಯ್ ಪರ್ನಣ್ಗಿ. ನಾ ಕೊಣಾಚೆಂಯ್ ಮಾರ್ಗದರ್ಶನ್ ಯಾ ಆದೇಶ್. ನಾಕೊಣಾಚೆಂಯ್ ಲಿಸಾಂವ್ ಯಾ ಬೆಸಾಂವ್. ತೆಂ ಆನಿ ತೊ ಏಕ್ ಸಂಪೂರ್ಣ್ ಥರಾಚೊ ನಿರ್ದಾರ್ ಘೆತಾತ್. ಪುಡ್ಲಿಂ ದೋನ್ ವರ್ಸಾಂ ಶಿಕಾಪ್, ಲಿಸಾಂವ್, ಪರಿಕ್ಶಾ ಮಧೆಂ ಪಮ್ಮು-ಪ್ರವೀಣ್ ಮೊಗಾ ದರ್ಯಾಂತ್ ಹೊಡೆಂ ಬಾಂದುಕ್ ಆಯ್ತಿಂ ಜಾತಾತ್.
ಪಮ್ಮು ಗ್ರೇಸ್ತ್ ಕುಟ್ಮಾಂತ್ಲಿ ಚಲಿ. ಪ್ರವೀಣಾ ವಿಶಿಂ ಆಯ್ಕಾಲ್ಲೆಂಚ್ ಸರ್ವ್ ಕುಟ್ಮಾದಾರಾಂ ಖುಬಾಳ್ತಾತ್. ಪಮ್ಮುಕ್ ಸಬಾರ್ ರಿತಿನ್ ಚಿತಾವ್ಣಿ ದಿತಾತ್. ತರೀ ಪಮ್ಮುಚೊ ನಿರ್ದಾರ್ ಥಿರ್ ಆಸ್ತಾ.
ಪ್ರವೀಣಾಚೊ ಏಕ್ ಲ್ಹಾನ್ ಸಮಸ್ಸೊ. ತಾಕಾ ಉಲಯ್ತಾನಾ ಗಾಗ್ ಯೆತಾ. ಹ್ಯಾ ಖಾತಿರ್ ಕೊಣಾಯ್ಲಾಗಿಂ ತೋಂಡ್ ಉಗ್ತೆಂ ಕರುಂಕ್ ಭಿಯೆತಾ. ಹ್ಯಾಚ್ ಖಾತಿರ್ ಪಮ್ಮು ಆನಿ ಪ್ರವೀಣ್ ಸಭಾರ್ ಪಾವ್ಟಿಂ ಝಗ್ಡಾಲ್ಲಿಂ, ದೊನೀ ಕುಟ್ಮಾಂ ಥಂಯ್ ಅಸಮಾದಾನ್ ವಾಡ್ಲ್ಲೆಂ.
ಪ್ರವೀಣ್ಯ್ ಕಾಂಯ್ ದುಬ್ಳ್ಯಾ ಕುಟ್ಮಾಂತ್ಲೊ ನ್ಹಂಯ್ ತರ್ಯೀ ತೊ ತಾಚೊ ಸಮಸ್ಸೊ ತಾಕಾ ದುಬ್ಳೊ ಕರುನ್ ಸೊಡ್ತಾಲೊ.
ಪೂಣ್ ದೊಗಾಂಯ್ ಮಧೆಂ ಖತ್ಕತೊ ಮೋಗ್, ನಿತಳ್ ಚಿಂತಾಪ್, ಹಾಲಾನಾತ್ಲ್ಲೊ ವಿಶ್ವಾಸ್, ಎಕಾಮೆಕಾಕ್ ಸಮ್ಜೊಂಚಿಂ ಶಾಣೆ ಪಣ್ ಧಾರಾಳ್ ಆಸ್ಲ್ಲೆಂ. "ತುಂ ಮ್ಹಾಜೊ ಕಿತ್ಲೊ ಮೋಗ್ ಕರ್ತಾಯ್ ಪ್ರವೀಣ್?"
ಪಮ್ಮುಚಾ ಸವಾಲಾಕ್ ಪ್ರವೀಣ್ "ಹಾ.....ಹಾಂ...." ಮ್ಹಣ್ ಉತ್ರಾಂಕ್ ಚಡ್ಪಡ್ತಾನಾ ಪಮ್ಮು ಖರೆಂಚ್ ರಾಗಾನ್ ಖಡ್ಕಡ್ತಾಲೆಂ. ಪೂಣ್ ಪ್ರವೀಣ್ ಸಗ್ಳೆಂ ಶಾಂತ್ ರಿತಿನ್ ಸೊಸ್ತಾಲೊ.
"ತುಂ ಮ್ಹಜೆಲಾಗಿಂ ಕಾಜಾರ್ ಜಾತಾಯ್?" ಪ್ರವೀಣಾಣ್ ಪಮ್ಮುಕ್ ಪ್ರೊಪೋಸ್ ಕರ್ನ್ ಜಾಲ್ಲೆಂ
ಡಿಗ್ರಿ ಸಂಪ್ಲಿ. ದೊಗಾಂಯ್ ಉಂಚ್ಲೆ ರಿತಿನ್ ಯಶಸ್ವಿ ಜಾಲ್ಲಿಂ. ಆಪ್ಲ್ಯಾ ಉತ್ರಾಂಕ್ ಫಾವೊತೆಂ ಸುದ್ರಾಪ್ ಹಾಡುಂಕ್ ಪ್ರವೀಣಾಣ್ ದೋನ್ ವರ್ಸಾಂ ಖಾತಿರ್ ಪರ್ಗಾಂವಾಂತ್ ಚಿಕಿತ್ಸಾ ಘೆಂವ್ಕ್ ನಿರ್ದಾರ್ ಕೆಲೊ. ಪಮ್ಮುಗೆರ್ ವ್ಹಡಿಲಾಂಕ್ ಧಾಡುನ್, ಸಮ್ಜವ್ನ್ ಜಾಲೆಂ. ವೆಚೆ ಆದಿಂ ಎಕಾಮೆಕಾಚ್ಯಾ ಕುಟ್ಮಾಲಾಗಿಂ ಕಶೆಂಯ್ ಖರಾರ್ ಜಾಲೆಂ. ಪಮ್ಮು ಪ್ರವೀಣಾಚ್ಯಾ ಸಂತೊಸಾಕ್ ಗಡ್ ನಾತ್ಲ್ಲಿ.
ಪಮ್ಮು ಗಾವಾಂತ್ಚ್ ಎಕಾ ಬ್ಯಾಂಕಾಂತ್ ವಾವ್ರಾಕ್ ಲಾಗ್ಲೆಂ. ಪ್ರವೀಣ್ ಪರ್ಗಾಂವಾಂತ್ ಉಲವ್ಪಾಚೆರ್ ತರ್ಬೆತಿ ಜೊಡುಂಕ್ ಪ್ರಯಾತ್ನ್ ಕರ್ತಾಲೊ. ಆತಾಂ ಮೋಗ್ ಪೊನಾದ್ವಾರಿಂ, ಮೊಬಾಯ್ಲಾದ್ವಾರಿಂ, ಇ-ಮೇಯ್ಲಾಂನಿ ಆಶಾರ್ ಪಾಶಾರ್ ಜಾಲೊ. ಕಠೀಣ್ ಉಭ್ದೆಸ್ ಭೊಗ್ಲೆ ತರ್ಯೀ ದೊಗಾಂಯ್ನಿ ಮೊಗಾ ಥಂಯ್ ಥಿರಾಸಣ್ ಸಾಂಬಾಳ್ಳಿ.
ದೀಸ್ ಉಭೊನ್ ಹಾಫ್ತೆ ಮಯ್ನೆಂ ಧಾಂವ್ಲೆ. ತ್ಯಾ ಎಕಾ ದಿಸಾ ಪಮ್ಮು ಕಾಮಾಕ್ ವೆತಾನಾ ರಸ್ತ್ಯಾರ್ ವೇಗಾನ್ ಆಯಿಲ್ಲೆಂ ಕಾರ್ ತಾಕಾ ಧರ್ಣಿಕ್ ಶೆವ್ಟಿಲಾಗ್ಲೆಂ. ಪಮ್ಮು ದೊಳೆ ಉಗ್ತೆ ಕರ್ತಾನಾ ತೀನ್ ದೀಸ್ ಗಳೊನ್ ಗೆಲ್ಲೆ. ಖಟ್ಲ್ಯಾ ಲಾಗಿಂ ದೊಳ್ಯಾಂತ್ ಕೊಳ್ಯಾ ತಿತ್ಲಿಂ ದುಖಾಂ ಗಳವ್ನ್ ಆವಯ್ ಹುಸ್ಕಾರ್ತಾಲಿ. ತಿಕಾ ಭುಜಂವ್ಕ್ ಪಮ್ಮು ತೋಂಡ್ ಉಗ್ತೆಂ ಕರ್ತಾನಾ... ಹಾಂ.... ತಾಳ್ಯಾಂತ್ಲ್ಯಾನ್ ಉತ್ರಾಂಚ್ ಯೇನಾಂತ್! ಪರತ್ ಪಯತ್ನ್ ಕರ್ತಾ. ನಾ... ಉತ್ರಾಂಚ್ ಸುಟಾನಾಂತ್!
ಪಮ್ಮುನ್ ತಾಚೊ ತಾಳೊ ಶಾಶ್ವತ್ ರಿತಿನ್ ಹೊಗ್ಡಾಯಿಲ್ಲೊ. ತಾಚೆ ತಕ್ಲೆಕ್ ಪಡ್ಲೆಲ್ಯಾ ಭಳಾಧೀಕ್ ಮಾರಾನ್ ಮೆಂದ್ವಾಚ್ಯಾ ಶಿರಾಂನಿ ತಾಚ್ಯಾ ಉತ್ರಾಂಕ್ ಸಾಶ್ವತ್ ಕಾತರ್ ಘಾಲ್ಲಿ. ಮೌನ್ಪಣಿ ರಡ್ಲೆಂ ತೆಂ. ಹುಸ್ಕಾರ್ನ್ ಹುಸ್ಕಾರ್ನ್ ರಡ್ಲೆಂ. ರಡ್ಣೆಂ ದುಖಾಂ ಸಾಗೊರಾಂತ್ ಖಿರೊನ್ ಗೆಲೆಂ.
ಪಾಟಿಂ ಘರಾ ಆಯಿಲ್ಲೆಂಚ್ ಪೊನಾಚೊ ಆವಾಜ್ ಮಾತ್ರ್ ಆಂಗಾಂತ್ಲಿಂ ಆಂತಾ-ಪಿಂತಾಂ ವೋಡ್ನ್ ಕಾಡ್ಚಿ ದೂಖ್ ಹಾಡಯ್ತಾಲಿ. ಕಾಳಿಜ್ ಜಿವೆಂ ಜಿವೆಂ ಮೂಟ್ ಮಾರ್ನ್ ಭಾಯ್ರ್ ವೊಡ್ತಾ ತಶೆಂ ಜಾಲಿ ಪಮ್ಮುಚಿ ಅವಸ್ತಾ. ಏಕ್ ಧೃಡ್ ನಿರ್ದಾರ್ ತೆಂ ಕರ್ತಾ. ಪ್ರವೀಣಾಕ್ ಕಾಂಯ್ಚ್ ಹ್ಯಾ ವಿಶಿಂ ಕಳೊಂಕ್ ನ್ಹಜೊ. ತಾಣೆಂ ತಾಚೆಂ ಭವಿಷ್ಯ್ ಪಾಡ್ ಕರುಂಕ್ ನ್ಹಜೊ. ತಾಚೆರ್ ಹಾವೆಂ ವೊಜೆಂ ಜಾವ್ನ್ ರಾಂವ್ಚೆಂ ಸಾರ್ಕೆಂ ನ್ಹಂಯ್. ಎಕಾ ನಿರ್ದಾರಾಕ್ ತೆಮ್ ಯೆತಾ ಆನಿ ಪ್ರವೀಣಾಕ್ ಏಕ್ ಪತ್ರ್ ಬರಯ್ತಾ.
"ಮ್ಹಾಕಾ ತುಜ್ಯೆ ಖಾತಿರ್ ರಾವೊಂಕ್ ಜಾಯ್ನಾ...... ತುಂ ವಿಸರ್ ಮ್ಹಾಕಾ"
ಪ್ರವೀಣಾಚಿ ಸ್ಥಿತಿ ಉಚಾಂಭಳ್ ಲ್ಹಾರಾಂ ಮಧೆಂ ಶಿರ್ಕಾಲ್ಲ್ಯಾ ನಾವಿಕಾ ಪರಿಂ ಜಾತಾ. ಭೊಗ್ಣಾಂ ವಾದಾಳಾಂನಿ ಆಪ್ಟೊನ್ ದಪ್ಟಾತಾ ತೊ. ತೊ ವಿರಾರಾಯೆಚ್ಯಾ ಆಗ್ಟ್ಯಾಂತ್ ಝಳ್ಳೊ.
ಪಮ್ಮುಚಿ ಆವಸ್ತಾ ಪಳವ್ನ್ ಆವಯ್ ಬಾಪಯ್ ಸಂಪೂರ್ಣ್ ಗಳ್ಳಿಂ. ಆಪ್ಲಿ ಎಕ್ಲಿಚ್ ಧುವ್ ಕುಟಾಚೆಂ ದಾಯ್ಜ್ ಹ್ಯೆ ಪರಿಂ ಕಶ್ಟೊಂಚೆಂ ಕೊಣಾಕ್ ತರ್ಯೀ ಆಂವಡ್ತಾ? ತಾಣಿಂ ಗಾಂವ್ ಸೊಡ್ನ್ ವ್ಹಡ್ಲ್ಯಾ ಶ್ಹೆರಾಕ್ ವಚೊಂಕ್ ನಿರ್ದಾರ್ ಕೆಲೊ. ಆಸ್ತ್ ಬದಿಕ್ ವಿಕ್ಲೆಂ. ನವ್ಯಾ ಗಾವಾಂತ್, ನವ್ಯಾ ಭಂವಾರಾಂತ್ ಪಮ್ಮು ಖಮ್ಡಿತ್ ಜಾವ್ನ್ ಪ್ರವೀಣಾಕ್ ವಿಸ್ರಾತೆಲೆಂ ಮ್ಹಳ್ಳಿ ಆಅಶಾ ತಾಂಚಿ.
ಹ್ಯಾ ನವ್ಯಾ ಗಾವಾಂತ್ ಪಮ್ಮುನ್ ಹಾತ್ ಭಾಸ್ ಶಿಕೊಂಕ್ ಸುರು ಕೆಲೆಂ. ಆಪ್ಣಾ ಭಿತರ್ ಪ್ರವೀಣಾಕ್ ವಿಸ್ರಾಜೆ ಮ್ಹಳ್ಳೆಂ ಚಿಂತಾಪ್ ಪುನರಾವರ್ತಿತ್ ಕರಿಲಾಗ್ಲೆಂ ತೆಂ.
ಥೊಡ್ಯಾ ದಿಸಾಂ ಉಪ್ರಾಂತ್ ಆಚಾನಕ್ ಪಮ್ಮುಕ್ ಗಾಂವಾಂತ್ಲೆಂ ತಾಚೆಂ ಕ್ಲಾಸ್ಮೆಟ್ ಭೆಟ್ಲೆಂ. ಪಮ್ಮುಚಿ ಸಗ್ಳಿ ಕಥಾ ತೆಂ ಜಣಾಸ್ಲ್ಲೆಂ. ಪ್ರವೀಣ್ ಗಾಂವಾಕ್ ಆಯ್ಲಾ ಆನಿ ಪಮ್ಮುಚ್ ವಿಶಿಂ ವಿಚಾರ್ ಕರುನ್ ಆಸ್ಲ್ಲೊ ತಾಕಾ ಕಳಯ್ಲಾಗ್ಲೆಂ ಪಮ್ಮುನ್ ಆಪ್ಲ್ಯಾ ಇಶ್ಟಿಣೆಚೆಂ ದೊನ್ಯ್ ಹಾತ್ ದರುನ್ ಪ್ರವೀಣಾಕ್ ಆಪ್ನಾ ವಿಶಿಂ ಸಂಗಾನಾಶೆಂ ಪರಾತಿ ಲಾಗ್ಲೆಂ.
ತಿ ಕಸಲಿ ಘಡಿಗೀ ದೇವ್ ಜಣಾಂ. ತ್ಯಾ ಉಪ್ರಾಂತ್ ಪ್ರವೀಣಾಚೊ ಪಾತ್ತೊಚ್ ನಾ ಜಾಲೊ. ಇ_ಮೇಯ್ಲಾಂ ಆಯ್ಲಿಂ ನಾಂತ್. ಪಮ್ಮು ಪ್ರವೀಣ್ ದೋನ್ ಲ್ಹಾನ್ ಕುದ್ರೆ ಜಾವ್ನ್ ಪಯ್ಸ್ ಪಯ್ಸ್ ಪಾವ್ಲ್ಲಿಂ.
ಭರ್ತಿ ವರಸ್ ಸಂಪ್ಲೆಂ ಆಪ್ಲಿ ಇಶ್ಟಿಣ್ ಭೆಟೊನ್ ಪಮ್ಮುಕ್. ಆಜ್ ಪರತ್ ತೆಂಚ್ ಇಶ್ಟಿಣ್ ದಾರಾರ್ ಉಭೆಂ ಆಸ್ಲ್ಲೆಂ. ತಿಚೆ ಪಾಟ್ಲ್ಯಾನ್ ಪ್ರವೀಣ್ ಉಭೊ ಆಸ್ಲ್ಲೊ. ಪಮ್ಮು ಥಟಕ್ಕ್!
ಇಶ್ಟಿಣೆನ್ ತಿಚ್ಯಾ ಬ್ಯಾಗಾಂತ್ಲೆಂ ಇನ್ವಿಟೇಶನ್ ಕಾರ್ಡ್ ಕಾಡ್ಲೆಂ. ಲಗ್ನಾ ಆಪವ್ಣೆಂ! ಪಮ್ಮುಕ್ ದೊಳ್ಯಾಂಕ್ ಕಾಳೊಕ್ಚ್ ಆಯ್ಲೊ.
ವ್ಹಯ್, ತೆಂ ಪ್ರವೀಣಾಚೆಂ ಲಗ್ನಾ ಪತ್ರ್.
ಸವ್ಕಾಸ್ ದೊಳ್ಯಾಂಕ್ ಧಯ್ರ್ ದೀವ್ನ್ ಆಸ್ಡ್ಯೊ ಉಕಲ್ನ್ ಪಮ್ಮುನ್ ಪ್ರವೀಣಾಕ್ ಪಳಂವ್ಚೆಂ ಧಯ್ರ್ ಕೆಲೆಂ. ತಾಚ್ಯಾ ದೊಳ್ಯಾಂತ್ ತಿಚ್ ಪ್ರಶಾಂತತಾ, ತೊಚ್ ಮೋಗ್, ತೊಚ್ ಭರ್ವಸೊ ಉಮಾಳ್ತಾಲೊ. ಏಕ್ ನಿರ್ಲಿಪ್ತ್ ಭೊಗ್ಣಾಂಚ್ಯೊ ಹಾಸೊ ತೊಂಡಾರ್ ಚರಯ್ಲ್ಯೊ ಪ್ರವೀಣಾನ್.
ಪಮ್ಮುನ್ ಕಾರ್ಡ್ ಉಗ್ತೆಂ ಕೆಲೆಂ. ಆಪ್ಲ್ಯಾ ದೊಳ್ಯಾಂಕ್ ತೆಂ ಪಾತ್ಯೆಲೆಂ ನಾ. "ಲಗ್ನಾ ಪತ್ರಾರ್ ಆಪ್ಣಾಚೆಂ ನಾಂವ್?" ತೆಂ ಹುಸ್ಕಾರ್ಲೆಂ.
ವ್ಹಯ್, ಪ್ರವೀಣಾನ್ ಪಮ್ಮುಲಾಗಿಂ ಲಗ್ನಾ ಭೆಸಾಂತ್ ಎಕ್ವಟೊಂಕ್ ನಿರ್ದಾರ್ ಕೆಲ್ಲೊ. ಆಪ್ಲ್ಯಾ ಹಾತಾನಿಂ ’ಹಾತ್ ಬಾಸ್’ ವ್ಹಾಪಾರ್ನ್ ಪ್ರವೀಣ್ ಉಲಂವ್ಕ್ ಲಾಗ್ಲೊ. ಪಮ್ಮುಕ್ ಪಾತ್ಯೆಂವ್ಕ್ ಕಶ್ಟ್ ಭೊಗ್ಲೆ.
"ವರ್ಸಾಂ ಆದಿಂ ಗಾಂವಾಕ್ ಆಯಿಲ್ಲೊ. ತುಜಿ ಸ್ಥಿತಿ ಕಳ್ಳಿ. ಪಾಟಿಂ ವಚೊನ್ ವರ್ಸಾ ಭಿತರ್ ಹ್ಯಾ ’ಹಾತ್-ಭಾಶೆ’ ವಿಶಿಂ ಚಡಿತ್ ಶಿಕಾಪ್ ಜೋಡ್ನ್ ಪಾಟಿಂ ಆಯ್ಲಾಂ." ಪ್ರವೀಣಾನ್ ಹಾತ್ ಭಾಶೆನ್ಚ್ ವಿಶಯ್ ಕಳಯ್ಲೊ.
"ಆಜ್ ಥಾವ್ನ್ ಹಾಂವ್ ತುಜೊ ತಾಳೊ ಜಾತಾಂ ಪಮ್ಮು. ಹಾಂವ್ ತುಜೊ ಮೋಗ್ ಕರ್ತಾಂ!"
ಹಾಫ್ತ್ಯಾ ಭಿತರ್ ಇಗರ್ಜೆಚ್ಯೊ ಘಾಂಟಿ ವ್ಹಾಜ್ಲ್ಯೊ. ರೆಸ್ಪೆರಾ ಮುದಿ ಆವಾಜ್ ನಾಸ್ತಾಂ ಬೊಟಾಂಕ್ ಸಜಯ್ಲಿ.
ತಾಂಚ್ಯಾ ’ಐ ಲವ್ ಯು’ಂತ್ ತಾಳೊ ನಾತ್ಲ್ಲೊ. ಫಕತ್ತ್ ಅರ್ಥ್ ಆಸ್ಲ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
