ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
8. ಜಿರ್ಗಿ ಮಿರ್ಸಾಂಗ್
ಎಡ್ವಿನ್ ಜೆ.ಎಫ್.
ಆಮ್ಕಾ೦ ಕತಾ ವಸ್ತು ಮೆಳಾನಾ೦ತ್
ಜಾಲ್ಲ್ಯಾನ್ ಆಮಿ೦ ಚಾಬ್ಲ್ಲೆ೦ಚ್ ಚಾಬಾಜೆ ಪಡ್ತಾ, ರವ೦ಚ್
ಕಾಡಿಜೆ ಪಡ್ತಾ ಮ್ಹಳ್ಳೆ೦ ಆಮ್ಕಾ೦ ಲೇಕಕಾ೦ಥಾವ್ನ್ ಆಯ್ಕೊ೦ಕ್ ಮೆಳ್ತಾ. ಕಾಮಾಸಾಳಾ೦ನಿ ಅಸಲಿ೦ ದುರ್ಸವ್ಣಿ೦ ಯೆತಾನಾ ಆಮಿ೦ ವಾ೦ಟೊ ಗೆ೦ವ್ಚ್ಯಾ೦ಕ್ ಕತಾವಸ್ತು ಯಾ ‘ಪ್ಲೊಟ್’ ದಿತಾ೦ವ್; ಹಾ೦ಚೆರ್ ಚಿ೦ತಪ್ ಆಟವ್ನ್, ಕತಾವಸ್ತ್ ವಿಸ್ಕಳಾವ್ನ್ ಬರಯಾ ಮ್ಹಳ್ಳೆ೦
ಸುಚನ್ ದೀವ್ನ್ ತಾ೦ಕಾ೦ ಘರಾ ದಾಡ್ತಾ೦ವ್.
ದುಸ್ರ್ಯಾ ದಿಸಾ ವರ್ತೆ ಹುಮೆದಿನ್ ತಿ೦ ಬರವ್ನ್ ಹಾಡ್ಲ್ಲೆ೦ ಆಮ್ಕಾ೦ ದಾಕಯ್ತಾತ್ ಆನಿ ತೆ೦
ವಾಚ್ತೆಚ್ ಆಮಿ೦ ದಿ೦ವ್ಚ್ಯೊ ಅಬಿಪ್ರಾಯೊ ತಾ೦ಕಾ೦ ತಿತ್ಲ್ಯೊ ರುಚನಾ೦ತ್.
ಹಾಕಾ ಕಾರಾಣ್ ಕಿತೆ೦? ಕಿತೆ೦ ತಾಣಿ೦ ಬರವ್ನ್ ಹಾಡ್ಲಾ೦?
ಎಕ್ ಫೊಕಾಣ್ ಆಸಾ ಅಶೆ೦:
ಪರೀಕ್ಶೆಖಾತಿರ್ ಪ್ರಬ೦ದ್ ಶಿಕಲ್ಲ್ಯಾ ಎಕ್ಲ್ಯಾನ್ ಫಕತ್ತ್ ಎಕಾ
ಮಾಡಾ ವಿಶಾ೦ತ್ ಬರ೦ವ್ಕ್ ಅಬ್ಯಾಸ್ ಕೆಲ್ಲೊ ಖ೦ಯ್. ಪುಣ್ ಆಯ್ಲೆ೦
ಪ್ರಶ್ನ್ ಗಾಯ್ ವಿಶಾ೦ತ್ ಬರಯ್ ಮ್ಹಣ್. ದೆಕುನ್
ಹ್ಯಾ ವಿದ್ಯಾರ್ತಿನ್ ಆಪ್ಲ್ಯಾ ಗಾಯ್ಕ್ ವರುನ್ ಮಾಡಾಕ್ ಬಾ೦ದ್ಲೆ೦ ಆನಿ
ಹೊ “ಗಾ೦ಚ್” ಆಸಾ ಕೆಲ್ಯಾ ಉಪ್ರಾ೦ತ್ ಆರಾಮಾಯೆನ್ ಮಾಡಾ ವಿಶಾ೦ತ್ ಪ್ರಬ೦ದ್ ಲಿಕ್ಲೊ.
ಪರಿಣಾಮ್? ವ್ಹಡ್ಲೊ ಗೋಳೆ!
ಆಮ್ಚ್ಯಾ ಬರವ್ಪ್ಯಾ೦ನಿ ಕರ್ಚೆ೦ಯ್ ಅಸಲೆ೦ಚ್ ಆನಿ ಇತ್ಲೆ೦ಚ್. ಕಿತ್ಯಾಕ್
ಮ್ಹಣ್ ತುಮಿ೦ ವಿಚಾರ್ಶಾತ್ ಆನಿ ಕಾ೦ಯ್ ಜಾಪ್ಯ್ ತುಮಿ೦ಚ್
ದಿಶಾತ್ ಕಿ ಕೊ೦ಕಣಿ೦ತ್ ಆನಿ ಕಿತೆ೦ ಕರು೦ಕ್ ಜಾತಾ?
ಜಾಯ್ತೆ೦ ಕರು೦ಕ್ ಜಾತಾ, ಆಮ್ಕಾ೦ ಫಾವೊ ತೊ ಸಾಹಿತಿಕ್, ಸಮಾಜಿಕ್ ಆನಿ ಸ೦ಸಾರಿಕ್ ಉಗ್ತಡ್ (exposure) ಆಸಾ ತರ್. ಆನಿ ಹ್ಯಾ ಉಗ್ತಡಾಚ್ಯಾ ಪ್ರಕಾಸಾ೦ತ್ ಆಮಿ೦ ಪಡಾಜೆ ತರ್ ಮ್ಹಾ-ಚಿ೦ತ್ಪ್ಯಾಪರಿ೦ ದಾರಾ೦-ಜನೆಲಾ೦ ಬ೦ದ್ ಕರುನ್ ಚಿ೦ತುನ್ ಬಸ್ಲ್ಯಾರ್ ಜಾಯ್ನಾ. ತರ್ ಕಿತೆ೦ ಕರು೦ಕ್ ಜಾಯ್?
ತೊ ಫಲಾಣೊ ‘ಪ್ಲೊಟ್’ ಕಸೊ ತುಮ್ಚ್ಯಾ ಮತಿ೦ತ್ ಆಯ್ಲೊ ಮ್ಹಳ್ಳೆ೦ ಸವಾಲ್ ಪಯ್ಲೆ೦: ಕಸಲ್ಯಾಯ್ ಘಡಿತಾನ್ ತುಮ್ಕಾ೦ ಮಿರ್ಮಿರಾಯ್ಲೆ೦, ಕಸಲೆ೦ಗಿ ದೃಶ್ ತುಮ್ಚ್ಯಾ ದೊಳ್ಯಾ೦ಕ್ ತೊಪ್ಲೆ೦, ಕಸಲ್ಯಾಗಿ ಉತ್ರಾ೦ನಿ ತುಮ್ಚೆ ಕಾನ್ ಬರ್ಲೆ, ಹೆ೦ ಪಯ್ಲೆ೦ ಇತ್ಯರ್ತ್ ಕರು೦ಕ್ ಜಾಯ್. ತ್ಯಾ ಉಪ್ರಾ೦ತ್ ಹ್ಯಾ ಕತಾವಸ್ತುಚಿ ವಾಡಾವಳ್ ಕಶಿ ಕರ್ಯೆತ್; ಹ್ಯೆ ವಾಡಾವಳಿಕ್ ಕಸಲ್ಯಾ ಸರ್ವ್ ಸಾಹೆತಿ೦ಚಿ ಗರ್ಜ್ ಆಸಾ; ಪರಿಸರ್ ಕಸಲೆ೦ ಆನಿ ಹ್ಯಾ ಪರಿಸರಾವಿಶಾ೦ತ್ ಆಪುಣ್ ಕಿತ್ಲೆ೦ ಜಾಣಾ೦ ಆಸಾ೦? ಹ್ಯಾ ಸವಾಲಾ೦ಕ್ ಪಕ್ಕಾ ಜಾಪಿ ಮೆಳ್ಳ್ಯಾ ಕರಿತ್ ಬರ೦ವ್ಕ್ ದರ್ಚೆ೦ ನ್ಹಂಯ್. ವ್ಹಯ್, ಬರ೦ವ್ಕ್ ದರ್ಲ್ಯಾರ್ ಕಾ೦ಯ್ ತರಿ ತುಮಿ೦ ಬರವ್ನ್ ಕಾಡ್ಶಾತ್ ಆನಿ ಕಾ೦ಯ್ ತೆ೦ ಪ್ರಗಟ್ ಜಾಯ್ತ್.
ಪುಣ್ ಅಸಲೆ೦ ಪ್ರಕಟನ್ ತುಮ್ಚ್ಯಾ ಪ್ರೇತನಾಚೊ ಮಕ್ಸದ್? ಫಕತ್ತ್ ತುಮ್ಚೆ೦ ನಾ೦ವ್ ಛಾಪುನ್ ಆಯ್ಲ್ಯಾರ್ ಜಾಲೆ೦? ದೆಕುನ್ ಆಮಿ೦ ಕೆದಳಾರಿ ಸಾ೦ಗ್ತಾ೦ವ್ ಕಿ ದರ್ವಡ್ ಕರಿನಾಕಾತ್; ಲಿಕ್ಲ್ಲೆ೦ ಪರತ್ ಪರತ್ ವಾಚಾ; ಜಾಯ್ ತರ್ ಎಕ್-ದೋನ್ ಹಫ್ತೆ ಪರ್ಯಾ೦ತ್ ಬಿತರ್ ದವರಾ; ಜಾಯ್ ತರ್ ಕೊಣಾ ಮಾಹೆತ್ವ೦ತ್ ವಾಚ್ಪ್ಯಾಕ್ (ಬರವ್ಪ್ಯಾಕ್ ನ್ಹಂಯ್!) ದಾಕಯಾ; ಆಕ್ರೇಕ್, ಸ೦ಪಾದಕಾಕ್ ದಾಡ್ಚ್ಯಾ ಫುಡೆ೦ ತುಮ್ಚ್ಯಾ ಬರ್ಪಾ೦ಚೆ೦ ತುಮಿ೦ಚ್ ಸ೦ಪಾದಕ್ ಜಾಯಾ.
ಹಾ೦ಗಾಸರ್ ತುಮ್ಚ್ಯಾ ಅಬ್ಯಾಸ್-ಸವ್ಲತೆಖಾತಿರ್ ಹಾ೦ವ್ ಎಕ್ ‘ಪ್ಲೊಟ್’ ದಿತಾ೦. ಹಿ ಕತಾವಸ್ತ್ ಕಾಲ್ಪನಿಕ್
ನ್ಹಂಯ್. ಹಾ೦ವ್ ಬೋವ್ ಲ್ಹಾನ್ ಆಸ್ತಾನಾ ಮ್ಹಜೆ
ಆಜೆನ್, ಅಸಲಿ ಕರಾಳ್ ಖಬರ್ ಮ್ಹಜ್ಯಾ ನಾಜೂಕ್ ಕಾನಾ೦ಕ್ ಪಡೊ೦ಕ್
ನಜೊ ಮ್ಹಣ್, ಮಾಮ್ಮಿಕ್ ಮಾತ್ರ್ ಸಾ೦ಗ್ತಾನಾ ಹಾ೦ವೆ೦ ಚೊರಿಯಾ೦
ಆಯ್ಕಾಲ್ಲಿ ನೀಜ್ ಸ೦ಗತ್. ತಿ ಆಸಾ ಅಶಿ: ಪಾ೦ಚ್ವೆ೦ತ್ ಆಸ್ಲ್ಲ್ಯಾ ಎಕಾ ಭುರ್ಗ್ಯಾನ್ ಬಾ೦ಯ್ತ್ ಉಡೊನ್
ಜೀವ್ಘಾತ್ ಕೆಲೊ. ಕಾರಾಣ್ ಕಸಲೆ೦? ತೆ೦ ಭುರ್ಗೆ೦ ಪರೀಕ್ಶೆ೦ತ್
ಫೇಲ್ ಜಾಲ್ಲೆ೦. ತಿತ್ಲೆ೦ಚ್ ನ್ಹಂಯ್, ತ್ಯಾ ಭುರ್ಗ್ಯಾಚೆ ಮಾವ್ಶೆನ್ ತಾಕಾ ದಮ್ಕಿ
ದಿಲ್ಲಿಕಿ ತೆ೦ ಫೇಲ್ ಜಾಯ್ತ್ ತರ್ ತಾಚ್ಯಾ ದೊಳ್ಯಾ೦ಕ್ ಆಪುಣ್
ಜಿರ್ಗಿ ಮಿರ್ಸಾ೦ ಚಿರ್ಡಿತೆಲಿ೦
ಮ್ಹಣ್. ಇತ್ಲೆ೦ಚ್ ನ್ಹಂಯ್: ಶಾಳೆಥಾವ್ನ್ ಹೆರಾ೦ ಭುರ್ಗ್ಯಾ೦ ಸಾ೦ಗಾತಾ ರಡಾತ್ತ್ ಯೆ೦ವ್ಚ್ಯಾ ಭುರ್ಗ್ಯಾಚಿ೦ ನಿಮಾಣಿ೦ ಉತ್ರಾ೦ ಆಯ್ಕಾ. “ಮೆಲ್ಯಾರ್
ಸರ್ವ್ ಕಶ್ಟ್ ಹಾಳು ಜಾತಾತ್ ನ್ಹಂಯ್?” ಇತ್ಲೆ೦ ಮ್ಹಣೊನ್ ತೆ೦ ಭ್ಹುರ್ಗೆ೦,
ಜಿರ್ಗಿ ಮಿರ್ಸಾ೦ಗೆಚ್ಯಾ
ಹುಲೊಪಾಕ್ ಬಿಯೆಲ್ಲೆ೦ ತೆ೦ ಭುರ್ಗೆ೦, ಶೀದಾ ದಾ೦ವೊನ್
ಲಾಗ್ಸಾರ್ ಆಸ್ಲ್ಲ್ಯಾ ಬಾ೦ಯ್ತ್ ಉಡ್ಲೆ೦!
ಕಿತ್ಲಿಶಿ೦ ವರ್ಸಾ೦ ಜಾಲಿ೦ ಹಾ೦ವೆ೦ ಹೆ೦ ಘಟನ್ ಆಯ್ಕೊ೦ನ್ ತರಿ
ಹ್ಯಾ ‘ಪ್ಲೊಟಾ’ಚೆರ್ ಮಟ್ವಿ ಕತಾ ಯಾ ಎಕ್ ಕಾದ೦ಬರಿಚ್ ಲಿಖ್ಚೆ೦ ಧಯ್ರ್
ಮ್ಹಾಕಾ ಯೆ೦ವ್ಕ್ನಾ; ಕಿತ್ಯಾಕ್ ಮ್ಹಣ್ ಹಾ೦ವ್ ನೆಣಾ೦.
ಆತಾ೦, ಹಿ ಕತಾವಸ್ತ್ (ಎಕ್ ನೀಜ್ ಘಡಿತ್) ತುಮ್ಚೆ ಸಮೊರ್ ಹಾ೦ವೆ೦ ದವರ್ಲಾ೦. ಕಿತೆ೦ ಕರು೦ಕ್ ಯೆವ್ಜಿತಾತ್ ತುಮಿ೦? ಎಕ್ ಮಟ್ವಿ ಕತಾ ಲಿಕು೦ಕ್? ಬರೆ೦. ಎಕ್ ಕಾದ೦ಬರಿ ಲಿಕು೦ಕ್? ಆನಿಕಿ ಬರೆ೦. ತರ್ ಥೊಡೆ ಸುಲುಸ್ (ಸುಚನಾ೦) ಮತಿ೦ತ್ ಘೆಯಾ: ಪಯ್ಲ್ಯೆ ಸುವಾತಿರ್ ಹಿ ಕತಾವಸ್ತ್ ತುಮಿ೦ ವಿಸ್ಕಳಾ೦ವ್ಕ್ ಆಸಾ. ಹ್ಯಾ ಖಾತಿರ್ ತುಮ್ಕಾ೦ ಜಾಯ್: ಎಕ್ ಪರಿಸರ್, ಎಕ್ ಕಾಳ್ (ಜಿರ್ಗಿ ಮಿರ್ಸಾ೦ಗೆಚಿ ಧಮ್ಕಿ ಆತಾ೦ ಕಾ೦ಯ್ ದಿತಾತ್?), ಜಿರ್ಗಿ ಮಿರ್ಸಾ೦ಗ್ ಚಡ್ಜಾವ್ನ್ ಕಸಲ್ಯಾ ರಾ೦ದ್ಪಾಕ್ ವಾಪರ್ತಾಲಿ೦? ಖಾರೆ೦-ಸುಕೆ೦ ಬಾಜುನ್ ಆಮ್ಟಾಣೆಚಿ ಮೀಟ್-ಮಿರ್ಸಾ೦ಗ್ ಕರುನ್ ಪೆಜೆ ಜೆವಣ್ ಕರ್ತಾನಾ? ಹೆ೦ ಸಾರ್ಕೆ೦ ಮ್ಹಣ್ ದಿಸನಾ ತರ್ ಘರಾ೦ತ್ಲ್ಯಾ ಮಾಲ್ಗಡ್ಯಾ೦ಲಾಗಿ೦ ವಿಚಾರಾ. ಹೊ ತುಮ್ಚೊ ಲ್ಹಾನ್ ಮಟ್ಟಾಚೊ ಸ೦ಸೊದ್ ಜಾತಲೊ ನ್ಹಂಯ್?
ಬರಾಬರ್. ಎಕ್ ಕುಟಮ್ ತಯಾರ್ ಕರಾ. ದುಸ್ರ್ಯಾಪಣಾಕ್ ಲಗ್ನ್ ಜಾಲ್ಲೊ ಬಾಪಯ್, ದೊಳ್ಯಾ೦ತ್ ರಗತ್, ಕಾಳ್ಜಾ೦ತ್ ಮೋಗ್ ನಾತ್ಲ್ಲಿ ಮಾವ್ಶಿ (ಮಿಣಿ ಮಿಣಿ ದೊಳೆ ಮಾವ್ಶೆ, ಹಾಚೊ ಉಡಾಸ್ ಆಯ್ಲೊ ನಾ ತರ್?), ತಕ್ಲೆಕ್ ರಿಗಾನಾತ್ಲ್ಲೆ೦ ಶಿಕಪ್....ಹ್ಯೆಚ್ ದಿಶೆನ್ ತುಮಿ೦ ಚಿ೦ತಪ್ ಚಾಲು ದವರ್ಶಾತ್ ತರ್ ಎಕ್ ಮಟ್ವಿ ಕತಾಚ್ಚ್ ಕಿತ್ಯಾಕ್, ಎಕ್ ಕಾದ೦ಬರಿಚ್ಚ್ ತಯಾರ್ ಕರ್ಯೆತ್. ಪುಣ್ ಎಕ್ ಚತ್ರಾಯ್: ತುಮ್ಚ್ಯಾ ಬರಪಾಚಿ ಲಾ೦ಬಾಯ್-ರು೦ದಾಯ್ ಎಕಾ ಚವ್ಕಟಾ೦ತ್ ಆಸು೦ದಿ, ಚ್ಯುಯಿ೦ಗ್ಗಮ್ ಬರ್ಪಾ೦ ಆಮ್ಕಾ೦ ನಾಕಾತ್!
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
