ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ಹಾಂವ್ ಮ್ಹಜಿ ಜಾತ್ ಸೊಡ್ತಾಂ
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್, ನಿರ್ಧಾರ್, ಅಖ್ರೇಚಿ ರಾತ್, ಫರಾಮಸ್, ಇಶ್ಟಿಣ್ಯೊ, ಮ್ಹಾಕಾ ವೇಳ್ ನಾ!?, ಕಾಳ್ಜಾಥಾವ್ನ್.
ಎಚ್.ಜೆ.ಗೋವಿಯಸ್
ಕುವೈಟ್ ಶೆಹರ್
ರಾವ್ಧಾ ಮ್ಹಳ್ಳ್ಯಾ ಜಾಗ್ಯಾರ್ ಆಬ್ದುಲ್ ವಹಾಬ್ ಮ್ಹಳ್ಳ್ಯಾ ಎಕಾ ಭೋವ್ ಗ್ರೇಸ್ತ್ ಕುವೈಟಿಚಾ ಬಂಗ್ಲ್ಯಾಂತ್ ಬಾವೀಸ್ ವರ್ಸಾಂ ಪ್ರಾಯೆಚಿ ಲವೀನಾ ಮ್ಹಳ್ಳಿ ಮಂಗ್ಳುರ್ಚಿ ಚಲಿ ಘರ್ ಖಾತ್ಯಾಚಾ ಕಾಮಾರ್ ಆಸ್ಲ್ಲಿ. ಲವೀನಾ ಭಾರಾವಿ ಶಿಕೊನ್ ಕಂಪ್ಯೂಟರ್ ಕೊರ್ಸ್ ಆನಿ ಆಫಿಸಾಚಾ ಲಗ್ತಿಚೆ ಥೊಡೆ ಹೆರ್ ಕೊರ್ಸ್ ಕರುನ್ ಭಾಯ್ಲ್ಯಾ ಗಾಂವಾಂತ್ ಆಪ್ಲೆಂ ನಶಿಬ್ ಸೊಧುನ್ ಪಾವ್ಲ್ಲೆಂ, ಪುಣ್ ಘರ್ ಖಾತ್ಯಾಚಾ ಕಾಮಾರ್.
“ಆಜ್ ತುಕಾ ವೇಳ್ ಕಿತ್ಯಾಕ್ ಜಾಲೊ?“ ಧನ್ಯಾಚಿ ಧುವ್ ಮರಿಯಮ್ ಲವೀನಾಕ್ ಜೋರ್ ಕರಿಲಾಗ್ಲಿ.
“ಮೀಸ್ ಸುಟ್ಲ್ಲೆಂಚ್ ಹರ್ಶೆಂಚೆ ಪರಿಂ ಬಸ್ಸ್ ಧರುನ್ ಆಯ್ಲಿಂ ಹಾಂವ್“ ಲವೀನಾ ಮ್ಹಣಾಲೆಂ.
“ಆನಿ ಮುಖಾರ್ ಇಗರ್ಜೆಕ್ ವೆಚಿ ಗರ್ಜ್ನಾ. ವೆಶಿ ಜಾಲ್ಯಾರ್ ತ್ಯಾಚ್ ದಿಸಾ ತುಕಾ ಎರ್ ಪೊರ್ಟಾಕ್ ಧಾಡ್ತಾಂ ಟಿಕೆಟ್ ಕಾಡುನ್, ಸಮ್ಜಾಲೆಂ ತುಕಾ?“
ಲವೀನಾನ್ ಕಾಂಯ್ ಮ್ಹಳೆಂನಾ. ತೆಂ ಬಾವ್ಡೆಂಶೆಂ ಜಾಲೆಂ. ಘರ್ ಕಾಮಾರ್ ಆಸ್ಲ್ಲ್ಯಾಂಕ್ ತಾಂಚೆ ಧನಿ ಆಯ್ತಾರಾಚೆಂ ಅರ್ದೊ ದೀಸ್ ರಜಾ ದಿತಾತ್. ಥೊಡಿಂ ಧನ್ಯಾಂ ದೋನ್ ಹಪ್ತ್ಯಾಂಕ್ ಅರ್ದೊ ದೀಸ್ ಆನಿ ಥೊಡಿಂ ಮಹಿನ್ಯಾಕ್ ಅರ್ದೊ ದೀಸ್. ಪುಣ್ ಬಿರ್ಮೊತ್ ಲವೀನಾಕ್ ಮಹಿನ್ಯಾಕ್, ಫಕತ್ತ್ ದೋನ್ ವೊರಾಂಚಿ ರಜಾ, ತ್ಯಾ ದೋನ್ ವೊರಾಂನಿ ತಾಣೆಂ ರಾವ್ದಾ ಥಾವ್ನ್ ಬಸ್ಸ್ ಧರುನ್ ‘ಫಾಹಧ್ ಅಲ್ ಸಾಲಮ್ ಸ್ಟ್ರೀಟ್’ ಶೆರೊಟೊನ್ ಹೊಟೆಲಾಚಾ ಲಾಗಿಂ ಧೆಂವೊನ್ ಪಾಂಚ್ ಮಿನುಟಾಂಚಿ ಪಾಂಯ್ ವಾಟ್ ಚಲೊನ್ ಇಗರ್ಜೆಕ್ ವಚುನ್, ಮೀಸ್ ಆಯ್ಕೊನ್ ತುರಂತ್ ಬಂಗ್ಲ್ಯಾಕ್ ಪಾಟಿಂ ಪರ್ತುಂಕ್ ಆಸ್ಲ್ಲೆಂ.
ತಾಚೆಪರಿಂ ಹೆರ್ ಘರ್ ಖಾತ್ಯಾಚಾ ಕಾಮಾಚಿಂ, ಮಿಸಾ ಉಪ್ರಾಂತ್ ಆಪ್ಲ್ಯಾ ವ್ಹಳ್ಕಿಂಚಾಂಕ್ ಭೆಟುನ್ ಸುಃಖ್ ದುಃಖ್ ಉಲವ್ನ್ ಥೊಡೆಂ ಖಾಣ್ ಪೀವನ್ ಘೆವ್ನ್ ವೆಳ್ ಪಾಶಾರ್ ಕರುನ್ ತಾಂಚ್ಯಾ ಬಂಗ್ಲ್ಯಾಕ್ ಪಾಟಿಂ ಪಾವ್ತಾತ್. ಥೊಡ್ಯಾಂಕ್ ತಾಂಚೆ ಧನಿ ವ ಧನಿನ್ಯೊ ಸೊಡುಂಕ್ಯೀ ಯೆತಾತ್ ಆನಿ ವರುಂಕ್ಯೀ ಯೆತಾತ್, ಪುಣ್ ಲವೀನಾಕ್ ಮಾತ್ರ್ ಹೆ ಕಷ್ಟ್.
ಮರಿಯಮಾಚಿಂ ರಾಗಾಚಿಂ ಉತ್ರಾಂ ಆಯ್ಕೊನ್ ದೊಳ್ಯಾಂನಿ ದುಃಖಾಂ ಆಯಿಲ್ಲೆಂ ಲವೀನಾ ಫುಡೆಂ ಚರ್ತಾನಾ, ತಾಕಾ ಮುಖಾರ್ ತಾಚಾ ಧನ್ಯಾಚೊ ಪುತ್ ಯೂಸುಪ್ ದಿಸ್ಲೊ. ಯೂಸುಪಾಕ್ ಭಯ್ಣಿನ್ ಲವೀನಾಕ್ ಸಾಂಗ್ಲ್ಲೆಂ ಆಯ್ಕಾಲ್ಲೆಂ. ತೊ ಭಯ್ಣಿ ಕಡೆನ್ ವಚುನ್ ಮ್ಹಣಾಲೊ, “ಮರಿಯಮ್ ತಾಕಾ ಕಶೆಂಯ್ ಮಹಿನ್ಯಾಕ್ ದೋನ್ ವೊರಾಂಚಿ ರಜಾ ಮಾತ್ರ್ ಮೆಳ್ತಾ. ತೆಂ ಹಾಂಗಾಸರ್ ಕಾಮಾಕ್ ಯೆತಾನಾ, ಆಮ್ಚ್ಯಾ ಬಾಬಾನ್ ಹರ್ಯೆಕಾ ಹಪ್ತ್ಯಾಕ್ ಮಿಸಾಕ್ ವಚುಂಕ್ ಸೊಡ್ತಾಂ ಮ್ಹಣ್ ಸಾಂಗ್ಲ್ಲೆಂ. ಆಮ್ಮಿನ್ಯಿ ಕೆದಳಾಚ್ ತಾಕಾ ಬಂದಡ್ ಕೆಲ್ಲಿನಾ. ಪುಣ್ ತುಂವೆಂ ತಾಚೆರ್ ತುಜಿ ಸಕ್ತ್ ಶಿಸ್ತ್ ಕರುನ್ ತಾಚಿ ಹಪ್ತ್ಯಾಚಿ ಅರ್ದ್ಯಾ ದಿಸಾಚಿ ರಜಾ ಮಹಿನ್ಯಾಕ್ ಫಕತ್ತ್ ದೋನ್ ವೊರಾಂಚೆರ್ ದೆವೊಂವ್ನ್ ತಾಚೆರ್ ನಿಜಾಯ್ಕಿ ಝುಲುಮ್ ಕೆಲಾಯ್. ಆಮಿ ದಿಸಾಕ್ ಪಾಂಚ್ ಪಾವ್ಟಿಂ ಮಾಗ್ಣೆಂ ಕರ್ತಾಂವ್; ಮೆಟಾಂ ಮೆಟಾಂನಿ ಆಸ್ಲ್ಲ್ಯಾ ಆಮ್ಚ್ಯಾ ಮಸ್ಜಿದೆಕ್ ವ್ಹೆತಾಂವ್. ಪುಣ್ ತ್ಯಾ ಕ್ರೀಸ್ತಾಂವಾಕ್ ಆಮ್ಚ್ಯಾ ಗಾಂವಾಂತ್ ಇಗರ್ಜ್ಯೊ ಆಸ್ಚ್ಯೊ ದೋನ್ಂಚ್ ಏಕ್ ಕುವೈಟ್ ಸಿಟಿಂತ್ ತರ್, ದುಸ್ರಿ ದುಸ್ರ್ಯಾ ಪೊಂತಾರ್ ಆಹ್ಮದಿಂತ್- ಹಾಂಗಾ ಥಾವ್ನ್ ಸುಮಾರ್ ಚಾಳೀಸ್ ಕಿಲೊ ಮೀಟರ್ ಪಯ್ಸ್. ಆನಿ ಆತಾಂ ತುಂವೆಂ ತಾಕಾ ಆನಿ ಮುಖಾರ್ ಮಿಸಾಕ್ ವೆಚೆಂ ನಾಕಾ ಮ್ಹಳ್ಯಾರ್ ಕಶೆಂ?
“ಹಾಂವ್ ದ್ವೇಶಿತಾಂ ಕ್ರೀಸ್ತಾಂವಾಂಕ್. ಆರ್ಥ್ ನಾತ್ಲ್ಲಿ ಜಾತ್ ತಾಂಚಿ. ಆಮ್ಚ್ಯಾ ಹ್ಯಾ ಮುಸ್ಲಿಮ್ ಗಾಂವಾಂನಿ ಆಮ್ಚ್ಯಾ ಸಾರ್ಕಾರಾನ್ ತಾಂಚ್ಯೊ ಇಗರ್ಜ್ಯೊ ದವರ್ಲ್ಯಾಚ್ ಕಿತ್ಯಾಕ್ ಕೊಣ್ಣಾ. ಸಾವ್ದಿ ದೇಶಾಪರಿಂ ಹಾಂಗಾಚ್ಯೊಯಿ ಇಗರ್ಜ್ಯೊ ಮಡ್ಲ್ಲ್ಯೊ ತರ್ ಭಾರಿ ಬರೆಂ ಆಸ್ತೆಂ“ ಮರಿಯಮ್ ರಾಗಾನ್ ಮ್ಹಣಾಲೆಂ.
“ತಶೆಂ ಮ್ಹಣಾನಾಕಾ ಮರಿಯಮ್. ಸರ್ವಾಂಯ್ಕಿ ತಾಂಚಿ ತಾಂಚಿ ಜಾತ್ ಮೊಗಾಚಿ. ಆಮಿ ವಿಸ್ರೊಂಕ್ ಫಾವೊನಾ, ತಾಂಚೊ ಈಸಾಯೀ ಆಮ್ಚ್ಯಾ ಆಲ್ಲಾಕ್ ಮೊಗಾಚೊ ಆನಿ ಆಮ್ಚ್ಯಾ ಪ್ರೊಫೆತ್ ಮೊಹಮ್ಮದಾ ಪ್ರಾಸ್ ಪಯಿಲ್ಲೆಂ ಆಯಿಲ್ಲೊ ಪ್ರೊಫೆತ್ ಜಾವ್ನಾಸಾ“
“ಪುಣ್ ತೊ ಆಲ್ಲಾಚೊ ಪುತ್ ಮ್ಹಣ್ತಾತ್ಮೂ, ತಿಂ ಪಿಶಿಂ ಕ್ರೀಸ್ತಾಂವ್ ಜಾತಿಚಿಂ? ದೆಕುನ್ ಮ್ಹಾಕಾ ತ್ಯಾ ಜಾತಿಚೆರ್ ರಾಗ್. ಆಲ್ಲಾಕ್ ಆಮಿ ದೇವ್ ಮ್ಹಣ್ ಮಾಂದ್ತಾನಾ, ತಾಣಿ ತಾಂಚಾ ಈಸಾಚೊ ಬಾಪುಯ್ ಮ್ಹಣ್ ಕಶೆಂ ಮಾಂದ್ಚೆಂ?“
“ತೆಂ ಆಮ್ಚ್ಯಾ ಜಾತಿಂತ್ ಆಮಿ ಖಂಡನ್ ಕೆಲಾಂ. ಪುಣ್ ತಿಂ ತಾಂಚೊ ಭಾವಾರ್ಥ್ ಸೊಡುಂಕ್ ತಯಾರ್ ನಾಂತ್ ತರ್, ಆಮಿ ತಾಂಕಾಂ ತಾಂಚಿ ಸೊಮೊಡ್ತ್ ಸೊಡುಂಕ್ ವ ತಿ ಚೂಕ್ ಮ್ಹಣೊಂಕ್ ಸಕಾನಾಂವ್“ ಯೂಸುಪ್ ಭಯ್ಣಿಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕರಿಲಾಗ್ಲೊ. ಭಾವ್ ಭಯ್ಣಿ ಮಧೆಂ ಚಲ್ಚೆ ಜಾತಿಚೆ ತಕ್ರಾರ್ ಲವೀನಾಕ್ ಆಯ್ಕಾತಾಲೆ.
ತಿತ್ಲ್ಯಾರ್ ವಯ್ರ್ ಥಾವ್ನ್ ಸಿಡಿ ದೆಂವೊನ್ ಮಡಮ್ ನಾಫೀಜಾ ಆಯ್ಲಿ. “ಆಮ್ಮಿ, ತುಂಚ್ ಸಾಂಗ್ ತ್ಯಾ ಆಯಾಕ್ ಆನಿ ಮುಖಾರ್ ಇಗರ್ಜೆಕ್ ವೆಚಿ ಗರ್ಜ್ನಾ ಮ್ಹಣ್. ಹರ್ಯೆಕ್ಪಾವ್ಟಿಂ ವೇಳ್ ಕರುನ್ ಯೆತಾ ಆನಿ ಬಸ್ಸ್ ಲೇಟ್ ಜಾಲೆಂ ಮ್ಹಣ್ತಾ...... ” ಆವಯ್ ಲಾಗ್ಗಿಂ ದೂರ್ ದಿಲೆಂ ಧುವೆನ್.
“ಲವೀನಾ.....“ ಮಡಮ್ ನಾಫೀಜಾನ್ ಲವೀನಾಕ್ ಉಲೊ ಮಾರ್ಲೊ. “ತುಂ ಆಜ್ ಪಾವ್ತಾನಾ ವೇಳ್ ಜಾಲೊ?“
“ವ್ಹಯ್ ಮಡಮ್......“ ಲವೀನಾ ಭಿಂಯಾನ್ ಜಾಪ್ ದೀಲಾಗ್ಲೆಂ.
“ತರ್, ತುಂ ಹರ್ಯೆಕಾ ಆಯ್ತಾರಾದೀಸ್ ಮಿಸಾಕ್ ವಚ್. ಹಾಂವ್ ತುಕಾ ಸಾಂಗ್ತಾಂ. ದನ್ಫರಾಂ ಜೆವ್ಲ್ಲೆಂಚ್ ತುಂ ವಚ್ ಆನಿ ರಾತಿಂ ಆಟ್ ವೊರಾಂ ಉಪ್ರಾಂತ್ಚ್ ಪಾಟಿಂ ಯೆ. ಹಿ ರಜಾ ತುಕಾ ಮ್ಹಜೆ ತರ್ಫೆನ್. ಹ್ಯಾ ಘರ್ಚಿ ದನಿನ್ ಹಾಂವ್, ಮರಿಯಮ್ ನ್ಹಯ್. ದನ್ಯಾನ್ ತುಕಾ ತುಂ ಯೆತಾನಾಂಚ್ ಹಿ ರಜಾ ಮಂಜೂರ್ ಕೆಲ್ಲಿ. ಪುಣ್ ತುಂವೆಂ ಮರಿಯಮಾಚಾ ಶಿಸ್ತೆಕ್ ಖಾಲ್ ಜಾವ್ನ್ ಮಹಿನ್ಯಾಕ್ ಚಾರ್ ಅರ್ದ್ಯಾ ದಿಸಾಂಚ್ಯೊ ರಜಾ, ಮಹಿನ್ಯಾಕ್ ಫಕತ್ತ್ ದೋನ್ ವೊರಾಂಕ್ ವಪ್ವುನ್ ಘೆತ್ಲೆಂಯ್. ಆಮ್ಕಾಂ ಕಶೆಂ ಆಮಿ ಆಮ್ಚ್ಯಾ ಸಮೊಡ್ತಿ ಪ್ರಕಾರ್ ಆಮ್ಚಿಂ ಮಾಗ್ಣಿಂ ವೆಳಾ ಪರ್ಮಾಣೆ ಕರಿನಾಂವ್ ತರ್ ಆಮಿ ಗುನ್ಯಾಂವ್ಕಾರ್ ಜಾತಾಂವ್. ತಶೆಂಚ್ ಆಮ್ಕಾಂ ಸುಕ್ರಾರ್ ತರ್, ತುಮ್ಕಾಂ ಆಯ್ತಾರ್ ನಮ್ಯಾರ್ಲಾ ಮ್ಹಣ್ ಆಮಿ ಕಿತ್ಯಾಕ್ ಸ್ವೀಕಾರ್ ಕರಿನಾಂವ್? ತುಂವೆಂ ಆಮ್ಚ್ಯಾ ಘರಾ ಯೇವ್ನ್ ಕಿತ್ಲೆ ಆಯ್ತಾರ್ ಮೀಸ್ ಖಳೊನ್ ಕಾಯ್ದೊ ಮೊಡ್ಲೊ, ತೆಂ ಪಾತಾಕ್ ಬೆಜ್ತಲೆಂ ಮ್ಹಜಾಚ್ ಧುವೆಚೆರ್. ದೆಕುನ್ ಆನಿ ಮುಖಾರ್ ತೆಂ ಪಾತಾಕ್ ತಾಚೆರ್ ಬೆಜ್ಚೆಂ ನಾಕಾ. ದೆಕುನ್ ತುಂ ಹರ್ಯೆಕಾ ಆಯ್ತಾರಾ ಮಿಸಾಕ್ ವಚ್ ಆನಿ ತುಜೊ ವೇಳ್ ಬರ್ಯಾನ್ ಪಾಶಾರ್ ಕರುನ್ ಯೆ“
ಮಡಮ್ ನಾಫೀಜಾನ್ ದಿಲ್ಲಿ ಆಜಾದಿ ಆನಿ ಕೆಲ್ಲಿ ದಯಾ ಆಯ್ಕೊನ್ ಲವೀನಾಚಾ ದೊಳ್ಯಾಂನಿ ಸಂತೊಸಾಚಿಂ ದುಃಖಾಂ ವಾಳ್ಳಿಂ. ತೆಣೆ ಯೂಸುಪ್ಯಿ ಖುಶಿ ಜಾತಾನಾ, ಹೆಣೆ ಮರಿಯಮ್ ಮಾತ್ರ್ ಆವಯ್ಚೆರ್ ರಾಗಾರ್ ಜಾವ್ನ್ ಶೀದಾ ಆಪ್ಲ್ಯಾ ರೂಮಾಕ್ ವಚುನ್ ದಾರ್ ಬಂದ್ ಕರಿಲಾಗ್ಲೆಂ.
ರಾತ್ಚ್ಯಾ ಜೆವ್ಣಾಕ್ ಮರಿಯಮ್ ಯೇಂವ್ಕ್ ನಾತ್ಲ್ಲೆಂ ಪಳೆವ್ನ್, ಘರ್ಚ್ಯಾ ಹೆರಾಂನಿ ಪರ್ವಾ ಕರುಂಕ್ನಾ ತರೀ, ಮರಿಯಮಾಕ್ ರಾತಿಂ ಸುಫ್ ಪಿಯೆಂವ್ಚಿ ಸವಯ್ ಆಸಾ ಮ್ಹಣ್ ಜಾಣಾ ಆಸ್ಲ್ಲ್ಯಾ ಲವೀನಾನ್ ಗರಮ್ ಸುಫ್ ತಾಚಾ ರೂಮಾಕ್ ವೆಲೊ. ಲವೀನಾಕ್ ಪಳೆವ್ನ್ ಆಪ್ಲೆ ತಮಾಶೆ ಕರುಂಕ್ ಆಯ್ಲಾಂ ಮ್ಹಣ್ ಚಿಂತುಂನ್, ಮರಿಯಮಾನ್ ಟ್ರೇಯಿಂತ್ ಆಸ್ಲ್ಲೊ ಸುಫಾಚೊ ಬಾಲ್ ಕಾಡುನ್ ಲವೀನಾಚಾ ತೊಂಡಾಂರ್ ಮಾರ್ಲೊ!!!
“ದೆವಾ...., ಮೆಲಿಂ ಹಾಂವ್......!!!“ ಗರಮ್ ಸುಫ್ ತೊಂಡಾರ್ ಪಡ್ಲ್ಲೆಂ ಲವೀಬಿನಾ ಆಪ್ಲೆಂ ಮುಸ್ಕಾರ್ ದೊನ್ಯೀ ಹಾತಾಂನಿ ಲಿಪಯ್ಲಾಗ್ಲೆಂ.
“ನಿಕಾಳ್ ಹಾಂಗಾಚೆಂ ದುಸ್ರೆಪಾವ್ಟಿಂ ತುಜೆಂ ತೊಂಡ್ ಮ್ಹಾಕಾ ದಾಖಯ್ನಾಕಾ.....“ ಉತ್ರಾಂ ಸಗಿಂ ಲವೀನಾಕ್ ಲೊಟುನ್ ದಾರಾ ಭಾಯ್ರ್ ಘಾಲುನ್ ಆಪ್ಲ್ಯಾ ಕುಡಾಚೆಂ ದಾರ್ ಬಂದ್ ಕರಿಲಾಗ್ಲೆಂ ಮರಿಯಮ್.
********
ಮರಿಯಮ್ ಪಳೆಂವ್ಕ್ ಮಸ್ತು ಸೊಬೀತ್. ಗ್ರೇಸ್ತ್ ಕಾಯೆಚಾ ಸುಖಾನ್ ವಾಡ್ಲ್ಲೆಂ ತೆಂ, ಕುಡಿವಿಶ್ಯಾಂನಿ ಫುಲೊನ್ ತಾಣೆ ನೆಸ್ಚ್ಯಾ ತ್ಯಾ ಅದುನಿಕ್ ನೆಸ್ಣಾರ್ ಕೊಣಾಯ್ಕಿ ಪಿಶ್ಯಾರ್ ಘಾಲ್ತಾಲೆಂ. ಅಟ್ರಾ ವರ್ಸಾಂ ತಾಕಾ ಭರ್ಲ್ಲಿಂ ಆನಿ ಕೊಲೆಜಿಕ್ ವ್ಹೆತಾನಾ ಹರ್ಯೆಕಾ ದಿಸಾ ತೆಂ ಆಪ್ಣೆ ನೆಸ್ಲ್ಲ್ಯಾ ರಂಗಾಚೆಂ ಕಾರ್ ವ್ಹರ್ತಾಲೆಂ. ತಶೆಂ ತಾಕಾಚ್ ಮ್ಹಣೊನ್ ತಾಚಾ ಬಾಪಾಯ್ನ್ ತಾಕಾ ಸಾತ್ ಕಾರಾಂ ಘೆವ್ನ್ ದಿಲ್ಲಿಂ. ಏಕ್ ದೀಸ್ ಕಾರಾರ್ ವ್ಹೆತಾನಾ, ತಾಕಾ ದೊಳ್ಯಾಂಕ್ ಕಾಳೊಕ್ ಭಗ್ಲೊ! ಕಾಂಯ್ ದಿಸಾನಾ ಜಾಲೆಂ!! ವೆಗಾನ್ ಆಸ್ಲ್ಲೆಂ ಕಾರ್ ಭಿರಾಂಕುಳ್ ಆವ್ಘಡಾಥಾವ್ನ್ ಚುಕೊಂಕ್ ಮರಿಯಮಾನ್ ಕಾರಾಚೆಂ ಸ್ಟೇರಿಂಗ್ ಎಕಾಚ್ಫಾರಾ ಘುಂವ್ಡಾಯ್ಲೆಂ. ಪರಿಣಾಮ್, ಕಾರ್ ರಸ್ತೊ ಸೊಡುನ್ ಫುಟ್ ಪಾತಿರ್ ಚಡೊನ್ ಲಾಯ್ಟ್ ಖಾಂಬ್ಯಾಕ್ ಹಾಂಡೊನ್ ಥಾಂಬ್ಲೆಂ! ಮರಿಯಮ್ ತ್ಯಾ ಮಾರೆಕಾರ್ ಆವ್ಘಡಾಥಾವ್ನ್ ಬಚಾವ್ ಜಾಲ್ಲೆಂ ತಾಚಿ ನಾಕ್ಷಿ ಸೈತ್ ವಾಂಕ್ಡಿ ಜಾಂವ್ಕ್ ನಾ ಪುಣ್ ಮತ್ ಚುಕೊನ್ ತಾಚೆಂ ಕಾರ್ ಮಾತ್ರ್ ಸಗ್ಳೆಂ ಚೆಂಚೊನ್ ಗೆಲ್ಲೆಂ!!!
ಕೂಡ್ಲೆ ಪೊಲಿಸ್ ಕಾರ್ ಥಂಯ್ಸರ್ ಪಾವ್ಲೆಂ, ಥೊಡ್ಯಾಚ್ ವೆಳಾನ್ ಎಂಬುಲೆನ್ಸ್ಯಿ ಪಾವ್ಲೆಂ. ಮತಿಹೀನ್ ಮರಿಯಮಾಕ್ ಆಸ್ಪತ್ರೆಕ್ ಸಾಗ್ಸಿಲೆಂ. ಮರಿಯಮ್ ಮತಿರ್ ಯೆತಾನಾ ತಾಣೆ ಆಸ್ಪತ್ರೆಂತ್, ತಾಚಾ ಘರ್ಚ್ಯಾಂಕ್ ತಾಚಾ ಖಟ್ಲ್ಯಾ ಭಂವ್ತಿ ಪಳೆಲೆಂ. ಆಪ್ಣಾಕ್ ಸುರಕ್ಷಿತ್ ಪಳೆವ್ನ್ ತಾಕಾ ಸರ್ವ್ ಉಗ್ಡಾಸ್ ಆಯ್ಲೊ, ತಾಣೆ ತಾಕಾ ದೊಳ್ಯಾಂಕ್ ಕಾಳೊಕ್ ಆಯಿಲ್ಲೆಂ ಸಾಂಗ್ತಾನಾ, ಸ್ವಾಭಾವೀಕ್ಪಣಿ ದಾಕ್ತೆರಾಂನಿ ತಾಚಾ ತಕ್ಲೆಚೆಂ ಅನಿ Sಛಿಚಿಟಿ ಕೆಲೆಂ. ರಿಪೊರ್ಟ್ ಯೆತಾನಾ ಮಾತ್ರ್ ಸಗ್ಳ್ಯಾಂಚಾ ವದನಾರ್ ಮರಿಯಮಾಚಾ ಮರ್ಣಾಚ್ಯೊ ಘಾಂಟಿ ವಾಜುಂಕ್ ಸುರು ಜಾಲ್ಲ್ಯೊ.
ವ್ಹಯ್ ಮರಿಯಮಾಚಾ ಮೆಂದಾಚಾ ದಾವ್ಯಾ ಬಾಗಾಂತ್ ಏಕ್ ಮಾಸ್ಕುಟ್ ವಾಡ್ಲ್ಲೆಂ. ತೆಂ
Brain tumour ನ್ಹಯ್ ಬಗಾರ್ ಹೆರ್ ಚಡ್ತಿಕ್ ಮಾಸಾಚೊ ಮುದೊ ಮೆಂದಾ ಭಿತರ್ ವಾಡ್ಲಾ ಆನಿ ಪಿಡೆಸ್ತಾಚಾ ಜಿವಾಕ್ ಬೋವ್ ಆಪಾಯ್ ಜಾವ್ನಾಸಾ ಮ್ಹಳ್ಳೆಂ ಆಯ್ಕೊನ್ ಸರ್ವಾಂಯ್ ಭಿಯೆಲ್ಲಿಂ. ಬ್ರೇಯ್ನ್ ಟ್ಯೂಮರ್ ತರೀ ಭಾಯ್ಲಾ ಗಾಂವಾಂನಿ ಒಪ್ರೇಶನ್ ಕರುನ್ ಸಭಾರ್ ಜಾಣಾ ಬರಿಂ ಜಾಲ್ಲೆಂ ದಾಖ್ಲೆ ಆಸಾತ್ ಆನಿ ಮರಿಯಮಾಚಿ ಪಿಡಾ ಕೊರೊಡಾಂತ್ ಎಕ್ಲ್ಯಾಕ್ ಜಾಂವ್ಚಿ ಪಿಡಾ ಆನಿ ಕಾಂಯ್ ಕರುಂಕ್ ಜಾಯ್ನಾತ್ಲ್ಲಿ ಪಿಡಾ ಜಾವ್ನಾಸ್ಲ್ಲಿ.
ಹಿ ಖಭಾರ್ ಲವೀನಾಕ್ ಮೆಳ್ತಾನಾ, ತೆಂ ಬೋವ್ ಬೆಜಾರ್ ಜಾಲ್ಲೆಂ ಆನಿ ತ್ಯಾ ದೀಸ್ ತೆಂ
ಮಡಮಿ ಸಾಂಗಾತಾ ಆಸ್ಪತ್ರೆಕ್ ಮರಿಯಮಾಕ್ ಪಳೆಂವ್ಕ್ ಗೆಲೆಂ. “ದೆವಾಚೆರ್ ಭರ್ವಸೊ ದವರ್ ಮರಿಯಮ್, ತುಂ ಬರೆಂ ಜಾತಲೆಂಯ್. ಹಾಂವ್ ತುಜೆ ಖಾತಿರ್ ಮಾಗ್ತಾಂ.....“ ಲವೀನಾನ್ ಭುಜಯಿಲ್ಲೆಂ ಮರಿಯಮಾಕ್.
“ಖಂಚಾ ದೆವಾಲಾಗ್ಗಿಂ ಮಾಗ್ತಾಯ್? ತುಮ್ಚ್ಯಾ ಈಸಾಲಾಗಿಂ?“ ಮರಿಯಮ್ ತ್ಯಾ ಸ್ತಿಥೆರ್ಯಿ ಲವೀನಾಚಿ ಛೆಷ್ಟಾಯ್ ಕರುನ್ ಹಿಣ್ಸಿಲಾಗ್ಲೆಂ.
“ದೇವ್ ಸಗ್ಳ್ಯಾಂಚೆ ಎಕ್ಚ್ ಮರಿಯಮ್, ಜಾಂವ್ ತೊ ತುಮ್ಚೊ ಆಲ್ಲಾ ವ ಮೊಹಮ್ಮದ್, ಆಮ್ಚೊ ಗೊಡ್ ವ ಜೆಜು......“
“ತೊಂಡ್ ದಾಂಪ್!“ ಮರಿಯಮ್ ರಾಗಾನ್ ತಾಳೊ ಕಾಡಿಲಾಗ್ಲೆಂ. “ಆಮ್ಚ್ಯಾ ಪ್ರೊಫೆತಾಕ್ ತುಮ್ಚ್ಯಾ ಈಸಾಕ್ ಸರಿ ಕರಿನಾಕಾ.....“ ಮಡಮಿನ್ ಲವೀನಾಕ್ ಉಲೈನಾಶೆಂ ಹಿಶಾರೊ ಕೆಲೊ.
“ಪುತಾ, ಆತಾಂ ಜಾತಿ ಥಂಯ್ ದ್ವೇಷ್ ನಾಕಾ. ಖಂಚಾಯ್ಕಿ ತುಂ ಬರೆಂ ಜಾ......“ ಮಾರೆಕಾರ್ ಪಿಡೆಕ್ ವಳಗ್ ಜಾಲ್ಲ್ಯಾ ದುವೆಚಾ ಜಿವಾಚಿ ಆಶಾ ಸಾಂಡ್ಲ್ಲಿ ಆಸ್ತಾಂ, ತಾಕಾ ದುಖಂವ್ಕ್ ಆವಯ್ಕ್ ವ ಕೊಣಾಯ್ಕಿ ಮನ್ ನಾತ್ಲ್ಲೆಂ.
ಮರಿಯಮಾಚಾ ಭಲಾಯ್ಕೆ ಖಾತಿರ್ ತಾಚಾ ಕುಟ್ಮಾಚಾಂನಿ ವಿಷೇಶ್ ರಿತಿರ್ ತಾಂಚಾ ಪಳ್ಳೆಂನಿ ಮಾಗೊಂಕ್ ಸುರು ಕೆಲೆಂ ಆನಿ ಮಾಗೈಲೆಂ. ಪುಣ್ ಕಸಲೆಂಚ್ ಬರೆಂ ಪಣ್ ಲಾಬ್ಲೆಂನಾ. ಆಖ್ರೇಕ್ ದಾಕ್ತೆರಾಂಚಾ ಸಲಹಾ ಪ್ರಕಾರ್ ಮರಿಯಮಾಕ್ ತಾಚಾ ಬಾಪಾಯ್ನ್ ಆನಿ ಭಾವಾನ್ ಆಮೆರಿಕಾಂತ್ಲ್ಯಾ ಜೊರ್ಜಿಯಾಂತ್ ಆಸ್ಚ್ಯಾ ಮೆಂದಾಚೆರ್ ಚಿಕಿತ್ಸಾ ಚಲಂವ್ಚ್ಯಾ ನಾಂವಾಡ್ಗಿಗ್ ಆಸ್ಪತ್ರೆಕ್ ಸಾಗ್ಸಿಲೆಂ. ಥಂಯ್ಸರ್ ದಾಕ್ತೆರಾಂನಿ ಮರಿಯಮಾಚಾ ಮೆಂದಾಕ್ Diagnose ಕರುನ್ ಪಳೆತಾನಾ, ಕಾಂಯ್ ಕರುಂಕ್ ಜಾಯ್ನಾತ್ಲ್ಲಿ ಕೇಸ್, ಫಕತ್ತ್ ಏಕ್ ಮಹಿನೊ ಮಾತ್ರ್ ಆಸಾ ತಾಚೆಲಾಗಿಂ ಮ್ಹಣ್ ತೀರ್ಪ್ ದಿಲೆಂ.
ಮರಿಯಮಾಚಾ ಮರ್ಣಾ ತಿರ್ಪಾವಿಶಿಂ ಆಯ್ಕಾಲ್ಲೆ ಬಾಪುಯ್ ಪೂತ್, ವಾರ್ಡಾಚಾ ಭಾಯ್ರ್ ಬಸೊನ್ ರಡಾಲಾಗ್ಲೆ. ದೊಗಾಂ ದಾದ್ಲ್ಯಾಂಕ್ ರಡ್ಚೆಂ ಪಳಯಿಲ್ಲೊ ಏಕ್ ಇಂಡಿಯಾಚೊ ತರ್ನಾಟೊ, ಯೇವ್ನ್ ವಿಚಾರಿಲಾಗ್ಲೊ, ತೆದ್ನಾಂ ಮರಿಯಮಾಚೊ ಭಾವ್ ಯೂಸುಪ್ ಗಜಾಲ್ ಸಾಂಗಾಲಾಗ್ಲೊ. ಆಯ್ಕಾಲ್ಲೊ ತರ್ನಾಟೊ ಮರಿಯಮಾಕ್ ಪಳೆಂವ್ಕ್ ವಾರ್ಡಾಕ್ ಗೆಲೊ.
“ಮ್ಹಜೆ ನಾಂವ್ ಡೆರನ್ ಆನಿ ಹಾಂವ್ ಹ್ಯಾ ಆಸ್ಪತ್ರೆಂತ್ ಲ್ಯಾಬ್ ಟೆಕ್ನಿಶಿಯನ್“ ತೊ ಮ್ಹಣಾಲೊ.
ಉಪ್ರಾಂತ್ ಮರಿಯಮಾಕ್ ಪಳೆವ್ನ್ “ಇತ್ಲೆಂ ಸೊಭಿತ್ ಆನಿ ತರ್ನಾಟೆಂ ಹೆಂ ಆಸ್ತಾಂ, ಹಾಚೆ ಥಂಯ್ ಅಶೆಂ ಜಾಂವ್ಕ್ ನ್ಹಜೊ ಆಸ್ಲ್ಲೆಂ. ಥೊಡೆ ಪಾವ್ಟಿಂ ದೇವ್ ಆಮ್ಚಿ ಪರಿಕ್ಷಾ ಘೆತಾ. ದೆಕುನ್ ತುಮಿ ಆಶಾ ಸಾಂಡ್ಚಿ ನ್ಹಯ್, ದೆವಾಚೆರ್ ಭರ್ವಸೊ ದವರುನ್ ತಾಚೆಲಾಗಿಂಚ್ ಮಾಗೊಂಕ್ ಜಾಯ್. ಸಾಧ್ಯ್ ಆಸಾ ತುಮ್ಚೆಂ ಮಾಗ್ಣೆ ಸ್ವೀಕಾರ್ ಜಾಂವ್ಕ್.....“
“ಆಮಿ ಮಾಗ್ಲ್ಲೆಂ ತಿತ್ಲೆಂ ಕೊಣೆಂಯ್ ಮಾಗೊಂಕ್ ನಾ ಕೊಣ್ಣಾ. ಜಾಯ್ತೆಂ ಮಾಗ್ಲೆಂ ಆನಿ ಮಾಗೈಲೆಂ, ಪುಣ್ ಕಾಂಯಿಂಚ್ ಬರೆಂಪಣ್ ಲಾಭ್ಲೆಂನಾ.....“ ಮರಿಯಮಾಚೊ ಬಾಪುಯ್ ಆಬ್ದುಲ್ ವಹಾಬ್ ಮ್ಹಣಾಲೊ.
“ಜಾಯ್ತೆಂ ಮಾಗ್ಲೆಂ ತುಮಿ ಮ್ಹಣ್ತಾತ್, ಪುಣ್ ದೆವಾಕ್ ತೆಂ ಮಾಗ್ಣೆಂ ಉಣೆ ಜಾಲೆಂ ಜಾಂವ್ಕ್ ಪುರೊ, ವ ತೆಂ ಮಾಗ್ಣೆಂ ತಾಚೆ ಥಂಯ್ ಪಾವುಂಕ್ ನಾಂಯ್ ಜಾಂವ್ಕ್ ಪುರೊ. ದೆಕುನ್ ಕಳಾನಾಸ್ತಾಂ ಮಾಗ್ತೆ ರಾವಾ“
“ಹಾಂಗಾಸರ್ ಮಸ್ಜೀದ್ ಖಂಯ್ಚರ್ ಆಸಾ ಮ್ಹಣ್ ಕಳಿತ್ನಾ. ನಾ ಜಾಲ್ಯಾರ್ ಆಮಿ ಹ್ಯಾ ವಗ್ತಾ ಮಸ್ಜಿದೆಂತ್ ಆಸ್ತ್ಯಾಂವ್“
“ಮಾಗ್ಣೆಂ ಖಂಯ್ಸರ್ಯಿ ಕರ್ಯೆತ್. ತೆಂ, ಮಸ್ಜಿದೆಂತ್, ಇಗರ್ಜೆಂತ್ ವ ಮಂದಿರಾಂತ್ಚ್ ಮಾಗಾಜಾಯ್ ಮ್ಹಣ್ನಾ. ಪಾಂವ್ಚೆಂ ತೆಂ ಎಕಾಚ್ ದೆವಾಕ್“
“ಆಮಿ ತೆಂ ಬರ್ಯಾನ್ ಜಾಣಾಂವ್, ಆನಿ ಆಮ್ಚಿ ಮಾಗ್ಚಿ ರೀತ್ ತುಕಾ ಕಳಿತ್ ಆಸೊಂಕ್ಪುರೊ. ದೆಕುನ್ ಅಸಲ್ಯಾ ಜಾಗ್ಯಾನಿ ಮಾಗೊಂಕ್ ದಾಕ್ಷೆಣ್ ಭಗ್ತಾ.....“ ಯೂಸುಫ್ ಮ್ಹಣಾಲೊ.
“ತರ್ ಏಕ್ ಕಾಮ್ ಕರಾ, ಹ್ಯಾಚ್ ಆಸ್ಪತ್ರೆಂತ್ ಏಕ್ ಕೊಪೆಲ್ ಆಸಾ. ಜಾಂವ್ಕ್ ತೆಂ ಕ್ರೀಸ್ತಾಂವಾಂಚೆಂ. ಪುಣ್ ಥಂಯ್ಚರ್ ಕೊಣೆಯಿ ವಚುನ್ ಮಾಗೊಂಕ್ ಕಾಂಯ್ ಬಂದಡ್ ನಾ. ತುಮಿ ತುಮ್ಚ್ಯಾ ರಿತಿ ರಿವಾಜಿ ಪ್ರಕಾರ್ ಮಾಗ್ಯೆತ್.....“
“ಹೆಂ ಸಾಂಗ್, ತುಂ ಕ್ರೀಸ್ತಾಂವಾಚೊ?“
“ವ್ಹಯ್.....“
“ದೆಕುನ್ಂಚ್ ತುಂವೆಂ ತಶೆಂ ಸಾಂಗ್ಲೆಂಯ್. ಪುಣ್ ಆಮಿ ಹೆರಾಂಚಾ ದೇವ್ ಸ್ಥಾನಾಂತ್ ಮಾಗೊಂಕ್ ವಚಾನಾಂವ್ ಆಮ್ಕಾಂ ತೆಂ ಆಡ್ವರ್ಲಾಂ“
“ತೆಂ ಮನ್ಶ್ಯಾನ್ ಕೆಲ್ಲ್ಯೊ ರಿತಿ ರಿವಾಜಿ, ದೆವಾನ್ ನ್ಹಯ್“
“ಡೆರನ್, ಹಾಂವ್ ಯೆತಾಂ ತುಜೆ ಸಂಗಿಂ......“ ಖಟ್ಲ್ಯಾವಯ್ಲೆಂ ಮರಿಯಮ್ ಎಕಾಚ್ಫಾರಾ ಉಟ್ಲೆಂ. “ಹೆರಾಂನಿ ಮ್ಹಜೆ ಖಾತಿರ್ ಮಸ್ತು ಮಾಗ್ಲಾಂ, ಆತಾಂ ಹಾಂವೆಂಯಿ ಮಾಗೊಂಕ್ ಜಾಯ್.....“
“ಪುಣ್ ತುಂವೆಂ ಕ್ರೀಸ್ತಾವಾಂಚಾ ಇಗರ್ಜೆಕ್ ಕಶೆಂ ವೆಚೆಂ?“ ಯೂಸುಪ್ ಮ್ಹಣಾಲೊ.
“ಮ್ಹಾಕಾ ಕಳಿತ್ ನಾ, ಪುಣ್ ಹಾಂವೆಂ ವಚಾಜಾಯ್....“ ಮರಿಯಮ್ ಫುಡೆಂ ಚಮ್ಕಾಲೆಂ.
“ಹೆಂ ಕಿತೆಂ ಕರ್ತಾಯ್ ಪುತಾ, ಆಮಿ ಹೆರಾಂಚಾ ದೇವ್ಸ್ಥಾನಾಂನಿ ಮಾಗ್ಲ್ಯಾರ್ ತೆಂ ದೆವಾಕ್ ಪಾವಿತ್ ಜಾಯ್ನಾಂ, ಶಿವಾಯ್ ಆಲ್ಲಾಕ್ ಅಖ್ಮಾನ್ ಕೆಲ್ಲೆ ಪರಿಂ ಜಾಯ್ತ್....“
“ತೆಂ ಆಮಿ ಚಿಂತ್ಚೆಂ ಬಾಬಾ. ಹಾಂವೆಂ ಕ್ರೀಸ್ತಾಂವಾಕ್ ಲೆಕಾ ವರ್ತೆಂ ದ್ವೇಷಿಲಾಂ. ಮ್ಹಾಕಾ ಪಳೆಂವ್ಕ್ ಆಯಿಲ್ಲ್ಯಾ ಆಮ್ಚ್ಯಾ ಕಾಮಾಚಾ ಲವೀನಾಕ್, ತೆಂ ಮ್ಹಜೆ ಖಾತಿರ್ ಮಾಗ್ತಾ ಮ್ಹಳ್ಳ್ಯಾಕ್ ಸೈತ್ ಹಾಂವೆಂ ತಾಕಾಚ್ ನ್ಹಯ್ ತಾಂಚಾ ದೆವಾಕ್ ಸೈತ್ ಅಖ್ಮಾನ್ ಕೆಲಾ. ಮೊರ್ಚೆ ಪಯ್ಲೆಂ ಮ್ಹಜಾ ಪಾತ್ಕಾಚೆಂ ಭಗ್ಸಾಣೆ ಹಾಂವ್ ಆಲ್ಲಾಕಡೆನ್ ಮಾಗ್ತಾಂ. ಜಾಂವ್ ಹಾಂವೆಂ ಮಾಗೊಂಕ್ ವೆಚೊ ಜಾಗೊ ಹೆರ್ ಧರ್ಮಾಚೊ, ಪುಣ್ ಹಾಂವೆಂ ಮಾಗ್ಚೆಂ ಆಮ್ಚ್ಯಾ ಆಲ್ಲಾ ಕಡೆನ್ಂಚ್ ಬಾಬಾ.....“ ಬಾಪಾಯ್ಚ್ಯಾ ವ ಭಾವಾಚಾ ಪ್ರತಿಕ್ರೀಯೆಕ್ ರಾಕಾನಾಸ್ತಾಂ ಮರಿಯಮ್ ಡೆರನಾಸಂಗಿಂ ಕೊಪೆಲಾಕ್ ಗೆಲೆಂಚ್.
ತ್ಯಾ ಕೊಪೆಲಾಂತ್ ಮರಿಯಮಾನ್ ಪಾಂಯ್ ದವರ್ತಾನಾ, ತಾಚಾ ಕುಡಿಂತ್ ಏಕ್ ಶಿರ್ಸಿರೊ ಧಾಂವ್ಲ್ಲೆಂ ಪರಿಂ ತಾಕಾ ಭಗ್ಲೆಂ. ಸಗ್ಳೆಂ ಕೊಪೆಲ್ ಇತ್ಲ್ಯಾ ಉಜ್ವಾಡಾನ್ ಪರ್ಜಳ್ಚೆಪರಿಂ ದಿಸ್ಲೆಂ ಕೀ, ತೊ ಉಜ್ವಾಡ್ ತೆಂ ಆಪ್ಲ್ಯಾ ಅಸ್ಕತ್ ದೊಳ್ಯಾಂನಿ ಪಳೆಂವ್ಕ್ ಸಕ್ಲೆಂನಾ, ಜಶೆಂ ಆಮಿ ಸುರ್ಯಾಕ್ ಪಳೆಂವ್ಕ್ ಸಕಾನಾತ್ಲ್ಯಾ ಪರಿಂ. ಏಕ್ ವಿಷೇಶ್ ಸಂತೋಸ್ ಆನಿ ಉರ್ಭಾ ತಾಚಾ ಕಾಳ್ಜಾಂತ್ ಭರ್ಲ್ಲೆ ಪರಿಂ ತಾಕಾ ಭಗ್ಲೆಂ. ಅಸಲೊ ವಿಚಿತ್ರ್ ಅನುಭವ್ ತಾಣೆ ಕೆದ್ನಾಂಚ್ ಭಗ್ಲ್ಲೊ ನಾ. ಆಲ್ತಾರಿಚಾ ಉಜ್ವ್ಯಾ ಕುಶಿನ್ ಮರ್ಯೆಚಿ ಹಾತ್ ವಿಸ್ತಾರಾವ್ನ್ ರಾವ್ಲ್ಲಿ ಇಮಾಜ್ ಸಗ್ಳಿಚ್ ಸುರ್ಯಾಚಾ ಉಜ್ವಾಡಾನ್ ಪರ್ಜಳ್ಚೆಪರಿಂ ದಿಸ್ತಾಲಿ ತಾಕಾ. ತೆಂ, ತೊ ಪಳೆಂವ್ಕ್ ಸಕಾನಾತ್ಲ್ಲೊ ಉಜ್ವಾಡ್ ಆಪ್ಲ್ಯಾ ದೊಳ್ಯಾಂನಿ ಕಷ್ಟಾಂನಿ ಜಿರವ್ನ್ ತ್ಯೆ ಮರ್ಯೆಚಾ ಇಮಾಜಿಲಾಗ್ಗಿಂ ಗೆಲೆಂ. ಲಾಗ್ಗಿ ಲಾಗಿಂ ಪಾವ್ತಾನಾ ತೆಂ ಆಪ್ಶೆಂಚ್ ದಿಂಬ್ಯೆರ್ ಗಳ್ಳೆಂ......
ಹೆಂ ಪಳಯಿಲ್ಲೊ ಡೆರನ್ ಅಜಾಪ್ ಜಾಲೊ! ಪುಣ್ ತೊ ಪ್ರಕಾಸ್ ಜಾಂವ್, ವ ತಸಲೊ ವಿಚಿತ್ರ್ ಅನುಭವ್ ಡೆರನಾಕ್ ಮಾತ್ರ್ ಕಳಿತ್ ಜಾಂವ್ಕ್ ನಾ. ದಿಂಬ್ಯೆರ್ ಪಡ್ಲ್ಲೆಂ ಮರಿಯಮ್ ಏಕ್ ವೊರ್ ದೊಳೆ ದಾಂಪುನ್ ಹಾತ್ ಜೊಡುನ್ ಆಸ್ಲ್ಲೆಂ. ಕೊಪೆಲಾಚಾ ಭಾಯ್ರ್ ಥಾವ್ನ್ ಬಾಪುಯ್ ಆನಿ ಭಾವ್ ಪಳೆವ್ನ್ ಆಸ್ಲ್ಲೆ. ತಾಂಕಾಂ ಮರಿಯಮಾನ್ ತಶೆಂ ಕೆಲ್ಲೆಂ ಪಳೆವ್ನ್ ಖಠೀನ್ ರಾಗ್ ಆಯಿಲ್ಲೊ, ಪೂಣ್ ತೆ ಅಸಾಹಾಯೆಕ್ ಜಾವ್ನಾಸ್ಲ್ಲ್ಯಾನ್, ಭಿತರ್ ವಚುಂಕ್ ಸಕ್ಲೆಂನಾಂತ್.
ಸವ್ಕಾಸ್ ಮರಿಯಮ್ ಉಟೊನ್ ಮರ್ಯೆಚಾ ಪಾಂಯಾಮುಳಾಂತ್ ಗೆಲೆಂ ಆನಿ ತ್ಯೆ ಇಮಾಜಿಚೊ ಉಮ್ಹೊ ಘೆವ್ನ್ ದಾವ್ಯಾ ಕುಶಿನ್ ಆಸ್ಚ್ಯಾ ಜೆಜುಚಾ ಪವಿತ್ರ್ ಕಾಳ್ಜಾಚಾ ಇಮಾಜಿ ಕಡೆನ್ ವಚುನ್ ತಾಚೊಯಿ ಉಮ್ಹೊ ಘೆವ್ನ್ ಮಾನ್ ಬಾಗವ್ನ್ ಭಾಯ್ರ್ ಆಯ್ಲೆಂ. ತಾಚಾ ತೊಂಡಾರ್ ಏಕ್ ವಿಷಿಷ್ಟ್ ಉರ್ಭಾ ಆನಿ ಉಲ್ಲಾಸ್ ಪಳೆಲೊ ಬಾಪಾಯ್-ಪುತಾನ್. ಡೆರನಾಕ್ಯಿ ಮರಿಯಮಚಾ ವದಾನಾವಯ್ಲಿ ಬದ್ಲಾವಣ್ ಪಾರ್ಕುಂಕ್ ವೇಳ್ ಲಾಗ್ಲೊನಾ.
“ಬಾಬಾ, ಮರಿ ಮ್ಹಜೆ ಕಡೆನ್ ಉಲೈಲಿ. ಮ್ಹಾಕಾ ಕಸಲಿಚ್ ಪಿಡಾನಾ ಮ್ಹಣ್ ಸಾಂಗಾಲಾಗ್ಲಿ.....“ ಮರಿಯಮ್ ಬಾಪಾಯ್ ಕಡೆನ್ ಸಾಂಗಾಲಾಗ್ಲೆಂ. “ಕಿತ್ಲೆಂ ಸಮಾಧಾನ್ ಆನಿ ಮತಿಕ್ ಉಜ್ವಾಡ್ ಮ್ಹಾಕಾ ಲಾಬ್ಲೊ ತ್ಯಾ ಜಾಗ್ಯಾರ್ ಮ್ಹಣ್ ಹಾಂವ್ ತುಮ್ಕಾ ಸಾಂಗೊಂಕ್ ಸಕಾನಾ. ಹಾಂವ್ ತ್ಯಾ ಜಾತಿಕ್ ದ್ವೇಷಿತಾಲಿಂ, ಹಾಂವ್ ಕಿತ್ಲಿಂ ಚೂಕ್ ಆಸ್ಲ್ಲಿಂ......“
“ತುಜಿ ತಕ್ಲಿ ಪಾಡ್ ಜಾಲ್ಯಾ. ತುಂ ತುಜ್ಯಾ ಮೆಂದಾಚಾ ಪಿಡೆಂತ್ ಪಿಶೆಂ ಜಾಲಾಂಯ್.... ತುಂ ಹೆರ್ ದರ್ಮಾಚಾ ಇಮಾಜಿಂಚೆ ಉಮ್ಹೆ ಘೆವ್ನ್ ಯೇವ್ನ್ ತುಜ್ಯಾ ಸ್ವತಾಃ ಜಾತಿಚೊ ಉಗ್ತ್ಯಾನ್ ಅಖ್ಮಾನ್ ಕರ್ತಾಯ್. ಹ್ಯಾ ಪಯ್ಲೆಂ ತುಂವೆಂ ಮೆಲ್ಲೆಂ ಜಾಲ್ಯಾರ್ಚ್ ಬರೆಂ ಆಸ್ಲ್ಲೆಂ. ತುಕಾ ಬರೆಂ ಕರುಂಕ್ ಹಾಂಗಾ ಹಾಡುನ್ ತುಜೆಂ ಪಿಶೆಂಪಣ್ ಪಳೆಂವ್ಚ್ಯಾ ಬದ್ಲಾಕ್ ತುಕಾ ಕುವೈಟಾಂತ್ಚ್ ಮರೊಂಕ್ ಸೊಡ್ಲ್ಲೆಂ ತರ್ ಬರೆಂ ಆಸ್ಲ್ಲೆಂ.....“ ಭಾವ್ ಆನಿ ಬಾಪುಯ್ ಮರಿಯಮಾಕ್ ದುರ್ಸುನ್ ಉಲೈಲೆ.
ಡೆರನ್ ಮಾತ್ರ್ ಉಲೈಲ್ಯಾರ್ ಜೀಬ್ ಪರ್ತಾನಾ ಮ್ಹಳ್ಳ್ಯಾಪರಿಂ ಮರಿಯಮಾ ಥಂಯ್ ಜಾಲ್ಲ್ಯಾ ಬದ್ಲಾವಣೆಕ್ ಪಳೆವ್ನ್ ಆಸ್ಲ್ಲೊ.
“ಹಾಂವ್ ಸತ್ಚ್ ಸಾಂಗ್ತಾಂ ಯೂಸುಫ್ ಮ್ಹಜಾ ಭಾವಾ, ಮ್ಹಾಕಾ ಪಾತ್ಯೆಯಾತ್ ತುಮಿ. ಹಾಂವ್ ಬರಿಂ ಜಾಲ್ಯಾಂ. ಮ್ಹಾಕಾ ಆತಾಂ ತಕ್ಲೆಂತ್ ಕಸಲ್ಲಿಚ್ ದೂಕ್ ಭಗಾನಾ.....“
“ತುಂವೆಂ ಮರ್ಚೊ ಕಾಳ್ ಲಾಗ್ಗಿಂ ಆಯ್ಲಾ ದೆಕುನ್ ತುಕಾ ತಶೆಂ ಭಗ್ತಾ. ಆಮಿ ತುಕಾ ತ್ಯಾ ಜಾಗ್ಯಾರ್ ವಚುಂಕ್ಚ್ ಸೊಡುಂಕ್ ನ್ಹಜೊ ಆಸ್ಲ್ಲೆಂ. ಥಂಯ್ ವಚುನ್ ಆಲ್ಲಾ ಕಡೆನ್ ಮಾಗ್ತಾಂ ಮ್ಹಣ್ ಎಕಾಚ್ಫಾರಾ ದಿಂಬ್ಯೆರ್ ಪಡೊನ್ ಆಮ್ಚ್ಯಾ ದರ್ಮಾಕ್ ತುಂವೆಂ ಅಖ್ಮಾನ್ ಕೆಲಾಯ್.....“ ಆಬ್ದುಲ್ ವಹಾಬ್ ಮ್ಹಣಾಲೊ.
“ತುಮಿ ಮ್ಹಾಕಾ ಕಾಂಯ್ ಕರುಂಕ್ ಜಾಯ್ನಾಂ ಬಾಬಾ. ತಿ ದೆವಾಚಿಚ್ ಖುಶಿ ಜಾವ್ನಾಸ್ಲ್ಲಿ ಮ್ಹಜೆ ಥಂಯ್ ಪರಿವರ್ತನ್ ಜಾಂವ್ಕ್......“
“ಪರಿವರ್ತನ್?“
“ವ್ಹಯ್ ಹಾಂವ್ ಮ್ಹಜಿ ಜಾತ್ ಸೊಡ್ತಾಂ....., ಹಾಂವ್ ಕ್ರೀಸ್ತಾಂವ್ ದರ್ಮಾಕ್ ವ್ಹೆತಾಂ. ಹಿಚ್ ಜಾವ್ನಾಸ್ಲ್ಲಿ ದೆವಾಚಿ ಖುಶಿ.....“
“ಮರಿಯಮ್.......!!!“ ಆಬ್ದುಲ್ ವಹಾಬ್ ಬೊಬಾಟ್ಲೊ. ತ್ಯಾ ಆವಾಜಾಕ್ ವಾರ್ಡಾಂತ್ಲಿ ಸರ್ವಾಂಯ್ ತಾಂಚೆ ಥಂಯ್ ಪಳೆಲಾಗ್ಲಿಂ. “ತುಂವೆಂ ಅಶೆಂ ಆಮ್ಚ್ಯಾ ಗಾಂವಾಂತ್ ಸಾಂಗ್ಲ್ಲೆಂ ತರ್, ಹಾಂವ್ ತುಕಾ ತಕ್ಷಣಾ ಜಿವೆಶಿಂ ಮಾರ್ತೊಂ......“
“ತುಮಿ ಸಮಾಧಾನ್ ಘೆಯಾತ್, ಸಾಧ್ಯ್ ಆಸಾ ತುಮ್ಚೆಂ ಮಾಗ್ಣೆಂ ಕಬೂಲ್ ಜಾಲಾಂ ಅನಿ ದೆವಾನ್ ಅಜ್ಯಾಪ್ ಕೆಲಾಂ. ದೆಕುನ್ ಆಮಿ ಮರಿಯಮಾಕ್ ಪರಾತ್ ತಾಪಾಸುಂಕ್ ಜಾಯ್.....“ ಡೆರನ್ ಮ್ಹಣಾಲೊ.
“ವ್ಹಯ್ ಖಂಡಿತ್ ತಾಪಾಸ್ಣಿ ಕರುಂಕ್ ಜಾಯ್. ತೆದಾಳಾ ಮಾತ್ರ್ ಹಾಚೆಂ ಪಿಶೆಂ ಸುಟ್ತಲೆಂ. ಬರಿ ಜಾಯ್ನಾತ್ಲ್ಲಿ ಪಿಡಾ ಕ್ರೀಸ್ತಾಂವಾಚಾ ದೆವಾನ್ ಬರಿ ಕೆಲಿ ಮ್ಹಳ್ಳೆಂ ಹಾಚೆಂ ಸಾಂಗ್ಣೆಂ ಫಟ್ ಜಾತಾನಾ ಹೆಂ ತ್ಯಾ ಬ್ರಮಿದೆಂತ್ಲೆಂ ಜಾಗೆ ಜಾತಲೆಂ......“ ಯೂಸುಫ್ ಮ್ಹಣಾಲೊ.
“ಕ್ರೀಸ್ತಾವಾಂಚೊ ದೇವ್ ಆನಿ ತುಮ್ಚೊ ದೇವ್ ವಿಂಗಡ್ ನ್ಹಯ್, ಸಾಧ್ಯ್ ಆಸಾ ತುಮ್ಚ್ಯಾ ಪಾತ್ಯೆಣಿ ಪ್ರಕಾರ್ ತುಮ್ಚೆಂ ಮಾಗ್ಣೆಂಚ್ ಕಬೂಲ್ ಜಾಲಾಂ. ತುಮ್ಚ್ಯಾ ಆಲ್ಲಾನ್ಂಚ್ ಮರಿಯಮಾಕ್ ಬರೆಂ ಕೆಲಾಂ.... ಖಂಚಾಯ್ಕಿ ತಾಚಾ ಮೆಂದಾಚೆಂ ಸ್ಕ್ಯಾನಿಂಗ್ ಆನಿ ಸೊನೊಗ್ರಾಫಿ ಪರಾತ್ ಆಮಿ ಕರ್ಯಾಂ......“ ಡೆರನ್ ಮ್ಹಣಾಲೊ.
ಸೊನೊಗ್ರಾಫಿ ಆನಿ ಸಭಾರ್ ನಮುನ್ಯಾಚಿ ತಾಪಾಸ್ಣಿ ಕರುನ್ ಪಳೆತಾನಾ, ಮರಿಯಮಾಚಾ ಮೆಂದಾಂತ್ ಆಸ್ಲ್ಲೆಂ ತೆಂ ಮಾಸ್ಕುಟ್ ನಪೈಂಚ್ ಜಾಲ್ಲೆಂ. ತಾಕಾ ತಿ ಪಿಡಾಚ್ ನಾ ಆನಿ ತೆಂ ಬಲೈಕೆಂತ್ ಎಕ್ದಮ್ ಬರೆಂ ಆಸಾ ಮ್ಹಳ್ಳೊ ರಿಪೊರ್ಟ್ ಪಳೆವ್ನ್ ಬಾಪುಯ್-ಪೂತ್ ಅಜಾಪ್ಲೆ, ಪುಣ್ ಮರಿಯಮಾ ಥಂಯ್ ಕಸಲಿಚ್ ವಿಸ್ಮಿತ್ಕಾಯ್ ನಾತ್ಲ್ಲಿ. ತೆಂ ಬರ್ಯಾನ್ ಜಾಣಾಂ ಆಸ್ಲ್ಲೆಂ, ತಾಚಿ ಪಿಡಾ ಗೂಣ್ ಜಾಲ್ಯಾ ಮ್ಹಣ್.
ಮರಿಯಮಾಕ್ ಆಸ್ಪತ್ರೆಥಾವ್ನ್ ಘರಾ ವಚುಂಕ್ ಪರ್ವಣ್ಗಿ ಮೆಳ್ಳಿ, ಪುಣ್ ತೆಂ ಪಾಟಿಂ ಕುವೈಟ್ ವಚುಂಕ್ ತಯಾರ್ ಜಾಲೆಂ ನಾ. ಪಾಟಿಂ ಗೆಲ್ಯಾರ್ ತಾಣೆ ಯೊವ್ಜಿಲ್ಲೆಂ ಕರುಂಕ್ ತಾಚಿಂ ವ್ಹಡಿಲಾಂ ಸೊಡ್ಚೆಪರಿಂ ನಾಂತ್ ಮ್ಹಳ್ಳೆಂ ತೆಂ ಬರ್ಯಾನ್ ಜಾಣಾ ಆಸ್ಲ್ಲೆಂ. ಮರಿಯಮಾಚಿ ಝಿದ್ದ್ ಪಳೆವ್ನ್ ನಿಮಾಣೆ ಬಾಪುಯ್ ಧುವೆಕ್ ಸಮ್ಜಾಯ್ಲಾಗ್ಲೊ, “ಪುತಾ, ಜಾಂವ್ಕ್ ಪುರೊ ತುಜೆ ಥಂಯ್ ಅಜ್ಯಾಪ್ ಘಡ್ಲಾಂ, ವ ಹೆಂಯಿ ಜಾಂವ್ಕ್ ಪುರೊ ತುಕಾ ತಿ ಪಿಡಾಚ್ ನಾತ್ಲ್ಲಿ, ಕಾಂಯ್ ಕುವೈಟ್ಚ್ಯಾ ರಿಪೊರ್ಟಾಂತ್ ಚೂಕ್ ಜಾಲ್ಲಿ ವ ಆಮಿ ಇತ್ಲ್ಯಾ ಲೊಕಾನ್ ಮಾಗವ್ನ್ ಆನಿ ಮಾಗ್ಲ್ಲೆಂ ತೆಂ ಆಮ್ಕಾಂ ಆಲ್ಲಾನ್ಂಚ್ ಥೊಡ್ಯಾ ಗಳಾಯೆ ನಿಮ್ತಿಂ ಹ್ಯಾ ಗಾಂವಾಂತ್ ದಿಲಾಂ. ಪುಣ್ ತೆಂ ತುಕಾ ಕ್ರೀಸ್ತಾಂವಾಂಚಾ ಇಗರ್ಜೆಂತ್ ಮೆಳ್ಳೆಂ ಮ್ಹಣ್ ಚಿಂತುನ್ ತುಂವೆಂ ತುಜ್ಯಾ ಕುಟ್ಮಾಕ್ ಸೊಡ್ಚೆಂ, ತುಂವೆಂ ತುಜ್ಯಾ ಜಾತಿಕ್ ಸೊಡ್ಚೆಂ ಹೆಂ ಖಂಚೆಂ ರಾಜಾಂವ್?“
“ಹಾಂವ್ ವಪ್ತಾಂ ಬಾಬಾ ತುಂವೆಂ ಸಾಂಗ್ಚ್ಯಾಂತ್ ಸತ್ ಆಸೊಂಕ್ ಪುರೊ; ಪುಣ್ ಮ್ಹಜೆಂ ಬರೆಂಪಣ್ ಹಾಂಗಾಚ್ ಆಸಾ ಆನಿ ಹಾಂವ್ ತೆಂಚ್ ಕರ್ತೆಲಿಂ ಜೆಂ ಮ್ಹಜೆಂ ಮನ್ ಮ್ಹಾಕಾ ಸಾಂಗ್ತಾ. ತುಮಿ ವಚಾ ಪಾಟಿಂ. ಹಾಂವೆಂ ಮ್ಹಜಿ ಜಾತ್ ಸೊಡ್ತಾಂ ಮಾತ್ರ್ ಮ್ಹಳ್ಳೆಂ, ಪುಣ್ ಮ್ಹಜಾ ಮನ್ಶ್ಯಾಂಕ್ ನ್ಹಯ್. ತುಮಿ ಮ್ಹಜಾ ಕಾಳ್ಜಾಂತ್ ಸದಾಂಚ್ ಆಸ್ತೆಲ್ಯಾತ್.....“
ಮರಿಯಮಾಚಾ ಹಟ್ಟಾ ಮುಖಾರ್ ಬಾಪುಯ್ ಆನಿ ಭಾವ್ ಸಲ್ವಾಲೆ. ತೆ ಪಾಟಿಂ ವ್ಹೆತಾನಾ, ಮರಿಯಮಾನ್ ಬಾಪಾಯ್ ಕಡೆನ್ ಸಾಂಗ್ಲೆಂ,
“ಬಾಬಾ, ಆಮ್ಚೆಂ ಲವೀನಾ, ಬರಿ ಚಲಿ. ಹಾಂವೆಂ ತಾಕಾ ಮಸ್ತು ದುಖೈಲಾಂ ಆನಿ ತಾಚೆಥಂಯ್ ಮಸ್ತು ಕರ್ಮಿಪಣ್ ದಾಖೈಲಾಂ. ತಾಕಾ ತುಂ ಘರ್ ಖಾತ್ಯಾಚಾ ಕಾಮಾ ಥಾವ್ನ್ ಅಜಾದಿ ದೀವ್ನ್ ಬರ್ಯಾ ಕಾಮಾಕ್ ಲಾಯ್. ತೆಂಚ್ ತುಜೆಂ ಧುವ್ ಮ್ಹಳ್ಳೆಪರಿಂ ಮ್ಹಜೊ ಜಾಗೊ ತಾಕಾ ದೀ......“
“ಮರಿಯಮ್....“ ಆಬ್ದುಲ್ ವಹಾಬ್ ಧುವೆಕ್ ವೆಂಗ್ಲೊ. “ಹಾಂವ್ ತುಂವೆಂ ಸಾಂಗ್ಲ್ಲೆಂ ಖಂಡಿತ್ ಕರ್ತಲೊಂ. ತ್ಯೆ ಚಲ್ಯೆಕ್ ಬರ್ಯಾ ಫುಡಾರಾಕ್ ಪಾಯ್ತಲೊಂ. ತುಕಾಯ್ ಹಾಂಗಾ ರಾವುಂಕ್ ಸರ್ವ್ ಬಂದಾಬಸ್ತ್ ಕರುಂನ್ಂಚ್ ಹಾಂವ್ ವ್ಹೆತಾಂ. ಪುಣ್ ತುಂ ಆಮ್ಕಾಂ ವಿಸ್ರಾನಾಕಾ.....“
ಜಾಪಿಂತ್ ಮರಿಯಮ್ ಬಾಪಾಯ್ಚ್ಯಾ ವೆಂಗೆಂತ್ ತಾಚಾ ಖಾಂದ್ಯಾ ಪಾಟ್ಲ್ಯಾನ್ ಸಂತೊಸಾಚಿಂ ದುಃಖಾಂ ರಡ್ಲೆಂ, ತೆದ್ನಾಂ ಮುಖ್ಲ್ಯಾನ್ ಡೆರನ್ ಯೆಂವ್ಚೊ ತಾಕಾ ದಿಸ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
