ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
5. ಆಯ್ಲೆಂ ತಶೆಂ ಗಾಯ್ಲೆಂ
ಮತಿಕ್
ಜಶೆಂ ಆಯ್ಲೆಂ
ತಶೆಂ ಆಮಿ
ಗಾಯ್ಲೆಂ
ರಾಜಾಂವಾಂನಿಂ ಲೆಕ್ಲೆಂ ತಶೆಂ ಲಿಕ್ಲೆಂ
ಎಕೆಕ್ಲ್ಯಾನ್ ತುಕ್ಲೆಂ, ತೆಂ ಲೆಕಾಭಾಯ್ಲೆಂ
ಎಕೆಕ್ಲ್ಯಾಚೆಂ ಕಾಳಿಜ್ ಆಮಿ ಜಿಕ್ಲೆಂ
ನತಾಲಾಂಚೆ ವೆಳಿಂ ದೊಳ್ಯಾಂತ್ ಏಕ್ ಥೆಂಬೊ
ದುಕಾಚೊ ನ್ಹಯ್ ಸಂತೊಸಾಚೊ ಆಸ್ಯೆತ್
ವಾಚ್ತಾನಾ ಹಿಂ ಉತ್ರಾಂ ತುಜ್ಯಾಯಿ ದೊಳ್ಯಾಂತ್ ಥೆಂಬೊ
ಆಯ್ಲೊ ಜಾಲ್ಯಾರ್ ಮ್ಹಜೆ ಖಾತಿರ್ ಸೊಸ್ಯೆತ್
ಜಿರಯ್ನಾಕಾ, ಮಿತ್ರಾ, ಗಳೊ ತುಜೊ ಭರೊಂ
ದೊಳೊಯಿ ತಾಚ್ಯಾ ಸಂಗಿಂ ಭರೊನ್ ಉರೊಂ
ಯೆಂವ್ಚ್ಯಾ ವರ್ಸಾ ತುಕಾ ಮ್ಹಜೊ ಉಗ್ಡಾಸ್ ಉರೊಂ
ಮ್ಹಾಕಾಯಿ ತುಜೊ ಘಡಿಯೆನ್ ಘಡಿ ಉರೊಂ
ನಾರ್ಲಾಮೊಲಾಂ ಜರಿ ಮೊಳ್ಬಾವೆರಿ ಧಾ೦ವ್ಲಿಂ
ಶೆವ್ಯೊ ರೊಸಾನ್ ಬುಡವ್ನ್ ತುಂವೆಂ ಖಾಯ್ಜೆ
ತಾಂದ್ಳಾ ಮೊಲಾಂ ಜರಿ ಪಾಂಚಾ ರುಪ್ಯಾಂ ಪಾವ್ಲಿಂ
ಭುರ್ಗ್ಯಾ೦ಕ್ ತುಜ್ಯಾ ಜಿರ್ಸಾಳೆನ್೦ಚ್ ಲಾಯ್ಜೆ
ಕುದ್ರೆಮುಖಾಕ್ ಪಳೆ ಕೊರೊಡ್ ವರ್ಸಾಂ ವಾಂಚ್ತಾ
ತಕ್ಲಿ ಫ಼ೊಡ್ಲ್ಯಾ ತರ್ಯಿ ಕೆದ್ನಾಂ ರಡ್ಟಾ
ತುಂಗಾ, ಮ್ಹಜ್ಯಾ ಮಿತ್ರಾ ಸತ್ತರ್ ವರ್ಸಾಂ ವಾಂಚ್ತಾ
ರಡ್ಚೆಂ ಮಾತ್ ಕೆದಿಂ ಕೆದಿಂಚ್ ಸೊಡ್ಟಾ
ಮೊಲಾಂ ಕಿತ್ಲಿಂಯಿ ವಾಡೊಂ ಪಾಟಿ ಪೆಂಕ್ಟಾಂ ಮೊಡುಂ
ಸಂತೊಸ್ಭರಿತ್ ಖುಶಾಲ್ಭರಿತ್ ಜಾಂವ್ಯಾಂ
ಕೆಕಿ ಬಿಸ್ಕುತ್ ರಗ್ಡುನ್ ಬಿರಿ ಬೊತ್ಲಿ ಫ಼ೊಡುನ್
ಶಿತಾ ಬದ್ಲಾಕ್ ಮಿಠಾಯ್ ಮಾತ್ ಖಾಂವ್ಯಾಂ
ಪಾಕಿಸ್ಥಾನಾ ಲಡಾಯ್ ಮಾತ್ಯಾರ್ ಯೆವ್ನ್ ತೆಂಕ್ಲಿ
ಯೆಂವ್ಚ್ಯಾ ವರ್ಸಾ ಸತ್ತ್ಯಾನಾಸ್ ಜಾತಾ
ಕೋಣ್ ಮ್ಹಣ್ಟಾ ಕಾಡುನ್ ಗಿರೆಸ್ತಾಂಚಿ ಖೊಂಕ್ಲಿ
ಭುರ್ಗಿಂ ಬಾಳಾಂ ರಗ್ತಾನ್ಚ್ ನ್ಹಾತಾ
ಗುಳೊ ಪಡೊಂ ಮಾಗ್ತಲ್ಯಾಂಚೆರ್ ಅನಾಹುತಾಂ
ಎಫ಼್-೧೬ ತಾಂಚ್ಯಾಚ್ ಮಾತ್ಯಾರ್ ದೆಂವೊಂ
ಭಾರತಾಚೆ ಪರ್ಜೇ ತುಜೆರ್ 1984 ಯೆತಾಂ
ಮರಿ-ಬಾಳಕ್ ಭುಜಾವಣ್ ದಿಂವೊಂ
ಎಕುಣೀಶೆಂ ಚೊವ್ತಾಸಾವ್ಯಾ ಭಾಗಿ ವರ್ಸಾ
ವನಸ್ಪತಿ ಡಬ್ಬ್ಯಾಂತ್ ಚರಬ್ ಜಾಲ್ಯಾ ಆತಾಂ
ಸೊಪುತ್ ಘೆತಾಂ ಆತಾಂ ಸಂತೊಸಾಚಾ ವರ್ಸಾ
ತಾರ್ಲೊ-ಬಾಂಗ್ಡೊ ತುಪಾನ್ ತೊಳುನ್ ಖಾತಾಂ
ಕವಿಚ್ಯಾ ದೊಳ್ಯಾಂಕ್ ದಿಸ್ಲೆಂ ಆನಿ ಜೊ ಅರ್ತ್ ತಾಚ್ಯಾ ಮತಿಕ್ ಜಾಲೊ ತೊ ತಾಣೆಂ ಕವಿತಾ ದ್ವಾರಿಂ ಮೂರ್ತ್ ರುಪಾಕ್ ಹಾಡ್ಲೊ. ಹೆಂ ಕೊಣಾಕ್ ಬರೆಂ ದಿಸ್ಯೆತ್, ಕೊಣಾಕ್ ವಾಯ್ಟ್ ದಿಸ್ಯೆತ್. ಕೋಣ್ ಕವಿಕ್ ಹೊಗಳ್ಶಿತಾನಾ ಕೋಣ್ ತಾಕಾ ಖೆಂಡಿತ್.
ಜಶೆಂ ಕವಿ ಮತಿಕ್ ಆಯಿಲ್ಲೆಬರಿ ಗಾಯ್ತಾ ತಶೆಂ ಮನಿಸ್ ಜಿಣಿ ಯೆತಾ ತಶಿ ಸ್ವೀಕಾರುನ್ ಸಂತೊಸಾನ್ ಜಿಯೆಂವ್ದಿ ಮ್ಹಣ್ಚೊ ಹೆ ಕವಿತೆಚೊ ಇರಾದೊ.
ಕವಿ ಸತ್ ಆಸ್ಲ್ಲೆಂ ಆಪ್ಲ್ಯಾ ಮತಿಂತ್ಲ್ಯಾ ವಿಚಾರಾಂಕ್ ತಾಳ್ಪಡ್ಚೆಬರಿ ಬದ್ಲುಂಕ್ ವಚನಾ. ತೊ ಆಸ್ಲ್ಲೆಂ ಆಸಾತಶೆಂ ಪಳೆವ್ನ್ ಆಪ್ಲ್ಯಾ ಮತಿಂತ್ ಉದೆಲ್ಲಿಂ ಭಾವನಾಂ ಉತ್ರಾಂ ರುಪಾಕ್ ದೆಂವಯ್ತಾ. ಫೆಸ್ತಾಪರ್ಬೆಂಚ್ಯಾ ವೆಳಾರ್ ಸಂತೊಸಾಚೆ ಉಮಾಳೆ ಆಸೊಂ, ಕಸಲೆ ಕಶ್ಟ್ ಆಯ್ಲ್ಯಾರ್ಯಿ ತ್ಯಾ ಕಶ್ಟಾಂಮದೆಂ ಜಾತಾ ತಿತ್ಲೆ ಬರೆ ರಿತಿನ್ ಜಿಣಿ ಸಾರ್ಚೆಬರಿ ಜಾಂವ್ ಮ್ಹಣ್ಚೆಂ ಮಾಗ್ಣೆಂ ಹೆ ಕವಿತೆಂತ್ ಆಸಾ.
ಕುದ್ರೆಮುಖಾಕ್ ಪಳೆ ಕೊರೊಡ್ ವರ್ಸಾಂ ವಾಂಚ್ತಾ
ತಕ್ಲಿ ಫ಼ೊಡ್ಲ್ಯಾ ತರಿ ಕೆದ್ನಾಂ ರಡ್ಟಾ
ತುಂಗಾ, ಮ್ಹಜ್ಯಾ ಮಿತ್ರಾ, ಸತ್ತರ್ ವರ್ಸಾಂ ವಾಂಚ್ತಾ
ರಡ್ಚೆಂ ಮಾತ್ ಕೆದಿಂ ಕೆದಿಂಚ್ ಸೊಡ್ಟಾ
ಕುದ್ರೆಮುಖ ಕೊರೊಡೊಂ ವರ್ಸಾಂ ಜಿಯೆಂವ್ಚೊ ಘಾಟ್, ತಕ್ಲಿ ತಾಚಿ ಫಡ್ಲ್ಯಾ ತರ್ಯಿ ರಡನಾ, ಪುಣ್ ಸಾಟ್ಸತ್ತರ್ ವರ್ಸಾಂ ಜಿಯೆಂವ್ಚೊ ಮನಿಸ್ ಕಿತ್ಯಾಕ್ ಸದಾಂನೀತ್ ಮ್ಹಳ್ಳೆಬರಿ ರಡ್ಟಾ?
ಮನಿಸ್ ಸಂತೊಸಾನ್ ಜಿಯೆಂವ್. ಫುಡಾರಾಂತ್ ಕಶ್ಟ್ ಯೆತಲೆ, ಝುಜಾಂ ಜಾತಲಿಂ, ಸತ್ತ್ಯಾನಾಸ್ ಜಾತಲೆಂ ಮ್ಹಣೊನ್ ಫಾಲೆಂ ಸಾಂಗ್ಚ್ಯಾ ಅನಾಹುತ್ ಪ್ರೇಮಿಂಚೆಂ ಅಂತ್ ಜಾಂವ್.
ಪಾಕಿಸ್ಥಾನಾ ಲಡಾಯ್ ಮಾತ್ಯಾರ್ ಯೆವ್ನ್ ತೆಂಕ್ಲಿ
ಯೆಂವ್ಚ್ಯಾ ವರ್ಸಾ ಸತ್ತ್ಯಾನಾಸ್ ಜಾತಾ
ಕೊಣ್ ಮ್ಹಣ್ಟಾ ಕಾಡುನ್ ಗಿರೆಸ್ತಾಂಚಿ ಖೊಂಕ್ಲಿ
ಭುರ್ಗಿಂ ಬಾಳಾಂ ರಗ್ತಾನ್ಚ್ ನ್ಹಾತಾ
ಗುಳೊ ಪಡೊಂ ಮಾಗ್ತಲ್ಯಾಂಚೆರ್ ಅನಾಹುತಾಂ
ಎಫ಼್-೧೬ ತಾಂಚಾಚ್ ಮಾತ್ಯಾರ್ ದೆಂವೊಂ
ಕಶ್ಟಾಂಮದೆಂ ಸುಖ್ ಪಳೆಂವ್ಚೆ ತಸಲೆಂ ಮನ್ ಮನ್ಶಾಚೆಂ ಜಾಂವ್. ‘ತಾರ್ಲೊ-ಬಾ೦ಗ್ಡೊ ತುಪಾನ್ ತೊಳುನ್ ಖಾತಾ೦.’ ಜಿಣಿಯೆಚ್ಯೊ ಚಿಲ್ಲರ್ ಸಂಗ್ತಿಯಿ ಸಂಭ್ರಮೊನ್ ಆಸೊಂ ಮ್ಹಣ್ಚೆಂ ಮಾಗ್ಣೆಂ ಹೆ ಕವಿತೆಚೆಂ ಚಿಂತಪ್.
ಎಕುಣೀಶೆಂ ಚೊವ್ತಾಸಾವ್ಯಾ ಭಾಗಿ ವರ್ಸಾ
ವನಸ್ಪತಿ ಡಬ್ಬ್ಯಾಂತ್ ಚರಬ್ ಜಾಲ್ಯಾ ಆತಾಂ
ಸೊಪುತ್ ಘೆತಾಂ ಆತಾಂ ಸಂತೊಸಾಚಾ ವರ್ಸಾ
ತಾರ್ಲೊ-ಬಾಂಗ್ಡೊ ತುಪಾನ್ ತೊಳುನ್ ಖಾತಾಂ
ಹಿ ಕವಿತಾ ಸಂಪೂರ್ಣ್ ಆಶಾವಾದಾನ್ ಭರ್ಲ್ಯಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications