ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಜಲ್ಮಾದೀಸ್ - ಪರತ್ ಏಕ್ ನವೆಂ ವರಸ್?
ವರಸ್ : 2004
ಅಂಕೊ : 4
ಮಯ್ನೊ : ಅಕ್ತೋಬರ್
ಸಂಪಾದಕೀಯ್ - 4 .
ವಲ್ಲಿ ಕ್ವಾಡ್ರಸ್
ಅಕ್ತೋಬರ್ ಮಯ್ನೊ ಮಹಾತ್ಮಾ ಗಾಂದಿಚಾ ಜಲ್ಮಾದಿಸಾಚೆಂ ಆಚರಣ್ ಕರ್ಚೊ ಮಯ್ನೊ, ತಶೆಂಚ್ ಆಮ್ಚಾ ಜಲ್ಮಾ ದಿಸಾಚೊಯ್ ಉಡಾಸ್ ಕರುನ್ ದಿಂವ್ಚೊ ಮ್ಹಣ್ಯೆತಾ. ಮನಿಸ್ ಕೋಣ್ಯ್ ಜಾಂವ್, ಜಾಂವ್ ಗ್ರೇಸ್ತ್, ಯಾ ದುಬ್ಳೊ. ಜಾಂವ್ ತೊ ಆಚರಣ್ ಕರುಂದಿ ಯಾ ಕರಿನಾಂಯ್ ರಾವೊಂದಿ.
ಪುಣ್ ಹರ್ಯೆಕ್ಲ್ಯಾಂಕ್ ಜಲ್ಮಾಚೊ ದೀಸ್ ಏಕ್ ಮಹತ್ವಾಚೊಚ್ಚ್ ಮ್ಹಣ್ಯೆತ್. ಪಾಶಾರ್ ಜಾಲ್ಲ್ಯಾ ವರ್ಸಾ ಶಿಕ್ಲ್ಲಿಂ ಲಿಸಾಂವಾಂ ಫ಼ುಡ್ಲ್ಯಾ ವರ್ಸಾಂತ್ ಅಪ್ಲ್ಯಾ ಜಿಣ್ಯೆಕ್ ಲಗ್ತಿ ಕರುಂಕ್ ಏಕ್ ಸಂದರ್ಭ್ ಮಾತ್ರ್ ನ್ಹಯ್ ಆವ್ಕಾಸ್ ಸಯ್ತ್.
"ಜಿವಿತ್ ಜಾವ್ನಾಸಾ ವರ್ಸಾಂಕ್ (ಆವ್ಕಾಕ್) ಜೀವ್ ಭರ್ಚೆಂ ಶಿವಾಯ್ ಜಿವಾಕ್ (ಆವ್ಕಾಕ್) ವರ್ಸಾಂ ಭರ್ಚಿಂ ನ್ಹಯ್" [Life is not filling YEARS into LIFE, but filling LIFE into YEARS] ಮ್ಹಣ್ತಾತ್ ಗಿನ್ಯಾನಿ. ಖಂಯ್ಚಾಕ್ ಖಂಯ್ಚೆಂ ಭರ್ಚೆಂ ಮ್ಹಳ್ಳಿ ಸಂಗತ್ ವೆಗ್ಳಿ, ಪುಣ್ ವರ್ಸಾಂ/ವೇಳ್ ನವಿಂ ನವಿಂ ಸ್ವಪ್ಣಾಂ ಘೆವುನ್ ಯೆತಾತ್ ಆನಿಂ ಪಾಶಾರ್ ಜಾವುನ್ ವೆತಾನಾ, ಆಪ್ಲ್ಯಾ ಚಿಂತ್ಪಾಚೆರ್ ಬೆಸೊರ್ ಘಾಲಿನಾಸ್ತಾಂ ರಾಂವ್ಚೊ ಮನಿಸ್ ಮಾತ್ರ್ ಥಂಯ್ಚೆ ಥಂಯ್ಚ್ ಉರ್ತಾ.
ಆಯ್ಚಾ ಹ್ಯಾ ಫ಼ಾಸ್ಟ್ಲಾಯ್ಫಾಂತ್ (Fastlife) ಮನ್ಶಾಕ್ ದಿಸಾಚಿಂ ಚೊವೀಸ್ ವೊರಾಂಯ್ ಉಣಿಂ ಜಾತಾತ್ ಆನಿಂ ಅಪ್ಣಾನ್ ಸಾಧ್ಸುಂಕ್ ಆಸ್ಚಾ ಸಂಗ್ತ್ಯಾಂಚಿ ಪಟ್ಟಿ ಲಾಂಬ್ ಜಾವ್ನ್ಂಚ್ ವೆತಾ ತರ್ಯ್ ಜೊ ವೆಕ್ತಿ ವಿಂಚವ್ಣೆಂತ್ (Priority) ಚುಕಾನಾ ತೊ ಹ್ಯಾ ಸರ್ವ್ ಸಂಗ್ತ್ಯಾಂಕ್ ಜ್ಯಾರಿ ಕರುಂಕ್ ಪಾವ್ತಾ.
ಹರ್ಯೆಕ್ಲ್ಯಾಕ್ ಮೆಳ್ಚೆಂ ಏಕ್ ಆವ್ಕ್ ಆನಿಂ ಅಪ್ಲ್ಯಾ ಜಿವಿತಾಚಾ ವಾಟೆರ್ ಎಕಾಮೆಕಾ ಚಲೊನ್ ಆಸ್ತಾನಾ, ಸಂಯ್ಬಿಕ್ ಸ್ವಾರ್ಥಾಚೆ ದೊರೆ ಅಪಾಪೆಂ ಉಭೆ ಜಾತಾತ್ ಆನಿಂ ಮತಿಂತ್ ಹೆಂ ಬರೆಂ, ಹೆಂ ವಾಯ್ಟ್ ಮ್ಹಳ್ಳೆಂ ಪಿಂತುರ್ ಏಕ್ ರೂಪ್ ಘೆತಾ ಆನಿಂ ಆಪಾಪಿಂಚ್ ಆಸ್ಚೆಂ ಬರೆಂ ಸರ್ವ್ ಆಪ್ಣಾಚೆಂ ಕರ್ಚಿ ನಾಡ್ಯ್ ಪಾಶಾರ್ ಜಾಯ್ನಾಸ್ತಾಂ ರಾವಾನಾ.
ತರ್ ಬರೆಂ ಆನಿಂ ಖೊಟೆಂ ಯಾ ವಾಯ್ಟ್ ಮ್ಹಳ್ಯಾರ್ ಕಿತೆಂ? ಸಂಪ್ಯಾ ರಿತಿನ್ ಉಚಾರ್ಚೆಂ ತರ್ ’ಜೆಂ ಆಪ್ಲ್ಯಾ ಮತಿನ್ ಒಪುನ್ ಘೆಂವ್ಚೆಂ, ಆಪ್ಲ್ಯಾ ಮತಿಕ್ ಸೊಭ್ಚೆಂ ಮಾತ್ರ್ ಬರೆಂ’ ಆನಿಂ ’ಜೆಂ ಅಪ್ಲ್ಯಾ ಮತಿಕ್ ಅಥ್ವೆಂ ದಿಸ್ಚೆಂ ತೆಂ ವಾಯ್ಟ್’. ತರ್ ಸಂಸಾರಾಂತ್ ಖಂಯ್ಚೆಂಚ್ ’ಬರೆಂ’ ಆನಿಂ ’ವಾಯ್ಟ್’ ಮ್ಹಣೊನ್ ನಾ? ಆಪಾಪ್ಲ್ಯಾ ಇರಾದ್ಯಾಂ ಖಾತಿರ್, ಆಪಾಪ್ಲ್ಯಾ ಸ್ವಾರ್ಥಾಖಾತಿರ್ ಮನ್ಶಾನ್ ಅಪಾಪ್ಲ್ಯಾ ಸಮ್ಜಣೆಪ್ರಕಾರ್ ಕೆಲ್ಲೆ ಹೆ ಭೇದ್ ಜಾವ್ನಾಸಾತ್.
ದಾಕ್ಲೊ; ಸೊರೊ ಜಿವಾಕ್ ಬರೊ ಮ್ಹಣ್ತಾತ್ ಥೊಡೆ. ಸೊರೊ ಮಾರೆಕಾರ್ ಮ್ಹಣ್ತಾತ್ ಹೆರ್ ಥೊಡೆ. ಸತ್ ಕಿತೇಂಯ್ ಆಸೊಂ, ಏಕ್ ಸತ್ ಮಾತ್ರ್ ಆಮಿಂ, ಪೆದ್ರುನ್ ಜೆಜುಕ್ ನೆಗಾರ್ ಕೆಲ್ಲೆಪರಿಂ ನೆಗಾರ್ ಕರ್ತಾಂವ್, ತೆಂ ಜಾವ್ನಾಸಾ ಆಪ್ಲ್ಯಾ ಮತಿನ್ ಒಪುನ್ ಘೆತ್ಲ್ಲ್ಯಾ ತ್ಯಾ ಬರ್ಯಾ/ವಾಯ್ಟಾಚೆರ್ ಎಕೊಡಿ ನದರ್ ಮಾರ್ಚಿ.
ಜಿಂ ಸತಾಂ ಅಪ್ಲ್ಯಾ ಮತಿಂತ್ ಆಸಾತ್ ತಿಂ ಕಿತ್ಲಿಂ ಸತಾಂ ಮ್ಹಳ್ಳೊ ಎಕೊಡೊ ನಿಹಾಳ್ ಕರುಂಕ್ ಆಮ್ಕಾಂ ನಾಕಾಚ್ ನಾಕಾ. ಹಾಕಾ ಆಮಿಂ ಆಮ್ಚಾ ಮತಿಕ್ ಬೆಸೊರ್ ಘಾಲುಂಕ್ ಘೆಂವ್ಚಿ ಅಲಕ್ಶಾಯ್ ಕಾರಣ್ ಜಾವ್ಯೆತ್. ದೆಕುನ್ಂಚ್ ಸಂಪೆಂ ತತ್ವ್ ಆಮಿಂ ಮಾಂದುನ್ ಘೆತಾಂವ್; ’ಬರೆಂ ಮ್ಹಳ್ಯಾರ್ ಹಾಂವ್ ಆನಿಂ ಮ್ಹಜಿಂ’ ಆನಿಂ ’ವಾಯ್ಟ್ ಮ್ಹಳ್ಯಾರ್ ಪೆಲಿಂ ಆನಿಂ ಪೆಲ್ಯಾಂಚಿಂ’.
ಮನಿಸ್ ಜಲ್ಮಾ ಥಾವ್ನ್ ಮೊರ್ನಾಪರ್ಯಾಂತ್ ಜಿಯೆತಾ ಫ಼ಕತ್ ಶಿಕೊಂಕ್. ಜಿಣ್ಯೆಂತ್ ಕೆನ್ನಾಂಯ್ ಖಂಯ್ಚಾರ್ ಪರಿಗತೆಂತ್ಯ್ ಮನ್ಶಾಂಕ್ ಶಿಕೊಂಕ್ ಆಸ್ತಾಚ್. ಹೆಂ ’ಆಪುಣ್ ಜಾಣಾರಿ’ ಮ್ಹಣ್ಚಾ ಕಿತ್ಲೆಶ್ಯಾ ಬುದ್ದುಜೀವಿಂಕ್ಯ್ ಲಘು ಜಾತಾ. ಆಮ್ಚಾ ಜಿಣ್ಯೆಂತ್ಯ್ ಜಾಯ್ತಿಂ ವರ್ಸಾಂ ಪಾಶಾರ್ ಜಾಲಿಂ ಆನಿಂ ಅಪ್ಲ್ಯಾ ಆಂತರಿಕ್ ಬದ್ಲಾವಣೆಕ್ ನವೆಂ ವರಸ್ಚ್ ಕಿತ್ಯಾಕ್ ಯೇಜಯ್ ಮ್ಹಳ್ಳೆಂ ಬರೆಂ ಸವಾಲ್. ನೀಜ್ ಜಾವ್ನ್ ಹೆಂ ವಾಜ್ಬಿ ಸವಾಲ್ಚ್ ಮ್ಹಣ್ಯೆತ್.
ನವೆಂ ವರಸ್ ಏಕ್ ನೀಬ್ ಮಾತ್ರ್, ಹ್ಯಾ ನವ್ಯಾ ವರ್ಸಾಂತ್ ಅಪುಣ್ ಏಕ್ ಬರೆಂ ಕಾಮ್ ಕರ್ತಾಂ - ಮ್ಹಜಾ ಮತಿಂತ್ ಆಸ್ಚೆಂ ಸಗ್ಳೆಂ ಬರೆಂ ನೀಜ್ ಜಾವ್ನ್ ಬರೆಂಗೀ? ಆನಿಂ ವಾಯ್ಟ್ ಮ್ಹಣೊನ್ ಆಸ್ಚೆಂ ಸಗ್ಳೆಂ ವಾಯ್ಟ್ಗೀ ಮ್ಹಳ್ಳೆಂ ಸಮ್ಜೊಂಕ್ ಪ್ರೇತನ್ ಕರ್ತಾಂ. ಜರ್ತರ್ ಹಾಂವ್ ಇತ್ಲೆಂ ಕರುಂಕ್ ಸಕ್ತಾಂ ತರ್ ಹೆಂ ಸತ್ ಸಭಾರ್ ಸತಾಂಕ್ ಅಪಾಪೆಂಚ್ ಉಘಡ್ತಾ ತೆಂ ಖಂಡಿತ್. ಪುಣ್ ಹೆಂ ಅಪುಣ್ ಕರ್ತಲೊಂ ಫ಼ಾಲ್ಯಾಂ ನ್ಹಯ್, ಆಜ್ಚ್ ಅತಾಂಚ್! ಕೆದಾಳಾಗೀ ಖೈಂಗೀ ಅಶೆಂ ವಾಚ್ಲ್ಲೊ ಉಡಾಸ್ "ಬಳ್ ಭಲಾಯ್ಕಿ ನ್ಹಯ್, ಲಾಂಬ್ ಆವ್ಕ್ ನ್ಹಯ್, ದೆವಾ ದೀ ಮ್ಹಾಕಾ ಸೆವೆಚೊ ಸ್ಪಿರಿತ್ ಜೀಣ್ಭರ್".
ಜಲ್ಮಾದೀಸ್ ಸದಾಂಚ್ ನವೆಂಚ್/ಬರೆಂಚ್ ಹಾಡುಂ ಮ್ಹಜಾ ಪೆಲ್ಯಾಥಂಯ್. ಮ್ಹಜಾ ಪೆಲ್ಯಾಚಾ ಘರಾಂನಿ ಸಮಧಾನೆಚೊ ದಿವೊ ಪೆಟೊನ್ಂಚ್ ಆಸೊಂ, ಮ್ಹಜಾ ಪೆಲ್ಯಾಚಾ ಕಾಳ್ಜಾಂತ್ ಉಲ್ಲಾಸ್ ಆಸೊಂ, ತಾಚಾ ಘರಾಂನಿ ಕೊಣೀಂ ಪಿಡೆ-ಶಿಡೆಂತ್ ಪಡಾನಾ ಜಾಂವ್, ಕಶ್ಟಾ-ನಶ್ಟಾನ್ ಉರಾನಾ ಜಾಂವ್.
ಕೆದಾಳಾ ಜರ್ ಹೆಂ ಚಿಂತಾಪ್ ಹರ್ಯೆಕ್ಲೊ ಚಿಂತುಂಕ್ ಸಕಾತ್ಗೀ, ತವಳ್ಚ್ ಆಪಾಪ್ಲೊ ಜಲ್ಮಾದೀಸ್ ಭಾಗಿ ಜಾಂವ್ಕ್ ಪಾವ್ತಲೊ.
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
