ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
3. ಕಾಣಿ ಜಿಣಿ
ಆವಾಜ್ ಮ್ಹಣೊನ್ ಆಯ್ಕಾನಾಕಾ
ಖಜ್ನೊ ಫ಼ುಟೊನ್ ಕಾನ್ ಬಸಾತ್
ಗೊಡ್ಶೆಂ ಮ್ಹಣೊನ್ ಗಿಳಿನಾಕಾ
ಗಡೆಕಾಸ್ತ್ ತಾಳ್ಯಾಂತ್ ಲೊಳಾತ್
ಸುವಾಸ್ ಮ್ಹಣೊನ್ ಹುಂಗಾನಾಕಾ
ಚಾಂಪ್ಯಾ ವಾಸಾನ್ ತಕ್ಲಿ ಘುಂವಾತ್
ಓಂಟ್ ಮ್ಹಣೊನ್ ಚಿಂವಾನಾಕಾ
ಫ಼ಾತ್ರಾ ಸಾರ್ಕೊ ದಾಂತ್ ಲಾಗಾತ್
ವಾಚ್ಪ್ಯಾ, ಮ್ಹಜಾ ಕರ್ಗಾನಾಕಾ
ಝಳಕ್ ದೆಕೊನ್ ಭುಲಾನಾಕಾ
ಹಿ ಕಾಣಿ ಮ್ಹಣೊನ್ ವಾಚಿನಾಕಾ
ಜಿಣಿ ಚಿ೦ತುನ್ ಕಾಳಿಜ್ ಭೆಸಾತ್.
ಏಕ್ ಸತ್, ಏಕ್ ಫಟ್. ಜಿಣಿಯೆಚ್ಯಾ ಸೊಬಾಯೆಕ್ ಭುಲೊನ್ ತಿಚ್ಯೆ ಸರ್ಶಿನ್ ಗೆಲ್ಯಾರ್ ಖರೆಂಸತ್ ಜಿಣಿಯೆಚೆಂ ದುಸ್ರೆಂ ರೂಪ್ ದಾಕಯ್ತಾ. ಕಾಣಿ ಸಮ್ಜಲ್ಲೊ ಜಿಣಿಯೀ ಸಮ್ಜತ್ ತರ್ ಜಿಯೆತ್, ನಾ ತರ್ ಜಿಣಿಂಚ್ ಏಕ್ ಕಾಣಿ ಜಾಂವ್ಕ್ ಪಾವಾತ್.
ಆವಾಜ್ ಮ್ಹಣೊನ್ ಆಯ್ಕಾನಾಕಾ
ಖಜ್ನೊ ಫ಼ುಟೊನ್ ಕಾನ್ ಬಸಾತ್
ಗೊಡ್ಶೆ೦ ಮ್ಹಣೊನ್ ಗಿಳಿನಾಕಾ
ಗಡೆಕಾಸ್ತ್ ತಾಳ್ಯಾ೦ತ್ ಲೊಳಾತ್
ದಿಸ್ಚೆಂ ಏಕ್ ಆಸ್ತಾ, ಪುಣ್ ಆಸ್ಚೆಂ ದುಸ್ರೆಂಚ್ ಆಸ್ತಾ. ಆವಾಜ್ ಮ್ಹಣ್ ಆಯ್ಕೊಂಕ್ ಲಾಗಿಂ ಗೆಲ್ಯಾರ್ ತೊ ಕಾನ್ ಭೆರೆಕರ್ಚೊ ಖಜ್ನೊ ಜಾವ್ನ್ ಕಾನ್ ಬಸ್ತಲೆ. ಗೊಡ್ಶೆಂ ಮ್ಹಣ್ ತೊಂಡಾಂತ್ ಘಾಲ್ಲೆಂ ಗಳ್ಯಾಲಾಗಿಂ ಪಾವ್ತಾನಾ ತಾಚಿ ಗೊಡ್ಸಾಣ್ ಸುಟೊನ್ ಭಿತರ್ಲಿ ಕೊಡ್ಸಾಣ್ ಗಳ್ಯಾಲಾಗಿಂ ಲೊಳ್ಟಲಿ. ಜೆಂ ಜಾಯ್ಮ್ಹಣ್ ಆಮಿ ಜೊಡುನ್ ಘೆತಾಂವ್ ತೆಂ ವೆಗಿಂಚ್ ಆಮ್ಕಾಂ ಕಶ್ಟಾಂಕ್ ಘಾಲ್ತಲೆಂ ಮ್ಹಣ್ಚೆಂ ಹ್ಯೆ ಕವಿತೆಚ್ಯೆಂ ಚಿಂತಪ್. ಹ್ಯಾ ಮೂಳ್
ಚಿಂತ್ಪಾಚೆರ್ ಬಾಂದೊನ್ ಆಯ್ಲ್ಯಾತ್ ಕವಿತೆಚ್ಯೊ ವೊಳಿ.
ಸುವಾಸ್ ಮ್ಹಣೊನ್ ಹು೦ಗಾನಾಕಾ
ಚಾ೦ಪ್ಯಾ ವಾಸಾನ್ ತಕ್ಲಿ ಘು೦ವಾತ್
ವೊ೦ಟ್ ಮ್ಹಣೊನ್ ಚಿ೦ವಾನಾಕಾ
ಫ಼ಾತ್ರಾ ಸಾರ್ಕೊ ದಾ೦ತ್ ಲಾಗಾತ್
ಚಾಂಪ್ಯಾಚೊ ವಾಸ್ ಬರೊಚ್, ಪುಣ್ ನಾಕಾಲಾಗಿಂ ಧರ್ನ್ ಹುಂಗ್ಲ್ಯಾರ್ ತಕ್ಲಿ ಘುಂವತ್. ಸುಂದರ್ ಓಂಟಾಂ ಪಾಟ್ಲ್ಯಾನ್ ಆಸ್ಚೆ ದಾಂತ್ ಎಕಾ ಉಮ್ಯಾನ್ ದೂಕ್ ದೀಂವ್ಕ್ಯೀ ಸಕ್ತಿತ್.
ಪೆಲ್ಯಾಚಿ ಜಿಣಿ ಸುಖಾಚಿ ಮ್ಹಣ್ ಪಯ್ಸ್ ಥಾವ್ನ್ ಪಳೆತೆಲ್ಯಾಕ್ ದಿಸ್ತಾ. ಪುಣ್ ಪಳೆತೆಲ್ಯಾಕ್ ದಿಸ್ಚಿ ತ್ಯಾ ಜಿಣಿಯೆಚಿ ಏಕ್ ಝಳಕ್ ಮಾತ್ರ್. ತ್ಯೆ ಸುಖಾಚ್ಯೆ ಝಳ್ಕೆ ಪಾಟ್ಲ್ಯಾನ್ ಆಸ್ಚೆ ಕಶ್ಟ್ ವಾಸ್ತವಿಕತಾ ಜಾವ್ನಾಸಾ. ಹಿ ಕವಿತಾ ಕಾಣಿ ಸಾಂಗನಾ ಬಗಾರ್ ಜಿಣಿಯೆಚಿ ಖರಾಯ್, ಕಶ್ಟ್ ಇತ್ಯಾದಿ ಸತಾಂ ದಾಕವ್ನ್ ದಿತಾ.
ಹಿ ಏಕ್ ಬೋವ್ ಸಾದಿ ಕವಿತಾ. ಖಂಯ್ಚಾಯ್ ಥರಾಚಿ ವಿಶೇಷ್ ಬಾಂದಾವಳ್ ಹ್ಯೆ ಕವಿತೆಂತ್ ದಿಸೊನ್ ಯೆನಾ. ಪುಣ್ ಭಿತರ್ಲೊ ತೀರ್ಲ್ ಬಳಾನ್ ಮತಿಕ್ ಲಾಗ್ತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications