ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಸಂಸಾರಾಂತ್ ಮನ್ಶಾಕುಳಾನ್ ವಾಪಾರ್ಚೆಂ ಭೋವ್ ವ್ಹಡ್ಲೆಂ ಹಾತೆರ್ ಜಾವ್ನಾಸಾ ’ಉತಾರ್’" - ರುಡ್ಯಾರ್ಡ್ ಕಿಪ್ಲಿಂಗ್
ಸಂಸಾರ್ ಮ್ಹಜ್ಯಾ ಮಾತ್ಯಾರ್ ನಾ!
ವರಸ್ : 2007
ಅಂಕೊ : 34
ಮಯ್ನೊ : ಎಪ್ರಿಲ್
ಸಂಪಾದಕೀಯ್ - 34.
ವಲ್ಲಿ ಕ್ವಾಡ್ರಸ್
ಸಂಸಾರ್ ಮ್ಹಜ್ಯಾ ಮಾತ್ಯಾರ್ ನಾ!
ಅಶೆಂ ಮ್ಹಣ್ತಚ್ ಮ್ಹಜ್ಯಾ ಮಾತ್ಯಾವಯ್ಲ್ಯಾ ಝಡಾಯೆಚಿಂ ಕಾರಣಾಂ ಅಥ್ವಿಂಚ್. ಕುಲ್ಯಾಕ್ ಜಾಲ್ಲ್ಯಾ ಘಾಯಾಪರಿಂ, ಧಾಖಂವ್ಕ್ಯೀ ನ್ಹಂಯ್ ಧಾಂಪುಂಕ್ಯೀ ನ್ಹಂಯ್.
ಮನಿಸ್ ಅಪ್ಲ್ಯಾಚ್ ಸಮ್ಜಣೆಂತ್ ’ಬರೆಂ’ ಆನಿ ’ವಾಯ್ಟ್’ ಮ್ಹಳ್ಳ್ಯಾಕ್ ವ್ಯಾಖ್ಯಾನ್
(Definition) ದೀಂವ್ಕ್ ಸಕ್ಲಾ. ಅಪುಣ್, ಅಪ್ಲೆಂ ಕುಟಾಮ್; ಅಪ್ಲಿ ಬಾಯ್ಲ್, ಅಪ್ಲಿಂ ಭುರ್ಗಿಂ, ಅಪ್ಲೆಂ ಕಾಮ್, ಅಪ್ಲೊ ಬಂಗ್ಲೊ, ಅಪ್ಲಿ ಗಾಡಿ, ಬ್ಯಾಂಕಾಂತ್ ಪಿಲಾಂ ಕಾಡ್ಚೊ ಅಪ್ಲೊ ದುಡು...
ಹಾಚೆ ಮಧೆಂ ತವಳ್ ತವಳ್ ಉಭ್ಗೊಣ್ ಕಾಡುಂಕ್ ದೇವ್ ಧರ್ಮಾಚೊ, ಪಾತಾಕ್ ಕರ್ಮಾಚೊ ಉಡಾಸ್ ಕಾಡ್ತಾ. ಚಡ್ತಾವ್ ಇತ್ಲ್ಯಾಕ್ಚ್ ಅಪ್ಲೊ ಸಂಸಾರ್ ಕರ್ನ್ ಸುಶೆಗಾತ್ ಜಿಯೆಂವ್ಚಿಂ. ಹಾಂಕಾಂ ಅಪ್ಲ್ಯಾ ಭಂವ್ತೊಣಿ ಕಿತೆಂ ಜಾತಾ ಮ್ಹಳ್ಳಿ ಫಿಕಿರಾಯ್ ನಾ. ಜೆದ್ನಾಂ ಪರ್ಯಾಂತ್ ಅಪ್ಲ್ಯಾ ಸಮಾಜೆಂತ್ ದಿಸಾನ್ ದೀಸ್ ವಾಡೊನ್ ಯೆಂವ್ಚಿ ಎಕೇಕ್ ಪಿಡಾ ಜೆದ್ನಾಂ ಅಪ್ಲ್ಯಾಚ್ ಕೊಣಾಕ್ ಗ್ರಾಸಿತಾನಾ ಫಕ್ಕ್ ಕರ್ನ್ ಜಾಗ್ ಜಾತಾ. ತೆದೊಳ್ ಪರ್ಯಾಂತ್ ಹ್ಯಾ ಸಮಾಜೆಕ್ ಕಿತ್ಲೆ ಘಡ್ಗಡೆ ಮಾರ್ಲ್ಯಾರ್ಯೀ ಕೊಣಾಕ್ ಕೋಣ್ ನಾ.
ಹ್ಯಾ ಪರಿಗತೆಚ್ಯಾ ದಾವ್ಲೆಂತ್ ಮನಿಸ್ ದಿಸಾನ್ ದೀಸ್ ಅಪುಣ್ ಸುಖಿ ಆಸಾಂ, ಸಮಧಾನಿ ಆಸಾಂ ಮ್ಹಣ್ ಅಪ್ಣಾಕ್ಚ್ ಫಟವ್ನ್ ಜಿಯೆವ್ನ್ ಆಸಾ. ಜಿತ್ಲ್ಯೊ ಚಡ್ ಬೌತಿಕ್ ಆಸ್ತ್ ವಸ್ತು ಪುಂಜಾಯ್ಲೆಂಗೀ ತಿತ್ಲೆಂ ಚಡ್ ಸುಖಿ, ಸಮಧಾನಿ ಮ್ಹಳ್ಳಿಂ ಚಿಂತ್ನಾ ಮತಿಂತ್ ಆಸ್ಲ್ಯಾರ್ಯೀ ಖರೆಂಪಣಿ ಹ್ಯಾ ಸುಖಾ ಸಮಧಾನೆಕ್ ಸೊಧ್ಚೆಂ ಮಾಪ್ ಅಜೂನ್ ಪರ್ಯಾಂತ್ ಖಂಚ್ಯಾಯ್ ವಿಗ್ಯಾನಾನ್ ಸೊಧುನ್ ಕಾಡುಂಕ್ ನಾ.
ಹೆಂ ಕಿತ್ಯಾಕ್?
ಇಲ್ಲೆ ಪಾಟಿಂ ಪಳೆಯಾಂಗಿ?
ಪಾಟಿಂ ಮ್ಹಳ್ಯಾರ್ ಕಾಂಯ್ ಆದಿಂ ಮಾಗಾಂತ್ ಮನಿಸ್ ಮಾಂಕೊಡ್ ಜಾವ್ನ್ ಜಿಯೆತಾಲೊ ಕಂಯ್ ತಿತ್ಲೆ ಪಾಟಿಂ ನ್ಹಂಯ್, ಆಮ್ಚಾ ಬಾಪಾಚ್ಯಾ ಕಾಳಾಕ್ ವಾ ಆಜ್ಯಾ ಅಜಿಯೆಚ್ಯಾ ಕಾಳಾಕ್ ಯಾ. ಚಡ್ ಪಯ್ಸ್ ನಾಕಾ, ಆಮ್ಚ್ಯಾಚ್, ಆಮ್ಚ್ಯಾ ಸಯ್ರ್ಯಾಂಚೆರ್ ಪಳೆಲೆಂ ತರ್, ಏಕ್ ಘರಾಣೆಂ ಕಶೆಂ ಜಿಯೆವ್ನ್ ಆಸ್ಲೆಂ? ದಾದ್ಲೆ ದೀಸ್ಭರ್ ತೊಟಾಂನಿ, ಗಾದ್ಯಾಂನಿ ಘೊಳ್ತಾಲೊ ಆನಿ ಬಾಯ್ಲಾಂ ದೀಸ್ಭರ್ ತಾಂಚೊ ಸಾಂಗಾತ್ ದಿತಾಲೊ ತಶೆಂಚ್ ಘರ್ಚೊ ಹಾರ್ಭಾರ್ ಸಯ್ತ್ ಸಾಂಬಾಳ್ತಾಲಿಂ. ಭುರ್ಗಿಂ ಶಿಕ್ತಾಲಿಂ. ಅಮೊರೆಚಿ ಘಾಂಟ್ ಆಯ್ಕತಾಲಿ, ಕುಟಾಮ್ ಎಕ್ಟಾಂಯ್ ಜಾವ್ನ್ ತೇರ್ಸ್ ಕರ್ತಾಲೊ. ಎಕಾಮೆಕಾಚಿಂ ಬೆಸಾಂವಾಂ ಮಾಗೊಂಕ್ ಆಸ್ತಾಲೆಂ. ಎಕ್ಲೊ ಕೋಣ್ ಪಿಡೆಂತ್ ಪಡ್ಲ್ಯಾರ್ ಸರ್ವಾಂ ತಾಚಿ ಸೆವಾ ಕರ್ತಾಲಿಂ. ಎಕ್ಲ್ಯಾ ಕೊಣಾಯ್ಚೆಂ ಕಾಜಾರ್ ಉಭೆಂ ಕರುಂಕ್ ಸಗ್ಳೆಂ ಕುಟಾಮ್ ದೀಸ್ ರಾತ್ ಸರ್ಭರಾಯೆನ್ ಮೆತೆರ್ ಜಾತಾಲೆಂ. ಪಯ್ಸಿಲ್ಯಾ ಸಯ್ರ್ಯಾಂಕ್ ಪಯ್ಲೆಂಚ್ ಯೇಂವ್ಕ್ ಪಡ್ತಾಲೆಂ. ಮಾಟೊವ್ ಘಾಲುಂಕ್ ಜಾಂವ್, ರಾಂದುಂಕ್ ಜಾಂವ್ ವಾ ಹೆರ್ ಸೆವೆಕ್ ಸೆಜಾರ್ಚೊ ತಶೆಂಚ್ ವಾಡ್ಯಾಚೊ ಲೋಕ್ ಜಮ್ತಾಲೊ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ಮನಿಸ್ ಅಪ್ಲೆಂ ಹರ್ಯೆಕ್ ಬರೆಂ ಫಾಲೆಂ ಅಪ್ಲ್ಯಾಂಸವೆಂ ವಾಂಟುನ್ ಜಿಯೆತಾಲೊ. ಹಾಂವ್ ಕಾಂಯ್ ಅಜಿಯೆಚ್ಯೊ ಪೊಟ್ಟು ಕಾಣ್ಯೊ ಸಾಂಗಾನಾ, ಹೆಂ ಆಮ್ಚ್ಯಾ ಭುರ್ಗ್ಯಾಪಣಾರ್ ಚಲೊನ್ ಆಸ್ಲ್ಲ್ಯಾ ಸಂಸಾರಾಚೆಂ ಚಿತ್ರಣ್ ಮಾತ್ರ್ ದಿತಾಂ.
ತವಳ್ ಕಸ್ಟ್ ಆಸ್ಲ್ಲೆ, ದುಬ್ಳಿಕಾಯ್ ಆಸ್ಲ್ಲಿ, ಮಾಲ್ತೆಂನಿ ಏಕ್ ದೋಯ್ ನೀಸ್ ಪಿಯೆಂವ್ಕ್ಯೀ ದೀಸ್ಭರ್ ಘಾಮ್ ವ್ಹಾಳಂವ್ಕ್ ಆಸ್ಲ್ಲೊ.
ಪುಣ್ ಆಜ್ ಮನಿಸ್ ಪ್ರಗತೆಚಾ ಸಂಸ್ರಾಂತ್ ಜಿಯೆವ್ನ್ ಆಸಾ, ಮನ್ಶಾಲಾಗಿಂ ದುಡು ಆಸಾ ವಾ ಸಲೀಸಾಯೆನ್ ದುಡು ಕರ್ಚಿ ವಿಧ್ಯಾ ಜಾಣಾ. ಶ್ಹೆರಾಂನಿ ಇಸ್ಕೊಲ್, ಇಗರ್ಜ್, ಆಸ್ಪತ್ರ್ ಲಾಗಿಂಚ್ ಆಸ್ಚಾ ಭಾಂದ್ಪಾನಿ ವಸ್ತಿ ಕರುಂಕ್ ಲಾಗ್ಲಾ.
ಕಿತ್ಲೆಂ ವಿಪರ್ಯಾಸ್ ನ್ಹಂಯ್ಗಿ? ಆದಿಂ ಮಾಲ್ತೆಂತ್ ನೀಸ್ ಪಿಯೆತಾನಾ ಸಯ್ತ್ ಆಸ್ಲ್ಲೊ ಸುಶೆಗ್ ಆಜ್ ಶ್ಹೆರಾಚಾ ವಾತಾವರಣಾಂತ್ ನಾ. ಗರೀಬ್ಪಣಾಂತ್ ಆಸ್ಲ್ಲೆಂ ಅಪ್ಲೆಂಪಣ್ ದುಡ್ವಾನ್ ಲುಟ್ಲಾಂ.
ತಿಚ್ಚ್ ಪರಿಗತ್ ಆಜ್ ಕಿತ್ತುನ್ ಉರ್ಲ್ಯಾ? ಏಕ್ ಕುಟಾಮ್ ಮ್ಹಳ್ಯಾರ್ ದಾದ್ಲೊ, ಬಾಯ್ಲ್ ಆನಿ ಆಸ್ಲ್ಯಾರ್ ಭುರ್ಗಿಂ. (ಥೊಡಿಂ ಪೆಟೆ ಆನಿ ಮಾಜ್ರಾಂ ಸಯ್ತ್ ಕುಟ್ಮಾಚೆ ಸಾಂದೆ ಮ್ಹಣ್ಚಿಂ ಅಂಡೆ ಪಿರ್ಕಿ ಆಸಾತ್). ಪುಣ್ ಹಕೀಗತೆಂತ್ ಭಾವಾಕ್ ಭಾವ್ ನಾ, ಭಯ್ಣಿಕ್ ಭಯ್ಣ್ ನಾ. ಆತಾಂ ಆಮ್ಕಾಂ ಆಚರಣ್ ಕರುಂಕ್ ದೀಸ್ ಸಭಾರ್ ಆಸಾತ್, ಆವಯಾಂಚೊ ದೀಸ್, ಬಾಪಾಯಾಂಚೊ ದೀಸ್, ಭಾವಾಂಚೊ ದೀಸ್, ಭಯ್ಣ್ಯಾಂಚೊ ದೀಸ್, ಮೋಗ್ ಕರ್ಣಾರಾಂಚೊ ದೀಸ್. ಅಸಲೆ ಜಾಯ್ತೆ ದೀಸ್ ಆಚರಣ್ ಕರ್ಯೆತಾ, ತಾಂಕಾಂ ಕಾಣಿಕೊ ದಿವ್ಯೆತಾ ಪುಣ್ ’ಮೋಗ್’ ಕಸೊ ಆನಿ ಖಂಯ್ ಥಾವ್ನ್ ಹಾಡ್ಚೊ? ಆನಿ ಮೋಗ್ ವಿಖ್ಚಾ ಆಂಗ್ಡೆವಿಶಿಂ ಹಾವೆಂ ಅಜೂನ್ ಆಯ್ಕೊಂಕ್ ನಾ ವಾ ಪಳೆಂವ್ಕ್ ನಾ.
ಹ್ಯಾ ಪರಿಗತೆಂತ್ ಮನಿಸ್ ಅಪ್ಲೊ ಪೆಲೊ, ಭಾವ್ ಭಾಂದವ್ಪಣಾಂತ್ ಎಕಾ ಕಾಳಾರ್ ಜಿಯೆವ್ನ್ ಆಸ್ಲ್ಲೊ. ಆತಾಂ ಸರ್ವ್ ಬೌತಿಕ್ ಸುಖಾಚಾ ಧಾಂವ್ಣೆಂತ್ ಖರ್ಶೆತಾ ತರ್ಯೀ ಧಾಂವೊನ್ ಆಸಾ. ಕಿತ್ಯಾಕ್ ಮಾಲ್ಘಡ್ಯಾಂನಿ ಅಪ್ಣಾನ್ ಕಸ್ಟ್ ಕಾಡ್ಲ್ಲೆಪರಿಂ ಅಪ್ಲ್ಯಾ ಭುರ್ಗ್ಯಾಂನಿ ಕಸ್ಟ್ ಕಾಡಿನಾಯೆ ಮ್ಹಣ್ ಜಾಯ್ತೊ ಸಾಕ್ರಿಫಿಸ್ ಕರ್ನ್ ಭುರ್ಗ್ಯಾಂಕ್ ಬರೆಂ ಶಿಕಾಪ್ ದಿಲೆಂ. ಆನಿ ಹ್ಯಾ ಭುರ್ಗ್ಯಾಂಕ್ ಶಿಕಾಪ್ ಮೆಳ್ಳೆಂ, ದುಡು ಮೆಳ್ಳೊ, ಬೌತಿಕ್ ವಸ್ತು ಮೆಳ್ಳ್ಯೊ ಪುಣ್ ಸಂಸ್ಕಾರ್ ಮೆಳ್ಳೊನಾ. ಹೊ ಸಂಸ್ಕಾರ್ ದಿತಾ ಅಪ್ಲಿಚ್ ಮಾಂಯ್ಭಾಸ್. ಪುಣ್ ಆಮ್ಚಾಂಕ್ ಆಮ್ಚಿ ಸಂಸ್ಕೃತಿ ಮೆಳ್ಳಿನಾ. ಮೋಗ್ ಮಾಯ್ಪಾಸ್, ಬಾವ್ ಭಾಂದವ್ಪಣ್ ಮೆಳ್ಳೆಂ ನಾ. ಹೆಂ ಸೊಧುಂಕ್ ಕಿತ್ಲೆ ಬೂಕ್ ವಾಚ್ಲೆ ತರ್ಯೀ ಹೆ ಶೆಗುಣ್ ಫಕತ್ತ್ ಜಿಯೆವ್ನ್ ಮಾತ್ರ್ ಮೆಳ್ಚೆ ಶಿವಾಯ್ ವಾಚುನ್/ಆಯ್ಕೊನ್ ಮೆಳ್ಚೆ ತಸ್ಲೆ ನ್ಹಂಯ್. ದೆಕುನ್ ಆಯ್ಚಾ ದಿಸಾ ಆಮ್ಚಿಂ ಆವಯ್-ಬಾಪಾಯ್ ಆಶ್ರಮಾಂತ್ ಜಿಯೆತಾತ್. ಆನಿ ಆಮಿಂ ಚಡ್ ಆನಿ ಆಶ್ರಮಾಂ ಭಾಂದ್ಚಾರ್ ವ್ಯಸ್ತ್ ಆಸಾಂವ್. ತಶೆಂ ಮ್ಹಣೊನ್ ಆಮಿಂ ಅಜೂನ್ ತೆಚ್ಚ್ ಮಾಂಡ್ ಕುರ್ಪೊಣ್ ಜಿಣಿ ಜಿಯೆವ್ನ್ ಆಸಾಜಯ್ ಆಸ್ಲ್ಲೆಂ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ ಭಿಲ್ಕುಲ್ ನ್ಹಂಯ್. ಪ್ರಗತಿ ಮನ್ಶ್ಯಾಕ್ ಜರೂರ್ ಗರ್ಜೆಚಿ. ಪುಣ್ ಹ್ಯಾ ಪ್ರಗತೆಚ್ಯಾ ಧಾಂವ್ಣೆಂತ್ ಮನ್ಶಾಪಣಾಚಿಂ ಮೌಲ್ಯಾಂ ಖಂಯ್ಚರ್ ಆನಿ ಕಶಿಂ ಗಳೊನ್ ಗೆಲಿಂ? ಇತ್ಲೆಂ ಚಿಂತಾಂ ಹಾಂವ್.
ತರ್ ’ಹಾಂವ್’ ಕೊಣ್?
ಹ್ಯಾ ಸಂಸಾರ್ ಮ್ಹಳ್ಳ್ಯಾ ದರ್ಯಾವೆಳೆರ್ ಆಸ್ಚ್ಯಾ ರೆಂವೆಚೊ ಏಕ್ ಕಣ್
ಹಾಂವ್. ಸುರ್ವೆರ್ ಸಾಂಗ್ಲಾಂ - ಪರತ್ ಸಾಂಗ್ತಾಂ ಸಂಸಾರ್ ಮ್ಹಜ್ಯಾ ಮಾತ್ಯಾರ್ ಭಿಲ್ಕುಲ್ ನಾ. ಸಂಸಾರ್ ಪಯ್ಲೆಂಯೀ ಚಲ್ಲಾ ಫುಡೆಂಯೀ ಚಲ್ತಲೊ. ದರ್ಯಾಂತ್ ಸುಕ್ತಿ ಭರ್ತಿ ಆದಿಂಯೀ ಆಸ್ಲ್ಲಿ, ಫುಡೆಂಯೀ ಆಸ್ತೆಲಿ. ಫಕತ್ತ್ ಹಾಂವೆಂ ಎಕಾ ರೆಂವೆಚಾ ಕಣಾನ್ ತಾಪ್ತಚ್/ನಿವ್ತಚ್ಚ್ ದರ್ಯೊ ಆಂಬೊಟ್ ಜಾಂವ್ಚೊನಾ, ಸುರ್ಯೊ ಕಾಳೊ ಜಾಂವ್ಚೊನಾ, ಕುಪಾಂ ಗಳ್ಚಿಂ ನಾಂತ್, ಚಂದ್ರ್ ಲಿಪ್ಚೊನಾ. ತರ್ಯೀ ಮ್ಹಾಕಾ ಮ್ಹಜೆಂ ಕೊಶೆಡ್ದ್ ಕಿತ್ಯಾಕ್ಗೀ ಮ್ಹಜಿ ಜವಾಭ್ದಾರಿ ಜಾಗಯ್ತಾ ಆನಿ ಹಾವೆಂ ಕಿತೆಂ ತರ್ಯೀ ವೆಗ್ಳೆಂ ಕರುಂಕ್ಚ್ ಜಾಯ್ ಮ್ಹಳ್ಳೆಂ ಮ್ಹಜ್ಯಾಚ್ ಸ್ವಪ್ಣಾಂಚೆಂ ವೊಜೆಂ ಮ್ಹಜ್ಯಾ ಮಾತ್ಯಾರ್ ಚಡಯ್ತಾ. ಹೆಂ ಖುಶೇಚೆಂ ವೊಜೆಂ, ಆಶೆಚೆಂ ವೊಜೆಂ ಜವಾಭ್ದಾರೆಚೆಂ ವೊಜೆಂ - ಚಡಾವತ್ ಮ್ಹಜ್ಯಾಕೀ ಹೆರಾಂಕ್ ಹೆಂ ’ಜಡಾಯೆಚೆಂ’ ದಿಸ್ಲ್ಲೆಂಯ್ ಆಸಾ. ತರ್ಯೀ ಮ್ಹಜ್ಯಾ ತಾಂಕಿಭಿತರ್ಲೆಂ ಬರೆಂ ಕರ್ಚೆಂ ಮ್ಹಜೆಂ ಪ್ರೇತನ್. ಸಮಾಜೆಂತ್ ಹೆರಾಂನಿ ಜಿಯೆಲ್ಲೆಪರಿಂ ಹಾವೆಂ ಜಿಯೆಜಾಯ್ ಮ್ಹಣ್ ನಾ. ಹಾವೆಂ ಕೆಲ್ಲೆಂ ಕಿತ್ಲೆಂ ಬರೆಂ ಮ್ಹಳ್ಳೆಂ ಹೆರಾಂಕ್ ಸ್ವಷ್ಟೀಕರಣ್ ದೀಜಾಯ್ ಮ್ಹಣ್ ನಾ ತರ್ಯೀ ಹಾವೆಂ ಜಿಯೆಲ್ಲಿಚ್ ಜಿಣಿ ಮ್ಹಣೊನ್ ಕರ್ನಾಸ್ತಾಂ, ಅಪ್ಲ್ಯಾ ಕೊಶೆಡ್ದಾಕ್ ಖಾಲ್ ಜಾವ್ನ್, ಮ್ಹಜ್ಯಾನ್ ಜ್ಯೆ ಕಿತೆಂ ಕರುಂಕ್ ಸಾಧ್ಯ್ ಆಸಾ ತೆಂ ಆಜ್ ಕರ್ಚೊಂ. ಕಿತ್ಯಾಕ್, ಫಾಲೆಂ ಹಾವೆಂಯೀ ಪಳೆಂವ್ಕ್ ನಾ.
ಮ್ಹಜಿಂ ಸ್ವಪ್ಣಾಂ ಹಾವೆಂ ಅಜೂನ್ ಪಾವೊಂಕ್ ನಾತ್ಲ್ಲ್ಯಾ ಮೊಳ್ಬಾವಯ್ಲಿಂ. ವಾಟ್ ಲಾಂಬ್ ಆಸಾ. ಹಾಂವ್ ಜಾಣಾಂ ಹಿ ವಾಟ್ ಚಡಾವತ್ ಎಕ್ಸುರಿಚ್. ತರ್ಯೀ ಹಾಂವೆಂ ತಿ ಚಲೊಂಕ್ ಆಸಾ. ಕಿತ್ಯಾಕ್ ಜೆಂ ವೊಜೆಂ ಮ್ಹಜೆರ್ ದಿಲ್ಲ್ಯಾ ಮ್ಹಜ್ಯಾ ಕೊಶೆಡ್ದಾಚಾ ಫಯ್ಸಲಾಕ್ ಫುಡ್ ಕರುಂಕ್ ಮ್ಹಾಕಾ ಆಸಾ ದೆಕುನ್. ಕೊಣಾಕ್ ಹಿ ಪಿಸಾಯ್ ಮ್ಹಣ್ ದಿಸೊಂದಿ, ಕೊಣಾಕ್ ಅನಿ ಕಿತೆಂಯ್ ದಿಸೊಂದಿ. ಮ್ಹಜಿ ವಾಟ್ ಮ್ಹಾಕಾ ಆನಿ ಮ್ಹಜೆಂ ಮಿಸಾಂವ್ ಮ್ಹಜೆಂ.
ದುಸ್ರೆಂ ಕಿತೆಂಚ್ ನ್ಹಂಯ್!
ಆತಾಂ ಜರೂರ್ ಕೊಣ್ ತರ್ಯೀ ಸಾಂಗ್ತಲೊಚ್ - ವಲ್ಲಿಕ್ ದುಸ್ರೆಂ ಕಾಂಯ್ ಕಾಮ್ ನಾ ಮ್ಹಣ್! ನ್ಹಂಯ್ಗಿ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
