ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ತುಕಾ ಪುರ್ಶಾಂವಾರ್ ಮಾನ್ ಕರ್ಚೆಂ ಆಸಾ. ಕಿತೆಂ ಉಪ್ಕಾರ್ ಸೊಮಿಯಾಂ? ತುಕಾ ಪುರ್ಶಾಂವಾರ್ ವ್ಹರ್ತಾನಾ ತುಜ್ಯಾ ಲೊಕಾಂನಿ ಹಾತಾಂತ್ ಮೊಬಾಯ್ಲಾಂ ಪಳಯಿತ್ತ್ ವಾಟೆರ್, ತ್ಯಾ ಮೊಬಾಯ್ಲಾಂಚೆರ್ ಖೆಳ್ಚೆಂ ತರ್, ಕಸಲೊ ಮಾನ್ ತುಕಾ ಫಾವೊ ಜಾತಾ? ಥೊಡ್ಯಾಂಕ್ ವಾಟೆರ್ ಫಕತ್ತ್ ಖಬ್ರೊ ಉಲಂವ್ಕ್ ಆಯಿನ್ನ್ ವೇಳ್ ತಶೆಂ ದಿಸ್ತಾ. ಕಿತೆಂ ಗಜಾಲಿ? ಬರ್ಯೊ ಪಾಡ್ ಸರ್ವ್. ಖಂಯ್ ಗೆಲೆಂ ತುಕಾ ಮ್ಹಣ್ ನಿರ್ಮಿತ್ ಕೆಲ್ಲೆಂ ಪರ್ಗಟ್ ಮರ್ಯಾದ್? ತುಕಾ ಹೆಂ ಕಶೆಂ ಲಾಗ್ತಾ?’
ಸತಾಂತ್ಲಿಂ ವಿಚಿತ್ರಾಂ - 16. ದೆವಾಚಿಂ ಘರಾಂ!?
ಜೆಮ್ಮಾ ಪಡೀಲ್
ದೆವಾ ತುಂ ಹ್ಯಾ ಸಗ್ಳ್ಯಾ ಸಂಸಾರಾಚೊ ರಚ್ಣಾರ್ ಆನಿ ರಾಯ್. ಆಮಿ ತುಜಿಂ ಭುರ್ಗಿಂ ಆನಿ ಪರ್ಜಾ. ತುಂ ಸಗ್ಳ್ಯಾಂನಿ ಆಸಾಯ್. ಉದ್ಕಾಂತ್ ಲಿಪೊನ್ ಆಸಾಯ್. ವಾರ್ಯಾರ್ ಉಭ್ತಾಯ್; ಗುಡ್ಯಾರ್ ರಾವ್ತಾಯ್. ರಾನಾಂನಿ ಘುಂವ್ತಾಯ್, ಮೊಳ್ಬಾರ್ ರಾಜ್ ಕರ್ತಾಯ್. ಧರ್ಣಿರ್ ಚಲ್ತಾಯ್. ಎಕಾ ಉತ್ರಾನ್ ತುಂ ತುಜ್ಯಾ ಹರ್ಯೆಕಾ ಗಾಂವಾಂತ್, ಶ್ಹೆರಾಂತ್, ಹಳ್ಳ್ಯಾಂತ್, ಮೊಳ್ಯಾಂತ್, ದೆವಾಳಾಂತ್ ಆನಿ ಪವಿತ್ರ್ ಜಾಗ್ಯಾಂನಿ ಆಸಾಯ್. ತುಂ ನಾರದಾಬರಿ ಸಗ್ಳ್ಯಾಂನಿ ಆಸ್ಚ್ಯಾ ತುಕಾ ಏಕ್ ಖರೊ ನಿಕ್ಕಟ್ಟ್ ಠಿಕಾಣೊ ನಾ, ಸಗ್ಳ್ಯಾ ಸಂಸಾರಾಂತ್ ತುಂ ಆಸ್ತಾನಾ, ತುಕಾ ಆಮಿಂ ನಮಾನ್ ಕರುಂಕ್ ಖಂಯ್ಚೊ ಜಾಗೊ ಸೊಧ್ಚೊ?
ತುಕಾ ತುಜ್ಯಾ ಮಣಿಯಾರ್ಯಾಂನಿ ದೆವಾಳಾಂ ಭಾಂಧುನ್ ದವರ್ಲ್ಯಾಂತ್. ತುಕಾ ಮಾನ್ ಕರುಂಕ್; ತುಜೆಗಡೆ ಉಲಂವ್ಕ್. ತುಜೆ ಥಾವ್ನ್ ಉಪ್ಕಾರ್ ಮೆಳೊಂಕ್ ಚಿಟಿ ಯಾ ಅರ್ಜ್ಯೊ ದೀಂವ್ಕ್. ತುಜ್ಯೆಲಾಗಿಂ ಪುರ್ಪುರೊಂಕ್. ತುಜೆರ್ ರಾಗ್ ಕರುಂಕ್. ಎಕಾ ಉತ್ರಾನ್ ತುಜ್ಯೆಲಾಗಿಂ ಸಂವಾದ್ ಕರುಂಕ್.
ತುಜ್ಯೆಲಾಗಿಂ ಸಂವಾದ್ ಕರುಂಕ್ ತುಕಾ ಕಸಲೆಂ ’ಘರ್’ ಜಾಯ್? ತುಂ ಜಲ್ಮಾಲ್ಲೊಯ್ ಗೊರ್ವಾಂಚ್ಯಾ ಗೊಟ್ಯಾಂತ್ - ಗೊರ್ವಾಂ ಸಂಗಿಂ. ಪುಣ್ ತುಜೆ ಮಣಿಯಾರಿ ತುಕಾ ವಂದನ್ ಕರುಂಕ್ ದೆವಾಳಾಂ ಭಾಂದ್ಚಾ ಕಾಮಾಂತ್ ತಾಂಕಾಂ ಭಾರಿ ಆಸಕ್ತ್. ತಾಂಚ್ಯಾ ಫಿರ್ಗಜೆಂತ್ ಲೊಕಾಕ್ ಬರೆಂ ವಸ್ತುರ್ ನೆಸೊಂಕ್ ನಾ ಜಾಲ್ಯಾರೀ ವ್ಹಡ್ ನ್ಹಯ್, ತುಕಾ ಮಾತ್ರ್ ದೆವಾಳ್ ಬರೆಂ ತಯಾರ್ ಕರುಂಕ್ ಪ್ರೇತನ್ ಕರ್ತಾತ್. ಲೊಕಾಲಾಗಿಂ ಪೊಟಾಕ್ ಜೇಂವ್ಕ್ ನಾ ತರೀ ಪರ್ವಾ ನಾ, ದೆವಾಳ್ ಜಾಯ್. ಫಿರ್ಗಜೆಚ್ಯಾ ಕುಟ್ಮಾಂತ್ ಕಾಜಾರ್ ಕರುಂಕ್ ಸಕಾನಾಸ್ಚಿಂ ಕುಟ್ಮಾ ವಿಶ್ಯಾಂತ್ ಚಿಂತ್ಚೆಂ ಕಾಮ್ "ತಾಂಚೆಂ" ನ್ಹಯ್. ತಾಂಕಾಂ ತುಕಾ ದೆವಾಳ್ ಭಾಂಧುಂಕ್ ಜಾಯ್. ದುಬ್ಳ್ಯಾ ದಾಕ್ಟ್ಯಾ ಕುಟ್ಮಾಂತ್ ಶಿಕ್ಪಾಖಾತಿರ್ ವದ್ದಾಡ್ಚಿಂ ಆಸ್ಚ್ಯಾ ಫಿರ್ಗಜೆಂತ್, ಏಕ್ಚ್ ಮೂಳ್ ಚಿಂತಾಪ್ - ದೆವಾಳ್ ಭಾಂದ್ಚೆಂ. ದೆವಾ. ಹಾಂವೆಂ ಚಿಂತ್ಲ್ಲೆಂ ಆನಿ ಚಿಂತುನ್ಚ್ ಆಸ್ಲ್ಲೊಂ - ತುಕಾ ಜಾಯ್ ಬರೆಂ ಕಾಳಿಜ್; ಬರೆಂ ಮನ್. ದುಬ್ಳ್ಯಾ ಥಂಯ್ ಕುಮೊಕ್ ದಿಂವ್ಚೊ ಮನೋಭಾವ್. ಪುಣ್, ತುಜೆಂ ಕಿತೆಂಯ್ "ಹಾಂಗಾ" ಚಲಾನಾ. ಸಾತ್ ವರ್ಸಾಂಚ್ಯಾ ಎಕಾ ಫಿರ್ಗಜೆಚ್ಯಾ ಆಡಳ್ತ್ಯಾಂತ್ ಜಾಯ್ ಏಕ್ ಮಜ್ಭೂತ್ ದೆವಾಳ್ ಪಳೆವ್ನ್ ಲೊಕಾಕ್ ಭಕ್ತ್ ಉದೆಜೆ. ಹೆಂ ತುಕಾ ಸಮಾ ದಿಸ್ತಾ? ತುಂ ದುಬ್ಳೊ ದೇವ್, ವ್ಹಡ್ ಸೊಭಿತ್ತ್ ದೇವಾಳಾಂತ್ ತುಕಾ ರಾವೊಂಕ್ ಬರೆಂ ಲಾಗ್ತಾ? ಗಾಂವ್ಚ್ಯಾ ಲೊಕಾಂನಿ ಕಶೆಂಯ್ ಜಿಯೆಲ್ಯಾರ್ ಪರ್ವಾನಾ, ತುಜ್ಯಾ ಮಣಿಯಾರ್ಯಾಂಕ್ ಜಾಯ್ ಏಕ್ ಬರೆಂ ’ಘರ್’. ತುಂ ಗೊಟ್ಯಾಂತ್ ಜಲ್ಮಾಲ್ಲೊ ದೇವ್ ತುಕಾ ಆತಾಂ ವ್ಹಡ್ ಸುಂದರ್ ದೆವಾಳ್ ಭೆಟಯ್ಲಾಂ. ಹೆಂ ತುಜ್ಯಾ ಮತಿಕ್ ಕಶೆಂ ಲಾಗ್ತಾ? ಬರೆಂ ಯಾ ಪಾಡ್?
ಪಾಡ್ ಜಾಲ್ಯಾರ್ ಕಿತ್ಯಾಕ್ ವಗೊಚ್ಚ್ ಆಸಾಯ್? ದೆವಾ ’ತುಜ್ಯಾ’ ಮಣಿಯಾರ್ಯಾಂಕ್ ಕಳಿತ್ ಕರ್ ತುಜಿ ಖುಶಿ -
- ತುಕಾ ಪಸಂದ್ ಜಾಂವ್ಚೆಂ.
- ದುಬ್ಳ್ಯಾಂಕ್ ಕುಮೊಕ್ ಕೆಲ್ಲ್ಯಾ ವೆಳಾರ್.
- ದುಬ್ಳ್ಯಾಂ ಥಂಯ್ ’ಬರೆಂ’ ಮೋಗ್ ಉಜಿತ್ ಕೆಲ್ಲ್ಯಾ ವೆಳಾರ್.
- ಸರ್ವಾಂಕ್ ಎಕಾ ನದ್ರೆನ್ ಪಳೆಲ್ಲ್ಯಾ ವೆಳಾರ್.
ತುಕಾ ಆಮಿಂ ತುಜ್ಯೆ ಖಾತಿರ್ ಭಾಂದ್ಲೆಲ್ಯಾ ದೆವಾಳಾಂತ್ ಪ್ರಣಾಮ್ ಕರ್ತಾಂವ್. ಥೊಡೆ ಪಾವ್ಟಿಂ ’ತುಕಾ ಪುರ್ಶಾಂವಾರ್ ಮಾನ್ ಕರ್ಚೆಂ ಆಸಾ. ಕಿತೆಂ ಉಪ್ಕಾರ್ ಸೊಮಿಯಾಂ? ತುಕಾ ಪುರ್ಶಾಂವಾರ್ ವ್ಹರ್ತಾನಾ ತುಜ್ಯಾ ಲೊಕಾಂನಿ ಹಾತಾಂತ್ ಮೊಬಾಯ್ಲಾಂ ಪಳಯಿತ್ತ್ ವಾಟೆರ್, ತ್ಯಾ ಮೊಬಾಯ್ಲಾಂಚೆರ್ ಖೆಳ್ಚೆಂ ತರ್, ಕಸಲೊ ಮಾನ್ ತುಕಾ ಫಾವೊ ಜಾತಾ? ಥೊಡ್ಯಾಂಕ್ ವಾಟೆರ್ ಫಕತ್ತ್ ಖಬ್ರೊ ಉಲಂವ್ಕ್ ಆಯಿನ್ನ್ ವೇಳ್ ತಶೆಂ ದಿಸ್ತಾ. ಕಿತೆಂ ಗಜಾಲಿ? ಬರ್ಯೊ ಪಾಡ್ ಸರ್ವ್. ಖಂಯ್ ಗೆಲೆಂ ತುಕಾ ಮ್ಹಣ್ ನಿರ್ಮಿತ್ ಕೆಲ್ಲೆಂ ಪರ್ಗಟ್ ಮರ್ಯಾದ್? ತುಕಾ ಹೆಂ ಕಶೆಂ ಲಾಗ್ತಾ? ತುಕಾ ಆವ್ಮಾನ್ ಜಾಯ್ನಾ? ಹೆಂ ವ್ಹಯ್ ತರ್, ತುಂ ಏಕ್ ಭಾರಿ ದೇವ್ ಸಾಯ್ಭಾ! ದುಸ್ರ್ಯಾ ’ಲೊಕಾಕ್’ ಧಾಖಯ್ಲ್ಯಾರ್ ಜಾಲೆಂ? ಕಾಮ್ ಜಾಲೆಂ?! ಉದ್ದೇಶ್ ಸುಫಳ್ ಜಾಲೊ!
ಮ್ಹಜ್ಯಾ ಹ್ಯಾ ಕುಂಬು ತಕ್ಲೆಂತ್ ಕಿತೆಂ ಯೆತಾ ತೆಂ ಕಳಾನಾ. ತುವೆಂ ತಕ್ಲಿ ದೀವ್ನ್ ತಕ್ಲೆ ಭಿತರ್ ಮೆಂದು ದಿಲ್ಲಿ ಚೂಕ್. ಪಳೆ ಕಿತೆಂ ತುಕಾ ಬರಯ್ತಾಂ?. ಹಾಂವೆಂ ಹ್ಯಾ ಪಯ್ಲೆಂ ಕಳಿತ್ ಕೆಲಾಂ. ಸಮ್ಜಾನಾತ್ಲೆಲ್ಯಾ ಮ್ಹಾಕಾ ತುಕಾ ಸವಾಲಾಂ ಧಾಡ್ನ್ ತುಜ್ಯೆ ಥಾವ್ನ್ ಶೀದಾ ಜವಾಬಿ ಯೇಂವ್ಕ್ ರಾಕ್ಚೆಂ!
ತುಕಾ ದೆವಾಳಾಂತ್ ಪುಜಾ. ತುಕಾ ಭೆಟಂವ್ಚೆಂ ಬಲಿದಾನ್. ಆಜ್ಕಾಲ್ ತುಜ್ಯಾ ನಾಂವಾರ್ ಉಭೆಂ ಕೆಲ್ಲ್ಯಾ ದೆವಾಳಾಂಕ್ ಲೋಕ್ ಉಣೊ ಬಗಾರ್ ತುವೆಂ ಕುರ್ವಾರ್ ಕೆಲ್ಲ್ಯಾ ಸಾಂತಾ ಸಾಂತಿಣಿಂಚ್ಯಾ ನಾಂವಾರ್ ಉಭಾರ್ಲೆಲ್ಯಾ ದೇವಾಳಾಚ್ಯಾ ಜಾಗ್ಯಾರ್ ವರ್ಸಾಂವಾರ್ ಯಾ ಸದಾಂಯ್ ಲೋಕ್. ಕಿತೆಂ ದೆವಾ ತಾಂಕಾಂ ತುವೆಂ ತಿತ್ಲೆಂಯ್ ವ್ಹಡ್ ಕೆಲಾಂಯ್?. ತುಜೆಲಾಗಿಂ ಮಾಗ್ಲೆಲೆಂ ಮೆಳಾನಾತ್ಲ್ಲೆ ತಾಂಚ್ಯೆಲಾಗಿಂ ಮಾಗ್ಲ್ಯಾರ್ ಮೆಳ್ತಾ ಕಂಯ್. ಹೆಂ ಖಂಯ್ಚೆಂ ಲೇಕ್? ರಾಯಾಥಾವ್ನ್ ಕಾಂಯ್ ಮೆಳಾನಾ. ತುಜ್ಯಾ ಸೆವಕಾ ಥಾವ್ನ್ ಮೆಳ್ಚೆ ಉಪ್ಕಾರ್ ತರ್ಯೀ ಕಶೆ? ’ಸೊಮಿಯಾಂ ತಾಂಕಾಂ ಬ್ಲ್ಯಾಂಕ್ ಚೆಕ್ಕ್ ಬರಂವ್ಚ್ಯಾ ಭಾಷೆನ್ ತಾಂಕಾಂ ಧಾರಾಳ್ ಬಂಡ್ವಾಳ್ ದಿಲಾಯ್? ಆಜ್ಕಾಲ್ ತಸಲ್ಯಾ ಜಾಗ್ಯಾಕ್ ವೆತಾನಾ ಲೊಕಾಚಿ ಖಾತಾಡ್. ಎಕಾ ಥರಾಚೆಂ ವ್ಯವಹಾರ್. ತಾಂಕಾಂ ಕಾಣಿಕೊ ಮ್ಹಣೊನ್ ತ್ಯಾ ಜಾಗ್ಯಾಚೆರ್ ಆಸ್ಲೆಲ್ಯಾ ಆಡಳ್ತೆದಾರಾಕ್ ಭಾರೀ ಕಾಮ್. ಹೊ ಕಸಲೊ ವ್ಯವಹಾರ್? ತುವೆಂ ಮಾಗ್ಣ್ಯಾಚ್ಯಾ ಜಾಗ್ಯಾರ್ ವ್ಯವಹಾರ್ ಕೆಲ್ಲ್ಯಾಂಕ್ ಚಾಬುಕಾಂತ್ ಮಾರ್ನ್ ಧಾಂವ್ಡಾಯ್ಲೆಂಯ್. ಆತಾಂ ತುಜಿ ಚಾಬೂಕ್ ಖಂಯ್ ಭಾಯ್ರ್ ಪಡ್ಲ್ಯಾ?
’ಹೊ’ ವ್ಯವಹಾರ್ ಪಳೆವ್ನ್ ಘೆವ್ನ್ ಆಜ್ಕಾಲ್ ’ಹರ್ಯೆಕ್’ ಜಾಗೆ ಪೂನ್ಶೆತಾಂ ಜಾಲ್ಯಾತ್. ತುವೆಂ ದೆವಾಳಾ ಭಿತರ್ ರಾವ್ಲ್ಯಾರೀ, ಸರ್ವ್ ಕಾರ್ಭಾರ್ ’ಪೂನ್ಶೆತಾಚ್ಯಾ’ ಮಹತ್ವೆನ್ ಭರ್ಲಾಂ. ತುವೆಂ ದೋನ್ ಹಜಾರ್ ವರ್ಸಾಧಿಂ ಉಭಾರ್ಲೆಲಿ ಚಾಬೂಕ್ ಭಾಯ್ರ್ ಕಾಡಿಜೆ. ನಾಂ ತರ್ ತುಜೆಂ ನಾಂವ್ ಪಂದಾ ಪಡ್ತೆಲೆಂ. ಹೆಂ ಮ್ಹಾಕಾ ಸಮಾ ದಿಸಾನಾ. ತುಂ ಸರ್ವೇಸ್ಪರ್. ಕಿತ್ಯಾಕ್ ವ್ಹಗೋ ಆಸಾಯ್? ಮ್ಹಾಕಾ ಉಭ್ದೇಸ್ ಭೊಗ್ತಾನಾ, ತುಂ ತಿತ್ಲೊ ಶಾಂತ್ ಕಸೊ ಸೊಮಿಯಾಂ? ಹಾಂವೆಂ ಉಚಾರ್ಲೆಲಿಂ ಸವಾಲಾಂ ಮ್ಹಾಕಾ ಕಳಿತ್ ಆಸಾ; ತೀಕ್ ಆಸಾ. ತಾಂಕಾಂ ಬರೆಂ ಲಾಗ್ಚೆಂ ನಾ. ತುಂ ಮ್ಹಾಕಾ ಏಕ್ ಮೆಸೇಜ್ ಧಾಡ್. ತಿ ಮೆಸೇಜ್ ತಾಂಕಾಂಯ್ ಧಾಖಯ್ತಾಂ. ಪಾತ್ಯೆಂವ್ಚೆಂ ಕಷ್ಟ್ ಆಜ್ಕಾಲ್. ರುಜ್ವಾತಿಚೊ ಸಂಸಾರ್ ಆಯ್ಚೊ.
ದಯಕರ್ನ್ ತುಜ್ಯೆಲಾಗಿಂ ಅಡ್ದೋಸ್ ಮಾಗ್ತಾಂ - ಮ್ಹಜೆರ್ ರಾಗ್ ಕರಿನಾಕಾ. ತಾಂಕಾಂಯ್ ರಾಗಾರ್ ಜಾಂವ್ಕ್ ಸೊಡಿನಾಕಾ.
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12, 13, 14, 15
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
