ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 18.
ನಾಂವ್: ಲುವಿಸ್ ರೊಡ್ರಿಗಸ್.
ಜಲ್ಮಾಲ್ಲಿ ತಾರಿಕ್: 23 ಸೆಪ್ತೆಂಬರ್ 1953.
ಆವಯ್ ಬಾಪಾಯ್ಚೆ ನಾಂವ್: ದೆವಾದೀನ್ ಸಿಸಿಲಿಯಾ ರೊಡ್ರಿಗಸ್ ಆನಿ ದೆವಾದೀನ್ ಡೇನಿಯಲ್ ರೊಡ್ರಿಗಸ್.
ಶಿಕಾಪ್: ಪ್ರೈಮರಿ ಶಿಕಾಪ್ ಬ್ರಹ್ಮಾವರಾಂತ್, ತ್ಯಾ ನಂತರ್ ಮುಂಬಯಾಂತ್.
ಪತಿಣ್: ರೀಟಾ ರೊಡ್ರಿಗಸ್.
ಭುರ್ಗಿಂ: ಲೊಲಿಟಾ ರೊಡ್ರಿಗಸ್ ಆನಿ ರಸಲ್ ರೊಡ್ರಿಗಸ್.
[ಮಾನೆಸ್ತ್ ಲುವಿಸ್ ರೊಡ್ರಿಗಸಾಸವೆಂ ಮೆಲ್ವಿನ್ ಜೆ. ವಾಸ್]
ಅಜೀಕ್ ಕಾಂಯ್ ಪಾಂಚ್-ಸ ವರ್ಸಾಂಧಿಂ ಜೊನಿ ಸುರತ್ಕಲಾಚೆರ್ ಏಕ್ ಲೇಖನ್ ದಿವೊ ಪತ್ರಾಚೆರ್ ಪರ್ಗಟ್ಲ್ಲೆಂ ಪಳೆವ್ನ್ ಎಕಾ ಸಂಪಾದಕಾನ್ ಮ್ಹಾಕಾ ಜೊನಿಚೆಂ ಸಂದರ್ಶನ್ ಘೆಂವ್ಕ್ ವಿಚಾರ್ಲ್ಲೆಂ ದೆಖುನ್ ಹಾವೆಂ ಜೊನಿಕ್ ವಿಚಾರ್ಲೆಂ. ಜೊನಿನ್ ಜಾಪ್ ದಿಲ್ಲಿ ಜಾವ್ನಾಸಾ, ಮ್ಹಜೆಂ ಸಂದರ್ಶನ್ ತುವೆಂ ಜರೂರ್ ಘೆವ್ಯೆತಾ, ಪುಣ್ ಏಕ್ ವಿನತಿ, ಮ್ಹಜ್ಯಾಕೀ ಪಯ್ಲೆಂ ತುವೆಂ ಚ್ಯಾರ್ ಜಣಾಂಚೆಂ ಸಂದರ್ಶನ್ ಘೆಂವ್ಕ್ ಆಸಾ, ಆನಿ ತೆ ಜಾವ್ನಾಸಾತ್ ಲಾರೆನ್ಸ್ ಪಿಂಟೊ (ಲೊರಿಯಾಬ್), ಲುವಿಸ್ ರೊಡ್ರಿಗಸ್, ಗ್ರೇಶಿಯನ್ ಡಿ’ಸೋಜ್ ಆನಿ ಲ್ಯಾನ್ಸಿ ರೊಡ್ರಿಗಸ್. ತ್ಯೇ ಉಪ್ರಾಂತ್ ತುಂ ಮ್ಹಜೆಂ ಸಂದರ್ಶನ್ ಘೆಂವ್ಕ್ ಯೇ, ಹಾಂವ್ ಖುಶೇನ್ ಒಪ್ತಾಂ. ಆಜ್ ಜೊನಿಯಾನ್ ನಾ ತರ್ಯೀ, ತಾಚೊ ಉಡಾಸ್ ಮಾತ್ರ್ ಆಸಾ. ಆಮಿ ಎದೊಳ್ಚ್ ಲೊರಿಯಾಬಾಚೆಂ ಸಂದರ್ಶನ್ ದಾಯ್ಜಾಚೆರ್ ಪರ್ಗಟ್ ಕೆಲಾಂ. ಆತಾಂ ದುಸ್ರೊ ಲುವಿಸ್ ರೊಡ್ರಿಗಸ್.
ಜಶೆಂ ಹಾಂವ್ ಹಾಕಾ ವಳ್ಕತಾಂ, ಹೊ ಸಾದ್ಯಾ ವೆಕ್ತಿತ್ವಾಚೊ, ಮೊಗಾಳ್-ಮಾಯ್ಪಾಸಿ ಉಲವ್ಣ್ಯಾಚೊ ಕೊಂಕ್ಣಿ ವಾವ್ರಾಕ್ ಪಾಟಿಂಬೊ ದಿಂವ್ಚೊ ಕೊಂಕ್ಣಿ ಮೊಗಿ. ಖುದ್ದ್ ಏಕ್ ಕಲಾಕಾರ್ ಜಾಲ್ಲೆನಿಮ್ತಿಂ ಹೆರಾಂಕ್ ವಳ್ಕೊಂಕ್, ಸಮ್ಜೊಂಕ್ ಸಕ್ಲ್ಲೊ. ಹಾಚೆಸವೆಂ ಮುಖಾಮುಖಿ ಮೆಳ್ಲ್ಲೊಂ ಭೋವ್ ಉಣೆಂ ತರ್ಯೀ ಜೆದ್ನಾಂ ಮುಖಾಮುಖಿ ಮೆಳ್ಳೊಂ. ಖರೆಂಚ್ ಜಾವ್ನ್ ಹಾಚೆಂ ಖಾಲ್ತೆಂಪಣ್, ಲ್ಹಾನ್ವಿಕಾಯ್ ಆನಿ ಕೊಂಕ್ಣಿ ಮೋಗ್ ಪಳೆವ್ನ್ ಅಜ್ಯಾಪ್ಲೊಂ. ಖರೆಂಚ್ ಜಾಣ್ತೆಂ ಸಾಂಗ್ತಾತ್ ’Simplicity is the sign of greatness’.
- ವಲ್ಲಿ ಕ್ವಾಡ್ರಸ್.
ಸಂವಾದ್ ಚಲವ್ಪಿ: ಮೆಲ್ವಿನ್ ಜೆ. ವಾಸ್, ಕೆಲರಾಯ್.
1. ಕುವೆಯ್ಟಾಂತ್ Konkani Talents ಮ್ಹಳ್ಳೊ ಪಂಗಡ್ ತುಮಿಂ ಘಡ್ಲೊ. ಕೊಂಕ್ಣಿ ಕಾರ್ಯಿಂ ತುಮಿಂ ಚಲಯ್ತಾತ್ ಆಸ್ತಾಂ ’ಕೊಂಕ್ಣಿ ತಾಲೆಂತಾಂ’ ಮ್ಹಳ್ಳೆಂ ನಾಂವ್ ಚಡ್ ಸೊಭ್ತೆಂ ನ್ಹಂಯ್ವೆ? ಕೊಂಕ್ಣಿ ಟ್ಯಾಲೆಂಟ್ಸಾವಿಶಿಂ ಥೊಡೆಂ ಸಾಂಗ್ಶಾತ್ಗೀ?
ಜಾ: ಖರೆಂ! ’ಕೊಂಕ್ಣಿ ಟ್ಯಾಲೆಂಟ್ಸ್’ ನಾಂವ್ ಇಂಗ್ಲಿಶ್ ಭಾಸೆಚೆಂ. ಪುಣ್ ಆಮ್ಚೊ ಮೂಳ್ ಇರಾದೊ ಆನಿ ಶೆವೊಟ್ ಜಾವ್ನಾಸ್ಲೊ, ಕುವೆಯ್ಟಾಂತ್ ಆಸ್ಚಾ ಕೊಂಕ್ಣಿ ತಾಲೆಂತಾಂಕ್ ಸೊಧುನ್, ತಾಂಕಾಂ ತಾಂಚಿ ತಾಲೆಂತಾಂ ಲೊಕಾಂಕ್ ಪಾವಂವ್ಚಾಕ್ ಏಕ್ ಆವ್ಕಾಸ್ ರಚುನ್ ದಿಂವ್ಚೊ. ಆನಿ ’ತಾಲೆಂತಾಂ’ ಮ್ಹಳ್ಳೆ ಸಬ್ಧ್ ಮಂಗ್ಳುರಿ ಕೊಂಕ್ಣಿ ಬೊಲಿಚೊ. ಪುಣ್ ಆಮ್ಚೊ ಇರಾದೊ ಫಕತ್ತ್ ಮಂಗ್ಳುರ್ಚಾ ಕೊಂಕ್ಣಿ ತಾಲೆಂತಾಂಕ್ ಆವ್ಕಾಸ್ ಕರ್ನ್ ದಿಂವ್ಚೊ ಮಾತ್ರ್ ನ್ಹಂಯ್, ಬಗಾರ್ ಗೊಂಯ್ಚಿಂ ಕೊಂಕ್ಣಿ ತಾಲೆಂತಾಂ, ಬೊಂಬೊಯ್, ಬೆಂಗ್ಳುರ್ ವಾ ಹೆರ್ ಗಾಂವ್ಚಾ ಕೊಂಕ್ಣಿ ತಾಲೆಂತಾಂಕ್ ಆವ್ಕಾಸ್ ಕರುನ್ ದಿಂವ್ಚೊ. ಆನಿ ಆಮ್ಚಾ ಚಡ್ತಾವ್ ಲೊಕಾಕ್ ಸಲೀಸಾಯೆನ್ ಸಮ್ಜಾಂವ್ಚಾ ಇರಾದ್ಯಾನ್ ಆಮಿ ’ಕೊಂಕಣ್ ಟ್ಯಾಲೆಂಟ್ಸ್’ ಮ್ಹಳ್ಳೆಂ ನಾಂವ್ ದಿಲ್ಲೆಂ ಶಿವಾಯ್ ಹೆರ್ ಕಸಲ್ಯಾಚ್ ಇರಾದ್ಯಾನ್ ನ್ಹಂಯ್.
’ಕೊಂಕಣ್ ಟ್ಯಾಲೆಂಟ್ಸ್’ ಏಕ್ ಸಂಘ್ ನ್ಹಂಯ್, ಬಗಾರ್ ಕೊಂಕ್ಣಿ ಸಂಗೀತಾಕ್ ಪ್ರಮುಕ್ ಸ್ಥಾನ್ (Priority) ದೀವ್ನ್, ತಶೆಂಚ್ ರಂಗ್ಮಂಚ್ ಆನಿ ಹೆರ್ ಶೆತಾಂತ್ ಆಸ್ಚಾ ತಾಲೆಂತಾಕ್ ಸೊಧುನ್ ಕಾಡ್ನ್, ತಾಂಕಾಂ ಏಕ್ ಆವ್ಕಾರ್ ಕರ್ನ್ ದಿಂವ್ಚೊ, ಅಶೆಂ ಆಮ್ಚಾ ಕೊಂಕ್ಣಿ ಲೊಕಾಕ್ ಮನರಂಜನ್ ದಿಂವ್ಚೊ ಪ್ರಮುಖ್ ಇರಾದೊ ಘೆವ್ನ್ ಆಸಾ ಕೆಲ್ಲೊ ಏಕ್ ಪಂಗಡ್. ಹಾಂತುಂ ಆಮ್ಚೊ ಘುರ್ಕಾರ್ ಲೊರಿಯಾಬ್ (ಲಾರೆನ್ಸ್ ಪಿಂಟೊ), ತರ್ ಜೊನಿ ಸುರತ್ಕಲ್, ಗ್ರೇಶಿಯನ್ ಆನಿ ಹಾಂವ್ ಸಾಂದೆ ಶಿವಾಯ್ ಹಾಂತುಂ ಕಸ್ಲೆಚ್ಚ್ ಹುದ್ದೆ ನಾಂತ್.
2. ಜೊನಿ ಸುರತ್ಕಲ್ವಿಶಿಂ ತುಮ್ಚೆ ಖಾಸ್ಗಿ ವಿಚಾರ್ ಕಸ್ಲೆ? ಹ್ಯಾ ವಿಶಿಂ ದೋನ್ ಸಬ್ಧ್ ಸಾಂಗ್ಶಾತ್?
ಜಾ: ಮನಿಸ್ ಜಿವಂತ್ ಆಸ್ತಾನಾ ತಾಚೆಂ ಬರೆಂಪಣ್ ಸಂಸಾರಾಕ್ ದಿಸಾನಾ ಜಾವ್ಯೆತ್, ಪುಣ್ ತಾಣೆಂ ಮೊರ್ತಚ್ಚ್ ತಾಚೆಂ ಬರೆಂಪಣ್ ಗಾಂವ್ಚೆ ಧಾರಾಳ್ ಮಾಪಾನ್ ಆಸ್ತಾತ್ - ಹೆಂ ಆಮ್ಚಾ ಸಮಾಜೆಚೆಂ ಪೊಕೊಳ್ಪಣ್. ಹಾಂವ್ ಜೊನಿಚ್ಯಾ ಖಾಸ್ ಮಿತ್ರಾಂ ಪಯ್ಕಿಂತ್ಲೊ ಜಾಲ್ಲ್ಯಾನ್ ಜೊನಿಕ್ ಲಾಗ್ಶಿಲ್ಯಾನ್ ಪಳೆಂವ್ಕ್, ಸಮ್ಜೊಂಕ್ ಸಕ್ಲ್ಲೊಂ. ಜೊನಿ ಏಕ್ ಭರ್ಲ್ಲೊ ಕೊಳ್ಸೊ, ಜೊನಿಚೊ ವಾವ್ರ್ ಪರ್ದ್ಯಾ ಪಾಟ್ಲೊ, ಜೊನಿನ್ ಕೆದಿಂಚ್ ಅಪ್ಲೊ ಫಾಯ್ದೊ ಕೊಂಕ್ಣೆಚ್ಯಾಕೀ ಚಡ್ ಜಾವ್ನ್ ಚಿಂತ್ಲ್ಲೊ ನಾ. ತಾಚೆಂ ಮರಣ್ ಖರೆಂಚ್ ಜಾವ್ನ್ ಆಮ್ಕಾಂ ವೆಕ್ತಿಗತ್ ಜಾವ್ನ್ ಭೋವ್ ವ್ಹಡ್ ಲುಕ್ಸಾಣ್. ತಶೆಂಚ್ ಕೊಂಕ್ಣೆಕ್ಯೀ. ಹಾಚ್ಯಾಕೀ ಚಡ್ ಕಿತೆಂ ಸಾಂಗೊಂ?
3. ತುಮ್ಚಿ ಪತಿಣ್ ರಿಟಾಬಾಯ್ ಏಕ್ ಗಾವ್ಪಿಣ್, ತುಮ್ಚಿ ಧುವ್ ಲೊಲಿಟಾ ಏಕ್ ಗಾವ್ಪಿಣ್, ತುಮ್ಚೊ ಪೂತ್ ರಸಲ್ ಏಕ್ ಸಂಗೀತ್ ವ್ಹಾಜಂತ್ರಾಂ ಖೆಳವ್ಪಿ. ಅಶೆಂ ಪಳೆಂವ್ಕ್ ಗೆಲ್ಯಾರ್ ತುಮ್ಚೆಂ ಕುಟಾಮ್ ಸಂಗೀತ್ಮೊಗಿ. ಸಂಗೀತಾಚೆಂ ಪ್ರೇರಣ್ ತುಮ್ಕಾಂ ಕೊಣಾ ಥಾವ್ನ್ ಕಶೆಂ ಲಾಭ್ಲೆಂ ಮ್ಹಣ್ ಸಾಂಗ್ಶಾತ್?
[ಲುವಿಸಾಬಾಚೆಂ ಸಂಗೀತ್ ಘರಾಣೆಂ, ತಾಚಿ ಪತಿಣ್ ರಿಟಾಬಾಯ್, ಧುವ್ ಲೊಲಿಟಾ, ಪೂತ್ ರಸಲ್]
ಜಾ: ಸತ್ ಸಾಂಗ್ಚೆಂ ತರ್, ಮ್ಹಜ್ಯಾ ಆವಯ್ ಬಾಪಾಯ್ಕ್ ಸಂಗೀತಾಚೆಂ ತಾಳ್-ಮೂಳ್ ಕಳಿತ್ ನಾಂ. ಹಾಂವ್ ಭೋವ್ ದುಬ್ಳ್ಯಾ ಕುಟ್ಮಾಂತ್ ಜಲ್ಮಾಲ್ಲೊಂ. ಜೆದ್ನಾಂ ಹಾಂವ್ ಬೊಂಬೊಯಾಂತ್ ಆಸ್ಲ್ಲೊಂ. ಆಮ್ಚೆ ಭಂವಾರಿಂ ಈಸ್ಟ್ ಇಂಡಿಯನ್ಸ್ ಆಸ್ಲೆ ಆನಿ ಹರ್ಯೆಕಾ ಲ್ಹಾಲ್ಹಾನ್ ವಾಡ್ಯಾಂನಿ ತಾಂಚೊಚ್ಚ್ ಮ್ಹಳ್ಳೊ ಸಂಗೀತ್ ಪಂಗಡ್ ಆಸ್ಲ್ಲೊ. ತ್ಯೇ ವೆಳಾರ್ ಹಾವೆಂ ಮ್ಹಜ್ಯಾ ಪೊಟಾಚ್ಯಾ ಜೊಡಿ ಖಾತಿರ್ ವ್ಹಾಜಂತ್ರಾಂ ಖೆಳೊಂಕ್ ಸುರು ಕೆಲೆಂ. ಅಶೆಂ ಬ್ಯಾಂಡಾಸವೆಂ ವೆವೆಗ್ಳ್ಯಾ ಕಾರ್ಯಾಂನಿ ವೆವೆಗ್ಳ್ಯಾ ರಿತಿರ್ ಸಂಗೀತ್ ಖೆಳೊಂಕ್ ಧರ್ಲೆಂ. ಅಶೆಂ ಮ್ಹಜ್ಯಾ ಜಿಣ್ಯೆರ್ ಹ್ಯಾ ರಂಗ್ಮಾಂಚಿಯೆನ್ ಮೊಸ್ತ್ ದಿಲೆಂ.
ಅಶೆಂ ಉಪ್ರಾಂತ್ ಹಾಂವ್ ಕುವೆಯ್ಟಾಕ್ ಪಾವ್ಲೊಂ ತರ್ಯೀ ಮ್ಹಜ್ಯಾ ಕಾಳ್ಜಾಮನಾಂತ್ ಸಂಗೀತ್ ಆಸ್ಲೆಂ, ಆನಿ ಗಾವ್ಪಿಣ್ ರಿಟಾಚಿ ವಳೊಕ್ ಮ್ಹಾಕಾ ಜಾಲ್ಲಿ ರಂಗ್ಮಾಂಚಿಯೆರ್ಚ್ಚ್. ಮ್ಹಾಕಾ ಜರ್ ಭುರ್ಗ್ಯಾಪಣಾರ್ ಜೊಕ್ತೊ ಆವ್ಕಾಸ್ ಲಾಭ್ಲ್ಲೊ ತರ್, ಹಾಂವ್ ಜರೂರ್ ಜಾಯ್ತೆಂ ಮುಖಾರ್ ಪಾವ್ತೊಂ. ದೆಕುನ್ ಮ್ಹಜ್ಯಾ ಭುರ್ಗ್ಯಾಂಕ್ ಆಮಿಂ ತೊ ಆವ್ಕಾಸ್ ಕರ್ನ್ ದಿಲಾ. ತೆಚ್ಚ್ಪರಿಂ ದೆವಾನ್ ತಾಂಕಾಂಯ್ ಭರ್ಪೂರ್ ತಾಲೆಂತಾಂ ದಿಲ್ಯಾಂತ್. ಅಶೆಂ ಸಂಗೀತ್ ಆಮ್ಚೆಂ ಘರಾಣೆಂ ಜಾಲಾಂ.
4. ಆಯ್ಚಾ ಕೊಂಕ್ಣಿ ಪರಿಗತೆವಿಶಿಂ, ಪ್ರತ್ಯೇಕ್ ಜಾವ್ನ್ ಕುವೆಯ್ಟಾಂತ್ಲ್ಯಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚಿ ಅಭಿಪ್ರಾಯ್ ಕಸ್ಲಿ?
ಜಾ: ಹಾಂವ್ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಪಳೆವ್ನ್, ಸಮ್ಜೊನ್ ಆಯಿಲ್ಲೆಪರಿಂ, ಆಯ್ಚಾ ಕಾಳಾಚಿ ಕೊಂಕ್ಣಿ ಪರಿಗತ್ ಜಾಯ್ತಿ ಸುಧ್ರೊನ್ ಆಯ್ಲ್ಯಾ. ಎಕಾ ತೆಂಪಾರ್ ಕೊಂಕ್ಣಿ ಉಲಂವ್ಕ್ ಮಿಂಜಾಸ್ಕಿ ಸುಟಾನಾಸ್ಚಾಂಕ್ ಸಯ್ತ್ ಆಜ್ ಕೊಂಕ್ಣಿ ಭರ್ಮಾಚಿ ಭಾಸ್ ಜಾಲ್ಯಾ. ಪುಣ್ ಸರ್ವಾಂ ನ್ಹಂಯ್, ಕಾಂಯ್ ಶೆಂಭೊರಾಂತ್ ಪನ್ನಾಸ್ ಠಕ್ಕೆ ಲೋಕ್ ಅಜೂನ್ ತೆಚ್ಚ್ ಮಿಂಜಾಸ್ಕೆಚ್ಯಾ ಸಂಸಾರಾಂತ್ ಜಿಯೆವ್ನ್ ಆಸಾ. ಆಯ್ಚಾ ಕಾಳಾರ್ ಭುರ್ಗ್ಯಾಂಕ್ ದುರ್ಸೊನ್ ಫಾಯ್ದೊ ನಾ, ಬಗಾರ್ ತಾಂಚ್ಯಾ ವ್ಹಡಿಲಾಂನಿ ತಾಂಕಾಂ ಕೊಂಕ್ಣಿ ಶಿಕಂವ್ಕ್ ನಾ. ಘರಾಂತ್ ಕೊಂಕ್ಣಿ ಗರ್ಜೆಚಿ. ಇಸ್ಕೊಲಾಂನಿ, ಆಫಿಸಾಂನಿ ಇಂಗ್ಲಿಶ್ ವಾ ಹೆರ್ ಭಾಸೊ ಆಸ್ಯೆತಾ, ಪುಣ್ ಘರಾಂನಿ ಕೊಂಕ್ಣಿ ಉಲಯ್ಲ್ಯಾರ್ ಮಾತ್ರ್ ಕೊಂಕ್ಣಿ ಭಾಸ್ ಬಾಳ್ವತಾ.
ಕುವೆಯ್ಟಾಂತ್ ಜಾಂವ್ಚೆ ತಿತ್ಲಿಂ ಕೊಂಕ್ಣಿ ಕಾರ್ಯಿಂ ಮ್ಹಜೆಪ್ರಕಾರ್ ಖಂಯ್ಚರ್ಯೀ ಜಾಯ್ನಾಂತ್, ಜಾಂವ್ಕ್ ಪುರೊ ಗೊಂಯ್ಕಾರ್, ಬೊಂಬೊಯ್ಕಾರ್ ವಾ ಮಂಗ್ಳುರ್ಕಾರ್; ಜಾವ್ಯೆತ್ ಸಂಗೀತ್, ಜಾವ್ಯೆತ್ ಕಲಾ, ಜಾವ್ಯೆತ್ ಸಾಹಿತ್ಯ್ ವಾ ಹೆರ್. ಪುಣ್ ಕುವೆಯ್ಟಾಂತ್ ಹರ್ಯೆಕಾ ಹಾಫ್ತ್ಯಾಂತ್ ಏಕ್ ನ್ಹಂಯ್ ಏಕ್ ಕೊಂಕ್ಣಿ ಕಾರ್ಯೆಂ ಜಾವ್ನ್ಂಚ್ ಆಸಾ. ಹೆಂ ಬರೆಂಚ್. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ವರ್ವಿಂ ಕೊಂಕ್ಣಿ ಕಲಾಕಾರಾಂಕ್ ಪಾಟಿಂಬೊ ಲಾಭ್ತಾ, ಕೊಂಕ್ಣಿ ಸಂಸ್ಕೃತಿ ಫುಲೊಂಕ್ ಏಕ್ ಆವ್ಕಾಸ್ ಲಾಭ್ತಾ. ಪುಣ್ ಹಾಂತುಂ ಪ್ರಮುಖ್ ಜಾವ್ನ್ ದೋನ್ ಪಂಗಡ್ ಆಸಾತ್, ಪಯ್ಲೆ - ಲಾಭಾ ಖಾತಿರ್ ಕರ್ಚೆ. ದುಸ್ರೊ - ದಾನಾಖಾತಿರ್ (ಚಾರಿಟಿ).
5. ತುಮಿಂ ಜಾಯ್ತ್ಯಾ ಕೊಂಕ್ಣಿ ಕಲಾಕಾರಾಂಕ್ ಕುವೆಯ್ಟಾಕ್ ಹಾಡ್ನ್ ತಾಂಕಾಂ ಆರ್ಥಿಕ್ ಮಜತ್ ಲಾಭ್ಚೆಪರಿಂ ಕೆಲಾಂ. ತುಮ್ಕಾಂ ಹಾಂತುಂ ಕಿತ್ಲೆಂ ಸಮಧಾನ್ ಆನಿ ತೃಪ್ತಿ ಆಸಾ?
ಜಾ: ಆಮಿಂ ಕೊಂಕ್ಣಿ ಗಾವ್ಪ್ಯಾಂಕ್ ತಾಂಚ್ಯಾ ಕೊವ್ಳ್ಯಾಂನಿ ಆಯ್ಕತಾಂವ್ ತರ್ಯೀ, ತಾಂಕಾಂ ಮುಕಾಮುಖಿ ಮೆಳ್ಚೆಂ, ತಾಣಿಂ ವೆದಿಚೆರ್ ಗಾಯ್ತಾನಾ ತಾಂಕಾಂ ಆಯ್ಕೊಂಚೆಂ ಏಕ್ ದುಸ್ರೆಂಚ್ ಭಾಗ್ ಆನಿ ನಶಿಬ್. ಮ್ಹಾಕಾ ಲ್ಹಾನ್ಪಣಾರ್ ಹಿ ಆಶಾ ಆಸ್ಲಿ, ಕೊಂಕ್ಣೆಚ್ಯಾ ಉಂಚ್ಲ್ಯಾ ಗಾವ್ಪ್ಯಾಂಕ್ ವೆದಿಚೆರ್ ಗಾಂವ್ಚೆಂ ಆಯ್ಕೊಂವ್ಚೆಂ. ದೆಕುನ್ ಹಾವೆಂ ಎಕೆಕ್ಲ್ಯಾಂಕ್ಚ್ ಗಾಂವಾಥಾವ್ನ್ ಕುವೆಯ್ಟಾಕ್ ಹಾಡ್ಲೆಂ ಆನಿ ಖಂಡಿತ್ ಜಾವ್ನ್ ಮ್ಹಾಕಾ ಹಾಂತುಂ ಭೋವ್ ಸಮಧಾನ್ ಆನಿ ತೃಪ್ತಿ ಆಸಾ.
6. ತುಮ್ಚೆವಿಶಿಂ ತುಮ್ಚಾ ವಾವ್ರಾಚೆರ್ ಸಭಾರ್ ಜಣ್ ಸಭಾರ್ ರಿತಿರ್ ಖೊಡಿ ಕಾಡ್ತಾತ್ ಆನಿ ಖೆಂಡ್ತಾತ್ ಹೆಂ ಕಿತ್ಯಾಕ್?
ಜಾ: ಸಂಸಾರಾಂತ್ ಸರ್ವಾಂಕ್ ಮೆಚ್ವಾಸಾರ್ಕೆಂ ಚಲ್ಚೊ ಕೊಣ್ಂಚ್ ನಾ ಆನಿ ತೆಂ ಸಾಧ್ಯ್ಯೀ ನಾ. ತೆಂ ಸಾಧನ್ ಕರ್ಚೆಂ ಪಿಶೆಂಪಣ್. ಜರೀ ತರೀ ಎಕ್ಲೊ ಮ್ಹಜೆವಿಶಿಂ ಖೊಡಿ ಕಾಡ್ತಾ, ವಾ ಠೀಕಾ ಕರ್ತಾ ತರ್ ತಾಂತುಂ ಹಾವೆಂ ಕಾಂಯ್ ಶಿಕೊಂಕ್ ಆಸ್ಲ್ಯಾರ್ ಹಾಂವ್ ಜರೂರ್ ತೆಂ ಉಪ್ಕಾರಿ ಮನಾನ್ ಸ್ವೀಕಾರ್ ಕರ್ತಾಂ. ಪುಣ್ ಹೊ ಫಕತ್ತ್ ಮೊಸೊರ್ ತರ್ ಹಾಂತುಂ ಕಾಂಯ್ ಕರುಂಕ್ ಜಾಯ್ನಾಂ, ಕಿತ್ಯಾಕ್ ’ಮೊಸ್ರಾಕ್ ವ್ಹಕಾತ್ ನಾ’ ಮ್ಹಣ್ ವಿಲ್ಫಿ ರೆಬಿಂಬಸಾನ್ ಗಾಯಿಲ್ಲೆಪರಿಂ, ಮೊಸ್ರಾಕ್ ಖರೆಂಚ್ ವ್ಹಕಾತ್ ನಾ. ಪುಣ್ ಏಕ್ ಗಜಾಲ್ - ಕೊಣ್ಯೀ ಎಕ್ಲೊ ಹೆರಾಂಚೆರ್ ಕಿತ್ಯಾಕ್ ಮೊಸೊರ್ ಕರ್ತಾ? ಜೆದ್ನಾಂ ಆಪ್ಣಾನ್ ಕರುಂಕ್ ಜಾಯ್ನಾತ್ಲ್ಲೆಂ ಹೆರಾಂನಿ ಕರ್ಚೆಂ ಪಳೆಂವ್ಕ್ ಜಾಯ್ನಾತ್ಲ್ಲ್ಯಾ ಘಡ್ಯೆ ಅಸಲೊ ಮೊಸೊರ್ ಉದೆಂವ್ಚೊ ಸಹಜ್. ತೆಂಯೀ ಆಮ್ಚಾ ಕ್ರೀಸ್ತಾಂವ್ ಸಮಾಜೆಂತ್ ಹೊ ಭರೊನ್ ವೊಮ್ತೊತಾ. ಹಾಕಾ ಹಾವೆಂ ವಾ ಕೊಣೆಂಯೀ ಕಿತೆಂಚ್ ಕರುಂಕ್ ಜಾಯ್ನಾ. ಪುಣ್ ಹಾಂವ್ ಮ್ಹಜೆಂ ಕಾಮ್ ಕರ್ನ್ಂಚ್ ವೆತಾಂ ಶಿವಾಯ್ ಹಾಂಕಾಂ ಆಯ್ಕೊನ್ ಅಪ್ಲ್ಯಾ ಮತಿಚೆಂ ಸಮಧಾನ್ ವಿಭಾಡಿನಾ.
7. ತುಮ್ಚೆಪ್ರಕಾರ್ ಕೊಂಕ್ಣೆಚಿ ಫುಡಾರ್ ಕಸೊ ಆಸಾ?
ಜಾ: ಕೊಂಕ್ಣೆಕ್ ಬರೊ ಫುಡಾರ್ ಆಸಾ, ಆಯ್ಲೆವಾರ್ ಜಾಲ್ಲಿ ವೆಬ್ಸಾಯ್ಟಾಂಚಿ ಕ್ರಾಂತಿ ಖರಿಚ್ಚ್ ಜಾವ್ನ್ ಕೊಂಕ್ಣೆಕ್ ಆಜ್ ಸ್ಥಾನ್-ಮಾನ್ ದಿಂವ್ಚಾಂತ್ ಸುಫಳ್ ಜಾಲ್ಯಾಶೆಂ ಮ್ಹಾಕಾ ಭಗ್ತಾ. ಆಜ್ಕಾಲ್ ಕೊಂಕ್ಣಿ ಕಲಾಕಾರಾಂಕ್ ಮಾನ್-ಸನ್ಮಾನ್ ಮೆಳ್ತಾ, ತಾಂಕಾಂ ಪುರಸ್ಕಾರ್-ಇನಾಮಾಂ ಲಾಭ್ತಾತ್, ತಾಂಕಾಂ ಪರ್ಗಾಂವಾಕ್ ಆಪವ್ನ್ ಹಾಡ್ನ್ ತಾಂಚಿ ಆರ್ಥಿಕ್ ಪರಿಗತ್ ಸುಧ್ರಾಂವ್ಕ್ ಜಾಯ್ತೆಂ ಸಂಘ್ ಸಂಸ್ಥೆ ವಾವ್ರ್ ಕರ್ನ್ ಆಸಾತ್ ಮ್ಹಣ್ತಾತಾ ಕೊಂಕ್ಣೆಚೆ ಆಯ್ಚೆ ತರ್ನಾಟೆ ಸಯ್ತ್ ಹುರುಪಾನ್ ವಾವ್ರ್ ಕರ್ನ್ ಆಸ್ಚೆಂ ಕೊಂಕ್ಣೆಚ್ಯಾ ನದ್ರೆಂತ್ ಭೋವ್ ಬರೆಂ.
8. ಆಮ್ಚಾ ಸಮಾಜೆಂತ್ ಹೆರಾಂನಿ ಕರ್ಚೆಂ ಬರೆಂಪಣ್ ಪಳೆಂವ್ಕ್ ಆಮ್ಕಾಂ ಕಿತ್ಯಾಕ್ ಜಾಯ್ನಾ? ಆಮ್ಚಿ ಸಮಾಜ್ ಕಿತ್ಯಾಕ್ ’ಎಕ್ವಟಿತ್’ ಜಾವ್ನ್ ನಾ? ಕಿತ್ಯಾಕ್ ಪರತ್ ಪರತ್ ಆಮ್ಚಿ ಸಮಾಜ್ ತುಟ್ತಾ/ಫುಟ್ತಾ?
ಜಾ: ಎಕಾ ಸಭ್ದಾನ್ ಸಾಂಗ್ಚೆಂ ತರ್; ’ಮೊಸೊರ್’, ಎಕಾಮೆಕಾಚೊ ಮೊಸೊರ್ ಹೆರಾಂಚೆಂ ಬರೆಂಪಣ್ ಪಳೆಂವ್ಕ್ ಆಮ್ಕಾಂ ಸೊಡಿನಾ. ದೆಖುನ್ ಕೊಣೆಂಯ್ ಬರೆಂ ಕೆಲ್ಲೆಂ ವಾ ಕರ್ಚೆಂ ಅನಿಕ್ಯೀ ಬರೆಂ ಕಶೆಂ ಕರ್ಯೆತಾ ಮ್ಹಣ್ ಚಿಂತ್ಚಾಕೀ, ತಾಕಾ ಕಶೆಂ ಆಡಾಂವ್ಚೆಂ ಮ್ಹಳ್ಳೆಂ ಚಿಂತ್ತೆಲೆ ಚಡ್ ಜಾಲ್ಯಾತ್ ದೆಕುನ್ ಆಮ್ಚಿ ಸಮಾಜ್ ಪರತ್ ಪರತ್ ತುಟ್ತಾ ಆನಿ ಫುಟ್ತಾ ಮ್ಹಳ್ಳಿ ಅಭಿಪ್ರಾಯ್ ಮ್ಹಜಿ.
9. ತುಮ್ಚಾ ಜಿಣ್ಯೆಂತ್ ತುಮ್ಚೆರ್ ಪ್ರಭಾವ್ ಘಾಲ್ಲಿಂ ಕೊಣ್?
ಜಾ: ಮ್ಹಜ್ಯಾ ಜಿಣ್ಯೆಂತ್ ಪ್ರಭಾವ್ ಘಾಲ್ಲಿ ಮ್ಹಜಿಚ್ಚ್ ಆವಯ್ ಜಾವ್ನಾಸಾ, ಕಿತ್ಯಾಕ್ ತಿಣೆಂ ಆಮ್ಕಾಂ ಭುರ್ಗ್ಯಾಂಕ್ ವ್ಹಡ್ ಕರುಂಕ್ ಕಾಡ್ಲ್ಲಿ ವಾಂವ್ಟ್ ಹಾಂವೆಂ ಖುದ್ದ್ ಪಳೆಲ್ಯಾ. ಹ್ಯಾ ಸಂಸಾರಾಂತ್ ಆವಯ್ ಏಕ್ ದೆವಾನ್ ದಿಂವ್ಚೆಂ ದೆಣೆಂ.
ಉಪ್ರಾಂತ್ ಮ್ಹಜ್ಯಾ ಜಿಣ್ಯೆಂತ್ ಪ್ರಭಾವ್ ಘಾಲ್ಲಿಂ ಥೊಡಿಂ ಆಸಾತ್; ಥಿಯೋ ಆಲ್ವಾರಿಸ್, ಬಾಬುಶ್. ಹಾಂವ್ ವ್ಹಾಜಂತ್ರ್ಯಾಂ ಖೆಳ್ತಾಲೊಂ ತರ್ಯೀ ತಾಂತ್ರಿಕ್ ರಿತಿನ್ ತಾಂಚೆಂ ಅಭ್ಯಾಸ್ ಹಾಂವ್ ಶಿಕ್ಲ್ಲೊಂ ಜಾವ್ನಾಸಾ ಥಿಯೋ ಅಲ್ವಾರಿಸಾ ಥಾವ್ನ್ ತಶೆಂಚ್ ಬಾಬುಶ್ ಥಾವ್ನ್. ಹಾಂವ್ ಖರೊಂಚ್ ತಾಂಕಾ ಋಣಿಂ.
10. ದಾಯ್ಜ್.ಕೊಮ್ ತುಮಿಂ ವಾಚ್ಲಾಂ? ವಾ ದಾಯ್ಜ್.ಕೊಮ್ವಿಶಿಂ ತುಮಿಂ ಆಯ್ಕಲಾಂ?
ಜಾ: ವ್ಹಯ್!. ಆಮ್ಘೆರ್ ಸದಾಂಯ್ ದಾಯ್ಜ್.ಕೊಮ್ ವಾಚ್ತಾನಾ ಹಾಂವೆಂಯೀ ತೆಂ ಪಳೆಲಾಂ. ಖಂಡಿತ್ ಜಾವ್ನ್ ಏಕ್ ಬರೆಂ ಕಾಮ್ ತುಮಿಂ ಸುರು ಕೆಲಾಂ. ದಾಯ್ಜ್.ಕೊಮ್ವಿಶಿಂ ಲೊಕಾಂ ಥಾವ್ನ್ಯೀ ಹಾವೆಂ ಜಾಯ್ತೆಂ ಆಯ್ಕಲಾಂ, ತುಮ್ಕಾಂ ಹೊಗ್ಳಿಕ್ ಫಾವೊ. ಕೊಂಕ್ಣಿ ಸಾಹಿತ್ಯಾಂತ್ ನವ್ಯಾ ನವ್ಯಾ ಪ್ರತಿಭೆಕ್ ಸೊಧುನ್ ಕಾಡುನ್ ತುಮಿ ಕೆಲ್ಲೊ, ಕರ್ಚೊ ವಾವ್ರ್ ಬರೊ. ಮ್ಹಜೊ ಪುರ್ತೊ ಸಹಕಾರ್ ತುಮ್ಕಾಂ ಆಸ್ತಲೊ ದೆಕುನ್ ತುಮಿ ಅನಿಕ್ಯೀ ತುಮ್ಚೊ ವಾವ್ರ್ ಮುಖಾರುನ್ ವರಾ. ತುಮ್ಚೆ ತಸಲ್ಯಾಂಚಿ ಕೊಂಕ್ಣೆಕ್ ಭೋವ್ ಗರ್ಜ್ ಆಸಾ.
11. ಕೊಂಕ್ಣಿ ಕಾರ್ಭಾರಿ ಅಂಕಣಾವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಮ್ಹಜ್ಯಾ ಚಿಂತ್ಪಾಪ್ರಕಾರ್, ತುಮಿಂ ಪರ್ದ್ಯಾ ಪಾಟ್ಲ್ಯಾನ್ ಆಸ್ಚಾಂಕ್ ಸೊಧುನ್ ಕಾಡ್ನ್ ತಾಂಕಾಂ ಲೊಕಾಮುಖಾರ್ ಹಾಡ್ಚೆಂ ಪ್ರೇತನ್ ಕರ್ನ್ ಆಸಾತ್, ಹೆಂ ಜಿತ್ಲೆಂ ಬರೆಂಗೀ ತಿತ್ಲೆಂಚ್ ಕಶ್ಟಾಂಚೆಂ ಕಾಮ್. ಹಾವೆಂ ಹ್ಯಾ ಆಧಿಂ ಪರ್ಗಟ್ ಜಾಲ್ಲ್ಯಾ ಥೊಡ್ಯಾ ಕಾರ್ಭಾರ್ಯಾಂಚಿಂ ಸಂದರ್ಶನಾಂ ವಾಚ್ಲ್ಯಾಂತ್, ನಿಜಾಯ್ಕೀ ಮಾಂದ್ಚೆತಸ್ಲೆಂ ಕಾಮ್. ತಾಣಿಂ ಕೊಂಕ್ಣಿ ಸಮಾಜೆಕ್ ಕಾಂಯ್ ಪಾಟಿಂಬೊ ದಿಲಾ ತರ್ ನಾಂವ್ ಜೊಡ್ಚಾಕ್ ನ್ಹಂಯ್ ತರ್ಯೀ ತಾಂಚೊ ಉಡಾಸ್ ಕಾಡ್ನ್ ತಾಂಚೆ ವಿಚಾರ್ ತುಮಿಂ ಲೊಕಾಂಕ್ ಪಾವಯ್ತಾತ್ - ಹೆಂ ನಿಜಾಯ್ಕೀ ವರ್ತೆಂ ಕಾಮ್.
12. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸ್ಲೆ?
ಜಾ: ಕೊಂಕ್ಣಿ ಭಾಸ್ ಭರ್ಮಾನ್ ಉಲಯಾ, ಹೆರಾಂಚಾ ಕೊಂಕ್ಣಿ ಮೊಗಾಕ್ ವಳ್ಕೊನ್ ಮಾನ್ ದಿಯಾ. ಆಮಿ ಫಿರ್ಗಜ್, ಸಮಾಜ್, ಚಿಂತ್ಪಾನ್, ಶಿಕ್ಪಾನ್, ವೃತ್ತೆನ್ ವಿವಿಂಗಡ್ ಆಸೊಂಕ್ ಪುರೊ ಪುಣ್ ಕೊಂಕ್ಣೆಂತ್ ಆಮಿ ಸರ್ವಾಂ ಎಕಾ ಕುಟ್ಮಾಚಿಂ ಮ್ಹಳ್ಳೆಂ ಚಿಂತಾಪ್ ಆಸೊನ್ ಆಮ್ಚಾ ತಾಂಕಿಚೊ ವಾವ್ರ್ ಕರ್ಯಾಂ ತಶೆಂಚ್ ತಸಲೊ ವಾವ್ರ್ ಕರ್ಚಾಂಕ್ ಪಾಟಿಂಬೊ ದಿವ್ಯಾಂ.
13. ದೇವ್ ಬರೆಂ ಕರುಂ ಲುವಿಸಾಬ್ ತುಮ್ಚಾ ಅಮೊಲಿಕ್ ವೆಳಾಕ್ ತಶೆಂಚ್ ಅಪುರ್ಭಾಯೆಚ್ಯಾ ವಿಚಾರಾಂಕ್.
ಜಾ: ದೇವ್ ಬರೆಂ ಕರುಂ ಮೆಲ್ವಿನ್ ತುಕಾ ತಶೆಂಚ್ ದಾಯ್ಜ್ ಪಂಗ್ಡಾಕ್, ತುಮ್ಚಿ ಹುಮೆದ್ ಅಶಿಚ್ಚ್ ಜಿವಾಳ್ ದವರಾ, ಕೊಂಕ್ಣಿ ಪ್ರಚಾರ್ ಅಸೊಚ್ಚ್ ಜಿವಾಳ್ ದವರಾ. ತುಮ್ಚೆಸವೆಂ ಹಾಂವ್ಯೀ ಖಂಡಿತ್ ಆಸ್ತಲೊಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
