ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 39. ಬೆಸಾಂವ್
ಅಶುಂತಾ ಪಿರೇರಾ, ಗಂಟಾಲ್ಕಟ್ಟೆ: ಚಡ್ತಾವಾಂಕ್ ಆಪ್ಲ್ಯಾ ಮಾಂಯ್ಗಾಂವಾಂತ್ ಆಸೊನ್ಯ್ ಮಾಂಯ್ಭಾಸೆಚೊ ಮೋಗ್ ನಾತ್ಲ್ಲ್ಯಾ ಹ್ಯಾ ಕಾಳಾರ್, ಪರ್ಗಾಂವಾಂತ್ ಆಸೊನ್ಯೀ ಮಾಂಯ್ಗಾಂವ್ಚೊ, ಮಾಂಯ್ಭಾಸೆಚೊ ಮೋಗ್ ಆಸೊನ್, ಅಪ್ಣಾಕ್ ಸಂದರ್ಭ್ ಲಾಭ್ತಾನಾ ಕೊಂಕ್ಣಿ ಸಾಹಿತ್ಯ್ ರಸ್ಚಿ ಪಿಸಾಯ್ ಆಸ್ತಾ. ತಾಂತುಂ ಎಕ್ಲೆಂ ಬಾಯ್ ಅಶುಂತಾ ಪಿರೇರಾ. ಆಯ್ಲೆವಾರ್ ಅಪ್ಲ್ಯಾ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಬೆಸಾಂವ್’ ಹಿಣೆ ಪರ್ಗಟ್ಲಾ. ಹಿ ಕಾಣಿ ತ್ಯಾ ಬುಕಾಂತ್ಲಿ ಏಕ್ ಕಾಣಿ.
ಅಶುಂತಾ ಪಿರೇರಾ
ನವೆಂ ಘರ್, ನವಿಂ ಮನ್ಶಾಂ, ನವಿಂ ಸಪ್ಣಾಂ ಹಾತಾಂಕ್ ನವಿಂ ಕಾಂಕ್ಣಾಂ, ಪಾಯಾಂಕ್ ನವಿಂ ಪಾಯ್ಜಾಣಾಂ, ಮಾತ್ಯಾರ್ ಪರ್ಮಳಿಕ್ ಮೊಗ್ರೆಂ, ಆಂಗಾರ್ ಕಾಜಾರಾಚೊ ಆಕರ್ಷಕ್ ನವೊ ಸಾಡೊ ಹಾಂವ್ ನ್ಹೆಸ್ಲ್ಯಾಂ...
ಮ್ಹಜ್ಯಾ ನವ್ರ್ಯಾಚಾ ಘರಾ ಹೆಂ ಮ್ಹಜೆಂ ಪಯಿಲ್ಲೆಂ ನತಾಲಾಂಚೆಂ ಫೆಸ್ತ್. ಕಾಜಾರ್ ಜಾವ್ನ್ ಫಕತ್ತ್ ಸ ದೀಸ್ ಉತ್ರಾಲ್ಯಾತ್. ನವ್ರ್ಯಾಕ್ ಚಡಿತ್ ರಜಾ ನಾ ಮ್ಹಳ್ಳ್ಯಾ ಖಾತಿರ್ ಆದ್ವೆಂತಾಂತ್ ಕಾಜಾರ್ ಜಾಂವ್ಚೆಂ ಪಡ್ಲೆಂ. ವ್ಹಡೇ ಆಶೆನ್ ಅನಿ ಉಮೆದಿನ್ ನವ್ರ್ಯಾ ಸಾಂಗಾತಾ ಮಿಸಾಕ್ ವ್ಹೆಚಾಕ್ ಹಾಂವ್ ಸಜೊನ್ ತಯಾರ್ ಜಾಲ್ಯಾಂ.
ಮಿಸಾಕ್ ನ್ಹೆಸೊನ್ ಆಸ್ಲ್ಲಿ ಮ್ಹಜಿ ಸಾಸುಮಾಂಯ್ ಎಕಾಚ್ಫರಾ ತಕ್ಲಿ ಘುಂವೊಳ್ ಯೆವ್ನ್ ಧರ್ಣಿಕ್ ಶೆವ್ಟಾಲಿ.
"ಕಿತೆಂ ಜಾಲೆಂ ಮಾಂಯ್?" ಹಾವೆಂ ಘಾಬ್ರೆವ್ನ್ ಯಾಂತ್ರಿಕ್ ಥರಾನ್ ಸವಾಲ್ ಕೆಲೆಂ.
"ವೊನಿಯೆ, ತುಂ ಕಾಂಯ್ ಭಿಂಯೆನಾಕಾ. ಅಮ್ಕಾಂ ಹೆಂ ಸದಾಂಚೆಂ. ಖಂಯ್ ಬರ್ಯಾ ಕಾರ್ಯಾಕ್ ವ್ಹಚೊಂಕ್ ಭಾಯ್ರ್ ಸರ್ತಾನಾ ಮಾಂಯ್ಚೆಂ ಹೆಂ ಆಸ್ಲ್ಲೆಂಚ್. ಆನಿ ಅರ್ಧ್ಯಾ ವೊರಾನ್ ತಿ ಸಾರ್ಕಿ ಜಾತಾ.
ಹಿಂ ಉತ್ರಾಂ ಆಯ್ಕೊನ್ ಹಾಂವ್ ಶೆರ್ಮೆಲಿಂ.
"ತುಂ ಆತಾಂ ತಿಚ್ಯೆ ವಿಶಿಂ ಕಾಂಯ್ ಚಿಂತಾ ಕರಿನಾಕಾ. ತಿಕಾ ಮುನ್ನಿ ಪಳೆತೆಲೆಂ. ಆನು ಚಡ್ ಜಾಯ್ತ್ ತರ್ ಆಸ್ಪತ್ರೆಕ್ ವ್ಹರ್ತೆಲೆಂ. ತುಂ ವೆಗಿಂ ತಯಾರ್ ಜಾ. ಮಿಸಾಕ್ ವೇಳ್ ಜಾತಾ. ಆಮ್ಚೆ ಖಾತಿರ್ ಕಾರ್ ವೊಡೊಲ್ ಥಾವ್ನ್ ರಾಕ್ತಾ." ಮ್ಹಜೊ ನೊವ್ರೊ ಆಮ್ಸರ್ಲೊ.
"ಮಾಂಯ್ ಖಾತಿರ್ ಹಾವೆಂ ಮ್ಹಾಜೆಂ ಕ್ರಿಸ್ಮಸ್ ಪಾಡ್ ಕರಿಜಾಯ್ಗೀ? ಮ್ಹಾಕಾ ಕೋಯರಾಂತ್ ರಾವೊಂಕ್ ಆಸಾ. ಇತ್ಲೆಂ ಬರೆಂ ನವೆಂಚ್ ಗೌನ್ ನ್ಹೆಸೊನ್ ಹಾಂವ್ ತಯಾರ್ ಜಾಲ್ಯಾಂ. ಮ್ಹಜ್ಯಾನ್ ಜಾಂವ್ಚೆಂನಾ ದಾಟ್ಟು." ಮುನ್ನಿ ಪುರ್ಪುರ್ಲೆಂ ಆನಿ ಸಣ್ಸಣ್ಲೆಂ.
"ಮಾಂಯ್ ಆತಾಂ ಸಮಾ ಜಾಯ್ತ್ ತರ್ ಬರೆಂ. ನಾ ತರ್ ತಿಚೆ ಸಂಗಿಂ ರಾವ್ತಾ ಕೋಣ್?"
"ಹಾಂವ್ ರಾವ್ತಾಂ" ಹಾವೆಂ ಮ್ಹಜ್ಯಾ ನವ್ರ್ಯಾಚ್ಯಾ ಸವಾಲಾಕ್ ಜಾಪ್ ದಿಲಿ.
"ಕಿತೆಂ!? ತುಂ ಆಜ್ ಫೆಸ್ತಾಚ್ಯಾ ಮಿಸಾಕ್ ಯೇನಾಂಯ್ ತರ್ ಆಮ್ಚೊ ಲೋಕ್ ಕಿತೆಂ ಮ್ಹಣಾತ್?" ಮ್ಹಜೊ ನವ್ರೊ ಆತಾಂ ನಿಜಾಯ್ಕೀ ರಾಗಾನ್ ಪೆಟ್ಲೊ.
"ಲೋಕ್ ಕಿತೆಂ ಮ್ಹಣ್ತೊಲೊ? ಹಾಂವ್ ನವಿ ಹೊಕಾಲ್ ಜಾವ್ನ್ ನವ್ರ್ಯಾ ಸಂಗಿಂ ಫೆಸ್ತಾಚ್ಯಾ ಮಿಸಾಕ್ ಪಾವ್ಲಿಂನಾ ತರ್ ಲೋಕ್ ಜರೂರ್ ವಿಚಾರ್ತಲೊ ಯಾ ಉಲಯ್ತಲೊ. ತೆಂ ಹಾಂವ್ ಜಣಾ. ಪೂಣ್ ಮಾಂಯ್ಕ್ ಕಾಂಯ್ ಚಡುಣೆ ಜಾಯ್ತ್ ತರ್ ತೊಚ್ಚ್ ಲೋಕ್ ಮ್ಹಾಕಾ ಉಲಯ್ತಲೊ ಆನಿ ಸಾಂಗ್ತಲೊ ಕೀ, ತೆಂ ಘರಾಂತ್ ರಿಗ್ಲ್ಲಿ ವೇಳ್ಘಡಿ ವಾಯ್ಟ್ ದೆಕುನ್ ಸಾಸುಕ್ ಆಶೆಂ ಜಾಲೆಂ ಮ್ಹಣೊನ್."
ಹಾವೆಂ ಕೊಣಾಚ್ಯಾಯ್ ಉತ್ರಾಂಕ್ ಕಾನ್ ದಿಲೆನಾಂತ್. ತಾಂಕಾಂ ಸಕ್ಡಾಂಕ್ ಮಿಸಾಕ್ ಧಾಡ್ಲೆಂ ಆನಿ ಹಾಂವ್ ಸಾಸು ಸಂಗಿಂ ಘರಾಚ್ ರಾವ್ಲಿಂ. ಕೂಡಾಕೂಡ್ಲೆ ತಿಕಾ ಆಸ್ಪತ್ರೆಕ್ ವ್ಹರುನ್ ತಿ ಗೂಣ್ ಜಾಲಿ ತರ್ ಮಿಸಾಕ್ ಪಾವ್ಯೆತ್ ಮ್ಹಣ್ ಹಾವೆಂ ಚಿಂತ್ಲೆಂ ಆನಿ ತಶೆಂಚ್ ಹಾಂವೆಂ ಪ್ರಯತ್ನ್ ಕೆಲೆಂ. ಪುಣ್ ಮ್ಹಜೆಂ ನಶಿಬ್ ಪಾಡ್ ಆಸ್ಲ್ಲೆಂ. ಸಾಸುಚಿ ಪರಿಸ್ಥಿತಿ ಹಾವೆಂ ಆಶೆಲ್ಲ್ಯಾ ಪರಿಂ ವೆಗಿಂ ಬರಿ ಜಾಲಿ ನಾ. ಕ್ರಿಸ್ಮಸಾಚಿ ರಾತ್ ಹಾವೆಂ ತಿಚೆ ಸಂಗಿಂ ಆಸ್ಪತ್ರೆಂತ್ ಪಾಶಾರ್ ಕರ್ಚಿ ಪಡ್ಲಿ.
ಆತಾಂ ಮ್ಹಾಕಾ ಚಿಂತಾನಾ ಮ್ಹಜೆರ್ ಬೆಜಾರಾಯ್ ಭಗ್ಲಿ. ಎಕಾ ಥರಾಚೊ ಕಾಂಟಾಳೊ ಆಯ್ಲೊ. ಆಪಾಪಿಂಚ್ ದೊಳ್ಯಾಂನಿ ದುಖಾಂ ಭರ್ಲಿಂ. ಕ್ರಿಸ್ಮಸ್ ಮೀಸ್ ಮ್ಹಜ್ಯೆ ಸಾಸುಮಾಂಯ್ಚ್ಯೆ ಭಲಾಯ್ಕೆ ವ್ಹರ್ತೆಂ ನ್ಹಂಯ್, ಹೆಂ ಹಾಂವ್ ಬರ್ಯಾನ್ ಜಣಾ. ಪುಣ್ ಹಾಂವ್ ನವಿ ಹೊಕಾಲ್. ನವ್ರ್ಯಾ ಸಂಗಿಂ ನವ್ಯಾ ಸಾಡ್ಯಾಚೆರ್ ಸೊಬೊನ್ ಮಿಸಾಕ್ ವ್ಹೆಚಿ ಆಶಾ ಮ್ಹಾಕಾಯ್ ಆಸ್ಲ್ಲಿ. ಹ್ಯಾ ಖಾತಿರ್ ಮ್ಹಜ್ಯಾ ದೊಳ್ಯಾಂನಿ ನಿರಾಶೆಚಿಂ ದುಖಾಂ ಉದೆಲಿಂ ಆನಿ ವ್ಹಾಳ್ಳಿಂ.
"ಮ್ಹಾಕಾ ಮುತೊಂಕ್ ಜಾಲಾಂ ಪುತಾ...... ಬೆಡ್ ಪ್ಯಾನ್ ದಿತಾಯ್ಗೀ?" ಸಾಸುಮಾಂಯ್ನ್ ಪಿಂರ್ಗೊನ್ ಮ್ಹಾಕಾ ಉಲೊ ದಿತಾನಾ ಹಾಂವ್ ಚಿಂತ್ನಾಂ ಸಂಸಾರಾಂತ್ಲಿಂ ಭಾಯ್ರ್ ಆಯ್ಲಿಂ.
ಹಾವೆಂ ಸವ್ಕಾಸ್ ಆನಿ
ಮೊಗಾನ್ ಉಟವ್ನ್ ಖಟ್ಲ್ಯಾರ್ ಬಸಯ್ಲಿ. ಆನಿ ಚತ್ರಾಯೆನ್
ಬೆಡ್ಪ್ಯಾನ್ ದಿಲೆಂ. ತಿಣೆ ತಿಚೆಂ ಕಾಮ್ ಕರ್ತಚ್ ಹಾವೆಂ ಬೆಡ್ಪ್ಯಾನ್
ನ್ಹಾಣ್ಯೆಕ್ ವ್ಹರ್ನ್ ನಿತಳ್ ಕೆಲೆಂ. ಹೆಂ ಸಗ್ಳೆಂ ಮ್ಹಾಕಾ
ನವೆಂಚ್ ತರೀ ಸಾಸು ಖಾತಿರ್ ಹಾವೆಂ ಸಮಧಾನೆನ್ ಕೆಲೆಂ.
ಹಾಂವ್ ತಿಚ್ಯಾ ಖಟ್ಲ್ಯಾಲಾಗಿಂ ಯೇವ್ನ್ ಬಸ್ಲ್ಯಾಂ ಮಾತ್ರ್, ಉಜ್ವೆ ಕುಶಿನ್ ಥಾವ್ನ್ ಕೊಣ್ಗೀ
ಮ್ಹಾಕಾ ಆಪಯ್ತಾ ತೆಂ ಆಯ್ಕಾಲೆಂ. ಹಾವೆಂ ತ್ಯಾ ಕುಶಿನ್ ಘುಂವೊನ್ ಪಳೆಲೆಂ. ಎಕ್ಲಿ
ಪ್ರಾಯ್ವಂತ್ ಸ್ತ್ರೀ ಮ್ಹಾಕಾ ಆಪಯ್ತಾಲಿ. ನಿದೆನ್ ಮ್ಹಜೆ ದೊಳೆ
ವೊಡ್ತಾಲೆ. ಹಾವೆಂ ಯಾಂತ್ರಿಕ್ ಥರಾನ್ ಹಾತ್ ಘಡಿಯಾಳಾಚೆರ್
ದೀಷ್ಟ್ ವ್ಹೆಲಿ. ಫಾಂತ್ಯಾಚಿಂ ವೊರಾಂ ಚ್ಯಾರ್ ಉತ್ರಾಲ್ಲಿಂ.
ಹಾಂವ್ ತ್ಯೆ ಸ್ತ್ರೀಯೆ ಅರ್ಶಿನ್ ಗೆಲಿಂ.
"ತುಕಾ ಕಿತೆಂ ಜಾತಾ?" ಹಾವೆಂ ಹಾಳ್ವಾಯೆನ್ ತಿಕಾ ವಿಚಾರ್ಲೆಂ.
"ಮ್ಹಾಕಾ ಮುತೊಂಕ್ ಜಾಲಾಂ ಪುತಾ. ಇಲ್ಲೆಶೆಂ ಬೆಡ್ಪ್ಯಾನ್ ದಿತಾಯ್ಗೀ? ಮ್ಹಾಕಾ ಚಲೊಂಕ್ಯ್ ಮ್ಹಜ್ಯಾನ್ ಜಾಯ್ನಾ."
ಹಾವೆಂ ತಿಕಾಚ್ ಚಿಕ್ಕೆ ಪಾರ್ಕಿಲೆಂ ಆನಿ ಬೆಡ್ಪ್ಯಾನ್ ಹಾಡ್ನ್ ತಿಚೆ ಸರ್ಶಿನ್ ರಾವ್ಲಿಂ. ತಿ ಪರ್ತ್ಯಾನ್ ಪಿಂರ್ಗಾಲಿ,
"ಮ್ಹಾಕಾ ಚಿಕ್ಕೆ ಉಟವ್ನ್ ಬಸಯ್ತಾಯ್ಗೀ ಪುತಾ.... ಉಪ್ಕಾರ್ ಜಾಯ್ತ್ ತುಜೊ......"
ತಿಚೆಂ ಉಲೊಣೆ ಆಯ್ಕೊನ್ ಮ್ಹಾಕಾ ಥೊಡೊ ಪಿಂತೆಗ್ ಆಯ್ಲೊ ತರೀ ಹಾವೆಂ ಸೊಸ್ಲೆಂ. ಆತ್ತಾಂ ಮಾಂಯ್ಚೆಂ ಮೂತ್ ಹಾವೆಂ ಕಾಡ್ಲೆಂ, ಆತಾಂ ಹಿಚೆಂಯ್..... ಮ್ಹಾಕಾ ಮ್ಹಜೊಚ್ ಕಾಂಟಾಳೊ ಆಯ್ಲೊ.
ನಿರ್ವೊಗ್ ನಾಸ್ತಾಂ,
ಪುರ್ಪುರ್ನಾಸ್ತಾಂ ಹಾವೆಂ ತಿಕಾ ಹಳ್ವಾಯೆನ್ ಉಟವ್ನ್
ಬಸಯ್ಲೆಂ. ಪುಣ್ ಹಾವೆಂ ಎಕ್ಟಾವ್ನ್ ದವರ್ಲೆಲೆಂ ಸಮಧಾನ್
ಮ್ಹಜೆಂ ನಿಧಾನ್ ಪಿಡ್ಡ್ಯಾರ್ ಜಾವ್ನ್ ಯೆತಾಲೆಂ. ತಿಣೆ ಏಕ್
ವ್ಹಡ್ ಸುಸ್ಕಾರ್ ಸೊಡುನ್ ಜೆಜುಕ್ ಹರ್ಶಿತಾನಾ ಹಾಂವ್ ಜಾಗಿಂ ಜಾಲಿಂ.
ತಿಚೆಂ ಬೆಡ್ಪ್ಯಾನ್ ಉಕಲ್ತಾನಾ ಹಾವೆಂ ತಿಚ್ಯಾ ತೊಂಡಾಕ್ಚ್ ಪಳೆಲೆಂ. ತೆಂ
ಸಗ್ಳೆಂ ಭರೊನ್ ಜಡಾಯೆಚೆಂ ಜಾಲ್ಲೆಂ. ಹಿಕಾ ಕಸಲಿ ಪಿಡಾಗಾಯ್,
ಹಾವೆಂ ಮ್ಹಾಕಾಚ್ ಸವಾಲ್ ಕೆಲೆಂ
"ತುಕಾ ಕಸಲಿ ಪಿಡಾ ಮಾಂಯ್?" ಹಾವೆಂ ತಿಕಾ ಥೊಡ್ಯಾ ಧಯ್ರಾನ್ ವಿಚಾರ್ಲೆಂ.
"ಮ್ಹಾಕಾ ಮೊರ್ಚೆ ತಸಲಿ ಪಿಡಾ ಕಾಂಯ್ ನಾ ಪುತಾ. ಫಕತ್ ಪ್ರಾಯೆಚೆಂ ನಿತ್ರಾಣ್. ಕಾಲ್ ಸಾಂಜೆರ್ ಮ್ಹಜಿಂ ಭುರ್ಗಿಂ ಮ್ಹಾಕಾ ಹಾಂಗಾಚರ್ ಸೊಡ್ನ್ ಗೆಲ್ಯಾಂತ್. ತಾಂಕಾಂ ಆಜ್ ರಾತಿಂ ಕ್ರಿಸ್ಮಸ್ ಮಿಸಾಕ್ ವಚೊಂಕ್ ಆಸಾ ಖಂಯ್. ಮೀಸ್ ಜಾವ್ನ್ ತಿಂ ಆತಾಂ ಘರಾ ಪಾವ್ಲ್ಯಾಂತ್ ಆಸ್ತಲಿಂ. ಹಾಂಗಾ ಮ್ಹಾಕಾ ಪಳೆಂವ್ಚಾಅಕ್ ಕೊಣ್ಯಿ ಯೇಂವ್ಕ್ ನಾ." ತಿಚೊ ತಾಳೊ ಗರ್ಗರೊ ಜಾಲೊ, ದೊಳೆ ವೊಲೆ ಜಾವ್ನ್ ಆಯ್ಲೆ. ಹಾಂವ್ ತಿಕಾಚ್ ಪಳವ್ನ್ ರಾವ್ಲಿಂ.
"ಸಾಂಜೆರ್ ಥಾವ್ನ್ ಮ್ಹಜೆಂ ಪೋಟ್ ಮುತಾನ್ ಭರ್ಲಾಂ. ಕೊಣಾಯ್ಕಡೆಂ ಸಾಂಗೊಂಕ್ ಮ್ಹಾಕಾ ಬರೆಂ ಲಾಗೊಂಕ್ ನಾ. ಆನಿ ಮ್ಹಜ್ಯಾನ್ ತಡ್ವೊಂಕ್ ಜಾಲೆಂ ನಾ. ಲಜ್ ಸಾಂಡುನ್ ತುಕಾ ಸಾಂಗ್ಲೆಂ. ಮ್ಹಜಿಂ ಭುರ್ಗಿಂ ತಾಂಚ್ಯಾ ಕುಟ್ಮಾಂ ಸಾಂಗಾತಾ ಹೆಂ ಕ್ರಿಸ್ಮಸ್ ಗದ್ದಾಳಾಯೆನ್ ಆಚರ್ಸಿತಾನಾ ಹಿ ತಾಂಚಿ ಮ್ಹಾತಾರಿ ಆವಯ್ ತಾಂಕಾಂ ಆಡ್ಕಳ್ ಜಾತಾ ದೆಕುನ್ ತಾಣಿಂ ಮ್ಹಾಕಾ ಹಾಡ್ನ್ ಆಸ್ಪತ್ರೆಂತ್ ಘಾಲಾಂ. ತಾಂಚ್ಯೆ ಖಾತಿರ್ ಹಾವೆಂ ಹರ್ಯೆಕ್ ರಾತ್ ಜಾಗಿಂ ರಾವೊನ್ ಪಾಶಾರ್ ಕೆಲ್ಯಾ. ಪುಣ್ ಆತಾಂ ಹಾಂವ್ ತಾಂಕಾಂ ರಾತಿಕ್ ಧೊಸ್ಚಿ ಮನಿಸ್ ಜಾಲ್ಯಾಂ. ತಾಂಕಾಂ ಹುಶಾರ್ ನಾತ್ಲ್ಲ್ಯಾ ವೆಳಾರ್ ಹಾವೆಂ ದೀಸ್ ಆನಿ ರಾತ್ ತಾಂಚಿ ಚಾಕ್ರಿ ಕೆಲ್ಯಾ, ಜತನ್ ಘೆತ್ಲ್ಯಾ, ಉಪ್ವಾಶಿಂ ರಾವ್ಲ್ಯಾಂ, ನೀದ್ ಖಳ್ಳ್ಯಾ. ಆಜ್ ತ್ಯೆಚ್ ತಾಂಚ್ಯೆ ಆವಯ್ಕ್ ಮ್ಹಾತಾರ್ಪಣ್ ಯೆವ್ನ್ ತಿ ಲಾಚಾರ್ ಜಾತಾನಾ ತಿಚಿ ತಾಂಕಾಂ ಪರ್ವಾ ನಾ, ಕ್ರಿಸ್ಮಸ್ ಚಡ್ ಗರ್ಜೆಚೆಂ ಜಾಲಾಂ....."
ಕಾಳಿಜ್ ಕಡವ್ನ್ ತಿ ಉಲಯ್ತಾ ತೆಂ ಮ್ಹಾಕಾ ಸಮ್ಜಾತಾ. ನವಿ ಹೊಕಾಲ್ ಮ್ಹಳ್ಳಿ ಗಜಾಲ್ ಹಾಂವ್ ಬೋವ್ಶಾ ಆಜ್ ವಿಸ್ರಾಲ್ಯಾಂ ಆನಿ ಹಿಂ ಮ್ಹಾಕಾ ನೈಟ್ಡ್ಯೂಟಿ ಕರ್ಚಿ ನರ್ಸ್ ಮ್ಹಣ್ ಚಿಂತಾತ್ ಜಾಂವ್ಕ್ ಪುರೊ.
ಹಾಂವ್ ನ್ಹಾಣ್ಯೆಕ್ ವಚೊನ್ ಹಾತಾಂತ್ಲೆಂ ಬೆಡ್ಪ್ಯಾನ್ ನಿತಳ್ ಕರುಂಕ್ ಅಮ್ಸರ್ಲಿಂ. ತಿಣೆ ಮ್ಹಜೊ ಹಾತ್ ಧರ್ಲೊ. ಹಾವೆಂ ತಿಕಾ "ಆತ್ತಾಂ ಆಯ್ಲಿಂ" ಮ್ಹಣ್ ಸಾಂಗೊನ್ ನ್ಹಾಣ್ಯೆ ಕುಶಿಕ್ ಕದಮಾಂ ಕಾಡ್ಲಿಂ. ಪಾಟಿಂ ಪರತ್ ಹಾಂವ್ ತಿಚೆ ಸರ್ಶಿಂ ಆಯ್ಲಿಂ. ತಿಣೆ ತ್ಯಾ ಮಂದ್ ಉಜ್ವಾಡಾಂತ್ಯೀ ಮ್ಹಾಕಾ ಪಾರ್ಕಿಲ್ಲೆಂ ಜಾಂವ್ಕ್ ಪುರೊ.
"ಮ್ಹಾಕಾ ಮಾಫ್ ಕರ್ ಪುತಾ. ತುಜ್ಯಾ ಹಾತಾಂತ್ ಆವಾಜ್ ಕರ್ಚಿಂ ನವಿಂ ಕಾಂಕ್ಣಾಂ, ದೊಳ್ಯಾಂತ್ ಭರೊನ್ ವೊಮ್ತೊಂಚಿಂ ಸಪ್ಣಾಂ ಮ್ಹಾಕಾ ಸಾಂಗ್ತಾತ್ ಕೀ, ತುಂ ನವಿ ಹೊಕಾಲ್ ಮ್ಹಣೊನ್. ಹಾವೆಂ ತುಕಾ ಮ್ಹಜೆಂ ಮೂತ್ ಕಾಡುಂಕ್ ಸಾಂಗೊಕ್ ನಜೊ ಆಸ್ಲ್ಲೆಂ ಮ್ಹಳ್ಳಿ ಆಪ್ರಾದಿ ಪ್ರಜ್ನಾ ಮ್ಹಾಕಾ ಧೊಸ್ತಾ. ಪುಣ್ ಹಾಂವ್ ಅಸಹಾಯಕ್ ಜಾಲ್ಲಿಂ ಪುತಾ. ತುವೆಂ ಮ್ಹಾಕಾ ವ್ಹಡ್ ಎಕಾ ಬಾಂಧ್ಪಸಾ ಥಾವ್ನ್ ಸುಟ್ಕಾ ದಿಲಿಯ್. ದೆಕುನ್ ದೇವ್ ತುಕಾ ಬರೆಂ ಕರುಂ. ತುವೆಂ ಮ್ಹಾಕಾ ಕೆಲ್ಲ್ಯಾ ಉಪ್ಕಾರಾ ಬಾಬ್ತಿಂ ತುಕಾ ದಿಂವ್ಚಾಕ್ ಮ್ಹಜೆಲಾಗಿಂ ಕಿತೆಂಚ್ ನಾ. ಪುಣ್ ಮ್ಹಜ್ಯಾ ಕಾಳ್ಜಾ ಥಾವ್ನ್ ಹಾಂವ್ ತುಕಾ ಬೆಸಾಂವ್ ದಿತಾಂ ಪುತಾ, ತುವೆಂ ವಿಣ್ಲ್ಲಿಂ ಸರ್ವ್ ಸಪ್ಣಾಂ ಸಾಕಾರ್ ಜಾತಲಿಂ ಆನಿ ತುವೆಂ ಆಶೆಲ್ಲೆಂ ಜಿವಿತ್ ತುಕಾ ಲಾಭ್ತಲೆಂ.
ಉಪ್ರಾಂತ್ ತಿಣೆ
ಮ್ಹಜ್ಯೆ ತಕ್ಲೆರ್ ಆಪ್ಲೊ ಕಾಂಪೆರೊ ಹಾತ್ ದವರ್ಲೊ. ತ್ಯಾ
ಹಾತಾಚ್ಯೆ ಉಬೆಕ್ ಮ್ಹಜ್ಯೆ ಕುಡಿಂತ್ ಕಸಲಿಗೀ ಏಕ್ ಸಕತ್
ಪ್ರವೇಶ್ ಜಾಲ್ಲೆಬರಿಂ ಭಗ್ಲೆಂ ಮ್ಹಾಕಾ.
************
ಚಡ್ಉಣೆ ವೀಸ್ ವರ್ಸಾಂ ಉತ್ರಾಲ್ಯಾಂತ್. ತ್ಯಾ ದಿಸಾ ತಿಚ್ಯಾ ಬೆಸಾಂವಾ ವಿಶಿಂ
ಹಾವೆಂ ಚಡಿತ್ ಕಿತೆಂಚ್ ಆಶೆಲ್ಲೆಂ ನಾ. ಪುಣ್ ಆಜ್ ಹಾಂವ್ ಸುಟಾವೆಂ
ಸಾಂಗ್ತಾಂ ಕೀ ಹಾಂವ್ ಇಸ್ಕೊಲಾಕ್ ವ್ಹೆತಾನಾ ಪಾಯಾಂಕ್ ಘಾಲುಂಕ್
ಮ್ಹಾಕಾ ವ್ಹಾಣೊ ನಾತ್ಲ್ಲ್ಯೊ. ಬರೆಂ ವಸ್ತುರ್ ನಾತ್ಲ್ಲೆಂ, ಜೆಂವ್ಚ್ಯಾಕ್
ಸಾರ್ಕೆಂ ಜೆವಾಣ್ ನಾತ್ಲ್ಲೆಂ. ಕಷ್ಟಾಂನಿ ಎಕಾ ಮಧ್ಯಮ್
ವರ್ಗಾಂತ್ಲ್ಯಾ ಟೆಕ್ನಿಶಿಯನಾಲಾಗಿಂ ಹಾಂವ್ ಕಾಜಾರ್ ಜಾಲ್ಲಿಂ. ತಾಣೆ ಗಲ್ಫಾಕ್ ಆದೇವ್ಸ್ ಕರ್ನ್ ಗಾಂವಾಂತ್ ಆಪ್ಲೆಂಚ್ ಏಕ್
ವರ್ಕ್ಶೋಪ್ ಉಘಡ್ಲೆಂ. ಆನಿ ಆಜ್ ತೊ ವ್ಹಡ್ ಎಕೆ ಕಂಪೆನಿಚೊ ಧನಿ ಜಾಲಾ, ದೊಗಾಂ ಭುರ್ಗ್ಯಾಂಚೊ
ಬಾಪಯ್, ದೆಡ್ಶೆಂ ಕಾಮಾಗಾರಾಂಕ್ ಜೋಡ್ ದಿಂವ್ಚೊ ಮ್ಹಾಲಕ್. ಕಾರಾಂ ಆಸಾತ್,
ವ್ಹಡ್ ಬೊಂಗ್ಲೊ ಆಸಾ, ಖರ್ಚಾಕ್ ಪಯ್ಶಾಂಚೊ ಕಾಂಯ್ ತತ್ವಾರ್
ನಾ. ಮ್ಹಜೊ ಮೊಗಾಳ್ ಪತಿ ತೊ.
ತ್ಯೆ ಸ್ತ್ರೀಯೆಚ್ಯಾ ಬೆಸಾಂವಾ ನಿಮ್ತಿಂಚ್ ಹೆಂ ಸಕ್ಕಡ್ ಜಾಲಾಂ ಮ್ಹಳ್ಳೆಂ ಹಾಂವ್ ಜಾಣಾ. ಫಕತ್ತ್ ತಿಚ್ಯಾ ಬೆಸಾಂವಾನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
