ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಸಾಕ್ರಿಫಿಸ್
ಅಶುಂತಾ ಪಿರೇರಾ ಗಂಟಾಲ್ಕಟ್ಟೆ: ಚಡ್ತಾವಾಂಕ್ ಆಪ್ಲ್ಯಾ ಮಾಂಯ್ಗಾಂವಾಂತ್ ಆಸೊನ್ಯ್ ಮಾಂಯ್ಭಾಸೆಚೊ ಮೋಗ್ ನಾತ್ಲ್ಲ್ಯಾ ಹ್ಯಾ ಕಾಳಾರ್, ಪರ್ಗಾಂವಾಂತ್ ಆಸೊನ್ಯೀ ಮಾಂಯ್ಗಾಂವ್ಚೊ, ಮಾಂಯ್ಭಾಸೆಚೊ ಮೋಗ್ ಆಸೊನ್, ಅಪ್ಣಾಕ್ ಸಂದರ್ಭ್ ಲಾಭ್ತಾನಾ ಕೊಂಕ್ಣಿ ಸಾಹಿತ್ಯ್ ರಸ್ಚಿ ಪಿಸಾಯ್ ಆಸ್ತಾ. ತಾಂತುಂ ಎಕ್ಲೆಂ ಬಾಯ್ ಅಶುಂತಾ ಪಿರೇರಾ. ಆಯ್ಲೆವಾರ್ ಅಪ್ಲ್ಯಾ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ಬೆಸಾಂವ್’ ಹಿಣೆ ಪರ್ಗಟ್ಲಾ. ಹಿ ಕಾಣಿ ತ್ಯಾ ಬುಕಾಂತ್ಲಿ ಏಕ್ ಕಾಣಿ.
ಹೆರ್ ಕಾಣ್ಯೊ: ಬೆಸಾಂವ್
ಅಶುಂತಾ ಪಿರೇರಾ
“"ಯೆದೊಳ್ ಮ್ಹಣಾಸರ್ ಕಾಜಾರ್ ಜಾ ಕಾಜಾರ್ ಜಾ ಮ್ಹಣ್ ಪುರ್ಪುರ್ತಾಲಿ ಆತಾಂ ಕಾಜಾರ್ ಜಾಲೊಂ ಹಾಂವ್ ಆನಿಕೀ ತುಕಾ ತುಕಾ ಸಮಾಧಾನ್ ನಾ!"
ಸಾಕಾಳಿಂ ಫುಡೆಂ ಕಾಮಾಕ್ ಭಾಯ್ರ್ ಸರ್ಚಾ ಮ್ಹಜಾ ಮೊಗಾಚಾ ಎಕ್ಲ್ಯಾಚ್ ಪುತಾನ್ ಹಿಂ ಉತ್ರಾಂ ಸಾಂಗ್ತಾನಾ ಮ್ಹಜೆಂ ಕಾಳಿಜ್ ಕೊಸಾಳ್ಳೆಂ. ಪುತಾಚಾ ಕಾಜಾರಾ ಉಪ್ರಾಂತ್ ಖಂಚಾಯ್ ಆವಯ್ಕ್ ಅಸಮಾಧಾನ್ ಭೊಗ್ತಾ? ಖಂಡಿತ್ ನಾ! ಬಗಾರ್ ತಿಕಾ ಜಾಂವ್ಚಾ ಸೊಂತೊಸಾಕ್ ಗಡ್ ಆಸಾನಾ! ತರ್ ಆಜ್ ಮ್ಹಜೊ ಪೂತ್ ಕಿತ್ಯಾಕ್ ಮಾಕಾ ಕೀಳ್ ಕರ್ನ್ ಉಲಯ್ಲೊ? ಮ್ಹಜೆ ಥಾವ್ನ್ ಕಾಂಯ್ ಚೂಕ್ ಜಾಲಿಗೀ? ಸಾಕಾಳಿಂ ಥಾವ್ನ್ ಸಾಂಜೆ ಪರ್ಯಾಂತ್ ಹಾಂವ್ ಹೆಂಚ್ ಚಿಂತುಂಕ್ ಪಡ್ಲಿಂ ಆನಿ ಹಾವೆಂ ನಿರ್ಧಾರ್ ಕೆಲೊ ಕೀ ಮ್ಹಜಾ ಪುತಾ ಕಡೆ ಸಾಂಜೆರ್ ಹಾಂವೆಂ ಉಲಂವ್ಕ್ ಜಾಯ್. ಮ್ಹಜೆ ಥಾವ್ನ್ ಕಿತೆಂಯ್ ಚೂಕ್ ಜಾಲಿ ತರ್ ಮಾಫಿ ಮಾಗೊಂಕ್ ಜಾಯ್.
ವೊಣ್ತಿರ್ ಉಮ್ಕಾಳ್ಚಾ ಘಡಿಯಾಳಾಚೆರ್ ದೀಷ್ಟ್ ಲಾವ್ನ್ ದೊಳೆ ವೊಳೊನ್ ಗೆಲೆ ಆನಿ ಕಶೆಂಯ್ ಸಾಂಜೆಚಿಂ ಸೊವ್ ವೊರಾಂ ವಾಜ್ಲಿಂ ಆನಿ ಮ್ಹಜೊ ಪೂತ್ ದಾರಾರ್ ಉಬೊ ಜಾಲೊ ಆನಿ ಮ್ಹಜೆಲಾಗಿಂ ವಿಚಾರಿ......
"ಹಲೋ ಡಾರ್ಲಿಂಗ್! ಹೌ ಆರ್ ಯು? ಟೀ ಪ್ಲೀಜ್".
ಹಾಸ್ತ್ಯಾ ತೊಂಡಾನ್ ಮ್ಹಜಾ ಪುತಾನ್ ಸದಾಂಚೆ ಪರಿಂ ಉಲಯ್ತಾನಾ ಮಾಕಾ ಸಮ್ಜಾಲೆಂ ಕೀ ಮ್ಹಜೊ ಪೂತ್ ಸಕ್ಕಡ್ ವಿಸ್ರೊನ್ ಗೆಲಾ ಕಿತೆಂ ತಾಣೆಂ ಸಾಕಾಳಿಂ ಸಾಂಗ್ಲ್ಲೆಂ. ಹಾಂವ್ ಸಂತೊಸ್ಲಿಂ ಆನಿಂ ತಾಕಾ ತಾಚಿ ’ಟೀ’ ಕರುನ್ ದೀಂವ್ಕ್ ಘಳಾಯ್ ಕರುಂಕ್ ನಾಂ.
ಮ್ಹಜೆಂ ಕಾಳಿಜ್ ಸಾಂಗ್ತಾ ‘ಹಾಂವೆಂ ಮ್ಹಜಾ ಪುತಾ ಕಡೆ ಉಲಯ್ಜೆ... ತೊ ಮ್ಹಜೊ ಪೂತ್... ಹಾವೆಂ ತಾಚೆ ಕಡೆ ಉಗ್ತ್ಯಾನ್ ಉಲಂವ್ಕ್ ಮಾಕಾ ಅಧಿಕಾರ್ ಆಸಾ’. ಹಾಂವೆಂ ಮ್ಹಜೆ ಥಂಯ್ ಆಸ್ಲ್ಲೆಂ ಸರ್ವ್ ಧೈರ್ ಎಕ್ಟಾಯ್ ಕೆಲೆಂ ಆನಿ ತಾಕಾ ಮ್ಹಳೆಂ..
"ಪುತಾ ...ಜೋನಿ... ಮಾಕಾ ತುಜೆ ಕಡೆ ಉಲಂವ್ಕ್ ಆಸಾ..."
"ಎಕ್ಸ್ಯೂಸ್ ಮೀ ಮಾಮ್, ತುವೆಂ ಮ್ಹುಜೆ ಕಡೆಂ ಎಪಾಂಯ್ಟ್ ಮೆಂಟ್ ಘೆತ್ಲ್ಯಾಯ್ಲಿ ? ಮ್ಹಜಾ ಪುತಾನ್ ಹಿಂ ಉತ್ರಾಂ ವಿಚಾರ್ತಾನಾ ಹಾಂವ್ ಥಟಕ್ಕ್ ಜಾಲಿಂ...
"ಮಾಮ್ಮಿ, ತುಕಾ ಮ್ಹಜೆ ಕಡೆ ಉಲಯ್ಜೆ ತರ್ ತುವೆಂ ಮ್ಹಜೆಂ ಕಿತೆಂ ಪರ್ಮಿಷನ್ ಘೆಂವ್ಕ್ ಆಸಾಗೀ? ಆಮಿಂ ದೊಗಾಂಯ್ ಫ್ರೆಂಡ್ಸ್, ತುವೆಂ ಕೆದಾಳಾಯ್ ಕಿತೆಂಯ್ ವಿಚಾರ್ಯೆತ್, ಉಲವ್ಯೆತ್.... ಕಾಲೆಂ ಜಾಯ್ ತುಕಾ...ಪೊಯ್ಶೆ, ನೊವೆಂ ಕಾರ್, ಘರ್ ಕಾಮಾಕ್ ನೌಕಾರ್, ಜೆರುಜಾಲೆಮಾಕ್ ವಚೊಂಕ್ ಟಿಕೆಟ್? ಕಿತೆಂ ಜಾಯ್ ಸಾಂಗ್ ॓.
ಮ್ಹಜಾ ಪುತಾಚಿಂ ಉತ್ರಾಂ ಆಯ್ಕೊನ್ ಹಾಂವ್ ಸೊಂತೊಸ್ಲಿಂ ಆನಿ ಹಾಂವ್ ತಾಚಾ ಲಾಗ್ಸಾರ್ ಬಸ್ಲಿಂ. ಆನಿಂ ತಾಚೆ ದೊನೀ ಹಾತ್ ಹಾಂವೆ ಧರ್ಲೆ ಆನಿ ಮ್ಹಳೆಂ "ಪುತಾ, ಮ್ಹಜೆ ಥಾವ್ನ್ ಕಿತೆಂಯ್ ಚೂಕ್ ಜಾಲಿ ತರ್ ಮಾಕಾ ಮಾಫ್ ಕರ್, ತುವೆಂ ಕಾಜಾರ್ ಜಾಯ್ಜಾಯ್ ಮ್ಹಣ್ ಹಾಂವ್ ಆಶೆತಾಲಿಂ ವಯ್ ಆನಿ ತುಜಾ ಕಾಜಾರಾ ಉಪ್ರಾಂತ್ ಹಾಂವ್ ಮ್ಹಸ್ತ್ ಸಂತುಷ್ಟ್ ಆಸಾಂ."
ಮಾಮ್ಮಿ ಹಾಂವ್ ಜಾಣಾಂ ತೆಂ... ಡೋಂಟ್ ವರ್ರಿ... ಸಾಂಗಾತಾಚ್ಚ್ ಹಾಂವ್ ಹೆಂಯ್ ಜಾಣಾಂ ಕೀ ಮ್ಹಜಾ ಕಾಜಾರಾ ಥಾವ್ನ್ ತುಕಾ ಇಲ್ಲೊಸೊ ಮೊಸೊರೀ ಜಾಲಾ ಕಿತ್ಯಾಕ್ ಮ್ಹುಳ್ಯಾರ್ ಹಾಂವ್ ತುಕಾ ಇಲ್ಲೊ ಉಣೆಂ ಟೈಮ್ ದಿತಾ ಆಜ್ಕಾಲ್ ವ್ಹಯ್ಗಿ ನ್ಹಯ್, ಸಾಂಗ್, ಸಾಂಗ್..."
ಪರ್ತ್ಯಾನ್ ಮ್ಹಜೊ ಪೂತ್ ಮ್ಹಜೆಲಾಗಿಂ ಮಸ್ತಿ ಕರುಂಕ್ ಲಾಗ್ಲೊ...
ಹಾಂವ್ ರಾಗಾನ್ ಪೆಟ್ಲಿಂ ತರೀ ಉಲ್ಟೆಂ ಮ್ಹಜಾ ಪುತಾಚಿಂ ಪೊಕ್ರಿಪೊಣಾಚಿ ಉತ್ರಾಂ ಆಯ್ಕಾತಾನಾ ಹಾಸೊಂಕ್ ಯೆತಾಲೆಂ.
" ತುಕಾ ಕಿತೆಂ ಸಾಂಗೊಂಕ್ ಆಸಾ ತೆಂ ಮಾಕಾ ಶೀದಾ ಸಾಂಗ್ ಜೋನಿ..." ಇತ್ಲೆಂ ಸಾಂಗೊನ್ ಹಾಂವ್ ಉಬಿಂ ರಾವ್ಲಿಂ.
"ಮಮ್ಮ್ ಲಿಸನ್, ಯು ಆರ್ ಸ್ವೀಟ್" ಮ್ಹಣಾಲೊ ತೊ.
"ಮಾಕಾ ಮಸ್ಕೊ ಲಾಂವ್ಕ್ ಪ್ರಯತ್ನ್ ಕರಿನಾಕಾ" ಹಾವೆಂ ತಾಕಾ ಖಡಕ್ಕ್ ತಾಕಿದ್ ದಿಲಿ.
ತಕ್ಶಣ್ ತಾಣೆಂ ಮಾಕಾ ಮುಡ್ಯಾ ತಿತ್ಲೆಂ ಜಡಾಯೆಚೆಂ ಸವಾಲ್ ಕೆಲೆಂ . . .
"ತರ್ ತುಂ ಕಿತ್ಯಾಕ್ ಸೋನಿಯಾ ವಿಶಿಂ ದುರಾಂ ಸಾಂಗ್ತಾಯ್?"
"ಸೋನಿಯಾ ಮ್ಹಜಿ ಸುನ್, ಪೂಣ್ ತಾಣೆ ಧುವೆಚೆಂ ಸ್ಥಾನ್ ಘೆತ್ಲಾಂ ಮ್ಹಜಾ ಕಾಳ್ಜಾಂತ್. ಧುವ್ ನಾ ಮ್ಹಳ್ಳೆಂ ದೂಕ್ ಪಯ್ಸ್ ಕೆಲಾಂ, ತಾಣೆಂ ಆನಿ ತುವೆಂ ಬರೆಂ ಕರ್ತಾನಾ ಶಾಭಾಸ್ಕಿ ದೀವ್ನ್, ಚೂಕ್ ಕರ್ತಾನಾ ತಿದ್ವುಂಚೆಂ ಮ್ಹಜೆಂ ಕಾಮ್.... ಪಳೆ ಪುತಾ, ತೆಂ ತುಜಾಕೀ ಪಯ್ಲೆಂ ಘರಾ ಥಾವ್ನ್ ಭಾಯ್ರ್ ಪಡ್ತಾ, ಆನಿ ತುಜಾಕೀ ವೇಳ್ ಕರುನ್ ಪಾಟಿಂ ಘರಾ ಪಾವ್ತಾ, ಮಟ್ವಿಂ ಮಟ್ವಿಂ ವಸ್ತುರಾಂ ನ್ಹೆಸ್ತಾ, ಆಯ್ತಾರಾ ಏಕ್ ದೀಸ್ ಮಿಸಾಕ್ ಯೇ ಮ್ಹಳ್ಯಾರ್, “ಇಟ್ಸ್ ಟೈಮ್ ವೇಸ್ಟ್ , ಇನ್ಸ್ಟೆಡ್ ಆಫ್ ವೇಸ್ಟಿಂಗ್ ಟೈಮ್ ಐ ಲೈಕ್ ಟು ಸ್ಲೀಪ್ ಮಮ್ಮ್ ಮ್ಹಣ್
ಮ್ಹಣ್ತಾ".
"ಮಾಮ್ಮಿ, ಉಗ್ಡಾಸ್ ಕರ್ ತುವೆಂಚ್ ಸಾಂಗ್ಲ್ಲೆಂಯ್ ‘ಪ್ಲೀಜ್ ಪುತಾ ಕಾಜಾರ್ ಜಾ. ಕಸಲ್ಯಾ ಚೆಡ್ವಾಕ್ ತುವೆಂ ಘರಾ ಹಾಡ್ಲ್ಯಾರೀ ಜಾಯ್ತ್, ಹಾವೆಂ ಮೊರ್ಚಾ ಪಯ್ಲೆಂ ತುವೆಂ ಕಾಜಾರ್ ಜಾಂವ್ಕ್ ಜಾಯ್ ವ್ಮ್ಹಣ್”ಆನಿ ಆತಾಂ ತೆಂ ಸಗ್ಳೆಂ ವಿಸ್ರೊನ್ ಗೆಲಿಯ್ಗೀ? ಮಾಕಾ ದಿಸ್ತಾ ತುವೆಂ ಆತಾಂ ತುಜಿ ಸಿ.ಡಿ ಚೇಂಜ್ ಕರುನ್ ದುಸ್ರಿ ಘಾಲ್ಯಾಯ್ ದಿಸ್ತಾ".
ಪರ್ತ್ಯಾನ್ ತೊ ಮ್ಹಜೆ ಕಡೆ ಪೊಕ್ರಿಪಣಾ ಉಲಂವ್ಕ್ ಲಾಗ್ಲೊ . . .
"ಲಿಸನ್ ಮಮ್ಮ್, ಸೋನಿಯಾ ಭಾಯ್ಲ್ಯಾ ಗಾವಾಂತ್ ಜಲ್ಮೊನ್, ವಾಡೊನ್ ಶಿಕ್ಲ್ಲೆಂ ಚೆಡುಂ ಆನಿ ಹಾಂವ್ ತಾಕಾ ಕಶೆಂ ತುಜೆ ಬರಿ ರೇಶನಾಚಿಂ ಕಾಪ್ಡಾಂ ಗುಟ್ಲಾಂವ್ಕ್ ಸಾಂಗೊಂ? ಸಾಕಾಳಿಂ ತೆಂ ವೆಗ್ಗಿಂ ವೆತಾ ತೆಂ ಹಾಂವ್ ಜಾಣಾ, ಪೂಣ್, ತಾಚಾ ಕಂಪೆನಿಚೆ ಸಗ್ಳೆ ಕ್ಲಾಯೆಂಟ್ಸ್ ಜರ್ಮನ್ಸ್ ಜಾಲ್ಲ್ಯಾನ್ ತಾಕಾ ಜರ್ಮನ್ ಶಿಕೊಂಕ್ ಆಸಾ. ತಾಕಾ ಪ್ರೊಮೋಶನ್ ಜಾಯ್ಜೆ ತರ್ ತಾಕಾ ಜರ್ಮನ್ ಯೇಂವ್ಕ್ಚ್ಚ್ ಜಾಯ್. ಸಾಂಜೆರ್ ತೆಂ ಜಿಮ್ನೆಸಿಯಮಾಕ್ ವೆತಾ ತಾಚೊ ಜೀವ್ ಫಿಟ್ ದವರ್ಚಾ ಖಾತಿರ್. ಮಾಕಾ ತಾಚಿ ಚೂಕ್ ಮ್ಹಣ್ ಭೊಗಾನಾ".
"ವಯ್ ವಯ್, ತುಕಾ ತಾಚಿ ಚೂಕ್ ದಿಸ್ಚಿ ತರೀ ಕಶೀ ಪುತಾ ? ತುಂ ತಾಚೆ ಥಂಯ್ ಸಗ್ಳೊ ಪಿಸೊ ಜಾಲಾಯ್..." ಮ್ಹಜಾ ಪುತಾಕ್ ಹಾಂವ್ ಪುರ್ಪುರುಂಕ್ ಲಾಗ್ಲಿಂ.
"ಯು ಆರ್ ರೈಟ್ ಮಮ್ಮ್, ಐ ಆಮ್ ರಿಯಲ್ಲಿ ಮ್ಯಾಡ್ ಎಟ್ ಹರ್, ತೆಂ ಕಿತೆಂಯ್ ಕರುಂ, ಐ ಲವ್ ಇಟ್ ಎಂಡ್ ಐ ಲವ್ ಹರ್...."
ಮ್ಹಜೊ ಪೂತ್ ಪರ್ತ್ಯಾನ್ ತಾಚಾ ಸ್ವಪ್ಣಾ ರಾಜಾಂತ್ ರಿಗ್ಲೊ. ಹಾಂವೀ ಸಂತೊಸ್ ಪಾವ್ಲಿಂ ಆನಿ ಹಾಂವೆಂ ತಾಕಾ ಧೊಸ್ಚೆಂ ಪ್ರಯತ್ನ್ ಕರುಂಕ್ ನಾ, ಬಗಾರ್ ಹಾಂವ್ ತಾಕಾ ರಾಕೊನ್ ರಾವ್ಲಿಂ. ಥೊಡ್ಯಾ ವೆಳಾನ್ ತಾಣೆ ಮಾಕಾ ಸದಾಂಚೆ ಬರಿಂ ಪೊಟ್ಲುನ್ ಧರುನ್ ಮ್ಹಜಾ ಗಾಲಾಂಕ್ ಕೀಸ್ ದಿಲೆ ಆನಿ ಮ್ಹಣಾಲೊ....
“ಹಾಯ್ ಸ್ವೀಟ್ ಹಾರ್ಟ್, ಆರ್ ಯು ಸ್ಟಿಲ್ಲ್ ಆಂಗ್ರ್ಯಿ ಓನ್ ಮಿ..?" ತಾಚಿಂ ಹಿಂ ಉತ್ರಾಂ ಆಯ್ಕಾತಾನಾ ಪರ್ತ್ಯಾನ್ ಮ್ಹಜೆಂ ಮೊಡ್ಲ್ಲೆಂ ಹೆಂ ಮನ್ ವೊಡ್ಲೆಂ
“ನೊ ಮೈ ಡಿಯರ್ ಸನ್" ಮ್ಹಣ್ ಸಾಂಗೊಂಕ್ ಹಾವೆಂ ವೇಳ್ ಕೆಲೊ ನಾ.
“ಮಾಮ್ಮಿ, ಹಾಂವ್ ಜಾಣಾ ತುವೆಂ ಮ್ಹಜೆ ಖಾತಿರ್ ಕಿತ್ಲೆ ಕಷ್ಟ್ ಕಾಡ್ಲ್ಯಾಯ್ ಮ್ಹಣೊನ್... ಡ್ಯಾಡಿ ನಾಂ ತರೀ ಮಾಕಾ ಕಸಲೆಂಚ್ ಉಣೆಪಣ್ ಭೊಗುಂಕ್ ದೀವ್ನಾಂಯ್. ಮ್ಹಾಕಾ ಆಜುನಿಯೀ ಉಗ್ಡಾಸ್ ಆಸಾಂ ಹಾಂವ್ ಕಾಲೆಜಿಂತ್ ಆಸ್ತಾನಾ ಸಾಯನ್ಸ್ ಎಕ್ಸಿಬಿಶನಾಕ್ ಆಮೇರಿಕಾಕ್ ವೊಚೊಂವ್ಕ್ ಪೈಶೆ ನಾತ್ಲ್ಯಾ ವೆಳಾರ್ ತುವೆಂ ಡ್ಯಾಡಿಚೆಂ ಇನ್ಸುರೆನ್ಸಾಚೆ ಪಯ್ಶೆ ಕಾಣ್ಘೆವ್ನ್ ಮಾಕಾ ಅಮೇರಿಕಾಕ್ ಧಾಡುಂಕ್ ನಾತ್ಲೆಂಯೀ ತರ್, ಸೋನಿಯಾ ಕೆದಿಂಚ್ ಮಾಕಾ ಮೆಳ್ತೆಂ ನಾಂ ಆನಿ ತ್ಯಾ ದೀಸ್ ಹಾಂವ್ ತಾಚಾ ಮೊಗಾರ್ ಪಡ್ತೊನಾ..."
ಆಜ್ ಹಾಂವ್ ಮ್ಹಜಾ ಪುತಾ ಥಂಯ್ ಮೊಸ್ತ್ ಸೊಂತೊಸ್ ಪಾವ್ತಾಂ, ಹಾವೆಂ ಕೆಲ್ಲ್ಯಾ ಉಪ್ಕಾರಾಚೊ ತಾಕಾ ಅಜೂನೀ ಉಗ್ಡಾಸ್ ಆಸಾ.
ಪರ್ತ್ಯಾನ್ ತೊ ಉಲಯ್ಲಾಗ್ಲೊ ಆನಿ ಮ್ಹಣಾಲೊ "ಮಾಮ್ಮಿ ತುಜಾ ಪನ್ನಾಸ್ ವರ್ಸಾಂಚಾ ಜಲ್ಮಾ ದಿಸಾಕ್ ತುಕಾ ಏಕ್ ವ್ಹಡ್ಲೊ ಬೊಂಗ್ಲೊ ಪ್ರೆಸೆಂಟ್ ಕರುಂಕ್ ಚಿಂತಾಂ ಆನಿ ತುವೆಂ ಮ್ಹಜೆ ಥಂಯ್ ಕೆಲ್ಲ್ಯಾ ಉಪ್ಕಾರಾಕ್, ತ್ಯಾ ತ್ಯಾಗಾಕ್ ತುಜೆಂ ಸಗ್ಳೆಂ ಋಣ್ ಆನಿಂ ತಶೆಂಚ್ ರೀಣ್ ಫಾರಿಕ್ ಕರುಂಕ್ ಹಾಂವ್ ಚಿಂತಾಂ...ಕಶಿ ಆಸಾ ಮ್ಹಜಿ ಐಡಿಯಾ? .. ಆರ್ ಯು ಹೆಪ್ಪೀ... ಲೋಕ್ ಮ್ಹಣ್ತಾ ಆವಯ್ ಬಾಪಾಯ್ಚೆಂ ಋಣ್ ಫಾರಿಕ್ ಕರುಂಕ್ ಭುರ್ಗಿಂ ಕೆದಿಂಚ್ ಸಕಾನಾಂತ್ ಮ್ಹಣ್ ಪೂಣ್ ಮಾಕಾ ತೆಂ ಫೊಟ್ ಕರುಂಕ್ ಜಾಯ್..."
"ತುಂ ಮಾಕಾ ಬೊರೊ ಬೊಂಗ್ಲೊ ಪ್ರೆಸೆಂಟ್ ಕರುನ್ ಆವಯ್ಚೆಂ ಋಣ್ ಆನಿ ರೀಣ್ ಫಾರಿಕ್ ಕರುಂಕ್ ಸಕ್ಶಿ ಪುತಾ, ಪೂಣ್ ತುಜಾ ಡ್ಯಾಡಿಚೆಂ ರಗ್ತಾಚೆಂ ರೀಣ್ ಆಸಾ ತುಜೆ ಥಂಯ್, ತೆಂ ಖಂಡಿತ್ ತುಕಾ ಫಾರಿಕ್ ಕರುಂಕ್ ಜಾಂವ್ಚೆಂ ನಾ.."
"ಡ್ಯಾಡಿಚೆಂ ರಗ್ತಾಚೆಂ ರೀಣ್??"!!
“ವ್ಹಯ್ ಪುತಾ ..... ಆಮ್ಚೆಂ ಸಗ್ಳೆಂ ಬಿಜ್ನೆಸ್ ಡ್ಯಾಡಿಚಾ ಎಕಾ ಇಷ್ಟಾನ್ ಭಿತರ್ ಘಾಲ್ನ್ ಆಮ್ಚಿ ಆರ್ಥಿಕ್ ಪರಿಸ್ಥಿತಿ ಮೊಸ್ತ್ ಪಾಡ್ ಜಾಲ್ಲಿ ತುಂ ಲ್ಹಾನ್ ಭುರ್ಗೊ ಆಸ್ತಾನಾ. ತಶೆಂ ತುಂ ಕಾಲೇಜಿಕ್ ವೆತಾನಾ ಆಮ್ಚೆ ಕಡೆ ಚಡ್ ಪಯ್ಶೆ ನಾತ್ಲ್ಲೆ; ಆನಿ ತ್ಯಾ ಸಾಯನ್ಸ್ ಎಕ್ಸಿಬಿಶನಾಕೀ ಧಾಡುಂಕ್ ಆಮ್ಕಾಂ ತಾಂಕ್ ನಾತ್ಲ್ಲಿ. ಜೆದ್ನಾಂ ಡ್ಯಾಡಿಕ್ ಕಳಿತ್ ಜಾಲೆಂಗೀ ತುಂ ತ್ಯಾ ಎಕ್ಸಿಬಿಶನಾಕ್ ಅಮೇರಿಕಾ ಪಾವ್ಶಿ ತರ್ ಖಂಡಿತ್ ತುಜೆಂ ಜೀವನ್ ನಂದನ್ ಜಾತೆಲೆಂ, ತುಕಾ ಬೊರೊಂ ಪುಡಾರ್ ಮ್ಹೆಳ್ತೆಲೊ ತ್ಯಾ ಖಾತಿರ್ ಸಬಾರ್ ಕಡೆ ಆಮಿಂ ರೀಣ್ ಕಾಡುಂಕ್ ಪ್ರಯತ್ನ್ ಕೆಲೆಂ ತರೀ ವ್ಹಡ್ಲೊ ಐವಜ್ ಜಾಲ್ಲ್ಯಾನ್ ರೀಣ್ ಮೆಳೊಂಕ್ ಕಷ್ಟ್ ಜಾಲೆ. ತ್ಯಾ ಖಾತಿರ್ ಡ್ಯಾಡಿನ್ ಜೀವ್ಗಾತ್ ಕೆಲೊ ಆನಿ ತಾಣೆ ಬರೈಲ್ಲ್ಯಾ ಗುಪಿತ್ ಚಿಟೀರ್ ಇನ್ಶ್ಸುರೆನ್ಸಾ ಥಾವ್ನ್ ಮೆಳ್ಲ್ಲ್ಯಾ ಪಯ್ಶಾನಿಂ ತುಕಾ ಅಮೇರಿಕಾ ಧಾಡುಂಕ್ ಮಾಕಾ ವಿನಂತಿ ಕೆಲ್ಲಿ....."
ಇತ್ಲಿಂ ವರ್ಸಾಂ ಪರ್ಯಾಂತ್ ಲಿಪಯಿಲ್ಲಿ ಹಿಂ ಕಾಣಿ ಮ್ಹಜಾ ಪುತಾಕ್ ಹಾಂವ್ ಸಾಂಗೊನ್ಂಚ್ ಗೆಲಿಂ, ಕಿತ್ಯಾಕ್, ಮ್ಹಜೆಂ ದೂಕ್ ಮಾಕಾ ಹಳೂ ಕರುಂಕ್ ಜಾಯ್ ಆಸ್ಲ್ಲೆಂ ಆನಿ ಮ್ಹಜೊ ಭುರ್ಗೊ ಬಾಳ್ಸ್ಯಾ ಪರಿಂ ಮ್ಹಜಾ ಉಸ್ಕ್ಯಾರ್ ಗಳ್ಳೊ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
