ಕವಿತಾकविताPoem
ಎಲ್ಯೆರ್,
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ದಾಯ್ಜ್ ಕವಿತಾ ಸ್ಪರ್ಧೊ 2006 ಹಾಂತುಂ ಇನಾಮಾಂ ಜಿಕ್ಲ್ಲಿಂ ಕವಿತಾ"
ಎಲ್ಯೆರ್, ತಾಕೊಡೆ
[ಪಯ್ಲೆಂ ಇನಾಮ್]
[ರುಪಯ್ 5000]
ದೆಸಾಚೆ ಖಂತಿಂತ್!
ಮ್ಹಜ್ಯಾ ದೆಸಾಂತ್ ಆಜ್
ಸತಾಂಚಿ ಸುನ್ನಾತ್ ಜಾತಾ
ಫಟಿಂಚೆ ಘಾಂಟಿಕ್ ಕೊಂಡಮ್ ಶಿರ್ಕಾವ್ನ್
ನೀತಿಚೆರ್ ಸಂಭೋಗ್ ಚಲ್ತಾ
ತಾಂಬ್ಡ್ಯಾ ಗಲ್ಲೆಂತ್ಲ್ಯಾ ಗಡ್ದೆಂತ್
ಪೊಂವೊನ್ ವೆಚ್ಯಾ ಇರ್ಜನಾಬರಿಂ
ಕಾಯ್ದೆ ಕಾನುನಾಂ ಪಾಜ್ವೊನ್ ವೆತಾತ್!
ಲೊಂಚಾಚೆ ಈದ್ರ್ ಪಿಯೆವ್ನ್
ಲೇಲೆ ಘಾಲುನ್ ಧಾಂವ್ತಾ
ಹ್ಯಾ ದೇಸಾಚೆಂ ಪೊಲಿಟಿಕ್ಸ್
ತಾಚೆ ಪಾಟ್ಲ್ಯಾನ್
ಕೆಸಾಂಚಿಂ ಝಾಂಟಾಂ ಶಿರ್ಕಾಲ್ಲ್ಯಾ
ಲೆಗುನ್ ತಲ್ಕಾಂಬರಿಂ
ಕೋಡ್ತ್ ವಕೀಲ್ ಆನಿ ಪೊಲಿಸ್
ನಿಮ್ಣೆ
ಹ್ಯಾ ದೆಸಾಚೊ ಸಾದೊ ನಾಗರಿಕ್
ಹರ್ನಿಯಾ ಪಿಡೇಸ್ತಾಬರಿಂ!
ಇತ್ಲೆಂಚ್ ತರ್ ವ್ಹಡ್ನಾ ಆಸ್ತೆಂ
ಆತಾಂತಾಂ, ಜಾತಿ ಮತಾಚ್ಯಾ ನಿಬಾನ್
ಸಾದಿಂ ಕಾಳ್ಜಾಂ ಪಾಸುನ್
ಮಿತ್ತಲಾಚ್ಯಾ ಸ್ಟೀಲಾಬರಿಂ
ಧಾರುಣ್ ಜಾಲ್ಯಾಂತ್
ದೇವ್ - ಧರ್ಮಾಚ್ಯಾ ಸೊರ್ಮುಣಾಂತ್
ಆಟೊನ್ ಆಟೊನ್
ಮಾಸೂಮ್ ಮನಾಂ ಸಯ್ತ್
ಮಲ್ಲ್ಯಾಚೊ ಸೊರೊ ಜಾಲ್ಯಾಂತ್
ಆತಾಂ ಮ್ಹಜಿ ಗಜಾಲ್
ಆಯ್ಕಾ..
ಹಾಂವ್,
ಹ್ಯಾ ದೆಸಾಚೆ ಖಂತಿನ್ ಬುಡೊನ್
ಚಿಂತುನ್ ಚಿಂತುನ್
ಕಂಗಾಲ್ ಜಾಲ್ಲೊ ಜೀವ್
ಆತಾಂ..
ಮಾನೆಸ್ತಾಂಕ್ ಡ್ರಗ್ಸಾಂತ್ ಬುಡವ್ನ್
ಗಿರೆಸ್ತಾಂಕ್ ಸೆಕ್ಸಾಂತ್ ನಿದಾವ್ನ್
ಗರಿಬಾಂಚಿ ರಕ್ಷಾ ಕರ್ಚೊ
ನಕ್ಸಲೈಟ್!
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ಎಚ್ಚೆಮ್
[ದುಸ್ರೆಂ ಇನಾಮ್]
[ರುಪಯ್ 3000]
ಸುಮಂಗಳೆಚೊ ಸ್ವಗತ್
ಹರ್ ರಾತ್ ಪುನವ್ ಮ್ಹಣ್
ಸಜೊನ್ ರಾವ್ಲಿಂ ಮಾಳುನ್ ಫುಲಾಂ
ನೆಸೊನ್ ಪಾಚ್ವೆಂ, ಯೆಣ್ಯಾಕ್ ತುಜ್ಯಾ
ಹರ್ ಜೆವಣ್ ಸಮಾಣ್ ಮ್ಹಣ್
ರಾಂದೂನ್ ಗೆಲಿಂ ರುಚಿಕ್ ಪಾಕ್ವಾನಾಂ
ದೀತ್ ಮ್ಹಣ್ ತ್ರಾಣ್, ವಿಸ್ವ್ಯಾಂಕ್ ತುಜ್ಯಾ
ಹರ್ ಸುರತ್ ಸೊಭಾಣ್ ಮ್ಹಣ್
ಖೆಳ್ಳಿಂ ಜಾಂಗಾಂನಿಂ ಲೊಳ್ಳಿಂ ಬಾವ್ಳ್ಯಾಂನಿ
ಖರ್ಶೆವ್ನ್ ರಾವ್ಲಿಂ, ಥೆಂಬ್ಯಾಕ್ ಎಕಾ ....
ಅಶೆಂ ಕಿತ್ಲ್ಯೊ ಸರೊನ್ ಗೆಲ್ಯೊ .. ..
ಅಸ್ಖಲಿತ್ ರಾತಿ, ರಾಕೊನ್ ಹಾಂವ್
ಫಾತೊರ್ ಜಾಲ್ಯಾಂ ವೆಂಗೆಂತ್ ತುಜ್ಯಾ.
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ಮೆಲ್ವಿನ್ ಪಿಂಟೊ, ನೀರುಡೆ
[ತಿಸ್ರೆಂ ಇನಾಮ್]
[ರುಪಯ್ 2000]
ನಾಚ್
ವಾರ್ಯಾ ರಾಣ್ಯೆ ಮೊಗಾ ಸ್ಪರ್ಶಾನ್
ರೂಕ್ ಧಲೊನ್ ಪಾನಾಂ ಶಿಂವೊರ್ ವೊತ್ತಾನಾ
ಗುಲೊಬಾ ಪಾಕ್ಳೆಂತ್ಲೊ ಮಧು ಚಿಂವೊನ್
ಪೊಕ್ರಿ ಭಂವರ್ ಆಮಾಲಿ ಜಾತಾನಾ
ನಾಚ್ ಘಡ್ತಾ
ರಾನಾಂ-ಮೊಲ್ಯಾಂ, ಗುಡ್ಯಾ-ಫಾಲ್ಯಾಂನಿ ಜಿವ್ದಾಳ್ ಕಶಿ
ತಾಬೊ ನಂಯ್ ಹಾಲೊನ್ ಧಲೊನ್ ವ್ಹಾಳ್ತಾನಾ
ತಿಚ್ಯಾ ಮಸ್ತೆಂನಿ ಪುಳಕಿತ್ ತಿಗುರ್
ಚರ್ಬೆಚಿಂ ಉಡ್ಕಾಣಾಂ ಘಾಲ್ತಾನಾ
ನಾಚ್ ಘಡ್ತಾ
ಸಮ್ದಿರಾಚೆಂ ಎಕೆಕ್ ಲ್ಹಾರ್ ಸುಕ್ತೆ ಭರ್ತೆಂನಿ
ಬುಳ್ಬುಳ್ಯಾಂ ಮೊಗ್ರ್ಯಾಂ ಸವೆಂ ತಡಿಕ್ ಆಪ್ಟಾತಾನಾ
ಮೊಡಾಂ ಮೊಡಾಂ ಮದೆಂ ಮೊಗಾ-ಖೆಳ್ ಉಭ್ಜೊನ್
ಪಾವ್ಸಾ ಮೊತಿಯಾಂ-ಧಾರ್ ಭುಂವಿ ದೆಂವ್ತಾನಾ
ನಾಚ್ ಘಡ್ತಾ
ಮೊಡಾಂ ನಕ್ತಿರಾಂ ಮದೆಂ ಅಪಾಲಿಪಾ ಖೆಳೊನ್
ಚಂದ್ರಾ ಹೊರೆತ್ ದರ್ಯಾಕ್ ಗರ್ಬೆಸ್ತ್ ಕರ್ತಾನಾ
ಧರ್ತೆ ರಾಣಿ ಸುರ್ಯಾ ಭರ್ತಾರಾ ಭಂವ್ತಿಂ
ಉಮಾಳ್ಯಾಂನಿ ಸುಶೆಗಾವಿಣೆಂ ಭಂವಾಡೆ ಕಾಡ್ತಾನಾ
ನಾಚ್ ಘಡ್ತಾ
ಶಿರಾಂ ಶಿರಾಂನಿ ರಗತ್ ಲ್ಹಾರಾಂ ಜಶೆಂ ವ್ಹಾಳೊನ್
ಕಾಳ್ಜಾ ಉಡಿಯೆಂನಿ ತಾಳ್ ಭರ್ತಾನಾ
ಎಕೆಕ್ ಜೀವ್ ಕಣ್ ಮರೊನ್ ದುಸ್ರೊ ಜಲ್ಮೊನ್
ಕೂಡ್ ನಾಚ್ಪಾ ಆಂಗಣ್ ಜಾತಾನಾ
ನಾಚ್ ಘಡ್ತಾ
ಪುಣ್,
ದರ್ಯಾ ಜಾಗ್ ವಾರ್ಯಾ ವೇಗ್
ಅಡ್ಕಳ್ಯಾಂನಿ ಅಸ್ತ್ವೆಸ್ತ್ ಜಾಲ್ಲ್ಯಾ ದಿಸಾ
ಗುಲೊಬಾಂತ್ಲೊ ಭೊಂವರ್, ನಂಯ್ತ್ಲೊ ತಿಗುರ್
ಬಲತ್ಕಾರಾನ್ ವಿಂಗಡ್ ಕರ್ಚೆಂ ಪ್ರೇತನ್ ಕೆಲ್ಲ್ಯಾ ದಿಸಾ
ಜಿವಿತ್ ಫುಲಂವ್ಚೊ, ಸೃಷ್ಟಿ ಚಲಂವ್ಚೊ ನಾಚ್ ರಾವ್ತಾ!
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ವಿಲ್ಸನ್ ಕಟೀಲ್
[ಭುಜ್ವಣೆಚೆಂ ಇನಾಮ್]
[ರುಪಯ್ 1000]
ಆಟೆವಿಟೆ
ದಿವ್ಳಾಂತ್
ಮರ್ಜೆನ್ ಧಲ್ಚ್ಯಾ
ಘಾಂಟಿಕ್ ಕಶಿ ಕಳತ್
ಮೆಟಾಂ ಚಡ್ತಾನಾ
ಫಾತ್ರಾಂಕ್ ಆಪ್ಟಂವ್ಚ್ಯಾ
ಪಾಂಯ್ಜಣಾಂಚಿ ದೂಕ್?
ಸಾವ್ಳೆಂತ್
ರುಕಾಕ್ ವೆಂಗ್ಚ್ಯಾ
ವ್ಹಾಲಿಕ್ ಕಸೊ ಕಳತ್
ಭಿತರ್ಲ್ಯಾ ರಾಂದ್ಣಿಂತ್
ಉಜ್ಯಾಂತ್ ಲಾಸ್ಚ್ಯಾ
ಸುಕ್ಯಾ ಲಾಂಕ್ಡಾಚೊ ಹುಲೊಪ್?
ಪಾಳ್ಣ್ಯಾಂತ್
ನಿದೆಂತ್ ಹಾಸ್ಚ್ಯಾ
ಬಾಳಾಕ್ ಕಶಿ ಕಳತ್
ಜಿಣಿಯೆ ಪೊಂತಾರ್
ಫೊಂಡಾಕ್ ದೆಂವ್ಚ್ಯಾ
ಮರ್ಣಾ ಪೆಟೆಚಿ ಝಡಾಯ್?
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ಆಂಟನಿ, ಬಾರ್ಕುರ್
[ಭುಜ್ವಣೆಚೆಂ ಇನಾಮ್]
[ರುಪಯ್ 1000]
ಕಾಟ್ ತುಟ್ಚೊ ವೇಳ್
ಧಡಲ್ ಬ-ಬಡಲ್ ಘಡ್ಘಡೊ ಜಗ್ಲಾಣೆಂ
ಚಿಂತ್ನಾಂಚೊ ರೆವೊಡ್, ಘುಂವ್ಲ್ಲೆಶೆ ಘಾಣೆಂ
ಝಗಡ್ತಾತ್ ಮತಿಂತ್ ಭೊಗ್ಣಾಂಚೆ ಸಾಗೊರ್
ಅಸ್ಡ್ಯಾಂಚ್ಯಾ ಪಡ್ದ್ಯಾರ್ ಇಮಾಜ್ಯೊ ಹಜಾರ್
ಶಿಜೊನ್ ಶಿಜೊನ್ ಪರ್ತಾಲ್ಲೆಶೆಂ ಮೇಲ್
ರಗಡ್ನ್ ರಗಡ್ನ್ ದೆಂವಲ್ಲೆಶೆಂ ತೇಲ್
ಹರ್ ಉಸ್ವಾಸಾಂತ್ ಭರಾತ್ತ್ ಯೆತಾ ಜೀವ್
ಏಕ್ ಏಕ್ ಅನ್ಬೊಗ್ ಗಿಳ್ಯಾಂ ತಿತ್ಲೊ ದಾವ್
ಮಂದ್ ಆವಾಜ್ ಉಟಯ್ತಾಶೆಂ ಲಿಪಲ್ಲಿ ಘೂಗ್
ಸೂರ್ ಪಡಲ್ಲ್ಯಾ ಪೀಟಾಕ್ ಆಯಿಲ್ಲಿಶಿ ಫೂಗ್
ಲ್ಹಾರಾಂ ಉಟವ್ನ್ ಹಾಸ್ತಾತ್ ಶೆಳೆಲ್ಲಿಂ ತಳಿಂ
ಉದರಾಚ್ಯಾ ಭುಂಯಾರಾಂತ್ ಉಬ್ತಾತ್ ಪಿಸೊಳಿಂ
ಧಾಂಪ್ಲ್ಲ್ಯಾ ದಿಷ್ಟಿಂತ್ ಸಂಸಾರಾಕ್ ವಿಸರ್ತಾಂ
ಅವ್ಯಕ್ತ್ ಆನಂದಾಂತ್ ಅನಂತಾಕ್ ನಿಸರ್ತಾಂ
ಮಧುರ್ ಸಿಂತಿಮೆಂತಾಂ, ಮಾತೆಂ ಸಮೇತ್ ಬುಡ್ತಾಂ
ಥಳಾಕ್ ಪಾವ್ತಾಂ, ದುಸ್ರ್ಯಾಚ್ ಸಂಸಾರಾಂತ್ ಉಟ್ತಾಂ
ನಿಮಾಣೆಂ ಭೊಗ್ಣಾಚೊ ತುಟ್ತಾನಾ ಕಾಟ್
ಆಂಗಾಂತ್ ಶಿರ್ಶಿರೊ, ಲ್ಹೊವಾಂ ಸರ್ವ್ ನೀಟ್
ಕಲ್ಪನಾ ದೆಖುನ್ ಆಸ್ತಾನಾ ಅಶೆಂಚ್ ಜಾತಾ
ಶೆಕಿಂ ಲಿಖ್ಣೆಂತ್ ದೆವೊನ್ ಯೆತಾ ಜಿವಿ ಕವಿತಾ.
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ರಿಚ್ಚಿ ಪಿರೇರ್
[ಭುಜ್ವಣೆಚೆಂ ಇನಾಮ್]
[ರುಪಯ್ 1000]
ಸಾಹಿತಿಚೆ ಸಂಕಷ್ಟ್
ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್
ವಾಚ್ತೆಲ್ಯಾಂಕ್, ನಾಚ್ತೆಲ್ಯಾಕ್ ಕಿತೆಂ ಕಳಿತ್?
ಸಿಂತಿಮೆಂತಾಂ ದುಃಖಾಂನಿ ಖಿರವ್ನ್
ಕೊಡು ಕಾಲ್ಸ್ ನಿರಾಳ್ ಪೊಟಾರ್ ಪಿಯೆವ್ನ್
ಮಾರ್ಲ್ಲಿಂ ಉತ್ರಾಂ, ತೊಪ್ಲ್ಲೆ ಭಾಲೆ
ಝೆಲೆ ಕರ್ನ್ ಗಳ್ಯಾಕ್ ಘಾಲೆ!
ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್
ಉಭ್ಗೊಣ್ ಧಾಂವ್ಡಾಯ್ತೆಲ್ಯಾಂಕ್, ಉಲ್ಲಾಸ್ ಭೊಗ್ತೆಲ್ಯಾಕ್
ಸಾಹಿತಿಚೆಂ ಸುಕ್ ದುಕ್ ಕಳಾತ್ ಕಿತೆಂ?
ಸುತಾಕ್ ಭಾಂದ್ಲ್ಲ್ಯಾ ತಾಲ್ವಾರಿ ಸಕಯ್ಲ್ ಮಾತೆಂ..
ಕೆದ್ನಾಂಯೀ ರಿತೆಂ ಪೊತೆಂ!
ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್
ಛಾಪ್ತೆಲ್ಯಾಚ್ಯೊ, ಪ್ರಕಟ್ತೆಲ್ಯಾಚ್ಯೊ ;ತ್ಯೊಚ್’ ಜಾತಿ
ಮೊರ್ಚೆ ಆದಿಂಚ್ ನಿಕೆಪಿಲ್ಲ್ಯೊ ರುಜ್ವಾತಿ
ಕೊಂಪ್ರಾಚೆಂ ಮೊಂವ್ ಲೆಂವೊಂಕ್ ಲಾಯಿಲ್ಲೆ ಲಾಖ್ಪತಿ
ಜೀವ್ ವಾಂಚಂವ್ಕ್ ಜೆವಾಣ್ ನಾ ಬೊಶಿ
ಬೂದ್ಬಾಳ್ ಭುಜಾವಣ್ ದಿಲಿ ದಾಧೊಶಿ!
ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ವಾಚುನ್, ಹಾಸೊನ್ ನಾಚ್ತಾ ಗಾಂವ್
ಆಮ್ಚೆಂ ’ಉದ್ಪಾದನ್’ ವಿಕ್ತೆಲ್ಯಾಕ್ ಕಾಂಯ್ ಭೊಗ್ಲಾಂ?
ನೀಸ್-ಪೇಜ್ ನಾಸ್ತಾಂ ಜಿವಾನ್ ಭಾಗ್ಲಾಂ
ಕಥಾ-ಕವಿತಾಂ ತಾಖ್ ಕರ್ನ್ ನಾಯ್ತ್ಯಾಕ್ ವಿಕ್ಲಾಂ
ವಿಣ್ಗ್ಯಾ ಪಾಂಯಾಂನಿ ಪಾವ್ಲಾಂ ಉಮ್ಕಾಳ್ತಾತ್ ಕಾತಿ
ತರ್ನ್ಯಾ ತೊಂಡಾರೀ ಪಿಕ್ಯಾ ಖಾಡಾಚಿ ಕುತಿ!
ಸೊಭಿತ್ ಸಾಹಿತ್ ರಚ್ತಾಂ ಹಾಂವ್
ಮ್ಹಾಕಾ ’ಮಸ್ತುನ್’ ನಾಚ್ತಾ ಗಾಂವ್..
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ಜಿಕ್ಲ್ಲಿಂ ಕವಿತಾ ^ ವಯ್ರ್
ಮೆಲಿಟಾ ಪಿಂಟೊ
[ಭುಜ್ವಣೆಚೆಂ ಇನಾಮ್]
[ರುಪಯ್ 1000]
ಕವಿತೆಚೆಂ ಸ್ವಪಾಣ್
ನಿರಾಶೆ ಉಜ್ಯಾನ್ ಲಾಸುನ್ ಸೊಡ್ಲ್ಲೆಂ,
ಸಪಣ್ ಮ್ಹಜೆಂ ಕರ್ವುನ್ ಗೆಲ್ಲೆಂ
ಗೊಬ್ರಾ ಸಾರೆಂ ಜಾಂವ್ಚೆ ಪಯ್ಲೆಂ
ಜಿವಾಳ್ ಜಾಲೆಂ ಕಿಟಾಳ್ ತಾಂತ್ಲೆಂ
ಭರ್ತೆ ವೇಳ್, ದರ್ಯೊ ಫುಗ್ಲೊ
ಕೊಂಕ್ಣಿ ಮೋಗ್, ಉಮಾಳೊನ್ ಆಯ್ಲೊ
ಚಿಂತ್ಪಾ ಧಾರ್, ಜಾವುನ್ ವ್ಹಾಳೊ
ಕೊಂಕ್ಣಿ ವೇಂಗ್ - ಉಭೆಂತ್ ಲಾಸ್ಲೊ
ಗಾಜೊಂ ಗೌರವ್, ವಾಜೊಂ ವೈಭವ್
ಉರ್ಭಾ ಮ್ಹಜಿ ಜಾಲಿ ಉದೆವ್
ಕೊಂಕಣ್ ಬಾಳ್, ಕೊಂಕ್ಣಿ ಫಳ್
ಪಾಲೆಲೆಂ ಮ್ಹಜೆಂ ಅಂತರ್ಮಳ್
ಚೇತನ್ ವಾಡ್ಲೆಂ, ಶಿರಾಂನಿ ಭರ್ಲೆಂ
ಕೊಂಕ್ಣಿ ಮಾಯೆಚಾ ಅಭಿಮಾನಾನ್
ದಿವ್ಟಿ ಜಳ್ಳಿ, ಲಿಖ್ಣಿ ವಾಳ್ಳಿ
ಭರ್ವಶ್ಯಾಚೆಂ ತೇಲ್ ಚಿಂವೊನ್
ಲಿಖ್ಣೆ ಮೂಳ್, ಉಸ್ತುನ್ ಆರಾವ್ನ್
ಚಿಂತ್ನಾಂ ರಾಸ್, ಚಾಳ್ನ್ ನೆರಾವ್ನ್
ಕೊಂಕ್ಣಿ ಭಾಸೆ ಮೊತಿಯಾಂ ಎಕ್ಟಾಂವ್ನ್
ಜಿವೆ ಜಾಲೆಂ ಕವಿತಾ ಸ್ವಪಾಣ್
ಮತಿಂ ಝಳ್ಕಾಲಿಂ ಉತ್ರಾಂ ವ್ಹಾಳ್ಳಿಂ
ಮಾಂಯ್ಭಾಸೆಚಿ ವಜ್ರಾಂ ಪರ್ಜಳ್ಳಿಂ
ವಜ್ರಾಂ ಗುಂತುನ್, ಸರ್ಪಳಿ ಘಡ್ಲಿ
ಕೊಂಕ್ಣಿ ಮಾಯೆಚ್ಯಾ ಗಳ್ಯಾರ್ ವಿಣ್ಲಿ.
ಅಶಿ ಮ್ಹಜಿ ಕವಿತಾ ಜಲ್ಮಾಲಿ
ಆತಾಂ ಮ್ಹಜಿ ಕವಿತಾ ಆಯ್ಕಾ
ಪರ್ವತ್ ಫುಟೊನ್ ರಸ್ತೊ ಉದೆತ್
ಫಾತೊರ್ ಕರ್ಗೊನ್ ಫುಲ್ ಫುಲಾತ್
ಕೊಗ್ಳೆ ತಾಳ್ಯಾನ್ ಕಾವ್ಳೊ ಗಾಯಿತ್
ಜರ್ ಕೊಂಕ್ಣಿ
ವೊಂಟಾರ್ ಫುಲಯ್ಶಿ, ಜಿಬೆರ್ ಗಾಜಯ್ಶಿ
ಚಿಂತ್ನಾಂನಿ ಆಟಯ್ಶಿ, ಕಾಳ್ಜಾಂತ್ ಪೆಟಯ್ಶಿ
ಮುಕುಟ್ ನೆಟಯ್ಶಿ, ವೈಭವ್ ಹಾಡಯ್ಶಿ
ಊಂಚ್ ಉಭಾರ್ಶಿ, ಮಾನಾನ್ ಸಜಯ್ಶಿ
ಸುರ್ಯಾಚೆಂ ಕೀರ್ಣ್ ಜಾಯ್ತ್ ಆಂದ್ಳೆಂ
ಚಂದ್ರಾಚೆಂ ಚಾಮ್ದ್ನೆಂ ಜಾಯ್ತ್ ಸಾವ್ಳೆಂ
ಮೊಳಾಬ್ ರಾವಯ್ತ್ ಪಾವ್ಸಾ ಪಾವ್ಳೆ
ತರೀ ಕೊಂಕ್ಣಿ
ಭಾಸ್ ಲಿಪ್ಚಿನಾ, ಲಜೆರ್ ಪಡ್ಚಿನಾ
ಧಣ್ಸಣೆಕ್ ಧಂಡಳ್ಚಿನಾ, ಹಿಣ್ಸೊಣೆಕ್ ರಡ್ಚಿನಾ
ಸ್ಥಾನ್-ಮಾನ್ ಹೊಗ್ಡಾಂವ್ಚಿನಾ
ಮಾಂಯ್ಭಾಸ್ ಕೆದಿಂಚ್ ಸರ್ಚಿನಾ
ಕೊಂಕ್ಣಿ ಭಾಸ್ ಕೆದಿಂಚ್ ಮೊರ್ಚಿನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.