ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಲೆಕ್ಟ್ರೋನಿಕ್ ಮಾಧ್ಯಮಾಂ, ವಿವಾದ್ ಆನಿಂ ಗುನ್ಯಾಂವ್
ವರಸ್ : 2005
ಅಂಕೊ : 10
ಮಯ್ನೊ : ಎಪ್ರಿಲ್
ಸಂಪಾದಕೀಯ್ - 10 .
ವಲ್ಲಿ ಕ್ವಾಡ್ರಸ್
ಆಯ್ಚೊ ಕಾಳ್ ಎಲೆಕ್ಟ್ರೋನಿಕ್ ಕಾಳ್ ಮ್ಹಣ್ತಾತ್ ಜಾಣಾರಿ, ಕಿತ್ಯಾಕ್ ಮ್ಹಳ್ಯಾರ್ ಮನ್ಶಾನ್ ಕರ್ಚಿಂ ಚಡಾವತ್ ಕಾಮಾಂ ಮನ್ಶಾಚಾ ಚಿಂತ್ಪಾಥಾವ್ನ್ ಉದೆಲ್ಲಿಂ ಯಂತ್ರಾಂ ಕರುಂಕ್ ಸಕ್ತಾತ್. ಆನಿಂ ಆಮ್ಚಾ ಜಿಣ್ಯೆಕ್ ಹ್ಯಾ ಸಂಗ್ತ್ಯಾಂಚೊಯ್ ಪರಿಣಾಮ್ ಜರೂರ್ ಪಡ್ಲಾ. ಆನಿಂ ಎಕಾ ವಾಟೆನ್ ಹೆಂ ಬರೆಂಚ್ ಮ್ಹಣ್ಯೆತಾ.
ಆತಾಂ ಚಿಂತಾಂ ಹೆಂ ಎಲೆಕ್ಟ್ರೋನಿಕ್ ಮಾಧ್ಯಮ್ ಜರ್ ನಾತ್ಲ್ಲೆಂ, ತರ್ ಕಶೆಂ ಜಮ್ಮು ಆನಿ ಕಾಶ್ಮಿರಾಂತ್ಲ್ಯಾ ಆತಂಕ್ವಾದಿಂಚಾ ಕರ್ನೆಂಚಿ ವಳೊಕ್ ಕನ್ಯಾಕುಮಾರಿಂಚ್ ಜಿಯೆಂವ್ಚಾ ಲೊಕಾಂಕ್ ಕಳ್ತೆಂ? ಅಮೆರಿಕಾಂತ್ ಜೊರ್ಜ್ ಬುಶ್ ಕಸೊ ಉಲಯ್ತಾ ಮ್ಹಳ್ಳೆಂ ಜಪಾನಾಂತ್ ಜಿಯೆತೆಲ್ಯಾಂಕ್ ಕಶೆಂ ಕಳ್ತೆಂ? ಆಸ್ಟ್ರೇಲಿಯಾಂತ್ ಜಾಂವ್ಚೆಂ ಕ್ರಿಕೆಟ್ ಮೇಚ್ ಪಾಕಿಸ್ತಾನಾಂತ್ ಕಶೆಂ ಪಳೆಂವ್ಕ್ ಜಾತೆಂ? ವೀರಪ್ಪನ್ ಮ್ಹಳ್ಯಾರ್ ಕಸೊ ಆಸ್ಲ್ಲೊ ಮ್ಹಳ್ಳೆಂ ಆಮಿಂ ಕಶೆಂ ಕಳ್ತೆಂ? ನ್ಹಯ್ಗೀ? ಆತಾಂ ಚಾರ್ ಲ್ಹಾನ್ ಘಡಿತಾಂಚೊ ನಿಹಾಳ್ ಕರ್ಯಾಂ;
ಪಯ್ಲೆಂ ಘಡಿತ್ : ಅಜಿಕ್ ಪಂದ್ರಾ ವರ್ಸಾಧಿಂ ಕೆ.ಎಸ್.ಆರ್.ಟಿ.ಸಿ. ಚಾ ಸಂಸ್ಥ್ಯಾಂತ್ ವಾವ್ರ್ ಕರುನ್ ಆಸ್ಲೆಲ್ಯಾಂಚಾ ವಾವ್ರಾಡ್ಯಾಂಚಾ ಭ್ರಶ್ಟಾಚಾರಾಕ್ ನಪಂಯ್ಚ್ ಕರುಂಕ್ ಸರ್ಕಾರಾಂನಿ ತವಳ್ ತವಳ್ ಬಸ್ಸಾಂಕ್ ಧಾಡ್ ಘಾಲುಂಕ್ ಧರ್ಲೆಂ ಆನಿಂ ಥೋಡ್ಯಾಚ್ ತೆಂಪಾನ್ ದಿಸಾಳ್ಯಾರ್ ಏಕ್ ವರ್ದಿ ಛಾಪ್ಲಿ; ’ಕೆ.ಎಸ್.ಆರ್.ಟಿ.ಸಿ ಚಾ ಡ್ರಾಯ್ವರಾಂ ಪಯ್ಕಿ ಸಾಠ್ ಠಕ್ಕೆ (60%) ಭ್ರಷ್ಟ್’. ತವಳ್ ಎಕ್ಲ್ಯಾ ವಾಚ್ಪ್ಯಾನ್ ಉದ್ಘಾರ್ ಸೊಡ್ಲೊ - ’ಕಿತ್ಲೆ ಬುಧ್ವಂತ್ ಉರ್ಲ್ಲೆ ಚಾಳಿಸ್ ಠಕ್ಕೆ ಡ್ರಾಯ್ವರ್’ ಮ್ಹಣ್. (ಮ್ಹಾಫ್ ಕರಾ - ಮ್ಹಜಾ ಉತ್ರಾಂಚೊ ಮತ್ಲಬ್ ಹೆ ಡ್ರಾಯ್ವರ್ ಸಗ್ಳೆ ಚೋರ್ ಮ್ಹಣ್ಚೊ ಬಿಲ್ಕುಲ್ ನ್ಹಯ್)
ದುಸ್ರೆಂ ಘಡಿತ್ : ಅಜಿಕ್ ಚಡುಣೆಂ ಪಾಂಚ್-ಸ ವರ್ಸಾಧಿಂ ಕ್ರಿಕೆಟಿಚೆಂ ಮ್ಯಾಚ್ ಫಿಕ್ಸ್ ಕರ್ಚಾ ವಿವಾದಾಂತ್ ಜಾಯ್ತೆ ಕ್ರಿಕೆಟ್ ಖೆಳ್ಘಾಡಿ ಶಿರ್ಕಾಲೆ ಆನಿಂ ತಾಂತುಂ ಆಫ್ರಿಕಾಚೊ ಹ್ಯಾನ್ಸಿ ಕ್ರೋನಿಯೆ ಎಕ್ಲೊ ಜಾವ್ನಾಸ್ಲ್ಲೊ. ಪಯ್ಲೆಂ ತಾಣೆಂ ಹೆರಾಂಪರಿಂ ಅಪ್ಲೊ ಗುನ್ಯಾಂವ್ ಕಬೂಲ್ ಕೆಲೊಚ್ ನಾ ತರ್ಯೀ ಎಕಾ ದಿಸಾ ತಾಕಾ ರಾತಿಚಿ ನೀದ್ ಪಡ್ಲಿನಾ ದೆಕುನ್ ಫಾಂತ್ಯಾರ್ ಉಟೊನ್ ಅಪ್ಲೊ ಗುನ್ಯಾಂವ್ ಕಬೂಲ್ ಕೆಲೊ ಆನಿಂ ತ್ಯಾ ಖಾತಿರ್ ತಾಕಾ ಅಧಿಕಾರಿಂನಿ ಕ್ರಿಕೆಟ್ ಖೆಳೊಂಕ್ ಸಾಸ್ಣಾಚೊ ಬಹಿಶ್ಕಾರ್ ಘಾಲೊ. ಪುಣ್ ವಿಜ್ಮಿತ್ಕಾಯೆಚಿ ಗಜಾಲ್ ಖಂಯ್ಚಿಗೀ ಮ್ಹಳ್ಯಾರ್ ಹೊ ಗುನ್ಯಾಂವ್ ಆಧಾರುನ್ಯೀ ನಿರಾಕಾರ್ಸಿಲ್ಲೆ ಖೆಳ್ಘಾಡಿ ಅಜೂನ್ ಖೆಳೊನ್ ಆಸಾತ್.
ತಿಸ್ರೆಂ ಘಡಿತ್ : ಇಕ್ರಾ ವರ್ಸಾಧಿಂ ಹಾಂವ್ ಬೊಂಬೊಯ್ಚಾ ಕ್ರೈಸ್ಟ್ ಚರ್ಚ್ ಹೈಸ್ಕೂಲಾಂತ್ ಕಂಪ್ಯೂಟರ್ ಶಿಕ್ಶಕ್ ಜಾವ್ನ್ ಕಾಮ್ ಕರ್ಚೆ ವೆಳಾರ್ ಮ್ಹಾಕಾ ಸಾಂಬಾಳ್ ದಿಂವ್ಚಾ ಮಾನೆಸ್ತಾನ್ ಖಾಸ್ಗೆಚೆಂ ಏಕ್ ಕಂಪ್ಯೂಟರ್ ಇಸ್ಕೊಲ್ ಉಗ್ತೆಂ ಕೆಲೆಂ ಆನಿಂ ತಾಚೊ ಪಾರ್ಟ್ನರ್ ಜಾವ್ನ್ ಮ್ಹಾಕಾ ಘೆತ್ಲೊ. ಮಿನತ್ ಆನಿಂ ವಾಂವ್ಟ್ ಮ್ಹಜಿ ತರ್ ಉರ್ಲ್ಲೊ ಬಂಡ್ವಾಳ್ ತಾಚೊ. ಆಮ್ಚಾ ಕಂಪ್ಯೂಟರ್ ಸೆಂಟರಾಕ್ ಏಕ್ ಟೆಲಿಫೊನ್ ಹಾಡಂವ್ಕ್ ಅರ್ಜಿ ಘಾಲ್ಲಿ ದೆಕುನ್ ಫೊನಾಚಿ ಲಾಯ್ನ್ ದೀಂವ್ಕ್ ಟೆಲಿಫೋನ್ ಸಂಸ್ಥ್ಯಾಚೊ ಮನಿಸ್ ಯೇವ್ನ್ ಲಾಯ್ನ್ ದಿತಾಂ ಪುಣ್ ಪಾಂಯ್ಶಿ ರುಪಯ್ ದೀ ಮ್ಹಣಾಲಾಗ್ಲೊ. ಮ್ಹಜಾ ಪಾರ್ಟ್ನರಾನ್ ವಾಜ್ಬಿ ಸವಾಲ್ ಕೆಲೆಂ ’ಎದೊಳ್ಚ್ ಅಪ್ಣಾನ್ ಟೆಲಿಫೊನಾಕ್ ಅರ್ಜಿ ದಿತಾನಾ ಪೊಯ್ಶೆ ಭರ್ಲ್ಯಾತ್ ಆಸ್ತಾಂ ಆತಾಂ ಪರತ್ ಪಾಂಯ್ಶಿ ರುಪಯ್ ಅಪ್ಣಾನ್ ಕಿತ್ಯಾಕ್ ದೀಜಯ್ ಮ್ಹಣ್’ ತವಳ್ ಸಭಾರ್ ಜಣ್ ಕುಡ್ಸಾಲೆ ಆನಿಂ ಚಡಾವತ್ ಸರ್ವಾಂನಿ ತಾಕಾ ಬೂದ್ ಸಾಂಗ್ಲಿ ಪಾಂಯ್ಶಿ ರುಪಯ್ ದೀಂವ್ಕ್ - ಪುಣ್ ತೊ ಕಬೂಲ್ ಜಾಲೊಚ್ ನಾ. ಟೆಲಿಫೋನ್ ಸಂಸ್ಥ್ಯಾಚೊ ಮನಿಸ್ ಲಾಯ್ನ್ ದೀನಾಸ್ತಾಂಚ್ ಪಾಟಿಂ ಗೆಲೊ ಆನಿಂ ಎಕಾ ಪಾಟ್ಲ್ಯಾನ್ ಏಕ್ ದುರಾಂ ದಿಲಿಂ ತರ್ಯೀ ಲಾಯ್ನ್ ದೀಂವ್ಕ್ ತಾಣಿಂ ಸ ಮಯ್ನ್ಯಾಂಚಿ ಘಳಾಯ್ ಕೆಲಿ ಮಾತ್ರ್ ನ್ಹಯ್ ಹಾಪ್ತ್ಯಾಚಾ ಹರ್ಯೆಕಾ ಎಕಾ ದಿಸಾ ಟೆಲಿಫೊನ್ ಕಾಮ್ ಕರಿನಾತ್ಲ್ಲೆಪರಿಂ ಕೆಲೆಂ.
ಚೊವ್ತೆಂ ಘಡಿತ್ : ಆಯ್ಲೆವಾರ್ ಶಕ್ತಿ ಕಪೂರ್ ಆನಿಂ ಅಮನ್ ವರ್ಮಾ ಹಾಂಣಿ ಕೆಲ್ಲೊ ವಿವಾದ್. ನವ್ಯಾಂಕ್ ಮುಖಾರ್ ಹಾಡಯ್ತಾಂ ಮ್ಹಳ್ಳೊ ಹೊರ್ಭೊಸ್ ದೀವ್ನ್ ನಿರಾಪ್ರಾಧ್ಯಾಂಕ್ ಜಾಯ್ ತಶೆಂ ವಾಪಾರ್ನ್ ಉಡಂವ್ಚಿ ರಿವಾಜ್ ಆಮ್ಚಾ ಸಮಾಜೆಚಾ ಹರ್ಯೆಕಾ ವರ್ಗಾಂನಿ ಆಸಾ.
ಆತಾಂ ಹ್ಯಾ ಚಾರ್ ಘಡಿತಾಂನಿ ಆಸ್ಚೆಂ ಸಾಮಾನ್ಯ್ ಚಿಂತಾಪ್ ಪಳೆಯಾಂ. ಬರೆಂ ಆಧಾರ್ಚೆಂಯ್ ಮನ್ಶಾನ್ಂಚ್ ಆನಿಂ ಖೊಟೆಂ ಸಯ್ತ್ ಆಧಾರ್ಚೆಂಯೀ ಮನ್ಶಾನ್ಂಚ್. ತರ್ಯೀ ತಿಸ್ರೆಂ ಘಡಿತ್ ಆಯ್ಚಾ ಕಾಳಾಚಾ ಸತಾಕ್ ಅರ್ಸೊ ಧರ್ತಾ. ಆನಿಂ ಚೊವ್ತೆಂ ಘಡಿತಾಂತ್ ಅಸಲೆಂ ಸತ್ ಉಲಂವ್ಚಾಂಕ್ಚ್ ನಪಂಯ್ಚ್ ಕರ್ಚಿ ವೆವಸ್ಥಾ ದಿಸೊನ್ ಯೆತಾ.
ಕಿತೆಂ ಜಾಲೆಂ ತೆಹೆಲ್ಕಾ ವಿವಾದಾಕ್? ತಾಚಾ ಸಗ್ಳ್ಯಾ ಕುಟ್ಮಾಕ್ಚ್ ನಾಸ್ ಕರ್ಚಿಂ ಜಾಯ್ತಿಂ ಪ್ರೇತನಾಂ ಚಲ್ಲಿಂ ಆನಿಂ ಚಲೊನ್ಂಚ್ ಆಸಾತ್. ತಾಣಿಂ ಕೆಲ್ಲೊ ಗುನ್ಯಾಂವ್? ’ಸತ್ ಉಚಾರ್ಲ್ಲೆಂ’. ಹೆಂ ಎದೊಳ್ ಚಲೊನ್ ಆಯಿಲ್ಲೆಪರಿಂ ಆತಾಂಯ್ ಚಲೊನ್ ಆಸಾ ಆನಿಂ ಫುಡೆಂಯ್ ಚಲೊನ್ಂಚ್ ಆಸ್ತೆಲೆಂ. ’ಸತ್ ಉಲಂವ್ಚಾಕ್ ಬಿಲ್ಕುಲ್ ಜಿಯೆಂವ್ಕ್ ಸಲೀಸ್ ನಾ’ ಪುಣ್ ’ಸತಾಚೊ ಡೋಂಗ್’ ಕರ್ಚಾಂಕ್ ಮಾತ್ರ್.
ಭೋವ್ಶಾ ಹೆಂ ಕಾಮ್ಯೀ ಎಲೆಕ್ಟ್ರೋನಿಕ್ ಮಾಧ್ಯಮಾಂನಿಮ್ತಿಂ ಸಾಧ್ಯ್ ಜಾಲ್ಲೆಂ ತರ್? ಕಿತೆಂಯ್ ಜಾಂವ್ - ಅಜೂನ್ ಸತ್ ಮಾತ್ರ್ ಜಿಯೆಲಾಂ ಆನಿಂ ಜಿಯೆತಾ. ಕೆನ್ನಾ ಭುಂಯ್ಕಾಪ್ ಜಾವ್ನ್, ಕೆನ್ನಾ ಸುನಾಮಿ ಜಾವ್ನ್ ಆನಿಂ ಕೆನ್ನಾ....... ಕೊಣ್ ಜಾಣಾ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
