ಎಕ್ಸುರೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

’ಕಾಣಿಂ ಎಕಾ ವಾಚ್ಪ್ಯಾಕ್ ಸ್ವಪ್ಣಾಂಚಾ ಸಾಗೊರಾಲಾಗಿಂ ಪಾವಂವ್ಕ್ ಸಕ್ತಾ ತರ್ ಕವಿತಾ ತಾಂತುಂ ಉಪ್ಯೆಂವ್ಚೊ ಅನ್ಭೋಗ್ ದಿತಾ’

ಕವಿತಾಪಾಠ್ - 10

ಲಿಸಾಂವ್ -10. ದೇವ್ ಎಕ್ಸುರೊ

ಕವಿತಾ - ದೇವ್ ಎಕ್ಸುರೊ

ಕವಿ: ವಲ್ಲಿ ವಗ್ಗ, ಮೈಸೂರ್

ಬೂಕ್: ಮೊತಿಯಾಂ ಆನಿ ತಾರಾಂ

ಪ್ರಕಾಶಕ್: ಆಶಾವಾದಿ ಪ್ರಕಾಶನ್

ಪಾಠ್ ಚಲವ್ಪಿ: ವಲ್ಲಿ ಕ್ವಾಡ್ರಸ್

ತಾರಿಕ್: 9 ದಸೆಂಬರ್ 2005

ಜಾಗೊ: ಸಾಲ್ಮಿಯಾ, ಕುವೇಯ್ಟ್

ತುಜ್ಯಾ ದೇವಳಾ ಭಿತರ್
ಕೊಣ್ಂಚ್ ನಾ
ಫಕತ್ ಆಂಧ್ಕಾರ್
ಆನಿ ಮೌನ್

ದಿವೊ ಝಳಂವ್ಕ್
ಕಾಳೊಕ್ ಧಾಂವ್ಡಾಂವ್ಕ್
ಭಜನಾಂ ಗಾಂವ್ಕ್
ನಾಚ್ ನಾಚೊಂಕ್
ಕೊಣ್ಂಚ್ ನಾ

ನಾ ಕೊಣ್ಂಚ್ ನಾ
ಆಸಾ ಫಕತ್
ಅಂಧ್ಕಾರ್ ಆನಿ ಮೌನ್!

ಕವಿಚಿ ವ್ಹಳೊಕ್:

ವಲ್ಲಿ ವಗ್ಗ ಕೊಂಕ್ಣೆಂತ್ಲೊ ಮಾಲ್ಘಡೊ ಸಾಹಿತಿ, ಪತ್ರಿಕೋಧ್ಯಮಿ, ವಾವ್ರಾಡಿ, ಚಿಂತ್ಪಿ ಆನಿ ಕವಿ. ಏಕ್ ಕಾಣ್ಯೆಗಾರ್ ಮಾತ್ರ್ ನ್ಹಯ್, ಅಪುರ್ಭಾಯೆಚೊ ಕವಿ ಜಾವ್ನ್ ಫಕತ್ತ್ ಕೊಂಕ್ಣೆಂತ್ ಮಾತ್ರ್ ನ್ಹಯ್, ಕಾನಡಿ ಭಾಸೆಂತ್‌ಯ್ ನಾಂವಾಡ್ದಿಕ್ ಜಾಲಾ. ಭೋವ್ ಉಣ್ಯಾಂ ಉತ್ರಾಂನಿ ಭೋವ್ ಗೂಂಡ್ ವಿಚಾರ್ ವ್ಹಾಳಂವ್ಚಿ ಶ್ಯಾಥಿ ಹಾಚಾ ಬರ್ಪಾಂನಿ ಆಸ್ಚಿ ಹಾಚಿ ವಿಶೇಷತಾ.

(ದಾವ್ಯಾ ಥಾವ್ನ್ ಉಜ್ವ್ಯಾಕ್) (ಬಸ್‌ಲ್ಲಿಂ) ವಿನ್ಸಿ ಪಿಂಟೊ, ಯು.ಸಿ.ಪೌಲೋಸ್, ಎಲಿಯಾಸ್ ಸಾಂಕ್ತಿಸ್. (ಉಭಿಂ ಆಸ್ಚಿಂ) ವಲ್ಲಿ ಕ್ವಾಡ್ರಸ್, ರೋಬರ್ಟ್ ಕ್ರಾಸ್ತಾ, ಸಿರಿಲ್ ಪೆರಿಸ್, ಜೊಮೆಲ್ ಬೊಂದೆಲ್, ಪ್ರಿಯಾ ಸಿಕ್ವೇರಾ, ಪ್ಯಾಟ್ರಿಸಿಯಾ ಕ್ಯಾಸ್ತಲಿನೊ, ಪೀಟರ್ ಕ್ಯಾಸ್ತಲಿನೊ.

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕವಿತಾಪಾಠ್ - 9. ಭಿತರ್ಲೆಂ ತುಫಾನ್ (ಜೆ.ಬಿ.ಮೊರಾಯಸ್)

ಕವಿತಾಪಾಠ್ - 8 . ದರ್‍ಯಾಕ್ ಉಜೊ ಪೆಟ್ಲಾ (ಚಾ.ಫ್ರಾ.ದೆ’ಕೋಸ್ತಾ)

ಕವಿತಾಪಾಠ್ - 7 . ಮನಿಸ್ ಮ್ಹಣ್ಜೆ ಕಿತೆಂ (ಲುವಿಸ್ ಮಸ್ಕರೇಞ್)

ಕವಿತಾಪಾಠ್ - 6 . ಮ್ಹಜೊ ದಿವೊ (ಮಾವ್ರಿಸ್ ಶಾಂತಿಪುರ್)

ಕವಿತಾಪಾಠ್ - 5 . ಬಾಂಯ್  (ಆಂಡ್ರು ಎಲ್. ಡಿ’ಕುನ್ಹಾ)

ಕವಿತಾಪಾಠ್ - 4 . ಆಜ್ (ವಲ್ಲಿ ಕ್ವಾಡ್ರಸ್)

ಕವಿತಾಪಾಠ್ - 3 . ಸಲ್ವಣಿ (ಫ್ರೆಡ್ ಕುಮಾರ್)

ಕವಿತಾಪಾಠ್ - 2 . ಕಯ್ದ್ಯಾಚಿ ಕವಿತಾ (ಎಚ್ಚೆಮ್)

ಕವಿತಾಪಾಠ್ - 1 . ವಾಟ್ (ಮೆಲ್ವಿನ್ ರೊಡ್ರಿಗಸ್)

ಆಂಧ್ಕಾರಾಕ್ ಉಗ್ಡಾಪೆಂ ಕರ್ಚೆಂ ಪ್ರೇತನ್ [-ವಲ್ಲಿ ಕ್ವಾಡ್ರಸ್, ಅಜೆಕಾರ್]

      ವಲ್ಲಿ ವಗ್ಗ ಕೊಂಕ್ಣೆಂತ್ಲ್ಯಾ ಶ್ರೇಷ್ಟ್ ಚಿಂತ್ಪಿ/ಸಾಹಿತಿಂ ಪಯ್ಕಿ ಎಕ್ಲೊ, ಭೋವ್ ಥೊಡ್ಯಾ ಉತ್ರಾಂನಿ ಪಾನಾಂ ಪಾನಾಂಚೆಂ ಚಿಂತಾಪ್ ವ್ಹಾಳಂವ್ಚಿ ಶ್ಯಾಥಿ ಆಸ್ಚಾ ವಲ್ಲಿ ವಗ್ಗಚಿಂ ಕವಿತಾ ಥೊಡ್ಯಾಚ್ ಉತ್ರಾಚಿಂ ಪುಣ್ ಗೂಂಡ್ ಅರ್ಥಾಚಿಂ, ಕೊಂಕ್ಣೆ ಕವಿತಾಚೆಂ ಅಧ್ಯಯನ್ ಕರ್ತೆಲ್ಯಾಂನಿ ಹಾಚಿಂ ಕವಿತಾ ಸಮ್ಜೊಂಕ್ ಸಕ್ಲ್ಯಾರ್ ತಾಂಚಾನ್ ಅಸಲಿಂ ಕವಿತಾ ಬರಂವ್ಕ್ ಪ್ರೇರಣ್ ಮೆಳ್ಚಾಂತ್ ಕಾಂಯ್ ದುಭಾವ್ ನಾ ಮ್ಹಳ್ಳ್ಯಾಕ್ ಹೆಂ ಕವಿತಾ ಗೊವಾಯ್ ದಿತಾ.

      ಉಜ್ವಾಡ್ ಆಸ್‌ಲ್ಲೆಕಡೆ ಕಾಳೊಕ್/ಅಂಧ್ಕಾರ್ ಆಸ್ತಾವೆ ತರ್? ದೇವ್ ಎಕ್ಸುರೊ ಮ್ಹಳ್ಳ್ಯಾ ಕವಿತೆಧ್ವಾರಿಂ ಕವಿನ್ ಅಸಲ್ಯಾಚ್ ಎಕಾ ಅಂಧ್ಕಾರಾಕ್ ಧರುಂಕ್ ಕರ್ಚೆಂ ಪ್ರೇತನ್ ಹ್ಯಾ ಕವಿತಾಂತ್ ದಿಸೊನ್ ಯೆತಾ. ಆತಾಂ ಹ್ಯಾ ಕವಿತ್ಚಾ ಎಕೆಕಾ ಪಂಗ್ತೆಕ್, ತಶೆಂಚ್ ಎಕೆಕಾ ಪಂಗ್ತೆಚಾ ಎಕೆಕಾ ವೊಳಿಕ್ ಸಮ್ಜೊವ್ಯಾಂ.

     "ತುಜ್ಯಾ ದೇವಳಾ ಭಿತರ್
      ಕೊಣ್ಂಚ್ ನಾ
      ಫಕತ್ ಆಂಧ್ಕಾರ್
      ಆನಿ ಮೌನ್"

      ದೇವ್ ಕೊಣಾಕ್‌ಯ್ ದಿಸ್ಲಾ? ದೆವಾಕ್ ಕೊಣೆಂಯ್ ಪಳೆಲಾಂ? ತರ್ ದೆವಾಳಾಭಿತರ್ ಆಸ್ಚೊ ಯಾ ನಾಸ್ಚೊ ದೇವ್ ಕೊಣಾಕ್ ದಿಸ್ಚೊ ತರ್‌ಯ್ ಕಸೊ? ಹಾಂಗಾಸರ್ ಕವಿ ದೆವಾಚಾ ಹಾಜ್ರೆವಿಶಿಂ ಉಲ್ಲೇಕ್ ಕರಿನಾಂ ಬಗಾರ್ ದೆವಾಶಿವಾಯ್ ಹೆರ್ ಕೊಣ್ಂಚ್ ನಾ ಮ್ಹಣ್ತಾ. ಫಕತ್ತ್ ಅಂದ್ಕಾರ್ ಆನಿ ಮೌನ್.

      ಸಾಂಗಾ ಮ್ಹಾಕಾ ಅಂದ್ಕಾರಾಂತ್ ಕೊಣ್ ಆಸೊಂ ವಾ ನಾ ಅಸೊಂ, ಪುಣ್ ಕಶೆಂ ದಿಸ್ಚೆಂ?
ದೆವಾಳಾಭಿತರ್ ತರ್ ಕೊಣ್ಂಚ್ ನಾ ಮ್ಹಣ್ಚಾ ಕವಿಕ್ ಕೊಣೆಂಚ್ ನಾಸ್ಚೆಂ ಕಶೆಂ ಕಳ್ಚೆಂ?

      ಆತಾಂ ಉಭಿಂ ಜಾಲ್ಲ್ಯಾ ಸವಾಲಾಂಕ್ ಮುಖ್ಲ್ಯಾ ಫಂಗ್ತೆಂನಿ ಜಾಪ್ ಆಸ್ಚಿ ಸೊಧ್ಯಾಂ. ಮುಖ್ಲಿ ಪಂಗತ್ ಅಶಿ ಆಸಾ;

     "ದಿವೊ ಝಳಂವ್ಕ್
      ಕಾಳೊಕ್ ಧಾಂವ್ಡಾಂವ್ಕ್
      ಭಜನಾಂ ಗಾಂವ್ಕ್
      ನಾಚ್ ನಾಚೊಂಕ್
      ಕೊಣ್ಂಚ್ ನಾ"

      ಕೊಣ್ಂಚ್ ನಾ ದಿವೊ ಪೆಟಂವ್ಕ್, ಕಾಳೊಕ್ ಧಾಂವ್ಡಾಂವ್ಕ್, ಭಜನಾಂ ಗಾಂವ್ಕ್, ನಾಚ್ ನಾಚೊಂಕ್....

ಹಾಂಗಾಸರ್ ಕವಿ ಎಕೆಕಾ ಉತ್ರಾಪಾಟ್ಲ್ಯಾನ್ ಇಮಾಜಿಂಚೊ ವೊರ್ ಉಭೊ ಕರ್ತಾ. ಇಮಾಜೆಂಚೊ ಪುರ್ಶಾಂವ್‌ಸೊ ದಿಸ್ತಾ.

      ಸರ್ವಾಂನಿ ದಿವೊ ಪೆಟಂವ್ಚೊ ಎಕಾಚ್ ಇರಾದ್ಯಾನ್ ನ್ಹಯ್. ತಾಂಚಾ ಮ್ಹಳ್ಳ್ಯಾ ಎಕೆಕಾ ಇರಾದ್ಯಾನ್, ಕೊಣಾಕ್ ಹೊ ದಿವೊ ಹೆರಾಂಕ್ ಧಾಖಂವ್ಕ್, ಕೊಣಾಕ್ ಹೊ ದಿವೊ ಅಪ್ಲ್ಯಾ ಮಾನಾಕ್ ರಾಕೊಂಕ್, ಕೊಣಾಕ್ ಹೊ ದಿವೊ ಅಪ್ಲ್ಯಾ ದವ್ಲತೆಚೊ, ಕೊಣಾಕ್ ಹೊ ದಿವೊ ಹೆರಾಂಕ್ ಹುಲ್ಪಾಂವ್ಚೊ.. 

      ಮನಿಸ್ ಸ್ವಾರ್ಥಿ ದೆಕುನ್ ಅಪ್ಲ್ಯಾ ಘರ್ಚಾ ಬಾಗ್ಲಾಕ್ ಆಯಿಲ್ಲ್ಯಾ ಭಿಕಾರ್‍ಯಾಕ್‌ಯ್ ದಿಂವ್ಚೆಂ ಖಾಣ್ ಎಕ್‌ಚ್ ಕಾಲ್ಚೆಂ ವ ಚಡ್ ಜಾಲ್ಲೆಂ, ಬೆಳ್ಶೆಲ್ಲೆಂ ಯಾ ಪಾಡ್ ಜಾಂವ್ಚೆಂ. 

      ಕವಿ ಹಾಂಗಾ ದಿವೊ ಪೆಟಂವ್ಕ್ ಕೊಣ್ಂಚ್ ನಾ ಮ್ಹಣ್ತಾ, ತೊ ದಿವೊ ಕಾಳೊಕ್ ಧಾಂವ್ಡಾಂವ್ಚೊ ದಿವೊ ಶಿವಾಯ್ ಹೆರ್ ದಿವೊ ನ್ಹಯ್. ಕಾಳೊಕ್ ಧಾಂವ್ಡಾಂವ್ಚೊ ದಿವೊ ಪೆಟಂವ್ಕ್ ಕೊಣ್ಂಚ್ ನಾ ಮ್ಹಣ್ತಾ. 

      ಭಜನಾಂ ಗಾಂವ್, ನಾಚ್ ನಾಚೊಂಕ್ ಕೊಣ್ಂಚ್ ನಾ -ಪಳೆಯಾ ಕವಿಚಾ ಚಿಂತ್ಪಾಚೆಂ ತ್ರಾಣ್! ಕವಿ ಸಾಂಗ್ತಾ ಹಾಂಗಾಸರ್ ಪೆಟ್ಚೆ ದಿವೆ ದವ್ಲತೆಚೆ, ಹೊಗ್ಳಾಪಾಚೆ, ಸ್ತುತಿ ಭಕ್ತೆಚೆ, ಆರಾಧಾನಾಚೆ, ಕೊಣಾಚಾ ಮಾನಾಚೆ, ಕೊಣಾಚಾ ಘನಾಚೆ, ಕೊಣಾಚಾ ಗುಣಾಂಚೆ ದೆಕುನ್ ಹಾಂಗಾಸರ್ ಆಸ್ಚೆಂ ಪೊಕೊಳ್ಪಣ್ ತೊ ಉಘಡ್ತಾ - ತೆಂ ಪೊಕೊಳ್ಪಣ್ ಜಾವ್ನಾಸಾ - ಅಪ್ಣಾಕ್ ಕೊಣ್‌ಯ್ ಪಳೆತಾ ತರ್ ಮಾತ್ರ್ ಜಾತೆಲಿಂ ಥಂಯ್ಸರ್ ಭಜನಾಂ, ಜಾತಲೊ ಥಂಯ್ಸರ್ ನಾಚ್. ಹಾಂಗಾಸರ್ ಕಾಳೊಕ್ ಭರ್ಲಾ, ಮೌನ್ ಆಸಾ ದೆಕುನ್ ಕೊಣೆಂ ಕರ್ಚಿಂ ಭಜನಾಂ? ಕೊಣಾಕ್ ಕರ್ಚಿಂ ಭಜನಾಂ? ಕೊಣಾಕ್ ದೆಖೊಂಕ್ ಹೊ ನಾಚ್!

      ಹಾಂಗಾಸರ್ ಜೆದ್ನಾಂ ಪರ್‍ಯಾಂತ್ ಕಾಳೊಕ್ ಧಾಂವ್ಡಾಂವ್ಚೊ ದಿವೊ ಪೆಟಾನಾ, ತೆದೊಳ್ ಪರ್‍ಯಾಂತ್ ಕೊಣ್ಂಚ್ ಆಸ್ಚೆನಾಂತ್ ಮ್ಹಣ್ತಾ ಕವಿ.

     "ನಾ ಕೊಣ್ಂಚ್
      ಆಸಾ ಫಕತ್
      ಅಂಧ್ಕಾರ್ ಆನಿ ಮೌನ್!"

      ಕವಿ ಹಾಂಗಾಸರ್ ಅಖೇರ್ಚೊ ಮಿಸ್ತೆರ್ ಸುಟಾವೆಂ ಉಚಾರ್ತಾ. ಹಾಂಗಾ ಕೊಣ್ಂಚ್ ನಾ, ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾ ಅಪ್ಲಿ ಪುಜಾ, ಅಪ್ಲ್ಯಾಂಚಿ ಪುಜಾ, ದೇವ್ ಫಕತ್ ಏಕ್ ಧಾಖವ್ಣೆಕ್ ಮಾತ್ರ್, ಪುಣ್ ಮನಿಸ್ ಹಾಂಗಾ ಜಿಯೆತಾ, ಮನಿಸ್ ಹಾಂಗಾ ಕಿತೆಂಯ್ ಕರ್ತಾ ತರ್ ಅಪ್ಣಾಚೊ ಸ್ವಾರ್ಥ್ ಪಳೆವ್ನ್ ಕರ್ತಾ, ಎಕಾ ದಿಸಾಚೆಂ ಖಾಣ್ ಸೊಡಿತ್ ತರ್‌ಯ್ ಅಪ್ಲ್ಯಾಚ್ ಸ್ವಾರ್ಥಾಕ್. ಹೊ ಉಪ್ವಾಸಾಚೊ ಡೋಂಗ್, ಹೊ ಮಾಗ್ಣೆಂ ವೊರೆಸಾಂವಾಚೊ ಡೋಂಗ್, ಫಕತ್ತ್ ಅಪ್ಲ್ಯಾ ಸ್ವಾರ್ಥಾಚೊ, ಮತ್ಲಬಾಚೊ - ಪೊಕೊಳ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್ ಮ್ಹಣ್ ಕವಿ ಹಾಂಗಾ ಬೋಟ್ ಜೊಕುನ್ ಬೊಬಾಟ್ತಾ.

      ಕವಿನ್ ಅಖೇರ್ಚಾ ಸಬ್ಧಾನ್ ಅನ್ಯೇಕ್ ಅಧ್ಯಾಯ್ ಉಚಾರ್ಲಾ ’ಮೌನ್’ ಮ್ಹಳ್ಯಾರ್ ಹಾಂಗಾ ಹೆರಾಂಕ್ ಆಯ್ಕೊಂವ್ಚೆ ಕಾನ್ ಬಂಧ್ ಜಾಲ್ಯಾತ್ ದೆಕುನ್ ಮೌನ್ ರಾಜ್ವಟ್ಕಿ ಚಲಯ್ತಾ, ಹೆರಾಂಚಿಂ ಉತ್ರಾಂ ಆಯ್ಕೊಂವ್ಚಿ ಶ್ಯಾಥಿ ಆಮ್ಕಾಂ ನಾತ್‌ಲ್ಲ್ಯಾವೆಳಾರ್ ಸಗ್ಳೆಂ ಮೌನ್ಂಚ್ ದಿಸ್ತಾ. 

      ಹೊ ಅಂಧ್ಕಾರ್ ಆದಿಮಾಗಾಂ ಥಾವ್ನ್ ಆಸ್‌ಲ್ಲೊ, ಆತಾಂಯ್ ಆಸ್ಚೊ, ಆನಿ ಮುಖಾರ್‌ಯ್ ಆಸ್ಚೆತಸಲೊ. ಹೊ ಸಂಸಾರ್ ಸಂಪ್ಲ್ಯಾರ್‌ಯ್ ಹೊ ಅಂಧ್ಕಾರ್ ಜಿವೊ ಆಸ್ತಲೊ, ಭೋವ್ಶಾ ಸಾಸ್ಣಾಚಾ ಸಾಸ್ಣಾಕ್ ಮ್ಹಳ್ಳೊ ಸಂದೇಶ್ ಪಾಚಾರ್ಚೆಂ ಕವಿತಾ ಧಾರ್ಮಿಕ್, ಸಾಮಾಜಿಕ್, ನೈತಿಕ್ ಮೌಲ್ಯಾಂಚೆರ್ ಆರ್ಸೊ ಧರ್ತಾ, ಎಕಾ ಸಬ್ಧಾನ್ ಕವಿತೆಚೆಂ ಸಗ್ಳೆಂ ತೀರ್ಳ್ ಆಸಾ - ಪಯ್ಲೊ ಸಬ್ಧ್, ’ತುಜ್ಯಾ’. ಮ್ಹಳ್ಯಾರ್ ಮನಿಸ್ ಸಗ್ಳೆಂ ಕರ್ತಾ ’ಆಪ್ಲ್ಯಾ’ ಯಾ ’ಮ್ಹಜ್ಯಾ’ ಶಿವಾಯ್ ’ಹೆರಾಂಚಾ’ ವ ’ತುಜ್ಯಾ’ ನ್ಹಯ್. ಹಾಂಗಾಸರ್ ಹೆಂ ದೇವಳ್ ’ತುಜೆಂ’ ಜಾವ್ನ್ಂಚ್ ಆಸಾ ದೆಕುನ್ ಹಾಂಗಾಸರ್ ಕಾಳೊಕ್ ಧಾಂವ್ಡಾಂವ್ಚೆ ದಿವೆ ಪೆಟ್ಚೆ ಕಶೆ? ಭಜನಾಂ ಗಾಂವ್ಚಿಂ ಕೊಣೆಂ? ನಾಚ್ ನಾಸ್ಚೊ ತರ್‌ಯೀ ಕೊಣೆಂ?

      ಕವಿತಾಕ್ ಎಕೇಕ್ ಪಾವ್ಟಿಂ ವಾಚ್ತಾನಾ ಎಕೆಕಾ ರಿತಿಚ್ಯೊ ಇಮಾಜ್ಯೊ ದಿಸ್ತಾತ್ ಜಾಲ್ಲ್ಯಾನ್ ಹ್ಯಾ ಕವಿತಾವಿಶ್ಯಾಂತ್ ಸವಿಸ್ತಾರ್ ರಿತಿನ್ ಬರವ್ಯೆತ್. ಪುಣ್ ಹ್ಯಾ ಅಧ್ಯಯನಾಕ್ ತೆಂ ಗರ್ಜೆಚೆಂ ನ್ಹಯ್. ಹೆಂ ಕವಿತಾ ಮ್ಹಜಾ ನದ್ರೆಂತ್ ಕವಿಚೆಂ ’ಆಂಧ್ಕಾರಾಕ್ ಉಗ್ಡಾಪೆಂ ಕರ್ಚೆಂ ಪ್ರೇತನ್’.

ದೇವ್ ಆನಿ ವಾಸ್ತವ್ ಹಾಂಚೆ ಮಧ್ಲೊ ಅಂತರ್ ಧಾಖಂವ್ಚೆಂ ಕವಿತಾ [-ಜೊಮೇಲ್, ಬೊಂದೆಲ್]

ಸಾಂ ಜುವಾಂವ್ಚ್ಯಾ ವಾಂಜೆಲಾಂತ್ ಪಯ್ಲ್ಯಾ ಅಧ್ಯಾಯಾಂತ್ ಏಕ್ ಥಾವ್ನ್ ಪಾಂಚ್ ವೊಳಿ ಮ್ಹಣಾಸಾರ್ ಆಮಿ ಆಶೆ ವಾಚ್ತಾಂವ್

"ವೆಳಾಕಾಳಾ ಪುರ್ವಿಂ ಸಬ್ದ್ ಆಸ್ಲೊ; ಸಬ್ದ್ ದೆವಾ ಸವೆಂ ಆಸ್ಲೊ. ಸಬ್ದ್ ದೇವ್ ಜಾವ್ನಾಸ್ಲೊ. 
ವೆಳಾಕಾಳಾ ಪುರ್ವಿಂಚ್ ತೊ ದೆವಾ ಸವೆಂ ಆಸ್ಲೊ. ಸರ್ವ್ ವಸ್ತು ತಾಚೆ ಮಾರಿಫತ್ ರಚನ್ ಜಾಲ್ಯೊ; 
ಆನಿಂ ರಚ್ಲೆಲಿ ಖಂಯ್ಚಿಚ್ ವಸ್ತ್ ತಾಚೇವಿಣೆಂ ಆಯ್‌ಲ್ಲಿ ನಾ. ರಚ್‌ಲ್ಲೇ ಹರೇಕ್ ವಸ್ತುನ್ ತಾಚೆ ಥಾವ್ನ್ ಜೀವ್ ಜೊಡ್ಲೊ;
ಆನಿಂ ತೊ ಜೀವ್‌ಚ್ ಮ್ಹನ್ಶ್ಯಾಕುಳಾಚೊ ಉಜ್ವಾಡ್ ಜಾಂವ್ಕ್ ಪಾವ್ಲೊ.ತೊ ಉಜ್ವಾಡ್ ಕಾಳೊಕಾಂತ್ ಪ್ರಕಾಸ್ತಾ,
ತಾಕಾ ಆಟಾಪುಂಕ್ ಕಾಳೊಕಾ ನಿಮ್ತಿಂ ಜಾಲೆಂನಾ".

      ಮ್ಹಣ್ಜೆ ದೇವ್ ಏಕ್ಲೊಚ್. ತೊಚ್ಚ್ ಉಜ್ವಾಡ್, ತೊಚ್ಚ್ ಸಬ್ದ್, ತೊಚ್ಚ್ ಸರ್ವಸ್ವ್. ತಶೆಂ ಜಾಲ್ಯಾನ್ ತಾಚೆ ಥಂಯ್ ಅಂಧ್ಕಾರ್ ನಾ ಯಾ ಕಸೊಲೊಚ್ಚ್ ಕಾಳೊಕ್ ನಾ. ಕಾಳೊಕಾನ್ ತಾಕಾ ಆಟಾಪುಂಕ್ ಜಾಯ್ನಾ. ಯಾ ತೊ ಮೊನೊ ದೇವ್ ನ್ಹಯ್ ಕಿತ್ಯಾಕ್ ಮ್ಹಳ್ಯಾರ್ ಸುರ್ವೆರ್ ಥಾವ್ ವ್ಹಾಳೊನ್ ಆಯ್ಲೊ ಸಬ್ದ್. 

      ಹಿ ಭುಮಿ ಆನಿಂ ಆಮಿ ಸರ್ವ್ ರಚ್ನಾಂ, ತಾಚ್ಯಾಚ್ ರಚ್ನೆಂತ್ಲೊ ಏಕ್ ಲ್ಹಾನ್ ವಾಂಟೊ ತರ್ ಆಮಿ ದೇವಾಕ್ ಚ್ಯಾರ್ ವೊಣೊದಿಚಾ ಬಾಂದ್ಪಾಂತ್ ಮ್ಹಣ್ಜೆ ದೆವಾಳಾಂತ್ ಬಂಧ್ ಕರುನ್ ದವರ್ಚೆ ಬರಿಂ ಆಸಾಗಿ? ತರ್ ತಸಲೊ ಹೊ ದೇವ್, ಹ್ಯಾ ಕವಿತೆಂತ್ ಏಕ್ಸುರೊ ಕಸೊ ಜಾಲೊ? ಯಾ ತಾಚಾ ದೆವಾಳಾಂತ್ ಅಂದ್ಕಾರ್ ಕಸಲೊ? ಯಾ ದೆವಾಳಾಂತ್ ಮೌನ್ ಕಸಲೆ? ತಾಚಾಕಿ ಪುಡೆಂ ಕವಿ ಕಸಲ್ಯಾ ದೆವಾಳಾ ವಿಶ್ಯಾಂತ್ ಉಲಯ್ತಾ? ಹೆಂ ಆಮಿ ಸಮ್ಚಾಜಯ್.

      ಸ್ವಾಭಾವಿಕ್ ರಿತಿನ್ ಉಲೊಂವ್ಚೆ ಜಾಲ್ಯಾರ್, ಕಸಲ್ಯಾಯ್ ಮಾತಿ ವೊಣೊದಿಚಾ ಯಾ ಕೊಂಕ್ರೆಟಿಚ್ಯಾ ಬಾಂಧ್ಪಾಕ್ ಆಮಿ ದೆವಾಳ್, ಇಗರ್ಜ್, ಮಸ್ಜಿದ್ ಯಾ ದೆವಾಕ್ ಹರ್ಸುಂಚೊ ಜಾಗೊ ಜಾವ್ನ್ ನೆಮ್ಲ್ಯಾರ್, ಅನಿಂ ಥಂಯ್ಸರ್ ಫಾವೊತಿ ವೀಜ್ ಸಕ್ತೆಚಿ ಯಾ ಉಜ್ವಾಡಾಚಿ ವಿಲೆವರಿ ಕರಿನಾಂವ್ ತರ್, ಥಂಯ್ ಕಾಳೊಕ್ ಯಾ ಅಂದ್ಕಾರ್ ಅಸ್ಚೆಂ ಸಹಜ್. ಆನಿಂ ತಶೆಂಚ್ ಥಂಯ್ ಕೊಣಿ ನರ್‌ಮ್ಹನಿಸ್ ವಚನಾ ಜಾಲ್ಯಾರ್ ಯಾ ಭಕ್ತಿಕ್ ವಾತಾವರಣ್ ಹಾಡಿನಾಂವ್ ತರ್ ತಾಕಾ ದೆವಾಳ್‌ಯೀ ಮ್ಹಣಾನಾಂತ್ ಆನಿಂ ಥಂಯ್ಸರ್ ಮೌನ್ ಉದೆವ್ನ್ ಯೆಂವ್ಚೆಂಯ್ ಸಹಜ್. ಪುಣ್ ದೆವಾಕ್ ಹ್ಯಾ ಸರ್ವ್ ಸಂಗ್ತೆಚಿ ಗರ್ಜ್ ಆಸಾಗಿ? ಆಮ್ಚ್ಯಾ ಮಾಗ್ಣ್ಯಾಂತ್ ಯಾ ಭಜಾನಾಂತ್ ಯಾ ಆಮ್ಚ್ಯಾ ವ್ಹಡ್ ವ್ಹಡ್ ಬಾಂಧ್ಪಾಂತ್ ದೇವ್ ಏಕ್ ಇಂಚ್ ತರ್ ವಾಡ್ತಾಗಿ ಯಾ ತಶೆ ಕರಿನಾಂವ್ ತರ್ ದೇವ್ ತಾಚ್ಯಾ ದೆವಾಸ್ಪಾಣಾ ಥಾವ್ನ್ ಯಾ ತಾಚ್ಯಾ ವೈಭವಾ ಥಾವ್ನ್ ಲ್ಹಾನ್ ಜಾತಾಗೀ? ತಶೆಂ ಜಾಲ್ಲ್ಯಾನ್ ಹೆಂ ಮಾಗ್ಣೆಂ, ಭಜನ್ ತಶೆಂಚ್ ವ್ಹಡ್ ಮಾಗ್ಣ್ಯಾ ಸಾಲಾಂಚಿ ಗರ್ಜ್ ಆಸ್ಚಿ ಕೊಣಾಕ್? ತೆಂ ಮ್ಹಕಾ ಆನಿಂ ತುಕಾ. ಮ್ಹಣ್ಜೆ ಮಾಗ್ಣೆಂ, ಭಜನ್ ಆನಿಂ ದೇವಾಳ್ ಹ್ಯೊ ಸರ್ವ್ ಸಂಗ್ತಿ ಆಮ್ಕಾ ದೆವಾ ಸರ್ಶಿಂ ವೊಚುಂಕ್ ಏಕ್ ವಾಟ್ ಜಾವ್ನಾಸಾ.

      ಹಾಂವೆ ಸಮ್ಜಾಲ್ಲ್ಯಾ ಪ್ರಕಾರ್, ಹ್ಯಾ ಕವಿತಾಂತ್, ದೇವ್ ವಯ್ರ್ ಸಾಂಗ್‌ಲ್ಲ್ಯಾ ದೆವಳಾಂತ್ ವಸ್ತಿ ಕರಿನಾ. ಆನಿಂ ದೆವಾಕ್ ಅಸಲಿ ಗರ್ಜ್ ನಾ ಮ್ಹಣ್ ಜಾಣಾ ಆಸ್ಚೊ ಕವಿ, ತೊ ತಾಕಾಚ್ ದೆವಾಚೆಂ ಮಂದಿರ್ ಜಾವ್ನ್ ಉಲಯ್ತಾ. ಹೆಂ ಆಮ್ಕಾಂ ವಾಂಜೆಲಾಂತ್ ವ್ಹಾಚುಂಕ್ ಮೆಳ್ತಾ ಕೀ "ಆಮಿ ಜಾವ್ನಾಸಾಂವ್ ದೆವಾಚೆಂ ತೇಂಪ್ಲ್"(2 ಕೊರಿಂಥ್ 6:16) ಆನಿಂ ಅಸಲ್ಯಾ ದೆವಾಳಾಂತ್ ಕವಿ ಸಾಂಗ್ತಾ ಥಂಯ್ಸ್‌ರ್ ಕೊಣೀ ನಾಂತ್ ಫಕತ್ತ್ ಮೌನ್ ಆನಿ ಅಂದ್ಕಾರ್. 

      ತೆಂ ಕಸಲೆ ಮೌನ್ ಆನಿಂ ಅಂಧ್ಕಾರ್ ತೆಂ ಕವಿಚ್ಚ್ ಜಾಣಾ. ಹೆಂ ಅಂಧ್ಕಾರ್ ಆನಿಂ ಮೌನ್ ಕವಿಕ್ ಏಕ್ಸುರೊ ಕರ್ತಾ, ನ್ಹಯ್ ದೆವಾಕ್. ಆಶೆಂ ಹ್ಯಾ ಕವಿತೆಂತ್ ದೇವ್ ಏಕ್ಸುರೊ ನ್ಹಯ್ ಬಗಾರ್ ಕವಿ ಏಕ್ಸುರೊ ಜಾಲಾ. 

      ಹಿ ವ್ಹೊಳ್ ಪಳೆಯಾ : 
      "ದಿವೊ ಝಳೊಂವ್ಕ್
      ಕಾಳೊಕ್ ದಾಂವ್ಡಾಂವ್ಕ್
      ಭಜನಾಂ ಗಾಂವ್ಕ್
      ನಾಚ್ ನಾಚುಂಕ್"

      ಹಾಂವೆ ವಯ್ರ್ ಸಾಂಗ್‌ಲ್ಲ್ಯಾ ಪ್ರಕಾರ್, ದೇವ್‌ಚ್ ಏಕ್ ಉಜ್ವಾಡ್ ಆನಿಂ ಕಾಳೊಕ್ ತಾಕಾ ಜಯ್ತ್ ವರುಂಕ್ ಸಾಧ್ಯ್‌ಚ್ ನಾ ತರ್, ಕವಿನ್ ಸಾಂಗ್ಚ್ಯಾ ಪ್ರಕಾರ್ ಕಸಲೊ ದಿವೊ ಝಳೊವ್ನ್ ಕಾಳೊಕ್ ದಾಂವ್ಡ್ಯಾವ್ಯೆತ್? ಅನಿಂ ತೊ ಕಾಳೊಕ್ ಖಂಯ್ಸರ್ ವಸ್ತಿ ಕರ್‍ತಾ? ಹಿಂ ವಯ್ಲಿಂ ಉತ್ರಾಂ ಪರತ್ ಪರತ್ ವಾಚ್ತಾನಾ, ಮ್ಹಕಾ ಪ್ರಸ್ತುತ್ ತೆಂಪಾರ್ ಕೊಂಕ್ಣೆಂತ್ ಏಕ್ ಮಾತ್ರ್ ಸಂಶೊಧನಾಚ ರಿತಿರ್ ವಾವ್ರ್ ಕರ್ಚೊ ಪ್ರಖ್ಯಾತ್ ಸಾಹಿತಿ ಜೆಜ್ವಿತ್ ಸಭೆಚೊ ಮಾ| ದೊ| ಪ್ರತಾಪ್ ನಾಯ್ಕ್ ಹಾಚಾ "ಆಮಿ ದೇವ್ ಮಂದಿರ್" ಮ್ಹಳ್ಳ್ಯಾ ಏಕಾ ಕವಿತಾಚೊ ಉಡಾಸಾಕ್ ಯೆತಾ. ತಿ ಕವಿತಾ ಅಶಿ ವ್ಹಾಳ್ತಾ...

      "ಆಮಿ ದೇವ್ ಮಂದಿರ್
      ತಾಂತು ದೇವ್ ಹಾಜಿರ್

      ಆಮ್ಚಿ ಜಿಣಿ ಖಾಲ್ತಿ ನೆಂಟಿ
      ಮಂದಿರಾಂತ್ಲಿ ಜಳ್ಚಿ ಪಂಟಿ

      ಆಮ್ಚಿ ಉತ್ರಾಂ ಮೊವಾಳ್ ಸುತ್ರಾಂ
      ಮಂದಿರಾಂತ್ಲಿ ರಂಗಾಳ್ ಚಿತ್ರಾಂ"

      ಹಿ ಏಕ್ ಅಸಲಿಚ್ ಉಂಚ್ಲಿ ಕವಿತಾ, ಆಜ್ ಆಮಿ ಚಡಿತ್ ಅಧ್ಯಯನ್ ಕರ್ಚಾ "ದೇವ್ ಏಕ್ಸುರೊ" ಮ್ಹಳ್ಳ್ಯಾಕ್ ಕವಿತಾಕ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಕವಿ ವಲ್ಲಿ ವಗ್ಗನ್ ಲಿಕ್ಲೆಲ್ಯಾ "ದೇವ್ ಎಕ್ಸುರೊ" ಮ್ಹಳ್ಳ್ಯಾ ಕವಿತೆಕ್ ಹಿ ಜಾಪ್ ದಿಲ್ಲ್ಯಾ ಬರಿ ಮ್ಹಕಾ ಬೊಗ್ತಾ. ಆಮ್ಚಿ ಜಿಣಿಂಚ್ ಖಾಲ್ತ್ಯಾ ಪಣಾನ್ ಆನಿಂ ಹೆರ್ ಶೆಗುಣಾನ್ ಝಳಯ್ಲ್ಯಾರ್ ಥಂಯ್ಸರ್ ಕಾಳೊಕ್ ಆಪಾಪಿಂಚ್ ನಪಂಯ್ಚ್ ಜಾತಾ. ಆನಿಂ ಥಂಯ್ಸರ್ ಕಸಲೆಂಚ್ ಮೌನ್‌ಪಣ್ ಉದೆವ್ನ್ ಯೆನಾ.

      ಜಿವಿತಾಂತ್ಲೆ ವಿವಿಧ್ ಸನ್ನಿವೇಶ್, ಕವಿ ವಲ್ಲಿ ವಗ್ಗಕ್ ಹಿ ಕವಿತಾ ಘಡುಂಕ್ ಪ್ರೆರಿತ್ ಕೆಲಾಂ ಅಸ್ತಾಲೆಂ, ಜಾಲ್ಯಾರಿ ಖಂಡಿತ್ ಜಾವ್ನ್ ಹಿ ಕವಿತಾ ಕವಿಚೊ ನಿರಾಶೆಚೊ ವ್ಹಾಳೊ ನ್ಹಯ್. ಬಗಾರ್ ತಾಚೆ ಥಂಯ್ ವಸ್ತಿ ಕರ್‍ಚ್ಯಾ ದೆವಾ ಆನಿಂ ತಾಚೆ ಸಂಭಾಶಣ್ಂಚ್ ಹ್ಯಾ ಕವಿತೆಚಿ ಗ್ರೇಸ್ತ್‌ಕಾಯ್ ಜಾವ್ನಾಸಾ. ಹೆಂಚ್ ಭರ್ವಾಶ್ಯಾಚೆ ಮೇಟ್ ತಾಚಾ ಅಂಧ್ಕರಾ ಥಾವ್ನ್ ಉಜ್ವಾಡಾಕ್ ವೆಚಿ ವಾಟ್ ಆನಿಂ ಹೆಂ ಭೊವ್ ಸೊಭಿತ್ ರಿತಿನ್ ಕವಿನ್ ವರ್‍ಣಿಲ್ಯಾ. ಜರ್‌ತರ್ ಆಮಿಂಯ್ ಅಸಲ್ಲ್ಯಾಚ್ ಸಂಭಾಶಣಾಕ್ ಯೇವ್ನ್ ಪಾವ್ಲ್ಯಾಂವ್ ತರ್ ದೇವಾಚೆಂ ವ್ಹಡ್ಪಣ್ ಜಾಣಾಂ ಜಾಂವ್ಕ್ ಸಕ್ತಾಂವ್ ಅನಿಂ ಆಮ್ಚ್ಯಾ ಜಿವಿತಾಂತ್ಲೆ ಮೌನ್‌ಪಣ್, ಅಂದ್ಕಾರ್ ದಾಂವ್ಡಾಂವ್ಕ್ ಅನಿಂ ಉಜ್ವಾಡಾಂತ್ ಜಿಯೆಂವ್ಕ್ ಸಕ್ತಾಂವ್.

ಕವಿಚೆಂ ರುದಾನ್? [ - ಪ್ರಿಯಾ ಸಿಕ್ವೇರಾ, ಫೆರಾರ್]

’ದೇವ್ ಎಕ್ಸುರೊ’ ಮ್ಹಳ್ಳ್ಯಾ ಕವಿತಾಂತ್ ಕವಿತಾಂತ್ಲೊ ಕವಿ ಆಪ್ಲೆಂ ರುದಾನ್ ದೆವಾ ಮುಖಾರ್ ದವರ್ಚೆಂ ಪಿಂತುರ್ ಹಾಂಗಾಸರ್ ಝಳ್ಕತಾ. ಆಧುನಿಕ್ ಕಾಳಾರ್ ಮನ್ಶಾಕ್ ದೆವಾಚೊ ಮೋಗ್, ಭಕ್ತಿಪಣ್, ದೆವಾಚೆಂ ಭ್ಯೆಂ ಉಣೆಂ ಜಾಲಾಂ. ದೆವಾ ಖಾತಿರ್ ಕೊಣ್ಂಚ್ ಜಿಯೆನಾಂತ್ ಆನಿಂ ಆಶೆಂ ದೇವ್ ಎಕ್ಸುರೊ ಜಾಲಾ ಮ್ಹಣ್ ಕವಿತಾಂತ್ಲೊ ಕವಿ ಸಾಂಗ್ತಾ.

       ತುಜ್ಯಾ ದೆವಾಳಾ ಬಿತರ್
          ಕೊಣ್ಂಚ್ ನಾಂ
          ಫಕತ್ ಅಂಧ್ಕಾರ್
          ಆನಿಂ ಮೌನ್

ಕವಿತಾಂತ್ಲೊ ಕವಿ ’ದೆವಾಳ್’ ಮ್ಹಳ್ಯಾರ್ ಇಗರ್ಜ್ಯೊ, ದಿವ್ಳಾಂ ಯಾ ಮಸ್ಜೀದಾಂಕ್ ಉಲ್ಲೇಖ್ ಕರಿನಾ. ಬಗಾರ್ ಹೊ ಆಖ್ಖೊ ಸಂಸಾರ್‌ಚ್ ದೆವಾಳ್ ಮ್ಹಣ್ ಸಾಂಗ್ತಾ. ಹಿ ಸೃಷ್ಟಿ ದೆವಾಚೆಂ ರಚನ್. ಹ್ಯಾ ಸೃಷ್ಟೆಂತ್ ಆಸ್‌ಲ್ಯಾ ಸರ್ವ್ ವಸ್ತುಂನಿ, ಸರ್ವ್ ಜಾಗ್ಯಾಂನಿ ದೇವ್ ಹಾಜರ್ ಆಸಾ. ಪುಣ್ ತಾಚ್ಯಾ ಮೊಗಾನ್, ತಾಚ್ಯಾ ಖುಶೆ ಫರ್ಮಾಣೆಂ ಚಲ್ಚೊ ಲೋಕ್ ಭಾರಿ ಉಣೆಂ. ಮನಿಸ್ ತಾಚ್ಯಾ ಪಾಡ್ ಕೃತ್ಯಾಂ ವರ್ವಿಂ ದೆವಾಕ್ ದುಖಯ್ತಾ. 

ದೇವ್ ಮ್ಹಳ್ಯಾರ್ ಮೋಗ್. ಪುಣ್ ಮನಿಸ್ ದ್ವೇಷಾನ್ ಭರೊನ್ ಜಿಯೆವ್ನ್ ಆಸಾ. ಖೊಟೆಂಪಣ್, ಅನ್ನ್ಯಾಯ್, ಅತ್ತ್ಯಾಚಾರ್, ಮೊಸೊರ್, ರಾಗ್ ಮ್ಹಳ್ಳೊ ಅಂಧ್ಕಾರ್ ಆನಿ ಥೊಡ್ಯಾ ಬರ್‍ಯಾ ಮನಾಂಚಾ, ದೆವಾಚ್ಯಾ ವಾಟೆನ್ ಚಲ್ಚಾ ಲೊಕಾಚೆ ಮೌನ್ ಭರೊನ್ ಗೆಲಾ ಮ್ಹಣ್ ಕವಿತಾಂತ್ಲೊ ಕವಿ ಸಾಂಗ್ತಾಂ.

          ದಿವೊ ಝಳಂವ್ಕ್
          ಕಾಳೊಕ್ ಧಾಂವ್ಡಾಂವ್ಕ್
          ಭಜನಾ ಗಾಂವ್ಕ್
          ನಾಚ್ ನಾಚೊಂಕ್
          ಕೊಣ್ಂಚ್ ನಾ

ಮನಿಸ್ ಖೊಟೆಂಪಣ್ ಮ್ಹಳ್ಯಾ ಕಾಳೊಂಕಾತ್ ಲೊಳೊನ್ ಆಸಾ. ತಾಕಾ ಆಪ್ಲ್ಯಾ ಸ್ವಂತ್ ಕಾಮಾಂ ಖಾತಿರ್, ಸ್ವಾರ್ಥಾಖಾತಿರ್ ಕಿತ್ಲೊಯಿ ವೇಳ್ ಮೆಳ್ತಾ. ಪುಣ್ ದೆವಾ ಖಾತಿರ್ ಖರ್ಚುಂಕ್ ವೇಳ್ ನಾಂ. ಬರೆಂಪಣ್ ಆಧಾರ್ನ್ ದೆವಾಚ್ಯಾ ವಾಟೆನ್ ಚಲೊಂಕ್ ಕೊಣ್ಂಚ್ ನಾ ಮ್ಹಣ್ ಕವಿತಾಂತ್ಲೊ ಕವಿ ಸಾಂಗ್ತಾ ತರ್‌ಯಿ ಹೆಂ ಪೂರಾ ಸತ್ ನ್ಹಯ್ ಮ್ಹಳ್ಳಿ ಮ್ಹಜಿ ಅಬಿಪ್ರಾಯ್. ಸಭಾರ್ ಜಣ್ ಆಸಾತ್ ದೆವಾಚೊ ಮೊಗ್ ಕರ್ಚಿ, ತಾಚ್ಯಾ ವಾಟೆನ್ ಚಲ್ಚಿಂ ಆಶೆಂ ಅಸ್ತಾಂ ಕವಿತಾಂತ್ಲೊ ಕವಿ ಕೊಣ್ಂಚ್ ನಾ ಮ್ಹಣ್ಚೆಂ ಸಾರ್ಕೆಂ ಮ್ಹಣ್ ಬೊಗಾನಾ. ಖಂಚ್ಯಾಗಿ ಏಕಾ ಘಡ್ಯೆ ಕಠಿಣ್ ಪರಿಸ್ಥಿತೆಂತ್ ಹ್ಯಾ ಸಂಸಾರಾಚ್ಯಾ ಲೊಕಾಚ್ಯಾ ಕೃತ್ಯಾಂಚೆರ್ ಕಾಂಠೊಳೊನ್, ಪರಿಪೂರ್ಣ್ ಅಸ್ಕತ್ ಜಾವ್ನ್ ಕವಿತಾಂತ್ಲೊ ಕವಿ ಹಾಂಗಾಸಾರ್ ಉಲಯ್ಲಾ.

          ನಾ ಕೊಣ್ಂಚ್ ನಾಂ
          ಆಸಾ ಫಕತ್
          ಅಂಧ್ಕಾರ್ ಆನಿಂ ಮೌನ್

ಆಶೆಂ ಪರ್ತ್ಯಾನ್ ಆಪ್ಲೆಂ ರುದಾನ್ ಕವಿತಾಂತ್ಲೊ ಕವಿ ದೆವಾ ಮುಖಾರ್ ದವರ್ತಾ.

ಪಾಟಿಂ ಕವಿತಾಪಾಠ್ ಪಾನಾಕ್ 

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications