ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಬಾಂಯ್ ಆನಿ ತೆಂ
ಕ್ಯಾಥರಿನ್ ರೊಡ್ರಿಗಸ್: PÉÆAQÚ vÀ±ÉAZï vÀļÀÄ ¨sÁ¸ÉZÁ ¸Á»vÁåAvï ¥sÁªÀiÁzï eÁ°è PÁåxÀj£ï KPï ¸ÀªÀiÁeï ¸ÉªÀQ ªÀiÁvïæ £ÀíAAiÀiï, ¸ÁzÁå ¯ÉÆPÁAZÁ PÁ¼ÁÓZÁ JPÉPÁ GrAiÉÄPï ¯ÁVì¯Áå£ï ¥ÁQð°è eÁªÁ߸Á. zÁAiÀiïÓ ¸Á»wPï ¸ÀàzsÉÆð 2004 ಹಾಂತುಂ ಹಿಚಾ ’ಚರುವೊ’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಹಿಚ್ಯಾ ’ಕೇಲ್ ಅಮ್ಮಾ’ ಕಾಣ್ಯೆಕ್ ವೊರಾಯ್ಣಾರಾಂಚೆಂ ಇನಾಮ್ ಲಾಭ್ಲಾಂ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಹಾಂತುಂ ಹಿಚ್ಯಾ ’ಏಕ್ ಫೊಡ್ ದುಕ್ರಾಮಾಸ್’ ಕಾಣ್ಯೆಕ್ ತಿಸ್ರೆಂ ಇನಾಮ್ ಲಾಭ್ಲಾಂ.
ಕ್ಯಾಥರಿನ್ ರೊಡ್ರಿಗಸ್
ಬಾಂಯ್:
ಹಿ ಮ್ಹಜಿ ಕಾಣಿ ವಿಚಿತ್ರ್. ಮ್ಹಜ್ಯಾ ಕಾಣಿಯೆಚೊ ಹೀರೊ ಬಾಂಯ್ ಆನಿ ಹಿರೊಯಿನ್ ತೆಂ ಗುಲಾಬಿ. ತುಮ್ಕಾಂ ಆಯ್ಕೊನ್ ವಿಚಿತ್ರ್ ದಿಸ್ಲ್ಯಾರ್ ತಿ ಮ್ಹಜೆ ಚೂಕ್ ನ್ಹಂಯ್. ಪೂಣ್ ಘಡಿತಾಂ ಎಕಾ ರಿತಿಚಿ ಶಿಂಕಳ್ ಸೊಡಯ್ತಾನಾ ಘುಸ್ಪಡ್ ಗೊಂದೊಳ್ ಸುಟ್ತಾನಾ ಎಕಾ ರಿತಿಚೊ ಘಾಮ್ ಸುಟ್ತಲೊ.
ಬಾಂಯ್: ತಾಕಾಯ್ ಏಕ್ ನಾಂವ್. ವ್ಹಯ್. ವ್ಹಯ್ ತಾಚೆಂ ನಾಂವ್ ಸರ್ಕಾರಿ ಬಾಂಯ್. ವೊಲಾಂವ್ಕ್ ನಾಂವ್ ದಿಲ್ಲೆಂ ಶಿಕ್ಪಿ ಜಣಾರಿ ಲೊಕಾಂನಿ ನ್ಹಂಯ್. ಸತಾನಿತಿಚ್ಯಾ ತ್ಯಾ ಕಾಳಾರ್ ಲಗ್ಬಗ್ ಶೆಂಬೊರ್ ವರ್ಸಾಂ ಆದ್ಲ್ಯಾ ಆಮ್ಚ್ಯಾ ಮಾಲ್ಗಡ್ಯಾಂನಿ ಪಿಲ್ಯಾದ್ ಜೊಡುನ್ ಹೆಂ ನಾಂವ್ ದವರ್ಲ್ಲೆಂ. ತಾಕಾ ರುತಾ ಕೆಲ್ಲೆಂ ಆಮಿ ನ್ಹಂಯ್. ಗೊರ್ಯಾ ಸಾಯ್ಬಾಂಚ್ಯಾ ಕುರ್ಪೆಚ್ಯಾ ಝರಿನ್ ತಾಚೊ ಜಲ್ಮ್ ಸೆಂಚುರಿ ಮಾರ್ಲ್ಯಾರ್ಯೀ ತೊ ಘಟ್ಮುಟ್ ಭಳಿಶ್ಟ್. ತಾಕಾ ಕಾರಾಣ್ ರುತಾ ಕೆಲ್ಲ್ಯಾ ಮೇಸ್ತಾಕ್ ಶಾಭಾಸ್ಕಿ ಪಾಟೊಂವ್ ವಾ ಬಾಂದಯಿಲ್ಲ್ಯಾ ಸಾಯ್ಬಾಂಕ್ ಚೆಪೆಂ ಉಕ್ಲುನ್ ಧರ್ಚೆಂ ತೆಂ ಕಳಾನಾ. ಪುಣ್ ಪೋರ್ ಗಾರೊ ವಚೊನ್ ಬಾಂದ್ಲ್ಲೆ ಫಾತರ್ ಪಳೆತಾನಾ ತೆ ಕಾತ್ರಿಲ್ಲ್ಯಾ ಮ್ಹಾರಾಂಚ್ಯಾ ಭಳಾಕ್ ಚಿಂತುನ್ ವಿಜ್ಮಿತ್ ಜಾಲೊಂ.
ಪಾಟಿಂ ವ್ಹಡ್ಲಿ ಕಾಣಿ. ಆಮ್ಚ್ಯಾ ಗಾಂವಾಂತ್ ಆದಿಂ ಜಾತಿ ಮಧೆಂ ಭಾರಿಚ್ ವೊದ್ದು ವೊರಾಂಟ್. ಪವಿತ್ರ್ ಮ್ಹಳ್ಳೆಂ ಕಿರೀಟ್ ಚಡಯ್ಲೆಂ ವಯ್ಲ್ಯಾ ಜಾತಿಚ್ಯಾ ಲಾಗಿಂ ಮಾತ್ರ್ ಬಾಂಯ್. ತೆಂ ಕೊಣಾಕ್ಯ್ ತಾಕಾ ಆಪ್ಡುಂಕ್ ದೀನಾತ್ಲ್ಲೆ. ಕೀಳ್ ಜಾತಿಚ್ಯಾಂಚಿ ಸಾವ್ಳಿ ಲೆಗುನ್ ಬಾಂಯ್ ಸರ್ಶಿನ್ ಪಡೊಂಕ್ ನಾತ್ಲ್ಲಿ. ಹಿ ಪಾಪ್ ಭಿರ್ಮತ್ ಎಕಾ ಕೊಳ್ಶ್ಯಾ ಉದ್ಕಾಕ್ ಮಯ್ಲಾಂಗಟ್ಲ್ಯಾನ್ ವೆತಾನಾ ಪವಿತ್ರಾಂಚ್ಯಾ ಘರಾ ಮುಕಾರ್ ಉದ್ಕಾಚಿ ಖತಡ್ ಜಾತಾಲಿ.
ನಿಮಾಣೆ ತರ್ಯ್ ಉದಾಕ್ ಉದಾಕ್ ಮ್ಹಣ್ಚಿ ಬೊಬಾಟ್ ಗೊರ್ಯಾ ಸಾಯ್ಬಾಂಚ್ಯಾ ಕಾನಿಂ ಪಡ್ಲಿ. ದೆಕುನ್ ಉದಾರ್ ಮನನ್ ಹಾಕಾ ಖೊಂಡುಂಕ್ ಶುರು ಕೆಲೆಂ ಉದಾಕ್ ಪಿಯೆತೆಲ್ಯಾಂಚೆಂ ನಶೀಬ್ ಬರೆಂ ಆಸ್ಲ್ಲೆಂ. ಉದ್ಕಾಚೊ ಮೊಟೊ ಝರಿಚೊ ವ್ಹಾಳೊ ವ್ಹಾಳ್ಳೊ. ಬಾಂಯ್ ಭರ್ ಉದಾಕ್ ಭರ್ಲೆಂ. ಕಾಟೆಂ ಬಾಂದ್ಲೆಂ. ತೀನ್ ಖಾಂಬೆ ಉಭೆ ಜಾಲೆ. ತೀನ್ ಆಡಿಂ ಘಾಲಿಂ ದೆಕುನ್ ಆತಾಂ ತಿಂ ಪಳಯಿಲ್ಲೊ ಮ್ಹಜೊ ಪೂತ್ ಸಾಂಗ್ತಾ "ಪಪ್ಪಾ ಹೆಂ ತ್ರಿಕೋಣ್....?"
ಮ್ಹಜೊ ಬಾಬ್ ಸಾಂಗ್ತಾಲೊ ಏಕ್ ಪಾವ್ಟಿಂ ಗಾಂವಾಂತ್ ಬರ್ಗಾಲ್ ಆಯ್ಲೊ. ಗಾಂವ್ಚ್ಯೊ ಸಾರ್ವ್ ಬಾಂಯೊ ಸುಕ್ಲ್ಯೊ. ಪೂಣ್.... ಹಾಂತುಂ ತಿಳಾ ತಿತ್ಲೊ ತಫಾವತ್ ಜಾಂವ್ಕ್ ನಾ ಖಂಯ್. ಎದೊಳ್ ಪರ್ಯಾಂತ್ ಭಶ್ಟ್ ಜಾತಾ ಮ್ಹಳ್ಳಿಂ ತಾಣಿಂ ಪಾಸೊನ್ ಉದಾಕ್ ವೆಲೆಂ. ಆಶೆಂ ಥೊಡೊ ಮುಳಾವೊ ಭೇಧ್ ಲಿಪ್ಲೊ. ಉಪ್ರಾಂತ್.... ಬಾಯ್ಲಾಂಚ್ಯಾ ಕಾಂಕ್ಣಾಚೊ ಆವಾಜ್. ಪಾಂಯ್ಜಣಾಂಚೊ ನಾದ್. ಹಾಸ್ಯಾಂಚೊ ವ್ಹಾಳೊ ವ್ಹಾಳ್ತಾನಾ ತೊ ಭಾರಿಚ್ ಖುಶಿ ಪಾವ್ಲೊ. ಲಾಟ್ಯಾಂಚೊ ಕಿರ್ರ್ ಮ್ಹಳ್ಳೊ ಆವಾಜ್ ನೆದ್ಲೆಲ್ಯಾಂಕ್ ಜಾಗಯ್ತಾನಾ ಭಾಯ್ಲೊ ದಬಾಜೊ ವಾಡ್ತಾಲೊ.
ತೆಂ .......
’ತೆಂ’ ಆಮ್ಚೆಂ ಹಿರೊಯಿನ್..... ಗುಲಾಬಿ. ನಾಂವ್ ಗುಲಾಬಿ ಪೂಣ್ ರಚ್ತಾನಾ ರಚ್ಣಾರ್ ತಾಕಾ ಕಾಂಟೆ ಆನಿ ಮ್ಹಾಲಿ ದೀಂವ್ಕ್ ವಿಸ್ರಾಲೊ. ದೆಕುನ್ ಹಾವೆಂ ಮ್ಹಜ್ಯಾ ಪಾಟಾರ್ ಚಡಯ್ತಾನಾ ಥೊಡ್ಯಾಂಚೆಂ ತೊಂಡ್ ಆಮ್ಸೆತಾಲೆಂ. ಪೂಣ್.... ಮ್ಹಾಕಾ ತಾಕಾ ತ್ಯಾ ಜಾಗ್ಯಾರ್ ಥಾವ್ನ್ ಉಟಂವ್ಕ್ ಮನ್ ನಾ. ಎಕಾ ಘಡಿಯೆ ತರ್ಯ್ ತೆಂ ಬಸ್ಲ್ಯಾರ್ ಮ್ಹಾಕಾ ಸಮಾಧಾನ್. ಉರ್ಲೆಲ್ಯಾ ಹಿರೋಯಿನಾ ಪರಿಂ ದಿಸ್ಚೆಂ ನಾ. ವ್ಹಯ್ ತೆಂ ಪಾಟಿಚೊ ಕಣೊ ನಾತ್ಲ್ಲೆಂ ನಿರ್ಬಾಗಿ!
ಬಾಳ್ಪಣಾರ್ ತಾಕಾ ಪಳಯಿಲ್ಲೊ ಹರ್ಯೆಕ್ಲೊ "ಓಹ್ ...! ಹ್ಯಾ ಭುರ್ಗ್ಯಾಕ್ ಹೆಂ ನಾಂವ್ ಕಿತ್ಲೆಂ ಸೊಭ್ತಾ!" ಆಶೆಂ ಉದ್ಗಾರ್ತಾಲೊ. ವ್ಹಯ್ ಗುಲಾಬಿಚೆ ವೋಂಟ್ ತಾಂಬ್ಡ್ಯಾ ಗುಲಾಬಿಚ್ಯಾ ಪಾಕ್ಳ್ಯಾಂ ಪರಿಂ ಆಸ್ಲ್ಲೆ. ತಾಚೆ ಪೊಲೆ ಎಪ್ಪಲ್! ಸದಾಂಚ್ ಉಡ್ಕಾಣಾಂ ಘಾಲ್ಚಿ ತಾಚಿ ಚಾಲ್ ಚಿತ್ಳಾಚಿ. ಹಾಸ್ತಾನಾ ದಿಸ್ಚೆ ತೆ ಮೊತಿಯಾಂ ಸಾರ್ಕ್ಯಾಚೆ ದಾಂತ್ ಆನಿ ಪಡ್ಚೆಂ ತೆಂ ಗಾಲಾ ವಯ್ಲೆಂ ಪೊಡ್ಕುಳ್! ವ್ಹಾ.... ಕಿತೆಂ ಸೊಭಾಯ್! ಚಂಚಲ್ ತೆ ದೊಳೆ ನವೆಂಸಾಂವ್ ಜೊಕ್ಚ್ಯಾಕ್ ರಾಕ್ತಾಲೆ. ವಾದೊನ್ ತೆಂ ಯೆತಾನಾ ಮ್ಹಾಕಾ ಕಳ್ಳೆಂ.... ಸರ್ವ್ ಆಸಾ ಕೆಲ್ಲ್ಯಾ ರಚ್ಣಾರಾನ್ ತ್ಯಾ ಗುಲೊಬಾಕ್ ಕಾಂಟೊ ದೀಂವ್ಕ್ ನಾತ್ಲ್ಲೊ.
ಲಾಂಕುಡ್ ಪೊಡ್ಚೊ ಸುಬ್ಬ, ದಿಸಾಕ್ ಜೊಡ್ತಾಲೊ ಆನಿ ರಾತಿಕ್ ಮೊಡ್ತಾಲೊ. ಬಾಯ್ಲ್ ತುಂಬೆ. ಧುವ್ ತಾಚೆಂ ಗುಲಾಬಿ. ತುಂಬೆ ನಳ್ಯಾಂ ಕಾರ್ಖಾನ್ಯಾಕ್ ಕಾಮಾಕ್ ವೆತಾಲೆಂ ತರ್ಯ್ ತಾಚೆಂ ಆಟ್ನೆಟ್ ಹಜಾರಾಂನಿ ಜೊಡ್ಚ್ಯಾ ಸ್ತ್ರೀಯೆಕ್ಯ್ ಲಜೆಕ್ ಘಾಲ್ತಾಲೆಂ. ಸುಬ್ಬ ಸಾಂಜ್ ಮ್ಹಣಾಚರ್ ಕಾಮ್ ಕರ್ತಾಲೊ ಉಪ್ರಾಂತ್ ನಾಕ್ ಭರ್ ಘೊಟ್ತಾಲೊ. ದಿಸಾಕ್ ದೋನ್ ಪಾವ್ಟಿಂ ವಾಟ್ಲಿ ದವರುನ್ ’ಬಲದೆ ಬಲಸ್’ ಮ್ಹಣೊನ್ ಫರ್ಮಾಯ್ತಾಲೊ. ತಾಚಿ ಪಟ್ಟಿ ಆಂರ್ದಾತಾ ಬಾಯ್ಲೆನ್ ಮಾಸ್ಳೆಚಿ ಕಡಿ ಆನಿ ಶಿತ್ ವಾಡ್ಲ್ಯಾರ್ ತುಂಬೆಚಿ ಪಾಟ್ ಆನಿಂ ಪೆಂಕಾಡ್ ಶಾಭೀತ್ ಉರ್ತಾಲಿ. ಕಾಂಯ್ ತರ್ಯ್ ಚಡ್ಉಣೆ ಜಾಲ್ಯಾರ್ ತಾಚೆಂ ರಗಾತ್ ಪಳಯ್ನಾಸ್ತಾಂ ಸುಬ್ಬುಚೊ ಚಡ್ಲ್ಲೊ ರಾಗ್ ದೆಂವಾನಾತ್ಲ್ಲೊ. ತೆಂಯ್ ಆಪ್ಲಿ ಜೀಬ್ ಹಾಲಯ್ತಾಲೆಂ ಪುಣ್ ಸೊರ್ಯಾಚೊ ದೆಂವ್ಚಾರ್ ವಾವಯಿಲ್ಲ್ಯಾ ಸುಬ್ಬುಕ್ ತೆಂ ಆಯ್ಕಾನಾತ್ಲ್ಲೆಂ. ತೆಂಯ್ ಸಲ್ವಾಲೆಂ. ದೆಕುನ್ ತಾಣೆಂಯ್ ಆಪ್ಲಿ ವಾಟ್ ಸೊಧ್ಲಿ ಆನಿ ಆರಾಮ್ ರಾವ್ಲೆಂ. ಆತಾಂ’ತಾಂ ತುಂಬೆ ಹಾತ್ ಉಭಾರುನ್ ಆಯಿಲ್ಲ್ಯಾ ಸುಬ್ಬುಕ್ ಬೂದ್ ಶಿಕಯ್ತಾಲೆಂ. ಆನಿ ಉಗ್ತ್ಯಾನ್ ಆಪ್ಲೊ ವಾವ್ರ್ ಕರ್ತಾನಾ ಬಾಯ್ಲೆಚಿ ಚಾರಿಯಾ ಪಳಯ್ಲ್ಯಾರ್ಯೀ ತೊ ಮೊನೊ ಜಾಲೊ. ಎಕಾಂತ್ ಮಾತ್ರ್ ತೊ ಸಂತುಶ್ಟ್. ಕಿತ್ಯಾಕ್ ಮ್ಹಳ್ಯಾರ್ ಆತಾಂ ಘರಾಂತ್ ರುಚಿಚ್ಯಾ ಜೆವ್ಣಾಕ್ ಬರ್ಗಾಲ್ ನಾತ್ಲ್ಲೊ.
ಗುಲಾಬಿ ವಾಡ್ಚೆಂ ಘರ್ಚ್ ವ್ಹಾಳಯೆಕ್ ಲಾಗ್ಲ್ಲೆಂ. ಬೆಬ್ದೊ ಬಾಪಯ್. ಮೆಳ್ಲ್ಲ್ಯಾಂಕ್ ವೋರ್ಲ್ ಹಾಂತುಳ್ಚೆಂ ಆವಯ್. ಗುಲಾಬಿ ಆಸ್ಚ್ಯಾ ಸುವಾತೆರ್ ವೀಕ್ ಭ್ರಲ್ಲೆಂ ತೆಂಚ್ ವಾಳ್ಚೆಂ ವಾರೆಂ ಸೆಂವ್ಚೆಂ ವಾರೆಂಚ್ ಜೀವ್ ಕಾಡುಂಕ್ ಆಯ್ತೆಂ ಜಾಲ್ಲೆಂ. ವಾಡೊನ್ ಯೆಂವ್ಚ್ಯಾ ರೊಂಪಿಯೆಚ್ಯಾ ಮುಳಾಕ್ಚ್ ಕುರಾಡಿಚೊ ಮಾರ್ ಪಡ್ಲ್ಲೊ. ಆಸ್ಚೆಂ ಏಕ್ಚ್ ಬಾಳ್. ತಾಚೆಂ ಜೀವನ್ ನಂದನ್ ಕರಿಜಾಯ್ ಜಾಲ್ಲಿಂ ಆವಯ್ ಬಾಪಯ್ ತಾಚ್ಯಾ ಜಿವಾಚಿಂ ಖೆಳ್ಗಾಡಿ ಜಾಲಿಂ. ತಿಂ ಮಜೆನ್ ಜಿಯೆಲಿಂ. ನಶೀಬ್ ಬರೆಂ ಆಸ್ಲ್ಲೆಂ ವೆಗಿಂಚ್ ಮೆಲಿಂ ಪೂಣ್..... ಧುವೆಕ್ ತಿಂ ಜಿವಾಂತ್ ಆಸ್ತಾನಾಂಚ್ ಬಾಂದ್ಲ್ಲಿ ಸಮಾಧಿ ಸಂಸಾರಾಕ್ ದಿಸ್ಲಿ ನಾ. ಕಾಂಟೆ ನಾತ್ಲಲೊ ಗುಲೊಬ್ ಪ್ರಕೃತೆಚ್ಯಾ ನಿಯಮಾ ಪರ್ಮಾಣೆ ಫುಲೊನ್ ಯೆತಾನಾ ಉಸ್ಟ್ಯಾ ಸಮಾಜೆಚ್ಯಾ ದೊಳ್ಯಾಂಕ್ ತೊಪುಂಕ್ ಲಾಗ್ಲೊ.
********
ಆಜ್ ದಿಸಾಚೊ ಸುರ್ಯೊ ಉದೆವ್ನ್ ಆಯ್ಲೊ ತರ್ಯ್ ಬಾಂಯ್ ಲಾಗಿಂ ಲಾಟ್ಯಾಂಚೊ ಆವಾಜ್ ನಾ. ಪೂಣ್ ಬಾಯ್ಲಾಂನಿ ಪುಸ್ಪುಸೊನ್ ಉಲಂವ್ಚೆಂ ಆಯ್ಕಾಲೆಂ. ಆಜ್ ಕಾಲ್ ಗಾಂವ್ಚೊ ಲೋಕ್ ಬಾಂಯ್ ಲಾಗಿಂ ಯೇವ್ಚೊ ಉಣೊ. ಹರ್ಯೆಕ್ಲ್ಯಾಚ್ಯಾ ಘರಾ ಮುಕಾರ್ ಏಕ್ ಬಾಂಯ್ ಆನಿ ತಾಕಾ ಪಂಪ್. ಪೂಣ್ ಗಾಂವಾಂತ್ ಆಜ್ ಕಾಲ್ ಭಿಕಾರಿ, ಪಿಶೆ, ಆನಿ ಕಾಮ್ ಸೊಧುನ್ ಭಂವ್ಚೆ ಪಯ್ಶಿಲ್ಯಾ ಗಾಂವ್ಚೆ ಭರ್ಲ್ಲೆ. ದೆಕುನ್ ಆತಾಂ ಪಯ್ಲೆಂಚ್ಯಾಕ್ಯ್ ಹ್ಯಾ ಮನಾಯಾಕ್ ವೆಂಗ್ಚೊ ಲೋಕ್ ಚಡ್ ಜಾಲ್ಲೊ. ಥಂಯ್ಚ್ ನ್ಹಾಣ್, ಉಂಬ್ಳಾಪ್! ಮ್ಹೆಳೆಂ ಧುಂವ್ಚೆಂ ಥಾಣೆಂ ಇತ್ಯಾದಿ ಅಶೆಂ ಸಗ್ಳ್ಯಾಂನಿ ಮ್ಹೆಳೆಂ ಆನಿ ಕುಸ್ಲ್ಲಿ ಘಾಣ್! ಘಾಣ್ ಯೆಂವ್ಚೊ ಜಾಗೊ... ವಚೊಂಕ್ ಜಾಯ್ನಾತ್ಲ್ಲೆಂ. ಲಾಟ್ಯಾಂಕ್ಯ್ ತೇಲ್ ಘಾಲಿನಾಸ್ತಾನಾ ಕಾಳ್ ಉತ್ರಾಲ್ಲೊ. ದೆಕುನ್ ತೆ ಬೊಬಾಟ್ತಾಲೆ. ’ಮ್ಹಕಾ ತಾನ್ ಲಾಗ್ಲ್ಯಾ...!’ ಆನ್ಕಿಟೆ ಥಾವ್ನ್ ಆಶೆಂ ರುದಾನ್ ಕರ್ತಾನಾ ಭಂವ್ತಣಿಚ್ಯಾ ಲೊಕಾಕ್ ’ಸುಪ್ರಭಾತ’ ಸಕಾಳಿಂ ಉಟ್ತಾನಾಂಚ್ ಶುರು ಜಾಲ್ಲೆಂ ಹೆಂ ಸಗ್ಳ್ಯಾ ದಿಸಾಚೆಂ ಸಮಾಧಾನ್ ಲುಟ್ತಾಲೆಂ.
ಹಾಂವ್ ಆಜ್ಯ್ ತ್ಯಾಚ್ ಆವಾಜಾಕ್ ರಾಕ್ತಾಲೊಂ. ಫಾಂತೆಂ ಜಾಂವ್ಕ್ ನಾ ಮ್ಹಣೊನ್ ತ್ಯಾಚ್ ವೊಲಿ ಭಿತರ್ ವಿಶೆವ್ ಘೆತಾಲೊಂ. ಥೊಡ್ಯಾ ವೆಳಾನ್ ಆವಾಜ್ ಆಯ್ಕಾಲೊ. ಪೂಣ್ ದಿಶಾ ಬದ್ಲುನ್ ಆಸ್ಲ್ಲಿ. ಮ್ಹಜಿ ಬಾಯ್ಲ್ ಖಟ್ಲ್ಯಾರ್ ಬಸೊನ್ ’ಮುಖ್ಯಾಂಶಗಳು’ ಮ್ಹಣೊನ್ ಸಾಂಗೊಂಕ್ ಲಾಗ್ಲಿ.
ಸರಕಾರಿ ಬಾಂಯ್ಚಾ ಖಾಂಬ್ಯಾಕ್ ಕೋಣೆ ತರ್ಯ್ ಕಸಲೆಂ ತರ್ಯ್ ವಾಹಾನ್ ಹಾಡುನ್ ಮಾರುನ್ ತೀನ್ ಖಾಂಬ್ಯಾಂ ಪಯ್ಕಿ ಏಕ್ ಖಾಂಬೊ ಪರ್ತೊನ್ ದೋನ್ ಮಾಲ್ವೊನ್ ರಾವ್ಲ್ಯಾತ್. ಆಡ್ ಘಾಲ್ಲೆ ಸರಳ್ ಸಕಯ್ಲ್ ಪಡ್ಲ್ಯಾತ್. ಉದಾಕ್ ಕಾಡುಂಕ್ ವಾಟ್ ನಾಸ್ತಾನಾ ಅಗ್ಳಿಂ ಕಿತೆಂ ಕರ್ಚೆಂ ಮ್ಹಣೊನ್ ತರ್ಕಾಕ್ ದೆಂವ್ಲ್ಯಾತ್.......ಕೋ....
ಬಾಯ್ಲೆಚೊ ವಿವರ್ ಮುಖಾರುನ್ ಗೆಲೊ. ಹಾಂವ್ ಲುಂಗಿ ಪೆಂಕ್ಟಾಕ್ ಸಾರ್ಕಿ ಬಾಂದುನ್ ಬಾಂಯ್ ಸರ್ಶಿಣ್ ಉಭೊ ಜಾಲೊಂ. ಮ್ಹಜೊ ಹೀರೊ ದುಖಾನ್ ಸುಸ್ಕಾರ್ ಸೊಡ್ತಾಲೊ. ತೀನ್ ಮುಲ್ಯಾಂಚೊ ಸಂಭಂಧ್ ತುಟ್ಲ್ಲೊ. ಆಕಾರ್ ಆಜ್ ಬದ್ಲಾಲ್ಲೊ. ಏಕ್ ಮುಲೊ ಚುಕ್ಲ್ಲ್ಯಾ ತಾಚಿ ಗತ್ ಪಳವ್ನ್ ಮ್ಹಕಾಯ್ ಬೆಜಾರ್ ಜಾಲೆಂ. ಮ್ಹಜೆಂ ಮನ್ ರಡ್ಲೆಂ. ಪೂಣ್.... ಮ್ಹಾಕಾ ಮಾತ್ರ್ ಏಕ್ ಅಪೂರ್ವ್ ವಸ್ತ್ ದಿಶ್ಟಿಕ್ ಪಡ್ಲಿ. ಜಿ ತಿ ಜಾವ್ನ್ ಆಸ್ಲ್ಲಿ ಎಕಾ ಮುರ್ಯಾ ಫಾತ್ರಾಚಿ, ಶೆಂಬರ್ ವರ್ಸಾಂ ಪಯ್ಲೆಂ ಬ್ರಿಟಿಶಾಂನಿ ಕೆಲ್ಲೆಂ ಕಾಮ್. ತೆಯೀ ಮಜ್ಭೂತ್ ಕಾಮ್! ಅನಿ ಆಜ್ ಕಾಲ್ ಉಗ್ತಾವಣಾಚ್ಯಾ ದಿಸಾಚ್ ಕೊಸ್ಳೊನ್ ಪಡ್ಚ್ಯಾ ಸರ್ಕಾರಿ ಕಾಮಾಕ್. ಅಸಲ್ಯಾ ಬಳಿಶ್ಟ್ ಹೀರೊಕ್ ಕಾಳ್ಕಾರ್ ಯೇವ್ನ್ ಕಾತ್ರಿಲ್ಲ್ಯಾ ಪಾಪಿಯಾಕ್ ಹಜಾರಾಂನಿ ಶಿರಾಪಿಲೆಂ. ಆಮ್ಚೊ ಹೀರೊ ತ್ಯಾಚ್ ದಿಸಾ ಅಪಾಂಗ್ ಜಾಲೊ. ಆನಿ ಮುಲ್ಯಾಕ್ ಶೆವ್ಟಾತಾನ್....
ಆಮ್ಚೆಂ ಹಿರೊಯಿನ್ ಬೊಂಗೊ ಆಸ್ಲ್ಲೆಂ ತೆಂ ಫುಲ್ಲೆಂ. ಕಿತೆಂ ತಿ ಸೊಭಾಯ್. ನಿಜಾಯ್ಕ್ಯ್ ದೆವಾಚ್ಯಾ ರಚ್ಣೆಂತ್ ಹಿ ಸೊಭಾಯ್ ಆಸಾ ಕರುಂಕ್ ಕಿತ್ಲೊ ವಾವ್ರ್ ಕೆಲಾ ಕೊಣ್ಣಾ? ಮ್ಹಾಕಾ ತವಳ್ ಕಳಿತ್ ಜಾಂವ್ಕ್ ನಾ, ಹಿ ಸೊಭಾಯ್ ತಾಕಾ ಸಾರ್ಕ್ಯಾ ಬಂದ್ರಾಕ್ ಪಾವಯ್ತ್? ವಾ ಸುಳಿಯೆಂತ್ ಶಿರ್ಕಾವ್ನ್ ನಾಸ್ಕರಿತ್? ಪೊಸ್ತಲೊ ನಾ. ಆವಯ್ ಬಾಪಯ್ ತಾಂಚಿ ಕೂಲ್ ಘೆಂವ್ಕ್ ಪಯ್ಶಿಲ್ಯಾ ಗಾಂವಾಕ್ ಗೆಲ್ಯಾಂತ್. ಪೋಟ್ ಆಯ್ಕಾನಾ, ಖರ್ಚ್ ರಾವಾನಾ. ದೆಕುನ್ ಕುಲಿಚ್ಯಾ ಕಾಮಾಕ್ ಲಾಗ್ಲೆಂ. ಪುಣ್ ಥಂಯ್ ಅನ್ನಾಡಿ ಪಾಟಿಕ್ ಲಾಗ್ತಾನಾ ಬಚಾವಿ ಸೊಧುನ್ ಬಿಡಿಯೊ ಬಾಂದುಂಕ್ ಲಾಗ್ಲೆಂ. ಪುಣ್... ಬಾವ್ಡೆಂ ನೆಣಾ ಆಸ್ಲ್ಲೆಂ ನಂಯ್ತ್ಲೆಂ ಉಟೊನ್ ಬಾಂಯ್ತ್ ಉಡ್ಲ್ಲೆಂ ಹೆಂ ಸತ್ ಕೊಡು ಜಾಲೆಂ ಪೂಣ್ ಕಾಲ್ಸ್ ಪಿಯೆಂವ್ಕ್ ತಾಣೆಂಚ್ ತಯಾರಾಯ್ ಕೆಲ್ಲಿ.
ಭರ್ಲ್ಲೆ ತಾಚ್ಯೆ ವಿಸ್ವೆ, ದೊಳ್ಯಾಂಕ್ ತೊಪ್ಚಿ ಸೊಭಾಯ್, ಭುಕೆಲ್ಲ್ಯಾ ಬೊಲ್ಪ್ಯಾಂಚಾ ದೊಳ್ಯಾಂಕ್ ಕೊಂಕ್ತಾನಾ ಎಕ್ಸುರ್ಯಾ ಚಲಿಯೆನ್ ಆಯ್ತೆಂ ಕೆಲ್ಲೆ ಝುಜಾಂತ್ ಸಮ್ಜಣಿ ದಿಸ್ಲಿ. ಸರ್ವ್ ತಾಚೆಂ ಪ್ರಯತ್ನ್ ಉದ್ಕಾಂತ್ ಉಬಾರ್ಲ್ಲ್ಯಾ ಹೋಮ್ಕುಂಡಾಂತ್ ಅರ್ಪಿಲ್ಯಾ ವಸ್ತು ಪರಿಂ ಜಾಲೆಂ. ವೋಂಯ್ ಆಸ್ಚ್ಯಾ ಹೆತಾಕ್ಚ್ ಚೊರಿಯಾಂ ತರ್ಯ್ ಝೊಂಪ್ ಮಾರುನ್ ಖಾಂವ್ಚ್ಯಾ ಪಾಡಾರಿ ಹರಾಮಿ ಪಾಡ್ಯಾಂಕ್ ವೋಂಯ್ ನಾತ್ಲ್ಲೆಂ ಶೆತ್ ಖಂಯ್ಚೆ ಲೇಖ್? ಅಸಲ್ಯಾಂಕ್ ರಕ್ಶಣ್ ದಿಂವ್ಚೆಂ ಬರೆಂ ಮನ್ ಕಿತ್ಲ್ಯಾ ಜಣಾಂಕ್ ಆಸಾ? ಥರ್ಣಿಕ್ ಶೆವ್ಟಾಲ್ಲ್ಯಾಂಕ್ ಪಾತಾಳಾಕ್ ಲೊಟುಂಕ್ ಆಶೆಂವ್ಚ್ಯಾ ಲೆಂಬೆಡ್ಯಾಂ ಮಧೆಂ ಜಿಯೆಂವ್ಕ್ ತಿತ್ಲೆಂ ಸಲೀಸ್..? ಪಯ್ಲೆಂ ಪಯ್ಲೆಂ ಗುಲಾಬಿ ಝುಜ್ಲೆಂ. ತಾಂಚೆ ಥಾವ್ನ್ ಚುಕಾರಿ ಮಾರುಂಕ್ ಲಾಗ್ಲೆಂ. ಪೂಣ್ ನಿಮಾಣೆ ರಗ್ತಾ ಮಾಸಾಚಿ ತಾಚಿ ಕೂಡ್ ಆನಿ ಮನ್ ಸಲ್ವಾಲೆಂ. ಎಕೆಕ್ಲ್ಯಾಚಿಚ್ ಭುಕ್ ಥಾಂಬಂವ್ಚೆಂ ಖಾಣ್ ಜಾಲೆಂ. ಉಗ್ತ್ಯಾ ಜಾಗ್ಯಾರ್ ದವರ್ಲ್ಲ್ಯಾ ಹರ್ವಾಣಾಂತ್ಲೆಂ ವಸ್ತ್ ಜಾಲೆಂ. ಆಟ್ರಾ ವರ್ಸಾಂಚ್ಯಾ ಹುನ್ ರಗ್ತಾಚ್ಯಾ ತರ್ನಾಟ್ಯಾ ಥಾವ್ನ್ ಸತ್ತರಾಂಚ್ಯಾ ಪಿಕ್ಲೆಲ್ಯಾ ಮಾತಾರ್ಯಾಂಚಿ ಕಾಮುಕಿ ತಾನ್ ಥಾಂಬಂವ್ಕ್ ಆಯ್ತೆ ಜಾಲೆಂ. ಸಕ್ಡಾಂಕ್ಯ್ ಲಾಗ್ಲ್ಲೊ ಹರ್ಬೊಸ್ ನಿಂವೊಚ್ಯಾ ನಿಚೆವಾಂತ್ ಆಪ್ಲಿ ಕೂಡ್ ವಿಕುಂಕ್ ಲಾಗ್ಲೆಂ.
ದಿಸಾ ಉಜ್ವಾಡಾಕ್ ಗುಲಾಬಿ ದೆಕ್ತಾನಾ ’ಥೂ ದಳಿದ್ರ್’ ಮ್ಹಣೊನ್ ಥುಕ್ಚೆ ರಾತ್ ಜಾಲ್ಲಿಚ್ ಜಾಗ್ ಮಾಗ್ ನಿಂವ್ಲ್ಲಿಚ್ ಅಡ್ವೊನ್ ಅಡ್ವೊನ್ ತ್ಯಾ ತಟ್ಟೆಚೆಂ ದಾರ್ ಲೊಟುನ್ ಮಾತಿಯೆಚ್ಯಾ ತ್ಯಾ ಕರ್ಕರ್ ಧರ್ಣಿರ್ ಲೊಳೊನ್ ಗುಲಾಬಿಚ್ಯಾ ಕುಡಿ ಥಾವ್ನ್ ಆಪ್ಲಿ ಭುಕ್ ಥಾಂಬಯ್ತಾಲೆ. ಪಿಶ್ಯಾ ಆಶೆಕ್ ಉದಾಕ್ ವೊತ್ತಾಲೆ. ಸುರ್ಯಾಚಾ ಉಜ್ವಾಡಾಕ್ ತಾಚೆ ವಿಶ್ಯಾಂತ್ ಪೊಜ್ಡೆಂ ಉಲಯಿಲ್ಲಿ ಜೀಬ್ ಆತಾಂ ಚಿಮ್ಣೆಚ್ಯಾ ಉಜ್ವಾಡಾಕ್ ತಾಕಾ ಚಿನೆಮಾಚ್ಯಾ ಉತ್ರಾಂನಿ ಸುಂರ್ಗಾರಾವ್ನ್ ಹೊಗೊಳ್ಸುನ್ ಗಾಣಾಂ ಗಾತಾಲೆ ಆನಿ ಆಪ್ಲಿ ಆಶಾ ಭಾಗವ್ನ್ ಬರ್ಯಾ ಮಾನೆಸ್ತಾಚೊ ವೇಸ್ ಪಾಂಗ್ರುನ್ ಥಂಯ್ ಥಾವ್ನ್ ಆಪ್ಲ್ಯಾ ಘರಾ ವೆತಾಲೊ. ಘರಾ ಬಾಯ್ಲೆ ಮುಕಾರ್ ಸತೆವಂತ್. ಬಾಯ್ಲೆಚ್ಯಾ ವೊರ್ಲಾಕ್ ಧರುನ್ ಖಾಟ್ಯೆರ್ ಧಾರೆಚ್ಯಾ ಬಾಯ್ಲೆಕ್ ಪೊಟ್ಲುನ್ ಗುಲಾಬಿಚಿಂ ಸಪ್ಣಾಂ ದೆಕ್ತಾಲೊ.
***********
ಗುಲಾಬಿ ಮ್ಹಾಜ್ಯಾ ದೊಳ್ಯಾಂ ಮುಕ್ಲೆಂ ಭುರ್ಗೆಂ. ತಾಚೆರ್ ಮ್ಹಾಕಾ ಮಾಯ್ಪಾಸ್ ಮ್ಹಣೊಂ....? ದಯಾಳಾಯ್ ಮ್ಹಣೊಂ....? ಭಿರ್ಮೊತ್ ಮ್ಹಣೊಂ.....? ಹಾಂವ್ ತಾಕಾ ಮ್ಹಜೆಂ ಭಯ್ಣ್ ಮ್ಹಣ್ ವೊಲಾಂವ್ ವಾ ಸೆಜಾರಿ ಮ್ಹಣ್ ಘೆಂವ್? ಮ್ಹಕಾಚ್ ಕಳಿತ್ ಜಾಯ್ನಾತ್ಲ್ಲಿಂ ಭಗ್ಣಾಂ. ತಾಕಾ ಮ್ಹಜ್ಯೆರ್ ವರ್ತೊ ಗೌರವ್ ಆನಿ ಅಭಿಮಾನ್! ಮ್ಹಾಕಾ ಪಳಯಿಲ್ಲೆಂಚ್ ಸೊಭಿತ್ ಹಾಸೊ ಫುಲವ್ನ್ ಧಾಂವೊನ್ ಯೆತಾಲೆಂ. ಕಿತೆಂ ಕಿತೆಂ ಸಾಂಗೊಂಕ್ ಆಶೆತಾಲೆಂ. ತಾಚ್ಯಾ ದೊಳ್ಯಾಂನಿಚ್ ತೆಂ ’ಮ್ಹಾಕಾ ರಾಕ್’ ಮ್ಹಳ್ಳ್ಯಾ ಪರಿಂ ಮ್ಹಾಕಾ ಸಾಂಗ್ತಾ ತಶೆಂ ಭಗ್ತಾಲೆಂ.
ವ್ಹಯ್! ಗುಲಾಬಿ ಆಜ್ಯ್ ಮ್ಹಾಕಾ ಸೊಧುನ್ ಆಯಿಲ್ಲೆಂ!
ತಾಚಿಂ ಭಗ್ಣಾಂ ಸಾಂಗೊಂಕ್ ತೆಂ ತೋಂಡ್ ಉಗ್ತೆಂ ಕರ್ತನಾಚ್ ಘರಾ ಭಿತರ್ಲ್ಯಾ ಕಾಮಾರ್ ಆಸ್ಲ್ಲಿ ಮ್ಹಜಿ ಬಾಯ್ಲ್ ’ಸಟ್ಟ್’ ಕರುನ್ ಗುಲಾಬಿಚ್ಯಾ ಮುಕಾರ್ ಹಾಜರ್ ಜಾಲ್ಲಿ. ತಿಣೆ ಗುಲಾಬಿಚೆರ್ ತಿಚಿ ತಿಚ್ ತಾತ್ಸಾರಚಿ ಕಾಂಟಾಳಿ ನದರ್ ಮಾರ್ತಾನಾ ಮ್ಹಾಕಾ ತ್ಯಾ ತಿಚ್ಯಾ ಮುಖಮಳಾರ್ ಉಟೊನ್ ರಾವ್ಲ್ಲೊ ಉಜ್ಯಾ ಕಾಸ್ತಾಚೊ ಛಾರೊ ಪಳವ್ನ್ ಎಕಾ ಥರಾಚಿ ಕಾವ್ಜೆಣಿ ಭಗ್ಲಿ. ತಿ ಪಾಟಿಂ ಮುಕಾರ್ ಚಿಂತಿನಾಸ್ತಾನಾ ತಿಚ್ಯಾ ತ್ಯಾ ಜಿಬೆಚ್ಯಾ ಧಾರಿನ್ ಗುಲಾಬಿಕ್ ಆಡ್ ಉಭೆಂ ವಯ್ರ್ ಸಕಯ್ಲ್ ಮ್ಹಳ್ಳ್ಯಾ ಪರಿಂ ಚಿರ್ತಾನಾ ಗುಲಾಬಿಚ್ಯಾ ದೊಳ್ಯಾಂನಿ ಉದ್ಕಾ ಝರ್ ನಿಶೆಲಿ. ಜಿಬೆಚಿ ಖೊರೊಜ್ ಕಾಡುನ್ ತಿ ಭಿತರ್ ವೆತಾನಾ.....
ಗುಲಾಬಿ ಮ್ಹಾಕಾಚ್ ದುಖಾಂ ಭರ್ಲೆಲ್ಯಾ ದೊಳ್ಯಾಂನಿ ಪಳೆತಾಲೆಂ.
ಮ್ಹಾಕಾ ತಾಚ್ಯಾ ದೊಳ್ಯಾಂಕ್ ದೊಳೆ ಮೆಳಂವ್ಕ್ ಸಾದ್ಯ್ ಜಾಲೆಂ ನಾ. ಮ್ಹಜೆಂ ಕಾಳಿಜ್ ಫಕತ್ತ್ ಗುಪಿತ್ತ್ ರಡೊಂಕ್ ಮಾತ್ರ್ ಸಕ್ಲೆಂ.
"ಛಿ...ತುಜಿ ಹಿ ಜೀಬ್...., ಜೀಬ್ ನಹಿಂ.... ತಿ ಕಲ್ವಂತಾಂಚ್ಯಾ ಪಾಂಯಾ ಬಾಶೆನ್ ನಾಚ್ಚಿ.... ನಾಚ್ಚಿ ಏಕ್.... !" ಬಾಯ್ಲೆಕ್ ಮನಾಂತ್ಚ್ ಪುರ್ಪುರ್ಲೊಂ ಹಾಂವ್. ಗುಲಾಬಿ ಖಾತಿರ್ ಮ್ಹಾಕಾ ಮ್ಹಜ್ಯಾ ಬಾಯ್ಲೆ ಮುಕಾರ್ ಉಭೊ ಜಾಂವ್ಚೆಂ ಧಯ್ರ್ ನಾತ್ಲ್ಲೆಂ.
ಹೆಂ ಮ್ಹಜೆಂ ಸದಾಂಚೆಂ. ಗುಲಾಬಿನ್ ಕಾಂಯ್ ಮ್ಹಜ್ಯೆ ಲಾಗಿಂ ದೋನ್ ಸಬ್ದ್ ಉಲಂವ್ಕ್ ಜಾಯ್ ಜಾಲ್ಯಾರ್ ಪಯ್ಲೆಂ ಹಾವೆಂ ಮ್ಹಜ್ಯಾ ಬಾಯ್ಲೆ ಥಾವ್ನ್ ಸಾಂಬಾಳುಂಕ್ ಪಡ್ತಾಲೆಂ. ನಾಂ ತರ್....
ಮ್ಹಜಿಂ, ತಿಕಾ ಸಮಾಧಾನ್ ಕರ್ಚಿಂ ಉತ್ರಾಂ, ತಿಚ್ಯಾ ಖಜ್ನ್ಯಾಚ್ಯಾ ಆವಾಜಾ ಮುಕಾರ್ ಉದಾಕ್ ಜಿರೊನ್ ಗೆಲ್ಲ್ಯಾ ಪರಿಂ ಜಿರೊನ್ ವೆತಾಲಿಂ. ಕೊಣಾ ಕೊಣಾಚೆಂ ಜಿವಿತ್ ವೊಪಾರಿ ಮುಕಾಂತ್ರ್ ಮ್ಹಜ್ಯಾ ಸಾಮ್ಕಾರ್ ತಿ ದಾಳ್ತಾಲಿ. ಘರಾಂತ್ ಸಮಾಧಾನ್ ಆಸೊಂಕ್ ಹಾಂವ್ಚ್ ಮೊನೊ ಜಾತಾಲೊಂ. ದೊಳೆ ಆಸೊನ್ಯ್ ಕುರ್ಡೊ! ಕಾನ್ ಆಸೊನ್ಯ್ ಕೆಪ್ಪೊ! ಬಾಯ್ಲೆಚೊ ಗಾಂಡು!
ಗುಲಾಬಿಚೆ ದೀಸ್ ಆಶೆಚ್ ದಾಂವ್ತಾನಾ....,
ತ್ಯಾ ಎಕಾ ದಿಸಾ!
ಉಟ್ತಾನಾಚ್ ವೇಳ್. ಆಮ್ಚೊರಾನ್ ಆಫೀಸಾಕ್ ವೆತಾನಾ ಗುಲಾಬಿ ಲಕೊನ್ ಲಕೊನ್, ಸುಸ್ಕಾರ್ ಸೊಡೀತ್ತ್ ಯೆಂವ್ಚೆಂ ದಿಸ್ಲೆಂ. ತಾಚಿ ಮುಸ್ತಾಯ್ಕಿ ಪಿಂಜುನ್ ಗೆಲ್ಲಿ. ಲಾಗಿಂ ಯೆತಾನಾ ತ್ಯಾ ಚಾಂಪ್ಯಾ ರಂಗಾಚ್ಯಾ ಕುಡಿರ್ ಮಾರಾಂಚಿಂ ದಾಡ್ಕಾಂ ಆನಿ ರಗ್ತಾಚಿ ಸಾಯ್ ನಿಶೆತಾಲಿ.
ಕೊಣೆ ತರ್ಯ್ ಹ್ಯಾ ಗೊರ್ವಾಕ್ ಆಶಾಪಾಶಾ ನಾಸ್ತಾನಾ ಬಡಯ್ಲಾಂ ಮ್ಹಳ್ಳೆಂ ಮ್ಹಾಕಾ ಕಳ್ಳೆಂ. ಮ್ಹಕಾ ಪಳೆಲ್ಲೆಂಚ್ ತಾಚ್ಯಾ ದುಖಾಂಚೊ ಕಾಟ್ ತುಟ್ಲೊ.
ತೆಂ ಮ್ಹಾಕಾ ಕಿತೆಂ ತರ್ಯ್ ಸಾಂಗೊಂಕ್ ಆಶೆತಾ ತಶೆಂ ದಿಸ್ಲೆಂ.
ತಿತ್ಲೆಂಚ್!
ಗುಲಾಬಿಚ್ಯಾ ತೊಂಡಾ ಥಾವ್ನ್ ಉತ್ರಾಂ ಭಾಯ್ರ್ ಪಡ್ಲಿಂ ನಾಂತ್.
ಮ್ಹಜ್ಯಾ ಪಾಟ್ಲ್ಯಾನ್ ಮ್ಹಜಿ ಬಾಯ್ಲ್, ತಿಚ್ಯಾ ಅಂಬಡ್ಯಾ ಸಾರ್ಕ್ಯಾ ದೊಳ್ಯಾಂನಿ ಮ್ಹಾಕಾ ಪಾರೊತ್ ಕರುನ್ ಉಭಿ ಆಸ್ಲ್ಲಿ!
ಗುಲಾಬಿ ಮ್ಹಾಕಾ ಪಳವ್ನ್ ಆಸ್ಲ್ಲ್ಯಾ ಪರಿಂಚ್ ’ಸರ ಸರ’ ಕರುನ್ ಪಾಂಯ್ ವೊಡೀತ್ತ್ ಹಾಂವ್ ಥಂಯ್ ಥಾವ್ನ್ ಚಲ್ಲೊಂ.
ಆಫೀಸಾಕ್ ಪಾವ್ಲೆಲ್ಯಾ ಮ್ಹಾಕಾ ಮ್ಹಜ್ಯಾ ಫೈಲಾಂಚಾ ಪಾನಾ ಪಾನಾಂನಿ ಗುಲಾಬಿಚ್ ದಿಸೊಂಕ್ ಲಾಗ್ಲೆಂ. ತಾಚೆಂ ರಡ್ಕುರೆಂ ಮುಖಮಳ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ದೀನ್ಪಣಿ ಉಭೆಂ ಜಾಲೆಂ.
ದೊಳೆ ದಾಂಪುನ್ ಹಾಂವ್ ಚಿಂತುಂಕ್ ಪಡ್ಲೊಂ.
ವ್ಹಯ್! ಕಾಲ್ಚ್ಯಾ ರಾತಿಂ ಗುಲಾಬಿಚ್ಯಾ ಘರಾ ಮ್ಹಕಾ ಚಿಮ್ಣೆಚೊ ಉಜ್ವಾಡ್ ದಿಸೊಂಕ್ ನಾತ್ಲಲೊ. ಕಾಲ್ಚ್ಯಾ ರಾತಿಂ ಕಿತೆಂ ತರ್ಯ್ ಜಾಲಾಂ.
"ಹೆಂ ಚೆಡುಂ ಕಿತ್ಯಾಕ್ ಆಶೆಂಯ್ ತಕ್ಲಿ ಖಾತಾ....!? ಮತಿಂತ್ಚ್ ಸವಲ್ ಉಟ್ಲೆಂ. ತಕ್ಲಿ ತಾಪ್ಲಿ. ಮ್ಹಾಕಾ ಗುಲಾಬಿ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ದಿಸಾನಾತ್ಲ್ಲೆಂ. ಆಫೀಸಾಂತ್ ಬಸೊಂಕ್ ಮ್ಹಾಕಾ ಜಾಲೆಂ ನಾ. ಹಾಂವ್ ಆಫೀಸಾ ಥಾವ್ನ್ ಶೀದಾ ಘರಾ ಚಮ್ಕಾಲೊಂ.
ಘರ್ಚ್ಯಾ ವಾಟೆರ್ ಬಿಡಿಯೆ ಬ್ರ್ಯಾಂಚಾಚೊ ಅಬ್ಬು ಧಾಂವೊನ್ ಆಯ್ಲೊ.
"ರೊಕಿ ಪೊರ್ಬುಲೆ..." ತೊ ವ್ಹಳೂ ಉಲಯ್ಲೊ. "ಕೋಡೆ ಒಂಜಿ ಗಮ್ಮತ್ ಆಂಡ್ ಅತ್ತೆ!"
ಆಪ್ಲೆಂ ಬೊಕ್ಡೆಚೆಂ ಖಾಡ್ ಖೊರ್ಪಿಲೆಂ ತಾಣೆ.
ಮ್ಹಾಕಾ ಅಜ್ಯಾಪ್ ಜಾಲೆಂ. "ಕಿತೆಂ...?" ಹಾವೆಂ ವಿಚಾರ್ಲೆಂ.
"ಅವ್ವೇ ಪೊರ್ಬುಲೆ...!" ತಾಣೆ ಆರಂಭ್ ಕೆಲೆಂ. "ಆಲ್ ನಿಕ್ಲೆನಾ ನಿರೆತ್ತ ಆ ಪಬ್ಲಿಕ್ ಗುಲಾಬಿ ಉಲ್ಲಲ್ ಅತ್ತೆ...? ರಾತ್ರೆಡ್ ಆಲ್ ಎಂಕ್ಲೆನಾ ಬರಿತ್ತಾ ಇಲ್ಲದ ಒಂಜಿ ಕಿದೆಟ್ಟ್...." ಸಾಂಗೊಂಕ್ ಲಜೆಲೊ ತೊ.
ಕಾಂಯ್ ತರ್ಯ್ ವಿಶೇಸ್ ಆಸ್ತೆಲೆಂ. ಹಾಂವೆ ಚಿಂತ್ಲೆಂ.
"ವಿಣ್ಗೆಂಚ್ ಆಸ್ಲ್ಲೆಂ....! ಪಯ್ಲೆಂಚ್ ಚಂದ್ರನಾಚಿ ಗಡ್ಬಡ್. ತಾಚೆ ವಯ್ರ್ ಗೊರ್ವಾಂಚ್ಯೊ ಆರಬಾಯೊ. ಘರ್ಚಿಂ ಧಾಂವೊನ್ ಯೆತಾನಾ.... ಹೆಂ ಗುಲಾಬಿ ಥಂಯ್ ಗೊಟ್ಯಾಂತ್ ಪಡೊನ್ ಆಸಾ. ರಾಗಾನ್ ಸಗ್ಳ್ಯಾಂನಿ ಆಡ್ಬಟೆಂ ಬಡವ್ನ್, ಏಕ್ ಕಾಪಾಡ್ ನ್ಹೆಸವ್ನ್, ಹಾತ್ ಪಾಂಯ್ ಬಾಂದುನ್ ಘಾಲೆಂ. ಸಕಾಳಿಂ ಪೊಲಿಸಾಂಕ್ ದಿತಾಂ ಮ್ಹಣ್ತಾನಾ ಹಾಂವ್ ಥಂಯ್ ಪಾವ್ಲೊಂ. ಹಾವೆಂ ಹಾಚೆ ವಿಶಿಂ ತಾಂಕಾ ಖಬಾರ್ ಸಾಂಗ್ತಚ್ ತಾಣಿಂ ಹಾಕಾ ಸೊಡ್ಲೆಂ. ಛೆ! ಚಲಿಯಾಂನಿ ಇತ್ಲೆಂ ಪಾಡ್ ಜಾಂವ್ಕ್ ನಜೊ. ನ್ಹಂಯ್ ತರ್ ಮಾತ್ಯಾರ್ ತಿತ್ಲೊ ವೊತುನ್ ಘೆತ್ಲ್ಯಾರ್ ಆನಿ ಕಶೆಂ?" ಆಬ್ಬು ಆಪ್ಲ್ಯಾ ಲಜ್ಮಾಂಡ್ಯಾ ಹಾಸ್ಯಾಂನಿ ಉಲಯ್ಲೊ.
ತಿತ್ಲೆಂಚ್!
ಗುಲಾಬಿಚಿಂ ಚಿಂತ್ನಾಂ ತಕ್ಲೆಂತ್ ಆಟಯಿತ್ತ್ ಹಾವೆಂ ಘರ್ಚಿ ವಾಟ್ ದರ್ಲಿ.
***********
ಗುಲಾಬಿ ಹೀರೊಚ್ಯಾ ಮೊಡ್ಕುರ್ ಭುಜಾರ್ ಬಸ್ಲ್ಲೆಂ. ಮ್ಹಾಕಾ ಪಳೆತಾಚ್ ತೆಂ ಗಳ್ಗಳ್ಯಾಂ ರಡೊಂಕ್ ಲಾಗ್ಲೆಂ.
ಎಕಾ ಖಿಣಾಕ್ ಮ್ಹಾಕಾ ತಾಚೊ ರಾಗ್ ಆಯ್ಲೊ. ಮ್ಹಾಕಾ ತೆಂ ಆತಾಂ ಆಪ್ಣಾಚೆಂಚ್ ಮ್ಹಳ್ಳ್ಯಾ ಪರಿಂ ಭಗ್ಲೆಂ.
"ಗುಲಾಬಿ.....!" ಘರ್ಜಾಲೊಂ ಹಾಂವ್. "ಕಿತ್ಯಾಕ್ ಮಾನ್ ವಿಕ್ತಾಯ್...?" ತಿತ್ಲೆ ಪಯ್ಸ್ ಕಶೆಂ ತುಂ ಪಾವ್ಲೆಂಯ್? ಕಿತ್ಯಾಕ್ ಥಂಯ್ ಮೊರೊಂಕ್ ಗೆಲೆಂಯ್...?" ಮ್ಹಜೊ ರಾಗಾಚೊ ತಾಳೊ ಉಟ್ಲೊ.
"ಹಾಂವ್ ನೆಣಾಂ ಬಾಬಾ! ತ್ಯಾ ಗತಿರ್ ಹಾಂವ್ ಕಶೆಂ ಗೆಲಿಂ ಗೆಲಿಂ ತೆಂ ಹಾಂವ್ಚ್ ನೆಣಾಂ. ಬಾಬಾ ಹಾಂವ್ ಸತ್ತ್ ಸಾಂಗ್ತಾಂ ಹಾಂವ್ ಜಣಾಂ ಆಸೊನ್ ಥಂಯ್ ಪಾವೊಂಕ್ ನಾ....!" ಗುಲಾಬಿ ರಡ್ತಾಲೆಂ.
"ತುಂ ಪಾವೊಂಕ್ ನಾಂಯ್! ಪುಣ್ ತುಜ್ಯಾ ಮಾತ್ಯಾರ್ ಆಸ್ಲ್ಲ್ಯಾ ತ್ಯಾ ದೆಂವ್ಚಾರಾಚೆಂ ಹೆಂ ಕಾರ್ಬರ್...!" ಹಾಂವ್ ರಾಗಾನ್ ಬೊಬಾಟ್ತಾನಾ ಮ್ಹಜ್ಯಾ ಬಾಯ್ಲೆಚಿ ತಿಚ್ ಕಾಂಟಾಳ್ಯಾನ್ ಭರ್ಲೆಲಿ ದೀಶ್ಟ್ ಮ್ಹಾಕಾ ಪಳೆತಾಲಿ. ಬೋವ್ಶಾ ತಿಕಾ ಹಾವೆಂ ಆಶೆಂ ಬಾಂಯ್ಚಾ ಕಾಟ್ಯಾ ಲಾಗಿಂ ಸರ್ವಾಂ ಹುಜಿರ್ ಗುಲಾಬಿಲಾಗಿಂ ಉಲಂವ್ಚೆಂ ತಿಚ್ಯಾ ಮರ್ಯಾದೆಕ್ ಲ್ಹಾನ್ ಕರುಂಕ್ ಪಾವ್ಲ್ಲೆಂ. ಘರ್ಚ್ಯಾ ಆಂಗ್ಣಾಕ್ ದೆಂವ್ಲೆಲಿ ತಿ ಸರಾಂರಾಂ ಮ್ಹಜ್ಯೆ ಲಾಗಿಂ ಆಯ್ಲಿ.
"ಛಿ! ತುಕಾ ಮರ್ಯಾದ್ ನಾ...?" ಮ್ಹಳ್ಳ್ಯಾ ತಿಣೆ ಗುಲಾಬಿ ತೆವ್ಶಿಂ ಘುಂವೊನ್, "ಥೂ...." ಕರುನ್ ತಾಚ್ಯೆರ್ ಥಿಂಪಿ ಉಡಯ್ಲಿ. "ವಾಟೆ ವಯ್ಲ್ಯಾ..... ಬೇವಾ..... ರಾಂ....!" ತಿಚಿಂ ಉತ್ರಾಂ ಮ್ಹಜ್ಯಾ ಕಾನಾಂತ್ ಘಡ್ಗಡ್ಯಾ ಪರಿ ಘಾಜ್ಲಿಂ.
ತಿತ್ಲೆಂಚ್!
"ತೋಂಡ್ ಧಾಂಪ್.....!" ಮ್ಹಜೊ ಹಾತ್ ಎದೊಳ್ಚ್ ಮ್ಹಜ್ಯಾ ಬಾಯ್ಲೆಚೆರ್ ಉಟೊನ್ ರಾವ್ತಾನಾ....
"ಬಾಬಾ.....!" ಬೊಬಾಟುನ್ ಗುಲಾಬಿನ್ ಮ್ಹಾಕಾ ಆಡಾಯ್ಲೊ.
"ಛೆ...! ತುಂ ಏಕ್ ಸ್ತ್ರೀ?." ಹಾಂವ್ ಮ್ಹಜ್ಯಾ ಬಾಯ್ಲೆಚೆರ್ ಕಾಂಟಾಳ್ಳೊಂ. "ಸ್ತ್ರೀ ಜಾವ್ನ್ ಎಕಾ ಸ್ತ್ರೀಯೆಚೊ ಮಾನ್ ಕಾಡಿನಾಕಾ." ರಾಗಾಚ್ಯಾ ಆವೇಶಾನ್ ಹಾಂವ್ ಆತಾಂ ಉಲಯ್ಲೊಂ. "ಹ್ಯಾ ಗುಲಾಬಿಕ್...! ಹ್ಯಾ ಹಾಕಾ...." ಹಾವೆಂ ಆತಾಂ ಗುಲಾಬಿಚೊ ಹಾತ್ ಧರ್ಲೊ. ಗುಲಾಬಿಕ್ ಮ್ಹಜ್ಯಾ ಬಾಯ್ಲೆ ಮುಕಾರ್ ಹಾವೆಂ ಉಭೆಂ ಕೆಲೆಂ.
"ಹೆಂ ಗುಲಾಬಿ....," ಮ್ಹಜೊ ತಾಳೊ ರಾಗಾನ್ ಕಾಂಪ್ತಾಲೊ. "ಹೆಂ ಆಜ್ ಬೇವಾರ್ಸಿ ಚೆಡಿ ಜಾಂವ್ಕ್ ಕಾರಾಣ್ ಕೋಣ್ ಮ್ಹಣೊನ್ ತುಂ ಜಣಾಂಯ್...? ಹ್ಯಾ ಗುಲಾಬಿಕ್ ಚೆಡಿಯೆಪಣಾಖ್ ತಯಾರ್ ಕೆಲ್ಲ್ಯಾ ಹ್ಯಾ ದಾದ್ಲ್ಯಾ ವರ್ಗಾಕ್ ಆನಿ ಹ್ಯಾ ಸಮಾಜೆಕ್ ಪಾಟ್ ಥಾಪುಡ್ನ್ ಶಾಭಾಸ್ಕಿ ದಿಂವ್ಚ್ಯಾ ತುಜ್ಯಾ ತಸಲ್ಯಾ ಜಾತಿಕ್ ದಿಕ್ಕಾರ್! ತುಜೆ ತಸಲ್ಯಾ ಸ್ತ್ರೀ ಜಾತಿಕ್ ಆಕ್ಮಾನ್!" ಹಾಂವ್ ಬೊಬಾಟ್ತಾಲೊಂ.
"ಆಶೆಂ ಕರುನ್ ತುಮಿ ತಾಕಾ ಧರ್ಣಿಕ್ ಮಾರ್ಲೆಂ. ಉಡಾಸ್ ದವರ್...! ತುಜ್ಯಾ ಘೊವಾಕ್ ತುಂ ರಾಕ್ತಾಯ್ ಮ್ಹಣೊನ್ ಹಾಂವ್ ನಿತಳ್ ನ್ಹಂಯ್? ಮ್ಹಾಕಾ ಮ್ಹಜಿ ಭಗ್ಣಾಂ ಆಸಾರ್. ಚಿಂತ್ನಾಂ ಆನಿ ಬರೆಂ ಕಾಳಿಜ್ ಆಸಾ. ತಾಚೆಂ ಪ್ರೇರಣ್ ಮ್ಹಾಕಾ ಜಾಯ್!" ಮ್ಹಜಿ ಬಾಯ್ಲ್ ಹಾವೆಂ ಉಲಂವ್ಚೆ ಆಯ್ಕಾತಾಲಿ ಶಿವಾಯ್ ತಿಚ್ಯಾ ತೊಂಡಾ ಥಾವ್ನ್ ಎಕ್ಚ್ ಏಕ್ ಉತಾರ್ ಪಾಸೊನ್ ಸುಟ್ಲೆಂ ನಾ.
"ಗುಲಾಬಿ ಮ್ಹಜ್ಯಾ ಭಯ್ಣಿ ಸಾರ್ಕೆಂ ಮ್ಹಜ್ಯಾ ಉಸ್ಕ್ಯಾರ್ ಬಸವ್ನ್ ಹಾವೆಂ ತಾಕಾ ಖೆಳಯಿಲ್ಲೆಂ.... ಮ್ಹಜ್ಯಾ ದೊಳ್ಯಾಂ ಮುಕಾರ್ ತೆಂ ಚಲೊಂಕ್ ಶಿಕ್ಲ್ಲೆಂ... ಆವಯ್ ಬಾಪಯ್ ಥಾವ್ನ್ ಕಾವ್ಜೆವ್ನ್ ತೆಂ ಆಮ್ಚ್ಯಾ ಘರಾ ಧಾಂವೊನ್ ಯೆತಾಲೆಂ....." ಮ್ಹಜೊ ತಾಳೊ ಆತಾಂ ಗದ್ಗದೀತ್ ಜಾತಾಲೊ. "ತಾಚೆಂ ಜೀವನ್ ಚಿಂತುನ್ ತಾಕಾ ಏಕ್ ಬರಿ ವಾಟ್ ದಾಖಂವ್ಚಿ ಸೊಡುನ್....." ಮುಕಾರ್ ಮ್ಹಾಕಾ ಉಲಂವ್ಕ್ ಆವ್ಕಾಸ್ ದೀನಾಸ್ತಾನಾ ಮ್ಹಜಿ ಬಾಯ್ಲ್ ಮ್ಹಾಕಾ ಥಂಯ್ಚರ್ಚ್ಚ್ ಸೊಡುನ್ ಘರಾ ತೆವ್ಶಿಂ ಚಲ್ತೆಚ್ ರಾವ್ಲಿ.
*********
"ಬಾಬಾ... ತುಂ ಕಾಣಿಯೊಂ ಬರಯ್ಣಾರ್. ಮ್ಹಜಿ ಕಾಣಿ ತುಂ ಕೆದಾಳಾ ಬರಯ್ತಾಯ್....?"
ಗುಲಾಬಿಚೆಂ ಹೆಂ ಸವಾಲ್ ಸದಾಂಚೆಂ ಜಾಲ್ಲೆಂ. ಪೂಣ್ ಹ್ಯಾ ದಿಸಾಂನಿ ತಾಚ್ಯೆ ಆಪ್ಲ್ಯಾ ಕಾಣಿಯೆ ವಿಶ್ಯಾಂತ್ ಕರ್ಕರೆ ವಾಡ್ಲೆ.
ಸಭಾರ್ ತೆಂಪಾ ಥಾವ್ನ್ ಮ್ಹಜಿ ಲಿಖ್ಣಿ ಭಂಧ್ ಪಡ್ಲ್ಲಿ. ಲಿಖ್ಣೆಕ್ ಜಿವೆಂಪನ್ ದೀಂವ್ಕ್ ಜಾಯ್ ಮ್ಹಳ್ಳ್ಯಾ ಎಕಾಚ್ಚ್ ಇರಾದ್ಯಾನ್ ಬರಯಿಲ್ಲಿ ಏಕ್ ಕಾಣಿ ಮ್ಹಜ್ಯಾ ಲಿಖ್ಣೆಕ್ ಮ್ಹಾರಗ್ ಪಡೊನ್ ಎಕಾ ಇಶ್ಟಾಗತೆಚ್ಯಾ ಸಂಭಂಧಾಕ್ ತುಟವ್ನ್ ಉಡಂವ್ಕ್ ಪಾವ್ಲ್ಲಿ. ಹ್ಯಾಚ್ ಖಾತಿರ್ ಆತಾಂ ಹಾವೆಂ ಲಿಖ್ಣೆಂತ್ ಜಾಗ್ರುತ್ಕಾಯ್ ಸಾಂಬಾಳ್ಲ್ಲಿ. ಚೊರಾಚೆಂ ಮನ್ ಕೆದ್ನಾಂಯ್ ದುಭಾವಿ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಸ್ವಾರ್ಥ್ ಸಾಧನಾಚ್ಯಾ ಉದ್ದೇಶಾಕ್ ಬರೊ ಬಾಂಧ್ ಕುಡ್ಕೆ ಕರುನ್ ಆಪ್ಲೆಂ ಸ್ವಾರ್ಥಿ ಪೋಟ್ ಭರ್ಚ್ಯಾ ಆಬ್ಲೆಸಿ ಮನ್ಶ್ಯಾ ಥಾವ್ನ್ ಸಮಾಧಾನ್ ಕೆದಾಳಾ ಸಾಂಡುಂಕ್ ಪಾವ್ಲ್ಲೊ, ತ್ಯಾ ದಿಸಾ ಥಾವ್ನ್ ಲಿಖ್ಣಿಂ ಮ್ಹಜ್ಯಾ ಹಾತಾ ಥಾವ್ನ್ ಲಿಖುಂಕ್ ಜಾಲಿ ನಾ.
"ಬಾಬಾ.... ತುಂ ಮ್ಹಾಕಾ ಜಾಣಾಂಯ್! ತುಕಾ ಮ್ಹಜಿ ಕಾಣಿ ಬರಂವ್ಕ್ ಭಿರಾಂತ್ ಕಿತ್ಯಾಕ್? ಮ್ಹಜಿ ಕಾಣಿ ಕೊಣಾಯ್ಕ್ಯೀ ಪಸಂದ್ ಜಾಂವ್ಚಿ ನಾ ಮ್ಹಳ್ಳಿ ಖಂತ್.....? ವಾ ಹ್ಯಾ ವಾಟ್ ಚುಕ್ಲೆಲ್ಯಾಚಿ ಕಾಣಿ ಬರಯ್ಲ್ಯಾರ್ ತುಜ್ಯಾ ಘನಾನ್ ಆಕ್ಮಾನ್ .....?" ಗುಲಾಬಿ ಮ್ಹಾಕಾ ಸವಾಲಾಂನಿ ಸತಾಯ್ತಾಲೆಂ. ಪುಣ್ ತಾಕಾ ಹಾಂವ್ ಕಶೆಂ ಸಮ್ಜಾಂವ್ ಹ್ಯಾ ಉಸ್ಕ್ಯಾರ್ ಖಳಯಿಲ್ಲ್ಯಾ ತ್ಯಾ ನೆಣ್ತ್ಯಾ ಗುಲಾಬಿಕ್ ... ಪಯ್ಲೆಂಚ್ ಸರ್ವಾಂನಿ ಪಾಕ್ಳ್ಯೊ ಪಾಕ್ಳ್ಯೊ ಸೊಡವ್ನ್ ಸಂಸಾರಾ ಮುಕಾರ್ ಉಗ್ತೆಂ ಕೆಲ್ಲ್ಯಾ ಗುಲಾಬಿಕ್ ಹಾಂವ್ ತ್ಯಾ ಪತ್ರಾಂಚಾ ಪಾನಾರ್ ನವ್ಯಾನ್ ಕಶೆಂ ಉಗ್ತೆಂ ಕರುಂಕ್ ಸಕ್ತಲೊಂ.
"ಮ್ಹಜಿ ಕಾಣಿ ತ್ಯಾ ಪತ್ರಾಂನಿ ಪಾಯ್ಸ್ ಜಾಂವ್ಚಿ ನಾ...? ಪತ್ರಾಂಚೆ ತುಜ್ಯಾ ಕಾಣಿಯೆಕ್ ಪಳವ್ನ್ ಹಾಸ್ತೆಲೆ...?" ಗುಲಾಬಿಚಿಂ ತಿಂಚ್ ಸವಾಲಾಂ.
"ತುಜಿ ಕಾಣಿ ಬರಯ್ಲ್ಯಾ ಮ್ಹಣೊನ್ ತುವೆಂ ಮ್ಹಜ್ಯೆರ್ಚ್ ಕೇಸ್ ಕೆಲ್ಯಾರ್...!" ಹಾಂವ್ ಹಾಸ್ಲೊಂ.
"ಮ್ಹಜೆಂ ಜಿವಿತ್ಚ್ ಇತ್ಲಿ ವ್ಹಡ್ಲಿ ಕೇಸ್ ಜಾಲ್ಯಾ ಮ್ಹಣ್ತಾನಾ..... ಹಾಂವ್ ತುಜ್ಯೆ ವಯ್ರ್ ಕಸಲಿ ಕೇಸ್ ಕರುಂ ಬಾಬಾ!" ಗುಲಾಬಿಚಿಂ ಉತ್ರಾಂ ಮ್ಹಾಜೆಂ ಕಾಳಿಜ್ ಶಿಂದ್ತಾಲಿಂ. ಹಾಂವ್ ಕಾಂಯ್ ಉಲಯ್ಲೊಂ ನಾ. ತಾಚ್ಯಾ ತೊಂಡಾರ್ ಏಕಾ ವಿಚಿತ್ರ್ ರಿತಿಚಿಂ ಭಾವನಾಂ ಉದೆಲಿಂ. ಗುಲಾಬಿಕ್ ಅಸಲ್ಯಾ ಭಾವನಾಂನಿ ಹಾವೆಂ ಎದೊಳ್ ಪಳೆಲ್ಲೆಂ ನಾ.
"ತರ್ ಹಾಂವ್ ಮೆಲ್ಯಾ ಉಪ್ರಾಂತ್ ಮ್ಹಜಿ ಕಾಣಿ ಬರಯ್. ತೆದ್ನಾ ವಿಚಾರುಂಕ್ ಹಾಂವ್ ಆಸ್ಚಿಂ ನಾ....!" ಗುಲಾಬಿನ್ ಆಪ್ಲ್ಯಾ ವೊಂಟಾನಿ ಭಲಾತ್ಕಾರೆನ್ ಹಾಸೊ ಹಾಡಂವ್ಕ್ ಪ್ರಯತ್ನ್ ಕೆಲೆಂ. ಪೂಣ್ ತೆಂ ತಾಂತುಂ ಸಲ್ವಾಲ್ಲೆಂ. ತಾಚೆ ತೆ ಗುಲೊಬಾ ಸಾರ್ಕ್ಯಾಚೆ ವೋಂಟ್ ಆಜ್ ಪಯ್ಲೆ ಪಾವ್ಟಿಂ ಮ್ಹಜ್ಯಾ ಮುಕಾರ್ ಆಪ್ಲ್ಯೊ ಪಾಕ್ಳ್ಯೊ ಫುಲಂವ್ಕ್ ಸಲ್ವಾಲ್ಲೆ. ತಿತ್ಲೆಂಚ್.....!
ಗುಲಾಬಿಕ್ ಆತಾಂ ತಡ್ವೊಂಕ್ ಜಾಲೆಂ ನಾಂ. ತೆಂ ಮ್ಹಜ್ಯಾ ಮುಕ್ಲೆಂ ವಚೊನ್ ತ್ಯಾ ಬಾಂಯ್ಚಾ ಕಾಟ್ಯಾರ್ ಬಸ್ಲೆಂ.
ಹ್ಯಾ ಉಪ್ರಾಂತ್ ಬಾಂಯ್ಚೊ ಆನಿ ಗುಲಾಬಿಚೊ ಸಂಭಂಧ್ ವಾಡ್ಲೊ.
ದೀಸ್ ವೆತಾಂ ವೆತಾಂ ತೊ ಚಡ್ಲೊ ಆನಿ ಸ್ಥಿರ್ ಜಾಲೊ.
ಆತಾಂ ಗುಲಾಬಿ ಆಪ್ಲ್ಯಾ ಗಿರಾಯ್ಕಾಂಕ್ ರಾಕೊನ್ ರಾಂವ್ಚೆಂ ಸ್ಟೇಶನ್ ಹೆಂ ಬಾಂಯ್ಚೆಂ ಕಾಟೆಂ. ಆತಾಂ ಹೊಚ್ ತಾಚೊ ಠಿಕಾಣೊ!
ದಾಂಡೊ ನಾತ್ಲ್ಲಿ ಬಾಂಯ್! ವಿಚಾರ್ ನಾತ್ಲ್ಲೆಂ ಗುಲಾಬಿ! ಹ್ಯಾ ದೊಗಾಂ ಮಧೆಂ ಕಸಲೊ ಸಂಭಂಧ್? ಫಕತ್ತ್ ಗುಲಾಬಿ ಮಾತ್ರ್ ಜಣಾ.
ಆತಾತಾಂ ಗುಲಾಬಿಚಿ ಗತ್ ಭೋವ್ ಕಳ್ವಳ್ಯಾಂಚಿ ಜಾಲಿ.
ಭಂವ್ತಣಿಚ್ಯಾ ವಠಾರಾಂತ್ ಸಮಾಧಾನ್ ನಾ ಜಾಲೆಂ.
ಪಿಯೆವ್ನ್ ಲೇಲೆ ಘಾಲ್ಚೆ, ಆನಿ ರಸ್ತೊ ಮೆಜ್ಚೆ ದಾದ್ಲೆ ವಾಡ್ಲೆ.
ಗುಲಾಬಿಚಿ ಸೊಭಾಯ್ ಜಿರ್ಲಿ.
ಶಿರೊ ಹರ್ಯೆಕ್ ಘಡಿ ಆಮಾಲ್ ಮಾಗೊಂಕ್ ಲಾಗ್ಲ್ಯೊ.
ಮತ್ ಥಿರಾರ್ ನಾ ಜಾಲಿ.
ಹ್ಯಾ ಮಧ್ಲಿ ತಿ ರಾತ್!
ತ್ಯಾ ರಾತಿಂ ಕಿಡೆಕಿಡೆರ್ಯಾಂಚಿ ಆನಿ ಸುಣ್ಯಾಂಚಿ ಬೋಬ್. ಚಾಂದ್ನ್ಯಾಚಿ ಜಳಕ್ ನಾ!
ಹ್ಯಾ ವೆಳಾರ್.....
ಭಾಯ್ರ್ ಥಾವ್ನ್ ವ್ಹಡ್ಲೊ ಏಕ್ ಆವಾಜ್!
ಅರ್ಧ್ಯಾ ನಿದೆಂತ್ಲೊ ಹಾಂವ್ ಉಟೊನ್ ಬಸ್ಲೊ. ಮ್ಹಜಿ ಬಾಯ್ಲ್ ಎದೊಳ್ಚ್ ನಿದೆಕ್ ವೆಂಗ್ಲ್ಲಿ. ಮ್ಹಜ್ಯಾ ಕಾಳ್ಜಾಂತ್ ದಡ್ದಡೆ ಉಟ್ಲೆ. ಹಾವೆಂ ಬಾಯ್ಲೆಕ್ ಜಾಗಯ್ಲೆಂ.
ಹಾಂವ್ ಆತಾಂ ಭಾಯ್ರ್ ದಾಂವ್ಲೊಂ. ಹಾಂವ್ ಜಣಾಂ ಆವಾಜ್ ಖಂಯ್ ಥಾವ್ನ್ ಆಯಿಲ್ಲೊ ತೊ.
ಹಾವೆಂ ಬೊಬೊ ಮಾರ್ಲ್ಯೊ.
ಸೆಜಾರ್ಚಿಂ ಉಟೊಣ್ ಧಾಂವೊನ್ ಆಯ್ಲಿಂ.
ಲೈಟಾಚಾ ಉಜ್ವಾಡಾಂತ್ ಹಾಂವ್ ಬಾಂಯ್ ತೆವ್ಶಿಂ ಧಾಂವ್ಲೊ.
"ಕೋಣ್ ತರ್ಯ್ ಬಾಂಯ್ತ್ ಪಡ್ಲಾ" ಹಾಂವ್ ಬೊಬೊ ಮಾರ್ತಾಲೊಂ
ಲೈಟಾಚಾ ಉಜ್ವಾಡಾಂತ್ ಭಿತರ್ ಫಕತ್ತ್ ಹಾಲ್ಚೆಂ ಉದಾಕ್ ಶಿವಾಯ್ ದುಸ್ರೆಂ ಕಾಂಯ್ ದಿಸ್ಲೆಂ ನಾ.
ಹ್ಯಾ ರಾತಿಕ್ ಬಾಂಯ್ಕ್ ದೆಂವ್ತಲೊ ಕೋಣ್? ಕೊಣ್ಯ್ ನಾ ಜಾಲೊ!
ಧಾ ಬಾರಾ ಟಾರ್ಚ್ ಪೆಟ್ಲೆ. ಬಾಂಯ್ ಭಿತರ್ ತಾಂಚೊ ಉಜ್ವಾಡ್ ಭರ್ಲೊ.
ತ್ಯಾ ಉಜ್ವಾಡಾಂತ್ ಎದೊಳ್ ಹಾಲೊನ್ ಆಸ್ಲ್ಲೆಂ ಉದಾಕ್ ಸವ್ಕಾಸ್ ಥಂಡ್ ಜಾಂವ್ಚೆಂ ದಿಸ್ಲೆಂ.
ಕೊಣೆ ಎಕ್ಲ್ಯಾನ್ ಪೊಲಿಸಾಂಕ್ ಆನಿ ಫಾಯರ್ ಸರ್ವೀಸಾಕ್ ಪೋನ್ ಕೆಲೆಂ.
ಪೊನಾಂ ಜೆಮೆಂತ್ ಘೊರೆತಾಲಿಂ!
ದುಸ್ರ್ಯಾ ದಿಸಾ ಸಕಾಳಿಂ....!
ಫಾಯರ್ ಸರ್ವಿಸಾಚೆ ಕಾರ್ಯಾಕ್ ದೆಂವ್ಲೆ.
ಬಾಂಯ್ಚ್ಯಾ ಥಳಾಂತ್ ಮೊಗಾನ್ ಸಂಸಾರಾಕ್ ವಿಸ್ರೊನ್ ವಿಶೆವ್ ಘೆಂವ್ಚಾ ಕುಡಿಕ್ ವಯ್ರ್ ಕಾಡ್ಲಿ.
ವ್ಹಯ್!
ಗುಲಾಬಿ! ಗುಲಾಬಿನ್ ಆಪ್ಲ್ಯಾ ಮೊಗಾಚ್ಯಾ ಬಾಂಯ್ ಸಾಂಗಾತಾ ಎಕ್ವಟ್ ಜೊಡ್ಲ್ಲೊ. ಸಾಸ್ಣಾಚಾ ಸಾಸ್ಣಾಕ್...!
ಕೊಣಾಯ್ಚಾ ದೊಳ್ಯಾಂನಿ ದುಖಾಂ ದೆಂವ್ಲಿಂ ನಾಂತ್.
ತಾಚ್ಯಾ ಕುಡಿಕ್ ಬೊಕೊರ್ನ್ ಕೆಲ್ಲೆ ಸಗ್ಳೆ ಪಾಟಿಂ ನಿಸ್ರಾಲೆ.
ತಾಚ್ಯಾ ಕುಡಿರ್ ಆಪ್ಲೊ ಘಾಮ್ ಜಿರವ್ನ್ ಸಪ್ಣೆಲ್ಲೆ ಆತಾಂ ತಾಚಿಂ ಖೆಳ್ಕುಳಾಂ ಕರಿಲಾಗ್ಲೆ.
ರಾತ್ಭರ್ ತಾಚ್ಯಾ ವೆಂಗೆಂತ್ ಪಿಂರ್ಗಾಲ್ಲೆ ಆತಾಂ ತಾಚ್ಯಾ ಮೊರ್ನಾಂತ್ ಸಂತೊಸ್ ಉಚಾರುಂಕ್ ಲಾಗ್ಲೆ.
ಇತ್ಲೆಂ ಜಾಲ್ಯಾರ್ಯೀ....
ಸದಾಂ ಗುಲಾಬಿನ್ ಖಾವ್ನ್ ಉಡಯಿಲ್ಲೆಂ ಉಶ್ಟೆಂ ಖಾವ್ನ್ ಮೌನ್ಪಣಿಂ ರುಕಾ ಥಾವ್ನ್ ರುಕಾಕ್ ಉಡೊನ್ ಧಾಂವ್ಚೊ ಕಾವ್ಳೊ ಮಾತ್ರ್,
ಕಸಲ್ಯಾಗೀ ಧಯ್ರಾನ್ ಮ್ಹಳ್ಳ್ಯಾ ಪರಿಂ ತ್ಯಾ ಬಾಂಯ್ಚಾ ಕಾಟ್ಯಾರ್ ಬಸೊನ್ ಬೊಬೊ ಮಾರಿಲಾಗ್ಲೊ.
ಹಾವೆಂ ತ್ಯಾ ಕಾವ್ಳ್ಯಾಕ್ ಏಕ್ ಪಾವ್ಟಿಂ ಆನಿ ಹ್ಯಾ ಸಂಸಾರಾಕ್ ವಿಸ್ರೊನ್ ನಿದ್ಲೆಲ್ಯಾ ಗುಲಾಬಿಕ್ ಏಕ್ ಪಾವ್ಟಿಂ ಪಳೆಲೆಂ.
ಗುಲಾಬಿಚಾ ಮೊಡ್ಯಾ ಲಾಗ್ಸಾರ್ ಆತಾಂ ಉರ್ಲೆಲೆ ಮ್ಹಳ್ಯಾರ್ ಹಾಂವ್ ಕಾವ್ಳೊ ಆನಿಂ ಮ್ಹಜಿ ಬಾಯ್ಲ್.
ಫಾಯರ್ ಸರ್ವಿಸಾಚೆ ಪಯ್ಸ್ ಬಸ್ಲೆಲೆ. ತೆ ಪೊಲಿಸಾಂಕ್ ರಾಕ್ತಾಲೆ.
"ತುಜಿ ಕಾಣಿ ಹಾಂವ್ ಬರಯ್ತಲೊಂ ಗುಲಾಬಿ!" ಹಾಂವ್ ಉದ್ಗಾರ್ಲೊ.
ಪೊಲಿಸ್ ಯೇವ್ನ್ ಗುಲಾಬಿಚಿ ಕೂಡ್ ವರುನ್ ಗೆಲೆ.
ಹಾಂವ್ ಆತಾಂ ಆಪ್ಲ್ಯಾ ಘರಾ ತೆವ್ಶಿಂ ಚಮ್ಕಾಲೊ.
ಏಕ್ ಪಾವ್ಟಿಂ ತ್ಯಾ ಗುಲಾಬಿಕ್ ವಿಶೆವ್ ದಿಲ್ಲ್ಯಾ ತಾಚ್ಯಾ ಮೊಗಾಚ್ಯಾ ಬಾಂಯ್ಕ್ ಪಳಂವ್ಕ್ ಮ್ಹಾಕಾ ಮನ್ ಜಾಲೆಂ. ಹಾಂವ್ ಪಾಟಿಂ ಘುಂವ್ಲೊಂ.
ಗಯ್ರೆ ಗಯ್ರೆ ಜಾಲ್ಲ್ಯಾ ಮ್ಹಜ್ಯಾ ದೊಳ್ಯಾಂಕ್ ತ್ಯಾ ಬಾಂಯ್ಚಾ ಕಾಟ್ಯಾರ್ ಚಲೊನ್ ಆಸ್ಚೆಂ ಗುಲಾಬಿ ಮಸ್ಕ್ ಮಸ್ಕ್ ದಿಸ್ಲೆಂ.... ಹಾವೆಂ ದೊಳೆ ಘಷ್ಟಿಲೆ.... ದೊಳ್ಯಾಂಚಿಂ ದುಖಾಂ ರಾವ್ಲಿಂ ನಾಂತ್. ಮ್ಹಜ್ಯಾ ಕಾನಾಂಕ್ ಫಕತ್ತ್ ತ್ಯಾ ಕಾವ್ಳ್ಯಾಚಿ ಬೋಬ್ ಆಯ್ಕತಾಲಿ.....
ಮ್ಹಾಕಾ ಸಮ್ಜಾಲೆಂ ನಾ ಹೊ ಕಾವ್ಳೊ ತ್ಯಾ "ಬಾಂಯ್ ಆನಿ ತೆಂ...." ಕಾಣಿಯೆಕ್ ಸಂಸಾರಾಕ್ ಸಾಂಗ್ತಾ, ವಾ, ತೊ ದಾರಾಂ ದಾಂಪುನ್ ನಿದ್ಲೆಲ್ಯಾ ಹ್ಯಾ ಸಮಾಜೆಕ್ ಜಾಗಂವ್ಚೆಂ ಪ್ರಯತ್ನ್ ಕರ್ತಾ?
ಕಾವ್ಳ್ಯಾ ತಾಳ್ಯಾಕ್ ಪಾರ್ಕಿಲ್ಲೊಂ ಹಾಂವ್ ಆತಾಂ ಬರಂವ್ಕ್ ಬಸ್ಲೊಂ. "ಬಾಂಯ್ ಆನಿ ತೆಂ...!"
ಗುಲಾಬಿಚಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
