ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ದೋನ್ ಉತ್ರಾಂ ಕಾಳ್ಜಾಚಿಂ
[ಕವಯತ್ರಿ ನಿರ್ಮಲಾ ಗೋವಿಯಸಾಚ್ಯಾ ’ಮೆಲಿಸ್ಸಾ ಅಮರ್ ಜಾ’ ಕವಿತೆಚೆರ್ ಪ್ರೇರಿತ್ ಜಾವ್ನ್ ಬರಯಿಲ್ಲಿಂ ದೋನ್ ಉತ್ರಾಂ ಹಿಂ]
- ಚೇತನ್ ಕಾಪುಜಿನ್
[ಚೇತನ್ ಕಾಪುಜಿನ್ ಮ್ಹಳ್ಳ್ಯಾ ಲಿಖ್ಣೆಂ ನಾಂವಾನ್ ಫಾಮಾದ್ ಜಾಲ್ಲೊ ಮಾ|ಚೇತನ್ ಲಿಯೊ ಲೋಬೊ, ಸೆವಕ್ ಪತ್ರಾಚೊ ಸಂಪಾದಕ್ ಜಾವ್ನ್ ವಾವ್ರ್ ಕರ್ನ್ ಆನ್ಭೋಗಿ ಮಾತ್ರ್ ನ್ಹಂಯ್, ಸಭಾರ್ ಲೇಖನಾಂ, ಕಾಣ್ಯೊ, ಕವಿತಾಂ, ತಶೆಂಚ್ ಅನುವಾದ್ ಹಾಣೆಂ ಕೆಲ್ಯಾಂತ್. ಪ್ರಸ್ತುತ್ ರೊಮಾಂತ್ ಸೆವಾ ದೀವ್ನ್ ಆಸ್ಚೊ ಹೊ ಗೂಂಡ್ ಚಿಂತ್ಪಿ ತಶೆಂಚ್ ಕೊಂಕ್ಣಿ ಸಾಹಿತ್ಯಾಚಿ ಅಭಿರುಚ್/ಹುಸ್ಕೊ ಆಸ್ಚೊ. ಫುಡೆಂಯ್ ಹಾಚೆಥಾವ್ನ್ ಅಸಲಿಂಚ್ ಪ್ರಭುದ್ದ್ ಬರ್ಪಾಂ ದಾಯ್ಜಾಚೆರ್ ವ್ಹಾಳೊನ್ ಯೇಂವ್ ಮ್ಹಣ್ ಆಶೆತಾಂವ್]
ದುಕ್ಲ್ಲ್ಯಾ ಕಾಳ್ಜಾಂಕ್ ಥೊಡಿ ಥಂಡಾಯ್ ದಿಂವ್ಚ್ಯಾ ಭರ್ವಸ್ಯಾನ್...
‘ತಿಂತಾನ್ ಕಾಗ್ದಾ ಪೊಲಿಯೆಚೆರ್ ಬರಯಿಲ್ಲೆಂ ತರ್, ಉಮಾಳ್ಚ್ಯೊ ದುಕಾಝರಿ ಬರಯಿಲ್ಲೆಂ ತೀಂತ್ ಇರಾಶೆಂ ಕರ್ತ್ಯೊ ಆಸ್ಲ್ಲ್ಯೊ’ಮ್ಹಳ್ಳೆಂ ಚಿಂತಾಪ್ ಮೊಜೆಥಂಯ್ ಆಪಾಪಿಂಚ್ ಉದೆಲೆಂ, ಅಂತರ್ಲ್ಲ್ಯಾ ದಾಕ್ಟುಲ್ಯಾ ಮೆಲಿಸ್ಸಾಖಾತಿರ್ ತಾಚೆಚ್ ಮೊಗಾಳ್ ಆವಯ್ನ್ ಆಪ್ಲಿಂ ಕಾಳ್ಜಾಚಿಂ ಭೊಗ್ಣಾಂ ಉಚಾರ್ಲ್ಲೆಂ ಕಾವ್ಯೆಂ ವಾಚ್ತಾನಾ.
ಮನ್ಶ್ಯಾಕ್ ಅಪ್ಲ್ಯಾ ಭಾವಾರ್ಥಾಚಿ ಗುಂಡಾಯ್ ದೆಖೊಂಕ್ ಮೆಳ್ಚಿ, ಲ್ಹಾನ್ಪಣಾರ್ ಬಾಯ್ಪಾಟ್ ಶಿಕ್ಲ್ಲೆಂ "ಸತ್ಮಾನ್ತಾಂ" ಮಾಗ್ಣೆಂ ಮ್ಹಣ್ತಾನಾ ನ್ಹಯ್, ಜಿಣಿಯೆಚ್ಯಾ ಸಂದಿಗ್ದ್ ಘುಂವ್ಡೆಂನಿ, ಕಟೀಣ್ ವಿಂಚವ್ಣ್ಯೊ ಕರುಂಕ್ ಪಡ್ತಾನಾ, ಆನಿ ಹ್ಯಾ ಘಡಿಯಾಂನಿ "ದೆವಾನ್ ಆನಿ ಮನ್ಶ್ಯಾನ್ ಮ್ಹಜೊ ಹಾತ್ ಸೊಡ್ಲಾ" ಮ್ಹಣ್ ಭಗ್ತಾನಾ. ಹ್ಯಾ ವೆಳಾರ್, ಕೊಣಿ ದೆಧೆಸ್ಪ್ರಾರ್ ಜಾವ್ನ್, ದೆವಾಕ್ ಆನಿ ಮನ್ಶ್ಯಾಕ್ ಶಿರಾಪ್ ಘಾಲುಂಕ್ಯಿ ಸಕ್ತಾ ವಾ "ಆಪ್ಲ್ಯಾ‘ಭಾವಾರ್ಥಾಚೆ ಗುಂಡಾಯೆಕ್ ಮೀತ್ ನಾ" ಮ್ಹಳ್ಳೆಂ ದಾಕುಂಕ್ಯಿ ಸಕ್ತಾ. ಹ್ಯೊ ಘಡಿಯೊ ಎಕ್ಲ್ಯಾಚ್ಯಾ ಖರ್ಯಾ ಭಾವಾರ್ಥಾಚೆಂ ಮೆಜಾಪ್(?)ಯಿ ಮ್ಹಣ್ಯೆತ್.
ದಾಕ್ಟುಲೆಂ ಬಾಳ್ ಮೆಲಿಸ್ಸಾಚಿ ಆವಯ್ ನಿರ್ಮಲಾ ಬಾಯೆಚ್ಯಾ ಉತ್ರಾಂನಿ ಹಿ ಗುಂಡಾಯ್ ದಿಸುನ್ ಯೆತಾ. ದೆವಾಕ್ ಆನಿ ಮನ್ಸ್ಯಾಕ್ ದುರ್ಸೊಂಕ್ ತಿಕಾ ಹಜ಼ಾರ್ ಕಾರಣಾಂ ಆಸಾತ್ ತರಿ.. ತಿ ದುರ್ಸಾನಾ. "ದೆವಾನ್ ದಿಲೆಂ ದೆವಾನ್ ವೆಲೆಂ, ತಾಚೆಂ ನಾಂವ್ ವರ್ತೆಂ ಜಾಂವ್" ಮ್ಹಳ್ಳಿಂ ಜೊಬ್ ಪಾತ್ರಿಯಾರ್ಕಾಚಿಂ "ನಿರ್ಜೀವ್" ಉತ್ರಾಂ ಹ್ಯಾ ಕಾವ್ಯಾಳ್ ಉತ್ರಾಂನಿ ಜಿವಾಳ್ ಜಾಲ್ಯಾಂತ್. ತಿಣೆಂಚ್ ಸಾಂಗ್ಚೆಬರಿ, ಹೆಂ ಕಾವ್ಯೆಂ ಏಕ್ ಭೊಗ್ಣಾ ಭಂಡಾರ್ ಆನಿ ಹೆಂ ದಿರ್ವೆಂ ದಾಕ್ಟುಲ್ಯಾ ಮೆಲಿಸ್ಸಾಕ್ ಪಾವ್ತೆಲೆಂ ಮ್ಹಳ್ಳೆಂ ಘಟ್ ಧಯ್ರ್ ತಿಚೆಂ. ಹೆಂ ಭರ್ವಸೊ ಫಟ್ಕಿರೊ ನ್ಹಯ್, "ಮೊಗಾಕ್ ಮರಣ್ ನಾ" ಸಾಂಗ್ತಾ ಭಾವಾರ್ಥಾಚೆಂ ಭಂಡಾರ್ ಪವಿತ್ರ್ ಪುಸ್ತಕ್.
ಆಂಜಾಂ ಸಂಗಿಂ ಖೆಳ್ಚಿ ಆಶಾ ಕೊಣಾಕ್ ನಾ? ಸಾಂತಾಂ ಭಕ್ತಾಂಚ್ಯಾ ಮೆಳಿಂತ್ ರಾವುಂಕ್ ಕೊಣಾಕ್ ಮನ್ ನಾ? ನೆಕೆತ್ರಾಚಿ ಬಾಳ್ವಿ ಜ಼ೊಡುಂಕ್ ಕೊಣಾಕ್ ಖುಶಿ ನಾ?- ಅಂತರ್ಲೆಲ್ಯಾ ಬಾಳ್ ಮೆಲಿಸ್ಸಾಖಾತಿರ್ ಕ್ಲೆರೆನ್ಸಾನ್ ಲಿಕ್ಲ್ಲ್ಯಾ ಪಂಗ್ತೆಂನಿ ಲಿಪುನ್ ಆಸ್ಚ್ಯಾ ಪಯ್ಸಿಲ್ಯಾ ಸಂಸಾರಾಚಿ ಆಶಾ (nostalgia) ಆಪಾಪಿಂಚ್ ಉಬ್ಜತಾ. "ಅಲ್ಲಿದೆ ನಮ್ಮನೆ, ಇಲ್ಲಿರುವುದು ಸುಮ್ಮನೆ" ಮ್ಹಳ್ಳ್ಯಾ ಸಭ್ದಾಂಕ್ ಆಪಾಪಿಂಚ್ ಅರ್ಥ್ ಮೆಳ್ತಾ. "ದಾಕ್ಟುಲೆಂ ಮೆಲಿಸ್ಸಾ ಆಜ್ ಆಂಜಾಂ ಸಾಂಗಾತಾ ಖೆಳುನ್ ಆಸಾ", ಮ್ಹಳ್ಳ್ಯಾಕ್ ತಾಚ್ಯಾ ಮೊಗಾಳ್ ಅವಯ್ಚ್ಯಾ ಭಾವಾರ್ಥಾಚ್ಯಾಕಿ ದುಸ್ರಿ ಸಾಕ್ಸ್ ನಾಕಾ.
’ಬರಿ ಕವಿತಾ’ ಆನಿ ’ಫಟ್ಕಿರಿ ಕವಿತಾ’ಚೆರ್ ಭಾಸಾಭಾಸ್ ಚಲ್ಚ್ಯಾ ಹ್ಯಾ ದಿಸಾಂನಿ, ’ಕೃತಕ್ ಅನ್ಬೊಗ್’ ಆಪ್ಲೆ ಕರ್ನ್ ಘೆವ್ನ್, ವಿಂಚ್ಣಾರ್ ಸಬ್ದ್ ವಿಂಚುಂಕ್ ಒದ್ದಾಡ್ನ್ ಕಾವ್ಯೆಂ ಲಿಕ್ಚ್ಯಾ ಫ಼ಾಮಾದ್ ಕವಿಂಚ್ಯಾ ’ಉತ್ತೀಮ್’ ಕವಿತೆಂ ಹುಜಿರ್, ಆವಯ್ಚ್ಯಾ ಕಾಳ್ಜಾಥಾವ್ನ್ ಅಪ್ಲ್ಯಾ ಅಂತರ್ಲೆಲ್ಯಾ ಬಾಳಾಖಾತಿರ್ ಉದೆಲ್ಲಿಂ ಹಿಂ ಭಗ್ಣಾಂ ಫಕತ್ ಉತ್ರಾಂ ನ್ಹಯ್! ದುಕಾಂ ಮೊತಿಯಾಂ ಮ್ಹಣುಂ, ಉಮಾಳ್ಯಾಂಚೊ ಸರ್ ಮ್ಹಣುಂ ವಾ ಕಾಳಿಜ್ ಖಿರವ್ನ್ ವೊತ್ಲ್ಲೆಂ ಮ್ಹಣುಂ? ಉಣೆಂಚ್, ಮ್ಹಜೆಲಾಗಿಂ ಉತ್ರಾಂ ನಾಂತ್.
ನಿಮಾಣೆಂ, ಹೊ ಏಕ್ ಕವಿತಾ ವಿಮರ್ಸೊ ನ್ಹಯ್. ಫಕತ್ತ್ ಮೊಜಿಂ ದೋನ್ ಉತ್ರಾಂ ದುಕ್ಲ್ಲ್ಯಾ, ರಡ್ಚ್ಯಾ ಕಾಳ್ಜಾಂಕ್ ಥೊಡಿ ಥಂಡಾಯ್ ದೀಂವ್ಕ್ ಸಕ್ತಿತ್ ಮ್ಹಳ್ಳ್ಯಾ ಭರ್ವಸ್ಯಾನ್ ಮಾತ್ರ್.
[ ಕವಯತ್ರಿ ನಿರ್ಮಲಾ ಗೋವಿಯಸಾಚೆಂ ’ಮೆಲಿಸ್ಸಾ ಅಮರ್ ಜಾ’ ಕವಿತಾ ವಾಚಾ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications