ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣೆಂತ್ ಪರ್ಗಟ್ ಜಾಲ್ಲೊ ಪಯ್ಲೊ ಬೂಕ್ 1962 ಇಸ್ವೆಂತ್ (ರೊಮಿ ಲಿಪಿಚೊ) ಜಾವ್ನಾಸಾ ದೋಕ್ಟ್ರಿನಾ ಕ್ರೀಸ್ತಾ [ಮಾ|ಬಾ|ತೋಮಸ್ ಸ್ತೀಫನ್ಸ್ ಹಾಚೊ]
ಆಯ್ಚೊ ಕೊಂಕ್ಣಿ ಲೋಕ್ ಆನಿ ಆಯ್ಚಿ ಕೊಂಕ್ಣಿ ಪರಿಗತ್
- ಪ್ರವೀಣ್ ತೌರೊ ಕುಲ್ಶೇಕರ್, ದುಭಾಯ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2004 ಹಾಂತುಂ ತಿಸ್ರೆಂ ಇನಾಮ್ ಜೊಡ್ಲ್ಲೆಂ ಲೇಖನ್]
ಕೊಂಕ್ಣಿ ಮ್ಹಣ್ತಾನಾ ಉಗ್ದಾಸ್ ಯೆತಾ ಆಮ್ಚಾ ಗಾಂವ್ಚಾ ಲೊಕಾಚೊ, ಆಮ್ಚ್ಯಾ ಮನ್ಶ್ಯಾಂಚೊ ಆನಿಂ ಆಮ್ಚ್ಯಾ ಮಾತ್ಯೆಚೊ. ಆಜ್ ಆಮ್ಕಾಂ ಕೊಂಕ್ಣೆ ಮ್ಹಣ್ ಲೋಕ್ ವಳ್ಕಾತಾ ಜಾಲ್ಯಾರ್ ಆಮಿಂ ಪಾಳ್ಚಾ ಸಂಸ್ಕ್ರತೆವಯ್ರ್ ಆನಿಂ ಆಮಿಂ ನೆಸ್ಚ್ಯಾ ನೆಸ್ಣಾಂ ಥಂಯ್, ಆಜ್ ಆಮಿಂ ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾಕ್ ಪಾವ್ಲ್ಯಾ ತರ್ಯಿ ಆಮ್ಚೆಂ ಆಚಾರ್ ವಿಚಾರ್ ಆಮಿಂ ಸಾಂಗಾತಾ ವರ್ನ್ ಗೆಲ್ಯಾಂವ್. ಆನಿಂ ಆಮಿ ತಿಂ ಆಜೂನ್ ಯಿ ಪಾಳುನ್ ಆಸಾಂವ್ ಹಿ ಸೊಂತೊಸಾಚಿ ಗಜಾಲ್, ವೋಲ್, ಕುಮ್ಗಾರ್, ಖರಾರ್. ರೋಸ್, ಕಾಜಾರ್, ಆನಿಂ ಮೋರ್ನ್ ಆಮಿಂ ಆದ್ಲ್ಯಾ ಆಮ್ಚ್ಯಾ ಪುರ್ವಾಜಾನಿಂ ಸಾಂಬಾಳ್ನ್ ಹಾಡ್ಲ್ಲಿ ರೀತ್ ರಿವಾಜ್ ಪಾಳ್ನ್ ಆಸಾಂವ್, ಆಮಿಂ ಆಮ್ಚಿ ಸಂಸ್ಕ್ರತಿ, ಆಮ್ಚ್ಯಾ ವಕ್ತಿತ್ವಾಕ್ ಸೊಭಾಯ್ ದಿತಾಂವ್.
ಸರಸ್ಪತಿ ನ್ಹಂಯ್ಚ್ಯಾ ಥಡಿರ್ ಆಮ್ಚಿಂ ಕೊಂಕ್ಣಿ ಭಾಸ್ ಜಲ್ಮಾಲ್ಲಿ, ಸರಸ್ಪತಿ ಆಜ್ ಆಳ್ವಾಲ್ಯಾ ಪುಣ್ ಕೊಂಕ್ಣಿ ಭಾಸ್ , ಸಂಸ್ಕ್ರತಿ, ಕೊಂಕ್ಣಿ ಲೋಕ್ ಆಮ್ಚೆಂ ಮಧೆಂ ಆಸಾ, ಆಮಿಂ ತಿ ಸಾಂಬಾಳುಕ್ ಆಸಾ ಆನಿಂ ಆಮ್ಚ್ಯಾ ಪುರ್ವಾಜಾನಿಂ ಸಾಂಬಾಳ್ನ್ ಹಾಡ್ಲ್ಲೆಪರಿ ಆಮಿಂ ಆಮ್ಚ್ಯಾ ಮುಖ್ಲ್ಯಾ ಜನಾಂಗಕ್ (ಪಿಳ್ಗೆಕ್) ಪಾವೊಂಕ್ ಆಸಾ, ಆದಿಂ ಮಾಗಾ ಏಕ್ ಬರೆ ಕಾರ್ಯೆಂ ಚಲ್ತಾನಾಂ, ಸಗ್ಳ್ಯಾ ವಾಡ್ಯಾಚೊ ಲೋಕ್ ಸಾಂಗಾತಾ ಮೆಳ್ತಾಲೊ, ಆನಿಂ ಹಾತಾಕ್ ಹಾತ್ ದೀವ್ನ್ ಕಾಮ್ ಕರ್ತಾಲೊ.
ವೇಳ್ಘಡಿ ಬದಲ್ತಾನಾಂ ಮನಿಸ್ ಬದ್ಲೊಂಕ್ ಲಾಗ್ಲೊ. ಥೊಡೆ ಕಾಮಾಚ್ಯಾ ಸೊಧ್ನೆರ್ ಬೊಂಬಾಯ್ ಸರ್ಗಾರ್ ಪಾವ್ತಾನಾ, ಸಂಸ್ಕ್ರತೆಚಿ ವೋಡ್ ಉಣೆಂ ಜಾವ್ನ್ ಆಯಿಲ್ಲಿ. ವೆತಾನಾ ಕಚ್ಚೆ ಆನಿಂ ಪುಡ್ವೆ ನೆಸೊನ್ ಗೆಲ್ಲೆ, ಪಾಟಿ ಯೆತಾನಾ ಸುಟಾ ಬೂಟಾರ್ ಸೊಭ್ಲೆ ಆನಿಂ ಪಿಂರ್ಗಿ ಸಂಸ್ಕ್ರತೆ ತೆವ್ಶಿಂ ಸವ್ಕಾಸ್ ಮೆಟಾಂ ಕಾಡುಂಕ್ ಲಾಗ್ಲೆಂ, ಉಪ್ರಾಂತ್ ಸವ್ಕಾಸ್ ಗಲ್ಫಾ ತೆವ್ಶಿನ್ ಮೆಟಾಂ ಕಾಡುಂಕ್ ಲಾಗ್ಲೆ. ಕೊಲ್ವಾಚಿಂ, ನಳ್ಯಾಚಿಂ ಘರಾಂ ಆಸ್ಲ್ಲಿಂ, ಟೆರೆಸಾಚಿಂ ಘರಾಂ ಜಾವ್ನ್ ಬದಲ್ತಾನಾ, ಸಂಸ್ಕ್ರತಿ ಆನಿಂ ಭಾಸ್ ವಿನಾಶೆಚ್ಯಾ ಸುರ್ವೆಚ್ಯಾ ಹಂತಾರ್ ಪಾವ್ಲಾಂ ಕಾಡುಂಕ್ ಲಾಗ್ಲಿಂ. ಆದಿಂ ಟಿಪ್ಪುಚ್ಯಾ ಕಾಳಾರ್ಯಿ ಆಮ್ಚ್ಯಾ ಮಾಲ್ಗಾಡ್ಯಾನಿ ತ್ಯಾ ಸಿಂಜೆಚ್ಯಾ ಬುಧ್ವಾರಾ ಸರ್ವ್ ಕೊಂಕ್ಣಿ ಕ್ರಿಸ್ತಾಂವಾಂಕ್ ಶ್ರೀರಂಗಪಟ್ಟಣಾಕ್ ಆಬುಂಡ್ನ್ ವರ್ತಾನಾ, ತಾಂಚ್ಯಾ ಸಾಂಗಾತಾ ಗುಮ್ಟಾಂ ವರುನ್ ಗೆಲ್ಲಿಂ, ಆಜ್ ಗುಮ್ಟಾಂ ಪದಾಂ ಆಳ್ವೊಚ್ಯಾ ಸ್ಥಿತೆರ್ ಆಸಾ, ಆಯ್ಚ್ಯಾ ಪಿಳ್ಗೆಕ್ ಮೊಡ್ಕೆಚ್ಯಾ ತೊಂಡಾಕ್ ಚಾಮ್ಡೆ ಬಾಂದುನ್ ವಾಜಯ್ತಾನಾ ನವೆಸಾಂವ್ ದಿಸೊಂಕ್ ಪುರೊ ಆನಿಂ ಪಿಶೆಂಪಣ್ ಮ್ಹಣ್ ಭೊಗುಂಕ್ ಪುರೊ, ಹಾಚಿ ಮ್ಹಧುರತಾ ತಾಂಚಿ ಉತ್ರಾಂ ಆನಿಂ ವಿಶಯ್ ಸಮ್ಜಾಲ್ಲ್ಯಾರ್ ತಾಚಿ ಖರಿ ಜಾಣ್ವಾಯ್ ತುಂಮ್ಕಾ ಝಳ್ಕಾತೆಲಿ.
ಆಜ್ಕಾಲ್ ಆಮ್ಚ್ಯಾ ಲೊಕಾನ್ ಆಮ್ಚ್ಯಾ ಬರ್ಯಾ ಸಂಸ್ಕ್ರತಿ ವಯ್ರ್ ಬೆಫಿಕಿರಾಯ್ ಧಾಕಯ್ಲ್ಯಾ, ಆಯ್ಚ್ಯಾ ಪಿಳ್ಗೆಕ್ ರೊಸಾಚ್ಯಾ ಕಾರ್ಯಾ ತವಳ್, ರೋಸ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಸಾರ್ಕಿ ಸಮ್ಜೊಣಿಂ ನಾಸ್ತಾ, ತಾಂತ್ಯಾ, ಬಿಯರ್, ಟೊಮೆಟೊ ಮಾರ್ನ್ ಆಪ್ಣಾನ್ ವ್ಹಡ್ಲೆ ಕಾಮ್ ಕೆಲಾಂ ಮ್ಹಣ್ ವಡ್ಪಣ್ ಉಲಯ್ತಾತ್, ಆನಿಂ ದಾಧೊಸ್ಕಯ್ ಬೊಗ್ತಾತ್, ಆಸಲೆ ಪಿಶೆಂಪಣ್ ಆಮಿಂ ಆಡಾಯ್ಜಾಯ್ ಆನಿಂ ಆಕ್ರಿಸ್ತಾಂವಾಕ್ ಬರಿ ಏಕ್ ಮೇಲ್ಫಾಂಕ್ತ್ ಜಾಯ್ಜಾಯ್.
ಆನಿಂ ಆಜ್ ಕೊಂಕ್ಣಿ ಉಲಂವ್ಚೊ ಲೋಕ್ ಉಣೊ ಜಾಲಾ, ಮಾಂಯ್ ಭಾಶೆಂತ್ ಉಲಯ್ಲ್ಯಾರ್ ತೊ ಗಾಂವ್ಟಿ ಯಾ ಗಾಂವ್ಚೊ ಮ್ಹಣ್ ವೊಲಾಯ್ತಾತ್ ಆಮ್ಚಿಂ ಕೊಂಕ್ಣಿ ಭಾಸ್ ಸಂವಿದಾನಾಂತ್ ಆಟ್ವಾ ವೊಳೆರಿಂತ್ ಆಸಾ ಜಾಲ್ಯಾರೀ ಆಮ್ಚಿ ಮಾಂಯ್ಭಾಸ್ ಆಮ್ಚ್ಯಾ ಇಸ್ಕೊಲಾಂತ್ ಶಿಕಂವ್ಚೊ ಆವ್ಕಾಸ್ ಆಜೂನ್ಂಯ್ ಸಂಪೂರ್ಣ್ ಮೆಳೊಂಕ್ ನಾ, ಆಮಿಂ ಇಗರ್ಜೆಚ್ಯಾ ಇಸ್ಕೊಲಾನಿಂ, ಕೊನ್ವೆಂಟ್ ಇಸ್ಕೊಲಾನ್ ಶಿಕೊನ್ ವ್ಹಡ್ ಜಾಲ್ಲ್ಯಾಂವ್ ಆನಿಂ ಆಮ್ಚ್ಯಾ ಧಾರ್ಮಿಕಾಂನಿ ಆಮ್ಚ್ಯಾ ಕೊಂಕ್ಣಿ ಭಾಶೆ ಥಂಯ್ ಚಡಿತ್ ಉರ್ಬಾ ದಾಕಂವ್ಕ್ ನಾ, ಇಸ್ಕೊಲಾಂತ್ ಮಾಯ್ಭಾಸ್ ಕೊಂಕ್ಣಿ ಉಲಯ್ತಾನಾ ಶಿಕ್ಶಾ ಫಾವೊ ಜಾಲ್ಯಾ, ಆಜೂನಿ ತೀ ಜಾರಿರ್ ಅಸಾ, ಆಮ್ಚಿ ಭಾಶೆ ಥಂಯ್ ಆಸ್ಲ್ಲಿ ವೋಡ್ ಲಾನ್ ಪಣಾರ್ ಥಾವ್ನ್ ಹುಮ್ಟೊನ್ ಕಾಡ್ಲ್ಯಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ, ಹ್ಯಾ ಶಿಕ್ಶೆಕ್ ಲಾಗೊನ್ ಆಮ್ಚಾ ವಡಿಲಾನಿಂ ಆಪ್ಲ್ಯಾ ಬುರ್ಗ್ಯಾಂಕ್ ಕೊಂಕ್ಣಿ ಭಾಶೆ ಥಂಯ್ ಚಡಿತ್ ಗಿನ್ಯಾನ್ ಆಪ್ಣಾಂವ್ಕ್ ಆನಿಂ ತಿ ಉರಂವ್ಕ್ ಆನಿಂ ತಾಚ್ಯಾ ಸಂಸ್ಕ್ರತೆವಿಶಿಂ ಚಡಿತ್ ಶಿಕೊಂವ್ಕ್ ಪಯತ್ನ್ ಕರುಂಕ್ ನಾ, ಆನಿಂ ಖಂಯ್ಚಿಂಯ್ ಆವಯ್ ಬಾಪಯ್ ಆಪ್ಲ್ಯಾ ಬುರ್ಗ್ಯಾಂಕ್ ಕೊಂಕ್ಣಿ ಭಾಸ್ ಶಿಕಂವ್ಕ್ ಧಯ್ರ್ ಘೆಂವ್ಚಿನಾಂತ್.
ಆಜ್ ಆಮ್ಚ್ಯಾ ಬುರ್ಗ್ಯಾಂಕ್ ಕೊಂಕ್ಣೆಂತ್ಲಿಂ ಚಾಲ್ತಿ ಮಾಗ್ಣಿಂ ಯೆನಾಂತ್, ಕೊಂಕ್ಣಿ ಕಾನಡಿ ಲಿಪಿಂತ್ ಬರಯಿಲ್ಲೆ ವಾಚುಂಕ್ ಕಳಾನಾ ಆಮ್ಚಿಂ ಬುರ್ಗಿಂ ಇಂಗ್ಲೆಜ್ ಮಾಧ್ಯಾಮಾಂತ್ ಶಿಕ್ತಾನಾ ಕನ್ನಡ ತೊಂಡ್ಪಾಶಿ ಉಲಯ್ತಾಂವ್, ಪುಣ್ ಕಾನಡಿ ಲಿಪಿಂತ್ಲೆ ಕೊಂಕ್ಣಿ ವಾಚುಂಕ್ ಯೆನಾ, ಆಶೆಂ ಕಿತ್ಯಾಕ್ ಘಡ್ತಾ, ಆಮ್ಚ್ಯಾ ಲೋಕಾ ಥಂಯ್ ಆಶೆಂಚ್ ತರ್ ಮುಕಾರೀ ಕೊಂಕ್ಣೆಚಿ ಪರಿಗತ್ ಕಶಿ ರಾವಾತ್, ಆಜ್ ಆಮ್ಚ್ಯಾ ಲೊಕಾ ಥಂಯ್ ಕೊಂಕ್ಣಿ ಥಂಯ್ ಉರ್ಬಾ ನಾ, ಕೊಂಕ್ಣಿ ಕಲೆಚೊ ಮೋಗ್ ನಾ, ಆಜ್ ಆಮಿಂ ಆಮ್ಚೊ ಲೋಕ್ ಮ್ಹಣ್ ಮೋಗ್ ಸಹಕಾರ್ ದಿತಾಂವ್. ತಾಂಕಾ ಕುಮೊಕ್ ಭಾಸಯ್ತಾಂವ್ ತಾಂಚಾ ದುಡ್ವಾಚ್ಯಾ ಕಂಪೆನಿಂತ್ ಆಮ್ಚೊ ಪಯ್ಸೊ ವಿನಿಯೊಗ್ ಕರ್ತಾಂವ್, ಆನಿಂ ನಾಂವ್ ಜೊಡುಂಕ್, ಮಾರ್ಬಲ್ ಫಾತ್ರಾರ್ ಆಮರ್ ಉರಂವ್ಕ್ ಜಾಯ್ತೊ ದುಡು ವಿಬಾಡ್ ಕರ್ತಾಂವ್, ಆನಿಂ ಆಮ್ಚೊ ಲೋಕ್ ಆಮ್ಕಾಂ ನಾಗವ್ನ್, ಬನಾವ್ನ್ ದಾಂವ್ತಾನಾ ಆಮ್ಚೆಂ ಥಂಯ್ ಆಸ್ಲ್ಲೊ (ಕೊಂಕ್ಣಿ ಲೊಕಾ ಮಧ್ಲೊ) ಬಾವಾಡ್ತ್ ದಂಡಳ್ತಾ, ಉಪ್ರಾಂತ್ ತಾಂಕಾ ದುರ್ಸಾಂತಾಂವ್.
ಆಜ್ ಕೊಂಕ್ಣಿ ಪತ್ರಾಂ ಕಿತ್ಲೊ ಲೋಕ್ ವಾಚ್ತಾ, ಕಿತ್ಲ್ಯಾ ಘರಾನಿಂ ಕೊಂಕ್ಣಿ ಪತ್ರಾಂ ಪಾವ್ತಾತ್, ವರ್ಸಾಕ್ ಏಕ್ ಕೊಂಕ್ಣಿ ಪತ್ರಾಂಕ್ ವರ್ಗಾಣಿ ಬಾಂಧುಂಕ್ ಲೋಕ್ ತೋಂಡ್ ಕಾಳೆಂ ಕರ್ತಾ, ಸಿನೆಮಾ ಆನಿಂ ಇತರ್ ಆನ್ಯ್ ಭಾಶೆಚ್ಯಾ ಪುಸ್ತಾಕಾಂಕ್ ಆಮಿಂ ಕಿತ್ಲೊ ದುಡು ತರೀ ವಿಭಾಡ್ತಾಂವ್ ಪುಣ್ ಕೊಂಕ್ಣಿ ಪತ್ರಾಂಕ್ ಪಾಂಚ್ ರೂಪಾಯ್ ದೀಂವ್ಕ್ ಆಮಿಂ ಪಾಟಿ ಮುಕಾರ್ ಕರ್ತಾಂವ್, ತಾಂತುಂ ಥೊಡಿಂ ಕಾರಣಾಂಯ್ ಆಸೊಂಕ್ ಪುರೊ ಥೊಡಿ ಆಮ್ಚಿಂ ಪತ್ರಾಂ ನಾಂವ್ ನಾಸ್ತಾನಾಂ ಮೆಲಿ. ಆನಿಂ ಥೊಡ್ಯಾ ಪತ್ರಾಂಕ್ ಆಮ್ಚ್ಯಾನಿಂಚ್ ಆಡ್ ಪಾಂಯ್ ದಿಲೊ, ಆಮ್ಚೆಂ ಮ್ಹಧೆಂ ಧಾರ್ಮಿಕ್ ಆನಿಂ ಲಾಯಿಕಾಚೆಂ ಪತ್ರ್ ಮ್ಹಳ್ಳೆ ಬೇದ್ ಭಾವ್ ಆಸಾ, ಧಾರ್ಮಿಕಾಚೆಂ ಪತ್ರ್ ಮ್ಹಣ್ತಾನಾ ಫಿರ್ಗಜೆತಾವ್ನ್ ಲೊಕಾಕ್ ಪ್ರೊತ್ಸಾವ್ ಮೆಳ್ತಾ ಆನಿಂ ಲೋಕ್ ದಾಕ್ಶೆಣ್ ನಾಸ್ತಾಂ ಕಾಣ್ಗೆತಾ, ಲಾಯಿಕಾಚೆಂ ಪತ್ರ್ ಮ್ಹಣ್ತಾನಾ ಪ್ರಚಾರ್ ಮೆಳಾನಾ ಆನಿಂ ಕರಿನಾಂತ್.
ಆನಿಂ ಆಮ್ಚೊ ಲೋಕ್ ಇತ್ಲೊ ಮೊವಾಳ್ ಆನಿಂ ಸೊಸ್ಣಿಕಾಯೆಚೊ ಧಾರ್ಮಿಕ್ ಮಣಿಯಾರಿ ಮ್ಹಣ್ತಾನಾ, ಪಾಟಿ ಮುಕಾರ್ ಪಳೆಯ್ನಾಸ್ತಾನಾಂಚ್ ಹಾತ್ ಉಕಲ್ನ್ ದಿತಾತ್, ಪುಣ್ ಲಾಯಿಕಾಚೆ ಪತ್ರಾಂಕ್ ಘರಾನಿಂ ವರ್ಗಣಿ ವಿಸಾರ್ತಾನಾ ತಿರಸ್ಕರಾನ್ ದೆಕ್ತಾತ್, ಆಮಿಂ ಕೊಂಕ್ಣಿ ಕೊಂಕ್ಣಿ ಮ್ಹಣ್ತಾಂವ್ ಆಮಿಂ ಎಕಾಮೆಕಾಕ್ ಸಹಕಾರ್ ದಿನಾಂವ್ ಎಕಾಮೆಕಾ ಥಂಯ್ ಪಂಥಾಟ್ ಚಲಂವ್ಚೆ ಕುರ್ಲೆ ಸ್ವಭಾವಾಚೆ ಆಮಿಂ. ಆಮಿಂ ವಯ್ರ್ ಯೆನಾಂವ್ ಆಮ್ಚ್ಯಾಂಕ್ಯಿ ವಯ್ರ್ ಯೇಂವ್ಕ್ ದಿನಾಂವ್, ಆಮ್ಚ್ಯಾ ಕೊಂಕ್ಣಿ ಕಾರ್ಯಾಕ್ ಲೋಕ್ ಯೆನಾ ಮ್ಹಣ್ ದುರ್ಸೊಣೆ ಕೊಂಕ್ಣಿ ಕಲಾಕಾರಾಂಚೆಂ, ಪುಣ್ ತ್ಯಾ ಏಕಾ ಕಲಾಕಾರಾಚ್ಯಾ ಸಂಗೀತ್ ಸಾಂಜೆಕ್ ಆನೆಕ್ಲೊ ಕೊಂಕ್ಣೆಂತ್ಲೊ ಮಹಾನ್ ಕಲಾಕಾರ್ ತಾಚೊ ಸಹಕಾರ್ ಬಾಸಯ್ನಾ, ತಾಚಿ ಹಾಜರಿ ಆಸಾನಾ, ಕೊಂಕ್ಣಿ ಕಾರ್ಯಾಕ್ ಲೋಕ್ ಬೊಟಾಂನಿ ಮೆಜ್ಚೆ ತಸಲೊ, ಆಮ್ಚ್ಯಾ ಕೊಂಕ್ಣಿ ಕಲಾಕರಾಂ ಮ್ಹದೆಂ ದೋನ್-ತೀನ್ ವಾಂಟೆ ಆನಿಂ ಪತ್ರಾಂ ಮ್ಹಧೆ ದೋನ್ ಫಾಂಟೆ, ಆನಿಂ ಆತಾಂ ಕೊಂಕ್ಣಿ ಟಿವಿ ಹಾಂತುಂ ಕಿತ್ಲ್ಯಾ ಕೊಂಕ್ಣಿ ಲೋಕಾಕ್ ಆವ್ಕಾಸ್ ಮೆಳ್ತಾ ಯಾ ಮೆಳ್ಳಾ, ಕಿತ್ಲ್ಯಾ ಕೊಂಕ್ಣಿ ಕಲಾಕರಾಚೆಂ ಸಂಗೀತ್ ಹ್ಯಾ ನಾಟಾಕಿಸ್ತಾಚೆಂ ನಾಟಕ್ ವ್ಹಾಳೊನ್ ಯೆತಾಲೆ, ಮ್ಹಣ್ ತೀ ವೇಳ್ಘಡಿ ಸಾಂಗ್ತೆಲಿ.
ಏಕ್ ಕೊಂಕ್ಣಿ ಮೋಗಿ ತಾಣೆ ಪರ್ಗಾವಾಂತ್ ಆಯಿಲ್ಲ್ಯಾ ಕೊಂಕ್ಣಿ ಕಲಾಕರಾಂಕ್ ಬರೊ ಯೆವ್ಕಾರ್ ದಿಲಾ ಆನಿಂ ಪಾಟಿಂಬೊ ಭಾಸಯಿಲ್ಲೊ, ಜಾಯ್ತಾ ಇಗರ್ಜೆಂಕ್, ಆನಾಥ್ ಆಸ್ರ್ಯಾಂಕ್ ದುಡ್ವಾಚಿ ಕುಮೊಕ್ ಭಾಸಯಿಲ್ಲೊ, ಕೊಂಕ್ಣಿ ಕೇಂದ್ರಾಕ್, ಪ್ರತಿಸ್ಟಾನಾಕ್ ದುಡು ದಾನ್ ದಿಲ್ಲೊ, ಗಲ್ಫಾಕ್ ಯೆತಾನಾ ಹಾತ್ ಜೊಡುನ್ ಆಯಿಲ್ಲೆ ಮಾನೇಸ್ತ್ ಗಾವಾಂಕ್ ದೆಂವ್ತಾನಾ ತಾಂಕಾ ಹಾಂಚಿ ವಳಕ್ ಸಯ್ತ್ ಅಸಾನಾ, ತಾಂಕಾ ಹಾತ್ ಸಯ್ತ್ ಮೆಳಯ್ನಾಂತ್, ಕಾರ್ಯಾಂತ್ ಮಾನಾಚಿ ಬಸ್ಕಾ ಸಯ್ತ್ ಫಾವೊ ಕರಿನಾಂತ್, ಮಾನ್ ದಿನಾಂತ್ ಎಕ್ಲೊ ದೂಕ್ ಉಚಾರ್ತಾಲೊ, ತರ್ ಆಮಿ ಕೊಂಕ್ಣೆ ಖಾತಿರ್ ಕಿತ್ಯಾಕ್ ಸಹಕಾರ್ ದಿಜಾಯ್ ಮ್ಹಣ್ ತೊ ದೂಖ್ ದಾಂಬುನ್ ದವರ್ನ್ ಕಡಕ್ಕ್ ಉತ್ರಾಂನಿ ಉಲಯ್ಲೊ, ಆಶೆಂ ಘಡ್ಲ್ಯಾರ್ ಮುಕಾರ್ ಕೊಂಕ್ಣೆಚಿ ಪರಿಗತ್ ಕಶಿ ರಾವತ್?
ಆಜ್ ಗಲ್ಫಾಂತ್ ಆನಿಂ ಆಮೆರಿಕಾಂತ್ ಆಮ್ಚ್ಯಾ ಕೊಂಕ್ಣಿ ಲೊಕಾನಿ ಖಂಯ್ ಪಾಳಾಂ ರೊಂಬಾಯ್ಲಾಂತ್ ಥಂಯ್ ಆಮ್ಚಿ ಭಾಸ್ ಆನಿಂ ಸಂಸ್ಕ್ರತಿ ಜಿವಾಳ್ ದವುರುಂಕ್ ಪಯತ್ನ್ ಕೆಲಾಂ ಆನಿಂ ಕರಿತ್ ಅಸಾತ್, ದಾಖ್ಲ್ಯಾಕ್ ಮೊಂತಿ ಫೆಸ್ತ್ ಸಂಸಾರ್ಭರ್ ಆಚಾರ್ಸಿತಾತ್, ಆಮ್ಚ್ಯಾ ಗಲ್ಫಾಂತ್ಲಾ ಕೊಂಕ್ಣಿಂ ಭಾವಾಂನಿ ಆಪ್ಲ್ಯಾ ಕೊಂಕ್ಣಿ ಕಲಾಕರಾ ಥಂಯ್, ಕೊಂಕ್ಣಿ ನಾಟಕಿಸ್ತಾಂ ಥಂಯ್ ಬರೆಂ ಮನ್ ದಾಕೈಲಾ, ಆನಿಂ ಥೊಡ್ಯಾಂಕ್ ತಾಂಚ್ಯಾ ಮಿನತೆಚೊ ಫಳ್ ಜಾವ್ನ್ ಏಕ್ ನಿಧಿ ಎಕ್ಟಾಂಯ್ ಕರ್ನ್ ಯಾ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲಾ, ಆಶೆಂ ಆಮಿಂ ಸರ್ವಾನಿ ಮುಕಾರ್ ಸರೊನ್ ಮ್ಹನ್ ಕೆಲ್ಯಾರ್ ಕೊಂಕ್ಣಿ ಕಲಾಕಾರಾ ಥಂಯ್, ಮೋಗಿ ಥಂಯ್ ನಾಟಕಿಸ್ತಾ ಥಂಯ್ ನವ್ಯಾ ತಶೆಂಚ್ ಪರ್ನ್ಯಾ ಲೇಕಾಕಾ ಥಂಯ್ ನವಿ ಆಂಕ್ರಿ ಪುಟ್ತೆಲಿ ಆನಿಂ ತಾಂಚೆ ಥಂಯ್ ಹುಮೆದ್ ವಾಡ್ತೆಲಿ, ಕೊಂಕ್ಣಿ ಭಾಸ್ ಜಿವಾಳ್ ಉರಂವ್ಕ್ ಥೊಡಿಂ ತರೀ ಪಯತ್ನ್ ಕರ್ತೆಲಿಂ. ಅಮ್ಚೊ ಕೊಂಕ್ಣಿ ಲೋಕ್ ಆಧುನಿಕತೆ ತೆವ್ಶಿನ್ ಚಮ್ಕಾಲಾ, ಘರಾನಿಂ ಕೊಂಕ್ಣಿ ಉಲಯ್ನಾಂತ್.
ಕೊಂಕ್ಣಿ ಕಾರ್ಭಾರಿ, ವಡ್ಲಿಂ ವಡ್ಲಿಂ ಭಾಶಣಾಂ ಆನಿಂ ಕಾರ್ಯೆ ಕೊಂಕ್ಣಿಂತ್ ಚಲಯ್ತಾತ್, ಸಭೆಚ್ಯಾ ಬಾಯ್ರ್ ಇಂಗ್ಲಿಶ್ ಕಾತರ್ತಾತ್ ಆನಿಂ ಭುರ್ಗ್ಯಾಕಡೆ ಇಂಗ್ಲಿಶಾಂತ್ ಸವಾಂದ್ ಚಲಯ್ತಾತ್, ಆಮ್ಚ್ಯಾ ಕೊಂಕ್ಣಿ ಕಾರ್ಯಾಂತ್ ಕೊಂಕ್ಣಿ ಯೆನಾತ್ಲಾ ಮುಖೆಲ್ಯಾಂಕ್, ತ್ಯಾ ಸಂಘಟನಾಚೆ ತಾಳ್ ಮೂಳ್ ನೆಣಾಸ್ಲ್ಲ್ಯಾ ಮುಕೆಲಿ ಜಾವ್ನ್ ಯಾ ಮುಕೆಲ್ ಸಯ್ರೊ ಜಾವ್ನ್ ಆಪಯ್ತಾತ್, ತರ್ ಆಮಿ ಖಂಯ್ ಚುಕ್ಲ್ಯಾಂವ್, ಆಮ್ಚ್ಯಾ ಬುರ್ಗ್ಯಾ ಥಂಯ್ ಆನಿಂ ಯುವಜಾಣಾಂ ಥಂಯ್ ಕೊಂಕ್ಣೆಚೊ ತಶೆಂ ಸಂಸ್ಕ್ರತೆಚೊ ಮೋಗ್ ವಾಡ್ಚೊ ತರಿ ಕಸೊ? ಆಜ್ ಆಮಿಂ ಇಸ್ಕೊಲಾಂತ್ ಕೊಂಕ್ಣಿ ವಿಶಯ್ ಜಾವ್ನ್ ಘೆಂವ್ಕ್ ಯಾ ಶಿಕಂವ್ಕ್ ಚರ್ಚಾ ಚಲವ್ನ್ ಆಸಾ, ಹಾಕಾ ಕಿತ್ಲಿ ಕೊಂಕ್ಣಿ ಆವಯ್ ಬಾಪಯ್ ಪಾಟಿಂಬೊ ದೀತ್?
ಆಜ್ ಆಮ್ಚೆ ಮ್ಹಧೆಂ ಸಭಾರ್ ಕೊಂಕ್ಣಿ ಕಾರ್ಯಿಂ ಜಾತಾತ್, ಮಹಾನ್ ಮನಿಸ್ ಕೊಂಕ್ಣಿ ಮ್ಹನ್ಶ್ಯಾಂಚೊ ಪಾಟಿಂಬೊ ಮಾಗ್ತಾತ್, ಆನಿಂ ಆಕ್ರೆಕ್ ಕಾರ್ಯಿ ಜಾತಚ್ ತಾಂಕಾ ವಿಸ್ರೊನ್ ಸೊಡ್ತಾತ್. "ಗರ್ಜ್ ಜಾಲಿ ವಯ್ಜ್ ಮೆಲೊ" ಮ್ಹಳ್ಳೆಂ ದುರ್ಸೊಣೆ ಆಯ್ಕೊಂಕ್ ಮೆಳ್ತಾ. ಪರತ್ ಸಹಕಾರ್ ದಿಂವ್ಕ್ ಆಮ್ಚೊ ಲೋಕ್ ಮುಕಾರ್ ಯೆನಾಂತ್.
ಎಕ್ಲ್ಯಾನ್ ಕೆಲ್ಲ್ಯಾ ಚುಕಿಕ್ ಸಗ್ಳಾ ಕೊಂಕ್ಣಿ ಪರ್ಜೆನ್ ಪಶ್ಚಾತಾಪ್ ಪಾವಾಜಾಯ್ ಪಡ್ತಾ. ಆನಿಂ ಆಬ್ಳೆ ಆತಾಂ ಪುಡಾರ್ ಪ್ರತಿಸ್ಟಾನ್, ಬರೆ ಕಾರ್ಯೆಂ, ಸರ್ವ್ ಕಾಥೊಲಿಕಾಂಕ್ ಏಕಾ ಸಾತ್ಯಾ ಪಂದಾ ಹಾಡ್ಚೆ ಪ್ರಯತನ್ ಹಾಂತುಂ ಕಿತ್ಲ್ಯಾ ಕೊಂಕ್ಣಿ ಲೊಕಾಕ್ ಆವ್ಕಾಸ್ ಮೆಳ್ಳಾ, ಯಾ ಆವ್ಕಾಸ್ ಘೆತ್ಲಾ, ಆಮಿಂ ಸರ್ವ್ ಕೊಂಕ್ಣಿ ಕಥೊಲಿಕಾಂನಿ ಎಕಾಮನಾನ್ ವಾವುರ್ಲ್ಯಾರ್, ಸಾರ್ಥಾಕ್ ಜಾಯ್ತ್ ಹಾಂಚೆ ಯೋಜನ್ ಆನೀಂ ಆಮ್ಚ್ಯಾ ಮಿನತೆಚೊ ಫಳ್ ಆನಿ ಕೊಂಕ್ಣೆಚೊ ಪುಡಾರ್ ಬರೊ ಜಾಯ್ತ್, ಹ್ಯಾ ಯೋಜಾನಾ ಥಾವ್ನ್ ಕೊಣಾಕ್ ಮುನಾಫೊ ಮೆಳ್ಳಾ, ಕೊಣಾಕ್ ಮಾನ್ ಮೆಳ್ಳಾ, ಕೊಣಾಕ್ ಮೆಳೊಂಕ್ ನಾ, ಮ್ಹಳ್ಳ್ಯಾ ಘರ್ಶಾಣಾಕ್ ಲಾಗೊನ್ ಪರತ್ ಕೊಂಕ್ಣೆಚೆ ವಾಂಟೆ ಜಾತೆಲೆ, ಮನಸ್ತಾಪ್ ಉಬ್ಜಾತಲೊ, ಆಶೆ ಜಾಂವ್ಕ್ ನಜೊ ಆನಿಂ ಸೊಡುಂಕ್ ನಜೊ, ನಾಂ ತರ್ ಪರತ್ ಕೊಂಕ್ಣೆಕ್ ಆಮ್ಚ್ಯಾ ಕೊಂಕ್ಣ್ಯಾಂಚೊ ಸಹಕಾರ್ ಮೆಳ್ಚೊನಾ, ಆಶೆಂ ಕೊಂಕ್ಣೆಚ್ಯಾ ವಾಂಟೆ ಫಾಂಟ್ಯಾಕ್ ಆವ್ಕಾಸ್ ದಿನಾ ಜಾಂವ್.
ಕೊಂಕ್ಣಿ ಭಾಸ್ ಸದಾಂಚ್ ಆಮರ್ ಉರೊಂ, ಕೊಂಕ್ಣಿ ಲೊಕಾ ಥಂಯ್ ಮಯಾಮೋಗ್ ಆನಿಂ ಎಕ್ವಟ್ ರಾಜ್ ಕರುಂದಿ, ಆಮ್ಚಿ ಸಂಸ್ಕ್ರತಿ ಆಮಿ ಆಮ್ಚ್ಯಾ ಮುಕ್ಲ್ಯಾ ಪಿಳ್ಗೆ ಖಾತಿರ್ ಜಾಗವ್ನ್ ದವರ್ಯಾ, ಆನಿಂ ಸರ್ವ್ ಆಮಿಂ ಕೊಂಕ್ಣೆ ಎಕಾ ಮನಾನ್ ಜಿಯೆವ್ಯಾ ಅನಿಂ ವಾವುರ್ಯಾಂ ಆನಿಂ ಕೊಂಕ್ಣೆಕ್ ಬರೊ ಫುಡಾರ್ ದಿವ್ಯಾಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications