ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಆಮ್ಚೆಂ ದಿಸಾಳೆಂ ಫಾಸಾಳ್ಳೆಂ!?
- ಆಸ್ಟಿನ್ ಡಿ’ಸೋಜ್ ಪ್ರಭು.
[ಹ್ಯಾ ಲೇಖನಾಂತ್ಲೆಂ ಸರ್ವ್ ವಿಚಾರ್ ಬರವ್ಪ್ಯಾಚೆ]
ಆಮ್ಚಾ ಸಮಾಜೆಚ್ಯಾ ಎಕೆಕಾ ಸಮಸ್ಸ್ಯಾಂಚೆರ್ ಆರ್ಸೊ ಧರ್ಚ್ಯಾ ಇರಾದ್ಯಾನ್, ಹೆಂ ಲೇಖನ್ ಪರ್ಗಟ್ಲಾಂ ಶಿವಾಯ್ ಕೊಣಾಯ್ಕ್ಯ್ ಹಲ್ಕ್ ಕರ್ಚ್ಯಾ ಇರಾದ್ಯಾನ್ ಭಿಲ್ಕುಲ್ ನ್ಹಂಯ್. ಹ್ಯಾ ಲೇಖನಾಚೊ ಬರವ್ಪಿ ಆಸ್ಟಿನ್ ಪ್ರಭುಚಿ ಪರತ್ ವಳೊಕ್ ಗರ್ಜ್ ಮ್ಹಣ್ ದಿಸಾನಾ. ಏಕ್ ಮುಖೆಲಿ, ಸಂಘಟಕ್, ವಾವ್ರಾಡಿ, ಚಿಂತ್ಪಿ, ಲೇಖಕ್, ಕವಿ, ಆನಿ ಸರ್ವಾಂಚ್ಯಾಕೀ ಪಯ್ಲೆಂ - ಸಾಮಾಜಿಕ್ ಹುಸ್ಕೊ ಆಸ್ಚೊ. ಹಾಣೆಂ ವಿಂಚ್ಲ್ಲೊ ವಿಷಯ್ ಆಮ್ಚಾ ಸಮಾಜೆಂತ್ ಪ್ರಸ್ತುತ್ ಆಸ್ಚಿ ಮಾರೆಕಾರ್ ಪಿಡಾ. ಇತ್ಲಿ ಪಿಡಾ ಆಮ್ಚಾ ಸಮಾಜೆಕ್ ಆಯ್ಲ್ಯಾ ಆನಿ ಯೆತೇಚ್ಚ್ ಆಸಾ ತರ್ಯೀ ಆಮ್ಚ್ಯಾ ಲೊಕಾಂಚಿ ಜೆಮ್ ಸುಟಾನಾ. ಆಮ್ಚ್ಯಾ ಲೊಕಾಂನಿ ಜಾಗ್ ಜಾಂವ್ಚಿ ಖಂಡಿತ್ ಗರ್ಜ್ ಆಸಾ, ನ್ಹಂಯ್ ಪರ್ತುನ್ ಖಾಂವ್ನ್ ಜೇವ್ನ್ ನಿದೊಂಕ್. ಬಗಾರ್ ಅಪ್ಲ್ಯಾ ಭಂವ್ತೊಣಿಂ ಕಿತೆಂ ಘಡ್ತಾ ಮ್ಹಳ್ಳೆಂ ತಜ್ವೀಜ್ ಕರ್ನ್ ಪಳೆಂವ್ಕ್.
ವಾಚ್ಪ್ಯಾಂಕ್ ಅಪಾಪ್ಲೆ ವಿಚಾರ್ ವೆಕ್ತ್ ಕರುಂಕ್ ಭರ್ಪೂರ್ ಆವ್ಕಾಸ್ ಆಸಾ.
ಹಾಂವೆ ಮ್ಹಜ್ಯಾ ಬಾವೀಸ್ ವರ್ಸಾಂಚ್ಯಾ ಪ್ರಾಯೆರ್ ಕೆಲ್ಲೆಂ ಇತ್ಲೆಂಚ್ - ಸರ್ವಾಂನಿ ಪತ್ರಾಂ ಕಾಡ್ಲಿಂ, ಚಲಯ್ಲಿಂ ಮ್ಹಣ್ ಹಾಂವೆಂಯೀ ಜೊ.ಸಾ.ಲಾಗ್ಚಿಂ ದೋನ್ ಪತ್ರಾಂ ಆನಿ ಸಿರಿವಂತಾಲಾಗ್ಚೆಂ ಏಕ್ ಪತ್ರ್ ಘೆವ್ನ್ ಚಲಂವ್ಕ್ ಧರ್ಲೆಂ. ಪುಣ್ ಹಾಂವೆ ಕೆಲ್ಲೆಂ ಹೆಂ ಕಾಮ್ ಎಕ್ಲ್ಯಾ ಎಕ್ಸುರ್ಯಾನ್, ಫಾವೊತೊ ಅನ್ಭೋಗ್ ನಾಸ್ತಾಂ, ಕಿತೆಂಚ್ ಹಾತಿಂ ಪಯ್ಶೆ ನಾಸ್ತಾಂ. ಪುಣ್ ಹಾಣಿಂ ಕಿತೆಂ ಕೆಲೆಂ?
ಹೆರ್ ದಿಸಾಳ್ಯಾ ಪತ್ರಾಂನಿ ಕ್ರೀಸ್ತಾಂವಾಚಿ ಖಬಾರ್ ಪ್ರಕಟ್ ಜಾಯ್ನಾ, ತೆ ಬಜರಂಗ ದಳಾಕ್ ಸಾಂಗಾತ್ ದೀವ್ನ್ ಕ್ರೀಸ್ತಾಂವಾಂ ವಿರೋಧ್ ಪ್ರಕಟ್ತಾತ್; ಹಾಕಾ ಏಕ್ಚ್ಚ್ ವಾಟ್ ಕೀ ಆಮಿಂ ಆಮ್ಚೆಂಚ್ ಪತ್ರ್ ಪ್ರಗಟ್ ಕರ್ಚೆಂ. ಹೊ ಶೆಳೊ ವಾದ್ ಮತಿಂ ದವರ್ನ್ ಆಮಿಂ - ಮಂಗ್ಳುರ್ಚ್ಯಾ ಕ್ರೀಸ್ತಾಂವಾಂನಿ ಏಕ್ ದಿಸಾಳೆಂ ಕಾಡ್ಲೆಂ - ರಂಗ್ ರಂಗಾಳ್ ಕೆಲೆಂ ಆನಿ ಹೆರ್ ಫಾಮಾದ್ ಪತ್ರ್ಕರ್ತಾಂಕ್ ಶೆಳೊ ಘಾಮ್ ಪಿಳುಂಕ್ ಧಾಡ್ಲೆಂ. ಹೆಂ ಪತ್ರ್ ಪಳೆವ್ನ್ ತೆ ಘಾಬರ್ಲೆ, ಆಮ್ಚಿ ಶ್ಯಾಥಿ ಪಳೆವ್ನ್ ತಾಂಕಾಂ ಮುಳ್ವಾಧ್ ಆರಂಭುಂಕ್ ಸುರು ಜಾಲಿ, ರಗ್ತಾ ದಾಬ್ ಚಡ್ಲೊ ಆನಿ ಹ್ಯಾ ಪತ್ರಾಚೊ ವಿಕ್ರೊ ದೆಂವ್ಲೊ!
ಆಮ್ಕಾಂ ಹಾಂಕಾರ್ ಚಡ್ಲೊ, ಮಿಂಜಾಸ್ಕಿ ಚಡ್ಲಿ ಆನಿ ಆಮ್ಚೆಂ ದರ್ಬಾರ್ ವಿಶೇಷ್ ರೀತಿಚೆಂ ಜಾಲೆಂ. ಕಂಪ್ಯೂಟರಾಂಚಿ ರಾಸ್ ಪಡ್ಲಿ, ವಿಶೇಷ್ ಮಾದರಿಚಿಂ ಕದೆಲಾಂ, ಮೆಜಾಂ, ಕಂಪ್ಯೂಟರಾಂ, ಹೆಣೆಂ ತೆಣೆಂ ಭಂವೊಂಕ್ ಕಾರಾಂ - ಸುಕ್ಯಾ ಗುವಾಚೆರ್ ಪಾವ್ಸಾಚ್ಯೊ ಶೆಣ್ಯೊ ಪಡ್ಲ್ಲ್ಯಾ ತಸಲಿ ಗತ್ ಆಮ್ಚಿ ಜಾಲಿ! ಭಂವ್ಡೆಕ್ ಲಗಾಮ್ ನಾ ಜಾಲಿ - ಕಿತ್ಯಾ ಹೆಂ ಯೋಜನ್ ಚಲಯ್ತೆಲ್ಯಾಂಕ್ ಪಯ್ಶಾಂಚಿ ಹಕೀಗತ್ ಕಳಿತ್ಚ್ಚ್ ನಾಸ್ಲಿ!
ಏಕ್ ಯಾಜಕ್ ಎಕಾಚ್ಛಾಣೆ ರಾಯ್ ಜಾಲೊ ಆನಿ ತಾಚೆಂ ಕಾರ್ಬಾರ್ ರಾಜಸ್ಥಾನಾಚೆಂ ರಾವ್ಳೆರ್ ಜಾಲೆಂ. ಕೊಣೆ ಪೆಲ್ಯಾಂನಿ ಪಯ್ಶೆ ವಾಡ್ತೆಲೆ ಮ್ಹಳ್ಳ್ಯಾ ಆಂಗಾಲಾಪಾನ್ ಆಸ್ಲ್ಲೆಂ ರೀಣ್ ಕಾಡ್ನ್ ಹ್ಯಾ ಪತ್ರಾಕ್ ದಿಲ್ಲೆಂ. ಥೊಡ್ಯಾಂನಿ ಲಾಖೊಂ ಲಾಖ್ ರುಪಯ್ ಖರ್ಚುನ್ ಹಿಶೆ ಮೊಲಾಕ್ ಘೆತ್ಲ್ಲೆ. ಸರ್ವ್ ರಾಕೊನ್ ಆಸ್ಲ್ಲೆ ಹ್ಯಾ ಫಾಯ್ದ್ಯಾಚ್ಯಾ ಪಯ್ಶಾಂನಿ ಬಂಗ್ಲೊ ಬಾಂಧುಂಕ್.
ಪುಣ್ ಜಾಲೆಂ ವಿಂಗಡ್ಚ್ - ಪತ್ರಾರ್ ಪಯ್ಲ್ಯಾ ಪಾನಾರ್ ಸುಶೆಗಾತ್ ಬಿಸ್ಪಾಚಿ, ಇಗರ್ಜಾಂಚಿ, ಸಾಂತಾಂ ಭಕ್ತಾಂಚಿ ತಸ್ವೀರ್ ಯೇಂವ್ಕ್ ಸುರು ಜಾಲಿ, ಕ್ರೀಸ್ತಾಂವ್ ವಾರ್ತಾ ಭಾರಿಚ್ ದಾಟ್ ಅಕ್ಷರಾಂನಿ ಜಾಹೀರ್ ಜಾಲಿ, ಸಂದೇಶ್ ವಿಶೇಷ್ ರೀತಿಂನಿ ಪ್ರಕಟ್ ಜಾಲೆ ಆನಿ ಆಮ್ಚೆಂ ಹೆ ದಿಸಾಳೆಂ ಪತ್ರ್ ಬಹು ಸಂಕ್ಯಾತ್ ಹಿಂದು-ಮುಸ್ಲಿಮಾಂಕ್ ಭುಕಾಂಡೊ ಪುಸುಂಕ್ಯೀ ನಾಫಾವೊ ಕಸೆಂ ಜಾಲೆಂ!
ವಿಕ್ರೊ ಉಣೊ ಜಾಲೊ, ಕಾಮೆಲಿ ಕಾಮ್ ಸೊಡ್ನ್ ಹೆರ್ ಕಡೆನ್ ಗೆಲೆ ಆನಿ ಆಮ್ಚ್ಯಾ ಪ್ರಖ್ಯಾತ್ ಪತ್ರಾನ್ ಥೊಡ್ಯಾಚ್ ಆವ್ದೆನ್ ಸಿಮೆತರಿಚಿ ವಾಟ್ ಧರ್ಲಿ. ಗಾಂವಾರ್ ಸಗ್ಳ್ಯಾ ಹಾಕ್ ಬೋಬ್ ಜಾಲಿ, ದುರ್ಬಳ್ಯಾಂಚೆ ತಸೆಂಚ್ ಗ್ರೇಸ್ತಾಂಚೆ ಹಿಶೆ ಬುರೂಸ್ ಜಾಲೆ - ಪೋಟ್ ಪಾಡ್ ಜಾವ್ನ್ ಪಾತಳ್ ಉದ್ಕಾಡೆ ಜಾಲ್ಲ್ಯಾಪರಿಂ! ಉಪ್ರಾಂತ್ ಥಂಯ್ ಉರ್ಲ್ಯೊ ಥೊಡ್ಯೊ ಪುಸ್ಕ್ಯೊ ಮಾತ್ರ್! ಬಿಕ್ಕಾಲ್ಲ್ಯಾಂಕ್ ಪ್ರತಿಫಳ್ ನಾ ಜಾಲೊ.
ದಿಸಾಳ್ಯಾ ಪತ್ರಿಕಾ ಯೋಜನಾಂತ್ ಸಭಾರ್ ಕ್ರಿಯಾಶೀಲ್ ಕಾಮೆಲ್ಯಾಂಚೊ ಮೆಳಾಪ್ ಜಾಲ್ಲೊ, ತಾಂಕಾಂ ವಿಚಾರ್ತೊಲೊ ಕೋಣ್ಂಚ್ ನಾಸ್ಲ್ಲ್ಯಾನ್ ತೆ ಥಂಡ್ ಪಡ್ಲೆ; ಆಮ್ಕಾಂ ಆಮಿಂಚ್ ಲಗಾಡ್ ಕಾಡ್ಲೆಂ. ಆಮ್ಚೆಂ ಪತ್ರ್ ಮೆಲೆಂ, ಯೆಮ್ಕೊಂಡಾಕ್ ಗೆಲೆಂ ಆನಿ ಪುನರ್ಜಿವಂತ್ಪಣ್ ದೆಖ್ಚೆಂ ನಾ ತೆಂ ಖಂಡಿತ್ ಜಾಲೆಂ.
ಮಂಗ್ಳುರ್ಚ್ಯಾ ಕ್ರೀಸ್ತಾಂವಾಂಚೆರ್ ಆಯಿಲ್ಲೆಂ ಏಕ್ಚ್ಚ್ ಅನ್ವಾರ್ ನ್ಹಂಯ್, ಹಾಚ್ಯಾ’ದಿಂ ಸಭಾರ್ ಯೇವ್ನ್ ಗೆಲ್ಲಿಂ ತರ್ಯೀ ಲೊಕಾನ್ ಭರ್ವಾಶ್ಯಾನ್ ಹ್ಯಾ ಯೋಜನಾಕ್ ಆಪ್ಲೊ ಪಾಟಿಂಬೊ ದಿಲ್ಲೊ, ತಾಂಚೆರ್ ಭರ್ವಾಸೊ ದವರ್ಲ್ಲೊ. ಪುಣ್ ಹ್ಯಾ ಪತ್ರ್ಕರ್ತಾಂನಿ ಹ್ಯಾ ಸರ್ವಾಚೆರ್ ಶೆಳೆಂ ಉದಾಕ್ ವೊತ್ಲೆಂ; ಉಜೊ ಪಾಲ್ವಲೊ ಆನಿ ಫಕತ್ತ್ ಧುಂವರ್ ಮಾತ್ರ್ ಉರ್ಲೊ. ಈರೋಡ್ಸ್, ಮೇಘ್ನಾ(ಮೈನಾ) ಪ್ಲ್ಯಾಂಟ್ಸ್, ಗ್ರೇಟ್ ಇಂಡಿಯಾ ಫೈನಾನ್ಸ್ ಕಂಪೆನಿ ಇತ್ಯಾದಿಂನಿ ಸಭಾರ್ ಹಿಶೆದಾರಾಂಕ್ ಘಡಾಯ್ ದಾಖವ್ನ್ ಜಾಲ್ಲೊ ಆನಿ ಆತಾಂ ಹ್ಯಾ ದಿಸಾಳ್ಯಾನ್ಯೀ ತಸಲೊಚ್ಚ್ ಆನ್ಯೇಕ್ ಘಡಾಯ್ ಹ್ಯಾ ಪತ್ರಾಚ್ಯಾ ಹಿಶೆದಾರಾಂಕ್ ದಾಖಯ್ಲೊ!
ಹಾಂವ್ ಆಯ್ಲೆವಾರ್ ಗಾಂವಾಕ್ ಗೆಲ್ಲ್ಯಾವೆಳಿಂ ಹ್ಯಾ ವಿಶಿಂ ಬರಿಚ್ಚ್ ಖಬಾರ್ ಘೆತ್ಲಿ ಆನಿ ಮ್ಹಾಕಾಚ್ ನಾಲಿಸಾಯ್ ಭೊಗ್ಲಿ! ಮ್ಹಜೆಯೀ ಹಿಶೆ ಧಿಕ್ಕಾಪಾಲ್ ಜಾಲೆ ಮ್ಹಣ್ಯಾಂ, ಸಬಾರ್ ದುರ್ಬಳ್ಯಾಂಚೆ ಕಷ್ಟಾಂಚೆ ಪಯ್ಶೆ ಗೆಲ್ಲೆ ತೆ ಆಯ್ಕಾತಾನಾ ಮ್ಹಾಕಾ ತಾಂಚಿ ಭಿರ್ಮತ್ ದಿಸ್ಲಿ.
ಆನಿ ಆತಾಂ ಹಾಂವ್ ಆಯ್ಕಾತಾಂ ಕಿತೆಂ? ತ್ಯಾ ಪತ್ರಾಚೊ ಸಂಪಾದಕ್ ಲಾಖೊಂ ರುಪಯ್ ಹಾತಿಂ ಘೆವ್ನ್ ಆತಾಂ ಇಂಗ್ಲೆಂಡಾಕ್ ಪಾವ್ಲಾ ಖಂಯ್! ಥಂಯ್ಸರ್ ತೊ ತಾಚ್ಯಾ ಕುಟ್ಮಾ ಲಾಗ್ಶಿಲ್ಯಾಂಚಾ ಶೊಪಾಂತ್ ಮಾಸ್/ಬಟಾಟೆ ವಿಕ್ತಾ ಖಂಯ್!! ತಾಕಾ ಹೆಂ ಪತ್ರ್ ಚಲವ್ನ್ ಆಸ್ತಾನಾ ಏಕಾ ಚಲಿಯೆಚಿ ಚಂಗಾಯ್ ಆಸ್ಲ್ಲಿ ಖಂಯ್!!! ತಿಂ ದೊಗಾಂಯ್ ಆತಾಂ ಇಂಗ್ಲೆಂಡಾಂತ್ ವಸ್ತಿ ಕರುನ್ ಆಸಾತ್ ಖಂಯ್!!!!
ಹಿ ಖಂಯ್ ಖಂಯ್ ಖಬಾರ್ ಆಯ್ಕೊನ್ ತುಮ್ಕಾಂಯ್ ವಚೊಂಕ್ ಮನ್ ಜಾಲೆಂ ಕೊಣ್ಣಾ ಥಂಯ್! ಗೆಲ್ಯಾರ್ ಮ್ಹಾಕಾ ಸಾಂಗಾ ಕಾಂಯ್ ಬರಿ ಖಬಾರ್ ಆಸಾ ಜಾಲ್ಯಾರ್; ಹಾಂವ್ ಪಿಲ್ಯಾದ್ ಜೊಡುಂಕ್ ತಯಾರಾಯ್ ಕರ್ತಾಂ!
-ಓಸ್ಟಿನ್ ಪ್ರಭು, ಚಿಕಾಗೊ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
