ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಕೊಳ್ಸೊ
ಆಂಡ್ರು ಡಿ’ಕುನ್ಹಾ: ಕೊಂಕ್ಣಿ ವರ್ತುಲಾಂತ್ ಹೊ ಕವಿ ಮ್ಹಣ್ ಮಾಂದ್ಚೆ ಜಾಯ್ತೆ ತರ್ಯ್ ಹಾಣೆಂ ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್ ಮ್ಹಣ್ ಹಾವೆಂ ಹ್ಯಾ ಆಧಿಂ ತವಳ್ ತವಳ್ ಸಾಂಗ್ಲಾಂ. ತಾಚ್ಯಾ ಕಾಣ್ಯಾಂಚಿ ಶ್ಯಾಥಿ ಖಂಚಿಗೀ ಮ್ಹಳ್ಯಾರ್, ವಾಚ್ಪಿ ದೊಳ್ಯಾಂನಿ ವಾಚ್ತಾಂ ವಾಚ್ತಾಂ, ಹೊ ತಾಂಚಾ ಕಾಳ್ಜಾಭಿತರ್ ರಿಗ್ತಾ ಮಾತ್ರ್ ನ್ಹಂಯ್, ವಾಚ್ಪ್ಯಾಂಚೆಂ ಸಗ್ಳೆಂ ಕಾಳಿಜ್ಚ್ ಪಿಗ್ಳಾಶೆಂ ಕರ್ತಾ. ಅಶೆಂ ಕಾಣಿ ವಾಚುನ್ ಜಾತಚ್ಚ್ ಖರೆಂಚ್ ವಾಚ್ಪ್ಯಾಚಾ ದೊಳ್ಯಾಂನಿ ದುಃಖಾಂ ಉದೆತಿತ್ ತರ್ ಕಾಂಯ್ ನವಾಲ್ ನಾ. ಆಪ್ಲ್ಯಾ ಕಾಣ್ಯಾಂನಿ ಮನ್ಶ್ಯಾ ಮೋಗ್ ಉಕ್ಲುನ್ ಧರ್ಚಿ ಕಲಾ ಹೊ ಭೋವ್ ಬರೆಂ ಕರ್ನ್ ಜಾಣಾಂ.
ಆಂಡ್ರು ಡಿ’ಕುನ್ಹಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ಬ್ರದರ್ ರೊಕಿ
ಆಂಡ್ರು ಡಿ’ಕುನ್ಹಾ
"ಬಾಟ್ಲಿ ಉಂಡಾ....ಬಾಟ್ಲಿ"
ತಿತ್ಲ್ಯಾರ್ ರಾಣಿ ಘೊಂಕ್ಲೆಂ. ಆಳೆನ್ ವಾಟುನ್ ಆಸ್ಲ್ಲ್ಯಾ ಫಿಲುಬಾಯೆನ್ ಉಟೊನ್ ರಸ್ತ್ಯಾಕ್ ತಿಳ್ಳೆಂ. ಕೊಣ್ಯ್
ದಿಸ್ಲೊ ನಾ. ಸೊಪ್ಯಾರ್ ವಚೊನ್ ದಾರ್ಯೆಂತ್ಲ್ಯಾನ್ ಗೆಟಿಲಾಗಿಂ ಭಾಯ್ರ್ ತಿಳ್ಳೆಂ.
ಸುಮಾರ್ ಚೊವ್ದಾ ಪಂದ್ರಾ ವರ್ಸಾಂಚೊ ಚೆಡೊ ಎಕ್ಲೊ ಗೊಣಿ ಖಾಂದ್ಯಾರ್ ಘಾಲ್ನ್ ಗೆಟಿಲಾಗಿಂ ರಾವ್ಲ್ಲೊ.
"ಬಾಟ್ಲಿ ಉಂಡಾ ಬಾಟ್ಲಿ...."
ಪಿಲುಬಾಯ್ ತಶೆಂ ಪುರಾ ಪರ್ಕ್ಯಾಂಕ್ ಭಿತರ್ ರೀಗ್ ದಿಂವ್ಚಿ
ಸಸರಾಯೆಚಿ ಬಾಯ್ಲ್ ನ್ಹಂಯ್. ತಿಚ್ಯಾ ಹುಕ್ಮೆ ವಿಣೆ ಅಶೆಂ
ಪುರಾ ಮಾರೊಗ್ ಭಂವ್ತೆಲೆ ಗೆಟಿ ಭಿತರ್ ರಿಗ್ಲೆ ತರ್ ತಿಣೆಂ ಘಾಲ್ಚೆ ದೆಂಕ್ಣೆ ಧಾ ಘರಾಂಕ್ ಆಯ್ಕಾತಾಲೆ.
ಪಿಲುಬಾಯೆಚಾ ಘರ್ಕಾರಾಕ್ ಹಂಪನ್ಕಾಟ್ಯಾರ್ ಎಕಾ ವ್ಹಡ್ಲ್ಯಾ
ಪ್ರಿಂಟಿಗ್ ಪ್ರೆಸ್ಸಾಂತ್ ಕಾಮ್. ಸಾಕಾಳಿಂ ನೋವ್ ವೊರಾರ್ ಗೆಲೊ ತರ್ ದೊನ್ಪಾರಾಂ ದೋನ್
ವೊರಾರ್ ಜೆವ್ಣಾಕ್ ಪಾಟಿಂ. ಮಾಗಿರ್ ತೀನ್ ವೊರಾರ್ ವಚೊನ್ ರಾತಿಂ ಆಟ್
ವೊರಾರ್ಶೆಂ ಪಾಟಿಂ.
ಪಿಲುಬಾಯೆಚಿ ಅಂಕ್ವಾರ್ ನಣಂದ್ ಎಕ್ಲಿ ಘರಾಚ್ ಆಸಾನಾತ್ಲ್ಲಿ. ಸಾಕಾಳಿಂಪಡೆ
ಸೆಜಾರಾ ಗಜಾಲಿ ಕರುಂಕ್ ಗೆಲ್ಲಿ ದೊನ್ಪಾರಾಂ ಜೆವ್ಣಾಕ್ ವೆಳಾರ್
ಹಾಜರ್ ಜಾತಾ. ಆಜ್ ಕೊಣ್ ಕಂಕ್ನಾಡಿ ಅಸ್ಪತ್ರೆಂತ್ ಆಸಾ ಮ್ಹಣ್ ಬರೆಂ ಕಾಪಡ್
ಪುಣೀ ನ್ಹೆಸೊನ್ ಪಿಡೆಸ್ತಾಂಚಾ ಭೆಟೆಕ್ ಗೆಲ್ಯಾ ಮಾದಮ್ ಆಮ್ಚಿ. ತಿ ಘರಾ
ನಾತ್ಲ್ಯಾರ್ಚ್ ಬರೆಂ. ನಾ ತರ್ ಮ್ಹಾತಾರ್ಯೆಚೆಂ ಪಿರಿಪಿರಿ ಆಯ್ಕೊಂಚೆಂ ಕೊಣೆ? ಖಂಚಿಂಯ್ ಕಾಮಾಂ
ಸಾರ್ಕಿಂ ಕೆಲ್ಲಿಂಚ್ ನಾಂತ್. ಹ್ಯಾ ಲೊಕಾನ್ ರಾಂದುನ್ ದವರ್ಲ್ಯಾರ್ ಉಸುನ್ ಖಾಂವ್ಕ್ ತಯಾರ್ ಯೆತಾ.
ಸೊಸುಂಕ್ ಜಾಯ್ನಾ. ಕರ್ಚೆಂ ಕಿತೆಂ? ಎಕ್ ಕಾಡಿ ಹಾಂಗಾಚಿ ಕಾಡ್ನ್ ಥಂಯ್ ದವರ್ನಾ.
ಸಾಂಗ್ಲ್ಯಾರ್ ತಿಚಿಂಚ್ ಕಾನುನಾಂ ಉಲಯ್ತಾ ಮ್ಹಾತಾರಿ...
ಪಿಲುಬಾಯೆನ್ ಕುಂಕ್ಡಾ ಗುಡಾ ಅಡೊಸಾಕ್ ಥೊಡ್ಯೊಸ್ಯೊ
ಬೊತ್ಲ್ಯೊ ರಾಸ್ ಘಾಲ್ಲ್ಯೊ. ಶೆಂಬೊರಾಂ ವಯ್ರ್ ಜಾತಿತ್
ಲೇಖ್ ಕೆಲ್ಯಾರ್. ದುಬಾಯ್ಚೊ ಪೂತ್ ಎಕಾ ಮ್ಹಯ್ನ್ಯಾಚಾ ರಜೆರ್ ಯೇವ್ನ್
ವಚೊನ್ ಪಂದ್ರಾ ದೀಸ್ ಜಾಲ್ಲೆ. ತ್ಯಾಚ್ ವೆಳಾರ್ ಕುವೈಟ್ ಥಾವ್ನ್ ಶಿರ್ವಾಂಚೊ ಜಾಂವಂಯ್ ಗಾಂವಕ್ ಆಯಿಲ್ಲೊ ಜಾಲ್ಲ್ಯಾನ್ ದೊಗಾಂಯ್ನೀ ಇಶ್ಟಾಂ
ಮಂತ್ರಾಂಕ್ ತಾಂಕಾ ಹಾಂಕಾಂ ಅಪವ್ನ್ ಕಾಂಯ್ ಇಲ್ಲ್ಯೊ ಬೊತ್ಲ್ಯೊ
ಸುಕಯಿಲ್ಲ್ಯೊ ನ್ಹಂಯ್. ಪಯ್ಶಾಂಚೆಂ ಕೇರ್ ನಾ
ಹಾಂಕಾಂ. ಗಲ್ಫಾಚೆ ಪಯ್ಶೆ ಆಸಾತ್ ಮ್ಹಣ್ ಮಜಾ ಮರ್ತಾತ್. ತಾಂಚೆ
ಪಯ್ಶೆ ನೆ? ಸಾಂಗ್ಚೆಂ ಕೊಣಾಕ್?
ಬೊತ್ಲ್ಯೊ, ಪರ್ನೆಂ ಲೊಂಕಾಡ್, ಪರ್ನಿಂ ಕಾಗ್ದಾಂ ಜಾಯ್
ಮ್ಹಣ್ ರಸ್ತ್ಯಾರ್ ಉಲೊ ಮಾರ್ನ್ ವೆಚೆ ಕಾಂಯ್ ಉಣೆ ಜಣ್
ನಾಂತ್...ಪುಣ್ ಚೋರ್ ಕೋಣ್ ಬರೊ ಕೋಣ್ ಮ್ಹಣ್ ಪಾತ್ಯೆವ್ಚೆಂ ಕಶೆಂ. ಕನಿಶ್ಟ್ ಕಾಳ್
ಹೊ....
ಆದ್ಲ್ಯಾ ಮ್ಹಯ್ನ್ಯಾಂತ್ ಸಾಂ ಪೆದ್ರು ವಾಡ್ಯಾಂತ್ ಮೊಟ್ಯಾ
ಸೆಲ್ಲಿಬಾಯೆಗೆರ್ ಸಾಕಾಳಿಂ ದೊಗ್ ಜಣ್ ಯೇವ್ನ್ ಬೊತ್ಲ್ಯೊ,
ಲೊಂಕಾಡ್, ಕಾಗ್ದಾಂ ಮೊಲಾವ್ನ್ ವ್ಹರ್ನ್ ಗೆಲ್ಲೆ. ರಾತಿಂ ಚೊರಾಂನಿ
ಸೆಲ್ಲಿಬಾಯೆಕ್ ಬಾಂದುನ್ ಘಾಲ್ನ್, ಭುರ್ಗ್ಯಾಂಕ್ ಭೆಶ್ಟಾವ್ನ್ ಭಾಂಗರ್, ಕಾಪ್ಡಾಂ ಆನಿ ಕಿತೆಂ
ಪುರಾ ವ್ಹರ್ನ್ ಗೆಲ್ಲೆ. ಜೀವ್ ದವರ್ಲ್ಲ್ಯಾಕ್ ದೆವಾಕ್ ಆರ್ಗಾಂ
ದೀಜಾಯ್. ಆನಿ ಕಿತ್ಲೆಕಡೆ ಅಶೆಂ ಘಡ್ಲಾಂ ಗಿ ಕೊಣ್ಣಾ....
ತಿ ಗಜಾಲ್ ಸೊಡ್ಯಾಂ. ಪೋರ್ ಪೋರ್ ಧುವೆಕ್ ಕಾಜಾರ್ ಕರ್ನ್
ದಿಲ್ಲ್ಯಾ ಶಿರ್ವಾಂತ್ ಎಕ್ ಪಾಪ್ ಸ್ತ್ರೀಯೆಚೊ ಜೀವ್ಚ್ ಕಾಡುಂಕ್
ನಾಂಗಿ ತ್ಯಾ ಕಾಸಪ್ಪಿ ಚೊರಾಂನಿ. ಚಿಂತಾನಾ ಆಂಗಾಚಿ ಲೋಂವ್ ಉಭಿ ಜಾತಾ. ವಿಗಾರ್
ಶೆರ್ಮಾಂವಾರ್ ಕಿತ್ಲೆಂ ಸಾಂಗ್ತಾ ಕಾಂಯ್ ಬೆಶ್ಟೆಂ ನ್ಹಂಯ್.
ಘಡ್ಚೆಂ ಘಡ್ತಾ. ನಶಿಬಾಂತ್ಲೆಂ ಚಕಂವ್ಕ್ ಜಾತಾವೆ? ತರೀ ಆಮ್ಚಿ ಚತ್ರಾಯ್ ಆಮಿ ಕರಿಜಾಯ್ಗಿ
ನಾಕಾ?
ಸೊಪ್ಯಾ ಥಾವ್ನ್ ತಿಳ್ಚಾ ಪಿಲುಬಾಯೆಕ್ ಪಳೆವ್ನ್ ಚೆಡೊ "
ಬಾಯಮ್ಮಾ ಬಾಟ್ಲಿ ಉಂಡಾ...." ಮ್ಹಣಾಲೊ.
ಚೆಡ್ಯಾಕ್ ಮಿಶ್ಯೊ ಸಾರ್ಕ್ಯೊ ಫುಟೊಂಕ್ ನಾಂತ್. ನೆಣ್ತೊಸೊ
ದಿಸ್ತಾ. ಬೊತ್ಲಿಂಕ್ ಕಿತ್ಲೆ ದಿತಾ ಪಳೆವ್ಯಾಂ...ಬರೆ ದಿಲ್ಯಾರ್ ವಿಕ್ಚೊ...ಅಶೆಂ ಚಿಂತುನ್
"ಉಲಾಯ್ ಬರೋಡ್ಚಿ ಅವ್ಲೆ ಉಂತು" ಮ್ಹಣ್ ಫಿಲುಬಾಯ್
ವೆಗಿಂ ವೆಗಿಂ ಭಿತರ್ ಗೆಲಿ. ಆಳೆನ್ ವ್ಹಾನಾಕ್ ಪುಸುನ್ ಮಾಸ್ಳೆಕ್ ಕುರ್ಪೊಣ್ ಧಾಂಪುನ್
ಹಾತ್ ಧುವ್ನ್ ಪಾಲಂವ್ ಅಂರ್ಧುನ್ ಫಿಲುಬಾಯ್ ಭಾಯ್ರ್ ಆಯ್ಲಿ.
ಭಿತರ್ ಯೆನಾಕಾ ಮ್ಹಣ್ ಸಾಂಗ್ಲ್ಲೆಂ ಚೆಡ್ಯಾಕ್, ಸಾರ್ಕೆಂ ಆಯ್ಕೊಂಕ್
ನಾಂಗಿ ಮ್ಹಣ್. ಚೆಡೊ ಗೆಟಿ ಭಿತರ್ ರಿಗೊನ್ ಹೆಣೆ ತೆಣೆ ಉಡಯೆಲ್ಲೆಂ
ಲೊಂಕ್ಡಾಚೆಂ ಕಿತೆಂ ಮೆಳಾತ್ಗಿ ಮ್ಹಣ್ ಸೊಧ್ತಾಲೊ.
ಫಿಲುಬಾಯೆಚಾ ತಕ್ಲೆಕ್ ಚಡ್ಲೆಂ. ಸಮಾ ಚಾರ್ ಧೆಂಕ್ಣೆ ಘಾಲೆ. ಘೊಂಕ್ಚೆಂ ಅನಿಕೀ ರಾವೊಂಕ್
ನಾತ್ಲ್ಲ್ಯಾ ರಾಣಿಕ್ಯ್ ದೋನ್ ಧೆಂಕ್ಣೆ ಪಡ್ಲೆ. ರಾಣಿಕ್
ವೋಡ್ನ್ ವರ್ನ್ ಘರಾ ಪಾಟ್ಲ್ಯಾನ್ ಬಾಂದ್ಲೆಂ ಫಿಲುಬಾಯೆನ್.
ಕುಂಕ್ಡಾ ಗುಡಾಚ್ಯಾ ಅಡೊಸಾಕ್ ಆಸ್ಲ್ಲ್ಯೊ ಬೊತ್ಲ್ಯೊ ದಾಕಯ್ಲ್ಯೊ
ಫಿಲುಬಾಯೆನ್ ಚೆಡ್ಯಾಕ್. ಚೆಡ್ಯಾಚೆ ದೊಳೆ ಪರ್ಜಳ್ಳೆ. ಬೊತ್ಲಿಕ್ ದೇಡ್ ರುಪಯ್ ದಿತಾಂ
ಮ್ಹಣ್ ತೊ ಬೊತ್ಲಿ ಲೇಕ್ ಕರುಂಕ್ ಲಾಗ್ಲೊ. ಶೆಂಭೊರ್ ಆನಿ
ಪಾಂಚ್ ಆಸ್ಲ್ಲ್ಯೊ. "ರಡ್ಡ್ ರುಪಯ್ ಕೊರೋಡೇ"
ಮ್ಹಣ್ ಫಿಲುಬಾಯ್ ಹಟಾಕ್ ಪಡ್ಲಿ. ಮಾಗಿರ್ ವರ್ಜಿ ಕರ್ನ್ ಚಕ್ಕಡ್
ಬೊತ್ಲ್ಯೊ ದೊನ್ಶಿಂ ರುಪಯಾಂಕ್ ಒಪ್ವಾಲಿ. ಮಾಗಿರ್ ಬೊತ್ಲಿ
ಸಾಂಗಾತಾ ನಾಕಾ ಜಾಲ್ಲೆ ಡಬ್ಬೆ, ಬುರಾಕ್ ಜಾಲ್ಲಿಂ ತೊಪ್ಲಿಂ, ಫುಟ್ಲ್ಲ್ಯೊ
ಬಾಲ್ದ್ಯೊ, ಕೊಂಕ್ಣಿ ಪೆಪರಾಂ ಪುರಾ ದೀವ್ನ್ ಅಡೆಯ್ಶಿಂ ರುಪಯ್
ಮೆಜುನ್ ಕಾಣ್ಘೆಲೆ ಫಿಲುಬಾಯೆನ್.
ಫಿಲುಬಾಯೆಕ್ ಖುಶಿ ಜಾಲಿ. ಸಾಂಜೆರ್ ಬೊಕ್ರ್ಯಾಮಾಸ್ ಹಾಡ್ಚೆಂ
ಮ್ಹಣ್ ಚಿಂತ್ಲೆಂ.
ಅಳೆನ್ ಕಾಡುನ್ ಮುಗ್ದಿತಾನಾ ನಾರ್ಲ್ ಕಾಡ್ಚೊ ಸಿಮಾಂವ್ ಆಯ್ಲೊ. ಸಿಮಾಂವ್ ಬರೊ
ಮ್ಹನಿಸ್. ಬೆಶ್ಟೆಂ ಮ್ಹಳ್ಯಾರ್ ಪಾವಾನಾ. ವ್ಹಾಡ್ಯಾಚಾ
ಲೊಕಾಕ್ ಗರ್ಜೆ ಆಕಾಂತಾಕ್ ಪಾಂವ್ಚೊ ಮನಿಸ್ ತೊ. ಚಾರ್
ಮಾಡಾಂಚೆ ನಾರ್ಲ್ ಕಾಡ್ಲ್ಲ್ಯಾಕ್ ಚಾರ್ ನಾರ್ಲ್ ತಾಕಾ ದಿಲೆ
ಫಿಲುಬಾಯೆನ್. ನಾಂ ತರ್ ಆಜ್ ನಾರ್ಲ್ ಕಾಡ್ಚೆ ಮನಿಸ್ ಖಂಯ್ ಮೆಳ್ತಾತ್?
ರಾಂದಾಪ್ ತಯಾರ್ ಜಾಲೆಂ. ತಾರ್ಲ್ಯಾಂಚಿ ಕಡಿ ಆನಿ ಬರಿ ಪಳೆವ್ನ್ ಥೊಡೆ
ಸಾರವ್ನ್ ದವರ್ಲೆ. ಭಾಜುಂಕ್.
ದನ್ಪರಾಂ ವೊತಾಭರಾಕ್ ಜೆವ್ಣಾಕ್ ಯೆಂವ್ಚಾ ಯೆಜ್ಮಾನ್ಯಾಕ್ ರುಚಿಚೆಂ ರಾಂದಪ್
ವಾಡ್ಚೆಂ ಮ್ಹಳ್ಯಾರ್ ಫಿಲುಬಾಯೆಕ್ ವರ್ತಿ ಧಾದೊಸ್ಕಾಯ್. ಘೊವ್ ಕಿತ್ಲೊ ಮೊವಾಳ್ಗಿ ಖಂಚಾಯ್
ಸಂಗ್ತಿಂನಿ ಇಲ್ಲೆಂ ಚಡುಣೆಂ ಜಾಲ್ಯಾರ್ ತಿತ್ಲೊಚ್ ರಾಗಿಷ್ಟ್ ಮ್ಹಣ್ ತಿ ಬರೀ ಜಾಣಾ.
ಪುಣ್ ರಾಂದುನ್ ಜಾಲ್ಲೆಂಚ್ ನಣಂದ್ ಯೇವ್ನ್ ಭೊಶಿ ಭರ್ನ್ ಉಸ್ಪುನ್
ಮಿಟಿಯೊ ಮಾರ್ನ್ ಖಾತಾನಾ ಫಿಲುಬಾಯೆಚೆಂ ಜಾಳ್ ಸಾಂಗ್ಚೆಂ
ನ್ಹಂಯ್.
ನಾಣ್ಯೆಂತ್ ಮಾಂಡ್ಯಾಂತ್ ಉದಕ್ ಖಾಲಿ ಜಾಲ್ಲೆಂ. ಉದಕ್ ಭರ್ನ್ ತಾಪವ್ಯಾಂ
ಮ್ಹಣ್ ಫಿಲುಬಾಯ್ ಕೊಳ್ಸೊ ಸೊಧಿಲಾಗ್ಲಿ. ತಾಂಬ್ಯಾಚೊ
ವ್ಹಡ್ಲೊ ಕೊಳ್ಸೊ ನ್ಹಾಣ್ಯೆಂತ್ ನಾತ್ಲ್ಲೊ. ಸಕಾಳಿಂ ಉದಕ್ ಭರ್ನ್ ಕೊಳ್ಸೊ
ಬಾಂಯ್ ಕಾಟ್ಯಾಲಾಗಿಂ ಸೊಡ್ಲ್ಲೊ ತಿಕಾ ಉಡಾಸ್ ಆಯ್ಲೊ.
ಘರಾ ಮುಖಾರ್ಚ್ ಬಾಂಯ್. ಪುಣ್ ಥಂಯ್ ಕೊಳ್ಸೊ
ನಾತ್ಲ್ಲೊ. ಬಾಂಯ್ಚಾ ಕಾಟ್ಯಾಲಾಗಿಂಚ್ ಕೊಳ್ಸೊ ಉದ್ಕಾ ಸಮೇತ್
ಸೊಡ್ಲ್ಲೊ ಸಾರ್ಕೊ ಉಡಾಸ್ ತಿಕಾ ಆಸ್ಲ್ಲೊ. ತರೀ ಸಗ್ಳ್ಯಾಂನಿ
ಸೊಧ್ಲೆಂ. ಸೊಪ್ಯಾರ್, ಕುಜ್ನಾಂತ್, ಜಾಲಾಂತ್, ಕಾಕ್ಸಾಂತ್, ಆಲ್ತಾರೀ ಕುಡಾಂತ್ಯ್
ಸೊದ್ಲೆಂ. ನ್ಹಾಣ್ಯೆಂತ್ ದೋನ್ ತೀನ್ ಪಾವ್ಟಿಂ ಸೊಧ್ಲೆಂ.
ತಾಂಬ್ಯಾಚೊ ಕೊಳ್ಸೊ ನಾ.
ಫಿಲುಬಾಯೆಚಿ ತಕ್ಲಿ ಪಿಸಾಂತುರ್ ಜಾಲಿ. ಆತಾಂ ಯೆಜ್ಮಾನ್ ಯೆತಾನಾ ತಾಕಾ ಕಳ್ಳ್ಯಾರ್ ರಾಗಾನ್ ಉಚಾಂಬಳ್ ಜಾಂವ್ಕ್ ಆಸಾ. ತಾಚ್ಯಾ ಭಾರೀ
ಮೊಗಾಚೊ ಕೊಳ್ಸೊ ತೊ. ತಾಚ್ಯಾ ಅಬಾಚ್ಯಾ ಕಾಳಾ ಥಾವ್ನ್ ಆಯಿಲ್ಲೊ ಕೊಳ್ಸೊ ಖಂಯ್ ತೊ....
ಖಂಯ್ ಗೆಲೊ ಕೊಳ್ಸೊ?....ಸಾಕಾಳಿಂ ಸೈಕಾಲಾಚಿ ಬೆಲ್ಲ್
ಮಾರ್ನ್ ಮಾಸ್ಳೆಚೊ ನಾಯ್ತೊ ಮಯ್ಯೆದಿ ಆಯಿಲ್ಲೊ. ತೊ
ಸದಾಂಚೊ ಮನಿಸ್. ಪುಣ್ ತಾಚಿ ಮಾಸ್ಳಿ ದಾಂಬುನ್ ಪಳೆತಾನಾ
ಮೋವ್ ಜಾಲ್ಲಿ ಜಾಲ್ಲ್ಯಾನ್ ನಾಕಾ ಮ್ಹಣ್ ಮಾರ್ಗಾ ದೆಗೆ ಥಾವ್ನ್ಂಚ್ ಚೊಡ್ಲ್ಲಿ. ತೊ ತಾಚೆ
ವಾಟೆನ್ ಗೆಲ್ಲೊ. ಮಾಗಿರ್ ಅಪುಣ್ಂಚ್ ಮಾರ್ಕೆಟಿಕ್ ವಚೊನ್ ಮಾಸ್ಳಿ
ಹಾಡ್ಲ್ಲಿ. ಹಾಂ... ತೆದಾಳಾ ಘರಾ ನಣಂದ್ ಆಸ್ಲ್ಲಿ. ತಿಚಿ ಘುಗಿಚೆ ದೊಳೆ. ತಿಚಾ
ಮುಖಾರ್ ಕೊಣೆಂಯ್ ಕೊಳ್ಸ್ಯಾಕ್ ಹಾತ್ ಲಾಗಂವ್ಕ್ ಸಾದ್ಯ್ಚ್
ನಾ. ಮಾಗಿರ್ ಆಯಿಲ್ಲೊ ತೊ ಬೊತ್ಲಿ ವ್ಹೆಲ್ಲೊ ಚೆಡೊ.... ಪಳೆಂವ್ಕ್
ನೆಣ್ತೊ ದಿಸ್ತಾಲೊ ತರ್ಯ್ ಕೊಣ್ ಪಡ್ಪಶ್ಯಾಚೊ ಪೂತ್
ಮ್ಹಣ್ ಕೊಣ್ ಜಾಣಾ. ಕೊಣಾಚಾ ಕಾಳ್ಜಾಕ್ ಹಾತ್ ಘಾಲ್ನ್ ಪಳೆಂವ್ಕ್ ಜಾತಾವೆ?
ನಾ. ಬೊತ್ಲ್ಯೊ ವ್ಹರುಂಕ್ ಯೆತಾನಾ ಪಳೆವ್ನ್ ದವರ್ನ್
ಮಾಗಿರ್ ವ್ಹಳೂ ಯೇವ್ನ್ ಕೊಳ್ಸೊ ಉಸ್ಳ್ಯಾಯ್ಲೊ ಜಾಯ್ಜಯ್.
ನಾಂ ತರ್ ಖಂಯ್ ವೆಚೊ ಕೊಳ್ಸೊ? ರಾಣಿಕ್ ಘರಾ ಪಾಟಿಂ ಬಾಂದುನ್ ಚೂಕ್ ಕೆಲಿ.
ನಾರ್ಲ್ ಕಾಡ್ಚೊ ಸಿಮಾಂವ್ಯ್ ಆಯಿಲ್ಲೊ. ತೊ ಬಂಗಾರ್ ಮನಿಸ್. ತಾಕಾ ಬರೆಂ ಒಳ್ಕಾತಾಂ.
ಫಿಲುಬಾಯೆಕ್ ತ್ಯಾ ಬೊತ್ಲಿ ವ್ಹೆಲ್ಲ್ಯಾ ಚೆಡ್ಯಾಚೆರ್ ಕಠಿಣ್ ದುಭಾವ್ ಜಾಲೊ. ಕಿತ್ಲೆಂ ಚತ್ರಾಯೆನ್ ಆಸ್ಲ್ಯಾರ್ಯ್ ಅಶೆಂ ಜಾಲೆಂ ನೆ? ಆತಾಂ ತ್ಯಾ ಅನ್ನಾಡ್ಯಾಕ್ ಖಂಯ್
ಮ್ಹಣ್ ಸೊಧ್ಚೊ?
ಸೆಜಾರ್ಚಾ ಪ್ರೆಸ್ಸಿ ಬಾಯೆಕ್ ಆನಿ ವಿನ್ನಿ ಬಾಯೆ ಉಲೊ ಮಾರ್ನ್ ಕೊಳ್ಸೊ ಚೊರಿ ಜಾಲ್ಲಿ ಖಬಾರ್
ಬೊಬಾಟುನ್ ಸಾಂಗ್ಲಿಚ್. ಫಿಲುಬಾಯೆಚಾ ಬೊಬಾಟೆಕ್ ರಾಣಿ ಉಚಾಂಬಳ್ ಜಾವ್ನ್ ಘೊಂಕ್ತಾನಾ
ಸೆಜಾರ್ಚಾ ರಾಜಾನ್, ಬುಲ್ಲಾ ಆನಿ ಬೊನಿನ್ ಸಾಂಗಾತ್ ದಿಲೊಚ್. ಖಬಾರ್ ಧಾ ಘರಾಂಕ್
ಪಾವ್ಲಿ. ಚೆಡೊ ತೆಣೆಂ ಸಗ್ಳ್ಯಾಂನಿ ಗೆಲ್ಲೊ ಜಾಲ್ಲ್ಯಾನ್ ತಾಂಚೆಂ ತಾಂಚೆಂ ಕಿತೆಂ ಚೊರಿ ಜಾಲಾಂ
ಮ್ಹಣ್ ತಿಂ ಸೊಧಿಲಾಗ್ಲಿಂ.
ರವಿ ಶೆಟ್ಟಿಚಾ ಮಾಡಾಂಚೆ ನಾರ್ಲ್ ಕಾಡ್ನ್ ಆಸ್ಲ್ಲ್ಯಾ ಸಿಮಾಂವ್ಕ್ಯ್ ಖಬರ್
ಪಾವ್ಲಿ. ತೊ ಕೊಣಾಚಾಯ್ ಗರ್ಜೆ ಆಕಾಂತಾಕ್ ಪಾಂವ್ಚೊ ಮನಿಸ್. ಉಟಾಉಟಿಂ
ಫಿಲುಬಾಯೆಗೆರ್ ಧಾಂವೊನ್ ಆಯ್ಲೊಚ್.
"ಕಶೆಂ ಪುಣೀ ಚೆಡ್ಯಾಕ್ ಧರ್ನ್ ಕೊಳ್ಸೊ ಹಾಡ್ ಸಿಮಾಂವ್, ತುಜೊ
ವ್ಹಡ್ಲೊ ಉಪ್ಕಾರ್ ಜಾಯ್ತ್." ಫಿಲುಬಾಯೆನ್ ಪರಾತ್ಲೆಂ.
"ಕಾಂಯ್ ಭಿಯೆನಾಕಾಗೆ.... ಹಾಂವ್ ಹೆಣೆಂ ವೆತಾಂ. ತುಂ ತೆಣೆಂತ್ಲ್ಯಾನ್
ವಚ್. ತೊ ಚೆಡೊ ಖಂಯ್ ವೆತಾ ಪಳೆವ್ಯಾಂ" ಧಯ್ರ್ ದೀವ್ನ್ ಸಿಮಾಂವ್ ರಸ್ತ್ಯಾಚಾ ಎಕಾ ಕುಶಿಕ್ ಗೆಲೊ. ತಾಚ್ಯಾ
ಪಾಟ್ಲ್ಯಾನ್ ಚಾರ್ ಪಾಂಚ್ ಚೆಡೆ ಗೆಲೆ. ಫಿಲುಬಾಯ್ ಘರಾಕ್
ಬೀಗ್ ಘಾಲ್ನ್ ರಾಣಿಕ್ ಗೆಟಿಲಾಗಿಂ ಬಾಂಧುನ್ ಅನ್ಯೇಕಾ ಕುಶಿಕ್ ಗೆಲಿ. ತಿಂ
ಸರಾಂಸರಾಂ ವೆತಾನಾ ತಿಚಾ ಪಾಟ್ಲ್ಯಾನ್ ಥೊಡಿಂ ಬಾಯ್ಲಾಂ ಆನಿ ಭುರ್ಗಿಂ ಧಾಂವಾಲಾಗ್ಲಿಂ.
ಎಕಾ ಗುಡಾ ಆಂಗ್ಡಿ ಚೆಡೊ ಸೊಡಾ ಪಿಯೆವ್ನ್ ಆಸ್ಲ್ಲೊ. ಫಿಲುಬಾಯೆನ್ ತಾಕಾ ಪಳೆಲೆಂಚ್ ಕಲ್ವೇ...ಕಲ್ವೇ
ಪತ್ತ್ಲೆ" ಮ್ಹಣ್ ಬೊಬೊ ಮಾರ್ಲ್ಯೊಚ್.
ಆತಾಂ ಮಾರ್ ಪಡ್ತಾತ್ ಮ್ಹಣ್ ಚೆಡೊಯ್ ಧಾಂವಾಲಾಗ್ಲೊ. ಕೊಣೆಂಗಿ ಎಕ್ಲ್ಯಾನ್ ಚೆಡ್ಯಾಕ್ ಧರ್ಲೊ.
ಫಿಲುಬಾಯೆನ್ ಪಾಲಂವ್ ಅರ್ದುಂನ್ ಬಾಂದುನ್ ರಪರಪ ಕರ್ನ್ ಚೆಡ್ಯಾಚಾ ಕಾನ್ಸುಲಾಕ್
ವ್ಹಾಜಯ್ಲೆಂಚ್. ಬಾಕಿಚಾನಿಂಯ್ ಬಾಕಿ ದವ್ರುಂಕ್ ನಾ.
ಚೆಡೊ ಕಂಗಾಲ್.
ತಾಚೆಲಾಗಿಂ ಆತಾಂ ಖಾಲಿ ಗೊಣಿ ಆಸ್ಲ್ಲಿ. ಬೊತ್ಲ್ಯೊ ನಾತ್ಲ್ಲೊ. ಕೊಳ್ಸೊಯ್
ನಾತ್ಲ್ಲೊ. ತಾಂಬ್ಯಾಚೊ ಕೊಳ್ಸೊ ಖಂಯ್ ಆಸಾ ಮ್ಹಣ್
ಫಿಲುಬಾಯೆನ್ ಧೆಂಕ್ಣೆ ಘಾಲ್ತಾನಾ ಸಗ್ಳಿ ಗುಡಾಂಗಡ್ಚ್
ಹಾಲ್ಲಿ.
ಚೆಡ್ಯಾನ್ ಆಪ್ಣೆ ಚೊರುಂಕ್ ನಾ ಮ್ಹಣ್ ಹಾತ್ ಜೊಡ್ತಾನಾ ಕೊಣೆಂಯ್ ಕಾನ್
ಹಾಲಯ್ಲೆ ನಾಂತ್. "ಪೊಲಿಸಾಂಕ್ ದಿತಾಂ, ಜೈಲಾಕ್ ಘಾಲ್ತಾ..ಫಾಶಿ ದಿತಾಂ"
ಮ್ಹಣ್ ಫಿಲುಬಾಯೆನ್ ಭೆಶ್ಟಾಯ್ಲೆಂ. ಚೆಡೊ ರಡಾಲಾಗ್ಲೊ.
ನಿಮಾಣೆ ಎಕಾ ಪ್ರಾಯೆಸ್ತಾನ್ ಇಲ್ಲ್ಯಾ ಮೊವಾಳಾಯೆನ್
ಬೊತ್ಲ್ಯೊ ಪುರಾ ಖಂಯ್ ದವರ್ಲ್ಯಾಯ್ ಮ್ಹಣ್ ವಿಚಾರ್ಲೆಂ. ಚೆಡೊ ರಡೊನ್ಂಚ್
ಸುಮಾರ್ ಪಯ್ಸ್ ಎಕಾ ಗುಡಾ ಆಂಗ್ಡಿ ತಾಂಕಾ ಅಪವ್ನ್ ವರ್ನ್ ಗೆಲೊ. ಥಂಯ್ ತಾಣೆ
ಮೊಲಾವ್ನ್ ವ್ಹೆಲ್ಲ್ಯೊ ಬೊತ್ಲ್ಯೊ, ಡಬ್ಬೆ, ಪ್ಲಾಸ್ಟಿಕ್ ಆನಿ ಕಿತೆಂ ಕಿತೆಂ ಆಸ್ಲ್ಲೆಂ. ಎಕ್ ತಾಂಬ್ಯಾಚೊ ಕೊಳ್ಸೊ ಆನಿ ಏಕ್ ಅಲ್ಯುಮಿನಿಯಮ್ ಕೊಳ್ಸೊಯ್ ಆಸ್ಲ್ಲೊ.
ಫಿಲುಬಾಯ್ ತೊ ಆಪ್ಣಾಚೊ ಕೊಳ್ಸೊ ನ್ಹಂಯ್ ಮ್ಹಣಾಲಿ ಆನಿ ಕೊಳ್ಸೊ ಚೆಡ್ಯಾನ್ ವಿಕುನ್ ಕೆಲೊ
ಮ್ಹಣ್ ಬೊಬಾಟ್ಲಿ.
ತಿತ್ಲ್ಯಾರ್ ಸುತ್ತು ಮಾರ್ನ್ ಸಿಮಾಂವ್ಯ್ ಥಂಯ್ಸರ್
ಪಾವ್ಲೊ. ತಾಣೆಂಯ್ ಚೆಡ್ಯಾಕ್ ಸಾತ್ ಆಟ್ ಮಾರ್ ಬಸಯ್ಲೆ. ಚೆಡ್ಯಾಚೆ
ವೋಂಟ್ ಫುಟೊನ್ ರಗತ್ ಆಯ್ಲೆಂ. ದೋನ್ ದಾಂತ್ ನಿಕಳ್ಳೆ.
"ತುಜೊ ಕೊಳ್ಸೊ ದೀನಾ ಜಾಲ್ಯಾರ್ ಹೊ ಕೊಳ್ಸೊ ವ್ಹರ್ಗೆ" ಸಿಮಾಂವ್ನ್ ಥಂಯ್ ಆಸ್ಲ್ಲೊ ತಾಂಬ್ಯಾಚೊ ಕೊಳ್ಸೊ
ವೋಡ್ನ್ ಫಿಲುಬಾಯೆಕ್ ದಿಲೊ.
ಚೆಡೊ ಬೊಬಾಟ್ಲೊ. ಕೊಣ್ಯ್ ಆಯ್ಕಾಲೆನಾಂತ್.
ಫಿಲುಬಾಯೆಕ್ ಸಮಾಧಾನ್ ನಾತ್ಲ್ಲೆಂ. ಹೊ ಕೊಳ್ಸೊ ಪಾತಳ್ ಆನಿ
ಲ್ಹಾನ್ ಆಸ್ಲ್ಲೊ. ತಿಚೊ ಕೊಳ್ಸೊ ವ್ಹಡ್ಲೊ ಆನಿ ತಾಂಬೆಂ ದಾಟ್.
ಪತಿ ಯೆಂವ್ಚೊ ವೇಳ್ ಜಾಲೊ ಮ್ಹಣ್ ಫಿಲುಬಾಯ್
ವೆಗ್ಗಿಂ ವೆಗ್ಗಿಂ ಹಾತಾಂತ್ ಕೊಳ್ಸೊ ಘೆವ್ನ್ ಚಲೊನ್ ಘರಾ
ಪಾವ್ತಾನಾ ದೋನ್ ವರಾಂ ಜಾತಾಲಿಂ ಮಾತ್ರ್. ಅಮ್ಸೊರಾನ್ ಜೆವಾಣ್
ಮಾಂಡ್ಲೆಂ. ಜೆವ್ತಾನಾ ಕೊಳ್ಸ್ಯಾಚಿ ಗಜಾಲ್ ಸಾಂಗ್ಲಿ. ಇತ್ಲೊ
ಮೊಲಾಧಿಕ್ ಕೊಳ್ಸೊ ಫಿಕಿರ್ ನಾಸ್ತಾನಾ ಭಾಯ್ರ್ ದವರ್ಲ್ಲ್ಯಾಕ್
ಬಾಯ್ಲೆಚೆರ್ಚ್ ತಾಕಾ ವಿಶೇಸ್ ರಾಗ್ ಆಯ್ಲೊ ತರ್ಯ್ ಆತಾಂ ಕಿತೆಂಯ್ ಶಿಣ್ ಉಲಯ್ಲ್ಯಾರ್
ಬಾಯ್ಲ್ಯ್ ತಾಳೊ ಪಿಂಜೀತ್ ಮ್ಹಣ್ ವ್ಹಗೊ ರಾವ್ಲೊ.
ಫಿಲುಬಾಯ್ ಮತಿಂತ್ಚ್ ತ್ಯಾ ನಾಪಾಸ್ ಚೆಡ್ಯಾಕ್ ಶಿರಾಪ್ತಾಲಿ. ...
ಸಾಂಜೆರ್ ಫಿಲುಬಾಯ್ ಚ್ಹಾಕ್ ಉದಕ್ ದವರ್ತಾನಾ ರಾಣಿ ಘೊಂಕ್ಲೆಂ.
ಕಲಯ್ ಜೆನಿ ಹಾತಾಂತ್ ತಾಂಬ್ಯಾಚೊ ಕೊಳ್ಸೊ ಘೆವ್ನ್ ಗೆಟಿಲಾಗಿಂ ರಾವ್ಲ್ಲೊ.
"ಧರ್ಗೆ ತುಮ್ಚೊ ಕೊಳ್ಸೊ...ತುಜಾ ನಂಡ್ಡೆನ್ ಕೊಳ್ಸೊ
ಸಾಂಜೆ ಭಿತರ್ ಹಾಡ್ನ್ ದಿ ಮ್ಹಣ್ ತಾಕಿದ್ ದಿಲ್ಲ್ಯಾನ್ ಬಾಕಿಚೆಂ
ಸಕ್ಕಡ್ ಕಾಮ್ ಬಾಕಿ ದವರ್ನ್ ತುಮ್ಚ್ಯಾ ಕೊಳ್ಸ್ಯಾಂಚೆಂ ಕಾಮ್ ಕರ್ನ್
ಹಾಡ್ನ್ ಆಯ್ಲೊಂ."
"ಆಮ್ಚೊ ಕೊಳ್ಸೊ?" ಫಿಲುಬಾಯ್ ಅಜ್ಯಾಪಾಂನಿ ಪಳೆಲಾಗ್ಲಿ.
"ಕಿತೆಂ ತಶೆಂ ದುಭಾವೊನ್ ಪಳೆತಾಯ್ಗೆ....ಹಾಂವೆಂ ಕಾಂಯ್ ಬದ್ಲುನ್
ದಿಲಾ ಮ್ಹಣ್ ದುಭಾವ್ಗಿ?..."
ಫಿಲುಬಾಯೆನ್ ಸಾಕಾಳಿ ಘಡ್ಲ್ಲಿ ಗಜಾಲ್ ಜೆನಿಕ್ ಸಾಂಗ್ಲಿ.
"ಸಾಕಾಳಿಂ ತುಂ ಮಾಸ್ಳಿ ಹಾಡುಂಕ್ ಮಾರ್ಕೆಟಿಕ್ ಗೆಲ್ಲಿಯ್
ದಿಸ್ತಾ...ಹಾಂವ್ ಹೆಣೆಂ ಕಾಮಾನ್ ಆಯಿಲ್ಲೊಂ. ತುಜಾ ನಂಡ್ಡೆನ್
ವಾಟೆನ್ ವೆತಾನಾ ಮಾಕಾ ಆಪವ್ನ್ ಹೊ ಕೊಳ್ಸೊ ದಿಲ್ಲೊ....ಆದಿಂ ಥಾವ್ನ್
ಮೊಗಾಚೆಂ ಕುಟಾಮ್ ಪಳೆ ತುಮ್ಚೆಂ...ತಶೆಂ ವೆಗ್ಗಿಂ ಕಲಯ್ ಕಾಡ್ನ್
ಹಾಡ್ನ್ ಆಯ್ಲೊಂ...ತುಕಾ ಸಾಂಗೊಕ್ ತುಜಾ ನಂಡ್ದೆಕ್ ಉಡಾಸ್ ಜಾಂವ್ಕ್
ನಾ ಕೊಣ್ಣಾ....ಪ್ರಾಯ್ ಜಾಲಿ ಪಳೆ..."
ಫಿಲುಬಾಯೆಕ್ ಆತಾಂ ಸಮ್ಜಾಲೆಂ. ಕೊಳ್ಸೊ ಜೆನಿಕ್ ದೀವ್ನ್
ನಣಂದ್ ಕಿತೆಂಚ್ ತಿಳ್ಸಿನಾಸ್ತಾಂ ಕಂಕ್ನಾಡಿ ಗೆಲ್ಲಿ....
ಫಿಲುಬಾಯೆಚೆ ದೊಳೆ ಭರುನ್ ಆಯ್ಲೆ. ತ್ಯಾ ಚೆಡ್ಯಾಚೆಂ
ನೆಣ್ತೆಂ ಮುಖಮಳ್, ತಾಣೆ ಖೆಲ್ಲೆ ಮಾರ್....ಫುಟ್ಲ್ಲೆ
ವೋಂಟ್....ಚಿಂತಾನಾ ತಿಚೆಂ ಕಾಳಿಜ್ ಪಾಪ್ಸಾಲಾಗ್ಲೆಂ. ಇತ್ಲಿಂ ಧಾರುಣ್ ದೊಳ್ಯಾಂತ್ ರಗತ್
ನಾತ್ಲ್ಲ್ಯಾಪರಿಂ ಆಪುಣ್ ಕಿತ್ಯಾಕ್ ಜಾಲಿಂ....ಮಾಕಾ ಭೊಗ್ಸಿ ದೆವಾ....ಮತಿಂತ್ಚ್
ಫಿಲುಬಾಯ್ ರಡಾಲಾಗ್ಲಿ.
ರಿಕ್ಷಾ ಧರ್ನ್ ಚೆಡ್ಯಾಚಾ ಸೊಧ್ನೆಕ್ ಲಾಗ್ಲಿ. ತ್ಯಾ ಚೆಡ್ಯಾ ಥಾವ್ನ್ ಭಲತ್ಕಾರಾನ್
ಹಾಡ್ಲ್ಲೊ ಕೊಳ್ಸೊ ಆನಿ ಚಡಿತ್ ದೊನ್ಶಿಂ ರುಪಯ್ ತಾಕಾ ದಿಂವ್ಕ್ ಘೆತ್ಲೆ.
ರಿಕ್ಷಾ ತ್ಯಾ ಗುಡಾ ಆಂಗ್ಡಿ ಕುಶಿಕ್ ಧಾಂವಾಲಾಗ್ಲಿ.
ಥಂಯ್ ಚೆಡೊ ನಾತ್ಲ್ಲೊ. ಸಾಮಾನ್ ಚಲ್ಲಾಪಿಲ್ಲಿ ಜಾವ್ನ್
ಪಡ್ಲ್ಲೊ. ಫಿಲುಬಾಯೆನ್ ಹೆಣೆಂ ತೆಣೆಂ ವಿಚಾರ್ಲೆಂ. ಚೆಡೊ ಖಂಯ್ ಗೆಲಾ
ಮ್ಹಣ್ಯಿ ಕೊಣಾಕ್ಯ್ ಕಳಿತ್ ನಾತ್ಲ್ಲೆಂ.
ದುಖಿಚಾ ಕಾಳ್ಜಾನ್ ಫಿಲುಬಾಯ್ ಘರಾ ಪಾಟಿಂ ಆಯ್ಲಿ. ಘರಾ ಪಾವ್ತಾನಾ
ನಣಂದ್ ಆಸ್ಲ್ಲಿ. ತಿಕಾ ಪಳೆಲೆಂಚ್ ರಾಗ್ ತಕ್ಲೆಕ್ ಚಡ್ಲೊ ಫಿಲುಬಾಯೆಚೊ.
"ಕೊಳ್ಸೊ ಜೆನಿಕ್ ದಿಲ್ಲೊ ಮ್ಹಣ್ ಏಕ್ ಸಬ್ದ್ ಸಾಂಗೊಂಕ್ ಕಿತೆಂ ಜಿಬೆಕ್
ಮಾರ್ ಆಯಿಲ್ಲಿಗಿ....?" ಫಿಲುಬಾಯ್ ಬೊಬಾಟ್ಲಿ.
"ತಾಂಬ್ಯಾಚೊ ಕೊಳ್ಸೊ ಮ್ಹಜಾ ಆಬಾಚೊ...ತುಜ್ಯಾ ಬಾಪಯ್ಚೊ
ನ್ಹಂಯ್...." ನಣಂದೆನ್ ಅನಿಕ್ಯ್ ವ್ಹಡ್ಲ್ಯಾನ್ ತಾಳೊ ಕಾಡ್ಲೊ...
ನಿದ್ಲ್ಲೆಂ ರಾಣಿ ವ್ಹಡ್ಲ್ಯಾನ್ ಘೊಂಕ್ಲೆಂ... ಫಿಲುಬಾಯ್ ಚಡಿತ್ ಉಲಯ್ಲಿನಾ...
ಫಿಲುಬಾಯ್ ಆತಾಂ ತ್ಯಾ ಗುಡಾ ಆಂಗ್ಡಿ ಕುಶಿಕ್ ಕೆದ್ನಾಂಯ್
ವೆತಾ...." ಏಕ್ ಪಾವ್ಟಿಂ ತೊ ಚೆಡೊ ದಿಷ್ಟಿಕ್ ಪಡೊಂ, ಆಪ್ಲೆಂ ಕಾಳಿಜ್ ಹಳೂ ಕರ್ತಾಂ"
ಮ್ಹಣ್ ತಿ ಸದಾಂ ರಾಕ್ತಾ.....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
