ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಧುಳ್ ತಿ ಧುಳ್ಚ್!
ಕ್ಲೆರೆನ್ಸ್ ಪಿಂಟೊ, ಕೈಕಂಬ: ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚಾ ಸಂಸಾರಾಂತ್ ಹೆಂ ನಾಂವ್ ಥಿರ್ ಆನಿ ಅಥ್ವೆಂಚ್. ಅಪುರ್ಭಾಯೆಚಿ ಕಥಾ, ವಿಭಿನ್ನ್ ರಿತಿನ್ ನಿರೂಪಣ್ ಕರ್ಚಾಂತ್ ಮಾತ್ರ್ ನ್ಹಂಯ್, ವಾಚ್ಪ್ಯಾಕ್ ತಿ ಕಾಣಿ ಸಂಪ್ತಾಪರ್ಯಾಂತ್ ಭಾಂದುನ್ ದವರ್ಚಿ ಕಲಾ ಆಸ್ಚಾ ಭೋವ್ ಥೊಡ್ಯಾಂ ಪಯ್ಕಿ ಉಟೊನ್ ದಿಸ್ಚೊ ಕಾಣ್ಯೆಗಾರ್ ಹೊ ಜಾವ್ನಾಸಾ. ಅಪುಟ್ ಕೊಂಕ್ಣಿ ಭಾಸ್ ಆನಿ ವಾಚ್ಪ್ಯಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ವೆಚಿ ಹಾಚಾ ಕಾಣ್ಯಾಂಚಿ ವಿಶೇಷತಾ. ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಪರ್ಗಟ್ ಜಾಲಾ ತರ್ಯ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಎದೊಳ್ಚ್ ಬರಯ್ಲ್ಯಾತ್. ವೆಬ್ಸಾಯ್ಟಾಂಚೆರ್ ಸುರ್ವಾತ್ ಕೆಲ್ಲೆಂ ಪಯ್ಲೆಂ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಕಥಾಮೃತ್’ ಹಾಣೆಂಚ್ ಸುರ್ವಾತ್ ಕೆಲ್ಲೆಂ ಜಾವ್ನಾಸಾ. [’ಸುಟ್ಕಾ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಹಾಚ್ಯೊ ಥೊಡ್ಯೊ ಕಾಣ್ಯೊ: ದೆವಾನ್ ವಿಸರ್ಲೆಲಿಂ ಭುರ್ಗಿಂ, ಯಜ್ನ್, ಏಕ್ ಕುಡ್ಕೊ ಪಿಜ್ಜಾ
ಕ್ಲೆರೆನ್ಸ್, ಕೈಕಂಬ
ಧುಳ್ ಜಾಲ್ಲಿ ಮಾತಿ
ಫ್ರಾನ್ಸಿಸ್ ಕಾರ್ಡೊಜಾಚ್ಯಾ ನಿರ್ಜೀವ್ ಕುಡಿಕ್ ಮಾತಿಯೆಕ್
ಪಾವ್ನ್ ಪಾಟಿಂ ತಾಚ್ಯಾ ಘರಾ ಯೆತಾನಾ ಥಂಯ್ಚರ್ ದುಃಖ್ ಯಾ
ಬೊಬಾಟ್ ಕಸಲಿಚ್ಚ್ ನಾತ್ಲ್ಲಿ. ದೋನ್ ವೊರಾಂ ಪಯ್ಲೆಂ
ಮೊರ್ನ್ ಲಿಪಯಿಲ್ಲಿ ರುಕಾಡಾಚಿ ಪೇಟ್ ಹಾಡ್ನ್ ಹಾಂವ್ ಯೆತಾನಾ ಆಯ್ಕಾಲ್ಲೆಂ ರಡ್ಣೆಂ, ರುದಾನ್,
ವಿಳಾಪ್ ಆತಾಂ ನಪಂಯ್ಚ್ ಜಾಲ್ಲೆಂ ಆನಿ ತಾಚ್ಯಾ ಬದ್ಲಾಕ್ ಏಕಾ ರೀತಿಚೆಂ
ಸಮಧಾನೆಚೆಂ ವಾತಾವರಣ್ ಆಸ್ಲ್ಲೆಂ ತಸೆಂ ಮ್ಹಾಕಾ ಭಗ್ಲೆಂ.
ಜಾಲಾಂತ್ ದವರ್ಲ್ಲ್ಯಾ ಸರ್ವ್ ಕದೆಲಾಂಚೆರ್ ಲೋಕ್ ಭರೊನ್ ಗೆಲ್ಲೊ. ಜಾಲಾಚ್ಯಾ ಪೊಂತಾರ್ ಏಕಾ ಮೇಜಾಚೆರ್ ಚಾ-ಕಾಫಿಯೆಚಿ, ಬಿಸ್ಕುತ್ ವಾಂಟ್ಚಿ ತಯಾರಾಯ್ ಚಲ್ತಾಲಿ. ಮ್ಹಾಕಾ ಕೊಣೆಂಗೀ ಘರಾ ಭಿತರ್ ಆಪವ್ನ್ ವೆಲೆಂ. ಭಿತರ್ಲ್ಯಾ ಕುಡಾಂತ್ ವಿಸ್ಕೆಚಿ ಬೋತ್ಲ್ ಉಗ್ತಿ ಕರುನ್ ಗ್ಲಾಸಾಂನಿ ವೊತ್ಚಿ ಸರ್ಬಾರಾಯ್ ಚಲ್ತಾಲಿ. ಮುಕ್ಲ್ಯಾ ಸೊಪ್ಯಾಚೆರ್ ಆಸ್ಲ್ಲ್ಯಾ ಸೊಫಾಚೆರ್ ಮ್ಹಾಕಾ ಬಸೊಂಕ್ ಆಮಂತ್ರಣ್ ಆಯ್ಲ್ಯಾ ಉಪ್ರಾಂತ್ ಹಾಂವೆಂ ಬಸ್ಕಾ ಘೆತ್ಲಿ.
ಹಾಂವೆಂ ’ನಾಕಾ’ ಮ್ಹಳೆ ತರೀ ಪ್ರಾನ್ಸಿಸ್ ಕಾರ್ಡೊಜಾಚ್ಯಾ ಬಾಯ್ಲೆನ್ ಆಗ್ನೆಸಾನ್ ಮ್ಹಜ್ಯಾ ಹಾತಿಂ ಗ್ಲಾಸ್ ಚೆಪ್ಲೊ " .....ತುಂ ನಾತ್ಲ್ಲೊಯ್ ತರ್ ಆಮ್ಚ್ಯಾಕ್ ಗಾಂವ್ಚಿ ಮಾತಿಯ್ ಮೆಳ್ತಿನಾ ಕೊಣ್ಣಾ.... ತಿತ್ಲ್ಯಾ ಕಶ್ಟಾಂನಿಂ ಮಸ್ಕತ್ ಥಾವ್ನ್ ಮೊರ್ನ್ ತುವೆಂ ಹಾಡ್ಲೆಂಯ್... ತುಜೊ ಉಪ್ಕಾರ್ ಕಸೊ ಬಾವುಡ್ಚೊ ತೆಂ ಮ್ಹಾಕಾಚ್ಚ್ ಕಳಾನಾ ....."
ಹಾಂವೆಂ ತೊಂಡಾರ್ ಕಾಂಯ್ಚ್ಚ್ ಬದ್ಲಾವಣ್ ಯಾ ಕುಸ್ಕುಟ್ ಹಾಸೊ ಸಯ್ತ್ ದಾಖಯ್ಲೊನಾ. ಹಾಸ್ಚೆಂ ಸಾರ್ಕೆಂ ನ್ಹಂಯ್ ಮ್ಹಣ್ ಮ್ಹಾಕಾ ಭಗ್ಲೆಂ ಯಾ ಹಾಸೊಂಕ್ಯ್ ಮ್ಹಾಕಾ ಆಯ್ಲೆಂ ನಾ. ಮ್ಹಜೆ ದೊಳೆ ತಿಚ್ಯಾ ದೊಳ್ಯಾಂಕ್ ಮೆಳವ್ನ್ ಗ್ಲಾಸ್ ಹಾತಿಂ ಘೆತ್ಲೊ. ಕೊಣೆಂಗೀ ಸಟ್ಟ್ ಕರ್ನ್ ಯೇವ್ನ್ ಸೊಡಾ ವೊತುನ್ ಗ್ಲಾಸ್ ಭರ್ಲೊ.
ತಾಂಚ್ಯಾ ವಾಡ್ಯಾಚೊ ಗುರ್ಕಾರ್ ಭರ್ಲ್ಲೊ ವಿಸ್ಕೆಚೊ ಗ್ಲಾಸ್ ಹಾತಿಂ ಘೆವ್ನ್, ಫ್ರಾನ್ಸಿಸ್ ಕಾರ್ಡೊಜಾವಿಶಿಂ ಉಲಂವ್ಚ್ಯಾಕ್ ಉಭೊ ಜಾಲೊ. ಆಪ್ಲ್ಯಾ ಕುಟ್ಮಾ ಖಾತಿರ್ ಪ್ರಾನ್ಸಿಸಾನ್ ಕೆಲ್ಲೊ ನಿಸ್ವಾರ್ಥಿ ತ್ಯಾಗ್ ವಿವರಿಲೊ. ಕುಟ್ಮಾಖಾತಿರ್ ವೀಸ್ ವರ್ಸಾಂಚಿ ಗಲ್ಫಾಂತ್ಲಿ ಏಕ್ಸುರಿ ಜೀಣ್.. ತ್ಯಾ ಜಿಣಿಯೆಂತ್ ಭಗ್ಲ್ಲೆಂ ನಿರಾಸ್ಪಣ್, ಕಾಡ್ಲ್ಲೆ ಕಶ್ಟ್ ನಾಜೂಕಾಯೆನ್ ವರ್ಣನ್ ಕೆಲೆ. ಪುಣ್, ಆತಾಂ ಘರ್ಚ್ಯಾಂಕ್ ಗರ್ಜ್ ಆಸ್ಲ್ಲ್ಯಾವೆಳಿಂ ’ಆಲಾಕ್ಕಾ’ ಸಾಂಡುನ್ ಸರ್ವಾಂಕ್ ಆನಾಥ್ ಕೆಲ್ಲ್ಯಾ ವಿಶಿಂ ದುಃಖಾನ್ ರಡ್ಲೊ. ತಾಚಿಂ ಸಿಸ್ರಿಚಿಂ ದುಖಾಂ ದೆಖೊನ್ ಭಂವ್ತಣಿಚಿಂ, ತಾಚ್ಯಾ ಮೊಗಾಚಿಂ ಆನಿ ಕುಟ್ಮಾಚಿಂ ಏಕ್ ಪಾವ್ಟಿಂ ವ್ಹಡ್ಲ್ಯಾನ್ ರಡ್ಲಿಂ ಆನಿ ಕಳ್ವಳ್ಳಿಂ ಆಯಿಲ್ಲ್ಯಾ ಲೊಕಾಕ್ ಪರತ್ ಏಕ್ ಪಾವ್ಟಿಂ ಜಾಗಂವ್ಚ್ಯಾ ಖಾತಿರ್ ಆನಿ ಪರತ್ ಥೊಡ್ಯಾ ಘಡಿಯಾಂನಿಂ ದುಃಕಾಚೆಂ ವಾದಾಳ್ ನಿಂವೊನ್ ಥಂಡ್ ಜಾಲೆಂ.
ಗುರ್ಕಾರಾಚಿಂ ಉತ್ರಾಂ ಅಕೇರ್ ಜಾಲ್ಯಾ ಉಪ್ರಾಂತ್ ಫ್ರಾನ್ಸಿಸ್ ಕಾರ್ಡೊಜಾಚ್ಯಾ ಆತ್ಯ್ಮಾಕ್ ಏಕ್ ಆಮ್ಚ್ಯಾ
ಬಾಪಾ, ತೀನ್ ನಮಾನ್ ಮರಿಯೊ ಏಕ್ ಆನಂದ್ ಬಾಪಾಕ್ ಭೆಟವ್ನ್, ಗುರ್ಕಾರಾನ್ ಗ್ಲಾಸಾಂತ್ಲೆಂ
ಸೆವ್ಲೆಂ. ಗ್ಲಾಸ್ ಪರತ್ ಅರ್ಧೊ ಭರುನ್ ತೊಯ್ ವೊಡ್ಲೊ.
ಹಾಂವ್ ಉಟೊಂಕ್ ತಯಾರ್ ಜಾಲೊಂ ತರ್ ಆಗ್ನೆಸಾನ್ ರಾವಯ್ಲೆಂ.
ಮಸ್ಕತ್ ಥಾವ್ನ್ ಪ್ರಾನಿಸಾಚ್ಯಾ ಮೊರ್ನಾ ಸಂಗಿಂ ಆಯಿಲ್ಲೊಂ
ಮ್ಹಜ್ಯಾ ಘರಾ ಆನಿಕ್ಯೀ ವಚೊಂಕ್ ನಾತ್ಲ್ಲೊಂ. ಘರ್ಚ್ಯಾಂಕ್
ಹಾಂವ್ ಯೆತಾಂ ಮ್ಹಣ್ ಖಬಾರ್ ನಾತ್ಲ್ಲಿ. ಫ್ರಾನ್ಸಿಸಾಚಿ ಆಶಾ ಆನಿ ಕಂಪ್ಣೆಚಿ ಖುಶಿ ಜ್ಯಾರಿ ಕರ್ಚ್ಯಾ ಖಾತಿರ್
ಮೊರ್ನಾಪೇಟೆ ಸಂಗಿಂ ಭಾಯ್ರ್ ಸರೊನ್ ಆಯಿಲ್ಲೊಂ.
ಆಗ್ನೆಸಾನ್ ’ಥೊಡ್ಯಾ ವೆಳಾಖಾತಿರ್ ರಾವ್’
ಮ್ಹಣ್ತಾನಾ ಹಾಂವೆಂ ’ನಾ’ ಮ್ಹಳೆಂ ನಾ.
ಆಯಿಲ್ಲಿಂ ಜಣಾಂ ಚಡಾವತ್ ವಚೊನ್ ಜಾಲ್ಲಿಂ.
"ವೀಸ್ ವರ್ಸಾಂ ಥಾವ್ನ್ ಗಲ್ಪಾಂತ್ ಆಸ್ಲ್ಲೊ..." ಆಗ್ನೆಸಾನ್ ಆಪ್ಲ್ಯಾ
ಹಾತಿಂ ಆಸ್ಲ್ಲ್ಯಾ ವಿಸ್ಕೆಚ್ಯಾ ಗ್ಲಾಸಾಂತ್ಲೊ ಆಖ್ರೇಚೊ ಘೊಟ್
ಮುಗ್ಧುನ್, ಉಲವ್ಣ್ಯಾನ್ ಬುನ್ಯಾದ್ ಘಾಲಿ. ಫ್ರಾನ್ಸಿಸಾಚಿಂ ತೆಗಾಂ ಚೆಡ್ವಾಂ ಭುರ್ಗಿಂ, ತಾಂಚೆ ಘೊವ್,
ನಾತ್ರಾಂ, ದೋಗ್ ಕಾಜಾರ್ ಜಾಯ್ನಾತ್ಲ್ಲೆ ಚೆಡೆ ತಿಕಾ ವೆಡೊ ಘಾಲುನ್ ಮ್ಹಳ್ಳ್ಯಾಬರಿ ತಿಚ್ಯಾ ಭಂವಾರಿಂ
ಬಸ್ಲ್ಲೆ. ".....ಹಾಣೆಂ ಕಿತೆಂ ಕೆಲಾಂ ತೆಂ ಹಾಂವ್ ನೆಣಾಂ.... ಮ್ಹಾಕಾ ಕಾಂಯ್ಚ್ಚ್
ದಿಸಾನಾ..... ವೀಸ್ ವರ್ಸಾಂ ಗಲ್ಫಾಂತ್ ಆಸ್ಲ್ಲೆ ಕಿತೆಂ ಪುರಾ ಕರ್ತಾತ್.... ಬಂಗ್ಲೆ ಭಾಂಧ್ತಾತ್ ....ಹಾಣೆಂ ಕೆಲ್ಲೆಂ ಕಿತೆಂ? ಗಾಂವಾಕ್ ಆಯಿಲ್ಲ್ಯಾ ಆಯಿಲ್ಲ್ಯಾ ವೆಳಿಂ
ಹಾಂವೆಂ ವಿಚಾರ್ಲ್ಲೆಂ ಹೆಂಚ್ಚ್..... ಹೊ ಏಕ್ ಧೆಟ್ಕೆ ತೆದೊ ಜಾಗೊ ಘೆತ್ಲೊ... ತಾಂತು ಏಕ್
ಲ್ಹಾನ್ ಘರ್ ಬಾಂಧ್ಲಾಂ... ಆನಿ ಹ್ಯಾ ತೆಗಾಂಕ್ ಕಶ್ಟಾಂನಿ ... ತೆಂಯೀ ರೀಣ್ ಕಾಡ್ಲಾಂ
ಮ್ಹಣ್ತಾಲೊ... ಕಾಜಾರ್ ಕೆಲೆಂ... ಹ್ಯಾ ಚೆರ್ಕ್ಯಾಂಕ್ ಶಿಕಂವ್ಕ್ ಥೊಡೆಪಾವ್ಟಿಂ ಕಶ್ಟ್ಚ್ಚ್
ಮ್ಹಣ್ತಾಲೊ... ಇತ್ಲಿಂ ವರ್ಸಾಂ ಗಲ್ಫಾಂತ್ ಆಸ್ಲ್ಲೆ ಥೊಡೆ ರಾವ್ಳೆರಾಂತ್ ರಾವ್ತಾತ್......"
ಹಾಂವೆಂ ಜವಾಬ್ ದಿಲಿಚ್ಚ್ ನಾ. ತಿ ಉಲವ್ನ್ ಆಸ್ತಾನಾಂಚ್ಚ್ ಭಂವಾರಿಂ ಪಳಯ್ಲೆಂ.
ಲ್ಹಾನ್ ತರ್ಯ್ ಸೊಭಿತ್ ಟೆರೆಸಾಚೆಂ ಘರ್... ಮುಖ್ಲ್ಯಾ
ಸೊಪ್ಯಾಚೆರ್ ಜಾಯ್ ಜಾಲ್ಲ್ಯೊ ಸಭಾರ್ ವಸ್ತು.. ಗ್ರೇಸ್ತ್
ಮನ್ಶಾಂಗೆರ್ ಆಸ್ಚ್ಯಾ ಪ್ರಮಾಣೆಂ ನ್ಹಂಯ್ ತರಿ ಸಾದಾರ್ನ್ ಘರಾಂತ್ ಆಸ್ಚೆಂ
ಸರ್ವ್ ಆಸ್ಲ್ಲೆಂ.... ಆಗ್ನೆಸ್ ತರ್ಯ್ ಬರೆಂ ಕರ್ನ್ ನೆಸ್ಲ್ಯಾ...
ಬಾಯ್ಲ್ಯಾನ್ ಬಾಂಯ್... ತಾಕಾ ಪಂಪ್... ದೊರೊ... ವ್ಹಡ್ಲಿ ಗೇಟ್.... . ಆನಿ ಕಿತೆಂ ಜಾಯ್
ಹಾಂಕಾಂ..
"ಹ್ಯಾಚ್ಚ್ ವರ್ಸಾ ಪಾಟಿಂ ಯೆತಾಂ ಮ್ಹಣ್ ಮ್ಹಣ್ತಾಲೊ...." ತಿಣೆಂ ಮುಕಾರ್ಸುನ್ ಮ್ಹಳೆಂ. "ಕಶೇಂಯ್ ಜಾಲೆಂ ಆನಿ ತೀನ್ ಚಾರ್ ವರ್ಸಾಂ ರಾವ್... ಚೆರ್ಕ್ಯಾಂಚೆಂ ಶಿಕಾಪ್ ಜಾಂವ್ದಿ... ಉಪ್ರಾಂತ್ ತಾಂಕಾಂ ಮಸ್ಕತ್ ವರ್ನ್ ತುಂ ಪಾಟಿಂ ಯೆ ಮ್ಹಳ್ಳೆಂ... ತಾಚ್ಯಾ ಪಯ್ಲೆಂಚ್ಚ್ ದೆವಾನ್ ಹಾಚೊ ಉಡಾಸ್ ಕರಿಜಯ್ಚ್ಚ್ಗೀ?"
ಮ್ಹಾಕಾ ಉಲಂವ್ಕ್
ಮನ್ಂಚ್ಚ್ ಆಯ್ಲೆಂ ನಾ ಆನಿ ಹಾಂವ್ ಉಲಯ್ಲೊಂ ನಾ..
"ಆತಾಂ ಗೆಲಾ ತೊ ಗೆಲಾ... ಮೆಲ್ಲ್ಯಾಂಕ್ ಸಂಸಾರಾಚಿ ಖಂತ್
ನಾ ಪಳೆ... ಆಮ್ಚಿ ಮಾತ್ ಗತ್ ಜಾಲಿ... ಹ್ಯಾ ಮುಕಾರ್ ಕಿತೆಂ ಕರ್ಚೆಂ
ಮ್ಹಣ್ ಮ್ಹಾಕಾ ಕಳಾನಾ... ಕಾಮ್ ಕೆಲ್ಲೆ ಪಯ್ಶೆ ಕಾಂಯ್ ಧಾಡ್ನ್
ದಿಲ್ಯಾತ್ಯ್ ತಾಚ್ಯಾ ಕಂಪ್ಣೆನ್...??"
ಹಾಂವೆಂ ಭಾಂದ್ಪಾಸಾಚೊ ಉಸ್ವಾಸ್ ಘೆತ್ಲೊ. ಆಗ್ನೆಸಾಚಿಂ ಉತ್ರಾಂ
ಮ್ಹಾಕಾ ಕೊಡು ಲಾಗ್ಲಿಂ. ಫ್ರಾನ್ಸಿಸಾಕ್ ಮಾತಿಯೆಕ್ ಪಾವ್ನ್
ವೊರಾಂಚೊ ವೇಳ್ಯ್ ಜಾಂವ್ಕ್ ನಾ... ಹಿ ಪಯ್ಶ್ಯಾಂಚಿ ಖಂತ್ ಉಲಯ್ತಾ...
ಹಾಂವ್ ಚಿಂತಾಲೊಂ, ಹಿ ಕಾಂಯ್ ಫ್ರಾನ್ಸಿಸಾಚ್ಯಾ ಮೊರ್ನಾವಿಶಿಂ ವಿಚಾರ್ತೆಲಿ
ಮ್ಹಣ್. ಕಸೊ ಮೆಲೊ? ಕಿತೆಂ ಜಾಲೆಂ? ಹೆಂ ಸರ್ವ್ ಕಿತೆಂಚ್ಚ್
ನಾ... ಬಗಾರ್ ಪಯ್ಶಾಂಚಿ ಖಂತ್ !!!!
ಆಗ್ನೆಸಾನ್ ಭಳಾನ್ ಮ್ಹಾಕಾ ಪಾಟಿಂ ರಾವಯಿಲ್ಲೊ ಉದ್ದೇಶ್ಯ್ ಕಳ್ಳೊ...
"ಆಗ್ನೆಸ್ ಬಾಯ್... "
ಮ್ಹಜಿಂ ಉತ್ರಾಂ ಮಿರ್ಮಿರ್ತಾಲಿಂ. " ಕಂಪ್ಣೆನ್ ಯೆದೊಳ್ ಕಾಂಯ್
ಸಾಂಗೊಂಕ್ ನಾ... ಪುಣ್ ತಾಚೆ ಪಯ್ಶೆ ಪುರಾ ಲೇಖ್ ಕರ್ನ್, ಭಾರತೀಯ್
ಪಯ್ಶೆ ಕರ್ನ್, ತುಜ್ಯಾ ನಾಂವಾರ್ ಡ್ರಾಫ್ಟ್ ಕರ್ನ್ ಮ್ಹಾಕಾ ದಾಡ್ತಾಂ ಮ್ಹಳಾಂ .. ತಿ..."
"ಕಾಂಯ್ ದೋನ್ ತೀನ್ ಲಾಖ್ ಪುಣಿ ಮೆಳ್ತಿತ್?" ಆಗ್ನೆಸ್
ಮ್ಹಜಿ ಉತ್ರಾಂ ತುಟವ್ನ್ ಆಮ್ಸೊರ್ಲಿ.
"ಹಾಂವ್ ನೆಣಾ...." ಹಾಂವ್ ಧೆಧೆಸ್ಪಾರ್ ಜಾಲ್ಲ್ಯಾಬರಿ ಉಲಯ್ಲೊಂ. "ಆಯಿಲ್ಲ್ಯಾ ತಿತ್ಲೆಂ ತುಂಕಾಂ ಹಾಡುನ್ ದಿತಾಂ... ಆಮ್ಚಿ ಕಂಪ್ಣಿ ತಾಚೆ ಪಯ್ಶೆ ಬಿಲ್ಕುಲ್ ದವರ್ಚಿ ನಾ.... ತಾಕಾ ದೀಂವ್ಕ್ ಆಸ್ಚ್ಯಾ ಕೀ ಚಡ್ ದಿತೆಲಿ ತೆಂ ಖಂಡಿತ್...."
"ತಿತ್ಲೆಂ ಕೆಲೆಂ ತರ್ ಆಮ್ಚಿ ಗತ್ ಬರಿ ಜಾಯ್ತ್.." ತಿಚ್ಯಾ ಉತ್ರಾಂನಿ ಆಬ್ಳಾಯ್ ಭರೊನ್ ಗೆಲ್ಲಿ. "ನಾ ತರ್ ಆಮಿಂ ಹಾಂಗಾಸರ್ ಮಾತಿ ಖಾಯ್ಜಾಯ್...."
ಹಾಂವೆಂ ಥಂಯ್ ಥಾವ್ನ್
ಮೆಟಾಂ ಕಾಡ್ಲಿಂ..
*********************
ಧುಳಿಕ್ ವೆಚ್ಯಾ ಪಯ್ಲೆಂ.......
ಕಸಬ್ ಥಾವ್ನ್ ಬುಕ್ಕಾ ವೆಚ್ಯಾ (ಮಸ್ಕತ್ ಥಾವ್ನ್ ಬಡ್ಗಾಕ್ ಆಸ್ಚಿ ಧೋನ್
ಶ್ಹೆರಾಂ - ಹ್ಯಾ ಜಾಗ್ಯಾಂ ಥಾವ್ನ್ ಇರಾನ್ ದೇಶ್ ಪಳೆಂವ್ಕ್
ದಿಸ್ತಾ.) ನವ್ಯಾ ಮಾರ್ಗಾಚೆಂ ಕಾಮ್ ಆಕೇರ್ ಜಾತಾನಾ ಶೆಂಬರ್ ಜಣಾಂಕ್ ಏಕ್ಚ್ಚ್
ಪಾವ್ತಿಂ ಕಾಮಾಂತ್ಲೆಂ ಕಾಡ್ಚೆಂ ಪತ್ರ್ ಮೆಳ್ಲ್ಲೆಂ ಆನಿ ತಾಂಚ್ಯಾ
ಪಯ್ಕಿ ಫ್ರಾನ್ಸಿಸ್ ಕಾರ್ಡೊಜಾಚೆಂ ನಾಂವ್ಯೀ ಏಕ್.
ತ್ಯಾ ಸಾಂಜೆರ್ ಪತ್ರ್ ಹಾತಿಂ ಘೆವ್ನ್ ಮ್ಹಜ್ಯಾ ಕುಡಾಕ್ ಆಯಿಲ್ಲೊ ಫ್ರಾನ್ಸಿಸ್ ಕಾರ್ಡೊಜಾ ಗಳ್ಗಳ್ಯಾಂ ರಡ್ತಾಲೊ. ತಾಚೆಂ ರಡ್ಣೆಂ ಪಳವ್ನ್ ಮ್ಹಾಕಾಚ್ಚ್ ಆಜ್ಯಾಪ್ ಜಾಲೆಂ. ಬೆಜಾರ್ಯೀ ಜಾಲೆಂ. ಇತ್ಲಿಂ ವರ್ಸಾಂ ಗಲ್ಫಾಂತ್ ಆಸೊನ್, ಜಾಯ್ ತಿತ್ಲೆಂ ಜೊಡುನ್ ಆಸ್ಚೊ ತೊ ಹ್ಯಾ ರಿತಿನ್ ರಡ್ಚೆಂ ಪಳವ್ನ್ ಕಿತೆಂ ಮಣ್ಚೆಂ ಮ್ಹಣ್ ಮ್ಹಾಕಾ ಕಳ್ಲ್ನಾ. ಜೊಡ್ಲ್ಲೆಂ ಇಲ್ಲೆಂ ಪುಣಿ ಪುಂಜವ್ನ್ ದವರ್ಲ್ಲೆಂ ಆಸ್ತಲೆಂ. ಹೊ ಗಾಂವ್ ಕಾಂಯ್ ಕೊಣಾಯ್ಕ್ಯೀ ಶಾಶ್ವತ್ ನ್ಹಂಯ್ ಆಜ್ ನ್ಹಂಯ್ ತರ್ ಫಾಲ್ಯಾಂ ವಚಾಜಯ್ಚ್ಚ್ - ಹಿಂ ಚಿಂತ್ನಾಂ ಮ್ಹಜಿಂ ಜಾವ್ನಾಸ್ಲ್ಲಿಂ.
ಮ್ಹಾಕಾ ಫ್ರಾನ್ಸಿಸ್ ಕಾರ್ಡೊಜಾಚಿ ವಳೊಕ್ ಜಾಲ್ಲಿ ಸಾಧಾರ್ನ್ ತೀನ್ ವರ್ಸಾಂ ಪಯ್ಲೆಂ. ಹಾಂವ್ ದುಭಾಯ್ ಇಜ್ನೆರ್ ಜಾವ್ನ್ ಕಾಮ್ ಕರ್ನ್ ಆಸ್ಲ್ಲೊಂ ಆನಿ ಮ್ಹಾಕಾ ಹಾಂಗಾ ವರ್ಗ್ ಜಾಲ್ಲ್ಯಾ ದೀಸಾಚ್ಚ್ ತೊ ಮ್ಹಜ್ಯಾ ಸರ್ಶಿನ್ ದಾಂವೊನ್ ಆಯಿಲ್ಲೊ. ಆಸ್ಲ್ಲ್ಯಾ ಸರ್ವ್ ಮಲ್ಭಾರ್ಯಾಂ ಮಧೆಂ ಎಕ್ಲೊ ಕೊಡ್ಯಾಳ್ಚೊ, ತೊ ಇಜ್ನೆರ್ ಜಾವ್ನ್ ಆಯಿಲ್ಲೊ ತಾಕಾ ನಿಜಾಯ್ಕಿ ಖುಶಿ ಜಾಲ್ಲಿ.
ಆಮ್ಚೊ ಭಾಂಧ್ ಭಳಾಧಿಕ್ ಜಾಂವ್ಕ್ ಏಕ್ ಕಾರಣ್ ಆಮ್ಕಾಂ, ಇಜ್ನೆರಾಂಕ್ ಆನಿ ಧಫ್ತರಾಂತ್ ರಾಂವ್ಚ್ಯಾಕ್ ದಿಂವ್ಚೆಂ ಹವಾನಿಯಂತ್ರಿತ್ ವ್ಯವಸ್ಥಾ. ಕಾಮೆಲ್ಯಾಂಕ್ ಸರ್ವಾಂಕ್ ರುಕಾಡಾಚಿಂ ಘರಾ (ಪೊರ್ಟಾ ಕೆಬಿನಾಂ) ವ ಧಾಟ್ ಲುಗ್ಟಾಚಿಂ (ತರ್ಪಾಲಿನ್) ಟೆಂಟಾಂ. ತ್ಯಾ ಟೆಂಟಾಂ ಭಿತರ್ ಏಕ್ ಪಾಂಕೊ ಆನಿ ಏಕ್ ಖಾಟ್. ತಾಂತುಂ ಯೆಂವ್ಚೆಂ ಹುನ್ ವಾರೆಂ ಮ್ಹಣ್ಚ್ಯಾಕೀ ಖತ್ಕತೆಂ ವಾರೆಂ ಮ್ಹಳ್ಯಾರ್ ಬರೆಂ. ಧಗಿಚ್ಯಾ ವೇಳಾರ್ ತ್ಯಾ ರುಕಾಡಾ ಘರಾಂನಿ ಜಾಂವ್ ಯಾ ಟೆಂಟಾನಿ ಜಾಂವ್ ದೋನ್ ಘಡಿಯೊ ರಾವೊಂಕ್ ಕಶ್ಟ್. ಥೊಡೆ ಮಲ್ಭಾರಿ ಇಜ್ನೆರ್ ಯಾ ಧಫ್ತರಾಂತ್ ಕಾಮ್ ಕರ್ಚೆ ಮಹಿನ್ಯಾಕ್ ತೀನ್ - ಚಾರ್ ರಿಯಾಲ್ ಘೆವ್ನ್, ಕಾಮೆಲ್ಯಾಂಕ್ ನಿದೊಂಕ್ ಆವ್ಕಾಸ್ ದಿಂವ್ಚೆಯ್ ಆಸಾತ್ ಕಂಪ್ಣೆಚ್ಯಾ ವ್ಹಡಿಲಾಂಕ್ ಕಳಿತ್ ಜಾಯ್ನಾತ್ಲ್ಲ್ಯಾ ಬರಿ.
ಫ್ರಾನ್ಸಿಸ್ ಕಾರ್ಡೊಜಾನ್
ಮ್ಹಜ್ಯಾಲಾಗಿಂ ಪಯಿಲ್ಲೊ ಉಪ್ಕಾರ್ ಮಾಗ್ಲ್ಲೊ ತೊಚ್ಚ್. "ಭಾಯ್ಲ್ಯಾ ಧಗಿಂತ್
ಬಿಲ್ಕುಲ್ ನೀದ್ ಪಡಾನಾ ಧನ್ಯಾಂ... ರಾತಿಕ್ ಹ್ಯಾ ಕೊನ್ಶ್ಯಾಂತ್ ನಿದ್ತಾಂ. ಫಾಂತ್ಯಾರ್ ಉಟೊನ್ ಚಲ್ತಾಂ..." ಆಡ್ಧೊಸ್
ಮಾಗೊನ್ ತಾಣೆಂ ಮ್ಹಳ್ಳೆಂ.
ಹಾಂವೆಂ ’ನಾ’ ಮ್ಹಳ್ಳೆಂ ನಾ. ತಸೆಂ ರಾತಿಕ್ ತೊ ಯೆತಾಲೊ ಆನಿ ಕೊನ್ಶ್ಯಾಂತ್ ನಿದ್ತಾಲೊ. ಸಕಾಳಿಂ ಚಾರ್
ವೊರಾರ್ ಆಪ್ಲೆಂ ನಿದ್ಚೆಂ ಬಿಚಾಣೆಂ ಘೆವ್ನ್ ಚಲ್ತಾಲೊ.
ಸುಕ್ರಾರಾ ದೀಸ್ ದನ್ಪಾರಾಂ ತೊ ಮ್ಹಜ್ಯಾ ಕುಡಾಕ್ ಯೆತಾಲೊ. ಹಾಂವೆಂ ತ್ಯಾ ದೀಸ್ ಜೆವ್ಣಾ ಸಾಲಾ ಥಾವ್ನ್ ಜೆವಾಣ್ ಕುಡಾಕ್ ಹಾಡಂವ್ಚೆಂ. ಇಜ್ನೆರಾಂಕ್ ದಿಂವ್ಚೆಂ ಜೆವ್ಣಾಚಿ ರೂಚ್ ಆನಿ ರೀತ್ಚ್ಚ್ ವಿಂಗಡ್. ಹಾಂವೆಂ ಆನಿ ತಾಣೆಂ ಸಾಂಗಾತಾ ಬಸೊನ್ ಜೆಂವ್ಚೆಂ. ಥೊಡ್ಯಾ ಪಾವ್ಟಿಂ ಇಲ್ಲೆಂ ’ಹುನ್’ ಉದಾಕ್ ಮೆಳ್ಳೆಂ ತರ್ಯೀ ತಾಕಾ ಜಾಂವ್ಚಿ ಖುಶಿ. ಪುಣ್, ಪಯ್ಶೆ ದೀವ್ನ್ ತಾಣೆಂ ಅಪ್ಣಾ ಖಾತಿರ್ ಕೆದಾಳಾಯ್ ಕಾಂಯಿಂಚ್ಚ್ ಹಾಡ್ಲ್ಲೆಂ ನಾ ಯಾ ಘೆತ್ಲ್ಲೆಂ ನಾ.
ತೀನ್ ವರ್ಸಾಂ ಆಮಿಂ ಸಾಂಗಾತಾ ಮ್ಹಳ್ಳ್ಯಾ ಬರಿ ಜಿಯೆಲ್ಲ್ಯಾಂವ್. ತಾಚ್ಯಾ ಕುಟ್ಮಾವಿಶಿಂ ಯಾ ಪಯ್ಶಾಂ ವಿಶಿಂ ತಾಣೆಂ ಮ್ಹಾಕಾ ಕಾಂಂಯ್ ಸಾಂಗ್ಲ್ಲೆಂ ನಾ. ಚೆಡ್ವಾಂಕ್ ಕಾಜಾರ್ ಜಾಲ್ಲ್ಯಾ ವೆಳಿಂ ಫೊಟೊ ಧಾಕಯಿಲ್ಲ್ಯೊ. "ಹಾಂವ್ ಆತಾಂ ಕಸೆಂ ಪಾಟಿಂ ವಚೊಂ?" ಆತಾಂ ತೊ ರಡೊನ್ಂಚ್ಚ್ ಉಲಯ್ಲೊ.
"ವೀಸ್ ವರ್ಸಾಂ ಹ್ಯಾ ಸುಡ್ಕಾಡಾಂತ್ ಜಿಯೆವ್ನ್, ತುಜೊ ಜೀವ್ ಕರ್ಪವ್ನ್ ತುವೆಂ ತುಜ್ಯಾ ಕುಟ್ಮಾಕ್ ಪೊಸುಂಕ್ ನಾಂವೆ? ಆತಾಂ ತುವೆಂ ಪಾಟಿಂ ಗೆಲ್ಯಾರ್ ತಾಣಿಂ ತುಕಾ ರಾಯಾಬರಿ ಪಳಯ್ಜಾಯ್..."
"ಹಾಂವ್ ಜಾಣಾ.. ಹ್ಯಾ ಗಾವಾಂತ್ ಕಿತ್ಲೆ ಕಶ್ಟ್ ಹಾವೆಂ ಕಾಡ್ಲ್ಯಾತ್ಗಿ ಮ್ಹಣ್... ಖಂಚ್ಯಾ ರಿತಿನ್ ಝಳ್ಚ್ಯಾ ವೊತಾಂತ್ ಶಿರ್ಶಿರ್ಯಾ ಥಂಡಿಯೆಂತ್ ಕಾಮ್ ಕೆಲಾಂ... ಧಗಿಂತ್ ಘಾಮ್ ಯೇವ್ನ್ ಜಾಂಗಾನಿಂ ಕಾತ್ರೆ ಪಡ್ತಾಲೆ.... ಹುಲೊಪಾನ್ ಮೇಟ್ ಕಾಡುಂಕ್ ಜಾಯ್ನಾತ್ಲ್ಲೆಂ. ಹಿಂವಾಂತ್ ಶೆಳ್ ಭರೊನ್ ಉಸ್ಮೊಡ್ ಆಯಿಲ್ಲ್ಯಾ ಬರಿ ಜಾತಾಲಿ... ತರ್ಯ್ ಹಾಂವೆಂ ಪರ್ವಾ ಕೆಲ್ಲಿ ನಾ.. ಚಡ್ತಿಕ್ ಕಾಮ್ (ಓವರ್ ಟಾಯ್ಮ್) ಕರಿನಾಸ್ತಾನಾ ರಾವ್ಲ್ಲೊಂ ನಾ. ಮ್ಹಜ್ಯಾ ಖಾತಿರ್ ಹಾಂವೆಂ ಕಿತೆಂಚ್ಚ್ ಕೆಲ್ಲೆಂ ನಾ.. ಕಂಪ್ಣೆನ್ ದಿಲ್ಲೆಂ ಖಾಣ್ ತೊಡೆಪಾವ್ಟಿಂ ಬೆಳ್ಶೆತಾಲೆಂ ತರಿ ಕುಟ್ಮಾ ಖಾತಿರ್ ಜೆವ್ತಾಲೊಂ. ಮ್ಹಜ್ಯಾ ತಸಲ್ಯಾ ಮೆಕಾನಿಕಾಕ್ ಶೆಂಬೊರ್ ರಿಯಲ್ ಪಾಗ್ ಮೆಳ್ಚೊಚ್ಚ್ ವ್ಹಡ್. ತ್ಯಾ ಸಾಂಬಾಳಾನ್ ಗಾವಾಂತ್ ಕೆಲ್ಲೆಂ ಪಾವಾನಾ ಮ್ಹಣ್ ಬಾಯ್ಲ್ ಪುರ್ಪುರ್ತಾ. ವೀಸ್ ವರ್ಸಾಂನಿ ತುಂವೆಂ ಮಝಾ ಮಾರ್ಲ್ಯಾಯ್ ಮ್ಹಣ್ತಾ... ಜಾಂವ್ಯಾಕ್ ಮಸ್ಕತ್ ವ್ಹರ್ ಮ್ಹಣ್ತಾ... ಹಾವೆಂ ತಾಂಕಾಂ ಕಶೆಂ ಹಾಡ್ಚೆಂ ತೆಂ ತುಂಚ್ಚ್ ಸಾಂಗ್... ಆತಾಂ ಹೆಂ ಕಾಮ್ ವಚೊನ್ ಗಾಂವಾಕ್ ವೆತಾನಾ ಮ್ಹಜ್ಯಾ ಹಾತಿಂ ಕಾಂಯ್ ಪನ್ನಾಸ್ ಹಜಾರ್ಯ್ ಮೆಳ್ಚೊ ನಾ... ತಿಸ್ರ್ಯಾ ಧುವೆಚ್ಯಾ ಕಾಜಾರಾ ವೆಳಿಂ ಕಂಪ್ಣೆ ಥಾವ್ನ್ ಘೆತ್ಲ್ಲೆಂ ರೀಣ್ ಆನಿಕ್ಯ್ ಕಾಭಾರ್ ಜಾಂವ್ಕ್ ನಾ......"
"ತುಂ ಕಾಂಯ್ ಖಂತ್ ಕರಿನಾಕಾ...ತುಂ ಏಕ್ ಪಾವ್ಟಿಂ ಗಾಂವಾಕ್ ಗೆಲ್ಲ್ಯಾ ಉಪ್ರಾಂತ್ ಸರ್ವ್ ಸಮಾ ಜಾತೆಲೆಂ..."
"ಕಾಂಯ್ಚ್ಚ್ ಸಮಾ ಜಾಂವ್ಚೆಂ ನಾ... ಹಾಂವ್ ದೋನ್ ಮಹಿನ್ಯಾಂಕ್ ಗಾವಾಕ್ ಗೆಲ್ಯಾರ್ ತಿತ್ಲಿಂ ಕೆಂಡ್ಚಿಂ ಮ್ಹಜಿಂ ಮನ್ಶಾಂ ಹಾಂವ್ ಕಾಮ್ ಸೊಡುನ್ ಗೆಲೊಂ ತರ್ ಮ್ಹಾಕಾ ಕಿತ್ಲೆಂ ಬರೆಂ ಕರ್ತಿತ್? ತೆಂಯ್ ಮ್ಹಜ್ಯಾ ಲಾಗಿಂ ಪಯ್ಶೆ ನಾಂತ್ ಮ್ಹಣ್ ಕಳ್ಳ್ಯಾರ್ ತಿಂ ...." ತೊ ಪರತ್ ರಡ್ಲೊಚ್ಚ್.
ಹಾಂವೆಂ ತಾಚ್ಯಾ ಲಾಗಿಂ ಕಿತೆಂಚ್ಚ್ ಉಲಂವ್ಚೆಂ ಪ್ರೇತನ್ ಕೆಲೆಂ ನಾ. ತಾಕಾ ಕಸಲಿಚ್ಚ್ ಕುಮಕ್ ಕರುಂಕ್ ಹಾಂವ್ ಸಕ್ಚೊಂ ನಾ ಮ್ಹಣ್ ಮ್ಹಾಕಾ ಕಳಿತ್ ಆಸ್ಲ್ಲೆಂ.
ತ್ಯಾ ರಾತಿಂ ಫ್ರಾನ್ಸಿಸ್ ನಿದೊಂಕ್ ಆಯ್ಲೊ ನಾ. ಹಾಂವ್ಯೀ ತಾಕಾ ಸೊಧುನ್ ಗೆಲೊಂ ನಾ. ಬೆಜಾರಾಯೆನ್ ತಾಚ್ಯಾಚ್ಚ್ ಕುಡಾಂತ್ ನಿದ್ಲಾ ಆಸ್ತಲೊ ಮ್ಹಣ್ ಚಿಂತ್ಲೆಂ.
ದುಸ್ರ್ಯಾ ದೀಸಾ ದನ್ಪಾರಾಂ ದಫ್ತರಾಂತ್ ಆಸ್ಲ್ಲ್ಯಾ ಮ್ಹಾಕಾ ಆವ್ಚಿತ್ತ್ ಖಬಾರ್ ಆಯಿಲ್ಲಿ. ಮೆಕಾನಿಕ್ ಪ್ರಾನ್ಸಿಸ್ ಕಾರ್ಡೊಜ್ ಕ್ರೇಯ್ನ್ ಸಾರ್ಕಿ ಕರ್ತಾನಾ ತಾಚ್ಯಾ ಪಂದಾ ಪಡೊನ್ ಮೆಲ್ಲೊ.
ಮ್ಹಜೆಂ ಕಾಳಿಜ್ ದಡ್ದಡ್ಲೆಂ. ವಿಧಿಚಿ ಕಸಲಿ ಮಾಂಡ್ಣಿ ಹಿ ಗಾಯ್ ಮ್ಹಣ್ ಮತಿಂತ್ ಚಿಂತ್ಲೆಂ.
ಸಾಂಜೆರ್ ಕಾಮ್ ಜಾವ್ನ್ ಕುಡಾಕ್ ಯೆತಾನಾ ಬಾಗ್ಲಾಚ್ಯಾ ಇಡ್ಯಾಂತ್ ಏಕ್ ಚೀಟ್ ಆಸ್ಲ್ಲಿ ಮ್ಹಾಕಾ ಮೆಳ್ಳಿ. ಆಮ್ಚ್ಯಾಚ್ಚ್ ಕೊಂಕ್ಣಿ ಭಾಶೆಂತ್ ಬರಯಿಲ್ಲಿ.
"ಮೊಗಾಚ್ಯಾ ಒಝಿ ಬಾಬ್,
ಹ್ಯಾ ಸ್ತಿಥೆರ್ ಹಾಂವ್ ಗಾವಾಕ್ ವಚೊಂಕ್ ಸಕ್ಚೊ ನಾ ಮ್ಹಣ್ ಹಾಂವ್ ಜಾಣಾಂ.. ಗಾಂವಾಕ್ ವೆಚ್ಯಾ ಬದ್ಲಾಕ್ ಹಾಂಗಾಚ್ಚ್ ಮೊರೊಂಕ್ ಚಿಂತ್ಲಾಂ. ಚೆರಿಯನ್, ಆಮ್ಚೊ ಡ್ರಾಯ್ವರ್ ಆದ್ಲ್ಯಾ ಮಯ್ನ್ಯಾಂತ್ ಕಾರಾ ಪಂಧಾಕ್ ಪಡೊನ್ ಮೆಲ್ಲೊ... ತಾಚ್ಯಾ ಕುಟ್ಮಾಕ್ ಪಾಂಚ್ ಹಜಾರ್ ರಿಯಾಲ್ ಮೆಳ್ಲ್ಲೆ ಕಂಯ್.. ಹಾಂವ್ಯ್ ತಸೊಚ್ಚ್ ಮೆಲೊಂ ತರ್ ... ಮೆಳ್ಲ್ಲ್ಯಾ ಪಯ್ಶಾಂನಿಂ ಮ್ಹಜಿಂ ಬಾಯ್ಲ್ ಭುರ್ಗಿಂ ಖುಶಿ ಜಾತೆಲಿಂ... ಯೆದೊಳ್ ಕರುಂಕ್ ನಾತ್ಲ್ಲೆಂ ಕಾಂಯ್ ತರ್ಯ್ ಹಾಡುಂಕ್ ಮ್ಹಜೆಂ ಆಗ್ನೆಸ್ ಸಕ್ತಲೆಂ... ದೆಕುನ್ ಹಾಂವೆಂ ಮೊರೊಂಕ್ ಚಿಂತ್ಲಾಂ... ಮ್ಹಜ್ಯಾ ಕುಟ್ಮಾಖಾತಿರ್...
ಏಕ್ ವಿನತಿ... ಮ್ಹಜೆಂ ಮೊರ್ನ್ ತುವೆಂಚ್ ಗಾಂವಾಕ್ ವ್ಹರಿಜಾಯ್.. ಗಾಂವಾಂತ್ ಹಾಂವ್ ಚಡ್ ತೇಂಪ್ ಜಿಯೆಲ್ಲೊಂ ನಾ ತರ್ಯೀ ಗಾಂವ್ಚಿ ಮಾತಿ ಹ್ಯಾ ಜಿವಾಕ್ ಲಾಗಾಜಯ್ ಮ್ಹಣ್ ಆಶಾ ಆಸಾ.. ಹಾಂವೆಂ ಅಶೆಂ ಕೆಲೆಂ ಮ್ಹಣ್ ಕೊಣಾಕ್ಚ್ಚ್ ಸಾಂಗಾನಾಕಾ ... ಆನಿ ಮ್ಹಜ್ಯಾ ಮೊರ್ನಾವರ್ವಿಂ ಆಯಿಲ್ಲೆ ಪಯ್ಶೆ ಆಗ್ನೆಸಾಕ್ ದೀವ್ನ್ ಮ್ಹಜ್ಯಾ ಆತ್ಮ್ಯಾಕ್ ಶಾಂತಿ ಮೆಳಾಶಿ ತುವೆಂ ಕರಿಜಾಯ್.. ಹೆ ಪಯ್ಶೆ ಪಳವ್ನ್ ತೆಂ ಸಂತೊಸ್ತೆಲೆಂ ತೆಂ ಖಂಡಿತ್... ತಾಚೊ ಸಂತೊಸ್ ಪಳವ್ನ್ ಮ್ಹಜೊ ಆತ್ಮೊ ಖುಶಿ ಜಾತಲೊ..
ಒಝಿ
ಬಾಬ್, ತುವೆಂ ಕೆಲ್ಲೊ ಉಪ್ಕಾರ್ ಹಾಂವ್ ವಿಸ್ರೊಂಚೊ ನಾ... ತುಕಾ ಆನಿ ತುಜ್ಯಾ ಕುಟ್ಮಾಚೆರ್ ದೆವಾಚಿಂ ಆಶೀರ್ವಾದಾಂ
ಹಾಂವ್ ಮಾಗೊನ್ ಧಾಡ್ತಲೊಂ..
ತುಜ್ಯಾ ಮೊಗಾಚೊ - ಫ್ರಾನ್ಸಿಸ್ ಕಾರ್ಡೊಜ್
************
ಧುಳಿಂತ್ಲಿ ಕಿರ್ಲಾಲ್ಲಿ ಭಾಂಗ್ರಾಳಿ ಕಣ್ಶಿ...
ಫ್ರಾನ್ಸಿಸ್ ಕಾರ್ಡೊಜಾಚೆಂ ಮೊರ್ನ್ ಜಾವ್ನ್ ಏಕಾ ಹಾಫ್ತ್ಯಾನ್
ಮಸ್ಕತ್ ಥಾವ್ನ್ ಕಂಪ್ಣೆನ್ ವಾರ್ಯಾ ತಪ್ಪಾಲಾಚೆರ್ ಕಾಗಾತ್ ಧಾಡ್ಲ್ಲೆಂ. ತಾಂತುಂ ಆಗ್ನೆಸ್ ಕಾರ್ದೊಜಾಚ್ಯಾ
ನಾಂವಾರ್ ಭಾರಾ ಲಾಖಾಂಚಿ ಡ್ರಾಫ್ಟ್ ಆಸ್ಲ್ಲಿ. ತಿತ್ಲೊ ಐವಜ್ ಪಳೆವ್ನ್
ಹಾಂವ್ಚ್ಚ್ ಆಜ್ಯಾಪ್ಲೊಂ.
ಅವ್ಘಡಾಂತ್ ಸಾಂಪಡ್ಲ್ಲ್ಯಾ ಫ್ರಾನ್ಸಿಸಾಕ್ ಇನ್ಸೂರೆನ್ಸಾ ಥಾವ್ನ್
ಪಾಂಚ್ ಹಜಾರ್ ರಿಯಾಲ್, ರಜೆಚೆ, ವೀಸ್ ವೊರ್ಸಾಂ ಕಾಮ್ ಕೆಲ್ಲೆಂ
ಸೆವೆಚೆಂ ದೆವೆಂ ಸರ್ವ್ ಸಾಂಗಾತಾ ಘಾಲುನ್ ತೊ ಐವಜ್ ಧಾಡುನ್
ದಿಲ್ಲೊ. ಹ್ಯಾ ವಿಶಿಂ ತಪ್ಶೀಲ್ ವಿವರಾಚೆಂ ಕಾಗಾತ್ ಕಂಪ್ಣೆನ್ ಬರಯಿಲ್ಲೆಂ. ಫ್ರಾನ್ಸಿಸಾನ್ ಕಂಪ್ಣೆಥಾವ್ನ್ ಕಾಡ್ಲ್ಲೆಂ ರೀಣ್ ತಾಣಿಂ
ವಸೂಲ್ ಕರುಂಕ್ ನಾತ್ಲ್ಲೆಂ.
ಡ್ರಾಫ್ತ್ ಘೆವ್ನ್ ಆಗ್ನೆಸಾಕ್ ಮೆಳ್ತಾನಾ, ತಿಕಾ ಜಾಲ್ಲೊ ಸಂತೊಸ್ ಕಾಂಯ್ ಸಾಂಗ್ಚೊ ನ್ಹಂಯ್.... ತಿ ಬರಿಚ್ಚ್ ಹಾಸ್ತಾಲಿ... ತಿಚ್ಯಾ ಸವೆಂ ಆಖ್ಖೆಂ ಕುಟಾಂಭ್ ಸಂತೊಸಾನ್ ಬುಡ್ಲ್ಲೆಂ...
"ಹಾಂವ್ ಜಾಣಾಸ್ಲ್ಲಿಂ ..." ತಿ ಉಮಾಳ್ಯಾನಿಂ ಭರೊನ್ ಮ್ಹಣಾಲಿ. " ಹಾಣೆಂ ಪಯ್ಶೆ ಖಂಯ್ ಪುಣಿ ಪುಂಜಾವ್ನ್ ದವರ್ಲ್ಯಾತ್ ಮ್ಹಣ್... ನಾ ತರ್ ಇತ್ಲಿಂ ವರ್ಸಾಂ ಗಲ್ಫಾಂತ್ ಘೊಳ್ಲ್ಲೆ ಪಯ್ಶೆ ಖಂಯ್ ವೆಚೆ? ಮೊರ್ನಾ ಉಪ್ರಾಂತ್ ತರಿ ಮೆಳ್ಳೆ..... ದೆವಾಕ್ ಆರ್ಗಾಂ... ದೇವ್ ಪಾವ್ಲೊ..." ತಿಣೆಂ ಡ್ರಾಫ್ಟಿಚೊ ಉಮೊ ಘೆತ್ಲೊ.
ಫ್ರಾನ್ಸಿಸ್ ಕಾರ್ಡೊಜಾಚಿ ಆಶಾಯ್ ತಿಚ್ಚ್ ಜಾವ್ನಾಸ್ಲ್ಲಿ ... ತೆ ಪಯ್ಶೆ ಪಳವ್ನ್ ತಾಣಿಂ ಸಂತೊಸ್ ಪಾವಾಜಯ್... ತಾಣಿಂ ಸುಖ್ ಭಗಿಜಾಯ್... ಏಕಾ ಧಾದ್ಲ್ಯಾಚಿ ನೀಜ್ ಆಶಾ ತಿ...
ಆಗ್ನೆಸಾನ್ ಮ್ಹಾಕಾ ರಾವ್ ಮ್ಹಳೆಂ ನಾ. ರಾವ್ ಮ್ಹಣ್ಚ್ಯಾ ಸ್ಥಿತೆರ್ ತಿ ನಾತ್ಲ್ಲಿ. ಹಾಂವ್ ಮುಖ್ಲ್ಯಾ ಗೆಟಿಂತ್ಲ್ಯಾನ್ ಭಾಯ್ರ್ ಯೆತಾನಾ ಪಾವ್ಸ್ ಭಾರಿಕ್ ಬಿರ್ಭಿರೊಂಕ್ ಲಾಗ್ಲೊ..
ಹಾವೆಂ ಮೊಳ್ಬಾಕ್ ಪಳಯ್ಲೆಂ.. ಫ್ರಾನ್ಸಿಸಾಚೊ ಆತ್ಮೊ ಥಂಯ್ಚರ್ ದಿಸ್ಲೊನಾ ಪುಣ್ ಸಂತೊಸಾನ್ ಆಸ್ಚೊ ತಾಚೊ ಆತ್ಮೊ ಮ್ಹಾಕಾ ಪಳಯ್ತಾ ಮ್ಹಣ್ ಮ್ಹಾಕಾ ಭಗ್ತಾಲೆಂ... ತಾಕಾ ಆತಾಂ ವರ್ತೆಂ ಸಮಧಾನ್ ಜಾಲಾಂ ಮ್ಹಣ್ ಹಾಂವ್ ಜಾಣಾಸ್ಲ್ಲೊಂ..
ಫ್ರಾನ್ಸಿಸ್ ಕಾರ್ಡೊಜಾಚೊ ಸಾಕ್ರಿಫಿಸ್ ಮತಿಂತ್ ಪರತ್ ಆಯ್ಲೊ... ಏಕಾ ದಾಧ್ಲ್ಯಾಚೊ ಸಾಕ್ರಿಫಿಸ್... ಕುಟ್ಮಾ ಖಾತಿರ್... ತಾಂಚ್ಯಾ ಸುಖಾಖಾತಿರ್... ಸಂತೊಸಾ ಖಾತಿರ್...
...ಆನಿ ತೆದ್ನಾಂ ಮ್ಹಜ್ಯಾ ದೊಳ್ಯಾಂನಿಂ ಉದೆಲ್ಲಿಂ ದುಃಖಾಂ ಪಾವ್ಸಾಚ್ಯಾ ಶೆಣಿಯಾನಿಂ ಮಿಸ್ಳೊನ್ ಮಾತ್ ಗೆಲಿಂ....
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
