ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 48. ಧಾಂಕಣ್
ಲ್ಯಾನ್ಸಿ ಪಿಂಟೊ ನಾಯಕ್: ನಾಟಕಿಸ್ತ್, ವಿಡಂಬನ್ಕಾರ್ ಜಾವ್ನ್ ಫಾಮಾದ್ ತರ್ಯೀ ಹೊ ಏಕ್ ಕಾಣ್ಯೆಗಾರ್ ತಶೆಂಚ್ ಕವಿ ಸಯ್ತ್. ವೆವೆಗ್ಳ್ಯಾ ವಿಶ್ಯಾಂಚೆರ್ ಬರಂವ್ಚೆಂ ಹಾಚೆಂ ಹವ್ಯಾಸ್. ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯಿಲ್ಲ್ಯಾ ಹಾಚ್ಯೊ ಚಡ್ತಾವ್ ಕಾಣ್ಯೊ ಸಾಮಾಜಿಕ್ ತರ್ಯೀ ಥೊಡ್ಯೊ ಮನೋವೈಗ್ಯಾನಿಕ್ ಚಿಂತ್ಪಾಚ್ಯೊ ಕಾಣ್ಯೊ ಹಾಣೆಂ ಬರಯ್ಲ್ಯಾತ್.
ಲ್ಯಾನ್ಸಿ ಪಿಂಟೊ
"ಹಲೋ ಜೆರಿ!"
"ಕಿತೆಂ ಜಾಲೆಂ?!"
"ಮಬ್ರೂಕ್.... ಮಬ್ರೂಕ್...."
"ಗಜಾಲ್ ಕಿತೆಂ ಸ್ಟ್ಯಾನಿ?"
"ತುಜ್ಯಾ ಜೇನಾಕ್ ವಿಜಾ ಮೆಳ್ಳಿ ಸಾಯ್ಬಾ!"
"ಅಚ್ಚಾ ದೆವಾಕ್ ಅರ್ಗಾಂ! ಮ್ಹಿನತ್ ಕಾಡ್ಲೆಲ್ಯಾ ತುಕಾ ಮಸ್ತ್ ಥ್ಯಾಂಕ್ಸ್
ಸ್ಟ್ಯಾನಿ......"
"ವ್ಹಡ್ ನಾ! ಉರ್ಲ್ಲಿ ಬಂದೋಬಸ್ತ್ ಕರ್ತಾಯ್ ಮೂ?! ಮ್ಹಜಿ ಕಸಲಿಯ್ ಕುಮಕ್ ಜಾಯ್ ತರ್ ಕಳಂವ್ಕ್ ದಾಕ್ಶೆನಾಕಾ....."
"ಮಸ್ತ್ ಥ್ಯಾಂಕ್ಸ್ ತುಜಿ ಚಡ್ ಸಳ್ಗಿ ಘೆಂವ್ಕ್ ಮ್ಹಕಾ ಮನ್
ನಾ...."
"ತುಕಾ ಕಿತ್ಲೆ ಪಾವ್ಟಿಂ ಸಾಂಗ್ಲಾಂ.... ಆಮ್ಗೆರ್ ರಾವಯ್
ಮ್ಹಣ್. ಥೊಡ್ಯಾ ತೆಂಪಾಕ್ ಭುರ್ಗ್ಯಾಂಚೆಂ ರೂಮ್ ತುಮ್ಕಾಂ
ಸೊಡ್ನ್ ದಿತಾಂ.... ಚೀಂತ್" ಮದ್ಗಾತ್ ಸಾಂಗಾಲಾಗ್ಲೊ ಸ್ಟ್ಯಾನಿ. ಕುಮೊಕ್ ಕರ್ಚಿ ಆನಿ
ಸ್ವತಾ ಭಾಸಾಂವ್ಚಿ ತಾಚೊ ಜಲ್ಮಾಗೂಣ್.
"ಥ್ಯಾಂಕ್ಸ್ ಸ್ಟೇನಿ...... ಹಾಂವ್ ಚಿಂತಾಂ...."
"ಬರೆಂ"
"ಥೆಂಕ್ಸ್" ಪೋನ್ ರಿಸಿವರಾಚೆರ್ ದವರ್ತಾನಾ ವಿಜಾಚಿ ಖಬಾರ್ ಆಯ್ಕೊನ್ ಕಿತ್ಲೊ
ಸಂತೊಸ್ ಜಾಲ್ಲೊಗೀ ತಾಚ್ಯಾಕಿ ದೊಡ್ತ್ಯಾನ್ ಖಂತ್ ಆಕಾಂತ್
ಮ್ಹಜೆ ಮತಿಂತ್ ಉದೆಲಿ.
ಎದೊಳ್ ವಿಜಾ ಮೆಳೊಂಕ್ ನಾತ್ಲೆಲ್ಯಾನ್ ಆನಿ ಮೆಳ್ತಾ ಮ್ಹಳ್ಳೊ ಖಂಡಿತ್ ಭರ್ವಸೊ
ನಾತ್ಲ್ಲ್ಯಾನ್ ಹಾವೆಂ ಸರ್ವ್ ಸಂಗ್ತಿ ಚಿಲ್ಲರ್ ರಿತಿನ್ ಘೆತ್ಲ್ಲ್ಯೊ.
ಆತಾಂ ವಿಜಾಮೆಳೊನ್ ಪರಿಗತ್ ಮುಕಾರ್ಚ್ ಉಬಿ ಜಾಲ್ಲಿ. ’ಜೆನಾಚೆ ಆಶೆಚೆಂ ಕುವಯ್ಟ್ ದಾಕಂವ್ಕ್
ಹಾಂವ್ ಸಕಾನಾಗೀ?
ನಿಜಾಯ್ಕ್ಯ್ ಕಟೀಣ್ ಸಂಗ್ತಿಂ ಹ್ಯಾ ಉಪ್ರಾಂತ್ ಹಾವೆಂ ಫುಡ್ ಕರುಂಕ್ ಆಸ್ಲ್ಲ್ಯೊ.
***********
ಹಾಂವ್ ’ಬದರ್ ಅಲ್ ಮುಲ್ಲ ಅಂಡ್ ಬ್ರದರ್ಸ್’ಂತ್ ತೆವೀಸ್
ವರ್ಸಾಂ ಥಾವ್ನ್ ಕಾಮ್ ಕರ್ನ್ ಆಸಾಂ. ಹ್ಯಾ ವರ್ಸಾ ಸೊಡ್ನ್
ವೆಚೆ ಆಲೋಚನೆರ್ ಜೆನಾಕ್ ವಿಜಿಟಿಂಗಾರ್ ಕುವೆಯ್ಟ್ ಹಾಡಂವ್ಚೆ ಆಲೋಚನೆಕ್
ಪಾವ್ಲ್ಲೊ.
ಇರಾಕಾಚಾ ಆಕ್ರಮಣಾ ವೆಳಾರ್ ಆಟ್ ಮ್ಹಯ್ನೆ ಬೆಕಾರ್ಪಣಾಂತ್ ಖರ್ಸಿಲ್ಲೆ
ಸೊಡ್ಲ್ಯಾರ್..... ಉರ್ಲ್ಲಿಂ ವರ್ಸಾಂ ಕಂಪ್ಣೆಂತ್ ಹಾಂವ್ ಏಕ್ ಟೆಕ್ನಿಶಿಯನ್ ಜಾವ್ನ್ ಆಯಿಲ್ಲೊಂ
ಹಾಂವ್..... ಆತಾಂ ’ಮೆಕ್ಯಾನಿಕಲ್ ಫೋರ್ಮ್ಯಾನ್’ ಮ್ಹಣ್
ಮ್ಹಾಕಾ ಸರ್ವ್ ಒಳ್ಕಾತಾಲೆ.
ಹರ್ಎಕಾ ಆಟ್ರಾ ಮಯ್ನ್ಯಾಂಕ್ ಏಕ್ ಪಾವ್ಟಿಂ ಗಾಂವಾಂಕ್ ವೆತಾಲೊಂ. ಕಂಪ್ಣೆಚಿ ಟಿಕೆಟ್
ಮೆಳಾನಾ ತರೀ ಸದಾಂ ಮೆಳ್ಚ್ಯಾ ’ಓವರ್ ಟಾಯ್ಮ್’ ಸೆವೆ
ವರ್ವಿಂ ಮಾತ್ಶೆಂ ಆರ್ತಿಕ್ ಬಳ್ ಮೆಳ್ತಾಲೆಂ.
ಹಾಂವ್ ಹರ್ಏಕ್ ಪಾವ್ಟಿಂ ಗಾಂವಾಂಕ್ ವೆತಾನಾ ಜೆನಾಕ್ ಆನಿ ಭುರ್ಗ್ಯಾಂಕ್ ಖುಶಿ ಕರ್ಚೆ ಖಾತಿರ್ ವಿಚಾರ್ಲ್ಲ್ಯೊ
ಸರ್ವ್ ವಸ್ತು ವ್ಹರ್ತಾಲೊಂ. ತಾಂಕಾಂ ಬರೆಂ ಕರ್ನ್ ಭೊಂವ್ಡಾಯ್ತಾಲೊಂ, ಜಾಯ್ ಜಾಲ್ಲೆಂ ಘೆವ್ನ್ ದಿತಾಲೊಂ.
ಸುರ್ವಿಲಿಂ ಪಾಂಚ್ ವರ್ಸಾಂ ಕುಟ್ಮಾ ವೊಜೆಂ ವ್ಹಾವಂವ್ಕ್ ಜೊಡ್ಲ್ಲಿ ಜೋಡ್
ಮೊಡ್ಲ್ಯಾರ್ ಉರ್ಲ್ಲಿಂ ವರ್ಸಾಂ ಘರ್, ಬಾಯ್ಲ್, ಭುರ್ಗಿಂ ಜಾತಾನಾ
ಹಾತಾಂತ್ ಕಾಂಯ್ ಪಯ್ಶೆ ಉರ್ಲೆನಾಂತ್.
ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ಮಾತ್ಶೆಂ ಬ್ಯಾಂಕ್ ಬ್ಯಾಲೆನ್ಸ್ ಚಡೊನ್ ಆಸಾ, ತಾಚ್ಯಾಕೀ ಚಡ್ ಕಾಮ್
ಸೊಡ್ತನಾ ಮೆಳ್ಚಿ ಗ್ರಾಚುಯಿಟಿ ಆನಿ ಬೆನಿಫಿಟ್ಸ್ ಆಂವ್ಡೆವ್ನ್ ಆಸಾಂ.
ಹಾಂವ್ ಗಾಂವಾನ್ ಬೆಳಾಚೊ ಆನಿ ಜೇನ್ ಕೊಡ್ಯಾಳ್ಚೆಂ. ಆತಾಂ
ಹಾಂವೆಂಯ್ ಕೊಡ್ಯಾಳ್ ಬೆಂದುರ್ ಜಾಗೊ ಘೆವ್ನ್ ’ಮಂಗ್ಳುರ್ಗಾರ್’ ಜಾಲಾಂ! ಜೇನ್
ಸಾದೆಂ ತರ್ಯ್ ಸಾಮಾರ್ತಿವಂತ್ ಸ್ತ್ರೀ.
ತೆಂ ಶ್ಹೆರಾಂತ್ ವ್ಹಡ್ಲ್ಯಾ ಕುಟ್ಮಾ ಸಾಂಗಾತಾ ವಾಡ್ಲ್ಲ್ಯಾನ್
ವ್ಹಡ್ಲೆಂ ಚಿಂತ್ಚೊ ತಾಚೊ ಸ್ವಬಾವ್ ಜಾವ್ನ್ ಗೆಲ್ಲೊ. ಸುರ್ವೆರ್... ಕಾಜಾರ್ ಜಾಲ್ಲ್ಯಾ ತವಳ್ ಕುವೆಯ್ಟಾಕ್
ವ್ಹರ್ಚೆ ಖಾತಿರ್ ಭಾರಿ ಮ್ಹಾಕಾ ಮೆಳ್ಚ್ಯಾ ಶೆಂಭರ್ ಡಿನಾರ್ ಸಾಂಬಾಳಾಂತ್ ತೆಂ
ಸಾದ್ ನಾತ್ಲ್ಲೆಂ.
ಉಪ್ರಾಂತ್ ಜೀವನ್ ಆನಿ ಝೀನಿಯಾ ಜಾಲ್ಲ್ಯಾನ್ ಕುವೆಯ್ಟಾಕ್
ವೆಚಿ ತಾಚಿ ಆಶಾಯ್ ಇರ್ಲಿ. ಹಾಂವ್ಯ್ ತಾಂತುಂ ಸುಶೆಗ್ ಜಾಲೊಂ.
ಜಿವಿತಾಂತ್ ಪಾಂಚ್ ಸ ವರ್ಸಾಂ ಮಂಗ್ಳುರಾಂತ್ ಘರ್ ಜಾಗ್ಯಾ ಖಾತಿರ್
ಸಮರ್ಪಿತಾನಾ ಆನಿ ಚಾರ್ ಪಾಂಚ್ ವರ್ಸಾಂ ತಾಂತುಂ ಘರ್ ಬಾಂದುಂಕ್ ತ್ಯಾಗ್ ಕರುಂಕ್
ಪಡ್ಲಿಂ.
ರಿಣಾ ವರ್ವಿಂ ಕುವೆಯ್ಟಾಕ್ ಪಾಟಿಂ ವೆಚ್ಯಾಕ್ ನಿರ್ವೊಗ್ ನಾತ್ಲ್ಲೊ.
ಇತ್ಲಿಂ ವರ್ಸಾಂ ಕುವೆಯ್ಟಾಂತ್ ಹಾಂವ್ ಗಳೊಂಕ್ ಸಕ್ತಲೊಂ
ಮ್ಹಣ್ ಹಾವೆಂ ಸಪ್ಣಾಂತ್ಯ್ ಚಿಂತುಂಕ್ ನಾ. ಪರಿಗತಿನ್
ಮ್ಹಾಕಾ ಘೊಳಯ್ಲೆಂ.
ಜಿವನಾಚೆಂ ಗ್ರಾಜುಯೇಶನ್ ಜಾಲಾಂ. ಚೆಡುಂ ಝಿನಿಯಾ ಫಾಯ್ನಾಲಾಂತ್ ಆಸಾ. ಘರಾಂತ್
ಸರ್ವ್ ಸವ್ಲತಾಯೊ ಆಸಾತ್. ಜಿವನಾಲಾಗಿಂ ’ಹೀರೊ ಹೊಂಡಾ’ ಆಸಾ. ಆವಯ್ ಧುವ್
’ಕೈನೆಟಿಕ್ ಹೊಂಡಾ’ ಚಲಯ್ತಾತ್. ’ಬಾಪಯ್ ಸಭಾರ್
ವರ್ಸಾಂ ಥಾವ್ನ್ ಗಲ್ಫಾಂತ್ ಬರೆ ಜೊಡಿರ್ ಆಸಾ ಮ್ಹಣ್ ತಿಂ ಜಾಣಾಂತ್.
ಪುಣ್ ತಾಚಿ ನೀಜ್ ಘೊಳ್ಚಿ ಪರಿಗತ್ ಕೊಣ್ಯ್ ನೆಣಾಂತ್.
ದಾದ್ಲ್ಯಾ ಜಿಣ್ಚ್ ತಶಿ. ಬಾಯ್ಲೆ ಭುರ್ಗ್ಯಾಂ ಖಾತಿರ್ ಚಡ್ ತ್ಯಾಗ್ ಕರ್ನ್ ಕರ್ಗೊನ್ ತಾಂಕಾಂ
ಸಂತೊಸ್ ಭೊಗುಂಕ್ ಆವ್ಕಾಸ್ ದಿಂವ್ಚೊ.
***********
ಪಂದ್ರಾ ದಿಸಾಂ ಭಿತರ್ ಪೂರಾ ವಿಲೆವರಿ ಕರ್ನ್ ಜಾಲ್ಲಿ.
ಜೆನಾಕ್ ವಿಜಾ ಧಾಡುನ್ ದಿಲ್ಲಿ.
ಹಾಂಗಾಸರ್ ಏಕ್ ಮುಲ್ಲಾಕ್ ತೀನ್ ಮಯ್ನ್ಯಾಂ ಖಾತಿರ್ ಘೆತ್ಲ್ಲೆಂ.
ಪನ್ನಾಸ್ ಡಿನಾರ್ ಮಯ್ನ್ಯಾಕ್ ಭಾಡೆಂ. ಮುಲ್ಲಾಕ್ ಮ್ಹಳ್ಯಾರ್
ಬಿಲ್ಡಿಂಗಾ ಕುಶಿನ್ ದೊರ್ಯಾಕ್ ಒಣೊದ್ಯೊ, ಪತ್ರಿಂ ಘಾಲ್ನ್, ಏಕ್ ಕೂಡ್, ಏಕ್ ಕಿಚನ್,
ಲ್ಹಾನ್ಸೊ ಕಾಕುಸ್ ಬಾತ್ರೂಮ್! ತಸಲಿಂ ಮುಲ್ಲಾಕಾಂ ಮೆಳೊಂಕ್ಯ್ ಕಶ್ಟ್.
ಹಳ್ಟಾಚಿಂ ಮನ್ಶ್ಯಾಂ ತಸಲ್ಯಾಂತ್ಚ್ ರಾವ್ತಾತ್. ಹಾಂವ್
ಹಾಂಕಾಂ ಘರ್ಚ್ ಮ್ಹಣ್ತಾಂ ಕಿತ್ಯಾಕ್ ಹಾಂವ್ ಮ್ಹಜಿ ಜಿಣಿ ಕಂಪ್ಣೆಚ್ಯಾ ಕ್ಯಾಂಪಾಂತ್ ದುಸ್ರ್ಯಾಂ ಬರಾಬರ್
ಹೊಂದೊನ್ ಜಿಯೆಲಾಂ. ಸಾಂಗಾತಾ ರಾಂದ್ಲಾಂ, ಬಸ್ಲಾಂ, ಹಾಸ್ಲಾಂ, ಖೆಳ್ಳಾಂ. ತೆ ಜಾತಿ ಭಾಯ್ಲೆ, ಭಾಶೆ ಭಾಯ್ಲೆ, ಗಾಂವಾ ಭಾಯ್ಲೆ.
ಆನಿ ಆತಾಂ ಮ್ಹಜ್ಯಾ ಘರಾಕ್ ಏಕ್ ಏರ್ ಕಂಡಿಶನ್ ಕಂಪ್ಣೆ ಥಾವ್ನ್ ’ವಾಸ್ತಾ’ಚೆರ್ ತೀನ್
ಮಯ್ನ್ಯಾಂಕ್ ಬಸಯ್ಲಾಂ. ಫ್ರಿಡ್ಜ್ಯ್ ತಸೊಚ್
ಹಾಡ್ಲಾ.
ಸಯ್ಟಾಚೆರ್ ಮೆಳ್ಲ್ಲೆ ಕಾರ್ಪೆಟಾ ಕುಡ್ಕೆ ಸಾಂಗಾತಾ ಘಾಲ್ನ್ ಧರ್ಣ್ ವೆವಸ್ತಿತ್ ಕೆಲ್ಯಾ. ತೆಣೆಂ
ಹೆಣೆಂ ಒಳ್ಕಿನ್ ವಿನತಿ ಕರ್ನ್ ಸೊಫಾಯಿ ದವರ್ಲಾ. ಮ್ಹಜೆಂ ಏಕ್
ಪರ್ನೆಂ ಕಬಟ್ ಥಂಯ್ಚರ್ ಸಾಗ್ಸಿಲಾಂ. ಎಕ್ಸುರ್ಯಾ ಖಟ್ಲ್ಯಾಕ್
ಬಾಂಕ್ ಕುಡ್ಸುನ್ ತಾಚೆರ್ ದೊಡಿ ಗಜ್ಡಿ ಘಾಲ್ನ್ ಬರ್ಯಾನ್ ಹಾಂತುಳಾಂ.
ತಶೆಂ ಆಶೆಂ ಫುಕಟಾಚೆಂ ಸರ್ವ್ ಜಾಲ್ಯಾರ್ಯ್ ವಸ್ತು, ಆಯ್ದಾನಾ
ಮ್ಹಣ್ತಾನಾ ಶೆಂಬೊರಾ ವಯ್ರ್ ಕುವೆಯ್ಟಿ ದಿನಾರ್ ಖರ್ಸಾಲೊ.
ವ್ಹಯ್ ಜಿವಿತಾಂತ್ ಪಯ್ಲೆ ಪಾವ್ಟಿಂ ಬಾಯ್ಲೆಕ್ ಜೆನಾಕ್ ಕುವೆಯ್ಟ್
ಹಾಡ್ಚೆಂ ಸಪಾಣ್ ಜ್ಯಾರಿ ಜಾತಾನಾ ಹೆ ಪಯ್ಶೆ ಕ್ಶುಲ್ಲಾಕ್
ದಿಸ್ಲೆಂ
ಹಾಂವ್ ಜಾಣಾಂ ತಾಕಾ ಕೊಣಾ ಸಾಂಗಾತಾ ಶೆರಿಂಗ್ ರಾವೊಂಕ್ ಜಾಂವ್ಚೆಂ
ನಾ. ಧಾಕ್ಟೆಂ ಜಾಲ್ಯಾರಿ ವ್ಹಡ್ ನಾ, ವೊರೆ ವಿಂಗಡ್ ತೆಂ ಆಶೆತಾ. ತೆಂ ತಾಚೆಂ
ಮನ್ ಹಾವೆಂ ಪಾರ್ಕಿಲಾಂ.
ವಿಜಾ ಧಾಡ್ತಾನಾ ಲಾಂಬ್ ಕಾಗದ್ ಬರಯ್ಲೆಂ. ತಾಂತುಂ ಪಯ್ಲೆಂ ಬರಯಿಲ್ಲ್ಯೊ
ಸಂಗ್ತಿ ಫಕತ್ತ್ ಬರಯ್ಲ್ಯಾತ್.
ಹಾಂಗಾ ಲ್ಹಾನ್ ಮುಲ್ಲಾಕಾಂತ್ ರಾವೊಂಕ್ ಪಡ್ತೆಲೆಂ.
ದಿಸಾಚೆಂ ಮ್ಹಾಕಾ ಕಾಮ್ ಆಸಾ. ಸದಾಂ ಭೊಂವ್ಡಾಂವ್ಕ್
ಮ್ಹಜ್ಯಾ ಲಾಗಿಂ ಕಾರ್ ನಾ. ಆಸಾ ತಶೆಂ ಎಡ್ಜಸ್ಟ್ ಜಾಯ್ಜೆ. ಜೆಂವ್ಕ್ ಖಾಂವ್ಕ್
ವಾಂದೆನಾಂತ್.... ಘರ್ಚೆಂ ಕಾಮ್ ಆನಿ ಮ್ಹಜೆಂ ಕಾಮ್ಯ್ ಸಾಂಬಾಳಿಜೆ... ಅಸಲ್ಯಾ
ಶರ್ತಾಂಕ್ ತಾಣೆ ಸಯ್ ಘಾಲ್ನ್ ಜಾಪ್ ದಿಲ್ಲಿ ಆಸಾ. ’ಆತಾಂ ಖಂಯ್
ಹಾಂವ್ ತುಜ್ಯಾಲಾಗಿಂ ಹೊಕ್ಲೆಪರಿಂ ಹನಿಮೂನಾಕ್ ಯೆತಾಂ.
’ಗಲ್ಫ್ ಪಳಯ್ಲಾಂ’ ಮ್ಹಣಾಜೆ. ಮಾತ್ಶೆಂ ಸರ್ವಾಂ ಥಾವ್ನ್
ಪಯ್ಸ್ ತುಜೆ ಬರಾಬರ್ ಎಕ್ಸುರ್ಯಾಕ್ಚ್ ರಾವೊಂಕ್ ಜಾಯ್. ತುಂ ಕಸೊ ತರೀ
ಮ್ಹಜೊಚ್ ಪಳೆ..... ತುಕಾ ಕಶೆಂ ಬಾಯ್ಲೆಕ್ ಖುಶಿ ದವರುಂಕ್ ತೆಂ ಬರೆಂ ಕಳಿತ್ ಆಸಾ.... ಥೊಡ್ಯೊ
ವಸ್ತು, ಥೊಡೆಂ ಭಾಂಗಾರ್ ಘೆಂವ್ಕ್....., ಮ್ಹಾಕಾ ಆದ್ಲಿ ಜಾಪ್ ಪಳವ್ನ್ ಚಿಂತುನ್
ಹಾಸೊಂಕ್ ಆಯ್ಲೆಂ.
ವಿಜಾ ಧಾಡ್ನ್ ವೀಸ್ ದಿಸಾಂ ಭಿತರ್ ಯೆಂವ್ಚಿ ಬಂದೋಬಸ್ತ್ ಜಾಲಿ.
ಹಾಂವ್ ಜಾಗೊ ಜಾಲೊಂ.... ರಾನಾಂತ್ಲೊ ಭುಕೆಲ್ಲೊ ವಾಗ್ ಜಾಗೊ ಜಾಲ್ಲೆ
ಪರಿಂ.
ಮುಕ್ಲಿ ಪರಿಗತ್ ಕೊಣಾಚಿ ಕಶಿ ಹಾಂವ್ ನೆಣಾಸ್ಲೊಂ.
**************
ಹರ್ಏಕ್ ಪಾವ್ಟಿಂ ಗಾಂವಾಕ್ ವೆತಾನಾ ಮ್ಹಾಕಾ ಚಾಳೀಸ್, ಪಾಂಚಾಳೀಸ್
ದೀಸ್ ರಜಾ ಮೆಳ್ತಾಲಿ. ಹಾವೆಂ ವೆಚ್ಯಾ ಆದ್ಲ್ಯಾ ದಿಸಾ ಕೇಸ್
’ಡಯ್’ ಕರ್ನ್ ಕಾಳೆ ಕರ್ಚೆ. ಪರ್ನೆಂ ವಸ್ತುರ್ ಸೊಡ್ನ್
ನವೆಂ ವಸ್ತುರ್ ಫಕತ್ ಸೂಟ್ಕೆಜಿಂತ್ ಭರ್ಚೆಂ. ಸಗ್ಳ್ಯೊ
ನವ್ಯೊ ನವ್ಯೊಚ್ ಘೆವ್ನ್ ವೆಚೆಂ.
ಪನ್ನಾಸಾಂ ಲಾಗಿಂ ಪಾವ್ಲ್ಲೊಂ ಹಾಂವ್ ಪಾಂತ್ತಿಸ್ ವರ್ಸಾಂಚಾ ತರ್ನಾಟ್ಯಾಪರಿಂ
ಸೊಭ್ತಾಲೊಂ.
ಪಳಂವ್ಚೆ ಮನಿಸ್ ಮ್ಹಾಕಾ ಖಂಚ್ಯಾಯ್ ಮೆನೆಜರಾಚ್ಯಾಕ್ಯಿ ಉಣೆ ಗ್ರೇಡಿಚೆರ್ ಆಸಾ ಮ್ಹಳ್ಯಾರ್
ಪಾತ್ಯೆಂವ್ಚೆ ನಾಂತ್. ಜೆನಾ ಲಾಗಿಂ, ಕೊಣ್ಯಿ ವಿಚಾರ್ಲ್ಯಾರ್ ತೊ ಕಂಪ್ಣೆಂತ್ ’ಇನ್ಚಾರ್ಜ್’
ಮ್ಹಣ್ತಾಲೆಂ.
ಸತ್ ಗಜಾಲ್ ಹಾಂವ್ ಎಕಾ ಪ್ರೊಜೆಕ್ಟಾಂತ್ ’ಮೆಕ್ಯಾನಿಕಲ್ ಫೋರ್ಮೆನ್’,
ಮ್ಹಜೆ ಬರಿ ದುಸ್ರೆ ಸಬಾರ್ ಲೋಕ್ ಆನಿ ಬಾಯ್ಲ್ ಗ್ರೇಡ್
ವಾಡಯ್ತಾನಾ ಉಣೆ ಕಿತ್ಯಾಕ್ ಕರ್ಚೆಂ? ಮ್ಹಣೊನ್ ಹಾಸೊನ್ ’ವ್ಹಯ್
ವ್ಹಯ್’ ಮ್ಹಣ್ಚೆಂ ಆಸ್ಲ್ಲೆಂ.
ಮಯ್ನ್ಯಾಕ್ ದೊನ್ಶಿಂ ಡಿನಾರಾ ವಯ್ರ್ ಒವರ್ ಟಾಯ್ಮ್ ಕರ್ನ್ ಮೆಳ್ತಾಲೆ.
ಗಾವಾಂತ್ ಪಂಚ್ವೀಸ್ ತೀಸ್ ಹಜಾರ್ ಮಯ್ನ್ಯಾಕ್ ಮ್ಹಳ್ಯಾರ್
ವ್ಹಡ್ಲೆಚ್ ಪಳೆ.
ಮ್ಹಜ್ಯಾ ವ್ಹಡ್ಪಣಾಚಾ ದಳ್ಬಾರಾಚಿಂ ಸಪ್ಣಾಂ ನೀಜ್ ದೊಳ್ಯಾಂನಿಂ ಪಳಂವ್ಕ್
ಮ್ಹಜಿ ಬಾಯ್ಲ್ ಜೇನ್ ಆಯ್ತೆಂ ಜಾಲ್ಲೆಂ.
ಹಜಾರ್ ಭೊಗ್ಣಾಂ, ವಿಚಿತ್ರ್ ಭೊಗ್ಣಾಂ ತಾಕಾ ಗಲ್ಫ್ ಆನಿ ಮ್ಹಜ್ಯಾವಿಶಿಂ ಆಸ್ಲ್ಲಿಂ ಆನಿ ಆಯಿನ್ನ್ ಎಕಾ
ದಿಸಾ ತಾಣೆ ಬೊಬಯ್ ಥಾವ್ನ್ ಕುವೆಯ್ಟಾಕ್ ’ಏರ್ ಇಂಡಿಯಾ’ಚೆರ್
ಬಸೊನ್ ಪಯ್ಣ್ ಸುರು ಕೆಲೆಂ.
**************
ಸೊಭಿತ್ ರಸ್ಮಾಚಿ ಸಾಡಿ, ಗೊಮ್ಟ್ಯಾ ತಿತ್ತುನ್ ನೀಟ್ ಕಾಳೆ ಕೇಸ್,
ಸೊಭಿತ್ ಕಾಪ್ಡಾ ತೆಕಿತ್ ಬ್ಲಾವ್ಜ್, ಆಶಾ ಆಕಾಂಕ್ಶೆಚೆ ದೊಳೆ,
ಸೊಭಿತ್ ಫುಡ್ಪುಡೀತ್ ವದನ್, ಸುಡ್ಸುಡೀತ್ ಚಾಲ್ ಘೆವ್ನ್ ಆಪ್ಲ್ಯಾ
ಸೂಟ್ ಕೆಜಿ ಸಾಂಗಾತಾ ಜೇನ್ ಯೇವ್ನ್ ಏರ್ ಪೊರ್ಟಾ ಭಾಯ್ರ್ ಯೆತಾನಾ
ಮ್ಹಾಕಾ ಖಂಯ್ಚಾಗೀ ಸಿನೆಮಾ ತಾರಾಕ್ ಪಳಯಿಲ್ಲೆಬರಿ ಜಾಲೆಂ.
ಮ್ಹಜೆಂ ಜೇನ್ ಇತ್ಲೆಂ ಸೊಬಿತ್ ಪಾತ್ಯೆಂವ್ಕ್ ಜಾಲ್ನಾ. ಹಾವೆಂ ಕಿತೆಂಯ್
ಸರ್ಬಾರಾಯ್ ಕರುಂಕ್ ನಾ. ನಾ ತರ್ ಸಾಂಗಾತಿ ಬಾಯ್ಲ್ ಯೆತಾ
ಮ್ಹಣ್ ನೊವ್ರೊ ಜಾಲಾ ಮ್ಹಣ್ ತಮಾಸೊ ಕರ್ತಿತ್
ಮ್ಹಣ್ ಕಾವ್ಜೆಲೊಂ. ಹಾಂವ್ ಕಸೊ ಆಸ್ಲ್ಯಾರ್ಯ್ ತಾಕಾ ಫರಕ್
ಪಡಾನಾ ತೆಂ ಹಾಂವ್ ಜಾಣಾಂ.
ಮ್ಹಜಿ ಪಯ್ಲಿ ದೀಶ್ಟ್ ತಾಚೆರ್ ಪಡ್ತಾನಾ ಹಾವೆಂ ’ಹಾಯ್ ಜೇನ್’ ಮ್ಹಳೆಂ. ಕುಶಿನ್ ಕಾರ್ ಘೆವ್ನ್ ಆಯಿಲ್ಲ್ಯಾ
ಸ್ಟೇನಿಕ್ ಸಾಂಗ್ಲೆಂ. ತೆಂ ಸಯ್ರ್ ಭಯ್ರ್ ಜಾಲ್ಲೆಬರಿ ಪಳಂವ್ಕ್
ಪಡ್ಲೆಂ. ಹಾಂವ್ ಘಾಬರ್ಲೊಂ.
’ತೆಂ ಜೇನ್ ನ್ಹಂಯ್ ವಾ ತೆಂ ಮ್ಹಾಕಾ ಒಳ್ಕೊಂಕ್ ಸಕ್ಲೆಂ
ನಾ?" ಹಾಂವ್ ದುಬಾವ್ಲೊಂ.
ತಿತ್ಲ್ಯಾರ್ ಸ್ಟೇನಿನ್ಯ್ ’ಹಾಯ್ ಜೇನ್’ ಮ್ಹಣ್ತಾನಾ
ಮಾತ್ಶೆಂ ಧಯ್ರಾನ್ ಹಾಸ್ಲೆಂ.
ವ್ಹಳೂ ’ಹಾಯ್’ ಮ್ಹಣಾಲೆಂ ತರ್ಯ್ ಆವಾಜ್ ಸುಟ್ಲೊ
ನಾ. ತಾಚೊ ಸಂತೊಸ್ ಖಂಚ್ಯಾಗೀ ಸಂಗ್ತಿ ವರ್ವಿಂ ಜಿರ್ಲೊ ತೆಂ
ಮ್ಹಾಕಾ ಸ್ಪಶ್ಟ್ ಜಾಲೆಂ.
ಘಡ್ಯೆನ್ ಮುಕಾರ್ ವಚೊನ್ ವೆಂಗುನ್ "ಕಶೆಂ ಅಸಾಯ್ ಜೇನ್?"
ಮ್ಹಣೊನ್ ಪೊಲ್ಯಾಕ್ ಕೀಸ್ ದಾಂಬ್ಲೊ.
ತಾಣೆಂ ಮ್ಹಜ್ಯಾ ವದನಾಕ್ ದಾಕ್ತೆರಾನ್ ಪಿಡೆಸ್ತಾಕ್ ಪಳಂವ್ಚ್ಯಾ
ನದ್ರೆನ್ ಚೊಯ್ಲೆಂ.
"ಕಿತೆಂ ಜಾಲ್ಯಾ ತುಜಿ ಹಾಲಾತ್? ಹುಶಾರ್ ನಾಂಯ್ಗೀ?" ಮ್ಹಾಕಾ
ಮಿಸ್ತೆರ್ಚ್ ಜಾಲೊ.
"ನಾ ಜೇನ್ ತೊ ಹುಶಾರ್ ಆಸಾ. ಕಿತೆಂ ಜಾಲಾಂ?" ಸ್ಟೇನ್
ಮಧೆಂ ಘುಸ್ಲೊ.
"ಆಸೊಂ! ತುಂ ಕಸೊ ಆಸಾಯ್ ಸ್ಟೇನಿ?" ತಾಚೆ ಲಾಗಿಂ
ಸುಕ್ ದುಕ್ ಸುರು ಕರಿಲಾಗ್ಲೆಂ.
ಹಾಂವ್ ತಾಚ್ಯೊ ವಸ್ತು ಘೆವ್ನ್ ಕಾರಾರ್ ಘಾಲ್ಚ್ಯಾ ಕಾಮಾಂತ್ ಬಿಝಿ ಜಾತಾನಾ ತೆಂ
ಸ್ಟೇನಿ ಲಾಗಿಂ ಉಲವ್ನ್ ಮ್ಹಾಕಾ ವಿಮರ್ಶಾಚೆ ದಿಶ್ಟಿನ್ ಪಳೆತಾಲೆಂ.
ಹಾಂವ್ ಕಿತೆಂಚ್ ಗಜಾಲ್ ನೆಣಾ ಜಾಲೊಂ. ಕಿತ್ಲೆ ಉರ್ಬೆನ್ ಆಯಿಲ್ಲೆಂ ಜೇನ್ ಎಕಾಚ್ಫರಾ
ಬಾವ್ಲೆಂ ಕಿತ್ಯಾಕ್? ಮ್ಹಾಕಾ ಸಮ್ಜಾಲೆಂನಾ. ವೇಳ್ ಆಸ್ಲ್ಲೊ. ತೀನ್
ಮಯ್ನೆ ಆಸ್ಲ್ಲೆ. ಚಡಿತ್ ಟೆನ್ಶನ್ ಘೆನಾಶೆಂ ಕಾರಾರ್
ಬಸ್ಲ್ಯಾಂವ್.
***********
ಕಾರ್ ಮಾರ್ಗಾರ್ ರಾವೊನ್ ಹಾವೆಂ ಸಾಮಾನ್ ಸಕ್ಲಾ ದವರ್ತಾನಾ.....
"ಯೇ ಸ್ಟೇನಿ ಕಾಂಯ್ ಪಿಯೆವ್ನ್ ವಚ್" ಒತ್ತಾಯ್ ಕೆಲಿ.
ತೊಯಿ ದಾಕ್ಶೆಣೆನ್ "ನಾಕಾ ನಾಕಾ.... ತುಮ್ಕಾಂ ಧಾರಾಳ್ ಉಲಂವ್ಕ್ ಆಸ್ತೆಲೆಂ. ಕೆದ್ನಾಂಯ್ ಗರ್ಜ್
ಪಡ್ಲ್ಯಾರ್ ಫೋನ್ ಕರಾತ್. ತುಮ್ಚೆ ಖಾತಿರ್ ಆಮ್ಚೆಂ
ಬಾಗಿಲ್ ಉಗ್ತೆಂ ಆಸಾ" ಮ್ಹಣೊನ್ ಚಲ್ಲೊ. ಜೆನಾನ್ ಬಿಲ್ಡಿಂಗ್ ಪಳೆಲೆಂ.
"ಖಂಚೆ ಮಾಳಿಯೆರ್ ಮುಲ್ಲಕ್?" ಪಯ್ಲೆಂ ಸವಾಲ್
ಸ್ಟೇನಿ ಗೆಲ್ಲೊಚ್ ವಿಚಾರ್ಲೆಂ, ಹಾಂವ್ ಹಾಸ್ಲೊಂ.
"ಮುಲ್ಲಾಕಾಂ ಗ್ರೌಂಡ್ ಫ್ಲೋರಾರ್ಚ್ ಆಸ್ತಾತ್. ಆಳೆ ವೋತೆಂ"
ಹಾವೆಂ ದಾಕಯ್ಲೆಂ.
"ತೆಂ ಗುಡ್ಸುಲ್.....? ಆಮ್ಚೆಂ ಶೆಡ್ಡ್ ತಾಚ್ಯಾಕ್ಯ್ ಬರೆಂ ಆಸಾ."
ಮ್ಹಾಕಾ ಹರ್ದ್ಯಾಕ್ ಕಸ್ಕ್ ಕರ್ನ್ ಸುರಿ ತೊಪ್ಲ್ಲೆಪರಿಂ ಜಾಲೆಂ.
ಹಾವೆಂ ಸೊಸ್ಣಿಕಾಯ್ ಸಾಂಬಾಳ್ಳಿ ಆನಿ ಶೀದಾ ಸಾಮಾನ್
ವ್ಹರ್ನ್ ಬಾಗಿಲ್ ಉಗ್ತೆಂ ಕರ್ನ್ ಎ.ಸಿ. ಘಾಲಿ, ದಿವೆ ಘಾಲೆ.
ಕಾರ್ಪೆಟ್ ಪರ್ನೆಂ ತರಿ ನಿತಳ್ ಆಸ್ಲ್ಲೆಂ. ಟಿವಿ, ವಿಡಿಯೊ ಖಟ್ಲೆಂ, ಕದೆಲಾಂ
ಸೊಫಾ ಎಕಾ ನದ್ರೆನ್ ಪಳವ್ನ್ ಜೇನ್ ಫುಲ್ಚೆಲೆಂ.
ಮಂಗ್ಳುರಾಂತ್ ಆಮ್ಗೆರ್ ಭಾರೀ ಸ್ಟೇಂಡರ್ಡ್ ವಸ್ತು ಆಸಾತ್.
ವಿಶಾಲ್ ತೀನ್ ಬೆಡ್ರುಮಾಚೆಂ ಘರ್, ಘರಾಂತ್ ವೀಜ್ ದಿವ್ಯಾಂಚೆಂ
ಪೂಂಜೆ, ವಿಶಾಲ್ ಸಾಲ್, ರಾಂದ್ಚೆಂ ಕೂಡ್ ಇತ್ಯಾದಿ ಇತ್ಯಾದಿ. ಆನಿ
ಹಾಂಗಾ ಕಾಕುಸ್ ಬಾತ್ ರೂಮ್, ಕಿಚನ್ ಪಳಂವ್ಕ್ ಭಿತರ್ ಗೆಲ್ಲೆಂ ಜೇನ್ ತಶೆಂಚ್
ಬಾಯ್ರ್ ಸೊಫಾರ್ ಯೇವ್ನ್ ಬಸ್ಲೆಂ
ಹಾವೆಂ ಜೆನಾಚ್ಯಾ ಪಸಾಂದೆಚಾ ಥಂಡ್ ’ಸ್ಟ್ರೊಬರಿ ಮಿಲ್ಕ್’ ಗ್ಲಾಸಾಂತ್
ಹಾಡ್ಲೆಂ.
"ಧರ್ ಪಿಯೆ ಜೇನ್. ತುಕಾ ಹೆಂ ಘರ್ ಮ್ಹಣೊಂಕ್ ಕಶ್ಟ್ ಜಾಂವ್ಕ್
ಪುರೊ. ಪುಣ್ ಮ್ಹಜೆ ಪರಿಗತೆಂತ್ ಹಾಚ್ಯಾಕ್ಯ್ ವ್ಹರ್ತೆಂ
ಹಾಂವ್ ಕಾಂಯ್ ಕರುಂಕ್ ಸಕೊಂಕ್ ನಾ. ಆಸಲ್ಯಾ ಸಂಗ್ತಿನಿಂ ನಿರಾಶಿ ಜಾಯ್ನಾಕಾ."
ತಾಣೆ ಮ್ಹಾಕಾ ಜ್ಯೊರಾನ್ ಚೊಯ್ಲೆಂ.
"ತುಂ ಏರ್ಪೊರ್ಟಾಕ್ ಬಾಯ್ಲೆಕ್ ಆಪವ್ನ್ ಹಾಡುಂಕ್ ಯೆತಾನಾ ತರ್ಯ್ ಬರೆಂ ಡ್ರೆಸ್ ಘಾಲುಂಕ್ ತುಕಾ ಕೊಣಿ
ಸಾಂಗಾಜೆಗೀ? ತುಜೆಂ ತೋಂಡ್ ಪಳೆ ಆರ್ಶ್ಯಾಂತ್....?" ತೆಂ ಖೆವ್ಜಾಲೆ.
ಹಾಂವ್ ಗಡ್ಬಡ್ಲೊಂ.
ಹಾಂವ್ ಇಗರ್ಜೆಕ್ ವೆಚೆಂ ವಸ್ತುರ್ ನ್ಹೆಸ್ಲ್ಲೊ. ಪಾಟಾಪಟ್ ಆರ್ಶ್ಯಾಂತ್
ವದನ್ ಪಳೆಲೆಂ. ತಿತ್ಲೆಂ ಪಾಡ್ ಮ್ಹಾಕಾ ದಿಸ್ಲೆಂ ನಾ.
ಸಟ್ಟ್ ಕರ್ನ್ ಉಡಾಸಾಕ್ ಆಯ್ಲೆಂ
ವ್ಹಯ್, ಹಾಂವ್ ಏರ್ಪೊರ್ಟಾಂತ್ ದೆಂವ್ತಾನಾ ಬರೊ ಸೊಬ್ತಾಲೊ. ತೆಂಯಿ ಬರೊ
ಸುಂರ್ಗಾರ್ ಕರ್ನ್ ಯೆತಾಲೆಂ. ಆಜ್ ಮ್ಹಜೆ ಕೇಸ್ ಪಿಕ್ಲ್ಲೆಂ ತಶೆಚ್ ಆಸಾತ್.
ಮ್ಹಜೆ ಮೊಚೆ ಸಾದೆ. ಮ್ಹಜೆಂ ವಸ್ತುರ್ ಸಾದೆಂ ಮಿಶಿಯೊ ಟ್ರಿಮ್ ಕರುಂಕ್
ನಾಂತ್. ಕೇಸ್ ಆಸ್ತ್ ವ್ಯಸ್ತ್ ಜಾವ್ನ್ ಕೊಂಬಿಯೆಚ್ಯಾ ಪಾಕಾಂಬರಿ
ದಿಸ್ತಾತ್. ಕಾಮಾಚಿ ಆನಿ ಘರ್ ಸಜಂವ್ಚಿ. ಪುರಾಸಣ್ ಕಾಬಾರ್ ಜಾಂವ್ಕ್
ನಾತ್ಲ್ಲಿ.
ಕಾಮಾಚೆಂ ಟೆನ್ಶನ್ ವಿಂಗಡ್ ಮತಿಂತ್ ಸತಯ್ತಾ. ಹೆಂ
ಸರ್ವ್ ಜೇನ್ ಕಿತೆಂ ಜಾಣಾಂ?
ರಜೆರ್ ವೆತಾನಾ ಹಾಂವ್ ಸರ್ವ್ ವಿಸರ್ನ್ ಮಜೆ ಖಾತಿರ್,
ಸಂತೊಸಾ ಖಾತಿರ್ ವೆತಾಂ. ಆನಿ ಹಾಂಗಾ ತ್ಯಾ ಖಾತಿರ್ ತ್ಯಾಗ್ ಕರ್ತಾಂ.
ಮ್ಹಾಕಾ ಕಿತೆಂ ಉಲವ್ಚೆಂ ತೆಂ ಕಳ್ಳೆಂ ನಾ.
"ಜೇನ್ ತುಕಾ ಪಯ್ಣಾಚಿ ಪುರಾಸಣ್ ಜಾಲ್ಯಾ ಆಸ್ತೆಲಿ. ತುಂ
ನ್ಹಾವ್ನ್ ಜೇವ್ನ್ ನಿದೆ. ಫಾಲ್ಯಾಂ ಸಾಕಾಳಿಂಕ್ ನಾಸ್ಟ್ಯಾಕ್, ಜೆವ್ಣಾಕ್
ಸಗ್ಳಿ ಬಂದೋಬಸ್ತ್ ಕರ್ತಾಂ. ಮ್ಹಾಕಾ ಸ ವೊರಾರ್ ಕಾಮಾಕ್
ವಚೊಂಕ್ ಆಸಾ"
"ತಿತ್ಲ್ಯಾ ವೆಗ್ಗಿಂ?"
"ಪಾಂಚಾ ಆದಿಂ ವಚೊಂಕ್ ಉಟೊಂಕ್ ಆಸಾ."
"....." ತೆಂ ಉಲಯ್ಲೆಂ ನಾ.
"ಸಗ್ಳಿ ಗಜಾಲ್ ಫಾಲ್ಯಾಂ ಉಲಯಾಂ. ಪರ್ಮಿಶನ್ ಘೆವ್ನ್ ಯೆತಾಂ"
ಪರಿಗತ್ ನಿಯಂತ್ರಣಾರ್ ಸಾಂಬಾಳ್ನ್ ತೊ ದೀಸ್ ಪಾಶಾರ್ ಕೆಲೊ. ಆನಿ ತೀನ್
ಪಯ್ನೆ ಪಾಶಾರ್ ಕರುಂಕ್ ಆಸ್ಲ್ಲ್ಯಾನ್ ಹಾವೆಂ ಸೊಸ್ಣಿಕಾಯ್ ಘೆತ್ಲಿ.
**************
ಏಕ್ ಹಪ್ತೊ ಸದಾಂ ಸಾಂಜೆಚೆಂ ಸ್ಟೇನಿ ಬರಾಬರ್, ಏಕ್ ದೋನ್
ಪಾವ್ಟಿಂ ಟ್ಯಾಕ್ಸಿಚೆರ್ ಕುವೆಯ್ಟ್ ಸಿಟಿ ಭೊಂವ್ಲ್ಯಾಂವ್. ಗರ್ಜೆಚ್ಯೊ
ವಸ್ತು ಘೆವ್ನ್ ದಿಲ್ಯೊ. ಭಾಯ್ರ್ ಹೊಟೆಲಾಂನಿ ಜೆವ್ಲ್ಯಾಂವ್.
ತಿತ್ಲ್ಯಾ ಭಿತರ್ ಮ್ಹಜೊ ಮೋಗ್ ಹುಸ್ಕೊ ಪಳವ್ನ್
ಸ್ವಾಬಾವಿಕ್ ಹಂತಾಕ್ ಪಾವ್ಲೆಂ. ತ್ಯಾ ಎಕ್ ದೀಸ್ ಹಾವೆಂ ತಾಕಾ ಬರ್ಯಾನ್
ಸಮ್ಜಾಯ್ಲೆ. ಸಿಝರ್ಸ್ ಚಾಯ್ನಿಸ್ ರೆಸ್ಟೋರಂಟಾಂತ್ ದೊಗಾಂಚ್
ಬಸೊನ್ ಜೆವ್ತಾನಾ.
"ಜೇನ್ ಸತ್ ಸಾಂಗ್ತಾ, ಮ್ಹಜೆಂ ತೆವಿಸ್ ವರ್ಸಾಂಚೆಂ ಜಿಣಿಯೆಂತ್ ಇತ್ಲ್ಯಾ ಬರ್ಯಾ
ಹೊಟೆಲಾಂತ್ ಇತ್ಲ್ಯಾ ಮೊಲಾಚೆಂ ಜೆವಾಣ್ ಜೆಂವ್ಚೆಂ ಪಯ್ಲೆಂ
ಪಾವ್ಟಿಂ. ಹರ್ ಎಕಾ ಡಿನಾರ್ ಖರ್ಚಿತಾನಾ ಇಂಡಿಯಾಚೆ ದೆಡ್ಶೆಂ ರುಪಯ್ ಜಾತಾತ್
ಮ್ಹಣೊನ್ ಪೋಟ್ ಮಾರ್ನ್ ಪಯ್ಶೆ ಉರಯ್ತಲೊಂ ಆನಿ ತುಮ್ಚೆ ಖಾತಿರ್ ದವರ್ತಲೊಂ. ತುಮಿ
ನಾಸ್ತಾನಾ ಕಿತೆಂಚ್ ಬರೆಂ ಖಾಂವ್ಕ್ ಜೇಂವ್ಕ್ ಮನ್ ಯೇನಾತ್ಲ್ಲೆಂ. ದಳ್ಬಾರ್ ಕರುಂಕ್
ಪುಟ್ವಾನಾತ್ಲ್ಲೆಂ. ಮಿಜಾಸ್ಕಿ ಕರುಂಕ್ ಒಂಬಾನಾತ್ಲ್ಲೆಂ. ಏಕ್
ಪಾವ್ಟಿಂ ರಾಂದ್ಲ್ಲೆಂ ಹಪ್ತೊ ಭರ್ ಜೆವ್ಲ್ಲೆಂ ಆಸಾ. ಪನ್ನಾಸ್
ಫಿಲ್ಸಾಚಾ ಕಬೂಸಾನ್ ದೀಸ್ ಸಾರ್ಲ್ಲೊಯ್ ಆಸಾ. ನವ್ಯೊ
ವ್ಹಾಣೊ, ನವೆಂ ವಸ್ತುರ್, ಸಾಕ್ಸ್, ಮೊಚೆ ಸೊಡ್ ಭಿತರ್ ಘಾಲ್ಚ್ಯೊ ಚಡ್ಡ್ಯೊ
ಪಾಸೊನ್ ನಿಮಾಣ್ಯಾ ಹಂತಾಕ್ ಪಾವ್ಲ್ಲ್ಯಾ ಬಗಾರ್ ದುಸ್ರ್ಯೊ ಘೆನಾತ್ಲ್ಲೊಂ, ಆನಿ ಜರ್ ಆಜ್
ಹಾಂಗಾ ಎಕ್ಸುರೊ ಜಿಯೆವ್ನ್ ದಳ್ಬಾರ್ ದಾಕಯಿಲ್ಲೆಂ ತರ್, ಆಮ್ಚೆಂ ಘರ್ ಆನಿ ಘರಾಣೆಂ ಉಭೆಂ ಜಾತೆಂ
ನಾ. ತುಕಾ ಆನಿ ಭುರ್ಗ್ಯಾಂಕ್ ಇತ್ಲ್ಯಾ ಬರ್ಯಾ ಹಂತಾಚೆಂ ಜಿವನ್ ಮೆಳ್ತೆಂ
ನಾ. ಸತ್ ಗಜಾಲ್ ಹಾಂವ್ ಕಶೆಂ ಜಿಯೆಲಾಂ ತೆಂ ದಾಕಂವ್ಕ್ ಫಾಲ್ಯಾಂ ತುಕಾ
ಮ್ಹಜ್ಯಾ ಕೆಂಪಾಕ್ ಆಪವ್ನ್ ವರ್ತಾಂ. ತೆದ್ನಾಂ ತುಕಾ ದಾದ್ಲ್ಯಾ ಜಿವಿತ್ ಕಿತೆಂ,
ಮನಿಸ್ ಥೊಡೆಂ ಜೊಡ್ಚೆ ಖಾತಿರ್ ಜಾಯ್ತೆಂ ಹೊಗ್ಡಾಯ್ತಾ ತೆಂ ತಿಕಾ ಕಳ್ತಾನಾ
ಮ್ಹಜ್ಯೆರ್ ಮಾತ್ ನ್ಹಂಯ್ ಸಗ್ಳ್ಯಾ ಗಲ್ಫಾಂತ್ಲ್ಯಾ ಎಕ್ಸುರ್ಯಾ ದಾದ್ಲ್ಯಾಂಚೆರ್ ದಯಾಳಾಯ್ ಯೇತ್..."
ಮ್ಹಜ್ಯಾ ಲಾಂಭ್ ಉತ್ರಾಂಚ್ಯಾ ಉಲವ್ಣ್ಯಾ ಉಪ್ರಾಂತ್ ಜೇನ್
ಸಂಪೂರ್ಣ್ ಬದ್ಲಾಲೆಂ.
ಜೆವಾಣ್ ಜಾವ್ನ್ ಆಟ್ರಾ ಡಿನಾರ್ ಬಿಲ್ಲ್ ಭರ್ತಾನಾ ತಾಚಿಂ ಅಂತರ್ಮಳಾಂ ಉಡ್ಲಿಂ. ತೆಂ ಆಕಾಂತ್ಲೆಂ.
"ದೊಗಾಂಕ್ ದೋನ್ ಹಜಾರಾಂ ವಯ್ರ್ ಬಿಲ್ಲ್"
"ವ್ಹಡ್ ನಾ, ತುಜ್ಯಾಕಿ ವರ್ತೆಂ ಆನಿ ಆಮ್ಚ್ಯಾ ಸಂತೊಸಾ
ಪ್ರಾಸ್ ವರ್ತೆ ಪಯ್ಶೆ ನ್ಹಂಯ್"
ದುಸ್ರ್ಯಾ ದಿಸಾ ಡ್ಯೂಟಿ ಜಾವ್ನ್ ಸಾಂಜೆರ್ ಜೆನಾಕ್ ಕಂಪ್ಣೆಚ್ಯಾ ಕೆಂಪಾಂತ್
ಮ್ಹಜೆಂ ರೂಮ್ ದಾಕಂವ್ಕ್ ವ್ಹೆಲೆಂ.
ಭಿತರ್ ಸರ್ತಾನಾಚ್ ತಾಕಾ ಕಾಂಟಾಳೊ ಆಯ್ಲೊ. ತರ್ಯ್ ತಾಣೆ ದಾಕಯ್ಲೊ
ನಾ. ಸಾಂಗತಿ ಕಾಮಾಚೆ ಯೇವ್ನ್ ನಮಸ್ತೆ ಸಾಹೆಬ್,
ನಮಸ್ತೆ ಸಾಹೆಬ್ ಕರಿಲಾಗ್ಲೆ. ಹಾವೆಂ ಮುಕಾರ್ ಆಪವ್ನ್
ವೆಲೆಂ. ತಾಂಚೊ ಜಿನೊಸ್ ಕಯ್ದ್ಯಾಬರಿ ಆಸ್ಲ್ಲೊ. ಕೋಣ್
ವಸ್ತುರ್ ಉಂಬಳ್ತಾ. ಕೋಣ್ ಬೊಬಾಟ್ತಾ. ಕೋಣ್ ರಾಂದ್ತಾ, ಕೋಣ್ ಶಿಂದ್ತಾ, ಕೋಣ್ ಕಾತಾರ್ತಾ, ಕೋಣ್ ಝಗಡ್ತಾ, ಕೋಣ್
ವಾಚ್ತಾ, ಕೋಣ್ ಧ್ಯಾನ್ ಕರ್ತಾ ಕೋಣ್ ವ್ಯಾಯಾಮ್ ಕರ್ತಾ, ಕೋಣ್ ಕಾಕ್ಸಾ ಭಾಯ್ರ್
ಭಿತರ್ಲೊ ಭಾಯ್ರ್ ಯೇಂವ್ಕ್ ರಾಕ್ತಾ.
ಹಾವೆಂ ಮ್ಹಜ್ಯಾ ರುಮಾಕ್ ಆಪವ್ನ್ ವ್ಹೆಲೆಂ.
"ಪಳೆ ಹಾಂಗಾಸರ್ ಹಾಂವ್ ರಾವ್ತಾಂ" ತಿತ್ಲ್ಯಾರ್ ಉರ್ಲ್ಲ್ಯಾ ತೆಗಾಂನಿ ಉಟೊನ್
ಹಾತ್ ಜೊಡ್ಲೆ.
ಹಾವೆಂ ಒಳೊಕ್ ಕರ್ನ್ ದಿಲಿ. ತಾಣಿಂ ಮ್ಹಜಿ ಹೊಗ್ಳಿಕ್ ಉಚಾರ್ಲಿ.
"ಆಮಿ ಹ್ಯಾ ರುಮಾಂತ್ ಚೋವ್ಗ್ ರಾವ್ತಾಂವ್. ಉರ್ಲ್ಲೆ
ಸಾದೆ ಕಾಮೆಲಿ ಆಸಲ್ಯಾ ರುಮಾಂತ್ ಆಟ್, ಧಾ ಜಣ್ ರಾವ್ತಾತ್. ಎಕ್ಲ್ಯಾ
ವಯ್ರ್ ಎಕ್ಲೊ ಖಟ್ಲೆಂ ಚಡವ್ನ್" ಹಾವೆಂ ಸಾಂಗ್ಲೆಂ.
ಗಾವಾಂತ್ ಸರ್ವ್ ಸಂಗ್ತಿಂನಿ ಶಿಸ್ತೆನ್ ಆಸ್ಚೊ ಹಾಂವ್ ಹಾಂಗಾ ಒಟ್ರಾಶಿ ಜಿಯೆಂವ್ಚೆಂ ಪಳವ್ನ್ ತಾಕಾ
ಪಾತ್ಯೆಂವ್ಕ್ ಜಾಲೆಂ ನಾ.
ತಿತ್ಲ್ಯಾರ್ ಎಕ್ಲ್ಯಾನ್ ಸಿಗ್ರೆಟ್ ಪೆಟಯ್ಲಿ.
ಸಿಗ್ರೆಟ್ ಮ್ಹಣ್ತಾನಾ ಮ್ಹಾಕಾ ಜಾಯ್ನಾತ್ಲ್ಲೆಂ ತೆಂ ಜಾಣಾಂ. ತರಿ
ಹಾಂವ್ ಮಾವ್ನ್ ಆಸ್ಲ್ಲೆಂ ಪಳವ್ನ್ ತಾಣೆಂ ಖೊಂಕ್ಲಿ ಕಾಡ್ಲಿ. "ಸೋರ್ರಿ
ಮೇಮ್ ಸಾಬ್" ಮ್ಹಣೊನ್ ತೊ ಭಾಯ್ರ್ ಗೆಲೊ. ತಾಚೆ ಬರಾಬರ್ ಉರ್ಲ್ಲೆ ದೊಗ್ಯ್ ಭಾಯ್ರ್ ಗೆಲೆ.
ಹಾವೆಂ ಮ್ಹಜ್ಯಾ ಖಟ್ಲ್ಯಾರ್ ’ಬಸ್’ ಮ್ಹಳೆಂ ದುಸ್ರೆಂ ಕದೆಲ್ ಥಂಯ್
ನಾತ್ಲ್ಲೆಂ.
"ಜೇನ್ ಹಾವೆಂ ಹ್ಯಾಚ್ ಖಟ್ಲ್ಯಾರ್ ಮ್ಹಜ್ಯಾ ತರ್ನಾಟ್ಪಣಾಚೆಂ ಚಡಿತ್ ಜಿವಿತ್
ಪಾಶಾರ್ ಕೆಲಾಂ. ಹೆಂ ಎಕ್ಸುರೆ ಖಟ್ಲೆಂ ಮ್ಹಜ್ಯಾ ವಾಂಟ್ಯಾಚೊ ಖುರಿಸ್. ತೊ
ಹಾವೆಂ ವ್ಹಾವಂವ್ಕ್ ನಾತ್ಲ್ಲೊ ತರ್ ಆಜ್ ತುಕಾ ಮಂಗ್ಳುರಾಂತ್
ಬೊಂಗ್ಲೊ. ವಾಹನಾಂ, ಭುರ್ಗ್ಯಾಂಕ್ ಶಿಕಾಪ್ ಸವ್ಲಾತಾಯೊ
ಲಾಬ್ತ್ಯೊ ನಾಂತ್. ಹ್ಯಾಚ್ ಖಾಟ್ಲ್ಯಾರ್ ಕಿತ್ಲೆ ಪಾವ್ಟಿಂ ಹುಶಾರ್
ನಾಸ್ತಾನಾ ಉರ್ಲಾಂ. ಕಿತ್ಲ್ಯೊ ರಾತಿ ನೀದ್ ನಾಸ್ತಾಂ ಸಾರ್ಲ್ಯಾತ್. ರಡೊನ್ ಉಶೆಂ
ಭಿಜಯ್ಲಾಂ. ಆಜ್ ಆಮಿ ಮನ್ಶ್ಯಾಂಬರಿ ಆಮ್ಚ್ಯಾ ಗಾವಾಂತ್ ಆಸಾಂವ್ ತರ್
ಹಾಂಗಾ ಹೆ ರಿತಿನ್ ಜಿಯೆಲ್ಲ್ಯಾನ್ ಮಾತ್. ದೆಕುನ್ ಮ್ಹಾಕಾ ಉಣೆ
ನದ್ರೆನ್ ಪಳಂವ್ಚ್ಯಾ ಆದಿಂ ತೆಂ ಪರ್ನೆಂ ವಸ್ತುರ್, ಪರ್ನೆ
ಮೊಚೆ ಅಸ್ತ್ವ್ಯಸ್ತ್ ಜಾಲ್ಲೆ ಧವೆ ಕೇಸ್, ಏಕ್ ಸಾಕ್ರಿಫಿಸಾಚಿ ಕುರ್ಹು
ಮ್ಹಣ್ ಚೀಂತ್ ಆನಿ ಭುರ್ಗ್ಯಾಂಕ್ ಹ್ಯಾ ವಿಶಿಂ ಸಾಂಗಿನಾಕಾ....
ಪಯ್ಶ್ಯಾಂಚೊ ದಳ್ಬಾರ್ ದಾಕಂವ್ಕ್ ಸಲೀಸ್, ಪಯ್ಶೆ ಜೊಡುಂಕ್ ಭಾರಿಚ್ ಕಶ್ಟ್ ಆಸಾತ್"
ಜೇನಾನ್ ದೀಗ್ ಸ್ವಾಸ್ ಸೆವ್ಲೊ.
ಮ್ಹಾಕಾ ರುಮಾಂತ್ಚ್ ಪೊಟ್ಲುನ್ ಧರ್ಲೆಂ ಆನಿ ಇತ್ಲೆಂಚ್
ಮ್ಹಣಾಲೆಂ.
ಮ್ಹಜ್ಯಾ ಮತಿಚೆಂ ಧಾಂಕಣ್ ತುವೆಂ ಉಗ್ತೆಂ ಕೆಲೆಂಯ್ ಜೆರಿ.
ಹ್ಯಾ ಉಪ್ರಾಂತ್ ಜಿಣ್ಯೆಚೆಂ ಪೋಂತ್ ಪರ್ಯಾಂತ್ ತುಜ್ಯಾ ಪಾಂಯಾಂಥಳಾ ಚಾಕ್ರಿ ಕರ್ನ್ ತುಜೊ
ಮೋಗ್ ಕರ್ನ್ ತುಕಾ ಖಾಲ್ತೆಂ ಜಾವ್ನ್ ಚಲ್ತಾಂ. ತುಜೆ ಜಿಣಿಯೆಚೊ
ಸಾಕ್ರಿಫಿಸ್ ಹಾಂವ್ ಯೇವ್ನ್ ಪಳವ್ನ್ ಸಮ್ಜಾಲಿಂ.
ಪುಣ್ ನಿರ್ಬಾಗಿ ತಿಂ.... ತಾಂಚಿಂ ಬಾಯ್ಲಾಂ ಆನಿ ಭುರ್ಗಿಂ ನೆಣಾಂತ್ ತಾಂಚ್ಯಾ ಘೊವಾಚೊ ತ್ಯಾಗ್.
"ಹಾಂವ್ ಜಾಯ್ತ್ಯೊ ವಸ್ತು ಘೆಂವ್ಕ್, ಸೊಭೊಂಕ್, ಭೊವೊಂಕ್,
ಮಜಾ ಕರ್ಚ್ಯಾ ಇರಾದ್ಯಾನ್ ಆಯಿಲ್ಲಿಂ. ಆತಾಂ ಮ್ಹಾಕಾ ಸಮ್ಜಾಲೆಂ.
ಹೊ ಜಾಗೊ ಪಯ್ಶೆ ಜಮಂವ್ಚೊ ತ್ಯಾಗಾಚೊ.
"ಮುಕ್ಲೆಂ ಜಿವಿತ್ ಗಾವಾಂತ್ ಆಸ್ಲ್ಲ್ಯಾಂತ್ ಸುದಾರ್ಸುನ್ ಜಿಯೆಲ್ಯಾರ್
ಹಾಚ್ಯಾಕೀ ಬರೆಂ ಜಿಯೆವ್ಯೆತ್. ದೀ ರಾಜಿನಾಮೊ ಆಮಿ ಚಲ್ಯಾಂ ಗಾಂವಾಕ್" ಜೇನಾನ್
ಸಾಂಗ್ತಾನಾ ಸಂಸಾರಾಂತ್ಲಿ ಶ್ರೇಶ್ಟ್ ಪ್ರಶಸ್ತಿ ಲಾಭ್ಲ್ಲೊ
ಸಂತೊಸ್ ಭೊಗ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
