ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 2
ದೆ|ವಿ.ಜೆ.ಪಿ. ಸಲ್ಡಾನ್ಹಾ (ಖಡಾಪ್)
ಖರೊ ಮೋಗ್
ನಾಂವ್ : ವಿಶೆಂತ್ ಜುವಾಂವ್ ಪೆದ್ರು ಸಲ್ಡಾನ್ಹ್.
ಲಿಖ್ಣೆ ನಾಂವಾಂ : ಖಡಾಪ್, ಜುಪೆಸ್, ವಿಜೆಪಿಎಸ್, ಪಿಯೆರ್.
ಜನನ್ : 09 ಜೂನ್ 1925.
ಜಲ್ಮಾಲ್ಲೊ ಗಾಂವ್ : ಒಮ್ಜೂರ್
ಮರಣ್ : 22 ಫ಼ೆಬ್ರೆರ್ 2000.
ದೆ|ವಿ.ಜೆ.ಪಿ.ಸಲ್ಡಾನ್ಹ್ (ಖಡಾಪ್)
ವಳೊಕ್:
ಶಿಕಾಪ್ : M.A; ND; DHM; MD (AM)
ಚಾರಿತ್ರಿಕ್ ಕಾದಂಬರ್ಯೊ : 13
ಇತರ್ ಕಾದಂಬರ್ಯೊ : 7
ಇತರ್ ಪುಸ್ತಕಾಂ : 5
ಆಣ್ಕಾರಿತ್ : 5
ಕವಿತಾ ಪುಂಜೊ : 2 [ಲಗ್ಬಗ್ 7000 ವಯ್ರ್ ಕವಿತಾಂ, ಪದಾಂ, ಕಂತಾರಾಂ, ಶ್ಲೋಕಾಂ, ಚುಟುಕಾಂ-ಚುಟ್ಕುಲಾಂ ಲಿಖ್ಲ್ಯಾಂತ್.]
ನಾಟಕಾಂ : 45.
ರೇಡಿಯೊ ನಾಟಕಾಂ : 7.
ಸಾಹಿತಿಕ್ ವಾವ್ರ್ :
’ಪಯ್ಣಾರಿ’ ಪತ್ರಾಚೊ ಸ್ಥಾಪಕ್ ಸಂಪಾದಕ್ (1950)
’ಕನ್ನಡವಾಣಿ’ ದಿಸಾಳ್ಯಾಚೊ ಸ್ಥಾಪಕ್ ಸಂಪಾದಕ್ (1960)
’ಅಮರ್ ಕೊಂಕಣಿ’ ಹಾಚೊ ಸ್ಥಾಪಕ್ ಸಂಪಾದಕ್ (1980)
ವೆಕ್ತಿತ್ವ್ :
ವಿ.ಜೆ.ಪಿ. ಯಾ ’ಖಡಾಪ್’ ನಾಂವಾರ್ಚ್ ಕೊಂಕ್ಣಿ ಸಂಸಾರಾರ್ ನಾಂವಾಡ್ದಿಕ್ ಜಾಲ್ಲೊ ವಿಜೆಪಿ ಏಕ್ ಖರೊ ಸಾಹಿತಿ, ಕವಿ, ನಾಟಕಿಸ್ತ್, ನಟ್, ನಿರ್ದೇಶಕ್, ಗಾವ್ಪಿ, ಸಂಗೀತ್ಕಾರ್, ದೊತೊರ್, ಕಾದಂಬರಿಕಾರ್, ಪತ್ರಿಕೋಧ್ಯಮಿ, ಸಂಘಟಕ್ ಆನಿಂ ಏಕ್ ಖರೊ ವಾವ್ರಾಡಿ. ಜಶೆಂ ಚಿಂತ್ಪಾಂತ್ ತೊ ಜಂಟಲ್ಮೇನ್ ಆಸ್ಲ್ಲೊಕೀ ತಶೆಂಚ್ ಜಿಣ್ಯೆಂತ್ಯಿ. ’ಚಾರಿತ್ರಿಕ್ ಕಾದಾಂಬರಿಯಾಂಚೊ ಬಾಪುಯ್’ ಮ್ಹಣ್ ನಾಂವಾಡ್ದಿಕ್ ಜಾಲ್ಲ್ಯಾ ವಿಜೆಪಿಚೆಂ ಸ್ಥಾನ್ ಕೊಂಕ್ಣಿ ಸಾಹಿತ್ಯಾಂತ್ ಭರುಂಕ್ ಅಜೂನ್ ಪರ್ಯಾಂತ್ ಕೊಣ್ಂಚ್ ಉದೆಂವ್ಕ್ನಾ.
ಚಿಂತಾಪ್ :
ವಿಜೆಪಿಚೆ ವಿಚಾರ್ ಸಾಮಾಜಿಕ್, ಕೊಂಕ್ಣಿ ಸಮಾಜೆಂತ್ ಕಿತೆಂ ಘಡ್ತಾ ಮ್ಹಳ್ಳಿ ಪರಿಪೂರ್ಣ್ ಜಾಣ್ವಾಯ್ ಆನಿಂ ಮಾಹೆತ್ ತಾಕಾ ಆಸ್ಲ್ಲಿ. ಮನ್ಶಾ ಜಿಣ್ಯೆಂತ್ ಏಕ್ ಮನಿಸ್ ಜಾವ್ನ್ ಅಪ್ಲ್ಯಾ ಶ್ಯಾಥಿಯೆಂತ್ ಕಿತೆಂ ಸಾಧ್ಯ್ಗೀ, ತಾಚಾಕೀ ಚಡಿತ್ ರಿತಿನ್ ಹೆರಾಂಕ್ ಬರೆಂ ಕರುಂಕ್ ಪೆಚಾಡ್ಲ್ಲ್ಯಾ ವೆಕ್ತಿಂಕ್ ತೊ ವಿಂಚುನ್ ವಿಂಚುನ್ ಕಾಡ್ತಾಲೊ ಆನಿಂ ಆಪ್ಲ್ಯಾ ಕಾದಂದರಿಯಾಂನಿ ತಾಂಕಾ ಜಿವಾಳ್ ದವರ್ತಾಲೊ. ಖರೆ ಕ್ರೀಸ್ತಿ ಶೆಗುಣ್ ತಾಚಾ ಬರ್ಪಾನ್, ನಡ್ತ್ಯಾಂತ್ ಆನಿಂ ಉಲವ್ಣ್ಯಾಂತ್ ಉಟೊನ್ ದಿಸ್ತಾಲೆ. ದೆಕುನ್ಂಚ್ ಭಾರಾ ಆಪೊಸ್ತೊಲಾಂ ಪಯ್ಕಿ ಪೆದ್ರುಕ್ ಮೆಳ್ಲ್ಲೆಂ ಸ್ಥಾನ್ ಕಶೆಂ ಹೆರಾಂಕ್ ಮೆಳೊಂಕ್ನಾಂಗೀ ತಶೆಂಚ್ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ವಿಜೆಪಿಚ್ ಪೆದ್ರು, ವಿಜೆಪಿಚ್ ಖಡಾಪ್. ತಾಚೆಶಿವಾಯ್ ನಾ ಕೋಣ್ಂಚ್ ದುಸ್ರೊ.
ಮಟ್ವ್ಯೊ ಕಾಣ್ಯೊ :
ವಿಜೆಪಿನ್ ಸಭಾರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್, ತಾಚಾ ಕಾದಂಬರಿಯಾಂನಿ ಕಶಿ ತಾಚಿಚ್ ಮ್ಹಳ್ಳಿ ಶೈಲಿ ಆಸ್ಲ್ಲಿಕೀ ತಶೆಂಚ್ ತಾಚಾ ಮಟ್ವ್ಯಾ ಕಾಣ್ಯಾಂನಿ ಸಯ್ತ್ ಉಟೊನ್ ದಿಸ್ಚಿ ಕೊಂಕ್ಣಿ ಭಾಸೆಚಿ ಗ್ರೇಸ್ತ್ಕಾಯ್ ಆನಿಂ ತಾಣೆಂ ವಿಂಸ್ಚಿ ಭೋವ್ ಸಾದಿ ಸಂಗತ್ಚ್ ಏಕ್ ಸೊಭಾಯ್ ಮ್ಹಣ್ಯೆತ್. ಹಾವೆಂ ವಾಚ್ಲ್ಲ್ಯೊ ತಾಚೊ ಥೊಡ್ಯೊ ಮಟ್ವ್ಯೊ ಕಾಣ್ಯೊ ಭೋವ್ ಮಟ್ವ್ಯೊ ಜಾವ್ನಾಸೊನ್ ಇತ್ಲಿ ಸಾದಿ ಜಾವ್ನಾಸಾಕೀ ಕಸ್ಲ್ಯಾಯ್ ಸಾದ್ಯಾ ವಾಚ್ಪ್ಯಾಕ್ ತಿ ಸಮ್ಜಾಜಯ್ ತಸಲಿ.
’ಖರೊ ಮೋಗ್’ ಯಿ ಏಕ್ ಅಸಲಿಚ್ ಕಾಣಿ, ಆಜಿಕ್ ಚಡುಣೆಂ ತೀನ್ ದಾಕ್ಡ್ಯಾಧಿಂ ಲಿಖ್ಲ್ಲಿ ಜಾವ್ನಾಸಾ. ತವಳ್ಚಾ ಶೈಲೆಪರಿಂ ಕಾಣ್ಯೆಚಾ ಅಖ್ರೇಕ್ ತ್ಯಾ ಕಾಣ್ಯೆಚೆಂ ಲಿಸಾಂವ್(ಸಾರ್) ಆಸ್ತಾಲೆಂ. ಆನಿಂ ತವಳ್ಚಾ ವಾಚ್ಪ್ಯಾಂಕ್ ಹೆಂ ವಾಚುನ್ ಕಾಣಿಂ ಸಮ್ಜೊಂಕ್ ಸಲೀಸ್ ಜಾತಾಲೆಂ ಮ್ಹಳ್ಳೆಂ ಹಾಂವ್ ಸಮ್ಜತಾಂ.
ಕಥಾದಾಯ್ಜ್ - 2 . ಖರೊ ಮೋಗ್
ಸಿರಿಲ್ ದುಬ್ಳ್ಯಾ ಕುಟ್ಮಾಂತ್ಲೊ ಲ್ಹಾನ್ ಆಸ್ತಾನಾಂಚ್ ತಾಚೊ ಬಾಪಯ್ ದೆವಾಧೀನ್ ಜಾಲ್ಯಾರೀ, ತಾಚೆ ಆವಯ್ನ್ ತಾಕಾ ಕಶ್ಟಾಂನಿ ಪೊಸುನ್ ಮೆಟ್ರಿಕ್ ಶಿಕವ್ನ್ ಬೊಂಬೊಯ್ ಧಾಡ್ಲ್ಲೊ.
ಪುಣ್ ಬೊಂಬೊಯಿಂತ್ ಸಿರಿಲಾಕ್ ಬರೆಂ ಕಾಮ್ಂಚ್ ಲಾಭೊಂಕ್ನಾ. ಲಾಗ್ಲ್ಲೆಂ ಮ್ಹಳ್ಯಾರ್ ಸೆಲಿನ್ ಮ್ಹಳ್ಳ್ಯಾ ಎಕಾ ಚಲಿಯೆಚಿ ಇಶ್ಟಾಗಾತ್ ಮಾತ್ರ್. ಸೆಲಿನಾಕೀ ಬಾಪಯ್ ನಾತ್ಲ್ಲೊ, ವ್ಹಡ್ ದೋಗ್ ಭಾನ್ ಸಯ್ತ್ ಕಾಳ್ಜೊರಾಚಾ ತಾಪಾನ್ ಮೊರ್ನ್ ಪಾವ್ಲ್ಲೆ ಅನ್ಯೇಕಾ ವ್ಹಡ್ ಭಯ್ಣಿಕ್ ಕಾಜಾರ್ ಜಾಲ್ಲೆಂ. ಅಶೆಂ ಜಾಲ್ಲ್ಯಾನ್ ಸೆಲಿನ್ ಎಕಾ ಸರ್ಕಾರಿ ದಫ್ತರಾಂತ್ ಕಾಮ್ ಕರ್ನ್ ಆಪ್ಲ್ಯೆ ಆವಯ್ಚೊ ಪೋಸ್ ಕರ್ತಾಲೆಂ. ಚೆಡುಂ ಸಂಯ್ಬಾನ್ಂಚ್ ಧಾದೊಶಿ ಆನಿಂ ಹಾಸ್ತೆಂ. ಪಳೆಂವ್ಕ್ ವಿಶೇಸ್ ಸುಂದರ್ ನ್ಹಯ್ ಜಾಲ್ಯಾರೀ ಗುಣಾಂನಿ ಮಾಣಿಕ್.
ಸಿರಿಲ್ ದೇವ್ ಭಿರಾಂತಿನ್ ವಾಡ್ಲ್ಲೊ ಭುರ್ಗೊ ಜಾಲ್ಲ್ಯಾನ್, ಪತ್ರಾಂ ಆನಿಂ ಉತ್ರಾಂ ಮುಕೇನ್ ನಾವಾಡ್ಲ್ಲ್ಯಾ ಬೊಂಬೊಯ್ಚ್ಯಾ ಚೆಡ್ವಾಂಚಿ ಇಸ್ಟಾಗಾತ್ ಕರುಂಕ್ ನಜೊ ಮ್ಹಣ್ ಗಟ್ಟ್ ರಾವೊನ್, ವಾಟೆರ್ ಪಾಶಾರ್ ಜಾತಾನಾ ಚೆಡ್ವಾಂ ಪುಣಿ ದಿಶ್ಟಿಕ್ ಪಡ್ಲ್ಯಾರ್ ದೊಳೆ ಸಯ್ತ್ ಧಾಂಪ್ತಾಲೊ. ಹೆಂ ಕಶೆಂಗೀ ಸೆಜಾರಾಚ್ ರಾಂವ್ಚ್ಯಾ ಸೆಲಿನಾಕ್ ಸಮ್ಜಾಲೆಂ ಆನಿಂ ಚಲಿಯಾಂ ಸಾರ್ಕ್ಯಾ ಹುಶಾರಾಯೆನ್ ಥೊಡ್ಯಾಚ್ ತೆಂಪಾ ಭಿತರ್ ಸಿರಿಲ್ ಆನಿಂ ಸೆಲಿನ್ ಭಾವ್ಭಯ್ಣಿಂ ಸಾರ್ಕ್ಯಾ ಸಳ್ಗೆನ್ ಚಲಾಲಾಗ್ಲಿಂ. ಸೆಲಿನಾಚ್ಯಾ ವೊಳ್ಕಿಚಾ ಥೊಡ್ಯಾ ಮಂಗ್ಳುರ್ಗಾರಾಂಕ್, ಹೆಂ ವಿಶೇಸ್ಶೆಂ ದಿಸ್ಲೆಂ, ಆನಿಂ ಥೊಡ್ಯಾ ದಿಸಾಂಭಿತರ್ ಸಿರಿಲಾಚ್ಯಾ ಆವಯ್ಕ್ ಕೊಣೆಂಗೀ ನಾಂವ್ ಘಾಲಿನಾಸ್ತಾಂ
"ತುಜೊ ಪೂತ್ ಬೊಂಬೊಯ್ ಕೊಣಾ-ಕೊಣಾ ಸಾಂಗಾತಾ ಭೊಂವ್ತಾ" ಮ್ಹಣ್ ಕಾಗಾತ್ ಬರಯ್ಲೆಂ. ತಿ ಬಾವ್ಡಿ ಕಂಗಾಲ್ ಜಾಲಿ. "ಬೊಂಬೊಯ್ಚ್ಯಾ ಪಾಸಾಂಕ್ ಸಾಂಪೊಡ್ಚ್ಯಾ ಬದ್ಲಾಕ್, ಪಾಟಿಂ ಯೇವ್ನ್ ಮ್ಹಾಕಾ ಇಲ್ಲೆಂ ವೀಕ್ ಪಿಯೆಂವ್ಕ್ ದೀ ಪುತಾ" ಅಶೆಂ ನತಾಲ್ಬಾಯೆನ್ ಪುತಾಕ್ ಕಾಗಾತ್ ಬರಯ್ಲೆಂ.. ಸಿರಿಲ್ ತ್ಯಾ ದೀಸ್ ಥಾವ್ನ್ ಸೆಲಿನಾ ಸಾಂಗಾತಾ ಭೊಂವೊಂಕ್ ಯಾ ಉಲಂವ್ಕ್ ಸಯ್ತ್ ಪಾಟಿಂ ಜಾಲೊ. ಚ್ಯಾರ್ ದಿಸಾಂನಿ ಸಿರಿಲ್ ಸೈನ್ಯಾಂತ್ ರಿಗ್ಲೊ. ಬೆಜಾರಾಯೆನ್ ಆನಿಂ ಖಂತಿನ್ ಗಾಂವಾಕ್ ವೆಚಿ ಆಲೋಚನ್ ತಾಣೆ ಬಾಕಿ ಘಾಲಿ. ಬೊಂಬೊಯ್ಥಾವ್ನ್ ಭಾಯ್ರ್ ವೆಚ್ಯಾ ಆದ್ಲೆ ದಿಸಾ ಸೆಲಿನಾಕ್ ಮೆಳೊಂಕ್ ಗೆಲೊ, ಆನಿಂ ಆಪುಣ್ ಸೈನಾಂತ್ ರಿಗ್ಲ್ಲಿ ಖಬರ್ ಸಾಂಗೊನ್ "ಸೆಲಿನ್, ಮ್ಹಾಕಾ ಶೆಂಬೊರ್ ರುಪಯ್ ರೀಣ್ ದಿ, ದೆವಾನ್ ತಾಂಕ್ದಿತಾನಾ ಪಾಟಿಂ ದಿತಾಂ. ಹಾಂವ್ ಗೆಲ್ಲ್ಯಾ ಉಪ್ರಾಂತ್ ಅಪ್ರೂಪ್ ಪುಣಿ, ಹಾಂವ್ ತುಜೊ ಭಾವ್ ಮ್ಹಣ್ ಚಿಂತುನ್ ತುಜ್ಯಾ ಮಾಗ್ಣ್ಯಾಂತ್ ಮ್ಹಜೊ ಉಡಾಸ್ ಕರ್" ಮ್ಹಣಾಲೊ.
ಸೆಲಿನಾನ್ ದುಕಾಂ ತಡ್ವುನ್, "ಜಾಯ್ತ್" ಮ್ಹಳೆಂ, ಆನಿಂ ಪಯ್ಶೆಯಿ ದಿಲೆ. ತಾಂತ್ಲೆ ಪನ್ನಾಸ್ ರುಪಯ್ ಸಿರಿಲಾನ್ ಆವಯ್ಕ್ ಧಾಡ್ಲೆ ಆನಿಂ ದುಸ್ರೆ ದಿಸಾ ಸಿರಿಲ್ ಬರ್ಮಾಕ್ ಭಾಯ್ರ್ ಸರ್ನ್ ಗೆಲೊ. ಪೂತ್ ಝುಜಾಕ್ ಗೆಲೊ ಮ್ಹಣ್ ಆವಯ್ಕ್ ಚಡ್ ಖಂತ್ ಜಾಲಿ. ಸಾಂಗಾತಾಚ್ ಬೊಂಬೊಯ್ಚ್ಯಾ ಸರ್ಗಾಂತ್ಲೊ ತೊ ಸುಟ್ಲೊ ಮ್ಹಣ್ ಸಂತೊಸ್ ಜಾಲೊ ಅಶೆಂ ಆಸ್ತಾಂ, ಬೊಂಬೊಂಯ್ತ್ ಸೆಲಿನಾನ್ ಹೆರ್ ಮಂಗ್ಳುರ್ಗಾರಾಂ ಕಡೆನ್ ಹಾಸ್ಚೆಂ ಉಲಂವ್ಚೆಂ ಬೋವ್ ಪಾತಳ್ ಕೆಲೆಂ.
ಸಿರಿಲಾಚ್ಯಾ ಆವಯ್ಕ್ ಕಾಗತ್ ಬರಯ್ಲೆಂ ತೆ ಬಾವ್ಡೆ ತಿತ್ಲ್ಯಾರ್ ಧಾದೊಶಿ ಜಾಲೆ. ವೀಕ್ ವೊಂಪ್ಲ್ಯಾ ಉಪ್ರಾಂತ್ ತಾಚೊ ಪ್ರತಿಫಳ್ ತಾಂಚೊ ನ್ಹಯ್! ತಿಸ್ರೆಂ ವರ್ಸ್ ಪಾಶಾರ್ ಜಾಲೆಂ. ಸಿರಿಲಾನ್ ಆವಯ್ಕ್ ಕಾಯಾಮ್ ಕಾಗಾತ್ ಆನಿಂ ಖರ್ಚಾಕ್ ಧಾಡ್ಲ್ಲೆಂ, ಬೊಂಬೊಂಯ್ತ್ ತಾಕಾ ಜಾಲ್ಲೆಂ ರೀಣ್ ಫಾರಿಕ್ ಕೆಲ್ಲೆಂ, ಸೆಲಿನಾಕ್ ಅಪ್ರೂಪ್ ಕಾಗಾತ್ ಬರಯ್ಲೆಂ, ವೆಗ್ಗಿಂ ರಜೆರ್ ಗಾಂವಾಕ್ ಯೆತಾಂ ಮ್ಹಣ್ ತಿಳ್ಸಿಲ್ಲೆಂ. ಅಶೆಂ ಆಸ್ತಾಂ ಸೆಲಿನಾನ್, ಸಿರಿಲ್ ಗಾಂವಾಕ್ ಯೆತಾನಾ ಬೊಂಬೊಯ್ ಯೇವ್ನ್ಂಚ್ ವೆತೊಲೊ ಜಾಲ್ಲ್ಯಾನ್ ತಾಕಾ ಇನಾಮ್ ಜಾವ್ನ್ ಏಕ್ ಜೊಡಿ ಮೊಚೆ ಮೊಲಾಕ್ ಘೆವ್ನ್ ದವರ್ಲ್ಲೆ.
ಸಿರಿಲ್ ರಜೆರ್ ಆಯ್ಲೊ. ಎಕಾ ಹೊಟೆಲಾಂತ್ ದೋನ್ ದಿಸಾಂಕ್ ರಾವ್ಲೊ ಆನಿಂ ಅಪುಣ್ "ಆಯ್ಲಾಂ" ಮ್ಹಣ್ ಸೆಲಿನಾಕ್ "ಫೋನ್" ಕೆಲೆಂ. ಸೆಲಿನ್ ಸಂತೊಸಾನ್, ತೆ ಮೊಚೆಯ್ ಸಾಂಗಾತಾ ಘೆವ್ನ್ ಸಿರಿಲಾಕ್ ಪಳೆಂವ್ಕ್ ಗೆಲೆಂ. ಸಿರಿಲ್ ಆರಾಮ್-ಕದೆಲಾರ್ ಬಸೊನ್ ಆಸ್ಲ್ಲೊ. ಸೆಲಿನಾಕ್ ಪಳಯ್ತಾಚ್ ತಾಕಾ ವರ್ತೊ ಸಂತೊಸ್ ಜಾಲೊ ಜಾಲ್ಯಾರೀ, ತೊ ಕದೆಲಾವಯ್ಲೊ ಉಟೊಂಕ್ನಾ. ಸೆಲಿನಾನ್ ಹ್ಯಾ ಚಾಲಿಚಿ ಪರ್ವಾ ಕರುಂಕ್ನಾ. ತಾಕಾಯ್ ಸಿರಿಲಾಕ್ ದೆಕ್ತಚ್ ಜಾಲ್ಲೊ ಆನಂದ್, ತೆಂಚ್ ಜಾಣಾ ಆಸ್ಲ್ಲೆಂ. "ಸಿರಿಲ್, ಮ್ಹಜ್ಯಾ ಉಡಾಸಾಕ್ ಏಕ್ ಜೊಡಿ ಮೊಚೆ ಘೆತ್ಲ್ಯಾತ್, ಘಾಲ್ನ್ ಪಳೆ" ಮ್ಹಣಾಲೆಂ.
ಸಿರಿಲ್ ಇಲ್ಲೊ ವೇಳ್ ಥಂಡ್ ರಾವೊನ್ ಮಾಗಿರ್ "ಸೆಲಿನ್, ತುಕಾ ಮಸ್ತ್ ದೇವ್ ಬರೆಂ ಕರುಂ. ಪುಣ್ ತುಜೆಂ ಇನಾಮ್ ಹಾಂವೆಂ ಸ್ವೀಕರ್ಸಿಲ್ಯಾರ್ - ತ್ಯಾ ಮೊಚ್ಯಾಂಚೊ ಪ್ರಯೋಗ್ ಕರುಂಕ್ ಮಾತ್ರ್ ಜಾಂವ್ಚೆಂ ನಾ" ಅಶೆಂ ಮ್ಹಣೊನ್ ಮೆಜಾ ಪೊಂದಾಕ್ ಆಸ್ಲ್ಲೆ ಪಾಂಯ್ ಕುಶಿನ್ ಘುಂವ್ಡಾವ್ನ್ ಸೆಲಿನಾಕ್ ದಾಕಯ್ಲೆ.
ದಾವೊ ಪಾಂಯ್ ಸಮಾ ಆಸ್ಲ್ಲೊ.. ಉಜ್ವೊ ಪಾಂಯ್ ಸಕಯ್ಲ್ಯಾ ಗಾಂಟಿ ತಿತ್ತುನ್ಂಚ್! ಥಳ್ವೊ ಆನಿಂ ಬೊಟಾಂ.. ನಾತ್ಲ್ಲಿಂ.... ಭೆಟಯ್ಲಿಂ ಝುಜಾಚೆ ಆಲ್ತಾರಿರ್! ಸೆಲಿನ್ ಲಾಗ್ಶಿಲ್ಯಾ ಕದೆಲಾರ್ ಬಸೊನ್, ಪಳೆವ್ನ್, ಉಲಯ್ತಾಲೆಂ ಗಳ್ಗಳ್ಯಾ ದುಕಾಂನಿ..
"ಸೆಲಿನಾ, ತುವೆಂ ಖಂತ್ ಕರ್ಚಿ ಗರ್ಜ್ ನಾ. ಕಿತೆಂ ಜಾಲ್ಯಾರೀ ಮ್ಹಜ್ಯಾ ಆವಯ್ಕ್ ಹಾಂವ್ ಜಡ್ ಜಾಂವ್ಚೊನಾ. ಹಾವೆಂ ಝುಜಾಕ್ ವೆಚ್ಯಾ ಪಯ್ಲೆಂ ತಿಚೆಂ ಬೆಸಾಂವ್ ಮಾಗೊಂಕ್ನಾ. ಆಪ್ಲೆಂ ಲಿಪವ್ನ್, ಪೆಲ್ಯಾಚೆಂ ಉಸ್ತುನ್, ಪೆಲ್ಯಾಚೆಂ ಬರೆಂ ನಾಂವ್ ಮಸ್ತುನ್ ಸಂತೊಸ್ ಪಾಂವ್ಚ್ಯಾ ಥೊಡ್ಯಾಂಚ್ಯಾ ರಾಗಾನ್ ಹಾಂವ್ ಝುಜಾಕ್ ಗೆಲ್ಲೊಂ. ಪುಣ್ ಆಮ್ಚಿ ಜಿಣಿ ಚಲಯ್ಜೆ ದೆವಾಚ್ಯಾ ಮಾಂಡಾವಳಿ ಪರ್ಮಾಣೆ"...
ಸಿರಿಲ್ ಗಾಂವಾಕ್ ಯೆಂವ್ಚಿ ಖಬರ್ ಆಯ್ಕೊನ್ಂಚ್, ಸಬಾರ್ ಸಯ್ರಿಕೊ ತಾಕಾ ರಾಕೊನ್ ರಾವ್ಲ್ಲ್ಯೊ. ಪುಣ್ ತೊ ಆತಾಂ ಥೊಂಟೊ ಜಾಲ್ಲೆಂ ದೆಕ್ತಚ್, ಪುರಾ ತೆಣೆ-ತೆಣೆ ಪಾಶಾರ್!..
ಪುಣ್ ನತಾಲ್ಬಾಯ್ ಮಾತ್ರ್ ಅಪುಣ್ ಮೊರ್ಚೆ ಪಯ್ಲೆಂ, ಸಿರಿಲಾಚಿ ಫಾವೊತಿ ಖಬರ್ ಘೆಂವ್ಚಿ, ಏಕ್ ಚಲಿ ಪಳೆವ್ನ್ ತಾಕಾ ಕಾಜಾರ್ ಕರಿಜೆ ಮ್ಹಣ್ ಆಶೆತಾಲಿ. ಅಶೆಂ ಆಸ್ತಾಂ ಏಕ್ ದೀಸ್-ಆಯ್ತಾರಾ ಸಾಂಜೆರ್ ನತಾಲ್ಬಾಯ್ ಸಾಕ್ರಾಮೆಂತಾಚೆಂ ಬೆಸಾಂವ್ ಜಾವ್ನ್ ಆಪ್ಲೆಂ ರಜಾರ್ ತಿ ತಿರ್ಸುನ್, ಪಾಟಿಂ ಪರ್ತಾತಾನಾ ಕೋಣ್ಗೀ ಏಕ್ ಚಲಿ "ದೇವ್ ಬರಿ ಸಾಂಜ್ ದೀಂವ್"
ಮ್ಹಣಾಲಿ. ನತಾಲ್ಬಾಯೆಕ್, ಉತರ್ ಮೆಚ್ವಾಲೆಂ ಜಾಲ್ಯಾರೀ ಚೆಡ್ವಾಚೊ ವೇಸ್ ಚಿಕ್ಕೆ ಪರ್ಕಿಸೊ ದಿಸ್ಲೊ. ಚೆಡ್ವಾಚೆಂ ಮುಖಮಳಾ ಲಕ್ಶಣ್ ತಿಕಾ ರುಚ್ಲೆಂ. ಗಜಾಲಿಂಕ್ ಸುರು ಜಾಲೆಂ. ಚೆಡ್ವಾನ್ ಖಾಲ್ತ್ಯಾಥರಾನ್ ಸಾಂಗ್ಲೆಂ - ಅಪುಣ್ ಆನಿಂ ಆಪ್ಲಿ ಆವಯ್ ಬೊಂಬೊಯ್ ಥಾವ್ನ್ ಪಾಂಚ್ ದಿಸಾಂ ಆದಿಂ ಯೇವ್ನ್ ಲಾಗಿಂಚ್ ರಾವ್ತಾತ್ ಮ್ಹಣ್.
"ಹಾಂವ್ ಬೊಂಬೊಯ್ ಜಲ್ಮಾಲ್ಲಿಂ. ಆಮ್ಚೊ ಬಾಪಯ್ ದೆವಾಧಿನ್ ಜಾಲ್ಲ್ಯಾ ಉಪ್ರಾಂತ್, ಆಮ್ಚ್ಯಾ ಕುಟ್ಮಾನ್ ಆಮಿ ಪಾಟಿಂ ಯೇಜೆ ಮ್ಹಣ್ ಅತ್ರೆಗ್ ದಾಕಂವ್ಕ್ ನಾ ಜಾಲ್ಯಾನ್, ಆಮಿ ಬೊಂಬೊಯ್ಚ್ ಉರ್ಲ್ಯಾಂವ್. ಪೂಣ್ ಆತಾಂ ಮ್ಹಾಕಾ ಕಾಜಾರ್ ಕರುಂಕ್ ಮ್ಹಣ್ ಮಾಂಯ್ನ್ ಮಂಗ್ಳುರ್ ಹಾಡ್ಲಾ. ಆಮ್ಕಾಂ ದುಸ್ರೆ ಕುಟಮ್ ಹಾಂಗಾ ನಾ. ಆಮಿ ಆತಾಂ ರಾಂವ್ಚೆಕಡ್ಚಿಂ ಮಾತ್ರ್ ಆಮ್ಚಿ ಪಯ್ಶಿಲಿ ಸಯ್ರಿ"
ಅಶೆಂ ತ್ಯಾ ಚಲಿಯೆನ್ ಸಾಂಗ್ಲ್ಲೆಂ ಆಯ್ಕೊನ್, ನತಾಲ್ಬಾಯೆಕ್ ಮನ್ಶೆಂ ಲಾಗ್ಲೆಂ ಚಲಿಯೆನ್ ಉಲಯ್ಲಿ ಭಾಸ್ ಅಪುಟ್ ಕೊಂಕ್ಣಿ ನ್ಹಯ್ ಜಾಲ್ಯಾರೀ, ಸಾಂಗ್ಲ್ಲೆಂ ಪುರಾ ತಿಕಾ ಸಮ್ಜಾಲೆಂ.
"ತುಜ್ಯಾ ಆವಯ್ನ್ ಸಯ್ರಿಕ್ ಸೊದ್ಲ್ಯಾಗೀ?" "ಮಾಂಯ್ನ್ ಸೊಧುನ್ ದವ್ರುಂಕ್ನಾ, ಹಾಂವೆಂಚ್ ಪಳಯ್ಲ್ಯಾ. ಪುಣ್ ತಸಲ್ಯಾ ಚಲ್ಯಾಕ್ ಹಾಂವ್ ಫ಼ಾವೊ ಜಾಲ್ಲಿಂ ನ್ಹಯ್ ದೆಕುನ್ ಮ್ಹಾಕಾ ಭ್ಯೆಂ ದಿಸ್ತಾ" ಜಾಪ್ ಮೆಳ್ಳಿ. ನತಾಲ್ಬಾಯ್
"ನಾ, ತುಜೆ ತಸಲ್ಯಾ ಚೆಡ್ವಾಕ್ ಕೊಣೆಂಯ್ ದಮ್ಮಯ್ಯಾ ಮ್ಹಣ್ ವ್ಹರ್ತಿತ್" ಮ್ಹಣಾಲಿ. ಇತ್ಲೆಶಾ ವೆಳಾಭಿತರ್ ತಿಕಾ ಹ್ಯಾ ಚಲಿಯೆಚಿ ಅಪುರ್ಬಾಯ್ ದಿಸ್ಲಿ. ದೆಕುನ್ ತಿಣೆಂ ಹಾಸೊನ್ಶೆಂ
"ಕೋಣ್ ತೊ ತುವೆಂ ಪಳಯ್ಲೊ ಭಾಗಿ ಚಲೊ?" ಸವಾಲ್ ಕೆಲೆಂ.
ಆಪ್ಲ್ಯಾ ಸಿರಿಲಾಕ್, ಅಸಲಿ ಚಲಿ ಮ್ಹಳ್ಳ್ಯಾರ್ ಜಾಯ್ತ್ ಮ್ಹಣ್ ಭೊಗ್ಲೆಂ ಆವಯ್ಚ್ಯಾ ಕಾಳ್ಜಾಕ್. ಪುಣ್ ತೊ ಜಾಲಾ ಥೊಂಟೊ ಅಶೆಂ ತಿ ಚಿಂತಾನಾ ಚಲಿ ಉಲಯ್ಲಾಗ್ಲಿ
"ತ್ಯಾ ಚಲ್ಯಾಚಿ ಚರಿತ್ರಾ ಹಾಂವ್ ನೆಣಾಂ. ತಾಚೆಂ ನಾಂವ್ ಮಾತ್ರ್ ಸಿರಿಲ್ ಮ್ಹಣ್ ಜಾಣಾ".. ಹಾಚೆ ಉಪ್ರಾಂತ್ ಘಡ್ಲ್ಲ್ಯೊ ಸಂಗ್ತಿ ವಿವರ್ಸುಂಕ್ ಆನಿಂ ಬರಂವ್ಕ್ ಮ್ಹಾಕಾ ತಾಂಕ್ ಪಾವಾನಾ... ಮಾತ್ರ್, ಸಿರಿಲಾಕ್ ಆನಿಂ ಸೆಲಿನಾಕ್ ಕಾಜಾರ್ ಜಾಲೆಂ.
ಸಿರಿಲಾನ್ "ನಾಕಾ" ಮ್ಹಳ್ಯಾರೀ ಸೆಲಿನಾನ್ ತಾಕಾ ಬೊಂಬೊಯ್ ಹಾಡ್ನ್ ಸಾಧಾರ್ನ್ ಚಲೊಂಕ್ ಜಾಯ್ ಸಾರ್ಕೆಂ, ಕೃತಕ್ ಪಾಂಯ್ ಬಾಂದಯ್ಲೊ. ಆನಿಂ ಥೊಡಿಂ ವರ್ಸಾಂ ಕಾಮ್ ಕರ್ನ್ ಪರ್ತುನ್ ಗಾಂವಾಕ್ ಗೆಲಿಂ..
ನತಾಲ್ಬಾಯೆಕ್ ಸುನ್ ಮ್ಹಳ್ಯಾರ್ ಜೀವ್, ಪಾವಾನಾತ್ಲ್ಲ್ಯಾಕ್, ಸಿರಿಲಾ ಸಾಂಗ್ಲ್ಲೆಂ ತೆಂಚ್ ಮ್ಹಣ್ ಚೆಡುಂ ಜಾಕಾ ಲಾಗೊನ್ ತಿಕಾ ಬೊಂಬೊಯ್ ಥಾವ್ನ್ ಕಾಗತ್ ಆಯಿಲ್ಲೆಂ. ನತಾಲ್ಬಾಯೆ ಸಮ್ಜಾಲಿ "ಬೊಂಬೊಯ್ ಮ್ಹಳ್ಯಾರ್, ಯೆಮ್ಕೊಂಡ್ಚ್ ನ್ಹಯ್ ಪುರ್ತೆಂ.. ತಾಂತುಂ ಥೊಡೆ ಆಂಜ್ಯ್ ಆಸಾತ್" ಮ್ಹಣ್.
ನಾ ಜಾಲ್ಯಾರೀ ವ್ಹಯ್, ಥೊಡ್ಯಾಂಚ್ಯಾ ಲಜೆಚ್ಯಾ ಕುರ್ತುವಾಂ ಖಾತಿರ್, ಸಗ್ಳಿ ಸಮಾಜ್ಚ್ ಖೊಟಿ ಮ್ಹಣ್ ಕೆಂಡುಂಕ್ ಜಾಯ್ನಾ. ಆಮ್ಕಾಂಮ್ಕಾ, ಆಮ್ಚೆಂ-ಆಮ್ಚೆಂಚ್ ಲೇಕ್ ದೀಂವ್ಕ್ ಆಸ್ತಾನಾ, ದುಸ್ರ್ಯಾಂಚಿ ಝಡ್ತಿ ಕರುಂಕ್ ಆಮಿ ಕೋಣ್?
ಇಶ್ಟಾ, ಉಲಯ್ನಾಕಾ ದುಸ್ರ್ಯಾಂಚಿ ಮರ್ಯಾದ್ ಭೆಂಡುನ್, ಚಲಾನಾಕಾ ಸದಾಂ ದುಸ್ರ್ಯಾಂಕ್ಚ್ ಖೆಂಡುನ್, ಬುಡಾನಾಕಾ ತುಜೊಚ್ ಫ಼ೊಂಡ್ ಖೊಂಡುನ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
