ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಅಂಕಣ್ಕಾರಾ ವಿಶ್ಯಾಂತ್: ಜಶೆಂ ಸಾಹಿತ್ಯ್ ಏಕ್ ಹವ್ಯಾಸ್ ಹೆರ್ ಭಾಸಾಂನಿ, ತಶೆಂಚ್ ಕೊಂಕ್ಣೆಂತ್ ಹವ್ಯಾಸ್ ಜಾವ್ನ್ ಸಾಹಿತ್ಯ್ ರಸ್ಚೆ ದರಬಸ್ತ್. ಕೊಣ್ ಮರನಂಜನಾಕ್, ಕೊಣ್ ವೇಳ್ ಪಾಶಾರ್ ಕರ್ಚಾಕ್ ತರ್ ಬೋವ್ ಥೊಡೆ ಚಿಂತ್ಪಿ ಸಮಾಜ್ ಜಾಗರಣ್ ಹಾಡಂವ್ಚ್ಯಾ ಇರಾದ್ಯಾನ್ ಸಾಹಿತ್ಯ್ ರಚ್ತಾತ್. ಸಮಾಜೆಚೊ ಹುಸ್ಕೊ, ಮೋಗ್ ಆಸ್ಲ್ಲೆನಿಮ್ತಿಂ, ಸದಾಂಚ್ ಅಸಲೆ ಜಾಗೆ ಆಸ್ತಾತ್ ಆನಿ ಮೊನೆ ಜಾವ್ನ್ ತರ್ಯೀ ಸಮಾಜೆಚ್ಯಾ ಪೊಕೊಳ್ಪಣಾಚೆರ್ ತವಳ್ ತವಳ್ ಆಪ್ಲ್ಯಾ ಲಿಖ್ಣೆಂತ್ ದಾಗ್ ದೀವ್ನ್ ಆಸ್ತಾತ್. ಎಕಾ ಖರ್ಯಾ ಸಾಹಿತಿಚಿ ಜವಾಬ್ಧಾರಿಯೀ ಹಿಚ್ಚ್.
ಪ್ರೀತಮ್ ಕಿರೆಂ ಅಸಲ್ಯಾಚ್ ವರ್ಗಾಚೊ ಸಾಹಿತಿ, ದಾಕ್ಡ್ಯಾಂಧಿಂ ಕ್ರಿಯಾತ್ಮಕ್ ರಿತಿನ್ ವಾವ್ರ್ ಕೆಲ್ಲೊ ಹೊ ಪರತ್ ಅಪ್ಲಿ ಲಿಖ್ಣಿ ಧರ್ನ್ ಜೆಮೆಂವ್ಚ್ಯಾ ಸಮಾಜೆಕ್ ಜಾಗಂವ್ಚೆಂ ಪ್ರೇತನ್ ಕರುಂಕ್ ಆಯ್ಲಾ, ಹೆಂ ಕೊಂಕ್ಣೆಂತ್ ಖಂಡಿತ್ ಜಾವ್ನ್ ಭೋವ್ ಸಂತೊಸಾಚೆಂ. ಏಕ್ ಪ್ರಭುದ್ದ್ ಲೇಖಕ್, ಕವಿ ಆನಿ ಅಂಕಣ್ಕಾರ್ ಜಾವ್ನಾಸ್ಚೊ ಪ್ರೀತಮ್ ಪ್ರಸ್ತುತ್ ಶಾರ್ಜಾಂತ್ ವಸ್ತಿ ಕರುನ್ ಆಸಾ ತಶೆಂಚ್ ಜೆಬೆಲ್ ಅಲಿಂತ್ ಕಾಮ್ ಕರುನ್ ಆಸಾ. ಕೊಂಕ್ಣೆಂತ್ ಆಪ್ಲ್ಯಾ ವಿಚಾರ್ಭರಿತ್ ಸಾಹಿತ್ಯಾಕ್ ಭೋವ್ ಫಾಮಾದ್ ಜಾಲ್ಲ್ಯಾ ದೆ|ಜೊರ್ಜಿ ಪೀಂತ್ ಆಯ್ಕೊಳಾಚಾ ಸಾಹಿತ್ಯಾಕ್ ಹಾಚೆಂ ಸಾಹಿತ್ಯ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಭೋವ್ಶಾ ಹೆ ದೊಗ್ಯೀ ಖಾಸ್ ಮಿತ್ರ್ ಜಾವ್ನಾಸ್ಲ್ಲೆನಿಮ್ತಿ ಆಸ್ಯೆತ್.
ಖಾಕಿಯೆಂತ್ಲಿ ಕೆಸೊಳಿ - 1
ಪ್ರೀತಮ್ ಕಿರೆಂ
ಕೊಣ್ಯೀ, ಕೊಂಕ್ಣೆಂತ್ಲೊ ಕಲಾಕಾರ್ ಯಾ
ಸಾಹಿತಿ ಜೊ ಹ್ಯಾ ಸಂಸಾರಾಚೆಂ ಪಯ್ಣ್ ಸಂಪವ್ನ್ ಸರ್ಗಿಂ ರಾಜಾಕ್ ಪಾಂಯ್ ತೆಂಕ್ತಾ, ತವಳ್ ಕೊಂಕ್ಣಿ
ವರ್ತುಲಾಂತ್ ಏಕ್ ದೃಶ್ಯ್ ತೆಂ ಸಾಮಾನ್ಯ್, ತೆಂ ಅಪ್ಶೆಂಚ್ಚ್ ಉಭ್ಜಾತಾ, ಜಸೆಂ,
ನಾಟಾಕಾಂತ್/ಪಿಂತುರಾಂನಿ ನಿಮಾಣೆಂ ಪೊಲಿಸಾಂಚೊ ಪ್ರವೇಶ್ ಜಾಲ್ಲೆಪರಿಂ.
ತೆಂ ಹ್ಯಾ ಪರಿಂ... ಆಸೊಂಕ್ಯೀ ಪುರೊ.
"ಫಲಾಣ್ಯಾ ಕಲಾಕರಾನ್ - ಸಾಹಿತಿನ್, ಕೊಂಕ್ಣೆಖಾತಿರ್ ಆಪ್ಲೆಂ
ಸರ್ವಸ್ವ್ ಅರ್ಪುನ್ ಆಪ್ಣಾಕ್ಚ್ಚ್ ಬಲಿ ದಿಲೊ. ಕೊಂಕ್ಣೆಚೊ ರಾಯ್ ಜಲ್ಮಾಲೊ ದುಬ್ಳಿಕಾಯೆನ್, ಜಿಯೆಲೊ ದುಬ್ಳಿಕಾಯೆನ್, ಆನಿಂ, ಅಂತರ್ಲೊ ದುಬ್ಳಿಕಾಯೆನ್. ಕೊಂಕ್ಣಿ ವಿಸ್ತಾರ್ ಶೆತಾಚಿ ಕೃಶಿ ಕರುನ್ ಥಕೊನಾತ್ಲ್ಲೊ, ಕೊಂಕ್ಣಿ ಕುಂವರ್
ಸಾಂಡುನ್ ಗೆಲೊ.
ಕೊಂಕ್ಣಿ ಶೆತಾಚೆಂ ವಿಸ್ತಾರ್ ಮಯ್ದಾನ್ಂಚ್ಚ್ ಪಂಣ್ಗಿಲ್
ಪಡ್ಲಾಂ. ಕೊಂಕ್ಣಿ ಸರ್ದಾರಾಚ್ಯಾ ಮೊರ್ನಾನ್ ಕೊಂಕ್ಣಿ ಮಾತಾಚ್ಚ್ ವಿಧವ್ ಜಾಲ್ಯಾ"
ಅಸೆಂ, ತಸೆಂ ಕೊಂಕ್ಣಿ ದುಖಾಂಚೊ ಸಾಗೊರ್ಚ್ಚ್ ವ್ಹಾಳ್ತಾ. ಆಖ್ರೇಕ್, ತಿತ್ಲೆಂ
ಪಾವಾನಾತ್ಲೆಲ್ಯಾಕ್,
"ಆಪ್ಲೆಂ ಮ್ಹಳ್ಳೆಂ, ಕಿತೆಂಚ್ಚ್ ಧನ್ ಪುಂಜಾಯಿಲ್ಲೆಂ ನಾಂ. ಕೊಂಕ್ಣೆಚ್ಯಾ
ಸುಖಿ ಫುಡಾರಾಚ್ಯಾ ಆಶೆನ್ ಆಪ್ಲೊ ಫುಡಾರ್ಚ್ಚ್ ವಿಸ್ರಾಲೊ" ಮ್ಹಳ್ಳೆಂ
ವೊಕ್ಕಾಣೆಂ ವಿಂಗಡ್.
ಕೊಣೇಂಯ್ ಪುನೆಗೆಲ್ಲ್ಯಾನ್ ತಾಚೆಖಾತಿರ್ ಚಾರ್ ವಾತಿ ಪೆಟಯ್ಲ್ಯೊ, ಚಾರ್ ದುಖಾಂ ಗಳಯ್ಲಿಂ. ತಾಚ್ಯಾ ಜಿವಿತಾಚ್ಯೊ ದುಖೇಸ್ತ್ ಘಡಿಯೊ
(ತ್ಯೊ ತಾಚ್ಯಾ ಖಾಸ್ ಕುಟ್ಮಾಚಾಂಕೀ ಕಳಿತ್ ನಾತ್ಲೆಲ್ಲ್ಯೊ ಸಯ್ತ್).
ಪತ್ರಾನಿಂ ಛಾಪುನ್ ಆಯ್ಲ್ಯೊ.
"ತೊ ಜಿವಂತ್ ಆಸ್ತಾಂ, ತಾಚ್ಯೊ ಏಕ್ ಯಾ ದೋನ್ ಕೃತಿಯೊ ಕಾಂಯ್
ಮೊಲಾಕ್ ಘೆಂವ್ನ್ ವಾಚ್ಲ್ಯಾತ್ಗಾಯ್ ಹಾಂವೆಂ? ದುಭಾವ್
ಮಾರ್ತಾ!! ಮ್ಹಜೆ ತಸಲ್ಯಾ ಕೊಂಕ್ಣಿ ಭಕ್ತಾಂಕ್ (ಪಕತ್ತ್ ಭಕ್ತ್
ಮಾತ್ರ್, ಆಚಾರ್ ನಾಂ)."
"ತಾಕಾ, ಶ್ಹೆರಾಂತ್ ಯಾ ನಾಡಾಂತ್ ಕಾಂಯ್ ತರೀ ಗೌರವ್ ದಿಲಾಗಾಯ್,
ಸನ್ಮಾನ್ ಮೆಳ್ಳಾಗಾಯ್".
ತಾಚೆಂ ಸುಖ್-ದುಖ್ ಸಮ್ಜೊಂವ್ಚೆಂ ಕಾಂಯ್ ಪ್ರಯತ್ನ್ ಕೆಲಾಂ ಗಾಯ್.
ಸಮ್ಜೊಂವ್ಚೆಂ ತೆಂ ಸೊಡ್ ತಿ ಪಯ್ಸಿಲಿ ಗಜಾಲ್, ಕಾಂಯ್ ತರ್ ಫರಾಮಶೆನ್ ದೊಳ್ಯಾಂ
ಮುಖಾರ್ ಪಡ್ಲೊ, ತಾಚೆ ಥಾವ್ನ್ ಫಳಾಫಳ್ ಘೆವ್ನ್
"ಉಡ್ದೊ" ಜಾಂವ್ಚೆ ಕಿತ್ಲೆಶೆ ದುಖೇಸ್ತ್ ಆಮ್ಚೆ ಮಧೆಂ ಆಸ್ಚೆನಾಂತ್ ??
"ಚಾರ್ ಜಣಾಂನಿ" ಸರ್ಗಾಚಾ ಸುಖಾಕ್ ಜಯ್ತ್ ಮಾಗ್ಲೆಂ, ತಸ್ವಿರ್ಯೊ ಛಾಪುನ್ ಆಯ್ಲ್ಯೊ.
ಕವಿತಾಂಚಾ ಪಾನಾಂನಿ ದುಖಾಂಚ್ಯೊ ಝರಿಚ್ಚ್ ವ್ಹಾಳ್ಳ್ಯೊ (ಹೆಂ ಕಾಂಯ್ ಆಮ್ಕಾಂ
ನವೆಂ ನ್ಹಂಯ್). ಕಾಂಯ್ ತರ್, ಇಲ್ಲೊ ನಶೀಬ್ವಂತ್ ತರ್, ಮಯ್ನ್ಯಾಚ್ಯೊಯೀ ಛಾಪ್ಲ್ಯೊ
(ಜರ್, ಪುಕ್ಕಟಾಚ್ಯೊ ತರ್, ವರ್ಸಾಚ್ಯೊಯ್, ಮುಂಗಡ್ಚ್ಚ್
ಬುಕ್ಕಿಂಗ್ ಕರ್ತೆಲೇಯ್ ಕಾಂಯ್ ಉಣೆ ಆಸ್ಚೆನಾಂತ್). ಲ್ಹದಿನ್ ಆನಿಕ್ಯೀ
ಲಾಂಬ್.... ಆಸಾ!
ಆಮಿಂಯ್ ಖುಶಿ, ದೆಖ್ತೆಲೇಯ್ ಖುಶಿ ("ದೆಖ್ತೆಲೆ" ಕಿತ್ಯಾಕ್, ಥೊಡೆ ದರ್ವೊಡಿ,
ವಾಚಿನಾಂತ್, ತಾಂಕಾಂ ಪುರ್ಸಾತ್ ನಾಂ, ಫಕತ್ತ್ ದೀಸ್ಟ್ ಘಾಲ್ಚಿ) ಆನಿಂ
ವಾಚ್ಪಿ ದಾಧೊಶಿ. ಇತ್ಲ್ಯಾರ್ ಸಂಪ್ಲೆಂ, ಆಮ್ಚೆಂ, ಆನಿಂ ಆಮ್ಚಾ (ಪರತ್ ತ್ಯಾಚ್ಚ್
ಮೆಟಾಂನಿ ಚಲ್ಚಾ) ಕಲಾಕಾರಾಂಚೆಂ ಮಿಸಾಂವ್. ತೆಂ ಆಮ್ಚೆರ್
ಸರ್ಗಿಂ ಥಾವ್ನ್ ದೇ(ಂವ್ಲ್ಲೆಂ,)ವ್ ಆಪವ್ಣೆಂ ಮ್ಹಣ್ಚೆಂಚ್ಚ್
ಸೂಕ್ತ್.
ಕೊಣೇಂಯ್ ಲೆಕ್ಚೆಂ ನಾಕಾ, "ಕೋಣ್ ಎಕ್ಲೊ ದೇವ್
ಭಿರಾಂತ್ ನಾತ್ಲಲೊ, ಜಿವಾಂತ್ ಉರ್ಲೆಲ್ಯಾ ಕೊಂಕ್ಣಿ ಕಲಾಕಾರಾಂಚೆರ್ ಝುಜಾಕ್
ರಾವ್ಲಾ"
ಮ್ಹಣ್.
ಆಮ್ಕಾಂ ಝುಜ್, ಕಲಾಕಾರಾಂಚೆರ್ ನ್ಹಂಯ್,
ಕಲೆಚೆರ್ಯೀ ನ್ಹಂಯ್. ಆಮ್ಚೆಂ ಝುಜ್ ಪಕತ್ತ್. ಕೊಂಕ್ಣಿ ಮಾಂಯ್ಭಾಸೆಚೊ
ಹುಸ್ಕೊ ದಾಖವ್ನ್, ಸುಂಯ್ಕ್ ಜಾಂವ್ಚಾ ಕೊಂಕ್ಣಿ ಶೆತಾಂತ್ಲ್ಯಾ ಫಾಕಿವಂತ್
ತಾಲೆಂತ್ದಾರಾಂಚೊ, ಜೊ ತಾಂಕಾಂ ಕೊಂಕ್ಣೆ ಥಾವ್ನ್, ಫಾಯ್ದೊ ಜಾಲಾ, ಆನಿಂ ಜಾವ್ನ್ಂಚ್ಚ್ ಆಸಾ.
ಝುಜ್ ಪಕತ್ತ್, ಕೊಂಕ್ಣೆಚ್ಯಾ ಆಮಿತಾಬ್ ಬಚ್ಚನಾಂಚೆರ್, ತಾಂಚಿ
ಬುನ್ಯಾದ್ ಖಡ್ಪಾರ್ ಘಟ್ ರಾವ್ಲ್ಯಾ.
ಝುಜ್ ಪಕತ್ತ್, ಕೊಂಕ್ಣೆಚೊ ಲೋಬ್ ಪಾಂಗುರ್ನ್, ಕೊಂಕ್ಣಿ
ಶೆರ್ಮಾಂವ್ ದಿಂವ್ಚಾ ಮಯ್ಲಾ ಫಾತೊರಾಂಚೆರ್. ಜೆಂ ತಾಂಕಾಂ, ಕಸ್ಟಾಂಕ್
ಸಾಂಪಡ್ಲೆಲ್ಯಾ ವರ್ಗಾಂಚಾಂಕ್ ಭಳಾಧಿಕ್ ದಿಗೊ ದಿಂವ್ಚಿ -
ದಿವಂವ್ಚಿ ತಾಕಿದ್ ಆನಿಂ ತಾಕತ್ ಆಸಾ. ಆನಿಂ ಕೊಣೆಂ ತಾಕಿದ್ ಪಾಳುಂಕ್
ನಾಂ, ತಾಂಚಿಂ ಪಾತ್ಕಾಂ ಭಗ್ಸುಂಚೆಂ ದೆಣೆಂ ಆಸಾ.
ಝುಜ್ ಫಕತ್ತ್ ಪತ್ರಿಕ್ಯೊಧ್ಯಮಿಂಚೆರ್, ಜೆಂ ತಾಣಿಂ ದುಬ್ಳ್ಯಾ
ಸಾಹಿತಿಂ ಥಾವ್ನ್ ಫಾಯ್ದೊ ಕೆಲಾ.
ದುಭಾವ್ ಧೊಸ್ತಾ, ಕಿತ್ಲೆಂ ಸಂಭಾವನ್ ಹ್ಯಾ ಸಾಹಿತಿಂಕ್ ಮೆಳ್ಳಾಂ, ತಾಣಿಂ
ಝರಯಿಲ್ಲ್ಯಾ ಲಿಖ್ಣೆಕ್??
ಸಂಭಾವನ್ ಸೊಡ್, ತಾಂಚೆಂ ಪ್ರಕಾಶಿತ್ ಜಾಲ್ಲ್ಯಾ ಬರ್ಪಾಂಚಿ ಏಕ್ ಗೌರವ್
ಪ್ರತಿ ಸಯ್ತ್ ತಾಂಕಾಂ ಪಾವಿತ್ ಕೆಲ್ಯಾಗಾಯ್ ??
ಆಯ್ಲೆವಾರ್ ಎಕಾ ಮ್ಹಾಲ್ಘಡ್ಯಾ ಲೇಖಕಾಚೊ ಕೊಡು ಅನುಭವ್ ಅಸೊಕೀ, ದಾಡ್ಲೆಲೆಂ
ಲೇಖನ್ ಪಾವಿತ್ ಜಾಲಾಂ ಮ್ಹಣ್, ಏಕ್ ಪಂದ್ರಾ ಪಯ್ಶಾಂಚೆಂ ಕಾರ್ಡ್ ಪರ್ಯಾಂತ್
ಪಾವಾನಾತ್ಲೆಲೆಂ ಖಂಯ್, ಚುರ್ಚುರ್ತಾ ತೊ. ಹಾಚಾಕ್ಯೀ
ವ್ಹಡ್ಲೊ ಆಘಾತ್ ಜಾಯ್ಗೀ ಆಮ್ಕಾಂ?? ಕೊಂಕ್ಣಿ ಮಾಯೆಚಾ ಬಾಳ್ಕಾಂಕ್!!
ಪತ್ರಾಂಚಿ ಗರಜ್ ಆಸಾ. ನ್ಹಂಯ್ ಫಕತ್ತ್ ಧುಂಪಂವ್ಕ್. ಬಗಾರ್ ಏಕಾನೆಕಿ ಜನಜಾಗೃತಿ
ದೀಂವ್ಕ್. ಜೆಂ ತಾಂಚ್ಯಾನ್ ಸಾಧ್ಯ್ ಆಸಾ. ತೇಂಯ್ ಪತ್ರಾಂಚೊ ದಾಟ್ ವಾಳೊ ವ್ಹಾಳ್ಚಾ
ಹ್ಯಾ ದಿವಸಾಂನಿಂ ಕಾಂಯ್ ಚಡ್ತಿಕ್ ಭಳ್ ಲಾಭತ್.
ಅಂತರ್ಜಾಳಿಚ್ಯಾ ಹ್ಯಾ ಕಾಳಾರ್, ಕಾಂಯ್ ಥೊಡ್ಯಾ ಪುಣೀಂ ಸಾಳಿಯಾಂಚಾ ಘೊಂಟೆರಾನಿಂ ಕಾಂಯ್ ಇಲ್ಲಿ ಕ್ರಾಂತಿ
ಹಾಡ್ಲಿ ತರ್..??
ಝುಜ್ ಫಕತ್ತ್ "ಸಾಹಿತ್ಯಾಚಾ ನಾಂವಾರ್" ಚಲಂವ್ಚಾ ಸಂಸ್ಧ್ಯಾಂಚೆರ್. ಜೆಂ ತೆ ತಾಂಚೆಂ
ಪೆಂಪಾರೆಂ ವಾಜೊವ್ನ್ ಆಸಾತ್, ಆಪ್ಲೆಂ ನಾಂವ್ ಪೇಪರಾಂನಿ ಧುಂಪಾಯ್ತಾತ್, ಕಾಮ್ ಗಾಂವಾರ್ ಗಾಜಾಯ್ತಾತ್. ತಸ್ವೀರ್ಯಾಂನಿ ಸೊಭಯ್ತಾತ್. ದುಬ್ಳ್ಯಾ
ಲಾಚಾರ್ ಸಾಹಿತಿಂಚೊ ಕಿತ್ಲೊ ಹುಸ್ಕೊ ದವರ್ಲಾಗಾಯ್
ಹ್ಯಾ ತೆಸಾಂವಾಂಚಾ ಭಾಗಿ ಮಿಸ್ತೆರಾನ್ ಭರ್ಲೆಲ್ಯಾ ಮಿಸಾಂವ್ಗಾರಾಂನಿ !!
(ತುಮಿಂ ತಾಂಕಾಂ ಕಸಾಯ್ಗಾರ್ ಮ್ಹಣಾ, ಶಿಣ್ ಆಸ್ಚಿನಾಂ ತಾಂಕಾಂ, ತೆಂ ತಾಂಚೆಂ
ಪ್ರೊಫೆಶನ್).
ಕಾಂಯ್ ಬರೆ ಉದ್ದೇಶ್ ದವ್ರುನ್ ಆಯ್ಲೆವಾರ್, ಶ್ರೀಮಾನ್ ಹೇಮಾಚಾರ್ಯಾನ್
"ದಾಯ್ಜಿ ಪೌಂಡೇಶನ್"ಚಿ ಆಪುರ್ಭಾಯೆಚಿ ಸುರ್ವಾತ್ ಕೆಲ್ಲಿ.
ಪ್ರಶಂಸಾಯೀ ಮೆಳ್ಲೆಲಿ. ತ್ಯಾ ಬಾಳ್ ಆಲೋಚನೆಕ್ ಚಡ್ತಿಕ್
ಪಾಕಾಂ ಪುಟೊನ್, ಆಪ್ಲೆಂಚ್ಚ್ ಭಳ್ ಲಾಭ್ಲೆಂ ತರ್, ಕೊಂಕ್ಣಿ
ಪುಜಾರಿಂಚಿ ಜಿವಂತ್ ಆಸ್ತಾನಾಂ, ಕಾಂಯ್ ಸಡ್ವೊಣ್ ಜಾಯ್ತ್, ಆಮಿಂ ದಾಡ್ಲೆಲ್ಯಾ
ಸಂದೇಶಾಂಕ್ ಮೋಲ್ ಯೇತ್, ಪತ್ರಾಂನಿ ಛಾಪ್ಲೆಲೆ, ತಸ್ವಿರ್ಯೊ,
ರಜಿಸ್ತ್ರ್ ಜಾವ್ನ್ ಪಾಯ್ನೆಲಾಂನಿ,
ವೊಣದಿರ್ ಸೊಭ್ತಿತ್.
ಹ್ಯಾ ಸರ್ವಾಂಕೀ ಮ್ಹನ್ ಜಾಯ್ಜಾಯ್, ರೆಡ್ಯಾಚೆಂ ಭಳ್ ಜಾಯ್ಜಾಯ್.
ಲ್ಹಾನ್ ಲ್ಹಾನ್ ಸಮೂದಾಯಾಂನಿ ಮಾಹೆತ್ ವೊಂಪಿಜಾಯ್.
ವಾಡ್ಯಾವಾರ್ ವೊವ್ಳಿಗ್ ಸಾಂಗಾಜಾಯ್,
ಪಿರ್ಗಜ್ವಾರ್ ಗರ್ನಾಳ್ ಮಾರಿಜಾಯ್.
ನವ್ಯಾ ಮುಂಗ್ಯಾಂಕ್ ಜಾಣ್ವಾಯ್ ಫುಟಾಯ್ಜಾಯ್.
ತೆದ್ನಾಂ ಕಾಂಯ್ ಹಸ್ತಿಚೆಂ ತ್ರಾಣ್ ಯೇತ್.
ತವಳ್ ಮಾತ್ರ್ ಉಪ್ರಾಂತ್ಲೊ ವಾವ್ರ್ ಸಲೀಸ್ ಜಾಯ್ತ್.
ಇತ್ಲ್ಯಾರ್ ಸಾಹಿತಿಚಿ ದುರ್ದಶಾ ಸಂಪ್ಲಿ ಮ್ಹಣ್ ಲೆಕ್ಚೆಂ ನಾಕಾ!
ಇತ್ಲ್ಯಾ ಸಲೀಸಾಯೆನ್ ಸಾಹಿತಿಚ್ಯಾ ಖಾಂದ್ಯಾ ವಯ್ಲೆಂ ಪೊತೆಂ ಮಾಯಾಗ್ ಜಾವ್ನ್, "ಲೇಪ್ ಟೊಪ್" ಝಳ್ಕತ್
ಮ್ಹಣ್ ಲೆಕ್ಲ್ಯಾರ್, ಸಪ್ಣಾಂತ್ ಕೆಳಿಂ ಖೆಲ್ಲ್ಯಾ ಪರಿಂ. ರಾತಿಕ್ ದೆಖ್ಲೆಲಿಂ
ನೆಕೆತ್ರಾಂ, ದಿಸಾಕ್ ತೆಂಲ್ಕ್ಯಾನ್ ಝಡಂವ್ಕ್ ವೆಚೆಂ ಪ್ರಯತ್ನ್ ಕೆಲ್ಯಾಪರಿಂ ಜಾಯ್ತ್.
ರೆಂವೆರ್ ರಾವ್ಳೆರ್ ಬಾಂದ್ಲೆಲ್ಯಾಪರಿಂ ಜಾಯ್ತ್.
ಹ್ಯಾ ಸಂದರ್ಭಿಂ, ಯಾದ್ ಯೆತಾ ಮ್ಹಾಕಾ, ಕಾಂಯ್ ಚಡ್-ಉಣೆಂ
ವೀಸ್ ವರ್ಸಾಂ ಆಧ್ಲೊ, ತೆದ್ನಾಂ ಹಾಂವ್ ಮಂಗ್ಳುರ್ ದಿಯೆಸೆಜಿಚ್ಯಾ
ನಾಂವಾಡ್ದೀಕ್ ಸಮಾಜ್ ಸೆವೆಚ್ಯಾ ಖಾಸ್ಗಿ ಸಂಸ್ಥ್ಯಾಂತ್
ವಾವ್ರ್ ಕರುನ್ ಆಸ್ತಾಂ, ಆಮ್ಚ್ಯಾ ಮೇನೆಜರಾನ್ ಸಾಂಗ್ಲೆಲ್ಯಾ ಉತ್ರಾಂಚೊ:
"ಜರ್ ತುಕಾ ಸಮಾಜ್ ಸೆವಾ (ಕಮ್ಯೂನಿಟಿ ಡೆವೆಲಪ್
ಮೆಂಟ್") ಕರ್ಚಿ ಉರ್ಭಾ ಆಸಾ, ತರ್, ತುಂ ಹೆರಾಂಕ್ ಸುದ್ರಾಂವ್ಕ್
ವ್ಹೆಚೆಂ ವ್ಯರ್ಥ್ ಪ್ರಯತ್ನ್ ಕರಿನಾಕಾ, ತುಂಚ್ಚ್ ಪಯ್ಲೆಂ
ಸುದ್ರೊ. ಜೆದ್ನಾಂ, ಹಾಂವ್ - ತುಂ ಸುದ್ರಾತಾಂ, ತೆದ್ನಾಂ ಸಮಾಜ್
(ಕಮ್ಯೂನಿಟಿ) ಅಪ್ಲೆ ಸಕ್ತೀನ್ ಆಪ್ಲಿಚ್ಚ್ ಸುದಾರ್ತೆಲಿ".
ತರ್ "ಮಾಜ್ರಾಕ್ ಪಯ್ಲಿ ಘಾಂಟ್ ಬಾಂದ್ಚಿ ಕೊಣೆಂ??? ಹಾವೆಂ ಯಾ ತುವೆಂ?"
ವ್ಹಯ್ರ್ ನೆರಾಯ್ಲ್ಯಾ ಕುಟ್ಮಾಕ್ ಲಗ್ತಿ ಜಾಲ್ಲೊ ಕೋಣ್
ತರ್ಯೀ
ಬಾವ್ಡೊ ಜಾಗರುಕ್ ಜಾಯ್ತ್ಗಾಯ್? ಟೆಕ್ಶೆಗಾರಾಂನಿ, ಕುಜ್ನೆರಾಂನಿ, ಆಯಾ - ಬೋಯಾಂನಿ
ಸುರ್ವಾತ್ ಕೆಲ್ಲೆಲ್ಯಾ ದಿಶೆಕ್ ಕಾಂಯ್ ಜೀವ್ ಭರಾತ್ಗಾಯ್?
ಸಡ್ವೊಣ್ದಾರ್ ಉಬ್ಜೊತ್ಗಾಯ್? ಆಮ್ಕಾಂ ಹ್ಯಾ ದುರಾದೃಶೆಂತ್ಲೊ
ಸುಟ್ಕಾ ದೀತ್ಗಾಯ್?
ಹ್ಯಾ ಮಿಸಾಂವಾಚಿಂ ಝಗ್ಲಾಣಿಂ, ಇತ್ಲ್ಯಾ ವೆಗ್ಗಿಂ ಆಖೇರ್ ಜಾಂವ್ಚಿಂ
ನಾಂತ್. ಇತ್ಲ್ಯಾ ವೆಗ್ಗಿಂ ಹಿ ಖಾಕಿಯೆಂತ್ಲಿ ಕೆಸೋಳಿ ಮಾಯಾಗ್ ಜಾಂವ್ಚಿ
ನಾಂ.
ಮುಖ್ಲ್ಯಾ ಕಿಸ್ತಾಂನಿ ಪರತ್ ಮುರ್ಮುರ್ತೆಲಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
