ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರುಸ್ತುರುಸಾಂವ್
ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್
ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್
ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್
ರುಸ್ತುರುಸಾಂವ್ - 8. ದಭಾಜೊ
ಲ್ಯಾನ್ಸಿ ಪಿಂಟೊ ನಾಯಕ್
"ಆಶೆಥಾವ್ನ್ ಸುಟ್ಕಾ ಜೊಡ್ಲ್ಲೆ ತೆದ್ನಾಂ,ತುಕಾ ಮಿಸ್ತೆರಾಂಚಿ ವಳಕ್ ಜಾತಾ,
ಆಶೆಮಧೆಂ ಶಿರ್ಕಾತಾಯ್ ತೆದ್ನಾಂ, ಫಕತ್ತ್ ಭಾಯ್ಲಿಂ ರುಪಾಂ ದಿಸ್ತಾತ್.
ತರೀ ಮಿಸ್ತೆರ್ ಆನಿ ಭಾಯ್ಲೆಂ ರೂಪ್ ಎಕಾಚ್ ಮುಳಾಯೆನ್ ಯೆತಾ,
ಆನಿ ತ್ಯಾ ಮುಳಾಕ್ ಮ್ಹಣ್ತಾತ್ ಕಾಳೊಕ್!
ಕಾಳೊಕಾ ಭಿತರ್ ಕಾಳೊಕ್ ಜಾವ್ನಾಸಾ ದಾರ್ವಾಟೊ ಸರ್ವ್ ಸಮ್ಜಣೆಚೊ!!"ಹಿಂ
ಉತ್ರಾಂ ಚೀನೀ ಗಿನ್ಯಾನಿ ’ಲಾವೋ ತ್ಸು’ಚಿಂ.
ಮ್ಹನಿಸ್, ಆಪ್ಣಾಕ್ ಭಿತರ್ಲ್ಯಾನ್ ಕಿತ್ಲ್ಯೊಯ್ ಅಸ್ಕತ್ಕಾಯ್ಯೊ ಆಸೊಂದಿತ್... ತರೀ ಭಾಯ್ಲೊ ದಭಾಜೊ ಉಣೆಂ ಕರುಂಕ್ ತಯಾರ್ ನಾಂ. ಆಪುಣ್ ಹಸ್ತ್ ನ್ಹಂಯ್ ತರೀ ಹಸ್ತಿಪರಿಂ ಮ್ಹಣ್ ಚಿಂತುಂಕ್ ಪಾಟಿಂ ಸರಾನಾಂ.
’ಮ್ಹನಿಸ್’ ಪೊಕೊಳ್ ಆಚಾರ್-ವಿಚಾರ್, ಆಡಂಬರ್, ದವ್ಲತ್, ಮಿಂಜಾಸ್ಕಿ, ವ್ಹಡ್ಪಾಣಾಚೆಂ ಮಿಶ್ರಣ್ ಮ್ಹಣೊಂ?ಹಾಂವ್
ಕಿತ್ಯಾಕ್ ಮ್ಹಣೊನ್ ಪಾಡ್ ಜಾಂವ್?ಮ್ಹನಿಸ್
ಸುಧ್ರಾಲಾ... ಪ್ರಗತೆಚ್ಯಾ ಪಥಾಚೆರ್ ಆಸಾ, ಹರ್ಯೆಕ್ ಘಡಿ ನವೆಂಸಾಂವ್ ಆಶೆತಾ! ಬೋವ್ ಬರೆಂ.
ಕಿತೆಂ ಕರುಂ? ಹಾಂವ್ ಬರವ್ಪಿ ಮೊರ್ಚ್ಯಾ ಅಧಿಂ ಸಾಂಗ್ಚೆಂ ಸಾಂಗೊನ್, ವೊಂಕ್ಚೆಂ ವೊಂಕೊನ್ ವೆಚೆಂ ಮ್ಹಜೆಂ ಜಲ್ಮಾ ಹಕ್ಕ್!
ಬಾಜಾರಾಂತ್ಲೆಂ ಹಜಾರ್ ಮೂಸ್ ಬಸ್ಲ್ಲೆಂ ಗೊಡ್ಶೆಂ ಮ್ಹಣ್ಜೆ ’ಸ್ವೀಟ್’ ಖಾಂವ್ಕ್ ಹಾಂವ್ ತಯಾರ್, ಪುಣ್ ಏಕ್ ಮೂಸ್ ಮೆಲ್ಲ್ಯಾ, ದುದಾ ಗ್ಲಾಸಾಕ್ ತೊಂಡಾಕ್ ತೆಂಕುಂಕ್ ಹಾಂವ್ ತಯಾರ್ ನಾಂ.
ಸಮ್ಜಾಲೆಂ?
ನಾಂ??
’ಮೂಸಾಕ್ ಕಾಡ್ನ್ ಉಡವ್ನ್ ದೊಳೆ ದಾಂಪುನ್ ಪಿಯೆ ಸಾಯ್ಬಾ!’- ಬೂದ್ಬಾಳ್
ಕಾಳೊಕ್ ಸಗ್ಳೆಂ ಸಮಾಂ ಕರ್ತಾ?
ನಾತಾನಾಂ ನಾಣ್ಯೆಂತ್ ಸಗ್ಳೆ ನಾಗ್ಡೆಚ್!
ಆನಿ ಮ್ಹನಿಸ್ ಜಲ್ಮಾತಾನಾಂ ನಾಗ್ಡೊ!
ಮಾತ್ರ್ ನ್ಹಂಯ್ ಜಲ್ಮಯ್ತಾನಾಂಯ್ (ಕರ್ನಿ ಕರ್ತಾನಾಂಯ್) ’ದೊಗಾಂ’ ಜಣಾಂ ಖುಶೆನ್ ವ ಒತ್ತಾಡಾನ್ ನಾಗ್ಡೆಂ ಜಾಂವ್ಚೆಂಚ್ ಪಡ್ತಾ.
ಹೆಂ ಮನ್ಶ್ಯಾ ನಿಯಮ್ ನ್ಹಂಯ್ ಪ್ರಕೃತೆ ನಿಯಮ್. ಆನಿ ಕಿತೆಂ ಮನ್ಜಾತಿ ಖಂಯ್ ’ಚಡ್ಡಿ’ ಘಾಲ್ತಾತ್??
ಆಮ್ಕಾಂ ದಭಾಜೊ ಎಕ್ ಸಮಾಜಿಕ್ ಭಾಂದಾವಳೆಂತ್ ಅವಿಭಾಜ್ಯ್ ಆಂಗ್ ಜಾವ್ನಾಸಾ.
ಆದ್ಲ್ಯಾ ಕಾಳಾರ್.... ಸೊರ್ರಿ ದೋನ್ ತೀನ್ ದಾಕ್ಡ್ಯಾ ಆದ್ಲಿಂ ಕಾಜಾರಾಂ ಪಳೆಯ್ತಾನಾ ಜಾಯ್ತೆಂ ತಫಾವತ್ ಆಜ್ ಝಳ್ಕಾತಾ- ಭೋವ್ ಬರೆಂ.
ಸೆಜಾರ್ಯಾಂಚ್ಯಾ ಕುಮ್ಕೆನ್, ಮ್ಹಾಲ್ಗಾಡ್ಯಾಂಚ್ಯಾ ಆಶೀರ್ವಾದಾಂನಿ, ಕುಟ್ಮಾಚ್ಯಾ ಸಹಕಾರಾನ್ ’ಕಾಜಾರಾಂ’ ಘಡ್ತಾಲಿಂ.
ಆಜ್ ಕಾಲ್ ಕಶೆಂ ಆನಿ ಕೆದ್ನಾಂ ಘಡ್ತಾ ತೆಂ ಕೋಣಾಕೀ ಗೊಮಾನಾ, ತರೀ ತುಟ್ತಾತ್ ಆನಿ ಪಡ್ತಾತ್ ತೆಂ ರೂಪ್ ರೂಪ್ ದಿಸ್ತಾ.
ಘರಾ ಎಕ್ ಕಾರ್ಯಾಚೆಂ ಆಮಂತ್ರಾಣ್ ಪತ್ರ್ ಆಯ್ಲ್ಯಾರ್ ’ಕೊಣಾಚೆಂ ’ಕೆಟರಿಂಗ್’ ಚಡ್ ಮುಖ್ಯ-ಕೊಣಾಚೆಂ ಕಾಜಾರ್ ವ ಕಾರ್ಯೆಂ ನ್ಹಂಯ್!
ಕಿತ್ಲೆ ನಮೂನ್ಯಾಚಿಂ ಖಾಣಾಂ ಆಸಾತ್? (ಮೆನು), ತಾಂತುಂ ಬಾಜ್ಲ್ಲೆಂ, ಸುಕೆಂ, ಕಡಿ ಇತ್ಯಾದಿ ಸವಾಲಾಂಯ್ ತಯಾರ್.
ಮತ್ಲಬ್....!??
ಸಾದೊ....! ’ಪಸಂದ್ ಜಾಲ್ಯಾರ್ ಯೆತಾಂ, ನಾಂ ತರ್ ತುಮಿ ಮುಖಾರ್ಸಿಯಾತ್’
ತೆಂ ಸೊಡಾ...... ಪಯ್ಲೆಂ ರೊಸಾ ಥಾವ್ನ್ ಪರ್ತಾಪಣಾ ಪರ್ಯಾಂತ್ ಜೆವ್ಣಾಂ ವೆಳಾರ್ ಘರಾ ಭಾಯ್ರ್, ಝಲಾ ಬಾಯ್ರ್, ಮಾಟ್ವಾ ಭಾಯ್ರ್ "ಕೊರ್ಗೊರ್ಲಿಂ" ತಯಾರ್ ಆಸ್ಲ್ಲಿಂ.
"...ನಾಗೇರೇ... ಎಣ್ಣೆಕ್ ಪಾಡ್ಲೆ.." ಮ್ಹಣೊನ್ ’ಟೊಪ್ ಲೆಸ್’ ಭಂಗೆರ್, ಭಾಟಿಯ್ಯೊ ಶೇಲ್ಯಾನಿ ವಿನಂತೆನ್ ವೊಡ್ಡಾಯ್ತೆಲ್ಯೊ.
ಆಜ್ ಉಶ್ಟೆಂ ಖಾತೆಲ್ಯಾಂಚಿ ಗತ್ ನಾಂ. ತೀಂಯ್ ಮರ್ಯಾದೆಚೆಂ ಜೇವ್ನ್ ಉಶ್ಟೆಂ ಸುಣ್ಯಾಂಕ್ ಘಾಲ್ತಾತ್. ಪ್ರಗತಿ ಬರೆಂಚ್.
ತೆಂ ಮೊರೊಂ...! ಆಮ್ಕಾಂ ಕಿತ್ಯಾಕ್ ಆಪಯ್ತಾತ್ ತೆಂ ನೆಣಾಂ??
ಆಯಾರ್ ನಾಕಾ, ಫುಲಾಂ ನಾಕಾತ್, ಗಿಫ್ಟಾಂ ನಾಕಾತ್....... ಫಕತ್ ಕಾನ್ ಫುಟ್ಚ್ಯಾ ಆವಾಜಾಂತ್ ಯೇಂವ್ನ್ ಜೇಂವ್ನ್ ವಚೊಂಕ್??
’ಕೊರ್ಗೊರ್ಲ್ಯಾಂಕ್ ದೀಂವ್ಕ್ ಆಸಾಧ್ಯ್ ದೆಕುನ್ ತಾಂಚೊ ಸಂತೊಸ್, ವಾಂಟುಂಕ್?? ತಾಂಚೊ ದಭಾಜೊ ದಾಖಂವ್ಕ್ ಆಮ್ಚಿ ಗರ್ಜ್ ಆಸಾ??’
’ಆಮಿಂ ಪಯ್ಶ್ಯಾಂನಿ ಉಣೆಂ ನಾಂವ್’ ಮ್ಹಳ್ಳೆಂ ವ್ಹಡ್ಪಣ್ ದಾಖಂವ್ಕ್?
ಪಯ್ಶೆ ಆಸಾತ್.....! ಫಕತ್ತ್ ಪಬ್ಲಿಕ್ ಜಾಯ್??
ಗಲ್ಫಾಂತ್ ಹಾಂವೆಂ ಪಳೆಯ್ಲಾಂ...... ಪಾರ್ಟ್ಯೊ ಕರ್ತಾತ್ ಸಾಂಗಾತಾ ಸಾಂಗಾತಾ "ಗಿಫ್ಟಾಂ" ಆಶೆತಾತ್.
ಘೊಟುಂಕ್ ಮೆಳ್ಳ್ಯಾರ್ ಆನಿ ವಿರೋದ್ ಸಂಯ್ಬಾಸವೆಂ ನಾಚೊಂಕ್ ಮೆಳ್ಳ್ಯಾರ್ ಭಾರೀ ಖುಶಿ.... ’ಪಾರ್ಟಿ ಫಸ್ಟ್ ಕ್ಲಾಸ್’
ಸುರ್ವೆರ್... ಪಯ್ಶೆ ಕರ್ಚಿ ಉರ್ಬಾ. ಪಯ್ಶೆ ಧಾರಾಳ್ ಜಾಲ್ಲೆಂಚ್ ನಾಂವಾಚಿ ವೋಡ್! ತ್ಯಾ ಖಾತಿರ್ ಕಿತೆಂಯ್ ಕರುಂಕ್ ತಯಾರ್. ’ಆಪ್ಲೆಂ ದರ್ಭಾರ್ ಆನಿ ದವ್ಲತ್ ಪ್ರದರ್ಸುಂಚೊ ದಭಾಜೊ!!’ ಪಯ್ಶೆ ದೀವ್ನ್ ಮುಖೆಲ್ ಸಯ್ರೊ, ಮಾನಾಚೊ ಸಯ್ರೊ, ಧಾನಿ, ಶಾಲಾಂ-ಫಳಾಂ - ಮೊಮೆಂಟೊ (ಯಾದಿಸ್ತಿಕಾ) .... ಶ್ರೇಯ್ ವೋಡ್ನ್ ಘೆತಾತ್.
ವಿಪರ್ಯಾಸಾಚಿ ಗಜಾಲ್, ಜಿಣಿಭರ್ ತ್ಯಾಗ್ ಕೆಲ್ಲ್ಯಾಕ್ ಪಯ್ಶ್ಯಾಂನಿ ಕಂಗಾಲ್ ಮನ್ಶ್ಯಾಕ್ ಕೊನ್ಶ್ಯಾಂತ್ ಕುರ್ವೊನ್ ಬಸೊಂಕ್ ಪಡ್ತಾ.
ಚಡಾವತ್ ಮ್ಹನಿಸ್ ಜಿಣ್ಯೆಂತ್ ’ಪಯ್ಶೆ ಕಶೆ ಕರ್ಚೆ?’ ಮ್ಹಣ್ ವೊಡ್ಡಾತಾನಾ, ಥೊಡ್ಯಾಂಕ್ ’ಪಯ್ಶೆ ಕಶೆ ಖರ್ಚುಂಚೆ?’ ಮ್ಹಳ್ಳಿ ಖಂತ್.
ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್ ಜಾಂವ್ಚ್ಯಾ ಕಾರ್ಯಾಂನಿ ಗರ್ಜೆ ಭಾಯ್ಲೊ ದಭಾಜೊ ಪಳೆಯ್ತಾನಾ ಆಮಿಂ ಉದರ್ಗತೆಚ್ಯಾ ಪಥಾಚೆರ್ ವೆತಾಂವ್ಗೀ? ವ ದುರ್ಗತೆಚ್ಯಾ ಫೊಂಡಾಕ್ ವೆತಾಂವ್ ತೆ ಗೊಮನಾ. ಹಾಂತು ಮಧ್ಯಮ್ ವರ್ಗಾಚೊ ಮ್ಹನಿಸ್ ಮಸ್ತ್ ಮಾರ್ ಖಾತಾ.
ಹಾಂವ್ಯ್ ಎಕಾ ದಭಾಜೆಕ್ ಕಾಜಾರಾಕ್ ಪಾವ್ಲ್ಲೊಂ. ಎಕ್ಲಿಚ್ ಧುವ್. ಮ್ಹಜ್ಯಾ ಬಾಯ್ಲೆಕ್ ಬರ್ಯಾನ್ ವಳ್ಕಾತಾ.
ಉಂಚ್ಲೆಂ ಡೆಕೊರೆಶನ್, ವೀಜ್ ದಿವ್ಯಾಂ ಸೊಭಾಯ್, ಸಂಗೀತ್, ನಾಚ್, ಫುಕಟಾಚೊ ವಿದೇಶಿ ಸೊರೊ, ಉಂಚ್ಲೆಂ ಕೆಟರಿಂಗ್, ನೊ ಗೀಫ್ಟ್... ಇತ್ಯಾದಿ ಇತ್ಯಾದಿ.
ಸಗ್ಳಿಂ ಖುಶ್! ಸಗ್ಳ್ಯಾಂನಿ ದಭಾಜಾಚೊ ಹೊಗ್ಳಾಪ್!!
ಮ್ಹಹಿನ್ಯಾ ಉಪ್ರಾಂತ್ ಎಕ್ ದೀಸ್ ಮ್ಹಜಿ ಬಾಯ್ಲ್ ಖಬಾರ್ ದಿತಾ ’........ಫಲಾಣ್ಯಾ ಕಾಜಾರಾಕ್ ಮ್ಹಹಿನ್ಯಾ ಆದಿಂ ಘೆಲ್ಲ್ಯಾಂವ್, ತಿ ವೊಕಾಲ್ ಮ್ಹೆಳ್ಳಿ.... ವಾಟೆರ್ ಸಾಂಗೊನ್ ರಡ್ತಾಲೆಂ.... ಲಾಖಾಂನಿ ಖರ್ಚ್ ಕರ್ನ್ ಕಾಜಾರ್ ಜಾಲ್ಲೊ ದಭಾಜ್ಯಾಚೊ ದುಡು ಉದ್ಕಾಂತ್ ಗೆಲೊ..... ಚೆಡ್ಯಾನ್ ಚೆಡ್ವಾಕ್ ಸೊಡ್ಲೆಂ....’
"ಸಮಾಜಿಕ್ ರುಸ್ತುರುಸಾಂವ್! ನಶಿಭಾಚೆಂ ಖೆಸ್ತಾಂವ್!!" ಹಾಂವೆಂ ಬಾಯ್ಲೆಕ್ ಪ್ರತಿಕ್ರಿಯಾ ದಿಲಿ ನಾ.
’ಜಿತ್ಲೆಂ ಚಡ್ ನಿರ್ಬಂಧ್ ತುಂ ಘಾಲ್ತಾಯ್, ತಿತ್ಲೊಚ್ ಉಣೆಂ ಗುಣೇಸ್ತ್ ಜಾತಾ ಲೋಕ್.
ಜಿತ್ಲಿ ಚಡ್ ಹಾತೆರಾಂ ತುಜ್ಯಾಲಾಗಿಂ ಅಸಾತ್, ತಿತ್ಲಿಚ್ ಉಣೆಂ ರಾಕ್ವಣ್ ಜಾತಾ ಲೊಕಾಚಿ.
ಜಿತ್ಲೆಂ ಚಡ್ ಅನುದಾನ್ ತುಂ ದಿತಾಯ್, ತಿತ್ಲೊಚ್ ಉಣೆಂ ಸ್ವಾವಲಂಬಿ ಜಾತಾ ಲೋಕ್’
ದೀರ್ಘ್ ಶ್ವಾಸ್ ಸೊಡ್ನ್ ಇತ್ಲೆಂಚ್ ಚಿಂತ್ಲೆಂ....... ಕಾನಡಿ ಉತಾರ್ - "ಮುಂಡೆ ಮದುವೆಯಲ್ಲಿ ಉಂಡವನೇ ಜಾಣ."
ರುಸ್ತುರುಸಾಂವಾಚಾ ಆಧ್ಲ್ಯಾ ತೆಸಾಂವಾಂಕ್ ಭೆಟ್ ದಿಯಾ
1. ರೋದ್
3. ಚೂಕ್
4. ದೂಕ್
5. ಸುರಾತ್
6. ಸೊಲ್ಲೊ
7. ಬದ್ಲಾವಣ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
