ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ರುಸ್ತುರುಸಾಂವ್
ಹೆಂ ತತ್ವಾಂ-ತರ್ಕಾಂಚೆಂ ತೆಂತೆಸಾಂವ್
ಹೆಂ ಆಮ್ಶೆಂ-ತಿಕ್ಶೆಂ ಮಿಸಾಂವ್
ಹೆಂ ರಾಜಾಂವ್-ವಿಚಾರಾಂಚೆಂ ಲಿಸಾಂವ್
ರುಸ್ತುರುಸಾಂವ್ - 3 . ಚೂಕ್!
ಲ್ಯಾನ್ಸಿ ಪಿಂಟೊ ನಾಯಕ್
ದುಸ್ರ್ಯಾಂಕ್ ಸಮ್ಜಂವ್ಚೊ ಹುಶಾರ್ ಆನಿ ಆಪ್ಣಾಕ್ಚ್ ಖುದ್ಧ್ ಸಮ್ಜಂವ್ಚೊ ಬುದ್ವೊಂತ್ ಮ್ಹಳ್ಳೆಂ ಉತಾರ್ ಮತಿಂತ್ ಫ್ರತಿಫಲತ್ ಜಾತಾ ತರೀ ಚಡಾವತ್ ಮನ್ಶ್ಯಾಂಕ್ ಪಯ್ಲೊ ಚೂಕಿ ದುಸ್ರ್ಯಾಂಚೊ ದಿಸ್ತಾತ್ ಶಿವಾಯ್ ಆಪ್ಲ್ಯೊ ನ್ಹಯ್.
ಆಮಿ ಚಿಂತ್ಲ್ಲ್ಯೊ ಚುಕಿ ಸಭಾರ್ ಪಾವ್ಟಿಂ ಚಾಲ್ತಿ ಮಾಗ್ಣಿ ಬುಕಾಂತ್ಲ್ಯಾ ಪಾತ್ಕಾ ಪರಿಂ....’ಹಾಸ್ಲಾಂ, ಖೆಳ್ಳಾ...ಉಲಯ್ಲಾ....ಹಾತ್ ಉಬಾರ್ಲಾ..ಹಳ್ಶಿಕ್ ಆಪಡ್ಲಾ, ಪಳೆಯ್ಲಾ...ಇತ್ಯಾದಿ.’
ಸತ್ ಸಾಂಗ್ಚೆ ತರ್ ಚುಕಿ ಆನಿ ಪಾತ್ಕಾಂಕ್ ಲಾಗ್ಶಿಲೊ ಸಂಬಂಧ್ ಆಸಾ ಜಾಲ್ಲ್ಯಾನ್ ಪಾತ್ಕಾಂ ಆಮಿಂ ಕೆಲ್ಲಿಂ ಮಾತ್ರ್ ನ್ಹಯ್ ದುಸ್ರ್ಯಾಂನಿ ಕರ್ತಾನಾಂಯ್ ಪಳೆಂವ್ನ್ ಸಂತೊಸ್ ಪಾಂವ್ಚೆಂ, ಆನಂದ್ ಜೊಡ್ಚೊ ಆನಿ ಉತ್ತೇಜನ್ ದಿಂವ್ಚೆಂಯೀ ಪಾತಾಕ್ ಜಾತಾ. ಮಾತ್ರ್ ನ್ಹಯ್ ಪಾತಾಕ್ ವ ಚೂಕ್ ಕರ್ತೆಲ್ಯಾಕ್ ಆಮಿಂ ತಿದ್ವಿನಾಂವ್ ಸಾಂಗಾನಾಂವ್ ತರ್ ತೇಂವೀ ಏಕ್ ಪಾತಾಕ್ ಮ್ಹಣೊನ್ ಮ್ಹಾಕಾ ’ಪೊಟ್ಟಾ’ ಚಾ ರೆತಿರೆವೆಳಾ ಆಯ್ಕಾಲ್ಲೊ ಉಗ್ಡಾಸ್ ಆಸಾ.
ಅನ್ಯಾಯ್.. ಅನೀತಿಂಕ್ ಒಪ್ಪಂದ್ ಕರ್ಚಾ ತಿತ್ಲಿ ವ್ಹಡ್ಲಿ ಚೂಕ್ ದುಸ್ರಿ ನಾಂ ಮ್ಹಣ್ ಸುಭಾಸ್ಚಂದ್ರ ಬೋಸ್ ಸಾಂಗ್ತಾ. ಮ್ಹಜ್ಯಾ ಜಿವಿತಾಂತ್ ಚುಕಿ ಘಡ್ತಾತ್ ತರೀ ತ್ಯೊ ಕರ್ನ್ಂಚ್ ವೆಚೆಂ ಮೂರ್ಖ್ಪಣ್ ಖಂಡಿತ್. ಬಿವ್ಕುರೆಂಪಣ್ಯಿ ಏಕ್ ಚೂಕ್ ಆನಿ ಅಪ್ರಾದ್. ತರೀ ದುಸ್ರ್ಯಾಂಚೊ ಚುಕಿ ಪಳೆಂವ್ಕ್ ಪ್ರತಿ ಎಕ್ಲೊ ಗೀದಾಚಾ ದೊಳ್ಯಾಂನಿ ರಾಕೊನ್ ಆಸ್ತಾ.
ಲ್ಹಾನ್ಪಣಾರ್ ಸದಾಂ ಚಲೊನ್ ಮೀಸಾಕ್ ವೆಚೆಂ ಆಸ್ಲ್ಲೆಂ ಆನಿಂ ಆಜ್ ಕಾಲ್ ಚಡಾವತ್ ಆಯ್ತಾರಾ ವೆಚ್ಯಾ ಎಕಾ ಮೀಸಾಕ್ಯೀ ಬಸ್ಸ್ ವ ಖಾಸ್ಕಿ ವಾಹನ್ ಜಾಯ್. ಹಿ ಚೂಕ್ ನ್ಹಯ್ ಪರಿಸ್ಥಿತಿ ಮ್ಹಣೊಂ..??
ವರ್ಸಾವರ್ ಫಿರ್ಗಜಿಂತ್ಲ್ಯಾ ಹರ್ಯೆಕಾ ಕುಟ್ಮಾಂನಿ ’ಅನ್ವಾಲ್’ ವ ದೆವೆಂ ದೀಂವ್ಕ್ ಆಸ್ತಾ.! ತರೀ ತೊ ಮೊರ್ತಾನಾಂ ಎಕಾ ತೆಂಪಾರ್, ಘಾಂಟಿಂಕ್ ಪಯ್ಶೆ, ಫೇನಾಂ ಘಾಲುಂಕ್, ಸಗ್ಳೆ ದಿವೆ ಪೆಟಂವ್ಕ್, ಪಯ್ಶೆ ದಿಂವ್ಚೆಂ ವಜಾನ್ ಆಸೆಲ್ಲೆಂ. ಪೊಂಡಾಂತ್ ಪೆಟವ್ನ್ ಉಡಂವ್ಚ್ಯೊ ವಾತಿ ಹಾಡ್ಚೆ ಅನಿವಾರ್ಯ್ ಜಾವ್ನ್ ಗೆಲ್ಲೆಂ.
ದುಬ್ಳ್ಯಾ ಕುಟ್ಮಾಂತ್ಲೊ ಎಕ್ಲೊ ದೆವಾಧೀನ್ ಜಾತಾನಾ ಎಕ್ ಸಾಂಡ್ಲ್ಲಿ ದೂಕ್. ತಾಚಾ ವಯ್ಲ್ಯಾನ್ ಭವಿಷ್ಯಾಚಿ ಖಂತ್, ಪೆಟೆಚೊ ಆನಿ ಚಾ-ಕಾಪ್ಯೆಚೊ ಖರ್ಚ್... ರೀಣಾಚೆಂ ವೊಜೆಂ ಇತ್ಯಾದಿ ಜಾತಾನಾ ತ್ಯಾ ಬಾಪ್ತಿಂ ಕೊಣೀಂ ಚಿಂತುಂಕ್ ವಚಾನಾತ್ಲ್ಲೆ. ಆನಿ ಚೂಕ್ ಮ್ಹಣೊನ್ಯಿ ಭೊಗಾನಾತ್ಲ್ಲೆಂ. ಜೀವ್ ಆಸ್ತಾನಾಂ ಆಪ್ಲ್ಯಾ ಫಿರ್ಗಜೆಖಾತಿರ್, ಧರ್ಮಾಖಾತಿರ್ ತಾಚಾ ತಾಂಕಿ ಭಿತರ್ಲೆಂ ದಿತಾ ತರ್ ಮೊರ್ತಾನಾಂ, ತಾಚಾವಿಶಿಂ ಧರ್ಮಾನ್ ಆನಿ ಫಿರ್ಗಜಿಚಾ ಸಾಂದ್ಯಾನಿ ಚಿಂತ್ಚಿ ಗರ್ಜ್ ವ್ಹಯ್ಗೀ ನ್ಹಯ್??
ಫಿರ್ಗಜಿಚೊ ಸಾಂದೊ ಮ್ಹಣ್ತಾನಾಂ ಪ್ರತ್ಯೇಕ್ ಜಾವ್ನ್ ದುಬ್ಳ್ಯಾ ಕುಟ್ಮಾಂತ್ಲೊ ತರ್ "ಮೊರ್ಣಾಂತ್" ತರೀ ನಿಸ್ಪಕ್ಷ್ಪಣ್ ಕರಿನಾಸ್ತಾಂ, ಸರ್ವ್ ಸವ್ಲತ್ಯೊ, ದವ್ಲತ್ಯೊ ತಾಕಾ ಫಾವೊ ಕರ್ಚೆಂ ಆಮ್ಚೆಂ ಧರ್ಮ್ ನ್ಹಯ್ಗೀ? ಕ್ರಿಸ್ತಾಂವ್ಪಣ್ ನ್ಹಯ್ಗೀ??
ಸಾಧ್ಯ್ ಜಾಲ್ಯಾರ್ ದುಬ್ಳ್ಯಾ ಕುಟ್ಮಾಂತ್ಲೊ ಸಾಂದೊ ದೆವಾಧೀನ್ ಜಾತಾನಾಂ ಫುಲಾಂ, ಭುಜಾವ್ಣಿಂ, ಉತ್ರಾಂ ಧಾರಾಳ್ ದಿಂವ್ಚಾಕೀ, ತಾಚ್ಯಾ ಆಧಾರಾಕ್ ’ಕಂರ್ಡೊ’ ದವರ್ನ್ ತಾಂತು ಆಮ್ಚೊ ಕುಮ್ಕೆ ಹಾತ್ ದಿಂವ್ಚೆಂ ಕೆತ್ಲೆಂ ಬರೆಂ ನ್ಹಯ್ಗೀ? ಫಿರ್ಗಜೆಂತ್ ಕುಮೊಕ್ ದಿಂವ್ಚಿಂ ಮಾಂಡಾವಳ್ ಆಸಾ? (ಸಾಂ. ವಿಶೆಂತಿಚೆ ಭಾವ್ ಆಸಾತ್...ತಾಂಕಾ ಸೊಡ್ನ್) ಫಿರ್ಗಜೆಂತ್ ಎಕ್ಚ್ ಕುಟಾಮ್ ದುಬ್ಳೆಂ (ಆರ್ಥಿಕ್ ರೇಖೆಚ್ಯಾ ಸಕ್ಲಾ ಆಸ್ಲ್ಲೆಂ) ಆಸಾ ತರ್ ತೆದ್ನಾಂ ವರೆಗ್ ತಿ ಫಿರ್ಗಜ್ ದುಬ್ಳಿ ಮ್ಹಣೊಂಕ್ಚ್ ಫಾವೊ.
’ಆಮ್ಚಿ ಫಿರ್ಗಜ್ ಗ್ರೇಸ್ತ್ ಫಿರ್ಗಜ್’ ಮ್ಹಣ್ಚೆಂ ಹಕ್ಕ್ ತ್ಯಾ ಫಿರ್ಗಜೆಂತ್ ಕೊಣಾಂಯ್ಕಿ ನಾಂ ಮ್ಹಣ್ ಮ್ಹಾಕಾ ಭೊಗ್ತಾ. ಚಡಾವತ್ ಆಜ್ಕಾಲ್ ಪ್ರಸಾರ್ ಮಾಧ್ಯಮ್ ಪಳೆಯ್ತಾನಾ ಭೊಗ್ತಾ ಧರ್ಮ್ ಎಕ್ ವ್ಯವಹಾರಾಚೆಂ ವ ಪಯ್ಶೆ ಜಮಂವ್ಚೆಂ ಎಕ್ ಸಾಧನ್ ಮ್ಹಳ್ಳ್ಯಾಪರಿಂ. ಸಂಸರಾಂತ್ಲೊ ಹರ್ಯೆಕ್ಲೊ ಮನಿಸ್ ಖಂಚಾಯಿ ಧರ್ಮಾಕ್ ಆಸೊಂ ’ದೇವ್ ಏಕ್’ ಮ್ಹಣ್ತಾ.
ದೇವ್ ಏಕ್, ದೇವ್ ಏಕ್ ಶೆಂಬೊರ್ ಠಕ್ಕೆ ಸಾರ್ಕೆಂ. ಪುಣ್ ಮ್ಹಾಕಾ ಸಾಂಗಾಂ ಮ್ಹನ್ಶಾಂನಿ ಆಪ್ಲ್ಯಾಚ್ ಧರ್ಮಾಂ ಥಾವ್ನ್ ಸರ್ಗಾಕ್ ವಚೊಂಕ್ ಜಾತಾ ಆನಿ ವಚಾಜಾಯ್ ಮ್ಹಳ್ಳೆಂ ಹಠ್ ಆನಿ ಆರ್ಗಾಂಟ್ ಕರ್ನ್ ಬಂಧಡ್ಯೊ ನಿಯಾಮಾಂ ಕಿತ್ಯಾಕ್ ಕರ್ಚಿಂ?? ಕೊಣೆಂ ಕರ್ಚಿಂ?? ಆನಿ ತಾಚಿ ಗರ್ಜ್?? ಬರ್ಯಾ-ಖರ್ಯಾ ಮನ್ಶಾಪಣಾಚಾ ಮನ್ಶಾಕ್ ದೇವ್ ಖಂಚಾ ರಾನಾಂ-ಮೂಲ್ಯಾಂತ್ ಧರ್ಮಾ ಆಸ್ಲ್ಯಾರೀ, ನಾತ್ಲ್ಯಾರೀ ಸರ್ಗಾಕ್ ಘೆಂವ್ಚೊ ನಾಂಗೀ?
ಧರ್ಮ್ ಶಿಕವ್ಚಾಂಕೀ ಚಡ್ ಮನ್ಶಾಪಣ್ ಶಿಕೊಂವ್ಚೆಂ ಸರ್ಗಾಕ್ ವಚೊಂಕ್ ಗರ್ಜೆಚೆಂ ನ್ಹಯ್ಗೀ?? ಬರೆ ಮನಿಸ್ ಆಮಿಂ ಸಮಾಜೆಕ್ ದಿಂವ್ಚೆಂ ಆನಿ ಆಸಾ ಕರ್ಚೆ ಗರ್ಜ್ ನ್ಹಯ್ಗೀ? ತಿ ಗರ್ಜ್ ಮ್ಹಣ್ ಜಾಣಾಂ ಆಸೊನ್ ಆಮಿಂ ಮೌನ್ ರಾವ್ತಾಂವ್. ತಿ ಚೂಕ್ ನಯ್ಗೀ? ಆಮಿಂ ಚಡ್ತಿಕ್ ಧಾರ್ಮಿಕ್ ಜಾಂವ್ಚಾಕೀ ಆಧ್ಯಾತ್ಮಿಕ್ ಜಾಂವ್ಚಿಂ ಗರ್ಜ್ ನ್ಹಯ್ಗೀ ?
ಸವಲಾಂ ಸಭಾರ್...ಸಭಾರ್.... ಆಸಾ ಅನ್ಯೇಕ್ ಸವಾಲ್... ಕೋಣ್ ಚಿಂತುಂಕ್ ಪುರೊ ವ ಮ್ಹಣೊಂಕ್ ಪುರೊ ಅಸಲೆ ವಿಷಯ್ ಬರಂವ್ಚೆಂ, ಉಲಂವ್ಚೆಂ ಚೂಕ್....ವಾಸ್ಚೆಂ ಚೂಕ್. ಹಿ ಚೂಕ್ ಮ್ಹಣ್ ಕೊಣೆಂ ಆನಿ ಕಶೆಂ ಮ್ಹಣ್ಚೆಂ?
ಖಂಚಾ ಅಧಾರಾರ್? ಚೂಕ್ ....ಚೂಕ್....ಚೂಕ್......ಆಮ್ಕಾಂ ದೂಖ್ ದಿಂವ್ಚೆಂ ಚೂಕ್ ಮ್ಹಣ್ ಭೊಗ್ಚೆಂ ಸಹಜ್. ತರೀ ತಾಚ್ಯಾ ಪಾಟ್ಲ್ಯಾ ಸಾರ್ಕೊ ಆಟೊವ್ ಕರ್ನ್ ಏಕ್ ಬರಿ ಸಮಾಜೆಕ್ ಉಪ್ಕಾರಾಕ್ ಪಡ್ಚಿ, ಮನ್ಶಾಪಣಾನ್ ದೆವಾಕ್ ಮೆಚ್ವೊಂವ್ಚಿ ಏಕ್ ’ಜೀವಿ’ ಜಾಂವ್ಚೆಂ ಚೂಕ್ಗೀ?
ಹೆಂ ರುಸ್ತುರುಸ್ತಾಂವ್ ನ್ಹಯ್ಗೀ?
ಆನಿಕೀ ಆಸಾ................! ಪುಣ್ ಸಕ್ಕಡ್ ಎಕ್ಚ್ ಪಾವ್ಟಿಂ ಸಾಂಗ್ಚಿಯೀ ಚೂಕ್! ಹ್ಹ............ಹ್ಹ..........ಹ್ಹ
ಆತಾಂ ಲಾವೊತ್ಸೆಚಿಂ ಹಿಂ ಉತ್ರಾಂ ವಾಚ್ಯಾಂ;
ಮ್ಹನಿಸ್ ಜಲ್ಮಾತಾನಾ ಮೋವ್ ಆನಿ ಮೊವಾಳ್
ಮರ್ಣಾಂತ್ ಜಾತಾ ಘಟ್ ಆನಿ ಕಡಕ್ಕ್
ಝಡಾಂ ಖಿರ್ಲಾತಾನಾ ಮೋವ್ ಆನಿ ಮೊವಾಳ್
ಮೆಲ್ಲಿಂಚ್ ಜಾತಾತ್ ಘಟ್ ಆನಿ ಕಡಕ್ಕ್
ಆಶೆಂ ಘಟ್ ಆನಿ ಬಾವ್ ಯೆನಾತ್ಲ್ಲೆಂ
ಮರ್ಣಾಚಾ ಸಾವ್ಳೆಂತ್ ಆಸ್ತಾ
ಕೋಣ್ ಮೊವಾಳ್ ಆನಿ ಸೊಡ್ನ್ ದಿತಾ
ಜಿವಿತಾಚ್ಯಾ ಸಾವ್ಳೆಂತ್ ಆಸ್ತಾ
ಘಟ್ ಆನಿ ಕಡಕ್ಕ್ ಆಸ್ಲ್ಲೆಂ ಮೊಡ್ತಾ
ಮೋವ್ ಆನಿ ಬಾವ್ ಯೆಂವ್ಚೆಂ ಬಾಳ್ತಾ
ವ್ಹಯ್! ಆಮಿಂ ಮೋವ್ ಆನಿ ಬಾವ್ ಯೆಂವ್ಚೆಪರಿಂ ಜಾಯ್ಜಾಯ್ ತರ್ ತಿದ್ವೊಣಿ ಆನಿ ಭೊಗ್ಸಾಣೆಂ ಸೊಡ್ದೊಡಿನ್ ಖಾಲ್ತೆಪಣಾನ್ ಮಾಂದಿಜಾಯ್.
ಸಮಾ ಮೂ??
ಹ್ಹ....ಹ್ಹ...........ಹ್ಹ ಸಮಾ ನ್ಹಯ್ ಕರ್ಮಾಂ.....!!!
ಯೆಸ್ಸ್........ಯೆಂವ್ಚಾ ಅಂಕ್ಯಾಂತ್ ಕಾಮಾಂ ಮ್ಹಣೊಂ ಕರ್ಮಾಂ...ದೊನಾಂತ್ ಏಕ್!!!
ಕರ್ಮಾಂ.......!! ಹ್ಹ....ಹ್ಹ...........ಹ್ಹ ಪರ್ತುನ್ ರಾಕೊವ್ಣಿಂ......ಆನಿ......ರಾಕೊವ್ಣಿಂ
ರುಸ್ತುರುಸಾಂವ್ - 1. ರೋದ್
ರುಸ್ತುರುಸಾಂವ್ - 2. ಗ್ರೇಸ್ತ್ಕಾಯ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
