ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಚೊ - ಅಮೆರಿಕಾಂತ್ಲೊ ಮಹಾನ್ ಖುನ್ಯೆಗಾರ್ - ಆಸ್ಟಿನ್ ಡಿ’ಸೋಜ್ ಪ್ರಭು
ಎಪ್ರಿಲ್ ತೆರಾವೆರ್ ತೆವೀಸ್ ವರ್ಸಾಂ ಪ್ರಾಯೆಚ್ಯಾ ಚೊ ಶಾಂಗ್ ವೀ ಹಾಣೆಂ ದೋನ್ ಪಿಸ್ತುಲ್ಯೊ ಘೆವುನ್ ಬಾವೀಸ್ ಜಣಾಂಚೊ ಸಂಹಾರ್ ಕೆಲೊ ಮಾತ್ರ್ ನ್ಹಂಯ್, ನಿಮಾಣೆಂ ಆಪ್ಲ್ಯಾಯೀ ಜೀವಾಚಿ ಬಲಿ ಘೆತ್ಲಿ ಆನಿ ಅಮೇರಿಕಾಚ್ಯೆ ಚರಿತ್ರೆಂತ್ಚ್ ಪಯ್ಲ್ಯೆ ಪಾವ್ಟಿಂ ಇತ್ಲ್ಯಾ ಜಣಾಂಚೊ ಜೀವ್ ಏಕಾ ಶಾಲಾಂತ್ ಕಾಡುನ್ ನವೊಚ್ಚ್ ದಾಖ್ಲೊ ರಚ್ಲೊ.
ಆಟ್ ವರ್ಸಾಂ ಪ್ರಾಯೆರ್ ದಕ್ಷಿಣ್ ಕೊರೆಯಾ ಥಾವ್ನ್ ಚೊ ಆಪ್ಲ್ಯಾ ಆವಯ್ ಬಾಪಾಯ್ಸಂಗಿಂ ಅಮೇರಿಕಾಕ್ ವಸ್ತಿ ಕರುಂಕ್ ಆಯಿಲ್ಲೊ ಆನಿ ಹಾಂಗಾಚೊ ಕಾಯಾಮ್ ರಾವ್ಪಿ ಜಾಲ್ಲೊ. ಎಕಾ ಲೊಂಡ್ರೆಂತ್ ಕಾಮ್ ಕರುನ್ ಆಸ್ಲ್ಲ್ಯಾ ತಾಚ್ಯಾ ಬಾಪಾಯ್ನ್ ಕಷ್ಟಾಂನಿ ’ಚೊ’ಕ್ ವ್ಹಡ್ ಕರುನ್ ತಾಂಚ್ಯಾ ಕುಟ್ಮಾಚ್ಯಾ ಬರ್ಯಾಪಣಾಖಾತಿರ್ ವರ್ಜೀನಿಯಾ ಪೊಲಿಟೆಕ್ನಿಕ್ ಇನ್ಸ್ಟಿಟ್ಯೂಟ್ ಆನಿ ರಾಜ್ಯ್ ವಿಶ್ವ್ ವಿದ್ಯಾಲಯ್ ಹಾಂಗಾ ಶಿಕ್ಪಾಕ್ ಧಾಡ್ಲ್ಲೊ. ಹೊ ಹಾಂಗಾಸರ್ ಎಕಾ ಕುಡಾಂತ್ ಏಕಾ ವಿದ್ಯಾರ್ಥಿ ಬರಾಬರ್ ವಸ್ತಿ ಕರುನ್ ಥಂಯ್ಸರ್ಚ್ ಶಾಲಾಕ್ ವೆತಾಲೊ. ಭಾರಿ ಎಕ್ಸುರ್ಯಾ ಸ್ವಭಾವಾಚೊ ಚೊ, ಕೊಣಾಯ್ಲಾಗಿಂ ಉಲಂವ್ನ್ ಜಾಂವ್, ಹಾಸೊನ್-ಖೆಳೊನ್ ಜಾಂವ್ ನಾತ್ಲ್ಲೊ.
ಚೊ ಶಾಲಾಂತ್ ಕ್ರಿಯಾತ್ಮಕ್ ಬರವ್ಪ್ಯಾಂಚಾ ಸಂಘಾಂತ್ ಆಸ್ಲ್ಲೊ ಆನಿ ತಾಚಿಂ ಬರ್ಪಾಂ ಭಾರಿಚ್ ವಿದ್ರೂಪ್ ಆನಿ ಕ್ರಾಂತಿಕಾರ್ ಜಾವ್ನಾಸ್ಲ್ಲಿಂ ಮ್ಹಣ್ ತಾಚಿ ಇಂಗ್ಲಿಷ್ ಮೆಸ್ತ್ರಿಣ್ ಸಾಂಗಾಲಾಗ್ಲಿ. "ಆಪ್ಣಾಕ್ ಚೊ ವಿಶ್ಯಾಂತ್ ಭಿರಾಂತ್ ಆಸ್ಲ್ಲಿ ದೆಖುನ್ ಹಾಂವೆ ತಾಕಾ ಏಕಾ ಮನಃಶಾಸ್ತ್ರಜ್ಞಾಕ್ ಪಳೆಂವ್ಕ್ ಶಿಫಾರಸ್ ಕೆಲ್ಲಿ" ಅಶೆಂ ಮ್ಹಣಾಲಿ ತಿ ಪತ್ರ್ಕರ್ತಾಂಲಾಗಿಂ ಉಲವ್ನ್. ಚೊ ಕೆನ್ನಾಂಯ್ ಆಪ್ಲ್ಯಾ ಬರ್ಪಾಂನಿ ಗ್ರೇಸ್ತ್ ವಿದ್ಯಾರ್ಥಿಂಕ್ ಹಿಣ್ಸಿತಾಲೊ ಆನಿ ತಾಂಚೆಂ ನಾಸ್ ಆಶೆತಾಲೊ ಖಂಯ್.
ಚೊ ಹೈಸ್ಕೂಲಾಂತ್ ಶಿಕೊನ್ ಆಸ್ತಾನಾ ತಾಕಾ ತಾಚೆ ಸಾಂಗಾತಿ ಕೊಲಾಯ್ತಾಲೆ ಆನಿ ಪಾಟಿಂ ಕೊರೆಯಾಕ್ ವಚೊನ್ ಶಿಕೊನ್ ಯೇ ಮ್ಹಣ್ ತಮಾಶೆ ಕರ್ತಾಲೆ ಖಂಯ್. ಆಶೆಂ ಚೊನ್ ಆಪ್ಲ್ಯಾ ಮತಿಂತ್ ಹ್ಯಾ ವಿದ್ಯಾರ್ಥಿಂಚೊ ತೀವ್ರ್ ಧ್ವೇಷ್ ದವರ್ಲ್ಲೊ ಆನಿ ತೊ ತಾಂಕಾಂ ಕಠೀಣ್ ಥರಾನ್ ಕಾಂಠಾಳ್ತಾಲೊ. ಅಸೊ ಹೊ ದ್ವೇಷ್ ವ್ಹಾಡಾತ್ತ್ ಆಯ್ಲೊ ಆನಿ ತಾಕಾ ಎಕ್ಲ್ಯಾ ಎಕ್ಸುರ್ಯಾಕ್ ಮತಿ ಭಿತರ್ಚ್ಚ್ ಕ್ರೋಧಾನ್ ಭರ್ಲೊ. ಚೊನ್ ಆಯ್ಲೆವಾರ್ ಏಕ್ ಎಕಾಮೆಕಾಚೆ ಜೀವ್ ಕಾಡ್ಚೆಂ ಪಿಂತುರ್ಯೀ ಪಳೆಲ್ಲೆಂ ಆನಿ ಆಪ್ಲ್ಯಾ ಮತಿ ಭಿತರ್ಚ್ಚ್ ಹ್ಯಾ ವಿದ್ಯಾರ್ಥಿಂಚೊ ಸಂಹಾರ್ ಕರ್ತಲೊಂ ಮ್ಹಣ್ ಪಂಥಾಹ್ವಾನ್ ಘೆತ್ಲ್ಲೆಂ.
ಚೊಚ್ಯಾ ಗುಳ್ಯಾಂಕ್ ಬಲಿ ಜಾಲ್ಲ್ಯಾ ಏಕಾ ವಿದ್ಯಾರ್ಥಿಚಿ ಆಸ್ಪತ್ರೆಚ್ಯಾ ಖಟ್ಲ್ಯಾ ಥಾವ್ನ್ ಕಾಣಿ:
ಸೊಮಾರ್ ಏಪ್ರಿಲ್ ಸೊಳಾ ಸದಾಂಚೆಪರಿಂಚ್ ಉಟೊನ್ ಎಕ್ವೀಸ್ ವರ್ಸಾಂಚೊ ಕೊಲಿನ್ ಅಂತರ್ರಾಷ್ಟ್ರೀಯ್ ವಿಷಯಾಂಚೊ ವಿದ್ಯಾರ್ಥಿ ಆಪ್ಲ್ಯಾ ಚೊವ್ತ್ಯಾ ವರ್ಸಾಂಚೆಂ ಶಿಕಾಪ್ ವರ್ಜೀನಿಯಾ ಟೆಖಾಂತ್ ಮುಖಾರುನ್ ಆಸ್ಚೊ ಶಾಲಾಕ್ ಭಾಯ್ರ್ ಸರ್ಲೊ. ತಾಚಿ ಪ್ರಥಮ್ ಕ್ಲಾಸ್ ತ್ಯಾ ದಿಸಾ ಫ್ರೆಂಚ್ ಜಾವ್ನಾಸ್ಲ್ಲಿ ಆನಿ ನೋವ್ ಜಾವ್ನ್ ಪಾಂಚ್ ಮಿನುಟಾಂನಿ 911 ನೋರಿಸ್ ಹೊಲಾಂತ್ ಸುರು ಜಾಂವ್ಕ್ ಆಸ್ಲ್ಲಿ. ಪುಣ್ ಕೊಲಿನಾಚ್ಯಾ ಎಕಾ ಮಿತ್ರಾಚೆಂ ಕಾರ್ ಪಾಡ್ ಜಾಲ್ಲ್ಯಾನ್ ತೊ ತಾಕಾ ಹಾಡುಂಕ್ ವಚೊನ್ ಶಾಲಾಕ್ ವಚೊಂಕ್ ಮಾತ್ಸೊ ತಡವ್ ಜಾಲ್ಲೊ. ಮಿತ್ರಾಚೆಂ ಕಾರ್ ರಿಪೇರ್ ಕರುಂಕ್ ವೋಡ್ನ್ ವ್ಹೆಲ್ಯಾ ಉಪ್ರಾಂತ್ ತಾಣಿಂ ಚಿಂತ್ಲೆಂ ಕೀ ಪಯ್ಲಿ ಕ್ಲಾಸ್ ಚುಕಂವ್ಚಿ ಮ್ಹಣ್. ತರೀ ತೆ ವೇಳ್ ಜಾಲ್ಯಾರೀ ಪರ್ವಾನಾ ಮ್ಹಣ್ ಶಾಲಾಕ್ ಗೆಲೆ. ಕ್ಲಾಸಿಂತ್ ಸತ್ರಾ ಜಣ್ ವಿದ್ಯಾರ್ಥಿ ಆಸ್ಲ್ಲೆ, ಚಡ್ತಾವ್ ಅಂತರ್ರಾಷ್ಟ್ರೀಯ್ ವಿಶಯಾಂಚೆರ್ ಶಿಕಾಪ್ ಮುಂದರುನ್ ವ್ಹರ್ಚೆ ತಾಂಕಾಂ ಅಂತರ್ರಾಷ್ಟ್ರೀಯ್ ಭಾಸ್ ಘೆಂವ್ಕ್ ಆಸಾ ಜಾಲ್ಲ್ಯಾನ್ ತ್ಯಾ ಫ್ರೆಂಚ್ ಕ್ಲಾಸಿಕ್ ಭರ್ತಿ ಜಾಲ್ಲೆ. ಸಭಾರಾಂನಿ ತಿಚ್ ಕ್ಲಾಸ್ ಗೆಲ್ಯಾ ವರ್ಸಾಯ್ ಸಾಂಗಾತಾ ಘೆತ್ಲ್ಲಿ.
ಕೊಲಿನ್ ಆನಿ ತಾಚೊ ಮಿತ್ರ್ ಕುಡಾ ಭಿತರ್ ರಿಗ್ತಾನಾ, ತಾಂಕಾಂ ಸರಾಗ್ ಗುಳೆ ಸೊಡ್ಲ್ಲೆ ತಸಲೊ ಆವಾಜ್ ಆಯ್ಕಾಲೊ. ತೊ ಆವಾಜ್ ಪೆಲ್ಯಾ ಹೊಲಾ ಸೊಪ್ಯಾ ಥಾವ್ನ್ ಯೆತಾಲೊ, ವ ಪೆಲ್ಯಾ ಕ್ಲಾಸಿ ಥಾವ್ನ್ ತೆಂ ತಾಂಚ್ಯಾ ಖರ್ಯಾ ಗಮನಾಕ್ ಆಯ್ಲೆಂನಾ. ಕ್ಲಾಸಿಂತ್ಲಿ ಶಿಕ್ಷಕಿಂ ಮ್ಹಣಾಲಿ, "ಮ್ಹಾಕಾ ಸಾಂಗಾನಾಕಾತ್ ತೊ ಆವಾಜ್ ಗುಳ್ಯಾಂಚೊ ಮ್ಹಣ್" ಮ್ಹಣಾಲಿ ಜೋಯ್ಸ್ಲಿನ್ ನವ್ಯಾ ವಿದ್ಯಾರ್ಥಿಂಲಾಗಿಂ. ಆಮಿಂ ಸಾಂಗ್ಲೆಂ ತಿಕಾ "ತ್ಯಾ ವಿಶ್ಯಾಂತ್ ಕಾಂಯ್ ಫಿಕಿರ್ ಕರ್ಚಿ ಗರ್ಜ್ ನಾ ಮ್ಹಣ್." ಮ್ಹಣಾಲೊ ಕೊಲಿನ್ ನ್ಯೂಸ್ವೀಕ್ ಪ್ರತಿನಿಧಿಲಾಗಿಂ. "ಶಾಲಾಲಾಗಿಂ ಬಾಂದ್ಪಾಚೆಂ ಬರೆಂಚ್ ಕಾಮ್ ಜಾವ್ನ್ ಆಸ್ಲ್ಲೆಂ. ಸಭಾರ್ ತ್ಯಾ ಆವಾಜಾಕ್ ಆಪ್ಲೊ ನಿಷೇದ್ ಉತ್ರಾವ್ನ್ ಆಸ್ಲ್ಲೆ, ತಾಣಿಂ ಚಿಂತ್ಲೆಂ ಕೀ ತೊ ಆವಾಜ್ ಧರ್ಣ್ ಖೊಂಡ್ಚ್ಯಾ ಮೊಡ್ತೆಲಾಚೊ ಕೊಣ್ಣಾ ಮ್ಹಣ್." ಜೋಯ್ಸ್ಲಿನಾಕ್ ಬಾಗಿಲ್ ಉಗ್ತೆಂ ಕರ್ನ್ ಪಳೆವ್ಯಾಂ ಮ್ಹಣ್ ಭಗ್ಲೆಂ, "ಪುಣ್ ತಿಣೆಂ ತಕ್ಷಣ್ ತೆಂ ಬಾಗಿಲ್ ಬಂಧ್ ಕೆಲೆಂ ಆನಿ ತೊಂಡಾರ್ ಭಾರಿಚ್ ಭಿಂಯಾಚಿ ಛಾಯಾ ತಿಣೆಂ ದಾಖಯ್ಲಿ೦- ಆನಿ ತಿ ಮ್ಹಣಾಲಿ, 911 ಆಪಯಾ," ಮ್ಹಣಾಲೊ ಕೊಲಿನ್.
ಕೊಲಿನಾನ್ ಆಪ್ಲೆಂ ಸೆಲ್ಲ್ ಫೋನ್ ಭಾಯ್ರ್ ಕಾಡ್ಲೆಂ, ಆನಿ 911 ಬುತಾಂವ್ ದಾಂಬ್ಲೆ, ಅಸೆಂ ತೊ 911 ಚಾಲಕಾಲಾಗಿಂ ಜಾಲ್ಲಿ ಗಜಾಲ್ ಕಳಂವ್ಚೆಂ ಪ್ರಯತ್ನ್ ಆನಿ ಖಂಯ್ ಥಾವ್ನ್ ಉಲಯ್ತಾ ಮ್ಹಣ್ ಸಾಂಗೊನ್ ಆಸ್ಲ್ಲೊ. 911 ಚಾಲಕಾಕ್ ಉಲವ್ಣೆಂ ಸಾರ್ಕೆಂ ಸಮ್ಜಾನಾತ್ಲ್ಲೆಂ ಆನಿ ಕೊಲಿನ್ ಪರತ್ ಪರತ್ ಸಾಂಗ್ಲ್ಲೆಂಚ್ ಸಾಂಗೊನ್ ಸಮ್ಜಾಂವ್ಚೆಂ ಪ್ರಯತ್ನ್ ಕರುನ್ ಆಸ್ಲ್ಲೊ. ತ್ಯಾಚ್ ವೆಳಾರ್, ಹೆರ್ ವಿದ್ಯಾರ್ಥಿ ಕ್ಲಾಸಿಚ್ಯಾ ಮುಖ್ಲ್ಯಾ ದಾರ್ವಟ್ಯಾಕ್ ಕದೆಲಾಂ ಡೆಸ್ಕಾಂ ಆಡ್ ದವರ್ನ್ ಪಿಛಾರ್ ಕರುಂಕ್ ಪಳೆವ್ನ್ ಆಸ್ಲ್ಲೆ. ಕಿತೆಂ ಕೆಲ್ಯಾರೀ ತೆಂ ಬಾಗಿಲ್ ಪಿಛಾರ್ ಕರುಂಕ್ ವಿದ್ಯಾರ್ಥಿ ಸಲ್ವಾಲೆ. "ಉಪ್ರಾಂತ್ ಬಾಗ್ಲಾಚೆರ್ ಗುಳ್ಯಾಂಚೆ ಬುರಾಕ್ ಜಾವ್ನ್ ಯೆಂವ್ಚೆ ಪಳೆಲೆ," ಮ್ಹಣಾಲೊ ಕೊಲಿನ್. ಚೊ ಗುಳೆ ಮಾರ್ನ್ ಬಾಗಿಲ್ ಫುಟಂವ್ಚೆಂ ಪ್ರಯತ್ನ್ ಕರುನ್ ಆಸ್ಲ್ಲೊ. ಚೊ ತೆಂ ಬಾಗಿಲ್ ಗುಳೆ ಮಾರ್ನ್ ಉಗ್ತಾಂವ್ಕ್ ಪಳೆತಾನಾ ಹಾಂವ್ ಧರ್ಣಿರ್ ಪಡ್ಲೊಂ."
ಥೊಡ್ಯಾಚ್ಚ್ ಖಿಣಾಂ ಉಪ್ರಾಂತ್, ಚೊ ಕ್ಲಾಸಿಭಿತರ್ ರಿಗ್ಲೊ. ಕೊಲಿನ್ ನಿದ್ಲ್ಲ್ಯಾ ಕಡೆನ್ ಥಾವ್ನ್ ಕ್ಲಾಸಿಚೊ ಮುಖೆಲ್ ದಾರ್ವಾಟೊ ಸಾರ್ಕೊ ದಿಸಾನಾತ್ಲ್ಲೊ, ಪಯ್ಲ್ಯೆ ಪಾವ್ಟಿಂ ಕೊಲಿನಾನ್ ಹ್ಯಾ ಖುನಿಗಾರಾಚೆಂ ತೋಂಡ್ ಪಳೆಲೆಂ. "ತಾಣೆಂ ಬೂಟ್ಸ್ ಘಾಲ್ಲೆ, ಕಾಳೆಂ ಕಲ್ಸಾಂವ್ ಆನಿಂ ಧೊವೆಂ ಶರ್ಟ್. ಸರ್ವ್ ವಿದ್ಯಾರ್ಥಿ ಧರ್ಣಿರ್ ಪಡೊನ್ ಆಸ್ಲ್ಲೆ, ಆನಿ ತೊ ಶೀದಾ ಕ್ಲಾಸಿಂತ್ ಡೆಸ್ಕಾಂ ಮಧೆಂ ಮಧೆಂ ಚಲೊನ್ ಯೇವ್ನ್ ಘಡ್ಯೆನ್ ಘಡಿ ಲೋಕಾಚೆರ್ ಗುಳೆ ಸೊಡುಂಕ್ ಲಾಗ್ಲೊ. ತೊ ಕಿತೆಂಚ್ ಮ್ಹಣಾನಾತ್ಲ್ಲೊ. ತಾಣೆಂ ಕಿತೆಂಚ್ ವಿಚಾರುಂಕ್ ನಾ. ತೊ ಫಕತ್ ಗುಳೆ ಸೊಡ್ತಾಲೊ." 911 ಚಾಲಕ್ ಆಜೂನ್ ಸೆಲ್ಲ್ ಫೊನಾರ್ ಆಸ್ಲ್ಲೊ, ಆನಿ ಕೊಲಿನಾನ್ ಖುನ್ಯೆಗಾರಾಚೆಂ ಗಮನ್ ತಾಚೆಂ ಥಂಯ್ ಯೇನಾ ಜಾಂವ್ಚ್ಯಾಕ್, ಧರ್ಣಿರ್ ವೊಗೊಚ್ ರಾವ್ಲೊ. "ಹಾಂವ್ ಚಿಂತ್ತಾಂ ತಾಕಾ ಪೊಲಿಸಾಂನಿ ಸೆಲ್ಲ್ ಫೊನಾರ್ ಉಲಂವ್ಚೆಂ ಆಯ್ಕಾಲೆಂ ಜಾಯ್ಜಯ್," ಮ್ಹಣಾಲೊ ಕೊಲಿನ್. "ತಾಣೆಂ ಮ್ಹಜೆಲಾಗಿಂ ಆಸ್ಲ್ಲ್ಯಾ ಥೊಡ್ಯಾಂಚೆರ್ ಗುಳೆ ಸೊಡ್ಲೆ, ಮ್ಹಜೆ ವಿರೋಧ್ ಧಿಕ್ಕಾರ್ ಆಸ್ಲ್ಲ್ಯಾ ಏಕ್ಲ್ಯಾ ಚೆಡ್ವಾಚೆರ್ ತಾಣೆಂ ತಾಚ್ಯಾ ಪಾಟಿರ್ ಗುಳೆ ಮಾರ್ಲೆ. ತಕ್ಷಣ್ ಮ್ಹಾಕಾ ಭಾರಿಚ್ ವೇಗಾನ್ ಆಯಿಲ್ಲ್ಯಾ ವಾರ್ಯಾಚೊ ಭಾಸ್ ಜಾಲೊ ಆನಿ ಏಕಾಚ್ಛಾಣೆ ಪಾಂಯಾರ್ ಹುನ್ ಉದಾಕ್ ಪಡ್ಲ್ಲ್ಯಾಪರಿಂ ಜಾಲೆಂ." ಕೊಲಿನಾಕ್ ತಾಚ್ಯಾ ಪಾಂಯಾರ್ ಪಡ್ಲ್ಲ್ಯಾ ಗುಳ್ಯಾನ್ ರಗಾತ್ ಫಾಸ್ಳಾವ್ನ್ ಸೊಡ್ಲೆಂ ತರೀ ತೊ ಆಪುಣ್ ಮೆಲಾಂ ಮ್ಹಳ್ಳ್ಯಾಪರಿಂ ಥಂಯ್ಚ್ ಧರ್ಣಿರ್ ನಿದ್ಲೊ. "ಕೋಣ್ಂಚ್ ಏಕ್ಲೊ ಉಟೊನ್ ಆಪ್ಲೆಂ ಪರಾಕ್ರಮ್ ದಾಖಂವ್ಕ್ ಮುಖಾರ್ ಯೇಂವ್ಕ್ ನಾ," ತಾಣೆಂ ಮ್ಹಳೆಂ. ಉಪ್ರಾಂತ್ ಗುಳೆ ಮಾರ್ಚೆ ಬಂಧ್ ಜಾಲೆ.
ಕೊಲಿನಾಕ್ ಉಟೊನ್ ಹೆಣೆಂ ತೆಣೆಂ ಪಳೆವ್ಯಾಂ ಮ್ಹಣ್ ಭಾರಿಚ್ ಮನ್ ಜಾಲೆಂ. "ಹಾಂವೆ ಚಿಂತ್ಲೆಂ ತೊ ಆಜೂನ್ ಕ್ಲಾಸಿಂತ್ ಆಸಾ ಮ್ಹಣ್," ತತ್ಕ್ಷಣ್ ಪರತ್ ಗುಳ್ಯಾಂಚೆ ಆವಾಜ್ ಕಾನಾಂಕ್ ಆಪ್ಟಾಲೊ, ಪರತ್ ತ್ಯಾ ಸೊಪ್ಯಾರ್; ಹೆರ್ ಕಿತೆಂಚ್ ಆವಾಜ್ ತ್ಯಾ ಕ್ಲಾಸಿಂತ್ ಆಯ್ಕೊಂಕ್ ನಾ. ಥೊಡೆ ವಿದ್ಯಾರ್ಥಿ ಸೆಲ್ಲ್ ಫೊನಾ ಮುಖಾಂತ್ರ್ ಹೆರಾಂಚೊ ಸಂಪರ್ಕ್ ಕರುಂಕ್ ಪ್ರಯತ್ನ್ ಕರುನ್ ಆಸ್ಲ್ಲೆ, ಮ್ಹಣಾಲೊ ಕೊಲಿನ್. ಕೊಲಿನಾಕ್ ಆಪ್ಲ್ಯಾ ಸೆಲ್ಲ್ ಫೊನಾಚೆರ್ ೯೧೧ ಚಾಲಕಾಚೊ ತಾಳೊ ಆಯ್ಕಾಲೊ, ತಾಣೆಂ ತೆಂ ಸೆಲ್ಲ್ ಫೊನ್ ಥಂಯ್ಚ್ ಸೊಡ್ಲೆಂ ಆನಿ ಪಾಟಿಕ್ ಗುಳೊ ಲಾಗ್ಲ್ಲೆಂ ಕ್ರಿಸ್ತಿನಾ ಥಂಯ್ ಆಸ್ಲ್ಲೆಂ ತೆಂ ತಾಣೆಂ ಪಳೆಲೆಂ. "ಆಮಿ ಸರ್ವ್ ಧರ್ಣಿರ್ ಪಡೊನ್ ಆಸ್ಲ್ಲ್ಯಾಂವ್" ಕೊಲಿನ್ ಚಿಂತ್ತಾ ಕೀ ಭೋವ್ಶಾ ಧಾ-ಪಂದ್ರಾ ಮಿನುಟಾಂ. ತೆನ್ನಾಂ ತಾಕಾ ಚಡಿತ್ ಗುಳ್ಯಾಂ ಆವಾಜ್ ಬಾಯ್ರ್ ಜಾಂವ್ಚೊ ಆಯ್ಕಾಲೊ. ಉಪ್ರಾಂತ್ ಪೊಲಿಸ್ ಸೈರಾನ್. ಆನಿ ಅಕಾಂತಾಚಿ ಬೊಬಾಟ್.
ಏಕ್ಚ್ಚ್ ಪಾವ್ಟಿಂ ಕ್ಲಾಸಿಚೊ ಮುಖೆಲ್ ದಾರ್ವಾಟೊ ಖೊಟಾವ್ನ್ ಉಗ್ತಾಯ್ಲೊ ಆವಾಜ್ ಆಯ್ಕಾಲೊ, ಖುನ್ಯೆಗಾರ್ ಪರತ್ ಭಿತರ್ ಆಯಿಲ್ಲೊ. "ತೊ ಪರತ್ ಪಾಟಿಂ ಆಯ್ಲೊ ಆನಿ ಪರತ್ ಗುಳೆ ಮಾರುಂಕ್ ಸುರು ಕೆಲೆ." ನಿದ್ಲ್ಲ್ಯಾ ಸರ್ವಾಂಚೆರ್, ಏಕ್ ಪಾವ್ಟಿಂ ತ್ಯಾ ಕೂಸಿನ್ ತರ್ ಪರತ್ ಹ್ಯಾ ಕುಸಿನ್. ಚೊ ಕುಡಾಂತ್ ಸಗ್ಳ್ಯಾನ್ ಚಲೊನ್ ಆಯ್ಲೊ, ಪರತ್ ಗುಳ್ಯಾಂಚೊ ಆವಾಜ್. ಖುನ್ಯೆಗಾರ್ ಕೊಲಿನಾಲಾಗಿಂ ಆಯಿಲ್ಲೊಚ್ ಕೊಲಿನಾಕ್ ದೋನ್ ಗುಳೆ ಆಪ್ಲ್ಯಾ ಕೂಡಿಕ್ ರಿಗ್ಲ್ಲೆ ತೆಂ ಕಳಿತ್ ಜಾಲೆಂ, ಏಕ್ ಖಾಂದ್ಯಾರ್ ಆನಿ ದುಸ್ರೊ ಕೂಲ್ಯಾರ್. ಕೊಲಿನಾಚ್ಯಾ ಬಗ್ಲೆಚೊ ಎಕ್ಲೊ ಸವ್ಕಾಸ್ ದುಖಿಚೆ ಸುಸ್ಕಾರ್ ಕಾಡುನ್ ಆಸ್ಲ್ಲೊ. "ಮ್ಹಜೆಂ ಹರ್ಧೆಂ ಆನಿ ಅರ್ಧಿ ಕೂಡ್ ಎಕಾ ಡೆಸ್ಕಾ ಪಂದಾ ಆಸ್ಲ್ಲಿ, ತಶೆಂ ಜಾಲ್ಲ್ಯಾನ್ ಜಾಂವ್ಕ್ ಪುರೊ ತೊ ಏಕ್ ಗುಳೊ ಮ್ಹಜ್ಯಾ ಕುಲ್ಯಾರ್ ಪಡ್ಲೆ," ಮ್ಹಣಾಲೊ ಕೊಲಿನ್ ನ್ಯೂಸ್ವೀಕ್ ಪ್ರತಿನಿಧಿಲಾಗಿಂ.
ಕೊಲಿನಾಕ್ ಪರತ್ ಸಭಾರ್ ಗುಳ್ಯಾಂಚೆ ಆವಾಜ್ ಆಯ್ಕಾಲೆ. ಉಪ್ರಾಂತ್ ಆನ್ಯೇಕ್. ಉಪ್ರಾಂತ್ ಪರತ್ ಗುಳ್ಯಾಂಚೊ ಆವಾಜ್ ಬಂಧ್ ಜಾಲೊ. ಕೊಲಿನ್ ಆತಾಂ ಆಪ್ಲ್ಯಾ ಪೊಟಾರ್ ನಿದೊನ್ ಆಸ್ಲ್ಲೊ ಆನಿ ತೊ ಹಾಲ್ಲೊ ನಾ. ತಾಚೆ ಕುಸಿಕ್ ಏಕ್ ಪಡೊನ್ ಆಸ್ಲ್ಲಿ ಚಲಿ ಉಟೊನ್ ಹೆಣೆಂ ತೆಣೆಂ ಪಳೆಂವ್ಚಿ ದಿಸ್ಲಿ. ತಾಕಾ ಬಾಗ್ಲಾಲಾಗಿಂ ಬಡಂವ್ಚೊ ಆನಿ ಕಿಂಕ್ರಾಟ್ಚೊ ಆವಾಜ್ ಆಯ್ಕಾಲೊ: ತೆ ಪೊಲಿಸ್ ಜಾವ್ನಾಸ್ಲ್ಲೆ, ಫೊರ್ಸಾನ್ ಕ್ಲಾಸಿ ಭಿತರ್ ರಿಗೊಂಕ್ ಪ್ರಯತ್ನ್ ಕರುನ್ ಆಸ್ಲ್ಲೆ. ಬಾಗ್ಲಾಕ್ ಕಿತೆಂಗಿ ಆಡ್ ಆಸ್ಲ್ಲ್ಯಾಪರಿಂ ಕೊಲಿನಾಕ್ ಭಗ್ಲೆಂ, ಪುಣ್ ಪೊಲಿಸಾಂನಿ ರಭಸಾನ್ ಕ್ಲಾಸಿ ಭಿತರ್ ದಾಡ್ ಘಾಲಿ. ತಕ್ಷಣ್ ತಾಕಾ ಆಯ್ಕಾಲೊ ಆವಾಜ್, "ಖುನ್ಯೆಗಾರ್ ಧರ್ಣಿರ್ ಪಡ್ಲಾ! ಖುನ್ಯೆಗಾರ್ ಕಾಳೊ!" ಪೊಲಿಸ್ ಕ್ಲಾಸಿಂತ್ ಭರ್ಲೆ ಆನಿ ಥಂಯ್ ಧರ್ಣಿರ್ ಪಡ್ಲ್ಲ್ಯಾ ಹರ್ಯೆಕ್ಲ್ಯಾಕ್ ಪಳೆವ್ನ್ ಏಏಕಾ ರಂಗಾನ್ ಆಪಯ್ಲಾಗ್ಲೆ. ತೊ ರಂಗ್ ತಾಂಚಿ ಆವಸ್ಥಾ ಕಸಲ್ಯಾ ಸ್ಥಿತೆರ್ ಆಸಾ ತಾಚೆರ್ ಹೊಂದ್ವೊನ್ ಆಸ್ಲ್ಲೊ. "ಹಾಂವ್ ಹಳ್ದುವೊ ರಂಗಾಚೊ ಮ್ಹಳೆಂ ತಾಣಿಂ," ಥೊಡೆ ತಾಂಬ್ಡೆ, ಪಾಚ್ವೆ ಆನಿ ಕಾಳೆ. ಭೋವ್ಶಾ ಕಾಳೆ ಮ್ಹಳ್ಯಾರ್ ಮರಣ್ ಪಾವ್ಲ್ಲೆ, ಖುನ್ಯೆಗಾರ್ ಮರೊನ್ ಪಾವ್ಲ್ಲೊ. ಕೊಲಿನಾಚಿ ಟೀಚರ್ ಜೋಯ್ಸ್ಲಿನ್ಯ್ ಏಕ್ ಹಳ್ದುವಿ ಆಸ್ಲ್ಲಿ. ಕೊಲಿನಾಕ್ ಪೊಲಿಸಾಂನಿ ವೋಡ್ನ್ ಸೊಪ್ಯಾರ್ ಹಾಡ್ಲೊ, ತಸೆಂಚ್ ಸಭಾರ್ ಹೆರಾಂಕ್. ಸಭಾರಾಂಕ್ ಭಾಯ್ಲ್ಯಾ ತಣಾರ್ ನಿದಾಯಿಲ್ಲೆಂ. ವೈದ್ಯಕೀಯ್ ಕುಮ್ಕೆದಾರಾಂನಿ ಕೊಲಿನಾಚೆಂ ವಸ್ತುರ್ ಪಿಂಜ್ಲೆಂ ಆನಿ ಘಾಯ್ ತಪಾಸ್ಲೆ. ಹಾಂವ್ ತ್ಯಾ ಹಿಂವೆಂತ್ ಕುಲ್ಕುಲ್ತಾಲೊಂ, ಪಾಂಚ್ ಮಿನುಟಾಂ ಉಪ್ರಾಂತ್ ಕೊಣೆಂಗಿ ಮ್ಹಜ್ಯಾ ಆಂಗಾರ್ ಕಾಂಬೊಳ್ ರೆವ್ಡಾಯ್ಲಿ. ತಕ್ಷಣ್ ಕೊಲಿನಾಕ್ ಸರ್ಶಿಲ್ಯಾ ನ್ಯೂ ರಿವರ್ ವ್ಯಾಲಿ ಮೆಡಿಕಲ್ ಸೆಂಟರಾಕ್ ವ್ಹೆಲೆಂ. ತಾಕಾ ತೀನ್ ಕಡೆನ್ ಗುಳ್ಯಾಂನಿ ಮಾರ್ಲ್ಲೆಂ - ಖಾಂದ್ಯಾರ್, ಜಾಂಗ್ಳಾರ್ ಆನಿ ಕೂಲ್ಯಾರ್. ಶಸ್ತ್ರ್ ಚಿಕಿತ್ಸೆನ್ ಕೊಲಿನಾಕ್ ಲೊಂಕ್ಡಾ ಸರಳ್ ದವರ್ನ್ ಗೂಣ್ ಕರ್ಚ್ಯಾರ್ ಆಸಾತ್. ಬುಧ್ವಾರಾ ಏಪ್ರಿಲ್ ಅಟ್ರಾವೆರ್ ಕೊಲಿನಾಚಿ ಚಿಕಿತ್ಸಾ ಜಾಲಿ. "ಹಾಂವ್ ಆಜೂನ್ ನೆಣಾಂ ಚೊನ್ ಅಸೆಂ ಕಿತ್ಯಾಕ್ ಕೆಲೆಂ ಮ್ಹಣ್," ಮ್ಹಣಾಲೊ ಕೊಲಿನ್ ಪತ್ರ್ಕರ್ತಾಲಾಗಿಂ ಆಸ್ಪತ್ರೆಚ್ಯಾ ಖಟ್ಲ್ಯಾರ್ ಥಾವ್ನ್ ಉಲವ್ನ್.
ಚಿಕಿತ್ಸೆಕ್ ಆಸ್ಪತ್ರೆಕ್ ದಾಖಲ್ ಕೆಲ್ಲ್ಯಾ ಥೊಡ್ಯಾಚ್ ವೆಳಾನ್ ಕೊಲಿನಾನ್ ಆಪ್ಲ್ಯಾ ಆವಯ್ಕ್ ಫೊನ್ ಕೆಲೆಂ, ಆನ್ನ್ ರಿಚ್ಮಂಡಾಂತ್ ವಸ್ತಿ ಕರ್ತಾಲಿ. ದೋನ್ ಮಹಿನ್ಯಾಂ ಆದಿಂ ತಾಂಚೆಂ ಕುಟಾಮ್ ಆಟ್ಲಾಂಟಾ ಥಾವ್ನ್ ಥಂಯ್ಸರ್ ವಸ್ತೆಕ್ ಆಯಿಲ್ಲಿಂ. ತಿಣೆಂ ಕ್ರಿಶ್ಚನ್ ಚಿಲ್ಡ್ರನ್ಸ್ ಫಂಡ್ ಹ್ಯಾ ಸಂಸ್ಥ್ಯಾಂತ್ ಅಧ್ಯಕ್ಷಾಚೆಂ ಕಾಮ್ ಘೆತ್ಲ್ಲೆಂ. ವರ್ಜೀನಿಯಾ ಟೆಕಾಂತ್ ಗುಳೆ ಉಭೊನ್ ಆಸ್ತಾನಾ ಆನ್ ಆಪ್ಲ್ಯಾ ಫುಡ್ಲದ್ ಬೋರ್ಡ್ ಜಮಾತಿರ್ ಮಗ್ನ್ ಜಾವ್ನಾಸ್ಲ್ಲಿ. ಸೊಮಾರಾಚಿ ಸಕಾಳ್, "ಆಮಿಂ ಜಮಾತಿ ಉಪ್ರಾಂತ್ ಜೆವ್ಣಾಕ್ ಭಾಯ್ರ್ ಸರ್ಲ್ಯಾಂವ್, ತೆನ್ನಾಂ ಕೊಣೆಂಗಿ ಮ್ಹಳೆಂ ಮ್ಹಾಕಾ ಮ್ಹಜ್ಯಾ ಪುತಾಚೆಂ ಫೊನ್ ಆಸಾ ಮ್ಹಣ್. ಕೊಲಿನಾನ್ ಆವಯ್ಕ್ ಆಪಂವ್ಚೆಂ ಆಸ್ಲ್ಲೆಂ ಆಪ್ಣಾಕ್ ಬರೆ ಮಾರ್ಕ್ಸ್ ಮೆಳ್ಲ್ಲ್ಯಾ ವೆಳಾರ್ ಮಾತ್ರ್, ತಸೆಂ ಜಾಲ್ಲ್ಯಾನ್ ಆನಾನ್ ಚಿಂತ್ಲೆಂ ಕೀ ಕಾಂಯ್ ಬರಿ ಖಬಾರ್ ಆಸಾ ಮ್ಹಣ್. ಪುಣ್ ಮ್ಹಾಕಾ ಫೊನ್ ಆಸಾ ಮ್ಹಳ್ಳೆಂ ಚೆಡುಂ ತೋಂಡಾರ್ ಸಂತೊಸ್ ದಾಖಯ್ನಾಸ್ಲ್ಲೆಂ. ಹಾಂವ್ ಫೊನಾರ್ ಆಸ್ತಾನಾ ತ್ಯಾ ಚೆಡ್ವಾನ್ ವರ್ಜೀನಿಯಾ ಟೆಕಾಂತ್ ಜಾಲ್ಲ್ಯಾ ಖುನ್ಯೆಗಾರಾಚಿ ಖಬಾರ್ ಛಾಪ್ಲ್ಲಿ ಮ್ಹಜ್ಯಾ ಹಾತಿಂ ದಿಲಿ." ಮ್ಹಣಾಲಿ ಆನ್ ಪತ್ರಿಕಾ ಪ್ರತಿನಿಧಿಲಾಗಿಂ. "ಕೊಲಿನ್ ಮ್ಹಣಾಲೊ ತಾಕಾ ಗುಳೆ ಮಾರ್ಲ್ಯಾತ್ ಮ್ಹಣ್. ತೊ ಚಡಿತ್ ಉಲಯ್ಲೊ ನಾ, ತಕ್ಷಣ್ ಯೇ ಮ್ಹಣಾಲೊ." ತಿ ತಕ್ಷಣ್ ಘರಾ ಗೆಲಿ ಆನಿ ಪತಿ ಆಂಡ್ರುಕ್ ಸಾಂಗಾತಾ ವ್ಹರ್ನ್ ಗೆಲಿ. ವಾಟೆರ್ ಹೈಸ್ಕೂಲಾಂತ್ ಶಿಕ್ಚ್ಯಾ ಧುವೆಕ್ ಏಮ್ಮಾಕ್ಯ್ ಆಪವ್ನ್ ವ್ಹೆಲೆಂ. ರಿಚ್ಮಂಡ್ ವರ್ಜೀನಿಯಾ ರಾಜ್ಯಾಚಾ ಎಕಾ ಕುಸಿಕ್ ಜಾಲ್ಯಾರ್ ವರ್ಜೀನಿಯಾ ಟೆಕ್ ಬ್ಲ್ಯಾಕ್ಸ್ಬರ್ಗಾಂತ್ ಆನ್ಯೇಕಾ ಕೂಸಿಕ್. ಹಿ ಖಬಾರ್ ಆನ್ನಾಕ್ ದಫ್ತರಾಂತ್ ಮೆಳ್ತಾನಾ ಥಂಯ್ ಬೋರ್ಡ್ ಜಮಾತೆಕ್ ಆಯಿಲ್ಲ್ಯಾ ಎಕ್ಲ್ಯಾಲಾಗಿಂ ಖಾಸ್ಗಿ ವಿಮಾನ್ ಆಸ್ಲ್ಲೆಂ. ತಾಣೆಂ ಆಮ್ಕಾಂ ತಾಚ್ಯಾ ವಿಮಾನಾರ್ ಶೀದಾ ವರ್ಜೀನಿಯಾ ಟೆಕ್ ವಿಮಾನ್ ಥಳಾಕ್ ವ್ಹೆಲೆಂ." ಮ್ಹಣಾಲಿ ಕೊಲಿನಾಚಿ ಆವಯ್.
ತ್ಯಾ ದೋನ್ ಯಂತ್ರಾಂಚ್ಯಾ ವಿಮಾನಾರ್ ಆಂಡ್ರು, ಆನ್ ಆನಿ ಏಮ್ಮಾಕ್ ಭಾರಿಚ್ ಕಷ್ಟಾಂಚೆಂ ಪಯ್ಣ್ ಜಾಲೆಂ. ಕೊಲಿನಾಚಿ ಸಂಗತ್ ಆಯ್ಕೊನ್ ತಾಂಕಾಂ ಖರೋಖರ್ ವಿರ್ಯಾರ್ ಜಾಲ್ಲೆಂ. "ಮ್ಹಜ್ಯಾ ಜಲ್ಮಾಂತ್ಚ್ಚ್ ಭಾರಿಚ್ ಭಿಂಯಾಚೆ ಪಯ್ಣ್ ಹೆಂ ಜಾವ್ನಾಸ್ಲ್ಲೆಂ," ಮ್ಹಣಾಲಿ ಆನ್ ಉಲಯ್ತಾನಾ. ತಾಂಚಿ ಧುವ್ ಆವಯ್ಕ್ ಪಯ್ಣಾರ್ ಸಮಾಧಾನೆನ್ ರಾವೊಂಕ್ ಮ್ಹಣ್ ಏಕ್ ಗಾಯನ್ ಗಾಂವ್ಕ್ ವೊತ್ತಾಯ್ ಕರುನ್ ಆಸ್ಲ್ಲೆಂ. ಹ್ಯಾ ಕುಟ್ಮಾಕ್ ಹ್ಯಾ ಖುನ್ಯೆ ವಿಶ್ಯಾಂತ್ ಥೊಡಿಚ್ ಮ್ಹಾಹೆತ್ ಆಸ್ಲ್ಲಿ. ವಿಮಾನ್ ಪಯ್ಣಾರ್ ತಾಂಕಾಂ ಕಿತೆಂಚ್ ಚಡಿತ್ ಆಯ್ಕೊಂಕ್ ಮೆಳೊಂಕ್ ನಾ. ಪಯ್ಣ್ ಸಂಪವ್ನ್ ವಿಮಾನ್ ಥಳಾರ್ ದೆಂವ್ತಚ್ ಚಲೊನ್ ವೆತಾನಾ ವಾಟೆರ್ ಮೆಳ್ಲ್ಲ್ಯಾ ಪೊಲಿಸಾಂನಿ, "ಶೆಂಬೊರಾಂನಿ ಪೊಲಿಸಾಂಕ್ ಪಳೆವ್ನ್ ಕಾಂಯ್ ಘಡ್ಬಡ್ನಾಕಾತ್, ಸಮಾಧಾನೆನ್ ಮುಖಾರ್ ವಚಾ," ಮ್ಹಣ್ತಾನಾ ಆನಾಕ್ ಖರಿ ಗಜಾಲ್ ಮತಿಕ್ ಗೆಲಿ, "ತೆನ್ನಾಂ ಕಳ್ಳೆಂ ಮ್ಹಾಕಾ ಹಿ ಖುನಿ ಖಂಚ್ಯಾ ಮಾರೆಕಾರ್ ವಿಷಯಾಚಿಗೀ ಮ್ಹಣ್" ಮ್ಹಣಾಲಿ ಆನ್.
ತಾಂಕಾಂ ವಿಮಾನ್ ಥಳಾ ಥಾವ್ನ್ ಶೀದಾ ಆಸ್ಪತ್ರೆಕ್ ವ್ಹೆಲೆಂ ಆನಿ ಕೊಲಿನಾಕ್ ಪಳೆಂವ್ಕ್ ಸೊಡ್ಲೆಂ. ಆಂಡ್ರು, ಆಫ್ರಿಕಾಂತ್ ಕಾಮ್ ಕರುನ್ ಆಸ್ಲ್ಲೊ ಅಸಲ್ಯಾ ಗುಳ್ಯಾಂಕ್ ಬಲಿ ಜಾಲ್ಲ್ಯಾಂಕ್ ಸದಾಂಚ್ ಪಳೆವ್ನ್ ಆಸ್ಲ್ಲೊ. ತಾಣೆಂ ಆನಾಕ್ ಆನಿ ಧುವ್ ಏಮ್ಮಾಕ್ ಸಮಾಧಾನೆನ್ ಭಿತರ್ ವ್ಹೆಲೆಂ. ಕೊಲಿನ್ ಖಟ್ಲ್ಯಾರ್ ವಿಶೇಷ್ ರಿತಿನ್ ದಿಸ್ತಾಲೊ. ಹೆಣೆಂ ತೆಣೆಂ ತಾಚ್ಯಾ ಕುಡಿರ್ ಬಾಂಧುನ್ ಘಾಲ್ಲೆಂ. ಕುಲ್ಯಾರ್ ಪಡ್ಲ್ಲೊ ಗುಳೊ ಪಾಶಾರ್ ಜಾಂವ್ಕ್ ನಾ ಜಾಲ್ಲ್ಯಾನ್ ದುಸ್ರ್ಯಾ ದಿಸಾ ಶಸ್ತ್ರ್ ಚಿಕಿತ್ಸಾ ಮಾಂಡುನ್ ದವರ್ಲ್ಲಿ. ಕೊಲಿನಾಚ್ಯಾ ಕುಟ್ಮಾಕ್ ಸಂಸಾರಾಂತ್ಲ್ಯಾ ಕೊನ್ಶಾಂ ಥಾವ್ನ್ ವೀಜ್ ಪತ್ರಾಂ, ಫೊನಾಂ ಯೆತಾಲಿಂ, ಕಿತೆಂಯ್ ಕುಮಕ್ ದೀಂವ್ಕ್ ತಯಾರ್ ಮ್ಹಣ್. ಹೆಂ ಸರ್ವ್ ತಾಂಕಾಂ ವಿಶೇಷ್ ಭುಜಾವಣ್ ದೀಂವ್ಕ್ ಪಳೆತಾನಾ ಆಪ್ಲೊ ಪುತ್ ಆಜೂನ್ ಜೀವ್ ಆಸಾ ತೆಂ ಚಿಂತುನ್ ತಾಣಿಂ ತಾಂಕಾಂಚ್ ಸಮಾಧಾನ್ ಕೆಲೆಂ. ಜರ್ ಕೊಲಿನ್ ಕ್ಲಾಸಿಕ್ ವೇಳ್ ಜಾಲೊ ಮ್ಹಣ್ ತಡವ್ ಕರುನ್ ಗೆಲ್ಲೊ ಜಾಲ್ಯಾರ್ ಚೊಚ್ಯಾ ಗುಳ್ಯಾಂಕ್ ಬಲಿ ಜಾತೊ ನಾ. ಆನಾಕ್ ಪುತಾಚೆರ್ ಅಭಿಮಾನ್ ಭೊಗ್ಲೊ; ಕಿತ್ಯಾ ತೊ ಆತಾಂ ಗುಳೆ ಲಾಗೊನ್ ಖಟ್ಲ್ಯಾರ್ ಆಸಾ ಜಾಲ್ಯಾರೀ ತಾಣೆಂ ಕ್ಲಾಸ್ ಚುಕಂವ್ಕ್ ನಾತ್ಲ್ಲಿ.
-ಓಸ್ಟಿನ್ ಪ್ರಭು, ಚಿಕಾಗೊ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed, hosted and maintained by Ashawadi Publications
