ಚಾಮ್ಡ್ಯಾಚ್ಯೊ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ

ಕವಿತಾಪಾಠ್ - 21

ಚಾಮ್ಡ್ಯಾಚ್ಯೊ ವ್ಹಾಣೊ - ಸನ್ನು ಮೊನಿಜ್

ಸನ್ನು ಮೊನಿಜ್

ತ್ಯೊ..

ತುಟ್ಲೆಲ್ಯೊ ’ಚಾಮ್ಡ್ಯಾಚ್ಯೊ ವ್ಹಾಣೊ’ ವರುನ್ ಪರತ್

ತ್ಯಾಚ್ ಚಾಮ್ಗಾರಾಲಾಗಿಂ ಗೆಲ್ಲೊಂ

ತೊ..

ಗೆಲೆತ್ಯಾ ಪಾವ್ಟಿಂಚ್ ಸಮಾ ಕರುಂಕ್ ನೆಗಾರ್ಲೊಲೊ

ಹಾಂವ್..

ಅರೇ ಚಾಮ್ಗಾರಾ

ಧಾಂವ್ ಮ್ಹಜಿ ಪಿರಾಯೆಕ್ ಭರ್‍ಲ್ಯಾ

ಅಟ್ರಾ ಉತ್ರೊನ್ ಎಕುಣಿಸಾಕ್ ಪಾವ್ಲಾಂ

ಅಶಿರ್ ಬಾವ್ಳ್ಯಾಂಚಾ ತಕ್ಲೆಂತ್ ಮ್ಹಜ್ಯಾ

ಕಾಜಾರ್ ಕರ್ಚೆಂ ವ್ಹೊಜೆಂ ಚಡ್ಲಾಂ..!

ಮಾರ್ರೆ ಬಾಬಾ.. ತುಟ್ಲ್ಯಾ ಚಾಮ್ಡ್ಯಾ ವ್ಹಾಣ್ಯಾಕ್ ಏಕ್ ಖಿಳೊ..!

ಚೆಡ್ವಾಕ್ ಮ್ಹಜ್ಯಾ ಸೈರಿಕ್ ಸೊಧ್ಚಾಕ್ ಹಾಂವ್ ಲಾಗ್ಲಾಂರೆ

ಗಿರೇಸ್ತಾಂಕ್ ಆಮ್ಚೆಂ ಪಾಕೆಂ ಕಾಂಯ್ ಸೊಭಾನಾರೆ

ಕೊಲ್ವಾ ಪಾಕ್ಯಾಕ್ ನಳೆ ಕಶೆಂ ಚಡಂವ್‌ರೆ

ಪಾಕ್ಯಾಕ್ ನಳೆ ಘಾಲ್ಯಾರ್ ಕಾಜಾರ್ ಕಶೆಂ ಕರುಂರೆ..

ಮಾರ್ರೆ ಭಾವಾ ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣ್ಯಾಕ್ ಏಕ್ ಖಿಳೊ.!

ಅಳೆಗಾ ಚಾಮ್ಗಾರಾ ಧುವೆಕ್ ಮ್ಹಜ್ಯಾ ಭಾಂಗಾರಾಪರಿಂ ಪೊಸ್ಲಾಂ

ತರೀ ಭಾಂಗಾರ್ ವಿಚಾರ್ಚ್ಯಾ ಸೈರಿಕೆಕ್ ಆಯ್ಕೊನ್ ಶೆರ್ಮೆಲಾಂ

ಧುವ್ ಮ್ಹಜಿ ಲಾಖಾಂತ್ ಏಕ್ ಗುಣಾಂತ್ ’ಮರಿ ಮಾಂಯ್’

ಆಸಾ ತರ್ ಬರಿ ಏಕ್ ಹೆಳ್ಕಿ. ಘಡ್ಯೆನ್ ಮ್ಹಾಕಾ ಕಳಯ್

ಮಾರ್ರೆ ಬಾಬಾ ತುಜ್ಯಾ ಚಾಮ್ಡ್ಯಾ ವ್ಹಾಣ್ಯಾಕ್ ಏಕ್ ಖಿಳೊ..!

ನವೆ ಕಿತ್ಯಾಕ್ ಘೆನಾಂಯ್ ಮ್ಹಣ್ ಶಿಣಾನಾಕಾ.

ನವೆ ಹಾವೆಂ ವರ್ಸಾಂಧಿಂ ಘೆತ್ಲ್ಯಾತ್ ಕಂಲ್ಬೆಂತ್ ಪಿಛಾರ್ ಕೆಲ್ಯಾತ್

ಕಾಂಯ್ ತೀಸ್ ರುಪಯ್ ವಾಟ್ಲಾತ್ ತಾಂಕಾಂ

ಧುವೆಚ್ಯಾ ಕಾಜಾರಾಕ್ ಮ್ಹಣ್ ರಾಕೊನ್ ದವರ್ಲ್ಯಾತ್

ಆತಾಂ ತರೀ

ಮಾರ್ರೆ ಬಾಬಾ ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣಾಂಕ್ ಏಕ್ ಖಿಳೊ..!

ಕವಿತಾಪಾಠ್‌ಚೆರ್ ಕೆಲ್ಲಿಂ ಅಧ್ಯಯನ್ ಲೇಕನಾಂ ಬುಕಾರುಪಾರ್ ಪರ್ಗಟ್ ಜಾಲ್ಯಾಂತ್

ಆಧ್ಲ್ಯಾ ಕವಿತಾಪಾಠಾಂಚೊ ವಿವರ್

ಕುವೆಯ್ಟಾಂತ್ಲಿಂ ವೆವೆಗ್ಳಿಂ ಕಾಮಾಸಾಳಾಂ

’ಕವಿತಾ ಮ್ಹಳ್ಯಾರ್ ಕಿತೆಂ?’ ಮ್ಹಳ್ಳೆಂ ಆಮಿಂ ಸಮ್ಜೊಂಕ್ ಸಕ್ತಾಂವ್. ಎಕಾ ಉತ್ರಾನ್ ಹ್ಯಾ ಸವಾಲಾಕ್ ಜಾಪ್ ಸೊಧುಂಕ್ ಜಾಯ್ನಾ. ಕವಿತಾ ಕೊಣಾಕ್ ಕಾಳ್ಜಾಚೊ ಉಲೊ ತರ್ ಕೊಣಾಕ್ ಚಿಂತ್ಪಾಚಿ ಅಭಿವ್ಯಕ್ತಿ ತರ್ ಅನಿ ಕೊಣಾಕ್ ಜಿಣ್ಯೆಲಿಸಾಂವ್. ಕೆದ್ನಾಂ ಹಿ ಮಿಸ್ತೆರ್ ಜಾತಾ ತರ್‌ಯೀ ಕವಿಂಕ್ ಮಾತ್ ಕೆದ್ನಾಂಯ್ ಕವಿತಾ ಏಕ್ ಭಳ್ವಂತ್ ಹಾತೆರ್.

ಆತಾಂ ’ಕವಿ ಮ್ಹಳ್ಯಾರ್ ಕೊಣ್?’ ಮ್ಹಳ್ಳೆವಿಶಿಂ ಎಕೊಡೊ (ಮಟ್ವೊ) ನಿಯಾಳ್ ಕರುಂಕ್ ವೆಚೆಂ ತರ್. ಕವಿ ಕಾಂಯ್ ಸರ್ಗಿಂ ಥಾವ್ನ್ ದೆಂವೊನ್ ಆಯಿಲ್ಲೊ ಜಾಂವ್, ಧರ್ತೆ ಥಾವ್ನ್ ಉಟೊನ್ ಆಯಿಲ್ಲೊ ಕಾಂಯ್ ನ್ಹಂಯ್. ತೆಚ್ಚ್ ಕುಡಿ ಅತ್ಮ್ಯಾಚೊ, ತೆಚ್ಚ್ ಮಾಸಾ ರಗ್ತಾಚೊ, ತೆಚ್ಚ್ ದೊಳೆ, ತೆಂಚ್ ಮನ್ಶಾ ರೂಪ್, ತೆಂಚ್ ಉಲಂವ್ಚೆಂ ತೋಂಡ್ ಆನಿ ತಿಚ್ಚ್ ಆಟವ್ ಕರ್ಚಿ ತಕ್ಲಿ ಆಸ್ಚೊ ತರ್‌ಯೀ ಕವಿ ವೆಗ್ಳೊ, ತಾಚಿಂ ಭಗ್ಣಾಂ ವೆಗ್ಳಿಂ, ತಾಚಿ ನದರ್ ವೆಗ್ಳಿ, ತಾಚಿಂ ಚಿಂತ್ನಾಂ ವೆಗ್ಳಿಂ, ತಾಣೆಂ ಜಿಯೆಂವ್ಚೊ ಸಂಸಾರ್ (ಬೌತಿಕ್ ಸಂಸಾರ್ ನ್ಹಂಯ್) ವೆಗ್ಳೊ.

ಸಂಸ್ರಾಂತ್ ಕವಿಂಚಿ ಚರಿತ್ರಾ ಉಸ್ತುಂಕ್ ಗೆಲ್ಯಾರ್ ಮಾರ್ಮಿಕ್ ಸತ್ ಉಗ್ಡಾಪೆಂ ಜಾತೆಲೆಂ - ಆನಿ ತೆಂ ಜಾವ್ನಾಸಾ, ತೆಂ ಹಾಂಗಾ ಸವಿಸ್ತಾರ್ ಜಾವ್ನ್ ಸಾಂಗ್ಚಿ ಗರ್ಜ್ ಮ್ಹಣ್ ದಿಸಾನಾ ತರ್‌ಯೀ ಮಟ್ವ್ಯಾನ್ ಉಲ್ಲೇಕ್ ಕರಿಜಾಯ್‌ಚ್.

ಆದಿಂ ಮಾಗಾ ಕವಿಂಕ್ ಆಸ್ತಾನಾಂತ್ ಜಾಗೊ ದೀವ್ನ್ ಪೊಸ್ತಾಲೆ ಕಂಯ್ ರಾಯ್-ಚಕ್ರವರ್ತಿ. ಅಪ್ಲ್ಯಾ ರಾಜ್ವಟ್ಕೆಕ್ ವಾಕಣ್ಣುಂಕ್. ಜೊ ಕೊಣ್ ವಿಶಿಷ್ಟ್ ರಿತಿನ್ ವಾಖಣ್ತಾ ತಸ್ಲ್ಯಾಂಕ್ ಜೊಕ್ತೊ ಮಾನ್ ಪುರಸ್ಕಾರ್ ತಶೆಂಚ್ ಧನ್ ದವ್ಲತ್ ಲಾಭ್ಲ್ಯಾ. ಕೊಣೆ ಅಸಲ್ಯಾ ಕವಿಂಚಾ ನಾಂವಾರ್ ಗಾಂವ್ ಅರ್ಪಿಲಾ ತರ್ ಕೊಣೆ ಅಸಲ್ಯಾ ಕವಿಂಚ್ಯಾ ಉಡಾಸಾರ್ ಪುತ್ಳ್ಯೊ ರಚ್ಲ್ಯಾತ್. ಕೊಣೆಂ ಅಸಲ್ಯಾ ಕವಿಂಚಾ ಉಡಾಸಾನ್ ಬಿರುಧಾಂ ವಾಂಟ್ಲ್ಯಾಂತ್. ತರ್‌ಯೀ ಕವಿ ಮ್ಹಳ್ಯಾರ್ ಹೆಚ್ಚ್ ನ್ಹಂಯ್. ಮ್ಹಜೆ ಪ್ರಕಾರ್ ಹೆ ಕವಿಚ್ಚ್ ನ್ಹಂಯ್.

ತರ್ ಕವಿ ಕೊಣ್?

ಕವಿ ಮ್ಹಳ್ಯಾರ್ ಆಪ್ಲ್ಯಾ ಜಿಣ್ಯೆಂತ್‌ಚ್ಚ್ ಹೆರಾಂಚಿ ಜಿಣಿ ಭೊಗ್ಚೆ. ಕವಿ ಮ್ಹಳ್ಯಾರ್ ದೆಖ್ಚೆ. ತಜ್ವೀಜ್ ಕರ್ನ್, ವೊರಾವ್ನ್ ದೆಖ್ಚೆ, ಕೊಣಾಕೀ ದಿಸಾನಾಸ್ಚೆಂ ದೆಖ್ಚೆ. ಕೊಣಾಕೀ ರುಚಾನಾಸ್ಚೆಂ ಲಿಖ್ಚೆ. ಮಾಫ್ ಕರಾ - ಹೆಂ ಕಾಂಯ್ ತುಮ್ಕಾಂ ಅಥ್ವೆಂಚ್ ದಿಸೊಂಕ್ ಪುರೊ. ಜಾಣಾರ್‍ಯಾಂಚಿ ಏಕ್ ಸಾಂಗ್ಣಿ ತುಮಿ ಆಯ್ಕೊಂಕ್ ಪುರೊ; ’ಸತ್ ಕೊಡು ಜಾವ್ನಾಸಾ’ - ಮ್ಹಳ್ಯಾರ್ ಕಿತೆಂ? ಕೊಣೆಂಯ್ ಹೆಂ ಸತ್ ಚಾಕೊನ್ ಪಳೆಲಾಂ? ಕಿತೆಂ ಹ್ಯಾ ಸಬ್ಧಾಚೊ ಅರ್ಥ್? ಸತ್ ಕೊಡು ಮ್ಹಳ್ಯಾರ್ ಕೊಣಾಕ್‌ಚ್ ರುಚಾನಾತ್‌ಲ್ಲೆಂ. ಆನಿ ಕವಿ ಜೆದ್ನಾಂ ಸತ್ ಉಲಯ್ತಾತ್ - ತೆಂಯ್ ಕೊಡುಚ್ ಆಸ್ತಾ. ಕೊಣಾಕ್‌ಚ್ ರುಚಾನಾ.

ಆಮಿ ದಾಖ್ಲೆ ಘೆವ್ಯಾಂ; ಟರ್ಕಿಚ್ಯಾ ಕವಿ ನಜೀಮ್ ಹಿಕ್ಮತಾಕ್ ಸರ್ಕಾರಿ ಧೋರಣಾಂ ವಿರೋದ್ ಲಿಖ್‌ಲ್ಲ್ಯಾಕ್ ಅಪ್ಲೊಚ್ಚ್ ದೇಸ್ ಸೊಡ್ನ್ ಧಾಂವ್ಡಾಯ್ಲೊ. ತೊ ರಶ್ಯಾಕ್ ಪೊಳ್ನ್ ಧಾಂವ್ಲೊ. ಪುಣ್ ವಿಪರ್ಯಾಸ್ ಖಂಚಿಗೀ ಮ್ಹಳ್ಯಾರ್ ವಿಶ್ವ್-ಶಾಂತೆಚೊ ನೋಬೆಲ್ ಪುರಸ್ಕಾರ್ ಹಾಕಾ ಫುಡೆಂ ಲಾಭ್ಲೊ. ಇರಾಕಾಚಾ ಎಕಾ ಕವಿಕ್ ಸರ್ಕಾರಿ ಧೋರಣಾಂಕ್ ವಿರೋದ್ ಬರಯಿಲ್ಲ್ಯಾಕ್ ತಾಚಾ ಹಾತಾಚ್ಯೊ ದೊನೀ ಮುಟಿ ಕಾತರ್ಲ್ಯೊ. ತರೀ ತಾಣೆಂ ಅಪ್ಲ್ಯಾ ಹಾತಾಂತ್ ದೆಂವ್ಚೆಂ ರಗಾತ್ ಅಪ್ಲ್ಯಾ ಕಪಲಾಕ್ ಪುಸುನ್ ತಾಂಕಾಂ ಜಾಪ್ ದಿಲಿ "ಮ್ಹಜಿ ಮೂಟ್ ಖಾತಾರ್ಲ್ಯಾರೀ, ಮ್ಹಜೆಂ ರಗಾತ್ ಕವಿತಾಚ್ ಉಲಯ್ತಾ" ಮ್ಹಣೊನ್ ಅಪ್ಲ್ಯಾ ಕಪಲಾಚೆರ್ ತಾಚೆಂ ರಗಾತ್ ಪುಸ್ಲೆಂ. ಅಖ್ರೇಕ್ ಸರ್ಕಾರಾನ್ ತಾಕಾ ಪರ್ಗಟ್ ರಿತಿನ್ ಫಾತ್ರಾಂವ್ಕ್ ಫರ್ಮಾಯ್ಲೆಂ - ತಾಕಾ ಎಕಾ ಜಾಗ್ಯಾರ್ ಭಾಂದುನ್ ಘಾಲ್ನ್, ತೆಣೆಂತ್ಲ್ಯಾನ್ ಪಾಶಾರ್ ಜಾಂವ್ಚಾ ಹರ್‍ಯೆಕ್ಲ್ಯಾನ್ ತಾಕಾ ಫಾತ್ರಾನ್ ಮಾರಿಜಾಯ್, ಜೊ ಕೋಣ್ ಮಾರಿನಾ ತಾಕಾ ಕಯ್ದ್ ಕರ್ತೆಲ್ಯಾಂವ್ ಮ್ಹಳ್ಳಿ ಆಜ್ಞಾ ದಿಲಿ.

ಹೆಂ ಸರ್ವ್ ಸರ್ಕಾರಾ ವಿರೋದ್ ಆವಾಜ್ ಉಟಯಿಲ್ಲ್ಯಾಕ್ ನ್ಹಂಯ್. ಹೆಂ ಸರ್ವ್ ಸತ್ ಆಸ್ಚೆಂ ಆಸ್ಚೆಪರಿಂ ಲಿಖ್‌ಲ್ಲ್ಯಾಕ್.

ಸಂಸ್ರಾಕ್‌ಚ್ ಕಿತ್ಯಾಕ್ ಆಮ್ಚ್ಯಾಚ್ ದೇಶಾಂತ್ ಆತಾಂ ಪಳೆವ್ಯಾಂ - ಆಮ್ಚಾ ದೇಶಾಂತ್ ರಬೀಂದ್ರನಾಥ್ ಟಾಗೋರಾಕ್ ಮಹಾನ್ ಕವಿ ಮ್ಹಣ್ ಮಾಂಧ್ತಾತ್. ತಾಣೆಂ ಬರಯಿಲ್ಲೆಂ ಸರ್ವ್ ಕಾವ್ಯೆಂ ಮ್ಹಣ್ಚೆ ಪಂಡಿತ್‌ಯೀ ಧಾರಾಣ್ ಮಾಪಾನ್ ಆಸಾತ್. ತರ್‌ಯೀ ಸಭಾರ್ ಕವಿತೆಚೆ ಪಂಡಿತ್ ವಾದ್ ಮಾಡ್ತಾತ್ - ಆಮ್ಚಾ ದೇಶಾಂತ್ ಜಲ್ಮೊನ್ ಆಯಿಲ್ಲ್ಯಾ ಉಂಚ್ಲ್ಯಾ ಕವಿಂ ಪಯ್ಕಿ ಎಕ್ಲೊ ಜಾವ್ನಾಸಾ ಸಾಹಿರ್ ಲುಧ್ಯಾನ್ವಿ. ಸಾಹಿರ್ ಲುಧ್ಯಾನ್ವಿ ಭಾರತಾಂತ್ ಜಲ್ಮಾಲ್ಲೊ ತರ್‌ಯೀ ದೇಸ್ ವಾಂಟೊ ಜಾತೆಚ್ಚ್ ಕರಾಚಿ ಗೆಲ್ಲೊ ಥಂಯ್ಚಾ ಎಕಾ ದಿಸಾಳ್ಯಾಚೊ ಸಂಪಾದಕ್ ಜಾವ್ನ್ ಆಸ್ಚೆ ವೆಳಾರ್, ತಾಣೆಂಯ್ ಸರ್ಕಾರಾ ವಿರೋದ್ ಬರಂವ್ಕ್ ಗೆಲ್ಲ್ಯಾಕ್ ತಾಕಾ ಜಿವ್ಶಿಂ ಮಾರುಂಕ್ ಸರ್ಕಾರಾನ್ ಹುಕುಮ್ ದಿಲ್ಲಿಚ್ಚ್, ತೊ ಬೊಂಬೊಯ್ ಧಾಂವೊನ್ ಆಯಿಲ್ಲೊ. ಹಿ ಪರಿಗತ್ ಸತ್ ಉಚಾರ್ತೆಲ್ಯಾಂಚಿ.

ರಬೀಂದ್ರನಾಥ್ ಟಾಗೊರಾನ್ ಕಿತೆಂ ಕೆಲೆಂ? ಜಣಗಣಮನ ಪದಾಚೊ ಖರೊ ಮತ್ಲಬ್ ಕಸ್ಲೊ? ಹೆಂ ಕೊಣಾಕ್ ಫುಗಾರ್ನ್ ಬರಯಿಲ್ಲೆಂ ಕಾವ್ಯೆಂ? ರಭೀಂದ್ರನಾಥ್ ಟಾಗೊರಾಕ್ ಪ್ರತಿಭಾ ಜರೂರ್ ಆಸ್ಲಿ. ಪ್ರತಿಭಾ ನಾಸ್ತಾಂ ತೊ ಇತ್ಲೊ ಮಹಾನ್ ಜಾಲ್ಲೊ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ ಭಿಲ್ಕುಲ್ ನ್ಹಂಯ್, ಹಾವೆಂ ಮ್ಹಜೆಂ ಅಧ್ಯಯನ್ ಸುರು ಕರ್ತಾನಾ ತಾಚಿಂ ಗೀತಾಂಜಲಿ ಬುಕಾಂತ್ಲಿಂ ಸರ್ವ್ ಕವಿತಾ ವಾಚ್ಲ್ಯಾಂತ್ ತಶೆಂಚ್ ಸಾಹಿರ್ ಲುಧ್ಯಾನ್ವಿಚಿಂಯ್ ಕವಿತಾ ಅಧ್ಯಯನ್ ಕೆಲ್ಯಾಂತ್. ಹ್ಯಾ ದೋನ್ ಕವಿಂ ಮಧೆಂ ಹಾವೆಂ ತಫಾವತ್ ಪಳೆಲಾ - ಟಾಗೋರ್ ಚಡಾವತ್ ಜಾವ್ನ್ ಹೊಗ್ಳಿಕ್ ದಿಂವ್ಚಿಂ, ಭಕ್ತ್ ಉಚಾರ್ಚಿಂ, ಅಲಂಕಾರಾಚಿಂ, ಪ್ರಾಸಾಚಿಂ ಕವಿತಾ ಬರಯ್ತಾಲೊ ತರ್ ಸಾಹಿರ್ ಲುಧ್ಯಾನ್ವಿಚಿಂ ಕವಿತಾ ಆಕ್ರೋಶಾಚಿಂ, ಬಂಡಾಯಾಚಿಂ ಆನಿ ಕಠೀಣ್ ನಿರಾಶಾವಾದೆಚಿಂ. ದೊಗಾಂ ಮಧೆಂ ಜಾಯ್ತೊ ಕಾಳಾಚೊ ತಫಾವತ್ ಆಸಾ. ಟಾಗೋರ್ ಬ್ರಿಟಿಶಾಂಚಾ ಕಾಳಾಚೊ ತರ್ ಸಾಹಿರ್ ಲುಧ್ಯಾನ್ವಿ ಬ್ರಿಟಿಶಾಂನಿ ಭಾರತ್ ಸೊಡ್ನ್ ಗೆಲ್ಲ್ಯಾ ಉಪ್ರಾಂತ್ಲೊ.

ಹಾಂಗಾಸರ್ ಆಮಿಂಯ್ ವಾದ್ ಮಾಡ್ಯೆತಾ - ನಿರಾಸ್‌ವಾದಿ ಪಾಚಾರ್ಚಿಂ, ಆಕ್ರೋಶಾಚಿಂ, ಬಂಡಾಯಾಚಿಂ ಕವಿತಾ ಉಂಚ್ಲಿಂ ಕಶಿಂ ಜಾಂವ್ಚಿಂ? ಅಸಲ್ಯಾ ಕಾವ್ಯಾನ್ ಸಂಸ್ರಾಕ್ ಬರೆಂ ಕೆಲ್ಲೆಂ ವಾ ಕರ್ಚೆಂ ಆಸಾ? ಅಸಲಿಂ ಕಾವ್ಯಾ ಫಕತ್ತ್ ಲೊಕಾಕ್ ಭಡ್ಕಾಯ್ತಾತ್ ಆನಿ ಎಕಾಮೆಕಾ ಘರ್ಶಣ್ ಮಾತ್ರ್ ಉಭ್ಜಾಯ್ತಾತ್ ಮ್ಹಣ್ ಚಿಂತಾತ್ ತರ್ ತೆಂ ಸಾರ್ಕೆಂ ಚಿಂತಾಪ್. ಪುಣ್ ಕಿತ್ಲೆಂ ಸಾರ್ಕೆಂ?

ಭೋವ್ ಸಲೀಸ್ - ಹ್ಯಾ ಸಂಸ್ರಾಂತ್ ಸರ್ಯೆಕ್ಲ್ಯಾಂಕ್ ಏಕ್ ಧರ್ಮ್ ಆಸಾ, ತ್ಯಾ ತ್ಯಾ ಧರ್ಮಾಚೊ ಗೃಂಥ್ ಆಸಾ, ಕ್ರಿಸ್ತಾಂವಾಂಕ್ ವಾಂಜೆಲ್ ತರ್ ಮಾಪ್ಳ್ಯಾಂಕ್ ಖುರಾನ್ ಆನಿ ಹಿಂಧ್ವಾಂಕ್ ಭಗ್ವದ್‌ಗೀತ. ಹರ್ಯೆಕಾ ಗೃಂಥಾಂನಿ ಆಸ್ಚೊ ಸಾರ್ ಏಕ್ - ಮನ್ಶಾ ಮೋಗ್, ಸಮಧಾನ್, ಶಾಂತಿ.. ಪುಣ್ ಆಮ್ಚಾ ಸಂಸ್ರಾಂತ್ ಕಿತ್ಯಾಕ್ ಅಸಮಧಾನ್? ಅಶಾಂತಿ?

ಅಶೆಂ ಮ್ಹಣ್ತಚ್ ಮನಿಸ್ ಜೆದ್ನಾಂ ಅಪ್ಣಾಕ್, ಅಪ್ಲ್ಯಾಂಕ್ ವಾ ಅಪ್ಲ್ಯಾ ಭಂವ್ತೊಣೆಚ್ಯಾಂಚೆರ್ ಜುಲುಮ್, ಅನ್ನ್ಯಾಯ್ ಜಾತಾಸ್ತಾಂ ವೊಗೆಚ್ಚ್ ರಾವೊನ್ ’ಎಕಾಮೆಕಾಚೊ ಮೋಗ್ ಕರಾ, ದುಸ್ಮಾನಾಂಕ್ ಭಗ್ಸಿಯಾ’ ಮ್ಹಣ್ ಹಾತ್ ಭಾಂದುನ್ ವಗೊ ಬೊಸ್ಲೊ ತರ್ ತೊ ಮಹಾನ್ ಕವಿ ಮ್ಹಣ್ ಜಾಲೊ ನ್ಹಂಯ್‌ಗಿ? ಮ್ಹಳ್ಯಾರ್ ಆಮ್ಚಾ ಘರಾ ಚೋರ್ ಯೆತಾನಾ, ಆಮ್ಚಾ ಘರಾಂತ್ ಲುಟ್ಕಾರ್ ರಿಗೊನ್ ತಾಂಕಾಂ ಸೊಲ್ತಾನಾ ಆಮಿಂ ತಾಂಕಾಂ ಧಾಂಬುನ್ ಧರ್ನ್ ಮೋಗ್ ಕರಿಜಾಯ್? ವಾ ವಿರೋದ್ ಕರಿಜಾಯ್? ವಿರೋದ್? ಕಸೊ?

ಹಾಂಗಾಸರ್ ಆಮ್ಚಿಂ ಚಿಂತ್ಪಾಸಕತ್ ಸಾಣ್ಯಾಕ್ ದಿಂವ್ಚಿ ಗರ್ಜ್ ಆಸಾ. ಆತಾಂ ಹಿ ಬಂಡಾಯ್ ಕಶಿ ಉಭ್ಜತಾ? ಅಪ್ಲ್ಯಾ ಭಂವ್ತೊಣೆಚ್ಯಾ ಅಸ್ಕತ್ಯಾಂಚೆರ್ ಜೆದ್ನಾಂ ಹಲ್ಲೊ ಚಲ್ತಾ, ಆಮ್ಕಾಂ ತಾಂಚೆರ್ ಹುಸ್ಕೊ, ಮೋಗ್ ಆಸಾ ತರ್ ಜರೂರ್ ಆಮಿಂ ಆವಾಜ್ ಉಟಯ್ತೆಲ್ಯಾಂವ್. ತೊ ಹಲ್ಲೊ ಕರ್ಚೆ ಕೊಣ್‌ಯ್ ಆಸೊಂ, ಕಿತ್ಲಿ ವ್ಹಡ್ ಪದ್ವಿಯ್ ತಾಂಚಿ ಆಸೊಂ.

ಹೆಂಚ್ ಚಿಂತಾಪ್ ದೋನ್ ವರ್ಗಾಂಚಾ ಮನ್ಶಾಂಕ್ ರಚ್ತಾ;

ಪಯ್ಲೊ: ಭಳ್ ಆಸ್ಚಾಂಕ್ ಸಾಂಗಾತ್ ದಿಂವ್ಚೊ - ಆಮ್ಕಾಂ ಕಿತೆಂ ಪಡೊನ್ ಗೆಲಾಂ ಮ್ಹಳ್ಳೆಂ ಚಿಂತಾಪ್.

ದುಸ್ರೊ: ಅಸ್ಕತ್ ಮನ್ಶ್ಯಾಂಕ್ ಸಾಂಗಾತ್ ದಿಂವ್ಚೊ - ಹೆರಾಂ ಥಂಯ್ ಅಪ್ಲಿ ಜಿಣಿ ಪಳೆಂವ್ಚೆಂ ಚಿಂತಾಪ್.

ಹ್ಯಾ ದೊನಾಂತ್‌ಯೀ ಜರೂರ್ ತಫಾವತ್ ಆಸಾ, ಪಯ್ಲ್ಯಾಂತ್ - ಬಳ್ ಆಸ್‌ಲ್ಲ್ಯಾಂಚಿ ಪಾಡ್ತ್ ಘೆತ್ಲ್ಯಾರ್ ಲೌಕಿಕ್ ಆಸ್ತ್-ವಸ್ತ್ ಮೆಳ್ತಾ, ಮೆಲ್ಲೆ ಗೆಲೆ. ಆಮಿ ಜೀವ್ ಆಸ್ತಾಂ ಆಮ್ಕಾಂ ಮಾನ್ ಸಮ್ಮಾನ್ ಜಾಯ್. ಆಮ್ಕಾಂ ಫಾಲ್ಯಾಂ ಹೆಚ್ಚ್ ಭಳ್ವಂತ್ ಕಾಂಯ್ ಮಹಾನ್ ಕವಿ ಮ್ಹಣ್ ಬಿಲ್ಲೊ ದಿಲ್ಯಾರೀ ದಿತಿತ್. ದೆಕುನ್ ಅಸಲ್ಯಾಂಕ್ ಧರ್ನ್ ಫುಕಾರ್ಲ್ಯಾರ್ ಜಾಲೆಂ.

ಪುಣ್ ಅಸ್ಕತ್ಯಾಚೆ ಪಾಡ್ತಿನ್, ದಣ್ಸತೆಲ್ಯಾಂಚೆ ಪಾಡ್ತೆನ್ ಗೆಲ್ಯಾರ್ ಆಮ್ಕಾಂ ಆಸ್ತ್ ಬದಿಕ್ ಸೊಡ್ - ಆಮ್ಚೊಚ್ ಮಾನ್ ಕಾಡುಂಕ್ ಪುರೊ. ತರ್‌ಯೀ ಖರೊ ಕವಿ ಅಸಲೊ ಜಾವ್ನಾಸಾ - ಜೊ ಅಸಲ್ಯಾ ಅಸ್ಕತ್ಯಾಂಚಿ ಪಾಡ್ತ್ ಘೆತಲೊ. ಸಮಾಜೆಂತ್ಲ್ಯಾ ದಣ್ಸಲ್ಲ್ಯಾಂಚೆಂ ರುದಾನ್ ಆಯ್ಕೊಂಕ್ ಸಕ್ಚೆ, ದಣಲ್ಲ್ಯಾಂಚಿ ಭುಕ್ ತಾನ್ ದೆಖೊಂಕ್ ಸಕ್ಚೆ - ಮಾತ್ರ್ ಖರೆ ಕವಿ.

ಇತ್ಲೆಂ ಸರ್ವ್ ಸಾಂಗೊನ್ ಆತಾಂ ಕೊಂಕ್ಣಿ ಕಾವ್ಯಾಕ್ ಪಾಟಿಂ ಯೆಂವ್ಚೆಂ ತರ್ ಕೊಂಕ್ಣೆಂತ್ ಅಸಲೆ ಕವಿ ಮ್ಹಾಕಾ ದಿಸ್ಚೆಂ ಭೋವ್ ಉಣೆಂ. ಆಮ್ಚೆ ಚಡ್ತಾವ್ ಕವಿ ಆಲ್ತಾರ್ ಭುರ್ಗೆಚ್. ಹೆ ಆದಿಂಯ್ ಆಸ್ಲೆ ಆತಾಂಯ್ ಆಸಾತ್ ಆನಿ ಫುಡೆಂಯ್ ಆಸ್ತೆಲೆ. ದೆಖುನ್ ಆಮ್ಕಾಂ ಚಾ.ಫ್ರಾ.ದೆ’ಕೋಸ್ತಾ ಜಾಂವ್, ದೊ|ವಿಲ್ಲಿ ಡಿ’ಸಿಲ್ವಾ ಜಾಂವ್, ದೊ|ಎಡ್ವರ್ಡ್ ನೊರೊನ್ಹಾ, ಎಚ್ಚೆಮ್ ಜಾಂವ್ ಅಸಲ್ಯಾಂಚಿ ಕಾವ್ಯ ಪ್ರತಿಭಾ ಕಿತ್ಲ್ಯಾಂಕ್ ಕಳಿತ್?. ಕಿತ್ಯಾಕ್? ಆಮಿಂಚ್ ಕವಿತಾ ಮ್ಹಳ್ಯಾರ್ ಏಕ್ ವ್ಯಾಖ್ಯಾನ್ ದಿಲಾಂ, ಏಕ್ ಪರಿಧಿ ಘಾಲ್ಯಾ. ಆನಿ ಹ್ಯಾ ಪರಿಧೆ ಭಿತರ್ ಆಸ್ಚಾಂಕ್ ವಾ ಯೆತೆಲ್ಯಾಂಕ್ ಮಾತ್ರ್ ಕವಿ ಮ್ಹಳ್ಳೊ ಬಿಲ್ಲೊ. ಬಾಕಿಚೆ ಪುರಾ ದೆವಾಕ್ ಸೊಡ್‌ಲ್ಲೆ ಪಾಡೆ..

ಚಾ.ಫ್ರಾ.ದೆ’ಕೋಸ್ತಾಕ್ ಕೊಂಕ್ಣೆಂತ್ಲೊ ಉಂಚ್ಲೊ ಕವಿ ಮ್ಹಣ್ ಆತಾಂ ವೊಲಾಯ್ತಾತ್ - ಖರೆಂ. ಪುಣ್ ತೊ ಜಿವಂತ್ ಆಸ್ತಾನಾ ತಾಕಾ ಲೆಖ್‌ಲ್ಲೆ ಕಿತ್ಲೆ? ತಾಚೆಂ ’ಜಿವಿತ್’ ಪತ್ರ್ ಸಯ್ತ್ ಚಲಂವ್ಕ್ ತಾಣೆಂ ಹರ್ಯೆಕಾ ದಿಸಾ, ಹರ್ಯೆಕಾ ಘಡ್ಯೆ ಭಗ್‌ಲ್ಲ್ಯಾ ಸಂಕಶ್ಟಾಂಕ್ ಸಮ್ಜಾಲ್ಲೆ ಕಿತ್ಲೆ? ಕಾರಣಾಂ ಖಂಚೀಂಯ್ ಆಸೊಂದಿತ್ - ಪುಣ್ ಹೆಂ ಮಾತ್ರ್ ಅಡ್ಹೂಕ್ ಸತ್.

ತರ್‌ಯೀ ಏಕ್ ಮಾತ್ರ್ ಸತ್ - ಸತ್ ಬರಂವ್ಚೆಂ ಧಯ್ರ್ ಆಸ್ಚೆ ಆತಾಂಯ್ ಥೊಡೆ ಆಸಾತ್. ಪರ್ನೆ ಕವಿಂ ಮಧೆಂ ಚಡ್ ನ್ಹಂಯ್ ತರ್‌ಯೀ ನವ್ಯಾ ಕವಿಂ ಪಯ್ಕಿಂತ್ ಅಸಲೆ ಕವಿ ಆಸಾತ್ (ತಸಲ್ಯಾ ಎಕೆಕ್ಲ್ಯಾಂಕ್‌ಚ್ ವಿಂಚುನ್ ಫುಡೆಂ ಕವಿತಾಪಾಠಾಚೆರ್ ಅಧ್ಯಯನ್ ಕರ್ಯಾಂ). ಜಾಂಕಾಂ ಸಮಾಜೆಚೆರ್ ಎಕೆಕಾ ವರ್ಗಾಂತ್ ಜಾಂವ್ಚೆಂ ಶೋಷಣ್ ದಿಸ್ತಾ. ಅಮಾಯಕಾಂಚೆರ್ ಭಳ್ವಂತಾಂನಿ ಕರ್ಚೊ ಹಲ್ಲೊ ದಿಸ್ತಾ. ಹಾಕಾ ಜಾಯ್ತಿಂ ದೃಶ್ಟಾಂತಾಂ ದಿವ್ಯೆತಾ - ಪುಣ್ ಹಾಂಗಾ ತಿಂ ಗರ್ಜೆಚಿಂ ಮ್ಹಣ್ ಮ್ಹಾಕಾ ದಿಸಾನಾಂತ್. ಪುಣ್ ಅಪ್ರೂಪಾನ್ ಮ್ಹಾಕಾ ಅಸಲೆ ಕವಿ ಥಂಯ್ ಹಾಂಗಾ ತವಳ್ ತವಳ್ ದಿಶ್ಟಿಕ್ ಪಡ್ತಾತ್. ತಾಂತ್ಲೊ ಎಕ್ಲೊ ಜಾವ್ನಾಸಾ ’ಸನ್ನು ಮೊನಿಜ್’. ತಾಕಾ ದಾಖ್ಲೊ ಜಾವ್ನ್ ಹೆಂ ಕವಿತಾ ಘೆವ್ಯಾಂ;

ಸನ್ನು ಮೊನಿಜ್ ವೆಕ್ತಿಗತ್ ಜಾವ್ನ್ ಹಾಂವ್ ವಳ್ಕತಾಂ ಥೊಡ್ಯಾ ಆವ್ದೆಕ್ ತರ್‌ಯೀ. ಕಿತ್ಯಾಕ್ ತಾಕಾ ಹಾಂವ್ ಮುಖಾಮುಖಿಂ ಜಾಲ್ಲೊಂ ಥೊಡೆಚ್ ಪಾವ್ಟಿಂ ತರ್‌ಯೀ ಆಮಿಂ ಸಭಾರ್ ಪಾವ್ಟಿಂ ಉಲಯ್ಲ್ಯಾಂವ್. ಹರ್ಯೆಕ್ ಪಾವ್ಟಿಂ ತಾಚಾ ಕಾಳ್ಜಾಂತ್ ಹೆರಾಂಚೊ ಹುಸ್ಕೊ, ಮೋಗ್ ಆನಿ ಭಿರ್ಮತ್ ಹಾವೆಂ ಪಾರ್ಕಿಲ್ಯಾ. ತಾಚ್ಯಾ ಉತ್ರಾಂನಿ ಶೀದಾ ಆನಿ ಕಡಕ್ಕ್ ದಿಸ್ಚೊ ಹೊ ತಿತ್ಲೊಚ್ ಪ್ರಾಮಾಣಿಕ್ ಚಿಂತ್ಪಿ. ತಾಚಿಂ ಕವಿತಾ ಕಾಂಯ್ ಅಸಲ್ಯಾ ದಣ್ಸಲ್ಲ್ಯಾಂಚಿ, ಅಸ್ಕತ್ಯಾಂಚಿ, ಜಿಣ್ಯೆಚೆರ್ ಆರ್ಸೊ ಧರ್ಚಿ ತಾಂಕ್ ಆಸ್ಚಿ ರೂಪ್ ರೂಪ್ ದಿಸ್ತಾ. ತಾಚೊ ದಾಖ್ಲೊ ಹೆಂ ’ಚಾಮ್ಡ್ಯಾ ವ್ಹಾಣೊ’ ಕವಿತಾ.

ಏಕ್ ಉತರ್ ಪ್ರಾಯೆಕ್ ಪಾವ್‌ಲ್ಲೊ ದಾದ್ಲೊ. ಕಾಜಾರಾಚೆ ಪ್ರಾಯೆಕ್ ಪಾವ್‌ಲ್ಲ್ಯಾ ಆಪ್ಲ್ಯಾ ಧುವೆಕ್ ಬರಿ ಸಯ್ರಿಕ್ ಸೊಧ್ಚಾಕ್ ಸದಾಂಯ್ ಅಪ್ಲೆಂ ಪಾಂಯ್ ಜರವ್ನ್ ಜರವ್ನ್ ವೆತಾಂ ದಿಸಾನ್ ದೀಸ್ ತ್ಯಾ ವ್ಹಾಣಾಂಚೆಂ ಆವ್ಕ್ ಸಂಪೊನ್ ಯೆತಾ ದೆಕುನ್ ತ್ಯಾ ವ್ಹಾಣಾಂಕ್ ಭಳ್ ದೀಂವ್ಕ್ ತೊ ದಾದ್ಲೊ ಚಾಮ್ಗಾರಾಲಾಗಿಂ ಏಕ್ ಖಿಳೊ ಮಾರುಂಕ್ ಪರಾತ್ತಾ. ಆನಿ ಹ್ಯಾ ವೆವೆಗ್ಳ್ಯಾ ಪಾತ್ರಾ ಮಧೆಂ ಏಕ್ ಭೋವ್ ಸೊಭಿತ್ ಪಿಂತುರ್ ಉಭೆಂ ಕರ್ತಾ.

’ತ್ಯೋ..

ತುಟ್ಲಲ್ಯೊ ’ಚಾಮ್ಡ್ಯಾಚ್ಯೊ ವ್ಹಾಣೊ’ ವರುನ್ ಪರತ್

ತ್ಯಾಚ್ ಚಾಮ್ಗಾರಾಲಾಗಿಂ ಗೆಲ್ಲೊಂ

ತೊ..

ಗೆಲೆತ್ಯಾ ಪಾವ್ಟಿಂಚ್ ಸಮಾ ಕರುಂಕ್ ನೆಗಾರ್ಲಲೊ

ಹಾಂವ್..

ಅರೇ ಚಾಮ್ಗಾರಾ

ಧಾಂವ್ ಮ್ಹಜಿ ಪಿರಾಯೆಕ್ ಭರ್‍ಲ್ಯಾ

ಅಟ್ರಾ ಉತ್ರೊನ್ ಎಕುಣಿಸಾಕ್ ಪಾವ್ಲಾಂ

ಅಶಿರ್ ಬಾವ್ಳ್ಯಾಂಚಾ ತಕ್ಲೆಂತ್ ಮ್ಹಜ್ಯಾ

ಕಾಜಾರ್ ಕರ್ಚೆಂ ವ್ಹೊಜೆಂ ಚಡ್ಲಾಂ..!

ಮಾರ್ರೆ ಬಾಬಾ.. ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣಾಕ್ ಏಕ್ ಖಿಳೊ..!’

ಕಸಲೆ ಹೆ ಪಾತ್ರ್?

ಪಯ್ಲೊ: ಕವಿತಾನಾಯಕ್ - ಮ್ಹಣ್ಜೆ ಪ್ರಾಯೆಕ್ ಪಾವ್‌ಲ್ಲೊ ದಾದ್ಲೊ.

ದುಸ್ರೊ: ಜರೊನ್ ಗೆಲ್ಲ್ಯೊ ಚಾಮ್ಡ್ಯಾಚೊ ವ್ಹಾಣೊ.

ತಿಸ್ರೊ: ಚಾಮ್ಗಾರ್.

ಚೊವ್ತೊ: ಖಿಳೊ.

’ಚೆಡ್ವಾಕ್ ಮ್ಹಜ್ಯಾ ಸೈರಿಕ್ ಸೊಧ್ಚ್ಯಾಕ್ ಹಾಂವ್ ಲಾಗ್ಲಾಂರೆ

ಗಿರೇಸ್ತಾಂಕ್ ಆಮ್ಚೆಂ ಪಾಕೆಂ ಕಾಂಯ್ ಸೊಭಾನಾರೆ

ಕೊಲ್ವಾ ಪಾಕ್ಯಾಕ್ ನಳೆ ಕಶೆಂ ಚಡಂವ್‌ರೆ

ಪಾಕ್ಯಾಕ್ ನಳೆ ಘಾಲ್ಯಾರ್ ಕಾಜಾರ್ ಕಶೆಂ ಕರುಂರೆ..

ಮಾರ್ರೆ ಭಾವಾ ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣಾಂಕ್ ಏಕ್ ಖಿಳೊ..!

ಹಾಂಗಾಸರ್ ಕವಿಚಾ ಭಿರ್ಮತೆಚ್ಯಾ ಚಿಂತ್ಪಾಚಿ ಗುಂಡಾಯ್ ಪಳೆಯಾ, ಗರೀಬ್‌ಪಣ್ ಉಟೊನ್ ದಿಸ್ಚೆಂ ಕೊಲ್ವಾಚೆಂ ಘರ್. ಹಾಂಗಾಸರ್ ಆಸ್ಚೆಂ ಥೊಡೆಂಯ್ ಗರಿಶ್ಟ್. ಮ್ಹಳ್ಯಾರ್ ಮಾತ್ಯಾಕ್ ವೊಡ್ಲ್ಯಾರ್ ಪಾಂಯಾಂಕ್ ಪಾವಾನಾ, ಪಾಂಯಾಂಕ್ ವೊಡ್ಲ್ಯಾರ್ ಮಾತ್ಯಾಕ್ ಪಾವಾನಾ ಮ್ಹಳ್ಳಿ ಪರಿಗತ್. ಸಂಸ್ರಾಕ್ ಸಯ್ರಿಕ್ ಸೊಧ್ಚ್ಯಾಧಿಂ ಸಯ್ರಿಕ್ ಮಾತ್ರ್ ನ್ಹಂಯ್, ಅಂತಸ್ತ್ ಸಯ್ ಜಾಯ್. ಆನಿ ಸಮಾಜೆನ್ ಅಂತಸ್ತ್ ಮೆಜ್ಚೆಂ ಮಾಪ್ ಪಳೆಯಾ - ಕೊಲ್ವಾಚೆಂ ಪಾಕೆಂ. ಆನಿ ತೆಂ ಅಂತಸ್ತ್ ಬದ್ಲುಂಕ್ ಹೊ ದಾದ್ಲೊ ಸಕಾನಾ. ಸಕ್ಲ್ಯಾರ್ ಅಪ್ಲ್ಯಾ ಧುವೆಚೊ ಬರೊ ಫುಡಾರ್ ರಿಸ್ಕೆರ್ ಆಸ್ಚೆಂ ದಿಸ್ತಾ. ದೆಕುನ್ ಅಪ್ಲ್ಯಾ ಧುವೆಚ್ಯಾ ಬರ್‍ಯಾ ಫುಡಾರಾ ಪಾಸತ್ ಅಪ್ಲೆಂ ಸುಖ್ ಸಮಧಾನ್ ತ್ಯಾಗ್ ಕರ್ಚೆಂ ಚಿಂತಾಪ್ ಹಾಂಗಾಸರ್ ದಿಸೊನ್ ಯೆತಾ.

’ಅಳೆಗಾ ಚಾಮ್ಗಾರಾ ಧುವೆಕ್ ಮ್ಹಜ್ಯಾ ಭಾಂಗಾರಾಪರಿಂ ಪೊಸ್ಲಾಂ

ತರೀ ಭಾಂಗಾರ್ ವಿಚಾರ್ಚ್ಯಾ ಸೈರಿಕೆಕ್ ಆಯ್ಕೊನ್ ಶೆರ್ಮೆಲಾಂ

ಧುವ್ ಮ್ಹಜಿ ಲಾಖಾಂತ್ ಏಕ್ ಗುಣಾಂತ್ ’ಮರಿ ಮಾಂಯ್’

ಆಸಾ ತರ್ ಬರಿ ಹೇಳ್ಕಿ. ಘಡ್ಯೆನ್ ಮ್ಹಾಕಾ ಕಳಯ್

ಮಾರ್ರೆ ಭಾವಾ ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣಾಂಕ್ ಏಕ್ ಖಿಳೊ..!’

ಚಡಾವತ್ ಜಾವ್ನ್ ಸಯ್ರಿಕ್ ಸೊಧ್ಚಿ ಅಪ್ಲ್ಯಾಂನಿ ಅಪ್ಲ್ಯಾಂ ಮಧ್ಲಿ. ಆತಾಂ ಜೆದ್ನಾಂ ಅಪ್ಲಿಂ, ಅಪ್ಲ್ಯಾ ಜಾತಿಚಿಂ, ಅಪ್ಲ್ಯಾ ಕುಳ್ಯೆಚಿಂ ಭಾಂಗಾರಾಕ್ ಮುಖಾರ್ ದವ್ರುನ್ ಸಂಬಂಧ್ ಘಡುಂಕ್ ಯೆತಾನಾ, ಖರೆಂ ಭಾಂಗಾರ್ ಜಾವ್ನಾಸ್ಚಾಂಕ್ ಕೊಣ್ ಹುಂಗ್ತಾ? ದೆಕುನ್ ಹಾಂಗಾ ತೊ ದಾದ್ಲೊ ಚಾಮ್ಗಾರಾಕ್ ಸಮ್ಜಾಯ್ತಾ, ತುಂ ಅಪ್ಲೊ ನ್ಹಂಯ್ ಜಾವ್ಯೆತ್, ತರೀ ಅಪ್ಲೆಂ ದೂಕ್-ಅಕ್ಲಾಸ್ ಸಮ್ಜೊಂಚಿ ಶ್ಯಾಥಿ ತುಕಾ ಆಸಾ. ಅಪ್ಲ್ಯಾ ಖರ್‍ಯಾ ಭಾಂಗಾರಾಕ್ ಪಳೆಂವ್ಚಿ ಶ್ಯಾಥಿ ತುಕಾ ಆಸಾ ದೆಕುನ್ ತುಂ ತರೀ ಮ್ಹಜಿ ಕುಮೊಕ್ ಕರ್, ಮ್ಹಜ್ಯಾ ಧುವೆಕ್ ಸಾಂಗ್ಡೊ ಕೊಣ್‌ಯ್ ತುಜ್ಯಾ ನದ್ರೆಂತ್ ಆಸ್ಲ್ಯಾರ್ ಮ್ಹಾಕಾ ಕಳಯ್ ಮ್ಹಣ್ ಭರ್ಮಾನ್ ವಿನತಿ ಕರ್ಚಿ ಪಳೆಯಾ.

’ನವೆ ಕಿತ್ಯಾಕ್ ಘೆನಾಂಯ್ ಮ್ಹಣ್ ಶಿಣಾನಾಕಾ.

ನವೆ ಹಾಂವೆಂ ವರ್ಸಾಂಧಿಂ ಘೆತ್ಲ್ಯಾತ್ ಕಂಲ್ಬೆಂತ್ ಫಿಛಾರ್ ಕೆಲ್ಯಾತ್

ಕಾಂಯ್ ತೀಸ್ ರುಪಯ್ ವಾಟ್ಲ್ಯಾತ್ ತಾಂಕಾಂ

ಧುವೆಚ್ಯಾ ಕಾಜಾರಾಕ್ ಮ್ಹಣ್ ರಾಕೊನ್ ದವರ್ಲ್ಯಾತ್

ಆತಾಂ ತರೀ

ಮಾರ್ರೆ ಭಾವಾ ತುಟ್‌ಲ್ಲ್ಯಾ ಚಾಮ್ಡ್ಯಾ ವ್ಹಾಣಾಂಕ್ ಏಕ್ ಖಿಳೊ..!’

ಹಾಂಗಾಸರ್ ಕವಿಚಿ ಆಶಾ ಅತ್ರೆಗ್ ಪಳೆಯಾ, ತಾಚೆಂ ಸ್ವಪಾಣ್ - ಎಕಾ ದಿಸಾ ಅಪ್ಲ್ಯಾ ಭಾಂಗಾರಾ ತಸ್ಲ್ಯಾ ಧುವೆಕ್ ಕಾಜಾರ್ ಕರುಂಕ್ ಆಸಾ, ಸೊಭಂವ್ಕ್, ಸಜಂವ್ಕ್, ನೆಟಂವ್ಕ್ ಆಸಾ, ಆನಿ ತ್ಯಾ ದಿಸಾ ಅಪ್ಲ್ಯೊ ಪರ್ನ್ಯಾ ವ್ಹಾಣಾಂಕ್ ಅಧೇವ್ಸ್ ಮಾಗೊಂಕ್ ಆಸಾ. ದೆಕುನ್ ಭೋವ್ ಜೊಗಾಸಾಣೆನ್ ನವ್ಯೊ ವ್ಹಾಣೊ ಕಂಲ್ಬೆಂತ್ ದವರ್ಲ್ಯಾತ್.

ತಶೆಂ ಮ್ಹಣೊನ್ ಕವಿತಾ ಕಸ್ಲ್ಯಾರ್ ಕೃತಕ್ ಸಿಂತಿಮೆಂತಾಂನಿ ನಾ - ಅಪ್ಲ್ಯಾ ಕಾಳ್ಜಾಂತ್ಲಿ ಸುಪ್ತಿ ಆಶಾ ಕವಿ ಚಾಮ್ಗಾರಾಲಾಗಿಂ ಎಕಾ ಸಂಭಾಶಣಾ ರುಪಾರ್ ವೆಕ್ತ್ ಕರ್ತಾ ತರ್‌ಯೀ, ಹಾಂಗಾ ಚಾಮ್ಡ್ಯಾಚ್ಯೊ ವ್ಹಾಣೊ ಆನಿ ಖಿಳೊ ಮ್ಹಳ್ಳ್ಯೊ ಇಮಾಜ್ಯೊ ಅರ್ಥ್ ದಿತಾತ್. ಖಿಳೊ ಘಟಾಯ್-ಆಧಾರ್ ದಿತಾ. ಜಶೆಂ ವ್ಹಾಣಾಂಕ್ ತಶೆಂಚ್ ಅಪ್ಲ್ಯಾ ವಾಟೆಕ್. ಮ್ಹಳ್ಯಾರ್ ಇತ್ಲಿ ಮಿನತ್ ಕರ್ನ್ ಅಪುಣ್ ಅನಿಕ್‌ಯ್ ಥಕೊಂಕ್ ನಾ. ಅಪುಣ್ ಅಪ್ಲೆಂ ಆವ್ಕ್ ಸಂಪ್ಚ್ಯಾಧಿಂ ಅಪ್ಲ್ಯಾ ಧುವೆಕ್ ಬರಿ ಸಯ್ರಿಕ್ ಸೊಧುನ್ ಕಾಡ್ತಲೊಂಚ್ ಮ್ಹಳ್ಳೆಂ ಧಯ್ರ್ ತ್ಯಾ ದಾದ್ಲ್ಯಾಕ್ ಆಸಾ.

ಸನ್ನು ಮೊನಿಜ್ ಪ್ರಾಯೆನ್ ಕಾಂಯ್ ಚಾಳಿಸಾಂಕ್ ಲಾಗಿಂ ಜಾಯ್ತ್. ತಾಕಾ ಕಾಂಯ್ ಕಾಜಾರಾಚೆ ಪ್ರಾಯೆಕ್ ಪಾವ್‌ಲ್ಲಿ ಧುವ್ ನಾ. ತರ್‌ಯೀ ಹೆಂ ಕವಿತಾ ವಾಚ್ತಾಂ ವಾಚ್ತಾಂ ಅಶೆಂ ಭಗ್ತಾ ಮ್ಹಳ್ಯಾರ್, ಖುದ್ದ್ ಕವಿಚ್ ಅಪ್ಲ್ಯಾ ಧುವೆಕ್ ಕಾಜಾರ್ ಕರುಂಕ್ ಮಿನತ್ ಕರ್ಚಿ ದಿಸೊನ್ ಯೆತಾ. ಎಕೇಕ್ ಆಟೆವಿಟೆ. ಎಕೇಕ್ ಭಗ್ಣಾಂ, ಎಕೇಕ್ ಉಮಾಳೆ, ಎಕೇಕ್ ಅತ್ರೆಗ್, ಎಕೇಕ್ ಖುಶಿ, ಎಕೇಕ್ ಆಶಾ ಪಳೆಯಾ. ಹಾಕಾಚ್ ಮ್ಹಣ್ಚೆಂ ಹೆರಾಂ ಥಂಯ್ ಅಪ್ಣಾಕ್ ದವ್ರುನ್ ಪಳೆಂವ್ಚಿ ದೀಶ್ಟ್ ಜೆದ್ನಾಂ ಕವಿಕ್ ಆಸ್ತಾ, ತೆದ್ನಾಂ ಥಂಯ್ ಕವಿತಾ ಅಪಾಪಿಂ ಉಭಿ ಜಾತಾ. ಆನಿ ತಸಲೆಂ ಕವಿತಾ ಖರೆಂಚ್ ಜಾವ್ನ್ ಖಂಚ್ಯಾಯ್ ಕಾಳಾರ್ ಸೊಭ್ತಾ.

ಕೊಂಕ್ಣೆಂತ್ ಅಸಲಿ ಪ್ರತಿಭಾ ಯಥೇಷ್ಟ್ ಮಾಪಾನ್ ನ್ಹಂಯ್ ತರ್‌ಯೀ ಜರೂರ್ ಆಸಾ. ತಾಂಕಾಂ ಜೊಕ್ತೊ ಆವ್ಕಾಸ್ ಲಾಭ್ಲೊ ತರ್ ಮಾತ್ರ್ ಕೊಂಕ್ಣಿ ಕಾವ್ಯಾಶೆತ್ ವ್ಹಾಡತ್ ಶಿವಾಯ್, ಫಕತ್ತ್ ಅಪ್ಣಾಕ್ ಧುಂಪಯ್ತೆಲ್ಯಾಂಕ್ ಮಾತ್ರ್ ’ಕವಿ ಪಾಟೊಸಾಕ್’ ಚಡಯ್ಲ್ಯಾರ್ ಆಮ್ಚೆಂ ಸಾಹಿತ್ಯ್ ಅಂತರ್‌ರಾಷ್ಟ್ರೀಯ್ ಮಟ್ಟಾರ್ ಪಾವಂವ್ಚೆಂ ಸ್ವಪಾಣ್ ಭಿಲ್ಕುಲ್ ಸ್ವಪ್ಣಾಂತ್ ಖೆಳಿಂ ಖಾಂವ್ಚೆಪರಿಂ. ಪುಣ್ ಹಾಂ! ಹೆಂ ರಾಜಕೀಯ್ ಮಾತ್ರ್ ಅಂತರ್‌ರಾಷ್ಟ್ರೀಯ್ ಮಟ್ಟಾಕ್ ಪಾವತ್ ಕೊಣ್ಣಾ.

- ವಲ್ಲಿ ಕ್ವಾಡ್ರಸ್.

[ಹಿ ಕವಿತಾ ಆಶಾವಾದಿ ಪ್ರಕಾಶನಾ ತರ್ಫೆನ್ ವೆಗಿಂಚ್ ಪರ್ಗಟೊನ್ ಯೆಂವ್ಚ್ಯಾ ’ಶಿಂಪಡ್ಲೆಲಿಂ ಮೊತಿಯಾಂ’ ಕವಿತಾಜಮ್ಯಾಂತ್ ಪರ್ಗಟೊನ್ ಯೆತೆಲೆಂ]

ಕವಿತಾಪಾಠ್ ಪಾನಾಕ್ 

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications