ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಚಡುನ್ ಗೆಲ್ಲೊ ರಗ್ತಾಸ್ರಾವ್.
* ಮ್ಹಜಿ ಪ್ರಾಯ್ 35 ವರ್ಸಾಂ, ಕಾಜಾರ್ ಜಾವ್ನ್ ಧಾ ವರ್ಸಾಂ ಜಾತಾತ್, ಮ್ಹಾಕಾ ದೊಗಾಂ ಭುರ್ಗಿಂ ಆಸಾತ್. ಕಾಜಾರಾಚ್ಯಾ ದುಸ್ರ್ಯಾ ವರ್ಸಾ ಹಾಂವ್ ಗರ್ಬೆಸ್ತ್ ಜಾಲ್ಲಿಂ ಪೂಣ್ ಚ್ಯಾರ್ ಮಯ್ನ್ಯಾಂನಿ ಮ್ಹಾಕಾ ಗರ್ಬಾಸ್ರಾವ್ ಜಾಲೊ. ತ್ಯಾ ವೆಳಾರ್ ಮ್ಹಜ್ಯಾ ಗರ್ಬ್ಕೋಶಾಂತ್ ಫೈಬ್ರೋಯ್ಡ್ ಮ್ಹಳ್ಳೆ ಘೆಟೆ ಆಸಾತ್ ಮ್ಹಣ್ ಸಾಂಗ್ಲ್ಲೆಂ. ಲ್ಯಾಪ್ರೊಸ್ಕೋಪಿ ಕರ್ನ್ ತೆ ಕಾಡಾಯ್ಲೆ. ಹಾಂವ್ ತ್ಯಾ ಉಪ್ರಾಂತ್ ಗರ್ಬೆಸ್ತ್ ಜಾಲ್ಲಿಂ ಆನಿ ಸಿಜೇರಿಯನ್ ಒಪ್ರೇಶನ್ ಕರುಂಕ್ ಪಡ್ಲೆಂ. ಮ್ಹಜ್ಯಾ ದುಸ್ರ್ಯಾ ಭುರ್ಗ್ಯಾಕ್ ಗರ್ಬೆಸ್ತ್ ಆಸ್ತಾನಾಂಯ್ ಮ್ಹಜಿ ತಪಾಸ್ಣಿ ಕೆಲ್ಲ್ಯಾ ದಾಕ್ತೆರಾಂನಿ ಮ್ಹಜ್ಯಾ ಗರ್ಬ್ಕೋಶಾಂತ್ ಭಾಯ್ಲ್ಯಾನ್ ಫೈಬ್ರೋಯ್ಡ್ ಆಸಾತ್ ಮ್ಹಣ್ ಸಾಂಗ್ಲ್ಲೆಂ ಆನಿ ತೆ ಪಾವ್ಟಿಂಚೊ ಬಾಂಳ್ತೆರ್ಯಿ ಸಿಜೇರಿಯನ್ ಶಸ್ತ್ರ್ಚಿಕಿತ್ಸೆ ಮುಕಾಂತ್ರ್ ಜಾಲೊ. ಫೈಬ್ರೋಯ್ಡ್ ಭಾಯ್ಲ್ಯಾನ್ ಆಸ್ಲ್ಲ್ಯಾನ್ ಆನಿ ತೆ ವೆಳಾರ್ ತೆ ಕಾಡುಂಕ್ ಜಾಯ್ನಾತ್ಲ್ಲ್ಯಾನ್ ಕಾಡ್ಲೆ ನಾಂತ್. ಮ್ಹಜಿಂ ದೊಗಾಂಯ್ ಭುರ್ಗಿಂ ಬರ್ಯಾ ಭಲಾಯ್ಕೆನ್ ಆಸಾತ್. ಆತಾಂ ಮ್ಹಾಕಾ ಮಯ್ನ್ಯಾಚೊ ಸ್ರಾವ್ ಜಾತಾನಾ ಸುರ್ವಿಲೆ ದೋನ್ ದೀಸ್ ವಿಶೇಸ್ ರಗ್ತಾಸ್ರಾವ್ ಆಸ್ತಾ. ಸಾಂಗಾತಾ ಪೆಂಕ್ಟಾಂತ್ ಕಟೀಣ್ ದೂಕ್ ಆಸ್ತಾ. ಹೊ ಸಮಸ್ಸೊ ಫೈಬ್ರೋಯ್ಡ್ ಆಸ್ಲ್ಲ್ಯಾನ್ ಜಾವ್ಯೆತ್? ಫೈಬ್ರೋಯ್ಡ್ ಕಾಡಾಯ್ಜೆ?.
- ಶ್ರೀಮತಿ ವಿ.ಎಮ್. ಮುಂಬಯ್.
ಮಯ್ನ್ಯಾಚ್ಯಾ ಸ್ರಾವಾಚೆ ವೆಳಾರ್ ಚಡ್ ರಗತ್ ಸ್ರಾವ್ ಜಾಂವ್ಚೊ (menorrhagia) ಸಮಸ್ಸೊ ಸ್ತ್ರಿಯಾಂಚ್ಯಾ ಭಲಾಯ್ಕೆಚ್ಯಾ ಸಮಸ್ಸ್ಯಾಪಯ್ಕಿಂ ಪ್ರಮುಕ್. ಮಯ್ನ್ಯಾಚೊ ಸ್ರಾವ್ ಜಾಯಿತ್ತ್ ಆಸ್ಚ್ಯಾ ಸುಮಾರ್ ೩೦ಠಕ್ಕೆ ಸ್ತ್ರಿಯಾಂ ಥಂಯ್ ಹೊ ಸಮಸ್ಸೊ ಆಸ್ತಾ ಮ್ಹಣ್ ಅಂದಾಜ್. ಹಾಕಾ ಥರಾವೋಳ್ ಕಾರಾಣಾಂ ಆಸುನ್ ಜೊಕ್ತೆಂ ಕಾರಣ್ ಕಳಿತ್ ಜಾಲ್ಯಾರ್ ಚಿಕಿತ್ಸಾ ಫಳಾದಾಯೇಕ್ ಜಾವ್ಯೆತಾ. ಥೊಡ್ಯಾ ಸ್ತ್ರಿಯಾಂ ಥಂಯ್ ಸ್ರಾವ್ ತೀನ್ ದೀಸ್ ಮಾತ್ರ್ ಆಸ್ತಾ ಪೂಣ್ ಜಾಂವ್ಚೊ ಸ್ರಾವ್ ಚಡ್ ಆಸ್ತಾ ಆನಿ ಹೆರ್ ಥೊಡ್ಯಾಂ ಸ್ತ್ರಿಯಾಂ ಥಂಯ್ ಸ್ರಾವ್ ಪಾಂಚ್ ದೀಸ್ ಥಾವ್ನ್ ಏಕ್ ಹಫ್ತೊ ಪರ್ಯಾಂತ್ ಆಸ್ಯೆತಾ. ಚಡ್ ರಗತ್ ಸ್ರಾವ್ ಜಾಲ್ಲ್ಯಾನ್ ಸ್ತ್ರಿಯಾಂ ಥಂಯ್ ರಗತ್ ಉಣೊ ಜಾಂವ್ಚೊ ವಾ ಎನೀಮಿಯಾ ಸಮಸ್ಸೊ ಉಬ್ಜತಾ. ಎನೀಮಿಯಾವರ್ವಿಂ ಸ್ತ್ರಿಯಾಂ ಥಂಯ್ ಪಯ್ಲೆಂಚ್ ಚಡ್ ಆಸ್ಚೊ ಸ್ರಾವ್ ಆನಿಕ್ಯಿ ಚಡ್ ಜಾವ್ಯೆತಾ. ಎನೀಮಿಯಾವರ್ವಿಂ ಜೆರಾಲ್ ಭಲಾಯ್ಕಿಚ್ ಪಾಡ್ ಜಾವ್ನ್ ಸ್ತ್ರಿ ಸದಾಂ ಪಿಡೇಸ್ತ್ ತಸಲ್ಯಾ ಗತಿಕ್ ವಚತ್. ಜಾಯಿತ್ತ್ಯಾ ಸ್ತ್ರಿಯಾಂ ಥಂಯ್ ಭಲಾಯ್ಕಿ ಪಾಡ್ ಜಾಂವ್ಕ್ ಎನೀಮಿಯಾ ಪ್ರೇರಣ್ ಜಾವ್ನಾಸ್ತಾ.
ಚಡ್ ರಗ್ತಾಸ್ರಾವ್ ಜಾಂವ್ಕ್ ಸಭಾರ್ ಕಾರಣಾಂ ಆಸ್ತಾತ್. ತರ್ನ್ಯಾಪ್ರಾಯೆರ್ ಅಶೆಂ ಜಾಂವ್ಕ್ ರೊವ್ಯಾಂತ್ ನಿಯಮಿತ್ ಥರಾನ್ ತಾಂತಿಂ ವಾಡಾನಾತ್ಲ್ಲೆಂ ಪ್ರಮುಕ್ ಕಾರಣ್. ಕುಡಿಚಿ ಮೊಟಾಯ್ ಚಡ್ ಆಸ್ಚ್ಯಾ ಥೊಡ್ಯಾ ಸ್ತ್ರಿಯಾಂ ಥಂಯ್ ಆನಿ ಹಾರ್ಮೋನಾಚೆ ಸಮಸ್ಸೆ ಆಸ್ಚ್ಯಾ ಹೆರ್ ಥೊಡ್ಯಾ ಸ್ತ್ರಿಯಾಂ ಥಂಯ್ ತಾಂತಿಯಾಚಿ ವಾಡಾವಳ್ ಅವೆವಸ್ತ್ ಜಾಲ್ಲ್ಯಾನ್ ಮಯ್ನ್ಯಾಚ್ಯಾ ಸ್ರಾವಾಂತ್ ತಫಾವತ್ ಆನಿ ರಗ್ತಾಸ್ರಾವ್ ಚಡ್ ಜಾಂವ್ಚೊ ಸಮಸ್ಸೊ ಉಬ್ಜತಾ. ಹಾಕಾ ಜೊಕ್ತೆ ಹಾರ್ಮೋನ್ ದೀವ್ನ್ ಪರಿಗತ್ ಮಿತಿ ಭಿತರ್ ಹಾಡ್ಯೆತಾ. ಗರ್ಬ್ ಭಾಗಾಂಕ್ ಲಗ್ತಿ ನ್ಹಯ್ ಆಸ್ಲ್ಲೆ ಹೆರ್ ಥೊಡೆ ಹಾರ್ಂಒನ್, ತೆ ಪಯ್ಕಿಂಯ್ ಥೈರೋಯ್ಡ್ ಹಾರ್ಮೋನ್ ಚಡ್ಉಣೆ ಜಾಲ್ಯಾನ್ಯಿ ರಗ್ತಾಸ್ರಾವ್ ಚಡ್ ಜಾವ್ಯೆತ್.
ಗರ್ಬ್ಕೋಶಾಚೆ ಭಿತರ್ ಫೈಬ್ರೋಯ್ಡ್ ಆಸ್ಚೊ ಚಡ್ ರಗ್ತಾಸ್ರಾವಾಕ್ ಕಾರಣ್ ಜಾವ್ಯೆತ್, ತುಜೆಪರಿಂ ಗರ್ಬ್ಕೋಶಾಚೆ ಭಾಯ್ರ್ ಆಸ್ಚ್ಯಾ ಫೈಬ್ರೋಯ್ಡ್ ಘೆಟ್ಯಾವರ್ವಿಂ ರಗ್ತಾಸ್ರಾವ್ ಚಡ್ಚಿ ಸಾಧ್ಯತಾಯ್ ಉಣಿ. ಹೆರ್ ಥೊಡ್ಯಾ ಸ್ತ್ರಿಯಾಂಕ್ ರೊವ್ಯಾಂತ್ ಟ್ಯೂಮರ್ ಜಾಲ್ಯಾರ್, ಗರ್ಬ್ಧಾರಣ್ ಆಡಾಂವ್ಕ್ ಗರ್ಬ್ಕೋಶಾ ಭಿತರ್ ಲೂಪ್ ತಸಲಿಂ ಸಾದನಾಂ ದವರ್ಲ್ಲ್ಯಾನ್ಯಿ ರಗ್ತಾಸ್ರಾವ್ ಚಡೊಂಕ್ ಸಾಧ್ಯ್ ಆಸಾ.
ಪೆಂಕ್ಟಾದುಕಿಕ್ ಆನಿ ತುಕಾ ಚಡ್ ರಗ್ತಾಸ್ರಾವ್ ಜಾಂವ್ಚ್ಯಾಕ್ ಶೀದಾ ಲಗ್ತಿ ಆಸೊಂಕ್ ಪುರೊ. ಸ್ತ್ರಿಯಾಂ ಥಂಯ್ ಗರ್ಬ್ ಭಾಗಾಂಕ್ ಸಂಬಂದ್ ಜಾಲ್ಲ್ಯಾ ಸಮಸ್ಸ್ಯಾಂವರ್ವಿಂ ಪೆಂಕ್ಟಾಂತ್ ದೂಕ್ ಯೆಂವ್ಚಿ ಸಾಮಾನ್ಯ್.
ತುವೆಂ ಖಂಚ್ಯಾಯ್ ಸ್ತ್ರಿಯೆಂಚ್ಯಾ ಭಲಾಯ್ಕೆ ಸಂಬಂದ್ ಖಂಚ್ಯಾಯ್ ಬರ್ಯಾ ತಜ್ಞ್ ದಾಕ್ತೆರಾಂಕ್ ಭೆಟೊನ್ ತಾಂಚಿ ಸಲಹಾ ಘೆಂವ್ಚೆಂ ಬರೆಂ. ಪೊಟಾಚೆಂ ಸ್ಕ್ಯಾನಿಂಗ್ ಕೆಲ್ಯಾರ್ಚ್ ಸಮಸ್ಸೊ ಕಿತೆಂ ಮ್ಹಣ್ ಚಡ್ತಾವ್ ಕಳ್ತಾ. ಒಪ್ರೇಶನ್ ಕರಿಜೆ ಮ್ಹಳ್ಯಾರ್ ಎಕಾಪ್ರಾಸ್ ಚಡ್ ದಾಕ್ತೆರಾಂಚಿ ಸಲಹಾ ಘೆಂವ್ಚಿ ಬರೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
