ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 17.
ನಾಂವ್: ಮಾರ್ಕ್ ಡೆನಿಸ್ ಡಿ’ಸೋಜಾ.
ಜಲ್ಮಾಲ್ಲಿ ತಾರಿಕ್: 10 ಅಕ್ಟೋಬರ್ 1951.
ಆವಯ್ ಬಾಪಾಯ್ಚೆ ನಾಂವ್: ದೆವಾಧಿನ್ ತೆರೆಜ್ ಡಿ’ಸೊಜ್ ಆನಿ ದೆವಾಧಿನ್ ಸಾಲ್ವಾದೊರ್ ಡಿ’ಸೊಜ್.
ಶಿಕಾಪ್: ಪ್ರೈಮರಿ ಶಿಕಾಪ್ ನಿಡ್ಡೋಡಿ, ತ್ಯಾ ನಂತರ್ ಪೊಂಪೈ ಹಾಯ್ಸ್ಕೂಲ್ ಕಿರೆಂ, ತ್ಯಾ ನಂತರ್ ಬೊಂಬಯ್.
ಲಗ್ನ್: 3 ಮಾಯ್ 1977.
ಪತಿಣ್: ಲೆನ್ನಿ ಡಿ’ಸೋಜ್.
ಭುರ್ಗಿ: ಲವಿಟಾ, ರೆನಿಟಾ, ರಾಯನ್, ಡೆಮಿಯಿನ್.
[ಮಾನೆಸ್ತ್ ಮಾರ್ಕ್ ಡೆನಿಸ್ ಡಿ’ಸೋಜ್ ಆನಿ ತಾಚ್ಯಾ ಪತಿಣೆಸವೆಂ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ಅಜೂನ್ ದೆಖೊಂಕ್ ನಾ, ಮುಖಾಮುಖಿಂ ಮೆಳೊಂಕ್ ನಾಂ ತರ್ಯೀ, ಹಾಚೆವಿಶಿಂ, ಹಾಚ್ಯಾ ಕೊಂಕ್ಣಿ ಮೊಗಾವಿಶಿಂ ಜಾಯ್ತೆಂ ಆಯ್ಕೊನ್ಂಚ್ ಹಾಚೊ ಅಭಿಮಾನಿ ಜಾಲಾಂ. ಪಾಟ್ಲ್ಯಾ ತೀನ್ ದಾಕ್ಡ್ಯಾಂ ಥಾವ್ನ್ ದುಭಾಯಾಂತ್ ಏಕ್ ಬರೊ ಉಧ್ಯಮಿ ಜಾವ್ನ್ ಹಾಚ್ಯಾ ಚಾಲ್ ಚಮ್ಕೊಣೆಂತ್ ಲ್ಹಾನ್ವಿಕಾಯ್, ಸಾದೆಂಪಣ್, ಖಾಲ್ತೆಂಪಣ್ ಆನಿ ಗರ್ಜೆವಂತಾಂಕ್ ಹಾಣೆಂ ದಿಂವ್ಚೊ ಮೋಗ್ ಖರೆಂಚ್ ಜಾವ್ನ್ ’Simplicity is the sign of greatness’ ಮ್ಹಳ್ಳ್ಯಾ ಇಂಗ್ಲಿಶ್ ಸಾಂಗ್ಣೆಚೊ ಉಗ್ಡಾಸ್ ಕರುನ್ ದಿತಾ. ಕೊಂಕ್ಣಿ ವಾವ್ರಾಕ್ ಲಾಗ್ಲ್ಲ್ಯಾ ಹರ್ಯೆಕ್ಲ್ಯಾಂಕ್ ಆಪ್ಲ್ಯಾ ತಾಂಕಿಚೊ ಪಾಟಿಂಬೊ ದಿಂವ್ಚೊ ಹೊ ಖರೊಚ್ ಎಕಾ ದೇವ್ ಭಿರಾಂತೆಚ್ಯಾ ಕುಟ್ಮಾಚೊ ತಶೆಂಚ್ ಏಕ್ ಕೊಂಕ್ಣಿ ಮೋಗಿ ಮ್ಹಣ್ಚ್ಯಾಂತ್ ದುಭಾವ್ ನಾ. ಹಾಕಾ ದಾಯ್ಜ್ ಕಾರ್ಭಾರಿ ಮ್ಹಣ್ ವಳ್ಕೊನ್ ಮಾನ್ ಕರುಂಕ್ ಖರೆಂಚ್ ಜಾವ್ನ್ ಆಮ್ಕಾಂ ಅಭಿಮಾನ್ ಭಗ್ತಾ. ಹಾಚೆತಸಲ್ಯಾ ಮುಖೆಲ್ಯಾಂಚಿ ಆಮ್ಚಾ ಸಮಾಜೆಕ್ ಭೋವ್ ಗರ್ಜ್ ಆಸಾ. -ಸಂ.
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ.
1. ತುಮಿ (Canara Entrepreneurs Limited) ಸಂಸ್ಥ್ಯಾಚೊ ಸ್ಥಾಪಕ್ ಸಾಂದೊ ತಶೆಂಚ್ ನಿರ್ದೇಶಕ್, ತಶೆಂಚ್ ’ಕರ್ನಾಟಕ ಸಂಘ ಶಾರ್ಜಾ’ಚೊ ಪಾತ್ರೊನ್. ತುಮ್ಚಾ ಸಮಾಜ್ಸೆವೆವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾ: ಮ್ಹಾಕಾ ವ್ಹರ್ತೊ ಸಂತೊಸ್ ಭಗ್ತಾ, ಕಿತ್ಯಾ 2003 ಪರ್ಯಾಂತ್ ಶಾರ್ಜಾಂತ್ ಎಕ್ಯೀ ಸಂಘ್ ಸಂಸ್ಥೆ ನಾತ್ಲ್ಲೆ. ತಶೆಂ ಸಭಾರ್ ಜಣಾಂಚ್ಯಾ ಒತ್ತಾಯೆಕ್ ಲಾಗೊನ್ ಆಮಿ ಏಕ್ ಸಂಘ್ ಘಡೊಂಕ್ ನಿರ್ಧಾರ್ ಕೆಲೊ. ಉಮೇಶ್ ನಂತೂರ್ಚ್ಯಾ ಅಧ್ಯಕ್ಷ್ಪಣಾಖಾಲ್ ಹೊ ಸಂಘ್ ಆಮಿ ಘಡ್ಲೊ. ಹಾಂವ್ ಚಡಾವತ್ ಹ್ಯಾ ಸಂಘಚ್ಯಾ ಖಂಚಾಯ್ ವಿಶಯಾಂತ್ ಮೆತೆರ್ ಜಾಯ್ನಾಂ ಪುಣ್ ಹರ್ ರಿತಿಚೊ ಸಹಕಾರ್ ದೀವ್ನ್ ಆಸಾ.
2. ಹ್ಯಾ ಸಂಘಾ ಥಾವ್ನ್ ಕಸಲ್ಯಾ ರಿತಿಚಿಂ ಕಾಮಾಂ ತುಮಿಂ ಕರ್ನ್/ಕರವ್ನ್ ಆಸಾತ್?
ಜಾ: ಲೊಕಾಂಚ್ಯಾ ಬರ್ಯಾಪಣಾಚಿಂ ಕಸಲಿಂಯೀ ಕಾರ್ಯಿಂ ಮಾಂಡುನ್ ಹಾಡುಂಕ್ ಉತ್ತೇಜನ್ ಆನಿಂ ಯೋಜನಾ ತಾಂಚಾ ಗಮನಾಕ್ ಹಾಡ್ಚಿ. ಎದೊಳ್ಚ್ಚ್ ಹ್ಯಾ ಸಂಘಾ ಥಾವ್ನ್ ಬರೆಂ ನಾಂವ್ ಆಸಾ. ಪಯ್ಲೆ ಪಾವ್ಟಿಂ ಗಾಂವಾ ಥಾವ್ನ್ ಆಯಿಲ್ಲ್ಯಾ ಕ್ರೀಸ್ರಾಂವ್ ಗಣ್ಯವ್ಯಕ್ತಿಂಕ್ ಮ್ಹಣ್ಜೆ ಫಾದರ್ ಡೆನಿಸ್ ಡೆಸಾ, ಎರಿಕ್ ಒಜೆರಿಯೊ, ವಿಕ್ಟರ್ ರೊಡ್ರಿಗಸ್ ಹಾಂಕಾಂ ಮಾನ್ ಸನ್ಮಾನ್ ಕರ್ನ್, ತಾಂಚಿ ಪ್ರತಿಭಾ ಆನಿ ವ್ಯಕ್ತಿತ್ವ್ ಕರ್ನಾಟಕಚ್ಯಾ ದುಸ್ರ್ಯಾ ಲೊಕಾಂಕ್ ಕರ್ನ್ ದಿಲ್ಯಾ. ಅಧ್ಲ್ಯಾ ವರ್ಸಾ ರಗ್ತಾದಾನ್ ಶಿಬಿರ್ ಆಸಾ ಕರುನ್ 45 ಜಣಾಂನಿ ಜಿ. ಎಮ್. ಸಿ. ಆಸ್ಪತ್ರೆಕ್ ಆನಿ ಶಾರ್ಜಾ ಗವರ್ನ್ಮೆಂಟ್ ಆಸ್ಪತ್ರೆಕ್ ದಾನ್ ಕೆಲಾ. ತ್ಯಾ ಶಿವಾಯ್ 10 ಜಣಾಂ ಜೈಲಾರ್ಯಾಂಕ್ ಟಿಕೆಟಿಚೊ ಖರ್ಚ್ ದೀವ್ನ್ ಆಪ್ಲ್ಯಾ ಮಾಂಯ್ಗಾಂವಾಕ್ ವಚೊಂಕ್ ಕುಮೊಕ್ ಕೆಲ್ಯಾ. ಸಾಂದ್ಯಾ ಪೈಕಿ ಕೊಣೀ ಅಂತರ್ಲೊ ತರ್ ತಾಂಚ್ಯಾ ಕುಟ್ಮಾಕ್ ದುಡ್ವಾ ಕುಮೊಕ್ ಕರ್ತಾಂವ್. ತ್ಯಾ ಶಿವಾಯ್ ವರ್ಸಾಕ್ ದೋನ್ ಪಾವ್ಟಿಂ ಕುಟ್ಮಾಚೆಂ ಪಿಕ್ನಿಕ್ ದವರ್ನ್ ಎಕಾಮೆಕಾಚಿ ವಳೊಕ್ ಜಾಯ್ಶೆಂ ಕರ್ತಾಂವ್. ಹ್ಯಾ ಪರ್ದೆಶಿ ಗಾಂವಾಂತ್ ಜಾತ್ ಭೇಧ್ ನಾಸ್ತಾನಾ ಎಕಾಮೆಕಾ ಆಧಾರ್ಸುನ್ ಸುಧಾರ್ಸುನ್ ಜಿಯೆಂವ್ಚೆಂ ಪ್ರಯತನ್ ಕರ್ನ್ ಆಸಾಂವ್. ತ್ಯಾ ಶಿವಾಯ್ ಸುರ್ವೆರ್ ಥಾವ್ನ್ ವಾವ್ರ್ ಕರ್ನ್ ಆಸ್ಲ್ಲ್ಯಾಂಕ್ ಹರ್ಯೇಕ್ ವರ್ಸಾ ಮತದಾನ್ ಕರ್ನ್ ವಿಂಚುನ್ ಕಾಡ್ಚ್ಯಾ ಮುಖಾಂತ್ರ್ ಹರ್ಯೇಕ್ಲ್ಯಾಕ್ ಮುಖೆಲಿ ಜಾಂವ್ಚೊ ಅವ್ಕಾಸ್ ಕರ್ನ್ ದಿತಾಂವ್.
3. ಕೊಂಕ್ಣೆಚ್ಯಾ ಹರ್ಯೇಕಾ ಕಾಮಾಂತ್ ತುಮಿ ತುಮ್ಚೊ ಮೊಟೊ ಸಹಕಾರ್ ದೀವ್ನ್ ಆಸಾತ್? ಹೆಂ ಕಿತ್ಲ್ಯಾ ಮಟ್ಟಾಕ್ ಗರ್ಜೆಚೆಂ ಮ್ಹಣ್ ತುಮ್ಕಾ ಭಗ್ತಾ?
ಜಾ: ಮನ್ಶ್ಯಾಚಿ ಜಿಣಿಂ ನಾಣ್ಯಾಚ್ಯಾ ದೋನ್ ಕುಶಿಂ ಬರಿಂ, ಏಕ್ ಆಮಿ ಪಯ್ಣಾರಿ, ದುಸ್ರಿ ಕೂಸ್ ಆಮ್ಚೊ ಉದ್ದೇಶ್ ಪಯ್ಣಾರ್ ಆಸ್ತಾನಾ ಆಮಿ ತ್ಯಾ ತ್ಯಾ ಹಂತಾರ್ ಮ್ಹಣ್ಜೆ ತರ್ನಾಟ್ಪಾಣಾರ್, ಮಾತಾರ್ಪಣಾರ್ ಆಮ್ಕಾ ದೆವಾನ್ ದಿಲ್ಲೊ ಉದ್ದೇಶ್ ಪರಿಪೂರ್ಣ್ ಕರಿನಾ ತರ್ ಜೀವನ್ ಸಾರ್ಥಕ್ ಜಾಯ್ನಾ. ತ್ಯಾ ತ್ಯಾ ಹಂತಾರ್ ಜವಾಬ್ದಾರಿ ಆಸ್ತಾತ್. ತ್ಯೊ ಉಣ್ಯೊ ಜಾಂವ್ ಚಡ್ ಜಾಂವ್ ತಿ ದುಸ್ರಿ ಗಜಾಲ್. ಶಿಕ್ತಾನಾ ಶಿಕೊಂಕ್ ಆಸಾ, ಆಮ್ಕಾ ಹರ್ಯೇಕಾ ಹಂತಾನಿ ಜವಾಬ್ದಾರಿ ಮ್ಹಣ್ಜೆ ಸಮಾಜ್, ಆಮಿ ಜಲ್ಮಾಲ್ಲೊ ಗಾಂವ್, ಫಿರ್ಗಜ್, ಸೆಜ್ಸಾಂಬಾರ್ ಹಾಂಚೆ ವಯ್ರ್ ಮನ್ಶ್ಯಾಚಿಂ ಕರ್ತವ್ಯಾಂ ಮ್ಹಳ್ಳ್ಯೊ ಆಸ್ತಾ. ನಾಂತರ್ ಮನಿಸ್ ಎಕಾ ಜಾನ್ವಾರಾಪರಿಂ. ವ್ಹಡ್ ಜಾತಾನಾ ಹೆರಾಂ ಸಾಂಗಾತಾ ಭರ್ಸೊನ್ ಹೆರಾಂಚ್ಯಾ ಗರ್ಜಾಂತ್ ಪಾವಾಜೆ ಪಡ್ತಾ. ಆತಾಂ ಮ್ಹಜ್ಯಾ ಗಾಂವಾಂತ್ ಹಾಂವೆ ಬರೆಪಣ್ ಕರ್ನಾ ತರ್ ಭಾಯ್ಲ್ಯಾಂ ಥಾವ್ನ್ ಕಿತೆಂಚ್ಚ್ ಆಶೆಂವ್ಕ್ ಜಾಯ್ನಾಂ. ಹೆಂ ಮ್ಹಜೆ ಏಕ್ ಕರ್ತವ್ಯ್ ಮ್ಹಣ್ ಹಾಂವೆಂ ಮಾನುನ್ ಘೆತ್ಲಾಂ ಸೊಡ್ನ್ ಮ್ಹಜ್ಯಾ ಸ್ವಾರ್ಥಾಖಾತಿರ್ ವಾ ನಾಂವ್ ಜೊಡ್ಚಿ ಆಶೆನ್ ನ್ಹಂಯ್.
4. ಕೊಂಕ್ಣಿ ಭಾಶೆಥಂಯ್ ಆನಿಂ ಕೊಂಕ್ಣಿ ವಾವ್ರಾಥಂಯ್ ತುಮ್ಕಾಂ ಕಶಿ ವೋಡ್ ಆಯ್ಲಿ. ತುಮ್ಕಾಂ ತುಮ್ಚ್ಯಾ ಸಮಾಜಿಕ್ ವಾವ್ರಾಂತ್ ಕಾಂಯ್ ಆಡ್ಕಳ್ಯೊ ಆಯ್ಲ್ಯಾತ್ಗೀ?
ಜಾ: ಆಡ್ಕಳ್ಯೊ ಜಾಯ್ತ್ಯೊ ಯೆತಾತ್, ತ್ಯೊ ಮತಿಂತ್ ದರುಂಕ್ ಜಾಯ್ನಾ. ಸಮಾಜೆಂತ್ ಮನಿಸ್ ಬರೆ ಕೆಲ್ಯಾರೀ ಉಲಯ್ತಾ, ವಾಯ್ಟ್ ಕೆಲ್ಯಾರೀ ಉಲಯ್ತಾ. ಮ್ಹಜೆಂ ಚಿಂತಾಪ್ ಕಸಲೆಂಗೀ ಮ್ಹಳ್ಯಾರ್ ತುಜೆಲಾಗಿಂ ಉಜ್ವಾಡ್ ಆಸಾ, ತೊ ವ್ಹರ್ನ್ ಮಾರ್ಗಾರ್ ದವರ್ ವಾಟೆನ್ ವೆಚೊ ವಾಟ್ಸುರೊ ತ್ಯಾ ಉಜ್ವಾಡಾಕ್ ಮುಕಾರ್ ಚಮ್ಕಾತಲೊ ಆನಿ ಆಪ್ಲ್ಯಾ ಠಿಕಾನ್ಯಾಕ್ ಪಾವ್ತಲೊ. ಆನಿ ಕೋಣ್ ತೊ ಉಜ್ವಾಡ್ ರಾನಾಂತ್ ದವರ್ತಾ ತೊ ನಿರ್ಫಳ್ ಜಾತಲೊ. ತಶೆಂ ಜಾಲ್ಲ್ಯಾನ್ ಮ್ಹಜ್ಯಾ ಕೊಶೆಡ್ದಾ ಫರ್ಮಾಣೆ ಮ್ಹಜೆಂ ಏಕ್ ಕರ್ತವ್ಯ್ ಮ್ಹಣ್ ಕರ್ಚೆ. ಮ್ಹಜೊ ಏಕ್ ಗುರು ಆಸ್ಲ್ಲೊ ತಾಚಿ ಏಕ್ ಸಾಂಗ್ಣಿಂ ಆಸ್ಲ್ಲಿ "ಮನಿಸ್ ಕೊರೊಡಾಂನಿ ಜಲ್ಮಾತಾ ಆನಿ ಮೊರ್ತಾ, ಕೋಣ್ ತೊ ಕಾಂಯ್ ತರೀ ಹೆರಾಂ ಖಾತಿರ್ ಕರ್ತಾ ತೊ ಮೆಲ್ಯಾ ನಂತರ್ ಚಾರ್ ದೀಸ್ ತರೀ ಲೊಕಾಚ್ಯಾ ಉಗ್ಡಾಸಾಂತ್ ಆಸ್ತಾ". ಹೆ ಉತಾರ್ ಹಾಂವೆ "ಬೆಳೆಂ ಜಾಯ್ತೆಂ ಆಸಾ, ಪುಣ್ ವಾವ್ರಾಡಿ ಥೊಡೆಚ್ಚ್" ಹ್ಯಾ ಉತ್ರಾಕ್ ಸರಿ ಕೆಲಾಂ ಆನಿ ಹೆಂ ಸತ್ ಜಾವ್ನಾಸಾ.
5. ಕೊಂಕ್ಣೆಂತ್ ಆತಾಂ ಆಸ್ಚೊ ಲಿಪಿಚೊ ವಾದ್ ಕಿತ್ಲ್ಯಾ ಮಾಪಾನ್ ಸಾರ್ಕೊ ಮ್ಹಣ್ ತುಮ್ಕಾಂ ಭಗ್ತಾ?
ಜಾ: ಲಿಪಿಚೊ ವಾದ್ ಹಾಂಗಾ ಯೆಂವ್ಕ್ಚ್ಚ್ ಸಾಧ್ಯ್ ನಾ. ಆಮಿ ಇಸ್ಕೊಲಾಂತ್ ಕನ್ನಡ ಶಿಕ್ಲ್ಲ್ಯಾನ್ ಆಮಿ ಕನ್ನಡ ಬರಯ್ತಾಂವ್, ತುಳು ಬರಯ್ತಾಂವ್, ಕೊಂಕ್ಣಿ ಬರಯ್ತಾಂವ್. ಆನಿ ಆತಾಂ ಆಮ್ಕಾಂ ಪರ್ತ್ಯಾನ್ ಇಸ್ಕೊಲಾಕ್ ವಚೊನ್ ದುಸ್ರಿ ಲಿಪಿ ಶಿಕೊಂಕ್ ಸಾಧ್ಯ್ ನಾ. ಲಿಪಿಕ್ ಚಡ್ ಮಹತ್ವ್ ದೀನಾಸ್ತಾ ಆಮ್ಚಿ ಕೊಂಕ್ಣಿ ಭಾಸ್ ಉರಯ್ಜೆ ಮ್ಹಳ್ಳೆ ಚಿಂತಾಪ್ ಮತಿಂತ್ ದವರ್ನ್ ಎಕಾ ಮನಾನ್ ವಾವ್ರ್ ಕೆಲ್ಯಾರ್ ಲಿಪಿಚೊ ವಾದ್ ಸಂಪೂರ್ಣ್ ಥರಾನ್ ಕಾಡ್ನ್ ಸೊಡ್ಯೆತ್.
6. ಶಾಳಾಂನಿ ಆತಾಂ ಕೊಂಕ್ಣಿ ಭಾಸ್ ಶಿಕಂವ್ಕ್ ಆವ್ಕಾಸ್ ಆಸಾ. ಪುಣ್ ಆಯ್ಚಿಂ ಭುರ್ಗಿಂ ಕಿತ್ಲ್ಯಾ ಮಟ್ಟಾನ್ ಹೆಂ ಸ್ವೀಕಾರ್ ಕರ್ತಿತ್, ಮ್ಹಣ್ಜೆ ಆತಾಂಚ್ಯಾ ಭುರ್ಗ್ಯಾಂಕ್ ಕನ್ನಡ ಶಿಕೊಂಕ್ ಕಷ್ಟ್ ಮಾರ್ಚ್ಯಾ ಹ್ಯಾ ಕಾಳಾರ್ ಭುರ್ಗಿಂ ಕೊಂಕ್ಣಿ ಬರಂವ್ಕ್ ಸಕ್ತಿತ್ಗೀ?
ಜಾ: ಜೆಂ ಕಿತೆಂ ಶಾಳಾಂನಿ ಕೊಂಕ್ಣಿ ಶಿಕಾಪ್ ಆಯ್ಲಾ ತೆಂ ಸಂತೊಸಾಚಿ ಗಜಾಲ್ ಆನಿ ಕೊಂಕ್ಣೆಚ್ಯಾ ಚರಿತ್ರೆಕ್ ಏಕ್ ಮುಕುಟ್ ದವರ್ಲ್ಲೆಪರಿಂ. ಪುಣ್ ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಸಾಂಗ್ಚೆ ತರ್ ಕೊಂಕ್ಣಿ ಘರಾಣ್ಯಾಂನಿ ಜಲ್ಮಾಲ್ಲ್ಯಾ ಹರ್ಯೇಕ್ಲ್ಯಾನ್ ಲಜೆನಾಸ್ತಾಂ ದಾಕ್ಷೆನಾಸ್ತಾಂ ಕೊಂಕ್ಣಿಂ ಉಲೈಲ್ಯಾರ್ ತಾಚ್ಯಾಕೀ ವ್ಹರ್ತೆಂ ಕೊಂಕ್ಣೆಂತ್ ದುಸ್ರೆ ಕಿತೆಂಯ್ ಜಾಯ್ ಮ್ಹಣ್ ನಾ. ವ್ಹಡಿಲಾಂನಿ ಜರ್ ಅಪ್ಲ್ಯಾ ಭುರ್ಗ್ಯಾಂಕ್ ಕೊಂಕ್ಣೆಚಿ ಖರಿ ವಳೊಕ್ ಕರ್ನ್ ದೀವ್ನ್ ಕೊಂಕ್ಣಿ ಉಲಂವ್ಕ್ ಆನಿ ಬರಂವ್ಕ್ ಮಜತ್ ಕರ್ತಿತ್ ತರ್ ಖಂಡಿತ್ ಜಾವ್ನ್ ಆಮ್ಚಿ ಭುರ್ಗಿಂ ಉರ್ಭೆನ್ ಕೊಂಕ್ಣಿಂ ಅಪ್ಣಾಯ್ತೆಲಿಂ ಮ್ಹಣ್ಚ್ಯಾಂತ್ ದುಭಾವ್ ನಾ.
7. ಕೊಂಕ್ಣಿ ಅಂತರ್ಜಾಳಿ ಆನಿ ಪತ್ರಾಂದ್ವಾರಿಂ ಕೊಂಕ್ಣೆಚಿ ಕಿತ್ಲ್ಯಾ ಮಟ್ಟಾಕ್ ವ್ಯದ್ಧಿ ಜಾಲ್ಯಾ ಮ್ಹಣ್ ತುಮ್ಚಿ ಅಭಿಪ್ರಾಯ್?
ಜಾ: ಅಂತರ್ಜಾಳಿಂನಿ ಆನಿ ಪತ್ರಾಂಧ್ವಾರಿಂ ಕೊಂಕ್ಣಿ ಇತ್ಲಿ ವಾಡ್ಲ್ಯಾಗೀ ಆತಾಂ ಕೊಂಕ್ಣೆನ್ಂಚ್ಚ್ ಸಂಪರ್ಕ್ ಜಾತಾ. ಮಿಡಿಯಾ ಮಾಧ್ಯಮಾದ್ವಾರಿ ಕೊಂಕ್ಣೆಚಿ ಬರೀ ವ್ಯದ್ಧಿ ಜಾಲ್ಯಾ. ಸಮಾಜೆಂತ್ ದಾಕ್ಟೊ ಜಾಂವ್ದಿ ವ್ಹಡ್ಲೊ ಜಾಂವ್ದಿ ತೊ ಕೊಂಕ್ಣಿ ಉಲೊಂವ್ಕ್ ಲಜೆನಾ. ಪಯ್ಲೆ ಲೊಕ್ ಕೊಂಕ್ಣಿ ಉಲೊಂವ್ಕ್ ಲಜೆತಾಲೊ ಆನಿ ಕೊಂಕ್ಣಿ ಉಲೊಂವ್ಚಿ ಆಶಿಕ್ಪ್ಯಾನಿ ಮ್ಹಣ್ ಚಿಂತಾಲೊ. ಆತಾಂ ಹೆಂ ಚಿಂತಾಪ್ ಆಳ್ವೊನ್ ಆಯ್ಲಾ. ಕೊಂಕ್ಣಿ ಸಮಾಜೆಕ್ ಬರೊ ಫುಡಾರ್ ಆಸಾ ಮ್ಹಳ್ಳೆ ಧೃಡ್ ಪಾತ್ಯೆವ್ಯೆತ್.
8. ಕೊಂಕ್ಣೆಂತ್ ಸಭಾರ್ ಹಾಫ್ತಾಳಿಂ, ತಶೆಂಚ್ಚ್ ದಿಸಾಳಿಂ ಆಯ್ಲಿ ಆನಿ ತಾಂತುಂ ಥೊಡಿ ನಾಂವ್ ನಾಸ್ತಾ ಮಾಯಾಗ್ ಜಾಲಿ. ಹಾಕಾ ಕಾರಾಣ್ ಕಸಲೆ?
ಜಾ: ಕೊಂಕ್ಣೆಚೆಂ ಬರೆಪಣ್ ಆಶೆವ್ನ್ ಶೆಂಬೊರ್ ಪತ್ರಾಂ ಇತ್ಲ್ಯಾ ಲ್ಹಾನ್ ಸಮಾಜೆಂತ್ ಕಾಡಿಜೆ ಮ್ಹಣ್ ನಾ. ಏಕಾ ಪತ್ರಾಂತ್ ಕಾಮ್ ಕರ್ನ್ ಇಲ್ಲಿ ಜಾಣ್ವಾಯ್ ಮೆಳ್ಳಿ ಮ್ಹಣ್ತಾನಾ ತೊ ವಚೊನ್ ತಾಚೆ ವಿಂಗಡ್ ಪತ್ರ್ ಸುರು ಕರ್ತಾ. ಆಸಲೆ ಚಿಂತಾಪ್ ಬರೆಂ ನ್ಹಂಯ್. ಜರ್ ಶೆಂಬೊರ್ ಪತ್ರಾಳಿಂ ಆಸ್ಲ್ಯಾರ್ ಕೊಣ್ ವಾಚ್ತಾ. ಕೊಂಕ್ಣೆಂತ್ ಪತ್ರಾಂ ಕಾಡ್ನ್ ಲಾಭ್ ಕರ್ಯೆತ್ ಮ್ಹಳ್ಳೆಂ ಚಿಂತಾಪ್ ಆಸೊನ್ ಹೆರಾಂಚೊ ದುಡು ಘಾಲ್ನ್ ಪತ್ರಾಂ ಕಾಡ್ಲ್ಯಾರ್ ಕಾಂಯ್ ಫಾಯ್ದೊ ನಾ. ಸ್ಪರ್ಧೊ ಜಾಯ್ ಪುಣ್ ಪತ್ರಾಂ ಕಿತ್ಲೊ ಲೋಕ್ ವಾಚ್ತಾ ಆನಿ ಕಸಲೆ ವಾಚಾಪ್ ಆಮಿ ಲೊಕಾಕ್ ದೀಜಾಯ್ ಆನಿ ದೀಂವ್ಕ್ ಸಕ್ತಾಂವ್ ಮ್ಹಳ್ಳೆ ಸಮ್ಜೊನ್ ಘೆಜೆ. ಪತ್ರಾಂ ಮಣ್ಜೆ ರಾಜಕಾರಣಿ ಬರಿ, ಎಕಾ ಪಂಗ್ಡಾಂತ್ ಗುಸ್ಪಡ್ ಜಾಲಿ ತರ್ ತೊ ಆನ್ಯೇಕ್ ಪತ್ರ್ ರಚ್ತಾ. ತ್ಯಾಚ್ಚ್ ಖಾತಿರ್ ಸಭಾರ್ ಜಣ್ ಕೊಂಕ್ಣೆ ಥಾವ್ನ್ ಪಯ್ಸ್ ಧಾಂವ್ಲ್ಯಾತ್. ಪ್ರಜಾಪ್ರಭುತ್ವಾಂತ್ ಜಿಯೆವ್ನ್ ಆಸ್ತಾಂ ಆಮಿ ದುಸ್ಮಾನಾಂಕ್ ಕಶ್ಟಾರ್ ಘಾಲ್ಚೆಂ ನ್ಹಂಯ್. ಆಪ್ಣಾಲಾಗಿಂ ದೆಣೆಂ ಆಸಾ ಮ್ಹಣ್ ಲೊಕಾಜೆ ಪಯ್ಶ್ಯೆ ಘೆವ್ನ್ ಚ್ಯಾರ್ ದೀಸ್ ಪತ್ರ್ ಚಲೊವ್ನ್ ಮಾಗಿರ್ ಬಂಧ್ ಕರ್ಚಾಕ್ ’ಪತ್ರಿಕೋಧ್ಯಮ್’ ಮ್ಹಣ್ ಹಾಂವ್ ಮಾಂದಿನಾ.
9. ಕೊಂಕ್ಣೆಂತ್ ವಾವ್ರಾಕ್ ಲಾಗ್ಚೆ ಭೋವ್ಚ್ಚ್ ಉಣೆಂ, ಪುಣ್ ತಾಂಚೇಯ್ ಪಾಯ್ ವೋಡ್ನ್ ಸಕೈಲ್ ಘಾಲ್ತೆಲೆ ಚಡ್ ಆಸಾತ್. ಹ್ಯಾ ವಿಶಿ ತುಮ್ಚಿ ಅಭಿಪ್ರಾಯ್ ಕಿತೆಂ?
ಜಾ: ಹ್ಯಾ ವಿಶಿಂ ಸಾಂಗ್ಚೆ ತರ್ ಹೆಂ ಸದಾಂಚೆ ಜಾಲಾ. ಖಂಯ್ಸರ್ ಬರೆಂ ಆಸಾ ಥಂಯ್ಸರ್ ವಾಯ್ಟ್ ಆಸಾಚ್ಚ್. ಜರ್ ತರ್ ತುಂ ಕೊಂಕ್ಣೆಚಿ ನಿಸ್ವಾರ್ಥ್ಪಣಿಂ ಸೆವಾ ಕರ್ತಾಯ್ ತರ್ ಹ್ಯಾ ವಿಶಿಂ ಕೆದಿಂಕ್ಚ್ಚ್ ಚಿಂತ್ಚೆ ನ್ಹಂಯ್. ಕೊಣೀ ವೋಡ್ನ್ ಸಕೈಲ್ ಘಾಲುಂಕ್ ಪ್ರಯತನ್ ಕರ್ತಾ ತರ್ ಕೆದಿಂಕ್ಚ್ಚ್ ಭಿಂಯೆಂವ್ಚೆಂ ನ್ಹಂಯ್. ಸಮಾಜ್ ಹೆಂ ಸರ್ವ್ ದೆಕ್ತಾ, ಬರ್ಯಾ ವಾಯ್ಟಾಚೆ ತುಲನ್ ಕರ್ತಾ. ಹೆಂ ಖಂಯ್ಸರ್ ಪಾವ್ತಾಗೀ ಮ್ಹಳ್ಯಾರ್ ಮನ್ಶ್ಯಾಚೆ ಉಣೆಂ ಶಿಕಾಪ್, ಉಣೆಂ ಚಿಂತ್ಪಾಚೆಂ, ಆನಿ ಉಣಿ ಸಮ್ಜೊನ್ ದಿಸೊನ್ ಯೆತಾ.
10. ತುಮಿ ಸುಮಾರ್ ತೀಸ್ ವರ್ಸಾಂ ಥಾವ್ನ್ ಗಲ್ಫಾಂತ್ ಉದ್ಯಮ್ ಚಲವ್ನ್ ಆಸ್ಲ್ಯಾರ್ಯೀ ತುಮ್ಚೆ ಥಂಯ್ ಸಾದೆಂಪಣ್ ಆಸಾ. ಆನಿಂ ಕೊಂಕ್ಣಿ ಭಾಸ್ ತುಮಿ ಆಜೂನೀ ವಿಸ್ರೊಂಕ್ ನಾಂತ್. ಹ್ಯಾ ವಿಶಿಂ ತುಮಿ ಕಿತೆಂ ಸಾಂಗೊಂಕ್ ಆಶೆತಾತ್?
ಜಾ: ಕೊಂಕ್ಣಿ ಮ್ಹಜಿ ಮಾಂಯ್ಭಾಸ್. ಆಮಿ ಕಿತ್ಲಿ ಪರ್ಗಾಂವಾಂತ್ ರಾವ್ಲ್ಯಾರೀ ತಿ ವಿಸ್ರೊಂಕ್ ಸಾಧ್ಯ್ ನಾ. ಹಾಂವ್ ನೋವ್ ಭಾಸಾಂನಿ ಉಲೊಂವ್ನ್ ಲೊಕಾಲಾಗಿಂ ಸಂಪರ್ಕ್ ಕರುಂಕ್ ಸಕ್ತಾಂ ತರ್ಯೀ ಕೊಂಕ್ಣಿ ಮ್ಹಜಿ ಮಾಂಯ್ಭಾಸ್, ಹಾಂವ್ ಕೊಂಕ್ಣಿ ಮಾಯೆಚ್ಯಾ ಉಸ್ಕ್ಯಾರ್ ವ್ಹಡ್ ಜಾಲ್ಲೊಂ ದೆಕುನ್ ಹಾಂವ್ ಕೊಂಕ್ಣಿ ಉಲಯ್ತಾಂ. ಆನಿ ಕೊಂಕ್ಣಿ ಉಲಂವ್ಕ್ ಮ್ಹಾಕಾ ಲಜ್ ಕೆದಿಂಕ್ಚ್ಚ್ ದಿಸಾನಾ.
11. ಫಿಂರ್ಗಿ ಭಾಶೆ ಥಂಯ್ ಆಕರ್ಶಿತ್ ಜಾಲ್ಲ್ಯಾ ಆಮ್ಚಾ ಸಭಾರ್ ಲೊಕಾಕ್ ಆತಾಂ ಕೊಂಕ್ಣಿ ಉಲಂವ್ಚೆಂ ಮ್ಹಳ್ಯಾರ್ ಫ್ಯಾಶನ್ ಜಾಲಾಂ. ಆಶೆಂ ಕಿತ್ಯಾಕ್?.
ಜಾ: ಪಯ್ಲೆ ಉಚಾರ್ಲ್ಲೆಪರಿಂ ಕೊಂಕ್ಣಿ ಉಲವ್ನ್ ಫುಡಾರ್ ಕರುಂಕ್ ಜಾಯ್ನಾಂ. ಆದಿಂ ಆವಯ್ ಬಾಪಾಯ್ಕ್ ಇಂಗ್ಲೀಶ್ ಯೇನಾ ತರೀ ಭುರ್ಗ್ಯಾಂನಿ ಇಂಗ್ಲೀಶ್ ಶಿಕಾಜೆ, ಉಲೈಜೆ ಮ್ಹಣ್ ಆಶೆತಾಲಿಂ. ಆತಾಂ ಹೆಂ ಚಿಂತಾಪ್ ಪರ್ನೆಂ ಜಾಲಾಂ. ಆತಾಂ ದೊತೊರ್, ಇಜ್ನೆರ್ ಸಮೇತ್ ಕೊಂಕ್ಣಿಂ ಉಲಂವ್ಚೆಂ ಮ್ಹಳ್ಯಾರ್ ಮರ್ಯಾದಿಚೆಂ ಮ್ಹಣ್ ಲೆಕ್ತಾತ್.
12. ಕೊಂಕ್ಣಿ ಭಾಶೆಕ್ ಫುಡಾರ್ ಆಸಾಗೀ? ಕೊಂಕ್ಣಿ ಭಾಸ್ ಉರವ್ನ್ ಹಾಡುಂಕ್ ಕಸಲಿಂ ಕಾಮಾ ಗರ್ಜೆಚಿ?
ಜಾ: ಕೊಂಕ್ಣೆ ಭಾಶೆಕ್ ಫುಡಾರ್ ಆಸಾ. ಪುಣ್ ಕೊಂಕ್ಣೆ ಥಾವ್ನ್ ತುಕಾ ಫುಡಾರ್ ಆಸಾ ಮ್ಹಣ್ ಚಿಂತ್ಚೆ ನ್ಹಂಯ್. ಅಪ್ಣೆಂ ಚ್ಯಾರ್ ಕೆಸೆಟಿ ಕಾಡ್ನ್ ತಾಂತು ಕಾಂಯ್ ಫಾಯ್ದೊ ಮೆಳಾನಾ ತರ್ ಕೊಂಕ್ಣೆಕ್ ದುರ್ಸೊಂಚೆ ನ್ಹಂಯ್. ಆಶೆಂ ಕೊಂಕ್ಣೆಕ್ ಫುಡಾರ್ ಜರೂರ್ ಆಸಾ. ಎಕ್ಚ್ಚ್ ಕೊಂಕ್ಣಿ ತುಜೊ ದಿಸ್ಪಡ್ತೊ ಗ್ರಾಸ್ ಜೊಡ್ಚೊ ವಾವ್ರ್ ಕರ್ನ್ ಘೆ, ವಾ ತುಜೊ ಹವ್ಯಾಸ್ ಕರ್ನ್ ಘೆ. ಕೊಂಕ್ಣಿ ಭಾಶೆಕ್ ಆಮಿ ಮಾನ್ ದೀವ್ನ್ ಘರಾಂನಿ ಆಮ್ಚಾ ಭುರ್ಗ್ಯಾಂಂ ಸಂಗಿ ಕೊಂಕ್ಣಿ ಉಲೈಜೆ, ಆಮ್ಚಿ ಕಾರ್ಯಿ ಕೊಂಕ್ಣೆನ್ಂಚ್ಚ್ ಆಸಾ ಕರುನ್ ಭುರ್ಗ್ಯಾಂಕ್ ಕೊಂಕ್ಣೆಚಿ ರೂಚ್ ಚಾಕೈಜೆ. ಆಶೆಂ ಆಮಿ ಕೊಂಕ್ಣಿ ಉರವ್ನ್ ಹಾಡುಂಕ್ ಸಾಧ್ಯ್ ಆಸಾ.
13. ದಾಯ್ಜ್ ಡಾಟ್ ಕೊಮಾವಿಶಿಂ ತುಮಿಂ ಆಯ್ಕಲಾಂ, ವಾ ತಾಂತ್ಲಿಂ ವಾಚ್ಪಾಂ ತುಮ್ಕಾ ಕಶಿಂ ಲಾಗ್ತಾತ್? ಹ್ಯಾ ವಿಶಿ ತುಮ್ಚೆ ವಿಚಾರ್ ಕಸಲೆ?
ಜಾ: ದಾಯ್ಜ್ ಡಾಟ್ ಕೊಮಾನ್ ಖರೆಂಚ್ ಜಾವ್ನ್ ಏಕ್ ನವೆಸಾಂವ್ ಸುರು ಕೆಲಾ. ದಾಯ್ಜ್ ಕೊಂಕ್ಣಿ ಸಮಾಜೆಂತ್ ಏಕ್ ಮಯ್ಲಾ ಫಾತೊರ್ ಜಾವ್ನಾಸಾ. ಆಸಲೆಂ ಕಾಮ್ ಎದೊಳ್ ಖಂಚಾಯ್ ವೆಬ್ಸಾಯ್ಟಾರ್ ಜಾಂವ್ಕ್ ನಾ. ಕೊಣೆಂಚ್ಚ್ ಆಸಲೊ ಪ್ರಯೋಗ್ ಕರುಂಕ್ ನಾ. ಹೊ ನವೊ ಪ್ರಯೋಗ್ ಲೊಕಾಕ್ ಆನಿ ಕೊಂಕ್ಣಿ ಸಮಾಜೆಕ್ ಉಪ್ಕಾರಾಕ್ ಪಡ್ಸೊ ತಸಲೊ ಜಾವ್ನಾಸಾ. ಹ್ಯಾ ವೆಬ್ಸಾಯ್ಟಾರ್ ತರ್ನ್ಯಾ ತಶೆಂ ಪರ್ನ್ಯಾ ಬರವ್ಪ್ಯಾಂಕ್ ತಾಂಚಿ ಕಲಾ ದಾಕೊಂವ್ಕ್ ಆವ್ಕಾಸ್ ಆಸಾ. ಹ್ಯಾ ವೆಬ್ಸಾಯ್ಟಾರ್ ಫಾಯ್ಸ್ ಜಾಂವ್ಚಿ ಬರ್ಪಾಂ, ಸೃಜನಶೀಲತಾ, ಚಟುವಟಿಕೊ, ಸಾಹಿತ್ಯ್ ಎಕಾ ವರ್ನಿ ಏಕ್ ಬರಿಂ ಆಸೊನ್ ವಾಚ್ಪ್ಯಾಂಚಿ ಮನಾಂ ದಾಧೊಸ್ ಕರ್ಚಿಂ ತಶೆಂಚ್ ಜಾಣ್ವಾಯೆನ್ ಭರ್ಚಿಂ ಜಾವ್ನಾಸಾತ್.
14. "ಕೊಂಕ್ಣಿ ಕಾರ್ಬಾರಿ" ಹೆಂ ದಾಯ್ಜಾಚೆ ಏಕ್ ಕೊಂಕ್ಣೆ ಖಾತಿರ್ ವಾವ್ರ್ ಕರ್ತೆಲ್ಯಾಂಚಿ ವಳಕ್ ವಾಚ್ಪ್ಯಾಂಕ್ ಕರ್ನ್ ದಿಂವ್ಚೆಂ ನವೆಂ ಯೋಜನ್. ಹ್ಯಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಹೆಂ ಯೋಜನ್ ಭೋವ್ಚ್ಚ್ ಬರೆಂ. ಹ್ಯಾ ಯೋಜನಾದ್ವಾರಿ ಕೊಂಕ್ಣಿ ಸಮಾಜೆಕ್ ಗ್ರೇಸ್ತ್ ಕೆಲ್ಲೆ ಬರಿ ಜಾತಾ. ಜರ್ ತುಂ ತುಜೆ ದಾಯ್ಜ್ ಸಾಂಬಾಳ್ನ್ ದವರಿನಾಂಯ್ ತರ್ ಕೆತೆಂ ಫಾಯ್ದೊ. ಹ್ಯಾ ಯೋಜನಾದ್ವಾರಿ ಸಂಸಾರಾರ್ ಶಿಂಪಡ್ಲೆಲ್ಯಾ ಹಜಾರೊಂ ಕೊಂಕ್ಣಿ ಲೊಕಾಕ್ ಕೊಂಕ್ಣೆ ಖಾತಿರ್ ವಾವ್ರ್ ಕರ್ತೆಲ್ಯಾಂಚಿ ವಳಕ್ ಜಾತಾ. ತಾಂಚೆ ವಿಶ್ಯಾಂತ್ ಲೋಕ್ ಜಾಣಾಂ ಜಾಂವ್ಕ್ ಸಕ್ತಾ, ಆನಿ ಲೊಕಾಕ್ ಕೊಂಕ್ಣಿ ಸಮಾಜೆಂತ್ ಕೊಂಕ್ಣಿ ವಾವ್ರಾಡ್ಯಾಂಚಿ ವಳೊಕ್ ಜಾತಾ.
15. ದಾಯ್ಜಾಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ದಾಯ್ಜ್ ವಾವ್ರಡ್ಯಾಂಕ್ ಭೊವ್ ಗರ್ಜೆಚೊ ಸಂದೇಶ್ "ಸದಾಂಚ್ಚ್ ಎಕ್ವಟಾನ್ ರಾವೊನ್ ಕಾಮ್ ಕರ್ಚೆ ಭೋವ್ ಗರ್ಜೆಚೆಂ. ಮ್ಹಜೊ ತಶೆಂಚ್ ಕೊಂಕ್ಣಿ ಸಮಾಜೆಚೊ ಸಹಕಾರ್ ತುಮ್ಕಾ ಭರ್ಪೂರ್ ಆಸ್ತಲೊ. ತುಮ್ಚಿಂ ಕಾಮಾಂ ಎಕ್ವಟಿತ್ ಜಾವ್ನ್ ಕಾರ್ಯ ರುಪಾರ್ ಹಾಡ್ಲ್ಯಾರ್ ಕೊಂಕ್ಣಿ ಸಮಾಜ್ ಖಂಡಿತ್ ಗ್ರೇಸ್ತ್ ಜಾತೆಲಿ. ಕಿತ್ಲ್ಯೊ ಆಡ್ಕಳ್ಯೊ ಆಯ್ಲ್ಯಾರ್ಯೀ ತುಮಿಂ ಧಯ್ರ್ ಸಾಂಡಿನಾಕಾತ್.
16. ದೇವ್ ಬರೆಂ ಕರುಂ ತುಮ್ಕಾ ಡೆನಿಸಾಬಾ, ತುಮ್ಚೊ ಅಮೊಲಿಕ್ ವೇಳ್ ಆಮ್ಚೆ ಸವೆಂ ಸಂದರ್ಶನಾಂತ್ ಖರ್ಚಿಲ್ಲ್ಯಾಕ್.
ಜಾ: ತುಕಾಯ್ ದೇವ್ ಬರೆಂ ಕರುಂ ವಾಯ್ಲೆಟ್. ಕೊಂಕ್ಣೆ ಥಂಯ್ ತುಜಿ ಉರ್ಬಾ ಕೆದಿಂಚ್ಚ್ ನಿವಾನಾ ಜಾಂವ್, ತುವೆಂ ತುಜೊ ವೇಳ್ ಕೊಂಕ್ಣೆ ಖಾತಿರ್ ಖರ್ಚುನ್ ಮ್ಹಜೆ ಸವೆಂ ಸಂದರ್ಶನ್ ಘೆತುಲ್ಲ್ಯಾಕ್ ತುಕಾ ತಶೆಂಚ್ಚ್ ದಾಯ್ಜಾಚ್ಯಾ ಸರ್ವ್ ವಾವ್ರಾಡ್ಯಾಂಕ್ ಹಾಂವ್ ಬರೆಂ ಮಾಗ್ತಾ. ದೇವ್ ಬರೆಂ ಕರುಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
