ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಭುರ್ಗೆಂ ಕಿತ್ಯಾಕ್ ಜಾಯ್ನಾ?.
* ಹಾಂವ್ 34 ವರ್ಸಾಂ ಪ್ರಾಯೆಚೊ ಆನಿ ಮ್ಹಜ್ಯಾ ಬಾಯ್ಲೆಚಿ ಪ್ರಾಯ್ 31. ಆಮ್ಚೆಂ ಕಾಜಾರ್ ಜಾವ್ನ್ 4 ವರ್ಸಾಂ ಜಾಲಿಂ. ತೀನ್ ವರ್ಸಾಂ ಪಯ್ಲೆಂ ಮ್ಹಜ್ಯಾ ಹೊಕ್ಲೆಕ್ ಗರ್ಬ್ಸ್ರಾವ್ ಜಾಲ್ಲೊ ಆನಿ ತ್ಯಾ ಉಪ್ರಾಂತ್ ಪಾಟ್ಲ್ಯಾ ವರ್ಸಾಂನಿ ಆಮಿ ಭುರ್ಗ್ಯಾ ಖಾತಿರ್ ಮನ್ ಕೆಲ್ಲೆಂ ನಾ. ಆಮಿ ಆತಾಂ ಭುರ್ಗ್ಯಾ ಖಾತಿರ್ ಅತ್ರೇಗಾನ್ ಆಸಾಂವ್. ಹಾಂವೆ ಮ್ಹಜೆಂ ವೀರ್ಯ್ ತಪಾಸ್ಣಿ ಕರಯ್ಲಾಂ ಆನಿ ತಾಂತು ೫೦ ಮಿಲಿಯ/ಮಿಲಿಮೀಟರ್ ಮ್ಹಣ್ ಆಸಾ. ಹ್ಯಾ ರಿಪೋರ್ಟಾಂತ್ ಸಾಮಾನ್ಯ್ 60 ಥಾವ್ನ್ 120 ಮಿಲಿಯಾ/ಮಿಲಿಮೀಟರ್ ಆಸ್ತಾ ಮ್ಹಣ್ ಆಸಾ. ಹಾಂವ್ ವೀರ್ಯ್ ಕಣಾಂಚೊ ಸಂಖೊ ವಾಡಂವ್ಕ್ ಜಾಯ್ ಆಸ್ಲ್ಲೆ ಗುಳಿಯೊ ಪಾಟ್ಲ್ಯಾ ಚಾರ್ ಮಯ್ನ್ಯಾಂ ಥಾವ್ನ್ ಘೆವ್ನ್ ಆಸಾಂ. ಪೂಣ್ ಮ್ಹಜಿ ಬಾಯ್ಲ್ ಹ್ಯಾ ಪರ್ಯಾಂತ್ ಗರ್ಬೆಸ್ತ್ ಜಾಂವ್ಕ್ ನಾ. ಮ್ಹಜ್ಯಾ ಬಾಯ್ಲೆಚಿ ತಪಾಸ್ಣಿ ಕೆಲ್ಲ್ಯಾ ದಾಕ್ತೆರ್ನಿನ್ ತಿ ಸಾರ್ಕಿ ಆಸಾ ಮ್ಹಣ್ ಸಾಂಗ್ಲಾಂ. ಮ್ಹಾಕಾ ಭೊಗ್ತಾ ಮ್ಹಜ್ಯಾ ವೀರ್ಯ್ರಸಾಚೊ ಪ್ರಮಾಣ್ ಉಣೊ ಜಾಲಾ ಆನಿ ವೀರ್ಯ್ ರಸ್ ಪಯ್ಲೆಂಚ್ಯಾ ತಿತ್ಲ್ಯಾ ವೆಗಾನ್ ಯೇನಾ. ಇತ್ಲೆಂಚ್ ನ್ಹಂಯ್, ಲೈಂಗಿಕ್ ಎಕ್ವಟಾ ಉಪ್ರಾಂತ್ ಮ್ಹಜ್ಯಾ ಬಾಯ್ಲೆಚ್ಯಾ ಜನಕಾಂಗ್ ಭಾಗಾಂತ್ ಮ್ಹಜೆಥಾವ್ನ್ ಪಾವ್ಲ್ಲೊ ವೀರ್ಯ್ ರಸ್ ಭಾಯ್ರ್ ವ್ಹಾಳ್ತಾ. ದಯಾ ಕರ್ನ್ ಹ್ಯಾ ಸಮಸ್ಸ್ಯಾಕ್ ಪರಿಯಾರ್ ದಿಯಾ.
- ವಿ.ಪಿ. ಗಾಂವ್ ನಾಕಾ.
ತುಜ್ಯಾ ವೀರ್ಯ್ ತಪಾಸ್ಣೆಚ್ಯಾ ರಿಪೋರ್ಟಾಂತ್ ವೀರ್ಯ್ ಕಣಾಂಚೊ ಸಂಖೊ ವಿಶೇಸ್ ಉಣೊ ನಾತ್ಲ್ಲ್ಯಾನ್ ತುಕಾ ಭುರ್ಗಿಂ ಜಾಂವ್ಚ್ಯಾಂತ್ ಊಣ್ ಆಸಾ ಮ್ಹಣೊಂಕ್ ಜಾಯ್ನಾ. ವೀರ್ಯ್ ಕಣಾಂಚ್ಯಾ ಸಂಕ್ಯಾ ತಿತ್ಲೆಂಚ್ ಕಿತ್ಲೆ ವೀರ್ಯ್ಕಣ್ ಭಲಾಯ್ಕೆಂತ್ ಆಸಾತ್, ತಾಂಚೆಂ ಚಲನ್ (motility) ಕಶೆಂ ಆಸಾ ಮ್ಹಳ್ಳೆಂಯ್ ಗರ್ಜ್. ಜೆರಾಲ್ ಥರಾನ್ ತುಜ್ಯಾ ರಿಪೋರ್ಟಾಂತ್ ಆಸಾತ್ ತಿತ್ಲೆ ಕಣ್ ಆಸ್ಲ್ಯಾರ್ ಭುರ್ಗಿಂ ಜಾಂವ್ಕ್ ದೊಶಿ ಆಸಾ ನಾಂತ್. ತುಮಿ ಪಾಟ್ಲ್ಯಾ ಥೊಡ್ಯಾ ಕಾಳಾಥಾವ್ನ್ ಮಾತ್ರ್ ಭುರ್ಗ್ಯಾ ಖಾತಿರ್ ಪ್ರೇತನ್ ಕರುನ್ ಆಸಾತ್, ತಿತ್ಲ್ಯಾ ಭಿತರ್ ಭುರ್ಗಿಂ ಜಾಂವ್ಕ್ ನಾಂತ್ ತರ್ ದೋಶ್ ಆಸಾ ಮ್ಹಣೊಂಕ್ ಜಾಯ್ನಾ. ತ್ಯಾ ಶಿವಾಯ್ ತುಜಿ ಸ್ತ್ರಿ ಏಕ್ ಪಾವ್ಟಿಂ ಗರ್ಬೆಸ್ತ್ ಜಾಲ್ಲ್ಯಾನ್ ತಿಣೆಂ ಪರತ್ ಗರ್ಬೆಸ್ತ್ ಜಾಂವ್ಚಿ ಸಾಧ್ಯತಾಯ್ ಖಂಡಿತ್ ಆಸಾ.
ಜಾಯಿತ್ತ್ಯಾ ಜೊಡ್ಯಾಂಕ್ ಸ್ತ್ರಿಯೆಚ್ಯಾ ಫಳಾಧೀಕ್ ದಿಸಾಚೊ ಜೋಪ್ ಆಸಾನಾ ಆನಿ ತವಳ್ ತವಳ್ ಕುಡಿಚೊ ಸಂಪರ್ಕ್ ಕರಿತ್ತ್ ಆಸ್ತಾತ್ ಪೂಣ್ ಫಳಾಧೀಕ್ ದೀಸ್ ಖಂಯ್ಚೊ ಮ್ಹಣ್ ಮತಿಂತ್ ಘೆನಾತ್ಲ್ಯಾರ್ ಗರ್ಬ್ ಸಂಭವ್ಣಿ ಪಾಟಿಂ ಪಡುಂಕ್ ಆಸಾ. ಸ್ತ್ರಿ ಮಯ್ನ್ಯಾಂತ್ ಫಕತ್ ಏಕ್ ದೀಸ್ ಮಾತ್ರ್ ಫಳಾಧೀಕ್ ಆಸ್ತಾ. ತೆ ದೀಸ್ ಸ್ತ್ರಿಯೆಚ್ಯಾ ರೊವ್ಯಾಂತ್ಲೆಂ ವಾಡ್ಲ್ಲೆಂ ತಾಂತಿಂ ಭಾಯ್ರ್ ಯೆತಾ ಆನಿ ಭಾಯ್ರ್ ಆಯಿಲ್ಲ್ಯಾ ಸುಮಾರ್ ಆಟ್ ಥಾವ್ನ್ ಬಾರಾ ವರಾಂ ಭಿತರ್ ಪುರುಷ್ ಕಣಾಂಚೊ ಸಂಪರ್ಕ್ ಜಾಯ್ನಾ ತರ್ ತಿ ಗರ್ಬೆಸ್ತ್ ಜಾಯ್ನಾ. ಸ್ತ್ರಿಯೆಥಂಯ್ ಪಾವ್ಲ್ಲೆ ದಾದ್ಲ್ಯಾಚೆ ವೀರ್ಯ್ಕಣ್ ಸುಮಾರ್ 72 ವರಾಂ ಜಿವಂತ್ ಆಸ್ತಾತ್ ತರ್ಯಿ ಫಳಾಧಿಕ್ ದಿಸಾಂನಿ ದಾದ್ಲ್ಯಾಚೊ ಸಂಪರ್ಕ್ ಜಾಂವ್ಕ್ ನಾ ತರ್ ಸ್ತ್ರಿಯೆನ್ ಗರ್ಬೆಸ್ತ್ ಜಾಂವ್ಚಿ ಸಾಧ್ಯತಾಯ್ ಉಣಿ.
ಫಳಾಧಿಕ್ ದೀಸ್ಸಾಮಾನ್ಯ್ ಜಾವ್ನ್ ಮುಕ್ಲ್ಯಾ ಸ್ರಾವಾ ಆದ್ಲೊ 14 ವೊ ದೀಸ್ ಜಾವ್ನಾಸ್ತಾ. ದಾಕ್ಲ್ಯಾಕ್ ಮುಕ್ಲೊ ಸ್ರಾವ್ ಮಯ್ನ್ಯಾಚ್ಯಾ 26 ತಾರೀಕೆರ್ ತರ್, 12 ತಾರೀಕ್ (26-14=12) ಫಳಾಧೀಕ್ ದೀಸ್ ಜಾವ್ನಾಸ್ತಾ. ಫಳಾಧೀಕ್ ದಿಸಾ ಆನಿ ತ್ಯಾ ದಿಸಾಚ್ಯಾ ಪಯ್ಲೆಂಚ್ಯಾ ಆನಿ ಉಪ್ರಾಂತ್ಲ್ಯಾ ದೋನ್ ದೀಸ್ (10 ಥಾವ್ನ್ 14 ತಾರಿಕ್) ಹರ್ ದಿಸಾ ಕುಡಿಚೊ ಸಂಪರ್ಕ್ ಕರಿಜೆ. ಸಾಧ್ಯ್ ಜಾತಾ ತರ್ ದಿಸಾಕ್ ದೋನ್ ಪಾವ್ಟಿಂ ಕೆಲ್ಯಾರ್ಯಿ ಬರೆಂ. ಥೊಡೆ ಪಾವ್ಟಿಂ ಫಳಾಧೀಕ್ ದೀಸ್ ಪಾಟಿಂ-ಮುಕಾರ್ ವಚ್ಯೆತ್ ಜಾಲ್ಲ್ಯಾನ್ ತ್ಯಾ ಪಾಂಚ್ ದಿಸಾಂಚ್ಯಾ ಆವ್ದೆರ್ ಚುಕಾನಾಸ್ತಾಂ ಸಂಪರ್ಕ್ ಕೆಲ್ಲ್ಯಾನ್ ಸ್ತ್ರಿಯೆನ್ ಗರ್ಬೆಸ್ತ್ ಜಾಂವ್ಚಿ ಸಾಧ್ಯತಾಯ್ ಚಡ್ತಾ. ಎಕಾವೆಳಾ ಮಯ್ನ್ಯಾಚೊ ಸ್ರಾವ್ ನಿಯಮಿತ್ ಥರಾನ್ ಜಾಯ್ನಾ ತರ್ ಸ್ತ್ರಿಯೆಚ್ಯಾ ಲೈಂಗಿಕ್ ಎಕ್ವಟಾಚ್ಯಾ ಭಾಗಾಂತ್ ಸ್ರಾವ್ ಜಾಂವ್ಚ್ಯಾ ಮ್ಯೂಕಸಾಚೆರ್ ಹೊಂದುನ್ ಫಳಾಧೀಕ್ ದೀಸ್ ಸೊಧುನ್ ಕಾಡ್ಯೆತಾ. ಫಳಾಧೀಕ್ ದಿಸಾ ಮ್ಯೂಕಸ್ ಪಾತಳ್, ನಿಸ್ರಾಟೆಂ ಆಸ್ತಾ. (ಫಳಾಧೀಕ್ ದೀಸ್ ಸೊಧುನ್ ಕಾಡ್ಚ್ಯಾ ಹ್ಯಾ ಆನಿ ಹೆರ್ ರಿತಿಂವಿಶಿಂ ಚಡ್ ವಿವರ್ ಮ್ಹಜ್ಯಾ ಕಾಜಾರಿ ಲೈಂಗಿಕ್ ಜಿವಿತ್ ಬುಕಾಂತ್ ಆಸಾತ್)
ದಾದ್ಲ್ಯಾ ಥಂಯ್ ವೀರ್ಯ್ ರಸಾಚೊ ಪ್ರಮಾಣ್ ತಾಚೆ ಪ್ರಾಯೆಚೆರ್ ಆನಿ ತಾಚೆಥಾವ್ನ್ ಕಿತ್ಲ್ಯಾ ಆವ್ದೆಂತ್ ಸ್ಖಲನ್ ಜಾಯಿತ್ತ್ ಆಸಾ ಮ್ಹಳ್ಳ್ಯಾಚೆರ್ ಹೊಂದುನ್ ಆಸಾ. ಹರ್ದೀಸ್ ದಾದ್ಲ್ಯಾ ಥಾವ್ನ್ ವೀರ್ಯ್ಸ್ರಾವ್(ಲೈಂಗಿಕ್ ಮಿಲನಾಂತ್ ವಾ ಸ್ವರತಿದ್ವಾರಿಂ) ಜಾತಾ ತರ್ ತಾಚೆ ಥಂಯ್ ವೀರ್ಯ್ ರಸಾಚೊ ಪ್ರಮಾಣ್ ಉಣೊ ಆಸ್ತಾ. ಪ್ರಾಯ್ ಚಡುನ್ ವೆತನಾ ವೀರ್ಯ್ರಸಾಚೊ ಪ್ರಮಾಣ್ ಉಣೊ ಜಾಯಿತ್ತ್ ಯೆತಾ. ಆಪ್ರೂಪ್ ಸ್ಖಲನ್ ಜಾತಾನಾ ವೀರ್ಯ್ ರಸ್ ಚಡ್ ಆಸ್ಯೆತಾ. ಪೂಣ್ ವೀರ್ಯ್ರಸಾಚ್ಯಾ ಪ್ರಮಾಣಾಚೆರ್ ದಾದ್ಲ್ಯಾಚಿ ವಂಶಾಭಿವೃದ್ಧೆಚಿ ಸಕತ್ ಹೊಂದುನ್ ನಾ. ಫಕತ್ ಭಲಾಯ್ಕೆನ್ ಆಸ್ಚೊ ಏಕ್ ವೀರ್ಯ್ಕಣ್ ಸ್ತ್ರಿಯೆ ಥಾವ್ನ್ ತಯಾರ್ ಜಾಲ್ಲ್ಯಾ ಎಕಾ ತಾಂತಿಯಾ ಸಾಂಗಾತಾ ಮೆಳ್ಲ್ಲ್ಯಾನ್ ಸ್ತ್ರಿ ಗರ್ಬ್ಬೆಸ್ತ್ ಜಾತಾ. ವೀರ್ಯ್ರಸಾಚ್ಯಾ ಪ್ರಮಣಾಕ್ ಆನಿ ಸ್ತ್ರಿ ಗರ್ಬೆಸ್ತ್ ಜಾಂವ್ಚ್ಯಾಕ್ ಕಿತೆಂಯ್ ವಿಶೇಸ್ ಸಂಬಂಧ್ ನಾ.
ವೀರ್ಯ್ರಸ್ ಭಾಯ್ರ್ ಯೆಂವ್ಚೊ ವೇಗ್ ಇತ್ಲೊಚ್ ಮ್ಹಣ್ ಮಾಪ್ ನಾ. ಆನಿ ಜೆರಾಲ್ ಥರಾನ್ ಹೊ ಉಣೊ ಜಾಯ್ನಾ. ಅಪ್ರುಪ್ ಸ್ಖಲನ್ ಕೆಲ್ಲ್ಯಾ ವೆಳಾರ್ ಚಡ್ ವೆಗಾನ್ ವೀರ್ಯ್ ಭಾಯ್ರ್ ಯೆತಾ ಮ್ಹಣ್ ಭೊಗ್ತಾ ಜಾವ್ಯೆತ್. ವೀರ್ಯ್ ಸ್ಖಲನ್ ಜಾಂವ್ಚೊ ವೇಗ್ ಉಣೊ ಜಾಲಾ ಮ್ಹಳ್ಳೊ ಫಕತ್ ತುಜೊ ಅಂದಾಜ್ ಆಸ್ಯೆತಾ. ಹೊ ಕಿತೆಂಯ್ ಊನ್ ಜಾವ್ನಾಸ್ಚಿ ಸಾಧ್ಯತಾಯ್ ನಾ.
ಲೈಂಗಿಕ್ ಮಿಲನಾಚ್ಯಾ ವೆಳಾರ್ ಸ್ತ್ರಿಯೆಥಂಯ್ ಸ್ಖಲನ್ ಜಾಲ್ಲೊ ದಾದ್ಲ್ಯಾಚ್ಯಾ ವೀರ್ಯ್ ರಸಾಚೊ ಥೊಡೊ ವಾಂಟೊ ಭಾಯ್ರ್ ವಾಳುನ್ ವೆಚೊ ಸಾಮಾನ್ಯ್, ಜಾಯಿತ್ತ್ಯಾ ಸಂದ್ರಪಾಂನಿ ಹೆಂ ಘಡ್ತಾ. ಹೊ ಕಿತೆಂಯ್ ದೋಶ್ ನ್ಹಂಯ್ ಆನಿ ಹಾಕಾ ಚಿಕಿತ್ಸೆಚಿ ಗರ್ಜ್ ನಾ. ತರ್ಯಿ ಸ್ತ್ರಿಯೆನ್ ಗರ್ಬೆಸ್ತ್ ಜಾಂವ್ಚಿ ಸಾಧ್ಯತಾಯ್ ಚಡಂವ್ಕ್, ಕುಡಿಚ್ಯಾ ಎಕ್ವಟಾ ಉಪ್ರಾಂತ್ ಥೊಡೊ ವೇಳ್ ಸ್ತ್ರಿಯೆನ್ ನಿದುನ್ಂಚ್ ರಾವ್ಲ್ಯಾರ್ ಬರೆಂ ಜಾಯ್ತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
