ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಜೆ.ಬಿ.ಮೊರಾಯಸಾಚಾ ’ಭಿತರ್ಲೆಂ ತೂಫಾನ್’ ಬುಕಾಕ್ 1985 ಇಸ್ವೆಚಿ ಕೇಂದ್ರಿಯ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಲಾಭ್ಲ್ಯಾ.
ಕಥಾದಾಯ್ಜ್ - 4
ಜೆ.ಬಿ.ಮೊರಾಯಸ್
ಕೊಶೆಡ್ದಾನ್ ಕೆಲ್ಲಿ ಖುನ್
ನಾಂವ್ : ಜೋನ್ ಬ್ಯಾಪ್ಟಿಸ್ಟ್ ಮೊರಾಯಸ್
ಲಿಖ್ಣೆ ನಾಂವ್ : ಜೆ. ಬಿ. ಮೊರಾಯಸ್.
ಜನನ್ : 29 ಜೂನ್ 1933.
ಜಲ್ಮಾಲ್ಲೊ ಗಾಂವ್ : ಕಲ್ಲಮುಂಡ್ಕೂರ್ (ನಿಡ್ಡೋಡಿ).
ಜೆ.ಬಿ.ಮೊರಾಯಸ್
ವಳೊಕ್:
ಪತಿಣೆಚೆಂ ನಾಂವ್ : ಮೆಟಿಲ್ಡಾ ಪಿಂಟೊ.
ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;
’ಕೊಶೆಡ್ದಾನ್ ಕೆಲ್ಲಿ ಖುನ್’ ಬುಕಾಕ್ 1980 ಇಸ್ವೆಂತ್, ಕೊಂಕ್ಣಿ ಭಾಷಾ ಮಂಡಳಿ ಗೊಯಾಂ ಥಾವ್ನ್ ಪ್ರಶಸ್ತಿ.
’ಭಿತರ್ಲೆಂ ತುಫ಼ಾನ್’ ಕವಿತಾಜಮ್ಯಾಂಕ್ 1985 ಇಸ್ವೆಚಿ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪ್ರಶಸ್ತಿ.
’ಮಹಾರಾಷ್ಟ್ರ ಗೌರವ್ ಪುರಸ್ಕಾರ್’ 1990 ಇಸ್ವೆಂತ್.
’ಶ್ರೇಷ್ಟ್ ಬೂಕ್’ ಪ್ರಶಸ್ತಿ 2001 ಇಸ್ವೆಂತ್, ಜೋರ್ಜ್ ಫ಼ೆರ್ನಾಂಡಿಸಾಚಿ ಜಿಣ್ಯೆಚರಿತ್ರಾ ಬುಕಾಕ್.
’ಸಂದೇಶ್ ಪ್ರತಿಷ್ಟಾನ್ ಪ್ರಶಸ್ತಿ’ 2001 ಇಸ್ವೆಂತ್.
ಸಾಹಿತಿಕ್ ವಾವ್ರ್ :
ಪಯ್ಲೆಂ ಕವಿತಾ ಫ಼ಾಯ್ಸ್ ಜಾಲ್ಲೆಂ: (1948 ಇಸ್ವೆಂತ್)
’ಕೊಂಕಣ್ ದಾಯ್ಜ್ ’ ಪತ್ರಾಚೊ ಸ್ಥಾಪಕ್ ಸಂಪಾದಕ್ (1958 ಇಸ್ವೆಂತ್).
’ದಿವೊ ’ ಪತ್ರಾಚೊ ಸ್ಥಾಪಕ್ ಸಂಪಾದಕ್ (1995-1998 ಇಸ್ವೆಂತ್).
’ಪಯ್ಣಾರಿ ’ ಪತ್ರಾಚಾ ಸಂಪಾದಕೀ ಮಂಡಳಿಂತ್ ವಾವ್ರ್ (1964/76 ಇಸ್ವೆಂತ್).
’ಕೊಂಕಣಿ ಸಾದ್ ’ ಕೊಂಕಣಿ ಭಾಶಾ ಮಂಡಳಿಚಾ ತ್ರೈ-ಮಾಸಿಕಾಚೊ ಸಂಪಾದಕ್ ಜಾವ್ನ್ ವಾವ್ರ್ (2000 ಇಸ್ವೆಥಾವ್ನ್).
ಬೂಕಾರುಪಾರ್ :
’ರೋಮಿಯೊ ಜೂಲಿಯೆಟ್’ (1954 - ಅಣ್ಕಾರಿತ್ ನಾಟಕ್)
’ಅಂತ್ಯ್ ನಾತ್ಲ್ಲೆಂ ಸ್ವಪಾಣ್’ (1975 - ಅಣ್ಕಾರಿತ್ ಕಾದಂಬರಿ)
’ನವಿ ವ್ಹಕಾಲ್’ (1977 - ಕವಿತಾಜಮೊ)
’ನಿಸ್ರಾಲ್ಲ್ಯಾಕ್ ಲೊಟುನ್ ಘಾಲೊ’ (1976 - ಕಾದಂಬರಿ)
’ಬೊಲ್ಪ್ಯಾಂ ಮದ್ಲಿ ಶೆಳಿ’ (1977 - ಕಾದಂಬರಿ)
’ಕೊಶೆಡ್ದಾನ್ ಕೆಲ್ಲಿ ಖುನ್’ (1980 - ಮಟ್ವ್ಯಾ ಕಾಣ್ಯಾಂಚೊ ಬೂಕ್ - ದೋನ್ ಛಾಪೆ)
’ಮಂಗ್ಳುರ್ಚಿಂ ಉಜ್ವಲ್ ರತ್ನಾಂ’ (1983- ವೆಕ್ತಿ ಪರಿಚಯ್)
’ಭಿತರ್ಲೆಂ ತುಫ಼ಾನ್’ (1984 - ಕವಿತಾಜಮೊ)
’ಜರ್ಲೊ ಗೋಮ್ಸ್’ (1987 - ಶೆರ್ಲೋಕ್ ಹೋಮ್ಸಾಚ್ಯೊ ಕಾಣ್ಯೊ)
’ಕನ್ನಡ ಸಾಹಿತ್ಯಾಚೊ ಇತಿಹಾಸ್’ (1989 - ಅಣ್ಕಾರಿತ್ - ಸಾಹಿತ್ಯ್ ಅಕಾದೆಮಿ ಪ್ರಕಾಶನ್)
’ಪುತಿಫ಼ಾರಾಚಿ ಬಾಯ್ಲ್’ (1990 - ಕವಿತಾ ನಾಟಕ್)
’ಜೋರ್ಜ್ ಫ಼ೆರ್ನಾಂಡಿಸಾಚಿ ಜಿಣ್ಯೆಕಥಾ’ (1999 ಇಸ್ವೆಂತ್).
’ನವೆಂ ಪಯ್ಣ್’ (2001 - ಅಣ್ಕಾರಿತ್)
’ಸ್ವಪಾಣ್ ಪಾರ್ಕಿ ಜುಜೆ’ (2002 - ನಾಟ್ಕುಳೊ)
’ಏಕ್ ದೇಂಟ್ ಆನಿ ಏಕ್ ಪಾನ್’ (2003 -ಕವಿತಾಜಮೊ)
ನಾಟಕ್: ’ಹಿ ವಾಟ್ ಯೆಮ್ಕೊಂಡಾಚಿ’ (1967 ಇಸ್ವೆಂತ್ ಖೆಳಯ್ಲಾ)
’ವಿಧಿಚೊ ಖೆಳ್’ (1986 ಇಸ್ವೆಂತ್ ಖೆಳಯ್ಲಾ)
ಕಾದಂಬರ್ಯೊ : 2.
ಮಟ್ವ್ಯೊ ಕಾಣ್ಯೊ : ಲಗ್ಬಗ್ 100 ವಯ್ರ್.
ಕವಿತಾ/ಚುಟುಕಾಂ : ಲಗ್ಬಗ್ 400 ವಯ್ರ್.
ಅಣ್ಕಾರಿತ್ : 3.
ಹೆರ್ ಅಣ್ಕಾರಿತ್ ವಾವ್ರ್ : ಬಿ.ಎ.ಸನದಿ ಹಾಚಾ ’ನವೆಂ ಪಯ್ಣ್’ ಕವಿತಾಜಮ್ಯಾಚೆಂ ತರ್ಜಣ್ ದಿವ್ಯಾಮೃತ್: ಕವಿತಾಂಚಿ ವೋಳ್ (1989 ಇಸ್ವೆಂತ್)
ಚಿಂತಾಪ್ :
ಎ.ಬಿ.ಮೊರಾಯಸ್ ಏಕ್ ಸಾದಿ ಜಿಣಿ ಉಂಚ್ಲೆಂ ಚಿಂತಾಪ್ ಚಿಂತ್ಚೊ ಸಾಹಿತಿ. ಖರೊ ಕೊಂಕ್ಣಿ ಮೋಗಿ ಆನಿಂ ಮ್ಹಜಾ ಸಮ್ಜೊಣೆಪ್ರಕಾರ್ ಕೊಂಕ್ಣಿ ಸಾಹಿತ್ಯಾಂತ್ ಹಾಚೆತಿತ್ಲೊ ವಾವ್ರ್ ಕೆಲ್ಲೆ ಕೊಣ್ಂಚ್ ಆತಾಂ ಸಂಸಾರಾಂತ್ ನಾಂತ್. ತರ್ಯ್ ಅಜೂನ್ ಪರ್ಯಾಂತ್ ತೊಚ್ ಕೊಂಕ್ಣಿ ಮೋಗ್ ಆಪ್ಲ್ಯಾ ಕಾಳ್ಜಾಂತ್ ದವ್ರುನ್ ಸದಾಂ ಅಪ್ಣಾಕ್ ಕಾರ್ಯಾಳ್ ದವರ್ನ್ ಆಸ್ಚೊ ಜೆ.ಬಿ.ಮೊರಾಯಸ್ ಏಕ್ ಖರೊ ಸಾಹಿತಿ ಮ್ಹಣ್ಯೆತ್. ಸಾಹಿತ್ಯಾಚಾ ಹರ್ಯೆಕಾ ಪ್ರಕಾರಾಂನಿ ತಾಣೆಂ ವಾವ್ರ್ ಕೆಲಾ. ಜಾಂವ್ ಕಾಣ್ಯೊ, ಕವಿತಾ, ನಾಟಕ್, ಅಣ್ಕಾರಿತ್ ಸಾಹಿತ್ಯ್, ಕಾದಂಬರಿ ಯಾ ವೆಕ್ತಿ ಪರಿಚಯ್ - ಹರ್ಯೆಕಾ ಪ್ರಕಾರಾಂನಿ ತಾಣೆಂ ವಾವ್ರ್ ಕೆಲಾ. ಜಾಯ್ತೆ ಬೂಕ್ ತಾಣೆಂ ಪರ್ಗಟ್ಲ್ಯಾತ್. ಪ್ರಾಯೆನ್ ತೊ ಮಾಲ್ಘಡೊ ತರ್ಯ್ ತಾಚೆಂ ಚಿಂತಾಪ್ ಅಜೂನ್ಯ್ ನವೆಂಸಾಂವಾಕ್ ಸ್ವೀಕಾರ್ ಕರ್ಚೆತಸಲೆಂ ಜಾವ್ನಾಸಾ.
ಮಟ್ವ್ಯೊ ಕಾಣ್ಯೊ :
ಜೆ.ಬಿ.ಮೊರಾಯಸಾಚೊ ಚಡ್ತಾವ್ ಮಟ್ವ್ಯೊ ಕಾಣ್ಯೊ ಸಾಮಾಜಿಕ್ ಸಂಗ್ತ್ಯಾಂಚೆರ್ ವಿಣ್ಲೆಲ್ಯೊ ಜಾವ್ನಾಸಾತ್. ಆಮ್ಚಾ ಮಾತಿಯೆಚೊ ಪರ್ಮಳ್, ಆಮ್ಚಾ ಸಂಸ್ಕ್ರತೆಚೊ ಉಲ್ಲೇಕ್, ಆಮ್ಚಾ ರಿವಾಂಜಿಂಕ್ ಹಾಚಾ ಮಟ್ವ್ಯಾ ಕಾಣ್ಯಾಂನಿ ಉಂಚ್ಲೆಂ ಸ್ಥಾನ್ ಆಸಾ. ಹಾಚೊ ಚಡ್ತಾವ್ ಕಾಣ್ಯೊ ಪಾರಂಪರಿಕ್ ಕಾಣ್ಯೊ. ಸಾದ್ಯಾ ವಾಚ್ಪ್ಯಾಂಕ್ ಹ್ಯೊ ಸಮ್ಜೊಂಕ್ ಬಿಲ್ಕುಲ್ ತ್ರಾಸ್ ಜಾಂವ್ಕ್ ಸಾಧ್ಯ್ ನಾ. ಜಶಿ ತಾಚಿ ಜಿಣಿ ಸಾದಿಗೀ ತಶೆಂಚ್ ತಾಚಿ ಸಾಹಿತ್ಯಾಚಿ ಭಾಸ್ ಸಾದಿ. ಹಿ ಕಾಣಿ ಆಯ್ಲೆವಾರ್ ತಾಕಾ ಮುಖಾಮುಖಿಂ ಮೆಳ್ಲ್ಲೆವೆಳಾರ್ ತಾಣೆ ದಿಲ್ಲಿ ಜಾವ್ನಾಸಾ. ಆನಿಂ ತಾಚೆಪ್ರಕಾರ್ ಎದೊಳ್ ತಾಣೆ ಬರಯಿಲ್ಲ್ಯಾ ಬರ್ಯಾಂತ್ಲಿ ಬರಿ ಮಟ್ವಿ ಕಾಣಿ ಜಾವ್ನಾಸಾ ’ಕೊಶೆಡ್ದಾನ್ ಕೆಲ್ಲಿ ಖುನ್’.
ಕಥಾದಾಯ್ಜ್ - 4 . ಕೊಶೆಡ್ದಾನ್ ಕೆಲ್ಲಿ ಖುನ್
ದೆವಾಧಿನ್ ವಿತೊರ್ ಲೋಬ್ ದಕ್ಷಿಣ್ ಕನ್ನಡಾಂತ್ ಮಾತ್ರ್ ನ್ಹಂಯ್ ಸಗ್ಳ್ಯಾ ಮದ್ರಾಸ್ ಪ್ರಾಂತಾಂತ್ (ತವಳ್ ಕರ್ನಾಟಕ ಪ್ರಾಂತ್ ನಾತ್ಲ್ಲೆಂ.) ಏಕ್ ತೀಕ್ಷ್ಣ್ ತಕ್ಲೆಚೊ, ಪೂಣ್ ಮನ್ಶ್ಯಾಪಣಾಚೊ ವಕೀಲ್ ಮ್ಹಣ್ ನಾಂವಾಡ್ಲ್ಲೊ. ತಾಣೆ ಹಾತಿಂ ಘೆತ್ಲ್ಲಿ ಕೆಜ್, ಕಿತ್ಲಿ ಚಿಲ್ಲರ್ ಜಾಲ್ಯಾರೀ, ತಿ ಕೊಡ್ತಿಂತ್ ಉಬಿ ಜಾತಾನಾ ತಾಕಾ ಎಕ್ ನವೊಚ್ ರಂಗ್ ಲಾಭ್ತಾಲೊ ಆನಿ ಶೆಂಬೊರಾನಿ ಲೋಕ್ ಫಕತ್ ವಕೀಲ್ ಲೊಬೊನ್ ಕೊಡ್ತಿಂತ್ ಝುಜ್ಚೆಂ ಪಳೆಂವ್ಕ್ ಯೆತಾಲೊ.
’ದುಬ್ಳ್ಯಾ ಧಾಕ್ಟ್ಯಾಂಚೊ ವಕೀಲ್’ ಮ್ಹಣ್ ತೊ ನಾಂವಾಡ್ಲ್ಲೊ ಜಾಲ್ಯಾರೀ, ಧನಿಕಾಂಚೊ ತೊ ದುಸ್ಮಾನ್ ಮ್ಹಣ್ ಚಿಂತುಂಕ್ ಫಾವೊ ನ್ಹಂಯ್. ಕೇಜ್ ಕೊಣಾಚೀಯ್ ಜಾಂವ್, ಏಕ್ ಪಾವ್ಟಿಂ ತಾಚ್ಯಾ ಹಾತಾಂತ್ ಆಯ್ಲಿ ಜಾಲ್ಯಾರ್, ತಾಚೆಂ ಧ್ಯಾನ್ ಆನಿ ಮನ್ ತ್ಯಾ ಕೆಜಿರ್ ಆಸ್ತಾಲೆಂ. ತಿ ಯಶಸ್ವಿ ಥರಾನ್ ಪೊಂತಾಕ್ ಪಾಯ್ತಾ ಪರ್ಯಾಂತ್ ತಾಕಾ ತಾನ್ ಭುಕ್ ವಿಸರ್ತಾಲಿ, ನೀದ್ ಪಡಾನಾತ್ಲಿ, ಸರ್ವ್ ಕಾಮಾಚಿ ತಾಕಾ ವಿಸರ್ ಪಡ್ತಾಲಿ. ತಾಣೆ ಝುಜೊನ್ ಜಿಕ್ಲ್ಲ್ಯೊ ಕೆಜಿ ಮಾಲ್ಘಡ್ಯಾಂಚ್ಯಾ ಕಾಣಿಯಾಂ ಪರಿ ಲೊಕಾಚ್ಯಾ ತೊಂಡಾಂತ್ ಅಜೂನ್ ಘೊಳ್ಟಾತ್.
ಕೊಡ್ತಿಂತ್ ತಾಕಾ ಪಳೆವ್ನ್ ನಾಕಾರ್ ಬೊಟ್ ಜೊಕ್ಲ್ಲೆ ಮನಿಸ್ ಆಜ್ ಮಾಲ್ ಮ್ಹಾತಾರೆ ಜಾಲ್ಯಾರೀ, ತಾಣಿಂ ಕೊಡ್ತಿಂತ್ ಪಳೆಲ್ಲಿಂ ದ್ರಶ್ಯಾಂ ಕಾಲ್ಚ್ ಜಾಲ್ಲ್ಯೆ ಪರಿ ತೆ ವರ್ಣಿತಾತ್. ಆಯ್ಲೆವಾರ್ ವಕೀಲ್ ಲೋಬ್ ದೆವಾಧಿನ್ ಜಾವ್ನ್ ಸಾಧಾರ್ಣ್ ವೀಸ್ ವರ್ಸಾಂನಿ - ತಾಚ್ಯಾ ಪುತಾನ್ ಬಾಪಾಯ್ಚಿಂ ಕಾಗ್ದಾಂ-ಪತ್ರಾಂ ಉಸ್ತಿತಾನಾ ತಾಣೆ ಆಪ್ಲ್ಯೊ ಥೊಡ್ಯೊ ಕಿಜಿ ಆಪ್ಲ್ಯಾಚ್ ಉತ್ರಾಂನಿ ವರ್ಣಿಲ್ಲ್ಯೊ, ತಾಚ್ಯಾ ಡಾಯ್ರಿಂತ್ ವಾಚುಂಕ್ ಮೆಳ್ಳ್ಯೊ. ಕಶೆಂ ಕೊಡ್ತಿಂತ್ ಕೆಜಿ ಜಿಕೊಂಕ್ ಆಪ್ಲಿ ಜೀಬ್ ತಾಣೆ ವಾಪರ್ಲಿಗಿ, ತ್ಯಾಚ್ ಪ್ರಕಾರ್ ತ್ಯಾ ಕೆಜಿಂಚೆಂ ವರ್ಣನ್ ಕರುಂಕ್ ಆಪ್ಲಿ ಲೆಖ್ಲಿ ಎಕಾ ಹಾತೆರಾ ಪರಿ ತಾಣೆ ವಾಪರ್ಲಿ. ತಾಣೆ ವರ್ಣಿಲ್ಲ್ಯಾ ಸಬಾರ್ ಕೆಜಿಂ ಪಯ್ಕಿ ಹಾಂಗಾ ಸಕಯ್ಲ್ ದಿಲ್ಲಿ ಭೋವ್ ವಿಚಿತ್ರ್ ಆನಿ ಕೌತುಕಾಚಿ ಜಾವ್ನಾಸಾ ಮ್ಹಣ್ಯೆತ್. ತಾಚ್ಯಾಚ್ ಉತ್ರಾಂನಿ ತಿ ಹಾಂವ್ ಹಾಂಗಾಸರ್ ದಿತಾಂ:
’ಹಾಂವೆ ಹಾಚ್ಯಾ ಆದಿಂ ಜಾಯ್ತ್ಯಾ ಜಣಾಂಚಿ ವಕಾಲತ್ ವಹಿಸಿಲ್ಯಾ. ಜಾಯ್ತ್ಯಾ ಜಣಾಂಕ್ ಜಯ್ಲಾಚೆಂ ದಾರ್ ಆಡಾಯ್ಲಾಂ. ಜಾಯ್ತ್ಯಾ ಜಣಾಂಕ್ ಮರ್ಣಾಚ್ಯಾ ಘಾಸಾಂತ್ಲೆಂ ಸೈತ್ ವಾಂಚಯ್ಲಾಂ. ಪುಣ್ ಮಿಂಗೆಲ್ ಶೆಟಿಚಿ ತಸಲಿ ಕೇಜ್ ಎದೊಳ್ ಪರ್ಯಾಂತ್ ಮ್ಹಜ್ಯಾ ಹಾತಾಕ್ ಆಯಿಲ್ಲಿ ನಾ. ಆನಿ ಮುಖಾರ್ ಯೇತ್ ಮ್ಹಣ್ಯೀ ಹಾಂವ್ ಪಾತ್ಯೆನಾ. ಅಸಲಿ ಕೆಜ್ ಮ್ಹಜೆ ತಸಲ್ಯಾ ಪ್ರಾಯೆಸ್ತ್ ಆನಿ ಹೆಳ್ಲ್ಲ್ಯಾ ವಕಿಲಾಚ್ಯೆ ಜಿಣ್ಯೆಂತ್ ಸೈತ್ ಎಕ್ಚ್ ಪಾವ್ಟಿಂ ಯೆಂವ್ಚಿ ಮ್ಹಣ್ ಹಾಂವ್ ಪಾತ್ಯೆತಾಂ.
’ಕಿನ್ನಿಗೊಳಿ ಥಾವ್ನ್ ಚಾರ್ ಮಯ್ಲಾಂ ಪಯ್ಸ್, ಕಲ್ಲಮುಂಡ್ಕೂರ್ ಫಿರ್ಗಜೆಂತ್ ಮೊಯ್ಲೆತ್ ಮ್ಹಳ್ಳೆಕಡೆ ಮಿಂಗೆಲ್ ಶೆಟ್ ರಾವ್ತಾಲೊ. ಆಸ್ಪತ್ದಾರ್ ಮನಿಸ್ ಆಸೊನ್ ತಾಚೆಚ್ ಮ್ಹಳ್ಳೊ ಸಾತ್ ಆಟ್ ಎಕ್ರೆ ಜಾಗೊ, ಮಾಡಾಂ ಮಾಡಿಯಾಂ ತೊಟ್ ಆನಿ ಏಕ್ ವ್ಹಡ್ಲೆಂ ಪುಣ್ ಪರ್ನೆಂ ನಳ್ಯಾಂಚೆಂ ಘರ್ ತಾಕಾ ಆಸ್ಲ್ಲೆಂ. ಹಿ ಕೆಜ್ ಸುರು ಜಾತಾನಾ ತಾಕಾ ಪನ್ನಾಸ್ ಆನಿ ಪಾಂಚ್ ವರ್ಸಾಂ ಜಾ
ತಿತ್. ಎಕ್ಯೆ ರಾತಿಂ ಧಾ ವೊರಾರ್ಶೆಂ ಮಿಂಗೆಲ್ ಕಿನ್ನಿಗೊಳಿ ಪೊಲಿಸ್ ಸ್ಟೆಷಾನಾ ಭಿತರ್ ರಿಗ್ಲೊ. ತಾಚ್ಯಾ ಹಾ
ತಾಂತ್ ರಗ್ತಾನ್ ಬುಡ್ಲ್ಲಿ ಲಾಂಬ್ ಎಕ್ ಸುರಿ ಆಸ್ಲ್ಲಿ. ಸೊರೊ ಪಿಯೆಂವ್ಕ್ ನಾತ್ಲ್ಲೊ ಜಾಲ್ಯಾರೀ ತಾಚೆ ದೊಳೆ ತಾಂಬ್ಡೆ ಜಾಲ್ಲೆ. ತೊ ಸೀದಾ ಇನ್ಸ್ಪೆಕ್ಟಾರಾಚ್ಯಾ ಕುಡಾ ಭಿತರ್ ಗೆಲೊ ಆನಿ ಸುರಿ ಮೆಜಾರ್ ದವರ್ನ್ ತಾಚ್ಯೆ ಮುಖಾರ್ ಹಾತ್ ಬಾಂಧುನ್ ಉಬೊ ರಾವ್ಲೊ. ಇನ್ಸ್ಪೆಕ್ಟರ್ ಬಾವ್ಡೊ ಗಜಾಲ್ ಕಿತೆಂ ನೆಣಾಸ್ತಾಂ ಕಾನ್ ದೊಳೆ ಸೊಡ್ನ್ ಮಿಂಗೆಲಿಕ್ಚ್ ಪಳೆಂವ್ಕ್ ಪಡ್ಲೊ.
"ರಾತಿಚ್ಯಾ ಹ್ಯಾ ವೆಳಾರ್ ಯೆವ್ನ್ ತುಮ್ಕಾಂ ಧೊಸ್ಲ್ಲ್ಯಾಕ್ ಭೊಗ್ಸಿಯಾ ಸಾಯ್ಬಾಂನೊ." ಮಿಂಗೆಲ್ ಮ್ಹಣಾಲೊ,
"ಹಾಂವೆ ಮ್ಹಜ್ಯಾ ಪುತಾಚಿ ನಿಕುಚಿ ಖುನ್ ಕೆಲ್ಯಾ ಹ್ಯಾಚ್ ಸುರಿಯೆನ್. ಮ್ಹಾಕಾ ತುಮಿ ಕೈದ್ ಕರ್ಯೆತ್."
"ಜಾಂವ್ ತಾಚ್ಯಾ ತಾಳ್ಯಾಂತ್ ದುಖ್, ಜಾಂವ್ ರಾಗ್ ವಾ ಹೆರ್ ಕಸಲೀಂಯ್ ಖುಣಾಂ ಜಿಂ ಸ್ವಾಭಾವಿಕ್ ಜಾವ್ನ್ ಖುನಿಗಾರಾಂಚ್ಯಾ ತಾಳ್ಯಾರ್ ದಿಸ್ಚೆ ತಸಲಿಂ, ತಾಚೆ ಥಂಯ್ ದಿಸೊಂಕ್ನಾಂತ್.
’ತಕ್ಷಣ್ ದೋಗ್ ಹವಾಲ್ದಾರಾಂಕ್ ಘೆವ್ನ್ ಇನ್ಸ್ಪೆಕ್ಟರ್ ಮಿಂಗೆಲಿಚ್ಯಾ ಘರಾ ಆಯ್ಲೊ ಮಿಂಗೆಲಿಕ್ ಸಾಂಗಾತಾ ಘೆವ್ನ್. ಮಿಂಗೆಲಿನ್ ಸಾಂಗ್ಲ್ಲ್ಯೆ ಪ್ರಮಾಣೆ ನಿಕು ಆಪ್ಲ್ಯಾ ಕುಡಾಂತ್ ಖಾಟಿಯೆರ್ ನಿದ್ಲ್ಲ್ಯಾಕಡೆ ಖುನ್ ಜಾವ್ನ್ ಅಂತರ್ಲ್ಲೊ. ತಾಚ್ಯಾ ಹರ್ದ್ಯಾಂತ್ ಥಾವ್ನ್ ವ್ಹಾಳ್ಲ್ಲೆಂ ರಗತ್ ಧರ್ಣಿರ್ ಗೆಟೆ ಜಾಲ್ಲೆಂ. ತಾಚಿ ಆವಯ್ ಆಕ್ಲಾಸಾನ್ ಆನಿ ಭಿಯಾನ್ ಕಂಗಾಲ್ ಜಾವ್ನ್ ಕೊನ್ಶಾಕ್ ಬಸ್ಲ್ಲಿ.
ಘರ್ಚ್ಯಾ ಕಾಮಾಚಿಂ ಆನಿ ಸೆಜ್-ಸಾಂಬಾರ್ಚೊ ಲೋಕ್ ಹೆಂ ಭಿರಾಂಕುಳ್ ದ್ರಶ್ಯ್ ಮೊನೊ ಜಾವ್ನ್ ಪಳೆತಾಲೊ. ಉಲಂವ್ಕ್ ಕೊಣಾಯ್ಕಿ ಧಯ್ರ್ ನಾತ್ಲ್ಲೆಂ. ಮಿಂಗೆಲಿನ್ ಸಾಂಗ್ಲ್ಲೆಂ ಹರ್ಯೆಕ್ ಉತಾರ್ ಸತ್ ಜಾವ್ನಾಸ್ಲ್ಲೆಂ. ತಾಚಿ ಮೊಟ್ವ್ಯಾನ್ ತನ್ಕಿ ಕರ್ತಚ್ ಮೊಡೆಂ ಕಾಡಯ್ಲೆಂ ಆನಿ ಮಿಂಗೆಲಿಕ್ ಲೊಕಾಪ್ಪಾಂತ್ ಘಾಲೊ.
’ಸುರ್ವೆರ್ ಹಿ ಕೇಜ್ ಚಿಲ್ಲರ್ ಆನಿ ಸಾಧಿ ತಶಿ ದಿಸ್ಲಿ. ವಾಂಕ್ಡ್ಯೆ ವಾಟೆನ್ ವೆಚ್ಯಾ ಪುತಾಕ್ ಪ್ರಯತನ್ ಕೆಲ್ಯಾರ್ಯೀ ಸುಧ್ರಾಂವ್ಕ್ ಜಾಯ್ನಾಸ್ತಾಂ ಸಲ್ವೊನ್ ಆಪ್ಣೆಂಚ್ ನೀತ್ ಕೆಲ್ಲಿ ತ್ಯಾ ಬಾಪಾಯ್ನ್. ಪುಣ್ ಉಪ್ರಾಂತ್ ಜಾಲ್ಲ್ಯೆ ತನ್ಖೆಂತ್, ಮುಖ್ಯ ಜಾವ್ನ್ ಮ್ಹಜ್ಯಾ ಖಾಸ್ಗಿ ತನ್ಖೆಂತ್, ಜಾಯ್ತ್ಯೊ ಸಂಗ್ತಿ ಉಜ್ವಾಡಾಕ್ ಆಯ್ಲ್ಯೊ. ತ್ಯೊ ಸಾಂಗ್ಚೆ ಪಯ್ಲೆಂ ನಿಕುಚಿ ಪಾಟ್ಲಿ ಚರಿತ್ರಾ ಹಾಂಗಾ ಇಲ್ಲಿ ವರ್ಣುಂಚಿ ಗರ್ಜ್ ದಿಸ್ತಾ.
’ನಿಕು ಲ್ಹಾನ್ ಪ್ರಾಯೆರ್ ಥಾವ್ನ್ಚ್ ಪೊಕ್ರಿ ಆನಿ ಆಪ್ಲ್ಯಾ ಖುಶೆಚೊ ಜಾವ್ನ್ ವಾಡ್ಲ್ಲೊ. ಖರ್ಚಾಕ್ ಆವಯ್ ಬಾಪಾಯ್ ಥಾವ್ನ್ ಮೆಳಾನಾತ್ಲ್ಲ್ಯಾ ವೆಳಾರ್ ಕಾಬಾಟಾಂತ್ ಥಾವ್ನ್ ಫಾರುಂಕ್ ಸುರು ಜಾಲೊ. ಉಪ್ರಾಂತ್ ಮುಡೆ ಮುಡೆ ತಾಂದುಳ್ ನಪಂಯ್ಚ್ ಜಾಲೊ. ನಾರ್ಲ್, ಪೊಪ್ಳಾಂ, ಘಡಾಯ್ ಮಾಯಾಕ್ ಜಾಲೆ. ಶೆಜಾರ್ಯಾಂನಿ ಚೊರ್ಯೆಂಚಿಂ ದುರಾಂ ದೀಂವ್ಕ್ ಸುರು ಕೆಲಿಂ. ಏಕ್ ಪಾವ್ಟಿಂ ಮಿಂಗೆಲ್ ಶೆಟಿನ್ ಅರಿಯಾಳ್ಚ್ಯಾ ಕೊಂಕ್ಣ್ಯಾಚೆ ಬಾಕಿ ಆಸ್ಲ್ಲೆ ಪಾಂಯ್ಶಿ ರುಪಯ್ ಪುತಾಲಾಗಿಂ ದೀವ್ನ್ ಧಾಡ್ಲೆ. ತೆ ಘೆವ್ನ್ ಗೆಲ್ಲೊ ನಿಕು ಕುದ್ರಿ ಪದ್ವಾರ್ ಸಗ್ಳಿ ರಾತ್ ಜುಗಾರ್ ಖೆಳೊನ್ ಸಗ್ಳೆ ಪಯ್ಶೆ ಹೊಗ್ಡಾವ್ನ್ ತಿಸ್ರ್ಯೆ ದಿಸಾ ಘರಾ ಆಯಿಲ್ಲೊ. ಅನ್ಯೇಕ್ ಪಾವ್ಟಿಂ ವ್ಹಾಳಾ ಪಲ್ತಡಿ ವಸ್ತಿ ಕರ್ನ್ ಆಸ್ಚ್ಯಾ ಸಾವೆರ್ ಮೆಂದೊಸಾಚ್ಯಾ ಧುವೆಚ್ಯಾ ಅಂಗಾರ್ ಹಾತ್ ಘಾಲುಂಕ್ ವಚೊನ್, ಸಗ್ಳ್ಯಾಂ ಮುಖಾರ್ ಚೆಡ್ವಾಚೆ ವ್ಹಾಣಾಂಚೆ ಮಾರ್ ಆನಿ ಆಪ್ಲ್ಯಾ ಬಾಪಾಯ್ಚೆ ಸೊಂಟ್ಯಾಂಚೆ ಮಾರ್ ತಾಣೆ ಖೆಲ್ಲೆ.
’ಪಯ್ಲೆಂ ಪಯ್ಲೆಂ, ನಿಕುಚಿ ಪೊಕ್ರಿಪಣಾಂ, ಲೆಖಾವರ್ತೊ ಖರ್ಚ್ ಆನಿ ಲೊಕಾಚ್ಯಾ ತೊಂಡಾಂತ್ಲ್ಯೊ ಗಾಳಿ ಬಾಪಾಯ್ಚ್ಯಾ ಕಾನಾಂತ್ ಪಡೊಂಕ್ ನಾತ್ಲ್ಲ್ಯೊ. ಪುಣ್ ಹಾಚೆ ವರ್ವಿಂ ನಿಕು ಥಂಯ್ ಬರೆಂಪಣ್ ಜಾಂವ್ಚ್ಯೆ ಬದ್ಲಾಕ್ ತಾಚಿ ಸವಯ್ ಆನಿಕೀ ಪಾಡ್ ಜಾವ್ನ್ ಆಯ್ಲಿ. ತಿ ಇತ್ಲಿ ಪಾಡ್ ಜಾಲಿಕೀ, ಗಾಂವ್ಚ್ಯಾ ಲೊಕಾಚಿ ಗಡ್ ಉತರ್ಲಿ ಮ್ಹಣ್ಯೆತ್. ತೆ ಎದೊಳ್ ವೊಗೆ ರಾವ್ಲ್ಲೆ ಫಕತ್ ಮಿಂಗೆಲ್ ಶೆಟಿಚೆಂ ತೊಂಡ್ ಪಳೆವ್ನ್ ಶಿವಾಯ್ ದುಸ್ರ್ಯಾ ಖಂಯ್ಚ್ಯಾಯ್ ಕಾರಣಾನ್ ನ್ಹಂಯ್. ಎದೊಳ್ ಜಾಲ್ಲಿಂ ಸಗ್ಳಿಂ ಘಡಿತಾಂ ಬಾಪಾಯ್ಚ್ಯಾ ಜಾಣ್ವಾಯೆ ಭಾಯ್ರ್ ಉರ್ಲ್ಲಿಂಗಿ ಮ್ಹಳ್ಳೆಂಯ್ ನಿಘಂಟ್ ಸಾಂಗೊಂಕ್ ಜಾಯ್ನಾ. ಪುಣ್ ಇತ್ಲೆಂ ಸತ್ಕೀ ಪುತಾ ಥಂಯ್ ತಾಚ್ಯಾ ನಡ್ತ್ಯಾಂತ್ ವಿಶೇಷ್ ಬದ್ಲಾವಣ್ ದಿಸೊನ್ ಆಯ್ಲಿನಾ.
’ಏಕ್ ದೀಸ್ ನಿಕು ಅವಾಳ್ಯಾ ಗುಡ್ಯಾರ್ ಕಾಜುಚ್ಯಾ ಫಾಡಿಂತ್ ಭೊಂವ್ತಾನಾ ಬೆಟಾಂತ್ಲ್ಯಾ ಸಾಲು ಪಿಂತಾಚಿ ಧುವ್ ಮಾಗ್ಗಿ ತೆಂಕ್ಡೆನ್ ಕಾಜು ಕಾಡ್ಚೆಂ ತಾಣೆ ಪಳೆಲೆಂ. ಫಾಡಿಂತ್ ಕಾಜುಚೆ ರೂಕ್ ಲಾಗಿಂ ಲಾಗಿಂ ಆಸ್ಲ್ಲ್ಯಾನ್ ಆನಿ ತಾಂಚೆ ಫಾಂಟೆ ಬಾಗ್ವೊನ್ ಧರ್ಣಿಕ್ ಲಾಗ್ಲ್ಲೆ ಜಾಲ್ಲ್ಯಾನ್ ರುಕಾಂ ಪಂದಾ ಕೊಣೆಂಯ್ ಕಿತೆಂಯ್ ಕೆಲ್ಯಾರ್ ಸುಲಭಾಯೆನ್ ಭಾಯ್ಲ್ಯಾಂಕ್ ಕಳಾನಾತ್ಲೆಂ. ಹ್ಯಾ ಪರಿಸ್ಥಿತಿಚೊ ಬರೊ ಫಾಯ್ದೊ ಜೊಡುಂಕ್ ಪಳೆಲೊ ನಿಕುನ್.
ಥೊಡ್ಯಾ ಮಹಿನ್ಯಾ ಥಾವ್ನ್ ತಾಕಾ ಮಾಗ್ಗಿಚೆರ್ ದೊಳೊ ಆಸ್ಲ್ಲೊ. ಪುಡ್ಪುಡಿತ್ ಜಾವ್ನ್ ವಾಡ್ಲ್ಲೆಂ ಮಾಗ್ಗಿ ರಂಗಾನ್ ಚಿಕ್ಕೆ ಸಾವ್ಳೆಂ ಜಾಲ್ಯಾರ್ಯೀ ತೊಂಡಾರ್ ಲಕ್ಷಣ್ ಆಸೊನ್, ಖುಶಾಲಿ ಸ್ವಭಾವಾಚೆಂ ಜಾವ್ನಾಸ್ಲ್ಲೆಂ. ದೆಕುನ್ ತಾಕಾ ಆಪ್ಲ್ಯಾ ಜಾಳಾಂತ್ ಸುಲಭಾಯೆನ್ ಸಾಂಪ್ಡಾವ್ಯೆತ್ ಮ್ಹಣ್ ಚಿಂತ್ಲೆಂ ಜಾಯ್ಜಾಯ್ ನಿಕುನ್. ’ಪಾಡಿಂತ್ ತೆಂ ಎಕ್ಲೆಂಚ್ ಆಸ್ಲ್ಲೆಂ ಪಲೆವ್ನ್ ನಿಕುಕ್ ಭಾಜ್ಲ್ಲೆಂ ಮೆಳ್ಳೆಂ. ಜಾಯ್ತ್ಯಾ ತೆಂಪಾ ಥಾವ್ನ್ ಭರೊನ್ ವೊಮ್ತೊಂಕ್ ಆಯಿಲ್ಲಿ ತಾಚೆ ಕುಡಿಚಿ ವೊಡ್ಣಿ ಕಾಟ್ ತುಟೊನ್ ವ್ಹಾಳೊಂಕ್ ಲಾಗ್ಲಿ. ಎಕಾಚ್ಪಾರಾ ತೊ ಚೆಡ್ವಾ ಸರ್ಶಿಂ ಧಾಂವ್ಲೊ ಆನಿ ತಾಕಾ ಆಪ್ಲ್ಯಾ ವೆಂಗೆಂತ್ ಆರಾವ್ನ್ ಧರ್ಲೆಂ. ನಿರ್ಜನ್ ಜಾಗೊ ಆನಿ ಚೆಡುಂಯೀ ಆಪ್ಲ್ಯಾ ಇಚ್ಛೆಕ್ ಕಬ್ಲಾತ್ ದಿತಲೆಂ ಮ್ಹಳ್ಳೆ ತಾಚೆ ಆಶೆಕ್ ಶೆಳೆಂ ಉದಾಕ್ ಪಡ್ಲೆಂ. ಖುಶಾಲಿ ಚೆಡ್ವಾಚೆಂ ಲೊಂಕ್ಡಾ ಸಾರ್ಕೆಂ ಕಾಳಿಜ್ ತೊ ನೆಣಾ ಜಾಲೊ. ತಾಚಿ ಬೊಬಾಟ್ ಆನಿ ಥಾಪ್ಡಾಂ, ಖೊಟೊ ಆನಿ ಮುಟಿ ಆನಿ ಪಾವಾನಾತ್ಲ್ಲ್ಯಾಕ್ ನಾಕ್ಷೊ ಬಳ್ ಜಾಲ್ಯೊ. ನಿಕುಚ್ಯಾ ಖೊಟ್ಯಾ ನಶಿಬಾಕ್ ಲಾಗೊನ್ ಹ್ಯಾಚ್ ವೆಳಾರ್ ಗುಡ್ಯಾಚ್ಯಾ ಮುಳಾಂತ್ ಪಾಶಾರ್ ಜಾಂವ್ಚೆ ದೊಗ್ ಹಿಂದು ತರ್ನಾಟೆ ಮಾಗ್ಗಿಚಿ ಬೊಬಾಟ್ ಆಯ್ಕೊನ್ ಫಾಡಿಕಡೆ ಧಾಂವೊನ್ ಆಯ್ಲೆ.
ಶಿಕಾರಿ ಚುಕ್ಲಿ ಮ್ಹಣ್ ನಿರಾಸೊನ್ ನಿಕುನ್ ಪಾಂಯಾಂಕ್ ಬೂಧ್ ಸಾಂಗ್ಲಿ. ತರ್ನಾಟ್ಯಾಂನಿ ತಾಕಾ ಧರುಂಕ್ ಜಾಯ್ತೆಂ ಪ್ರಯತ್ನ್ ಕೆಲ್ಯಾರ್ಯೀ ತೆ ಜಿಕ್ಲೆನಾಂತ್. ಮಾಗ್ಗಿಚ್ಯಾ ತೊಂಡಾಂತ್ ಥಾವ್ನ್ ಸರ್ವ್ ಗಜಾಲ್ ಸಮ್ಜಾತಚ್ ತೆ ದೊಗ್ಯೀ ಚೆಡ್ವಾಚ್ಯಾ ಬಾಪಾಯ್ಕ್ ಘೆವ್ನ್ ಕಿನ್ನಿಗೊಳಿ ಪೊಲಿಸ್ ಸ್ಟೆಷನಾಕ್ ದೂರ್ ವ್ಹರ್ನ್ ಗೆಲ್ಲೆ.
’ವಿಚಿತ್ರ್ ಕಿತೆಂಗಿ ಮ್ಹಳ್ಯಾರ್, ಹಿ ಸರ್ವ್ ಗಜಾಲ್ ಮಿಂಗೆಲ್ ಶೆಟಿಕ್ ಕಾಂಯ್ಚ್ ಕಳಿತ್ ನಾತ್ಲ್ಲಿ. ನಿಕು ತ್ಯಾ ದೀಸ್ ಘರಾ ಯೇಂವ್ಕ್ ನಾ. ತೊ ದೀಸ್ ಆಯ್ತಾರ್ ಜಾಲ್ಲ್ಯಾನ್, ಬಾಣಂಗಡಿ ಸಾಂತ್ ಆಸ್ಲ್ಲಿ. ಮಿಂಗೆಲ್ ಶೆಟ್ ಹರ್ಶೆಂಚ್ಯಾಬರಿ ಥೊಡ್ಯೊ ಶಿರೊತ್ಯೊ ಆನಿ ಪಾನಾಂ ವ್ಹರ್ನ್ ಸಾಂತೆಕ್ ಗೆಲ್ಲೊ. ವ್ಯಾರ್ ವಿಕುನ್ ಜಾತಚ್, ಅಣ್ಣಪ್ಪಾಚ್ಯಾ ಹೊಟೆಲಾಂತ್ ಏಕ್ ಗ್ಲಾಸ್ ಚ್ಹಾ ಪಿಯೆಂವ್ಕ್ ಗೆಲೊ. ತ್ಯಾ ವೆಳಾರ್ ಆಪ್ಲ್ಯಾ ಪುತಾನ್ ಕೆಲ್ಲ್ಯಾ ಹೀನ್ ಕರ್ತುಬಾಚಿ ಖಬರ್ ತಾಕಾ ಆಕಸ್ಮಿತ್ ಮೆಳ್ಳಿ. ತಿ ಕಶಿ ಮ್ಹಳ್ಯಾರ್-
’ಅಣ್ಣಪ್ಪಾಚ್ಯಾ ಹೊಟೆಲಾಂತ್ ಏಕ್ ವೊರೆ ವಿಂಗಡ್ ಲ್ಹಾನ್ ಕೂಡ್ ಆಸ್ಲ್ಲೆಂ. ಮಿಂಗೆಲಿನ್ ಕೆದಾಳಾಯ್ ಹ್ಯಾಚ್ ಕುಡಾಂತ್ ಬಸೊನ್ ಚ್ಹಾ ಪಿಯೆಂವ್ಚಿ ಆಸ್ಲ್ಲಿ. ತ್ಯಾ ದೀಸ್ ತಾಚೆ ಸಾಂಗಾತಾ ಕೊಣ್ಯೀ ನಾತ್ಲ್ಲೆ. ಪೂಣ್ ಭಾಯ್ಲ್ಯಾನ್ ದೋಗ್ ಚೊವ್ಗ್ ಬಸೊನ್ ನಿಕುಚಿ ಖಬರ್ ಉಲಂವ್ಕ್ ಲಾಗ್ಲೆ. ಭಿತರ್ ಮಿಂಗೆಲ್ ಬಸೊನ್ ಆಸಾ ಮ್ಹಣ್ ತಾಂಕಾಂ ಕಾಂಯ್ ಇಲ್ಲೊ ಹಿಶಾರೊ ಮೆಳ್ಲ್ಲೊ ಜಾಲ್ಯಾರ್ ತೆ ಸಬ್ಧ್ ಕಾಡ್ತೆನಾಂತ್. ಪುತಾ ಆನಿ ಬಾಪಾಯ್ ಮಧೆಂ ರಾತ್ ದಿಸಾಚೊ ತಫಾವಾಯ್ ಆಸಾ ಮ್ಹಳ್ಳೆಂ ಸಗ್ಳ್ಯಾಂಕ್ಯೀ ಕಳಿತ್ ಆಸ್ಲ್ಲೆಂ.
ತಾಂಣಿ ಉಲಂವ್ಚಿ ಖಬರ್ ಕೊಣಾಯ್ಚ್ಯಾ ಕಾನಾಂಕ್ ಪಡ್ಚಿನಾ ಮ್ಹಳ್ಳ್ಯಾ ಧಯ್ರಾನ್ ತೆ ಉಲಂವ್ಕ್ ಲಾಗ್ಲೆ. ಕಶೆಂ ನಿಕುನ್ ಚೆಡ್ವಾಚೆರ್ ಬಲಾತ್ಕಾರ್ ಕೆಲ್ಲೆಂ, ಕಶೆಂ ಚೆಡ್ವಾನ್ ನಿಕುಚೆಂ ತೋಂಡ್, ದೊಳೆ ಇತ್ಯಾದಿ ನಾಕ್ಷಾಂನಿ ಫಾಪ್ಸುನ್ ರಗತ್ ಕಾಡ್ಲ್ಲೆಂ ಆನಿ ಕಶೆಂ ದೋಗ್ ಜಣ್ ಧಾಂವ್ಡಾವ್ನ್ ಯೆತಚ್ ನಿಕು ಧಾಂವ್ಲ್ಲೊ, ಉಪ್ರಾಂತ್ ಕೆಲ್ಲೆಂ ಪೊಲಿಸ್ ಕಂಪ್ಲೆಂಟ್; ಕಶೆಂ ಥೊಡ್ಯಾಚ್ ವೆಳಾ ಭಿತರ್ ಪೊಲಿಸ್ ನಿಕುಚ್ಯಾ ಸೊಧ್ನೆರ್ ಪಡ್ಟಲೆ ಇತ್ಯಾದಿ, ಇತ್ಯಾದಿ.
’ಭಿತರ್ ಬಸ್ಲ್ಲ್ಯಾ ಮಿಂಗೆಲ್ ಶೆಟಿಕ್ ಹೆಂ ಉಲವ್ಣೆಂ ಆಯ್ಕಾತಾನಾ ಕಶೆಂ ಭೊಗ್ಲೆಂ ಜಾಯ್ತ್? ಹರ್ಯೆಕ್ ಉತರ್ ಕಡ್ಲ್ಲೆಂ ಶಿಶೆಂ ತಶೆಂ ತಾಚ್ಯಾ ಕಾನಾಂತ್ ಪಡ್ಲೆಂ. ಗ್ಲಾಸಾಂತ್ಲಿ ಚ್ಹಾ ತಶಿಚ್ ಉರ್ಲಿ. ಪಿರಿಯೆಂತ್ಲೊ ಪೊಳೊ ಅರ್ಧೊಚ್ ಉರ್ಲೊ. ನಿದೆಂತ್ಲ್ಯಾ ಮನ್ಶಾಬರಿ ಮಿಂಗೆಲ್ ಶೆಟ್ ಉಟ್ಲೊ. ತೆವ್ಶಿನ್ ಹೆವ್ಶಿನ್ ಪಳೆನಾಸ್ತಾಂ ಶೀದಾ ಕೊಂಕ್ಣ್ಯಾ ಸರ್ಶಿಂ ವಚೊನ್ ತಾಚೆ ಪಯ್ಶೆ ಫಾರಿಕ್ ಕೆಲೆ ಆನಿ ರಸ್ತ್ಯಾಕ್ ದೆಂವ್ಲೊ.
ಉಲವ್ನ್ ಬಸ್ಲ್ಲ್ಯಾಂಕ್ ತೊ ದಿಷ್ಟಿಕ್ ಪಡ್ತಚ್ ತಕ್ಲೆಕ್ ಘಡ್ಘೊಡೊ ಮಾರ್ಲ್ಲೆಬರಿ ಜಾಲೆಂ. ತೆ ಮೌನ್ ಜಾಲೆ. ತಕ್ಲಿ ಉಕ್ಲುನ್ ತಾಚೆಂ ತೊಂಡ್ ಪಳೆಂವ್ಚೆಂ ಇತ್ಲೆಂ ಧಯ್ರ್ ತಾಂಕಾಂ ಆಯ್ಲೆಂನಾ. ಆಪ್ಲ್ಯಾ ಉಲವ್ಣ್ಯಾಚೊ ಪರಿಣಾಮ್ ಕಸೊ ರಾವಾನ್ ಮ್ಹಳ್ಳೆಂ ಚಿಂತುನ್ ತೆ ಕಂಗಾಲ್ ಜಾಲೆ. ಜಶೆಂ ಪಯ್ಸ್ ಮ್ಹಳ್ಬಾರ್ ಏಕ್ ಲ್ಹಾನ್ ಕಾಳೆಂ ಮೋಡ್ ಮುಖಾರ್ ಯೆಂವ್ಚ್ಯಾ ವಾದಾಳಾಚೊ ಘುರ್ತ್ ಜಾವ್ಯೆತ್ಗಿ, ತಶೆಂ ಮಿಂಗೆಲ್ ಶೆಟಿನ್ ಎಕಾಚ್ಫರಾ ಸಬ್ಧ್ ಕಾಡಿನಾಸ್ತಾಂ ಹೊಟೆಲಾಂತ್ ಥಾವ್ನ್ ಭಾಯ್ರ್ ಗೆಲ್ಲೆಂ ದ್ರಶ್ಯ್ ಮುಖಾರ್ ಘಡ್ಚ್ಯಾ ಅನಾಹುತಾಚೆಂ ಪಯ್ಲೆಂ ವಾರೆಂ ಜಾವ್ನ್ ಝಳ್ಕಾಲೆಂ.
’ಮಿಂಗೆಲ್ ಶೆಟ್ ಅರ್ಧ್ಯಾಚ್ ವೊರಾನ್ ಘರಾ ಪಾವ್ಲೊ. ಹರ್ಶೆಂ ಆಟ್ ನೋವ್ ವೊರಾಂ ಜಾಲ್ಯಾ ಶಿವಾಯ್ ಯೇನಾತ್ಲ್ಲೊ ಮನಿಸ್ ಆಜ್ ಕಾಳೊಕ್ ಜಾಂವ್ಚ್ಯೆ ಪಯ್ಲೆಂಚ್ ಆಯಿಲ್ಲೊ ಪಳೆವ್ನ್ ಕೊಶಾಬಾಯ್ ಅಜಾಪ್ಲಿ.
ಚಿಮ್ಣೆಚ್ಯಾ ಅಸ್ಕತ್ ಉಜ್ವಾಡಾಂತ್ ತಾಚೆಂ ತೊಂಡ್ ತಿಕಾ ಸಾರ್ಕೆಂ ದಿಸ್ಲೆಂನಾ. ನಾ ಜಾಲ್ಯಾರ್ ತಿಕಾ ಆಪ್ಶೆಂಚ್ ಕಳ್ಟೆಂ, ಕಿತೆಂ ತರ್ಯೀ ವಿಶೇಸ್ ಘಡ್ಲಾಂ ಮ್ಹಣ್.
"ಕಿತೆಂ ವೆಗಿಂ ಆಯ್ಲ್ಯಾತ್? ಮಾಸ್ಳಿ ಕಾಂಯ್ ಹಾಂಡುಕ್ನಾಂಗಿ? ಮಿರ್ಸಾಂಗ್ ಮುಗ್ದಾಲ್ಲಿ ತೀಯೀ ಹಾಡುಂಕ್ ನಾಮೂ?" ತಿಣೆ ಅಜಾಪೊನ್ಶೆಂ ವಿಚಾರ್ಲೆಂ.
"ತುಜ್ಯಾ ಮಿರ್ಸಾಂಗೆಕ್ ಉಜೊ ಲಾಯ್! ಆನಿ ತುಜ್ಯಾ ಮಾಸ್ಳೆಕ್ ಕೊಲೊ ವೊರೊಂದಿ!" ಗೊರೊಜ್ ಮಾರ್ಲಿ ಮಿಂಗೆಲಿನ್,
"ನಿಕು ಖಂಯ್ ಗೆಲಾ ಸಾಂಗ್!"
’ಆತಾಂ ಕೊಶಾಬಾಯೆಕ್ ಸ್ವಷ್ಟ್ ಸಮ್ಜಾಲೆಂಕೀ, ಆಪ್ಲ್ಯಾ ಪುತಾನ್ ಕಿತೆಂ ತರ್ಯೀ ಅನಾಹುತ್ ಕೆಲಾಂ ಆನಿ ತಿ ಖಬಾರ್ ಬಾಪಾಯ್ಚ್ಯಾ ಕಾನಾಂತ್ ಪಡ್ಲ್ಯಾ ಮ್ಹಣ್. ಪುತಾಚಿ ಸವಯ್ ತಿ ಬರೀ ಜಾಣಾ. ಪುಣ್ ಬಿಯಾಕ್ ಆನಿ ಭಾತಾಕ್ ಎಕ್ಲೊಚ್ ಮ್ಹಣ್ ಲ್ಹಾನ್ ಪ್ರಾಯೆರ್ ಥಾವ್ನ್ ಕೊಂಡಾಟೊ ಕರ್ನ್ ವಾಡಯಿಲ್ಲ್ಯಾನ್, ತಾಚಿ ಚಾಲ್ ವಾಂಕ್ಡ್ಯೆ ವಾಟೆನ್ ವೆತಾನಾ ಬರಿ ಬೂಧ್-ಬಾಳ್ ಆನಿ ಶಿಕ್ಷಾ ದಿಂವ್ಚ್ಯಾ ಬದ್ಲಾಕ್ ಪುರ್ಪುರೆ ಆನಿ ರಡ್ಣೆಂ ಆಯ್ಕೊಂಕ್ ಮೆಳ್ಲ್ಲ್ಯಾನ್ ತೆಂ ಪುತಾಚ್ಯಾ ಹ್ಯಾ ಕಾನಾಂತ್ ಥಾವ್ನ್ ತ್ಯಾ ಕಾನಾಂತ್ಲ್ಯಾನ್ ಪಾಶಾರ್ ಜಾತಾಲೆಂ.
ಪುತಾನ್ ಕೆಲ್ಲೊ ಕಿತೆಂಯ್ ಅನ್ನ್ಯಾಯ್ ಬಾಪಾಯ್ಚ್ಯಾ ಕಾನಾಂತ್ ಪಡ್ಚ್ಯೆ ಪಯ್ಲೆಂ ತಿಚ್ಯಾ ಕಾನಾಕ್ ಪಡ್ಟಾಲೊ. ಬಾಪಯ್ ಘರಾ ಆಸ್ಚೊ ಭೋವ್ ಉಣೊ. ತೊ ಸಾಂಜೆರ್ ಘರಾ ಪಾಂವ್ಚ್ಯೆ ಭಿತರ್ ಪುತಾಚೆ ಕೆದೆ ವ್ಹಡ್ ಗುನ್ಯಾಂವ್ ಆಸ್ಲ್ಯಾರೀ ತೆ ನಪಂಯ್ಚ್ ಜಾತಾಲೆ ವ ಎಕ್ದಮ್ ಚಿಲ್ಲರ್ ಕರ್ನ್ ಸೊಡ್ಟಾಲಿ ತಿ ಆವಯ್ ಆನಿ ಘೊವಾಚೊ ರಾಗ್ ನಿವ್ಳಾಯ್ತಾಲಿ. ಹ್ಯಾ ವರ್ವಿಂ ಪುತಾಚೊ ನೀಜ್ ಸ್ವಭಾವ್ ಮಿಂಗೆಲಿಕ್ ಕಳೊಂಕ್ ಜಾಯ್ತಿಂ ವರ್ಸಾಂ ಗೆಲಿಂ. ಆಪ್ಲೊ ಪೂತ್ ಅಪ್ಣಾಪರಿ ನ್ಹಂಯ್ ಮ್ಹಣ್ ತೊ ಜಾಣಾ ಆಸ್ಲ್ಲೊ ಜಾಲ್ಯಾರೀ, ಗಾಂವಾರ್ ಸಗ್ಳ್ಯಾ ಪಾಡ್ ನಾಂವ್ ವರಿತ್ ಮ್ಹಣ್ ತಾಣೆ ಸಪ್ಣಾಂತ್ಯೀ ಚಿಂತುಂಕ್ನಾ.
’ಕೊಶಾಬಾಯೆಕ್ ಕಾಯ್ಲಿರ್ ಉಬೆ ರಾವ್ಲ್ಲೆಬರಿ ಜಾಲೆಂ. ಗಜಾಲ್ ಸಮ್ಜೊಂಚಿ ಕಶಿ? ವಿಚಾರ್ಚೆಂ ಕೊಣಾಲಾಗಿಂ? ಘೊವಾಕಡೆಗಿ? ತಾಚೆಲಾಗಿಂ ವಿಚಾರ್ಚೆಂ ಸೊಡ್, ತಾಚೆಂ ರಾಗಾನ್ ಕಾಳೆಂ ವಿದ್ರೂಪ್ ಜಾಲ್ಲೆಂ ತೊಂಡ್ ಪಳೆಂವ್ಕ್ ಸೈತ್ ತಿಕಾ ಧೈರ್ ನಾಸ್ಲ್ಲೆಂ. ಆನಿ ಪುತಾಲಾಗಿಂ ವಿಚಾರ್ಯೆತೆಂ ಮ್ಹಳ್ಯಾರ್ ತೊ ಆನಿಕ್ಯೀ ಘರಾ ಯೆಂವ್ಕ್ ನಾ. ಆಯ್ಲ್ಯಾರ್ಯೀ ಬಾಪಯ್ ಮುಖಾರ್ ಕಶೆಂ ವಿಚಾರ್ಚೆಂ? ತ್ಯಾ ಶಿವಾಯ್ ಘೊವ್ ಆಜ್ ಝುಜಾಕ್ ಉಬೊ ಜಾಲಾ! ಕ್ರೋಧಾ ಪ್ರಮಾಣೆ ಆಜ್ ಜೀವ್ ಕಾಡುಂಕ್ಯೀ ಪಾಟಿಂ ಸರ್ಚೊನಾ ತೊ!
’ಮಿಂಗೆಲ್ ಶೆಟ್ ಘುಡಾಂತ್ ಸಾಂಪ್ಡಾಲ್ಲ್ಯಾ ವಾಗಾ ಪರಿ ಚೊವ್ಕೆಂತ್ ಪಾಸಾಯೊ ಮಾರುಂಕ್ ಲಾಗ್ಲೊ. ತಾನ್ ಭುಕ್ ತೊ ವಿಸರ್ಲೊ. ವೊರಾಂ ಪಾಟ್ಲ್ಯಾನ್ ವೊರಾಂ ಪಾಶಾರ್ ಜಾಲಿಂ. ನಿಕುಚೊ ಪಾತ್ತೊ ನಾ. ಮಿಂಗೆಲ್ ಜೆವಿನಾ ವ ನಿದಾನಾ. ಕೊಶಾಬಾಯ್ ಕೊನ್ಶ್ಯಾಂತ್ ಬಸೊನ್ ಶೆರ್ಮೆಲ್ಯಾ, ಘಾಮಾನ್ ತಿಚೆಂ ಸಗ್ಳೆಂ ಆಂಗ್ ಭಿಜ್ಲಾಂ ಆನಿ ಥರ್ಥರ್ತಾ. ಎಕ್ ದೊನ್ ಪಾವ್ಟಿಂ ಘೊವಾಲಾಗಿಂ ಉಲಂವ್ಚೆಂ ಪ್ರಯತ್ನ್ ತಿಣೆಂ ಕೆಲೆಂ. ಪುಣ್ ತಿಚ್ಯಾ ತೊಂಡಾಂತ್ಲ್ಯಾನ್ ಸಬ್ಧ್ ಸಾರ್ಕೆ ಯೇನಾ ಜಾಲೆ ಆನಿ ಆಯ್ಲ್ಯಾರ್ಯೀ ತೆ ತಿಕಾಚ್ ಆಯ್ಕಾಲೆಗೀ ಮ್ಹಳ್ಳೊ ದುಬಾವ್. ಭ್ಯೆಂ ಆನಿ ವಿರಾರಾಯ್ ಮೆಳೊನ್ ತಿಚಿ ತಾನ್ ಭುಕ್ಯೀ ಥಾಂಬೊನ್ ಗೆಲ್ಲಿ.
ಸಾಡೆ ಧಾ ವೊರಾರ್ಶೆಂ ಅಂಗ್ಣಾಂತ್ ಕೊಣ್ಗಿ ಚಲೊನ್ ಯೆಂವ್ಚೊ ಅವಾಜ್ ಆಯ್ಕಾಲೊ. ಸಾಂಗಾತಾಚ್ ವ್ಹಡ್ಲ್ಯಾನ್ ಕಸಲೆಂಗಿ ಭುರ್ಶೆಂ ಕಂತಾರ್ ಮ್ಹಣ್ಚೊ ತಾಳೊ. ಅಖ್ರೇಕ್ ನಿಕು ಘರಾ ಪಾವ್ಲ್ಲೊ. ಹರ್ಶೆಂ ಉಗ್ತೆಂ ಆಸ್ಚೆಂ ಘರಾಚೆಂ ದಾರ್ ಆಜ್ ಮಿಂಗೆಲಿನ್ ಹಟಾನ್ ಬಂದ್ ಕರ್ನ್ ಭಿತರ್ಲ್ಯಾನ್ ಖಿಳ್ ಘಾಲ್ಲಿ. ಭಾಯ್ರ್ ಥಾವ್ನ್ ’ಬಡ ಬಡ’ ಕರ್ನ್ ದಾರಾರ್ ಮಾರ್ಚೊ ಅವಾಜ್ ಆಯ್ಕಾಲೊ ಆನಿ ತಾಚೆ ಸಾಂಗಾತಾಚ್ ಆಡ್ ಪಡ್ಲ್ಲೆ ಜಿಬೆಚೆ ಗಾಳಿ ಸೊವೆ.
’ಕೊಶಾಬಾಯ್ ಎಕಾಚ್ಪಾರಾ ಉಡೊನ್ ಪಡ್ಲಿ ಆನಿ ದಾರಾ ಸರ್ಶಿಂ ಧಾಂವೊನ್ ಆಯ್ಲಿ. ಪುಣ್ ತಿಚ್ಯಾಕ್ಯೀ ಪಯ್ಲೆಂ ಮಿಂಗೆಲ್ ದಾರಾಲಾಗಿಂ ಯೇವ್ನ್ ಆಡ್ ರಾವ್ಲೊ. ಘರಾಚೊ ಸೊಪೊ ವಾರ್ಯಾ ಪಾವ್ಸಾ ಥಾವ್ನ್ ರಾಕೊಂಕ್ ಮೊಡ್ಲಾಂಚಿ ತಟ್ಟಿ ಘಾಲ್ಲಿ. ತ್ಯಾ ತಟ್ಟೆಚ್ಯಾ ಇಡ್ಯಾಂತ್ಲ್ಯಾನ್ ಕೊಶಾಬಾಯೆನ್ ಹಾತ್ ಭಾಯ್ರ್ ಘಾಲ್ನ್ ಹಾತ್ ಭಾಶೆನ್ ಪುತಾಕ್ ಪಾಟಿಂ ವಚೊಂಕ್ ಹಿಶಾರೊ ದಿಲೊ. ನಿಕುಕ್ ಪಯ್ಲೆಂ ತ್ಯಾ ಹಾತ್ ಭಾಶೆಚೆರ್ ಧ್ಯಾನ್ ಗೆಲೆಂನಾ. ಪುಣ್ ಇಲ್ಲ್ಯಾ ವೆಳಾನ್ ತಾಚಿ ದೀಷ್ಟ್ ಥಂಯ್ ವೆತಚ್ ತಾಣೆ ದಾರ್ ಬಡಂವ್ಚೆಂ ಬಂದ್ ಕೆಲೆಂ ಆನಿ ತ್ಯಾ ಹಾತಾಕ್ಚ್ ಪಳೆಂವ್ಕ್ ಪಡ್ಲೊ. ತಾಚ್ಯಾ ಸಯ್ರ್-ಭಯ್ರ್ ಜಾಲ್ಲ್ಯೆ ಮತಿಂತ್ ಸಯ್ತ್ ಘರಾಂತ್ ಕಿತೆಂಗಿ ವಿಶೇಸ್ ಘಡ್ಲಾಂ ಆನಿ ಕೋಣ್ಗಿ ಆಪ್ಣಾಕ್, ಬಹುಶ ಆವಯಿಚ್, ಘರಾ ಯೇನಾಕಾ, ಪಾಟಿಂ ವಚ್ ಮ್ಹಣ್ ಹಿಶಾರೊ ದಿತಾ ಮ್ಹಣ್ ತಾಕಾ ಸುಸ್ತಾಲೆಂ.
ಸಕಾಳಿಂ ಜಾಲ್ಲ್ಯಾ ಘಡಿತಾಚೊ ತಾಕಾ ಉಗ್ಡಾಸ್ ಆಯ್ಲೊ ಆನಿ ಆಪ್ಣಾಚ್ಯಾ ಜಿವಾಚೆರ್ ಕಿತೆಂ ತರ್ಯೀ ಅಪಾಯ್ ರಾಕೊನ್ ಆಸಾ ಮ್ಹಣ್ ತಾಕಾ ಭೊಗ್ಲೆಂ. ತಾಚೆಂ ಅಮಾಲ್ ಅರ್ಧೆಂ ದೆಂವ್ಲೆಂ ಆನಿ ತೊ ಪಾಟಿಂ ಪರ್ತಾಲೊ. ಇಲ್ಲ್ಯಾ ವೆಳಾನ್ ತಾಚ್ಯಾ ಮೆಟಾಂಚೊ ಅವಾಜ್ ಉಣೊ ಉಣೊ ಜಾವ್ನ್ ಆಯ್ಲೊ ಆನಿ ಪರ್ತ್ಯಾನ್ ಸಗ್ಳೆಂ ನಿಶ್ಯಬ್ಧ್. ಮಿಂಗೆಲಿನ್ ಆನಿ ಕೊಶಾಬಾಯೆನ್ ಚೊವ್ಕೆಂತ್ ನಿದ್ಚೆಂ ಆಸ್ಲ್ಲೆಂ. ಚೊವ್ಕೆಚ್ಯಾ ಮುಖ್ಲ್ಯಾನ್ ಘರಾಚ್ಯಾ ಲಾಂಬಾಯೆಕ್ ಸೊಪೊ ಆಸ್ಲ್ಲೊ. ಚೊವ್ಕೆಚ್ಯಾ ದಾವ್ಯಾ ಪೊಂತಾರ್ ಎಕ್ ಕೂಡ್ ಆಸ್ಲ್ಲೆಂ. ತಾಂತುಂ ನಿಕು ಎಕ್ಸುರೊ ನಿದ್ತಾಲೊ.
ತ್ಯಾ ಕುಡಾಕ್ ಲಾಗೊನ್ ಅನ್ಯೇಕ್ ಕೂಡ್ ಆಸ್ಲ್ಲೆಂ. ತಾಂತುಂ ಪೊಪ್ಳಾಂಚೆ ಮಾಂಡೆ, ಖೊರಿಂ, ಪಿಕ್ಕಾಸಾಂ ಆನಿ ಹೆರ್ ಗಾದ್ಯಾ ವಾಲಿಚೊ ಸಾಮಾನ್ ದಾಸ್ತಾನ್ ಆಸ್ಲ್ಲೊ. ಘರಾಚ್ಯಾ ಪಾಟ್ಲ್ಯನ್ ಹ್ಯಾ ಮಾಂಡ್ಯಾ ಕುಡಾಕ್ (ಪೊಪ್ಳಾಂ ಉದ್ಕಾಂತ್ ಘಾಲ್ನ್ ದವರ್ಚ್ಯಾ ವ್ಹಡ್ಲ್ಯಾ ಬುಯಾಂವಾಕ್ ಮಾಂಡೊ ಮ್ಹಣ್ತಾತ್) ರಿಗೊಂಕ್ ವೆಗ್ಳೆಂಚ್ ದಾರ್ ಆಸ್ಲ್ಲೆಂ. ತಶೆಂಚ್ ತ್ಯಾ ಕುಡಾ ಥಾವ್ನ್ ನಿಕುಚ್ಯಾ ಕುಡಾಕ್ ವಚೊಂಕ್. ಅಶೆಂ ನಿಕುಕ್ ಘರಾ ಭಿತರ್ ರಿಗೊಂಕ್ ದುಸ್ರಿ ವಾಟ್ಯೀ ಆಸ್ಲ್ಲಿ.
ಮಿಂಗೆಲ್ ಶೆಟ್ ಸೊಡಯಿಲ್ಲ್ಯಾ ಮಾಂದ್ರೆರ್ ಆಡ್ ಪಡ್ಲೊ ಜಾಲ್ಯಾರ್ಯೀ ತಾಕಾ ನೀದ್ ಆಯ್ಲಿನಾ. ಆಜ್ ತಾಚ್ಯೆ ಜಿಣ್ಯೆಂತ್ ನಿರ್ಮೊಣ್ಯಾಚಿ ಏಕ್ ಘಡಿಲಾಗಿಂ ಪಾವ್ಲ್ಲಿ. ಆಪ್ಣೆಂ ಚಿಂತ್ಲ್ಲೆಂ ಮೆಟ್ ಕಾಡ್ಚೆಂಗಿ ನಾಕಾ ಮ್ಹಳ್ಳ್ಯಾ ವಾದಾಳಾಂತ್ ತೊ ಸಾಂಪ್ಡಾಲ್ಲೊ. ಕೊಶಾಬಾಯ್ ತಾಚ್ಯಾಕೀ ಚಿಕ್ಕೆ ಪಯ್ಸ್ ಆಡ್ ಪಡ್ಲ್ಲಿ. ಪುಣ್ ತಿಚ್ಯಾ ದೊಳ್ಯಾಂಕೀ ದೊಳೊ ಲಾಗೊಂಕ್ನಾ. ಘೊವಾಚೊ ರಾಗ್ ನಿಯಾಳ್ನ್ ತಿಚ್ಯಾ ಹರ್ದ್ಯಾಂತ್ ಭಾತ್ ಖಾಂಡ್ಟಾಲೆಂ. ಥೊಡ್ಯಾ ಮಿನುಟಾಂ ಉಪ್ರಾಂತ್ ಭಾಯ್ರ್ ಅಂಗ್ಣಾಂತ್ ಪರ್ತ್ಯಾನ್ ಕಸಲೊಗೀ ಅವಾಜ್ ಜಾಲೊ. ದೊಗಾಂಯ್ ಎಕಾಚ್ಫರಾ ಉಟೊನ್ ಬಸ್ಲಿಂ.
ಆತಾಂ ಅವಾಜ್ ಮಾಂಡ್ಯಾ ಕುಡಾಕಡೆ ಥಾವ್ನ್ ಆಯ್ಕಾತಾಲೊ. ಕೊಣ್ಗಿ ಧಾಂಟೊನ್ ಪಡ್ಲ್ಲೊ ಅವಾಜ್; ಪಾಟಾಪಾಟ್ ರಾಶಿ ವಯ್ಲೆ ನಾರ್ಲ್ ನಿಸರ್ನ್ ಪಡ್ಲ್ಲೊ ಅವಾಜ್; ಖೊರಿಂ ಪಿಕ್ಕಾಸಾಂ ಅಪ್ಟಾಲ್ಲೊ ಅವಾಜ್. ಘರಾಚ್ಯಾ ಮುಖ್ಲ್ಯಾ ದಾರಾಂತ್ಲ್ಯಾನ್ ಯೇಂವ್ಕ್ ಜಾಯ್ನಾಸ್ತಾಂ ಪಾಟಿಂ ಗೆಲ್ಲೊ ನಿಕು ಪಾಟ್ಲ್ಯಾ ದಾರಾಂತ್ಲ್ಯಾನ್ ಆಪ್ಲ್ಯಾ ಕುಡಾಕ್ ರಿಗೊಂಕ್ ಪ್ರಯತನ್ ಕರ್ತಾಲೊ. ಮ್ಹಾಕಾ ದಿಸ್ತಾ, ತೊ ತಿ ಏಕ್ ರಾತ್ ಜರ್ ಭಾಯ್ರ್ ರಾಂವೊಕ್ ಸಕ್ಲ್ಲೊ, ಮುಖಾರ್ ಜಾಂವ್ಕ್ ಆಸ್ಚೆಂ ಅನಾಹುತ್ ಥೊಡೆಂ ತರಿ ಉಣೆಂ ಕರ್ಯೆತೆಂ. ಪುಣ್ ಎಕಾ ಮನ್ಶ್ಯಾಕ್ ಆಪ್ಲ್ಯಾ ಘರಾಂತ್ ಕಾಂಯ್ ಸ್ವಾಗತ್ ನಾ ಮ್ಹಣ್ ಕಳಿತ್ ಆಸ್ಲ್ಯಾರೀ ತೆಂ ಘರ್ ತಾಕಾ ಆಯಸ್ಕಾಂತಾಬರಿ ವೊಡ್ತಾ. ತಕಾ ದುಸ್ರೊ ಆಸ್ರೊ ಪಳೆಂವ್ಚಿ ಸಕತ್ಯೀ ನಾ, ಮನ್ಯೀ ನಾ. ತಶೆಂ ಜಾಲೆಂ ನಿಕು ಥಂಯ್. ಬಾಪಾಯ್ನ್ ತಾಕಾ ಭಿತರ್ ಕಾಣ್ಘೆಲೊನಾ ಜಾಲ್ಯಾರೀ, ದುಸ್ರ್ಯೆ ವಾಟೆನ್ ಪುಣೀ ತೊ ಭಿತರ್ ರಿಗ್ಲೊ.
ಹಾಂವೆಂ ಹಾಚ್ಯೆ ಆದಿಂ ಸಾಂಗ್ಲಾಂಕೀ, ಮಿಂಗೆಲ್ ಶೆಟ್ ಆಪ್ಣೆ ಚಿಂತ್ಲ್ಲೆಂ ಮೆಟ್ ಕಾಡ್ಚೆಂಗಿ ನಾಕಾ ಮ್ಹಳ್ಳ್ಯಾ ದೊಡ್ಯಾ ಬಾಂದ್ಪಾಸಾಂತ್ ಸಾಂಪ್ಡಾಲೊ. ನಿಕು ಭಿತರ್ ರಿಗ್ಲ್ಲ್ಯಾ ಫಾರಾ ತಾಚೊ ನಿಚೆವ್ ಥಿರ್ ಜಾಲೊ. ಆನಿ ಚಿಂತ್ಲ್ಲೆಂ ಮೆಟ್ ಕಾಡ್ಚೊ ಧ್ರಡ್ ನಿರ್ಧಾರ್ ತಾಣೆ ಕೆಲೊ. ಉಪ್ರಾಂತ್ ಜಾಲ್ಲ್ಯೆ ತನ್ಖೆ ವೆಳಾರ್ ತಾಚಿ ಬಾಯ್ಲ್ ಮ್ಹಣಾಲಿಕೀ, ತ್ಯೆ ಅಯಿನ್ನ್ ವೆಳಾರ್ ತೊ ’ಗಡಗಡ’ ಕಾಂಪ್ತಾಲೊ ಮ್ಹಣ್.
ತಾಚ್ಯೆ ಮತಿ ಭಿತರ್ಲೆಂ ತುಫಾನ್ ಹಾಂತುಂ ಸಮ್ಜವ್ಯೆತ್. ಸಾಸ್ಪೊನ್ ಸಾಸ್ಪೊನ್ ನಿಕು ಆಪ್ಲ್ಯಾ ಕುಡಾ ಭಿತರ್ ಗೆಲೊ. ತಾಚ್ಯೆ ಜಿಬೆರ್ ಥಾವ್ನ್ ಗಾಳಿ ಆನಿ ಶಿರಾಪ್ ಸರಾಗ್ ವ್ಹಾಳ್ಟಾಲೆ. ಕಸೊಯೀ ಕದೆಲಾಂ ಮೆಜಾಂಕ್ ಅದ್ಳೊನ್, ಆಪ್ಲಿ ಮಾಂದ್ರಿ ಸೊಧುನ್ ಕಾಡ್ಲಿ ತಾಣೆ ಆನಿ ತಾಚೆರ್ ಆಡ್ ಪಡ್ಲೊ. ತರ್ಯೀ ತಾಚಿ ಜೀಬ್ ರಾವ್ಲಿನಾ. ಭುರ್ಶಿಂ ಪದಾಂ, ಹಾಸೊ ಆನಿ ಗಾಳಿ ಚಡೊನ್ಚ್ ಆಯ್ಲ್ಯೊ. ಎಕ್ ಉತರ್ ತಾಚ್ಯಾ ತೊಂಡಾಂತ್ ಥಾವ್ನ್ ಘಡ್ಯೆ ಘಡ್ಯೆ ಯೆತಾಲೆಂ ಖಂಯ್ -
"ಮ್ಹಾಕಾ ಆಜ್ ಬಾಬ್ ಶೆಳಿ ಭೆಟಯ್ತಲೊ!" ಮ್ಹಳ್ಳೆಂ! ಚೊವ್ಕೆಂತ್ ಚಿಮ್ಣಿ ಆನಿಕೀ ಜಳ್ಟಾಲಿ.
ಮಿಂಗೆಲ್ ಶೆಟ್ ಉಟೊನ್ ಉಬೊ ರಾವ್ಲೊ. ಏಕ್ ಘಡಿಭರ್ ಪಾಕ್ಯಾಚೆರ್ ದೀಷ್ಟ್ ಲಾವ್ನ್ ಪುತಾಚ್ಯಾ ಕುಡಾಲಾಗಿಂ ತಾಣೆ ಮೆಟಾಂ ಕಾಡ್ಲಿಂ. ಕೊಶಾಬಾಯ್ ಕಾಂಪೊಂಕ್ ಲಾಗ್ಲಿ. ದೊನ್ಯೀ ಹಾತ್ ಮುಖಾರ್ ವೊಡ್ಡಾವ್ನ್ ಅಡ್ದೊಸ್ ಮಾಗ್ಚ್ಯೆಬರಿ ತಿಣಿ ಹಾತ್ ಭಾಸ್ ಕೆಲಿ. ಉಲಂವ್ಕ್ ತಿಚಿ ಜೀಬ್ ಸುಟ್ಲಿನಾ. ಉಟೊಂಕ್ ಪ್ರಯತನ್ ಕೆಲೆಂ ತಿಣೆ. ಪುಣ್ ದೊನ್ಯೀ ಪಾಂಯಾಂಕ್ ಜಡಾಯೆಚೆ ಫಾತೊರ್ ಬಾಂಧ್ಲ್ಲ್ಯೆಬರಿ ತಿಕಾ ಭೊಗ್ಲೆಂ ಆನಿ ತಿ ಹಾಲಾನಾ ಜಾಲಿ. ತಿಚೆ ದೊಳೆ ಮಾತ್ರ್ ಘೊವಾಚೊ ಪಾಟ್ಲಾವ್ ಕರಿಲಾಗ್ಲೆ.
ಮಿಂಗೆಲ್ ನಿಕುಚ್ಯಾ ಕುಡಾಕ್ ರಿಗ್ಲ್ಲೊಚ್ ದಾರ್ ಬಂದ್ ಕರ್ನ್ ಭಿತರ್ಲ್ಯಾನ್ ಖಿಳ್ ಘಾಲಿ. ಚಿಮ್ಣಿ ತಾಣೆ ಸಾಂಗಾತಾ ವ್ಹೆಲ್ಲಿ ಜಾಲ್ಲ್ಯಾನ್ ಕೊಶಾಬಾಯ್ ಕಾಳೊಕಾಂತ್ ಬಸೊನ್ ಶೆರ್ಮೆಲಿ. ಹ್ಯಾ ಪ್ರಕರಣಾಚ್ಯಾ ಭೋವ್ ಮಹತ್ವಾಚ್ಯೆ ಘಡಿಯೆರ್ ಜಾಲ್ಲಿಂ ಹಿಂ ಘಡಿತಾಮ್ ತನ್ಖೆ ವೆಳಾರ್ ಉಡಾಸ್ ಕರ್ತಾನಾ ಕೊಶಾಬಾಯ್ ಸಾರ್ಕೆಂ ಸಾಂಗಾನಾ ಜಾಲಿ. ಪಯ್ಲೆ ಸುವಾತೆರ್ ಮಿಂಗೆಲ್ ನಿಕುಚ್ಯಾ ಕುಡಾಂತ್ ಕಿತ್ಲೊ ವೆಳ್ ಆಸ್ಲ್ಲೊ ಜಾಯ್ತ್ ಮ್ಹಳ್ಳ್ಯಾ ಸವಾಲಾಕ್ ಪಯ್ಲೆ ಪಾವ್ಟಿಂ ಪಾಂಚ್ ಮಿನುಟಾಂ ಆನಿ ದುಸ್ರ್ಯೆ ಪಾವ್ಟಿಂ ಅರ್ಧೆಂ ವೊರ್ ಮ್ಹಣ್ ತಿ ಮ್ಹಣಾಲಿ.
ತಾಣಿಂ ಉಲಯಿಲ್ಲೆಂ ಆಯ್ಕಾತೆಲೆಂಗಿ ಆನಿ ಆಯ್ಕಾತೆಲೆಂ ಜಾಲ್ಯಾರ್ ತೆ ಕಿತೆಂ ಉಲಯ್ತಾಲೆ ಮ್ಹಳ್ಳ್ಯಾ ಸವಾಲಾಕ್ ತೆ ಉಲಯಿಲ್ಲೊ ಅವಾಜ್ ಮಾತ್ರ್ ಆಯ್ಕಾತಾಲೊ ಪುಣ್ ಉತ್ರಾಂ ಸಮ್ಜಾನಾತ್ಲ್ಲಿಂ ಮ್ಹಣಾಲಿ ತಿ ಆನಿ ಅನ್ಯೇಕ್ ಪಾವ್ಟಿಂ, ಉಲಯಿಲ್ಲೆಂ ಕಾಯಿಂಚ್ ಆಯ್ಕೊಂಕ್ ನಾ ಮ್ಹಣಾಲಿ. ಹ್ಯಾ ವರ್ವಿಂ ಸಮ್ಜವ್ಯೆತ್ಕೀ, ತಿ ತ್ಯಾ ವೆಳಾರ್ ಖಂಯ್ಚ್ಯಾ ಅವಸ್ಥೆರ್ ಆಸ್ಲ್ಲಿಗಿ ಮ್ಹಣ್. ಪೊಲಿಸಾಂನಿ ಉಪ್ರಾಂತ್ ಕೆಲ್ಲ್ಯಾ ಸವಿಸ್ತಾರ್ ತನ್ಖೆ ಆನಿ ಪ್ರಯೋಗಾಂ ವರ್ವಿಂ ರುಜು ಜಾಲೆಂ ಕೀ, ನಿಕುಚ್ಯಾ ಕುಡಾಕ್ ಭಿತರ್ಲ್ಯಾನ್ ಖಿಳ್ ಘಾಲ್ನ್ ಚಾಲು ತಾಳ್ಯಾನ್ ಉಲಯ್ಲ್ಯಾರ್ ಚೊವ್ಕೆಂತ್ ಆಸ್ಲ್ಲ್ಯಾಂಕ್ ಕಾಂಯ್ಚ್ ಆಯ್ಕಾನಾ ಮ್ಹಣ್. ಪೊಲಿಸ್ ತನ್ಖೆ ವರ್ವಿಂ ಹೆಂಯ್ ಕಳಿತ್ ಜಾಲೆಂ ಕೀ, ಮೊಡ್ಯಾ ಸರ್ಶಿಂ ಮೆಳ್ಲ್ಲಿ ಸುರಿ ನಿಕುಚಿಚ್ ಮ್ಹಣ್, ಪುಣ್ ಹ್ಯಾ ಖುನ್ಯೆಚ್ಯಾ ಆಯ್ದಾವಿಶಿಂ ವಿಚಾರ್ಲ್ಯಾ ಖಂಯ್ಚ್ಯಾಯ್ ಸವಾಲಾಕ್ ಮಿಂಗೆಲ್ ಜವಾಬ್ ದೀಂವ್ಕ್ ಸಕ್ಲೊನಾ.
ಕೆಜಿಂತ್ಲ್ಯಾ ಹ್ಯಾ ಭೋವ್ ಮಹತ್ವಾಚ್ಯಾ ಸವಾಲಾಕ್ ತಾಣೆ ಹಾಂಯೀಂ ಕರುಂಕ್ ನಾ, ಹುಂಯೀಂ ಕರುಂಕ್ ನಾ. ತೆಂ ಪಳೆವ್ನ್ ಮ್ಹಾಕಾ ಮಾತ್ರ್ ಭೋವ್ ಅಜ್ಯಾಪ್ ಜಾಲೆಂ. ಖುನ್ ಜಾವ್ನ್ ಥೊಡ್ಯಾಚ್ ದಿಸಾಂನಿ ಪೊಲಿಸ್ ತನ್ಖಿ ಕಾಬಾರ್ ಜಾಲಿ. ಗಾಂವ್ಚ್ಯಾ ಲೊಕಾಕ್ ಹ್ಯಾ ಕೆಜಿಂತ್ ವಿಶೆಸ್ ಅತುರಾಯ್ ಉಬ್ಜಾಲಿನಾ. ಮ್ಹಣ್ಚೆ, ಹರ್ಶೆಂ ಜಾಲ್ಯಾರ್ ಗಾಂವಾಂತ್ ಕೊಣಾಚೀಯ್ ಖುನ್ ಜಾಲ್ಯಾರ್ ಉಬ್ಜೊಂಚಿ ಅತುರಾಯ್ ಆನಿ ಅಭಿರೂಚ್, ಮೆಲ್ಲ್ಯಾ ಮನ್ಶ್ಯಾ ಥಂಯ್ ಬಿರ್ಮತ್ ಅಸಲೆಂ ಕಾಂಯ್ ಲೊಕಾ ಥಂಯ್ ದಿಸೊನ್ ಆಯ್ಲೆಂನಾ.
ತಾಕಾ ಕಾರಣ್ ಸಹಜ್ ಆಸ್ಲ್ಲೆಂ. ವಾಯ್ಟ್ ಆಯ್ಕೊನ್ ಶೆಂಬೊರ್ ವರ್ಸಾಂ ವಾಂಚ್ಚ್ಯಾಕೀ ಬರೆಂ ಆಯ್ಕೊನ್ ಪಂಚ್ವೀಸ್ ವರ್ಸಾಂ ಜಿಯೆಲ್ಲೆಂ ಅಧಿಕ್ ಬರೆಂ ಮ್ಹಣ್ಚೆ ಸಾಂಗ್ಣೆಕ್ ಸರಿ ಜಾವ್ನ್ ಬಾಪಾಯ್ನ್ಚ್ ಪುತಾಕ್ ಪೆಲ್ಯಾ ಸಂಸಾರಾಕ್ ಧಾಡ್ಲ್ಲೊ. ಕಂಯ್ ತರ್ಯೀ ಏಕ್ ದೀಸ್ ನೀತ್ ತಾಚಿ ಪಾಟ್ ಧರ್ತಲಿ ಮ್ಹಣ್ ಖಂಡಿತ್ ಜಾಣಾ ಜಾಲ್ಲ್ಯಾ ತ್ಯಾ ಬಾಪಾಯ್ನ್ ಆಪ್ಣೆ ಜಾವ್ನ್ಚ್ ತಿ ನೀತ್ ಕೆಲ್ಲಿ ಆನಿ ಅಶೆಂ ಹೆರಾಂಚೆ ರಗ್ಳೆ ಉರಯಿಲ್ಲೆ. ಅಶೆಂ ಲೋಕ್ ಚಿಂತಾಲೊ. ಮಿಂಗೆಲ್ ಶೆಟ್ ಸತ್ತಿ ಆನಿ ಎಕಾ ಉತ್ರಾಚೊ ಮನಿಸ್ ಮ್ಹಣ್ ಲೋಕ್ ತಾಕಾ ಮಾನ್ತಾಲೊ, ಅಸಲ್ಯಾ ಮನ್ಶಾನ್ ಫಾಶೆಚ್ಯಾ ಖಾಂಬ್ಯಾಕ್ ಚಡ್ಚೆಂ ಕೊಣಾಯ್ಕೀ ನಾಕಾ ಜಾಲ್ಲೆಂ.
ಗಾಂವ್ಚ್ಯಾ ಮಾತ್ಭಾರ್ಯಾಂನಿ ಕಿತ್ಲಿ ವತ್ತಾಯ್ ಕೆಲ್ಯಾರೀ ವಕೀಲ್ ಆಪ್ಣಾಕ್ ಬಿಲ್ಕುಲ್ ನಾಕಾ ಮ್ಹಣ್ ತೊ ಹಟಾಕ್ ಪಡ್ಲೊ. ತರ್ಯೀ ಥೊಡ್ಯಾಂನಿ ಧಯ್ರ್ ಸಾಂಡಿನಾಸ್ತಾಂ ಫಿರ್ಗಜ್ ಪಾದ್ರಿಕ್ ಧರ್ನ್ ಹ್ಯಾ ವಿಶಿಂ ದೊಡ್ತೆಂ ಪ್ರಯತನ್ ಕೆಲೆಂ. ಆಹ್ರೆಕ್, ಪಾದ್ರಿಚ್ಯಾ ವತ್ತಾಯೆಕ್ ಆನಿ ಮಿಂಗೆಲ್ ಮ್ಹಾಕಾ ವಳ್ಕಾತಾಲೊ ಆನಿ ಮಾನ್ತಾಲೊ ಜಾಲ್ಲ್ಯಾನ್ ಮ್ಹಾಕಾ ಆಪ್ಲೊ ವಕೀಲ್ ಕರುಂಕ್ ಒಪ್ವಾಲೊ. ಹಾವೆಂ ಮ್ಹಜೆಂ ಎಕ್ ಶರ್ತ್ ಘಾಲೆಂಕೀ ಹಿ ಕೇಜ್ ಜಿಕ್ಲ್ಯಾರ್ಯೀ ಸಲ್ವಾಲ್ಯಾರ್ಯೀ ರುಸುಮ್ ಜಾವ್ನ್ ಏಕ್ ರುವಿ ಸೈತ್ ಘೆಂವ್ಚೊನಾ.
ಹಾವೆಂ ಏಕ್ ಕೇಜ್ ಘೆತ್ಲಿ ಜಾಲ್ಯಾರ್ ತಾಚೆಂ ತಾಳ್ ಮೂಳ್ ಸೊಧುನ್ ಕಾಡ್ಲ್ಯಾ ಶಿವಾಯ್ ರಾವಾನಾ. ಕಿತ್ಲೀಯೀ ವಾಂವ್ಟ್ ಆನಿ ಖರ್ಚ್ ಪಡ್ಲ್ಯಾರ್ಯೀ ಮ್ಹಾಕಾ ಸಂಪೂರ್ಣ್ ತ್ರಪ್ತಿ ಜಾಲ್ಯಾ ಶಿವಾಯ್ ಹಾಂವ್ ಕೊಣಾಯ್ ಖಾತಿರ್ ಝುಜೊಂಕ್ ಕೊಡ್ತಿಚಿಂ ಮೆಟಾಂ ಚಡಾನಾ. ಅಶೆಂಚ್ ಹ್ಯೆ ಕೆಜಿವಿಶಿಂ ಮ್ಹಜಿ ಥೊಡಿ ಖಾಸ್ಗಿ ತನ್ಖಿ ಚಲಯ್ಲಿ. ಸುರ್ವೆರ್ ಥಾವ್ನ್ಚ್ ಮ್ಹಾಕಾ ಏಕ್ ದುಬಾವ್ ಆಸ್ಲ್ಲೊ ಕೀ, ಹಿ ಕೇಜ್ ಭಾಯ್ಲ್ಯಾನ್ ದಿಸ್ಚೆ ಇತ್ಲಿ ಸೊಂಪಿ ನ್ಹಂಯ್. ಕಶಿ ಏಕ್ ವೊಣದ್ ಪಯ್ಸ್ ಥಾವ್ನ್ ಪಳೆತಾನಾ ಸಫಾಯ್ ದಿಸ್ತಾ ಪುಣ್ ಲಾಗಿಂ ಯೇವ್ನ್ ಪಳೆಲ್ಯಾರ್ ತಾಚೆ ಖರ್ಕಸ್ ಭಾಗ್ ಝಳ್ಕೆಕ್ ಪಡ್ಟಾತ್ ತಶೆಂ ಸೂಕ್ಷ್ಮ್ ಥರಾನ್ ತಜ್ವಿಜ್ ಕರ್ನ್ ಪಳೆತಾನಾ ಪಯ್ಲೆಂ ಝಳ್ಕೊಂಕ್ ನಾಸ್ಲ್ಲ್ಯೊ ಥೊಡ್ಯೊ ಸಂಗ್ತಿ ಉಪ್ರಾಂತ್ ಉಜ್ವಾಡಾಕ್ ಆಯ್ಲ್ಯೊ. ಅಶೆಂ ಜಾಲ್ಲ್ಯಾನ್ ಹಿ ಕೇಜ್ ಯಶಸ್ವೀ ಥರಾನ್ ಕಾಬಾರ್ ಕರ್ಚಿ ಉರ್ಬಾ ಮ್ಹಜೆ ಥಂಯ್ ಉಬ್ಜಾಲಿ.
ಮಿಂಗೆಲ್ ಶೆಟಿಕ್ ಹ್ಯಾ ಖುನ್ಯೆಚ್ಯಾ ವೆಳಾರ್ ಪನ್ನಾಸ್ ಆನಿ ಪಾಂಚ್ ವರ್ಸಾಂ ಆನಿ ಕೊಶಾಬಾಯೆಕ್ ಚಾಳೀಸ್ ಆನಿ ಆಟ್ ವರ್ಸಾಂ ಪಿರಾಯ್. ನಿಕು ತಾಂಚೊ ಎಕ್ಲೊಚ್ ಪೂತ್. ಮೊರ್ಚ್ಯಾ ವೆಳಾರ್ ತಾಕಾ ಬಾವೀಸ್ ವರ್ಸಾಂ. ಮಿಂಗೆಲ್ ಆನಿ ಕೊಶಾಚೆಂ ಕಾಜಾರ್ ಜಾವ್ನ್ ಧಾ ವರ್ಸಾಂ ಪರ್ಯಾಮ್ತ್ ತಾಂಕಾಂ ಭುರ್ಗೆಂ ಜಾಂವ್ಕ್ ನಾಸ್ಲ್ಲೆಂ. ದೆವಾನ್ ದುಸ್ರೆಂ ಕಿತೆಂಯ್ ತಾಂಕಾಮ್ ಉಣೆ ಕರುಂಕ್ನಾ. ತ್ಯಾ ಶಿವಾಯ್ ಗಾಂವಾರ್ ತಾಕಾ ಜಾಯ್ತೊ ಮಾನ್ ಆಸ್ಲ್ಲೊ. ಕಷ್ಟಾಂ ಅಕಾಂತಾ ವೆಳಾರ್ ಸಗ್ಳೆ ತಾಚ್ಯೆ ಸರ್ಶಿಂ ಧಾಂವೊನ್ ಯೆತಾಲೆ ಆನಿ ತೊ ಕೊಣಾಯ್ಕ್ಯೀ ನಿರಾಶಿ ಕರಿನಾಸ್ಲೊ. ಮಿಂಗೆಲಿಚ್ಯಾ ಭುರ್ಗ್ಯಾಪಣಾರ್ಚ್ ತಾಚೊ ಬಾಪಾಯ್ ಅಂತರ್ಲ್ಲೊ. ಪುಣ್ ಆವಯ್ ಧೈರಾಧಿಕ್ ಜಾಲ್ಲ್ಯಾನ್ ಪುತಾಕ್ ಘೆವ್ನ್ ಎದ್ಯಾ ವ್ಹಡ್ ಘರ್ ಜಾಗ್ಯಾಚೊ ಹಾರ್ ಭಾರ್ ತಿಣೆ ಶಾಬಿತಾಯೆನ್ ಚಲಯ್ಲೊ.
ಲ್ಹಾನ್ ಪ್ರಾಯೆರ್ಚ್ ಜವಾಬ್ದಾರೆಚೆಂ ವೊಜೆಂ ಮಿಂಗೆಲಿಚ್ಯಾ ಮಾತ್ಯಾರ್ ಪಡ್ಲ್ಲ್ಯಾನ್ ಜಿಣ್ಯೆಂತ್ಲೆಂ ಕಷ್ಟ್ ತೊ ಜಾಣಾ ಜಾಲೊ. ಚೊವೀಸ್ ವರ್ಸಾಂ ಪ್ರಾಯೆರ್ ಆವಯ್ಚೆ ವಳ್ಕಿರ್ ಬರಿಶಿ ಏಕ್ ಸಯ್ರಿಕ್ ಸೊಧುನ್ ಮಿಂಗೆಲಿಚೆಂ ಕಾಜಾರ್ ಕೆಲೆಂ ಆನಿ ಸೊಳಾ ವರ್ಸಾಂಚೆಂ ಕೊಶೆ ನವಿ ವ್ಹಕಾಲ್ ಜಾವ್ನ್ ತಾಂಚ್ಯಾ ಘರಾ ಆಯ್ಲೆಂ. ಕಾಜಾರ್ ಜಾಲ್ಲ್ಯಾ ಎಕಾ ವರ್ಸಾನ್ ಮಿಂಗೆಲಿಚಿ ಆವಯ್ ಕಾಳ್ಜೊರಾಚ್ಯಾ ತಾಪಾನ್ ಅಂತರ್ಲಿ. ಆತಾಂ ಎದ್ಯಾ ವ್ಹಡ್ ಘರ್ ಬದ್ಲಾಕ್ ಹಕ್ಕ್ದಾರಾಂ ಜಾವ್ನ್ ಘೊವ್ ಬಾಯ್ಲಾಂ ದೊಗಾಂಚ್ ಉರ್ಲಿಂ.
ಕಾಜಾರ್ ಜಾವ್ನ್ ದೊನ್ ವರ್ಸಾಂ ಪಾಶಾರ್ ಜಾಲಿಂ. ಹ್ಯೆ ಆವ್ದೆಂತ್ ತಾಂಕಾಂ ಭುರ್ಗೆಂ ಜಾಂವ್ಕ್ ನಾಸ್ಲ್ಲೆಂ ತರ್ಯೀ ರಾಕ್ಚೆಂ ಸೈರಾಣ್ ತಾಂಕಾಂ ಆಸ್ಲ್ಲೆಂ. ಪುಣ್ ತಿಸ್ರೆಂ ವರಸ್ ಯೇವ್ನ್ ವೆತಚ್ ಮಿಂಗೆಲಿಚ್ಯಾ ಜಿವಾಂತ್ ಏಕ್ ವಿಚಿತ್ರ್ ಬದ್ಲಾವಣ್ ಘಡೊನ್ ಆಯ್ಲಿ. ಕಾಮ್ ಸಾರ್ಕೆಂ ಕರಿನಾ ಜಾಲೊ; ಚಿಂತುನ್ ಬಸ್ಲ್ಯಾರ್ ಬಸ್ಲೊಚ್. ಹೆಂ ಮುಖ್ಯ ಜಾವ್ನ್ ಕೊಶೆಂ ಲಾಗ್ಸಾರ್ ಆಸ್ತಾನಾ ಘಡ್ಟಾಲೆಂ. ತಿ ತಿಚೆ ಇತ್ಲ್ಯಾಕ್ ಕಾಮ್ ಕರ್ನ್ ಆಸ್ತಾನಾ ತಾಚಿ ದೀಷ್ಟ್ ಆಪಾಪಿಂಚ್ ತಿಚೆ ವಯ್ರ್ ವೆತಾಲಿ ಆನಿ ಥಂಯಿಂಚ್ ಖಂಚ್ತಾಲಿ. ತಿ ದೀಷ್ಟ್ ತಿಚ್ಯಾ ಅಂಗಾಚ್ಯಾ ಕಣಾ ಕಣಾಂನಿ ಸುರಿಯೆಬರಿ ರಿಗ್ತಾಶೆಂ ತಿಕಾ ಭೊಗ್ತಾಲೆಂ. ತೊ ತಿಕಾ ದುರ್ಸಾನಾಸ್ಲ್ಲೊ, ಪುರ್ಪುರ್ನಾಸ್ಲ್ಲೊ - ಚುಕೊನ್ ಸೈತ್ ಏಕ್ ವಾಂಕ್ಡೊ ಸಬ್ಧ್ ಉಲಯ್ನಾಸ್ಲ್ಲೊ. ಪುಣ್ ತೆ ದೊಳೆ ಆನಿ ತಿ ದೀಷ್ಟ್!
"ಸಗ್ಳ್ಯಾಂಚ್ಯಾ ಕುಶಿಂತ್ ಫಳಾಂ ಕಿರ್ಲಾತಾತ್. ತುಜಿ ಕೂಸ್ ಕಿತ್ಯಾಕ್ ಬಂಜರ್?" ಮ್ಹಳ್ಳೆಂ ಸವಾಲ್ ವಿಚಾರ್ತಾಶೆಂ ತ್ಯಾ ದಿಷ್ಟಿ ವರ್ವಿಂ ಕೊಶಾಕ್ ಭೊಗ್ತಾಲೆಂ. ಆತಾಂ ತಿಕಾ ಭಿರಾಂತ್ ಉಟ್ಲಿ. ಕಾಮ್ ಕರುಂಕ್ ತಿಕಾ ಮನ್ ನಾ ಜಾಲೆಂ. ಪುರೊ ಜಾವ್ನ್ ಆಡ್ ಪಡ್ಲ್ಯಾರೀ ನೀದ್ ಪಡಾನಾ ಜಾಲಿ. ಮಧ್ಯಾನ್ ರಾತ್ ಜಾಲ್ಯಾರೀ ಘೊವ್ ಆಪ್ಣಾಚೆರ್೬ಚ್ ದೀಷ್ಟ್ ಜೊಕುನ್ ಆಸ್ಚೊ ಪಳೆವ್ನ್ ತಿಕಾ ಘಾಮ್ ಸುಟ್ಟಾಲೊ. ತಿಚಿ ಭಲಾಯ್ಕಿ ಪಾಡ್ ಜಾವ್ನ್ ಆಯ್ಲಿ. ತರ್ಯೀ ಘೊವಾಲಾಗಿಂ ತೊಂಡ್ ಸೊಡ್ನ್ ವಿಚಾರ್ಚೆಂ ಧೈರ್ ತಿಕಾ ಆಯ್ಲೆಂನಾ. ಕ್ರಮೇಣ್ ತಿಚೆ ಥಂಯ್ ಜಾಲ್ಯಾರ್ಯೀ ಥೊಡಿ ಬದ್ಲಾವಣ್ ಜಾವ್ನ್ ಆಯ್ಲಿ.
ವರ್ಸಾಂ ಪಾಟ್ಲ್ಯಾನ್ ವರ್ಸಾಂ ಧಾಂವ್ತಾನಾ ತಿಚ್ಯೆ ಕುಡಿಂತ್ ಭುರ್ಗ್ಯಾಪಣಾಚೊ ಬೊಂಗೊ ಆಸ್ಲ್ಲೊ ತರ್ನಾಟ್ಪಣಾಚೆಂ ಪುಲ್ ಜಾವ್ನ್ ಪುಲೊನ್ ಆಯ್ಲೊ. ಪಯ್ಲೆಂ ಘೊವಾನ್ ತಿಕಾ ವೆಂಗ್ತಾನಾ ತಿಚ್ಯಾ ಅಂಗಾಂತ್ ವ್ಹಡ್ಣೆಚಿ ಊಬ್ ಚರೊನ್ ತಾಚ್ಯೆ ವೆಂಗೆಕ್ ತಿ ಆಶೆಂವ್ಕ್ ಲಾಗ್ಲಿ. ಕಶೆಂ ಪಾವ್ಸ್ ಯೇವ್ನ್ ಥಂಡ್ ಆನಿ ಮೋವ್ ಜಾಲ್ಲ್ಯೆ ಮಾತ್ಯೆಂತ್ ಬಿಂ ಘಾಲ್ಯಾರ್ ತೆಂ ವೆಗಿಂ ಕಿರ್ಲಾತಾಗಿ, ತಶೆಂ ಘೊವಾಚ್ಯಾ ಸ್ಪರ್ಶಾಕ್ ಆಶೆಂವ್ಚ್ಯಾ ಕೊಶಾ ಥಂಯ್ ಘರ್ ಬದ್ಕಾಕ್ ಹಕ್ಕ್ದಾರ್ ಕಿರ್ಲೊಂಚಿಂ ಖುಣಾಂ ದಿಸೊನ್ ಆಯ್ಲಿಂ. ಜ್ಯೆ ಘಡಿಯೆ ಮಿಂಗೆಲಿಕ್ ಆಪ್ಲೆಂ ಧಾ ವರ್ಸಾಂಚೆಂ ಸಪಣ್ ಸುಫಳ್ ಜಾಂವ್ಚೆ ಸಂಕೇತ್ ದಿಸೊನ್ ಆಯ್ಲೆ, ತ್ಯೆ ಘಡಿಯೆ ತಾಕಾ ಜಾಲ್ಲೊ ಸಂತೊಸ್ ಆನಿ ತಾಚ್ಯಾ ಜಿವಾಂತ್ ಜಾಲ್ಲೆ ಉಲ್ಲಾಸಾಚೆ ಆಟೆವಿಟೆ ವರ್ಣುಂಚೆ ತಸಲೆ ನ್ಹಂಯ್. ಹ್ಯಾ ಸಂತೊಸಾನ್ ತಾಣೆ ಶೆಜಾರ್ಚ್ಯಾಂಕ್ ಆಪೊವ್ನ್ ಏಕ್ ವ್ಹಡ್ಲೆಂ ಫೆಸ್ತ್ಚ್ ಕೆಲೆಂ. ಎಕ್ ಕಳ್ಸೊ ಸುರ್ ಖಾಲಿ ಜಾಲಿ. ಕೊಶೆಂ ದೆಖಿ ತೆಕೀತ್ ಸಗ್ಳ್ಯಾಂ ಮುಖಾರ್ ಲಜ್ ದಾಕಯ್ತಾಲೆಂ ಜಾಲ್ಯಾರ್ಯೀ ತೆಂಯೀಂ ಸಂತೊಸಾನ್ ಆನಿ ದವ್ಲತೆನ್ ಭರ್ಲ್ಲೆಂ. ಉಪ್ರಾಂತ್ಲೆ ನೋವ್ ಮಹಿನೆ ನೋವ್ ಮಹಿನೆ ನೋವ್ ದಿಸಾಂ ಬರಿ ಪಾಶಾರ್ ಜಾಲೆ. ಗುರ್ವಾರಿಚಿ ಹರ್ಯೆಕ್ ಕಿರ್ಕೊಳ್ ಆಶಾ ಆನಿ ಉರ್ಭಾ ಮಿಂಗೆಲಿನ್ ಥಾಂಬಯ್ಲಿ.
ಕಾಮಾಕ್ ಚಡ್ತಿ ಮನಿಸ್ ದವರ್ಲೆ. ಬಾಯ್ಲ್ ಬಾಳಾಂತ್ ಜಾವ್ನ್ ಗುಳ್ಗುಳಿತ್ ಚೆರ್ಕ್ಯಾ ಭುರ್ಗ್ಯಾಕ್ ತಾಚ್ಯಾ ಹಾತಾಂತ್ ದಿಲ್ಲ್ಯಾ ವೆಳಾರ್ ಎಕ್ ಮೊಲಾದಿಕ್ ಕಾಣಿಕ್ ತಶಿ ತಾಣೆ ಕಾಣ್ಘೆಲಿ. ನಿಕೊಲಸ್ ಮ್ಹಳ್ಳ್ಯಾ ಲಾಂಬ್ ನಾಂವಾ ಬದ್ಲಾಕ್ ನಿಕು ಜಾಲೊ ಮಿಂಗೆಲಿಚೊ ಪೂತ್ ಸಗ್ಳ್ಯಾಂಕ್. ಬಾಪಾಯ್ಚ್ಯಾ ಕಠಿಣ್ ಶಿಸ್ತೆ ಖಾಲ್ ಎಕಾ ಕೈದಿಬರಿ ತಾಚೆಮ್ ಭುರ್ಗ್ಯಾಪಣ್ ಸಂಪ್ಲೆಂ. ಬಾಪಾಯ್-ಪುತಾ ಮಧೆಂ ಉಲವ್ಣೆ ಭೋವ್ ಉಣೆ ಆಸ್ಲ್ಲೆಂ. ದೋನ್ ಸಂಗ್ತಿಂನಿ ಮ್ಹಾಕಾ ದುಬಾವ್ ಆಸ್ಲ್ಲೊ. ಪಯ್ಲೆ ಸುವಾತೆರ್, ಖುನ್ ಜಾಲ್ಲ್ಯಾ ಮನ್ಶ್ಯಾಚ್ಯಾ ಅಂಗಾರ್ ಉಡ್ಡಾಲ್ಲೆ ವ ಧಡ್ಬಡ್ಲ್ಲೆ ಕಸಲೆಚ್ ಸಂಕೇತ್ ನಾತ್ಲ್ಲೆ. ತೊಂಡಾರ್ ಶಾಂತಿ ನಿಶೆತಾಲಿ.
ದುಸ್ರೆಂ ಕಿತೆಂಗಿ ಮ್ಹಳ್ಯಾರ್ ಸುರಿ ಆಸ್ಲ್ಲಿ ನಿಕುಲಾಗಿಂ. ತರ್ ತಿ ಮಿಂಗೆಲಿಕ್ ಕಶಿ ಮ್ಹೆಳ್ಳಿ? ಪಯ್ಲೆಂ ತೊ ಮ್ಹಜ್ಯಾ ತೀಕ್ಷ್ಣ್ ಸವಾಲಾಂ ಮುಖಾರ್ ತಾಣೆ ಆಪ್ಲೆಂ ವ್ಯಾಖ್ಯಾನ್ ಬದ್ಲಿಲೆಂ ಆನಿ ಥಂಯ್ಚ್ ಮೆಜಾರ್ ಆಸ್ಲ್ಲಿ ತಿ ಆಪ್ಣೆ ಕಾಡ್ಲ್ಲಿ ಮ್ಹಣಾಲೊ. ಅಸಲ್ಯಾ ದುಬಾವಾಚ್ಯಾ ಲ್ಹಾರಾಂನಿ ಹಾಂವ್ ಸಾಂಪ್ಡೊನ್ ಹ್ಯಾ ಪ್ರಕರಣಾಂತ್ ಕಿತೆಂ ತರ್ಯೀ ಅಢ್ಹುಕ್ ಸತ್ ಲಿಪೊನ್ ಆಸಾ ತೆಂ ಭಾಯ್ರ್ ಕಾಡಿಜಾಯ್ ಮ್ಹಳ್ಳ್ಯಾ ಹಟಾಕ್ ಲಾಗ್ಲೊಂ. ಮ್ಹಜ್ಯಾ ಅಂತಸ್ಕರ್ನಾಚೊ ತಾಳೊ ಮ್ಹಣಾಲೊ ಕೀ, ಹೊ ಮನಿಸ್ ಎಕ್ ಖುನಿಗಾರ್ ನ್ಹಂಯ್. ಕುಂಕ್ಡಾಚಿ ಗೊಮ್ಟಿ ಕಾತರ್ಲ್ಲ್ಯೆ ಬರಿ ಆಪ್ಲ್ಯಾಚ್ ಪುತಾಚಿ ಗೊಮ್ಟಿ ಕಾತರ್ಚೊ ಹರಾಮಿ, ಅತ್ಯಾಚಾರಿ ನ್ಹಂಯ್ ಹೊ.
ತರ್ಯೀ ಹ್ಯಾ ಭಿರಾಂಕುಳ್ ಕರ್ನೆಕ್ ತೊ ಒಪ್ತಾ! ತರ್ ನೀಜ್ ಗಜಾಲ್ ಕಿತೆಂ? ಸತ್ ಉಸ್ತುನ್ ಕಾಡ್ತಾಲೊಂ ಮ್ಹಳ್ಳ್ಯಾ ಹಟಾನ್ ಹಾವೆಂ ಲೊಕಪ್ಪಾಂತ್ ತಾಚ್ಯಾ ಪಿಂಜ್ರ್ಯಾಕ್ ಭೆಟ್ ದಿಲಿ. ಖುನಿಯೆ ವಿಶಿಂ ಭಾಯ್ಲ್ಯಾ ಭಾಯ್ರ್ ಜಾಯ್ತಿ ತನ್ಖಿ ಹಾವೆಂ ಚಲಯ್ಲಿ ಜಾಲ್ಯಾರ್ಯೀ ತಾಕಾ ಖಾಸ್ಗಿ ಜಾವ್ನ್ ಹಾಂವ್ ಚಡ್ ಭೆಟೊಂಕ್ನಾ. ಹಿ ಮ್ಹಜಿ ದುಸ್ರಿ ಭೆಟ್ ಜಾವ್ನಾಸ್ಲ್ಲಿ. ಬಾಂಕಾರ್ ಬಸೊನ್ ಕಿತೆಂಗಿ ವಾಚುನ್ ಆಸ್ಲ್ಲೊ ತೊ ಮ್ಹಾಕಾ ಪಳೆತಚ್ ಉಟೊನ್ ಉಬೊ ರಾವ್ಲೊ ಆನಿ
"ದೇವ್ ಬರೊ ದೀಸ್ ದೀಂವ್ ವಿತೊರಾಬಾ" ಮ್ಹಣ್ ಹಾತ್ ಜೊಡ್ಲೆ.
"ಬಸ್ ಮಿಂಗೆಲಿ" ಹಾವೆಂ ಮ್ಹಳೆಂ, "ತುಜೆ ಲಾಗಿಂ ಇಲ್ಲೆಂ ಖಾಸ್ಗಿ ಉಲಯಾಂ ಮ್ಹಣ್ ಮನ್ ಜಾಲೆಂ. ಆಜ್ ಹಾಂವ್ ತುಜೊ ವಕೀಲ್ ಮ್ಹಣ್ ಯೇಂವ್ಕ್ ನಾ. ಬಗಾರ್ ಎಕ್ ಮಿತ್ರ್ ಆನಿ ಹಿತಚಿಂತಕ್ ಜಾವ್ನ್ . ಮಿಂಗೆಲಿ ಮ್ಹಾಕಾ ಸಾಂಗ್, ತುವೆಂ ತುಜೆಂ ಕರ್ತವ್ಯ್ ಕೆಲಾಂಯ್ ಮ್ಹಣ್ ಭೊಗ್ತಾ ಜಾವ್ಯೆತ್. ಪುಣ್ ಹರ್ಯೆಕಾ ಮನ್ಶ್ಯಾನ್ ಜರ್ತರ್ ಆಪ್ಣಾಕ್ ಸಮಾ ದಿಸ್ಚೆ ಪ್ರಮಾಣೆ ನೀತ್ ಕೆಲಿ ಜಾಲ್ಯಾರ್ ಹೊ ಸಂಸಾರ್ ಯಮ್ಕೊಂಡ್ ಜಾಂವ್ಕ್ ಆಸಾ. ಸಮಾಜೆಕ್ ತುವೆಂ ಜವಾಬ್ ದೀಂವ್ಕ್ ನಾಂಗಿ?"
ಸಬಾರ್ ವೆಳ್ ತಕ್ಲಿ ಬಾಗಾವ್ನ್ ತೊ ರಾವ್ಲೊ ಆನಿ ಉಪ್ರಾಂತ್ ತಾಚೆಂ ಕಾಳ್ಜಾಂತ್ಲೆಂ ವಾದಾಳ್ ಉತ್ರಾಂನಿ ಭಾಯ್ರ್ ಪಡ್ಲೆಂ.
"ವಿತೊರಾಬಾ" ತೊ ಮ್ಹಣಾಲೊ ಲೋವ್ ತಾಳ್ಯಾನ್,
"ಹಾವೆಂ ತಾಕಾ ಕೆಲೊ ತರ್ ತಾಕಾ ಕಾಡ್ಚೆಂ ಹಕ್ಕ್ ಮ್ಹಾಕಾ ನಾಂಗಿ? ತಾಕಾ ಹ್ಯಾ ಸಂಸಾರಾಂತ್ ಹಾಡುಂಕ್ ಕಿತ್ಲೆಂ ಹಾಂವ್ ವದ್ದಾಡ್ಲೊಂ. ಆವಯ್ಚ್ಯಾ ಗರ್ಭಾಂತ್ ಥಾವ್ನ್ ತಾಕಾ ಹಾಂವೆ ಹುಮ್ಟುನ್ ಮ್ಹಳ್ಳೆ ಪರಿ ಹಾಡ್ಲೊ. ಹೆರ್ ಆವಯೊ ಆಪ್ಲ್ಯಾ ಭ್ಹುರ್ಗ್ಯಾಂಕ್ ನೋವ್ ಮಹಿನೆ ವಾವಯ್ತಾತ್ ಪುಣ್ ಮ್ಹಜ್ಯೆ ಬಾಯ್ಲೆನ್ ತಾಕಾ ಇಕ್ರಾಂ ವರ್ಸಾಂ ವಾವಯ್ಲೊ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ. ದೆವಾಲಾಗಿಂ ಮಾಗ್ಲೆಂ ಹಾವೆಮ್ ಬರ್ಯಾ ಗುಣಾಂಚೊ ಚೆಡೊ ದೀ ಮ್ಹಣ್. ಅವ್ಯಾ ಮಾತಿ ಕಾಡ್ನ್ ತುಂ ಮೊಳ್ತಾಯ್ ಆನಿ ತುಚ್ಯಾ ಮನಾ ಜೊಕ್ತೊ ಆಕಾರ್ ದಿತಾಯ್. ಪುಣ್ ದುಸ್ರ್ಯೆ ಘಡಿಯೆ ತಿ ಫಕತ್ ಮಾತಿ ಮ್ಹಳ್ಳೆಂ ತುಕಾ ಸುಸ್ತಾತಾ ಆನಿ ತಿ ತುಂ ಕಾಡ್ನ್ ಉಡಯ್ತಾಯ್."
"ಜಲ್ನಾತಾನಾಂಚ್ ಕೊಣ್ಯೀ ಖೊಟೊ ಆಸಾನಾ ಮಿಂಗೆಲಿ" ಹಾವೆಂ ಸಮ್ಜಾಯ್ಲೆಂ
"ಹೆಂ ಮ್ಹಜೆಂ ಫಳ್ ಪಯ್ಲೆಂ ಥಾವ್ನ್ಚ್ ಕುಸ್ಲ್ಲೆಂ ಮ್ಹಣ್ ಮ್ಹಾಕಾ ಸುಸ್ತಾಲೆಂ. ಥೊಡೆ ರೂಕ್, ಝಡ್ ಆಸ್ತಾನಾ ವಾಂಕ್ಡೆ ಆಸ್ಲ್ಯಾರ್ಯೀ ವ್ಹಡ್ ಜಾತಾನಾ ನೀಟ್ ಜಾತಾತ್. ಪುಣ್ ಹೊ ಚಡ್ ಆನಿ ಚಡ್ ವಾಂಕ್ಡೊ ಜಾಲೊ. ತಾಚೆ ಫಾಂಟೆ ಕಾತರ್ನ್ ಸಮಾ ಕರ್ತೊಂ ಮ್ಹಳ್ಯಾರ್ ತೆ ಮ್ಹಜ್ಯಾ ಹಾತಾಕ್ ಮೆಳಾನಾ ಜಾಲೆ. ಹೆಂ ಮುಖಾರ್ ಕಶೆಂ ರಾವಾತ್ ಮ್ಹಳ್ಳೆಂ ಸವಾಲ್ ಮ್ಹಾಕಾ ಕಾಂತಂವ್ಕ್ ಲಾಗ್ಲೆಂ."
"ತಾಚೆಂ ಕೊಶೆಡ್ದ್ ಜಾಗಂವ್ಕ್ ತುವೆಂ ಕಾಂಯ್ ಸಾಧನ್ ಕೆಲೆಂಯ್? ತಾಕಾ ಬರಿ ಶಿಕೊವ್ಣ್ ದಿಲಿಯ್?" ಪಯಿಲ್ಲೆ ಪಾವ್ಟಿಂ ದೊಳೆ ಉಕ್ಲುನ್ ತಾಣೆ ಮ್ಹಜೆರ್ ದೀಷ್ಟ್ ಜೊಕ್ಲಿ.
"ಹಾಂವ್ ಚಡ್ ಉಲಂವ್ಚೊ ಮನಿಸ್ ನ್ಹಂಯ್ ವಿತೊರಾಬಾ. ಸಮ್ಜಾಂವ್ಚೆಂ ಕಾಮ್ ಮ್ಹಜೆ ಪ್ರಾಸ್ ಚಡ್ ಮ್ಹಜೆ ಬಾಯ್ಲೆನ್ ಕೆಲಾಂ. ಮ್ಹಜೊ ತಾಳೊ ಮ್ಹಜ್ಯಾ ಉತ್ರಾಂನಿ ನ್ಹಂಯ್ ತರಿ ಮ್ಹಜ್ಯಾ ಕರ್ನ್ಯಾಂನಿ ತಾಕಾ ದಿಸ್ಲಾ. ಪುಣ್ ತೊ ಮ್ಹಜೆ ಥಂಯ್ ಸಂಪೂರ್ಣ್ ಕುಡ್ಡೊ ಜಾಲ್ಲೊ."
"ತರ್ ತುಜೊ ಗುನ್ಯಾಂವ್ ಕಾಂಯಿಂಚ್ ನಾ ಮ್ಹಣ್ಟಾಯ್?"
"ಹಾವೆಂ ವೊಂಪ್ಲ್ಲೆಂ ಭಿಂ ಕಿರ್ಲಾತಾನಾ ಸರ್ಪಾಚಿಂ ಪಿಲಾಂ ವಯ್ರ್ ಆಯ್ಲಿಂ ಜಾಲ್ಯಾರ್ ಹಾವೆಂ ಇಸ್ಕೊಲ್ ಮೆಸ್ತ್ರಿಬರಿ ಬೆತ್ ಘೆವ್ನ್ ತಾಂಕಾಂ ಶಿಕಯ್ಜಾಯ್ ಆಸ್ಲ್ಲೆಂ? ತುಜೆಂ ಮುಖ್ಲೆಂ ಬರೆಂ ವಾಯ್ಟ್ ಕೊಣಾಚೆರ್ ಹೊಂದೊನ್ ಆಸ್ಲ್ಲೆಂಗಿ ತೊ ಮನಿಸ್ ಫಕತ್ ಖೊಟೊ, ವಿಕಾಳ್ ಆನಿ ನಿಷ್ಟುರ್ ಜಾಲೊ ಆನಿ ತುಜೆಂ ಘರ್ದಾರ್ ಸಗ್ಳೆಂ ತಾಚ್ಯಾ ಖೊಟ್ಯಾಪಣಾಂನಿ ಬುಡ್ಲೆಂ ತರ್, ತುಂ ಕಿತೆಂ ಕರ್ಶಿ? ತಾಚಿಂ ಹಾಡಾಂ ಮೋಡ್ನ್ ದುಸ್ರ್ಯಾಚ್ ಥರಾನ್ ಮಾಂಡುನ್ ಹಾಡ್ಚಿಂಗಿ? ವ ದುಸ್ರೊಚ್ ಎಕ್ ಮೆಂದು ಆನಿ ಕಾಳಿಜ್ ದಿಂವ್ಚೆಂ?"
ತಾಚೊ ತಾಳೊ ಕಾಂಪ್ತಾಲೊ. ಜಿಣ್ಯೆಂತ್ ಪಯಿಲ್ಲೆ ಪಾವ್ಟಿಂ ತಾಚೆಂ ಭಿತರ್ಲೆಂ ಝುಜ್ ತಾಣೆ ಉಗ್ತೆಂ ದಾಕಯ್ಲೆಂ. ತರ್ಯೀ ಮ್ಹಜ್ಯಾ ಮತಿಂತ್ ಭೊಗ್ಲೆಂ ಕೀ, ತಾಣೆ ಸಗ್ಳೆಂ ಸಾಂಗೊಂಕ್ನಾ. ಬಗಾರ್ ಮ್ಹಾಕಾ ತ್ರಪ್ತಿ ಕರ್ಚ್ಯೆ ಖಾತಿರ್ ಮಾತ್ರ್ ಇತ್ಲೆಂ ಉಲಯ್ಲೊ ಮ್ಹಣ್.
"ತುಂ ವಿಚಾರುಂಕ್ ಪುರೊ ವಿತೊರಾಬಾ" ತಕ್ಲಿ ಬಾಗಾವ್ನ್ಚ್ ತಾಣೆ ಮುಂದರಿಲೆಂ,
" ಕೆದಾಳಾ ತುಜೊ ಭರ್ವಸೊ ಸಂಪ್ಲೊಗಿ ಮ್ಹಣ್. ಕೊಡ್ ಲಾಗ್ಲ್ಲ್ಯಾಕ್ ವಿಚಾರ್ ತಾಕಾ ಕೆದಾಳಾ ಕಳ್ಳೆಂಗಿ ಮ್ಹಣ್. ಪಯ್ಲ್ಯಾ ದಿಸಾಚ್ ತಾಕಾ ಕಳ್ಟಾ ತರ್ಯೀ ತೊ ಪಾತ್ಯೆಂವ್ಕ್ ತಯಾರ್ ನಾ. ಮಾಂದ್ರೆರ್ ಶೆವ್ಟಾತಾನಾ ಮಾತ್ರ್ ತೊ ಪಾತ್ಯೆತಾ. ರಾತಿ ಪಾಟ್ಲ್ಯಾನ್ ರಾತ್ ಹಾಂವ್ ಚಿಂತುನ್ ಬಸ್ತಾಲೊಂ. ಕಿತೆಂ ಕರುಂ? ಖಂಯ್ಚಿ ವಾಟ್ ಧರುಂ? ಹೆಂ ಭೊಕರ್ನ್ ಯೆಂವ್ಚೆಂ ಕೊಡ್ ಕಶೆಂ ಅಡಾಂವ್? ಶಿಸ್ತೆನ್ಗಿ? ಶಿಸ್ತ್ ಕೆದಾಳಾಯ್ ಚುಕಿ ಪ್ರಾಸ್ ಎಕ್ ಮೆಟ್ ಪಾಟಿಂ ಆಸ್ತಾ. ಕಾಯ್ದೆ ಲಾಗು ಕರಿಜಾಯ್ ಆಸ್ಲ್ಲೆ? ಸಂಪೂರ್ಣ್ ಕಾಯ್ದೆ ಕೊಣೆಂಯ್ ಕೆಲ್ಲೆ ಆಸಾತ್? ಪೆಟ್ಯಾಬರಿ ತಾಕಾ ಬಾಂಧುನ್ ಘಾಲಿಜಾಯ್ ಆಸ್ಲ್ಲೊ? ಬಾಂಧ್ಲೊ ಮ್ಹಾಕಾಚ್ ಹಾವೆಂ. ಹಾಂವ್ ರೂಕ್ ತೊ ಫಾಂಟೊ, ರುಕಾನ್ ಫಾಂಟ್ಯಾಕಡೆ ಝಗಡ್ಚೆಂಗಿ? ತೊಚ್ ದೀಕ್ ದೊನಾಂತ್ಯೀ ವ್ಹಾಳ್ಟಾ. ಹಾಂವ್ ವಾತ್, ತೊ ಝಳಕ್. ವಾತ್ ನಾತ್ಲ್ಯಾರ್ ಝಳಕ್ ಆಸಾ? ಪುಣ್ ಹೆಂ ಖೊಟೆಪಣ್ ಖಂಯ್ ಥಾವ್ನ್ ಆಯ್ಲೆಂ? ಅಸಲ್ಯಾ ಖೊಟ್ಯಾಪಣಾಕ್ ಜಲ್ಮ್ ದಿಲ್ಲೊ ಹಾಂವ್ಚ್ ಖೊಟೊ?"
ಥೊಡೊ ವೇಳ್ ತೊ ಮೌನ್ ಜಾಲೊ. ದೊಳೆ ಧಾಂಪುನ್ ಗೂಂಡ್ ಧ್ಯಾನ್ ಕರ್ತಾಸೊ ಮ್ಹಾಕಾ ದಿಸ್ಲೊ. ಉಪ್ರಾಂತ್ ಎಕಾಚ್ಫಾರಾ ತಾಚ್ಯಾ ಚಿಂತ್ನಾಂಚೊ ವ್ಹಾಳ್ ಉತ್ರಾಂನಿ ವ್ಹಾಳ್ಳೊ.
"ಖಂಯ್ಚ್ಯೆಯೀ ಸ್ತ್ರೀಯೆಕ್ ಎಕ್ಚ್ ಫಳ್ ಆಸೊಂಕ್ನಜೊ. ಮ್ಹಜೆ ಆವಯ್ಕ್ ಸಾತ್ ಆನಿ ಮ್ಹಜ್ಯೆ ಆಜೆಕ್ ಇಕ್ರಾ ಭುರ್ಗಿಂ ಆಸ್ಲ್ಲಿಂ. ಭುರ್ಗೊ ಎಕ್ಚ್ ಜಾಲ್ಯಾರ್ ಅಧಿಕ್ ವ್ಹಡ್ ರಿಸ್ಕ್ ತಿ. ತಸಲ್ಯಾ ಎಕಾಚ್ ಭುರ್ಗ್ಯಾಕ್ ಜರ್ ದೇವ್ ಆನಿ ಮನಿಸ್ ಸೈತ್ ಪಯ್ಸ್ ಕರ್ತಿತ್, ತರ್ ತಿ ಆವಯ್ ಫಾರಿಕ್ಪಣ್ ಸೊಧ್ತಾ. ತ್ಯಾ ಪುತಾನ್ ಚೂಕ್ ಕೆಲ್ಯಾರ್ಯೀ ತಿ ದೊಳೆ ಧಾಂಪುನ್ ವರ್ತಾ."
"ಮಿಂಗೆಲಿ" ಹಾವೆಂ ಮ್ಹಳೆಂ ತಾಚಿಂ ಉತ್ರಾಂ ಅರ್ಧ್ಯಾರ್ಚ್ ಕಾತರ್ನ್
"ಹೆಂ ಸಗ್ಳೆಂ ಅಂತ್ ಕರುಂಕ್ ತುಂ ತಾಚ್ಯಾ ಕುಡಾಕ್ ಗೆಲ್ಲೊಯ್. ತುಂ ತಾಚ್ಯಾ ಕುಡಾಕ್ ಏಕ್ ಪಾವ್ಟಿಂ ನ್ಹಂಯ್, ದೋನ್ ಪಾವ್ಟಿಂ ಗೆಲ್ಲೊಯ್! ದೊನ್ ಪಾವ್ಟಿಂ!! ಪಯ್ಲೆ ಪಾವ್ಟಿಂ ತುಂ ತಾಚೆಲಾಗಿಂ ಉಲವ್ನ್ ಭಾಯ್ರ್ ಯೆತಾನಾ ತೊ ಜೀವಂತ್ ಆಸ್ಲ್ಲೊ. ಪುಣ್ ದುಸ್ರ್ಯೆ ಪಾವ್ಟಿಂ ತೊ ಕುಡಾಕ್ ರಿಗ್ತಾನಾ ತೊ ಮಾಂದ್ರೆರ್ ಮೊಡೆಂ ಜಾವ್ನ್ ಪಡ್ಲ್ಲೊ!"
ಮ್ಹಾಕಾ ಕಾಂತವ್ನ್ ಆಸ್ಲ್ಲಿ ದುಬಾವಾಚಿ ಕೀಡ್ ಮಾರ್ಚೆ ಖಾತಿರ್ ಹಾಂವೆ ಅಸೊ ಕಾಳೊಕಾಂತ್ ಫಾರ್ ಸೊಡ್ಲೊ. ಪುಣ್ ತೊ ತಾಕಾ ಲಾಗ್ಲೊ ಜಾಲ್ಯಾರ್ಯೀ ಕಸೊ! ಮ್ಹಜಿಂ ಉತ್ರಾಂ ಆಯ್ಕಾತಚ್ ತಾಚ್ಯಾ ತೊಂಡಾರ್ ಜಾಲ್ಲಿ ಬದ್ಲಾವಣ್ ಹಾಂವ್ ಕೆದಿಂಚ್ ವಿಸರ್ಚೊನಾ. ತಾಚೆ ವೋಂಟ್ ರಗ್ತಾಚಿ ಲಯ್ ನಾಸ್ತಾಂ ಧೊವೆ ಜಾಲೆ. ಗಾಲೊ ಫೊಂಡಾಕ್ ಗೆಲೆ. ದೊಳ್ಯಾಂಚೊ ಪ್ರಜಳ್ ಮಾಯಾಕ್ ಜಾಲೊ ತಸೊಚ್ ಮ್ಹಜೊ ದುಬಾವ್ಯೀ.
"ತುಜೊ ಸ್ಪಿರಿತ್ ತ್ಯಾ ಘರಾಂತ್ ಆಸ್ಲ್ಲೊ ದಿಸ್ತಾ, ಇತ್ಲೆಂ ಸಗ್ಳೆಂ ಜಾಣಾ ಜಾಂವ್ಕ್" ಗಾಗೆಲೊ ತೊ ಭಿರಾಂತೆಚಿ ದೀಷ್ಟ್ ಮ್ಹಜ್ಯಾ ತೊಂಡಾರ್ ಜೊಕುನ್.
"ತಶೆಂ ಕಾಂಯ್ ನಾ" ಮ್ಹಳೆಂ ಹಾವೆಂ,
"ಪಂಚ್ವೀಸ್ ವರ್ಸಾಂಚ್ಯಾ ವಕಾಲತಿಚ್ಯಾ ಅನುಭವಾನ್ ಹಾಂವ್ ಮನ್ಶ್ಯಾಂಚೆಂ ವರ್ತನ್ ಶಿಕ್ಲಾಂ. ಆಮ್ಕ್ಯಾ ಸಂದರ್ಭಾಚೆರ್ ಎಕ್ ಮನಿಸ್ ಅಮ್ಕ್ಯಾ ಥರಾನ್ ಕಿತ್ಯಾಕ್ ಚಲ್ತಾ ಮ್ಹಣ್ ಹಾಂವ್ ಸಮ್ಜಾತಾಂ. ಆತಾಂ ಆಯ್ಕ್. ತುಜ್ಯಾ ಪುತಾ ವಿಷ್ಯಾಂತ್ ಹಾವೆಂ ಜಾಯ್ತಿ ಮಾಹೆತ್ ಕಾಡ್ಲಿ. ಕಿನ್ನಿಗೊಳಿ ಸಾಯ್ಮನ್ ಮ್ಹಳ್ಳೊ ತಾಚೊ ಈಷ್ಟ್ ಆಸಾ. ತಾಣೆ ಮ್ಹಾಕಾ ಹೆಂ ಸಾಂಗ್ಲೆಂ ಕೀ, ತುಜೊ ಪೂತ್ ತುಕಾ ವಿಶೇಸ್ ಥರಾನ್ ದ್ವೇಶಿತಾಲೊ ಮ್ಹಣ್. ತುಕಾ ಜಿವೆಶಿಂ ಮಾರ್ಚ್ಯೆ ವಿಶಿಂ ಸೈತ್ ತೊ ಜಾಯ್ತೆ ಪಾವ್ಟಿಂ ಉಲಯ್ಲಾ ಖಂಯ್. ಪುಣ್ ತುಂ ಮುಖಾರ್ ಆಸ್ತಾನಾ ತುಜೆಲಾಗಿಂ ಉಲಂವ್ಕ್ ಸೈತ್ ತಾಕಾ ಧೈರ್ ಯೇನಾಸ್ಲೆಂ ಖಂಯ್. ದುಸ್ರ್ಯಾ ಥೊಡ್ಯಾಂನಿ ಮ್ಹಾಕಾ ಸಾಂಗ್ಲೆಂ ಕೀ, ತೊ ನೀಜ್ ಜಾವ್ನ್ ವಾಯ್ಟ್ ಭುರ್ಗೊ ನ್ಹಂಯ್ ಬಗಾರ್ ಅಸ್ಕತ್ ಮನಾಚೊ ಜಾಲ್ಲ್ಯಾನ್ ದುಸ್ರ್ಯಾಂಚ್ಯಾ ಸಾಂಗಾತಾ ಪಡೊನ್ ವಾಯ್ಟ್ ಸವಯೊ ಶಿಕ್ಲೊ ಮ್ಹಣ್. ಹೆಂ ಸತ್ ತುಕಾ ತ್ಯೆ ರಾತಿಂ ನಿಕು ತುಜೆಲಾಗಿಂ ಉಲಯ್ತಾನಾ ಝಳ್ಕಾಲೆಂ"
ಹಾಂವ್ ಮೌನ್ ಜಾತಚ್ ಎಕ್ ಲಾಂಬ್ ಉಸ್ವಾಸ್ ಸೊಡ್ಲೊ ಮಿಂಗೆಲಿನ್. ತಾಚೆ ಭಿತರ್ಲೊ, ಇತ್ಲ್ಯಾ ಭದ್ರತೆನ್ ಸಾಂಬಾಳ್ಲ್ಲೊ ಘುಟ್ ಹಾವೆಂ ಉಗ್ತೊ ಕೆಲ್ಲ್ಯಾ ವೆಳಾರ್ ತೊ ಭಿರಾಂತೆನ್ ಕಂಗಾಲ್ ಜಾಲ್ಲೊ ಜಾಲ್ಯಾರ್ಯೀ ಆತಾಂ ತಾಚ್ಯಾ ತೊಂಡಾರ್ ಧಯ್ರ್ ದಿಸ್ತಾಲೆಂ. ಆಪ್ಲೆಂ ಕಾಳಿಜ್ ಉಗ್ತೆ ಕರುಂಕ್ ತೊ ತಯಾರ್ ಜಾಲ್ಲೊ. ಮಾತ್ಯಾ ವಯ್ಲೆಂ ಎಕ್ ಭಾರಾಧಿಕ್ ವೊಜೆಂ ಹಾಳು ಜಾಲ್ಲ್ಯೆಬರಿ ತಾಕಾ ಭೊಗ್ಲೆಂ. ತಾಕಾ ಉತ್ತೇಜನ್ ದೀಂವ್ಕ್ ಹಾವೆಂ ಮ್ಹಳೆಂ:
"ತಾಕಾ ಭುಂಯ್ ಘಾಲುಂಕ್ ತುಕಾ ಇಕ್ರಾ ವರ್ಸಾಂ ಲಾಗ್ಲಿಂ ಆನಿ ತೊ ಕಸಲೊ ಮ್ಹಣ್ ಸಮ್ಜೊಂಕ್ ಆನಿಕ್ ಬಾವೀಸ್ ವರ್ಸಾಂ ಗೆಲಿಂ ಆನಿ ತೆದಾಳಾ ವೆಳ್ ಉತ್ರಾಲ್ಲೊ. ತರ್, ಕಿತ್ಯಾಕ್ ಮಿಂಗೆಲಿ, ತುವೆಂ ಕರ್ನಾಸ್ಲ್ಲೊ ಅಪ್ರಾಧ್ ಮಾತ್ಯಾರ್ ವೋಡ್ನ್ ಘೆತಾಯ್? ಕೊಣೆ ಸ್ವತ ಆಪ್ಲೊ ಜೀವ್ ಕಾಡ್ಲೊ, ತಾಚೊ ತುಂ ಖುನಿಗಾರ್ ಕಸೊ ಜಾಂವ್ಚೊ? ಕಿತ್ಯಾಕ್ ಮಿಂಗೆಲಿ? ಕಿತ್ಯಾಕ್?"
"ತುಂ ಸಮಾಧಾನೆನ್ ಆಯ್ಕೊಂಕ್ ತಯಾರ್ ಆಸಾಯ್ ತರ್ ಮ್ಹಜೆ ಕಾರಣ್ ಸಮ್ಜಾತೊಲೊಯ್ ವಿತೊರಾಬಾ" ಮ್ಹಳ್ಳೆಂ ಮಿಂಗೆಲಿನ್ ಶಾಂತ್ ತಾಳ್ಯಾನ್.
"ಹಾಂವ್ ಎಕ್ ಹಜಾರ್ ರುಪಯ್ ಘೆವ್ನ್ ತಾಚ್ಯಾ ಕುಡಾಕ್ ಗೆಲ್ಲೊಂ ವ್ಹಯ್. ಮ್ಹಜ್ಯಾ ದೊಳ್ಯಾ ಮುಖ್ಲೊ ಖಂಯ್ ತರ್ಯೀ ಪಯ್ಸ್ ಧಾಡುಂಕ್. ತೊ ನಿದ್ಲ್ಲ್ಯಾಕಡೆ ಹಾಂವ್ ಉಬೊ ರಾವ್ಲೊಂ ಆನಿ ಮ್ಹಳೆಂ:
"ಉಬೊ ರಾವ್ ತುಜ್ಯಾ ಬಾಪಾಯ್ ಮುಖಾರ್!" ತೆದಾಳಾ ತೊ ಮ್ಹಣಾಲೊ
"ತುವೆಂ ಜಾವ್ನ್ ಮ್ಹಾಕಾ ಶೆವ್ಟಿಲಾಯ್ ಆಸ್ತಾಂ ಹಾವೆಂ ಕಿತ್ಯಾಕ್ ಉಬೊ ರಾವಾಜಾಯ್?"
"ಹಾವೆಂ ಶೆವ್ಟಿಲೊ? ಪಿಶ್ಯಾಬರಿ ಉಲಯ್ನಾಕಾ!" ಹಾವೆಂ ರಾಗಾನ್ ಜವಾಬ್ ದಿಲಿ.
"ಮ್ಹಜ್ಯಾ ಹ್ಯಾ ಕೊಂಡಾಂತ್ಲ್ಯಾ ದುಕ್ರಾ ಜಿಣ್ಯೆಕ್ ತುಂಚ್ ಕಾರಣ್! ತುಂಚ್!" ಆಡ್ ಪಡ್ಲ್ಲ್ಯಾ ಜಿಬೆನ್ ಪರ್ತ್ಯಾನ್ ಪರ್ತ್ಯಾನ್ ತೊ ಮ್ಹಣಾಲೊ.
"ತುಜ್ಯಾ ಜಡಾಯೆನ್ ಹಾಂವ್ ಪಿಟೊ ಜಾಲಾಂ. ತುಜೆ ದೊಳೆ ಆನಿ ತಿ ದೀಷ್ಟ್! ತುಂ ಮ್ಹಜೆಲಾಗಿಂ ಕಂಯ್ ತರಿ ಬರೋ ಎಕ್ ಸಬ್ಧ್ ಉಲಯ್ಲಾಯ್? ಏಕ್ ದಿಸ್ ತರಿ ಮ್ಹಜೆಂ ನಾಂವ್ ಕಾಡ್ನ್ ಆಪಯ್ಲಾಂಯ್? ತರ್ ಹಾವೆಂ ಹೆರಾಂಚಿ ಇಷ್ಟಗತ್ ಕೆಲ್ಲ್ಯಾಂತ್ ಚೂಕ್ ಕಿತೆಂ? ತೆ ಕಾಂಯ್ ನಾ ಜಾಲ್ಯಾರೀ ಮ್ಹಜ್ಯಾ ಸುಖಾದುಖಾಂತ್ ಪುಣೀ ವಾಂಟೆಲಿ ಜಾತಲೆ. ಮ್ಹಜಿ ಅಸ್ಕತ್ಕಾಯ್ ಸಮ್ಜಾತಲೆ.
ವ್ಹಯ್, ಹಾಂವ್ ಖೊಟೊ, ಪುಣ್ ಜಲ್ಮಾತಾನಾಂಚ್ ಖೊಟೊ ಜಾವ್ನ್ ಜಲ್ಮಾಲ್ಲೊಂ? ಹಾಂವ್ ಪಾತ್ಕಿ, ಪುಣ್ ತುಂ ಸರ್ಗಾರ್ ಥಾವ್ನ್ ದೆಂವ್ಲ್ಲೊಯ್ ಕಿತೆಂ? ಮ್ಹಾಕಾ ಬರೆಂ ಕರ್ಚೆಂ ತುಜ್ಯಾ ಹಾತಾಂತ್ ಆಸ್ಲ್ಲೆಂ; ಪುಣ್ ತುವೆಂ ಮ್ಹಾಕಾ ಕೊಂಡಾಂತ್ ಲೊಟ್ಲೊಯ್"
ಅಶೆಂ ಜಾಯ್ತೊ ತೊ ಬೊಬಾಟ್ಲೊ, ರಡ್ಲೊ ತೊ, ತಸೊಚ್ ಹಾಸ್ಲೊ. ವಿಕಟ್ ಹಾಸೊ ತ್ಯೊ! ಮ್ಹಜ್ಯಾನ್ ಸೊಸುಂಕ್ ಜಾಲೆಂನಾ. ಹಾಂವ್ ಭಾಯ್ರ್ ಗೆಲೊ. ಮಾಡಿಯಾಂ ತೊಟಾಂತ್ ಶೆವೊಟ್ ನಾಸ್ತಾಂ ಭೊಂವ್ಲೊಂ. ಸಗ್ಳೆಂ ನಿಶ್ಯಬ್ಧ್ ಆಸ್ತಾನಾ ಮ್ಹಜ್ಯಾ ಕೊಶೆಡ್ದಾಚ್ಯಾ ತಾಳ್ಯಾಚಿ ಗರೊಜ್ ಮ್ಹಾಕಾ ಆಯ್ಕಾಲಿ.
"ಮಿಂಗೆಲಿ ತುಂಚ್ ಹ್ಯಾ ಸರ್ವಾಕ್ ಕಾರಣ್! ತಿ ಗರೊಜ್ ಮ್ಹಜ್ಯಾ ಕಾಳ್ಜಾಕ್ ಸುರಿಯೆ ಬರಿ ತೊಪ್ಲಿ ವಿತೊರಾಬಾ. ಮ್ಹಜ್ಯಾನ್ ಸೊಸುಂಕ್ ತಾಂಕ್ಲೆಂನಾ. ಹಾಂವ್ ಧಾಂವ್ಲೊಂ ಪಾಟಿಂ. ಮ್ಹಜೆ ದೊಳೆ ಉಗ್ತೆ ಜಾಲ್ಲೆ. ಪುಣ್ ಹಾಂವ್ ಪಾವ್ತಾನಾ ವೆಳ್ ಉತ್ರೊನ್ ಗೆಲ್ಲೊ. ಮ್ಹಜೊ ಪೂತ್ ರಗ್ತಾಚ್ಯಾ ಕೊಂಡಾಂತ್ ಪಡೊನ್ ಆಸ್ಲ್ಲೊ.
"ಹಾಂವ್ ಜಾಯ್ತೊ ವೆಳ್ ರಾವ್ಲೊಂ ಚಿಂತುನ್. ಆಜ್ ಜರ್ತರ್ ಮ್ಹಜೊ ಪೂತ್ ಮೆಲಾ ತಾಚೊ ಖುನಿಗಾರ್ ಹಾಂವ್. ಹಾವೆಂ ಖುನ್ಯೆಚಿ ಶಿಕ್ಷಾ ಭೊಗಿಜಾಯ್ ವಿತೊರಾಬಾ. ಇತ್ಲೆಂಚ್ ಮ್ಹಾಕಾ ಸಾಂಗೊಂಕ್ ಆಸ್ಲ್ಲೆಂ. ಉಪ್ರಾಂತ್ಲೆಂ ಸಗ್ಳೆಂ ತುಂ ಜಾಣಾಂಯ್."
ಸಬ್ಧ್ ಕಾಡಿನಾಸ್ತಾಂ ಹಾಂವ್ ಉಟ್ಲೊಂ. ದುಸ್ರ್ಯೆ ದಿಸಾ ಕೊಡ್ತಿಂತ್ ಕೆಜ್ ಉಬಿ ಜಾಂವ್ಕ್ ಆಸ್ಲ್ಲಿ. ತಾಚಿ ತಯಾರಿ ಕರುಂಕ್ ಆಸ್ಲ್ಲಿ ಮ್ಹಾಕಾ. ಹೆಂ ಲಿಪ್ಲ್ಲೆಂ ಸತ್ ಉಜ್ವಾಡಾಕ್ ಹಾಡ್ನ್ ಎಕಾ ನಿರಾಪ್ರಾಧಿ ಮನ್ಶಾಕ್ ವಾಂಚಂವ್ಕ್ ಆಸ್ಲ್ಲೆಂ ಮ್ಹಾಕಾ. ಹಿಂ ಚಿಂತ್ನಾಂ ಅಟಯಿತ್ತ್ ವೆಗಿಂ ವೆಗಿಂ ಹಾಂವ್ ಘರಾ ಗೆಲೊಂ.
ದುಸ್ರ್ಯೆ ದಿಸಾ ಕೊಡ್ತಿಂತ್ ಚಿಂತುಕ್ನಾಸ್ಲ್ಲೆಂ ಘಡ್ಲೆಂ. ಮಿಂಗೆಲಿನ್ ನಿತಿದಾರಾಕ್ ಅರ್ಜಿ ದಿಲಿ ಕೀ, ಆಪ್ಣಾಕ್ ವಕೀಲ್ ನಾಕಾ ಆನಿ ಅಪ್ಣಾ ವಯ್ಲಿ ಕೆಜ್ ಆಪುಣ್ಚ್ ಝುಜ್ತಾಂ ಮ್ಹಣ್. ಎಕಾ ದಿಸಾ ಭಿತರ್ ಕೇಜ್ ಸಂಪ್ಲಿ.
ಮಿಂಗೆಲಿಚಿ ಉತರ್ ಪಿರಾಯ್ ಪಳೆವ್ನ್ ಆನಿ ಖಂಯ್ಚ್ಯಾ ಸಂದರ್ಭಾರ್ ತಾಣೆ ಖುನ್ ಕೆಲ್ಲಿ ಮ್ಹಳ್ಳೆಂ ಮತಿಂತ್ ದವರ್ನ್ ನಿತಿದಾರಾನ್ ತಾಕಾ ಧಾ ವರ್ಸಾಂಚಿ ಕಠಿಣ್ ಸಜಾ ಫರ್ಮಾಯ್ಲಿ.
ತ್ಯೆ ದೀಸ್ ಥಾವ್ನ್ ವಿತೊರಾಬಾನ್ ವಕಾಲತ್ಪಣ್ ಸೊಡ್ನ್ ಸೊಡ್ಲೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
