ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಆಧ್ಯಾತ್ಮಿಕ್ ಚಿಂತಾಪ್ ಖಂಚ್ಯಾಯ್ ಧರ್ಮಾಕ್ ಲಗ್ತಿ ಜಾಲ್ಲೆಂ ನ್ಹಯ್ ಪುಣ್ ಸರ್ವ್ ಧರ್ಮಾಂಚೆಂ ಮೂಳ್" - ಆವಾ
ಭಾವಾಡ್ತಾ ದಾಯ್ಜ್[ಕೊಂಕ್ಣೆಂತ್
ಮಾ|ಜೋರ್ಜ್ ಒಲಿವೆರಾಚಿ ವಳೊಕ್ ಚಡ್ತಾವಾಂಕ್ ಆಸ್ಚಿನಾ. ಸೆವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಪ್ರಸ್ತುತ್ ಕಾಪುಚಿನ್ ಮೆಳಾಚ್ಯಾ ಇಂಗ್ಲಿಶ್ ಪತ್ರಾಚೊ ಸಂಪಾದಕ್ ಜಾವ್ನಾಸಾ. ಸದ್ದ್ಯಾಕ್ ಮಯ್ಸೂರಾಂತ್ ಯಾಜಕೀ ಸೆವಾ ಭೆಟವ್ನ್ ಆಸ್ಚೊ ಹೊ ಏಕ್ ಕೊಂಕ್ಣಿ ಬರವ್ಪಿ, ಕವಿ ಆನಿ ಚಿಂತ್ಪಿ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡ್ಲ್ಲೊ, ಹ್ಯಾ ಅಂಕಣಾಂತ್ ತವಳ್ ತವಳ್ ಆಧ್ಯಾತ್ಮಿಕ್ ಚಿಂತ್ಪಾಚ್ಯಾ/ಭಾವಾಡ್ತಾಕ್ ಲಗ್ತಿ ಜಾಲ್ಲ್ಯಾ ವಿಚಾರಾಂಕ್ ಆಟಾಪ್ಚಿಂ ಲೇಖನಾಂ ಬರಯ್ತಲೊ - ಪುಣ್ ಹೆಂ ಅಂಕಣ್ ಶೆರ್ಮಾಂವಾಂಚೆಂ ಭಿಲ್ಕುಲ್ ನ್ಹಯ್ ಮ್ಹಳ್ಳೆಂ ಆಧ್ಯಾತ್ಮಿಕ್ ಸಾಹಿತ್ಯಾಕ್ ವಳ್ಕತೆಲ್ಯಾಂಕ್ ಜರೂರ್ ಸಮ್ಜಾತೆಲೆಂ.]
ತುಮ್ಚಿಂ ಸವಾಲಾಂ/ವಿಚಾರ್ ಧಾಡುಂಕ್ ವಿಳಾಸ್: info@daaiz.com
ಮಾ|ಜೋರ್ಜ್ ಒಲಿವೆರಾ
ತುಂ ಕಾಳ್ಜಾಚ್ಯಾ ಗೊಂಡ್ಯಾ ಮ್ಹಜ್ಯಾ
"ತುಂ ಕಾಳ್ಜಾಚ್ಯಾ ಗೊಂಡ್ಯಾ ಮ್ಹಜ್ಯಾ/ ನಮಾನ್ ತುಕಾ ಭರ್ವಾಶಾ’ಮ್ಚ್ಯಾ
ಮಾಯ್ ಮಹಿನ್ಯಾಚೆಂ ದುಲಬ್ ರಾಣ್ಯೆ/ ಚರ್ಣಾ ತುಜ್ಯಾ ಲಾಗ್ತಾಂವ್ ಮಾಯೆ"
ಮಾಯ್ ಮಹಿನ್ಯಾಂತ್ ಅಮ್ಚ್ಯಾ ಕ್ರಿಸ್ತಾಂವ್ ಘರಾಣ್ಯಾನಿಂ ಮಾಗ್ಣ್ಯಾ ವೆಳಿಂ ಥೊಡ್ಯಾ ಪಾವ್ಟಿಂ ಗಾಂವ್ಚೆಂ ಗೀತ್: ತುಂ ಕಾಳ್ಜಾಚ್ಯಾ ಗೊಂಡ್ಯಾ ಮ್ಹಜ್ಯಾ.. ಸಬಾರ್ ಭಕ್ತಾಂಕ್ ಅಪ್ಲ್ಯಾ ಭುರ್ಗ್ಯಾಪಣಾಚೆಂ ಉಡಾಸ್ ಕರ್ಚೆಂ ಗೀತ್ ಹೆಂ. ಕಥೊಲಿಕ್ ಕೊಂಕ್ಣಿ ಕ್ರಿಸ್ತಾಂವ್ ಘರಾನಿಂ ಮರ್ಯೆಕ್ ಮಾಯ್ ಮಹಿನ್ಯಾಂತ್ ನಮಾನ್ ಕರ್ಚೆಂ ಗೀತ್ ಹೆಂ.
ಭಾಗೆವಂತ್ ಮರಿ ಕುಟ್ಮಾ-ಜಿವಿತಾಚಿ ಅದರ್ಶ್:- ತ್ಯಾ ಎಕಾ ಸುಪರ್ ಮಾರ್ಕೆಟಿಕ್ ಅವಯ್ ಅಪ್ಲ್ಯಾ ದಾಕ್ಟ್ಯಾ ಭುರ್ಗ್ಯಾಕ್ ಕಾಣ್ಗೆವ್ನ್ ಘೆಲಿ. ಜಯ್ತ್ ಸುಪರ್ ಮಾರ್ಕೆಟಿಂತ್ ಹೆಣೆಂ-ತೆಣೆಂ ಶೊಪ್ಪಿಂಗ್ ಕರ್ತಾನಾ, ಅವಯ್ ಎಕಾ ಕೊನ್ಶ್ಯಾಕ್ ಪಾವ್ತಾನಾ, ಭುರ್ಗೆಂ ಅನೇಕಾ ಕೊನ್ಶ್ಯಾಕ್ ಪಾವ್ಲೆಂ. ಅವಯ್ಕ್ ತ್ಯಾ ಗ್ರಾಹಕಾಂ ಸಾಂಗಾತಾ ಅಪ್ಲ್ಯಾ ಭುರ್ಗ್ಯಾಕ್ ಸೊದುಂಕ್ ಕಷ್ಟ್ ಜಾಲೆಂ, ಅಕಾಂತ್ ಜಾಲೊ, ಕಿತೆಂ ಕರ್ಚೆಂ ಮ್ಹಣ್ ಸಮ್ಜಾನಾಸ್ತಾನಾ, ಸಕ್ಕಡ್ ಕುಶಿನ್ ಸೊದುಂಕ್ ಲಾಗ್ಲಿ. ಭುರ್ಗ್ಯಾಕ್ ಅವಯ್ ಚುಕ್ಲ್ಲಿ ಸಮ್ಜೊಂಕ್ ಚಡ್ ವೇಳ್ ಲಾಗೊಂಕ್ ನಾ. ತಾಣೆಂ ಅವಯ್ಚೆಂ ನಾಂವ್ ವ್ಹಡಾನ್ ಉಚಾರುಂಕ್ ಸುರು ಕೆಲೆಂ. ಅವಯ್ಚೆಂ ನಾಂವ್ ಮೊನಿಕಾ: ’ಮೊನಿಕಾ! ಮೊನಿಕಾ!’ ಭುರ್ಗ್ಯಾನ್ ಬೊಬೊ ಘಾಲ್ಯೊ! ಅವಯ್ಕ್ ಅಪ್ಣಾಕ್ ಕೊಣ್ ಅಪಾಯ್ತಾ ತಶೆಂ ಭಗ್ಲೆಂ. ಅವಾಜ್ ಯೆಂವ್ಚ್ಯಾ ಕುಶೆನ್ ಅವಯ್ನ್ ಅಪ್ಲಿಂ ಮೆಟಾಂ ಘಾಲಿಂ. ತಿಕಾ ಅಪ್ಲೆಂ ಭುರ್ಗೆಂ ನಾಂವಾನ್ ಅಪಯ್ತಾ ಮ್ಹಣ್ ಕಳೊಂವ್ಕ್ ಚಡ್ ವೇಳ್ ಗೆಲೊನಾ. ಭುರ್ಗ್ಯಾಕ್ ಮೆಳ್ಲ್ಲ್ಯಾ ತಕ್ಷಣ್ ತಿಣೆಂ ಭುರ್ಗ್ಯಾಕ್ ಜಾಗೊವ್ಣಿ ದಿಲಿ: ತುವೆಂ ಮ್ಹಾಕಾ ’ಮಾಮ್ಮಿ’ ಮ್ಹಣ್ ಉಲೊ ಕರಿಜಾಯ್, ಮ್ಹಜೆಂ ನಾಂವ್ ಕಾಡುಂಕ್ ನ್ಹಜೊ.”ತಾಕಾ ಭುರ್ಗ್ಯಾನ್ ಜಾಣ್ವಾಯೆಚಿ ಜಾಪ್ ದಿಲಿ: ಹ್ಯಾ ಸುಪರ್ ಮಾರ್ಕೆಟಿಂತ್ ಸಬಾರ್ ಮಾಮ್ಮಿ ಅಸಾತ್, ತುಜೆಂ ನಾಂವ್ ಕಾಡ್ಲ್ಲ್ಯಾನ್, ತು ಮ್ಹಾಕಾ ಪರತ್ ಲಾಬ್ಲಿ.”
ಹ್ಯಾ ಯಾತ್ರಿಕ್ ಸುಪರ್ ಮಾರ್ಕೆಟ್ ಸಂಸಾರಾಂತ್ ಬಜಾರ್ ಪರಿಸರಾಂತ್ ಜಿಯೆತಾನಾ, ವಿಕುಂಕ್, ಕಾಣ್ಗೆಂವ್ಕ್, ಮೊಲಾಂವ್ಕ್, ಲಾಭ್ ಕರುಂಕ್, ಲೇಖ್-ಪಾಖ್ ಕರುಂಕ್, ವಿಮರ್ಶೊ ಕರುಂಕ್, ಪ್ಲ್ಯಾನಿಂಗ್ ಕರುಂಕ್ ಜಾಯ್ತೊ ಟಾಯ್ಮ್ ವೆತಾನಾ, ಎಕಾಮೆಕಾಚಿ ವ್ಹಳಕ್ ಉಣಿಂ ಜಾತಾ. ಭೆಟ್ ಅಪ್ರೂಪ್ ಜಾತಾ, ಸಂಬಧ್ ಯಾಂತ್ರಿಕ್ ಜಾತಾ, ಮ್ಹನ್ಶ್ಯಾಪಣ್ ಯಾಂತ್ರಿಕ್ ಜಾತಾ. ಅಸಲ್ಯಾ ವೆಳಾರ್ ಧರ್ಮ್ ಅಮ್ಚೆಂ ಚುಕೊನ್ ಘೆಲ್ಲೆಂ ಬೆಲೆನ್ಸ್ ಪಾಟಿ ಹಾಡುಂಕ್ ಸಕ್ತಾ. ಜುದೆವಾಚ್ಯಾ ಸಾಂಗ್ಣ್ಯಾಪ್ರಕಾರ್: ದೆವಾಕ್ ಸಗ್ಳ್ಯಾನಿ ರೂಪ್-ರೂಪ್ ರಾವೊನ್ ಹರ್ಯೆಕಾ ಮನ್ಶ್ಯಾಕ್ ಜತನ್ ಘೆಂವ್ಕ್ ಮನ್ ಅಸ್ಲ್ಲೆಂ, ತ್ಯಾ ದೆಕುನ್ ತಾಣೆಂ ಅವಯ್ಕ್ ರಚ್ಲೆಂ”ಅಮ್ಚ್ಯಾ ಜಿವಿತಾಂತ್ ಅವಯ್-ಬಾಪಾಯ್ಕ್ ಕಸೆಂ ಅಮಿ ಪಯಿಲ್ಲೆಂ ಸ್ಥಾನ್-ಮಾನ್, ಗೌರವ್ ದೀವ್ನ್ ಮಯಾ-ಮೋಗ್ ದಿತಾಂವ್, ತ್ಯಾಚ್ ಪ್ರಕಾರ್ ಬಾವಾಡ್ತಾ ಜಿವಿತಾಂತ್ ಪವಿತ್ರ್ ತ್ರಿದಾಂದ್: ಬಾಪ್, ಪೂತ್, ಪವಿತ್ರ್ ಆತ್ಮ್ಯಾಕ್ ಅಮಿ ಮಾನ್ ದಿತಾಂವ್, ತಾಚ್ಯಾ ಉಪ್ರಾಂತ್ ಭಾಗೆವಂತ್ ಮರ್ಯೆಕ್ ಅಮಿ ನಮಾನ್ ಕರ್ತಾಂವ್. ಯಾತ್ರಿಕ್ ಪಯ್ಣಾರ್ ಅಸ್ಚ್ಯಾ ಅಮ್ಕಾಂ, ಅಮ್ಚ್ಯಾ ವೊಂಟಾನಿ ಸದಾಂಚ್ ಮರ್ಯೆಚೆಂ ಮಧುರ್ ನಾಂವ್ ಖೆಳಾಜಾಯ್.
ಮರಿ ಮ್ಹಳ್ಯಾರ್ ದೆವಾಕ್ ಮೊಗಾಚಿ ಮ್ಹಣ್ ಅರ್ಥ್. ಮರಿ ದೆವಾಚಿ ಮಾತಾ, ಅಮ್ಚ್ಯಾ ಕುಟ್ಮಾ-ಜಿವಿತಾಚೆಂ ಅದರ್ಶ್. ತಿಚ್ಯಾವರ್ವಿಂ ಮನ್ಶಾಕುಳಾಚಾ ಸರ್ವ್ ಕುಟ್ಮಾಕ್ ಜಿವಿತಾಚೊ ಸಡ್ವೊಣ್ದಾರ್ ಲಾಭ್ಲೊ. ತಿಚ್ಯಾ ಖಬ್ಲಾತೆವರ್ವಿಂ ದೇವ್ ಮನಿಸ್ ಜಾಲೊ ಅನಿ ಅಮ್ಚೆಂ ಮಧೆಂ ಜಿಯೆಲೊ. ತಿಚ್ಯಾ ಧೈವಿಕ್ ಸಂಪರ್ಕಾವರ್ವಿಂ ತಿ ಪವಿತ್ರ್ ತ್ರಿದಾಂದ್: ಬಾಪ್, ಪೂತ್, ಪವಿತ್ರ್ ಅತ್ಮ್ಯಾಚೆಂ ಪ್ರತಿರೂಪ್ ಜಾಂವ್ಕ್ ಪಾವ್ಲಿ. ತಿಚ್ಯಾ ಕಬ್ಲೆತಾ ವರ್ವಿಂ ತಿ ದೇವಾ ಬಾಪಾಚಿ ಧು ಯಾ ಭುರ್ಗೆಂ ಜಾವ್ನ್ ತಿ ಪವಿತ್ರ್ ಪುಸ್ತಕಾಚ್ಯಾ ಪಾನಾನಿಂ ತಿ ಪರ್ಜಳ್ತಾ. ಜೆಜುಚಿ ಅವಯ್ ಜಾವ್ನ್ ದೇವ್-ಮಾತಾ ಜಾವ್ನ್ ವಾಂಜೆಲಾಚ್ಯಾ ವಾಟೆರ್ ತಿ ದಿಷ್ಟಿಕ್ ಪಡ್ತಾ. ದೇವಾಚ್ಯಾ ಕುರ್ಪೆನ್ ಪವಿತ್ರ್ ಅತ್ಮ್ಯಾಚಿ ವೊಕಾಲ್ ಜಾವ್ನ್ ತಿ ಅಮ್ಚ್ಯಾ ಬಾವಾಡ್ತ್ಯಾ ಜಿವಿತಾಂತ್ ಅದರ್ಶ್ ಜಾವ್ನ್, ಮೇಲ್-ಫಾಂಕ್ತ್ ಜಾವ್ನಾಸಾ.
ಮಯಾ-ಮೊಗಾಚಿ ಥೊಡಿಂ ನಿಯಮಾಂ:-
ಅರ್ಚ್ ಬಿಸ್ಪ್ ಫುಲ್ಟನ್ ಶೀನ್ ಹ್ಯಾ ಪ್ರಾಖ್ಯಾತ್ ಲೇಖಕಾ ಪ್ರಕಾರ್ ಮರಿ ವಾಂಜೆಲಾಂತ್ ಸಾತ್ ಪಾವ್ಟಿ ಉಲಯ್ಲ್ಯಾ. ಹ್ಯಾ ಸಾತ್ ಉತ್ರಾಕ್ ತಾಳ್ ಪಡೊನ್ ತಾಣೆಂ ಮಯಾ-ಮೊಗಾಚ್ಯಾ ಜಿವಿತಾಕ್ ಸಾತ್ ನಿಯಮಾ ದಿಲ್ಯಾಂತ್. ತಿಂ ನಿಯಮಾ ಅಮ್ಚ್ಯಾ ದಿಸ್ಪೊಡ್ತ್ಯಾ ವೈಯಕ್ತಿಕ್ ಅನಿ ಕುಟ್ಮಾ-ಜಿವಿತಾಕ್ ಖಂಡಿತ್ ಉಪ್ಕಾರಾಕ್ ಪಡ್ತೆಲಿ.
ಪಯ್ಲೆಂ ನಿಯಮ್: - ಮೋಗ್ ಏಕ್ ವಿಂಚವ್ಣ್. ಪುಣ್ ಮರಿ ದೇವ್ದುತಾಲಾಗಿಂ ಮ್ಹಣಾಲಿ: “ಹೆಂ ಘಡ್ಚೆಂ ಕಶೆಂ? ಹಾಂವ್ ಆಜುನ್ಯೀ ಅಂಕ್ವಾರ್!”(ಲೂಕ್ 1.34). ಮರಿಯೆನ್ ಮಯಾ-ಮೋಗಾಚ್ಯಾ ಜಿವಿತಾಂತ್ ಸರ್ವೇಶ್ವರ್ ದೇವಾಚಿ ವಿಂಚೊವ್ಣ್ ಕೆಲಿ. ಅಮ್ಚ್ಯಾ ಜಿವಿತಾಂತ್ ಪ್ರಥಮ್ ದೇವಾಕ್, ನಂತರ್ ಪೆಲ್ಯಾಕ್, ನಿಮಾಣೆಂ ಅಮಿ ಅಮ್ಕಾಂಚ್ ವಿಂಚುನ್ ಕಾಡಿಜಾಯ್. ಪೆಲ್ಯಾಚೊ ಹುಸ್ಕೊ ಅಸ್ಲ್ಲ್ಯಾಕ್ ಮಾತ್ರ್ ಮೋಗ್ ಕರುಂಕ್ ಕಳ್ತಾ.
ದುಸ್ರೆಂ ನಿಯಮ್: ಮೋಗ್ ಅಪ್ಲಿ ಖುಶಿ, ಪೆಲ್ಯಾಚ್ಯಾ ಖುಶೆಕ್ ಏಕ್ ಜಾಂವ್ಕ್ ಅಪೇಕ್ಷಿತಾ. ತೆದ್ವಾಂ ಮರಿಯೆನ್ ಮ್ಹಳೆಂ: “ಪಳೆ, ಹಾಂವ್ ಸರ್ವೆಸ್ಪರಾಚಿ ಚಾಕರ್ನ್; ತುಜ್ಯಾ ಉತ್ರಾ ಪರ್ಮಾಣೆಂ ಮ್ಹಜೇ ಥಂಯ್ ಜಾಂವ್.”(ಲೂಕ್ 1.38). ಪೆಲ್ಯಾಚಿ ಖುಶಿ ಕರ್ತಾನಾ ಜಾಂವ್ಚೊ ಸಂತೊಸ್, ಸ್ವಂತ್ ಖುಶಿ ಕರ್ತಾನಾ ಲಾಬಾನಾ. ಕುಟ್ಮಾ ಜಿವಿತಾಂತ್ ಪೆಲ್ಯಾಚಿ ಕರುನ್, ಸೆವೆ ಮನೋಬಾವನಾನ್ ಜಿಯೆತಾನಾ, ಅಮ್ಚ್ಯಾ ಜಿವಿತಾಕ್ ಅರ್ಥ್, ತಸೆಂಚ್ ಸಂತೊಸ್ ಲಾಬ್ತಾ.
ತಿಸ್ರೆಂ ನಿಯಮ್: ಮೋಗ್ ಪೆಲ್ಯಾಚಾ ಸೆವೆಂತ್ ಖರ್ಚುಂಕ್ ಅಶೆತಾ. “ಹೆಂ ಘಡೊನ್ ಥೊಡ್ಯಾಚ್ ದಿಸಾಂನಿ ಮರಿ ಉಠುನ್ ಜುದಾಚ್ಯಾ ದೊಂಗ್ರಾಳ್ ಪ್ರದೇಶಾಂತ್ಲ್ಯಾ ಏಕ್ ಶಹರಾಕ್ ಧಾಂವ್ಧಾಂವಿಂ ಗೆಲಿ. ಥಂಯ್ ಜಾಕರಿಚ್ಯಾ ಘರಾ ಭಿತರ್ ಸರ್ನ್, ಎಲಿಜಾಬೆತಿಕ್ ತಿಣೆಂ ನಮಾನ್ ಕೆಲೊ. (ಲೂಕ್: 1.38-40). ಮೋಗ್ ಕರ್ಚೆ ಸುಲಭ್. ಮೊಗಾರ್ ಪಡ್ಚೆಂ ಆನೀಕೀ ಸುಲಭ್. ಮೊಗಾನ್ ಜಿಯೆಂವ್ಚೆಂ ಕಷ್ಟ್, ಮೊಗಾನ್ ರಾಂವ್ಚೆಂ ಕಷ್ಟ್. ತ್ಯಾಚ್ ದೆಕುನ್ ಮೊಗಾಚ್ಯಾ ಇಸ್ಕೊಲಾಂತ್ ಸಬಾರ್ ಜಣ್ ಫೆಯ್ಲ್ ಜಾತಾತ್. ಸ್ವಾರ್ಥಾಕ್ ಮೊಗಾಚ್ಯಾ ಘರಾಂತ್ ಚಡ್ ಜಾಗೊ ದೀಂವ್ಕ್ ನ್ಹಜೊ. ನಿಸ್ವಾರ್ಥ್ ಅಸ್ಲ್ಲ್ಯಾ ಲಾಗಿಂ ಮೋಗ್ ಅಸಾ, ಮೋಗ್ ಅಸ್ಲ್ಲ್ಯಾ ಲಾಗಿ ಸೆವಾ, ಅಸಾ, ಸೆವಾ ಅಸ್ಲ್ಲ್ಯಾ ಲಾಗಿಂ ಶಾಂತ್-ಸಮಾಧಾನ್ ಭರ್ಪೂರ್ ಅಸಾ. ಭಾಗೆವಂತ್ ಮರಿ ಅಮ್ಕಾಂ ಹೆಂ ವರ್ತೆಂ ಸತ್ ಹ್ಯಾ ನಿಯಮಾವರ್ವಿಂ ಶಿಕಯ್ತಾ.
ಚವ್ತೆಂ ನಿಯಮ್: - ಮೊಗಾಚಿ ದುಸ್ರಿ ಕುಸ್ ಸಂತೊಸ್:- ತವಳ್ ಮರಿ ಮ್ಹಣಾಲಾಗ್ಲಿ: “ಮ್ಹಜೊ ಜೀವ್ ಸರ್ವೆಸ್ಪರಾಚಿ ವ್ಹಡ್ವಿಕ್ ಗಾತಾ, ಮ್ಹಜೊ ಆತ್ಮೊ ದೆವಾ ಮ್ಹಜ್ಯಾ ತಾರಕಾ ಥಂಯ್ ಸಂತೊಸಾನ್ ಉಡ್ತಾ. (ಲೂಕ್ 1.46-47). ನೀಜ್ ಮೊಗ್, ನೀಜ್ ಸಂತೊಸ್ ದಿತಾ. ಕುಟ್ಮಾ ಜಿವಿತಾತ್ ನಿಜ್, ನಿಸ್ವಾರ್ಥ್ ಮೊಗ್ ಅಸ್ತಾನಾ, ತ್ಯಾ ಕುಟ್ಮಾಂತ್ ಯಥೇಷ್ಟ್ ಸಂತೊಸ್ ಅಸ್ತಾ. ಮರ್ಯೆಮಾಂಯೆಚ್ಯಾ ಜಿವಿತಾಂತ್ ಅಸಲೊ ಅನಂದ್ ಸದಾಂಚ್ ಅಸ್ಲ್ಲೊ.
ಪಾಂಚ್ವೆಂ ನಿಯಮ್: ಮೊಗಾಚೆಂ ಅನೇಕ್ ಕುಸ್ ದೂಕ್. ತಾಕಾ ಥಂಯ್ ಪಳೆವ್ನ್ ತಾಚಿಂ ಮಾಯ್ಬಾಪ್ ಆಜಾಪ್ ಜಾಲಿಂ. ತವಳ್ ತಾಚಿ ಆವಯ್ ತಾಚೇಲಾಗಿಂ ಮ್ಹಣಾಲಿ: “ಪುತಾ, ತುವೆಂ ಆಮ್ಕಾಂ ಅಶೆಂ ಕಿತ್ಯಾಕ್ ಕೆಲೆಂಯ್? ತುಜೊ ಬಾಪ್ ಆನಿ ಹಾಂವ್ ವ್ಹಡ್ ಖಂತಿ ದುಖಾಣ್ ತುಕಾ ಸೊಧುನ್ ಆಸ್ಲ್ಲ್ಯಾಂವ್.”(ಲೂಕ್ 2.48). ಸುಖ್-ದೂಕ್ ಜಿವಿತಾಚಿ, ದೋನ್ ಕುಸಿ. ಏಕಾ ನಾಣ್ಯಾಕ್ ಕಸೆಂ ದೋನ್ ಕುಸಿ ಅಸಾತ್, ತಸೆಂಚ್ ಜಿವಿತಾಕ್ ಸುಖ್-ದುಕಾಚೆಂ ದೋನ್ ಕುಸಿ ಅಸಾತ್. ಜಿವಿತಾಚಿ ಭಾಸ್ ಮೊಗಾಚಿ ಭಾಸ್, ಅಸೆಂ ಮೋಗ್ ಕರ್ತೆಲ್ಯಾಂಕ್ ದೂಕ್ ನೆಗಾರ್ ಕರುಂಕ್ ಜಾಯ್ನಾ. ಭಾಗೆವಂತ್ ಮರ್ಯೆನ್ ಮೊಗಾಚೊ ಖುರಿಸ್ ತಿಚ್ಯಾ ಖಾಂದ್ಯಾರ್ ಖಾಲ್ತ್ಯಾಪಣಿಂ ಘೆತ್ಲೊ.
ಸವೆಂ ನಿಯಮ್: ಉಣೊ ಮೊಗ್, ಚಡೀತ್ ಮೋಗಾ ಮುಖಾರ್ ಮೊರಾಜಾಯ್. ಥಂಯ್ ವಾಯ್ನ್ ಉಣೊ ಪಡ್ಲೊ. ತೆದ್ವಾಂ ಜೆಜುಚೇ ಆವಯ್ನ್ ತಾಕಾ ಸಾಂಗ್ಲೆಂ: “ತಾಂಚೆಲಾಗಿಂ ವಾಯ್ನ್ ನಾ.” (ಜುವಾಂವ್ 2.3). ಸೆಜಾರಾಚ್ಯಾ ಘರಾ, ಮರಿ ಅಪ್ಲೆಂ ವ್ಹಡ್ಪಣ್ ಲೆಖಿನಾಸ್ತಾನಾ, ಪೆಲ್ಯಾಚ್ಯಾ ಹುಸ್ಕೆನ್ ಜೆಜುಲಾಗಿಂ ತಿಂ ವಿನಂತಿ ಕರ್ತಾ. ಏಕಾ ಕುಟ್ಮಾಂತ್ ದೇವ್-ಮಾಯೆಚೊ ಅಸಲೊ ಗೂಣ್ ಅಸ್ಲ್ಯಾರ್, ತೆಂ ಕುಟಾಮ್ ಶಾಶ್ವತ್ ಬಾಳ್ತಾ. ಮೋಗಾಂತ್ ವಿವಿಧ್ ಹಂತಾಂ ಅಸಾತ್, ಸ್ವ-ಮೋಗ್, ಪೆಲ್ಯಾಚೊ ಮೋಗ್, ದೇವಾಚೊ ಮೋಗ್. ಚಡೀತ್ ಮೋಗ್ ಕರ್ತಾನಾ, ಅಮಿ ಉಣ್ಯಾ ಮೋಗಾಕ್ ಅದೇವ್ಸ್ ಮಾಗಾಜಾಯ್.
ಸಾತ್ವೆಂ ನಿಯಮ್: ನಿಮಾಣೆಂ ಸರ್ವ್ ಮೋಗ್, ದೇವಾಚಿ ಖುಶಿ ಕರ್ಚಾಂತ್ ಏಕ್ ಜಾವ್ನಾಸಾ. ತವಳ್ ತಾಚೇ ಅವಯ್ನ್ ಚಾಕ್ರಾಂಕ್ ಸಾಂಗ್ಲೆಂ: “ತೊ ತುಮ್ಕಾಂ ಕಿತೆಂ ಸಾಂಗ್ತಾಂ ತೆಂ ಕರಾ.” (ಜುವಾಂವ್ 2.5). ಮರಿ ಅಮ್ಚ್ಯಾ ಕುಟ್ಮಾಚಿ ಅದರ್ಶ್, ಅಮ್ಕಾ ಸಾರ್ಕಿ ವಾಟ್ ದಾಕಯ್ತಾ. ಅಮ್ಚ್ಯಾ ಜಿವಿತಾಂತ್, ಅಮಿ ದೊನ್ ಸಂಗ್ತಿಂ ಗಮನಾಕ್ ದವ್ರಿಜಾಯ್: ಪಯಿಲ್ಲೆಂ ದೇವಾಚಿ ಖುಶಿ ಕಿತೆಂ ಮ್ಹಣ್ ಪಾರ್ಕುಂವ್ಚಿಂ, ದುಸ್ರೆಂ, ತ್ಯಾಚ್ ಅಮ್ಚಿಂ ಜಿಣಿ ಮಾಂಡುನ್ ಹಾಡ್ಚಿ. ಬಾಗೆವಂತ್ ಮರಿ, ಅಮ್ಚ್ಯಾ ಕುಟ್ಮಾಚಿ ರಾಣಿ, ಅಮ್ಚ್ಯಾ ಕುಟ್ಮಾಂತ್ ನೀಜ್ ಮೋಗ್ ರಾಜ್ ಕರುಂಕ್ ಕುಮಕ್ ಕರುಂದಿ. ಮಾಯ್ ಮಹಿನ್ಯಾಂತ್, ತೇರ್ಸಾಚ್ಯಾ ದೆವಾಸಾಂವಾ ಸಂಗಿಂ ಮರ್ಯೆ ಸಂಗಿಂ ಜೆಜು ಸರ್ಶಿಂ ಮೆಟಾಂ ಕಾಡುಯಾಂ.
ಭಾವಾಡ್ತಾ ದಾಯ್ಜ್ 1: ಜಿವಿತಾ ಉಪ್ರಾಂತ್ ಜಿವಿತ್.
ಭಾವಾಡ್ತಾ ದಾಯ್ಜ್ 2: ಪಾಕ್ಸ್ ಅಮೇರಿಕನಾ ಕ್ರಿಸ್ಮಸ್.
ಭಾವಾಡ್ತಾ ದಾಯ್ಜ್ 3: ನವ್ಯಾ ವರ್ಸಾಕ್ ನವೆಂ ಚಿಂತಾಪ್.
ಭಾವಾಡ್ತಾ ದಾಯ್ಜ್ 4: ಜಿವಿತಾಚೆ ಚಾಳೀಸ್ ವಿಂಚ್ಣಾರ್ ದೀಸ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
