ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಬೆಣ್ಸಾಂ
ಕ್ಯಾಥರಿನ್ ರೊಡ್ರಿಗಸ್: ಕೊಂಕ್ಣಿ ತಶೆಂಚ್ ತುಳು ಭಾಸೆಚಾ ಸಾಹಿತ್ಯಾಂತ್ ಫಾಮಾದ್ ಜಾಲ್ಲಿ ಕ್ಯಾಥರಿನ್ ಏಕ್ ಸಮಾಜ್ ಸೆವಕಿ ಮಾತ್ರ್ ನ್ಹಂಯ್, ಸಾದ್ಯಾ ಲೊಕಾಂಚಾ ಕಾಳ್ಜಾಚಾ ಎಕೆಕಾ ಉಡಿಯೆಕ್ ಲಾಗ್ಸಿಲ್ಯಾನ್ ಪಾರ್ಕಿಲ್ಲಿ ಜಾವ್ನಾಸಾ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಹಾಂತುಂ ಹಿಚಾ ’ಚರುವೊ’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಹಿಚ್ಯಾ ’ಕೇಲ್ ಅಮ್ಮಾ’ ಕಾಣ್ಯೆಕ್ ವೊರಾಯ್ಣಾರಾಂಚೆಂ ಇನಾಮ್ ಲಾಭ್ಲಾಂ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಹಾಂತುಂ ಹಿಚ್ಯಾ ’ಏಕ್ ಫೊಡ್ ದುಕ್ರಾಮಾಸ್’ ಕಾಣ್ಯೆಕ್ ತಿಸ್ರೆಂ ಇನಾಮ್ ಲಾಭ್ಲಾಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಹಾಂತುಂ ಹಿಚ್ಯಾ ’ಬೆಣ್ಸಾಂ’ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಹಾಂತುಂ 5000 ರುಪ್ಯಾಂಚೆಂ ಪಯ್ಲೆಂ ಇನಾಮ್ ಜೊಡ್ಲೆಲಿ ಕಾಣಿ]
ಕ್ಯಾಥರಿನ್ ರೊಡ್ರಿಗಸ್
ಪಾಜೆ ಗುಡೊ. ಮಧೆಂ ಏಕ್ ವ್ಹಡ್ ಖಡಾಪ್. ಭಂವ್ತಿ ವ್ಹಡ್ ವ್ಹಡ್ ರೂಕ್. ಉಭಾರ್ ಗುಡೊ. ಗುಡೊ ಭರ್ ಬೆಣ್ಸಾಂ, ಕಣೆರಾಂ, ಪೊಡ್ಕೊಳಾಂ... ಆಶೆಂ ಸಭಾರ್ ಫಳಾಂ, ವ್ಹಡ್ ವ್ಹಡ್ ಆಂಬೆ, ಕಾಜು, ಪೀಪ್ಳಿ, ಆನಿ ವೊಡಾಚೆ ರೂಕ್. ಹ್ಯಾ ಗುಡ್ಯಾಚ್ಯಾ ಸೊಭಾಯೆಕ್ ಭುಲೊನ್ ಸಭಾರ್ ಜಣ್ ತಾಂಚಿ ರಜಾ ಖರ್ಚುಂಕ್ ಯೆತಾಲೆ. ಹ್ಯಾ ಗುಡ್ಯಾಚಾ ಬೆಣ್ಸಾಂಚಿ ರೂಚ್ ಚಾಕ್ಲ್ಲೊ ಹರ್ಯೆಕ್ ಪಾವ್ಟಿಂ ತಿಂ ಜಾತಾನಾ ಚುಕಾನಾಸ್ತಾನಾ ಯೇವ್ನ್ ತಾಂಚಿ ರೂಚ್ ಚಾಕ್ತಾಲೊ. ಕಾಳಿಂ ಬೆಣ್ಸಾಂ ಆನಿ ಧವಿಂ. ಧವ್ಯಾಚಿ ರೂಚ್ ಆಮ್ಶಿ ಗೊಡ್ಶಿ, ಪೂಣ್ ಕಾಳಿಂ ಖೆಲ್ಲ್ಯಾಂಕ್ ಆನಿಕೀ ಜಾಯ್ ಮ್ಹಳ್ಳಿ ಆಶಾ ಉದೆತಾಲಿ.
ಪಾಜೆಯಿ ಗುಡ್ಯಾ ಸಕಯ್ಲ್ ಪರ್ಕತ್ತಿ ಪಾಜೆಯಿ. ಹಾಂಗಾಸರ್ ಆಸ್ಚಿಂ ಧಾ-ಪಂದ್ರಾ ಕುಟ್ಮಾಚಿಂ ನಲ್ಕಾಂಚಿಂ. ಲಗ್ಭಗ್ ಪನ್ನಾಸ್ ಮೈಲಾಂ ಪಯ್ಸ್ ಹಾಂಗಾಚಿಂ ಮನ್ಶ್ಯಾಂ ಭುತಾಕ್ ಕೋಲ ಭಾಂದ್ತಾಲಿಂ. ಭಾರಿಚ್ಚ್ ನೀತ್ ನಿಯಮಾಂ ಆಸ್ಲ್ಲಿಂ. ಜಾತಿಚ್ಯಾ ರೆಗ್ರ್ಯಾಂಕ್ ಕಾಂಯ್ ಚಡುಣೆಂ ಜಾಲ್ಯಾರೀ ಜಾರಿಚ್ಯಾ ಮುಖೆಲ್ಯಾಂನಿ ದಿಂವ್ಚೆಂ ತೀರ್ಪ್ಚ್ ನಿಮಾಣೆಂ. ತಾಂತು ಉಪ್ರಾಂತ್ ವಾದ್ಚ್ಚ್ ನಾತ್ಲ್ಲೊ.
ಹ್ಯಾ ಗಾಂವಾಂತ್ ಅಣ್ಣಿಕ್ ಭಾರಿಚ್ಚ್ ಮರ್ಯಾದ್. ತಾಚ್ಯಾ ಲ್ಹಾನ್ಶ್ಯಾ ಗುಡ್ಸುಲಾ ಬಗ್ಲೆಕ್ ವ್ಹಡ್ ಏಕ್ ಜಾಂಬ್ಳಾಂ ರೂಕ್. ತಾಂತುಂ ಜಾಂಬ್ಳಾಂ ಜಾಲ್ಯಾರ್ ಭಿಕಾರ್ಯಾಕ್ ಕೆಸೊಳಿ ಜಾಲ್ಲ್ಯಾಬರಿ. ಜಾಂಬ್ಳಾಂಚ್ಯಾ ಜಡಾಯೆಕ್ ಆನಿ ತಾಂತುಂ ಬಸೊನ್ ಗಾಯನ್ ಕರ್ಚ್ಯಾ ಸುಕ್ಣ್ಯಾಂನಿ ಏಕ್ ನವೊ ಸಂಸಾರ್ ಆಸಾ ಜಾತಾಲೊ. ಅಣ್ಣಿಕ್ ವ್ಹಡ್ ಉರ್ಬಾಲ್. ತೊ ಕಲ್ಕುಡಾಕ್ ಕೋಲ ಬಾಂದಿತ್ ಜಾಲ್ಯಾರ್ ತಾಚ್ಯಾ ಕೋಲಾಚೊ ನಾಚ್ ಆನಿ ದಿಂವ್ಚ್ಯೊ ಆರಾಬಾಯೊ ಆನಿ ದಿಂವ್ಚಿ ನುಡಿ ಆಯ್ಕಾತೆಲ್ಯಾಕ್ ಆನಿ ಪಳೆತೆಲ್ಯಾಂಕ್ ಕಾವ್ಜೆಣಿ ಉಟಯ್ತಾಲಿ. ತಾಚೆಂ ಉತಾರ್ ಸತ್ ಜಾತಾ ಮ್ಹಳ್ಳೆಂ ಚಿಂತಾಪ್ ಲೊಕಾ ಮಧೆಂ ಘಾಜ್ತಾಲೆಂ. ಚಡಾವತ್ ತಾಕಾಚ್ಚ್ ಕೋಲಾಕ್ ಲೆಪ್ಪು ದಿತಾಲೆ. ವೀಳ್ಯ ದೀವ್ನ್ ವೆತಾನಾ ಸಕ್ಕಡೀ ಜಾಯ್ತ್ ಮ್ಹಣೊಂಕ್ ತಾಕಾ ಸಾಧ್ಯ್ ನಾತ್ಲ್ಲೆಂ. ಕಾರಾಣ್ ತಾಂಚ್ಯಾಂತ್ ಏಕ್ ನಿಯಮ್ ಆಸ್ಲೆಂ. ವಾರೀಸ್ ಹಕ್ಕಾಂತ್ ವಚೊಂಕ್ ಆಸ್ಚ್ಯಾಂ ಲಾಗಿಂ ಮಾತ್ರ್ ವಚ್ಯೆತ್. ಪುಣ್.... ಲೋಕ್ ಲೊಕಾಕ್ ನಾಕಾ ಜಾಲ್ಯಾರ್ ತಾಣಿಂ ಕೆಕಾಚ್ಯಾಂಕ್ ಫಾರಿಕ್ ಕರ್ಚೆಂ ಕರ್ನ್ ಉಪ್ರಾಂತ್ ಹಾಕಾ ಆಪವ್ನ್ ವರ್ಯೆತ್.
ಮೊಸ್ರಾಕ್ ವಕಾತ್ ನಾ. ಆಣ್ಣಿ ಗೀದ್ರಾವತ್ ಭುತಾಕ್ ಅಣಿ ಬಾಂದಿತ್ ಜಾಲ್ಯಾರ್ ಘೊಣಿಬರಿಚ್ ಉಭ್ತಾಲೊ. ಗುಳಿಗಾಕ್ ಬಾಂದುನ್ ಜಿವೆಂ ಕುಂಕಾಡ್ ತಾಣೆಂ ಚಾಬೊನ್ ಖಾತಾನಾ ಪಳೆತೆಲಿಂ ನೀಟ್ ಜಾತಾಲಿ. ತಾಣೆಂ ದಿಂವ್ಚೆಂ ತೀರ್ಪ್ ಸತ್ ಜಾತಾತ್ ಮ್ಹಳ್ಳೆಂ ಚಿಂತಾಪ್, ಲೊಕಾಚ್ಯಾ ತಕ್ಲೆಂತ್ ರಿಗ್ಲ್ಲೆಂ. ದೆಕುನ್ ಪಯ್ಶೆ ಖರ್ಚುನ್ ತರೀ ಪಾತ್ಯೆಲ್ಲ್ಯಾ ಭುತಾಕ್ ಸಂತುಶ್ಟ್ ಕರ್ತಾಲೆ.
ಅಣ್ಣಿ ಆನಿ ತಾಚಿ ಬಾಯ್ಲ್ ಖಂಯ್ಚಾಕೀ ಕಾನ್ ದೀನಾತ್ಲಿ. ಸಗ್ಳೆಂ ವರ್ಸ್ ಭರ್ ಭುತಾಚೆಂ ನೇಮ, ಭಾರ್ಣೆ, ಕೋಲ, ಅಗೆಲ್ ನಾತ್ಲ್ಲೆ. ಮಕರ ಉಪ್ರಾಂತ್ ದೈವಚೆಂ ಕಾಮ್ ತರ್ ಪಾವ್ಸಾಳ್ ಯೆತಾನಾ ತಾಚ್ಯಾ ಪೊಟಾಚಿ ವ್ಯಾಪ್ತ್ ದುಸ್ರಿಚ್. ಆಣ್ಣಿ ಭುತಾಕ್ ಕೋಲ ಭಾಂದ್ತಾನಾ, ದೂಮಿ ಹಾತಾಂತ್ ತೆಂಬರೆ ಘೆವ್ನ್ ಪಾರ್ದನ ಸಾಂಗ್ತಾಲೆಂ. ತಾಚೆಂ ಪಾರ್ದನ ಆಯ್ಕಾಲ್ಲ್ಯಾಂಚೆ ಕಾನ್ ನೀಟ್ ಜಾತಾಲೆ. ಲೊಕಾಂಚಿ ಮನಾ ಪಿಸ್ವೊಂಚಿ ವಿಶೇಸ್ ಸಕತ್ ತಾಚ್ಯಾ ತಾಳ್ಯಾಕ್ ಆಸ್ಲ್ಲಿ.
ಜಾತಿಚಿ ವ್ಯಾಪ್ತ್ ನಾತ್ಲ್ಲ್ಯಾ ವೆಳಾರ್ ಭೊಣ್ಕಿಚೆ ಸೊದ್ನೆಕ್ ವೆತಾಲಿಂ. ಖಂಯ್ಚಾ ಬೊಲ್ಯಾಂನಿ ಆಸ್ಲ್ಲಿ ಕಾಂಟಿ ತರೀ ಕಾಡುನ್ ವೊತಾಕ್ ಸುಕಯ್ತಾಲಿಂ. ಉಪ್ರಾಂತ್ ಕಾಂಟೆ ಕಾಡುನ್ ತಿಂ ಪಾನಾಂ ಕೊವ್ಳೆ ಕರುನ್ ದವರ್ತಾಲಿಂ. ಸಾತ್ ವತಾಕ್ ಸಾತ್ ಧೊವಾಕ್ ಸುಕ್ಲ್ಲ್ಯೊ ಚುಡೆತ್ಯೊ ಕಾಂಟೆ ಕಾಡುನ್ ಕೊವ್ಳೆ ಕೆಲ್ಲೆಂ ಪಳಂವ್ಕೀ ಸೊಭಿತ್ತ್. ಭಾಯ್ರ್ ಪಾವ್ಸ್ ವೊತ್ಲ್ಯಾರೀ ಭಿತರ್ ಮಾಂದ್ರೆಚೆಂ ವೊಳಾಪ್ ಜಾತಾಲೆಂ.
ರೆವ್ಡಾವ್ನ್ ದವರ್ಲ್ಲಿಂ ನಿವ್ಣಿಂ ಭಾಯ್ರ್ ಯೆತಾನಾ ದೊಗಾಂಚೆ ತಾಳೆ ಪಾರ್ದಾನಾಚ್ಯಾ ಸಂಗೀತಾಂತ್ ಖೆಳ್ತಾಲೆ. "ಹೋ ಡೆನ್ನನ್ನ.... ಡೆನ್ನಾನ್ನ.... ಹೋ.... ಹೋ..." ಮ್ಹಳ್ಳೊ ಆವಾಜ್ ವಾರ್ಯಾ ಪಾವ್ಸಾಂತೀ ಪಯ್ಸ್ ಪರ್ಯಾಂತ್ ಘಾಜ್ತಾಲೊ. ಹೆಂ ಆಯ್ಕಾತಾನಾ ತಾಚೆರ್ ಉಜೊ ವೊಂಕ್ತೆಲ್ಯಾಂಕ್ ಆನಿಕೀ ಖರಾಯ್ ಉಟ್ತಾಲಿ.
ಸಾಂತಾಂಕೀ ಮಾಂದ್ರ್ಯಾಚ್ಯೊ ಕೊವ್ಳ್ಯೊ ಮಾತ್ಯಾರ್ ದವರ್ನ್ ಅಣ್ಣಿ ವೆತಾನಾ ತಾಚ್ಯಾ ಪಾಟ್ಲ್ಯಾನ್ ದೂಮಿ ತಕ್ಕಣ್ಚ್ಯೊ ಕೊವ್ಳ್ಯೊ ಕಾಕಿಯೆಕ್ ಘೆವ್ನ್ ಯೆತಾಲೆಂ. ವ್ಹಾನಾಂ ಭುರ್ಗ್ಯಾಂಕೀ ನಿದೊಂಕ್ ಅಣ್ಣಿನ್ ತಯಾರ್ ಕೆಲ್ಲೆಂ ತಕ್ಕಣ್ಚ್ಚ್ ಭಲಾಯ್ಕೆಚೆಂ ಹಾತೆರ್. ಭುರ್ಗೆಂ ಪೊಟಾಂತ್ ಆಸ್ತಾನಾಚ್-ಅಣ್ಣಿ ಎನ್ನ ಪುಲ್ಲಿಗೊಂಜಿ ತಕ್ಕಣ್ ಮುಡೆ. ಮರ್ಮಲ್ ಇನಿ ಎಲ್ಲೆ ಉಲ್ಲಲ್. ಪಯ್ಲೆಂಚ್ ಸಾಂಗೊನ್ ದವರ್ತಾಲಿಂ. ತವಳ್ ಅಣ್ಣಿಚೆ ದಾಂತ್ ದಿಸ್ತಾನಾ ಹಾತಾಂತ್ ಆಸ್ಚ್ಯಾ ಭಕ್ತಿಕಾಂನಿ ಘಾಲ್ಲ್ಯಾ ಭಾಂಗಾರಾಚಿ ವಾಟ್ಲಿ ಪರ್ಜಳ್ತಾಲಿ.
"ಕೊಣಾಕ್ ಕರ್ಚೆಂ? ಪೊಟಾಂತ್ ಎಕೀ ಕಿರ್ಲೊಂಕ್ ನಾಂತ್ಮೂ" ಥೊಡಿಂ ಕುಲ್ಪಾಂ ಕಾಡುನ್ ಮುಕಾರ್ ಮುಕಾರ್ ಸಾಂಗ್ತಾನಾ ದೂಮಿ ಮನಾಂತ್ಚ್ ರಡ್ತಾಲೆಂ.
"ಹಾವೆಂ ಕಿತೆಂ ಪಾಪ್ ಕೆಲಾಂ? ಸಗ್ಳಿಂ ಗೊಡ್ಡು ಮುರಡೆ ಮ್ಹಣ್ ಧಣ್ಸಿತಾತ್. ಮ್ಹಜ್ಯಾ ವಯ್ಲೆಂ ಹೆಂ ಖತ್ ಕಶೆಂ ವಚಾತ್?"
ದೂಮಿ, ಅಣ್ಣಿ ಲಾಗಿಂ ಸಾಂಗೊನ್ ರಡ್ತಾನಾ ತೊ ತಾಕಾ ಆಪ್ಲ್ಯಾ ಭಳಿಶ್ಟ್ ಹಾತಾಂನಿ ಧಯ್ರ್ ದಿತಾಲೊ.
ಸಪಾಣ್ ನೀಜ್ ಜಾಲೆಂ. ದೂಮಿಚೆಂ ಮಾಗ್ಣೆಂ ಪಾವ್ಲೆಂ. ಅಣ್ಣಿ ಸಂತೊಸಾನ್ ನಾಚ್ಲೊ. ಆಪ್ಲೆಂ ಭುತಾಂಚಿ ಸೆವಾ ಕರ್ತಾನಾ ಘಾಲ್ಚ್ಯಾ ಗಗ್ಗರಾಕ್ ಪರತ್ ಪರತ್ ನಮಸ್ಕಾರ್ ಕರುಂಕ್ ಲಾಗ್ಲೊ. ಭುತಾಚ್ಯಾ ಫಾತ್ರಾಕ್ ಆನಿ ಪಾಪೆಕ್ ಆಡ್ ಪಡ್ಲೊ. ಆಸ್ಲ್ಲೊ ಅಪವಾದ್ ಮಾಜ್ವಾಲೊ ಮ್ಹಣ್ ಖುಶ್ ಜಾಲೊ. ಭುತಾಚಾ ಮುಕ್ಲಿ ಕಾಂಪಿಣ್ ವಾಜ್ಲಿ. ಫಾತ್ರಾಕ್ ಫುಲಾಂನಿ ಸೊಭಯ್ಲೆಂ.
ದೀಸ್ ಭರ್ಲೆ. ದೂಮಿನ್ ಏಕ್ ಪುಡ್ಪುಡೀತ್ ಭುರ್ಗ್ಯಾಕ್ ಜಲ್ಮ್ ದಿಲೊ. ಚಲಿ ಜಾಲ್ಯಾರ್ ಕಿತೆಂ? ಹೆಂ ಮ್ಹಜೆಂ ಮಾಣಿಕ್ ಮ್ಹಣ್ತಾಲೊ. ಘರಾ ಆಸ್ತಾನಾ ಅಣ್ಣಿ ಧುವೆಕ್ ಏಕ್ ಘಡಿ ಸಕ್ಲಾ ದವರಿನಾತ್ಲೊ.. ಆತಾಂ ತಾಕಾ ಅಂಕ, ಆಯನ, ಕೋಲ ನಾಕಾತ್. ಧುವೆಕ್ ಘೆವ್ನ್ ದೂಮಿಕ್ ಯೇಂವ್ಕ್ ಜಾಯ್ನಾ. ದೆಕುನ್ ತಾಚ್ಯಾ ಕಾಮಾಂತ್ ಪಾಟಿಂಬೊ ದಿತೆಲೆಂ ನಾ. ತಾಚ್ಯಾಕೀ ತಾಕಾ ದೂಮಿಚೆಂ ಪಾರ್ದನ ನಾಸ್ತಾನಾ ನಾಚೊಂಕ್ ಉಮೆದೀ ನಾ. ತರೀ ಪೊಟಾಚಿ ವ್ಯಾಪ್ತ್, ಜಾತಿಚೊ ಕಸಬ್ ಸೊಡುಂಕ್ ಜಾತಾಗೀ?
ದೀಸ್, ಮಯ್ನೆ, ವರ್ಸಾಂ ಸಂಪ್ತಾನಾ ಅಣ್ಣಿಚೊ ಸಂತೊಸ್ ನಿಂವೊನ್ ಆಯ್ಲೊ. ಲ್ಹಾನ್ ಆಸ್ತಾನಾ ಪದ್ದಿನ್ ಕರ್ಚೆಂ ಸಗ್ಳೆಂ ಬರೆಂ ದಿಸ್ಚ್ಯಾ ತಾಕಾ ಸವ್ಕಾಸ್ ಸಮ್ಜಾಲೆಂ. ಕಿತೆಂಗೀ ಆಯ್ಬ್ ಆಸಾ. ಪಾಂಚ್, ನೋವ್ ವರ್ಸಾಂಚೆಂ ಅಜೂನ್ ಸಾರ್ಕೆಂ ಉಲಯ್ನಾ. ತಾಚೆಂ ನಡ್ತೆಂ, ಚಿಂತಾಪ್, ಸಾರ್ಕೆಂ ನಾ. ಆಮ್ಚಿ ಧುವ್ ಹೆರಾಂ ಭುರ್ಗ್ಯಾಂಬರಿ ನಾ ಮ್ಹಳ್ಳೆಂ ಕಳ್ತಾನಾ ದೊಗಾಂಯ್ ಪುಟ್ಚ್ಯಾ ತಶೆಂ ರಡ್ಲಿಂ. ಪರತ್ ಆಂಗೊಣೆಂ, ಸಾಂಗೊಣೆಂ ಜಾಲೆಂ. ಪುಣ್ ಪದ್ದಿ ಥಂಯ್ ಎಕಾ ತಿಳಾ ತಿತ್ಲೆಂಯ್ ಬದ್ಲಾವಣ್ ಜಾಂವ್ಕ್ ನಾ. ಭಿಜುಡ್ ಮನ್ಜಾತಿಬರಿ ಘಾಲ್ಚಿಂ ಉಡ್ಕಾಣಾಂ, ಅನಿಕೀ ಚಡ್ ಜಾಲಿಂ. ದೊಗಾಂನಿ ತಾಣಿಂ ಪಾತ್ಯೆಲ್ಯಾ ದೆವಾಲಾಗಿಂ ವಿಚಾರ್ಲೆಂ. "ಹೆಂಚ್ಗೀ ತುವೆಂ ಆಮ್ಚ್ಯಾ ಸೆವೆಕ್ ದಿಂವ್ಚೆಂ ಇನಾಮ್?"
ಘೊಡೆಂ ಘಾಲ್ತಾಲೆಂ ಪದ್ದಿ, ಪುಣ್ ಆಂಗ್ ಮಾತ್ಯಾಚೆಂ ತಾಕಾ ಪಡೊನ್ ವಚೊಂಕ್ ನಾ. ದುಕ್ರಾಬರಿ ಲೊಳ್ತಾಲೆಂ. ಪ್ರಾಯೆಕ್ ಪಾವೊಂಕ್ ಆಯ್ತೆಂ ಜಾಲ್ಯಾ ತಾಕಾ ಅನಿಕೀ ಆವಯ್ನ್ಚ್ ನ್ಹಾಣಯ್ಜೆ. ನಿತಳಾಯ್ ಕರಿಜೆ. ನಾ ಜಾಲ್ಯಾರ್ ತಶೆಂಚ್ ತೊಂಡಾಂತ್ ಏಕ್ ದಾವ್ಯಾ ಹಾತಾಚೆಂ ಬೋಟ್ ಘಾಲುನ್ ಚಿಂವ್ತೆ ಬಸ್ತಾಲೆಂ. ವಾಡ್ತಾ ವಾಡ್ತಾನಾ ತಾಚ್ಯಾ ತೊಂಡಾರ್ ಆಯ್ಬ್ ಏಕ್ ಉಟೊನ್ ದಿಸ್ಲೆಂ.
ತಾಚ್ಯಾ ಥಂಯ್ ಬೂದ್ ಬಸೊಂಕ್ ನಾ ತರೀ ಸ್ತ್ರೀಪಣ್ ರುತಾ ಜಾಂವ್ಕ್ ಯೆತಾನಾ ದೂಮಿಚಿ ಭಿರಾಂತ್ ವಾಡ್ಲಿ. "ಸ್ವಾಮಿ ಬಬ್ಬೂ ಎನ್ನ ಬಾಲೆನ್ ಇಂಚೆನೇ ಬುಡು. ಪೊಣ್ಣು ಪೋದು ಪೊಣ್ಜೋವ್ ಮಲ್ಪಡ" ಮ್ಹಣ್ ಮಾಗೊಂಕ್ ಲಾಗ್ಲೆಂ. ಕೊಣಾಕ್ ಕೋಣ್ ರಾಕ್ತಾ? ದೀಸ್ ಉದೆಲೊ ದೂಮಿನ್ ಭಿಯೆಲ್ಲೊ ದೀಸ್ ಯೆತಾನಾ....
ಗುಡ್ಯಾರ್ ಬೆಣ್ಸಾಂ ಕಾಡುಂಕ್ ಗೆಲ್ಲೆಂ ಪದ್ದಿ ಬೆಣ್ಸಾಂಚಾ ಖತಾಂ ಸವೆಂ ಬಾಯ್ಲ್ಪಣಾಚಿಂ ಖತಾಂಯ್ ಆಂಗ್ಭರ್ ಕರುನ್ ಖಂಯ್ಚಾಯೀ ಸಂಗ್ತಿಚಿ ಖಬಾರ್ ನಾಸ್ತಾನಾ ಸೆಜಾರ್ಚ್ಯಾ ಚೆಡ್ಯಾಂಲಾಗಿಂ ಝಗ್ಡಾತಾನಾ ದೂಮಿನ್ ತಾಕಾ ವೋಡ್ನ್ ಭಿತರ್ ಹಾಡ್ಲೆಂ.
ಧುವೆಕ್ ದೂಮಿ ಆನಿ ಅಣ್ಣಿ ಸಮ್ಜೊಂಕ್ ಲಾಗ್ಲಿಂ. ಆನಿ ಮುಕಾರ್ ಅಶೆಂ ಕರುಂಕ್ ನ್ಹಜೊ ಮ್ಹಣೊನ್ ಸಾಂಗ್ತಾನಾ ತೆಂ ವ್ಹಡ್ಲ್ಯಾನ್ ಹಾಸ್ಲೆಂ. ಉಪ್ರಾಂತ್ ರಡ್ಲೆಂ. ದೊಗಾಂಯ್ ಭಿತರ್ಲ್ಯಾ ಭಿತರ್ ಕರ್ಗಾಲಿಂ. ಉಲಯ್ತೆಲ್ಯಾಂಕ್ ಭಾಜ್ಲ್ಲೆಂ ಮೆಳ್ಳೆಂ. ದೈವಚೆಂ ನಾಗಯ್ಲೆಂ. ದೆಕುನ್ ಆಸಲೆಂ ಅಂಡೆಪಿರ್ಕಿ ಜಲ್ಮಾಲಾಂ. ಮೀಟ್ ಘಾಲುನ್ ಕೋಲಾ ವೊಡುಂದಿತ್. ಕೆಲ್ಲೆಂ ಕರ್ಮ್ ಚುಕ್ತಾಗೀ? ಆಮ್ಚ್ಯಾ ಪೊಟಾಕ್ ಪಾಂಯ್ ದಿಲ್ಲೊ. ಆತಾಂ.... ಧರ್ಣಿಕ್ ಮಾರುಂಕ್ ನಾಂಗೀ?
ಸಾಕಾಳಿಂ ಉಟ್ತಾನಾ ಗುಡ್ಯಾ ವಯ್ಲ್ಯಾ ಮಾತ್ಯೆ ರಸ್ತ್ಯಾರ್ ಕಾರಾಂ, ಜಿಪಾಂ, ಉಟ್ಲ್ಲಿ ಧುಳ್ ಪರ್ಕತ್ತಿ ಪಾಜೆಂತೀ ದಿಸ್ಲಿ. ಪಾಜೆಂತ್ಲಿ ವಯ್ರ್ ರಸ್ತ್ಯಾರ್ ಧಾಂವ್ಲಿ. ಕೋಣ್ಗೀ ಕಿತೆಂಗೀ ಸಾಂಗ್ತಾಲೊ. ಕಿತೆಂಗೀ ವಿಚಾರ್ತಾಲೊ. ಉಲಯಿಲ್ಲೆಂ ಸಮ್ಜಾನಾ. ಕಾಣಿಯೊ ಮಾತ್ರ್ ಮಸ್ತ್ ಆಯ್ಕಾಲ್ಯೊ. ಎದೊಳ್ ಹೆಂ ರಾನ್ ಪರ್ಕತ್ತಿ ಪಾಜೆಯಿಚ್ಯಾ ಲೊಕಾಚೆಂ. ಆತಾಂ ಕೋಣ್ ಮ್ಹಣ್ತಾ ಹೊ ಗುಡೊ, ಹೊ ಜಾಗೊ ಅಪ್ಪಣ್ಣ ಹೆಗ್ಡೆಚೊ. ತಾಣೆ ತೊ ಏಕ್ ವ್ಹಡ್ ಕಂಪೆನಿಕ್ ವಿಕ್ಲಾ. ದೆಕುನ್ ತೆಂ ರಾನ್ ಕಾತ್ರುನ್ ಕಾರ್ಕಾಣೊ ಕರ್ತಾತ್.
ಆಯ್ಕೊನ್ ಆಣ್ಣಿಕ್ ತೊಣ್ಕ್ಯಾನಿ ಬಡಯಿಲ್ಲ್ಯಾಬರಿ ಜಾಲೆಂ. ರಾನಾಂತ್ ತಾಚೊ ದೇವ್ ಆಸ್ಲೊ. ರಾನಾಂತ್ ತಾಚಿ ದಿಸಾಚಿ ಪೋಡ್ ಆಸ್ಲಿ.. ಹೆಂ ರಾನ್, ಹೊ ಗುಡೊ ಆನಿ ಖದಾಪ್ ನಾ ಮ್ಹಣ್ ಚಿಂತುಂಕೀ ತಾಕಾ ನಾಕಾ.
ಹ್ಯಾ ವರ್ಸಾ ಮಸ್ತ್ ಜಾಂಬ್ಳಾಂ, ಪದ್ದಿ ಆಪ್ಲ್ಯಾ ಗಾಗ್ರ್ಯಾಂತ್ ಪೊಸೊಭರ್ ಜಾಂಬ್ಳಾಂ ಗೆವ್ನ್ ಗಾಗ್ರೊ ಉಕ್ಲುನ್ ಯೆತಾನಾ ಹೆಂ ಪಳಯಿಲ್ಲ್ಯಾ ಸೆಜಾರ್ಚ್ಯಾಂನಿ ತಾಳಿಯೊ ಪೆಟುನ್ ಹಾಸ್ತಾನಾ ದೂಮಿಚೊ ರಾಗ್ ಮಸ್ತಕಾಕ್ ಚಡ್ಲೊ. ಥಂಯ್ಚ್ ಆಸ್ಲ್ಲೆಂ ಬಯ್ತಾಡ್ ಕಾಡುನ್ ಧುವೆಕ್ ಮಾರ್ತಾನಾ ಪದ್ದಿಚ್ಯಾ ಹಾತಾಂತ್ಲೊ ಗಾಗ್ರೊ ಸುಟ್ಲೊ ಆನಿ ತಾಣೆಂ ಕಶ್ಟಾಂನಿ ಎಕ್ಟಾಂಯ್ ಕೆಲ್ಲೆಂ ತಾಚೆಂ ದಾಯ್ಜ್ ಧುಳಿಂತ್ ಪಡ್ಲೆಂ. ಪದ್ದಿ ಬೊಬಾಟ್ತಾನಾ ಆವಯ್ಚೊ ರಾಗ್ ಆನಿಕೀ ಚಡ್ಲೊ. ತಾಣೆಂ ರಾಗಾನ್ ತೆಂ ಆಪ್ಲ್ಯಾ ಪಾಂಯಾನ್ ಮಸ್ತುನ್ ಸೊಡ್ತಾನಾ... ಅಣ್ಣಿಕ್ ಹೆಂ ಪಳಂವ್ಕ್ ಜಾಂವ್ಕ್ ನಾ.
"ಮರ್ಲಾಯಾ ನಿಕ್ಕ್?" ಬಾಯ್ಲೆಕ್ ಧೆಂಕ್ಣೊ ಘಾಲ್ನ್ ಭಿತರ್ ವೋಡ್ನ್ ಗೆಲೊ. ಪದ್ದಿ ನಾಕಾಂತ್ ಕಿರ್ಮೆಂ, ತೊಂಡಾಂತ್ ಲಾಳ್, ದೊಳ್ಯಾಂತ್ ದುಕಾಂ ಗಳವ್ನ್ ಮಾತ್ಯೆಂತ್ ಪಡ್ಲ್ಲಿಂ ಜಾಂಬ್ಳಾಂ ಪರತ್ ಆಪ್ಲ್ಯಾ ಗಾಗ್ರ್ಯಾಂತ್ ಘಾಲ್ತಾನಾ ದೂಮಿ ಹುಸ್ಕಾರ್ಲೆಂ.
********
ರಾತ್ ಆನಿ ದೀಸ್ ಕಾಮ್. ಬೊಟಾಂನಿ ಮೆಜ್ಚ್ಯಾ ದಿಸಾಂನಿ ರಾನ್ ಖಾಲಿ. ಹೆಂ ಪಳಯಿಲ್ಲೆಂ ಪದ್ದಿ ಬೊಬಾಟ್ಲೆಂ. ಮ್ಹಜೆ ರೂಕ್, ಮ್ಹಜೆಂ ರಾನ್, ಮ್ಹಜಿಂ ಬೆಣ್ಸಾಂ, ಮ್ಹಜಿಂ ಸುಕ್ಣಿಂ ಅಪ್ಪಾ... ತಾಂಕಾಂ ನಾಕಾ ಮ್ಹಣ್ ಸಾಂಗ್. ಮ್ಹಾಕಾ... ರಾನ್ ಜಾಯ್.... ರೂಕ್ ಜಾಯ್. ರಡ್ಲೆಂ ಆನಿ ಹುಸ್ಕಾರ್ಲೆಂ. ಅಣ್ಣಿನ್ ಬಾಯ್ಲೆಲಾಗಿಂ.... "ಪಳೆ ಆಮ್ಚ್ಯಾ ಪದ್ದಿಕ್ ಕೋಣ್ ಬೂದ್ ನಾ ಮ್ಹಣ್ತಾ? ತಾಕಾ ಆಸ್ಲ್ಲಿ ಬೂದ್ ಉಲ್ಲಾಯಾಕ್ ಆಸ್ಲ್ಲಿ ಜಾಲ್ಯಾರ್....?" ಹ್ಯಾ ಸಮಾಜೆನ್ ನಾ ಕೆಲ್ಲ್ಯಾ ಚಲಿಯೆಚೆಂ ರುದಾನ್ ಕೊಣಾಕ್ ಆಯ್ಕಾತ್?
ಪಯ್ಲೆಂ ಘರಾಚ್ಚ್ ಸೊಡುನ್ ದೊಗಾಂಯ್ ಕಾಮಾಕ್ ವೆತಾಲಿಂ. ರಾನಾಂತ್ ರುಕಾ ಝಡಾಂ ಮಧೆಂ ತೆಂ ಆಸ್ತಾಲೆಂ. ಪುಂ... ಆತಾಂ... ಸರ್ವ್ ಬದ್ಲಾಲಾಂ. ಉದೆಲ್ಲೊ ದೇವ್ ಪೆಲ್ಯಾಚಿಂ ಆಪ್ಲಿಂ ಕಿರ್ಣಾಂಚ್ ತಾಂಚ್ಯಾ ಘರಾಂತ್ ಘಾಲ್ತಾ. ಪದ್ದಿಕ್ ಸೊಡ್ನ್ ವಚೊಂಕೀ ನ್ಹಯ್. ಆಪವ್ನ್ ವರುಂಕೀ ನ್ಹಯ್. ಆಪವ್ನ್ ವೆಲ್ಯಾರ್ ತಾಂಕಾ ಕಾಮ್ ಕರುಂಕ್ ದೀನಾತ್ಲೆಂ. ದೆಕುನ್ ತಾಣಿಂ ಏಕ್ ಸೊಂಪಿ ವಾಟ್ ಸೊದ್ಲಿ. ಪದ್ದಿಕ್ ಪೆಂಕ್ಟಾಕ್ ದೊರಿ ಘಾಲ್ನ್ ಬಾಂದುನ್ ತಿಂ ಭಾಯ್ರ್ ವೆತಾಲಿಂ. ದೊರಿ ಸುಟಂವ್ಚಿ ಭುದ್ವಂತ್ಕಾಯ್ ತಾಚೆ ಕಡೆ ನಾತ್ಲ್ಲಿ.
ಪುಣ್ ಎಕಾ ದಿಸಾ ತಿಂ ದೊಗಾಂಯ್ ಹೆಂ ವಿಸ್ರೊನ್ ಕಾಮಾಕ್ ಗೆಲಿಂ. ಪದ್ದಿ ಧಾಂವ್ಲೆಂ ಆಪ್ಲ್ಯಾ ರಾನಾ ಥಂಯ್. ತಾಚೆಂ ರಾನ್, ರೂಕ್, ಸಗ್ಳೆಂ ಮಾಯಾಗ್. ವ್ಹಡ್ ವ್ಹಡ್ ದಾಂತಾಂಚೆ ರಾಕ್ಕೊಸ್ ಆಪ್ಲ್ಯಾ ವ್ಹಡಾ ಭೊಟಾಂನಿ ಗುಡೊ ಭೊಕೊರ್ನ್ ಕಾಡ್ತಾನಾ ಪದ್ದಿ ಭಿಯೆಲೆಂ. "ರಕ್ಕಸೆ..... ರಕ್ಕಸೆ....’ ಮ್ಹಣೊನ್ ಬೊಬಾಟುನ್ ಘರಾ ಪಾಟಿಂ ಧಾಂವೊನ್ ಯೆತಾನಾ ಸೆಜಾರ್ಚಿಂ ಭುರ್ಗಿಂ "ಪದ್ದಿ-ಪೆದ್ದಿ, ಪದ್ದಿ ಮರ್ತಿ" ಮ್ಹಣೊನ್ ತಾಚ್ಯಾ ಭೊಂವಾರಿ ನಾಚ್ತಾನಾ, "ನಿನ್ನಮ್ಮೆ..." ಮ್ಹಣೊನ್ ಘರಾ ಧಾಂವ್ಲೆಂ.
ದುಸ್ರ್ಯಾ ದಿಸಾ ಥಾವ್ನ್ "ಅಪ್ಪಾ ಎನನ್ ಕಟ್ಟ್ ಪಾಡ್..." ತೆಂಚ್ ಸಾಂಗ್ತಾನಾ ದೊಗಾಂಯ್ ಎಕಾಮೆಕಾ ಪಳಂವ್ಕ್ ಪಡ್ಲಿಂ. ರೂಕ್, ಮಾತ್ತಿ ಸಗ್ಳಿ ಮುಗ್ದಾಲಿ. ಪುಣ್.... ಖಡಾಪ್ ಏಕ್ ಸಾಕ್ಸ್ ಜಾವ್ನ್ ಉರ್ಲೆಂ.
ಎಕಾ ರಾತಿಂ ಪರ್ಕತ್ತಿ ಪಾಜೆಯೆಚಿ ಭುಂಯ್ ಕಾಂಪ್ಲಿ. ಘಡ್ಗಡೊ ಮಾರ್ಲೊ. ಕೊಣೀ ನೆಣಾಂತ್ ಕಿತೆಂ ಜಾಲೆಂ. ವ್ಹಡ್ ವ್ಹಡ್ ಫಾತೊರ್ ಪಡ್ಲ್ಲೊ ಆವಾಜ್. ಭಾಯ್ರ್ ವಚೊಂಕ್ ಕೊಣಾಕೀ ಧಯ್ರ್ ನಾ. ಆಸ್ಲ್ಲಿಂ ಪಿಂಜ್ಕರ್ ವೋಲ್, ಮಾತ್ಯಾಂಗೊಳ್ ಘಾಲುನ್ ಎಕಾಮೆಕಾ ಆರಾವ್ನ್ ನಿದ್ಲಿಂ. ಸಗ್ಳ್ಯಾಂನಿ ಚಿಂತ್ಲೆಂ ಸಂಸಾರ್ ಅಕೇರ್ ಜಾಲೊ. ಆಮ್ಚೆ ದೀಸ್ ಮುಗ್ದಾಲೆ. ಸರ್ವ್ ದೆವಾಂಕೀ ಮತಿಚ್ಯಾ ಖಣಾಂತ್ ಪರತ್ ಸ್ಥಾಪಿತ್ ಕೆಲೆಂ.
ಫಾಲೆಂ ಜಾಲೆಂ. ಭಾಯ್ರ್ ಯೇವ್ನ್ ಪಳೆತಾನಾ, ಅಕೇರಿಚಿ ನಿಶಾನೀಯ್ ಮಾಜ್ವಾಲ್ಲಿ. ಅಣ್ಣಿನ್ ಬಾಯ್ಲೆಕ್ ಆಪಯ್ಲೆಂ. "ಸರ್ವ್ ಸಂಪದ್ಲೆಂ." ತಾಂಚ್ಯಾ ಪಾಟ್ಲ್ಯಾನ್ ದೊಳೆ ಘಸ್ಟಿತ್ತ್ ಆಯಿಲ್ಲೆಂ ಪದ್ದಿ "ಅಮ್ಮಾ... ಪಾದೆನ್ಲಾ ಕಂಡೊಂದ್ ಪೋಯೆರಾ?" ಬೊಬಾಟುನ್ ನಾಚ್ತಾನಾ ಅಣ್ಣಿಚ್ಯಾ ದೊಳ್ಯಾಂತ್ ದುಕಾಂ ಫುಟ್ಲಿಂ. ತಾಚೊ ದೇವ್ ತ್ಯಾ ಖಡ್ಪಾ ಕುಶಿಂತ್ ಆಸ್ಲ್ಲೊ ಆತಾಂ ನಾ ಜಾಲ್ಲೊ.
*********
ಪದ್ದಿಕ್ ಪೆಂಕ್ಡಾಕ್ ದೊರಿ ಸದಾಂಚಿ ಜಾಲಿ. ತೆಂ ಆತಾಂ ಅನಿಕೀ ಮೊನೆಂ ಜಾಲೆಂ. ಎಕಾ ದಿಸಾ- "ಅಪ್ಪಾ... ಇನಿ ದೇವೆರ್ ಬತ್ತ್ದ್ ಎನನ್ ದಾದ ದಾದನಾ ಮಲ್ತೆರ್!" "ಪೊಣ್ಣಗ್ ದಾದ್ ಮರ್ಲಾ?" ಪಯ್ಲೆಂಚ್ ಧನಿಯಾಚ್ಯಾ ಘರಾ ತಕ್ಲಿ ಹುನ್ ಕರುನ್ ಆಯಿಲ್ಲೆಂ ದೂಮಿ ಧುವೆಕ್ ತೋಂಡ್ ಧಾಂಪುಂಕ್ ಲಾಗ್ಲೆಂ.
ಅಶೆಂಚ್ ತೆಂ ತವಳ್ ತವಳ್ ಸಾಂಗ್ತಾನಾ ಕಾಂಯ್ ತರೀ ಆಸಾಗೀ ಮ್ಹಳ್ಳೊ ದುಬಾವ್ ಉದೆಲೊ ತರೀ ತಾಣೆಂ ಗಣ್ಣೆಂ ಕರುಂಕ್ ನಾ.
ಎಕಾ ದಿಸಾ ದೂಮಿ ಭಲಾಯ್ಕಿ ಬರಿ ನಾ ಮ್ಹಣ್ ಪಾಟಿಂ ಯೆತಾನಾ ತಾಕಾ ಪಯ್ಸ್ ಥಾವ್ನ್ ಭುತಾಚ್ಯಾ ಕೊಲಾಕ್ ಘಾಲ್ಚ್ಯಾ ವಸ್ತುರ್ ನ್ಹೆಸ್ಲ್ಲಿ ಏಕ್ ವ್ಯಕ್ತಿ ಆಪ್ಣಾಗೆರ್ ಥಾವ್ನ್ ಭಾಯ್ರ್ ಯೆಂವ್ಚ್ಯಾಬರಿ ದಿಸ್ಲಿ. ತಾಣೆಂ ಆಪ್ಲಿಂ ಮೆಟಾಂ ವೆಗ್ಗಿಂ ವೆಗ್ಗಿಂ ಕಾಡುನ್ ಲಾಗಿಂ ಯೆತಾನಾ... ತಿ ಖಂಯ್ ಗೆಲಿ ಮ್ಹಳ್ಳೆಂ ಕಳೊಂಕ್ ನಾ. ಘರಾ ಯೆತಾನಾ ಪದ್ದಿ ನಿದ್ಲಾಂ. ತೆಂ ನಿದ್ಲ್ಲಿ ರೀತ್ ಪಳೆತಾನಾ ತಾಚಿಂ ಝಿಂಟಾಂ ಉಡ್ಲಿಂ. ಧುವೆ ಲಾಗಿಂ ಧಾಂವೊನ್ ಆಯ್ಲೆಂ. "ಪದ್ದಿ... ಪದ್ದಿ..." ತೆಂ ಭ್ರಮಿದೆರ್ ಆಸಾ. ತಾಚ್ಯಾ ಆಂಗಾರ್ ಹಾತ್ ಘಾಲುನ್ ಉಟಂವ್ಕ್ ಪಳೆತಾನಾ... "ಆವು ದೇವೆರೆ ಈರ್ ಬಯ್ದಿನ ಏರೆಡಲಾ ಪನ್ಪುಜಿ. ಕೊರ್ತಿನ ಮರ್ದ್ ಪರ್ತೆ. ಬುಡ್ಲೆ."
ಅಸ್ಪಶ್ಟ್ ಉಲಯ್ತಾನಾ.... ದೂಮಿ ಸೆಜಾರಾ ಧಾಂವ್ಲೆಂ. ಭುರ್ಗ್ಯಾಂಲಾಗಿಂ ವಿಚಾರ್ಲೆಂ. "ಕೋಣ್ ಆಯ್ಲೊ?" ಭುರ್ಗ್ಯಾಂನಿ ನಂಜೆನ್ ಸಾಂಗ್ಲೆಂ. "ಜುಮಾದಿ ಬತ್ತ್ದ್ ಇತ್ತೆ.’ ಕಿಸ್ಕ್ ಕರುನ್ ಹಾಸ್ತಾನಾ ದೂಮಿ ಪರತ್ ಘರಾ ಪಾಟಿಂ ಆಯ್ಲೆಂ.
ದೂಮಿಚೊ ದುಬಾವ್ ಖರೊ ಜಾಲೊ. ತೆಂ ಪಿಶ್ಯಾಬರಿ ಜಾಲೆಂ. ಮಾರ್ನ್ ಬಡಯ್ತಾನಾ ಜುಮಾದಿ ಬರೊಂದಿತ್ತೆರ್. ಮರ್ದ್ ಕೊರ್ತಿನ ಬೊಕ್ಕ ಬಯ್ದಿಜೆರ್. ಅಮ್ಮೆ ಕೋಲ ಕಟ್ಟ್ನಗ ಅಂಚೆನೆ ಬರೊಂದಿತೆ. ಆಯೆ ಪಂಡಿನಂಚ ಯಾನ್ ಕೇನುಜಾಂಡ ನಿಕುಲು ಇರ್ವೆರ್ಲಾ ಸೈಪರ್ ಪಂಡ್ದ್ ಪಂಡಿನೆಕ್ಕ್ ಯಾನ್ ಆರ್ ಪಂಡಿನಂಚನೇ ಕೇನೊಂದಿತ್ತೆ!"
"ಅಯ್ಯೋ ಜುಮಾದೆ ನಿನ್ನ ಚಾಕ್ರಿ ಮಲ್ತಿನೆಕ್ಕ್ ಕೊರಿಯನಾ ಕಾಣಿಕೆ?" ಬೊಬಾಟುನ್ ಪಡ್ಲ್ಲೆಂ ದೂಮಿ ಉಟ್ತಾನಾ ಅರ್ದೆಂ ಪಿಶೆಂ ಜಾತಾನಾ, ಅಣ್ಣಿಚಾ ಕಾನಾಂತ್ ರಾತಿಂ ಫುಟ್ಲ್ಲ್ಯಾ ಖಡ್ಪಾಚ್ಯಾಕೀ ವ್ಹಡ್ ಆವಾಜ್ ಜಾತಾನಾ ತಾಚೆ ಕಾನ್ ಕೆಪ್ಪೆ ಜಾಲೆ.
ಆತಾಂ ದೂಮಿ ಕಾಮಾಕ್ ವಚಾನಾ. ತೆಂ ಮೊನೆಂ ಜಾಲಾಂ. ಮಹಿನೆ ಉತ್ರಾತಾನಾ ಜುಮಾದಿನ್ ದಿಲ್ಲೊ ಫಳ್, ಖೆಳ್ಲ್ಲೊ ಖೆಳ್ ಉಗ್ತ್ಯಾ ಮಯ್ದಾನಾರ್ ಪಡ್ಲೊ. ಗಾಂವಾಂತ್ ಘಾಣ್ ಉಟ್ಲಿ. ಜಾತಿಚಿಂ ಪಂಚೆತ್ಕಿ ಅಪಯ್ಲಿ. ಪದ್ದಿ ಕಾಜಾರಾ ಆದಿಂ ಆವಯ್ ಜಾತಾ ದೆಕುನ್ ಅಣ್ಣಿಚ್ಯಾ ಕುಟ್ಮಾಕ್ ತಾಂಚ್ಯಾ ಜಾತಿಂತ್ ಉಜೊ, ಉದಾಕ್ ನಾ, ಪುಟ್ಟು-ಸಾವಿಜ್ಜಿ, ತಾಕಾ ಜಾತಿಂತ್ಲೆಂ ಕಾಡ್ಲೆಂ. ಹೊರ್ತ್ ಕರುನ್ ದವರ್ಲೆಂ. ದೆಕುನ್... ಆನಿ ಮುಕಾರ್ ಅಣ್ಣಿನ್ ಭುತಾಕ್ ಕೋಲ ಬಾಂದುಂಕ್. ಜಾತಿಚ್ಯಾ ಕಟ್ಟ್ ಕಟ್ಲೆ ಪ್ರಕಾರ್ ಅಣ್ಣಿ ಆನಿ ಮುಕಾರ್ ಗಗ್ಗರ ಪಾಂಯಾಂಕ್ ಘಾಲ್ಚೊ ನಾ. ಅನಿ ಜೊಡ್ಚೊ ನಾ. ಅಣ್ಣಿಚೆಂ ಕುಟಾಮ್ ಎಕ್ಸುರೆಂ, ವಿಣ್ಗೆಂ ಜಾಲೆಂ. ಜಾತಿ ಕಾಟ್ಯಾರ್ ಥಾವ್ನ್ ದೆಂವೊನ್ ಆಯಿಲ್ಲೊ ಅಣ್ಣಿ ನಾಕ್ಭರ್ ಪಿಯೆಲೊ ಆನಿ ದೊಳೆ ಭರ್ ರಡ್ಲೊ.
*******
ಸುರು ಜಾಲಿ ಹ್ಯಾ ಕುಟ್ಮಾಚಿ ವೀದ್ ವಾವ್ಳಿ. ಅಣ್ಣಿ ಮನ್ ಯೆತಾನಾ ಕಾಂಯ್ ತರೀ ಕಾಮ್ ಕರ್ತಾಲೊ. ನಾ ತರ್ ಗಗ್ಗರ ಆನಿ ತೆಂಬರೆ ಪೊಟ್ಲುನ್ ಧರುನ್ ರಡ್ತಾಲೊ. ದೂಮಿಚೊ ಸಂಸಾರ್ ವೆಗ್ಳೊ ಜಾಲೊ. ದೀಸ್ ಭರ್ಲೆ. ಖಡಾಪ್ ಫುಟ್ಚ್ಯಾ ಬೊಬೆನ್ ಪದ್ದಿನ್ ಏಕ್ ಮಾಸಾಚೊ ಮುದೊ ಭುಂಯ್ಕ್ ಘಾಲ್ತಾನಾ ಆಸ್ಲ್ಲ್ಯಾ ಬಾಯ್ಲ್ ಮನ್ಶ್ಯಾನ್ ವಿಚಾರ್ಲೆಂ. "ಚೆಡ್ವಾಕ್ ಕಿತೆಂ ದಿಲ್ಲೆಂಯ್? ಪಳೆ... ಕಸಲೆಂ ವಿದ್ರೂಪ್ ಭುರ್ಗೆಂ ಜಲ್ಮಾಲಾಂ!"
"ಹುಂ" ಅಣ್ಣಿ ಹಾಸ್ಲೊ. "ಹಾವೆಂ ನ್ಹಯ್ ಅಮ್ಮಾ. ಭುರ್ಗ್ಯಾಚಾ ದಳ್ದಿರ್ ಬಾಪಾಯ್ನ್ ಕೆಲ್ಲೆಂ ಕರ್ಮ್!"
"ಭುರ್ಗ್ಯಾಕ್ ಪಳೆತಾನಾ ಅಣ್ಣಿಕ್ ರಾಗ್ ಮಸ್ತಾಕಾಕ್ ಚಡ್ತಾಲೊ. ಅಬ್ಬಾ ಇತ್ಲೊ ವಿದ್ರೂಪ್ ಕಸೊ ಜಲ್ಮಾಲೊ? ತೊ ಸದಾಂಯ್ ಮಾಗ್ತಾಲೊ ವೆಗಿಂ ತೊ ಮೊರೊಂದಿ. ಪುಣ್... ದೀಸ್ ವೆತಾಂ ವೆತಾಂ... ಉದ್ಕಾನ್ ಆನಿ ನಿಸಾನ್ ತೊ ವಾಡ್ಲೊ. ಸಾಂಗಾತಾಚ್ ಅಣ್ಣಿಚೊ ರಾಗ್ ಚಡ್ಲೊ.
ತೆಂಬರೆ, ಗಗ್ಗರ, ಖಡ್ಸಲೆ, ಮಣಿ.... ಭುತಾಕ್ ಜಾಯ್ ತೆಂ ವಸ್ತುರ್. ಅಣ್ಣಿ ಸದಾಂಯ್ ತಾಕಾ ಸರ್ವಾಂಕೀ ಉಮೆ ದಿತಾಲೊ ಆನಿ ಮೊಳ್ಬಾಕ್ ಪಳೆತಾಲೊ.
ಎಕಾ ದಿಸಾ ಉಟ್ತಾನಾ... ದೂಮಿ... ದೊಳೆ ಉಗ್ತೆಚ್ ದವರುನ್ ಪಳೆತಾನಾ.... "ಕಿತ್ಯಾಕ್ ಪಳೆತಾಯ್. ನಿದೆ," ಅಣ್ಣಿ ಬಾಯ್ಲೆಚೆಂ ತೋಂಡ್ ಪುಸ್ತಾನಾ ಉಕಾಚ್ಚಾಣೆ ಉಡೊನ್ ಪಡ್ಲೊ. ತಾಚೆಂ ದೂಮಿ ದೊಳೆ ಸೊಡುನ್ ಹ್ಯಾ ಘರ್ಚೊ ವಿಶಯ್ ಘೆಂವ್ಕ್ ಪಯ್ಣಾಕ್ ಲಾಗ್ಲ್ಲೆಂ.
ಭಿತರ್ ಭಾಯ್ರ್ ಧಾಂವ್ಲೊ. ನಿಮಾಣೆ ಹ್ಯಾ ಘಡಿಯೆ ತರೀ ತಾಚಿಂ ಫಾತ್ರಾಚಿಂ ಕಾಳ್ಜಾಂ ಮೊವಾಳ್ತಿತ್ ಮ್ಹಳ್ಳ್ಯಾ ಆಶೆನ್ ಜಾತಿಚ್ಯಾಂಚಾ ಘರಾ ಪಾವ್ಲೊ. ಕೊಣೀ ತಾಕಾ ಆಯ್ಕೊಂಕ್ ನಾಂತ್. ಅಣ್ಣಿನ್ ಅಡ್ದೊಸ್ ಮಾಗ್ತಾನಾ ತೆ ಹಂಕಾರಾನ್ ಉಡ್ಲೆ. "ನಿಕಾಳ್... ಜಾತಿಕ್ ಅಕ್ಮಾನ್ ಕರ್ಚೊ ತುಂ ತೀನ್.... ಕಾಸಾ...." ಅಣ್ಣಿನ್ ತೋಂಡ್ ಉಗ್ತೆಂ ಕರ್ಚ್ಯಾ ಆದಿಂಚ್ "ಧುವೆಕ್ ವಿಕುನ್ ಕೆಲ್ಲೆಂ ನಾಂಗೀ? ಮುಗ್ದಾಲ್ಯಾರ್ ಆತಾಂಯ್ ಕೊಣೀ ಯೇತ್. ವಚೊನ್ ರಸ್ತ್ಯಾರ್ ರಾವಯ್. ಬರೊ ವ್ಯಾರ್ ಜಾಯ್ತ್." ಕಿತೆಂ ಸಾಂಗ್ತಲೊ ಬಾವ್ಡೊ. ಎದೊಳ್ ಎಕೀನ್ಪಣಾರ್ ದೈವ ದೆವಾಚಿಂ ಚಾಕ್ರಿ ಕೆಲ್ಯಾತ್ ಹೊಚ್ಚ್ಗೀ ಮ್ಹಾಕಾ ಸಾಂಬಾಳ್" ಅಣ್ಣಿ ಖಾಂದ್ಯಾ ವಯ್ಲ್ಯಾ ಬೈರಾಸಾಂತ್ ದೊಳೆ ಪುಸಿತ್ತ್ ಘರಾ ಆಯ್ಲೊ.
ಅಣ್ಣಿಕ್ ಅನಿಕೀ ಆಶಾ. ತೊಂಡಾನ್ ಸಾಂಗ್ಲ್ಯಾರೀ ಹ್ಯಾ ವೆಳಾರ್ ಯೇನಾಸ್ತಾನಾ ರಾಂವ್ಚೆ ನಾಂತ್. ದೆಕುನ್ ಭುಂಯ್ಕ್ ಕಾಳೊಕಾಚಿ ಸಾಯ್ ಪಡ್ತಾ ವರೇಗ್ ಥಂಯ್ಚ್ ಬಸ್ಲೊ. ಭಿತರ್ ಯೆತಾನಾ ದೂಮಿಚ್ಯಾ ವಯ್ರ್ ಮುಸಾಂಚಿ ಹಾರಿ, ಪಳೆತಾಂ ಮುಯಾಂಚೊ ವೊರ್. ಹಾವೆಂ ಮುಯಾಂಕ್ ಆನಿ ಮುಸಾಂಕ್ ಆಪಂವ್ಕ್ ನಾ. ತರೀ ಆಯ್ಲ್ಯಾತ್. ತಾಂಕಾಂ ಆಸ್ಲ್ಲಿ ಬೂದ್ ಮ್ಹಜ್ಯಾಂಕೀ ನಾಂಗೀ? ಪಳೆತಾಂ ಧುವೆಕ್. ಆವಯ್ಕ್ ಕಿತೆಂ ಜಾಲಾಂ ಮ್ಹಳ್ಳೆಂಯ್ ತೆಂ ನೆಣಾಂ. ತೆಂ ಮುಸಾಂಕ್ ಮಾರ್ಚ್ಯಾ ಕಾಮಾಂತ್ ಮಗ್ನ್ ಜಾಲಾಂ. ಧುವೆಕ್ ಪಳೆತಾನಾ ತಾಚೊ ರಾಗ್ ಮಸ್ತಕಾಕ್ ಚಡ್ಲೊ. "ಕಿತ್ಯಾಕ್ ಜಲ್ಮಾಲೆಂಯ್? ಕಿತ್ಯಾಕ್ ಮೊರಾನಾಂಯ್?" ಪುರ್ಪುರ್ಲೊ. ಪುಣ್ ತಾಕಾ ಹಾಚಿ ಖಬಾರ್ ನಾ. ತೆಂ ಉಸ್ವಾಸ್ ಸೊಡುಂಕ್ ಕಶ್ಟೊಂಚಾ ಭುರ್ಗ್ಯಾಲಾಗಿಂ ಆಪ್ಣೆ ಮಾರ್ಲ್ಲೆ ಮೂಸ್ ಭುರ್ಗ್ಯಾಚಾ ತೊಂಡಾಂತ್ ಚೆಪ್ತಾನಾ "ಅಯ್ಯೋ ದೇವೆರೇ... ಎನ್ನ ಕರ್ಮನೇ" ಆಜೊ ಭುರ್ಗ್ಯಾಲಾಗಿಂ ಧಾಂವ್ತಾನಾ "ಅಮ್ಮಾ... ಕೆಲೆಂಜಿ ತಿನಡ್... ಅವ್ವು ಸಯ್ಯಡ್... ಅವ್ವು...ತಯ್ಯಡ್" ಮ್ಹಣ್ ಕಿಡ್ಕಿಡೊನ್ ಹಾಸ್ತಾನಾ ಅಣ್ಣಿಚೊ ಹಾತ್ ತಾಚ್ಯಾ ಕಾನ್ಸುಲಾರ್ ಬಸ್ಲೊ.
"ಬೋಸುಡಿ..... ಊಟ್ಗೋ..... ಕಿತ್ಯಾಕ್ ಜಲ್ಮಾಲೆಂಯ್? ಮ್ಹಜೆಂ ಸತ್ಯಾನಾಸ್ ಕೆಲೆಂಯ್!" ತಾಕಾ ವೊಡುನ್ ವ್ಹರ್ತಾನಾ ತೆಂ ಬೊಬಾಟ್ಲೆಂ. ಭುರ್ಗ್ಯಾಚಾ ತೊಂಡಾ ಥಾವ್ನ್ಚ್ಚ್ ಕಾಡ್ತಾನಾ.... ಅಣ್ಣಿಚೆಂ ಕಾಳಿಜ್ ಕಾತ್ರಲೆಂ.
ಕಾಳೊಕ್ ಭುಂಯ್ಕ್ ಪಡ್ತಾನಾ..... ಎಕಾ ರಿತಿಚಿ ಘಾಣ್ ಉಟೊಂಕ್ ಲಾಗ್ಲಿ. ಅಣ್ಣಿ ದೂಮಿಚ್ಯಾ ಲಾಗಿಂ ಆಯ್ಲೊ. ತಾಚ್ಯಾ ದೊಳ್ಯಾಂತ್, ಕಾನಾಂತ್, ನಾಕಾಂತ್ ಆನಿ ತೊಂಡಾಂತ್ ರಗ್ತಾಚೊ ಫೆಂಡ್ ಯೆತಾಲೊ. ಆನಿ ರಾಕ್ಲ್ಯಾರ್ ಫಾಯ್ದೊ ನಾ. ದೆಕುನ್ ಆಪ್ಣೆ ತರೀ ಮ್ಹಜ್ಯಾ ದೂಮಿಕ್ ಭುಂಯ್ಕ್ ಭಾರ್ ಜಾಂವ್ಕ್ ಸೊಡುಂಕ್ ನ್ಹಜೊ"
ದೆಕುನ್.... ಕುಶಿನ್ ಆಸ್ಲ್ಲ್ಯಾ ಖೊರ್ಯಾಕ್ ಆನಿ ಪಿಕ್ಕಾಸಾಕ್ ಘೆಂವ್ಕ್ ಭಾಯ್ರ್ ಪಡ್ಲೊ.
ದೆವ್ವಚಿ ಚಾಕ್ರಿ ಕರ್ತಾಲೊ ತೊ. ದೆಕುನ್ ಮೆಲ್ಲ್ಯಾ ಮನ್ಶ್ಯಾಕ್ ಆಪ್ಡುಂಕ್ ವಾ ಲಾಗಿಂ ವಚೊಂಕ್ ನಾತ್ಲ್ಲೆಂ. "ಆಮೆ-ಸೂತಿಕ ತಾಂಕಾಂ ನಾತ್ಲ್ಲೆ. ಪುಣ್ ಆಜ್ ತಾಚ್ಯಾಚ್ ಮೊಗಾಚ್ಯಾ ದೂಮಿಕ್ ಭುಂಯ್ತ್ ನಿದೊಂಕ್ ತಾಣೆಂಚ್ ಪೊಂದ್ ಖೊಂಡಿಜಾಯ್. ಲಾಂಕ್ಡಾಂಕ್ ತಾಕಾ ಗತ್ ನಾ. ಕಶೆಂ ಏಕ್ ಮೂಟ್ ಗೊಬೊರ್ ಕರ್ಚೊ? ಅಣ್ಣಿನ್ ಎದೊಳ್ ಪರ್ಯಾಂತ್ ಆಪ್ಣಾ ಭಿತರ್ ಲಿಪೊನ್ ದವರ್ಲ್ಲ್ಯಾ ದುಃಖಾಂಚೊ ಕಾಟ್ ಪುಟ್ಲೊ. ಅಣ್ಣಿ ಕಾಳಿಜ್ ಫುಟ್ಚ್ಯಾಬರಿ ರಡ್ಲೊ. ಸಂಸಾರ್ ಬುಡೊನ್ ವೆಚ್ಯಾಬರಿ ಭಗ್ಲೆಂ. ಆಶೆಂ ಜಾತಾಗೀ? ಸವಾಲ್ ಉದೆಲೆಂ. ತಾಚ್ಯಾ ಘರ್ಚೊ ಕಾಳು ಪಯ್ಸ್ ಥಾವ್ನ್ ಧಾಂವೊನ್ ಆಯಿಲ್ಲೊ ಧನಿಯಾನ್ ವಯ್ರ್ ಘಾಲ್ಲಿ ಮಾತಿ ಪಯ್ಸ್ ಲೊಟುಂಕ್ ಲಾಗ್ಲೊ. ಮನ್ಶ್ಯಾಂ ಲಾಗಿಂ ನಾತ್ಲ್ಲೆಂ ಬರೆಂ ಮನ್ ಮನ್ಜಾತಿ ಲಾಗಿಂ ಪಳೆತಾನಾ ತಾಚೆಂ ದೂಃಖ್ ಇಲ್ಲೆಂ ಹಳು ಜಾಲೆಂ.
ಪೊಂಡ್ ಅರ್ದೊ ಜಾತಾನಾ ತಾಕಾ ಭಿತರ್ ಥಾವ್ನ್ ಚಿಮ್ಣೆ ತೆಲಾಚಿ ವಾಸ್ ಆಯ್ಲಿ. ಭಿತರ್ ಯೆತಾನಾ ಪದ್ದಿನ್ ಆಸ್ಲ್ಲೆಂ ತೇಲ್ ದೂಮಿಚೆರ್ ಆನಿ ಭುರ್ಗ್ಯಾಚೆರ್ ಘಾಲ್ತಾಲೆಂ. "ಯೆತಾತ್ಗೀ ಯೆತಾತ್.... ಅಮ್ಮಾ... ಹೆ ಮೂಸ್ ಆನಿ ಮುಯೊ ಸಗ್ಳ್ಯೊ ಮೊರೊಂದಿತ್. ಮೊರಾ.... ಮೊರಾ..... ಹಾತಾಂತ್ಲಿ ಕಾಡಿ ಪೆಟವ್ನ್ ಉಡಯ್ತಾನಾ ಉಜೊ ಭಗ್ಗ್ ಕರುನ್ ಸಗ್ಳ್ಯಾನಿ ಪೆಟ್ಲೊ. ದೈವ ಯೆತಾನಾ ಜೀಡಿಗೆ ಹಾಲೊಂವ್ಚ್ಯಾಬರಿ ಉಜೊ ಪೆತ್ಲೊ. ಅಣ್ಣಿಕ್ ಚಿಂತುಂಕ್ ವೇಳ್ ನಾ. ಉಜ್ಯಾಚ್ಯೊ ಜಿಬೊ ನಾಚೊಂಕ್ ಲಾಗ್ಲ್ಯೊ. ಕಿತೆಂ ಕರುಂ? ಮೆಲ್ಲ್ಯಾ ಬಾಯ್ಲೆಚಿ ಕೂಡ್ ಭಾಯ್ರ್ ಹಾಡುಂ? ಪಿಶ್ಯಾ ಧುವೆಕ್ ರಾಕೊಂ? ವ ಮಾಸಾಚ್ಯಾ ಮುದ್ಯಾಕ್? ಬೆಣ್ಸಿಚ್ಯಾ ಆಡಾರಾಂನಿ ಬಾಂದ್ಲ್ಲಿ ವೊಣೊದ್ ಜಳೊನ್ ಪಾಕೆ ಜಳ್ತಾನಾ - ಕಿತೆಂ ಹಾಡುಂ? ಗಗ್ಗರ್, ತೆಂಬರೆ ವಾ ಕೋಲ ಬಾಂದ್ಚಿ ಮುಸ್ತರೆ? ತಾಚೆ ಸಮಾಸ್ಯೆ ಜಳ್ತಾಲ್ಯೊ. ಪಳೆತೇ ರಾವ್ಲ್ಲೊ ಅಣ್ಣಿ ಪಾಟ್ ಘಾಲುನ್ ವೆತಾನಾ ತೀನ್ ಕುಡಿ ಕೊಣಾಚೊಯೀ ಆಧಾರ್ ನಾಸ್ತಾನಾ, ಸಾರಿ ಚಡಯ್ನಾಸ್ತಾನಾ ಜಳ್ಚ್ಯಾ ಉಜ್ಯಾಂತ್ ಸಮಾಜೆಚಿಂ ಖತಾಂ ಪುಸುನ್ ಸೊಡ್ಲ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
