ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭಲಾಯ್ಕೆ ದಾಯ್ಜ್[ಕೊಂಕ್ಣೆಂತ್
ಸಾಹಿತಿ ಜಾವ್ನ್ ಜಿತ್ಲೊ ಫಾಮಾದ್ಕೀ, ಹಾಡಾಂಚೊ ತಜ್ನ್ ಜಾವ್ನ್ಯೀ ತಿತ್ಲೊಚ್ ಫಾಮಾದ್. ಜಿತ್ಲ್ಯೊ ಕಾಣ್ಯಾಂನಿ ಫಾಮಾದ್ಗೀ, ತಿತ್ಲೊಚ್ಚ್ ಭಲಾಯ್ಕೆ ಲಗ್ತಿ ಜಾಲ್ಲ್ಯಾ ಲೇಖನಾಂಕ್. ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂ ಥಾವ್ನ್, ಪತ್ರಾಂನಿ ಸಭಾರ್ ಲೊಕಾಂಚ್ಯಾ ಭಲಾಯ್ಕೆಕ್ ಲಗ್ತಿ ಜಾಲ್ಲ್ಯಾ ಸವಾಲಾಂಕ್ ಪರಿಹಾರ್ ದೀವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತ್ ಸಾಯ್ಟಾಂನಿ ಸಯ್ತ್ ಫಾಮಾದ್. ಪ್ರಸ್ತುತ್ ಕೊಂಕ್ಣಿ ಲೇಖಕಾಂಚಾ ಎಕ್ತಾರಾಚೊ ಅಧ್ಯಕ್ಷ್ ಜಾವ್ನ್ ಕೊಂಕ್ಣಿ ವಾವ್ರ್ಯೀ ಕರುನ್ ಆಸಾ.]
ಸವಾಲಾಂ ಧಾಡುಂಕ್ ವಿಳಾಸ್: bhalaikedaaiz@gmail.com
ಡಾ|ಎಡ್ವರ್ಡ್ ನಜ್ರೆತ್
ಗುಪಿತ್ ಜಾಗ್ಯಾರ್ ಹುಲೊಪ್
* ಮ್ಹಜಿ ಪ್ರಾಯ್ 29 ವರ್ಸಾಂ, ದೊಗಾಂ ಭುರ್ಗಿಂ ಆಸಾತ್. ದೋನ್ಯಿ ಪಾವ್ಟಿಂ ಮ್ಹಾಕಾ ಸಿಜೇರಿಯನ್ ಜಾಲ್ಲೆಂ. ನಿಮಾಣ್ಯಾ ಭುರ್ಗ್ಯಾಕ್ ಆತಾಂ ದೇಡ್ ವರ್ಸಾಂ ಜಾತಾತ್. ದುಸ್ರೆಂ ಸಿಜೇರಿಯನ್ ಜಾಲ್ಲ್ಯಾ ಸುಮಾರ್ ಸ ಮಯ್ನ್ಯಾಂ ಉಪ್ರಾಂತ್ ಮ್ಹಾಕಾ ಲೈಂಗಿಕ್ ಎಕ್ವಟಾಚ್ಯಾ ವೆಳಾರ್ ಕಟೀಣ್ ದುಕೊಂಕ್ ಸುರು ಜಾಲೆಂ. ದಾಕ್ತೆರಾಕಡೆ ದಾಕಾಯಿಲ್ಲ್ಯಾಕ್ ಮುತಾಂತ್ ಇನ್ಫೆಕ್ಶನ್ ಜಾಲಾಂ ಮ್ಹಣ್ ಸಾಂಗೊನ್ ವಕತ್ ದಿಲೆಂ. ಮ್ಹಜ್ಯಾ ದಾದ್ಲ್ಯಾಕ್ಯಿ ವಕತ್ ಘೆಂವ್ಕ್ ಬರವ್ನ್ ದಿಲೆಂ. ದಾಕ್ತೆರಾನ್ ಕಳಯಿಲ್ಲೆಪರಿಂಚ್ ಆಮಿ ವಕ್ತಾಂ ಘೆತ್ಲಿಂ. ಸಮಸ್ಸೊ ಉಣೊ ಜಾಲೊ ನಾ ದೆಕುನ್ ಮುತಾಚ್ಯಾ ಸ್ಪೆಶಲಿಸ್ಟ್ ದಾಕ್ತೆರಾಕಡೆ ಗೆಲಿಂ ತಣೆಂ ಭಿತರ್ ಲಾಯ್ಟ್ ಘಾಲ್ನ್ ತಪಾಸ್ಲೆಂ ಆನಿ ಕಿತೆಂಯ್ ಸಮಸ್ಸೊ ನಾ ಮ್ಹಣ್ ಸಾಂಗ್ಲೆಂ. ಪೂಣ್ ಮ್ಹಜೊ ಸಮಸ್ಸೊ ಆಜೂನ್ ಧೊಸುನ್ ಆಸಾ. ಮುತಾಚೊ ಭಾಗ್ ತಾಂಬ್ಶೆಲಾ, ಮುತೊಂಕ್ ಜಾತಾನಾ ಕಟೀಣ್ ದುಕ್ತಾ. ಲೈಂಗಿಕ್ ಭಾಗಾಂತ್ ಖೊರೊಜ್ಯಿ ಆಸಾ. ಎಕೇಕ್ ಪಾವ್ಟಿಂ ರಗತ್ ಸಯ್ತ್ ಯೆತಾ. ಮ್ಹಾಕಾ ಹೆ ಪಿಡೆನ್ ಜಾಯಿತ್ತೆಂ ಸತಾಯ್ಲೆಂ..ಹಾಂವೆಂ ಕಿತೆಂ ಚಿಕಿತ್ಸಾ ಕರಿಜೆ ಮ್ಹಣ್ ಕಳಯಾ.
-£ÁAªï,UÁAªï £ÁPÁ. UÁAªï £ÁPÁ
ತುಜೊ ಸಮಸ್ಸೊ ಮುತಾಭಾಗಾಂನಿ ಬೆಕ್ಟಿರಿಯಾಂ ಥಾವ್ನ್ ಇನ್ಫೆಕ್ಶನ್ ಜಾಲ್ಲ್ಯಾನ್ ಉಬ್ಜಲಾ ತಶೆಂ ದಿಸ್ತಾ. ಜೊಕ್ತಿ ಚಿಕಿತ್ಸಾ ಮೆಳನಾಸ್ತಾಂ ಸಮಸ್ಸೊ ಪರ್ನ್ಯಾರ್ ಪಡ್ಲಾ ತಶೆಂ ಜೋಪ್ ಜಾತಾ.
ಮುತಾಚ್ಯಾ ಭಾಗಾಂತ್ ಬೆಕ್ಟಿರಿಯಾಂ ಥಾವ್ನ್ ಅಕ್ರಮ್ (ಇನ್ಫೆಕ್ಶನ್) ಜಾಂವ್ಚೆಂ ಸ್ತ್ರಿಯಾಂಚ್ಯಾ ಭಲಾಯ್ಕೆಚ್ಯಾ ಸಮಸ್ಸ್ಯಾಂ ಪಯ್ಕಿಂ ಪ್ರಮುಕ್. ಉಸ್ವಾಸಾಚ್ಯಾ ಭಾಗಾಂನಿ ಬೆಕ್ಟಿರಿಯಾಚ್ಯಾ ಪಿಡೆಂ ಉಪ್ರಾಂತ್ ಮುತಾಭಾಗಾಂಚೆಂ ಇನ್ಫೆಕ್ಶನ್ ಸಾಮಾನ್ಯ್. ದಾದ್ಲ್ಯಾಂಪ್ರಾಸ್ ಸ್ತ್ರಿಯಾಂ ಥಂಯ್ ಮುತಾ ಭಾಗಾಂನಿ ಇನ್ಫೆಕ್ಶನ್ ಜಾಂವ್ಚೆಂ ಚಡ್. ಜೆರಾಲ್ ಥರಾನ್ ಭಲಾಯ್ಕೆವಂತ್ ವ್ಯಕ್ತಿಚ್ಯಾ ಮುತಾಂತ್ ಕಿತೆಂಚ್ ಬೆಕ್ಟಿರಿಯಾ ಆಸಾನಾಂತ್. ಮುತಾ ಭಾಗಾಂಕ್ ಹೆರ್ ಸುವಾತೆ ಥಾವ್ನ್ ಬೆಕ್ಟಿರಿಯಾಂಚೊ ಪ್ರವೇಶ್ ಜಾತಾ. ಸ್ತ್ರಿಯಾಂ ಥಂಯ್ ಅನ್ಕಿಟೆಂತ್ ಆಸ್ಚ್ಯೊ ಇ. ಕೊಲಯ್ ಮ್ಹಳ್ಳ್ಯೊ ಬೆಕ್ಟಿರಿಯಾ ಹಾಗ್ಣೆಥಾವ್ನ್ ಮುತಾದಾರಾಂತ್ಲ್ಯಾನ್ ಭಿತರ್ ಸರೊನ್ ಮುತಾ ಭಾಗಾಚ್ಯಾ ಇನ್ಫೆಕ್ಶನಾಕ್ ಕಾರಣ್ ಜಾಂವ್ಚೆಂ ಸಾಮಾನ್ಯ್.
ಏಕ್ ಪಾವ್ಟಿಂ ಮುತಾ ಭಾಗಾಂನಿ ಇನ್ಫೆಕ್ಶನ್ ಜಾಲ್ಯಾರ್ ಸಲೀಸಾಯೆನ್ ಸಮಸ್ಸೊ ಪರಿಯಾರ್ ಜಾಯ್ನಾ. ಥೊಡಿಂ ಬೆಕ್ಟಿರಿಯಾ ಹಳ್ತಾಚ್ಯಾ ಒಕ್ತಾಂಕ್ ಬಾಗ್ವನಾಂತ್, ಸಮಸ್ಸೊ ಪರ್ನ್ಯಾರ್ ಪಡ್ತಾ. ಆನಿ ಥೊಡ್ಯಾಂ ಥಂಯ್ ಪರತ್ ಪರತ್ ಇನ್ಫೆಕ್ಶನ್ ಜಾವ್ಯೆತಾ.
ಲೈಂಗಿಕ್ ಭಾಗಾಂನಿ ಖೊರೊಜ್ ಆಸೊಂಕ್ ತ್ಯಾ ಭಾಗಾಂತ್ ಫಂಗಸ್ ಇನ್ಫೆಕ್ಶನ್ ಆಸ್ಚೆಂ ಕಾರಣ್ ಜಾವ್ಯೆತ್. ಲೈಂಗಿಕ್ ಥರಾನ್ ಕ್ರಿಯಾತ್ಮಕ್ ಆಸ್ಚೆ ಸ್ತ್ರಿಯೆಕ್ ಫಂಗಸ್ ಇನ್ಫೆಕ್ಶನ್ ಆಸ್ಲ್ಯಾರ್ ತಿಚ್ಯಾ ದಾದ್ಲ್ಯಾನ್ಯಿ ವಕತ್ ಘೆಂವ್ಚೆಂ ಗರ್ಜ್. ಮುತಾಭಾಗಾಂನಿ ಬೆಕ್ಟಿರಿಯಾಚ್ಯಾ ಇನ್ಫೆಕ್ಶನ್ ಮಾತ್ರ್ ಆಸ್ಲ್ಯಾರ್ ದಾದ್ಲ್ಯಾಕ್ ಚಿಕಿತ್ಸಾ ದಿಂವ್ಚಿ ಗರ್ಜ್ ಆಸಾನಾ.
ಖಂಚೊಯ್ ಭಲಾಯ್ಕೆಚೊ ಸಮಸ್ಸೊ ಸಾಮಾನ್ಯ್ ದಾಕ್ತೆರಾಂಚ್ಯಾ ಚಿಕಿತ್ಸೆಥಾವ್ನ್ ನಿರ್ದಿಶ್ಟ್ ಆವ್ದೆ ಭಿತರ್ ಗೂಣ್ ಜಾಯ್ನಾ ತರ್ ತಾಕಾ ಲಗ್ತಿ ಸ್ಪೆಶಲಿಸ್ಟ್ ದಾಕ್ತೆರಾಚಿ ಸಲಹಾ ಘೆಂವ್ಚಿ ಬರಿ. ಸ್ಪೆಶಲಿಸ್ಟ್ ದಾಕ್ತೆರಾನ್ ಏಕ್ಪಾವ್ಟಿಂ ತಪಾಸುನ್ ಚಿಕಿತ್ಸಾ ದಿಲ್ಲೆ ತಕ್ಷಣ್ ಪಿಡಾ ನಿವಾರ್ತಾ ಮ್ಹಣೊಂಕ್ ಜಾಯ್ನಾ. ಸಮಸ್ಸೊ ಪರಿಯಾರ್ ಜಾಯ್ನಾ ತರ್ ಪರತ್ ತಾಚೆಚ್ ಕಡೆ ವಚೊನ್ ಸಲಹಾ ಘೆಂವ್ಚಿ ಬರಿ. ತಾಚೆಥಾವ್ನ್ಯಿ ಸಮಸ್ಸೊ ಪರಿಯಾರ್ ಜಾಂವ್ಚಿಂ ಖುಣಾಂ ನಾಂತ್ ತರ್ ವಾ ಸ್ಪೆಶಲಿಸ್ಟ್ ದಾಕ್ತೆರ್ ಪಿಡೆಚ್ಯಾ ಗತಿವಿಶಿಂ ಸ್ವಶ್ಟ್ ಮಾಹೆತ್ ದಿಂವ್ಕ್ ಸಕನಾ ತರ್ ದುಸ್ರ್ಯಾ ಸ್ಪೆಶಲಿಸ್ಟಾಚಿ ಸಲಹಾ ಘೆಂವ್ಚೆಂ ಸಾರ್ಕೆಂ. ಜಾಯಿತ್ತೆಪಾವ್ಟಿಂ ಪಿಡಾ ವೆಳಾರ್ ಗೂಣ್ ಜಾಯ್ನಾತ್ಲ್ಲ್ಯಾನ್ ಸಮಸ್ಸೊ ಪರ್ನ್ಯಾರ್ ಪಡತ್, ಅನಾಹುತಾಂ ಘಡ್ತಿತ್ ವಾ ಸಮಸ್ಸೊ ಜೂನ್ ಜಾವ್ನ್ ಪರಿಯಾರ್ ಸಾದ್ಯ್ ಜಾಂವ್ಚೊ ನಾ. ಹಿ ಏಕ್ ಜೆರಾಲ್ ಸಲಹಾ ಮತಿಂತ್ ಆಸ್ಚಿ ಬರೆಂ.
ತುವೆಂ ತುಜ್ಯಾ ಸಮಸ್ಸ್ಯಾಕ್ ಪರಿಯಾರ್ ಜೊಡ್ಚೆ ಖಾತಿರ್ ಖಂಚ್ಯಾಯ್ ಬರ್ಯಾ ಆಸ್ಪತ್ರೆಂತ್ (ಸಾದ್ಯ್ ತರ್ ಮೆಡಿಕಲ್ ಕೊಲೆಜ್ ಆಸ್ಪತ್ರೆಂತ್) ಸ್ತ್ರಿಯೆಂಚ್ಯಾ ಪಿಡೆಂಚ್ಯಾ ವಿಬಾಗಾಕ್ ವಚೊನ್ ಸಲಹಾ ಘೆಂವ್ಚಿ ಬರಿ. ಥಂಯ್ ತಪಾಸ್ಣಿ ಕರ್ನ್ ತುಕಾ ಮುತಾ ಭಾಗಾಂಚ್ಯಾ ಸ್ಪೆಶಲಿಸ್ಟ್ (ಯುರೋಲೊಜಿಸ್ಟ್) ನ್ಹಯ್ ತರ್ ಕಿಡ್ನೆಸ್ಪೆಶಲಿಸ್ಟ್ ದಾಕ್ತೆರಾಚಿ ಸಲಹಾ ಜೊಡುಂಕ್ ಧಾಡುಂಕ್ ಪುರೊ. ಮೂತ್ ಚತ್ರಾಯೆನ್ ಕಾಡ್ನ್ ಬೆಕ್ಟಿರಿಯಾಂಚ್ಯಾ ತಪಾಸ್ಣೆಕ್ ಧಾಡ್ತಿತ್. ಜೊಕ್ತಿಂ ವಕ್ತಾಂ ದಿಲ್ಯಾರ್ ಸಮಸ್ಸೊ ಪರಿಯಾರ್ ಜಾಯ್ತ್.
ತುವೆಂ ಜಾಯಿತ್ತೆಂ ಉದಕ್ ಪಿಯೆತ್ತ್ ಆಸೊನ್ ಮೂತ್ ಚಡ್ ವಚಾಶೆಂ ಕರ್ಚೆಂ ಬರೆಂ. ಮುತೊಂಕ್ ಜಾಲ್ಲೆ ವೆಳಾರ್ ಮುತೊನ್ ಯೆಂವ್ಚೆಂ, ಮೂತ್ ಭಾಂದುನ್ ಘೆನಾಕಾ. ಕಾಕ್ಸಾಕ್ ಗೆಲ್ಲೆ ಉಪ್ರಾಂತ್ ಹಾಗ್ಣಿ ಆನಿ ಮುತಾ ಭಾಗ್ ವಿಂಗಡ್ ಬರ್ಯಾನ್ ಧುವ್ನ್ ನಿತಳ್ ದವರ್. ಧುತನಾ ಹಾಗ್ಣೆ ಥಾವ್ನ್ ಮುಕಾರ್ ಧುಂವ್ಚೆ ಬದ್ಲಾಕ್, ಮುಕಾರ್ ಥಾವ್ನ್ ಪಾಟಿಂ ಧುಂವ್ಚೆಂ ಬರೆಂ. ಹೆ ವರ್ವಿಂ ಹಾಗ್ಣೆ ಥಾವ್ನ್ ಬೆಕ್ಟಿರಿಯಾಂ ಮುತಾ ಭಾಗಾಚೆ ದಿಶೆರ್ ಯೆಂವ್ಚೆಂ ಆಡಾಯ್ವೆತಾ. ಭಿತರ್ಲಿಂ ವಸ್ತ್ರಾಂಯ್ ನಿತಳ್ ಆಸೊಂದಿ. ದಾಕ್ತೆರಾಂನಿ ಸುಚಾಯಿಲ್ಲೆ ಶಿವಾಯ್ ತುಜೆಯಿತ್ಲ್ಯಾಕ್ ಕಿತೆಂಯ್ ಮುಲಮಾಂ/ಲೊಶನ್ ವಾಪ್ರಿನಾಕಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
