ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 36. ಬಾಯ್ಲ್ ಆನಿ ಭಾಂಗಾರ್
ಬಾವ್ತಿಸ್ ಮೆಂದೊಸ್, ಕಿನ್ನಿಗೋಳಿ: ಪಳೆವ್ನ್, ಉಲವ್ನ್ ನೆಣಾಂ ತರ್ಯ್ ಕೊಂಕ್ಣೆಕ್ ಹಾಣೆ ದಿಲ್ಲ್ಯಾ ದೇಣ್ಗೆವಿಶಿಂ ಜಾಯ್ತೆಂ ಆಯ್ಕಲಾಂ ಆನಿ ತ್ಯಾ ಪ್ರಕಾರ್ ಹೊ ಏಕ್ ಫಾಮಾದ್ ನಾಟಕಿಸ್ತ್ ತರ್ಯಿ ಹಾಣೆಂ ಕವಿತಾಂ, ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಮಟ್ವ್ಯಾ ಕಾಣ್ಯಾಂಚೆಂ ಅಧ್ಯಯನ್ ಕರ್ಚಾಂಕ್ ಬಾಮ್ಸ್ ಹಾಚ್ಯೊ ಕಾಣ್ಯೊ ಖಂಡಿತ್ ಜಾವ್ನ್ ಅಜೀಕ್ ತೀಸ್-ಚಾಳಿಸ್ ವರ್ಸಾಧ್ಲ್ಯಾ ಸಂಸಾರಾಕ್ ವರ್ಚಾಂತ್ ದುಭಾವ್ ನಾ.
[ಜನನ್: 14 ನವೆಂಬರ್ 1941 ಕಾಜಾರ್: 20 ಮಾಯ್ 1962 ಮರಣ್: 4 ದಸೆಂಬ್ರ್ 1988]
ಬಾಮ್ಸ್
ವೊರಾಂ ರಾತಿಚಿಂ ಇಕ್ರಾ ವ್ಹಾಜ್ಲ್ಲಿಂ. ಲೊಕಾಂಚೊ ಸಂಚಾರ್ ಉಣೊ ಜಾಲ್ಲೊ. ಆಕಾಶಾರ್ ನೆಕೆತ್ರಾಂ ಎಕಾಮೆಕಾ ಥಂಯ್ ಪ್ರಜಳ್ ಫಾಂಕಯ್ತಾಲಿಂ. ಅರ್ಧೊ ಚಂದ್ರ್ ಕುಪಾಂ ಭಿತರ್ ಅಪಾ-ಲಿಪಾ ಖೆಳ್ತಾಲೊ. ದರ್ಯೊ ಮಾತ್ರ್ ಘೊರೊಜ್ ಘಾಲ್ನ್ ಆಪ್ಲಿ ಖೊರೊಜ್ ಕಾಡ್ತಾಲೊ ಆನ್ ಆಪ್ಲ್ಯಾ ಗರ್ಭಾಂತ್ ಯೇಂವ್ಕ್ ಆಸ್ಚಾಂಕ್ ರಾಕ್ತಾಲೊ!
ವಯ್ಲೆಂ ವಾತಾವರಣ್ ರಾಜ್ ವಿರಾಜ್ ಜಾತಾನಾ ಎಕ್ಲಿ ಸ್ತ್ರೀ ಧಾಂವೊನ್ ಆಯ್ಲಿ ಆನಿ "ಹಾಂವ್ ಆತಾಂಚ್ ದರ್ಯಾಂತ್ ಉಡ್ತಾಂ ಆನಿ ಜೀವ್ಘಾತ್ ಕರ್ತಾಂ!" ಮ್ಹಣ್ ತ್ಯಾ ಪೆಂಟಾಳೆಕಡೆ ಪಾವ್ತಾನಾ ಪಾಟಾಪಾಟ್ ಆಸ್ಚಾ ತಿಚ್ಯಾ ಪತಿನ್ ತಿಕಾ ಆರಾಯ್ಲೆಂ ಆನಿ ರಾವಯ್ಲೆಂ.
"ನಾ! ಸೊಡಿನಾ!!" ತ್ಯಾ ದಾದ್ಲ್ಯಾಚೊ ತಾಳೊ ಸತ್ ಸಾಂಗ್ತಾಲೊ.
"ಏಕ್ಚ್ ತುವೆಂ ಮ್ಹಾಕಾ ಕುವೇಯ್ಟ್ ವಚೊಂಕ್ ದಸ್ಕತ್ ದೀಜಾಯ್, ನಾ ತರ್ ಮ್ಹಾಕಾ ದರ್ಯಾಂತ್ ಉಡೊಂಕ್ ಸೊಡಿಜಾಯ್" ತಿ ಸ್ತ್ರೀ ಪರತ್ ಹುಳ್ವುಳ್ಳಿ.
"ಲಿನಾ, ಹಾಂಗಾ ತುಕಾ ಕಿತೆಂ ಉಣೆ ಆಸಾ ಮ್ಹಣ್ ತುಂ ಕುವೇಯ್ಟ್ ಭಾಯ್ರ್ ಸರ್ಲಾಂಯ್..? ದೆವಾನ್ ದಿಲ್ಲೆಂ ಸರ್ವ್ ಆಸ್ತಾಂ ಲಿನಾ, ತುಕಾ ತೊ ಅರ್ಭ್ಯಾಂಚೊ ಗಾಂವ್ ಕಿತ್ಯಾಕ್..?" ತಿಚೊ ದಾದ್ಲೊ ತಿಕಾ ಸಮ್ಜಾಯ್ತಾಲೊ ತರಿ ತಿ ಸಮ್ಜಾಲಿನಾ.
ಸಬಾರ್ ತರ್ಕಾಂ ಜಾಲ್ಲ್ಯಾ ಉಪ್ರಾಂತ್ ತಿಚೊ ದಾದ್ಲೊ ತಗ್ಸಾಲೊ ಆನಿ ತಿಕಾ ಕುವೆಯ್ಟ್ ವಚೊಂಕ್ ದಸ್ಕತ್ ದೀಂವ್ಕ್ ಒಪ್ಲೊ.
ಬೊಂಬಂಯ್ತ್ಲ್ಯಾ ತಾಜ್ ಮಹಲ್ ಹೊಟೆಲಾ ಮುಖಾರ್ ಆರಂಭ್ ಜಾಲ್ಲಿ ಹಿ ಕಾಣಿ ಆಬ್ಳೆ ಕುವೇಯ್ಟ್ ಪಾವ್ಲಿ. ವ್ಹಯ್ ಲಿನಾ ಕುವೇಯ್ಟ್ ಭಾಯ್ರ್ ಸರ್ಲೆಂ ಆನಿ ಗೆಲೆಂ. ತಾರ್ವಾರ್ ತಿಕಾ ತಿಚ್ಯಾ ಪತಿಚಿಂ ಉತ್ರಾಂ ಉಗ್ಡಾಸ್ ಕರುಂಕ್ಲಾಗ್ಲಿಂ.. ತರೀ ತಿ ಪರಿವರ್ತನ್ ಜಾಲಿನಾ. ಆನಿ ಜಾವ್ನ್ಯೀ ಫಾಯ್ದೊ ನಾ.
*****ಲೊರಿ
ಆನಿ ಲಿನಾ!
ವ್ಹಯ್, ಲೊರಿ ಆನಿ ಲಿನಾ. ಪಾಂಚ್ ವರ್ಸಾಂ ಆದಿಂ ಸಾತ್ವ್ಯಾ ಸಾಕ್ರಾಮೆಂತಾಂತ್ ಎಕ್ವಟಿತ್ ಜಾಲ್ಲಿಂ. ಲೊರಿಕ್ ಅಪ್ಲೆಂಚ್ ಘರ್ ಆಸೊನ್ ಏಕ್ ಲೊಂಡ್ರಿ ಆಸ್ಲ್ಲಿ. ತ್ಯಾ ಲೊಂಡ್ರೆಂತ್ ಜಾಂವ್ಚ್ಯಾ ಫಾಯ್ದ್ಯಾಂತ್ ದೊಗಾಂಯ್ಚೊ ಸಂಸಾರ್ ಸುಖಾನ್ ಸರ್ತಾಲೊ ತರಿ ಲಿನಾಕ್ ಕುವೇಯ್ಟ್ ವೆಚಿ ಆಶಾ ಲಾಗ್ಲ್ಲಿ. ದೊಗಾಂಯ್ಚಾ ಸಂಗಮಿಕ್ ಮೊಗಾ ಮಧೆಂ ಏಕ್ ಫಳ್ ಕಿರ್ಲಾಲ್ಲೆಂ ಜಾಲ್ಯಾರ್ ಲಿನಾ ಕುವೇಯ್ಟ್ ವೆತೆಂ ನಾ ಕೊಣ್ಣಾ.
"ತುಂ ಕುವೇಯ್ಟ್ ಥಾವ್ನ್ ಪಾಟಿಂ ಯೆತಾನಾ ಹಾಂವ್ ಆಸಾಂಗಿ ನಾ ಕೊಣ್ಣಾ.." ಲೊರಿನ್ ಆಪ್ಲ್ಯಾ ರಡ್ಕುರ್ಯಾ ಕಾಳ್ಜಾಂತ್ಲಿಂ ಉತ್ರಾಂ ಲಿನಾಕ್ ಸಾಂಗ್ತಾನಾ ಆಸ್ಪಾಸ್ಚಾ ಸೆಜಾರ್ಯಾಂಕ್ ಭೊಗ್ಲೆಂ ಪುಣ್ ಲಿನಾಕ್ ದುಖ್ಲೆಂನಾ ವ ಭಗ್ಲೆಂನಾ. ಕಾರಣ್ ಲಿನಾ ಕುವೇಯ್ಟ್ಚಾ ಭಾಂಗಾರಾವಿಶಿಂ ನಿಯಾಳ್ತಾಲೆಂ. ವ್ಹಯ್, ತಾಚೊ ನಿಯಾಳ್ ಸ್ವಾಭಾವಿಕ್, ತಾಚಿಂ ಚಿಂತ್ನಾಂ ಸ್ವಾಭಾವಿಕ್, ತಾಚ್ಯೆ ಆದಿಂ ಕುವೇಯ್ಟ್ ಗೆಲ್ಲ್ಯಾ ಸ್ತ್ರೀಯಾಂ-ಚಲಿಯಾಂನಿ ಹಾಡ್ಲ್ಲಿಂ ಆಧುನಿಕ್ ವಸ್ತುರಾಂ ಆನಿ ಭಾಂಗಾರ್ ಲಿನಾಚ್ಯಾ ಆಶೆಕ್ ಕಾರಾಣ್ ಜಾಲ್ಲೆಂ. ಹ್ಯಾಚ್ ಕಾರಣಾನ್ ಲಿನಾಕ್ ಕುವೇಯ್ಟ್ ಪಾವಯ್ಲೆಂ.
"ಆಜ್ ಭಾಂಗಾರಾಚಾ ಆಶೆಕ್ ಲಾಗೊನ್ ಮ್ಹಜಾ ಖುಶೆಕ್ ಕುರಾಡ್ ಮಾರ್ನ್ ಕುವೇಯ್ಟ್ ಗೆಲೆಂ". ಹ್ಯಾ ಚಿಂತ್ನಾಂ ಬರಾಬರ್ ಲೊರಿ ದೆಧೆಸ್ಪ್ರೊರ್ ಜಾಲೊ. "ದೆವಾ, ಮ್ಹಾಕಾ ತುವೆಂ ಬಾಯ್ಲ್ ದಿಲಿಯ್ ಪುಣ್ ತಿಕಾ ಜಾಯ್ ಪುರ್ತೆಂ ಭಾಂಗಾರ್ ದಿಲೆಂನಾಂಯ್ ಕಿತ್ಯಾಕ್?" ದೆಧೆಸ್ಪ್ರೊರ್ ಜಾಲ್ಲೊ ಲೊರಿ ದೆವಾಕ್ ದುರ್ಸೊಂಕ್ ಲಾಗ್ಲೊ. ಹಿಂಚ್ ಚಿಂತ್ನಾಂ, ಹಿಂಚ್ ಭಗ್ಣಾಂ ದಿಸಾಂದೀಸ್ ಲೊರಿಕ್ ಧೊಸುಂಕ್ ಲಾಗ್ಲಿಂ. ಭಗ್ಣಾಂ ಆನಿ ಚಿಂತ್ನಾಂದ್ವಾರಿಂ ಮಾನವ್ ಪಿಸೊ ಜಾಂವ್ಕ್ ಸಾಧ್ಯ್ ಆಸಾ. ತರ್ ಫುಡೆಂ ಲೊರಿಚೆಂ ಜೀವನ್ ಪಿಡ್ಡ್ಯಾರ್ ಜಾಂವ್ಕ್ ಲಿನಾ ಕಾರಾಣ್ ವ್ಹಯ್ ತರ್ ಹ್ಯಾ ವಿಶಿಂ ಲಿನಾಕ್ ಕೊಣ್ ಸಾಂಗಾತ್?
ಲಿನಾ ಕುವೇಯ್ಟ್ ಪಾವೊನ್ ಸ ಮಯ್ನೆ ಸಂಪ್ಲೆ. ಲಿನಾ ಹಾಂಗಾ ಪಾವ್ತಾನಾ ಹವೊ ಥಂಡಾಯೆಚೊ ಜಾಲ್ಲ್ಯಾನ್ ಲಿನಾಕ್ ಕಸಲೆಯ್ ಕಷ್ಟ್ ಭಗ್ಲೆನಾಂತ್. ಪಯ್ಲೆಂಚ್ ಸುಂದರ್ ಆಸ್ಚೆಂ ಲಿನಾ ಆರ್ಭ್ಯಾಂಚಾ ಖಾಣಾ ಜೆವ್ಣಾ ಧ್ವಾರಿಂ ಕುಡಿನ್ ದಾಟೆಂ ಮೊಟೆಂ ಜಾಲ್ಲೆಂ ಮಾತ್ರ್ ನ್ಹಂಯ್ ಸೊಭಾಯ್ ಸಯ್ತ್ ಚಡ್ಲ್ಲಿ. ಆಯ್ತಾರಾಚಾ ಮಿಸಾ ವೆಳಾ ದೆವ್ಳಾ ವಠಾರಾಂತ್ ಲಿನಾ ಪ್ರವೇಶ್ ಜಾತಾನಾ ಆಮ್ಚೆ ದಾದ್ಲೆ ಲಿನಾಚಿ ಲಾಂಬ್ ರುಂದಾಯ್ ತ್ಯಾ ತೆಕಿದ್ ವಿರಾಜ್ ಕರ್ಚಿ ಆಕರ್ಷಿಕ್ ಸೊಭಾಯ್ ತುಕ್ತಾಲೆ ಆನಿ ಲಿನಾವಿಶಿಂ ತರ್ಕ್ ಕರ್ತಾಲೆ. ಬಾಯ್ಲಾಂಕ್ ಸಪ್ಲಾಯ್ ಕರ್ಚೆ ಥೊಡೆ ದಲಾಲಿ ಲಿನಾಚೊ ಪಾಟ್ಲಾವ್ ಕರ್ನ್ ತಾಂಚಾ ಜಾಳಾಂತ್ ಶಿರ್ಕಾವ್ನ್ ಜಾಯ್ತೆಂ ಸಾಧನ್ ಕರ್ತಾಲೆ ತರಿ ಲಿನಾ ತಾಂಚಾ ವ ಹೆರಾಂಚ್ಯಾ ಜಾಳಾಂತ್ ಶಿರ್ಕೊಂಕ್ ನಾ. ಲಿನಾಚಿಂ ಧನ್ಯಾಂ ಬರ್ಯಾ ಮನಾಚಿಂ ಗ್ರೇಸ್ತಾಂ ಜಾಲ್ಲ್ಯಾನ್ ತಾಕಾ ಫಾವೊತೊ ಸಾಂಭಾಳ್, ಸವ್ಲತ್ಯೊ ಆಸ್ಲ್ಲ್ಯಾನ್ ಕೂಡ್ ಭಾಡ್ಯಾಕ್ ಘಾಲ್ನ್ ಭಾಂಗಾರ್ ಜಮಂವ್ಚಿ ಗರ್ಜ್ ತಾಕಾ ಪಡೊಂಕ್ ನಾ.
ಆಬ್ಳೆ ಆತಾಂ ವರ್ಸ್ ದೇಡ್ ಸಂಪ್ಲೆಂ. ಹ್ಯೆ ಆವ್ದೆಂತ್ ಲೊರಿಚಿಂ ಆನಿ ಲಿನಾಚಿಂ ಜಾಯ್ತಿಂ ಪತ್ರಾಂ ಅದಲ್ ಬದಲ್ ಜಾಲ್ಲಿಂ. ತರೀ ಹ್ಯಾ ದಿಸಾಂನಿ ಲೊರಿಚಿಂ ಪತ್ರಾಂ ಲಿನಾಕ್ ಯೇಂವ್ಕ್ ನಾಂತ್. ಪುಣ್ ಲೊರಿ ಭಲಾಯ್ಕೆಂತ್ ನಾ, ಲೊಂಡ್ರಿ ವಿಕ್ಲ್ಯಾ ಆನಿ ಲೊರಿ ಪಿಶ್ಯಾಂಬರಿ ಭಂವ್ತಾ ಮ್ಹಣ್ ಲಿನಾಕ್ ಸೆಜಾರ್ಯಾಂನಿ ಕಳಯ್ಲೆಂ. ತೆಂ ಆಯ್ಕಾಲ್ಲ್ಯಾ ಲಿನಾಕ್ ಆತಾಂಚ್ ಭಾಯ್ರ್ ಸರ್ನ್ ಬೊಂಬೊಯ್ ಚಲ್ಯಾಂ ಮ್ಹಣ್ ಭಗ್ಲ್ಲೆಂ ತರಿ ದೋನ್ ವರ್ಸಾಂಚೊ ಸೊಲ್ಲೊ ಕರ್ನ್ ಗೆಲ್ಲ್ಯಾ ಲಿನಾಕ್ ತೆಂ ಸಾಧ್ಯ್ ಜಾಲೆಂನಾ. ಹ್ಯಾ ವೆಳಾ ತಾಕಾ ಅಪುಣ್ ಘೊವಾಕ್ ಸೊಡ್ನ್ ಕುವೇಯ್ಟ್ ಆಯಿಲ್ಲಿ ಚೂಕ್ ಮ್ಹಣ್ ಭಗ್ತಾಲೆಂ. ಕಾರಣ್ ಕುವೇಯ್ಟ್ ಗಾಂವಾಂತ್ ಚಡ್ತಿಕ್ ಬಾಯ್ಲಾಂ ಘೊವಾಕ್ ಸಾಂಡ್ಲ್ಲಿಂ, ವಿಧೊವ್ ಜಾಲ್ಲಿಂ, ಬೆಬ್ದ್ಯಾ ಘೊವಾ ಸಾಂಗಾತಾ ರಾವೊಂಕ್ ಆನಿ ಜಿಯೆಂವ್ಕ್ ಅಸಕ್ತ್ ಜಾಲ್ಲಿಂ ಹಾಂಗಾ ಆಸಾತ್ ಶಿವಾಯ್ ಸರ್ವಯ್ ಆಸೊನ್ ಲಿನಾಬರಿ ಆಸ್ಚಿಂ ಅಪ್ರೂಪ್ ಮ್ಹಣ್ಯೆತ್. ತ್ಯಾ ಮಧೆಂ ಥೊಡ್ಯೊ ಆಂಕ್ವಾರ್ ಚಲಿಯೊ ಆಪ್ಲ್ಯಾ ಫುಡಾರಾಕ್ ಸೊಧುನ್ ಆಯ್ಲ್ಯಾಂತ್ ಜಾಲ್ಯಾರ್ ಥೊಡಿಂ ಆಪ್ಲ್ಯಾ ಘರ್ಚಾಂಕ್ ಆಧಾರ್ಸುಂಕ್, ಆಸ್ತಿ ಘೆಂವ್ಕ್, ಘರಾಂ ಬಾಂದಂವ್ಕ್ ತಾಂಚಾ ಆವಯ್-ಬಾಪಾಯ್ನ್ ತಾಂಕಾಂ ಹ್ಯಾ ಗಾಂವಾಂಕ್ ಧಾಡ್ಲ್ಯಾಂತ್. ಅಸಲ್ಯಾವಿಶಿಂ ಥೊಡೆಪಾವ್ಟಿಂ ಲಿನಾ ಚಿಂತಾಲೆಂ ಆನಿ ಆಪ್ಣಾಯಿತ್ಲ್ಯಾಕ್ ಭಿರ್ಮೊತ್ ಪಾವ್ತಾಲೆಂ. ತ್ಯಾ ವಗ್ತಾ ಲಿನಾನ್ ಆಪ್ಲ್ಯಾ ಭಾಂಗಾರಾ ಸಾರ್ಕ್ಯಾ ಘೊವಾಕ್ ವಾಟೆಕ್ ಲಾವ್ನ್ ಭಾಂಗಾರ್ ಜಮಂವ್ಕ್ ಆಯಿಲ್ಲಿ ಚೂಕ್ ಮ್ಹಣ್ ಕೊಣೆಂಯ್ ಸಾಂಗ್ಲ್ಲೆಂ ಜಾಲ್ಯಾರ್?
ವರ್ಸಾಂ ದೋನ್ ಸಂಪ್ಲೆಂ. ಸೊಲ್ಲ್ಯಾ ಪ್ರಕಾರ್ ಲಿನಾಚಾ ಧನ್ಯಾಂನಿ ಲಿನಾಕ್ ಬೊಟಿಚಿ ಟಿಕೆಟ್ ದಿಲಿ ಆನಿ ಬರೆಂ ಪಯ್ಣ್ ಮಾಗ್ಲೆಂ.
ತಾರುಂ ಧಾಂವ್ತಾಲೆಂ. ಲ್ಹಾರಾಂ ಪಾಟಿಂ ಉರ್ತಾಲಿಂ. ಪಾಟ್ಲ್ಯಾ ಆನಿ ಮುಖ್ಲ್ಯಾ ಲ್ಹಾರಾಂಕ್ ಪಳೆಂವ್ಚಾ ಲಿನಾಚಾ ಮನಾಂತ್ ವಿವಿಧ್ ಲ್ಹಾರಾಂ ಉದೆತಾಳಿಂ. "ಹಾಂವೆಂ ಹಾಡ್ಲ್ಲೆಂ ಸಭಾರ್ ತೊಲೆ ಭಾಂಗಾರ್ ಲೊರಿಕ್ ಧಾಖಯ್ತೆಲಿಂ, ಇತ್ಲೆಂ ಭಾಂಗಾರ್ ತುಜಾ ಜಿಣ್ಯೆಂತ್ ಕರ್ನ್ ದೀಂವ್ಕ್ ಸಾಧ್ಯ್ ಆಸ್ಲ್ಲೆಂಗೀ ಮ್ಹಣ್ ವಿಚಾರ್ತೆಲಿಂ. ಸೆಜಾರ್ಚಾಂಕ್ ಮ್ಹಜೆಂ ಭಾಂಗಾರ್ ಧಾಖವ್ನ್ ಜಳಯ್ತೆಲಿಂ.." ಇತ್ಯಾದಿ ಚಿಂತ್ನಾಂನಿ ಮಗ್ನ್ ಜಾಲ್ಲ್ಯಾ ಲಿನಾಕ್, ಲೊರಿ ಸೆಜಾರ್ಚಿಂ ಮುಖಾಮುಖಿಂ, ಆಸ್ಲ್ಲ್ಯಾಬರಿ, ಉಲಯ್ಲ್ಯಾಬರಿ ಜಾತಾನಾ, ಅಪುಣ್ ಬೊಂಬೊಂಯ್ತ್ ನಾ, ಬೊಟಿರ್ ಆಸಾಂ ಮ್ಹಣ್ ಜಾಗ್ ಜಾತಾಲಿ!
ವೊರಾಂ ರಾತಿಚಿಂ ಬಾರಾ ವ್ಹಾಜೊನ್ ಗೆಲ್ಲಿಂ. ಶಾಂತ್ ದರ್ಯೊ ಕಿತ್ಯಾಕ್ಗೀ ತುಫಾನಿ ಜಾಲ್ಲೊ. ಹ್ಯಾ ವಗ್ತಾ ಲ್ಹಾನ್ ಲ್ಹಾರಾಂ ರಾಕ್ಸಾಪರಿ ತಾರ್ವಾಕ್ ಗ್ರಾಸುಂಕ್ ಆಯ್ತಿಂ ಜಾಲ್ಲಿಂ. ಎಕಾಚ್ಛಾಣೆ ತಾರ್ವಾಕ್ ಉಜೊ ಲಾಗ್ಲೊಚ್! ಉಜ್ಯಾ ಭಂವ್ತಿಂತ್ಲ್ಯಾನ್ ಯೆಂವ್ಚಾ ರಾಸ್ ರಾಸ್ ಕಾಳ್ಯಾ ಧುಂವ್ರಾಧ್ವಾರಿಂ ತಾರ್ವಾರ್ ಆಸ್ಚಿಂ ಎಕಾಮೆಕಾ ದಿಸಾನಾತ್ಲ್ಲಿಂ.
ಬೋಬೊ ಆನಿ ಆಕಾಂತ್ ಮಾತ್ರ್ ಆಯ್ಕಾತಾಲೊ. ಉಜೊ ಕಸೊ ಲಾಗ್ಲೊ, ಹೆಂ ಆವ್ಘಡ್ ಕಸೆಂ ಘಡ್ಲೆಂ ಮ್ಹಣ್ ಕೊಣೀ ಸಾಂಗೊಂಕ್ ತಾಂತುಂ ಉರೊಂಕ್ ನಾಂತ್! ಉಜ್ಯಾಂತ್ಲೊ ಕಾಳೊಕ್ ವಿಸ್ತರಿತ್ ಜಾತಾನಾ ತಾರ್ವಾಸಂಗಿಂ ಸರ್ವ್ಯ್ ಸಂಪ್ಲ್ಲೆಂ! ಲಾಖಾಂಚೆಂ ಭಾಂಗಾರ್ ಮಿಟಾಉದಾಕ್ ಜಾಲ್ಲೆಂ. ಲಿನಾಚಾ ಕುಡಿಂತ್ಲೊ ಅತ್ಮೊ ಭಾಯ್ರ್ ಸರ್ಚಾ ಆದಿಂ "ಲೊರಿ ಮ್ಹಜಾ ಭಾಂಗಾರಾ.." ಮ್ಹಳ್ಳೆ ತೀನ್ ಸಬ್ಧ್ ಮಾತ್ರ್ ಭಾಯ್ರ್ ಸರ್ಲ್ಲೆ.
ತ್ಯಾಚ್ ರಾತಿಂ ತ್ಯಾಚ್ ವಗ್ತಾ ತ್ಯಾಚ್ ವೆಳಾರ್ ಪಿಸೊ ಜಾಲ್ಲೊ ಲಿನಾಚೊ ಪತಿ ಲೊರಿ, ತಾಚ್ ಮಹಲ್ ಹೊಟೆಲಾ ಮುಖ್ಲ್ಯಾ ದರ್ಯಾ ಪೆಂಟೆಳಾರ್ ಬಸೊನ್ ಹೆಂ ಗೀತ್ ಗಾಯ್ತಾಲೊ.. "ಬಾಯ್ಲ್ ಆನಿ ಭಾಂಗಾರ್, ಕೊಣಾ ಕೊಣಾಚ್ಯಾ ಆಂಗಾರ್.." ಗೀತ್ ಸಂಪ್ತಚ್ ಲೊರಿ ಪೋಟ್ಭರ್ ಹಾಸ್ಲೊ! ದೊಳೆಭರ್ ರಡ್ಲೊ!! ಗಳೊಭರ್ ಬೊಬಾಟ್ಲೊ.
"ಲಿನಾ, ಲಿನಾ, ಹಾಂವ್ಯಿ ಕುವೇಯ್ಟ್ ಯೆತಾಂ.." ಮ್ಹಳ್ಳ್ಯಾ ಉತ್ರಾಂ ಬರಾಬರ್ ಲೊರಿ ದರ್ಯಾಂತ್ ಉಡ್ಲೊಚ್! ಉಡ್ಲ್ಲ್ಯಾ ಲೊರಿಕ್ ಪಳಯಿಲ್ಲೆ ಥೊಡೆ ಪಿಸೊ ದರ್ಯಾಂತ್ ಉಡ್ಲೊ ಮ್ಹಣ್ ಹಾಸ್ಲೆ ಶಿವಾಯ್ ತಾಕಾ ಸಾಲ್ವಾರ್ ಕರುಂಕ್ ಕೊಣೀಂ ಫುಡೆ ಆಯ್ಲೆನಾಂತ್! ಎಕಾ ಪಿಶ್ಯಾಕ್ ಸಾಲ್ವಾರ್ ಕೆಲ್ಯಾರ್ ಕೊಣೀಂ ಇನಾಮ್ ದೀನಾಂತ್ ತರ್ ಕೊಣ್ ಕಿತ್ಯಾಕ್ ಸಾಲ್ವಾರ್ ಕರಿತ್? ಗ್ರೇಸ್ತಾಂಚೊ ಪೆಟೊ ಜರ್ ದರ್ಯಾಂತ್ ಪಡ್ಲ್ಲೊ ವ ಉಡ್ಲ್ಲೊ ಜಾಲ್ಯಾರ್ ಸಬಾರ್ ಜಣ್ ದರ್ಯಾಂತ್ ಉಡೊನ್ ತಾಕಾ ಸಾಲ್ವಾರ್ ಕರ್ತೆ!
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
