ಬರವ್ಪ್ಯಾಚಿ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಕವಿತಾಝರ್

      ಬರವ್ಪ್ಯಾಚಿ ಗತ್

ತಕ್ಲಿ ಆಟಯ್ಲಿ, ಉಗ್ಡಾಸ್ ಜಿವೆ ಕೆಲೆ
ಲಿಖ್ಣೆಂತ್ ತೀಂತ್ ಕಾಗ್ದಾರ್ ದೆಂವ್ಲೆಂಚ್ ನಾ
ಕಶಿ ಸುರ್ವಾತ್ ಕರುಂ, ಹೆಂಚ್ ಮ್ಹಾಕಾ ಗೊಮ್ಲೆಂನಾ
ಫಾಂತೆಂ ಜಾತಾನಾ ಚಿಂತ್ಲೆಂ ಬರಂವ್ಚೆಂ ಸಲೀಸ್ ನಾ

ಥೊಡ್ಯಾಚ್ ದಿಸಾಂನಿ ಖೊರೊಜ್ ಪರತ್ ಜಿವಾಳ್ಳಿ
ವಿಂಚವ್ಣ್ ಆತಾಂ ಹಾವೆಂ ಕರಿಜಾಯ್‌ಚ್ ಆಸ್‌ಲ್ಲಿ
ಕಾಣಿ.. ಕವನ್.. ಲೇಖನ್.. ಯಾ ಕಾದಂಬರಿ?
ಝಳ್ಕಾಲಿ ಐಡಿಯಾ.. ಸವಾಲಾಂ ಧಾಡ್ಚಿಂ ಭಾರಿ ಬರಿಂ

ಚಿಂತುನ್ ಚಿಂತುನ್ ಸಗ್ಳ್ಯಾ ಪತ್ರಾಂಕ್ ಸವಾಲಾಂ ಧಾಡ್ಲಿಂ
ಸವಾಲ್ಲ್ ಯೆತಾ ಮ್ಹಣ್ ಪತ್ರಾಂಯ್ ಮೊಲಾಕ್ ಘೆತ್ಲಿಂ
ವರ್ಸ್ ಗೆಲ್ಯಾರ್‌ಯೀ ಸವಾಲಾಂ ಸವಾಲಾಂ ಜಾವ್ನ್ಂಚ್ ಉರ್ಲಿಂ
ಚಿಂತ್ಲೆಂ, ಸಂಪಾದಕ್ ಸಾಯ್ಭಾಚ್ಯಾ ಖಚ್ರ್ಯಾ ಡಬ್ಬ್ಯಾಂತ್‌ಚ್ ಜಿರ್ಲಿಂ

ಲೇಖನಾಂಚ್ ನಾಂತ್ ಮ್ಹಣ್ ಸಂಪಾದಕ್ ರಡ್ತಾತ್
ಕವನಾಂಚೆರ್ ಮ್ಹಾಕಾ ಖಾಯ್ಸ್ ನಾ.. ಆತಾಂ ಉರ್ಲ್ಯಾತ್ ಕಾಣ್ಯೊ
ಬರಯ್ಲ್ಯೊ.. ಪತ್ರಾಕ್ ಧಾಡ್ಲ್ಯೊ ಆನಿ ಪರ್ಗಟ್‌ಯ್ ಜಾಲ್ಯೊ
ಲೇಖನ್ ಜಾಲೊಂ.. ನಾಂವ್ ಜೊಡ್ಲೆಂ!

ಖೊರೊಜ್ ರಾವ್ಲಿನಾ ಸಂಪಾದಕ್ ಸಂಚಾಲಕ್ ಜಾಂವ್ಚಿ ಆಶಾ
ಪತ್ರಿಕೋಧ್ಯಮ್ ಜಾಲಿ ಮ್ಹಜಿ ದಿಶಾ 
ಧಯ್ರ್ ಕೆಲೆಂ.. ಮೆಟ್ ಕಾಡ್ಲೆಂ. ಆನಿ ರೀಣ್ ಕಾಡ್ಲೆಂ
ಸಂಪಾದಕ್.... ಸಂಚಾಲಕ್‌ಯೀ ಜಾಲೊಂ

ಬರ್ಪಾಂ.. ಥೊಡಿಂ ಬರಯಿಲ್ಲಿಂ.. ಥೊಡಿಂ ಆಯಿಲ್ಲಿಂ
ಆಯಿಲ್ಲಿಂ ಬರ್ಪಾಂ ದೆಖೊನ್ಂಚ್ ತಕ್ಲಿ ಘುಂವ್ಲಿ
ತಿದ್ವುನ್ ತಿದ್ವುನ್ ಜೀವ್ ಗೆಲೊ ಭಾಗೊನ್
ಇಸ್ತಿಹಾರಾಂ ಸೊಧುನ್ ಪಾಂಯ್ ಗೆಲೆ ಝರೊನ್

ಪಯ್ಲೆಂ ನಾಂವಾ ಖಾತಿರ್ ಸಗ್ಳೆಂ ಕೆಲೆಂ
ಆತಾಂ ನಾಂವ್ ಉರಂವ್ಚ್ಯಾ ಖಾತಿರ್ ವದ್ದಾಡ್ತಾಂ
ಜೀವ್ ಸುಕ್ಲಾ ಶಿಂತಿದ್ ಪುರ್ತೆಂ ತಾಪ್ಲಾಂ
ಪತ್ರ್ ಕೊಣಾಚ್ಯಾ ತರ್‌ಯೀ ಮಾತ್ಯಾರ್ ಘಾಲುಂಕ್ ರಾಕ್ತಾಂ

ಕವಿತಾಝರ್ - 131

- ಜಾನೆಟ್ ಐವನ್ ಅಲ್ಮೇಡಾ

ಜಶೆಂ ಮಾಲ್ಘಡ್ಯಾಂಚಿ ಏಕ್ ಸಾಂಗ್ಣಿ ಆಸಾ, ’ಮನ್ಶ್ಯಾಸವೆಂ ಜಿಯೆವ್ನ್ ಪಳೆ, ಉದ್ಕಾಂಕ್ ದೆಂವೊನ್ ಪಳೆ’ ಮ್ಹಳ್ಳೆಪರಿಂ ಬರವ್ಪಿ ಜಸೊ ಭಾಯ್ರ್ ದಿಸ್ತಾ, ತಸೊ ಭಿತರ್ ಆಸ್ತಾಗೀ? ಏಕ್ ಬರವ್ಪಿ ಆಪ್ಲ್ಯಾ ಮತಿಂತ್ಲ್ಯಾ ಸ್ವಪ್ಣಾಂಕ್ ಹಕೀಗತ್ ದಿಂವ್ಚಾ ವಾಟೆರ್ ಚಲ್ತಾನಾ ತಾಕಾ ಭೊಗುಂಕ್ ಪಡ್‌ಲ್ಲ್ಯಾ ಸಂಗ್ತ್ಯಾಂಚೆರ್ ಅಪುರ್ಬಾಯೆಚಾ ರಿತಿನ್ ಎಕೊಡೊ ನಿಯಾಳ್ ಕರುನ್ ದಿತಾ ಬಾಯ್ ಜಾನೆಟ್ ಐವನ್ ಅಲ್ಮೇಡಾ.

ಕವಿತಾಝರ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications