ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಸಮ್ಜತೆಲ್ಯಾಕ್ ಸಮ್ಜಾಂವ್ಚಿ ಗರ್ಜ್ ನಾ, ಸಮ್ಜಾನಾತ್ಲ್ಲ್ಯಾಕ್ ಸಮ್ಜಾವ್ನ್ ಫಾಯ್ದೊಯ್ ನಾ’
ಬದ್ಲೊನ್ ವೆಚ್ಯಾ ಸಂಸಾರಾಂತ್ ಕೊಂಕ್ಣಿ ’ಸಾಹಿತಿ’ ಖಂಯ್ ಆಸಾತ್?
ವರಸ್ : 2008
ಅಂಕೊ : 46
ಮಯ್ನೊ : ನವೆಂಬರ್
ಸಂಪಾದಕೀಯ್ - 46.
ವಲ್ಲಿ ಕ್ವಾಡ್ರಸ್
ದಿಸಾನ್ದೀಸ್ ಕಿತ್ಯಾಕ್ ಘಡ್ಯೆನ್ ಘಡಿ ಬದ್ಲೊನ್ ಆಸ್ಚ್ಯಾ ಸಂಸಾರಾಂತ್ ಆಮ್ಚೊ ದೇಸ್ಯ್ ಏಕ್ ದೆಕುನ್ ಆಮ್ಚ್ಯಾ ದೇಸಾಂತ್ಯೀ ಆಯ್ಲೆವಾರ್ಲ್ಯಾ ದಿಸಾಂನಿ ಉಟೊನ್ ದಿಸ್ಚಿ ಬದ್ಲಾವಣ್ ಕಾಂಯ್ ವಿಚಿತ್ರ್ ನ್ಹಯ್, ಪುಣ್ ಬದ್ಲಾವಣ್ ಜಾಂವ್ಚಿ ರೀತ್ ಮಾತ್ರ್ ವಿಚಿತ್ರ್ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಪ್ರತ್ಯೇಕ್ ಜಾವ್ನ್ ಆಯ್ಲೆವಾರ್ಲ್ಯಾ ದಿಸಾಂನಿ ಆಮ್ಚ್ಯಾ ದೇಸಾಚ್ಯಾ ಹರೆಕಾ ಕೊನ್ಶ್ಯಾಂನಿ ಜಾಂವ್ಚೆ ತಸಲಿ ಬದ್ಲಾವಣ್ ಫುಡಿಲ್ಯಾ ದಿಸಾಂನಿ ಆಮ್ಕಾಂ ಖಂಚ್ಯಾ ದಿಶೆಂತ್ ಚಲಂವ್ಕ್ ಸಕ್ತೆಲಿ, ವಾ ಆಮ್ಚ್ಯಾ ದೇಸಾಚೊ ಫುಡಾರ್ ಖಂಚ್ಯಾ ದಿಶೆನ್ ಚಮ್ಕತಲೊ ಮ್ಹಳ್ಳೆಂ ಏಕ್ ವ್ಹಡ್ಲೆಂ ಸವಾಲ್;
ಮಹಾರಾಷ್ಟ್ರಾಂತ್ ಎಮ್ಮೆನೆಸ್ ಪಾರ್ಟೆಚ್ಯಾ ಲೊಕಾಂ ಥಾವ್ನ್ ಉತ್ತರ್ ಭಾರತಿಯಾಂಚೆರ್; ಪ್ರತ್ಯೇಕ್ ಜಾವ್ನ್ ಬಿಹಾರಿಂಚೆರ್ ಜಾಂವ್ಚೊ ಅನ್ನ್ಯಾಯ್, ಕಾಶ್ಮಿರಾಂತ್ ಕೆದಿಂಚ್ ನಿಂವಾನಾತ್ಲ್ಲೊ ಉಜೊ, ಅಸ್ಸಾಮಾಂತ್, ಮಲೆಗಾಂವಾಂತ್ ಫುಟ್ಲ್ಲೆ ಬೋಂಬ್, ಒರಿಸ್ಸಾಂತ್ ತಶೆಂಚ್ ಹೆರ್ ರಾಜ್ಯಾಂನಿ ಧರ್ಮಾಚ್ಯಾ ನಾಂವಾಂನಿ ಜಾಂವ್ಚಿ ವೀದ್-ವಾವ್ಳ್, ಬಾಂಗ್ಲಾದೇಶಿ ಲೊಕಾಂಚಿ ಧುಸ್ಪಟ್, ಸಂಗ್-ಪರಿವಾರಾಂಚ್ಯೊ ಧೊಶಿ ಹ್ಯಾ ಸರ್ವಾಂಕ್ ಪಾಟ್ಲಾವ್ ಕರುನ್ ಅವ್ಚಿತ್ ಉಭಿ ಜಾಲ್ಲಿ ಸಂಸಾರಾಚಿ ಆರ್ಥಿಕ್ ದಿವಾಳಿ ಖರೆಂಚ್ ಜಾವ್ನ್ ಫುಡೆಂ ಯೇಂವ್ಕ್ ಆಸ್ಚ್ಯಾ ಭಿರಾಂಕುಳ್ ದಿಸಾಂಚಿಂ ಖುಣಾಂ ಧಾಖಯ್ತಾ.
ಅಶೆಂ ಮ್ಹಣೊನ್ ಖಂಚೋಯ್ ದೇಸ್ ಭಾಗೆವಂತ್ ರಿತಿನ್ ಜಿಯೆವ್ನ್ ನಾ. ಹರ್ಯೆಕಾ ದೇಶಾಂತ್ ತಾಂತಾಂಚೆ ಮ್ಹಳ್ಳೆಚ್ ಆಂತರಿಕ್ ಸಮಸ್ಸೆ ಆಸಾತ್. ಆತಂಕ್ವಾದ್ ಆಸ್ಯೆತ್, ಜಾಗತೀಕರಣ್ ಆಸ್ಯೆತ್, ಪಿಡಾ-ಶಿಡಾ ಆಸ್ಯೆತ್, ಪ್ರಾಕೃತಿಕ್ ಲುಕ್ಸಾಣ್ ಆಸ್ಯೆತ್ ವಾ ಹೆರ್ ರಿತಿರ್ ಆಸ್ಯೆತ್. ಪುಣ್ ಆಮ್ಚ್ಯಾ ದೇಸಾಂತ್ ಆಸ್ಚ್ಯಾ ಸಮಸ್ಸ್ಯಾಂ ಪಾಟಿಂ ಆಸ್ಚಿ ಮನೋಗತ್ ಮಾತ್ರ್ ಹ್ಯಾ ಸರ್ವಾಂಚ್ಯಾಕೀ ಚಡಿತ್ ಆಕಾಂತ್ ಸಾದ್ಯಾ ಮನ್ಶ್ಯಾಂಚ್ಯಾ ಕಾಳ್ಜಾಂತ್ ಉಭ್ಜಾಯ್ತಾ ಮ್ಹಳ್ಳೆಂ ಖರೆಂ.
ಸಂಸಾರಾಂತ್ ಜಿಯೆತೆಲ್ಯಾ ಲೊಕಾಂಚ್ಯಾ ಮನಾಂತ್ ಆಸ್ಚೆಂ ಚಿಂತಾಪ್, ಕಾಳ್ಜಾಂತ್ ಆಸ್ಚಿಂ ಭಗ್ಣಾಂ, ತೊಂಡಾಚೊ ಜಿನೊಸ್ ಆನಿ ಧಾಖವ್ಪ್ - ಭಿಲ್ಕುಲ್ ಎಕಾಮೆಕಾ ಉಲ್ಟಿಂ. ಆಜ್ಕಾಲ್ ಚಡ್ತಾವ್ ಲೋಕ್ ಫಕತ್ತ್ ಧಾಖವ್ಪಾಕ್ ಭುಲ್ತಾ. ದೆಖುನ್ ಭಾಯ್ಲೆಂ ರೂಪ್ ಸಜಂವ್ಚ್ಯಾರ್ ಪಡ್ಲಾ ಶಿವಾಯ್ ಭಿತರ್ಲೆ ಭಿತರ್ ಪೊಕೊರ್ನ್ ವೆಚೆತಸಲೆಂ ’ಪೊಕೊಳ್ ಜಿವಿತ್’ ಜಿಯೆವ್ನ್ ಆಸಾ.
ಹೆಂ ವಾಸ್ತವ್ ಆಮ್ಚ್ಯಾ ದೇಶಾಚಿ ಹಕೀಗತ್ ತರ್, ಆಮ್ಚ್ಯಾ ಸಮಾಜೆಂತ್, ಆಮ್ಚ್ಯಾ ಕೊಂಕ್ಣಿ ಸಮಾಜೆಂತ್ ಆಮಿ ಖಂಯ್ ಆಸಾಂವ್? ಕಿತ್ಲೆ ಪಾಟಿಂ ಉರ್ಲ್ಯಾಂವ್ ಮ್ಹಳ್ಳ್ಯಾಚೆರ್ ಎಕೊಡಿ ನದರ್ ಮಾರ್ಲಿ ತರ್, ಆಮ್ಚ್ಯಾ ಕೊಂಕ್ಣೆಂತ್ಯೀ ಅಸಲಿ ಮನೋಗತ್ ಉಟೊನ್ ಯೆಂವ್ಚಿ ಭೋವ್ ನಿರಾಶಾದಾಯಕ್ ಮ್ಹಣ್ಯೆತಾ. ಚಡ್ತಾವ್ ಥಕ್ಲ್ಯಾತ್, ಚಡ್ತಾವ್ ಪಿಕ್ಲ್ಯಾತ್ ಆನಿ ಥೊಡೆ ಆಸಕ್ತ್ ಸುಸ್ತ್ ಜಾವ್ನ್ ಲಕ್ಲ್ಯಾತ್ ಆನಿ ಪಾಟಿಂ ಉರ್ಲ್ಯಾತ್ - ದೆಕುನ್ ಮುಕಾರ್ ಆಸ್ಚೆ ಸರ್ವ್ ಮುಖೆಲಿ ಜಾಲ್ಯಾತ್. ಹಿಚ್ಚ್ ಪರಿಗತ್ ಸರ್ವ್ಯೀ ದಿಶೆಂನಿ; ದೆಕುನ್ ವೆದಿಚೆರ್ ಚಡ್ಲ್ಲೆ ಸರ್ವ್ ನಟ್, ವೆದಿ ಪಾಟಿಂ ಆಸ್ಚೆ ಸರ್ವ್ ನಿರ್ದೇಶಕ್, ಮೈಕಾ ಹಾತಿಂ ಧರ್ಲ್ಲೆ ಸರ್ವ್ ಗಾವ್ಪಿ, ತಿಂತೆರ್ ಹಾತಿಂ ಧರ್ಲ್ಲೆ ಸರ್ವ್ ಬರಯ್ಣಾರ್, ತೊಂಡಾಕ್ ಆಯಿಲ್ಲೆಂ ಉಲ್ಟೆಂ ಉಲಯ್ತೆಲೆ ವಿಮರ್ಶಕ್ - ಹಾಂಚೆ ಮಧೆಂ ಖಂಚ್ಯಾಗೀ ಮುಲ್ಯಾಂತ್, ಕೊಣಾಚ್ಯಾಗೀ ದಾಕ್ಶೆಣೆನ್, ಕೊಣಾಚ್ಯಾಗೀ ಭಿಂಯಾನ್ ವಾ ಕಿತೆಂಚ್ ನಾಕಾ ಮ್ಹಳ್ಳೆಂ ಬೇಜವಭ್ದಾರಿ ಚಿಂತಾಪ್ಗೀ ವಾ ಕಿತ್ಯಾಕ್ ದುಸ್ಮಾನ್ಕಾಯ್ ಮ್ಹಳ್ಳೆಂ ಚಿಂತ್ಪಾಚೊ ಪಾಂಗ್ರುನ್ ಕೊನ್ಶ್ಯಾಂತ್ ಘೊರೆಂವ್ಚ್ಯಾ ಸಾಹಿತಿಂ ಸಮೊರ್ ವೆವಸ್ತಿತ್ ರಿತಿನ್ ಚಲ್ಚೆಂ ’ಪತ್ರಿಕೋಧ್ಯಮ್’ ಮ್ಹಳ್ಳೊ ದಂದೊ.
’ಬರಯ್ಣಾರ್ ಆನಿ ಸಾಹಿತಿ ಮಧೆಂ ಕಸ್ಲೊ ಫರಕ್?’ ಮ್ಹಣ್ ಮ್ಹಾಕಾ ಸವಾಲ್ ಕೆಲ್ಲೊ ಎಕ್ಲೊ ಅಪ್ಣಾಕ್ ಮಹಾನ್ ಕೊಂಕ್ಣಿ ಸಾಹಿತಿ (ಸ್ವ-ಘೋಶಿತ್) ಮ್ಹಣ್ ಧಾಂಗ್ರೊ ಮಾರ್ಚ್ಯಾನ್. ಪುಣ್ ಹಾಂವೆಂ ಜಾಪ್ ದೀಂವ್ಕ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಜಾಪಿ ಮಾಗ್ತಲೊ ಸಾಹಿತಿ ಜಾಲ್ಲೆಪರಿಂಚ್ ನಾ, ಜಾಪಿ ಸೊಧ್ತಲೊ ಮಾತ್ರ್ ಸಾಹಿತಿ ಜಾಂವ್ಕ್ ಸಕ್ತಾ. ಸಮ್ಜತೆಲ್ಯಾಕ್ ಸಮ್ಜಾಂವ್ಚಿ ಗರ್ಜ್ ನಾ, ಸಮ್ಜಾನಾತ್ಲ್ಲ್ಯಾಕ್ ಸಮ್ಜಾವ್ನ್ ಫಾಯ್ದೊಯ್ ನಾ - ಆಸೊಂ.
ಪುಣ್ ಹಕೀಗತೆಂತ್ ಕೊಂಕ್ಣೆಂತ್ ನೊವೊದಾಚ್ಯಾಕೀ ಚಡಿತ್ ಠಕ್ಕೆ ಬರಯ್ಣಾರ್ ಫಕತ್ತ್ ಬರಯ್ಣಾರ್ ಜಾವ್ನ್ ಉರ್ಲ್ಯಾತ್. ದೆಕುನ್ ತ್ಯಾಚ್ಚ್ ಕಾಲ್ಪನಿಕ್ ಕಾಣ್ಯಾಂಕ್ ಅಪ್ಲೊ ಸಂಸಾರ್ ಕರುನ್ ಆಸಾತ್ ಶಿವಾಯ್ ಆಪ್ಲ್ಯಾ ಘರಾ ಪಲ್ತೊಡಿ ಕೊಣ್ ಮೆಲಾ, ಕೊಣ್ ಆಸಾ ಮ್ಹಳ್ಳೆಂ ತಾಂಕಾಂ ಪಡೊನ್ ಗೆಲ್ಲೆಂ ನಾ. ತಾಂಕಾಂ ಫಕತ್ತ್ ಪತ್ರಾಂನಿ ಆಪ್ಲಿ ತಸ್ವೀರ್ ಆಯ್ಲ್ಯಾರ್ ಪುರೊ, ಆನಿ ಆಪ್ಣಾನ್ ಬರಯಿಲ್ಲೆಂ (ಕಸ್ಲೇಂಯ್ ತೆಂ ಆಸೊಂ) - ಪರ್ಗಟೊನ್ ಆಯ್ಲ್ಯಾರ್ ಪುರೊ. ತೆಚ್ಚ್ ಪತ್ರಾಚೆ ವಿತರಕ್, ತೆಚ್ಚ್ ಪತ್ರಾಚೆ ಪ್ರಚಾರಕ್, ತೆಚ್ಚ್ ಪತ್ರಾಚೆ ಪೋಶಕ್ ಆನಿ ತೆಚ್ಚ್ ಪತ್ರಾಚೆ ಪ್ರಾಯೋಜಕ್ ಕಿತ್ಯಾಕ್ - ತಾಂಚಿಂಚ್ ಅಂಕಣಾಂ, ತಾಂಚ್ಯೊಚ್ ಕಾಣ್ಯೊ, ತಾಂಚಿಂಚ್ ಕವಿತಾ. ಕೊಣೆಂಯ್ ವಾಯ್ಟ್ ಉಲಯ್ನಾಯೆ, ಉಲಯ್ಲ್ಯಾರ್ ತಸಲ್ಯಾಂಚೆರ್ ಕೇದ್ ಉಡಂವ್ಚ್ಯಾಕ್, ವಾ ತಾಂಕಾಂ ಹಲ್ಕ್ ಕರ್ಚ್ಯಾಕ್ ಹಾಂಚಿಂಚ್ ವಿಡಂಬನಾಂ - ವ್ಹಾ! ಕಿತ್ಲಿ ಭಾಗಿ ಕೊಂಕ್ಣಿ ನ್ಹಯ್?
ದೆಕುನ್ ಆತಾಂ ಪರಿಗತ್ ಅಶಿ ಆಸಾ ಮ್ಹಳ್ಯಾರ್, ಬಾರಾಂತ್ ಬಸೊನ್ ಕೊಣಾಚ್ಯಾಗೀ ದುಡ್ವಾಂತ್ ಪಿಯೆವ್ನ್, ಕೊಣಾಕ್ಗೀ ಯೆಟುನ್ ತುಂ ಬರಯ್ರೆ, ಹಾಂವ್ ಘಾಲ್ತಾ, ತುಂ ಸೊಡಯ್ರೆ ಹಾಂವ್ ಛಾಪ್ತಾಂ ಮ್ಹಳ್ಳೆಂ ಪತ್ರಿಕೋಧ್ಯಮ್ ಜಾಲಾಂ. ಹಾಂಗಾ ಸಂಪಾದಕ್ಯೀ ತೆಚ್ಚ್, ಪ್ರಕಾಶಕ್ಯೀ ತೆಚ್ಚ್, ಬರಯ್ಣಾರ್ಯೀ ತೆಚ್ಚ್, ಆನಿ ಹೆಚ್ಚ್ ಮನೋಗತೆಚೆ ಅಂಕಣ್ಕಾರ್. ಕಸಲಿಚ್ಚ್ ಅರ್ಹತಾ ಗರ್ಜ್ ನಾ - ತಿಂತೆರ್ ಧರುಂಕ್ ಕಳ್ಳ್ಯಾರ್ ಪುರೊ. ಭಾಸೆಚಿ ಗಿನ್ಯಾನ್ ಜಾಂವ್, ನೈತಿಕ್ ಮೊಲಾಂ ಜಾಂವ್, ಜವಾಭ್ದಾರೆಚಿ ನದರ್ ಜಾಂವ್ ನಾತ್ಲ್ಯಾರೀ ಚಲ್ತಾ. ಹಿ ಪರಿಗತ್ ಪಳೆವ್ನ್ ಕಾಂಠಾಳೊನ್ ಸಭಾರಾಂ ಕೊಂಕ್ಣೆಕ್ ಉಜೊ ಪಡೊಂದಿ ಮ್ಹಣ್ ಪಯ್ಸ್ ರಾವ್ತಾನಾ, ಹಾಂಗಾ ಥೊಡ್ಯಾಚ್ ಮಯ್ನ್ಯಾಂನಿ, ವ ಥೊಡ್ಯಾಚ್ ವರ್ಸಾಂನಿ ಹಿ ಕೊಂಕ್ಣಿ ಅಪ್ಲಿಚ್ ಖಾಸ್ಗಿ ಆಸ್ತ್-ವಸ್ತ್ ಮ್ಹಣೊನ್ ಹೆ ಚಿಂತುಂಕ್ ಲಾಗ್ತಾತ್, ಇತ್ಲೆಂಚ್ ನ್ಹಯ್, ಹೆಂ ವ್ಹಯ್ ಪಾತ್ಯೆಂವ್ಚೆ ಸಯ್ತ್ ಆಸಾತ್. ಉಪ್ರಾಂತ್ ಹಾಂಚೆಂಚ್ ಕೊಂಕ್ಣಿ ಸಾಹಿತ್, ಹೆಚ್ಚ್ ವೊರಯ್ಣಾರ್, ಹೆಚ್ಚ್ ವಿಮರ್ಶಕ್, ಹೆಚ್ಚ್ ಪಂಡಿತ್ ಆನಿ ಹಾಂಚಿಚ್ ಕೊಂಕ್ಣಿ. ಕೊಣೆಂಯ್ ಆಕ್ಶೇಪ್ ಕರುಂಕ್ ನಾ - ಕೆಲೊ ತರ್ ಹಾಂಚಿಂ ನಾಂವಾಂ ಪಾಡ್ ಕರ್ಚಿಂ ಎಸ್ಸೆಮೆಸ್ಸಾಂ, ಆನಿ ಕಿತೆಂ ಭೊಂಗೊಸ್ತೊಳ್. ಸಾಂಗಾ - ಹ್ಯಾ ಮನೋಗತೆಕ್ ಆನಿ ಭಜರಂಗ್ ದಳಾಚ್ಯಾ ಮನೋಗತೆಕ್ ಕಾಂಯ್ ಫರಕ್ ಆಸಾ?
ಬದ್ಲಾವಣ್ ಜಾಯ್ - ಭಿಲ್ಕುಲ್ ಜಾಯ್. ಪುಣ್ ಹರ್ಯೆಕಾಕ್ ಏಕ್ ವೇಳ್ ಆಸಾ, ಸ್ಥಾನ್ ಆಸಾ, ಮಾನ್ ಮರ್ಯಾದ್ ಮ್ಹಳ್ಳಿ ಆಸಾ. ಕಾಜಾರಾಚ್ಯಾ ಸಂಭ್ರಮಾರ್ ಮೊರ್ನಾಚ್ಯೊ ಕಂತಿಗೊ ಗಾಂವ್ಚ್ಯೊ ಸೊಭ್ತಾ?, ಬಾಪ್ತಿಜ್ಮಾ ವೆಳಾರ್ ’ಜನಗಣಮನ’ ಸೊಭ್ತಾ? ಮ್ಹಾಕಾ ತರ್ಯೀ ಸೊಭಾನಾ. ದೆಖುನ್ ಆಜ್ ಆಮಿಂ ಬರಯಿಲ್ಲೆಂಚ್ ಸಾರ್ಕೆಂ ಆನಿ ವರ್ತೆಂ - ಹೆರಾಂಚೆಂ ಸರ್ವ್ ಸಾರೆಂ ವಾ ಶೆಣ್. ಆಮ್ಕಾಂ ಆಮಿ ಕೆಲ್ಲೆಂ ಸಾರ್ಕೆಂ ನ್ಹಯ್ ಮ್ಹಣ್ ಕೊಣೆಂಯ್ ಮ್ಹಣೊಂಕ್ ನ್ಹಜೊ. ಜರ್ಥರ್ ಎಕಾ ವಿಮರ್ಶಕಾಕ್ ಹೆಂ ಸ್ವೀಕಾರ್ ಕರುಂಕ್ ಸಾಧ್ಯ್ ನಾ ತರ್ ತಾಕಾ ಹೆರಾಂಚ್ಯಾ ಬರ್ಪಾಂಚೆರ್ ವಿಮರ್ಸೊ ಕರುಂಕ್ಯೀ ಯೋಗ್ಯತಾ ನಾ.
ದೆಕುನ್ ಸಂಸಾರ್ ಕಿತ್ಲೊ ಮುಖಾರ್ ಪಾವ್ಲಾ ತರ್ಯೀ ಆಮ್ಚ್ಯಾ ಕೊಂಕ್ಣೆಂತ್ ಆಮ್ಚೆ ಬರವ್ಪಿ ಅಜೂನ್ ಥಂಯ್ಚ್ ಆಸಾತ್ ವಾ ಪಾಟಿಂ ಯೆತಾತ್, ಜಶೆಂ ಕಾನಡಿಂತ್ ಏಕ್ ಸಾಂಗಾಪ್ ಆಸಾ ’ಬರು ಬರುತ್ತಾ ರಾಯರ ಕುದುರೆ ಕತ್ತೆಯಾಯಿತು’ ಮ್ಹಣ್ಚೆಪರಿಂ.
ಹ್ಯಾ ಪರಿಗತೆಮಧೆಂ ಕೊಂಕ್ಣೆಂತ್ ಉದೆಲ್ಲಿ ’ಶೆಣ್ ಚಳ್ವಳ್’ ಕಾಂಯ್ ನವೊ ಭರ್ವಸೊ ಹಾಡಂವ್ಕ್ ಸಕ್ತಾ ಮ್ಹಣೊನ್ ಫಕತ್ತ್ ಹಾತ್ ಭಾಂದುನ್ ಬೊಸ್ಲ್ಯಾಂವ್ ತರ್ - ಆಮ್ಚೆ ತಿತ್ಲೆ ಬೇಕೂಫ್ ಹ್ಯಾ ಸಂಸಾರಾಂತ್ ಕೊಣೀಂ ಆಸ್ಚೆನಾಂತ್. ಹಿ ಚಳ್ವಳ್ ಫಕತ್ತ್ ಕೊಣಾಚೆಂ ಸಾಹಿತ್ಯ್ ’ಶೆಣ್’ ಕೊಣಾಚೆಂ ’ಘಾಣ್’ ಮ್ಹಳ್ಳ್ಯಾಕ್ ಸೀಮಿತ್ ಜಾಯ್ನಾಸ್ತಾಂ ನವಿಂ ಮಿಸಾಂವಾಂ ಸುರು ಜಾಯ್ಜಯ್. ನವೆ ಪ್ರಯೋಗ್ ಜಾಯ್ಜಯ್. ಪುಣ್ ಹಾಂಗಾಸರ್ ಜಾಲ್ಯಾರೀ ಉದೆತಾ ತೆಂಚ್ ಸವಾಲ್ - ಕೊಣೆಂ ಕರ್ಚೆಂ? ಕೆದಾಳಾ ಕರ್ಚೆಂ? ಕಶೆಂ ಕರ್ಚೆಂ? ಆನಿ ಎಕಾಧಾವೆಳಾ ಕೆಲ್ಯಾರೀ ಕೊಣಾಕ್ ಹಾಚಿ ಗರ್ಜ್ ಪಡ್ಲ್ಯಾ?
ಕೊಂಕ್ಣೆಚೊ ಇತ್ಲೊ ಲೋಕ್ ಬುಧ್ವಂತ್, ವಾಚ್ಪಿ ವರ್ಗಾಚೊ ಆಸಾ ತರ್ಯೀ ಕೊಂಕ್ಣಿ ಪತ್ರಾಂ ವಾಚ್ತೆಲ್ಯಾಂಚೊ ಸಂಖೊ ಫಕತ್ತ್ 3% ಮಾತ್ರ್. ಹಾಂಗಾಸರ್ ಚಡ್ತಾವ್ ಪತ್ರಾಂ ಹೆಚ್ಚ್ 3% ವಾಚ್ಪ್ಯಾಂಕ್ ಮತಿಂತ್ ಧರುನ್ ಪತ್ರಾಂ ಚಲಯ್ತಾ ಆನಿ ತೆಚ್ಚ್ ಪಾರಂಪರಿಕ್ ಸಾಹಿತ್ (ವಾ ಸಂಕ್ಪಾಶಣ್) ದಿತಾ ಶಿವಾಯ್, ಬಾಕಿಚೊ 97% ಲೋಕ್ ಕಿತೆಂ ಆಶೆತಾ? ತೊ ಕಿತ್ಯಾಕ್ ಪಾಸೊನ್ ಕೊಂಕ್ಣಿ ಪತ್ರಾಂ ವಾಚಿನಾಂತ್ ಮ್ಹಳ್ಳೆಂ ಸಮ್ಜೊಂಚೆ ಪ್ರೇತನ್ ಸಯ್ತ್ ಕೆಲ್ಲೆಂ ದಿಸಾನಾ. ಕೊಂಕ್ಣೆಂತ್ ಆಮಿ ಪಾಂಚ್, ಧಾ, ವೀಸ್, ಪನ್ನಾಸ್ ವರ್ಸಾಂಚೆಂ ಪತ್ರಿಕೋಧ್ಯಮ್ ಚಲವ್ನ್ ಅನ್ಭೋಗ್ ಆಸಾ ಮ್ಹಣ್ತೆಲ್ಯಾಂನಿ ಗೊಂಯ್ಟಾಂಯ್ ಉದೆಶೆಂ ಕೆಲ್ಲೆಂನಾ ಮ್ಹಳ್ಳೆಂ ಅಪುಟ್ ಸತ್. ಕಾನಡಿ ಲಿಪಿಯೆಂತ್ ನೊವೊದ್ ಠಕ್ಕೆ ಸಾಹಿತ್ಯ್ ಆಸಾ ಮ್ಹಣ್ ದಾಂಗ್ರೊ ಮಾರ್ತೆಲ್ಯಾಂನಿ ಆಜ್ ಕೊಂಕ್ಣಿ ಸಾಹಿತ್ಯಾಕ್ ಆರ್ ಮಾರ್ಚೆಪರಿಂ ಕೆಲಾಂ ತರ್ ಅಸಲ್ಯಾಚ್ಚ್ ಮಹಾನ್ ಪತ್ರಿಕೋಧ್ಯಮಿಂನಿ(?) ಮ್ಹಳ್ಳೆಂ ಅಪುಟ್ ಸತ್ ಸಮ್ಜೊಂಚಿ ಗರ್ಜ್ ಆಸಾ.
ಆಮ್ಚ್ಯಾ ವಾಚ್ಪ್ಯಾಂಕ್ ಆಳ್ಶಿ ಕೆಲ್ಲ್ಯಾಂತ್ ಆಮ್ಚ್ಯಾ ಸರ್ವ್ ಸಂಪಾದಕಾಂಚೆಂ ಬೇಜವಭ್ದಾರಿಪಣ್ ಪಯ್ಲೆಂ ಆಸಾ ಮ್ಹಳ್ಳೆಂ ನಿಶ್ಟುರ್ ಸತ್ ಪಯ್ಲೆಂ ಮಾಂದುನ್ ಘೆಜಯ್. ಶೆಣ್ ಚಳ್ವಳೆನ್ ಸಯ್ತ್ ಹ್ಯೇ ದಿಶೆನ್ ಚಿಂತಾಪ್ ಆಟಂವ್ಕ್ ನಾ. ಜರ್ ತರ್ ಪರ್ಗಟ್ಚೊ ಸಂಪಾದಕ್ ಯೋಗ್ಯ್ ಆಸಾ ತರ್, ಅಸಲೆಂ ಬರಯಿಲ್ಲೆಂ ಪರ್ಗಟ್ ಕರ್ಚ್ಯಾಧಿಂ ವೊರಾವ್ನ್ ಪಳೆತೊ ನ್ಹಯ್? ಪುಣ್ ಹಾಂಗಾಸರ್ ಅಶೆಂ ಕರ್ತೆಲೆ ಕೊಣ್ ಆಸಾತ್? ಆನಿ ಹ್ಯಾ ಮಧೆಂ ಬರೆಂ ಸಾಹಿತ್ ದಿಂವ್ಚಿ ಶ್ಯಾಥಿ ಆಸ್ಲೆಲೆ ಆಜ್ ಖಂಯ್ ಆಸಾತ್? ಆಮ್ಚೆ ಬರಯ್ಣಾರ್, ಕವಿ ಸಯ್ತ್ ಅಸಲ್ಯಾಚ್ ಪೊಕೊಳ್ ಚಿಂತ್ಪಾಂತ್ ಅಪುಣ್ ಭಾಗಿ ಮ್ಹಳ್ಳೆಂ ಚಿಂತಾಪ್ ಚಿಂತುಂಕ್ ಲಾಗ್ಲ್ಯಾತ್. ದೆಕುನ್ ಕೆದಾಳಾಗೀ, ಖಂಯ್ಗೀ, ಕಶೆಂಗೀ, ಮೊರೊನ್ ಗೆಲ್ಲ್ಯಾಂಚ್ಯಾ ಯಾದಿನ್ ಸುಕ್ಯಾ ಸಯ್ಲಾಪಾಚಿಂ, ಕೃತಕ್ ಭಗ್ಣಾಂಚಿ ಕವಿತಾ ಬರಯ್ತಾತ್ ಪುಣ್, ಅಮ್ಚೆಚ್ ಪಯ್ಕಿಂತ್ಲೊ ಕವಿ ಆಜ್ ಕಸೊ ಜಿಯೆತಾ? ಖಂಯ್ ಆಸಾ? ಮ್ಹಳ್ಳೆಂ ಚಿಂತುಂಕ್ ಸಯ್ತ್ ವಚಾನಾಂತ್ - ಹೆಂ ಹಕೀಗತ್.
ಸಾಹಿತಿಕ್ ಆಸಾಜಯ್ ಜಾಲ್ಲಿಂ ಪಯ್ಲಿಂ ಲಕ್ಶಣಾಂ - ದೀಶ್ಟ್, ಜವಾಭ್ದಾರಿ, ಅಪ್ಣಾಂಕ್ ಹೆರಾಂ ಥಂಯ್ ದೆಖ್ಚಿ ಶ್ಯಾಥಿ, ಸಮಾಜೆಂತ್ ಜಾಂವ್ಚ್ಯಾ ಹರ್ಯೆಕಾ ಅನೀತೆಚೆಂ ಉಗ್ತ್ಯಾನ್ ಖಂಡನ್ ಕರ್ಚೆಂ ಧಯ್ರ್ ಆನಿ ಕಸ್ಲಿಚ್ ಮುಲಾಜ್ ನಾತ್ಲ್ಲೆಂ ಚಿಂತಾಪ್. ಆನಿ ಭೋವ್ ಗರ್ಜೆಚೆಂ - ನಾಂವಾಚೊ, ಮಾನಾಚೊ, ಪ್ರಶಸ್ತೆಚೊ, ಪುರಸ್ಕಾರಾಚೊ ಕಸ್ಲೊಚ್ ಅಂಗಾಲಾಪ್ ನಾತ್ಲ್ಲೆಂ ಚಿಂತಾಪ್.
ಸಾಂಗ್ಲ್ಲೆಪರಿಂ ಆತಾಂ ಉಟ್ತಾ ವ್ಹಡ್ಲೆಂ ಸವಾಲ್ - ತಸಲೆ ಕೊಂಕ್ಣೆಂತ್ ಅಜೂನ್ ಜೀವ್ ಆಸಾತ್?
ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
