ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಆಮಿಂ ಥೊಡೆ ಪಾವ್ಟಿಂ ಚಿಂತಾಂವ್, ದುಬ್ಳಿಕಾಯ್ ಫಕತ್ತ್ ಭುಕೆಲ್ಲಿ, ನಾಗ್ಡೆಂ ಆಸ್ಚಿ ಆನಿ ರಾವೊಂಕ್ ಘರ್ ನಾಸ್ಚಿ ಮ್ಹಣ್. ಪುಣ್ ಕೊಣಾಕ್ಚ್ ನಾಕಾ ಜಾಲ್ಲಿಂ ಜಾವ್ನ್ ಜಿಯೆಂವ್ಚಿ, ಕೊಣಾಚೊಚ್ ಮೋಗ್ ನಾಸ್ತಾಂ ಜಿಯೆಂವ್ಚಿ, ಕೊಣಾಥಾವ್ನ್ಯೀ ಜತನ್ ಮೆಳಾನಾಸ್ತಾಂ ಜಿಯೆಂವ್ಚಿಚ್ ವ್ಹಡ್ಲಿ ದುಬ್ಳಿಕಾಯ್ ಜಾವ್ನಾಸಾ.’ - ಮದರ್ ತೆರೆಜಾ
ಬದ್ಲಾನಾತ್ಲ್ಲೊ ಲೋಕ್
ವರಸ್ : 2007
ಅಂಕೊ : 41
ಮಯ್ನೊ : ನವೆಂಬರ್
ಸಂಪಾದಕೀಯ್ - 41.
ವಲ್ಲಿ ಕ್ವಾಡ್ರಸ್
ಆಮ್ಚಾ ಕಿರಿಸ್ತಾಂವ್ ಸಮಾಜೆಕ್ ’ಗಾಡ್ವಾ ಕುಳಿಯೆಚಿ ಸಮಾಜ್’ ಮ್ಹಣ್ ಕೊಣೆಂಗೀ ವೊಲಾಯಿಲ್ಲೆಂ ಅಜೂನ್ ಮ್ಹಾಕಾ ಉಡಾಸ್ ಆಸಾ, ಕಿತ್ಯಾಕ್ ಮ್ಹಳ್ಯಾರ್ ಜಲ್ಮಾ ಥಾವ್ನ್ ಮೊರ್ತಾ ಪರ್ಯಾಂತ್ ಆಮ್ಚ್ಯಾ ಸಮಾಜೆನ್ ಎಕಾ ನ್ಹಯ್ ಎಕಾ ರಿತಿನ್ ’ಗಾಡಾಂವ್’ ಜಾವ್ನ್ ದೀಸ್ ಸಾರ್ಚೆ ಶಿವಾಯ್, ಅಜೂನ್ ಸಯ್ತ್ ಹೆಂ ಚಿಂತಾಪ್ ಫಟ್ ಮ್ಹಣ್ ರುಜು ಕರುಂಕ್ ಕೊಣ್ಯೀ ಎದೊಳ್ ಸಕೊಂಕ್ ನಾ.
ಅಜೀಕ್ ಕಾಂಯ್ ಪಾಂಚ್-ಸ ಧಾಕ್ಡ್ಯಾಧ್ಲ್ಯಾ ಕಾಳಾರ್ ಆಮ್ಚೊ ಕಿರಿಸ್ತಾಂವ್ ಲೋಕ್ ಗುಲಾಮ್ಗಿರಿಚಿ, ಕತ್ತೆಚಾಕ್ರೆಚಿ ಜಿಣಿ ಜಿಯೆವ್ನ್ ಆಸ್ಲ್ಲೊ. ಚಡ್ತಾವ್ ಲೋಕ್ ಅಶಿಕ್ಪಿ, ಕಠೀಣ್ ದುಬ್ಳೊ, ದೀಸ್ಭರ್ ಥಂಯ್ ಹಾಂಗಾ ಮ್ಹಣ್ ಕೊಣಾ ಕೊಣಾಗೆರ್ ಬುಟ್ಟಿ ಚಾಕರಿ ಕರುನ್ ಆಪ್ಲ್ಯಾ ಕುಟ್ಮಾಕ್ ಪೊಸ್ತಾಲೊ; ಕೊಣ್ ತೊಟಾಂನಿ, ಕೊಣ್ ಗಾದ್ಯಾಂನಿ, ಕೊಣ್ ಬೆಟಾಂನಿ ತರ್ ಆನಿ ಕೊಣ್ ಅಪ್ಲೆಂ ಘರ್ದಾರ್, ಕುಟಾಮ್ ಸಾಂಡುನ್ ಪಯ್ಸಿಲ್ಯಾ ಘಾಟಾಂನಿ ವಚೊನ್ ಕಾಮ್ ಕರುನ್ ಪೊಯ್ಶೆ ಜೊಡ್ತಾಲೊ.
ಉಪ್ರಾಂತ್ ಹ್ಯಾ ಕಿರಿಸ್ತಾಂವ್ ಲೊಕಾಚಿ ಪರಿಗತ್ ಮಾತ್ಶಿ ಸುಧ್ರೊನ್ ಆಯ್ಲಿ, ತೊಟಾಚಿ ಜೋಡ್ ಉತ್ರೊನ್ ಲೋಕ್ ಪಯ್ಸಿಲ್ಯಾ ಬೊಂಬೊಯ್ ಪಾವ್ಲೊ ಆನಿ ಬೊಂಬೊಯ್ಗಾರ್ ಜಾಲೊ. ಆನಿ ಬೊಂಬೊಯ್ ವಚೊನ್, ಕೊಣ್ ಹೊಟ್ಲಾಂನಿ, ಕೊಣ್ ಘರಾಂನಿ ಆಯಾ ಜಾವುನ್, ಕೊಣ್ ಬೊಟ್ಲೆರ್ ಜಾವ್ನ್, ಕೊಣ್ ಗಾಡಿಯೊ ಧಾಂವ್ಡಾವ್ನ್ ಆನಿ ಕೊಣ್ ಬೆಕ್ರೆಂನಿ ಪೀಟ್ ಮೊಳುನ್ ಪೊಯ್ಶೆ ಜೊಡಿಲಾಗ್ಲೊ ಆನಿ ಮಾಯ್ಗಾಂವ್ಚಾ ಆಪ್ಲ್ಯಾ ಕುಟ್ಮಾದಾರಾಂಕ್, ಬಂದ್ವಾಂಕ್ ಪೊಸುಂಕ್ ಲಾಗ್ಲೊ.
ಮಾಯ್ಗಾಂವಾಂನಿ ಕೊಲ್ವಾಚಿಂ ಘರಾಂ ಬದ್ಲೊನ್ ನಳೆ ಆಯ್ಲೆ, ಚಿಮ್ಣಿ, ಲಾಂಪ್ಯಾಂವ್ ಪಾಲ್ವೊನ್ ವೀಜ್ ದಿವೆ ಆಯ್ಲೆ - ಜಾವ್ಯೆತ್ ಆಂಬಿಲ್ ಪೇಜ್ ಬದ್ಲೊನ್ ಪೇಜ್ ಆನಿ ಲೊಣ್ಚೆಂ ಜಾಲೆಂ, ಪುಣ್ ಆಮ್ಚೊ ಕಿರಿಸ್ತಾಂವ್ ಲೋಕ್ ಕಾಂಯ್ ದಿಸಾಚೆಂ ಪೋಟ್ಭರ್ ಜೇಂವ್ಕ್ ಲಾಗ್ಲೊ. ಗಾಂವಾಂತ್ ಪಿಡಾ ಶಿಡಾ ಆಸ್ಲಿ, ಕಸ್ಟ್ ಅನ್ವಾರ್ ಆಸ್ಲೆ ಪುಣ್ ಮನಿಸ್ ಕಸ್ಟಾಂನಿ ತರ್ಯೀ ಎಕಾಮೆಕಾ ಪಾವೊನ್ ಜಿಯೆತಾಲೊ.
ಉಪ್ರಾಂತ್ ಕೊಣ್ ಸಾತ್ ದರ್ಯೆ ಉತ್ರೊನ್ ಗೆಲೊ ಆನಿ ಗಲ್ಫಾಚ್ಯಾ ಪೊಯ್ಶ್ಯಾಂನಿ ಆಮ್ಚ್ಯಾ ಕಿರಿಸ್ತಾಂವ್ ಸಮಾಜೆಚೆರ್ ರಾಜ್ವಟ್ಕಿ ಕೆಲಿ. ನಳ್ಯಾಂಚಿಂ ಘರಾಂ ಟೆರೆಸಾಚಿಂ ಜಾಲಿಂ, ಘರಾಂನಿ ಟಿವಿ, ವಿಡಿಯೊ, ಟೇಪ್ರೆಕೋರ್ಡರ್, ಕಂಫ್ಯೂಟರಾಂ, ಎ.ಸಿ, ಕಾರಾಂ, ಬಾಯ್ಕಾಂ, ಸ್ಕೋಚ್ ಯೆತಾನಾ, ಸಮಾಜೆಂತ್ ಸರ್ವಾಂಕೀ ಏಕ್ಚ್ ಸ್ಪರ್ಧೊ; ಹಾಂವ್ಚ್ ಉಂಚ್ಲೊ ಮ್ಹಣ್ ಧಾಖಂವ್ಚೊ. ಸಂಸಾರಿ ಧನ್ ದವ್ಲತೆಚೆಂ ಧಾಕವ್ಪ್ ಕರುನ್ ಆಮ್ಚಿ ಜಿಣಿ ಆಮಿ ಬದ್ಲಿಲಿ. ಸರ್ವಾಂ ಆಮಿ ಸ್ವಾವಲಂಬಿ ಜಾಲ್ಯಾಂವ್, ಆಮ್ಕಾಂ ಆಮ್ಚ್ಯಾ ಸೆಜ್-ಸಾಂಬಾರ್ಯಾಚಿ ಗರ್ಜ್ ನಾ, ಫಿರ್ಗಜ್ ಸೊಡ್ಯಾಂ, ಆಮ್ಚ್ಯಾ ಕುಟ್ಮಾಚ್ಯಾ ಸಾಂದ್ಯಾಂಚಿಂಚ್ ಎಕಾಮೆಕಾಕ್ ಗರ್ಜ್ ನಾ. ಆಮ್ಚೆಲಾಗಿಂ ದುಡು ಆಸಾ, ವೆವೆಗ್ಳ್ಯಾ ಬ್ಯಾಂಕಾಂನಿ, ಫಿಕ್ಸ್ ಡೆಪಾಸಿಟಾರ್, ಆಸ್ತಿಚ್ಯಾ ಲೆಕಾರ್, ಜಾಯ್ತೊ ದುಡು ಆಸಾ. ಆಮ್ಕಾಂ ವಶೀಲಾಯ್ ಆಸಾ, ಸಂಸಾರಾಂತ್ ಜಿಯೆಂವ್ಚಿ ರೀತ್ ಕಳಿತ್ ಆಸಾ.
ಆಯ್ಚೊ ಕಾಳ್ ಗಲ್ಪಾಚೊ ಕಾಳ್ ನ್ಹಯ್, ಆಯ್ಚೊ ಕಾಳ್ ಇಂಟರ್ನೆಟ್ಟಾಚೊ ಕಾಳ್, ತಾಂತ್ರಿಕತೆಚೊ ಕಾಳ್, ಆಜ್ ಆಮಿ ಘಾಟಾಕ್ ಜಾಂವ್, ಬೊಂಬೊಯ್ ಜಾಂವ್, ಗಲ್ಫಾಕ್ ಆಶೆನಾಂವ್, ಆಜ್ ಆಮ್ಕಾಂ ಎಕ್ಚ್ಚ್ ಶೆವೊಟ್, ಕಶೆಂ ತರ್ಯೀ ಅಮೇರಿಕಾ, ಕೆನಡಾ, ಯು.ಕೆ ವಾ ಆಸ್ಟ್ರೇಲಿಯಾ ವಚೊಂಕ್. ಆನಿ ವೆಗಿಂಚ್ ಆಮ್ಚ್ಯಾ ಘರಾಂ ಘರಾಂನಿ ಗಾಡಿಯೊ ನ್ಹಯ್, ಹೆಲಿಕೋಪ್ಟರಾಂ, ಚಾರ್ಟರ್ಡ್ ಫ್ಲಾಯ್ಟಾಂ ಆಸ್ತಿತ್ ತರ್ ತಾಂತುಂ ನವಾಲ್ ನಾ. ಪುಣ್ ಏಕ್ ಘಡಿ ಆಮ್ಚೆ ಭಂವಾರಿಂ ಎಕೊಡಿ ನದರ್ ಘುಂವ್ಡಾಂವ್ಚಿ ತರ್;
ಆಯ್ಲೆವಾರ್ ದುಭಾಯಾಂತ್ ಥೊಡ್ಯಾ ಭಾರತೀಯ್ ಕಾಮೆಲ್ಯಾಂನಿ ಕೆಲ್ಲಿ ’ಸ್ಟ್ರಾಯ್ಕ್’ ಮಾತ್ರ್ ಆಮ್ಚ್ಯಾ ಪ್ರಗತೀಪರ್ ಚಿಂತ್ಪಾಕ್ ಬಳ್ವಂತ್ ಕುರಾಡ್ ಮಾರಿನಾಯೆ ರಾವಾನಾ. ಆಮಿ ಎಕಾ ವಾಟೆರ್ ಮೊಸ್ತ್ ಪ್ರಗತಿಶೀಲ್ ಜಾಲ್ಯಾಂವ್ ಮ್ಹಣ್ ಹರ್ಧೆಂ ಪೆಟುನ್ ಆಸ್ಚಾ ಘಡ್ಯೆ, ಆಮಿ ಅನ್ಯೇಕಾ ವಾಟೆರ್ ಸಾಂಡುನ್ ಆಯಿಲ್ಲೆಂ ನಾಗ್ಡೆಂ ಸತ್ ಆಮ್ಚೆ ಮುಕಾರ್ ಉಭೆಂ ರಾವೊನ್ ಆಮ್ಕಾಂಚ್ ಹೆಡಾಯ್ತಾ. ಮ್ಹಳ್ಯಾರ್ ಆಮ್ಚ್ಯಾ ಸಮಾಜೆಂತ್ ಏಕ್ ವರ್ಗ್ ಅಜೂನ್ ತಸೊಚ್ಚ್ ಆಸಾ, ಜೊ ವೆಳಾಕಾಳಾಕ್ ಸರಿ ಜಾವ್ನ್ ಅಜೂನ್ ಸಯ್ತ್ ಬದ್ಲೊಂಕ್ ನಾ, ಬದ್ಲೊಂಚೆಪರಿಂ ದಿಸಾನಾ - ಕಿತ್ಯಾಕ್?
’ದುಭಾಯ್’ ಮ್ಹಜ್ಯಾ ಮತಿಂತ್ ಕೆದಿಂಚ್ ವಿಸ್ರೊನ್ ವಚೊಂಕ್ ಸಕಾನಾಸ್ಲೆಂ ಶ್ಹೆರ್, ಅಜೀಕ್ ಕಾಂಯ್ ಧಾ ವರ್ಸಾಂ ಆಧಿಂ ಹಾಂವ್ ದುಭಾಯ್ ಶೆರಾಂತ್ಲ್ಯಾ ಎಕೆಕಾ ಗಲ್ಲೆಂನಿ, ಗಲ್ಪಾಚಿಂ ಸ್ವಪ್ಣಾಂ ವ್ಹಾವಾವ್ನ್ ಗೆಲ್ಲೊಂ, ತಿಂ ಸ್ವಪ್ಣಾಂ ಚ್ಯುರಾನ್ ಚೂರ್ ಜಾವ್ನ್ ರಿತ್ಯಾ ಹಾತಾಂನಿ ಪಾಟಿಂ ಆಯಿಲ್ಲೊ ಉಡಾಸ್ ಅಜೂನ್ ಮ್ಹಜ್ಯಾ ಕಾಳ್ಜಾ ಮನಾಂತ್ ಆಸಾತ್. ಆಪ್ಲ್ಯಾ ಕುಟ್ಮಾಕ್, ಆಪ್ಲ್ಯಾ ಇಸ್ಟಾಂಕ್, ಆಪ್ಲ್ಯಾ ಬಾಂವ್ಡಾಂಕ್ ಗಾಂವಾಂತ್ ಸೊಡುನ್ ಹ್ಯಾ ರೆಂವೆಚ್ಯಾ ಶ್ಹೆರಾಂತ್ ಕಾಮ್ ಕರುಂಕ್ ಯೆತಾನಾ ಮ್ಹಜೆಲಾಗಿಂಯೀ ಹೆರ್ ಕಿತೆಂಚ್ ನಾತ್ಲ್ಲೆಂ.
ಹೆಂ ’ದೇಶ್ಭಕ್ತ್, ಆದರ್ಶ್ವಾದಿ ಚಿಂತಾಪ್’ ಭೋವ್ ಬರೆಂ - ಪುಣ್ ಫಕತ್ತ್ ಆಮಿ ಪೋಟ್ಭರ್ ಜೇವ್ನ್, ಧೆಂಕ್ ಕಾಡ್ನ್, ದೊಳೆ ಧಾಂಪುನ್, ಸ್ವಪ್ಣಾಂ ದೆಖ್ಚಾ ವಗ್ತಾ ಮಾತ್ರ್ ಶಿವಾಯ್, ನ್ಹೆಸೊಂಕ್ ಮೂಂಜ್ ಆಸೊನ್ ಕಾಶ್ಟಿ ನಾಸ್ತಾಂ ಆಸ್ಚ್ಯಾ ಘಡ್ಯೆ, ಕುಟ್ಮಾಕ್ ಮಾತ್ಯಾ ವಯ್ರ್ ಪಾಕೆಂ ನಾಸ್ಚ್ಯಾ ಘಡ್ಯೆ, ವಾ ಭುಕೆಕ್ ಪೊಟಾಕ್ ಏಕ್ ಘಾಸ್ ಶಿತ್ ನಾಸ್ತಾಂ ವ್ಹಳ್ವಳ್ಚ್ಯಾ ವಗ್ತಾಂ ಹೆ ದೇಸ್ಭಕ್ತ್, ಆದರ್ಶ್ವಾದಿ ಮ್ಹಳ್ಳೆ ಫಕತ್ತ್ ಪೊಕೊಳ್ ಸಭ್ದ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಅಶೆಂ ಪಳೆಂವ್ ಗೆಲ್ಯಾರ್ ಪೊಟಾಕ್ ಏಕ್ ಥೆಂಬೊ ನೀಸ್ ಸಯ್ತ್ ನಾಸ್ಚಾ ವಗ್ತಾಂ ಖಂಚೋಯ್ ಮನಿಸ್ ಆಪ್ಲ್ಯಾ, ಆಪ್ಲ್ಯಾ ಕುಟ್ಮಾಚ್ಯಾಂಕ್ ಪೊಟಾಕ್ ಏಕ್ ಘೊಟ್ ನೀಸ್ ಮಾತ್ರ್ ಆಶೆತಾ ಶಿವಾಯ್ ದೇಶ್ಭಕ್ತ್ ನ್ಹಯ್. ಆನಿ ಅಸಲ್ಯಾ ಘಡ್ಯೆ ಸಯ್ತ್ ದೇಶ್ಭಕ್ತ್ ನಿಯಾಳಿಜೆ, ಕೊಣೆಂಯ್ ಗಲ್ಫಾಕ್ ವಚಾನಾಯೆ ಮ್ಹಣ್ ಚಿಂತಾ ತರ್ ಮ್ಹಜೆಪ್ರಕಾರ್ ತೊ ಬೇಕೂಫ್. ಹಾಂವ್ ಕಾಂಯ್ ಆಮ್ಚ್ಯಾ ಸರ್ವ್ ಲೊಕಾಂನಿ ಗಲ್ಫಾಕ್ ಯೇವ್ನ್ ಕಾಮ್ ಕರಿಜಯ್ ಮ್ಹಳ್ಳ್ಯಾ ಚಿಂತ್ಪಾಚೊ ವಾದಿ ನ್ಹಯ್. ಪುಣ್ ಕೊಣೆ ಖಂಯ್ಚರ್, ಕಶೆಂ ಕಾಮ್ ಕರಿಜಯ್ ಮ್ಹಳ್ಳಿ ಸರ್ವಾಂಕ್ ಆಪಾಪ್ಲಿ ವಿಂಚವ್ಣ್ ಜಾಯ್ನಾ, ಥೊಡೆಪಾವ್ಟಿಂ ನಿರ್ವೋಗ್ ನಾಸ್ತಾಂ ಸಯ್ತ್ ಕಾಮ್ ಕರಿಜೆ ಪಡ್ತಾ.
ಸಕಾಳಿಂ ಫಾಂತ್ಯಾರ್ ದೊಳೆ ಉಘಡ್ಲ್ಯಾರ್ ಕಾಂಯ್ ಮಾಯ್ಗಾಂವಾಂತ್ ಧನ್ಪಾರಾಂಚ್ಯಾ ಸುರ್ಯಾಕ್ ಪಳೆಲ್ಲೆಪರಿಂ ಜಾಲ್ಲೊ ಅನ್ಭೋಗ್, ತಿತ್ಲೊ ಉಜ್ವಾಡ್, ತಿತ್ಲಿ ಧಗ್ ಸೊಸುನ್ ದೀಸ್ ಕಾಡ್ಲ್ಲೆಶಿವಾಯ್ ನಿರ್ವೋಗ್ ನಾ. ಹ್ಯಾ ಪರಿಗತೆಕ್ ಸೊಸುನ್ ತರ್ಯೀ ಕಾಮ್ ಕರ್ಚಿಂ ಕಿತ್ಲಿಂ ನಾಂತ್? ಪುಣ್ ಸರ್ವಾಂಕ್ ಎಕಾಚ್ಚ್ ಲೆಕಾಚೆಂ ಕಾಮ್, ಜಿವಿತ್ ಆಸಾ ಮ್ಹಣ್ ನಾ. ಕೊಣ್ ಮರ್ಯಾದಿಚೆಂ ಕಾಮ್ ಕರ್ನ್ ಸಯ್ತ್ ಹಾಂಗಾಚ್ಯಾ ವಾಡೊನ್ ಯೆಂವ್ಚ್ಯಾ ಮಾರ್ಗಾಯೆಂತ್ ದೀಸ್ ಕಾಡುಂಕ್ ವದ್ದಾಟ್ತಾ ತರ್ ಆನಿ ಕೊಣ್ ದೊಗಾಂನಿ ರಾಂವ್ಚಾ ಎಕಾ ಕುಡಾಂತ್, ಕಾಂಯ್ ಧಾ-ಭಾರಾ ಜಣ್ ಜಿಯೆತಾ, ಎಕೇಕ್ ಧಿರಾಮ್ ಉರಂವ್ಚ್ಯಾ ಆಶೆನ್, ತಾಂಕಾಂಯ್ ಆಶಾ ಅತ್ರೆಗ್ ಆಸಾತ್; ಬರೆಂ ನೆಸೊಂಕ್, ಬರೆಂ ಖಾಂವ್ಕ್, ಬರಿ ಜಿಣಿ ಜಿಯೆಂವ್ಕ್, ತರ್ಯೀ ತಾಣಿಂ ಖಾಂವ್ಚೆ ಸುಖೆ ಖುಬುಸ್, ವಾ ಥೊಡೆಪಾವ್ಟಿಂ ಉಪಾಶಿಂ. ಕಿತ್ಯಾಕ್? ಹೆ ಎಕೇಕ್ ಧಿರಾಮ್ ತರ್ಯೀ ಉರಯ್ಲ್ಯಾರ್, ಕಾಂಯ್ ಮಯ್ನ್ಯಾಕ್ ಆಪ್ಲ್ಯಾ ಮಾಯ್ಗಾಂವಾಕ್ ಪಯ್ಶೆ ಧಾಡ್ಯೆತ್ ನ್ಹಯ್ಗೀ? ಮ್ಹಳ್ಳ್ಯಾ ಚಿಂತ್ಪಾನ್. ತಾಂಚಿ ಎಕೆಕಾ ದಿಸಾಚಿ, ಎಕೆಕಾ ಖಿಣಾಚಿ ಜಿಣಿ ಭಿರಾಂಕುಳ್. ಕೊಣಾಕ್ ಮಯ್ನ್ಯಾಚೊ ಸಾರ್ಕೊ ಸಾಂಬಾಳ್ ಮೆಳ್ತಾ ವಾ ನಾ ತೆಂ ಕಳಿತ್ ನಾ, ಆನಿ ಕೊಣಾಕ್ ಮೆಳಾತ್ ತರ್ಯೀ, ಫಾಲ್ಯಾಂ ಹೆಂ ಕಾಮ್ ಆಸಾ ವಾ ನಾ ಮ್ಹಳ್ಳೆಂ ನಿಘಂಟ್ ನಾ. ಹಿ ವಿಜಾ ಲಾಭೊಂಕ್ ಕಶೆಂಯ್ ಕೊಣಾ ಕೊಣಾಚೆ ಪಾಂಯ್ ಧರುನ್, ಆಪ್ಲಿ ಆಸ್ತ್, ಆಪ್ಲ್ಯಾ ಬಾಯ್ಲೆಚೆಂ ಭಾಂಗಾರ್, ಪಿಡ್ಡುಕ್ ಸಯ್ತ್ ಆಡೊವ್ ಘಾಲುನ್, ಥೊಡ್ಯಾಂನಿ ಆಪ್ಲ್ಯೊ ಕಾತಿ ಝರವ್ನ್ ವಾ ವಿಖುನ್ ಹಜಾರಾಂನಿ-ಲಾಖಾಂನಿ ಪೊಯ್ಶೆ ಯೇಜಂಟಾಂಕ್ ಯೆಟುನ್ ಆಯಿಲ್ಲೆಂ ಕಶೆಂಯ್ ಜಾಲೆಂ. ಥೊಡೆ ಪಾವ್ಟಿಂ ಎಕಾ ಕಾಮಾಕ್ ಹಾಡ್ನ್ ಅನ್ಯೇಕ್ ಕಾಮ್ ಕರಿಜಾಯ್ ಪಡ್ತಾ.
ಹ್ಯಾ ಪರಿಗತೆಂತ್ ಕೊಣ್ ಪೆಪ್ಸಿಚೆ ಡಬ್ಬೆ ಜಮವ್ನ್ ದೀಸ್ ಕಾಡ್ತಾ ತರ್ ಆನಿ ಕೊಣ್ ಚೊರಿಯಾಂ ಸೊರೊ ವಿಖುನ್ ದೀಸ್ ಕಾಡ್ತಾ. ಕೊಣಾಕ್ ಗರ್ಜೆಚೆಂ ತರ್ ಕೊಣಾಕ್ ಮರ್ಜೆಚೆಂ.
ಹ್ಯಾ ಸಂದರ್ಭಾರ್ ಆಮ್ಚ್ಯಾ ದೇಶಾಚಿ ಆರ್ಥಿಕ್ ಪರಿಗತ್ ಸುಧ್ರೊನ್ ಯೆಂವ್ಚಿ ಗಜಾಲ್ ಸಂತೊಸಾಚಿಚ್ಚ್. ಪುಣ್ ಪಯ್ಲೆಂಚ್ ಅರ್ಧೆಂ ಜೆವಾಣ್ ಜೇವ್ನ್ ಮಾಯ್ಗಾಂವಾಕ್ ಪೊಯ್ಶೆ ಧಾಡ್ತೆಲ್ಯಾಂಚ್ಯಾ ಪೊಟಾಕ್ ಅನ್ಯೇಕ್ ಮಾರ್, ರಿಣಾಚೊ ಭರೊ, ಚಡ್ಚಿ ಮಾರ್ಗಾಯ್, ಪಯ್ಲೆಂ ಏಕ್ ಪೆಕೆಟ್ ಖುಬುಸ್ ತರ್ಯೀ ಸವಾಯೆರ್ ಮೆಳ್ತಾಲೊ ಆತಾಂ ತಾಚೆಂಯೀ ಮೋಲ್ ಚಡ್ಲಾಂ. ಹ್ಯಾ ಪರಿಗತೆಂತ್ ತಾಂಚೆಂ ರುದಾನ್ ಆಯ್ಕತೆಲಿಂ ತರ್ಯೀ ಕೊಣ್?
ಹ್ಯಾ ದಿಸಾಂನಿ ಖರೆಂಚ್ ಜಾವ್ನ್ ಭೋವ್ ದುಬ್ಳೆ ಜಾವ್ನಾಸಾತ್ ಗಲ್ಫಾಗಾರ್, ಕಾಂಯ್ ಹಾಂತ್ಲೆ ಥೊಡೆ ಬರ್ಯಾ ಕಾಮಾರ್ ಆಸ್ತಿತ್ ವಾ ಬರೊ ಸಾಂಬಾಳ್ ಜೊಡ್ತಿತ್, ತರ್ಯೀ ಚಡ್ತಾವ್ ಲೊಕಾಂಚಿ ಅಜೂನ್ ತಿಚ್ಚ್ ಪರಿಗತ್, ಪಾಂಯಾಂಕ್ ವೊಡ್ಲ್ಯಾತ್ ಮಾತ್ಯಾಕ್ ಪಾವಾನಾ, ಮಾತ್ಯಾಕ್ ವೊಡ್ಲ್ಯಾರ್ ಪಾಂಯಾಂಕ್ ಪಾವಾನಾ ಮ್ಹಳ್ಳಿ ಗತ್.
ಆಮ್ಚೊ ದೇಸ್ ಪ್ರಗತೆಚಿಂ ಪಾವ್ಲಾಂ ಚಮ್ಕೊನ್ ಆಸಾ, ಸಂಸಾರಾಂತ್ ಭೋವ್ ವೇಗಾನ್ ಉಂಚಾಯೆಕ್ ಪಾಂವ್ಚ್ಯಾ ತೀನ್ ರಾಷ್ಟ್ರಾಂ ಪಯ್ಕಿಂತ್ ಆಮ್ಚೊ ಭಾರತ್ ದೇಸ್ ಏಕ್ ಮ್ಹಳ್ಳೆಂ ಸತ್. ಪುಣ್ ಆಮ್ಚ್ಯಾ ದೇಶಾಂತ್ಲಿಂ ಥೊಡಿಂ ಅಜೂನ್ ಅಪ್ಲ್ಯಾ ಕುಡಿಚೆ ವಿಸ್ವೆ ವಿಖುನ್ ಜಿಯೆತಾತ್, ಕೊಣ್ ಆಪ್ಲ್ಯಾ ಧುವೆಕ್ ವಿಖ್ತಾ, ಕೊಣ್ ಆಪ್ಲ್ಯಾ ಭಯ್ಣಿಕ್ ವಿಖ್ತಾ. ಆಮ್ಚೆಲಾಗಿಂ ಇಂಟರ್ನೆಟ್ಟಾಂ ಆಸಾತ್ ತರ್ಯೀ ಆಮ್ಚ್ಯಾ ಸಮಾಜೆಂತ್ ಜಶೆಂ ಗ್ರೇಸ್ತ್ ಗ್ರೇಸ್ತ್ ಜಾತೇಚ್ ವೆತಾತ್ಗೀ ತಿತ್ಲೆಚ್ ಮಾಪಾನ್ ಗರೀಬ್ ಗರೀಬ್ ಜಾತೇ ವೆತಾತ್. ಆನಿ ಹ್ಯಾ ಪರಿಗತೆಚೆರ್ ಇಲ್ಲೊ ಅರ್ಸೊ ಧರುಂಕ್ ಖಂಚೀಯ್ ಸಂಘಟನಾಂ ಮುಖಾರ್ ಯೆಂವ್ಚೆಂ ಮ್ಹಜ್ಯಾ ಕುಡ್ಡ್ಯಾ ದೊಳ್ಯಾಂಕ್ ತರ್ಯೀ ದಿಸಾನಾಂತ್. ಆಮ್ಚೊ ಥೊಡೊ ಶಿಕ್ಪಿ ಲೋಕ್ ಅಜೂನ್ ಜಾತ್-ಧರ್ಮಾಚ್ಯಾ ನಾಂವಾರ್ ಆಮ್ಚ್ಯಾ ರಾಜಕೀಯ್ ಮುಖೆಲ್ಯಾಂಚೆ ಕಟ್ಪುತ್ಳಿ ಜಾವ್ನ್ಸಮಾಜೆಕ್ ಚುರಾನ್ ಚುರೊ ಕರುಂಕ್ ಲಾಗ್ಲ್ಯಾತ್. ಆಮ್ಚಿಂ ಸಂಚಾಲನಾಂ ಅಜೂನ್ ಫಿರ್ಗಜೆಂನಿ ಭಾಂದ್ಪಾಂ/ಹೊಲಾಂ ಭಾಂದ್ಚ್ಯಾರ್ ವೆಸ್ತ್ ಆಸಾತ್, ಪಾರ್ಟ್ಯೊ, ಪಿಕ್ನಿಕಾಂ ಕರ್ಚ್ಯಾಂತ್, ವಾ ಲೊಕಾಂಕ್ ಕುಸೊಳಾಂ ದುಖ್ತಾಸರ್ ಹಾಸಂವ್ಚ್ಯಾಂತ್ ಆನಿ ಮಾನ್-ಸಮ್ಮಾನಾಂನಿ ವೆಸ್ತ್ ಆಸಾತ್.
ತರ್ ಹ್ಯಾ ವರ್ಗಾಚಿ ಜಿಣಿ ಜಿಯೆತೆಲೊ ಆಮ್ಚೊ ಕೊಣ್? ಆಮ್ಕಾಂ ಕಿತೆಂ ಲೆಕ್ತಾ? ಆಮ್ಚಿಂ ಸಂಚಾಲನಾಂ, ಆಮ್ಚೆ ಸಂಘ್ ಸಂಸ್ಥೆ ’ಆಮಿ’ ಮ್ಹಳ್ಳೆ ದೊರೆ ಭಾಂದ್ಚಾರ್ ವೆಸ್ತ್ ಜಾತಾನಾ, ಅಸಲ್ಯಾ ವರ್ಗಾಚ್ಯಾ ಕೊಣಾಯ್ಕೀ ಏಕ್ ಕಾಮ್, ಏಕ್ ಘರ್, ಎಕಾ ವರ್ಸಾಚೆಂ ನ್ಹೆಸಾಪ್, ಎಕಾ ಮಯ್ನ್ಯಾಚೆಂ ನಿರ್ಮಳ್ ಜೆವಾಣ್ ತರ್ಯೀ ಅಸಲ್ಯಾ ವರ್ಗಾಂತ್ ಜಿಯೆತೆಲ್ಯಾಂಕ್ ದಿಲ್ಲೆಂ ತರ್ ಕಿತೆಂ ಜಾತೆಂ? ಹೆಂ ಕೊಣೆ ಕರ್ಚೆಂ? ಆಮ್ಚೆ ಧಾರ್ಮಿಕ್ ಮುಖೆಲಿ ಅಜೂನ್ ಫೆಸ್ತಾಚ್ಯಾ ಮುಡ್ದೊಮಾಂಕ್ ವಾತಿ ವಾಂಟ್ಚ್ಯಾರ್ ವೆಸ್ತ್ ಆಸಾತ್, ಆಮ್ಚೆ ಲಾಯಿಕ್ ಮುಖೆಲಿ ಸಯ್ತ್ ಅಜೂನ್ ವಾರ್ಷಿಕೋತ್ಸವ್/ಫೆಸ್ತಾಂ ಆಚರಣಾಂನಿ, ಹೌಸಿ-ಹೌಸಿ ಖೆಳಾಂನಿ ವೆಸ್ತ್ ಆಸಾತ್, ಆಮ್ಚ್ಯೊ ಮಾಗ್ಣ್ಯಾ ಜಮಾತಿ ಸಯ್ತ್ ’ಕೊಣ್ ಕೊಣಾಪಾಟ್ಲ್ಯಾನ್ ಧಾಂವ್ಲಾಂ, ಕೊಣೆ ಕೊಣಾಚೊ ಗರ್ಬ್ ಕಾಡ್ಲಾ’ ಮ್ಹಳ್ಳ್ಯಾ ಚಿಂತ್ಪಾಂನಿಚ್ ವೆಸ್ತ್ ಆಸಾ ಶಿವಾಯ್, ಆಮ್ಚೆ ಮಧೆಂ ಹ್ಯಾ ವರ್ಗಾಚೆ ಅಜೂನ್ ಚಡೊನ್ಂಚ್ ಆಸಾತ್ ಮ್ಹಳ್ಳೆಂ ಕ್ರೂರ್ ಸತ್.
ಆನಿ ಹ್ಯಾ ಪರಿಗತೆಂತ್ ಆಮಿ, ಭಾಗೆವಂತ್, ದೆವಾನ್ ವಿಂಚುನ್ ಕಾಡ್ಲೆಲಿ ಪರ್ಜಾ, ಹಫ್ತ್ಯಾಕ್ ಮಿಸಾಕ್ ವಚೊನ್ ’ಎಕಾಮೆಕಾಚೊ ಮೋಗ್ ಕರ್ಯಾಂ’ ಮ್ಹಣ್ ತಾಳೊ ಪಿಂಜುನ್ ಬೊಬಾಟ್ಚೆ, ಕೊಣ್ ಹೆ ’ಎಕಾಮೆಕಾ’ಂತ್ಲೆ? ಕಸಲೊ ತೊ ಮೋಗ್? ಮ್ಹಳ್ಳೆಂ ಚಿಂತುಂಕ್ ಸಕ್ಲ್ಲ್ಯಾಂವ್ ತರ್?
ಹ್ಯಾ ವಗ್ತಾಂ ಖರೆಂಚ್ ಜಾವ್ನ್ ಮ್ಹಾಕಾ ಸಾಹಿರ್ ಲುಧ್ಯಾನ್ವಿನ್ ಬರಯಿಲ್ಲ್ಯೊ ಹ್ಯೊ ವೊಳಿ ಉಡಾಸಾಕ್ ಯೆತಾತ್;
"ಇಸ್ಕೊ ಹಿ ಜೀನಾ ಕೆಹೆತೇ ಹೈ ತೊ ಯೂಹೀಂ ಜೀಲೇಂಗೆ, ಉಫ್ ನಾ ಕರೇಂಗೇ, ಲಬ್ ಸೀಲೇಂಗೆ, ಆಂಸೂ ಪೀಯೇಂಗೆ"
[ಜರ್ ಹಾಕಾಚ್ಚ್ ಜಿಣೆ ಮ್ಹಣ್ಚೆಂ ತರ್, ಅಶೆಂಚ್ ಜಿಯೆವ್ಯಾಂ, ಅಯ್ಯೋ ಮ್ಹಣ್ಚೆಂ ನಾಕಾ, ಓಂಟ್ ಶಿಂವ್ಯಾಂ ಆನಿ ದುಖಾಂ ಪಿಯೆವ್ಯಾಂ]
ಪುಣ್ ಅಖ್ರೇಕ್ ಉಟ್ತಾ ಏಕ್ ಸವಾಲ್, ಆಮ್ಕಾಂ ವಾಚುನ್/ಆಯ್ಕೊನ್ ಸುದ್ರೊಂಕ್ ಜಾತೆಂ ತರ್ ಕಿತೆಂ ಆಮ್ಕಾಂ ವಾಂಜೆಲ್ ಆಸಾ, ವೇದ, ಖುರಾನ್ ಆಸಾತ್; ಜರ್ ತ್ಯಾ ಗೃಂಥಾಂನಿ ಆಮ್ಕಾಂ ಬದ್ಲುಂಕ್ ನಾಂ ತರ್, ಆತಾಂ ಹ್ಯೊ ದೋನ್ ವೊಳಿ ಕಶ್ಯೊ ಆಮ್ಕಾಂ ಚಿಂತುಂಕ್ ಕರ್ತಿತ್ ನ್ಹಯ್ಗಿ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
