ಆಯ್ಲೊ,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಪಿಂತುರಾಚೆರ್ ಪ್ರೇರಣ್ ಜೊಡುನ್ ಕವಿತಾ ಬರಂವ್ಕ್ ’ತಿಂತೆರಾಂತ್ ಪಿಂತುರಾಂ’ ಅಂಕಣಾಕ್ ಭೆಟ್ ದಿ.

ಕವಿತಾಝರ್

ಆಯ್ಲೊ, ಜೆಜು ಆಯ್ಲೊ!

ನತಾಲಾಂ ಫೆಸ್ತ್ ಆಯ್ಲೆಂ ಹಾಂಗಾ ಧಾಂವೊನ್, ಧಾಂವೊನ್
ಆಚರುಯಾಂ ವ್ಹಡಾ ಮರ್ಜೆನ್, ಕುಸ್ವಾರ್ ಖಾಂವವ್ನ್
ಏಕ್ ದೀಸ್ ಆಬ್ಳೆ ಮರಿ ಉಟೊನ್ ಜುಜೆಲಾಗಿಂ ಉಲಯ್ಲಿ
ಆಪುಣ್ ಗುರ್ವಾರ್ ಮ್ಹಣೊನ್ ತಿ ತಾಕಾ ಸಾಂಗಾಲಾಗ್ಲಿ
      ಜುಜೆ ಬಾವ್ಡೊ ದೊಳೆ ವ್ಹಡ್ಲೆ ಕರುನ್ ತಿಕಾಚ್ ಪಳಯ್ತಾ
      ಕಾಡ್ತಾಂ ಲಗಾಡ್ ಮ್ಹಳ್ಳ್ಯಾಪರಿಂ ದೊಳೆ ವಾಟಾರ್ನ್ ಉಲಯ್ತಾ
      ಭಿಂಯೆಲ್ಲಿ ಮರಿ ಉಪಾಯ್ ನಾಸ್ತಾಂ ಕುಜ್ನಾ ಕುಶಿನ್ ಧಾಂವ್ತಾ
      ಸರ್ಗಾವಯ್ಲೊ ಭಡ್ವೊ ಜುಜೆಕ್ ಏಕ್‌ಚ್ಚ್ ಪಾವ್ಟಿಂ ಉಟಯ್ತಾ
ದುಭಾವ್ನಾಕಾ ಜುಜೆ ತುಂ ಮರಿ ಗರ್ಭೆಸ್ತ್ ಜಾಲಿ ಮ್ಹಣ್
ದೆವಾಚಿ ತಿ ಇಚ್ಚಾ ಆತಾಂ ತಿಣೆಂ ಜ್ಯಾರಿ ಕರುಂಕ್ ಜಾಯ್
ತುವೆಂ ತಿಕಾ ಆತಾಂ ಭಾರಿಚ್ ಮಾಯಾಮೊಗಾನ್ ಪಳೆಂವ್ಕ್ ಜಾಯ್
ಸರ್ಗಾವಯ್ಲ್ಯಾ ಬಾಳಾಕ್ ತಿ ಜನನ್ ಸಂಸಾರಾಂತ್ ದಿತೆಲಿ
      ಜೆಜು ಮ್ಹಳ್ಳ್ಯಾ ನಾಂವಾನ್ ತಿ ತಾಕಾ ಆಪಂವ್ಕ್ ಲಾಗ್ತೆಲಿ
      ಹಾಂವ್ ನ್ಹಯ್‌ಗಿ ತಿಚೊ ಘೊವ್, ಅಶೆಂ ದೆವಾನ್ ಕಿತ್ಯಾ ಕೆಲೆಂ
      ಬಾಪಯ್ ಜಾಂವ್ಚೆಂ ಭಾಗ್ ಮ್ಹಜೆ ಥಾವ್ನ್ ನಪಂಯ್ಚ್ ಜಾಲೆಂ
      ತಶೆಂ ಭಿಲ್ಕುಲ್ ಚಿಂತಿನಾಕಾ ಹ್ಯಾ ಘಡ್ಯೆ ಮ್ಹಣ್ತಾ ಆಂಜ್
ತುಂಚ್ ಬಾಪಯ್ ಮ್ಹಣ್ ಚೀಂತ್; ಪಾಶಾರ್ ಕರ್ ಹರ್‍ಯೆಕ್ ಸಾಂಜ್
ಬಾವ್ಡೊ ಜುಜೆ ಕರ್ತೊಲೊ ಕಿತೆಂ, ಆಂಜಾ ಉತಾರ್ ಆಯ್ಕಾತಾ
ಥೊಡೆ ಪಾವ್ಟಿಂ ಚಿಂತುನ್, ಚಿಂತುನ್ ಆಪ್ಣಾ ಇತ್ಲ್ಯಾಕ್ ಕರ್ಗಾತಾ
ನೋವ್ ಮಹಿನೆ ಪಾಶಾರ್ ಜಾತಾತ್ ಮರಿ ಭರ್‌ಲ್ಲಿ ಗುರ್ವಾರ್
ಹೆರೊದ್ ಸಗ್ಳ್ಯಾ ಲೋಕಾಕ್ ಧಾಡ್ತಾ ಕಾನಿಶ್‌ಮಾರ್ ಓರ್ಡರ್
      ಸಗ್ಳ್ಯಾಂಕ್ ಆತಾಂ ವಚೊಂಕ್ ಆಸಾ ಬೆತ್ಲೆಹೆಮ್ ಶಹರಾಕ್
      ಬಾವ್ಡೊ ಜುಜೆ ಗೋಟ್ಯಾಂತ್ಲೆಂ ತೆಂ ಗಾಡಾಂವ್ ವೊಡುನ್ ಹಾಡ್ತಾ
      ಮರಿಯೆಕ್ ತಾಚೆರ್ ಬಸವ್ನ್ ತೊ ಜೆರುಜಲೆಮಾಕ್ ಚಲ್ತಾ
      ಮರಿ ಬಾವ್ಡಿ ಆಂಕ್ಡುನ್-ಪಾಂಗ್ರುನ್ ಕಶೀಯ್ ಥಂಯ್ಸರ್ ಪಾವ್ತಾ
ಶೆರಾಕ್ ಲಾಗಿಂ-ಲಾಗಿಂ ಪಾವ್ತಾಂ ಯೇಣೊ ತಿಕಾ ಯೆತಾತ್
ಜುಜೆ ಸಗ್ಳೊ ಪಿಸಾಂತುರ್ ಜಾವ್ನ್ ಆಸ್ರೊ ಸೊಧುಂಕ್ ಲಾಗ್ತಾ
ಗೆಲ್ಲ್ಯಾ ಕಡೆನ್ ಸರ್ವಾಂಚೆ ಇನ್ಕಾರ್, ನಿಮಾಣೆಂ ಗೊಟೊ ದಿಸ್ತಾ
ಜಾಲ್ಲೆಂ ಜಾತಾ ಆಂಕ್ವಾರ್ ಮರಿಯೆಕ್ ತೊ ಸಕ್ಲಾ ದೆಂವಯ್ತಾ
      ತುರ್ತಾನ್ ತಿಕಾ ಗೊಟ್ಯಾಭಿತರ್ ಗೊರ್ವಾಂ ಮಧೆಂ ಲಿಪಯ್ತಾ
      ಥೊಡ್ಯಾಚ್ಚ್ ವೇಳಾನ್ ಉಂಗೇಂ-ಉಂಗೇಂ ಆವಾಜ್ ತಾಕಾ ಆಯ್ಕಾತಾ
      ಜೆಜು ಆಯ್ಲೊ, ಜೆಜು ಆಯ್ಲೊ - ಮರಿ ತಾಕಾ ಲಾಗಿಂ ಆಪಯ್ತಾ
      ಪರ್ಜಳಾಚೊ ಬಾಳೊಕ್ ಜೆಜುಕ್ ಪಳೆವ್ನ್ ಜುಜೆ ಸಗ್ಳೊಚ್ಚ್ ಶೆರ್ಮೆತಾ
ಮತಿಂತ್ಲೆಂ ಸವಾಲ್, ಆತಾಂ ಹಾಂಗಾ ನವಾಲ್ ಜೆಜುಕ್ ನಮಾನ್ ಮ್ಹಣ್ತಾ
ಸರ್ಗಾವಯ್ಲೆ ಭಡ್ವೆ ಸಗ್ಳೆ ತುರ್ಬೆಂತಾಂ ವ್ಹಾಜುಂಕ್ ಲಾಗ್ತಾತ್
ಅನಂದ್ ದೇವಾಕ್ ಸರ್ಗಿಂ ಆನಿ ಶಾಂತಿ ಮನ್ಶಾಂಕ್ ಸಂಸಾರಿಂ
ಬೆತ್ಲೆಹೆಮಾಂತ್ ಗಾನಾಂಚ್ ಆಯ್ಕೊಂಕ್ ತಾಂಕಾಂ ಮೆಳ್ತಾತ್
      ಏಕ್‌ಚ್ಚ್ ಪಾವ್ಟಿಂ ಶಿಮ್ಟಿ ನೆಕೆತ್ರ್ ಅಂತ್ರಳಾರ್ ತಾಂಕಾಂ ದಿಸ್ತಾ
      ಶಿಮ್ಟೆಂತ್ಲೊ ತೊ ವಿಶೇಸ್ ಪ್ರಕಾಸ್ ಗರ್ಧನ್ಯಾಗೊಟ್ಯಾರ್ ಪಡ್ತಾ
      ಗೊವ್ಳಿ ಸಗ್ಳೆ ಹೆಂ ಪಳೆವ್ನ್ ಸಗ್ಳೆಚ್ ವಿಜ್ಮಿತ್ ಜಾವ್ನ್ ಪಡ್ತಾತ್
      ಕಿತೆಂ ಘಡ್ಲಾಂ ಹಾಂಗಾಸರ್? ತೆ ಶೆಳಿಯಾಂ ಸಂಗಿಂಚ್ ಯೆತಾತ್
ಆಬ್ ಜುಜೆ, ಆಂಕ್ವಾರ್ ಮರಿ ತಾಂಕಾಂ ಗೊಟ್ಯಾಂತ್ ದಿಸ್ತಾತ್
ಭೊವ್ಶಾ ಬಾಪುಯ್ ಆನಿ ಧುವ್ ಮ್ಹಣೊನ್ ತೆ ಚಿಂತಾತ್
ಏಕ್ಲೊ ಶಿಕ್ಪಿ ಗೊವ್ಳಿ ಮ್ಹಣ್ತಾ ತಿ ಸರ್ಗಾ ರಾಯಾಚಿ ಮಾತಾ
ಪ್ರವಾದಿಂನಿಂ ಸಾಂಗ್‌ಲ್ಲೆಂ ಆಯ್ಕೊಂಕ್ ನಾಂಯ್? ನಕ್ರೆ ಕರಿನಾಕಾ
      ಲಜೀಶ್ಟ್ ಮರಿ ಹ್ಯಾ ದಾದ್ಲ್ಯಾಂಕ್ ಪಳೆವ್ನ್ ತಕ್ಲಿ ಪಂದಾ ಘಾಲ್ತಾ
      ಜೆಜು ಮರಿಯೆ ತೊಂಡಾಕ್ ಪಳೆವ್ನ್ ಮಿಟ್ಯೊ ಮಾರುಂಕ್ ಲಾಗ್ತಾ
      ಗೊರ್ವಾಂಚ್ಯಾ ತ್ಯಾ ಖಾಣಾವಳಿಂತ್ ಬಾಳೊಕ್ ಜೆಜು ಜಲ್ಮಾಲಾ
      ಸಗ್ಳ್ಯಾ ಸಂಸಾರಾರ್‌ಚ್ ತಾಚೊ ಪ್ರಕಾಶ್ ಖರೊಚ್ ಫಾಂಕ್ಲಾ!
ಆಯ್ಲೊ ಜೆಜು, ಆಯ್ಲೊ ಮ್ಹಣ್ ಸಗ್ಳ್ಯಾ ಗಾಂವಾರ್ ಗುಜ್ಗುಜೊ
ಖಬಾರ್ ಮೆಳ್ತಚ್ ತೆಗಾಂ ರಾಯಾಂಕ್ ಭಿಲ್ಕುಲ್ ಸೊಸುಂಕ್ ನಜೊ
ಧುಂಪ್, ಮೀರ್, ಭಾಂಗಾರ್ ಘೆವುನ್ ತೇಗ್ ರಾಯ್ ಭಾಯ್ರ್ ಸರ್ತಾತ್
ಕರ್‌ಯಾಚ್ಯಾ ಪಾಟಿರ್ ಬಸೊನ್ ಆಪ್ಲೆಂ ಪಯಣ್ ಮುಖಾರಿತಾತ್
      ಶೆವ್ಟಿಂ ತಾಂಕಾಂ ದಿಸ್ತಾ ನೆಕೆತ್ರ್ ಆಪ್ಲೊ ಉಜ್ವಾಡ್ ಫಾಂಕವ್ನ್
      ಹೆರೊದ್ ರಾಯಾಕ್ ದಿಸಾನಾಸ್ತಾಂ ಬೊಲ್ತಿಚ್ ವಾಟ್ ದಾಖವ್ನ್
      ಸಭಾರ್ ದಿಸಾಂಚ್ಯಾ ಪಯ್ಣಾ ಉಪ್ರಾಂತ್ ಬೆತ್ಲೆಹೆಮಾಕ್ ತೆ ಪಾವ್ತಾತ್
      ಬಾಳೊಕ್ ಜೆಜುಕ್ ನಮಾನ್ ಕರುನ್ ಕಾಣಿಕೊ ಆಪ್ಲ್ಯೊ ದಿತಾತ್
ಆತಾಂ ಕಿತೆಂ ಸುಂರ್ಗಾರಾಯ್ ಸಗ್ಳ್ಯಾ ಸಂಸಾರಾರ್ ಜಾತಾ
ಫಕತ್ ಭಾಯ್ಲ್ಯಾನ್ ಶೃಂಗಾರ್, ದೆವಾಸ್ಪಣ್ ಭಿತರ್ಲ್ಯಾನ್ ಕುಸ್ತಾ
ಕ್ರೀಸ್ತಾಂವ್ ತಿಂ ಘರಾಂ ನೆಟವ್ನ್ ಕಾಣಿಕೊ ಏಕಾಮೆಕಾಕ್ ವಾಂಟ್ತಾತ್
ಭಿಕಾರಿ ತೊ ಹಿಂವಾನ್ ಮೊರ್ತಾ, ದೊಳೆ ಧಾಂಪುನ್ಂಚ್ ವೆತಾತ್
      ಆಯ್ಲೊ ಜೆಜು, ಆಯ್ಲೊ ಮ್ಹಣೊನ್ ಆಮಿಂಯೀ ನಾಚೊಂಕ್ ಲಾಗ್ಯಾಂ
      ಸಂಸಾರಾರ್ ಶಾಂತಿ ಯೆಂವ್ಚ್ಯಾಕ್ ದೇವಾಲಾಗಿಂ ಮಾಗ್ಯಾಂ
      ಎಕಾಮೆಕಾಚ್ಯಾ ಮಾಯಾಮೊಗಾನ್ ಸದಾಂಚ್ ಜಿಯೆಂವ್ಕ್ ಶಿಕ್ಯಾಂ
      ನತಾಲಾಂ ಸಂದರ್ಭಿಂ ಕುಮಕ್ ಕರುನ್ ಗರ್ಜೆವಂತಾಂಕ್ ರಾಕ್ಯಾಂ

ಕವಿತಾಝರ್

- ಓಸ್ಟಿನ್ ಡಿ’ಸೋಜ್, ಪ್ರಭು

ನತಾಲಾಂಚೆಂ ಫೆಸ್ತಾಂತ್ ಕಸಲ್ಯಾ ಸಂಗ್ತ್ಯಾಂಕ್ ಮಹತ್ವ್ ದೀಜಾಯ್ ಮ್ಹಳ್ಳೆಂ ಭೋವ್ ಅಪುರ್ಭಾಯೆಚಾ ರಿತಿನ್ ಕವಿತಾರುಪಾರ್ ವ್ಹಾಳಯ್ತಾ, ಓಸ್ಟಿನ್ ಡಿ’ಸೋಜ್ ಪ್ರಭು ಹ್ಯಾ ಕವಿತೆಂತ್. ಜೆಜುನ್ ದೋನ್ ಹಜಾರ್ ಪಾಂಚ್ ವರ್ಸಾಂಧಿಂ ಜಲ್ಮೊನ್ ಯೆತಾನಾ ಮರಿಯೆಕ್, ಜುಜೆಕ್ ತಶೆಂಚ್ ಹೆರಾಂಕ್ ಕಿತೆಂ ಭೊಗ್‌ಲ್ಲೆಂ ಜಾವ್ಯೆತ್ ಮ್ಹಳ್ಳೆಂ ಅಪುರ್ಭಾಯೆಚಾ ರಿತಿನ್ ಸಾಂಗೊನ್, ಅಖ್ರೇಕ್ ಬಾಳೊಕ್ ಜೆಜುಕ್ ಭೆಟೊಂಕ್ ಆಯಿಲ್ಲ್ಯಾ ರಾಯಾಂ ಪಯ್ಕಿ ಆತಾಂ ಆಮಿಂ ಎಕ್ಲಿಂ ಜಾವ್ನಾಸ್ತಾಂ, ಆಮಿಂ ಜೆಜುಕ್ ಭೆಟ್ ದೀಂವ್ಕ್ ವೆಚಾ ರಸ್ತ್ಯಾರ್ ಆಮ್ಕಾಂ ಕಸೊ ಮೆಳ್ತಾ ಆನಿ ತೊ ಜೆಜು ಖಂಚ್ಯಾ ರುಪಾರ್ ಆಸಾ ಮ್ಹಳ್ಳೆಂ ಭೋವ್ ನಾಜೂಕ್ ರಿತಿನ್ ಪಿಂತ್ರಾಯ್ತಾ.

ಕವಿತಾಝರ್ ಪಾನಾಕ್

ಪಾಟಿಂ ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications