ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
2002 ಇಸ್ವೆಂತ್ ಮ್ಹಜಾ ಮಟ್ವ್ಯಾ ಕಾಣ್ಯಾಂಚಾ ಪಯ್ಲ್ಯಾ ಬುಕಾಚೆಂ (ಆಶಾವಾದಿ) ಪ್ರಸ್ತಾವನ್ ಬರಯಿಲ್ಲೊ ಕೊಂಕ್ಣಿ ಸಾಹಿತಿಕ್ ಚಕ್ರವರ್ತಿ ಎಡ್ವಿನ್ ಜೆ.ಎಫ್.ಡಿ’ಸೊಜ್. ಮ್ಹಜಾ ದುಸ್ರ್ಯಾ ಬುಕಾಕ್ (ಖಿಳೊ) ತಾಚೆಲಾಗಿಂ ಹಾವೆಂ ಪರತ್ ಪ್ರಸ್ತಾವನ್ ಬರಂವ್ಕ್ ವಿಚಾರ್ತಾನಾ ತಾಣೆಂ ಮ್ಹಾಕಾ ಅಶೆಂ ಲಿಖ್ಲೆಂ "ವಲ್ಲಿ ಮ್ಹಜೆ ಪ್ರಕಾರ್ ತುಂ ಎದೊಳ್ಚ್ ಕೊಂಕ್ಣೆಂತ್ ನಾಮ್ಣೆಚೊ ಕಾಣ್ಯೆಗಾರ್ ಜಾಲಾಯ್ ದೆಖುನ್ ತುಂ ಅಜೂನ್ ತುಕಾ ಭುರ್ಗೊಚ್ ಮ್ಹಣ್ ಚಿಂತ್ಚಿ ತರ್ ತುಜೆಂ ಚಿಂತಾಪ್ ಸಾರ್ಕೆಂ ಕರ್". ದೆಖುನ್ ತ್ಯಾ ಬುಕಾಕ್ ಪ್ರಸ್ತಾವನ್ ನಾತ್ಲ್ಲೆಂ. ಪುಣ್ ತಿಸ್ರ್ಯಾ ಬುಕಾಕ್ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ಕ್ ಏಕ್ ಅಸಲ್ಯಾ ಸಾಹಿತಿಕ್ (ಪ್ರಸ್ತಾವನಾಕ್) ಹಾಂವ್ ಸೊಧುನ್ ಆಸ್ಲ್ಲೊಂ, ಜೊ ಏಕ್ ಚಿಂತ್ಪಿ, ನಾಟಕಿಸ್ತ್, ಗೂಂಡ್ ಕಾಣ್ಯೆಗಾರ್ ಆನಿ ವಿಶಾಲ್ ನದ್ರೆಚೊ. ಆನಿ ಮಿಕ್ಮ್ಯಾಕ್ಸ್ ಶಿವಾಯ್ ಹೆರ್ ಕೊಣ್ಂಚ್ ಮ್ಹಾಕಾ ದಿಸ್ಲೊನಾ. ಆನಿ ತಾಚಾ ಪ್ರಸ್ತಾವನಾಂತ್ಲೆ ಎಕೇಕ್ ವಿಚಾರ್ ವಾಚ್ತಾನಾಂಚ್ ತುಮ್ಕಾಂ ತೆಂ ಸುಸ್ತಾತೆಲೆಂ ದೆಖುನ್ ತೆಂ ಹಾಂಗಾಸರ್ ದಿಲಾಂ. ತಾಚಾ ದುಖೇಸ್ತ್ ಕುಟ್ಮಾಕ್ ಭುಜಯ್ತಾನಾ, ತಾಚಾ ಅತ್ಮ್ಯಾಕ್ ಶಾಂತಿ ಮಾಗ್ತಾಂ. [- ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಮಿಕ್ಮ್ಯಾಕ್ಸ್
ಕಂಗಾಲ್ ಆನಿ ತಾಚಾ ಕುಕ್ಕೆಹಳ್ಳೆಕ್ ಬರೆಂ ಮಾಗೊನ್
ಸುಮಾರ್ ತೀನ್ ವರ್ಸಾಂ ಆದಿಂ ವಲ್ಲಿಚ್ಯಾ "ಆಶಾವಾದಿ" ಕಾಣಿಯೆಪುಂಜ್ಯಾಕ್ ಹಾಂವೆ ಏಕ್ ವಿಮರ್ಸೊ ಬರಯಿಲ್ಲೊ. ಕೊಂಕಣಿ ಸಾಹಿತ್ಯಾಂತ್ ಫುಲೊನ್ ಯೆಂವ್ಚ್ಯಾ ಎಕಾ ತರ್ನ್ಯಾ ಸಾಹಿತಿಚಿ ಆಶಾ ಆನಿ ಹುಮೆದ್ ನಿವಾನಾ ಜಾಂವ್ ತಶೆಂ ಬರೆಂ ಮಾಗ್ಲ್ಲೆಂ ಆತಾಂ ತ್ಯಾಚ್ ಲೇಕಕಾಚ್ಯಾ ನವ್ಯಾ ಕಥಾಸಂಕಲನಾಕ್ ಪ್ರಸ್ತಾವನ್ ಬರವ್ನ್ ಆಸಾಂ. ಖಂಡಿತ್ ಜಾವ್ನ್ ಹೊ ವಿಮರ್ಸೊ ನ್ಹಂಯ್.
ಪಾಟ್ಲ್ಯಾ ವರ್ಸಾಂನಿ ವಲ್ಲಿ ಕ್ವಾಡ್ರಸ್, ಆಜೆಕಾರ್ ಹಾಣೆ ಕೊಂಕ್ಣಿ ಸಾಹಿತ್ಯಾಕ್ ದೀವ್ನ್ ಆಸ್ಚಿ ದೆಣ್ಗಿ ಅಪಾರ್. ಆಪ್ಲ್ಯಾ ತರ್ನಾಟ್ಪಣಾರ್ ಯುವಜಣಾಂಚ್ಯಾ ವರ್ತುಲಾಂನಿ ಪರ್ಜಳ್ಲ್ಲೊ ಹೊ ಯುವಕ್, ಆಪ್ಲ್ಯಾ ಬೋವ್ ತರ್ನ್ಯಾ ಪ್ರಾಯೆರ್ಚ್ ಕೊಂಕ್ಣೆ ಥಂಯ್ ಆಕರ್ಶಿತ್ ಜಾಲ್ಲೊ. ಗಲ್ಫಾಕ್ ಪಾವ್ಲ್ಲ್ಯಾ ಮಾಗಿರ್ಯಿ ಹಾಚಿ ಸಾಹಿತಿಕ್ ವೋಡ್ ನಿಂವೊಂಕ್ ನಾ, ಬಗಾರ್ ಸಬಾರ್ ವಾಂಟ್ಯಾಂನಿ ಫುಲೊನ್ ರಾವ್ಲಿ ತಿ ನಿಜಾಯ್ಕಿ ಶಾಭಾಸ್ಕೆಚಿ. ಕೊಂಕ್ಣಿ ಸಂಬಂಧಿ ಅಂತರ್ಜಾಳಾಂಚೊ (Website) ರಚ್ಪಿ ಜಾವ್ನ್, ಕೊಂಕ್ಣಿ ಪತ್ರಾಂಚೊ ಆಧಾರ್ ಖಾಂಬೊ ಜಾವ್ನ್, ನಾಟಕ್ಕರ್ತ್ ಜಾವ್ನ್, ಕಾದಂಬರಿಕಾರ್ ಜಾವ್ನ್ ಹಾಣೆ ರಚ್ಲ್ಲೆಂ ಸಾಹಿತ್ಯ್, ಥೊಡೆ ಪಾವ್ಟಿಂ ಮ್ಹಾಕಾಚ್ಚ್ ವಿಜ್ಮಿತ್ ಕರ್ತಾ. ಪುಣ್ ವಲ್ಲಿ ಮ್ಹಾಕಾ ಚಡಿತ್ ಪಸಂದ್ ಜಾತಾ ಮಟ್ವ್ಯಾ ಕಾಣಿಯಾಂಚ್ಯಾ ರುಪಾರ್. ತೊ ನವ್ಯಾನ್ ಕಿತೆಂ ತರೀ ಸೊಧುನ್ ಆಸ್ತಾ, ತ್ಯಾ ಉತ್ರಾಕ್ ಸಾಕ್ಸ್ ಜಾವ್ನ್ ಹಿ ಕೃತಿ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಆತಾಂ ತುಮ್ಚೆಂ ಹಾತಿಂ ಆಸಾ.
ಹರ್ ಬರವ್ಪಿ, ಹರ್ ನಾಟಕ್ಗಾರ್, ಹರ್ ಸಿನೇಮಾ ನಿರ್ದೇಶಕ್ ಆಪ್ಲ್ಯಾ ನವ್ಯಾ ಕೃತಿಯೆ ವಿಶಿಂ, ಹರ್ ಪಾವ್ಟಿಂ; ಆಪುಣ್ ನವೆಂಚ್ ದೀವ್ನ್ ಆಸಾಂ ಮ್ಹಣೊನ್ಚ್ ಸಾಂಗ್ತಾ. ಪುಣ್ ದಿತಾನಾ ಮಾತ್ರ್ ಚಡಾವತ್ ಪಾವ್ಟಿಂ ಆದ್ಲ್ಯಾಂನಿ ದಿಲ್ಲೆಂಚ್ ನವ್ಯಾ ರಿತಿನ್ ದಿತಾ ತಿತ್ಲೆಂಚ್. ಹಾಂತುಂ ಕಸಲಿಚ್ ಚೂಕ್ ನಾ. ಸಾಹಿತ್ಯಾಂತ್ ಕಿತೆಂ ತರೀ ಬದ್ಲಾವ್ ಹಾಡುಂಕ್ ಜಾಯ್ ಮ್ಹಳ್ಳಿ ಆಂವ್ಡೊಣಿ ಆಸ್ಲ್ಯಾರ್ ಪುರೊ - ತೆಂಚ್ ಎಕಾ ಲೇಕಕಾಚ್ಯಾ ವಾಡಾವಳಿಚೊ ಸಂಕೇತ್.
ಎಕಾ ಕಾಳಾರ್ ’ಆಮ್ಚ್ಯಾ’ ಕೊಂಕ್ಣೆಂತ್ ಯೆಂವ್ಚ್ಯೊ ಚಡಾವತ್ ಕಾಣಿಯೊ ಮೊಗಾ ಭೊಂವಾರಿಂ ವ ಇಗರ್ಜೆಚ್ಯಾ ದೊರ್ಯಾ ಬಿತರ್ಚ್ ರಚಿತ್ ಜಾತಾಲ್ಯೊ. ಹ್ಯಾ ವರ್ತುಲಾಚ್ಯಾ ಭಾಯ್ರ್ ವಚೊನ್ ಕಾಣಿಯೊ ಬರೊಂವ್ಕ್ಜಾಯ್ ಮ್ಹಣೊನ್ ವಾಚ್ಪ್ಯಾಂನಿ ಮಾಗೊಂಕ್ ಸುರು ಕೆಲ್ಲೆಂ, ಸುಮಾರ್ ತೀಸ್-ಪಾಂತ್ತೀಸ್ ವರ್ಸಾಂ ಆದಿಂ. ತಶೆಂಚ್ ತ್ಯಾ ಆವ್ದೆಚ್ಯಾ ಉಪ್ರಾಂತ್ ಸಭಾರಾಂನಿ Universal ವಿಶಯ್ ಆಟಾಪ್ಚ್ಯೊ ಕಾಣ್ಯೊ ರಚುಂಕ್ ಪ್ರಯತ್ನ್ ಕೆಲ್ಲೆಂ ಆಸಾ. ಪುಣ್ ಆಮ್ಚ್ಯಾ ಕಥೊಲಿಕ್ ಕೊಂಕ್ಣಿ ಲೇಕಕಾಂಚ್ಯಾ ಜಿಣಿಯೆಂತ್, ಭುರ್ಗ್ಯಾಪಣಾರ್ ಜಾಲ್ಲೆ, ಧಾರ್ಮಿಕ್ ಪರಿಸರಾಂತ್ಲೆ ಅನುಭವ್ ಇತ್ಲ್ಯಾ ಗಂಭೀರ್ ರಿತಿನ್ ಮನಾಂತ್ ದಾಖಲ್ ಜಾವ್ನ್ ವೆತಾತ್, ಇಗರ್ಜೆಚ್ಯಾ ದೊರ್ಯಾ ಭಾಯ್ರ್ ತರ್ ಕಾಣಿ ಆರಂಭ್ ಜಾಲಿ ತರೀ, ನಿಮಾಣ್ ತಿ ಯೇವ್ನ್ ವಿಶೆವ್ ಘೆಂವ್ಚಿ - ಇಗರ್ಜೆಚ್ಯಾ ದೊರ್ಯಾ ಭಿತರ್ಚ್!
ಹ್ಯಾ ಕಥಾಸಂಕಲನಾಂತ್ ಆಸ್ಚ್ಯೊ ಕಾಣಿಯೊ ವಾಚ್ತಾನಾ, ಮೋಗ್ ತುಕಾ ಉಗ್ತ್ಯಾ ನದ್ರೆಕ್ ಝಳ್ಕಾನಾ. ಪುಣ್ ಲೇಕಕಾಕ್ ಎಕಾ ಬರ್ಯಾ ಸಮಾಜೆ ಥಂಯ್, ಸಮಾಜಿಕ್ ನಿತಿ ಥಂಯ್ ಆಸ್ಚೊ ಮೋಗ್, ಪಯ್ಶಿಲ್ಯಾನ್ ಗಯ್ರೊ-ಗಯ್ರೊ ಜಾವ್ನ್ ದಿಸ್ತಾ. ಹರ್ಯೆಕಾ ಕಾಣಿಯೆಂತ್ ಕಾಣಿಯೆಗಾರಾಚಿ ಉಪಸ್ಥಿತಿ ಧರ್-ಧರ್ ಮ್ಹಣ್ ನದ್ರೆಕ್ ಯೆತಾ. ವೆವಸ್ಥೆವೆಶಿಂ ತಾಚೆ ಅನುಭವ್, ತಾಚೊ ರಾಗ್, ತಾಚೆಂ ಝುಜ್ - ಸುಂದರ್ ರಿತಿನ್ ಕಾಣಿ ಸಾಂಗೊನ್ಂಚ್ ವೆತಾತ್. ವಾಚುನ್ ಸಂಪಯೆಲ್ಲಿ ಏಕ್ ಕಾಣಿ, ಮುಕಾರ್ ಯೇಂವ್ಕ್ ಆಸ್ಚ್ಯಾ ಆನೇಕಾ ಕಾಣಿಯೆಚೆಂ ಪ್ರಸ್ತಾವನ್ ತಶೆಂ ಭೊಗ್ತಾ, ಆನಿ ಹ್ಯಾ ಭೊಗಾಪಾಕ್ ಎಕ್ಲೊ ’ಕಂಗಾಲ್’ ಆನಿ ’ಕುಕ್ಕೆಹಳ್ಳಿ’ಚೊ ಗಾಂವ್ ಸಾಂಕೊವ್ ಆನಿ ಶಾಶ್ವತ್ ಸಂಕೇತ್ ಜಾತಾತ್. ಫಿರ್ಗಜೆಂತ್ಲೆಂ ರಾಜಕೀಯ್, ಯುವಜಣಾಂಚೊ ವಾಪಾರ್ - ತಾಂಚಿಂ ಸಿಂತಿಮೆಂತಾಂ, ಗಲ್ಫಾಂತ್ಲೆ ಎಕ್ತಾರ್, ಎಕಾಚ್ಫರಾ ಗೇಸ್ತ್ ಜಾಲ್ಲ್ಯಾಂಚೆಂ ಪೊಕ್ಳೆಪಣ್ - ಸರ್ವ್ ಲೇಕಕಾಚ್ಯಾ ಪಯ್ಣಾರಿ ಮನೋಭಾವಾಕ್ ಕಾಣಿಯಾಂಚೆ ರೂಪ್ ದಿತಾತ್.
ವಲ್ಲಿ ಕ್ವಾಡ್ರಸಾಕ್ ಕಿತೆಂ ಸಾಂಗೊಂಕ್ ಜಾಯ್ ತೆಂ ಉಗ್ತ್ಯಾನ್ ಸಾಂಗ್ಚೆಂ ಧಯ್ರ್ ಆಸಾ!
****
ಜಲ್ಮಾಲ್ಲ್ಯಾ ಘರಾ ಥಾವ್ನ್, ವಾಡ್ಲ್ಲ್ಯಾ ಗಾಂವಾ ಥಾವ್ನ್, ಖೆಳ್ಲ್ಲ್ಯಾ ಮಾತಿಯೆ ಥಾವ್ನ್ ಹಜಾರೋ ಮಯ್ಲಾಂ ಪಯ್ಸ್ ಬಸೊನ್ ಬರಯ್ಲ್ಯಾರ್, ತ್ಯಾ ಸಾಹಿತ್ಯಾಂತ್ ಆಸಲ್ ಮಾತಿಯೆಚಿ ಮೂರ್ ಹಾಡುಂಕ್ ವ್ಹಡ್ ತ್ರಾಸ್. ಥೊಡೆ ಪಾವ್ಟಿಂ ಆಮ್ಚ್ಯಾಚ್ ಹಿತ್ಲಾಂತ್ ವಾಗೊನ್ ಆಸ್ಲ್ಲ್ಯಾ ಝಡಾಂ-ಪಾಲ್ಯಾಂಚಿಚ್ ನಾಂವಾಂ ಉಡಾಸಾಂತ್ ಯೇನಾಂತ್ ಫಲಾಣ್ಯಾ ಎಕಾ ವಸ್ತುಚೆಂ ಮೂಳ್ನಾಂವ್ ಮೆಳ್ಳೆಂನಾ ತರ್, ತಿ ಕಾಣಿ ಅಧುರಿ ತಸಲಿ ಸ್ಥಿತಿ. ವಿದೇಶಾಂತ್ ಬಸೊನ್, ಕೊಂಕ್ಣಿ ಸಾಹಿತ್ಯ್ ರಚನ್ ಕರ್ತೆಲ್ಯಾ ಚಡಾವತ್ ಸಾಹಿತಿಂಚೆ ಕಷ್ಟ್ ಹೆಚ್. ಪರ್ಗಾಂವಾಂತ್ಲ್ಯಾ ತ್ಯಾ ಯಾಂತ್ರಿಕ್ ಜೀವನಾ ಮಧೆಂ, ಗಾಂವ್ಚೊ ಉಡಾಸ್ ಆನಿ ಅನುಭವ್ ಆರಾವ್ನ್, ನೆರಾವ್ನ್
Nativity ಕ್ ಬಾದಾಕ್ ಜಾಯ್ನಾಂಶೆ ಕಾಣಿ ಬರಂವ್ಕ್ ವ್ಹರ್ತ್ಯಾ ಮ್ಹಿನತೆಚಿ ಗರ್ಜ್ ಆಸಾ. ಹ್ಯಾ ಪುಸ್ತಕಾಂತ್ ತಸಲೆಂ ಏಕ್ ಖಾಲ್ತೆಂ ಪ್ರಯತನ್ ಜಾಲಾಂ.
ಏಕ್ ಲೇಕಕ್, ವಾಚ್ಪ್ಯಾಂಚ್ಯಾ ಪ್ರಿತಿನ್ ವಾಡ್ಲ್ಯಾರ್ಚ್ ತೊ ಲೊಕಾ ಮೊಗಾಳ್ ಜಾತಾ. ವಾಚ್ಪ್ಯಾಕ್ ಕಿತೆಂ ರುಚ್ತಾ ಮ್ಹಳ್ಯಾ ಸವಲಾಚ್ಯಾಕೀ, ಲೇಕಕ್ ಬರಯ್ತಾನಾ, ಆಪ್ಲ್ಯಾ ಚಿಂತ್ಪಾಕ್ - ಆಪ್ಲ್ಯಾ ಕೊಶೆಡ್ದಾಕ್ ಕಿತ್ಲೊ ಖಾಲ್ತೊ ಆಸಾ ಆನಿ ತಾಣೆ ಬರಂವ್ಚೆ ವಿಚಾರ್ ಕಿತ್ಲೆ ಉಗ್ತೆ ಆಸಾತ್, ಬರವ್ಪಾಂತ್ ಕಸಲೆಂ ನವೆಸಾಂವ್ ಆಸಾ - ಹ್ಯೊ ಸಂಗ್ತಿ ಅಧಿಕ್ ಗರ್ಜೆಚ್ಯೊ. ತರ್ ಲೇಕಕಾಚೆ ಹೆ ವಿಚಾರ್ ವಾಚ್ಪ್ಯಾಕ್ ಪಸಂದ್ ಜಾಲೆ ತರ್ - ತೊ ಲೇಕಕ್ ಫಕತ್ ಲೊಕಾ ಮೊಗಾಳ್ ಜಾತಾ ಮಾತ್ರ್ ನ್ಹಂಯ್, ತಾಚಿ ಕೃತಿ ಲಾಂಬ್ ಕಾಳ್ ಜಿಯೆತಾ.
ಲೇಕಕ್ ಮಾಲ್ಘಡೊ ಮ್ಹಣೊನ್ಗೀ ವ ತಾಣೆ ಬರಯಿಲ್ಲೆಂ ಸರ್ವ್ಶ್ರೇಶ್ಟ್ ಮ್ಹಣೊನ್ಗೀ ’ಭಕ್ತ್’ ಉಚಾರುಂಕ್ ಸುರು ಕೆಲೆಂ ತರ್, ಆಪಾಪಿಂಚ್ ತೊ ಲೇಕಕ್ ವಾಚ್ಪ್ಯಾ ಥಾವ್ನ್ ಪಯ್ಸ್ ವೆತಾ. ದ್ರಶ್ಟಾಂತಾಕ್ - ರವೀಂದ್ರನಾಥ ಠಾಗೋರ್. ಠಾಗೊರಾಚೆಂ ಆರಾಧನ್ ಎಕಾ ಸ್ಥರಾಚೆರ್ ಆಮ್ಚ್ಯಾ ದೆಶಾಂತ್ ಹ್ಯಾ ಸ್ಥಿತೆಯೆಚೆರ್ ಪಾವ್ಲ್ಲೆಂ - ತಾಣೆ ಬರಯೆಲ್ಲೆಂ ಸರ್ವ್ ’ಮಹಾಕಾವ್ಯ’ ತಶೆಂ ಸ್ವೀಕಾರ್ ಕರುಂಕ್ ಲಾಗ್ಲೆ. ವಿಮರ್ಶಕ್ ಠಾಗೋರಾಚೊ ಸಾರ್ಕೊ ವಿಮರ್ಸೊ ಕರುಂಕ್ಯೀ ಕಾವ್ಜೆಲೆ. ಹ್ಯಾಚ್ ಕಾರಣಾಕ್ ಕೊಂಕ್ಣೆನ್ ಮಹಾನ್ ಮ್ಹಣ್ ಆರಾಧನ್ ಕೆಲ್ಲೆ ಕಿತ್ಲೆಶೆ ಲೇಕಕ್ ಆಯ್ಚ್ಯಾ ದಿಸಾ, ಪುಸ್ತಕ್ ಭಂಡಾರಾಂನಿ ವಿಶೆವ್ ಘೆವ್ನ್ ಆಸಾತ್.
ಎಕಾ ಕಾಳಾರ್ ತಸಲೆಂ ಪುಶ್ಕಳ್ ಸಾಹಿತ್ಯ್ ರಚುಂಕ್ ತಾಂಕಾಂ ಸ್ಫೂರ್ತಿ ಖಂಯ್ ಥಾವ್ನ್ ಆಯಿಲ್ಲಿ? ಏಕ್ ಕೃತಿ ರಚನ್ ಕರ್ಚ್ಯಾ ಪಯ್ಲೆಂ - ತೆ ಕಸಲಿ ತಯಾರಾಯ್ ಕರ್ತಾಲೆ? ಕಸಲೆಂ ವಾಚಪ್ ವಾಚ್ತಾಲೆ? ತಾಂಚ್ಯಾ ಬರವ್ಪಾಕ್ ಆನಿ ಆತಾಂಚ್ಯಾ ಬರವ್ಪಾ ಮದ್ಲೊ ಫರಕ್ ಕಸಲೊ? - ಅಸಲೊ ಏಕ್ ತುಲನಾತ್ಮಕ್ ವಿಮರ್ಸೊ ಜಾಲ್ಯಾರ್ ಮಾತ್ರ್, ಪುಸ್ತಕ್ ಭಂಡಾರಾಂತ್ ವಿಶೆವ್ ಘೆಂವ್ಚೆ ಆದ್ಲೆ ಮಹಾನ್ ಬರವ್ಪಿಯೀ ಉಗ್ತಾಡಾಕ್ ಯೆತೆಲೆ ಆನಿ ಆತಾಂಚೆ ಬರವ್ಪಿಯೀ ಉಗ್ತಾಡಾಕ್ ಯೆತೆಲೆ ಆನಿ ಆತಾಂಚೆ ಬರವ್ಪಿಯೀ ತಾಂಚೆ ಸಾಹಿತ್ಯಾ ಥಾವ್ನ್ ಸ್ಫೂರ್ತಿ ಘೆತೆಲೆ. ಸಾಂಗಾತಾಚ್ ಕೊಂಕ್ಣಿಯಿ ವಾಡ್ತೆಲಿ.
ಪುಣ್ ಅಸಲಿಂ ಸರ್ವ್ ಕಾಮಾಂ ಕರುಂಕ್ ಆಮ್ಕಾಂ ಪುರ್ಸುತ್ ಖಂಯ್ ಆಸಾ?
ಪುಸ್ತಕಾಕ್ ಬರೆಂ ಮಾಗೊನ್,
ಮಿಕ್ಮ್ಯಾಕ್ಸ್,
ಮಂಗ್ಳುರ್,
23
ಮಾಯ್ 2005
ಮಿಕ್ಮ್ಯಾಕ್ಸಾಚಾ ಮೊರ್ನಾಚೆರ್ ಕವಿತಾ
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications