ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಕೊಂಕ್ಣಿ ಭಾಸ್ ಆನಿ ಲಿಪಿ
- ಕ್ಯಾಥರಿನ್ ರೊಡ್ರಿಗಸ್, ಕಟ್ಪಾಡಿ
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ವೊರಯ್ಣಾರಾಂಚೆಂ ಶಿಫಾರಸ್ ಜೊಡ್ಲ್ಲೆಂ ಲೇಖನ್]
ಸುತಾರ್ಯಾನ್ ಕೆಲ್ಲ್ಯಾ ಪಾಳ್ಣ್ಯಾಕ್, ವೊಳ್ಲ್ಯಾ ದೊರಿಯಾಂನಿ
ಪಾಟಿಯಾಂಕಿ ಬಾಂಧ್ಲೆಂ. ಪಾಳ್ಣೆಂ ಧಲಯ್ಲೆಂ, ಧಲ್ಲೆಂ, ಧಲೊನ್ ಧಲೊನ್ ಆಸ್ಚ್ಯಾ ಪಾಳ್ಣ್ಯಾಂತ್ ನಿದ್ಲಿ. ಜಂಯೊ ಜೊಂಪಿಯೊ ಕಾಡ್ಲ್ಯೊ. ತ್ಯಾ
ಮಧುರ್ ನಾಜೂಕ್ ತಾಳ್ಯಾಕ್ ನೆಂಣ್ತೆ ಕಾನ್ ಮ್ಹಜೆಂ ನೀಟ್ ಜಾಲೆಂ. ಧಣ್ಸಲ್ಲೆಂ ದೊಳೆ
ಮ್ಹಜೆಂ ದಾಂಪುನ್ ವಿಶೆವಾಕ್ ಅತ್ರೆಗ್ಲೆ. ಧರ್ಣಿಕ್ ಪೊವ್ಲೆನ್
ವೊಡ್ಲ್ಯಾ ಶೆಣಾಂಚ್ಯಾ ಪರ್ಮಾಳಾಕ್ ಕುಟ್ಮಾಚೊ ಮೋಗ್ ಮೆಳ್ಳೊ. ಕೊಂಕ್ಣಿ ಗಾಣಾಂ ಆಯ್ಕಾಲ್ಲೊ ಜೀವ್
ವಾಡೊನ್ ಆಯ್ಲೊ ತವಳ್ ಮ್ಹಾಕಾ ಥಂಯ್ಸರ್ ಲಿಪಿ ನಾತ್ಲ್ಲಿ.
ಪುಣ್ ಕೊಂಕ್ಣೆಚೊ ಅವಾಜ್ ಮ್ಹಾಕಾ ಕೊಂಕ್ಣಿ ಮನಿಸ್ ಕರುಂಕ್
ಸಕ್ಲೊ.
ಜೊಂಪಿಯಾಂ ಮಧೆಂ ಅವಯ್ಚಿಂ ಮಾಂಡಿ ಥಂಯ್ಸರ್ ಪರತ್ ತ್ಯಾಚ್ಚ್ ಕೊಂಕ್ಣಿ ಭಾಸೆಚ್ಯಾ ಅವಾಜಾ
ಸಂಗಿಂ ಮಾಂಯ್ಚಿ ಊಬ್! ತಿಚ್ಯಾ ಉಮ್ಯಾಂನಿ ಕೊಂಕ್ಣಿ ಸಂಗೀತಾಚೊ ಅವಾಜ್
ಮ್ಹಜ್ಯಾ ಗಾಲಾಂಚೆರ್ ಪಡ್ಲೊ. ತಿಚ್ಯಾ ಚಿಂವೆಂ ಥಾವ್ನ್ ದೂದ್
ಹಾಂವೆಂ ಚಿಂವ್ತಾನಾ, ವ ತಿಣೆಂ ಮಾಲ್ತೆಂತ್ ಶಿತ್ ಘುಡ್ಡೊನ್ ಭರಯ್ತಾನಾ,
ವ ಪಯ್ಲಿ ಶಿತಾಚಿ ಉಂಡಿಂ ತಿಣೆಂ ಮ್ಹಾಕಾ ದಿತಾನಾ ಥಂಯ್ ತಿಣೆಂ
ಮ್ಹಾಕಾ ಕೊಂಕ್ಣಿ ದಿಲಿಂ, ಪುಣ್ .....ಆಯ್ಕೊಂಕ್ ನಾಂ ಲಿಪಿ ಕಸಲಿ ಮಳ್ಳೊ
ವಾದ್!..
ಶಿರಾಂ ಶಿರಾಂನಿ ಕೊಂಕ್ಣೆಚೊ ಸ್ವಾದ್, ವೇಂಗ್, ವೋಡ್, ಮೋಗ್,
ಮಾಯ್ಪಾಸ್, ಸಗ್ಳ್ಯಾ ಕುಟ್ಮಾನ್ ದಿತಾನಾ ಕೊಂಕ್ಣಿ ಮಾತ್ರ್ ಆಯ್ಕಾಲಿ. ತ್ಯಾ ಕೊಂಕ್ಣೆಚ್ಯಾ
ಬಳಾನ್, ವೊಮ್ತಿ ಪಡ್ಲಿ, ಘೊಡೊ ಕೆಲೊ, ಧಿಮ್ಕಾರಿ ಗೆಲಿಂ,
ಪೋಟ್ ವೊಡುಂಕ್ ಶಿಕ್ಲಿಂ. ಬಸೊಂಕ್ ಲಾಗ್ಲಿ, ಉಬಿಂ ಜಾಲಿಂ,
ನಿಮಾಣೆಂ ಚಲೊಂಕ್ ಸಕ್ಲಿ. ತ್ಯಾ ಹರ್ಯೇಕಾ ಮ್ಹಜ್ಯಾ ಕಾಮಾಂನಿ
ಮ್ಹಾಕಾ ಅಧಾರ್ ದಿಲೊ ಮ್ಹಜ್ಯಾ ಕೊಂಕ್ಣೆಚ್ಯಾ ಉತ್ರಾಂನಿ.....
ಪುಣ್ ......ಎಕಾ ಘಡಿಯೆ ಲೆಗುನ್ ಆಯ್ಕೊಂಕ್ ನಾಂ ಹಾಂವೆಂ ಲಿಪಿ ಕಸಲಿ ಮ್ಹಳ್ಳೆಂ
ಸವಾಲ್. ಆತಾಂ ವ್ಹಡ್ ಜಾಲಾಂ. ಕೊಂಕ್ಣೆಕ್ ಕೋಣ್ ಫೊಂಡ್ ಕಾಡ್ತಾ ಥೊಡೆ ಜೀವ್
ದೀಂವ್ಕ್ ಪೆಚಾಡ್ತಾತ್ ದೆಕುನ್ ವಾವ್ರ್ ಕರ್ತಾತ್, ಅಸಲ್ಯಾ
ನಾಜೂಕ್ ಸ್ಥಿತೆರ್ ಲಿಪಿಚೊ ವಾದ್ ಉಟೊನ್ ನಿತ್ರಾಣಿ ಜಾಲ್ಲ್ಯಾ ಕೊಂಕ್ಣಿ ಭಾಶೆಕ್ ಆನಿಕಿ ಕಷ್ಟೊಂವ್ಚೆಂ ಕಸಲೊ
ನ್ಯಾಯ್?
ಜೀವನ್ ಆನಿಂ ಜೀವಿತ್ ದಿಲ್ಲ್ಯಾ ಕೊಂಕ್ಣೆಚ್ಯಾ ಲಿಪಿಯೆಚೆಂ ಸವಾಲ್ ಉಟ್ಲಾಂ.
ಹ್ಯಾ ಸವಲಾಂಕ್ ಆಮಿಂ ವ್ಹಡ್ ಜಡಾಯೆಚಿಂ ಆಡಿಂ ಬಾಂಧುನ್ ಅರಬಾಯೊ ದಿತಾಂವ್.
ವಾದ್ ವಿವಾದ್ ಮಾಂಡ್ತಾಂವ್. ಆನಿಂ ಆಮಿಂ ಧರ್ಲ್ಲ್ಯಾ ಕೊಂಬ್ಯಾಕ್ಚ್ ಚಾರ್
ಪಾಂಯ್ ಮ್ಹಣೊನ್ ಭಾಚ್ತಾಂವ್.
ಭಾಸ್.......... ಮ್ಹಳ್ಯಾರ್ ಲ್ಹಾನ್ಸೊ ತೋಡ್ ನ್ಹಂಯ್ ಭರ್ತೆಚಿಂ
ನ್ಹಂಯ್! ತಿಚೆಂ ಪಾಳ್ ಭರ್ತಿ ಪಾತಾಳಾಕ್ ದೆಂವ್ಲಾ ಆನಿಂ ತ್ಯಾ ಮೂಳ್ ಪಾಳಾಕ್
ಸಬಾರ್ ಲ್ಹಾನ್, ವ್ಹಡ್, ಕೆಸಾಂ ಪಾಳಾಂ ಪುಟ್ಲ್ಯಾಂತ್. ತ್ಯಾ ಪಾಳಾಂಚ್ಯಾ ಆಧಾರಾನ್ ರೂಕ್ ಜಾಯ್ ತೆಂ
ಪೋಶಣ್ ಘೆತಾ ಆನಿಂ ಬರ್ಯಾನ್ ವಾಡ್ಟಾ. ತಶೆಂ ಕೊಂಕ್ಣಿ
ಸಬಾರ್ ಜಾತಿಚ್ಯಾ ಲೊಕಾಂಚ್ಯಾ ತೊಂಡಾಂನಿ ಕೆಳ್ತಾ ಆನಿಂ ಸಬಾರ್ ಲಿಪಿಯೆಚ್ಯಾ ಧ್ವಾರಿಂ
ಸಾಹಿತಿಚ್ಯಾ ಹಾತಿಂ ಲಿಖ್ಣೆ ಧ್ವಾರಿಂ ವಾಳ್ತಾ. ಹ್ಯಾ ವಿಶಾಲ್ ರೂಕಾಕ್ ಆಶೆಂ
ಸಭಾರ್ ಫಾಂಟೆಂ, ಆಡಾರಾಂ ಫುಟ್ಲ್ಯಾಂತ್ ಆನಿಂ ಹರ್ಯೇಕಾ ಖಾಂದಿಯೆ ಥಾವ್ನ್ ಫುಲಾಂ ಫಳಾಂ ರುತಾಂ ಜಾಲ್ಯಾತ್. ಅಂತ್ರಳಾ
ವಯ್ಲಿಂ ಸುಕ್ಣಿಂ ಆನಿಂ ಧರ್ಣಿಂ ವಯ್ಲ್ಯಾ ಮನ್ಜಾತಿಕ್ ತಿಂ ಆಸ್ರೊ ಜಾಲಾಂ. ಕೊಂಕ್ಣಿ ಭಾಸೆಚಿ ಗಡ್ ಎಕಾ ಜಾತಿಕ್
ವ ಎಕಾ ರಾಜ್ಯಾಕ್ ಸೀಮಿತ್ ನ್ಹಂಯ್ ಮ್ಹಳ್ಳೆಂ ಸತ್ ಆಮಿಂ
ಪಯ್ಲೆಂ ಜಾಣಾಂ ಜಾಲ್ಯಾರ್ ಲಿಪಿಯೆಚೊ ವಾದ್ ಉಟೊಂಕ್ ಸಾಧ್ಯ್
ನಾ.
ಭಾಸೆಚ್ಯಾ ಬರ್ಯಾಪಣಾಕ್ ಲಿಪಿ ಜಾಯ್ ತೆಂ ಖರೆಂ. ಪುಣ್ ಖಂಯ್ಚಿ
ವಾಪ್ರಿಜೆ ಮ್ಹಣ್ಚ್ಯಾ ಪ್ರಾಸ್ ಖಂಯ್ ಆನಿಂ ಕೊಣಾಕ್ ತಿ ಕಶಿ
ಪ್ರಯೋಗ್ ಕೆಲ್ಯಾರ್ ಉಪ್ಕಾರ್ತಾ ಮ್ಹಳ್ಳೆಂ ಚಿಂತ್ಚೆಂ ಗರ್ಜ್. ಆಶೆಂ ಕೆಲ್ಯಾರ್
ಪೋಸ್ ಕೆಲ್ಲ್ಯಾ ರೂಕಾ ಥಾವ್ನ್ ಮನಾಂ ಪಿಸ್ವೊಂಚಿಂ ಫುಲಾಂ ಪಳೆವ್ಯೆತ್ ಆನಿಂ ತೊ ಪರ್ಮಳ್ ಆನಿಂ
ಸೊಭಾಯ್ ಚಾಕ್ಯೆತ್.
ವಯ್ರ್ ಸಾಂಗ್ಲ್ಲ್ಯಾ ಪರಿಂ ಭಾರತಾಚ್ಯಾ ಸಭಾರ್ ರಾಜ್ಯಾಂನಿ ಕೊಂಕ್ಣೆಚೊ
ಸ್ವಾದ್ ಆಸಾ. ಹರ್ಯೇಕಾ ಸುವಾತೆರ್ ಥಂಯ್ ವಾಪ್ರುಂಚಿ ಏಕ್ ಲಿಪಿ ಆಸಾ. ಆನಿಂ ಥಂಯ್ಚೊ
ಲೋಕ್ ಆಪ್ಲಿ ಕೊಂಕ್ಣಿ ಕಾಗ್ದಾರ್ ಬರೈತಾನಾ ಬಾಳ್ಪಣಾರ್ ಆಪ್ಣೆಂ ಶಿಕ್ಲ್ಲಿ ಲಿಪಿ ಆಪ್ಲಿ
ಬೊಗ್ಣಾಂ ಮಾಂಯ್ ಭಾಶೆಂತ್ ಕಳೊಂಕ್ ವಾಪ್ರಿತಾ. ಆಶೆಂ ಥಂಯ್ಚ್ಯಾ
ಲೊಕಾಂಚ್ಯಾ ಕಾಳ್ಜಾ ದಾರಾರ್ ತ್ಯಾಚ್ಚ್ ಲಿಪಿಯೆ ದ್ವಾರಿಂ ಕೊಂಕ್ಣಿ ಆಪ್ಲೊ ಜಾಗೊ ಆಪ್ಣಾಯ್ತಾ. ಆಶೆಂ
"ಕಾಲೊಗ್ ತಕ್ಕ ಕೋಲ" ಮ್ಹಳ್ಳ್ಯಾ ಪರಿಂ ಥಂಯ್ ಚಾಲ್ತೆಕ್ ಆಸ್ಚಿಂ ಲಿಪಿ ಕೊಂಕ್ಣೆಕ್ ಗಳ್ಸಿಲ್ಯಾರ್ ತಾಂತುಂ
ನವೆಂಸಾಂವ್ ನಾಂ.
ಹರ್ಯೇಕಾ ಮನ್ಶಾಕ್ ತಾಚ್ಯಾ ಕಾಳ್ಜಾಚ್ಯಾ ಗೂಂಡಾಯೆಕ್ ಆಪ್ಲಿ
ಮಾಂಯ್ಭಾಸ್ ಸದಾಂಚ್ ಜೀವಾಳ್ ಆನಿಂ ಕ್ರಿಯಾತ್ಮಕ್ ಜಾವ್ನ್ ಆಸಾಜೆ ಮ್ಹಳ್ಳಿ ಆಶಾ. ತ್ಯಾ ಆಶೆನ್ ಖರೊ ಏಕ್
ಮಾಂಯ್ ಭಾಸೆಚೊ ಪ್ರೇಮಿ ತಿಕಾ ಖಂಯ್ಚಾಯ್ ರಿತಿಚೊ ಅಪಾಯ್ ಯೇನಾತ್ಲ್ಯಾ ಬರಿಂ ಜಾಗ್ರುತ್ ಆಸ್ತಾ ದೆಕುನ್ ತಿಚ್ಯಾ ವಾಡಾವಳಿಕ್ ಆನಿಂ ಬರ್ಯಾಪಣಾಕ್ ಖಂಯ್ಚಾಯ್ ತ್ಯಾಗಾಕ್ ತಯಾರ್ ಆಸ್ತಾ.
ಪುಣ್ ಹಾಂಗಾಸರ್ ಖರೊ ಮೋಗ್ ಗರ್ಜ್ ಸೊಡ್ನ್ ನಾಂವ್ ಜೊಡುಂಕ್ ಅಥ್ವಿ
ವಾಟ್ ಧರ್ಚಿ ಸಾರ್ಕಿ ನ್ಹಂಯ್.
ಭಾಸೆಚಿ ಆಸ್ತ್ ವಾಡಾಜೆ ತರ್ ತಿಂ ವಾಚ್ತೆಲಿಂ ಜಾಯ್. ಚಡಿತ್
ಲೊಕಾಕ್ ಜಾಣಾಂ ಆಸ್ಚ್ಯಾ ಲಿಪಿಯೆನ್ ಬರಯ್ಲ್ಯಾರ್ ಸಭಾರಾಂಕ್ ತಾಂತ್ಲೊ
ವಿಶಯ್ ಕಳಿತ್ ಜಾಂವ್ಕ್ ಸಾಧ್ಯ್. ತೊ ಸಂಧೇಶ್ ಪಯ್ಸ್
ಪಯ್ಸ್ ಪಾವೊಂಕ್ ಜಾತಾ. ದೆಕುನ್ ಪಯ್ಲೆಂ ಹೆಂ ಸತ್ ಜಾಣಾಂ ಜಾಯ್ಜೆ ಆನಿಂ
ಹೆಂ ಮನನ್ ಕರಿಜೆ ದೆಕುನ್ ಲಿಪಿಯೆಚ್ಯಾ ನವ್ಯಾ ಸೊಧ್ನೆಂ
ಪಾಟ್ಲ್ಯಾನ್ ಜಿವ್ಯಾ ಮೊಡ್ಲಾಚಿ ಚೂಡ್ ಘೆವ್ನ್ ಸೊಧ್ನಾಂ ಕರ್ಚಾಕಿ ಆಮ್ಚೆಂ ಥಂಯ್ ಆಸ್ಲ್ಲೆಂ
ದಿರ್ವೆಂ ಗರ್ಜೆ ತೆಕಿದ್ ಖರ್ಚಿಲ್ಯಾರ್ ಭಾಸೆಚೆಂ ಭಂಡಾರ್ ಭರ್ತಾಲೆಂ.
ಕೊಂಕ್ಣಿ ಬರಯ್ತಾನಾ ಜರಿತರಿ ಕನ್ನಡ ಲಿಪಿ ವಾಪ್ರಿತಾಯ್ ತೆಂ
ಸಾರ್ಕಿ ನ್ಹಂಯ್ ಮ್ಹಣ್ಜೆಂ ಸೂಕ್ತ್ ನ್ಹಂಯ್. ವ ತುಂ ರೋಮಿ ಲಿಪಿ ಬರೈತಾಯ್ ತೇಂಯ್
ಸಮಾ. ಕಿತ್ಯಾಕ್ ತ್ಯಾ ಲಿಪಿಕ್ ಅಂತರಾಷ್ಟ್ರೀಯ ಮಟ್ಟಾರ್
ಮಹತ್ವ್ ಆಸಾ. ಜರಿತರಿ ತುಂ ದೇವ್ನಾಗರಿ ಲಿಪಿಂತ್ ಬರೈತಾಯ್ ತೆಂ
ವಡ್ಪಣ್ ವ ಉಣೆಪಣ್ ನ್ಹಂಯ್. ಕಿತ್ಯಾಕ್ ತಿ ಲಿಪಿ ಆಮ್ಚ್ಯಾ ದೇಶಾಚಿ
ಪೊಣ್ಜಿ ಲಿಪಿ. ತಾಂತುಂ ಬರಂವ್ಚೆಂ ಬಾಗ್ಯಿ ನ್ಹಂಯ್ ನಿರ್ಭಾಗ್ಯಿ
ನ್ಹಂಯ್. ಪುಣ್ ............ಆಜ್ಕಾಲ್ ಆಮ್ಚ್ಯಾ ಚಡ್ ಬುದ್ವಂತ್ಕಾಯೆ
ವರ್ವಿಂ ಹ್ಯಾ ತಿನೀ ಪ್ರಮುಖ್ ಲಿಪಿಂಚ್ಯಾ ದಾವ್ಲೆಂತ್ ಕೊಂಕ್ಣಿ ಭಾಸ್ ಶಿರ್ಕಾಲ್ಯಾ.
ಹ್ಯಾ ದಾವ್ಲೆಂತ್ಲೆಂ ಕೊಂಕ್ಣೆಕ್ ಸೊಡೈಜೆ ಜಾಲ್ಲೆಂ ಆಮ್ಚೆಂ
ವ್ಹರ್ತೆಂ ಕಾಮ್ ಜಾವ್ನಾಸಾ. ತಾಚ್ಯಾಕಿ ಆಮಿಂ ಬರಯಿಲ್ಲೆಂ ಕಿತ್ಲೆಂ ಜಣ್
ವಾಚ್ತಾತ್ ಆನಿಂ ತಾಂತ್ಲೆಂ ವಿಷಯ್ ಮನನ್ ತರುಂಕ್ ಸಕ್ತಾತ್ ಮ್ಹಳ್ಳೆಂ
ಪಯ್ಲೆಂ ಪಳೈಜಾಯ್. ತುಂವೆಂ ಬರೈಲೆಂಚ್ ವಾಚ್ತಾಲೆ
ಬೊಟಾಂನಿ ಮೆಜ್ತಾ ತಿತ್ಲೆ ತರ್, ತೆಂ ಹಪ್ತೊಭರ್ ಭುಕೆನ್ ಆಸ್ಲ್ಯಾ
ಮುಖಾರ್ ಕೇವಲ್ ಪಳೆವ್ನ್ ರಾಂವ್ಚ್ಯಾ ತಸಲೆ ಭಾಂಗಾರ್ ಜಾಲ್ಯಾರಿ ತಾಚೊ ಕಾಂಯ್ ಉಪ್ಕಾರ್ ಆಸಾನಾ. ತಾಚ್ಯಾ ಬದ್ಲಾಕ್ ತುಂವೆಂ ಏಕ್ ಕುಡ್ಕೊ ಉಂಡೊ
ದಿಲ್ಯಾರಿ ತಾಕಾ ವರ್ತೆಂ ಉಪ್ಕಾರಾಕ್ ಪಡ್ತಾ. ತಶೆಂ ಲಿಪಿಯಿ ಕೊಣಾಕಿ ಕಳಿತ್
ನಾಂ ತರ್ ಆತಾಂ ಕೇಸ್ ಪಿಕ್ಲ್ಲ್ಯಾ ವ ಆಪ್ಲೆ ನಿಮಾಣೆಂ ದೀಸ್
ಮೆಚ್ತೆಲ್ಯಾಂಕ್ ನವ್ಯಾನ್ ಏಕ್ ಲಿಪಿ ಶಿಕೊನ್ ವಾಚಿಜೆ ಮ್ಹಳ್ಯಾರ್
ಲೊಂಕಾಡ್ ಪಿಳುನ್ ಉದಾಕ್ ಕಾಡ್ಚಾಬರಿ.
ಕನ್ನಡಾಚ್ಯಾ ಲಿಪಿಯೆಚ್ಯಾ ಮೈದಾನಾರ್ ಖೆಳೊನ್ ಆಸ್ಚ್ಯಾ ಖೆಳ್ಗಾಡ್ಯಾಂಕ್ ಪಳೈಲಾರ್ ತ್ಯಾ ಖೆಳ್ಗಾಡ್ಯಾಂಚಿ
ಪಾಟ್ ಥಾಪಡ್ಚಿಂ ಆಸಾತ್. ತಾಂಕಾಂ ಉತ್ತೇಜನಾಚ್ಯಾ ತೇಲಾನ್ ಮಾಕುನ್ ಬಳೀಷ್ಟ್ ಕರ್ತೆಲೆ
ಮಹಾನ್ ಮನಿಸ್ ಯಥೇಷ್ಟ್ ಆಜ್ಕಾಲ್ ಉದೆವ್ನ್ ಯೆತಾತ್
ಹೆಂ ಕನ್ನಡ ಲಿಪಿಯೆಂತ್ ಬರೈತೆಲ್ಯಾಂಕ್ ಏಕ್ ಬಳಾಧಿಕ್
ಹಾತೆರ್. ಮೈದಾನಾರ್ ಆಪ್ಲ್ಯಾ ಮಾಲ್ಘಡ್ಯಾಂನಿ ಖೆಳುಲ್ಲೊ ಕುಟ್ಟಿ ದೊಣ್ಯಾಚೊ ಖೆಳ್ ಖೆಳ್ಚ್ಯಾ
ಲಾಗಿಂ ತೊ ನಾಕಾ ದುಸ್ರೊ ಖೆಳ್. ಖೆಳ್ ಮ್ಹಳ್ಯಾರ್ ತಾಕಾ ತೊ ಖೆಳೊಂಕ್ ಆಸಾಧ್ಯ್. ತಾಚೆರ್ ಆನಿಕಿ ಒತ್ತಡ್ ಘಾಲ್ಯಾರ್ ತೊ ಖೆಳ್ ವಿಭಾಡುಂಕ್
ಬಲಾತ್ಕಾರಾನ್ ವಕಾತ್ ಪಿಯೆಂವ್ಚೊ ಪಿಡೆಸ್ತ್ ಜಾತಾಲೊ.
ಭಾಸೆಚ್ಯಾ ವಾಡಾವಳಿಂತ್ ಲಿಪಿ ಗರ್ಜೆಚಿಗಿ ವ ಭಾಸ್ ಆಪ್ಣಾಂವ್ಚಿ ರೀತ್? ಮ್ಹಳ್ಳೆಂ
ಸವಾಲ್ ಆಜ್ಕಾಲ್ ಆಧುನಿಕ್ ಕಾಳಾಚ್ಯಾ ವಾರ್ಯಾ ವಾದಾಳಾಕ್ ಶಿರ್ಕೊನ್ ಕೊಂಕ್ಣಿ ಭಾಸೆಚೊ
ಪ್ರಕಾಶ್ ಘೈರೊ ಘೈರೊ ಜಾಲಾ. ಏಕಾ ರೀತಿಚೆಂ ಮೋಡ್ ಕೊಂಕ್ಣೆಕ್ ದಾಂಪ್ಲಾ.
ವ ಗ್ರಹಣಾಕ್ ವಳಕ್ ಜಾಲಾಂ. ದೆಕುನ್ ಆಮಿಂ ಅಲಕ್ಶಾ ಕೆಲ್ಯಾರ್
ಮುಖಾರ್ ಜಾಂವ್ಚ್ಯಾ ನಷ್ಟಾಕ್ ಆಮಿಂಚ್ ಕಾರಣ್ ಜಾತೆಲ್ಯಾಂವ್.
ಸುಲಭಾಯೆರ್ ಹೆಂ ಪಯ್ಸ್ ಜಾಂವ್ಚೆಂ ಬರಿ ದಿಸಾನಾ. ಗಿಳುಂಕ್ ಯೆಂವ್ಚ್ಯಾ ರಾಕ್ಕೊಸಪರಿ ವಿಕಾಳ್
ಹಾಸೊ ಹಾಸೊನ್ ಕೊಂಕ್ಣೆಚೊ ಮುಳಾವೊ ಫಾತೊರ್ಚ್
ಹಾಲಂವ್ಚ್ಯಾ ಸ್ಥಿತೆರ್ ಪಾವ್ಲಾ.
ಶಹರಾಂತ್ ಕೊಂಕ್ಣಿ ಭಾಸ್ ಆಜ್ ಕಾಲ್ ಮಾತ್ಯಾಕ್ ಖೊಳ್
ವೊಡುನ್ ಆಯಪಣ್ ಹೊಗ್ಡಾಯಿಲ್ಲ್ಯಾ ವಿಧ್ವಿಚೊ ವೇಸ್ ಘಾಲುನ್
ಮುಲ್ಯಾಕ್ ಬೊಸ್ಲಾ. ನಾಡಾಂತ್ ಶಹರಾಚೆಂ ವಾರೆಂ ಬರೆಂಚ್
ವಾಳೊನ್ ಆಪ್ಲೆಂ ರೂಪ್ ದಾಕಂವ್ಕ್ ಆಯ್ತೆ ಜಾಲಾಂ. ಆಸಲ್ಯಾ
ಪರಿಗತೆರ್ ಆಸ್ಚಿಂ ಕೊಂಕ್ಣಿ ಕಾತ್ರಿಂತ್ ಶಿರ್ಕಾಲೆಂ ಪೊಪಾಳ್ ಜಾಲಾಂ.
ಹ್ಯಾ ಭ್ರಮಿದೆಚ್ಯಾ ವೆಳಾರ್ ಆಮಿಂ ಕೊಂಕ್ಣೆಚೊ ಲಿಪಿಯೆಚೊ
ವಾದ್ ಹಾತಿಂ ಘೆತ್ಲ್ಯಾರ್ ’ಘೊವ್ ಕಾಪಾಡ್ ಹಾಡ್ತಾ ಮ್ಹಣೊನ್ ಆಸ್ಲ್ಲೆಂ ರಾಂದ್ಣಿಕ್ ಚೆಪ್ಲ್ಲಿ ಗತ್ ಜಾಯ್ತ್’.
ಪಯ್ಲೆಂ ಆಮಿಂ ಚಿಂತ್ಯಾಂ ಆಮ್ಕಾಂ ಕಿತೆಂ ಜಾಯ್? ಪುರ್ವಾಜಾಂನಿ ಆಮ್ಕಾಂ
ದಿಲ್ಲೆಂ ದಿರ್ವೆಂ ರಾಕೊನ್ ವರ್ಚೆಂ? ವ ಆವಯ್ಚ್ಯಾ ಫಾಸ್ಳೆಂತ್ ಆಯ್ಕಾಲ್ಲಿಂ ಆಮ್ಚಿಂ ಭಾಸ್ ಉರವ್ನ್
ವರ್ಚಿ ವ ತಿಕಾ ಆಮ್ಚ್ಯಾ ಮಿಜಾಸ್ಕೆನ್ ರಿಸ್ಕೆರ್ ಘಾಲ್ಚೆಂ? ಭಾಸ್ ಮುಳ್ಯಾರ್
ಮೋಲ್ ಬಾಂದುಂಕ್ ಜಾಯ್ನಾ ತಸಲಿ ವ್ಹಡ್ಲಿ ಆಸ್ತ್. ಹಿ ಆಸ್ತ್ ಉರಂವ್ಚಿ ಅಪೇಕ್ಶಾ, ಆಮ್ಚ್ಯಾ ಕಾಳ್ಜಾಂನಿ ಗಾಜ್ತಾ ತೊ ಆವಾಜ್
ಮುಖ್ಲ್ಯಾ ಪಿಳ್ಗೆಕ್ ರಾಕೊನ್ ದವರಿಜೆ ತರ್ ಆಮಿಂ ಕೊಂಕ್ಣಿ ಭಾಸೆಚ್ಯಾ ಖರ್ಯಾ
ಮೊಗಾನ್ ಭರೊನ್ ಲಿಪಿಯೆಚ್ಯಾ ವೊದ್ದು ವೊರಾಂಟಾಕ್ ಕಾನ್
ದೀನಾಸ್ತಾನಾ ಭಾಸೆಚ್ಯಾ ವಾಡಾವಳೆಚೆರ್ ಆಮ್ಚೆಂ ಧ್ಯಾನ್ ಸ್ಥಿರ್ ಕರಿಜೆ.
ಮನ್ಶ್ಯಾ ರುಪಾರ್ ಆಸ್ಚ್ಯಾ ಆಮ್ಕಾಂ ಮನ್ಜಾತಿಚ್ಯಾ
ವರ್ಗಾಂತ್ ಉಂಚ್ಲೆ ಸ್ಥಾನ್ ಆಸಾ. ತಿತ್ಲೆಂಚ್ ನ್ಹಂಯ್ ಭಾಸ್, ಚಿಂತಾಂಪ್ ಉಲಾಪ್ ಆಸ್ಚಿ ಏಕ್ಚ್ ಏಕ್
ಪ್ರಾಣಿ ಮ್ಹಳ್ಯಾರ್ ಮನಿಸ್. ಸಂಸರಾಂತ್ ಆಸ್ಚ್ಯಾ ಹಜಾರೊಂ ಭಾಸೆ
ಸಾಂಗಾಂತಾ ಆಮ್ಚಿಂ ಕೊಂಕ್ಣಿಯಿ ಏಕ್. ಹ್ಯಾ ಭಾಸೆಚ್ಯಾ ಸಾವ್ಳೆಂತ್
ವಾಡ್ಲ್ಲ್ಯಾ ಆಮಿ ಭಾಸೆ ಬಿತರ್ಲೊ ಜೀವ್! ಭಾಸೆಚಿಂ ಘಟಾಯ್ ಭಾಸೆಖಾತಿರ್ ಎದೊಳ್ ಕೆಲ್ಲೊ
ವಾವ್ರ್ ಹೆಂ ಸರ್ವ್ ವರೊವ್ನ್ ಪಳೆಜೆ. ಜರಿತರೀ ಖಂಯ್ಚಾಯ್ ಏಕಾ
ಲಿಪಿನ್ ಕೆಲ್ಲೊ ವಾವ್ರ್ ಮೊಟ್ಯಾ ಮಾಪಾಚೊ ಆಸಾ. ಸಾಂಗಾತ್ಚ್ಚ್ ತ್ಯಾ
ಲಿಪಿನ್ ಬರಯಿಲ್ಲೆಂ ಸಾಹಿತ್ಯ್ ವ ಬರಪ್ ಚಡ್ ಲೋಕ್ ವಾಚ್ತಾ ಆನಿಂ ತಾಂತ್ಲೆಂ ಬರೆಂಪಣ್ ಆಪ್ಣಾಯ್ತಾ ಜಾಲ್ಯಾರ್ ತವಳ್ ತಿ ಲಿಪಿ
ಮಾನುನ್ ಘೆತ್ಲ್ಯಾರ್ ಚೂಕ್ ನಾಂ. ಭುಕ್ ಥಾಂಬಂವ್ಚಿ ಭಾಕ್ರಿ ಆಸ್ತಾನಾ ಖುಬ್ಯಾರ್ ಆಸ್ಲ್ಲೆಂ
ಬೊಂಡೊ ಕಾಡುಂಕ್ ಉರ್ಡೊಂವ್ಚೆಂ ಸಮಾಗಿ? ಹ್ಯಾ ಸಂದರ್ಭಿ
ಮ್ಹಜ್ಯಾ ಮಾಂಯ್ನ್ ಕೆದಾಳಾರಿ ಸಾಂಗ್ಚಿ ಏಕ್ ಸಾಂಗ್ಣಿ ಉಗ್ಡಾಸಾಕ್ ಯೆತಾ...... ಉಂಡೊ ಖೆಲ್ಲ್ಯಾಕ್ ಕುಂನ್ಡ್ಯಾಚಿ ರೂಚ್ ಕಶಿ ಕಳಾತ್?
ನಿಮಾಣೆಂ ಮ್ಹಜ್ಯಾ ಚಿಂತ್ಪಾಚ್ಯಾ ಝರಿಕ್ ಕಾಟ್ ಭಾಂದ್ತಾನಾ
ಮ್ಹಜ್ಯಾ ಭಾಂದ್ಲ್ಲ್ಯಾ ಹ್ಯಾ ಕಾಟಾ ಬಿತರ್ ಆಸ್ಚೆಂ ಉದಾಕ್ ಕಿತ್ಲೆಂ? ಎಕ್ಟಾಂಯ್ ಕೆಲ್ಲ್ಯಾ
ಹ್ಯಾ ಉದ್ಕಾಂತ್ ಹಾಂವ್ ಕಿತ್ಲೆಂ ಪೀಕ್ ಕಾಡಿನ್? ಹೆಂ ಮ್ಹಾಕಾ ಕಳಿತ್ ಆಸ್ಲ್ಯಾರ್ ಬರೆಂ.
ಖಂಯ್ಚಿ ಲಿಪಿ ಸೂಕ್ತ್ ಮ್ಹಳ್ಳ್ಯಾ ವಿಶೆಂತ್ ವಿಮರ್ಸೊ ಕರ್ತಾನಾ ಕರ್ಣಾಟಕಾಂತ್ ಕನ್ನಡ ಲಿಪಿ
ವಾಪ್ರಿಲ್ಯಾರ್ ಮಾತ್ರ್ ಕೊಂಕ್ಣೆಚ್ಯಾ ಮೋವ್ ಜಾಲ್ಲ್ಯಾ ತಾಳ್ಯಾಕ್ ಬಳ್
ದಿವ್ಯೆತ್ ವ ಬಾವೊನ್ ಆಯಿಲ್ಯಾ ಕೊಂಕ್ಣಿ ವಾಲಿಕ್ ಜೀವ್ ಭರಿಯೆತ್
ವ ಸುಕೊನ್ ಯೇರ್ ಆಯಿಲ್ಲ್ಯಾ ಕೊಂಕ್ಣಿ ಭಾಸೆಕ್ ಶೆಳ್ ದೀವ್ನ್ ಜಿವಾಳ್ ಕರಿಯೆತ್.
ವೊದ್ದು ವೊರಾಂಟಾಚ್ಯಾ ಅರ್ಗಟಾಂಕ್ ವ ಆಪ್ಣಾಚೆಂಚ್ ಜಾಯಿಜಾಯ್ ಮ್ಹಳ್ಳ್ಯಾ ಆಶೀರ್ ಚಿಂತ್ಪಾಂ
ಪ್ರಾಸ್ ಆಮ್ಚ್ಯಾ ಶಿರಾಂ ಶಿರಾಂನಿಂ ವಾಳ್ಚ್ಯಾ ರಗ್ತಾ ಸಂಗಿಂ ಏಕ್ ಜಾಲ್ಲ್ಯಾ ಕೊಂಕ್ಣಿ ಭಾಸೆಕ್ ಲಿಪಿಚ್ಯಾ
ಸಾಂಕ್ಳ್ಯಾಂನಿ ಬಾಂದಿನಾಸ್ತಾನಾ ತಿಕಾ ವಾಡೊಂಕ್ ಸೊಡ್ಯಾ. ತಿಚ್ಯಾ ಭಂವಾರಿಂ ಆಮ್ಚ್ಯಾ
ಮಿಜಾಸ್ಕೆನ್ ಬಾಂದ್ಲ್ಲ್ಯಾ ದೊರೆ ಕೊಸ್ಳೊನ್ ತಿಕಾ ಸುಟ್ಕಾ
ದಿವ್ಯಾಂ. ತಿಚ್ಯಾ ಬರೆಂಪಣ್ ಖಾತಿರ್ ಆಮಿಂ ಫುಲ್ ನಾಂ ತರ್
ಪಾಕ್ಳಿ ದೀವ್ನ್ ಆಮ್ಚೆಂ ಕಾಯ್ದೊ ಕರ್ಯಾ.
ಲಿಪಿಯೆಚ್ಯಾ ಬಂಧಂಡೆಂತ್ಲೆಂ ಸುಟ್ಕಾ ದಿವ್ಯಾ!
ಕೊಂಕ್ಣಿ ಭಾಸೆಕ್ ಜಿಯೆಂವ್ಕ್ ಸೊಡ್ಯಾಂ!
ಕೊಂಕ್ಣಿ ಉಲೊವ್ಯಾಂ! ಕೊಂಕ್ಣಿ ವಾಪರ್ಯಾಂ
ಕೊಂಕ್ಣಿ ಭಾಸೆಕ್ ಜಯ್ತ್ ಮಾಗ್ಯಾಂ
ಲಾಂಬ್ ಜಿಯೊಂ ಕೊಂಕ್ಣಿ ಭಾಸ್!!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications