ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕೊಂಕ್ಣಿ ಕವಿತಾಂಚಿ ಇಲ್ಲಿ ತರ್ಯೀ ಮಾಹೆತ್ ಆಸ್ಚಾಂಕ್ ಹೆಂ ನಾಂವ್ ವಳ್ಕಿಚೆಂ; ಏಕ್ ಕವಿ ಜಾವ್ನ್, ಕವಿತಾಕ್ ಪಯ್ಲೆಂ ಸಮ್ಜೊನ್, ಉಪ್ರಾಂತ್ ತಾಚೆರ್ ಸಮೀಕ್ಶಾ ಕರ್ಚಿ ಶ್ಯಾಥಿ ಆಸ್ಚಾ ಕೊಂಕ್ಣೆಂತ್ಲ್ಯಾ ಭೊವ್ ಥೊಡ್ಯಾಂ ಪಯ್ಕಿಂತ್ಲೊ, ಅಂಕಣ್ಕಾರ್, ಕಾಣ್ಯೆಗಾರ್ ತಶೆಂಚ್ ವಿಚಾರ್ವಂತ್ ಸಾಹಿತಿ. ಕೊಂಕ್ಣಿ ಕವಿತಾಂಶಿವಾಯ್, ಹಿಂದಿ, ಉರ್ದು ಭಾಸೆಂತ್ಯೀ ಹಾಣೆಂ ಕವಿತಾ ಲಿಖ್ಲ್ಯಾಂತ್ ತಶೆಂಚ್ ಕವಿತಾಂಕ್ ಲಗ್ತಿ ಜಾಲ್ಲಿಂ ಸಭಾರ್ ಲೇಖನಾಂ ಹಾಣೆಂ ಬರಯ್ಲ್ಯಾಂತ್. ದಾಯ್ಜ್ ಸಾಯ್ಟಿಚೊ ಸಹ-ಸಂಪಾದಕ್ ಜಾವ್ನ್ ಆಸ್ಚೊ ಹೊ ವೆಗಿಂಚ್ ಹೆರ್ ಭಾಸಾಂಚಾ ಕವಿತಾಂಕ್ ಕೊಂಕ್ಣಿ ಅನುವಾದ್ ಕರ್ಚೆಂ ಹಾಚೆಂಚ್ ಏಕ್ ಅಂಕಣ್ ದಾಯ್ಜ್ ಸಾಯ್ಟಿಚೆರ್ ವಾಚ್ಪ್ಯಾಂಕ್ ವಾಚುಂಕ್ ಮೆಳ್ತೆಲೆಂ. ಹೊ ತಾಚೊ ಫುಡ್ಲದ್ ಕವಿತಾಜಮೊ ಜಾವ್ನಾಸಾ.
- ವಲ್ಲಿ ಕ್ವಾಡ್ರಸ್
ಮೆಲ್ವಿನ್ ಜೆ. ವಾಸ್
ಆಟ್ವ್ಯಾ ರಂಗಾಚೊ ಧೊಣು
ಕೊಗುಳೆಕ್ ಕಿತ್ಲಿ ಗಾಂವ್ಚಿ ಪ್ರತಿಭಾ ಆಸೊನ್ ಕಿತೆಂ ಫಾಯ್ದೊ
ಜರ್ ತಿಕಾ ಗಾಂವ್ಚೊ ಆವ್ಕಾಸ್ ಲಾಭ್ಲೊಚ್ ನಾ ತರ್?
ಮೊರಾಕ್ ಕಿತ್ಲಿಯ್ ನಾಸ್ಚಿ ಪ್ರತಿಭಾ ಆಸೊನ್ ಕಿತೆಂ ಫಾಯ್ದೊ
ಜರ್ ತಿಕಾ ನಾಚ್ ಕರ್ಚೊ ಆವ್ಕಾಸ್ ಲಾಭ್ಲೊನಾ ತರ್?
ಮನಿಸ್ ಸ್ವಾರ್ಥಿ ಜೀವಿ - ಮನ್ಶಾ ಸುರ್ವಾತೆ ಥಾವ್ನ್ಂಚ್. ಹ್ಯಾ ಸಂಸಾರಾಂತ್ಲೆಂ ಹರ್ಯೆಕ್ ಅಪ್ಲ್ಯಾ ಫಾಯ್ದ್ಯಾ ಖಾತಿರ್ ಗಳ್ಸಿತಾ, ಜಾಂವ್ ತಿಂ ಫುಲಾಂ ಫಳಾಂ ವ ಜಾನ್ವಾರಾಂ. ಅಪ್ಲ್ಯಾ ವೊಡ್ತಾಂತ್ ಅಪ್ಲೇಸ್ತಕಿಂ ವ್ಹಾಡ್ಚೆಂ ಝಡ್ ಸಯ್ತ್ ಕಿತ್ಲೆಂ ಲಾಂಬ್ ಆಸೊಂಕ್ ಜಾಯ್? ಕಿತ್ಲೆಂ ರೂಂದ್ ವ್ಹಾಡೊಂಕ್ ಜಾಯ್ ಮ್ಹಳ್ಳೆಂ ಫಯ್ಸಲ್ ಕರ್ಚೆಂ ಮನ್ಶಾನ್ಂಚ್. ಇತ್ಲೆಂಚ್ ಕಿತ್ಯಾಕ್? ಮನಿಸ್ ಮನ್ಶಾಕ್ ಸಯ್ತ್ ಅಪ್ಲ್ಯಾ ಫಾಯ್ದ್ಯಾಚೊ ಕರ್ನ್ ಘೆತಾ ಜಾಯ್ತೆ ಪಾವ್ಟಿಂ. ಅಸಲ್ಯಾ ಚಿಂತ್ಪಾಂತ್ ಹೆರಾಂಚಿ ಪ್ರತಿಭಾ ಸಂಸಾರಾನ್ ದೆಖ್ಚಿ ತರ್ಯ್ ಕೆದಾಳಾ?
ಅಜೀಕ್ ಲಗ್ಭಗ್ ತೀನ್ ವರ್ಸಾಂಧಿಂ ಮ್ಹಾಕಾ ಹಾಚಿ ಮುಖಾಮುಖಿ ವಳೊಕ್ ಜಾಲ್ಲಿ. ಸಂಯ್ಬಾನ್ ದಾಕ್ಶೆಣೆಚೊ, ಲಜೀಶ್ಟ್ ತರ್ಯ್ ಶಿಸ್ತೆಚೊ, ಸ್ವಾಭಿಮಾನಾಚೊ, ಖಾಲ್ತೊ ಆನಿ ಉತ್ರಾಚೆಂ ಮೋಲ್ ಸಮ್ಜಾಲ್ಲೊ ಹೊ ಕವಿ, ಕಾಣ್ಯೆಗಾರ್, ಚಿಂತ್ಪಿ ಆನಿ ಏಕ್ ಪ್ರಾಮಾಣಿಕ್ ವಾಚ್ಪಿ. ಪಾಟ್ಲ್ಯಾ ತೀನ್ ವರ್ಸಾಂನಿ ಹಾಣೆಂ ಕೊಂಕ್ಣಿ ಸಾಹಿತ್ಯಾಂತ್ ಚಲೊನ್ ಆಯಿಲ್ಲ್ಯಾ ವಾಟೆಕ್ ಪಳೆತಾನಾ ಮ್ಹಜೆಂ ಕಾಳಿಜ್ ನಿಜಾಯ್ಕ್ಯೀ ಸಂತೊಸಾನ್ ಫುಲ್ತಾ. ಕಿತ್ಯಾಕ್ ಮ್ಹಳ್ಯಾರ್ ಅಪ್ಲ್ಯಾ ದೀಸ್ಪಡ್ತ್ಯಾ ವಾವ್ರಾಮಧೆಂ ಸಾಹಿತ್ಯಾಕ್ ಸ್ಥಾನ್-ಮಾನ್ ದೀವ್ನ್ ವ್ಹಡಾ ಮಿನತೆನ್ ಅಪ್ಲೆಂ ಅಧ್ಯಯನ್ ಚಾಲು ದವರ್ನ್, ಮೆಜುಂಕ್ ಜಾಯ್ನಾತ್ಲ್ಲಿಂ ಕಿತ್ಲೆಶಿಂಗೀ ವೊರಾಂ ಆಮಿಂ ಸಾಹಿತ್ಯಾಚೆರ್ ಸಂವಾದ್ ಚಲಯ್ಲಾ ಆನಿ ಚಲವ್ನ್ ಆಸಾಂವ್.. ಆನಿ ಹ್ಯಾ ವೆಳಾಕ್ ಜೆದ್ನಾಂ ಮೋಲ್ ಮೆಳ್ತಾನಾ ಕೊಣಾಕ್ ಸಂತೊಸ್ ಜಾಯ್ನಾಂ ಜಾಯ್ತ್!.
ಹ್ಯಾ ತೀನ್ ವರ್ಸಾಂ ಉಪ್ರಾಂತ್ ಹೊಚ್ಚ್ ಕವಿ ಕೊಂಕ್ಣಿ ಸಾಹಿತಿಕ್ ವರ್ತುಲಾಂಕ್ ಏಕ್ ಪ್ರಭುದ್ದ್ ಚಿಂತ್ಪಿ, ಏಕ್ ಭರ್ವಶ್ಯಾಚೊ ವಿಮರ್ಶಕ್, ಏಕ್ ಗೂಂಡ್ ಚಿಂತ್ಪಾಚಿಂ ಕವಿತಾ ಬರಂವ್ಚೊ ಕವಿ, ಏಕ್ ತರ್ಜಣ್ಕಾರ್, ಏಕ್ ನಾಟಕಿಸ್ತ್, ದಿಗ್ದರ್ಶಕ್, ಏಕ್ ವಾವ್ರಾಡಿ, ಏಕ್ ನಟ್, ಏಕ್ ಸಂವೇದನಾತ್ಮಕ್ ಲೇಖನಾಂ ಬರಂವ್ಚೊ ಲೇಖಕ್, ಸೂಕ್ಶ್ಮ್ ನದ್ರೆಚೊ ಅಂಕಣ್ಕಾರ್ ಆನಿ ಕಾಣ್ಯೆಗಾರ್.. ಖರೆಂಚ್ ಮ್ಹಜೆಂ ಕಾಳಿಜ್ ಸಂತೊಸಾನ್ ಫುಲೊಂಕ್ ಜಾಯ್ತಿಂ ಕಾರಾಣಾಂ ಆಸಾತ್. ಪುಣ್ ಹ್ಯಾ ಖಂಚಾಕ್ಯಿ ಹಾಂವ್ ಕಾರಾಣ್ ನ್ಹಂಯ್. ಹಾಚಿ ಪ್ರತಿಭಾ, ಹಾಚಿ ಮಿನತ್, ಹಾಚೆಂ ಚಿಂತಾಪ್, ಹಾಚಿ ಶ್ರದ್ದಾಚ್ಚ್ ಕಾರಾಣ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್..
ದಾಯ್ಜ್ ವಾವ್ರಾಕ್ ಮ್ಹಜೆಸವೆಂ ಸಮಾಸಮ್ ಖಾಂದ್ ಮಾರ್ಲ್ಲ್ಯಾ ಹಾಣೆಂ ಕೆದಿಂಚ್ ವೋತ್ ವಾ ಸಾವ್ಳಿ ತೆಂ ತಿಳುಂಕ್ ನಾ. ಸಾಹಿತ್ಯ್ ಮನ್ಶಾಜಿಣ್ಯೆಚೊಚ್ ಏಕ್ ವಾಂಟೊ. ದೆಖುನ್ ಬರೊ ಮನಿಸ್ ಜಾಲ್ಲೆಖರಿತ್ ಬರೆಂ ಸಾಹಿತ್ಯ್ ರಚುಂಕ್ ಸಾಧ್ಯ್ ನಾ ಮ್ಹಣ್ ಖರೆಂಪಣಿಂ ಪಾತ್ಯೆಂವ್ಚ್ಂತ್ ಹೊಯ್ ಎಕ್ಲೊ. ಜಶೆಂ ಏಕಲವ್ಯ ಧ್ರೋಣಾಚಾರ್ಯಚಿ ಇಮಾಜ್ ಅಪ್ಲ್ಯಾ ಆಂಗ್ಣಾಂತ್ ದವ್ರುನ್ ಧೊಣ್ವಿ ವಿಧ್ಯಾ ಶಿಕೊನ್ ಧ್ರೋಣಾಚಾರ್ಯಾಕ್ಚ್ ಅಪ್ಲೊ ಗುರು ಮ್ಹಣ್ ಮಾಂದ್ಚೆಪರಿಂ ಮ್ಹಜಾ ಕಾಳ್ಜಾಕ್ ಲಾಗ್ಸಿಲೊ ಎಚ್ಚೆಮ್ ಹಾಚೊ ಸಾಹಿತಿಕ್ ಗುರು.
’ಆಟ್ವ್ಯಾ ರಂಗಾಚೊ ಧೊಣು’ - ಮೆಲ್ವಿನಾಚೊ ಫುಡ್ಲದ್ ಬೂಕ್.. ಜಿತ್ಲೊ ತಾಕಾ ಅತ್ರೆಗಾಚೊಗೀ ತಿತ್ಲೊಚ್ ಮ್ಹಾಕಾಯ್.. ಎಚ್ಚೆಮಾಚೆಂ ಪ್ರಸ್ತಾವನ್ ಖರೆಂಚ್ ಹ್ಯಾ ಧೊಣುಚಾ ಆಟ್ವ್ಯಾ ರಂಗಾಕ್ ವಾಚ್ಪ್ಯಾಂ ಸಮೊರ್ ಧಾಖಂವ್ಕ್ ಸಕಾತ್ ತರ್ ಹಾಂವ್ ದಾಧೊಸ್.. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಕವಿತಾಜಮ್ಯಾಂತ್ಲಿಂ ಥೊಡಿಂ ಕವಿತಾ ಆಧ್ಯಾತ್ಮಿಕತೆಚೆರ್ ಆಸಾತ್, ಆಧ್ಯಾತ್ಮಿಕತಾ ಧರ್ಮಾಚ್ಯಾಕೀ ಊಂಚ್
(Spirituality is above
religion). ಪಾಂಚ್ ವರ್ಸಾಂಧಿಂ ದೆ|ಜೊರ್ಜಿ ಪೀಂತ್ ಆಯ್ಕೊಳ್ ಹಾಣೆಂ ಕೊಂಕ್ಣೆಕ್ ಹಾಚಿ ಸುರ್ವಾತ್ ಕೆಲ್ಲಿ, (ಆಶಾವಾದಿ ಪ್ರಕಾಶನಾಚಾ
2002 ಇಸ್ವೆಂತ್ ಪರ್ಗಟ್ಲ್ಲ್ಯಾ ’ಜಿವಿತಾ ಸೊಭಾಣ್’ ಬುಕಾರುಪಾರ್) ’ತಾವೋಯಿಸಮ್’ ಹಾಚೆಂ ಕೊಂಕ್ಣೆಕ್ ಅಣ್ಕಾರ್ ಕರುನ್. ಹ್ಯಾ ಬುಕಾಂತ್ ತರ್ಯ್ ಅಸಲಿಂಚ್ ಕವಿತಾ ಆಸಾತ್ ಜಿಂ ಧರ್ಮ್-ದೇವ್ ಥಾವ್ನ್ ವೆಗ್ಳಿಂ - ಜಿಂ ಮನ್ಶಾಕ್ ’ಮನಿಸ್’ ಜಾಂವ್ಕ್ ಪ್ರೇರಣ್ ದಿಂವ್ಚಿ. ಭೋವ್ ಸಂತೊಸ್ ಭೊಗ್ತಾ ಆತಾಂ ಏಕ್ ತರ್ನಾಟೊ ಕವಿ ಕೊಂಕ್ಣೆಂತ್ ಅಪ್ಲ್ಯಾಚ್ ಮಿನತೆರ್ ಹೆಂ ಮಿಸಾಂವ್ ಮುಖಾರುನ್ ಆಸಾ.
ಹ್ಯಾ ಸಂಗ್ರಹಾಂತ್ ನವ್ಯಾಚ್ ಚಿಂತ್ಪಾಚಿಂ ನವ್ಯಾಚ್ ರುಪಾಚಿಂ ನವ್ಯಾಚ್ ಮಾಪಾಚಿಂ ಕವಿತಾ ಆಸಾತ್.. ಮನ್ಶಾ ಚಿಂತಾಪ್ ತೆಂಚ್, ಮನ್ಶಾಚೆಂ ದೂಕ್ ತೆಂಚ್, ಮನ್ಶಾಚಿಂ ಭಗ್ಣಾಂ ತಿಂಚ್.. ವೇಸ್ ಬದಲ್ಲಾ ಪುಣ್ ರೂಪ್ ತೆಂಚ್.. ಭಾಸ್ ಬದಲ್ಲ್ಯಾ ಪುಣ್ ಚಿಂತಾಪ್ ತೆಂಚ್... ಹೊಚ್ ಆಟ್ವ್ಯಾ ರಂಗಾಚೊ ದೊಣು!!
- ವಲ್ಲಿ ಕ್ವಾಡ್ರಸ್, ಅಜೆಕಾರ್
[ಹೊ ಬೂಕ್ ವೆಗಿಂಚ್ ಪರ್ಗಟ್ಚಾರ್ ಆಸಾ - ಹೊ ಆಶಾವಾದಿ ಪ್ರಕಾಶನಾಚೊ ವೀಸಾವೊ ಬೂಕ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications