ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ವಿಶೇಸ್ ಲೇಖನ್:
ಕೊಂಕ್ಣೆಕ್ ಫುಡಾರ್ ಆಸಾ!
ಆನ್ಸಿ ಪಾಲಡ್ಕಾ: ಕೊಂಕ್ಣಿ ಸಾಹಿತ್ಯ್ ರಸ್ಚೆಸವೆಂ ಭರ್ಪೂರ್ ಕೊಂಕ್ಣಿ ವಾವ್ರ್ ಕರ್ತೆಲೆ ಕೊಂಕ್ಣೆಂತ್ ಆಸ್ಚೆ ಭೋವ್ ಥೊಡೆ, ತಾಂತುಂ ಮ್ಹಾಕಾ ಉಟೊನ್ ದಿಸ್ಚೊ ಬಾಬ್ ಆನ್ಸಿ ಪಾಲಡ್ಕಾ. ಗಾಂವಾಂತ್, ಪರ್ಗಾಂವಾಂತ್ ಆನಿ ಆತಾಂ ಬೊಂಬೊಯಾಂತ್ ಹಾಣೆಂ ಕರ್ಚೊ ಕೊಂಕ್ಣಿ ವಾವ್ರ್ ಖರೊಚ್ಚ್ ಜಾವ್ನ್ ವ್ಹಾಖಣ್ಣೆಕ್ ಫಾವೊ ಜಾಲ್ಲೊ. ಆಪ್ಲ್ಯಾ ಸಾಹಿತ್ಯಾಕ್ ಎದೊಳ್ಚ್ ಸಭಾರ್ ಪ್ರಶಸ್ತ್ಯೊ ಆಪ್ಣಾಯ್ಲ್ಯಾರೀ, ತಾಚ್ಯಾ ಕೊಂಕ್ಣಿ ವಾವ್ರಾಕ್ ಖಂಚೀಯ್ ಪ್ರಶಸ್ಥಿ/ಪುರಸ್ಕಾರ್ ಲ್ಹಾನ್ ದಿಸತ್.
ಆನ್ಸಿ ಪಾಲಡ್ಕಾ
ಕೊಂಕ್ಣಿ ವಾಂಚಾನಾ. ಕೊಂಕ್ಣಿ ಮರ್ತೆಲಿ ಅಸಲೊ ವಾದ್ ಹಾಂವ್ ದಶಕಾಂ ಥಾವ್ನ್ ಆಯ್ಕೊನ್ ಆಯ್ಲಾಂ. ಪುಣ್ ಏಕ್ ಆಶಾವಾದಿ ಜಾವ್ನ್ ಕೊಂಕ್ಣೆ ಖಾತಿರ್ ಹಾವೆಂ ಕಿತೆಂ ಕರ್ಯೆತ್ ಮ್ಹಳ್ಳೆಂ ಸವಾಲ್ ಉಡಯ್ತೆಲೆ ಆಮ್ಚೆ ಮಧೆಂ ಕಿತ್ಲೆ ಜಣ್ ಆಸಾತ್?
ಥೊಡ್ಯಾಂಕ್ ಕೊಂಕ್ಣಿ ಏಕ್ ವೃತ್ತಿ. ಆಪ್ಲೆಂ ಧೊಲ್ಕೆಂ ಭರ್ಚಿ ವಾಟ್, ಜಾಂವ್. ಬೋವ್ ಬರಿ ಗಜಾಲ್. ಪುಣ್ ವಿಪರ್ಯಾಸ್ ಮ್ಹಳ್ಯಾರ್ ಅಸಲ್ಯಾ ವರ್ಗಾಂತ್ಲ್ಯಾ ಥೊಡ್ಯಾ ಲೋಕಾಕ್ ಕೊಂಕ್ಣೆಚೆಂ ಕಿತೆಂಚ್ ಬರೆಪಣ್ ಪಡೊನ್ ಗೆಲ್ಲೆಂ ನಾ. ಆಪುಣ್ ಆಪ್ಣಾಕ್. ಆಪ್ಣಾಚೆಂ ಬರೆಂಪಣ್ ಜಾಲ್ಯಾರ್ ಸಯ್. ದೇವ್ ಸಮೇಸ್ತಾಂಕ್ ಆಸಾ ನ್ಹಂಯ್. ಅಶೆಂ ಆಸಾ ತಾಂಚೆಂ ಚಿಂತಾಪ್.
ಹ್ಯಾಚ್ ಖಾತಿರ್ ಕೊಂಕ್ಣಿ ಲೊಕಾಕ್ ತಾಣಿ ಬೊಲಿ, ಲಿಪಿ ಮ್ಹಣ್ ವಾಂಟೆ ಫಾಂಟೆ ಕೆಲಾಂ. ಆಪ್ಣಾಕ್ ಚಾರ್ ಕಾಸ್ ಮೆಳ್ತಾತ್ ಮ್ಹಣೊನ್ ಆಪ್ಣಾಕ್ ಕಿತೆಂ ಜಾಯ್ ತೆಂ ಧಾ ಜಣಾಂಚೆರ್ ಬಲಾತ್ಕಾರಾನ್ ಥಾಪುಂಕ್ ಪ್ರಯತ್ನ್ ಕೆಲಾಂ. ಅಶೆ ಕೊಂಕ್ಣೆಚ್ಯಾ ವ್ಯವಸ್ಥಿತ್ ನಾಸಾಕ್ ತಾಣಿ ಬುನ್ಯಾದ್ ಘಾಲ್ಯಾ.
ಭಾಸ್, ಧರ್ಮ್, ಸಂಸ್ಕೃತಿ ಹಾಂಚೆ ಕೋಣೇಂಯ್ ವಾಂಟೆ ಫಾಂಟೆ ಕರ್ಚೆ ಭಾಶೆನ್ ನಾ. ಎಕಾ ಭಾಶೆಚೊ ಲೋಕ್ ತ್ಯಾಚ್ ಭಾಶೆನ್ ವ್ಯವಹಾರ್ ಕರ್ತಾನಾ ತಾಂಚೆ ಥಂಯ್ ಆಪ್ಲೆಪಣ್ ಯೆತಾ. ಹೆಂ ಸಮ್ಜಲ್ಲ್ಯಾನ್ಂಚ್ ಕಥೊಲಿಕ್ ಧರ್ಮಾನ್ ಮಾಂಯ್ ಭಾಶೆನ್ ಧಾರ್ಮಿಕ್ ಕಾರ್ಯಿಂ ಚಲವ್ನ್ ವರುಂಕ್ ಆವ್ಕಾಸ್ ದಿಲಾ. ಪುಣ್ ಹಿ ಗಜಾಲ್ ಸ್ಥಳೀಯ್ ಧರ್ಮಿಕಾಂಕ್ ಕಳಿತ್ ಆಸಾಜೆ ನ್ಹಂಯ್? ತಾಚೆ ವಿಶಿಂ ಚಿಂತಾಪ್ಚ್ ಆಟಯ್ನಾತ್ಲ್ಲ್ಯಾ ತಾಣಿ ಧಾರ್ಮಿಕ್ ಕೇಂದ್ರಾಂನಿ ಬಲತ್ಕಾರಾನ್ ಫಿಂರ್ಗಿ ಭಾಸ್ ಥಾಪ್ಲ್ಯಾ. ಪರಿಣಾಮ್ ಜಾವ್ನ್ ಆಜ್ಕಾಲ್ ತೇಂಪ್ಲಾಂನಿ ದೆವ್ಳಾಂನಿ ವೆಚೊ ಲೋಕ್ ಪಾತಳ್ ಜಾಲಾ. ಕಿತ್ಯಾಕ್ ಲೋಕಾಕ್ ವೊಡುನ್ ಘೆಂವ್ಚಿ ಭಾಸ್ ಆನಿ ಸಂಸ್ಕೃತೆಚಿ ಕಾಂತೀಯ್ ಸಕತ್ ಥಂಯ್ ನಾ.
ಗಾಂವಾಂ ಭಾಯ್ರ್ ಆಸ್ಲ್ಲ್ಯಾ ಮುಂಬಯ್ ಥಸಲ್ಯಾ ಶೆರಾಂನಿ ಜಿಯೆತೆಲ್ಯಾ ಲೋಕಾಕ್ ಕೊಂಕ್ಣೆಂತ್ ಸದಾಂಚ್ ವ್ಯವಹಾರ್ ಚಲಂವ್ಕ್ ಆವ್ಕಾಸ್ ಮೆಳಾನಾ. ಪುಣ್ ಘರಾಂನಿ ಕೊಂಕ್ಣಿ ಉಲಂವ್ಕ್, ಭುರ್ಗ್ಯಾಂಲಾಗಿಂ ಕೊಂಕ್ಣಿ ಉಲಂವ್ಕ್ ತಾಂಕಾಂ ಕೊಣೆ ಬಂದಡ್ ಘಾಲ್ಯಾ? ಥೊಡೆ ಲೋಕ್ ಅಸಲ್ಯಾ ಚಿಂತ್ಪಾಚೇಯ್ ಆಸಾತ್. ಮಾಂಯ್ಭಾಸ್ ಉಲವ್ನ್ ಕಿತೆಂ ಮೆಳ್ಚೆಂ ಆಸಾ? ಥೊಡೆ ಶಿಖಂಡಿ ವರ್ಗಾಚೆ. ಕೊಂಕ್ಣೆಂತ್ ಉಲಯ್ಲ್ಯಾರೀ ಜಾಯ್ ಮ್ಹಣ್ ತಾಣಿ ಫಿಂರ್ಗಿ ಭಾಶೆಂತ್ಚ್ ಜಾಪ್ ದಿಂವ್ಚಿ. ಫಿಂರ್ಗಿ ಭಾಸ್ ಸದಾಂಚ್ ಉಲಂವ್ಕ್ ಆವ್ಕಾಸ್ ಆಸಾ. ಕೊಂಕ್ಣೆಂತ್ ಉಲಂವ್ಕ್ ಹೊ ಏಕ್ ಅಪ್ರೂಪ್ ಅವ್ಕಾಸ್ ಮ್ಹಳ್ಳೆಂ ಚಿಂತಾಪ್ ತಾಂಚ್ಯಾ ಖಟ್ಟ್ಯಾಂತ್ ನಾಂಚ್ ನಾ.
ಕೊಂಕ್ಣಿ ವಾಂಚಾನಾ. ಕೊಂಕ್ಣಿ ಉರಾನಾ, ಕೊಂಕ್ಣಿ ಆಳ್ವಾತಾ ಮ್ಹಣ್ ಕೋಣ್ಯೀ ಸುಲಭಾಯೆನ್ ಮ್ಹಣ್ತಾ. ಕೊಂಕ್ಣೆ ಖಾತಿರ್ ಆಪ್ಲಿ ಫುಲ್ ವ ಪಾಕ್ಳಿ ದಿಂವ್ಚಿ ತಾಂಕಾಂ ಪಡೊನ್ ವಚೊಂಕ್ ನಾ!
ಮುಂಬಯ್ಚ್ಯಾ ಕೊಂಕ್ಣಿ ಭಾಶಾ ಮಂಡಳಾನ್ ಜಾಯ್ತೆ ಪಾವ್ಟಿಂ ಪ್ರತಿಭಾ ಸ್ಪರ್ಧೆ ಚಲಯ್ಲ್ಯಾತ್. ಪುಣ್ ಜಾಯ್ತೆ ಪಾವ್ಟಿಂ ಕಾರ್ಯಕ್ರಮಾ ಕರಿಜೆ ಮಳ್ಳೆ ಖಾತಿರ್ ತಿಂ ಆಸಾ ಕೆಲ್ಯಾಂತ್ ಜಾಲ್ಲ್ಯಾನ್ ಲೋಕಾನ್ ತಾಂಕಾಂ ಪಾಟಿಂಬೊ ದಿಲ್ಲೊ ನಾ. ಹ್ಯೆ ಪಾವ್ಟಿಂ ಜಮಾತೆ ವೆಳಾರ್ ಹಾಂವೆಂ ಏಕ್ ವಾದ್ ಫುಡೆಂ ದವರ್ಲೊ. ಲೋಕ್ ಆಮ್ಚೆಲಾಗಿಂ ಯೇನಾ ತರ್ ಆಮಿ ಲೋಕಾಲಾಗಿಂ ಯಾ. ಅಶೆಂ ಆಮಿ ಹ್ಯೆ ಪಾವ್ಟಿಂ ಹೊ ಸ್ಪರ್ಧೊ ಕೊಂಕ್ಣಿ ಲೋಕ್ ಭರೊನ್ ಆಸ್ಚ್ಯಾ ಮಾಲಾಡಾಂತ್ ಆಸಾ ಕೆಲೊ. ಪರಿಣಾಮ್ ಜಾವ್ನ್ ಆಮ್ಕಾಂ ರಾಶಿಂನಿ ಸ್ಪರ್ಧಿಕ್ ಮೆಳ್ಳೆ. ವೆಳಾ ಫರ್ಮಾಣೆ ಸ್ಪರ್ಧೊ ಆಕೇರ್ ಕರುಂಕ್ಚ್ಚ್ ಕಶ್ಟ್ ಮಾರ್ಲೆ.
ಕೊಂಕ್ಣೆಚ್ಯಾ ಗಜಾಲಿ ವಿಶ್ಯಾಂತ್ಯೀ ಹಾಂವೆಂ ತೆಂಚ್ ಮ್ಹಣ್ಚೆಂ. ಆಮಿ ದಿಲ್ಲೆಂ ಸಾಹಿತ್ಯ್ ಆಮಿ ಬರಂವ್ಚ್ಯಾ ಲಿಪಿಂತ್ ಗೋಂಯಾ ವ ಕರ್ನಾಟಕಾ ಬಾಯ್ಲೊ ಲೋಕ್ ವಾಚಿನಾ ತರ್ ತಾಂಕಾಂ ಖಂಚಿ ಲಿಪಿ ಕಸಲೆಂ ಸಾಹಿತ್ಯ್ ರುಚಿಚೆಂ ತೆಂ ಆಮಿ ವೊರವ್ನ್ ಪಳವ್ಯಾಂ. ತಸಲೆಂಚ್ ಸಾಹಿತ್ಯ್ ತಾಂಚ್ಯಾಚ್ ಖಾಶೆಲ್ಯಾ ಲಿಪಿಂತ್ ಆಮಿ ತಾಂಕಾಂ ದಿಂವ್ಯಾಂ. ಕಿತ್ಯಾಕ್ ಭಾಸ್ ಚಡ್ ಗರ್ಜ್. ಲಿಪಿ ಭಾಸ್ ವ್ಯವಹಾರ್ ಕರುಂಕ್ ಜಾಯ್ ಜಾಲ್ಲೆಂ ಏಕ್ ಹಾತೆರ್ ಮಾತ್. ಕೊಫಿ ಪಿಯೆಂವ್ಕ್ ಕೋಪ್ ನಾತ್ಲ್ಯಾರ್ ಗೊಬ್ಳೊ ವಾಪಾರ್ಲ್ಲ್ಯಾಂತ್ ಕಾಂಯ್ ಲುಕ್ಸಾಣ್ ಆಸಾ? ಅಶೆಂ ಲೋಕಾಚ್ಯಾ ಸದಾಂ ವಾಪಾರ್ಚ್ಯಾ ಖಾಶೆಲ್ಯಾ ಲಿಪಿಂತ್ ಆಮಿ ಕೊಂಕ್ಣಿ ಸಾಹಿತ್ಯ್ ದಿಲೆಂ ತರ್ ಸಂಸಾರಾಚ್ಯಾ ವಿವಿಧ್ ಕೊನ್ಶ್ಯಾಂನಿ ಶಿಂಪ್ಡೊನ್ ಗೆಲ್ಲ್ಯಾ ಕೊಂಕ್ಣಿ ಲೋಕಾಚಿ ಪಿಳ್ಗಿ ಪಾಸೂನ್ ಕೊಂಕ್ಣಿ ವಾಚುಂಕ್ ಫುಡೆಂ ಯೆಂವ್ಚಿನಾಂಗೀ? ವಾವ್ರ್ ಕಷ್ಟಾಂಚೊ. ಪುಣ್ ಜೊಕ್ತೆಂ ಸುಂಕಾಣ್ ದರ್ತೆಲ್ಯಾಚಿ ಆಜ್ ಗರ್ಜ್ ಆಸಾ.
ಮ್ಹಾಕಾ ಏಕ್ ಪಾವ್ಟಿಂ ಭಾರತೀಯ್ ಭಾಶಾ ಸಂಸ್ಥಾನಾಂತ್ ಗೊಂಯ್ಚ್ಯಾ ಭುರ್ಗ್ಯಾಂ ಖಾತಿರ್ ಕೊಂಕ್ಣೆಂತ್ ಸಾಹಿತ್ಯ್ ರಚ್ಚ್ಯಾ ಪಂಚ್ವೀಸ್ ದಿಸಾಂಚ್ಯಾ ಕಾರ್ಯಾಗಾರಾಂತ್ ವಾಂಟೊ ಘೆಂವ್ಚೊ ಆವ್ಕಾಸ್ ಸರ್ಕಾರಾನ್ ದಿಲ್ಲೊ. ಹ್ಯಾ ವೆಳಿಂ ಹಾಂವೆಂ ಏಕ್ ವಾದ್ ಮಾಂಡ್ಲ್ಲೊ. ಪುಸ್ತಕಾಂ ಕನ್ನಡ ಲಿಪಿಂತ್ಯೀ ತಯಾರ್ ಜಾಯ್ಜೆ ಮ್ಹಣ್. ಆಮ್ಚ್ಯಾ ಇಸ್ಕೊಲಾಂನಿಂಯ್ ಕೊಂಕ್ಣಿ ಶಿಕೊಂಕ್ ಜಾಯ್ ಮ್ಹಣ್. ಪುಣ್ ಭಿತರ್ಲ್ಯಾನ್ ಏಕ್ ಅಥ್ವಿಚ್ ಭಿರಾಂತ್ ಆಸ್ಲ್ಲಿ. ಕೊಂಕ್ಣಿ ಕರ್ನಾಟಕಾಚ್ಯಾ ಇಸ್ಕೊಲಾಂತ್ ಹಾಡ್ಲ್ಯಾರ್ಯೀ ಶಿಕೊಂಕ್ ಕೋಣ್ಂಚ್ ಫುಡೆಂ ಯೆಂವ್ಚೆ ನಾಂತ್ ಮ್ಹಣ್. ಪುಣ್ ಆಜ್ ತಿ ಗಜಾಲ್ ಫಟ್ ಜಾಲ್ಯಾ.
ಆಜ್ ಕರ್ನಾಟಕಾಂತ್ ಕೊಂಕ್ಣೆಕ್ ಅಕಾಡೆಮಿ ಆಸಾ. ಸರ್ಕಾರಾನ್ ಚಲಂವ್ಚ್ಯೊ ಕೊಂಕ್ಣಿ ಅಕಾಡೆಮಿ ಆಸ್ಚ್ಯೊ ಫಕತ್ ಗೊಂಯಾಂತ್ ಆನಿ ಕರ್ನಾಟಕಾಂತ್ ಮಾತ್. ಹೆರ್ ಪ್ರದೇಶಾಂನಿ ಥೊಡ್ಯಾಂನಿ ಕೊಂಕ್ಣಿ ಸಂಸ್ಥ್ಯಾಂಕ್ ಕೊಂಕ್ಣಿ ಅಕಾಡೆಮಿ ಮ್ಹಣ್ ನಾಂವ್ ದವರ್ಲಾಂ. ಕರ್ನಾಟಕಾಚ್ಯಾ ಕೊಂಕಣ್ ಕರಾವಳೆಂತ್ಲ್ಯಾ ೯೧ ಇಸ್ಕೊಲಾಂತ್ಲೆ ದೋನ್ ಹಜಾರಾಂ ಪ್ರಾಸ್ ಚಡ್ ಕೊಂಕ್ಣಿ ಲೋಕ್ ಕನ್ನಡ ಲಿಪಿಂತ್ ಕೊಂಕ್ಣಿ ಶಿಕೊನ್ ಆಸಾ. ಕರ್ನಾಟಕಾಂತ್ ಕೊಂಕ್ಣೆಕ್ ರಾಜ್ಭಾಶೆಚೊ ಮಾನ್ ನಾ ತರೀ ಕೊಂಕ್ಣಿ ಪತ್ರಾಂ ಕರ್ನಾಟಕಾ ಭಾಯ್ರ್ ಸಂಸಾರಾಚ್ಯಾ ವಿವಿಧ್ ಪ್ರಮುಕ್ ಶೆರಾಂತ್ಲ್ಯಾ ಪುಸ್ತಕ್ ಸ್ಟೋಲಾಂನಿ ವಿಕ್ತಿಂ ಮೆಳೊನ್ ಆಸಾತ್. ಸರ್ಕಾರಿ ಆಸ್ರೊ ನಾತ್ಲ್ಯಾರೀ, ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ದೀನಾ ತರೀ ಕನ್ನಡಾ ಲಿಪಿಂತ್ ಜಾಯ್ತೆಂ ರುಚಿಚೆಂ ಸಾಹಿತ್ಯ್ ಆಸಾ. ಕೊಂಕ್ಣಿ ಲೋಕ್ ತೆಂ ಮಜೇನ್ ವಾಚುನ್ ಆಸಾ. ಏಕಾ ಬರವ್ಪ್ಯಾಕ್ ಹಾಚ್ಯಾ ವರ್ತೆಂ ಕಿತೆಂ ಜಾಯ್.
ಕನ್ನಡ ಲಿಪಿಚ್ಯಾ ಕೊಂಕ್ಣೆಂತ್ ಆಜ್ ಪಾಂಚ್ ಹಪ್ತ್ಯಾಳಿಂ ತಿಸಾಂ ಲಾಗಿಂ ಮಯ್ನ್ಯಾಳಿಂ/ಪಂದ್ರಾಳಿಂ ಆನಿ ಶೆಂಬೊರಾಲಾಗಿಂ ಪ್ರಾದೇಶಿಕ್ ಪತ್ರಾಂ ಪ್ರಕಟ್ ಜಾತಾತ್. ಕನ್ನಡ ಲಿಪಿ ವಾಪಾರ್ಚ್ಯಾ ಜಾಯ್ತ್ಯಾ ಬರಯ್ಣಾರಾಂನಿ ಎಕೇಕ್ಲ್ಯಾಂನಿ ಪನ್ನಾಸಾಂ ಪ್ರಾಸ್ ಚಡ್ ಫಕತ್ ಕಾದಂಬರಿ (Novels) ಲಿಖ್ಲ್ಯಾತ್. ರಾಜಾಶ್ರಯ್ ಆಸ್ಚ್ಯಾ ಗೋಂಯಾಂತ್ ಸಗ್ಳ್ಯಾಂನಿ ಸಾಂಗಾತಾ ಮೆಳೊನ್ ಬರಯಿಲ್ಲ್ಯೊ ಕಾದಂಬರಿ ದೋನ್ ವ ತೀನ್ ಅಂಕ್ಡ್ಯಾ ವಯ್ರ್ ಗೆಲ್ಲಿ ಪಟ್ಟಿ ಕೋಣ್ಯೀ ಮ್ಹಾಕಾ ದೀತಿತ್ ತರ್ ಮ್ಹಾಕಾ ಎಕ್ದಮ್ ಖುಶಿ ಜಾಂವ್ಕ್ ಆಸಾ. ತಶೆಂ ಮ್ಹಣ್ ಗೋಂಯಾಂ ಪ್ರಾಸ್ ಚಡ್ ಬರೆಂ ಸಾಹಿತ್ಯ್ ಮಂಗ್ಳುರಾಂತ್ ಆಸಾ ಮ್ಹಣ್ ಹಾವೆಂ ಸಾಂಗ್ಚೆಂ ನ್ಹಂಯ್. ಕಿತ್ಯಾಕ್ ಸಾಹಿತ್ಯ್ ಆಂಕ್ಡ್ಯಾಂನಿ ತುಲನ್ ಕರುಂಕ್ ಜಾಯ್ನಾ. ಮೌಲ್ಯಾಂನಿ ತೆಂ ತುಲನ್ ಕರಿಜೆ. ಪುಣ್ ಗೊಂಯಾಂ ಪ್ರಾಸ್ ಚಡ್ ವಾಚ್ಪಿ ಮಂಗ್ಳುರಾಂತ್ ಆಸಾತ್ ಮ್ಹಣ್ ಖಂಡಿತ್ ಸಾಂಗ್ಯೆತ್. ಹಾಂವೆಂ ಸಾಂಗ್ಚೊ ಉದ್ದೇಶ್ ಕಿತೆಂ ಮ್ಹಳ್ಯಾರ್ ಕೊಂಕ್ಣೆಚ್ಯಾ ವಾಡಾವಳೆಕ್ ರಾಜಾಶ್ರಯ್, ಅಕಾಡೆಮಿ ಪ್ರಶಸ್ತಿ ಜಾಯ್ಜೆಚ್ ಮ್ಹಣ್ ನಾ. ಹೆಂ ಸತ್ ಗಮನಾಂತ್ ಘೆತ್ಲೆಂ ತರ್ ರಾಜಾಶ್ರಯ್ ನಾತ್ಲ್ಲ್ಯಾ ಮುಂಬಯ್ ವ ಹೆರ್ ಪ್ರದೇಶಾಂತ್ ಆಸ್ಚ್ಯಾ ಕೊಂಕ್ಣಿ ಲೋಕಾಕ್ ಕೊಂಕ್ಣಿ ಫುಡ್ಕಾಯ್ ದರುಂಕ್ ಕಾವ್ಜೆಣಿ ಕಿತ್ಯಾಕ್ ಮ್ಹಣ್ ವಿಚಾರ್ಚೊ ಉದ್ದೇಶ್ ಮ್ಹಜೊ.
ಕರ್ನಾಟಕಾಂತ್ ಥೊಡ್ಯಾಂನಿ ಆಜೂನ್ ಮ್ಹಣ್ಚೆಂ ಆಸಾ. ಕೊಂಕ್ಣಿ ಕನ್ನಡ ಲಿಪಿಂತ್ ಶಿಕ್ಲ್ಯಾರ್ ಹಿಂದಿ ಭಾಸ್ ಉಲಂವ್ಕ್ ಬರಂವ್ಕ್ ಯೆಂವ್ಚಿ ನಾ ಮ್ಹಣ್. ಹೆಂ ಏಕ್ ಪಿಶೆಂ ಚಿಂತಾಪ್. ಮ್ಹನ್ಶಾನ್ ಕಿತ್ಲ್ಯೊ ಭಾಸೊ ಜಾತಾತ್ ತಿತ್ಲ್ಯೊ, ಕಿತ್ಲ್ಯೊ ಲಿಪಿ ಜಾತಾತ್ ತಿತ್ಲ್ಯೊ ಶಿಕ್ಲ್ಯಾರ್ ತಾಕಾಚ್ ಫಾಯ್ದೊ. ಪುಣ್ ಗರ್ಜ್ ಮ್ಹಣ್ ದಿಸ್ಲ್ಯಾರ್ ಹೆಂ ಶಿಕೊಂಕ್ ಚಡ್ ತೇಂಪ್ ಲಾಗಾನಾ. ಸವೆ ಕ್ಲಾಸಿ ಥಾವ್ನ್ ಪದ್ವೆ ಪರ್ಯಾಂತ್ ಹಿಂದಿ ಭಾಶೆಂತ್ ಶಿಕ್ಲ್ಲ್ಯಾ ಮ್ಹಾಕಾ ಆಜೂನ್ ಏಕ್ ಹಿಂದಿ ಸಾಹಿತಿಕ್ ಪುಸ್ತಕ್ ವ ಹಿಂದಿ ನಿಯತಕಾಲಿಕ್ ಮಜೇನ್ ವಾಚುಂಕ್ ಯೇನಾ. ಹಿಂದಿ ಉಲಂವ್ಕ್ ಪಾಸೂನ್ ಮ್ಹಾಕಾ ಕಳಿತ್ ನಾತ್ಲ್ಲೆಂ. ಹಾಂವ್ ಪಯ್ಲೆಂ ಹಿಂದಿ ಉಲಂವ್ಕ್ ಶಿಕ್ಲ್ಲೊಂ ದುಬಾಯಾಂತ್. ತ್ಯಾ ಉಪ್ರಾಂತ್ ಮುಂಬಯಾಂತ್. ಕೊಂಕ್ಣೆಚ್ಯಾ ಮೊಗಾಕ್ ಲಾಗೊನ್ ಮ್ಹಾಕಾ ಆತಾಂ ದೇವ್ನಾಗಿರಿಂತ್ಲಿ ಕೊಂಕ್ಣಿ, ರೋಮಿ ಲಿಪಿಂತ್ಲಿ ಕೊಂಕ್ಣಿ ವಾಚುಂಕ್ ಬರಂವ್ಕ್ ಕಶ್ಟ್ ಮಾರಿನಾ. ಪುಣ್ ಧಾ ವರ್ಸಾಂ ಇಸ್ಕೊಲಾಂತ್ ಶಿಕ್ಲ್ಯಾರೀ ಆಜೂನ್ ಹಿಂದಿಚಿಂ ಪತ್ರಾಂ ಪುಸ್ತಕಾಂ ವಾಚುಂಕ್ ಬರಂವ್ಕ್ ಮ್ಹಾಕಾ ತ್ರಾಸ್ ಜಾತಾತ್. ಕಿತ್ಯಾಕ್ ಮ್ಹಜ್ಯಾ ಪರಿಸರಾಂತ್ ತಾಚಿ ತಿತ್ಲಿ ಗರ್ಜ್ ನಾ. ಜರ್ ಗರ್ಜ್ ಆಸ್ಲ್ಲಿ ತರ್ ಫಕತ್ ಮಯ್ನ್ಯಾಂನಿ ಮ್ಹಾಕಾ ಹೆಂ ಸಾಧ್ಯ್ ಜಾತೆಂ. ಕೇರಳಾಂತ್ ಜಿಯೆಂವ್ಚೊ ಆಮ್ಚೊ ಲೋಕ್ ಮಲಯಾಳಮ್ ವಾಚುಂಕ್ ಬರಂವ್ಕ್ ಸಕಾನಾಂಗೀ? ಫಕತ್ ಅರ್ಭಿ ವಾಚ್ಚ್ಯಾ ಬರಂವ್ಚ್ಯಾ ಉಲಂವ್ಚ್ಯಾ ಗಾಂವಾಂತ್ ಜಿಯೆಂವ್ಚೊ ಆಮ್ಚೊ ಲೋಕ್ ತ್ಯಾ ಭಾಶೆಂತ್ ವ್ಯವಹಾರ್ ಕರಿನಾಂಗೀ? ಸಂಶೋದನಾ ಖಾತಿರ್ ರೋಮಾಕ್ಗೀ ಇಟೆಲಿಕ್ಗೀ ಜರ್ಮನಿಕ್ಗೀ ವೆಚೆ ಆಮ್ಚೆ ಧಾರ್ಮಿಕ್ ಫಕತ್ ವರ್ಸಾ ಭಿತರ್ ತಿ ಭಾಸ್ ಶಿಕೊನ್ಂಯೀ ತ್ಯಾ ಭಾಶೆಂತ್ ಸಂಸೊದ್ ಮಂಡನ್ ಕರಿನಾಂತ್ಗೀ? ಜರ್ ಗರ್ಜ್ ಆಸಾ ತರ್ ತಿ ವಸ್ತ್ ಮೆಳೊಂಕ್/ಕಳೊಂಕ್ ಕಾಂಯ್ಂಚ್ ವೇಳ್ ಲಾಗಾನಾ. ಫಕತ್ ಇಲ್ಲೆ ಪ್ರಯತ್ನ್ ಕರಿಜೆ. ತಿತ್ಲೆಂಚ್.
ಗಾಂವಾಂತ್ಚ್ (ಮ್ಹಣ್ಜೆ ಮಂಗ್ಳುರಾಂತ್) ವೃತ್ತಿ ಕರುನ್ ಆಸ್ಲ್ಲ್ಯಾ ಆಮ್ಚ್ಯಾ ಪುರ್ವಜಾಂಕ್ ಹಿಂದಿ ಭಾಸ್ ಲಿಪಿ ಇಸ್ಕೊಲಾಂತ್ ಶಿಕ್ಲ್ಯಾರೀ ಕಿತ್ಲ್ಯಾ ಜಣಾಂಕ್ ತ್ಯಾ ಭಾಶೆಂತ್ ವೆವಹಾರ್ ಚಲಂವ್ಕ್ ಜಾತಾಲೊ? ಪುಣ್ ಆಯ್ಚ್ಯಾ ಕಾಳಾರ್ ಗಾಂವಾಂತ್ ಹಿಂದಿ ಉಲಂವ್ಕ್ ಕಳಿತ್ ನಾತ್ಲ್ಲೆ ಕೋಣ್ ಆಸಾತ್? ಆಮ್ಚೆಂ ಟಿ.ವಿ. ಫಿಲ್ಮ್ ಮಾದ್ಯಮ್ ಇತ್ಲೆಂ ಪ್ರಭಾವ್ಕಾರಿ ಜಾಲಾಂಗೀ ಆಜ್ ಹರ್ ಲೋಕಾಕ್ ಹಿಂದಿ ಸುಲಭಾಯೆನ್ ಉಲಂವ್ಕ್ ಯೆತಾ. ಪುಣ್ ಹಿಂದಿ ವಾಚುಂಕ್ ಬರಂವ್ಕ್ (ಮ್ಹಣ್ಜೆ ಹಿಂದಿ ಸಾಹಿತ್ಯ್, ಪತ್ರಾಂ ಪುಸ್ತಕಾಂ) ಕಿತ್ಲ್ಯಾ ಜಣಾಂಕ್ ಜಾತಾ. ಫಿಲ್ಮ್ ಸಂಸಾರಾಂತ್ಲ್ಯಾ ಚಡಾವತ್ ಲೋಕಾಂನಿ ಹಿಂದಿ ಬರಂವ್ಕ್ ವಾಪಾರ್ಚಿ ಲಿಪಿ ರೋಮಿ. ಕರ್ನಾಟಕಾ ಭಾಯ್ರ್ ಆಸ್ಚ್ಯಾ ಕನ್ನಡ ಲೋಕಾಚಿಂ ಭುರ್ಗಿಂ ಗರ್ಜೆಕ್ ಖಂಚ್ಯಾ ಲಿಪಿಂತ್ ಬರಯ್ತಾತ್? ರೋಮಿಂತ್. ಪರ್ಗಾಂವಾಂತ್ ಆಸ್ಚೊ ಮರಾಠಿ ಲೋಕ್ ಪಾಸೂನ್ ಗರ್ಜೆಕ್ ಮರಾಠಿ ರೋಮಿ ಲಿಪಿಂತ್ ಬರಯ್ತಾ. ರೋಮಿ ಲಿಪಿಂತ್ ಮರಾಂಠಿ ಶಿಕಂವ್ಚೊ ಏಕ್ ಸುಪುರ್ಲೊ ಸಂಸ್ಥೊ ಪಾಸುನ್ ಆಸಾ. ರೋಮಿ ಲಿಪಿಂತ್ ಮರಾಠಿ ಶಿಕಂವ್ಚಿ ವೆಬ್ಸೈಟ್ ಪಾಸೂನ್ ಆಸಾ. ಚಡ್ ಪಯ್ಸ್ ಕಿತ್ಯಾಕ್ ವೆಚೆಂ. ಗೋವಾ ಕೊಂಕ್ಣಿ ಅಕಾಡೆಮಿಚಿ ಅಧಿಕೃತ್ ವೆಬ್ಸೈಟ್ ತುಮಿ ಪಳೆಲ್ಯಾ. ತಾಂತುಂ ಆಸ್ಚಿಂ ಲಿಖಿತಾಂ ಫಕತ್ ರೋಮಿ ಲಿಪಿಂತ್ಲಿ. ದೇವ್ನಾಗಿರಿ ಲಿಪಿಂತ್ ತಯಾರ್ ವೆಬ್ಸೈಟ್ ಕರ್ಚಿ ತಿತ್ಲಿ ಕಾಂಯ್ ಕಶ್ಟಾಂಚಿ ಗಜಾಲ್ ನ್ಹಂಯ್. ಪುಣ್ ರೋಮಿ ಲಿಪಿ ಭಾಶೆನ್ ನಾಗಿರಿ ಲಿಪಿಂತ್ ವೆಬ್ಸೈಟ್ ಕರ್ಚಿ ತಿತ್ಲಿ ಸುಲಭ್ಯೀ ನ್ಹಂಯ್.
ತರ್ ಆಮ್ಕಾಂ ಕೊಂಕ್ಣಿ ಲೋಕಾಕ್ ಮಾತ್ ಲಿಪಿಚೊ ವಾದ್ ಕಿತ್ಯಾಕ್. ಆಮ್ಚಿಂ ಭುರ್ಗಿಂ ಖಂಚ್ಯಾ ಪರಿಸರಾಂತ್ ಆಸಾತ್ ತ್ಯಾ ಪರಿಸರಾಂತ್ ಪ್ರಭಾವ್ಕಾರಿ ಜಾವ್ನಾಸ್ಚ್ಯಾ ಲಿಪಿಂತ್ಚ್ ಆಮ್ಚ್ಯಾ ಭುರ್ಗ್ಯಾಂಕ್ ರುಚ್ಚೆಂ ಕೊಂಕ್ಣಿ ಸಾಹಿತ್ಯ್ ಆಮಿ ದಿವ್ಯಾಂ. ತಾಂಕಾಂ ರುಚಿಚೆಂ ಭುರ್ಗ್ಯಾಂಚೆಂ ಸಾಹಿತ್ಯ್ ರಾಶಿಂನಿ ತಯಾರ್ ಕರುನ್ ಆಕರ್ಶಿತ್ ರೀತಿನ್ ರಂಗಾಳ್ ಪಿಂತುರಾಂ ಸವೆಂ ತಾಣಿ ದಿಸ್ಪಡ್ತೆಂ ವಾಪಾರ್ಚ್ಯಾ ಲಿಪಿಂತ್ ತಾಂಚ್ಯಾಚ್ ಬೋಲಿಂತ್ ಬರವ್ನ್ ದಿವ್ಯಾಂ. ಅಶೆಂ ಕೆಲೆಂ ತರ್ ಕೊಂಕ್ಣಿ ಆಳ್ವೊನ್ ವೆಚಿನಾ. ಕರ್ನಾಟಕಾ ವ ಗೊಂಯಾಂ ಭಾಯ್ರ್ಯೀ ಕೊಂಕ್ಣಿ ಬಾಳ್ವೊನ್ ಯೆತೆಲಿ.
ಸಗ್ಳ್ಯಾಂಚೆರ್ ಏಕ್ ಲಿಪಿ ಏಕ್ ಬೋಲಿ ಥಾಪುನ್ ವ್ಯವಸ್ಥಿತ್ ರಿತಿನ್ ಕೊಂಕ್ಣೆಚೆಂ ನಾಚ್ ಕರ್ಚ್ಯಾಕೀ ವಿವಿಧ್ ಲಿಪಿಂನಿ ವಿವಿಧ್ ಬೋಲಿಂನಿ ಕೊಂಕ್ಣಿ ಫುಲಾತ್ ತರ್ ಕಿತ್ಲೆಂ ಬರೆಂ ಜಾಯ್ತ್?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications