ಅಂಖ್ಯಾಚೆಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆಗ್ನೆಲ್ ಪಿರೇರ್ ಹಾಚಾ ಸಿಯೋನ್ ಆಶ್ರಮ್ ವಿಶ್ಯಾಂತ್ಲೆಂ ಅಪುರ್ಭಾಯೆಚೆಂ ಲೇಖನ್ ಹ್ಯಾ ಪಾನಾಕ್ ಭೆಟ್ ದಿಯಾ

ಮಿತ್ರ್-ದಾಯ್ಜ್ ವಿಶೇಸ್ ಅಂಖ್ಯಾಚೆಂ ವಿಶೇಸ್ ಲೇಖನ್ - ವಲ್ಲಿ ಕ್ವಾಡ್ರಸ್, ಅಜೆಕಾರ್

ಅರುಣೋದಯ - ಸ್ಪೆಶಲ್ ಇಸ್ಕೊಲ್ (ಕಾರ್ಕಳ್)

[ಮತಿಚಾ ವಿಕಾಸಾಕ್ ಪಾವೊಂಕ್ ನಾತ್‌ಲ್ಲ್ಯಾ ಭುರ್ಗ್ಯಾಂಕ್ ಏಕ್ ಭರ್ವಶ್ಯಾಚೆಂ ಕಿರಣ್]      

ಭಯ್ಣ್ ಡೊನಾಲ್ಡಾ ಪಾಯ್ಸ್ (ಸಂಚಾಲಕಿ) 

ಹ್ಯಾ ಸಂಸಾರಾಂತ್ ಜಿಯೆಂವ್ಚಾ ಹರ್‍ಯೆಕಾ ಮನ್ಶ್ಯಾಕ್ ಮಾನಸಿಕ್ ವಿಕಾಸನ್ ಗರ್ಜೆಚೆಂ. ಭುರ್ಗ್ಯಾಪಣಾ ಥಾವ್ನ್ ತರ್ನಾಟ್‌ಪಣಾಕ್ ಪಾಂವ್ಚಾ ಹರ್‍ಯೆಕ್ಲ್ಯಾಕ್ ಮತಿಚಿ ವ್ಹಾಡಾವಳ್ ಜಾಂವ್ಕ್‌ಚ್ ಜಾಯ್. ಆನಿ ಅಸಲಿ ಮತಿಚೆಂ ವಿಕಾಸನ್ ಜಾಯ್ನಾತ್‌ಲ್ಲಿಂ ಭುರ್ಗಿಂ ಘರಾಂನಿ ತಶೆಂಚ್ ಸಮಜೆಂತ್ ಕೊಣಾಕ್‌ಯ್ ’ನಾಕಾ ಜಾಲ್ಲಿಂ ಭುರ್ಗಿಂ’ ಮ್ಹಳ್ಳೆಂ ಚಿಂತಾಪ್ ತ್ಯಾ ಭುರ್ಗ್ಯಾಂಕ್, ತಾಂಚಾ ಆವಯ್ ಬಾಪಾಯ್ಕ್ ತಶೆಂಚ್ ಸಯ್ರ್ಯಾ ಧಯ್ರ್ಯಾಂಕ್ ಸಯ್ತ್ ವಿರಾರಾಯೆಕ್ ಕಾರಾಣ್ ಜಾತಾ. ಅಸಲ್ಯಾ ಭುರ್ಗ್ಯಾಂಚಿಂ ಆವಯ್ ಬಾಪಾಯ್ ಸಯ್ತ್ ಸಮಾಜೆ ಥಾವ್ನ್ ಪಯ್ಸ್ ರಾವ್ತಾತ್.

ಎಕಾಮೆಕಾ ಆಧಾರ್ ದಿಂವ್ಚೆಂಚ್ ಖರೆಂ ಕ್ರಿಸ್ತಾಂವ್‌ಪಣ್

ಇತ್ಲ್ಯಾ ಕಶ್ಟಾಂನಿ ಚಲೊನ್ ಯೆಂವ್ಚೊ ಹೊ ಕೊಣಾಕ್ ರಾಕೊನ್ ಆಸಾ?

"ಮತಿಚೆಂ ವಿಕಾಸನ್ ಜಾಯ್ನಾತ್‌ಲ್ಲಿ ಏಕ್ ಪಿಡಾ ನ್ಹಂಯ್ ಬಗಾರ್ ಏಕ್ ಊಣ್" ಮ್ಹಣ್ತಾತ್ ಜಾಯ್ತೆ ಮಾನಸಿಕ್ ಪಿಡೆಚೆ ತಜ್ನ್-ದೊತೊರ್. ತರ್‌ಯ್ ಸಮಾಜ್ ಅಸಲ್ಯಾಂಕ್ ಸಲೀಸಾಯೆನ್ ಸ್ವೀಕಾರ್ ಕರಿನಾ. ಆಮ್ಚಾ ಸಮಾಜೆಂತ್ ಜಶೆಂ ಆಮ್ಚಾ ಥೊಡ್ಯಾ ಸಯ್ರ್ಯಾಂಗೆರ್ ಜಾವ್ಯೆತಾ ಆಮ್ಚಾ ಇಶ್ಟಾಂಕ್ ಜಾವ್ಯೆತಾ ದೆವಾನ್ ಭುರ್ಗಿಂ ದಿಲ್ಯಾಂತ್ ತಾಂತ್ಲಿಂ ಥೊಡಿಂ ಮತಿಚಾ ವಿಕಾಸಾಕ್ ಪಾವೊಂಕ್ ಸಕಾನಾತ್‌ಲ್ಲಿಂ ಜಾವ್ನಾಸಾತ್. ಅಸಲ್ಯಾಂಕ್ ಜಶೆಂ ಆಮ್ಕಾಂ ರಚ್ಲಾಂ ದೆವಾನ್ ತರ್‌ಯ್ ಚಡ್ತಾವ್ ಜಾವ್ನ್ ಆಸಲ್ಯಾಂಕ್ ಪಳೆವ್ನ್ ಆಮಿ ಹಾಸ್ತಾಂವ್, ತಾಂಚಿಂ ನಕ್ಲಾಂ ಕರ್ತಾಂವ್ ಆನಿ ಹ್ಯಾ ಭುರ್ಗ್ಯಾಂಚಾ ಆವಯ್-ಬಾಪಾಂಯ್ಚೆರ್ ನಾ ನಾ ರಿತಿಚ್ಯೊ ಖಬ್ರೊ ಕರುಂಕ್‌ಯ್ ಪಾಟಿಂ ಸರಾನಾಂವ್, ಹೊ ಹಾಂಚಾ ಕರ್ಮಾಂಚೊ ಫಳ್ ಮ್ಹಣೊಂಕ್‌ಯ್ ಆಮ್ಚಿ ಜೀಬ್ ಪಾಟಿಂ ಸರಾನಾ. ಪುಣ್ ಹಿಂ ಉತ್ರಾಂ ಉಚಾರ್ತೆಲ್ಕ್ಯಾಂಕ್ ಎಕಾ ದಿಸಾ ವಾಡ್ ಅಸಲ್ ಸಯ್ತ್ ಪಾಟಿಂ ದೀಂವ್ಕ್ ಆಸ್ತೆಲೆಂ ಮ್ಹಳ್ಳೆಂ ಕೊಣೆಂಯ್ ಚಿಂತ್‌ಲ್ಲೆಂ ನಾ.

[ಓಂ ಶಾಂತಿ ಶಾಂತಿ ಶಾಂತಿ ಹೀ... ಆಮ್ಚಾ ಪೊಟಾಚಾ ಖಾಣಾಕ್ ಕುಮೊಕ್ ಕೆಲ್ಲ್ಯಾಂಕ್ ಬೆಸಾಂವ್ ದೀ ದೆವಾ]

ಅಸಲ್ಯಾ ಭುರ್ಗ್ಯಾಂಚಾ ವಿಕಾಸಾ ಖಾತಿರ್ ಆಸ್ಚೆ ಸಂಸ್ಥೆ ಭೋವ್ ಉಣೆಂ. ತೆಂಯ್ ಶ್ಹೆರಾಂನಿ ಆಸ್ಯೆತಾ - ಪುಣ್ ಹಳ್ಳೆ ಹಳ್ಳೆಂನಿ ಅಸಲಿಂ ಕಿತ್ಲಿಶಿಂಗೀ ಭುರ್ಗಿಂ ಜಿಯೆತಾತ್ ಆಪ್ಲ್ಯಾ ಘರ್ಚಾಂಕ್ ವೊಜೆಂ ಜಾವ್ನ್, ಆಪ್ಲೊ ಫಾಲ್ಯಾಂಚೊ ಫುಡಾರ್ ಫಕತ್ತ್ ಕಾಳೊಕಾಂತ್ ಲಿಪವ್ನ್ ಸದಾಂಕಾಳ್ ಎಕಾ ಭರ್ವಶ್ಯಾಚಾ ಕಿರ್ಣಾಕ್ ರಾಕೊನ್ ಜಿಯೆತಾತ್. ಸಂಸಾರ್ ಚಲ್ತಾ ಹಾಂಚಿ ಕಸಲಿಚ್ ಫಿಕಿರ್ ನಾಸ್ತಾಂ. ತರ್‌ಯ್ ಆಮ್ಚಾ ಸಮಾಜೆಂತ್ ದೇವ್ ಥೊಡ್ಯಾಂಕ್ ವಿಂಚುನ್ ಕಾಡ್ತಾ ಅಸಲ್ಯಾಂಚಾ ಕುಮ್ಕೆಕ್ - ಆನಿಂ ಅಸಲೆಂಚ್ ಇಸ್ಕೊಲ್ ಜಾವ್ನಾಸಾ ಕಾರ್ಕಳಾಂತ್ಲೆಂ ’ಅರುಣೋದಯ ಸ್ಪೆಶಲ್ ಇಸ್ಕೊಲ್’.

ಸದಾಂಚ್ ಹಾಸ್ಕುರ್‍ಯಾ ವದನಾರ್, ಹ್ಯಾ ದೈವಿಕ್ ಮಿಸಾಂವಾಂತ್ ವಾಂಟೆಲಿ ಜಾಂವ್ಚಿಂ [ದಾವ್ಯಾ ಥಾವ್ನ್: (ಬಸ್‌ಲ್ಲಿಂ): ಉಮಾಶಂಕರ್, ಜಾಸಿಂತಾ ಡಿ’ಮೆಲ್ಲೊ, ಭಯ್ಣ್ ಡೊನಾಲ್ಡಾ ಪಾಯ್ಸ್, ವಿಲ್ಮಾ ಪಿಂಟೊ, ಸುಪ್ರಿಯಾ. (ಉಭಿಂ ಆಸ್ಚಿಂ): ಕಸ್ತೂರಿ, ಕವಿತಾ, ರೀಟಾ, ಸುಮಲತಾ, ಸುನಿಲ್, ರಾಖೇಶ್]

ಕೊಣ್ ಸಾಂಗತ್ ಹೊ ಮಾನಸಿಕ್ ಪಿಡೆಚೊ ಭುರ್ಗೊ ಮ್ಹಣ್?

ಹಾಕಾ ಪಳೆವ್ನ್ ಹಾಸ್‌ಲ್ಲ್ಯಾಂತ್ಲಿಂ/ಹಾಸ್ಚಾಂತ್ಲಿಂ ಆಮಿಂಯ್ ಎಕ್ಲಿಂ ನ್ಹಂಯ್‌ಗಿ?

ಅರುಣೋದಯ ಫಕತ್ ಏಕ್ ಇಸ್ಕೊಲ್ ಮಾತ್ರ್ ನ್ಹಂಯ್, ಹ್ಯಾ ಇಸ್ಕೊಲಾಂತ್ ಫಕತ್ತ್ ಶಿಕ್ಷಣ್ ಮಾತ್ರ್ ದೀನಾಂತ್, ಭುರ್ಗ್ಯಾಂಕ್ ವ್ಹಡಾ ಜತ್ನೆನ್, ಮೊಗಾನ್ ತಾಂಚಾ ಮತಿಚಾ ವ್ಹಾಡಾವಳೆಕ್ ಲಗ್ತಿ ಜಾಲ್ಲ್ಯಾ ಸಭಾರ್ ರಿತಿಂಚಾ ಶೈಕ್ಷಣಿಕ್ ಮೌಲ್ಯಾಂಕ್ ಆವ್ಕಾಸ್ ಕರುನ್ ದಿತಾ, ಪಿಡೆಸ್ತ್ ಬುರ್ಗ್ಯಾಂಕ್ ವ್ಹಕಾತ್ ದಿತಾತ್, ತಾಂಕಾಂ ಚಲೊಂಕ್, ಉಲಂವ್ಕ್, ಹಾಸೊಂಕ್, ಚಿಂತುಂಕ್ ಶಿಕಯ್ತಾ. ಆಮ್ಕಾಂ ರಚ್‌ಲ್ಲೊ ದೇವ್ ಏಕ್ ಆಸ್ತಾನಾ ಹಾಂಗಾಸರ್‌ಯ್ ಜಾತ್ ಏಕ್‌ಚ್ - ’ಮನ್ಶಾಪಣಾಚಿ’ ಜಾತ್ ಶಿವಾಯ್ ಕೊಣ್ ಕ್ರೀಸ್ತಾಂವ್, ಕೊಣ್ ಹಿಂದು ಆನಿ ಕೊಣ್ ಮುಸ್ಲಿಮ್ ಮ್ಹಳ್ಳೊ ಭೇಧ್ ಹ್ಯಾ ಇಸ್ಕೊಲಾಂತ್ ನಾ. 

ಹ್ಯಾ ಇಸ್ಕೊಲಾವಿಶಿಂ ಮಟ್ವೆಂ ವಿವರಣ್:

ಜಶೆಂ ಇಟಲಿ ಥಾವ್ನ್ ಆಮ್ಚಾ ದೇಶಾಕ್ ಆಯಿಲ್ಲಿ ಭಯ್ಣ್ ತೆರೆಜಾ, ಕಲ್ಕತ್ತಾಂತ್ಲ್ಯಾ ಗತ್ ಆಧಾರ್ ನಾತ್ಲೆಲ್ಯಾಂಚೊ, ಪಿಡೇಸ್ತಾಂಚೊ ಆಧಾರ್ ಜಾವ್ನ್ ಕಶಿ ಮದರ್ ತೆರೆಜಾ ಜಾಲಿಗೀ, ತೆಚ್ಚ್‌ಪರಿಂ ಲೊರೆಟ್ಟೊ ಫಿರ್ಗಜೆಂತ್ ಜಲ್ಮೊನ್ ದುಬ್ಳ್ಯಾಂಚಾ ಸೆವೆಖಾತಿರ್ ಅಪ್ಲಿ ಜಿಣಿಂಚ್ ಸಮರ್ಪಿತ್ ಕೆಲ್ಲಿ ಬೆಥನಿ ಧರ್ಮ್ ಭಯ್ಣ್ ಸಿಸ್ಟರ್ ಡೊನಾಲ್ಡಾ ಪಾಯ್ಸ್ ಹಿಣೆಂ 2000 ಇಸ್ವೆಂತ್ ಅಸಲ್ಯಾ ಭುರ್ಗ್ಯಾಂ ಪಾಸತ್ ಅಪ್ಲಿ ಜಿಣಿ ಸಮರ್ಪುಂಕ್ ನಿಚೆವ್ ಕೆಲೊ ಮಾತ್ರ್ ನ್ಹಂಯ್, ಸಮಾಜೆಂತ್ಲ್ಯಾ ಭೋವ್ ಕಶ್ಟಾಚಾ ಕಾಮಾಕ್ ವಿಂಚುನ್ ಮನ್ಶಾ ಮೊಗಾಕ್ ಏಕ್ ನವೊ ಅರ್ಥ್ ಸೊಧುನ್ ಕಾಡ್ಚೆಂ ಮಿಸಾಂವ್ ಸುರು ಕೆಲೆಂ.

ಕಾರ್ಕಳ್ ತಾಲುಕ್ ಏಕ್ ದುಬ್ಳೊ ಗಾಂವ್ ಆನಿ ಕಾರ್ಕಳ್ಚಾ ಸುತ್ತೂರಾಂತ್ಲೆ ಗಾಂವ್‌ಯ್ ಗರೀಬ್‌ಪಣಾಚೆ ಗಾಂವ್. ಚಡ್ತಾವ್ ಲೋಕ್ ಕೃಷಿಕ್ ಆನಿ ಕೂಲಿ ಕಾಮ್ ಕರ್ನ್ ಆಪ್ಲೊ ದೀಸ್ಪಡ್ತೊ ಗ್ರಾಸ್ ಜೊಡ್ತಾ, ಅಸಲ್ಯಾ ಪರಿಗತೆಂತ್ ಮಾನಸಿಕ್ ವಿಕಾಸನ್ ಜಾಯ್ನಾತ್‌ಲ್ಲ್ಯಾ ಆಪ್ಲ್ಯಾ ಭುರ್ಗ್ಯಾಕ್ ಬರೆಂ ಶಿಕಾಪ್ ದೀಂವ್ಕ್ ಚಿಂತ್ಚೆ ತಸಲಿಂ ಭೊವ್ ಉಣಿಂ ವಾ ಕೊಣ್‌ಯ್ ನಾಂತ್ ಮ್ಹಳ್ಯಾರ್‌ಯ್ ಸಾರ್ಕೆಂ ಜಾಯ್ತ್. ತರ್‌ಯ್ ಭರ್ವಸೊ ಸಾಂಡಿನಾಸ್ತಾಂ, ದೆವಾಚಿ ಖುಶಿಯೆಕ್ ಖಾಲ್ತಿಮಾನ್ ಘಾಲ್ನ್ ಹೆಂ ಕಶ್ಟಾಂಚೆಂ ಮಿಸಾಂವ್ ಸುರು ಕೆಲ್ಲ್ಯಾ ಸಿಸ್ಟರ್ ಡೊನಾಲ್ಡಾಚಾ ಮಿನತೆನ್ ಆನಿ ಮಾಗ್ಣ್ಯಾನ್ ಆಜ್ ಹ್ಯಾ ಇಸ್ಕೊಲಾಂತ್ ಚಡುಣೆಂ ಪನ್ನಾಸ್ ಭುರ್ಗಿಂ ಆಸಾತ್, ತಾಂತ್ಲಿಂ ಚಡಾವತ್ ಭುರ್ಗಿಂ ಆಪಾಂಗ್ - ಕೊಣಾಕ್ ಸಾರ್ಕಿ ದೀಶ್ಟ್ ನಾ ತರ್ ಕೊಣಾಕ್ ಸಾರ್ಕೆಂ ಚಲೊಂಕ್ ಜಾಯ್ನಾಂ, ಆನಿ ಕೊಣಾಕ್ ಉಲಂವ್ಕ್ ಜಾಯ್ನಾಂ ತರ್ ಕೊಣಾಕ್ ಚಿಂತುಂಕ್ ಜಾಯ್ನಾ. ಪುಣ್ ಹಿಂ ಸರ್ವಾಂಕ್ ಆಮ್ಚೆಪರಿಂ ದೆವಾನ್ ಏಕ್ ಕಾಳಿಜ್ ದಿಲಾಂ, ಏಕ್ ಜೀವ್ ದಿಲಾ, ದೋನ್ ದೊಳೆ, ಏನ್ ನಾಕ್, ದೋನ್ ಕಾನ್ ಆನಿ ಮನ್ಶಾಸಾರ್ಕಿ ಕೂಡ್ ದಿಲ್ಯಾ. ಆಮ್ಕಾಂ ದೆವಾನ್ ಸರ್ವ್ ಬರೆಂ ಪಣ್ ದಿಲಾಂ ಮತಿಕ್ ಬರೆಂ ಚಿಂತುಂಕ್ ದಿಲಾಂಸ್ತಾಂ ಆಮ್ಚೆಮಧೆಂ ಆನಿ ತ್ಯಾ ಭುರ್ಗ್ಯಾಂ ಮಧೆಂ ಆಸ್ಚೊ ಪ್ರಮುಖ್ ತಫಾವತ್ ಇತ್ಲೊಚ್;

ಆಮಿಂ ತಸಲ್ಯಾಂಚೆಂ ಬರೆಂಪಣ್ ಚಿಂತ್ಚಾ ಬದ್ಲಾಕ್ ಆಮ್ಚೊ ಸ್ವಾರ್ಥ್ ಮಾತ್ರ್ ಚಿಂತಾಂವ್, ಹೆರಾಂಚೆರ್ ಖೊಟೆಂ ಆಶೆಂವ್ಕ್, ಕರುಂಕ್ ಸಕ್ತಾಂವ್. ಪುಣ್ ತಿಂ ಅಪ್ಣಾಸವೆಂಚ್ ಝುಜೊನ್ ಹಿ ಜಿಣಿ ಜಿಯೆತಾತ್. ಹೆರಾಂ ಹಾಂಚೆರ್ ಹಾಸ್ತಾನಾ ಹಿಂ ಅಪ್ಲ್ಯೊ ಹಾಸೊ ವಿಸರ್ಲ್ಯಾಂತ್.

ಕಾರ್ಕಳಾಂತ್ಲ್ಯಾ ನವ್ಯಾ ಪೊಲಿಸ್ ಸ್ಟೇಶನಾಚಾ ಬಗ್ಲೆನ್ ಆಸ್ಚಾ ಇಸ್ಕೊಲಾಂತ್ ಸದ್ದ್ಯಾಕ್ ತೆಗಾಂ ಸಮಾಜ್ ಸೆವಕಿಂ, ದೊಗಾಂ ಶಿಕ್ಶಕಾಂ, ಚ್ಯಾರ್ ಮನೋವೈಗ್ಯಾನಿಕ್ ದೊತೊರ್ ಆನಿ ಏಕ್ ಉಲಂವ್ಚಿ ತರ್ಭೆತಿ ದಿಂವ್ಚೊ ದೊತೊರ್ ಆಸಾತ್ ಆನಿ ಹ್ಯಾ ಭುರ್ಗ್ಯಾಂಚಾ ಬರ್‍ಯಾಪಣಾಕ್ ಸರ್ವ್ ಮಿನತೆನ್ ವಾವ್ರ್ ಕರುನ್ ಆಸಾತ್.

ಹೆಂ ಇಸ್ಕೊಲ್ ’ಜೀವನ್ ವೆಲ್ಫೇರ್ ಟ್ರಸ್ಟ್, ಕಾರ್ಕಳ್’ ಹೆಂ ಚಲಯ್ತಾ ತರ್‌ಯ್ ಹ್ಯಾ ಟ್ರಸ್ಟಾಚಿ ಸಂಚಾಲಕಿ (ಮ್ಯಾನೇಜಿಂಗ್ ಟ್ರಸ್ಟಿ) ಜಾವ್ನಾಸ್ಚಿ ಭಯ್ಣ್ ಡೊನಾಲ್ಡಾ ಆಪ್ಲ್ಯಾ ಸಾದ್ಯಾ, ಖಾಲ್ತ್ಯಾ ಜಿಣ್ಯೆಧ್ವಾರಿಂ ಕಾರ್ಕಳ್ಚಾ ಸುತ್ತುರಾಂತ್ಲ್ಯಾ ಸರ್ವ್ ಲೊಕಾಂಕ್ ವಳ್ಕಿಚಿ.

ಬರಿ ಜಿಣಿ ಜಿಯೆಂವ್ಚೆಂ ಹಕ್ಕ್ ದೆವಾನ್ ಹರ್‍ಯೆಕ್ಲ್ಯಾಕ್ ದಿಲಾಂ ತರ್‌ಯ್ ಸಭಾರ್ ಪಾವ್ಟಿಂ ಆಮಿಂ ಎಕಾಮೆಕಾಕ್ ಲ್ಹಾಲ್ಹಾನ್ ರಿತಿರ್ ಆಧಾರ್ ದೀಂವ್ಕ್ ಸಕ್ತಾಂವ್. ತಿತ್ಲೆಂ ವ್ಹಡ್ ಕಾಳಿಜ್ ಆಸ್ಚಾಂಕ್ ಮಾತ್ರ್ ಹೆಂ ಸಾಧ್ಯ್ ಜಾತಾ. ಹೆರಾಂಚಾ ಸಂತೊಸಾ ಖಾತಿರ್ ಕರ್ಚೊ ಏಕ್ ಲ್ಹಾನ್ ಸಾಕ್ರಿಫಿಸ್ ಭೋವ್ಶಾ ಆಮಿಂ ಕರ್ಚಾ ಹಜಾರ್ ರೆತಿರೆಂ ಪ್ರಾಸ್ ಉಂಚ್ಲೊ. 

ದಾಯ್ಜ್ ಹಾಂಚೆ ಕೊಣ್?

ಆಮಿಂ ಕೊಂಕ್ಣಿ ಬರವ್ಪಿ, ಆಮ್ಚೆಂ ಮಿಸಾಂವ್ ಕೊಂಕ್ಣಿ ಸಾಹಿತ್ಯ್ ತರ್‌ಯ್ ಸಾಹಿತ್ಯಾಧ್ವಾರಿಂ ಸಮಾಜ್ ಸೆವಾ ಕರ್ಚಿಂ ಆಮ್ಚಿಂ ಪಾವ್ಲಾಂ ಆಧ್ಲ್ಯಾ ವರ್ಸಾಪರಿಂ ಹ್ಯಾ ವರ್ಸಾಯ್ ಮುಖಾರುಂಕ್ ಚಿಂತ್ಲಾಂ. ಆಧ್ಲ್ಯಾ ವರ್ಸಾ ’ಸಿಯೋನ್ ಆಶ್ರ್ಯಾಕ್’ ಕುಮೊಕ್ ಕರ್ಚಾ ಇರಾದ್ಯಾನ್ ’ದಿವೊ ದಾಯ್ಜ್ ವಿಶೇಷ್ ಅಂಕೊ 2005’ ಪರ್ಗಟ್ ಕೆಲ್ಲೆಪರಿಂ, ಹ್ಯಾ ವರ್ಸಾ ’ಮಿತ್ರ್ ದಾಯ್ಜ್ ವಿಶೇಸ್ ಅಂಖೊ 2006’ ಆಮಿ ಪರ್ಗಟ್ ಕರ್ತೆಲ್ಯಾಂವ್, ಕೊಂಕ್ಣೆಚಾ ಹೆರ್ ಥೊಡ್ಯಾ ವಾವ್ರಾಕ್ ಆಧಾರ್ ಜಾಂವ್ಚಾ ಕಾಮಾಂ ಸವೆಂ ’ಅರುಣೋದಯ ಇಸ್ಕೊಲಾಕ್’ ಕಾಂಯ್ ಇಲ್ಲಿ ಆರ್ಥಿಕ್ ಮಜತ್ ದಿಂವ್ಚಾ ಇರಾದ್ಯಾನ್ ಪರ್ಗಟ್ ಜಾಂವ್ಚಾ ಹ್ಯಾ ವಿಶೇಸ್ ಅಂಖ್ಯಾಂತ್ ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತಿಂಚಾ ವಿಂಚ್ಣಾರ್ ಬರ್ಪಾಸವೆಂ ವಿಶಿಷ್ಟ್ ರಿತಿಚೆಂ ಸಾಹಿತ್ಯ್ ಆಟಾಪೊನ್ ಆಸ್ತೆಲೆಂ ಆನಿ ಸರ್ವ್ ಕೊಂಕ್ಣಿ ಸಾಹಿತ್ಯ್ ಮೊಗಿಂನಿ ಪುಂಜಾವ್ನ್ ದವರ್‍ಯೆತ್ ಜಾಲ್ಲೊ ಬೂಕ್ ಜಾವ್ನ್ ಹೊ ಪರ್ಗಟೊನ್ ಯೆತಲೊ.

ದಿವೊ ದಾಯ್ಜ್ ವಿಶೇಷ್ ಅಂಖೊ 2005

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications