ಅಂಕಲ್,

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ ’ದಾಯ್ಜ್’ ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಸವಾಲಾಂಕ್ ಜಾಪಿ

ಹ್ಯಾ ಅಂಕಣಾಂತ್ ಇನಾಮಾಂಕ್ ಫಾವೊ ಜಾಲ್ಲ್ಯಾ ಸವಾಲಾಂಚೆಂ ಪೋಶಕ್ ಜಾವ್ನಾಸಾತ್ ಹಿಂ ಕೊಂಕ್ಣಿ ಪತ್ರಾಂ

Placeholder: the original page gave this picture no description, and none has been written yet. It came from daaiz\daaiz\column\sz\sz5.asp.

ದಿವೊ ಹಾಫ್ತ್ಯಾಳೆಂ

ಮಿತ್ರ್ ಹಾಫ್ತಾಳೆಂ

ಸೆವಕ್ ಮಯ್ನ್ಯಾಳೆಂ

ಅಂಕಣ್‌ಕಾರಾ ವಿಶ್ಯಾಂತ್

’ಮಿತ್ರ್’, ’ಝೆಲೊ’ ತಶೆಂಚ್ ’ಕಾಣಿಕ್’ ಪತ್ರಾಂಚೆಂ ಸಂಪಾದಕ್ಪಣ್ ಚಲಂವ್ಚೆ ಮಾರಿಫಾತ್, ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಭರ್ಪೂರ್ ಅನ್ಭೋಗ್ ಆಸ್ಚೊ ದೊ|ಆಸ್ಟಿನ್ ಡಿ’ಸೋಜ್ ಪ್ರಭು ಪ್ರಸ್ತುತ್, ಅಮೆರಿಕಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕೊಂಕ್ಣಿ ಭಾಸ್/ಸಾಹಿತ್ಯಾಚಾ ವ್ಹಾಡಾವಳೆಕ್ ಖಾಂದ್ ದಿಲ್ಲೊ ಹೊ ಏಕ್ ಸಂಘಟಕ್/ಮುಖೆಲಿ ತಶೆಂಚ್ ಕೊಂಕ್ಣಿ ಕಾರ್ಭಾರಿ ಜಾವ್ನಾಸಾ.

ಹಾಚಾ ವೆಕ್ತಿತ್ವಾ/ವಿಚಾರಾಂವಿಶಿಂ ಚಡ್ ಜಾಣಾಂ ಜಾಂವ್ಕ್ ಕೊಂಕ್ಣಿ ಕಾರ್ಭಾರಿ ಅಂಕಣಾಕ್ ಭೆಟ್ ದೀ.

[ಹೆಂ ಮಯ್ನ್ಯಾಳೆಂ ಅಂಕಣ್ ಜಾವ್ನಾಸಾ, ತುಮ್ಚಿಂ ಸವಾಲಾಂ ವಿಚಾರಾ, ಇನಾಮಾಂ ಜೊಡಾ]

* ಆಸ್ಟಿನ್ ಅಂಕಲ್, ತುಂ ಬೆಜಾರ್ ಕರಿನಾಕಾ; ತುಂ ಬಾಯ್ಲಾಂಡೊಗಿ? [ವಿಕ್ಟರ್ ಮಿನೆಜಸ್, ದುಬಾಯ್]

ತುಕಾ ಕೊಣೆಂ ಸಾಂಗ್ಲೆಂ ಹಾಂವ್ ’ಬಾಯ್ಲಾಂಚೊ ಲೆಂಡೊ = ಬಾಯ್ಲಾಂಡೊ" ಮ್ಹಣ್? ಕಿತೆಂ ಉಲಯ್ತಾಯ್ ವಿತೊರಿ?

* ಹಾಂಗಾ ಎಕ್ಲಿ ಬಾಯ್ ದುಕ್ರಾ ಮಾಸ್ ಆನಿಂ ಸನ್ನಾಂ ನಾ ಜಾಲ್ಯಾರ್ ಫೆಸ್ತ್‌ಚ್ಚ್ ಕರುಂಕ್ ಜಾಯ್ನಾ ಮ್ಹಣ್ತಾನೆ ಆಸ್ಟಿನ್ ಮಾಮಾ? [ಲವೀನಾ ಪಿಂಟೊ, ಮಂಗ್ಳುರ್]

ತಿ ಜಾಲ್ಯಾರ್ ಖರಿ ಮಂಗ್ಳುರ್ಗಾರ್ನ್! ತಿಚೊ ಪತಿ ಆಸ್‌ಲ್ಲೊ ತರ್ ಸೊರೊಯೀ ನಾಸ್ತಾಂ ಫೆಸ್ತ್ ಜಾಯ್ನಾ ಮ್ಹಣ್ತೊ ಕೊಣ್ಣಾ.

* ಮಾಮಾ ತುಂ ಸವಾಲಾಂಕ್ ಜಾಪಿ ದೀಂವ್ಕ್ ಖಂಯ್ ಶಿಕ್ಲೊಯ್? [ಗೀತಾ ಜಿ.ಇ., ಮಂಗ್ಳುರ್]

ಜಸೆಂ ಮ್ಹಾಕಾ ಸುಸು ಕರುಂಕ್ ಆನಿ ಪುರ್ಕ್ ಕರುಂಕ್ ಕೊಣೇಂಯ್ ಶಿಕಂವ್ಕ್ ನಾಸ್‌ಲ್ಲೆಂಗೀ ತಶೆಂಚ್ ಜಾಪಿ ದೀಂವ್ಕ್ ಯೆದೊಳ್ ಕೊಣೆಂಚ್ ಶಿಕಂವ್ಕ್ ನಾ; ಸವಾಲ್ ವಾಚ್ತಾಂ ಸ್ವಯಂಚಾಲಿತ್ ಜಾಪ್ ಯೆತಾ.

* ಆಜ್‌ಕಾಲ್ ಕರ್ಚೆ ಥೊಡೆ ಪುಣ್ ಭರ್ಚೆ ಅಥ್ವೆಚ್ ಜಾಲ್ಯಾತ್‌ಮೂ? [ರೊಜಿಟಾ ನಜ್ರೆತ್, ಮಿರಾರೋಡ್]

ತೆಂ ತಶೆಂಚ್ ರೊಜಿಟಾ. ಪಳೆ, ಪಾಪ್ ಜೆಜು ಸಂಸಾರಾಕ್ ಆಯ್ಲೊ ಆನಿಂ ಖುರ್ಸಾರ್ ಮೆಲೊ. ಆತಾಂ ಪಯ್ಶೆ ಕರ್ಚೆ ದುಸ್ರ್ಯಾಂನಿಂಚ್.

* ಸಂಸಾರಾಂತ್ ಸತ್ ಮ್ಹಳ್ಳೆಂ ಆಸಾ ಮ್ಹಣ್ ತುಕಾ ಭೊಗ್ತಾವೆ ಆಸ್ಟಿನಾ? [ವಿನ್ಸಿ ಬೆಂಗ್ಳುರ್]

ಸಂಸಾರಾಂತ್ ಸತ್ ನಾ ಮ್ಹಣೊಂಕ್ ಜಾಯ್ನಾ ವಿನ್ಸಿ; ಸತ್ ಆಸಾ ಸತ್ತಿ ಮನಿಸ್ ಮಾತ್ರ್ ಭಾರಿಚ್ ವಿರಳ್.

* ಮ್ಹಜಿ ಧುವ್ಡಿ ಆಜ್‌ಕಾಲ್ ಸದಾಂಯ್ ಸಲ್ಮಾನ್ ಖಾನಾಚಿಂ ಪಿಚ್ಚರಾಂ ಪಳೆತಾಮೂ? ಕಾಂಯ್ ವಾಯ್ಟ್ ಪಿಡೆಚಿಂ ಖುಣಾಂ ನ್ಹಂಯ್‌ಮೂ? [ಅಲಿಸ್ ಸಿಲ್ವಾ, ಕಾಪಿಕಾಡ್]

ತುಜ್ಯೆ ಧುವ್ಡೆಕ್ ಮ್ಹಜೆಲಾಗಿಂ ಧಾಡ್, ತಾಕಾ ಲಾಗ್‌ಲ್ಲೊ ಸಲ್ಮಾನ್ ಖಾನ್ ಸುಟಯ್ತಾಂಗಿ ನಾ ತೆಂ ಮಾಗಿರ್ ಪಳೆ.

* ಆಜ್‌ಕಾಲ್ ಸಗ್ಳ್ಯಾನೀ ಜುಬ್ಲೆವ್ ಚಲ್ತಾತ್‌ಮೂ? ಗಜಾಲ್ ಕಹಲಿಗಾ ಕುಂಪಾರೆ? [ಕುಮಾದ್ರ್ ಕುಂದಪುರ್]

ಗಜಾಲ್ ಇತ್ಲಿಚ್ಚ್ ಕುಮಾದ್ರೆ, ಚಡ್ತಾವ್ ಫೊಂಡಾಕ್ ಲಾಗಿಂ ತೆಂಕ್ಲ್ಯಾತ್! ವೆಚ್ಯಾ ಪಯ್ಲೆಂ ಫೆಸ್ತ್ ಕರ್ತಾತ್, ತಿತ್ಲೆಂಚ್.

* ತರ್‍ನೆಂ ತರ್‍ನೆಂ ಮೊರ್‍ನೆಂ ಮ್ಹಳ್ಯಾರ್ ಕಿತೆಂಗಾ? [ಗಂಗು ಗಂಗೊಳ್ಳಿ ಆತಾಂ ವಾರಣಾಸಿ]

ಶೀದಾ ಜಾಪ್ ದಿಲ್ಯಾರ್ ಮ್ಹಾಕಾ ಬಾಯ್ಲಾಂಡೊ ಮ್ಹಣೊಂಕ್ ಆಸಾತ್. ತಶೆಂ ಮ್ಹಳ್ಯಾರ್ - ಪಿಕ್‌ಲ್ಲಿ ಪೊಪಾಯ್ - ಮಿರಿಯೊ ಪಡ್‌ಲ್ಲಿ ಆಜಿ ನಹಿಂ ಮ್ಹಣ್.

* ಅಮೆರಿಕಾಂತ್ ಪಾವ್ಸ್ ಯೆತಾವೆ ಇರ್ಮಾಂವ್? [ದುಕೊರ್ ಬೊಸ್ತ್ಯಾಂವ್]

ಅಮೇರಿಕಾ ಯೆಮ್ಕೊಂಡಾಂತ್ ಆಸಾ ಮ್ಹಣ್ ತುಕಾ ಕೊಣೆ ಸಾಂಗ್ಲೆಂ ಇರ್ಮಾಂವ್?

* ಇಗರ್ಜೆಂನಿ ಚಡ್ ದಾನ್ ದಿಲ್ಲ್ಯಾಂಚಾ ಮಾತ್ಯಾರ್ ಹಾತ್ ದವರ್ನ್ ಆಜ್‌ಕಾಲ್ ಪವಿತ್ರ್ ಅತ್ಮೆ ಮಾಗ್ತೆಲ್ಯಾಂಕ್ ಕಿತೆಂ ಕರ್‍ಯೆತಾ? [ಶಾಲೆಟ್ ವಾಲೆನ್ಸಿಯಾ] (ಎಕಾ ವರ್ಸಾಚಿ ಮಿತ್ರ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ತುಕಾ ಕೊಣೆಂ ಸಾಂಗ್ಲೆಂ ತೆ ಪವಿತ್ರ್ ಅತ್ಮೆ ಮಾಗ್ತಾತ್ ಮ್ಹಣ್? ತೆ ಚಡೀತ್ ಪಯ್ಶೆ ಮಾಗ್ತಾತ್; ತುಕಾ ತಾಂಚಿ ಭಾಸ್ ಸಮ್ಜಾನಾ!

* ತುಂ ಆಜ್‌ಕಾಲ್ ತುಕಾ ಸವಾಲಾಂ ವಿಚಾರ್ಚಾ ಬಾಯ್ಲಾಂವಿಶಿಂ ರಾತಿಂ ಚಿಂತುನ್ ಬೊಸ್ತಾಯ್ ಮ್ಹಣ್ತಾತ್ ಥೊಡೆ ಹಾಂಗಾ - ತುಂ ಕಿತೆಂ ಮ್ಹಣ್ತಾಯ್ ಧನ್ಯಾ? [ಪಿರ್ಕಿ, ಪೆರ್ಡೂರ್]

ಹಾಂವ್ ಚಿಂತುನ್ ಬಸ್ಚೊ ಮನಿಸ್‌ಚ್ಚ್ ನಹಿಂ ಜಾಲ್ಯಾರ್! ಹಾಂವ್ ತಾಂಕಾಂ ಗುರ್ವಾರ್ ಕರುನ್ಂಚ್ ಧಾಡ್ತಾಂ!!

* ತುಂ ಮೊಟೊ ಕಿತ್ಯಾಕ್ ಜಾಯ್ನಾಂಯ್ ಆಸ್ಟಿನಾ? [ಬೊಂಬಿಲ್, ಬೊಂಬೊಯ್]

ಮೊಟಾಯ್ ಕಿತ್ಯಾ? ಹಾಂವ್ ಮೆಲೊಂ ಜಾಲ್ಯಾರ್ ಮ್ಹಜಿ ಪೇಟ್ ಕೊಣೆಂ ವ್ಹಾವಂವ್ಚಿ ಬೊಂಬಿಲಾ?

* ತುಜೆ ಕಿತ್ಲೆ ದಾಂತ್ ಭಾಂಗಾರಾಚೆ ಮ್ಹಣ್ ಮ್ಹಜಿ ಕುಮಾದ್ರ್ ಮ್ಹಾಕಾ ವಿಚಾರ್ತಾ - ಕಿತೆಂ ಗಜಾಲ್? [ನಾಂವ್ ನಾಕಾ, ಕುವೇಯ್ಟ್] (ಎಕಾ ವರ್ಸಾಚಿ ದಿವೊ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ಧಾಡ್ ತಿಕಾ ಅಮೇರಿಕಾಕ್; ತಿಚ್ಯೆಲಾಗಿಂಚ್ ಹಾಂವ್ ತೆ ಮೆಜುಂಕ್ ಲಾಯ್ತಾಂ. ಬಹುಶ್ಯ ತಿ ಪೆಂಕ್ಟಾ ಸಕಯ್ಲ್ ಚರ್ಬೆಲ್ಯಾ!

* ಆಧ್ಲ್ಯಾ ಕಾಳಾರ್ ರಾಕ್ಕೊಸ್ ಜಿಯೆತಾಲೆ ಖೈಂ, ಆತಾಂಚಾ ಕಾಳಾರ್ ತೆ ಖೈಂ ಗೆಲೆಗಾ? [ಗಾಸ್ಪರ್ ಕಾರ್ಡೊಜ್](ಎಕಾ ವರ್ಸಾಚಿ ಸೆವಕ್ ಪತ್ರಾಚಿ ದೇಶಿ ವರ್ಗಣೆಚೆಂ ಇನಾಮ್ ಫಾವೊ ಜಾಲ್ಲೆಂ ಸವಾಲ್)

ತೆ ಆಜೂನ್ ಆಸಾತ್ ಹ್ಯಾ ಸಂಸಾರಾಂತ್ - ಜೋರ್ಜ್ ಬುಶ್, ಸದ್ದಾಮ್ ಹುಸೇನ್, ಎಲ್. ಕೆ. ಅಡ್ವಾಣಿ, ಬಾಳ್ ಥಾಕ್ರೆ, ಕಿತ್ಲಿಂ ನಾಂವಾಂ ಜಾಯ್ ತುಕಾ?

* ದೆಂಕ್ಳೊ ಆನಿ ಮಾಣ್ಕೊ - ಹಾಂಚೆಪಯ್ಕಿ ಕೊಣ್‌ಗಾ ಉಂಚ್ಲೊ? [ಶರ್ಮಿಳಾ, ನಂತೂರ್]

ಕಾಲೆ ಉಲಯ್ತಾಯ್‌ಯಾ ಆಂಬ್ರೊಜಾ? ತುಜೊ ಕಿತೆಂ ಆಂಬೊ ಪಿಕೊಂಕ್ ನಾಮೂ?

ಎಕಾ ವರ್ಸಾಚಿ ದೇಶಿ ವರ್ಗಣಿ ಹ್ಯಾ ಸಕಯ್ಲ್ಯಾಂಕ್ ಫಾವೊ ಜಾತಾ

’ಮಿತ್ ಹಾಪ್ತ್ಯಾಳೆಂ’

ಶಾಲೆಟ್, ವಾಲೆನ್ಸಿಯಾ

’ದಿವೊ ಹಾಪ್ತ್ಯಾಳೆಂ’

ನಾಂವ್ ನಾಕಾ, ಕುವೇಯ್ಟ್

’ಸೆವಕ್ ಮಯ್ನ್ಯಾಳೆಂ’

ಗಾಸ್ಪರ್ ಕಾರ್ಡೋಜ್

(ಇನಾಮಾಂ ಜಿಕ್ಪ್ಯಾಂಕ್ ತಾಂಚಿಂ ಇನಾಮಾಂ ತಾಣಿಂ ದಿಲ್ಲ್ಯಾ ವಿಳಾಸಾಕ್ ಪಾವ್ತೆಲಿಂ, ಚೂಕ್ ವಿಳಾಸಾಕ್ ಆಮಿ ಜವಾಬ್ಧಾರ್ ನಾಂವ್) - ಸಂ.

ತುಮ್ಚಿಂ ಸವಾಲಾಂ ಧಾಡುಂಕ್ ವಿಳಾಸ್: austinporob@gmail.com ವಾ editor@daaiz.com