ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 24. ದೇವ್ದಾಸ್
ಜೆರಿ ರಾಸ್ಕಿಞ್, ಆಂಜೆಲೊರ್: ಏಕ್ ತಾಲೆಂತಾಚೊ ಪುಂಜೊ ಮ್ಹಳ್ಯಾರ್ ಸಾರ್ಕೆಂ ಜಾಯ್ತ್, ಏಕ್ ನಾಟಕಿಸ್ತ್, ನಟ್, ಉಲವ್ಪಿ, ಕಾರ್ಯೆಂ ನಿರ್ವಾಹಕ್ ಮಾತ್ರ್ ನ್ಹಂಯ್, ಏಕ್ ಪ್ರಭುದ್ದ್ ಕವಿ, ವಿಮರ್ಶಕ್, ಕಾಣ್ಯೆಗಾರ್ ಆನಿ ಚಿಂತ್ಪಿ. ಚಿಂತ್ಪಾಚಿ ಪ್ರಭುದ್ದತಾ ಆಸ್ಲ್ಲೆನಿಮ್ತಿಂ ಜಾಯ್ತೆಪಾವ್ಟಿಂ ಆಪ್ಲ್ಯಾ ಜಿಣ್ಯೆಚಾ ಅನ್ಭೋಗಾನ್ ಕಾಣ್ಯೆಚೆಂ ರೂಪ್ ದೀವ್ನ್ ಸಮಾಜೆಕ್ ಪ್ರಸ್ತುಸ್ ಕರ್ಚಿ ಕಲಾ ಜಾಣಾ ಆಸ್ಚಾ ಥೊಡ್ಯಾಂ ಪಯ್ಕಿಂತ್ಲೊ ಹೊ ಎಕ್ಲೊ. ಆಪ್ಲ್ಯಾ ಥೊಡ್ಯಾ ಬರ್ಪಾಂಕ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಸಯ್ತ್ ಹಾಣೆಂ ಜೊಡ್ಲ್ಯಾಂತ್.
ಜೆರಿ ರಾಸ್ಕಿಞ್
ಮತಿಂತ್ ಅಸಮಧಾನ್ ಆಸ್ಲ್ಲೆಂ. ಚಿಂತ್ಪಾಕ್ ಆದಾಳ್ತಾಲೆಂ.
ಮೊಡಾಂ ಎಕಾಮೆಕಾಕ್ ಆಪ್ಟೊನ್ ಗಡ್ಗಡೊ ಆನಿ ಝಗ್ಲಾಣೆಂ
ಮಾರ್ಚೆಪರಿಂ. ಮತಿಂತ್ ಉಟ್ಲೆಲ್ಯಾ ವಾದಾಳಾಚೊ ಉಜೊ ದೊಳ್ಯಾಂನಿ ಭಾಯ್ರ್
ಸರ್ತಾಲೊ.
ಕಿತ್ಯಾಕ್ ಅಶೆಂ ಘಡ್ತಾ?
ಹಿಂ ತೀನ್ ಉತ್ರಾಂ ಕರಂದಾಯೆಚಿಂ ಜಾಂವ್ಕ್ ಪಾವ್ಲ್ಲಿಂ ರೊನಿಕ್. ರಗ್ತಾಚಾ ಒತ್ತಡಾನ್ ಫುಲೊನ್ ತಕ್ಲಿ ದಿಂವ್ಚಿ ತಾಚಾ ಕಪಾಲಾ
ವಯ್ಲ್ಯಾ ಶಿರಾಂಕ್ ಪೊಶೆಲೆಂ ತಾಣೆ.
ಚಿಂತ್ನಾಂಚಾ ಉದ್ವೇಗಾನ್ ಭರೊನ್ ತಾಚೆಂ ಕಾಳಿಜ್ ಉಡ್ತಾಲೆಂ.
ಸಮಧಾನೆಚ್ಯೆ ಮತಿಕ್ ನಾಸಮಧಾನಾಚೆಂ ಕಿಸರ್, ಲಂಕಪಟ್ಣಾಕ್ ಉಜೊ
ದಿಲ್ಲ್ಯೆಪರಿಂ.
ಆನಿ ಥೊಡೊ ವೇಳ್ ಅಪುಣ್ ಅಸೊಚ್ಚ್ ಬಸಾನ್ ತರ್ ಮೆಂದು ಕಡೊನ್
ನಾಕಾಂತ್ಲ್ಯಾನ್ ತೊವೊಂಕ್ ಪುರೊ! ಹ್ಯಾ ಚಿಂತ್ನಾ ಬರಾಬರ್ ರೊನಿ ತಾಚಾ ಕುಡಾ ಥಾವ್ನ್ ಭಾಯ್ರ್ ಆಯ್ಲೊ.
ಆಮೊರೆಚ್ಯೆ ಘಾಂಟಿ ವಯ್ರ್ ಅರ್ಧೊ ಘಂಟೊ ಉತರ್ಲ್ಲೊ.
ಸಾಂಜೆಚೆಂ ಕಾಳೊಕಾಭರಿತ್ ಥಂಡ್ ವಾರೆಂ ತಾಚ್ಯೆ ಕುಡಿಕ್ ಸ್ಪರ್ಶ್ ಕರ್ನ್ ವ್ಹಾಳ್ಳೆಂ ತರೀ ತಾಚಿ
ಮತ್ ಶಾಂತ್ ಜಾಂವ್ಕ್ ಆಯ್ಕಾಲಿನಾ.
ಸಾಂಡುನ್ ಗೆಲ್ಲ್ಯಾ ವಾಸ್ರಾನ್ ದೆದೆಸ್ಪ್ರಾರ್ ಜಾವ್ನ್ ಮೆಟಾಂ ಕಾಡ್ಲ್ಲೆಪರಿಂ ತಾಚಾ
ಮೆಟಾಂಕ್ ಶೆವೊಟ್ ನಾತ್ಲ್ಲೊ.
’ಪೇಂ..’ ಹೊರ್ನಾಚಾ ಆವಾಜಾಸಂಗಿಂ ’ಗರ್ರ್’ ಬ್ರೇಕಿಚೊ ಆವಾಜ್ ಕಾನಾಂಕ್ ಆಪ್ಟಾತಾನಾ ಅಪುಣ್
ಮಾರ್ಗಾ ಮಧೆಂ ಎಕಾ ಕಾರಾಚಾ ಮುಖಾರ್ ಆಸಾಂ ಮ್ಹಳ್ಳೆಂ ತಾಕಾ ಕಳಿತ್ ಜಾಲೆಂ.
ಕಾರಾಚೊ ಚಾಲಕ್ ಪುರ್ಪುರಾತ್ತ್ ಆಸ್ತಾನಾ ಅಛಾನಕ್ ಜಾಲ್ಲ್ಯಾ ಘಡಿತಾಚಿ
ಪ್ರತಿಕ್ರಿಯಾ ಜಾವ್ನ್ ವೆಗಾನ್ ಉಡ್ಚ್ಯಾ ಕಾಳ್ಜಾ ಸಾಂಗಾತಾ ರೊನಿನ್ ರಸ್ತ್ಯಾಚ್ಯೆ ದೆಗೆಚಿ
ವಾಟ್ ಧರ್ಲಿ.
".... ಮಾರ್ಗಾರ್ ಕಿತ್ಯಾ ಯೇವ್ನ್ ಮೊರ್ತಾಯ್? ಘರಾ ಸಾಂಗೊನ್ ಯೇಂವ್ಕ್
ನಾಂಯ್ಗಿ?" ಚಾಲಕಾಚಿಂ ಉತ್ರಾಂ ತಾಚಾ ಕಾನಾಂಕ್ ಆಪ್ಟಾತಾವರೇಗ್
ಸ್ವಷ್ಟ್ ರಿತಿನ್ ನಿಷ್ಕ್ರಿಯ್ ಜಾವ್ನಾಸ್ಲ್ಲೊ ರೊನಿ.
’.... ಘರಾ ಸಾಂಗೊನ್ ಯೇಂವ್ಕ್ ನಾಂಯ್ಗಿ?’ ಉತ್ರಾಂ ರೊನಿಚಾ ಕಾನಾಂನಿ ರಿಗೊಂಕ್
ನಾಂತ್ ಬಗಾರ್ ತೊಪ್ಲಿಂ, ಶಿಸೆಂ ವೊತ್ಲ್ಲ್ಯೆಪರಿಂ.
’ಕೊಣ್ಯೀ ಆಸ್ಲ್ಯಾರ್ ನ್ಹಂಯ್ವೆ ಸಾಂಗ್ತಲೆಂ?’ ಚಿಂತ್ನಾಂಚೆಂ ಮೂಳ್ ಫುಟ್ಲೆಂ ಉದ್ಕಾಚೊ ಕಾಟ್ ಫುಟ್ಲ್ಲೆಪರಿಂ.
’ಕಸಲ್ಯಾ ಪಾತ್ಕಾಕ್ ಹೆಂ ಪ್ರಾಚಿತ್? ಅರ್ವಿಲ್ಲ್ಯಾ ದಿಸಾಂ ಥಾವ್ನ್ ಆಪ್ಲ್ಯೆ
ಮತಿಕ್ ಜಾಲ್ಲಿ ಚಿತ್ರ್ಹಿಂಸಾ. ಚೂಕ್ ಕೊಣಾಚಿ? ಆಪ್ಣಾಚಿ ಯಾ ಆಪ್ಣಾಚಾ ಘರ್ಚಾಂಚಿ?’
ಮತ್ ಚಿಂತಾನಾ ಮಾರ್ಗಾ ದೆಗೆನ್ ಭಾಂದ್ಲೆಲ್ಯಾ ವೊಡಾಚಾ ರುಕಾ ಮುಳಾಂತ್ ಗಳ್ಳೊ ರೊನಿ.
"ತ್ಯಾ ಚೆಡ್ವಾಲಾಗಿಂ ಕಾಜಾರ್ ಜಾಯ್ಜಾಯ್ ತರ್ ಹ್ಯಾ ಘರ್ಚೆಂ
ಮೇಟ್ ತುವೆಂ ಚಡ್ಚಿ ಗರ್ಜ್ನಾ" ಬಾಪಾಯ್ನ್ ಜಾಗ್ವಣ್
ದಿಲ್ಲ್ಯಾಚೊ ಉಡಾಸ್ ಆಯ್ಲೊ ತಾಕಾ.
ತೆಂ ಚೆಡುಂ ನಾಕಾ.. ಪುಣ್ ಕಿತ್ಯಾಕ್ ನಾಕಾ? ಕಸಲೊಚ್ಚ್ ಊಣ್
ವ ಅವ್ಗುಣ್ ತಾಚೆಥಂಯ್ ನಾ. ತಾಣಿಂ ಪಸಂದ್ ಕರುಂಕ್ನಾ ಮ್ಹಳ್ಳೆಂ
ನೀಬ್ ಸಾರ್ಕೆಂಗೀ?
ಚಿಂತಾಪ್ಚ್ ಸಾರ್ಕೆಂ ನಾತರ್ ಕಿತೆಂ ಕರುಂವ್ಯೆತಾ? ಆಪ್ಲೆ ಕಿತ್ಲೆಂ ಆನಾಕ್
ಸಮ್ಜಾಯ್ಲೆಂನಾ? ತರೀ ಏಕ್ಚ್ಚ್ ಏಕ್ ಹಟ್ ತಾಚೆಂ, ನಾಕಾ
ಮ್ಹಣೊನ್ ಜಾಲೆಂ - ತ್ಯಾ ದೆಕುನ್ ನಾಕಾ. ಕಸಲೆಂ ಸರ್ಕ್
ಹೆಂ? ಕಿತ್ಯಾಕ್ ನಾಕಾ ಮ್ಹಣೊನ್ ಸವಾಲ್ ಕೆಲ್ಯಾರ್ ’ನಾಕಾ
ಮ್ಹಣೊನ್ ಏಕ್ ಪಾವ್ಟಿಂ ಸಾಂಗ್ಲಾಂ. ತ್ಯಾ ಉಪ್ರಾಂತ್ ಪರತ್
ವ್ಹಯ್ ಮ್ಹಣ್ಚೆಂ ಸವಾಲ್ಚ್ ಉದೆನಾ ಜಾಲ್ಲ್ಯಾವರ್ವಿಂ
ನಾಕಾ’.
ತರ್ ಅಪ್ಣೆಂಯ್ ಮ್ಹಜೆಂ ತರ್ಕ್ ಮಾಂಡ್ಯೆತ್, ’ಜಾಯ್
ಮ್ಹಣೊನ್ ಏಕ್ ಪಾವ್ಟಿಂ ಸಾಂಗ್ಲ್ಯಾ ಉಪ್ರಾಂತ್ ಜಾಯ್ಜಾಯ್ಚ್ಚ್.’ ಆಪ್ಲ್ಯಾ ಚಿಂತ್ಪಾಕ್ ತಾಕಾಚ್ಚ್
ಹಾಸೊ ಆಯ್ಲ್ಯೊ.
ತಿಂ ತಶಿಂ ಚಿಂತಾತ್ ಮ್ಹಣೊನ್ ಅಪ್ಣೆಂಯ್ ತಶೆಂ ಚಿಂತುಂಕ್
ಸಾಧ್ಯ್ವೆ?
"ತಶೆಂ ನ್ಹಂಯ್ ಆನಾ. ಹಾಂವೆಂ ಮ್ಹಜಾ ಥೊಡ್ಯಾ ಖಾಸ್ಗಿ ಕಾರಾಣಾಂಕ್
ಲಾಗೊನ್ ತಾಚೆಲಾಗಿಂ ಕಾಜಾರ್ ಜಾಂವ್ಚೆಂ. ಮ್ಹಾಕಾ ದುಸ್ರೆಂ ಚೆಡುಂ
ಪಸಂದ್ ನಾ. ಆನಿ ಹಾಂವ್ ದುಸ್ರ್ಯೆ ಚಲಿಯೆಲಾಗಿಂ ಕಾಜಾರ್ಯೀ ಜಾಂವ್ಚೊನಾ.."
ತಾಚಾ ಉತ್ರಾಂಕ್ ಧಡೊ ಘಾಲ್ನ್ ಬಾಪಾಯ್ನ್ ಜಾಪ್ ದಿಲ್ಲಿ,
"ಜಾಯ್ನಾ ಆನಿ ಜಾತಾಂ ಮ್ಹಣ್ಚಿ ತಿ ತುಜಿ ಖುಶಿ ನ್ಹಂಯ್.."
"ಕಾಜಾರ್ ಜಾಂವ್ಚೆಂ ಹಾವೆಂ ಮ್ಹಳ್ಳ್ಯಾ ಉಪ್ರಾಂತ್.."
"ವ್ಹಯ್.. ತುಜ್ಯೆ ಬಾಯ್ಲೆಲಾಗಿಂ ಹಾಂವ್ ಕಾಜಾರ್ ಜಾಯ್ನಾಂ.
ಸಾಂಗ್ಲ್ಲೆಂ ಆಯ್ಕ್ ಆನಿ ಥಂಯ್ ಬಸ್.." ಅಪ್ಲೊ ನಿರ್ಧಾರ್ ನಿರ್ದಯೆನ್ ಕಳಿತ್ ಕೆಲ್ಲೊ ತಾಚಾ
ಬಾಪಾಯ್ನ್.
ಹ್ಯಾ ವರ್ವಿಂ ರೊನಿ ಕಾಂಯ್ ಚಡಿತ್ ವಿಚಲಿತ್ ಜಾಲೊನಾ. ಕಿತ್ಯಾಕ್, ತಾಚಿ
ಮತ್ ಬರೀ ಪಕ್ವ್ ಜಾಲ್ಲಿ. ಅಟ್ಟಾವೀಸ್ ವರ್ಸಾಂಚೊ ತರ್ನಾಟೊ. ಶಿಕಾಪ್
ಸಂಪವ್ನ್ ಬರ್ಯಾ ಕಾಮಾರ್ ಆಸಾ.
ಆಪ್ಣಾ ಆನಿ ಬಾಪಾಯ್ಚಾ ಚಿಂತ್ಪಾಥಂಯ್ ಆಸ್ಚೆ ಊಣ್ ತಾಕಾ ಝಳ್ಕಾನಾಸ್ತಾಂ ರಾವ್ಲೆನಾಂತ್.
ವಿಷಯ್ ಸೂಕ್ಷ್ಮ್ ಜಾವ್ನಾಸ್ಲ್ಲೊ. ಹಾಂ.. ಅಧಿಕಾರಾಚೊ.
ಅಪ್ಣಾಚಾ ಪುತಾನ್ ಅಪ್ಣೆ ಸಾಂಗ್ಲ್ಲ್ಯಾಪರಿಂ ಚಲೊಂಕ್ ಜಾಯ್ - ಅಪ್ಣೆಂ
ಸಾಂಗ್ಲ್ಲ್ಯೆ ಚಲಿಯೆಕಡೆನ್ ಕಾಜಾರ್ ಜಾಂವ್ಕ್ ಜಾಯ್.
ಲ್ಹಾನ್ ವ್ಹಡ್ ತಾಕಾ ಕೆಲ್ಲ್ಯಾ ಖಾತಿರ್ ಇತ್ಲೆಂ ಥೊಡೆಮ್ ಕರುಂಕ್ ಜಾಯ್ನಾ ತರ್ ತಸಲೊ
ಪೂತ್ ಆಸೊನ್ ಕಿತೆಂ ಫಾಯ್ದೊ?
ನೀಳ್ ಏಕ್ ಸ್ವಾಸ್ ಸೊಡ್ಲೊ ರೊನಿನ್ ಬಸ್ಲ್ಲ್ಯಾಕಡೆಂ. ತರೀ ಎದೊಳ್
ಮತಿಂತ್ಲೆಂ ದ್ವಂದ್ವ್ ಉಣೆ ಜಾವ್ನ್ ಆಬ್ಳೆ ಘರಾಚ್ಚ್ ಆಸ್ಲ್ಲೊ.
ಲ್ಹಾನ್ ಥಾವ್ನ್ ರೊನಿಕ್ ಬಾಪಾಯ್ಚೊ ಸಹವಾಸ್ ಕರ್ಚೊ
ಸಂದರ್ಭ್ ಮೆಳ್ಲ್ಲೊ ಮ್ಹಳ್ಯಾರ್ ತಾಣೆ ರಜೆರ್ ಗಾಂವಾಕ್ ಆಯಿಲ್ಲ್ಯಾ ತವಳ್
ಮಾತ್ರ್. ತೆದಾಳಾ ಥಾವ್ನ್ಂಚ್ ತಾಚೆಥಂಯ್ ಕಸಲೊಗೀ ಎಕಾ ಥರಾಚೊ
ಭಿಜುಡ್ ರಿಗ್ಲ್ಲೊ. ಊಟ್ ಬೋಸ್ ಮ್ಹಣ್ಚಾ ಬಾಪಾಯ್ ಥಂಯ್
ಮೋಗ್ ಉದೆಂವ್ಚಾ ಬದ್ಲಾಕ್ ಭ್ಯೆಂ ರಿಗ್ಲ್ಲೆಂ.
ಪುಣ್ ಅಪುಣ್ ವಾಡೊನ್ ದಾದ್ಲೆಂಪಣ್ ಆಪ್ಣಾಯ್ತಾನಾ ತಾಚೆಥಂಯ್ ಆಸ್ಲ್ಲೆಂ
ಬಾಪಾಯ್ಚೆಂ ತೆಂ ಭ್ಯೆಂ, ತಾತ್ಸಾರಾಕ್ ಬದ್ಲಾಲ್ಲೆಂ, ತರೀ ಎದೊಳ್
ವರೇಗ್ ತೊ ತಾತ್ಸಾರ್ ತಾಣೆ ದಾಖಯಿಲ್ಲೊನಾ. ಬಾಪಾಯ್ಚಾ
ಹಿಶಾರ್ಯಾ ಖಾಲ್ಚ್ ತೊ ಚಲ್ತಾಲೊ.
ಬಾಪುಯ್ ಘರಾ ನಾತ್ಲ್ಲ್ಯಾ ತವಳ್ ಮಾತ್ರ್ ಆವಯ್ನ್ ಆನಿ
ಪುತಾನ್ ಘರಾಂತ್ ವ್ಹಡ್ ತಾಳ್ಯಾನ್ ಉಲಂವ್ಚೆಂ. ನಾ ತರ್ ತಾಂಚಾ ತೊಂಡಾ ಥಾವ್ನ್ ಉಚಾರ್ಲ್ಲಿಂ ಉತ್ರಾಂ ತಾಂಚಾಂಚ್ ಕಾನಾಂಕ್ ಕಷ್ಟಾಂನಿ
ಮ್ಹಳ್ಳೆಪರಿಂ ಆಯ್ಕಾತಾಲಿಂ.
ಅಪ್ರೂಬ್ ಬಾಪಾಯ್ಚಾ ರುದ್ರ್ ಸ್ವಭಾವಾಕ್ ಬಂಡಾಯ್ ಕರ್ಚೊ ಅತ್ರೆಗ್ ಆವಯ್ ಥಂಯ್ ಉಚಾರ್ಲ್ಲ್ಯಾ ವೆಳಿಂ, "ನಾಕಾ
ಪುತಾ, ತುಕಾ ತಾಚೊ ಸ್ವಭಾವ್ ಕಳಿತ್ ಆಸಾ, ಭೆಷ್ಟೆಂಚ್ ಕಿತ್ಯಾಕ್
ಮನಸ್ತಾಪಾಕ್ ಕಾರಣ್ ದಿತಾಯ್..?" ಅಶೆಂ ಆವಯ್ನ್
ಸಾಂಗ್ತಾನಾ ತಿಚೆಂ ಮುಖಮಳ್ ಪಳೆಂವ್ಕ್ ಭಿರ್ಮತೆನ್ ಆಪ್ಲೆಂ
ಮೌನ್ ಸಾಂಭಾಳಿಜಾಯ್ ಪಡ್ಲ್ಲೆಂ ರೊನಿಕ್.
ಪುಣ್ ಅಸಮಧಾನೆಚಾ ಮುರ್ಮುರ್ಯಾಂಚೆ ಪೆಳೆ ಮತಿಚಾ ಮಾಳ್ಯಾರ್ ದಾಸ್ತಾನ್ ಜಾವ್ನ್ ಧುಂವರ್ತಾಲೆ.
ಅಸಲ್ಯಾ ವಾತಾವರಣಾಂತ್ ರೊನಿ ಶಿಜೊನ್ ಆಸ್ತಾನಾ ರಾನಾಚಾ ಉಜ್ಯಾಕ್ ಥಂಡಾಯೆಚೊ
ಪಾವ್ಸ್ ಮ್ಹಳ್ಳೆಪರಿಂ ಭೆಟ್ಲ್ಲೆಂ ಚೆಡುಂ ’ಸುಮಾ’.
ಸದಾಂ ಎಕಾಮೆಕಾ ಪಳೆವ್ನ್ ಪ್ರಾರಂಬ್ ಜಾಲ್ಲಿ ವಳೊಕ್ ಉಪ್ರಾಂತ್
ಮೊಗಾಕ್ ಪರಿವರ್ತನ್ ಜಾತಾನಾ ತಾಂಚಾ ತಾಂಚಾ ವೆಕ್ತಿತ್ವಾಚಿ ಗುಂಡಾಯ್ ದೊಗಾಂಯ್ಕೀ
ಸಮ್ಜೊನ್ ಘೆಂವ್ಕ್ ತಿಂ ಸಕ್ಲ್ಲಿಂ.
ದೋನ್ ನಿತಳ್, ನಿರ್ಮಳ್ ಕಾಳ್ಜಾಂ. ಏಕ್ ಮೊಗಾಕ್ ಆಶೆಂವ್ಚೆಂ ಅನ್ಯೇಕ್
ಮೊಗಾಚೊ ಶಿಂವೊರ್ ವೊತ್ಚೆಂ.
ಹ್ಯಾ ಸಾಂಗಾತಾ ವರ್ವಿಂ ರೊನಿನ್ ಜಿಣ್ಯೆಂತ್ ಏಕ್ ಅರ್ಥ್ ಸೊಧ್ಲ್ಲೊ. ತಾಣೆಂ ಜಿಯೆಜಾಯ್ - ಎಕಾಮೆಕಾ ಖಾತಿರ್. ತಾಂಚೆಚ್ಚ್ ಖಾತಿರ್ ಮ್ಹಳ್ಳೊ ಧ್ಯೇಯ್ ಉದೆಲ್ಲೊ.
ಮೋಗ್, ಮೋಗ್ ಮ್ಹಳ್ಯಾರ್ ಸುಮಾ. ಸುಮಾ ಮ್ಹಳ್ಯಾರ್ ರೊನಿ. ತಶೆಂ ಜಾಲ್ಲ್ಯಾನ್
ಮೋಗ್, ಸುಮಾ ಆನಿ ತೊ ಮ್ಹಳ್ಯಾರ್ ಏಕ್. ಆತಾಂ ಉದೆಲೆಂ
ಸವಾಲ್ ತೊ ಮೋಗ್ ಕಾರ್ಯಗತ್ ಕರ್ಚೆಂ.
ದರ್ಯಾಚ್ಯೆ ತಡಿರ್ ಬಸೊನ್ ದೊಗಾಂಯ್ನೀ ದಿಗಂತಾಚೆರ್ ದೀಷ್ಟ್ ಖಂಚಯ್ಲಿ.
ಸುಮಾಚೊ ಹಾತ್ ಆಪ್ಲ್ಯಾ ಹಾತಾಂತ್ ವೆಂಗ್ಲ್ಲೊ ರೊನಿನ್. ತ್ಯಾ
ಹಾತಾಚಿ ಮೊವ್ಸಾಣ್, ಊಬ್ ಸ್ವಾಭಾವಿಕ್ ರಂಗ್ ಲಾಯಿಲ್ಲ್ಯೊ
ನಾಕ್ಶ್ಯೊ. ತಾಚೊ ಹಾತ್ಚ್ಚ್ ಗಿರೇಸ್ತ್ಕಾಯೆಚೆಂ ಏಕ್ ದಿರ್ವೆಂ. ತರ್
ಸುಮಾ! ತಾಚಾ ವಿಶಾಲ್ ಕಾಳ್ಕ್ಯಾ ದೊಳ್ಯಾಂನಿ ಉದೆಂವ್ಚೊ
ಹಾಸೊ, ಉಸಾಳ್ಚಿಂ ಕಿಟಾಳಾಂ, ಧಾಂಪ್ತಾನಾ ತಾಚಾ ತೊಂಡಾಕ್ ಆಸ್ಡ್ಯಾಂನಿ ದಿಂವ್ಚಿ
ವಿಶೇಷ್ ಸೊಭಾಯ್ ಆನಿ ಅಶೆಂಚ್ ವರ್ಣುಂಕ್ ಜಾಯ್ತೆಂ ಆಸ್ಚಾ
ಸುಮಾಲಾಗಿಂ ಏಕ್ ಜಾಂವ್ಚಿ ವೇಳ್ಘಡಿ ಯೇತ್ ಕೆದ್ನಾಂ?
ಹ್ಯಾ ಅತ್ರೆಗಾನ್ ಉದ್ವೇಗ್ ಚಡಯ್ತಾನಾ ಗಜಾಲ್ ಬಾಪಾಯ್ಚಾ
ಮುಖಾರ್ ದವರ್ಲ್ಲಿ ರೊನಿನ್. ಕ್ಯಾಪ್ಟನ್ ಬ್ಯಾಪ್ಟಿಸ್ಟ್ ಅಲ್ಬುಕರ್ಕಾನ್ ಕಸಲಿಂಚ್ ಭಾವನಾಂ
ನಾಸ್ತಾಂ ರೊನಿನ್ ಸಾಂಗ್ಚೆಂ ಆಯ್ಕಾಲೆಂ ಆನಿ ಆಯ್ಕೊನ್ ’ಜಾಯ್ನಾ... ತಿ ಖುಶಿ ತುಜಿ
ನ್ಹಂಯ್’ ಮ್ಹಣ್ ಖಡಾಖಡ್ ಜಾಪ್ ದಿಲ್ಲಿ.
ಹೆವ್ಶಿನ್ ಸುಮಾಚಾ ಘರಾ ರೊನಿಚಾ ಘರಾಣ್ಯಾ ಥಾವ್ನ್ ಕಬ್ಲಾತ್
ನಾ ಮ್ಹಣ್ ಕಳಿತ್ ಜಾತಾನಾ ರಂಗ್ ಬದ್ಲಾಲ್ಲೊ. ಘರಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ
ಪುತಾಕ್ ಆಸ್ತಿಂತ್ ವಾಂಟೊ ಆಸಾತ್ವೆ? ಆಸ್ತ್ ಬದಿಕ್ ನಾತ್ಲ್ಲೊ ಜಾಂವಯ್ ಆಮ್ಕಾಂ ಕಿತ್ಯಾಕ್?
ಲಿಲ್ಲಿಬಾಯೆನ್ ಹಾಡ್ಲ್ಲಿ ಗಲ್ಫಾಚಿ ಸೈರಿಕ್ ಕಶಿಯ್ ತಯಾರ್ ಆಸಾ.
ಮೋಗ್ ರಾಗ್ ಕರಿನಾ, ಅನ್ನ್ಯಾಯ್ ಚಿಂತಿನಾ, ಮೊಸೊರ್
ಪಾವಾನಾ ಆಣಿ ಆಸ್ತ್ಯೀ ದೀನಾ. ಗಿರೇಸ್ತ್ ಕಾಳ್ಜಾ ಮಧೆಂ ಆನಿ
ಹಾತಾಂಚಾ ಬೊಟಾಂಚೆರ್ ಆಸ್ಚಾ ಭಾಂಗಾರಾಚಾ ದಾಟ್ ದಾಟ್ ಮುದಿಯಾಂ
ಮಧೆಂ ಮಾನೆಸ್ತಿಣ್ ಸಿಸಿಲ್ ಸೆರಾವೊ ಆನಿ ಮಾನೆಸ್ತ್
ಬೊನವೆಂಚರ್ ಸೆರಾವೊನ್ ಮುದಿಯೊ ಆಸ್ಲ್ಲ್ಯಾ
ಬೊಟಾಂಕ್ ವೋಟ್ ಘಾಲೊ.
ಸುರ್ಯೊ ದರ್ಯಾಂತ್ ದೆಂವ್ತಾನಾ ಆಪ್ಣೆಂ ಅಶೆಂಚ್ ಸುಮಾಲಾಗಿಂ ಏಕ್ ಜಾಯ್ಜಾಯ್, ಚಿಂತಿಲಾಗ್ಲೊ ರೊನಿ. ತರೀ
ಸಂಸಾರಾಕ್ ಅಪ್ಲೆಂಚ್ ಮ್ಹಳ್ಳೆಂ ನಿಯಮ್ ಆಸಾ ಮ್ಹಳ್ಳಿ
ಸಂಗತ್ ಮಾತ್ರ್ ರೊನಿಚ್ಯೆ ಮತಿಂತ್ ಝಳ್ಕಾಲಿನಾ.
"ಆಮಿ ರಿಜಿಸ್ತ್ರಿ ಕಾಜಾರ್ ಜಾವ್ಯಾಂ ಆನಿ ತಾಚೆ ಉಪ್ರಾಂತ್ ಮ್ಹಜೊ ಗುರು
ಮಾ|ಬಾ|ವಿಲ್ಯಮ್ ಗೊನ್ಸಾಲ್ವಸಾಲಾಗಿಂ ಉಲವ್ನ್ ರೆಸ್ಪೆರ್ ಜಾವ್ಯಾಂ. ಕಿತೆಂ
ಮ್ಹಣ್ತಾಯ್ ತುಂ ಸುಮಾ?"
ಥೊಡ್ಯಾ ವೆಳಾಚಾ ಮೌನಾ ನಂತರ್ ಸುಮನ್ ಜಾಪ್ ದಿಲಿ,
"ತುವೆಂ ಸಾಂಗ್ಲ್ಲೆಪರಿಂ ಜಾಂವ್."
ಸುಮಾಚೊ ತೊ ಕೊಗ್ಳೆ ತಾಳೊ ರೊನಿಕ್ ಸಂತೊಸಿತ್ ಕರಿಲಾಗ್ಲೊ. ಆನಿ
ಹ್ಯೆ ಘಡಿಯೆ ಕಾಳಿಜ್ ತಾಚೆಂ ಭರೊನ್ ಯೇವ್ನ್ ತಾಣೆ ಕಿತೆಂಚ್ ಚಿಂತ್ಚಾ
ಪಯ್ಲೆಂ ಸುಮಾಕ್ ಏಕ್ ಮಧುರ್ ಭಳಾಧಿಕ್ ಉಮೊ
ದಿಲೊ.
ಬಾಯ್ಕಾಚೆರ್ ಪಾಟಿಂ ಘರಾ ವೆತಾನಾ ರೊನಿಕ್ ಆಪ್ಲ್ಯಾ ಹಾತಾಂನಿ
ಪೊಟ್ಲುನ್ ಧರ್ನ್ ಬಸ್ಲ್ಲೆಂ ಸುಮಾ. ಶೆರಾಕ್ ಲಾಗಿಂ
ಪಾವ್ತಾನಾ ಸುಮಾ "ರೊನಿ.. ರೊನಿ.." ಮ್ಹಣೊನ್
ಬೊಬಾಟ್ಲೆಂ. ಮುಖ್ಲ್ಯಾನ್ ಏಕ್ ಪ್ರಾಯ್ವಂತ್ ಮ್ಹಾತಾರಿ
ಪಾಶಾರ್ ಜಾತಾಲಿ. ರೊನಿನ್ ಎಕಾಚ್ಫರಾ ಬಾಯ್ಕಾಚಿ ಬ್ರೇಕ್
ಮಾರ್ಲಿ.
ಬಾಯ್ಕ್ ನಿಯಂತ್ರಣಾಕ್ ಯೇಜಾಯ್ ತರ್
ಪಾಟ್ಲ್ಯಾನ್ ವೆಗಾನ್ ಆಯ್ಲಲೆಂ ಕಾರ್ ಯೇವ್ನ್ ಬಾಯ್ಕಾಕ್ ಆಪ್ಟಾಲೆಂ.
ಬಾಯ್ಕ್ ರೊನಿ ಆನಿ ಸುಮಾ ಡಾಮಾರಾಚಾ ರಸ್ತ್ಯಾಕ್
ಶೆವ್ಟಾಲಿಂ. ಥೊಡ್ಯಾಚ್ ವೆಳಾನ್ ಲೋಕ್ ಜಮ್ಲೊ. ’ಸುಮಾ..
ಸುಮಾ..’ ರೊನಿ ಸುಮಾ ಸರ್ಶಿನ್ ಆಯ್ಲೊ. ಸುಮಾಚ್ಯೆ ತಕ್ಲೆ ಭಂವ್ತಣಿಂ ರಗಾತ್ ನಿಧಾನ್ ಜಮೊನ್ ಯೆತಾಲೆಂ.
ಲೊಕಾನ್ ಸುಮಾಕ್ ಉಕಲ್ಚಾ ಪಯ್ಲೆಂಚ್ ರೊನಿನ್ ಸುಮಾಚಿ ತಕ್ಲಿ ಆಪ್ಲ್ಯಾ ಉಸ್ಕ್ಯಾರ್ ದವರ್ಲಿ.
ಸುಮಾಚೆ ದೊಳೆ ಉಗ್ತೆ ಆಸೊನ್ ರೊನಿಕ್ಚ್ ಪಳೆತಾಲೆ,
ಪುಣ್ ತಾಂತುಂ ಪ್ರಕಾಸ್ ಯಾ ಚಲನ್ ನಾತ್ಲ್ಲೆಂ. ಲೊಕಾನ್ ದೊಗಾಂಯ್ಕೀ
ಲಾಗ್ಶಿಲ್ಯೆ ಆಸ್ಪತ್ರೆಕ್ ಸಾಗ್ಶಿಲೆಂ. ಪುಣ್ ಸುಮಾ ಎದೊಳ್ಚ್
ಮರಣ್ ಪಾವ್ಲಾಂ ಮ್ಹಣ್ ದಾಕ್ತೆರಾನ್ ಸಾಂಗ್ಲೆಂ.
’ಪ್ರಾಣ್ ಗೆಲಾ’ ಮ್ಹಣ್ತಾನಾ ರೊನಿ ಎಕಾಚ್ಚ್ಫರಾ ಕಾಟ್ಯಾಚೆರ್
ಬಸೊನ್ ಆಸ್ಲ್ಲೊ ಉಡೊನ್ ಪಡ್ಲೊ. ವೊಡಾಚಾ ಕಾಟ್ಯಾಚೆರ್
ಬಸ್ಲ್ಲ್ಯಾ ರೊನಿಚಾ ಕಾನಾಂಕ್ ಪಯ್ಸ್ ಥಾವ್ನ್ ಏಕ್ ಪದ್ ಆಯ್ಕಾತಾಲೆಂ;
’ವೊಡಾ
ಪಂದಾ, ಶೆಜ್ ಮ್ಹಜಿ
ಮೊಗ್ರೆ ಕಳ್ಯಾಂಚಿ..
ಯಾದ್ ತುಜಿ ಯೆತಾ ಮ್ಹಾಕಾ
ಅರ್ಧ್ಯೆ ರಾತಿಚಿ..’
ಹೆಂ ಸರ್ವ್ ಘಡೊನ್ ಆತಾಂ ಸ ವರ್ಸಾಂ ಉತರ್ಲ್ಯಾಂತ್. ಆನಿ
ಹ್ಯೆ ಆವ್ದೆಂತ್ ರೊನಿಕ್ ಖುನ್ಯೆಗಾರ್, ಬೆಫಿಕಿರ್, ಅಪುರ್ಭಾಯೆಚಾ ಚೆಡ್ವಾಕ್ ಲಗಾಡ್ ಕಾಡ್ಲ್ಲೊ
ಮನಿಸ್ ಮ್ಹಣ್ ಸಮಾಜೆಥಾವ್ನ್ ಆಯ್ಕೊಂಕ್ ಮೆಳ್ಳಾಂ. ರೊನಿನ್ ಘರ್
ಸೊಡ್ಲಾಂ, ತಶೆಂಚ್ ಖಾಡ್ಯೀ. ಥಂಯ್ ಹಾಂಗಾ ತೊ ಮತಿನ್
ಸಾರ್ಕೊನಾ ಮ್ಹಣ್ತಾತ್. ರೊನಿಚಾ ಎಕಾ ಇಷ್ಟಾನ್ ರಾವೊಂಕ್ ತಾಕಾ ತಾಚ್ಯಾ ಘರ್ಚೆಂ ಏಕ್ ಕೂಡ್
ದಿಲಾಂ. ರೊನಿ ಸದಾಂನೀತ್ ರಡ್ತಾ. ಪುಣ್ ಹೆಂ ಕೊಣಾಯ್ಕೀ ಕಳಿತ್ ಜಾಯ್ನಾಂ ಆನಿ ರೊನಿಕ್ ತಾಚಿ ಗರ್ಜ್ಯೀ ಭಗಾನಾ. ಥೊಡೆ ತಾಕಾ
’ದೇವ್ದಾಸ್’ ಮ್ಹಣ್ತಾತ್.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
