ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 10. ಮಾರಿಯಾ
ಪಯ್ಲಿ ಕೊಂಕ್ಣಿ ಕಾದಂಬರಿ ’ಆಂಜೆಲ್’ ಬರವ್ಪಿ, ಫಾಮಾದ್ ಪತ್ರಿಕೋಧ್ಯಮಿ, ಸಾಹಿತ್ಯ್ಕಾರ್ ಜಾವ್ನ್ ಕೊಂಕ್ಣೆಚೊ ಜಾಯ್ತೊ ವಾವ್ರ್ ಕರುನ್ ಜಾಯ್ತೆಂ ಹೊಗ್ಡಾವ್ನ್, ಸೊಸುನ್, ಭೊಗುನ್ ಹೊ ಸಂಸಾರ್ ಸಾಂಡುನ್ ಗೆಲ್ಲ್ಯಾ ಜೊ.ಸಾ.ಅಲ್ವಾರಿಸಾಚೊ ಆತಾಂ ಆಮಿಂ ಫಕತ್ತ್ ಉಡಾಸ್ ಮಾತ್ರ್ ಕಾಡ್ಯೆತಾ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಹಿ ಕಾಣಿ ಅಜಿಕ್ ಚಡುಣೆಂ ಚಾಳಿಸ್ ವರ್ಸಾಂಧಿಂ ಬರಯಿಲ್ಲಿ ದೆಕುನ್ ಹಿ ಪಾರಂಪರಿಕ್ ರಿತಿರ್ಚ್ ಆಸಾ ತರ್ಯ್ ಹ್ಯಾ ಕಾಣ್ಯೆಂತ್ ವಾಚುಂಕ್ ಮೆಳ್ಚಾ ಕೊಂಕ್ಣಿ ಭಾಸೆಚಿ ಅಪುರ್ಭಾಯೆಚಿ ಸೊಭಾಯ್ ಪಳೆಯಾ.
ಜೊ.ಸಾ.ಅಲ್ವಾರಿಸ್
"ಕಿತ್ಯಾಕ್ ಆಪಯಿಲ್ಲೆಂಯ್ ಸಿಸಿಲ್ಬಾಯೆ? ಸಯ್ರಿಕೆಚೆ ಖಬ್ರೆಕ್ಮು? ತುಜ್ಯಾ ನೆರಿಕ್ ಪುಣಿ ಸಯ್ರಿಕ್ ಹಾಡುಂಕ್ ಮ್ಹಾಕಾ ಆನಿ ಸಾಧ್ಯ್ ನಾ. ತಾಚ್ಯಾ ನಾಂವಾಕ್ಚ್ ಚೆಡ್ವಾಂ ಆಕಾಂತೊನ್ ಲಿಪ್ತಾತ್. ತಾಂಚಿಂ ವ್ಹಡಿಲಾ ದಾಂತ್ ಖಿರ್ಲುನ್ ಮ್ಹಾಕಾ ರಾಗಾನ್ ತೊಂಡಾಕ್ ಆಯಿಲ್ಲೆಂ ಯೆಟ್ತಾತ್! ತಿತ್ಲೊ ’ಫಾಂಕಿವಂತ್’ ಜಾಲಾ ತುಜೊ ’ಪೋಲಿ’ ಪೂತ್. ತಾಕಾ ಹ್ಯಾ ಗಾಂವಾಂತ್ಲೊ ಕೊಣ್ಚ್ ದಿಂವ್ಚೊ ನಾ ಆಪ್ಲೆ ಧುವೆಕ್. ವಿದೇಶಾಂತ್ಲೆಂ ಕೋಣ್ ಮೆಳ್ತಾ ಜಾಲ್ಯಾರ್ ಪಳೆ".
ಸಿಸಿಲ್ಬಾಯ್ ಕಪಾಲಾಕ್ ಹಾತ್ ಧಾಡಾವ್ನ್ ನಿರಾಶೆನ್ ಸುಸ್ಕಾರ್ಲಿ. ಆನಿ ನೆರಿಕ್ ದುರ್ಸತ್ ಮ್ಹಣಾಲಿ,
"ಮ್ಹಜ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ಹಾಕಾ ಎಕ್ಲ್ಯಾಕ್ ಮಾತ್ ಅನ್ನಡ್ಪಣಾಚೊ ಬುದಿ ಕಸ್ಯೊ ಆಯ್ಲ್ಯೊ. ಮ್ಹಾಕಾ ಸಮ್ಜನಾ ದಾವಿದಾ, ತು ಜಾಣಾಂಯ್ ಹೆರ್ ಸ ಭುರ್ಗಿಂ ವಡ್ಲ್ಯಾ ಭೆಸಾಂಕ್ ಆನಿ ಹುದ್ದ್ಯಾಕ್ ಪಾವೊನ್ ಮರ್ದಾಯೆನ್ ಜಿಯೆತಾತ್. ಹಾಕಾ ನಿಮಾಣ್ಯಾಕ್ಚ್ ಕಶಿ ಕೀಡ್ ಲಾಗ್ಲಿ?
ನಿಮಾಣೊ- ಪುಸುನ್ ವೊತ್ಲೊಲ್ ಪೊಳೊ - ಮ್ಹಣೊನ್ ಕೊಂಡಾಟ್ಯಾನ್ ಪೊಸ್ತಾತ್ ತಶೆಂ ಹಾಕಾ ಪೊಸಿನಾಸ್ತಾಂ ಶಿಸ್ತೆನ್ ವಾಗಯ್ಲೊ ಜಾಲ್ಯಾರೀ ಹೊ ಕಸೊ ಪಾಡ್ ಜಾಲೊ? ತಾಕಾ ಸುದ್ರಾಂವ್ಕ್ ಹಾಂವೆಂ ಕೆಲ್ಲೆಂ ಸಾದನ್ ಕಿತ್ಲೆಂ. ವಿಬಾಡ್ಲೊ ತೊ ದುಡು ಕಿತ್ಲೊ! ತರೀ, ಆಕ್ರೇಕ್ ಉರ್ಲಾ ತೊ ಏಕ್ ಕಾಜಾರ್ ಕರ್ಚೊ ಉಪಾಯ್ ತೊ ಪುಣಿ ತಾಕಾ ಸಾರ್ಕೆ ವಾಟೆಕ್ ಹಾಡಿತ್ ಮ್ಹಣ್ ಭರ್ವಸ್ಲೆಲಿಂ. ಪುಣ್ ತೆಣೆಂಯಿ ಎಕೀ ಚೆಡುಂ ಮಕಾರ್ ಯೆಂವ್ಕ್ ಭಿಯಾತಾಮು! ದಾವಿದಾ, ದುಬ್ಳೆಂ ಆಸ್ಲ್ಯಾರೀ ಫಿಕಿರ್ ನಾ. ದೋತ್ ದೆಣೆಂ ನಾಕಾ. ಕೊಣೀ ಮೆಳ್ತಾ ತರ್ ಶೆವಟ್ಚೆಂ ಸಾದನ್ ಕರ್ನ್ ವೆಗಿಂ ಕಳಯ್."
***
ಗರೀಬ್ ಆನ್ನ ಆನಿ ದುವ್ ಮಾರಿಯಾ ಆಂಗ್ಣಾಂತ್ ಬಸೊನ್ ಮೊಗ್ರಿಂ ಗುಂತಾಲಿಂ, ಒಣಿಂತ್ಲ್ಯಾನ್ ದಾವಿದ್ ಪಾಶಾರ್ ಜಾಲ್ಲೊ ದಿಸ್ಲೊ ಆನ್ನಾಕ್. ತಿ ತಾಕಾ ಹಾಕ್ ಮಾರುನ್ ರಾವವ್ನ್ ತಾಚೆಕಡೆ ಧಾಂವ್ಲಿ. ತೊಚ್ ಪಯ್ಲೆಂ ಉಲಯ್ಲೊ.
"ತುವೆಂ ಆಪಯಿಲ್ಲೊ ಇರಾದೊ ಕಳ್ಳೊಗೆ ಮ್ಹಾಕಾ. ಉಡಾಸ್ ಆಸಾ. ಸೊದಿತ್ ಆಸಾಂ. ಸಕ್ಕಡೀ ಜಾಯ್ ಮ್ಹಣ್ತಾತ್ ಜೊಡಿರ್ ಆಸ್ಚೆಂ ಯಾ ಜೊಡೊಂಕ್ ಸಕ್ಚೆಂ ಚಡ್ ಶಿಕ್ಪಿ ಚೆಡುಂ. ಮೆಟ್ರಿಕ್ ನಾಪಾಸ್ ಜಾಲ್ಲ್ಯಾ ತುಜಾಕ್ ಕೋಣ್ ಹುಂಗ್ತಾ? ಹಾಂ - ’ಪೋಲಿ’ ಜಾಯ್ ಲಾಲ್ಯಾರ್ ಕಿತ್ಲೆಯಿ ಆಸಾತ್. ಲಾಕ್ಪತ್ಯಾಂಚೆ ಪೂತ್ ತೆಯೀ! ಹಿಪ್ಪಿಬರಿ ದೀಸ್ಭರ್ ಭೊಂವ್ತಾತ್ ಆನಿ ತಾಂಕ್ತಾತ್ ತಿಂ ಪೂರಾ ಅನ್ನಾಡ್ಪಣಾಂ ಕರ್ತಾತ್. ತಸ್ಲೊ ಎಕ್ಲೊ ಆಸಾ, ಜಾಯ್ತವೇ?"
"ಕೋಣ್ ತೊ?"
"ಮಣ್ಣಗುಡ್ಡೆಚ್ಯಾ ಸಿಸಿಲ್ಬಾಯೆಚೊ ಪೂತ್."
"ತೊ? ಹುಂ- ಗುಣಾಂವಂತಿ ಮಾರಿಯಾಕ್ ತ್ಯಾ ’ಪೋಲಿ’ ಚ್ಯಾ ಗಳ್ಯಾಕ್ ಬಾಂದ್ಚಿ ಗತ್ ಯೇವ್ನಾ ದಾವಿದಾಬಾ. ಕೊಣೀ ಮೆಳಾನಾ ಜಾಲ್ಯಾರ್ ಕೊವೆಂತಾಕ್ ಧಾಡ್ತಾಂ ತಾಕಾ. ಗುಂಡ್ಯೆಕ್ ಲೊಟಿನಾ"
***
’ಹರ್ಯೆಕ್ ಮನಿಸ್ ಎಕಾ ಖೊಟ್ಯಾಕ್ ಬರೊ ಕರಿತ್ ಜಾಲ್ಯಾರ್, ಸಂಸಾರಿಂ ಆಸ್ಚ್ಯಾ ಪ್ರಾಸ್ ದೋನ್ ವಾಂಟೆ ಚಡ್ ಬರೆಪಣ್ ಜಾಯ್ತ್’ - ಹೆಂ ಮಾರಿಯಾನ್ ವಾಚ್ಲೆಲೆಂ ಏಕ್ ಸಾಂಗ್ಣೆಂ. ಆತಾಂ ಆವಯ್ ಆನಿ ದಾವಿದ್ ಉಲಯ್ಲಿಂ ತೆಂಯ್ ತಾಕಾ ಆಯ್ಕಾಲೆಂ. ’ತರ್ ಹಾಂವೆಂ ಎಕಾ ’ಪೋಲಿ’ ಬರೊ ಕರುಂಕ್ ನಜೊಗಿ?’ - ಹೆಂ ತಾಚ್ಯಾ ಅತ್ಮ್ಯಾಚೆಂ ಸವಾಲ್. ಮ್ಹಾಕಾ ಜೆಜುಚಿ ಆನಿ ಮರಿಯೆಚಿ ಕುಮಕ್ ಮೆಳ್ಳ್ಯಾರ್ ಜರೂರ್ ಬರೊ ಕರ್ಯೆತಾ.’- ತಾಚಿಚ್ ಜವಾಬ್.
ಮಾರಿಯಾ ಸಾಂಜೆರ್ ದಾವಿದಾಗೆರ್ ಗೆಲೆಂ. "ಮಾಮಾ, ತುವೆಂ ಸಕಾಳಿಂ ಮಾಂಯ್ಕ್ ಸಾಂಗ್ಲೊಯ್ ತೊ ’ಪೋಲಿ’ ಕೋಣ್?"
"ತುಕಾ ನಾಕಾ ಬಾಯೆ ತ್ಯಾ ಸಯ್ತಾನ್ ಕಾಸ್ತಾಚ್ಯಾ ಚೆಡ್ಯಾಚಿ ಒಳೊಕ್!"
"ತಾಕಾ ಬರೊ ಕರುಂಕ್ ಜಾಯ್ನಾಂಗಿ?"
"ಜಾಯ್ನಾ ದೆಕುನ್ ತಸೊಚ್ ಸೊಡ್ಲಾ."
"ಹಾಂವ್ ತಾಕಾ ಏಕ್ ಪಾವ್ಟಿಂ ಪಳೆಂವ್ಕ್ ಅತ್ರೆಗ್ತಾಂ".
"ತ್ಯಾ ಸಯ್ತಾನಾಚ್ಯಾ ದಲಾಲ್ಯಾಕ್? ಪಳೆಂವ್ಕ್ ಪುಣಿ ಪಿಕ್ಯಾ ಟೊಮೆಟ್ಯಾಬರಿ ಆಸಾ ತೊ. ಬುದಿ ಮಾತ್ ರಸ್ತ್ಯಾನ್ ಭೊಂವ್ಚ್ಯಾ ಸುಣ್ಯಾಕೀ ನಾಂತ್!"
"ಆಸೊಂ. ಮ್ಹಾಕಾ ತಾಚಿ ಸಯ್ರಿಕ್ ಕರ್ ಮಾಮಾ, ಉಪ್ಕಾರ್ ತುಜೊ!"
"ಛೆಟ್ ಪಿಸಾಂಟಾ! ತೊ ತುಕಾ ಎಕಾಕ್ ದಿಸಾನ್ ಪಿಸ್ಡುನ್ ಉಡಯ್ತ್! ತುಕಾ ಜೀವ್ ಜಡ್ ಜಾಲಾ ತರ್ ದುಸ್ರೊ ಉಪಾಯ್ ವಾಪಾರ್; ತಾಚೆ ಸಯ್ರಿಕೆನ್ ಹೊಗ್ಡಾಯ್ನಾಕಾ! ಆನಿ ಮ್ಹಾಕಾಯಿ ಯಾ ಪಾತ್ಕಾಂತ್ ವಾಂಟೆಲಿ ಕರ್ನಾಕಾ."
"ತಾಕಾ ಬರೊ ಕರ್ಚ್ಯಾಂತ್ ಮ್ಹಜೊ ಜೀವ್ ದಗ್ದೊನ್ ವಚನಾಶೆಂ ಹಾಂವ್ ಚತ್ರಾಯ್ ಘೆತಾಂ".
"ತುಜೆ ಆವಯ್ಕ್ ಸಾಂಗ್. ತಿ ಒಪ್ತಾ ತರ್, ಆಜ್ಚ್ ಲಾಗವ್ನ್ ಘಾಲ್ತಾಂ."
****
ಮಾರಿಯಾಚೊ ನಿರ್ಧಾರ್ ಆಯ್ಕೊನ್ ಆವಯ್ ಆನ್ನಾ ಸಗ್ಳಿಚ್ ಉಚಾಂಬಳ್ ಜಾಲಿ. ಪುಣ್, ಕ್ರಮೇಣ್ ಚಿಂತುನ್ ವೊರಯ್ತಾನಾ ತಿಚೆಂ ಮನ್ ಬದಲ್ಲೆಂ. ಚೆಡೊ ಬರೊ ಜಾಯ್ತ್ ಜಾಲ್ಯಾರ್ ಗ್ರೇಸ್ತ್ ಘರಣ್ಯಾಂತ್ ಚೆಡುಂ ಸುಕಾಕ್ ಪಡತ್. ಶಿವಾಯ್, ದೋತ್ ದೆಣೆಂ ನಾಕಾ ಮ್ಹಳಾಂ. ಹಾಕಾ ಘರಾಚ್ ಆಂಕ್ವಾರ್ ರಾವ್ಲ್ಯಾರೀ ಮೆಳ್ಚೆಂ ಸುಕ್ ಕಿತೆಂ?... ತಿಣೆ ಪರ್ವಣ್ಗಿ ದಿಲಿ.
ಮಾರಿಯಾ ನೆರಿ ಸಂಗಿಂ ಲಗ್ನಾಕ್ ಒಪ್ಲಾಂ ಮ್ಹಳ್ಳೆಲೆಂ ಆಯ್ಕೊನ್ ಸಿಸಿಲ್ ಹಿಸ್ಪಾ ವರ್ತ್ಯಾ ಸಂತೊಸಾನ್ ನಾಚ್ಲಿ. ಉಟಾಉಟಿಂ ಖರಾರ್ ಕೆಲೆಂ. ದೊನೀ ಪಾಡ್ತಿಂಚ್ಯಾ ಸಂಬಂದಿಕಾಂಕ್ ಆನಿ ಸಯ್ರ್ಯಾಂಕ್ ವಿಸ್ಮಿತ್ಕಾಯ್ ಬೊಗ್ಲಿ. ಹ್ಯಾ ಕಾರ್ಯಾವೆಳಿಂ. ’ಚೆಡ್ವಾಕ್ ಜಿವೆಂಚ್ ಸಯ್ತಾನಾಚ್ಯಾ ಪಿಲ್ಯಾಕ್ ಬಾಂದುನ್ ದಿಲೆಂ, ಆನ್ನಾನ್’- ಮ್ಹಣಾಲಿಂ ತಿಚ್ಯಾ ಪಾಡ್ತಿಚಿಂ ಮನ್ಶಾಂ ಎಕಾಮೆಕಾ ಘುಟಾನ್ ಅಬಿಪ್ರಾಯ್ ಉಚಾರ್ನ್.
ಸಕಾಳಿಂಚ್ಯಾ ಆದೇಸಾಕ್ ಖರಾರಾಚೆಂ ಕಾರ್ಯೆಂ. ಸಾಂಜೆರ್ ಸೊವ್ರ್ಯಾಕ್ ಭಿರಾಂಕುಳ್ ಮಾರೆಕಾರ್ ಆವ್ಘಡ್ ಜಾಲೆಂ. ತೊ ಆನಿ ತಾಚೆ ಚೋವ್ಗ್ ದೆಡೆ ಗಮ್ಮಾತ್ ಮಾರುಂಕ್ ಗೆಲ್ಲೆ ತೆ, ಪಾಂಚೀ ಜಣ್ ಎಕಾಚ್ (ಇಶ್ಟಾಚ್ಯಾ) ರಿಕ್ಶಾಂತ್ ಬಸೊನ್ ಯೆತಾನಾ, ಘುಂವ್ಡೆರ್ ತೆ ಆಡ್ ಪಡ್ಲಿ. ಸಕ್ಕಡೀ ಘಾಯೆಲೆ. ನೆರಿ ಮತಿವಿಣ್ ಆಸ್ಪತ್ರೆಂತ್ ಭರ್ತಿ ಜಾಲೊ. ವಾಂಚ್ಚಿ ಗೋಶ್ಟಿ ದುಬಾವಾಚಿ; ವಾಂಚ್ಲ್ಯಾರೀ ಜೀಣ್ಭರ್ ಪ್ರಯೋಜನಾಕ್ ಪಡ್ಚೊ ನ್ಹಯ್; ಏಕ್ ಪಾಯ್ ಕಾತ್ರುಂಕ್ ಪಡ್ತಾ ಮ್ಹಣ್ ದಿಸ್ತಾ" ಮ್ಹಳೆಂ ದಾಕ್ತೆರಾಂನಿ.
ಸಿಸಿಲ್ ಪರಿಪೂರ್ಣ್ ಪಿಸಾಂತುರ್ ಜಾಲ್ಲ್ಯಾಬರಿ ಮಾರಿಯಾಚೆರ್ ಪೆಟ್ಲಿ.
’ಚೆಡೊಚ್ ಖೊಟೊ ಮ್ಹಣ್ ಲೆಕ್ಲೆಲೆಂ ಹಾಂವೆಂ. ತಾಕಾ ಬರೆಂ ಕರ್ಚ್ಯಾ ನಿಬಾನ್ ಆಯ್ಲೆಲೆಂ ಚೆಡುಂ ತೇಟ್ ಅವಲಕ್ಶಣಾಚೆಂ! ಮಾಲ್ದಿಸಾಂವ್ ಹಾಡ್ಲೆಂ ತಾಣೆ!’ ಆಶೆಂ ತೊಂಡಾಕ್ ಆಯ್ಲೆಲ್ಯೊ ಗಾಳಿ ಯೆಟ್ಲ್ಯೊ. ತಾಚೆರ್ ಶಿರಾಪ್ ಘಾಲೊ ಆನಿ ಪುತಾಚ್ಯಾ ಬೊಟಾಚಿ ಮುದಿ ನಿಸ್ರಾವ್ನ್ ಘೆವ್ನ್ ತಿ ಆಪ್ಲ್ಯಾ ಕಾರಾರ್ ಆನ್ನಗೆರ್ ಉಬ್ಲಿ. ಥಂಯ್, ಆವ್ಘಡಾಚಿ ಖಬಾರ್ ನೆಣಾಸ್ಲೆಲ್ಯಾ ಆವಯ್ ಆನಿ ಧುವೆಕ್ ಸಣ್ಸಣೀತ್ ಭಾಶೆನ್ ಸಾಂಗೊನ್, ಮಾರಿಯಾನ್ ದಿಲ್ಲಿ ಮುದಿ ತಾಂಚ್ಯಾ ಪಾಯಾಂಕಡೆ ತಿರಸ್ಕಾರಾನ್ ಉಡವ್ನ್, "ಮ್ಹಜ್ಯಾ ಪುತಾನ್ ದಿಲ್ಲಿ ಮುದಿ ಪಾಟಿಂ ದೀಗೊ, ಮಾಲ್ದಿಸಾಂವ್ ಪಡ್ಲೆಲ್ಯಾ! ತಾಕಾ ಬರೊ ಕರ್ತಾಂ ಮ್ಹಳ್ಳ್ಯಾ ನಿಬಾನ್ ಸಯ್ರಿಕ್ ಘಟ್ ಕರ್ನ್, ಪುರ್ತೊ ದೀಸ್ ಆಕೇರ್ ಜಾಂವ್ಚ್ಯಾ ಬಿತರ್ ತಾಕಾಚ್ ಲಗಾಡ್ ಕಾಡ್ಲೊಯ್. ಕಾಜಾರ್ ನಾಕಾಚ್ ಆಸ್ಲ್ಲೆಂ. ’ಪೋಲಿ’ ಆಸೊನ್ ಜಾಲ್ಯಾರೀ ತಾಚ್ಯಾ ಇತ್ಲ್ಯಾಕ್ ದೀಸ್ ಪಾಶಾರ್ ಕರ್ನ್ ಆಸ್ತೊ. ಪುಣ್ ಆತಾಂ? ಪಾಯ್ ಕಾತ್ರೊನ್, ಲಂಗ್ಡೊ ಜಾವ್ನ್ ಘರಾಂತ್ ಪಡತ್ ಜಾಲ್ಯಾರ್ ಮ್ಹಾಕಾ ವೊಜ್ಯಾ ವಯ್ರ್ ಜಡ್ ವೊಜೆಂ ಜಾಲೆಂ! ಆನಿ ತಾಚಿ ಜೀಣ್ಭರ್ ಗತ್ ಕಿತೆಂ?" ಆಶೆಂ ನಿಶ್ಟುರ್ಪಣಿಂ ದುರ್ಸೊನ್ ಉಲಯ್ಲಿ. "ವೆಗಿಂ ದಿ ತಾಚಿ ಮುದಿ!" ತಿ ಬೊಬಾಟ್ಲಿ.
ಆನ್ನಾ ಮೊಡ್ಯಾಕ್ ರುದಾನ್ ಕೆಲ್ಲ್ಯಾಬರಿ ಜೊರಾನ್ ರಡ್ತಾನಾ ಮಾರಿಯಾ ರೂಕ್ ಜಾವ್ನ್ ಮೊನೆಂಚ್ ಉರ್ಲೆಂ.
"ಕಾಸಾಪ್ಪ್ಯಾಚ್ಯಾ ದೊಳ್ಯಾಂನಿ ಏಕ್ ದುಕಾ ಥೆಂಬೊ ಮುಣಿ ಫುಟ್ಲೊಗಿ ಪಳೆ!" ಸಿಸಿಲ್ಬಾಯ್ ಕೆಂಡುನ್ ಉಲಯ್ಲಿ.
"ತೊ ವಾಂಚ್ತಾಲೊ, ಮ್ಹುಜ್ಯಾ ಪಾಸತ್ ಆಪಾಯಾವೆಣೆಂ ವಾಂಚ್ತಲೊ ಮ್ಹಳ್ಳಿ ಪಾತ್ಯೆಣಿ ಮ್ಹಾಕಾ ಭೊಗ್ತಾನಾ ಹಾಂವ್ ಕಿತ್ಯಾ ರಡೊಂ? ತಾಕಾ ಕಿತೆಂ ಜಾಲ್ಯಾರೀ ತಾಚಿ ಸೆವಾ ’ಹಾಂವ್’ ಕರ್ತೆಲಿಂ. ಕರ್ಚೆಂ ಹಕ್ಕ್ ಮ್ಹಜೆಂ; ಕರ್ತವ್ಯ್ಯಿ ಮ್ಹಜೆಂ. ತೊ ಖಂತ್ ಕರಿನಾಕಾ, ಮಾಂಯ್."
"ಥೂ! ಮ್ಹಾಕಾ ’ಮಾಂಯ್’ ಮ್ಹಣನಾಕಾ. ತೆಂ ಹಕ್ ಇತ್ಲ್ಯಾರ್ ಆಕೇರ್ ತುಕಾ. ಇತ್ಲ್ಯಾರ್ಚ್ ಇತ್ಲೆಂ ವಾಯ್ಟ್ ಜಾವ್ನ್ ಗೆಲೆಂ ’ತುಜ್ಯಾ’ ವರ್ವಿಂ. ಫುಡೆಂ ಕಿತೆಂ ಬರೆಪಣ್ ಕರ್ತೆಲೆಂಯ್ ಅವಲಕ್ಶಣಾಚ್ಯಾ. ತುವೆಂ ತಾಚಿ ಚಾಕ್ರಿ ಕರ್ಚಿ ನಾಕಾ; ತಾಚ್ಯಾ ಸುತ್ತಾಕ್ ಲಾಗಿಂ ವಚನಾಕಾ ವಚೊಂಕ್ ಸೊಡ್ಚಿ ನಾ!. ಆಯ್ಚೆಂ ಖರಾರ್ ಇತ್ಲ್ಯಾರ್ ರದ್. ಮಾನ್ ನಶ್ಟ್ ಭರ್ತಿ ಕರುಂಕ್ ಜಾಯ್ ತರ್ ವಕೀಲಾ ಮಾರಿಪಾತ್ ನೋಟಿಸ್ ಧಾಡ್ ಮ್ಹಾಕಾ. ಆತಾಂ ಮುದಿ ಹಿವ್ಶಿನ್ ದಿ!"
"ತಾಣೆ ಮ್ಹಾಕಾ ದಿಲ್ಲಿ ಮುದಿ ತುಕಾ ದೀನಾ. ತಾಕಾಚ್ ದಿತಾಂ" ಮ್ಹಣಾಲೆಂ ಮಾರಿಯಾ ಧಯ್ರಾನ್.
"ತಾಕಾ ತುಂ ಕಶೆಂ ದಿತಾಯ್ ಪಳೆತಾಂ!"
****
ಆನ್ನಾ ಬಾವ್ಡಿ ಪರಿಪೂರ್ಣ್ ಕಂಗಾಲ್ ಜಾವ್ನ್ ಪಡ್ಲಿ. ಚಿಂತುನ್ ಆಪ್ಲ್ಯಾ ಜಾಂವ್ಯಾಚೆರ್ ಆಯ್ಲೆಲೆಂ ಆಕಸ್ಮಿತ್ ಆನ್ವಾರ್ ಆನಿ ಹ್ಯಾ ವರ್ವಿಂ ಆಪ್ಲೆ ಧುವೆಚ್ಯಾ ಫುಡಾರಾವಯ್ರ್ ಜಾಂವ್ಚೊ ಮಾರೆಕಾರ್ ಪರಿಣಾಮ್. ಪುಣ್, ಮಾರಿಯಾ?
ತಾಕಾ ಹ್ಯಾ ಆವ್ಘಡಾಂತ್ ದಿಸ್ಲೆಂ ದೆವಾಚೆ ಮಜತೆಚೆಂ ಬೋಟ್ - ಕಾಳೊಕಾಂತ್ ಜಳ್ಚಿ ವಾತ್ ತಸಿ. ಹೆಂ ಏಕ್ ಆನ್ವಾರ್ ವ್ಹಯ್ ಪುಣ್ ಸಾಂಗಾತಾಚ್ ದೆವಾಚೆಂ ಆಶಿರ್ವಾದ್ಯಿ. ಹೆ ಪಾತ್ಯೆಣೆನ್ ತಿ ಧಾಂವ್ಲಿ ಆಸ್ಪತ್ರೆಕ್. ಪುಣ್ ನೆರಿಚಿ ಭೆಟ್ ತಿಕಾ ಲಾಬ್ಲಿ ನಾ. ಕಾರಣ್ - ಸಿಸಿಲ್ ಬಾಯೆನ್ ತಿಚೆ ವಿರೋದ್ ಥಂಯ್ ಕರುನ್ ದವರ್ಲ್ಲಿ ಬಂದಾಬಸ್ತ್. ತೆಂ ಪಯ್ಲೆಂ; ನೆರಿ ಆಜೂನ್ ಮತಿರ್ ನಾತ್ಲ್ಲೊ ತೆಂ ದುಸ್ರೆಂ. ಸಾತ್ ದೀಸ್ ತಿಕಾ ಹಿಚ್ ನಿರಾಸ್ಪಾಣಾಚಿ ಗತ್ ಭೆಟ್ಲಿ. ಜಾಲ್ಯಾರೀ ಹ್ಯಾ ಮಧೆಂ ತಿಕಾ ಪೆಲ್ಯಾಂ ಮುಕಾಂತ್ರ್ ಮೆಳ್ಳೆಲಿ ಬರಿ ಖಬಾರ್ ಹಿ, - ತೊ ಸುದ್ರಾಪಾಚೆ ವಾಟೆರ್ ಆಸಾ. ಪಾಂಯ್ ಕಾತ್ರುಂಕ್ ನಾ. ಪ್ಲಾಸ್ಟಾರಾಂತ್ ಘಾಲುನ್ ಖಾಟ್ಯೆಕ್ ಬಾಂದ್ಲಾ.
ಆಟ್ವ್ಯಾ ದಿಸಾ ಬಂದಬಸ್ತೆಚೆ ವೆವಸ್ತೆಂತ್ ಆತ್ವೆಂ ಬದ್ಲಾಪ್ ದಿಸೊನ್ ಆಯ್ಲೆಂ ತಿಕಾ. ಜಕ್ಮೆದಾರಾಚ್ಯಾ ಕುಡಾಚ್ಯಾ ದಾರಾರ್ ಆಸ್ಲ್ಲೊ ರಾಕ್ವಲ್ ತ್ಯಾ ದಿಸಾ ನಾತ್ಲ್ಲೊ. ಕಾರಣ್, ಸಿಸಿಲ್ಬಾಯೆಚೆ ತಕ್ಲೆಂತ್ಲೊ ಆಕಾಂತ್ ಉಣೊ ಜಾವ್ನ್, ನೆರಿಚ್ಯಾ ಜಿವಾಚಿ ಭಿರಾಂತ್, ಖಂತ್-ಹುಸ್ಕೊ ಆನಿ ದುಬಾವ್ ಪರಿಹಾರ್ ಜಾವ್ನ್, ಪರಿಗತ್ ಚಾಲ್ತಿಶಿ ದಿಸ್ಲಿ. ಮಾತ್ರ್ ನ್ಹಯ್, ತೊ ಬರೊ ಜಾತಾ ಮ್ಹಳ್ಳೆ ಖಾತ್ರೆನ್, ತಾಕಾ ಸ್ಪೆಶಲ್ ಸರ್ಬಾರಾಯೆಚಿ ಲಕ್ಶಾ ದಿಂವ್ಚಿ ಗರ್ಜೆ ಭಾಯ್ಲಿ ಮ್ಹಣ್ ಭೊಗ್ಲೆಂ. ತೀಸ್ ರುಪ್ಯಾಚ್ಯಾ ಭಾಡ್ಯಾಚ್ಯಾ ಸ್ಪೆಶಲ್ ಕುಡಾಂತ್ ತೊ ಆಸಾ, ತಾಂತುಂ ಜಾಯ್ ತಿಂ ಪೂರಾ ಸವ್ಕರ್ಯಾಂ ಆಸಾತ್; ನರ್ಸಾಂ ಆನಿ ವಾರ್ಡ್ಬೊಯ್ ಬರಿ ಸೆವಾ ಕರ್ತಾತ್ ತರ್ ಆಪ್ಣೆ ಆನಿ ಘರ್ಚ್ಯಾಂನಿ ದಿಸಾಂ ಮಧೆಂ ತೀನ್-ಚಾರ್ ಪಾವ್ಟಿಂ ಯೇವ್ನ್ ವಚೊನ್ ಪೆಟ್ರೊಲ್ ವಿಬಾಡ್ಚೊ ಕಿತ್ಯಾ? ದಿಸಾಂತ್ ಏಕ್ ಪಾವ್ಟಿಂ ಯೇವ್ನ್, ಪಳೆವ್ನ್, ಉಲವ್ನ್ ಗರ್ಜೆಚೊ ಪರಿಹಾರ್ ಕರುನ್ ಗೆಲ್ಯಾರ್ ಪುರೊ. ಚಡ್ ಕೊಂಡಾಟೊ ಕೆಲ್ಯಾರ್ ತೊ ಪರ್ತ್ಯಾನ್ ಪಾಡ್ ಜಾಯ್ತ್. ಆಸೊಂ ಎಕ್ಸುರೊಚ್ ಆಪ್ಲ್ಯಾ ಪಾತ್ಕಾಂಚೆಂ ಕರ್ಮ್ ಭೊಗುನ್....ಆನಿ ತ್ಯಾ ಚೆಡ್ವಾಕ್ ಹಾಚಿ ಯೆದೊಳ್ಚ್ ವಿಸರ್ ಪಡ್ಲ್ಯಾ ಆಸ್ತೆಲಿ....ಆಶೆಂ ಸಮ್ಜೊನ್ ತಿಣೆ ಸಾಂಜೆರ್ ಎಕ್ಚ್ ಪಾವ್ಟಿಂ ಯೆಂವ್ಚೆಂ ಕ್ರಮ್ ಸುರು ಕೆಲೆಂ.
ತ್ಯಾ ದಿಸಾ ನೆರಿಕ್ ದೊನ್ಪಾರಾಂಚೆಂ ಜೆವಾಣ್ ದಿಲ್ಯಾ ಉಪ್ರಾಂತ್ ವೊರಾಂ ಆಡೇಜ್ ವ್ಹಾಜ್ತಾ ಪರ್ಯಾಂತ್ ಕೊಣ್ಚ್ ಕುಡಾ ಭಿತರ್ ಆಯ್ಲೆಂ ನಾ. ಕರೆಂಟ್ ಬುತಾಂವ್ ದಾಂಬ್ಲ್ಯಾರ್ ತಿ ವ್ಹಾಜನಾ. ವ್ಹಡ್ಲ್ಯಾನ್ ಆಪಂವ್ಕ್ ತಾಕಾ ಸಕತ್ ನಾ. ಆಪಯಿಲ್ಲೆಂ ಕುಡಾ ಭಾಯ್ರ್ ಆಯ್ಕನಾ. ತಾಕಾ ಕೂಸ್ ಪರ್ತುಂಕ್ ಆನಿ ಏಕ್ ಘೊಟ್ ಉದಕ್ ದಿತೆಲ್ಯಾಚಿ ಗತ್ ನಾ. ಆಸಲೆ ಕಳ್ವಳ್ಯಾಂಚೆ ಘಡಿಯೆ ಬಿತರ್ ಆಯ್ಲೆಂ ಕೋಣ್? ತಾಚಿ ಮೊಗಾಳಿ ಪತಿಣ್. ಆಂಜಾಳಿ ಮಾರಿಯಾ!
"ಮಾರಿಯಾ! ಮಾರಿಯಾ.....!" ಹಾತ್ ದೊನಿ ಉಸವ್ನ್, ರಡ್ಕುರ್ಯಾಂ ಬೊಬಾಟ್ಲೊ ತೊ, ಭುಕೆಲ್ಲೆಂ ಬಾಳ್ ಆವಯ್ಕ್ ಆಪಯ್ತಾ ತಶೆಂ
"ಮ್ಹಜ್ಯಾ ಪತಿರಾಯಾ!" ಉದ್ಗಾರಿತ್ ತೆಂ ತಾಚ್ಯಾ ಉಗ್ತ್ಯಾ ಹಾತಾಂತ್ ಸೆರ್ವಾಲೆಂ ಆನಿ ತಾಚ್ಯಾ ಹರ್ದ್ಯಾರ್ ತಕ್ಲಿ ದವರ್ನ್ ತೆಂ ರಡ್ಲೆಂ.
ನೆರಿನ್ ತಾಕಾ ವೆಂಗೆಂತ್ ಘಟ್ ಧರುನ್-
"ಮಾರಿಯಾ, ಸಾತ್ ದೀಸ್ ತುಂ ಕಿತ್ಯಾ ಆಯ್ಲೆನಾಂಯ್ ಮ್ಹಾಕಾ ಭೆಟೊಂಕ್? ತುಕಾ ಆಶೆಂ ವೆಂಗ್ಚೆಂ ಭಾಗ್ ಭೊಗ್ಚೆ ಪಾಸತ್ಚ್ ಹಾಂವ್ ಮರ್ಣಾಕಡೆ ಝುಜೊನ್ ಜಿವಂತ್ ಉರ್ಲಾಂ ಮಾರಿಯಾ. ಮ್ಹಾಕಾ ಸಾಂಡುನ್ ಗೆಲೆಂಯ್ ಮ್ಹಣ್ ಚಿಂತುನ್ ಹಾಂವ್ ಕಳ್ವಳ್ಳೊಂ. ಮ್ಹಾಕಾ ಸೊಡುನ್ ವಚನಾಕಾ! ಹಾಂವ್ ತುಕಾ ಸೊಡಿನಾ."
"ಸೊಡ್ಚೆಂ ನಾಕಾಚ್ ಮ್ಹಜ್ಯಾ ಪತಿ. ಸಗ್ಳೊ ಸಂಸಾರ್ ಆನಿ ಯೆಮ್ಕೊಂಡ್ ಆಮ್ಚೆಂ ಮದೆಂ ಆಡ್ ಆಯ್ಲ್ಯಾರೀ ಹಾಂವ್ ತುಕಾ ಸೊಡುನ್ ವಚಾನಾ, ದೆವಾನ್ ತುಕಾ ಮ್ಹಜೆ ಖಾತಿರ್ಚ್ ಜಿವಂತ್ ದವರ್ಲಾ. ಮ್ಹಜ್ಯಾ ಭಾಂಗಾರಾ!"
"ಮ್ಹಾಕಾ ’ಭಾಂಗಾರಾ’ ಮ್ಹಳೆಂಯ್? ಮ್ಹಜೆ ಜಿಣ್ಯೆಂತ್ ಕೊಣೆಂಚ್ ತಶೆಂ ಮ್ಹಾಕಾ ಆಪಂವ್ಕ್ ನಾ ಮಾರಿಯಾ" - ತೊ ಆನಿಕೀ ಪೊಟ್ಲುನ್ ರಡ್ಲೊ. "ಮ್ಹಜಿ ಆವಯ್ ಲೆಗುನ್ ’ಪೋಲಿ’, ’ಆನ್ನಾಡಿ’ ಮ್ಹಣ್ತಾಲಿ!"
ರಡಾನಾಕಾ ಪತೀ ಆನಿ ಮ್ಹಾಕಾಯಿ ರಡಯ್ನಾಕಾ. ಆಮ್ಚ್ಯಾ ಎಕ್ವಟ್ಯಾ ಜೀವನಾಂತ್ ರಡೊಂಕ್ ಕಾರಣ್ ದಿಂವ್ಚಿಂನಾ ಹಾಂವ್ ತುಕಾ."
ಹಾಂಗಾ ನೆರಿನ್ ವೇಂಗ್ ಸುಟಯ್ಲಿ. ರಡ್ಣೆಂ ಜಿರಯ್ಲೆಂ. ಮಾರಿಯಾ ನೀಟ್ ಜಾಲೆಂ ಆಪ್ಲ್ಯಾ ಪಾಲ್ವಾನ್ ನೆರಿಚಿಂ ದುಕಾಂ ಆನಿ ತೋಂಡ್ ಎಕೊಡೆಂ ಪುಸ್ಲೆಂ; ಆಪ್ಲ್ಯಾಚ್ ತುವಾಲ್ಯಾನ್ ತಾಚೆಂ (ನೆರಿಚೆಂ) ನಾಕ್ ಪಿಳುನ್ ಸಾಫ್ ಕೆಲೆಂ.
"ಮಾರಿಯಾ, ತುಂ ಆಸೊ, ಇತ್ಲೊ ಕೊಂಡಾಟೊ ಕರ್ತಾನಾ ಕೋಣ್ ತೊ ನಿರ್ಬಾಗಿ ಲೆಗುನ್ ರಡತ್? ಮ್ಹಜೆ ಯೆದೊಳ್ಚೆ ಜಿಣ್ಯೆಂತ್ ಹಾಂವ್ ಭೊಗುಂಕ್ ನಾತ್ಲ್ಲಿಂ ಸ್ವಾದೀಕ್ ಭೊಗ್ಣಾಂ ಆತಾಂ ಬೊಗ್ಲಿಂ, ಮ್ಹಜಾ ಆಂಜಾ. ಹಾಂವ್ ಭಾಗಿ ಜಾಲೊಂ ಮಾರಿಯಾ! ಹಾಂವ್ ಭರೊ ಜಾಲೊಂ! ಕುಡಿನ್ ಮ್ಹಯ್ ತರ್ ಖರೊಚ್ ಆತ್ಲ್ಯಾನ್, ಮ್ಹಾಕಾ ಬರೊ ಕರ್ಚೆಂ, ಮ್ಹಜೆಂ ವಾಯ್ಟ್ ವಿಸ್ರೊನ್ ಮ್ಹಾಕಾ ಏಕ್ ಮನಿಸ್ ಮ್ಹಣೊನ್ ಲೆಕ್ಚೆಂ ಕೊಣ್ಚ್ ನಾತ್ಲೆಂ. ತರೀ ಖೊಟ್ಯಾಕ್ ಬರೊ ಕರ್ಚಿ ಏಕ್ ಪುಣಿ ವೆಕ್ತಿ ಮನ್ಶಾಂ ಮದೆಂ ಆಸಾ ಮ್ಹಣ್ ತುಜಾ ಧಯ್ರಾದಿಕ್ ವರ್ತನಾನ್ ತುವೆಂ ರುಜು ಕೆಲೆಂಯ್. ತರೀ ಮದೆಂಚ್ ಹೆಂ ಆನ್ವಾರ್ ಮ್ಹಜೆರ್ ಭೆಟ್ಲ್ಯಾ ಉಪ್ರಾಂತ್ ತುಂ ಕಾಜುಲ್ಯಾಬರಿ ಝಳ್ಕಲ್ಲೆಂಯ್ ಆಣಿ ತಶೆಂಚ್ ಗೆಲ್ಲೆಂಯ್ ಮ್ಹಣ್ ಹಾಂವ್ ಸಮ್ಜಾಲ್ಲೊ. ಆಜ್ - ಫಾಲ್ಯಾ ತುಂ ಯೇವ್ನಾಂಯ್ ತರ್ ಹಾಂವ್ ಹ್ಯಾ ಕುಡಾಥಾವ್ನ್ ಜಿವೊಚ್ ಭಾಯ್ರ್ ವೆತೊಂನಾ ಮಾರಿಯಾ, ತುಂ ಕಿತ್ಯಾ ಆಯ್ಲೆಂನಾಂಯ್?"
"ತ್ಯಾ ವಿಶ್ಯಾಂತ್ ಆಮಿ ಆತಾಂ ಉಲಂವ್ಚೆ ನಾಕಾ. ತುಜೆಂ ಸುಕ್-ದೂಕ್ ಪಯ್ಲೆಂ ಸಾಂಗ್. ತುಜಿ ಮಾಮ್ಮಿ ಯೆಂವ್ಚ್ಯಾ ಪಯ್ಲೆಂ ಮ್ಹಾಕಾ ಹಾಂಗಾಥಾವ್ನ್ ಭಾಯ್ರ್ ವೆಚಿ ಗರ್ಜ್ ಆಸಾ."
"ಆರೇ! ತುಂ ವೆತಾಯ್?" - ತಾಣೆ ಮಾರಿಯಾಚೊ ಹಾತ್ ಘಟ್ ಧರ್ಲೊ. " ತುಂ ಮಾಮ್ಮಿಕ್ ಕಿತ್ಯಾ ತಿತ್ಲೆಂ ಬಿಯತಾಯ್? ಕಿತೆಂ ಘಡ್ಲಾಂ ತುಮ್ಚ್ಯಾ ಮದೆಂ? ತುಜ್ಯಾ ವಿಶ್ಯಾಂತ್ ತಿ ಕಿತೆಂಚ್ ಉಲಯ್ನಾತ್ಲ್ಲಿ; ವಿಚರ್ಲ್ಯಾರ್ ವಿಚಾರುಂಕ್ ಮ್ಹಾಕಾ ಆಡ್ವರ್ತಾಲೆ. ಕಿತ್ಯಾ, ಮಾರಿಯಾ?"
"ತೆಂ ಆತಾಂ ಗರ್ಜೆಚೆಂ ನ್ಹಯ್."
"ಮ್ಹಾಕಾ ತೆಂ ಗರ್ಜೆಚೆಂ ಆಂಜಾ. ತೀ ತುಜೆರ್ ನಿಶ್ಟುರ್ ಜಾಲ್ಯಾವೇ?"
"ನಿಶ್ಟುರ್ಚ್ ನ್ಹಯ್ ಬಗಾರ್ ದುಸ್ಮಾನ್ ಲೆಗುನ್. ತಿಣೆ ಆಮ್ಚೆಂ ಲಗ್ಣಾ-ಖರಾರ್ ರದ್ ಕೆಲಾಂ. ಹಾಂವ್ ಅವಲಕ್ಶಣಾಚೆಂ, ಮಾಲ್ದಿಸಾಂವ್ ಪಡ್ಲೆಲೆಂ. ಮ್ಹಜೆ ವರ್ವಿಂ ತುಕಾ ಆವ್ಘಡ್ ಜಾಲಾಂ ಮ್ಹಣ್ ತಿಣೆ ಕಾರಣಾಂ ದಾಕಯ್ಲ್ಯಾಂತ್. ತುಂಯಿ ತಶೆಂಚ್ ಸಮ್ಜಲಾಯ್ ತರ್ ಮ್ಹಾಕಾ ಆತಾಂಚ್ ಸುಟಾವೆಂ ಸಾಂಗ್ ಆನಿ ಖರಾರ್ ರದ್ ಕರುನ್ ಮ್ಹಾಕಾ ಧಾಡ್."
"ಇತ್ಲ್ಯಾಕ್ಚ್ ತುಂ ಆಜ್ಯಿ ಕಾಜುಲ್ಯಾಬರಿ ಆಯ್ಲಾಂಯ್ ಮಾರಿಯಾ?"
"ಮ್ಹಜೊ ಇರಾದೊ ತೊ ನ್ಹಯ್ ಬಗಾರ್ ತುಕಾ ಸುಕಿ ಕರ್ಚೊ. ಪುಣ್ ತುಜೆ ಆವಯ್ಕ್ ತೆಂ ನಾಕಾ ತರ್--"
"ಮ್ಹಜೆ ಆವಯ್ನ್ ಮ್ಹಾಕಾ ಸುಕಿ ಕರುಂಕ್ ನಾ ಮಾರಿಯಾ. ಕರ್ತಲ್ಯಾಕ್ ಆಡಾಂವ್ಚೊ ಅದಿಕಾರ್ ತಿಕಾ ನಾ. ತಿ ಹಾಂಗಾ ಯೆಂವ್. ತಿಚಿ ನೀತ್ ಹಾಂವ್ ಕರ್ತಾಂ"
"ಕಿತೆಂಯ್ ಕರ್; ತಿ ತುಜಿ ಆವಯ್. ತ್ಯಾ ಪಯ್ಲೆಂ ಮ್ಹಾಕಾ ವಚೊಂಕ್ ದಿ. ನಾ ತರ್ ತಿ ಯೆತೆಚ್ ಮ್ಹಜೆಂ ಮೊಡೆಂ ಪಡತ್!"
"ಪಡ್ಲ್ಯಾರ್ ತುಜೆಂ ಮಾತ್ ನ್ಹಯ್, ಬಗಾರ್ ಮ್ಹಜೆಂಯ್ ಪಡೊಂಕ್ ಜಾಯ್. ದೆಕುನ್, ತಿ ಯೆತಾಸರ್ ತುಂ ಹಾಂಗಾ ರಾವ್."
"ಮಾರಿಯಾ, ಸಬಾರ್ಶೆಂ ಚಿಂತುನ್ ರಾವ್ಲೆಂ. ನೆರಿಚೆ ಪಾಸ್ಳೆಕ್ ಖಾಟ್ಯೆರ್ ಬಸೊನ್ ಎಕಾಮೆಕಾಚೊ ಹಾತ್ ಮೆಳವ್ನ್, ಖೆಳವ್ನ್ ಮಸ್ತ್ ಸುಕ್ದೂಕ್ ಉಲಯ್ಲಿಂ, ನೆರಿಚೆಂ ಆಯ್ಕೊನ್ ತಾಕಾ ಭುಜಯ್ಲೆಂ.
"ಪುಣ್, ಖರಾರ್ ಜಾಲ್ಯಾಚ್ ದಿಸಾ ದೆವಾನ್ ಮ್ಹಾಕಾ ಹ್ಯಾ ಅನ್ವಾರಾಂತ್ ಶೆವ್ಟಾಯ್ಲೊ ಕಿತ್ಯಾ ಮಾರಿಯಾ? ಆಮ್ಚೊ ಎಕ್ವಟ್ ಜಾಂವ್ಚೊ ನಾಕಾಚ್ ಮ್ಹಳ್ಳಾ ಉದ್ದೇಶಾನ್?"
"ಹಾಂವ್ ನೆಣಾಂ, ರಾಯಾ. ತರೀ ಹಾಂವ್ ಸಮ್ಜತಾಂ. ಆಮ್ಕಾಂ ಕಶ್ಟಾಂಚ್ಯಾ ಪ್ರಾಚಿತಾನ್ ನಿರ್ಮಳ್ ಕರುನ್, ತ್ಯಾ ಪವಿತ್ರ್ ಭೆಸಾಕ್ ಫಾವೊ ತ್ಯಾ ಪರಿಂ ಆಯ್ತೆಂ ಕರುಂಕ್."
"ಸಮಾ. ಹಾಂವೆಂ ಕೆಲ್ಲ್ಯಾ ಅನ್ನಾಡ್ಪಣಾಂ ಪಾಸತ್ ಮ್ಹಾಕಾ ಹೆಂ ಪ್ರಾಚಿತ್ ಫಾವೊ. ತೆ ನದ್ರೆನ್ ಹೆಂ ಆವ್ಘಡ್ ನ್ಹಯ್ ಬಗಾರ್ ದೆವಾಚೆಂ ಆಶಿರ್ವಾದ್".
ತೆದಾಳಾಚ್ ಸಿಸಿಲ್ಬಾಯ್. ತಿಚೊ ವಕೀಲ್ ಪೂತ್, ಸುನ್ ಆನಿ ಒಳ್ಕೆದಾರಾಂ ಒಟ್ಟುಕ್ ಸ ಜಣಾಂ ಬಿತರ್ ಸರ್ಲಿಂ. ಮಾರಿಯಾಕ್ ಪಳೆಲ್ಲ್ಯಾ ಫರಾ ತಿ ಎಕ್ದಮ್ ವಿಕಾರ್ಲಿ ಆನಿ ಉಚಾಂಬಳಾಯೆನ್ ಮ್ಹಣಾಲಿ-
"ಹೆತ್ ಮಾಲ್ದಿಸಾಂವ್ ಪಡ್ಲೆಲ್ಯಾ ! ಹಾಂಗಾಯಿ ಆಯ್ಲಾಂಯ್ಗೊ, ಮಾಟ್ ಕರ್ಚ್ಯಾ ಆವಲಕ್ಶಣಾಚ್ಯಾ! ನಿಕಳ್ ಭಾಯ್ರ್"
"ಮಾಮ್ಮಾ" ಮ್ಹಣಾಲೊ ನೆರಿ ನಿದ್ಲ್ಲ್ಯಾ ಥಂಯ್ ಥಾವ್ನ್ಚ್. ಮಾರಿಯಾಚೊ ಹಾತ್ ಸೊಡಿನಾಸ್ತಾಂ. "ತುಂ ಕೊಣಾಕಡೆ ಕೊಣಾ ಹುಜ್ರಿಂ ಆಸೊನ್ ಉಲಯ್ತಾಯ್ ತೆಂ ಪಯ್ಲೆಂ ಸಮಾ ಚಿಂತುನ್ ಮಾಗಿರ್ ಉಲಯ್."
"ಕೊಣಾಕಡೆ ಉಲಯ್ತಾಂ ತೆಂ ತುಕಾ ಮಾಗಿರ್ ಸಾಂಗ್ತಾಂರೆ. ಪಯ್ಲೆಂ ತೆಂ ನಿಕ್ಳೊಂ ಹಾಂಗಾಥಾವ್ನ್. ಉಟ್ಗೊ, ಅವಲಕ್ಶಣಾಚ್ಯಾ ಆನಿ ನಪಂಯ್ಚ್ ಜಾ." ಆಶೆಂ ಮ್ಹಣೊನ್ ಸಿಸಿಲ್ ತಾಚೆರ್ ಜುಲುಮಾಯೆಕ್ ಯೆತಾನಾ-
ನೆರಿ ಉಟೊಂಕ್ ತಾಂಕಾನಾತ್ಲೆಂ ತರೀ ಮಾರಿಯಾಕ್ ಆಧಾರಾಕ್ ವೆಡ್ಕೊಳೊನ್ ನೀಟ್ ಬಸ್ಲೊ ಆನಿ, ಮಾರಿಯಾ ಭೊಂವ್ತಣಿಚೊ ವೆಡ್ಕೊಳ್ ಸೊಡಿನಾಸ್ತಾಂ, ತಾಚ್ಯಾ ಭುಜಾವ್ಣ್ಯಾನ್ ಆವಯ್ಕಡೆ ಮ್ಹಣಾಲೊ-
"ಮಾಮ್ಮಾ, ಮ್ಹಜೆ ಪತಿಣೆಕ್ ಹ್ಯಾ ಪರಿಂ ಹಲ್ಕುನ್ ಫರ್ಮಾಂವ್ಚೊ ಅದಿಕಾರ್ ತುಕಾ ನಾ; ಹಕ್ ತ್ಯಾ ಪಯ್ಲೆಂ ನಾ. ಬರ್ಯಾನ್, ಆವಯ್ ಭಾಶೆನ್ ಉಲಯ್ತಾಯ್ವೆ, ರಾವ್. ನಾ ತರ್. ತುಂಚ್ ನಿಕಳ್ ಭಾಯ್ರ್!"
"ಹುಂ ತುಜೆರ್ ಮಾರೆಕಾರ್ ಅನ್ವಾರ್ ಹಾಡ್ಚೆಂ ಹಾಡುನ್ ವಯ್ಲ್ಯಾನ್ ತುಜೆಂ ಮನ್ಯಿ ಮ್ಹಜೆರ್ ಉಪ್ರಾಟಾಯ್ಲೆಂಗೀ ಹ್ಯಾ ಶೂರ್ಪನಕಿನ್? ಆತಾಂ ನಿದೆ; ಚಡಿತ್ ಉಲಯ್ನಾಕಾ. ತುಜಿ ನೀತ್ ಹಾಂವ್ ಮಾಗಿರ್ ಕರ್ತಾಂ."
"ನೀತಿ ತರ್ಫೆನ್ ಮ್ಹಾಕಾ ಉಲಂವ್ಕ್ ಆಸಾ ತೆಂ ಆತಾಂಚ್ ಉಲಯಿಲ್ಲ್ಯಾ ಬಗಾರ್ ಹಾಂವ್ ನಿದಾಯ್ ನಾ; ತುಕಾ ಉಲಂವ್ಕ್ಯೀ ಸೊಡಿನಾ. ಬರ್ಯಾನ್ ಆಯ್ಕ್;
"ಮ್ಹಜೆ ಜಿಣ್ಯೆಂತ್ ತುವೆಂ ಮ್ಹಾಕಾ ಕೆಲ್ಯಾಯ್ ತೆಂ ಉಪ್ಕಾರ್ ದೊನ್ಚ್; ಪಯ್ಲೊ, - ಮ್ಹಾಕಾ ಭುಂಯ್ ಘಾಲ್ಲೊ; ದುಸ್ರೊ, - ಮಾರಿಯಾಚಿ ಸಯ್ರಿಕ್ ಬಾಂದ್ಲ್ಲೊ. ಹ್ಯಾ ಮದ್ಲ್ಯಾ ಮ್ಹಜಾ ತೆವೀಸ್ ವರ್ಸಾಂನಿ ತುವೆಂ ಮ್ಹಾಕಾ ಕಾಂಯ್ಂಚ್ ಬರೆಪಣ್ ಕರುಂಕ್ ನಾಂಯ್, ತುಜ್ಯಾ ಹೆರ್ ಭುರ್ಗ್ಯಾಂಕ್ ಕೆಲ್ಲೆ ಬರಿ. ಶಿರೊತೆರ್ ವಾಡ್ತಾನಾ, ’ನಾಕಾ, ನಾಕಾ ಮ್ಹಣೊನ್ ಹಾತ್ ಆಡ್ ಧರ್ಲ್ಯಾರೀ ದೊಯ್ ಭರ್ ಚಡ್ಚ್ ವಾಡ್ತಾತ್ ತಶೆಂ, ದೆವಾನ್ ತುಜೆ ಉತರ್ ಪ್ರಾಯೆರ್ ಮ್ಹಾಕಾ ತುಜ್ಯಾ ಉದಾರಾಂತ್ ರಚ್ಲೊ. ತುವೆಂ ಕಿತೆಂ ಕೆಲೆಂಯ್? ಶಿರೊತೆರ್ ಚಡಿತ್ ವಾಡ್ಲೆಲೆಂ ಶಿರೊತೆ ಸಮೇತ್ ಭಾಯ್ರ್ ಮುಟ್ಟಾಳಾಚಾಕ್ ಉಡಯ್ತಾತ್ ತಶೆಂ ಮ್ಹಾಕಾ ಬಾಳ್ಪಣಾರ್ ಆಯಾಚೆ ತಾಬೆಂತ್ ಉಡಯ್ಲೆಂಯ್. ತಿಣೆಂ ಮ್ಹಾಕಾ ಬಾಟ್ಲಿ - ದುದಾನ್ ವಾಗಯ್ಲೆಂ. ಮ್ಹಾಕಾ ಚಾರ್ ವರ್ಸಾಂ ಭರ್ಚಾ ಪಯ್ಲೆಂಚ್ ಶಿಕ್ಪಚ್ಯಾ ನಿಬಾನ್ ಬೊರ್ಡಿಂಗಾಚ್ಯಾ ಜಯ್ಲಾಂತ್ ಭರ್ತಿ ಕೆಲೆಂಯ್. ಥಂಯ್ ಆಸಾತ್ ಚಡಾವತ್ ಆವಯ್ಚೊ ಮೋಗ್ ನೆಣಾಸ್ಚೆ ’ಪೋಲಿ’. ಹಾಂವೀ ತಾಂಚಾಬರಿಚ್ ಜಾಲ್ಲೊಂ ಮಾಮ್ಮಾ; ಮ್ಹಜೆಚ್ ಖರೆ ಮಸ್ತೆನ್ ನ್ಹಯ್. ಪಳೆ ಜಶೆಂ ಆಜ್ ಮಾರಿಯಾ ಮ್ಹಜೆ ಸರ್ಶಿಂ ಬಸೊನ್ ಮೊಗಾನ್ ಸುಕ್-ದೂಕ್ ಉಲಯ್ಲೆಂ ತಶೆಂ ತುವೆಂ ಮ್ಹಾಕಾ ಲಾಗಿಂ ಬಸವ್ನ್ ಉಲಯಿಲ್ಲೊ ಧಾಕ್ಲೊ ಆಸಾವೆ? ಮ್ಹಜೆ ಕಶ್ಟ್ ಚಿಂತುನ್ ಹಾಂವ್ ವ್ಹಡೊಲ್ ಮಾರಿಯಾ ಮುಕಾರ್ ರಡ್ಲೊಂ. ತುಜ್ಯಾ ಮುಕಾರ್ಯಿ ರಡ್ಲೆಲೆ ಧಾರಾಳ್ ದ್ರಶ್ಟಾಂತ್ ಆಸಾತ್. ತರೀ, ಆಜ್ ಮಾರಿಯಾನ್ ಮ್ಹಜಿ ದುಕಾಂ ತಾಚ್ಯಾ ತುವಾಲ್ಯಾನ್ ಪಿಳ್ಳೆಂ. ತಶೆಂ ತುವೆಂ ಏಕ್ ಪಾವ್ಟಿಂ ಪುಣಿ ಪಿಳ್ಲ್ಲೊ ಉಡಾಸ್ ಆಸಾವೆ? ತುಕಾ? ತಾಣೆ ಮ್ಹಾಕಾ ’ಭಾಂಗಾರಾ’ ಮ್ಹಣ್ ಕೊಡಾಟೊ ಉಚಾರ್ಲೊ. ಪುಣ್ ತುವೆಂ ಮ್ಹಾಕಾ ಕಸಲ್ಯಾ ನಾಂವಾಂನಿ ಕೆಂಡ್ಲೆಂಯ್ ತಾಚೊ ಉಡಾಸ್ ಆಸ್ತಲೊ ತುಕಾ. ಆಜ್ ಹಾಂವೆಂ ಜೆಜುಚೆ ಮಾಯೆಚೆಂ ’ಮರಿಯೆಚೆಂ’ ನಾಂವ್ ಕಿತ್ಲ್ಯಾಗಿ ವರ್ಸಾಂ ಉಪ್ರಾಂತ್ ’ಮಾರಿಯಾಕ್’ ಆಪಂವ್ಚ್ಯಾ ನಿಬಾನ್ ಉಚಾರ್ಲೆಂ. ಪುಣ್ ತುವೆಂ ಮ್ಹಜ್ಯಾ ತೆವೀಸ್ ವರ್ಸಾಂನಿ ಏಕ್ ಖಣ್ ತೇರ್ಸ್ ಪುಣಿ ಶಿಕವ್ನ್ ’ತೆಂ ಪವಿತ್ರ್ ನಾಂವ್’ ಮ್ಹಜ್ಯಾ ತೊಂಡಾಂತ್ ಘೊಳಶೆಂ ಕೆಲ್ಲೆಂಯ್ವೆ? ಆಜ್ ಮ್ಹಾಕಾ ಮಾರಿಯಾನ್ ವೆಂಗುನ್, ಭುಜವ್ನ್, ಬರಿ ಬೂದ್ ಸಾಂಗ್ಲಿ ತಶೆಂ ತುವೆಂಯ್ ಕೆಲ್ಲೆಂಯ್ ಜಾಲ್ಯಾರ್ ಹಾಂವ್ ’ಪೋಲಿ’ ಜಾತೊಂವೇ? ತುವೆಂ ಆವಯ್ಪಣಾಚಿ ಕರ್ತಾವ್ಯಾಂ ಮ್ಹಜೆ ಥಂಯ್ ಪಾಳ್ಳ್ಯಾಂಯ್ ಮ್ಹಣ್ ಹ್ಯಾ ಜಮ್ಯಾ ಮುಕಾರ್ ರುಜು ಕರ್; ಮಾಗಿರ್ ಮಾರಿಯಾಕ್ ಹಾಂವ್ಚ್ ಭಾಯ್ರ್ ಧಾಡ್ತಾಂ ಕೆದೊಳ್ ಪರ್ಯಾಂತ್ ತುಂ ರುಜು ಕರುಂಕ್ ಸಕನಾಂಯ್ ತೆದೊಳ್ ಪರ್ಯಾಂತ್ ಅಮ್ಕಾಂ ಮೆಕ್ಳಾಂವ್ಚೊ ಅದಿಕಾರ್ ಕೊಣಾಕ್ಚ್ ನಾ."
ಸಿಸಿಲ್ಬಾಯ್ ಕದೆಲ್ ಪಳೆವ್ನ್ ತಾಚೆರ್ ಬಸ್ಲಿ ಆನಿ ರಡ್ಲಿ ಆಪ್ಲಿಂ ಪಾತ್ಕಾಂ ಒಳ್ಕೊನ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
