ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಆಧ್ಯಾತ್ಮಿಕ್ ಚಿಂತಾಪ್ ಖಂಚ್ಯಾಯ್ ಧರ್ಮಾಕ್ ಲಗ್ತಿ ಜಾಲ್ಲೆಂ ನ್ಹಯ್ ಪುಣ್ ಸರ್ವ್ ಧರ್ಮಾಂಚೆಂ ಮೂಳ್" - ಆವಾ
ಭಾವಾಡ್ತಾ ದಾಯ್ಜ್[ಕೊಂಕ್ಣೆಂತ್
ಮಾ|ಜೋರ್ಜ್ ಒಲಿವೆರಾಚಿ ವಳೊಕ್ ಚಡ್ತಾವಾಂಕ್ ಆಸ್ಚಿನಾ. ಸೆವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಹೊ ಪ್ರಸ್ತುತ್ ಕಾಪುಚಿನ್ ಮೆಳಾಚ್ಯಾ ಇಂಗ್ಲಿಶ್ ಪತ್ರಾಚೊ ಸಂಪಾದಕ್ ಜಾವ್ನಾಸಾ. ಸದ್ದ್ಯಾಕ್ ಮಯ್ಸೂರಾಂತ್ ಯಾಜಕೀ ಸೆವಾ ಭೆಟವ್ನ್ ಆಸ್ಚೊ ಹೊ ಏಕ್ ಕೊಂಕ್ಣಿ ಬರವ್ಪಿ, ಕವಿ ಆನಿ ಚಿಂತ್ಪಿ. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡ್ಲ್ಲೊ, ಹ್ಯಾ ಅಂಕಣಾಂತ್ ತವಳ್ ತವಳ್ ಆಧ್ಯಾತ್ಮಿಕ್ ಚಿಂತ್ಪಾಚ್ಯಾ/ಭಾವಾಡ್ತಾಕ್ ಲಗ್ತಿ ಜಾಲ್ಲ್ಯಾ ವಿಚಾರಾಂಕ್ ಆಟಾಪ್ಚಿಂ ಲೇಖನಾಂ ಬರಯ್ತಲೊ - ಪುಣ್ ಹೆಂ ಅಂಕಣ್ ಶೆರ್ಮಾಂವಾಂಚೆಂ ಭಿಲ್ಕುಲ್ ನ್ಹಯ್ ಮ್ಹಳ್ಳೆಂ ಆಧ್ಯಾತ್ಮಿಕ್ ಸಾಹಿತ್ಯಾಕ್ ವಳ್ಕತೆಲ್ಯಾಂಕ್ ಜರೂರ್ ಸಮ್ಜಾತೆಲೆಂ.]
ತುಮ್ಚಿಂ ಸವಾಲಾಂ/ವಿಚಾರ್ ಧಾಡುಂಕ್ ವಿಳಾಸ್: info@daaiz.com
ಮಾ|ಜೋರ್ಜ್ ಒಲಿವೆರಾ
ಪಾಕ್ಸ್ ಆಮೇರಿಕನಾ ಕ್ರಿಸ್ಮಸ್
ಪಾಕ್ಸ್ ಆಮೇರಿಕನಾ:-
ಲಾತ್ಯಾ ಬಾಶೆನ್ ’ಪಾಕ್ಸ್ ಕ್ರಿಸ್ತಿ’ ಮ್ಹಳ್ಳೊ ಸಬ್ದ್ ಆಸಾ. ಹಾಚೊ ಅರ್ಥ್ ಕ್ರಿಸ್ತಾಚೆ೦ ಶಾ೦ತಿ-ಸಮಾಧಾನ್. ಬೈಬಲ್ ಕಾಳಾರ್ ರೋಮನ್ ಚಕ್ರವರ್ತಿ ಚರಿತ್ರೆ೦ತ್ ಪ್ರಬಲ್ ಅಸ್ಚ್ಯಾ ಕಾಳಾರ್ ಪಾಕ್ಸ್ ರೋಮನಾ ಮ್ಹಳ್ಳೊ ಸಬ್ದ್ ಚಾಲು ಅಸ್ಲ್ಲೊ. ಹ್ಯಾ ಸಬ್ದಾಚೊ ಅರ್ಥ್: ತ್ಯಾ ಕಾಳಾರ್ ಸರ್ವ್ ಧರ್ಮ್, ಜಿಣ್ಯೆ-ರಿವಾಜ್, ಸ೦ಸ್ಕ್ರತಿ, ಬಾಸ್, ಸರ್ಕಾರ್ ರೋಮ್ ಚಕ್ರವರ್ತಿಕ್ ತಕ್ಲಿ ಬಾಗವ್ನ್ ಅಸ್ಲ್ಲೆ. ಕೊಣ್ ರೊಮಾಚೆ೦ ನೀತ್-ನಿಯಮ್ ಪಾಳ್ತಾಲೊ, ತಾ೦ಕಾ ಶಾ೦ತ್-ಸಮಾಧಾನ್ ಅಸ್ಲ್ಲೆ೦, ಹೆರಾ೦ಕ್ ತೆ೦ ನಾತ್ಲ್ಲೆ೦. ತ್ಯಾಚ್ ದೆಕುನ್ ಸುರ್ವಿಲ್ಲ್ಯಾ ಪವಿತ್ರ್ ಸಭೆಕ್ ಚರಿತ್ರೆಚ್ಯಾ ಪಯಿಲ್ಲ್ಯಾ ತೀನ್ ಶೆಕ್ಡ್ಯಾಂಕ್ ಜಾಯಿತ್ತೆ ಕಷ್ಠ್-ದಗ್ಧ್ ಸೊಸು೦ಕ್ ಮೆಳ್ಳೆ೦. ಅಜ್ಕಾಳ್ ಸ೦ಸಾರಾಚೆ೦ ನೀತ್-ನಿಯಮ್ ಪಾಕ್ಸ್-ಅಮೇರಿಕನಾಕ್ ಸರಿ ಕರ್ಯೆತ್. ಅಮೇರಿಕನ್ ಡೊಲರ್, ಅಮೇರಿಕನ್ ಸರ್ಕಾರ್, ಅಮೇರಿಕನ್ ಭಾಸ್, ಆಮೇರಿಕನ್ ಜಿಣ್ಯೆ-ಶೈಲಿ, ಆಮೇರಿಕನ್ ರಿತಿ-ರಿವಾಜಿ, ತೆ೦ ಕೊಣ್ ಪಾಳ್ತಾ, ತಾ೦ಕಾ ಸ೦ಸಾರಿ ಶಾ೦ತ್-ಸಮಾಧಾನ್ ಅಸಾ. ಅಶೆಂಯೀ ಏಕ್ ಪುರಾತನ್ ಗಾದ್ ಅಸಾ: ’ರೋಮಾ೦ತ್ ಜಿಯೆತಾನಾ ರೋಮನಾ ಪರಿ೦ ಜಿಯೆ.’ ಹಿ ಪುರಾತನ್ ಗಾದ್ ಅಜ್-ಕಾಳ್ ತೆಕಿದ್ ಹಾ೦ವೆ೦ ಘು೦ವ್ಡಾಯ್ಲಿ ತರ್ ತಿ ಹ್ಯಾ ಪರಿ೦ ಉದೆತಾ: ’ಆಮೇರಿಕನ್ ಸ೦ಸಾರಾ೦ತ್ ಅಸ್ತಾನಾ, ಅಮೇರಿಕನಾ ಪರಿ೦ ಜಿಯೆ.’ ಜರ್ಮನಿ೦ತ್ ತಾತ್ಕಾಳಿಕ್ ಯಾಜಕೀಯ್ ಸೆವಾ ಫಿರ್ಗಜಿಂನಿ ಅರ್ಪಿತಾನಾ, ಹಾ೦ವೆ೦ ಲ್ಹಾನ್ ಭುರ್ಗ್ಯಾಲಾಗಿ೦ ವಿಚಾರ್ಚೆ೦ ಅಸ್ಲ್ಲೆ: ರಜೆರ್ ತುಮಿ ಖ೦ಚ್ಯಾ ಜಾಗ್ಯಾಕ್ ವ್ಹಚೊ೦ಕ್ ಅಶೆತಾತ್, ಸಕ್ಟಾಚ್ ಜಾಪ್: ಆಮೇರಿಕಾ. ತಿ೦ ತಶೆ೦ ಜಾಪ್ ದಿತಾಲಿಂ ಮಾತ್ರ್ ನ್ಹಯ್, ಪುಣ್ ಅಮೇರಿಕಾ ವಚೊನ್ ಯೆತಾಲಿಂ. ತಾ೦ಚ್ಯಾ ದೃಷ್ಟೆನ್ ಆಮೇರಿಕಾ ಹ್ಯಾ ಸ೦ಸಾರಾಚೊ ಸರ್ಗ್.
ಆಮೇರಿಕನ್ ಕ್ರಿಸ್ಮಸ್ ಮೇಡ್ ಇನ್ ಚೈನಾ:-
ಆಮೇರಿಕನ್ ಕ್ರಿಸ್ಮಸ್ ಮೇಡ್ ಇನ್ ಚೈನಾ. ಆಮೇರಿಕನ್ ಕ್ರಿಸ್ಮಸ್ ಚೀನಾ ದೇಶಾ೦ತ್ ತಯಾರ್ ಜಾತಾ ಮ್ಹಣ್ ಸಾ೦ಗ್ಲ್ಯಾರ್ ತುಮ್ಕಾಂ ಅಜ್ಯಾಪ್ ಜಾ೦ವ್ಕ್ ಪುರೊ. ಪುಣ್ ಹೆ೦ ಶೆ೦ಬರ್ ಠಕ್ಕೆ೦ ಸತ್. ಕ್ರಿಸ್ಮಸ್ ಫೆಸ್ತಾ ವೆಳಾರ್ ವ್ಹಾಪಾರ್ಚಿ ನೆಕೆತ್ರಾ೦, ಡೆಕೊರೆಷನ್ ಕಾಗ್ದಾ೦, ಲೈಟಿ೦ಗ್ ಲ್ಯಾ೦ಪ್ಸ್, ಗರ್ಧಾನಾಚ್ಯಾ ಘೊಟ್ಯಾಚೆಂ ಸೆಟ್, ಕ್ರಿಸ್ಮಸ್ ಕಾರ್ಡಾ೦ ಸರ್ವ್ ಆಮೇರಿಕಾಕ್ ಚೀನಾ ಥಾವ್ನ್ ಯೆತಾತ್. ಹ್ಯೊ ಸ೦ಗ್ತಿ೦ ಅಮೇರಿಕಾ೦ತ್ ಕೆಲ್ಯಾರ್ ಕ್ರಿಸ್ಮಸ್ ಅಮೇರಿಕಾನ್ ಪರ್ಜೆಕ್ ಮಾರಗ್ ಜಾ೦ವ್ಕ್ ಅಸಾ. ಚೀನಾ ಅದಿಕೃತ್ ಕ್ರಿಸ್ಮಸ್ ಪೆಸ್ತ್ ಅಚರಣ್ ಕರಿನಾ ತರ್, ಅಮೇರಿಕನ್ ಡೊಲರಾಚೆರ್ ಪಾತ್ಯೆತಾ. ತ್ಯಾ ದೆಕುನ್ ಕ್ರಿಸ್ಮಸ್ ಫೆಸ್ತಾಚೆ ಸರ್ವ್ ವೊರ್ವಿ೦ ಥ೦ಯ್ಸರ್ ಉಣ್ಯಾ ದರಿರ್ ತಯಾರ್ ಕರುನ್ ಕ್ರಿಸ್ಮಸ್ ಪೆಸ್ತಾ ವೆಳಾರ್ ಅಮೇರಿಕಾಕ್ ಧಾಡ್ತಾತ್. ಜಾಗತೀಕರಣಾಚ್ಯಾ ಪರಿಸರಾ೦ತ್ ಅಮೇರಿಕಾಚೆ೦ ಕ್ರಿಸ್ಮಸ್ ಚೀನಿಕರಣ್!.
ಕ್ರಿಸ್ತ್ ಗ್ರಹಣ್ ಯಾ ಕ್ರಿಸ್ತೋತ್ಸವ್ 2007
ಹರ್ಯೆಕಾ ವರ್ಸಾ ಅಮಿ ಕ್ರಿಸ್ತಾ೦ವ್ ಕ್ರಿಸ್ಮಸ್ ಕ್ರಿಸ್ತೋತ್ಸವ್ ಅಚರಣ್ ಕರ್ತಾನಾ, ಸಭಾರ್ ಹೆರ್ ಕ್ರಿಸ್ ಗ್ರಹಣ್ ಅಚರಣ್ ಕರ್ತಾತ್. ಕ್ರಿಸ್ತ್ ಗ್ರಹಣ್ ಮ್ಹಳ್ಯಾರ್ ಕ್ರಿಸ್ತಾಕ್ ಸೊಡ್ಚೆ೦ ಅನಿ ಕ್ರಿಸ್ಮಸ್ ಅಚರಣ್ ಕರ್ಚೆ೦. ಕ್ರಿಸ್ಮಸ್ ರಿತಿ-ರಿವಾಜೆನಿ ಕ್ರಿಸ್ತ್ ನ೦ಪಯ್ಚ್ ಜಾತಾನಾ ಕ್ರಿಸ್ತ್ ಗ್ರಹಣ್ ಸುರು ಜಾತಾ. ಧ್ರಷ್ಠ್ರಾ೦ತಾಕ್: ಕ್ರಿಸ್ಮಸ್ ಕಾರ್ಡಾ೦ನಿ೦ ಕ್ರಿಸ್ತ್ ಜನನ್ ಘಟನ್ ಚಿತ್ರಣ್ ಸೊಡ್ನ್, ಹೆರ್ ಸರ್ವ್ ಸ೦ಗ್ತಿ೦ ಅಸಾ ಜಾಲ್ಯಾರ್ ತ್ಯಾ ಕಾರ್ಡಾ೦ನಿ ಕ್ರಿಸ್ತ್ ಗ್ರಹಣ್ ಸುರು ಜಾಲಾಂ. ಅಮ್ಚ್ಯಾ ಕ್ರಿಸ್ಮಸ್ ಶೊಪ್ಪಿ೦ಗಾ೦ತ್ ಕ್ರಿಸ್ತ್-ಜನನ್ ಮ್ಹತಿ೦ತ್ ಭಾಯ್ರ್ ಪಡೊನ್ ಹೆರ್ ಸರ್ವ್ ಸ೦ಗ್ತಿ೦ ಮ್ಹತಿ೦ತ್ ವಿರಾಜ್ ಕರ್ತಾನಾ, ಥ೦ಯ್ಸರ್ ಕ್ರಿಸ್ತ್-ಗ್ರಹಣ್ ಉದೆ೦ವ್ಚಿ ಖುಣಾ೦ ದಿಸೊನ್ ಯೆತಾತ್. ಕ್ರಿಸ್ತ್ ಜನಿತ್ ಸ್ಮರಣ್ ಏಕ್ ಸೆಕು೦ಡ್ ಉಡಾಸ್ ಹಾಡಿನಾಸ್ತಾನಾ, ಟಿ.ವಿ. ಕ್ರಿಸ್ಮಸ್ ಪ್ರೊಗ್ರ್ಯಾಮ್, ಕ್ರಿಸ್ಮಸ್ ಡ್ಯಾನ್ಸ್, ಕ್ರಿಸ್ಮಸ್ ಸ೦ಗೀತ್, ಕ್ರಿಸ್ಮಸ್ ಪಾರ್ಟಿ ಜಾಲ್ಯಾರ್ ಥ೦ಯ್ಸರ್ ಕ್ರಿಸ್ತೋತ್ಸವ್ ಜಾ೦ವ್ಚ್ಯಾ ಬದ್ಲಾಕ್ ಕ್ರಿಸ್ತ್-ಗ್ರಹಣ್ ಅಚರಣ್ ಜಾ೦ವ್ಚೆ೦ ಖಂಡಿತ್.
ಹ್ಯಾ ನವೆ೦ಬರಾ೦ತ್ ಬೆ೦ಗ್ಳೂರು ಶೆರಾ೦ತ್ ಸಗ್ಳಿ೦ ಕರ್ಣಾಟಕಾಚಿ ಕ್ರಿಸ್ತಾ೦ವ್ ಪರ್ಜೆಚೆ೦ ಭಿಸ್ಪ್ ಸಾಯ್ಬ್, ಯಾಜಕ್, ಧಾರ್ಮಿಕ್ ಬಾವ್ ಭಯ್ಣಿ, ಧಾರ್ಮಿಕ್ ವಡಿಲ್, ಅನಿ ಲಾಯಿಕ್ ಮುಖೆಲಿ ಲಾಗಿ೦ ಲಾಗಿ೦ ಏಕ್ ಹಜಾರ್ ಪ್ರತಿನಿಧಿ ತೀನ್ ದಿಸಾಂಚ್ಯಾ ಕ್ರಿಸ್ತೊತ್ಸವ್ ಸ೦ಭ್ರಮಾಕ್ ಹಾಜರ್ ಜಾಲೆ. ಕ್ರಿಸ್ತಾಚಿ ಕಥಾ ಕಸೆ೦ ಬಾವಾಡ್ತಾನ್ ಪಯಿಲ್ಲೆ ಅಪ್ಣಾಚ್ಯಾ ಜಿವಿತಾತ್ ಸ್ವೀಕಾರ್ ಕರುನ್ ಚಿ೦ತ್ನೆ೦-ಸಬ್ದಾನ್-ಕರ್ನೆನ್ ಜಿಯೆ೦ವ್ಚೆ೦ ಅನಿ ತಸೆ೦ಚ್ ಮ್ಹಜಿ ಜಾಲ್ಲಿ ತಿ ಅಮರ್ ಕಥಾ ಪೆಲ್ಯಾಚ್ಯಾ ಜಿವಿತಾತ್ ಅರ್ಥಾಭರಿತ್ ಥರಾನ್ ಕಸೆ೦ ವಾ೦ಟುನ್ ಘೆ೦ವ್ಚೆ೦, ಹ್ಯಾ ವಿಷ್ಯಾ೦ತ್ ಸ೦ವಾದ್ ಜಾಲೊ, ಅತಾ ತೊ ಉತ್ಸವ್ ದಿಯೆಸೆಜಿಚ್ಯಾ ಮಟ್ಟಾರ್, ತಸೆ೦ಚ್ ಫಿರ್ಗಜೆಚ್ಯಾ ಮಟ್ಟಾರ್ ಚಲೊ೦ಕ್ ಅಸಾ. ಹ್ಯಾ ವರ್ವಿ೦ ಥೊಡ್ಯಾ ತೆ೦ಪಾಕ್ ಪುಣೀಂ ಅಮ್ಚೆ೦ ಮದ್ಲೆ೦ ಕ್ರಿಸ್ತ್-ಗ್ರಹಣ್ ಮಾಯಾಗ್ ಜಾತೆಲೆ೦.
ಕ್ರಿಸ್ಮಸ್ ಪಾಪಾ:-
ಕ್ರಿಸ್ಮಸ್ ಫೆಸ್ತ್ ಮ್ಹಣ್ತಾನಾ ಸಕ್ಟಾ೦ಕೀ ಕ್ರಿಸ್ಮಸ್ ಪಾಪಾಚೊ ಉಡಾಸ್ ಯೆತಾತ್. ತ್ಯಾಚ್ ದೆಕುನ್ ಶೊಪ್ಪಿ೦ಗ್ ಮಾಲಾನಿ೦, ಸುಪರ್ ಮಾರ್ಕೆಟಿತ್ ಜಯ್ತ್ ಕ್ರಿಸ್ಮಸ್ ಪಾಪಾ ವಿಕ್ರಾಪಾಕ್ ಯೆ೦ವ್ಚ್ಯಾ ಲೋಕಾ೦ಕ್ ಸ್ವಾಗತ್ ಕರು೦ಕ್ ಹ್ಯಾ ದಿಸಾನಿ೦ ಮುಕಾರ್ ಯೆತಾ. ಎಕ್ಲ್ಯಾನ್ ತಾಚೆ೦ ಜಿವಿತ್ ತೀನ್ ಭಾಗಾನಿ೦ ವರ್ಣಿಲಾ. ಪಯ್ಲೆ೦: ಲಾನ್ ಅಸ್ತಾನಾ ಕ್ರಿಸ್ಮಸ್ ಪಾಪಾ ನೀಜ್ ಮ್ಹಣ್ ಪಾತ್ಯೆಲ್ಲೆ೦ ಜಿವಿತ್. ದುಸ್ರೆ೦: ವ್ಹಡ್ ಜಾತಾನಾ ಕ್ರಿಸ್ಮಸ್ ಪಾಪಾ ಸತ್ ನ್ಹಯ್ ಮ್ಹಣ್ ಮಾ೦ದುನ್ ಘೆತ್ಲ್ಲೆ೦ ಜಿವಿತ್. ತಿಸ್ರೆ೦: ಉತರ್ ಪ್ರಾಯೆರ್ ಅಪ್ಣೆಚ್ ಕ್ರಿಸ್ಮಸ್ ಪಾಪಾ ಜಾವ್ನ್ ಹೆರಾ೦ಕ್ ಸ೦ತೊಸ್ ದಿಲ್ಲೆ೦ ಜಿವಿತ್!
ತುಮ್ಕಾ ಭಾಗಿ ಸೊಮ್ಯಾ ಜೆಜುಚೆ೦ ಜನನಾಚೆ೦ ನತಾಲಾ ಫೆಸ್ತ್ ಅನಿ ಸ೦ತೊಸ್ಭರಿತ್ ನವೆ೦ ವರ್ಸ್ ಮಾಗ್ತಾಂ.
ಭಾವಾಡ್ತಾ ದಾಯ್ಜ್ 1: ಜಿವಿತಾ ಉಪ್ರಾಂತ್ ಜಿವಿತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
