ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್
[ಕೊಂಕ್ಣೆಂತ್ ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
20. “ಆಮ್ಚೊ ಲೇಕಕ್ ತಯಾರ್ ಜಾಲೊ?”
ಎಡ್ವಿನ್ ಜೆ.ಎಫ್.
ಮ್ಹಾಕಾ ಮಾಫ್ ಕರಾ, ಹೆ೦ ಸವಾಲ್ ಪರಿಹಾಸ್ಯಾಕ್ ಲಾಗೊನ್ ವಿಚಾರ್ಲ್ಲೆ೦ ನ್ಹಯ್. ತರಿ, ಹ್ಯಾ ಸವಲಾಕ್ “ವ್ಹಯ್” ಮ್ಹಣ್ ಕೋಣ್ಯಿ ಜಾಪ್ ದೀತ್ ತರ್ ತಿ ಜಾಪ್ ಮ್ಹಜ್ಯಾ ಪ್ರೇತನಾಚೆರ್ ಪರಿಹಾಸ್ಯ್ ಮ್ಹಣ್ ಹಾ೦ವ್ ಸಮ್ಜತೊಲೊ೦ ಆನಿ ಶಿಣ್ತೊಲೊ೦ ಕಿತ್ಯಾಕ್ ಹ್ಯಾ ವೀಸ್ ಕಿಸ್ತಾ೦ನಿ ಎಕಾ ಲೇಕಕಾಕ್ ತಯಾರ್ ಕರು೦ಕ್ ಮ್ಹಜ್ಯಾನ್ ಸಾದ್ಯ್ ನಾ. ಹ್ಯಾ ವೀಸ್ ಕಿಸ್ತಾ೦ನಿ ಹಾ೦ವೆ೦ ತುಮ್ಕಾ೦ ವೆವೆಗ್ಳೆ ಸುಚಾವ್ ದಿಲ್ಯಾತ್, ಹಾ೦ವೆ೦ ಸುಮಾರ್ ಚಾಳಿಸ್ ವರ್ಸಾ೦ಥಾವ್ನ್ ಕೊ೦ಕಣಿ ಲಿಕಿತಾ೦ಚಿ ಕೃಶಿ ಕರ್ತನಾ ಕಾಡ್ಲೆಲಿ೦ ಮೆಟಾ೦ ತುಮ್ಕಾ೦ ದಾಕಯ್ಲ್ಯಾ೦ತ್.
ಪುಣ್ ಎಕ್ ಲಿಕಿತ್/ಕಾದ೦ಬರಿ/ಕತಾ ಅಶಿಚ್ಚ್ ಜಾಯ್ಜೆ, ತಶಿಚ್ಚ್ ಜಾಯ್ಜೆ ಮ್ಹಳ್ಳೆ೦ ಕಸಲೆ೦ಚ್ ನೇಮ್ ಹಾ೦ವೆ೦ ತುಮ್ಚೆರ್ ದೆ೦ವ೦ವ್ಕ್ ನಾ. ಅಶೆ೦ ಕರ್ಚೆ೦ ಹಕ್ಕ್ಯಿ ಮ್ಹಾಕಾ ನಾ. ಅಶೆ೦ ಮ್ಹಣ್ತಾನಾ ಹಾ೦ವ್ ಮ್ಹಾಕಾಚ್ ಎಕ್ ಭದ್ರ್ ಕೊಟ್ಯಾ೦ತ್ ಫಿಚಾರ್ ಕರುನ್ ಮ್ಹಣಾನಾಕಿ ಹಾ೦ವ್ ಎಡ್ವಿನ್ ಜ಼ೆ.ಎಫ್.ಡಿಸೊಜಾ, ಫಾಮಾದ್ “ಸಾಹಿತಿ” ಮ್ಹಜ಼ೆಸರ್ಶಿ೦ ಯೆನಾಕಾತ್. ತುಮಿ೦ ಹ್ಯಾ ನೆಮಾಳ್ಯಾ ಮುಕಾ೦ತ್ರ್ ಮ್ಹಾಕಾ ಕೆದಳಾರಿ ಸ೦ಪರ್ಕ್ ಕರ್ಯೆತ್ ಆನಿ ಸಲಹಾ ಸುಚನಾ೦ ದಿವ್ಯೆತ್ ಯಾ ವಿಚಾರುಯೆತ್. ಬರವ್ಪ್ಯಾ೦ಚ್ಯಾ ಮೆಳಿ೦ತ್ ರಾವೊ೦ಕ್ ಜಾಯ್ ಆಸ್ಚೆ೦ ತೆ೦ ಶಿಕಪ್ ಮ್ಹಜ್ಯಾ ಮಟ್ಟಾಕ್ ಆಕೇರ್ ಜಾ೦ವ್ಕ್ ನಾ ಆನಿ ಸದಾ೦ನೀತ್ ಹಾ೦ವ್ ಕಾ೦ಯ್ ತರಿ ನವೆ೦ ಶಿಕೊನ್೦ಚ್ ಆಸಾ೦.
ನವೆ೦ ಶಿಕೊನ್೦ಚ್ ಆಸಾ೦ ಮ್ಹಣ್ತಾನಾ ಹ್ಯಾ ಪ್ರಗತಿಪರ್ ಸ೦ಸಾರಾ೦ತ್ ಸಾಹಿತ್ ರಚ್ತಾನಾ ತಾ೦ತ್ರಿಕತೆನ್ ಕೆಲ್ಲಿ ಪ್ರಗತಿ ಆಮಿ೦ ವಿಸರ್ಚಿ ನ್ಹಯ್. ದೆಕುನ್ ಹ್ಯಾ ನಿಮಾಣ್ಯಾ ಕಿಸ್ತಾ೦ತ್ ಹಾ೦ವೆ೦ ಸಾ೦ಗೊ೦ಕ್ ಸೊದ್ಚೆ೦ ಕಿತೆ೦ಗಿ ಮ್ಹಳ್ಯಾರ್ ಆಮ್ಚ್ಯಾ ಬರ್ಪಾ೦ನಿ ತಾ೦ತ್ರಿಕತೆಚೆ೦ ಮಟ್ಟ್ ಆಮಿ೦ ಸಾ೦ಬಾಳಿಜ಼ೆ ಯಾ ತೆ೦ ಅಪ್-ಟು-ಡೇಟ್ ಆಸಾಜ಼ೆ. ಎಕ್ ಸಾಹಸಿ ಕತಾ/ಕಾದ೦ಬರಿ ಲಿಕ್ಚಿ ತರ್ ತುಜ಼ೊ ಕತಾನಾಯಕ್/ಹೀರೊ ಅಪ್ರತಿಮ್ ಮ್ಹಣ್ ದಾಕ೦ವ್ಚೆ ಖಾತಿರ್ ತಾಚ್ಯಾ ಹಾತಾ೦ತ್ ತೀನ್ ನಳಿಯಾ೦ಚಿ ಡಬ್ಬಲ್ ಬೆರಲ್ ಗನ್ನ್ ದಿ೦ವ್ಚಿ ನ್ಹಯ್; ತೀನ್ ನಳಿಯೊ ಖ೦ಯ್, ಡಬ್ಬಲ್ ಬೆರೆಲಾ೦ ಖ೦ಯ್? ತರಿ, ಅಶೆ೦ ಎಕಾ ಕತೆ೦ತ್ ಛಾಪುನ್ ಆಯ್ಲಾ೦ ಮ್ಹಳ್ಯಾರ್ ತುಮಿ೦ ಕಿತೆ೦ ಮಣ್ಶಾತ್? ಪೋಯ್ರ್ಚ್ ಎಕಾ ವಾಚ್ಪ್ಯಾನ್ ಮ್ಹಾಕಾ ಸಾ೦ಗ್ಲೆ೦: ಎಕಾ ಸನ್ನಿವೆಶಾ೦ತ್ ಎಕ್ಲ್ಯಾಕ್ ‘ಪೇಜ಼ರಾ’ಚೆರ್ ಮೆಸೇಜ್ ಯೆತಾ ಅನಿ ತೊ ತಿ ವಾಚುನ್ ಆಪ್ಲ್ಯಾ ಸೆಲ್ಲ್ಪೋನಾಚೆರ್ (ಸೆಲ್ಲ್ಫೊನ್ ಸಾರ್ಕೊ ಸಬ್ದ್. ಹೆ೦ ಮೊಬಾಯ್ಲ್ ಖ೦ಯ್ಥಾವ್ನ್ ಆಯ್ಲೆ೦ ಹಾ೦ವ್ ನೆಣಾ೦) ಜಾಪ್ ದಿತಾ. ಹೆ೦ ಕಸಲೆ೦ ನವಾಲ್. ಸೆಲ್ಲ್ಫೊನ್ ಆಸ್ಲ್ಲ್ಯಾಕ್ ಪೇಜ಼ರ್ ಕಿತ್ಯಾಕ್? ಹೊ ಮನಿಸ್ ತಿತ್ಲೊಯಿ ಅಪ್ರತಿಮ್ ಪತ್ತೇದಾರ್/ಗೂಡಚಾರಿ?
ಹರ್ಯೆಕಾ ಸನ್ನಿವೆಶಾ೦ತ್ ತಾ೦ತ್ರಿಕತಾ ಮಜ಼್ಬೂತ್ ಆಸಾಜ಼ೆ. ಕೋರ್ಟ್ರೂಮ್ ದೃಶ್ ವಿವರಿತಾನಾ ಕೋರ್ಟ್ ಕಸೊ ಆಸ್ತಾ ಮ್ಹಣ್ ಪಳೆನಾಸ್ತಾ೦ ನಾಕಾ ಜಾಲ್ಲೆ೦ ಬರವ್ನ್ ಘಾಲ್ಚೆ೦ ಹಾಸ್ಯಾಸ್ಪದ್. ಆಮ್ಚ್ಯಾ ಸಿನೆಮಾ೦ನಿ ಕೋರ್ಟ್ರೂಮ್ ದೃಶಾ೦ಚ್ಯಾಕಿ ಹಾಸ್ಯಾಸ್ಪದ್ ದೃಶಾ೦ ಹೆರ್ನಾ೦ತ್. ಆಮಿ೦ಯಿ ತಸಲ್ಯಾ ದೃಶಾ೦ಚೆ೦ ನಕಲ್ ಕಾಡ್ಚೆ೦ ನಾಕಾ.
ಲಡಾಯ್/ಮಾರಾಮಾರೆಚಿ ದೃಶಾ೦: ಹಿ ಜ಼ೇಮ್ಸ್ ಬೊ೦ಡ್ ಫಿಲ್ಮಾ ಆಯ್ಲ್ಯಾ ಉಪ್ರಾ೦ತ್ ಆಮ್ಚೊ ಹರ್ಯೆಕ್ ಹೀರೊ ಜ಼ೂಡೊ/ಕ೦ಗ್ಫೂ/ಕರಾಟೆ ಆನಿ ಹೆರ್ ಸರ್ವ್ ಮಾರ್ಶಲ್ ಕಲೆ೦ನಿ ಪರಿಣತ್ ಪುಣ್ ಲಡಾಯ್ ಜಾತಾನಾ ಆಮ್ಚ್ಯಾ ಹೀರೊ೦ನಿ ಮಾರ್ಚೆ೦ ಎಕ್ ‘ಗಿಲೆಟಿನ್ ಚೊಪ್’ ಮಾತ್ರ್. ದೆ|ವಿಜ಼ೆಪಿ ಆಪ್ಲ್ಯಾ ಕಾದ೦ಬರಿಯೆ೦ನಿ ಲಡಾಯ್/ಮಾರಾಮಾರೆಚಿ ಸಬಾರ್ ಸನ್ನಿವೆಶಾ೦ ಹಾಡ್ತಾಲೊ. ತಾಚ್ಯಾ ಚಾರಿತ್ರಿಕ್ ಕಾದ೦ಬರಿಯೆ೦ನಿ ಯೆ೦ವ್ಚೆ೦ ತಲ್ವಾರ್ ಫಾಯ್ಟ್ ಮಿರ್ಮಿರೆ೦. ಹಾ೦ವೆ೦ ತಾಚೆಲಾಗಿ೦ ಎಕ್ ಪಾವ್ಟಿ೦ ವಿಚಾರ್ಲೆ೦, “ತು೦ ಫ಼ೆನ್ಸಿ೦ಗ್ ಕೆದಳಾ ಶಿಕ್ಲೊಯ್?” ತಾಣೆ ಮ್ಹಾಕಾ ಜಾಪ್ ದಿಲಿ, “ರಫಾಯೆಲ್ ಸಾಬಾಟಿನಿನ್ ಮ್ಹಾಕಾ ಶಿಕಯ್ಲೆ೦.” ಸಾಬಾಟಿನಿ (ದಿ ಬ್ಲ್ಯಾಕ್ ಸ್ವೊನ್, ಕ್ಯಾಪ್ಟನ್ ಬ್ಲಡ್, ಫ಼ೊರ್ಚುನ್ಸ್ ಫ಼ೂಲ್) ಎಕ್ ಪ್ರಕ್ಯಾತಿ ಬರವ್ಪಿ ಆನಿ ಹಾಚ್ಯಾ ಕಾದ೦ಬರಿ೦ನಿ ದರ್ಯಾ ಚೊರಾ೦ಚಿ೦ ಆನಿ ತಾ೦ಕಾ೦ ಪಾಡಾವ್ ಕರ್ತೆಲ್ಯಾ೦ಚಿ ಸಾಹಸಾ೦ ಖೂಬ್ ಆಸಾತ್. ಫ಼ೆನ್ಸಿ೦ಗ್ ಯಾ ತಲ್ವಾರ್ ಫ಼ಾಯ್ಟಾಚೆ ಸುಲುಸ್ ಸಬಾಟಿನಿಚ್ಯಾ ಬರ್ಪಾ೦ಥಾವ್ನ್ ವಿಜ಼ೆಪಿ ಜಾಣಾ೦ ಜಾಲಾ ಆನಿ ತಾಣೆ ಆಪ್ಲ್ಯಾ ಕಾದ೦ಬರಿ೦ನಿ ಹಿ ಜಾಣ್ವಾಯ್ ವಾಪರ್ಲ್ಯಾ ತರ್ ಹೆ೦ ನಕ್ಕಲ್ ಜಾತಾ ಮ್ಹಣ್ ತುಮಿ೦ ಚಿ೦ತಿನಾಕಾತ್. ಸದಾ೦ ಪ್ರಕ್ಯಾತ್ “ಟಾರ್ಜನ್” ಕತಾ ಲಿಕ್ಲ್ಲೊ ಎಡ್ಗರ್ ರಾಯ್ಸ್ ಬರ್ರೊವ್ಸ್ ತಾಚೆ ಜಿಣಿಯೆ೦ತ್ ಆಫ್ರಿಕಾಚ್ಯಾ ರಾನಾ೦-ಮೊಳ್ಯಾ೦ನಿ ರಿಗೊ೦ಕ್ ನಾ ಮ್ಹಳ್ಯಾರ್ ತುಮ್ಕಾ೦ ಅಜ್ಯಾಪ್ ಜಾತೆಲೆ೦ಚ್. ತರ್ ವಿಜ಼ೆಪಿ-ನ್ ತಲ್ವಾರ್ ಹಾತಾ೦ತ್ ಧರಿಜ಼ೆ ಮ್ಹಳ್ಳಿ ಗರ್ಜ್ ಮ್ಹಾಕಾ ದಿಸನಾ!
ಸಾಹಿತ್ ರಚ್ತಾನ ಮಾಹೆತ್ ಯೆಕ್ಟಾ೦ಯ್ ಕರ್ಚಿ ಬೋವ್ ಗರ್ಜೆಚಿ. ಸುಮಾರ್ ವರ್ಸಾ೦ ಆದಿ೦ ಹಾ೦ವೆ೦ “ತೆ ಆಯ್ಲ್ಯಾತ್” ಮ್ಹಳ್ಳಿ ವಯ್ಜ್ನಾನಿಕ್ ಕಾದ೦ಬರಿ ಲಿಕ್ಲಿ ಆನಿ ತಿ ಹ್ಯಾಚ್ ನೆಮಾಳ್ಯಾರ್ ಪ್ರಗಟ್ ಜಾಲ್ಲಿ. ಪುಣ್ ಹ್ಯಾ ‘ಫ್ಲಾಯಿ೦ಗ್ ಸೊಸರ್’ ವಿಶಯಾಚೆರ್ ಮಾಹೆತ್ ಯೆಕ್ಟಾ೦ಯ್ ಕರು೦ಕ್ ಮ್ಹಾಕಾ ಸುಮಾರ್ ತೆರಾ ವರ್ಸಾ೦ ಲಾಗ್ಲ್ಯಾ೦ತ್ ಮ್ಹಣ್ ಹಾ೦ವೆ೦ ಸಾ೦ಗಾಜೆ. ತರಿ, ಹಿ ಕಾದ೦ಬರಿ ಲಿಕುನ್ ತಿ ಸಾ೦ಕ್ಳೇಕ್ರಮಾರ್ ಯೆತಾನಾ ಮ್ಹಾಕಾ ‘ಗುಡುಗುಡು’ ಜಾತಾಲೆ೦, ಖ೦ಯ್ತರಿ ಮ್ಹಜೆ೦ ‘ರಿಸರ್ಚ್’ ನಿಸರ್ಲಾ೦ಗಿ ಮ್ಹಣ್. ವಿಜ್ಞಾನ್ ಹರ್ಯೆಕಾ ಖಿಣಾನ್/ಖಿಣಾಕ್ ಪ್ರಗತಿಪರ್ ದೆಕುನ್.
ತುಮ್ಚ್ಯಾ ಬರ್ಪಾ೦ಕ್ ವಿಶಯ್ ವಿ೦ಚ್ತಾನಾ ಸಾದ್ಯಾ ವಿಶಯಾ೦ಥಾವ್ನ್೦ಚ್ ಸುರು ಕರಾ ಪುಣ್ ಹ್ಯಾ ಸಾದ್ಯಾ ವಿಶಯಾಚೆರ್ ಜಾತಾತಿತ್ಲಿ ಮಾಹೆತ್ ಆರಾಯಾ. ಮಾಹೆತ್ ಫಕತ್ ತುಮಿ೦ ರಚು೦ಕ್ ಆಸ್ಚೆ ಪಾತ್ರ್ ಜಿಯೆವ್ನ್ ತುಮ್ಕಾ೦ ಮೆಳಾಜೆ ಮ್ಹಣ್ ನಾ. ಸದ್ದಾಮಾಚೊ ಪಾತ್ರ್ ತುಮಿ೦ ಹಾಡ್ತಾತ್ ತರ್ ತುಮಿ೦ ಸದ್ದಾಮ್ ಜಾಯ್ಜೆ ಮ್ಹಣ್ ನಾ ಪುಣ್ ತಾಚ್ಯಾ ವಿಶಾ೦ತ್ ಜಾತಾತಿತ್ಲೆ೦ ಜಾಣಾ೦ ಜಾ೦ವ್ಚಿ ಗರ್ಜ್. ಆನಿ ಹಿ ಗರ್ಜ್ ಆತಾ೦ಚಿ ಮಾದ್ಯಮಾ೦ ಪೂರ್ಣ್ ಕರು೦ಕ್ ಸಕ್ತಾತ್. ಗೃ೦ತಾ೦, ಪತ್ರಾ೦, ನೆಮಾಳಿ೦ ಆನಿ ಇ೦ಟ್ರ್ನೆಟ್ಟ್ ಕಿತ್ಲ್ಯಾ ಆನಿ ಕಸಲ್ಯಾ ರಿತಿರ್ ಆಮ್ಕಾ೦ ಉಪ್ಕಾರಾಚಿ೦ ಮ್ಹಳ್ಳೆ೦ ತಿ೦ ವಾಪರ್ಲ್ಯಾ ಉಪ್ರಾ೦ತ್ಚ್ ಕಳಿತ್ ಜಾತಾ. ಹಾ೦ಚೊ ಬರ್ಫೂರ್ ಫಾಯ್ದೊ ಜೊಡಾ, ಸುಶಿಕ್ಶಿತ್ ಜಾಯಾ, ಚಿ೦ತಪ್ ಚಾಲು ಕರಾ. ಚಿ೦ತ್ನೆನ್, ಸಬ್ದಾನ್ ಆನಿ ಬರ್ಪಾನ್ ತುಮ್ಕಾ೦ ಯೆಸ್ ಲಾಬೊ೦!
[ಹಾಂಗಾಸರ್ ಹೆಂ ಅಂಕಣ್ ಸಂಪ್ತಾ - ಥೊಡ್ಯಾ ತಾಂತ್ರಿಕ್ ಕಾರಣಾಂಕ್ ಲಾಗೊನ್ ಹ್ಯಾ ಅಂಕಣಾಚೆ ಹರ್ಯೆಕ್ ಆಂಕ್ಡೆ ವೆಳಾರ್ ಆಮಿ ಪರ್ಗಟುಂಕ್ ಸಕೊಂಕ್ ನಾತ್ಲ್ಲ್ಯಾಕ್ ಆಮಿ ಪಶ್ಚಾತಾಪ್ ಪಾವ್ತಾಂವ್. ಹೆಂ ಅಂಕಣ್ ದಾಯ್ಜ್ ವಾಚ್ಪ್ಯಾಂಕ್ ಫಾವೊ ಕೆಲ್ಲ್ಯಾ ಮಾನೆಸ್ತ್ ಎಡ್ವಿನ್ ಜೆ. ಎಫ್. ಡಿ’ಸೋಜಾಕ್ ದೇವ್ ಬರೆಂ ಕರುಂ. - ಸಂ.]
ಆಧ್ಲೆ ಅಂಕ್ಡೆ: 1,2,3,4,5,6,7,8,9,10,11,12,13,14,15,16,17,18,19
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
